ཏཱ་རེའི་གནས་ཡིག་བདེ་ཆེན་བགྲོད་པའི་ལམ་བཟང་མ་རིག་མུན་སེལ། ཧོར་བླ་གཞན་ཕན་བཟང་པོ།
ཏཱ་རེའི་གནས་ཡིག་བདེ་ཆེན་བགྲོད་པའི་ལམ་བཟང་མ་རིག་མུན་སེལ་ཞེས་བྱ་བ་བཞུགས༔
ཕུན་ཚོགས་ཕན་བདེའི་བྱེད་པོ་བླ་ན་མེད༔
སྲིད་པའི་ལམ་དུབ་མགྲོན་པོ་དབུགས་དབྱུང་མཁན༔
མཁས་གྲུབ་བྱེ་བའི་གཙུག་གི་རྒྱན་གཅིག་པུ༔
ལྷ་མིའི་བླ་མ་མཚོ་སྐྱེས་རྡོ་རྗེ་རྒྱལ༔
རྟེན་འབྱུང་བསླུ་མེད་རྟེན་འབྲེལ་ཟབ་མོ་ཡི༔
བདེན་མཐུ་བསླུ་མེད་གངས་ཅན་བོད་དུ་གྲགས༔
ཐུབ་པའི་ཞལ་སྐྱིན་པད་འབྱུང་རིགས་གསུམ་གྱི༔
གདུལ་ཞིང་ཁྱད་འཕགས་དབུས་གཙང་མདོ་སྒང་དྲུག༔
བྱེ་བྲག་རོང་ཆེན་བཞི་ཞེས་འབྱུང་བ་ལས༔
རྒྱལ་མོ་རོང་གི་གནས་བདག་མུ་རྡོ་ཡི༔
ཉེར་གནས་གནས་ཆེན་བརྒྱ་དང་གནས་ཕྲན་སྟོང༔
པད་འབྱུང་རྗེ་འབངས་གྲོགས་ཀྱི་བྱིན་རླབས་ཆུས༔
ལེགས་བྲན་སྙིགས་དུས་རྒུད་པ་ཞི་བའི་ཆེད༔
གཏེར་སྟོན་ལུང་སྟོན་གནས་སྒོ་འབྱེད་པའི་དུས༔
ལེགས་པར་གདམས་པའི་ནང་ཚན་གངྒ་ཡི༔
མིང་གི་ཟུར་ཆགས་བྱང་ཤར་ཏཱ་རེའི་གནས༔
རྟེན་འབྲེལ་འཕྲོ་ཅན་རྟ་སྦྲུལ་ལོ་ཤར་དུས༔
ཊཱཀྐིའི་བརྡ་དང་གནས་བདག་ཆོས་དབང་ཚོས༔
བསྐུལ་བའི་ལུང་བྱང་སྙིང་ལ་ཤར་བ་ལསཿ
རེ་ཞིག་དང་ལེན་དབེན་པའི་ལེ་ལོའི་སྐབས༔
ཉིང་འཁྲུལ་རྨི་ལམ་གསལ་བའི་གོ་འབྱེད་དུས༔
ལྷ་དང་བླ་མས་ཞལ་གཟིགས་ལུང་བསྟན་ནས༔
ཐ་མའི་རྟེན་འབྲེལ་འཕྲོ་ཅན་གྱུར་པ་ལ༔
ཕྱིར་བཤོལ་བདུད་ཀྱི་དབང་དུ་ལུས་པ་ན༔
ཊཱཀྐིའི་བཀའ་ཆད་འགྲོ་དོན་སྒོ་འགགས་པས༔
ད་ལྟ་རིང་མིན་གནས་ལ་དབུགས་དབྱུང་མཛོད༔
པདྨ་བཀོད་དང་སྦས་གནས་འབྲས་ལྗོངས་ཀྱི༔
གནས་སྒོ་འབྱེད་ལ་ཉེ་བའི་དུས་རྟགས་ཡིན༔
སྒྲོལ་མའི་གནས་ཀྱི་ཡོན་ཏན་བརྗོད་མི་ལང༔
རྟེན་འབྲེལ་མདོར་བསྡུས་འདི་རུ་ལེགས་བརྗོད་གསོན༔
ནོར་བུའི་རི་ལ་ལྷ་མོ་རྣམ་གསུམ་བཞུགས༔
སྐུ་རྟེན་གསུང་ཡིག་ཐུགས་རྟེན་ཕྱག་མཚན་སོགས༔
