ཆུ་དབར་སྒྲོལ་མ་རིའི་གནས་བསྟོད་མོས་ལྡན་སྙིང་གི་དགའ་སྟོན། ཡི་དམ་རྡོ་རྗེ།
ཆུ་དབར་སྒྲོལ་མ་རིའི་གནས་བསྟོད་མོས་ལྡན་སྙིང་གི་དགའ་སྟོན་ཞེས་བྱ་བ།
༡ མར་གད་མདངས་ལྡན་གསུམ་མཚོན་ཕྱག་རྒྱ་ཅན། །
རབ་འབྱམས་རྒྱལ་བའི་ཕྲིན་ལས་གཏེར་གྱི་བདག །
སེང་ལྡིང་ནགས་ཀྱི་སྒྲོལ་མ་གཙོར་གྱུར་པའི། །
ཉེར་གཅིག་ལྷ་མོའི་ཚོགས་ཀྱིས་ཤིས་པ་སྩོལ། །
༢ འཛམ་གླིང་དབུ་རྩེ་བསིལ་ལྡན་ཁ་བའི་ལྗོངས། །
མདོ་ཁམས་གཡུ་ལྗོངས་གཡུ་དངོས་ཤར་གྱི་ཕྱོགས། །
རྒྱལ་རོང་ཞེས་གྲགས་རྨད་བྱུང་ཞིང་མཆོག་གི། །
གནས་ཀྱི་གོང་བ་ཆུ་དབར་སྨན་གྱི་ཚལ། །
༣ སྟོད་ན་ཙཱ་རི་གཉིས་པ་ཆོ༵ས་སྐུ༵འི་གནས། །
བར་ན་ཨར་ཡ་ཏཱ་རེ་ལོ༵ངས་སྐུ༵འི་གནས། །
སྨད་ན་དཔལ་གྱི་རི་བོ་སྤྲུ༵ལ་སྐུ༵འི་གནས། །
དོན་ལ་འབུམ་ཕྲག་མཁའ་འགྲོའི་དཀྱིལ་འཁོར་རྫོགས། །
༤ ནོར་འཛིན་ས་ཡི་དཔྱད་པ་རྫོགས་པའི་ཡུལ། །
སྐྱེས་མཆོག་དུ་མས་གྲུབ་པ་བརྙེས་པའི་རི། །
མ་སྲིང་མཁའ་འགྲོ་རྒྱ་མཚོ་འདུ་བའི་གྲོང་། །
རྒྱལ་ཡུམ་དཔའ་མོའི་གནས་མཆོག་བསྟོད་ལ་སྤྲོ། །
༥ སྔོན་ཚེ་རྒྱལ་དབང་རྡོ་རྗེ་གྲོ་ལོད་དང་། །
གངས་ཅན་མིག་གཅིག་རྣམ་སྣང་ལོ་ཙ་བས། །
གཏེར་སྦས་བྱིན་རླབས་སྤྲིན་དབང་འོད་ཕྲོམ་དང་། །
ལྷ་བདུད་བཙན་ཀླུ་གནས་གཏེར་སྲུང་མར་བསྐོས། །
༦ དེས་ཀྱང་ཚད་མིན་གནས་འདིའི་ཕྱོགས་མཚམས་ཀྱི། །
ཕྱག་ཆེན་ལུང་པར་རྫོགས་ཆེན་ཆོས་སྐོར་དང་། །
ཤེལ་ཕུག་བྲག་ལ་འབྱུང་འགྱུར་ལུང་བསྟན་སྐོར། །
འཕགས་མའི་རི་ལ་མཁའ་འགྲོའི་སྒྲུབ་སྐོར་སྦས། །
༧ དགེ་རྒྱས་ལུང་པར་རིགས་གསུམ་སྒྲུབ་སྐོར་དང་། །
ཀེའུ་ཚང་བྲག་ལ་གུ་རུའི་སྒྲུབ་ཐབས་སྐོར། །
སྤོས་ངད་ལྡན་རིར་ཆོས་ནོར་གཏེར་ཁ་སོགས། །
ཕྱི་རབས་སྐྱེ་བོའི་སྐལ་བར་སྨོན་ཏེ་སྦས། །
༨ རབ་ཚེས་རྣམ་རྒྱལ་ས་ཟླའི་ཡར་ངོའི་བཅུར། །
རྔ་ཡབ་དཔལ་རི་སྤྲུལ་པའི་ཕོ་བྲང་དུ། །
གྲུབ་དབང་བསམ་གཏན་ཡེ་ཤེས་གླིང་པ་ལ། །
རྒྱལ་དབང་པདྨས་བྱིན་རླབས་ལུང་བསྟན་པས། །
༩ ཁམས་གསུམ་རྣམ་རྒྱལ་ཁྲོ་བོའི་སྐུར་བཞེངས་ནས། །
ཧཱུྃ་ཆེན་སྒྲ་བསྒྲགས་དྲེགས་ཚོགས་དབང་དུ་བསྡུས། །
