གཡུ་སྙིང་པདྨ་རྣམ་པར་བཀྲ་བའི་གནས་ཡིག་འབྲིང་པོ་དད་ལྡན་ཡིད་ལ་དགའ་སྐྱེད། མཁན་སྨན་བླས་བསྒྲིགས།
བླ་མ་དང་མགོན་པོ་འཇམ་དཔལ་དབྱངས་ལ་ཕྱག་འཚལ་ལོ། །
དྲི་མེད་འོ་མཚོ་ལས་འཁྲུངས་མཚོ་སྐྱེས་རྗེ། །
གང་གི་རྣམ་འཕྲུལ་གཏེར་ཆེན་ལུང་རིག་གླིང་། །
དེ་ཡི་ཐུགས་སྲས་འགྱུར་མེད་བློ་མཐའ་ཡས། །
བརྒྱུད་པར་བཅས་ལ་ཕྱག་འཚལ་དགེ་ལེགས་སྩོལ། །
སྦས་ཡུལ་པདྨ་བཀྲ་བ་ཐུགས་ཀྱི་གནས། །
གཡུ་སྙིང་དགྲ་བླ་མི་མགོན་དཀར་པོའི་མདུན། །
སྔོན་དུས་འཛམ་གླིང་གེ་སར་རྒྱལ་པོ་ཡིས། །
སྒེགས་ཀྱི་ཙཱི་ནའི་རྒྱལ་པོ་དབང་བསྡུའི་སྐབས། །
སྤྱི་དཔོན་ཁྲ་རྒན་སྐུ་མཚམས་བཞུགས་པའི་རྟགས། །
ལྷ་མདའ་བདུན་སྒྲིག་ལྗོན་ཤིང་ངོ་མཚར་ཡོད། །
བར་དུ་གཏེར་ཆེན་ལུང་རིག་གླིང་པ་ཡིས། །
དགོངས་གཏེར་ནམ་མཁའ་མཛོད་ཀྱི་ཆོས་སྡེ་རྣམས། །
ལེགས་པར་ཕབས་པའི་གཏེར་གནས་རྨད་བྱུང་ལགས། །
ཆོས་བདག་ཧོར་བླ་གཞན་ཕན་དེ་ཡང་བཞུགས། །
དེ་རྗེས་རྒྱ་དབོན་ལྷ་མོ་ཚེ་རིང་གིས། །
སྒྲུབ་གནས་འདི་ཡི་གནས་སྒོ་ཕྱེས་ནས་སུ། །
འགྲོ་བ་རྣམས་ལ་ཕན་བདེའི་ལེགས་ལམ་བསྟན། །
གནས་འདིའི་ཡོན་ཏན་བསམ་མི་ཁྱབ་མཆིས་ཀྱང་། །
མདོར་ན་གནས་འདིར་དགེ་སྒྲུབ་ཆེ་ཕྲ་གང་། །
ཅི་བྱས་འབུམ་འགྱུར་ཡིན་ཅིང་ཚེ་འདིར་བདེ། །
ཕྱི་མ་ཐར་པའི་ལམ་སྣ་ཟིན་ཅེས་གསུངས། །
༈ ཁྱད་པར་ཨོ་རྒྱན་གནས་དང་བདེ་ཆེན་ཞིང་། །
དཔའ་བོ་མཁའ་འགྲོའི་གནས་ཡུལ་ཐམས་ཅད་དང་། །
ལྷོ་རྒྱལ་འཛམ་བུ་གླིང་གི་གནས་ཡུལ་ཀུན། །
འདིར་འདུས་དུས་ནི་ཤིང་མོ་གླང་གི་ལོའི། །
ཧོར་ཟླ་བཅུ་པའི་ཚེས་བཅུ་ནས་བཟུང་སྟེ། །
མེ་སྟག་ཟླ་བ་བཅུ་པའི་གནམ་སྟོང་བར། །
བྱིན་རླབས་དངོས་གྲུབ་ཐམས་ཅད་ཅད་འདུ་བར་ངེས། །
བསྐོར་ཚུལ་གསུམ་གྱི་དང་པོ་ནང་སྐོར་ནི། །
རི་ཁྲོད་འདི་ནས་དགོན་ཤར་ནང་བརྒྱུད་དེ། །
དགོན་པའི་ནུབ་ནས་གཡུ་མཁར་ཐང་བརྒྱུད་ཅིང། །
ཨ་ར་པ་ཙ་བསྐོར་ནས་དུར་ཁྲོད་ཀྱི། །
སྨད་ནས་ཡར་འཁོར་ཡར་ལ་འོང་བའི་ལམ། །
མཁའ་འགྲོའི་ཚོགས་གཞོང་ནུ་ཚོགས་རང་བྱུང་དང། །