གང་ཟག་དབང་པོའི་ཁམས་བཞིན་བསམ་ཡས་མཐོང༔
དཔལ་གྱི་རི་ལ་སྐུ་གསུམ་ཕོ་བྲང་དང༔
ཐོད་ཕྲེང་རིགས་ལྔའི་སྒྲུབ་ཕུག་བྱིན་ལྡན་ཡོད༔
འཇམ་སྐུ་ཕྱག་མཚན་ཆོས་འབྱུང་འབུར་དུ་དོད༔
ཨ་ར་པ་ཙ་ལ་སོགས་དུ་མ་མངོན༔
བཻ་རོའི་དབུ་ཞྭ་མཐོང་བ་དོན་ལྡན་དང༔
སྐུ་རྗེས་དང་ནི་ལྷ་ལམ་བགྲོད་ཐེམ་སྐས༔
པད་འདབ་དང་ནི་དམ་ཅན་ར་ཡི་གདོང༔
སློབ་དཔོན་ཕྱག་མཛུབ་རྗེས་དང་ཞབས་ཟུང་རྗེས༔
ནམ་མཁའི་སྙིང་པོ་གཡུ་སྒྲ་ཟུང་གཅིག་གིས༔
སྟོབས་རྩལ་འགྲན་པའི་ཞབས་རྗེས་ཟུང་དུ་འཇུག༔
ཕག་མོའི་སྐུ་དང་རྡོ་དྲིལ་ལྗོན་པའི་ཤིང༔
བསམ་མི་ཁྱབ་པ་རིས་སུ་བཀྲ་བ་ཡོད༔
མེ་རི་འབར་བའི་དུར་ཁྲོད་གཞལ་ཡས་ཁང༔
རང་བྱོན་དུར་ཤིང་དུར་ཆུ་དུར་སྤྲིན་དང༔
ཁྲག་ཞག་འདམ་ཞལ་མདའ་མདུང་རལ་གྲིའི་གུར༔
འཇིགས་སུ་རུང་བའི་ལོགས་ལ་ཆེ་མཆོག་གི༔
ཞལ་ཕྱག་བཀྲ་དང་སྣང་སྲིད་ཟིལ་གནོན་གྱིས༔
དྲེགས་པ་བཏུལ་བའི་གྲུབ་རྟགས་ཕྱག་ཞབས་རྗེས༔
ཐེག་ཆེན་པོ་ཏི་རང་བྱོན་རྒྱལ་མཚན་གྱིས༔
ལེགས་སྤྲས་མཐོང་ཚད་གྲོལ་བའི་རྟེན་འབྲེལ་ཡོད༔
ཁྲག་འཐུང་ཁྲོ་བོའི་ལྷ་ཚོགས་དངོས་བཞུགས་ཀྱང༔
རིག་འཛིན་སར་གནས་ལས་ཅན་འགའ་མ་གཏོགས༔
ཐམས་ཅད་ཡོངས་ཀྱི་དབང་པོའི་སྤྱོད་ཡུལ་མིན༔
རྒྱ་བོད་པཎ་གྲུབ་ཕྱག་མཚན་ཞབས་རྗེས་དང་༔
རྒྱ་སོག་བོད་གསུམ་ཡིག་འབྲུ་གྲངས་ལས་འདས༔
ལས་སྐལ་ལྡན་པ་རྣམས་ཀྱིས་ཆོས་སྐལ་དུ༔
འབད་རྩོལ་མེད་པར་མཐོང་བ་ཨེ་མ་ཧོ༔
གནས་དེར་ཞག་གཅིག་སྒོམ་སྒྲུབ་བྱས་ན་ཡང༔
ཕྱི་མ་མཁའ་སྤྱོད་གཡུ་ལོ་བཀོད་པ་དང༔
པདྨ་འོད་སོགས་བགྲོད་པ་ཐེ་མི་ཚོམ༔
བཀའ་བརྒྱད་རི་ལ་ལྷ་སྐུ་རང་རང་གི༔
སྐུ་ཡིག་ཕྱག་མཚན་ལ་སོགས་ཡིད་ཆེས་མངོན༔
དེ་ཕྱིར་ཡོན་ཏན་བརྗོད་པ་བསམ་ལས་འདས༔
སྡེ་བརྒྱད་ཕུག་པར་རང་རང་ཕྱག་མཚན་དང༔
སྲོག་ཡིག་ལ་སོགས་ཡིད་ཆེས་རྟགས་མཚན་འབྱུང༔
སེང་གདོང་རི་ལ་གཏོར་མའི་གྲི་རིས་དང༔
སེང་ཞལ་རྡོ་གཏོར་དྲག་པོའི་ཆས་ཀྱིས་བརྒྱན༔