ཏཱ་རེ་མི་འགྱུར་ལྷུན་གྱིས་གྲུབ་པའི་གནས། །
ཐར་འདོད་བསོད་ནམས་དཔལ་དུ་གཏེར་སྒོ་ཕྱེས། །
༡༠ ཕྱི༵་ལྟར་མ་བཅོས་ལྷུན་གྱིས་གྲུབ་པའི་གནས། །
ན༵ང་ལྟར་འོག་མིན་གཡུ་ལོ་བཀོད་པའི་ཞིང་། །
གས༵ང་བ་སྐུ་གསུམ་རྒྱལ་བའི་ཕོ་བྲང་ཆེ། །
ངོ་མཚར་དག་པ་དབྱིངས་ཀྱི་གཞལ་ཡས་ཁང་། །
༡༡ སྒྲོ༵ལ་མ༵འི་སྐུ་ཡི་དབྱིབས་མཚུངས་ལྷུན་པོའི་སྤོར། །
སྒྲོ༵ལ་མ༵འི་སྐུ་བརྙན་རང་བྱོན་བཀྲ་བ་ཡིས། །
སྒྲོ༵ལ་མ༵འི་གནས་འདིར་འབྲེལ་ཐོག་སྐྱེ་འགྲོ་ཀུན། །
སྒྲོ༵ལ་མ༵འི་ཞིང་དུ་འདྲེན་པའི་རྟེན་འབྲེལ་མཚོན། །
༡༢ མ༵་བརྩིགས་མངོན་པར་མཐོ་བའི་བྲག་ངོས་སུ། །
མ༵་བྲིས་གཡས་སུ་འཁྱིལ་བ་ཆོས་ཀྱི་དུང་། །
མ༵་བུས་སྙན་པར་གྲགས་པའི་སྒྲ་དབྱངས་ཀྱིས། །
མ༵་བོས་ཕྱོགས་ཀྱི་སྐྱེ་བོ་མགྲོན་དུ་འགུགས། །
༡༣ འཇི༵གས་བྱེད་འཇི༵གས་མཛད་བྲག་རི་འཇི༵གས་རུང་ལ། །
གས༵ང་ཆེན་གས༵ང་བའི་མཛོད་འཛིན་གས༵ང་བའི་བདག །
འབུ༵ར་དུ་དོད་པའི་འབུ༵ར་ཚུགས་སྡང་མིག་གིས། །
མ༵་རུང་བདུད་བགེགས་མ༵་ལུས་འཇོམ་པར་བྱེད། །
༡༤ སྨན་གྱི་བླ་མས་བྱིན་གྱིས་བརླབས་པ་ཡི། །
བདུད་རྩིའི་རྒྱུན་བཟང་ཡན་ལག་བརྒྱད་པའི་སྐྱེམས། །
ཡིད་ཆེས་དད་པ་བརྟན་པོས་འཐུང་བྱས་ན། །
ཚེ་བསྲིང་གྲིབ་སེལ་དུག་གསུམ་ནད་ལས་གྲོལ། །
༡༥ བཻ་རོ་ཡབ་སྲས་ལྷ་ལུང་དཔལ་རྡོར་གྱིས། །
སྒྲུབ་པ་མཛད་པའི་སྒྲུབ་ཕུག་བྱིན་ལྡན་དང་། །
གྲུབ་པ་བརྙེས་རྟགས་ཕྱག་ཞབས་རྗེས་བཀོད་པ། །
སྲ་མཁྲེག་རྡོ་ཡི་ངོས་ན་ལྷམ་མེར་གསལ། །
༡༦ ཀུན་ཏུ་བཟང་མོའི་རོལ་རྩལ་ཨེ་ཀ་ཛའི། །
ཡིད་གཟུགས་ཆགས་པའི་རྟེན་མཁར་རང་གྲུབ་དང་། །
རཱ་ཧུ་ལ་དང་བཛྲ་ས་དྷུ་ཡི། །
བླ་ཤིང་སྦྲེལ་འཁྱིལ་དམ་ལྡན་སྙིང་གི་དཔྱིད། །
༡༧ མ༵་བཤམས་སྨན་རཀ་གཏོར་ཚོགས་སྒྲུབ་རྫས་ཚང་། །
མ༵་བྲིས་ཡིག་འབྲུ་ཕྱག་མཚན་ཕྱོགས་སུ་བཀྲ། །
མ༵་བསྐྱིལ་གནས་གསུམ་མཁའ་འགྲོའི་བྱིན་འོད་འཁྱིལ། །
མ༵་ཚོགས་མཁའ་འགྲོའི་གནས་འདི་གཏན་གྱི་སྐྱབས། །
༡༨ ངོ་མཚར་སྒྲོལ་མ་གཡུ་ཡི་ལྷ་ཁང་དང་། །
ཇོ་དར་རྡོ་འབུམ་མཆོད་རྟེན་འཁོར་ཆེན་སོགས། །
གསར་དུ་བསྐྲུན་པའི་རྟེན་གསུམ་གཟི་བྱིན་གྱིས། །
