ཏཱ་རེའི་གནས་ཀྱི་ལུང་བྱང་མདོར་བསྡུས། རྒྱ་སྤྲུལ་ལུང་རིག་གླིང་པ།
ཁྱད་པར་བོད་སྐྱོང་དགེ་བསྙེན་ཉེར་གཅིག་གིཿ
ནང་ཚན་དགེ་བསྙེན་རྡོ་རྗེ་གཡུ་ཁྲོམ་གྱིཿ
གཡས་ཕྱོགས་ཏཱ་རེ་མི་འགྱུར་དགའ་བའི་ཚལཿ
སྔོན་ཚེ་ལོ་ཙ་བཻ་རོ་ཙ་ན་དང་ཿ
སློབ་དཔོན་ཆེན་པོ་པདྨ་ཀཱ་ར་ཡིསཿ
ཟབ་གཏེར་ཉེར་བདུན་སྦས་ཤིང་གནས་བདག་ནིཿ
རྡོ་རྗེ་ཐོག་མེད་རྩལ་དང་ཀླུ་རྒྱལ་ནིཿ
ཟླ་བའི་ཟུར་ཕུད་ཅན་གཉིས་སྲུང་མར་བསྐོསཿ
མ་འོངས་འབྱུང་འགྱུར་ལུང་དང་བཅས་པ་ནིཿ
ཤེལ་ཕུག་ཁྱུང་ཆེན་བྲག་ལ་གཏེར་དུ་སྦསཿ
གྲུབ་བརྙེས་མང་པོ་འོད་སྐུར་གྲོལ་བའི་གནསཿ
ཕྱག་ཆེན་ལུང་པར་དུང་སེང་འགྱིང་འདྲའི་བྲགཿ
བཻཌཱུར་མདོག་འདྲ་ཧཱུྃ་ཡིག་གསལ་བ་དེརཿ
རྫོགས་ཆེན་སྡེ་གསུམ་ཀློང་དགུའི་སྐོར་རྣམས་ཡོདཿ
འཕགས་མའི་རི་ལ་མ་རྒྱུད་མཁའ་འགྲོ་ཡིཿ
སྒྲུབ་ཐབས་ཕྱི་ནང་གསང་སྐོར་དུ་མ་ཡོདཿ
ཀེའུ་ཚང་བྲག་ལ་གུ་རུའི་སྒྲུབ་སྐོར་དངཿ
སྐུ་བརྙན་བུ་ཆུང་ལོ་གསུམ་ཙམ་ཞིག་ནིཿ
རྡོ་དཀར་ལས་གྲུབ་ངོ་མཚར་ལྡན་པ་ཡོདཿ
དགེ་རྒྱས་ལུང་པར་རིགས་གསུམ་སྒྲུབ་སྐོར་དངཿ
སྐུ་དང་ཕྱག་མཚན་ཡ་མཚན་ཆེ་བ་ཡོདཿ
མདོར་ན་ཕྱི་སྐོར་རྟ་པའི་ཞག་བཅུ་གསུམཿ
གསང་སྐོར་ཞག་བདུན་ནང་གི་སྐོར་ཚད་ནིཿ
རྒྱང་གྲགས་བཅོ་བརྒྱད་ཡང་གསང་སྐོར་བའི་ཚདཿ
རྒྱང་གྲགས་བརྒྱད་ཡིན་ཕན་ཡོན་རང་བྱུང་སོགསཿ
མིང་ཅན་གཅིག་གིས་གསལ་བར་སྟོནཿ
གུ་ཧྱཿ རྒྱ་སྤྲུལ་པས་སོ