མཚོ་རྒྱལ་ཚེ་སྒྲུབ་མཛད་པའི་ཕུག་པ་དེར༔
ཚེ་ཆུ་རང་བྱོན་མཁའ་འགྲོའི་བླ་མཚོ་ཡོད༔
དེ་མིན་བྱེ་བྲག་ཡོན་ཏན་བརྗོད་ལས་འདས༔
སངས་རྒྱས་གཉིས་པས་བརྗོད་ཀྱང་ཐུག་པ་མེད༔
སྤྱིར་ན་གནས་འདིའི་ས་རྡོ་རི་བྲག་དང༔
རྩི་ཤིང་ནགས་ཚལ་ཆུ་ཀླུང་བྱ་རི་དྭགས༔
ཐམས་ཅད་བདེ་ཆེན་ཞིང་དང་ཁྱད་མི་མངའ༔
ཐེག་ཆེན་རྣལ་འབྱོར་སྣང་བ་འབྱམས་སུ་ཀླས༔
མི་སྐྱ་ཕོ་མོ་དད་པས་དྭངས་འདྲེན་ཅིང༔
ཕྱག་སྐོར་བྱས་ཤིང་རང་བྱོན་སོགས་མཐོང་ན༔
ཚེ་འདིར་བདེ་ལྡན་ཕྱི་མར་སངས་རྒྱས་ཐོབ༔
རིགས་ངན་ལོག་སྲེད་མཁན་གྱིས་སྒྲོ་སྐུར་ན༔
ཚེ་འདིར་ཡུལ་ལྷའི་བཀའ་ཆད་མི་འདོད་འབྱུང༔
འཕོས་ཚེ་རྡོ་རྗེ་དམྱལ་བར་འཚོད་ཏ་རེ༔
དམ་ཆོས་རིན་ཆེན་འདོད་པས་གནས་འདི་སྐོར༔
གྲགས་པའི་གཡས་འཁྱིལ་སྒྲ་ཡིས་གྲགས་པ་སྡུད༔
དབུལ་པོ་ཟས་ནོར་འདོད་པས་གནས་འདི་སྐོར༔
ཡིད་བཞིན་རིན་ཆེན་ལྟ་བུའི་དགོས་འདོད་འབྱུང༔
གཏི་མུག་རྨུག་པ་འཐིབ་པས་གནས་འདི་སྐོར༔
ཤེས་རབ་གསལ་བའི་སྒྲོན་མེ་སྙིང་ལ་འཆར༔
སྡིག་ཅན་ཤན་པས་གནས་འདིར་ཕྱག་སྐོར་རེམས༔
ལས་གྱི་སྒྲིབ་དག་ཕྱི་མར་ཐར་བ་ཐོབ༔
ནད་གདོན་བགེགས་ཀྱིས་ནོན་རྣམས་གནས་འདི་སྐོར༔
བར་ཆད་དབྱིངས་གྲོལ་ཚེ་ཡི་དངོས་གྲུབ་ཐོབ༔
འཇའ་དང་འོད་ལུས་གྲུབ་འདོད་གནས་འདི་རུ༔
གཉིས་མིན་གཅིག་པུས་སྒྲུབ་པ་ལྷུར་བླངས་ན༔
འཕོ་ཆེན་བུམ་སྐུ་བདེ་བླག་ཉིད་དུ་འགྲུབ༔
འདོད་དོན་ལྷུན་གྲུབ་ཏཱ་རེའི་གནས་འདི་རུ༔
རང་གཞན་དོན་གཉིས་འབད་མེད་ཤུགས་ཀྱིས་འབྱུང༔
གནས་འདིའི་ཕྱི་ནང་བར་གསུམ་ཐམས་ཅད་དུ༔
སྐུ་གསུམ་མངོན་གྱུར་ལོངས་སྐུའི་ཞིང་མཚོན་ཕྱིར༔
སྐུ་ཡིག་ཕྱག་མཚན་ཕྱག་ཞབས་གྲུབ་པའི་རྟགས༔
བསམ་མི་ཁྱབ་པ་བརྗོད་ལས་འདས་པ་ཡོད༔
རང་ལ་དབང་བའི་སྐལ་ལྡན་ཀུན་གྱིས་མཐོང༔
དེ་མིན་འཚོལ་བའི་ངལ་བ་ག་ལ་དགོས༔
བསྐོར་བའི་ཚད་ནི་བརྒྱ་དང་རྩ་བརྒྱད་དེ༔
དེ་འབྲས་གནས་སྐབས་མཐར་ཐུག་ཡང་དག་ལྡན༔