རྡོ་རྗེ་ཕག་མོ་གཤིན་རྗེའི་ཞལ་དང་ནི། །
ཕུར་བུ་ཧོམ་ཁུང་རང་བྱུང་བསྐོར་ནས་ཡར། །
ཆུ་དཀར་ཁོག་བརྒྱུད་བྲག་སྣའི་ཡར་ཁ་ཡི། །
མཎྚལ་ཐང་ན་གུ་རུའི་ཞབས་རྗེས་ཡོད། །
རྡོ་དཀར་ཚོམ་བུ་རྣམས་ལ་ཁ་གསོ་གྱིས། །
ཤར་ལྷོ་དཀྱིལ་འཁོར་ཐང་ནས་འཕྲེད་ལམ་བགྲོད། །
གྲུབ་ཆུ་བསྐོར་འཐུང་བྱས་ནས་ཀུན་མཁྱེན་གྱི། །
རི་ཁྲོད་བརྒྱུད་དེ་འདི་རུ་སླེབས་པ་ནི། །
ནང་སྐོར་རྒྱས་པ་ཞིག་གི་ལམ་ཡིན་གསུངས། །
ཡིག་བརྒྱ་དུང་ཕྱུར་བཅུ་བཏོན་ཕན་ཡོན་ཡོད། །
བར་སྐོར་ཡོལ་རི་ནས་བརྒྱུད་གཡུ་སྙིང་རི། །
ནང་དུ་བཞག་ནས་ཚྭ་དང་མཁར་འདུས་བསྐོར། །
ཡིག་བརྒྱ་དུང་ཕྱུར་ཉི་ཤུའི་ཕན་ཡོན་འཐོབ། །
ཕྱིི་སྐོར་ཡོལ་རི་ནང་བཞག་ཤིང་སྐམ་ལ། །
བརྒྱུད་ནས་ལྡོང་རི་འཁྱིལ་ཆེན་ཁོག་ནས་ཡར། །
གནས་ལུང་གདུག་ཆེན་ནང་བཞག་གཡུ་སྙིང་བར། །
ཕན་ཡོན་ཡིག་བརྒྱ་དུང་ཕྱུར་སུམ་ཅུ་ཐོབ། །
མི་བདེན་སྙམ་པའི་ལོག་ལྟ་ཡོད་པ་དང་། །
ཨེ་བདེན་སྙམ་པའི་ཐེ་ཚོམ་ཡོད་གྱུར་ན། །
རྐང་པ་ལ་ནི་སྡུག་བསྔལ་གཏད་པའི་སྟེང་། །
རྣམ་པར་སྨིན་པ་བཟང་པོ་མྱོང་མི་འགྱུར། །
དཔལ་མགོན་འཕགས་པ་ཀླུ་སྒྲུབ་ཞལ་སྔ་ནས། །
གང་ཟག་ལོག་པར་ལྟ་བས་ལེགས་སྤྱད་ཀྱང་། །
དེ་ཡི་རྣམ་པར་སྨིན་པ་མི་བཟད་ལྡན། །
ཞེས་གསུངས་ཕྱིར་ན་ལོག་ལྟ་ཐེ་ཚོམ་སྤོངས། །
དུང་ཕྱུར་མང་པོའི་དགེ་བ་འབྱུང་དཀའ་བས། །
དད་དང་དག་སྣང་བྱེད་པ་གལ་ཆེའོ། །
དད་དང་དག་སྣང་ལྡན་པའི་གང་ཟག་ལ། །
གོང་བཤད་ཕན་ཡོན་ཐོབ་ལ་བསླུ་བ་མེད། །
འོན་ཀྱང་གནས་ལ་མོས་པའང་འབྲས་བུ་ཆེ། །
གནས་འབྲེལ་ཐོབ་ཚད་ཚེ་འདིའི་བར་ཆད་ཞི། །
ཕྱི་མ་བདེ་ནས་བདེ་བར་འགྲོ་ཞེས་གསུངས། །
ཡི་གེ་པ་ནི་འཇིགས་མེད་ཚུལ་ཁྲིམས་ཀྱིས། །
གཡུ་སྙིང་རི་ཁྲོད་བླ་མའི་བཀའ་བཞིན་བྲིས། །
དགེ་བས་འགྲོ་རྣམས་སངས་རྒྱས་ཐོབ་པར་ཤོག །
རྒྱ་ལྷས་མཛད་པའི་གནས་ཡིག་འདི་ནི་དུས་འགྱུར་སྐབས་གཏོར་བརླག་ཏུ་གྱུར་པ་མཁན་དོན་ཚེ་དང་དབུ་གཟུངས་ཐོ་གཉིས་ཀྱི་ཐུགས་ལ་རགས་ཙམ་བཞུགས་པ་ལ་གཞི་བྱས་ནས་སྨན་བླས་བསྒྲིགས་སྤེལ་བགྱིས་པ་དགེ་ལེགས་འཕེལ། །