གང་བརྩམ་ཡིད་བཞིན་འགྲུབ་ལ་སོམ་ཉི་ཅི༔
ཡོད་དེ་མེད་པའི་གཏན་ཚིགས་བརྡ་ལས་སྣང་༔
ནང་སྐོར་དཔལ་གྱི་རི་དང་ཏཱ་རེ་ཡི༔
གནས་ཡིག་དཀར་ཆགས་མདོར་བསྡུས་འདིར་བཀོད་དགེ༔
ཁྱད་པར་ཤིང་ཕོ་རྟ་ཡི་དྲུག་པའི་སྐབས༔
སངས་རྒྱས་ཆོས་གསུང་དུས་གཉན་ཚེས་བཞི་ནས༔
གཡང་དཀར་ལོ་ཡི་གཉིས་པའི་ཚེས་བཅུ་ཚུན༔
རྒྱ་བོད་གནས་ཆེན་སྟོང་རྩ་གནས་ཕྲན་ནི༔
ཡོད་དོ་ཅོག་རྣམས་འདི་རུ་འདུས་པའི་རྟགས༔
སྒྲ་དང་འཇའ་སྤྲིན་ལེགས་པའི་མཚན་མར་བཅས༔
ལན་གཅིག་བསྐོར་བས་ཏཱ་རེ་དུང་ཕྱུར་བདུན༔
འཕྲལ་གྱི་རྐྱེན་སེལ་སྔོན་གྱི་ལས་ཡང་སྲབ༔
འདི་རུ་འཚོགས་ཤིང་སྒྲུབ་འབྲེལ་ཕྱག་སྐོར་སོགས༔
མང་དུ་སྒྲུབ་ན་སངས་རྒྱས་ཐོབ་པར་འགྱུར༔
གནས་རྣམས་གང་ལ་ཁས་ལེན་ཡོད་པའི་མི༔
ཐེ་ཚོམ་མེད་ན་འདི་རུ་ཕྱག་སྐོར་གྱིས༔
གཞན་གྱི་གནས་ལས་འབུམ་གྱི་འགྱུར་ཁྱད་ཡོད༔
མཁའ་སྤྱོད་ས་སྤྱོད་བྱིན་རླབས་འདི་རུ་འཕོས༔
ཡོད་པའི་ཚད་མ་རང་སེམས་དཔང་པོར་ཡོད༔
བསླུས་ན་ལྷ་དང་བླ་མའི་བྱིན་རླབས་ཞན༔
སྔོན་བཟང་ལས་འཕྲོ་སད་ལ་པད་འབྱུང་གིས༔
ལུང་མ་བསྟན་པར་གཞན་གྱིས་འདི་མི་གོ༔
གལ་ཏེ་ཆོས་བརྒྱད་ཟོལ་གྱིས་སྨད་ན་ཡང༔
ཡུལ་ལྷས་བཀའ་ཆད་ལེགས་པའི་མཚན་མ་མེད༔
ཆོས་མེད་ཕོ་ཚོད་མཁན་གྱིས་བསླུ་སེམས་ཀྱིས༔
གཞན་མགོ་སྐོར་བའི་ཤོམ་ར་བསྒྲིག་ན་ཡང༔
མཁའ་འགྲོའི་བརྡ་ལས་མ་བྱུང་ངོས་མི་ཟིན༔
ད་ལྟ་དད་ལྡན་ཕོ་མོས་སྐུ་ཡིག་དང་༔
ཕྱག་མཚན་རྫས་རྟགས་ལེགས་པའི་ལྟས་མཐོང་བ༔
གནས་སྒོ་འབྱེད་པའི་དུས་ལ་བབ་པའི་རྟགས༔
ཡིན་པ་ཀུན་གྱི་སྒྲ་འཛིན་ལམ་ལ་བསྟིམས༔
མ་དག་སྐྱེ་བོས་འབུར་དོད་རང་བྱོན་ལ༔
མ་དག་སྣང་བས་ལོག་པར་ལྟ་བ་འཆོར༔
ལོག་ལྟའི་འབྲས་བུ་ནམ་ཡང་ཐར་བ་དཀོན༔
དད་པས་དག་སྣང་སྦྱང་བ་སྔགས་ཀྱི་ཆོས༔
ལར་ནི་མི་མཇེད་སྤྲུལ་སྐུའི་ཞིང་ཁམས་ཡིན༔
མོས་པའི་དུས་སུ་ལོངས་སྐུའི་ཞིང་དུ་ངེས༔
དེ་ཡི་བསྟན་པའི་མཇུག་ཏུ་འོག་མིན་གནས༔
གདོད་མའི་ལྷུམས་ཞུགས་དབུ་མའི་དབྱིངས་སུ་འཇུག༔
ཆོས་རྣམས་སྐུ་གསུམ་ཞིང་དང་ཡུམ་ལྔའི་ཀློང༔
ཡེ་ནས་ཡིན་ལ་ཡིན་པའི་འདུ་ཤེས་སྐྱེད༔
འཕགས་པའི་བྱིན་རླབས་ཆགས་པ་གངས་ཅན་ལྗོངས༔
ཡིན་ཕྱིར་ས་སྤྱོད་འཁྲུལ་བ་མེད་པའི་གནས༔
རང་རང་ལས་འབྲེལ་གནས་ཀྱི་སྐལ་བ་རུ༔
ཨོ་རྒྱན་ཆེན་པོས་བྱིན་རླབས་བྱས་ནས་བཞག༔
ད་ལྟའི་དུས་འདིར་ཕན་པའི་རྟེན་འབྲེལ་ལས༔
པད་འབྱུང་ཡབ་ཡུམ་བྱིན་རླབས་སྙིང་ལ་སིམ༔
ཡུལ་གྱི་ལྷ་དང་ཊཱཀྐིའི་བརྡ་རིས་ལས༔
འགྲོ་དོན་འབྱུང་བའི་རྟེན་འབྲེལ་ཤར་བཞིན་བཀོད༔
ཉེས་འགལ་མཆིས་ན་ལྷ་དང་སྲུང་མར་བཤགས༔
དགེ་བས་འབྲེལ་ཐོག་འགྲོ་བ་མ་ལུས་པ༔
གནས་སྐབས་བདེ་ལྡན་མཐར་ཐུག་འོག་མིན་ཞིང༔
འཕྱུག་མེད་རྫོགས་སངས་རྒྱས་པའི་རྒྱུར་གྱུར་ཅིག༔
བཀྲ་ཤིས་བདུད་རྩིའི་ཆར་གྱིས་ལེགས་བྲན་གནས༔
བཀྲ་ཤིས་དགེ་མཚན་སྐུ་གསུམ་ས་སྤྱོད་ཞིང༔
བཀྲ་ཤིས་སྨོན་ལམ་དུས་ལ་བབ་པའི་དགེས༔
བཀྲ་ཤིས་དཔལ་གྱིས་འགྲོ་ཀུན་འཚོ་བར་ཤོག༔
ཅེས་གནས་ཡིག་བདེ་ཆེན་བགྲོད་པའི་ལམ་བཟང་མ་རིག་མུན་སེལ་འདི་རྟེན་འབྲེལ་དུས་ལ་བབས་པའི་ཚེ་སྐྱབས་རྗེ་སྤྲུལ་པའི་སྐུ་ཀུན་བཟང་ཉི་མ་དང་། མི་དབང་གྲགས་པའི་མཆེད་ཟླ་རིག་འཛིན་འཇིགས་མེད་དང་། བསྟན་འཛིན་དགེ་བའི་བཤེས་གཉེན་ཨ་བྷ་ལ་ཤི་ལ་དང་། རིག་འཛིན་དུ་མའི་ལུང་གིས་བསྔགས་པའི་མཁས་མཆོག་ཀརྨའི་མཚན་ཅན་དང་། རང་སློབ་དད་པའི་མྱུ་གུ་ལེགས་པར་སྨིན་པའི་སྭ་ར་རཱ་ཛ་དང་། སྔོན་སྨོན་ལས་འཕྲོ་བཟང་པོ་ལ་དབང་བ་ལུང་རྟོགས་དང་། རིག་འཛིན་དོན་གྲུབ་སོགས་ཀྱིས་ལྷ་རྫས་དཀར་པོ་དང་ཡོ་བྱད་གྱ་ནོམ་པ་དུ་མའི་སྐྱེས་བཅས་བཀས་བསྐུལ་བ་ལ་བརྟེན་ནས་མི་ལྡོག་ཙམ་དུ་ཆོས་མེད་ཆོས་པའི་གཟུགས་བརྙན་འཆང་བའི་བླ་གཟུགས་རྒྱལ་ཁམས་ཉུལ་བའི་དཱ་རི་དྲ་པ་ས་ར་ཧི་ཏས་ཐོལ་བྱུང་ཐོགས་མེད་དུ་སྨྲས་པ་དུས་གསུམ་ཀུན་ཏུ་དགེ་བར་གྱུར་ཅིག། །
།