དད་ལྡན་རྒྱུད་ལ་ཚོགས་གཉིས་བར་མེད་འདྲེན། །
༡༩ གནས་འདིར་ཕྱི་སྐོར་བར་སྐོར་ནང་སྐོར་གསུམ། །
ཕན་ཡོན་རིིམ་བཞིན་ཏཱ་རེ་དུང་ཕྱུར་ནི། །
དགུ་དང་དྲུག་དང་གསུམ་རྣམ་འཐོབ་འགྱུར་ཅེས། །
ཨ་ཙར་ས་ལེ་ཧོར་གྱི་བླ་མའི་བཀའ། །
༢༠ ཁྱད་པར་ཆུ་མོ་སྦྲུལ་ལོའི་སྦྲུལ་ཟླ་ལ། །
གནས་ཡུལ་ཀུན་གྱི་བྱིན་ནུས་འདིར་འདུ་བས། །
ཕྱག་སྐོར་སྒྲུབ་བརྩོན་གྲངས་མེད་འཕེལ་འགྱུར་ཕྱིར། །
སྙིང་རུས་སྐྱེད་ཅིག་སྐལ་བཟང་གྲོགས་པོ་དག །
༢༡ འདི་བྲིས་དགེ་བས་མ་གྱུར་འགྲོ་བ་རྣམས། །
གནས་སྐབས་བརྒྱད་གཉིས་འཇིགས་པ་ཀུན་ལས་གྲོལ། །
མཐར་ཐུག་བདུན་གསུམ་དོན་གྱི་ལྷ་མོ་ཡི། །
རང་ཞལ་མངོན་སུམ་མཇལ་བའི་རྒྱུར་གྱུར་ཅིག །
ཅེས་ཚིགས་སུ་བཅད་པ་སྒྲོལ་མ་ཉེར་གཅིག་གི་གྲངས་ལྡན་འདི་ནི་ཐུན་མིན་ཆོས་ཀྱི་མཆེད་པོ་དམ་པ་བླ་མ་ཡིད་འོང་ནོར་བུ་སོགས་ནས་སྔ་ཕྱིར་ལན་གྲངས་དུ་མར་བསྐུལ་བའི་ཞལ་ངོ་མི་ལྡོག་ཆེད། རྒྱལ་ཁམས་ཉུལ་བའི་མུ་ཏོ་བ་ཡི་དམ་རྡོ་རྗེར་འབོད་པའི་སྙོམ་ལས་མཁན་དེས། བོད་རབ་བྱུང་བཅུ་བདུན་པའི་ལྕགས་ཕོ་སྟག་གི་གནམ་ལོ་གསར་དུ་ངོམ་པའི་དུས་བཟང་སྟེ། ཧོར་བླ་གཞན་ཕན་བཟང་པོས་གནས་གཏེར་བཞེས་ནས་བགྲང་བྱ་བརྒྱ་ཕྲག་གཅིག་དང་བཅོ་བརྒྱད་ལ་སོན་པའི་སྐབས་སུ་བྲིས་པ་འགྲོ་ཀུན་གཡུ་ལོ་བཀོད་པའི་ཞིང་དུ་སྐྱེ་བའི་རྒྱུར་གྱུར་ཅིག
༈ དེ་ཡང་གོང་གི་ལུང་བྱང་དུ། མདོར་ན་ཕྱི་སྐོར་རྟ་པའི་ཞག་བཅུ་གསུམ༔ གསང་སྐོར་ཞག་བདུན་ནང་གི་སྐོར་ཚད་ནིཿ རྒྱང་གྲགས་བཅོ་བརྒྱད་ཡང་གསང་སྐོར་བའི་ཚདཿ རྒྱང་གྲགས་བརྒྱད་ཡིན་ཞེས་གསུངས་པའི་སྐོར་ཚུལ་དང་པོ་ཕྱི་སྐོར་ནི། ཉིན་དང་པོ་གནས་སྐོར་ལ་འགྲོ་བའི་སྟ་གོན་དང་འབྲེལ་ཏཱ་རེའི་གནས་སུ་ཞག་གཅིག དེ འི་ཕྱི་ཉིན་ཏཱ་རེའི་གནས་སུ་ཕྱག་སྐོར་བྱས་ནས་བསྡད། དེའི་ཕྱི་ཉིན་སྔ་བར་གྱུ་ཡོན་མའི་ནང་ནས་བརྒྱུད་གདུག་ཆེན་ནས་གནས་ལུང་དུ་ཞག་གཅིག དེ་ནས་ཡོལ་རི་ནས་ཞག་གཅིག དེ་ནས་དེམ་བརྒྱུད་གཡུ་ཁྲོམ་བསྐོར་ནས་ལམ་དུ་ཞག་གཅིག དེ་ནས་ཆུ་ཀྱོག་ཀྱོག་ནས་གཡུ་སྙིང་དུ་ཞག་གཅིག དེ་ནས་སྒེགས་ཀྱི་ཡིག་དྲུག་གནས་སུ་ཞག་གཅིག དེ་ནས་ལྡོང་རིར་ཞག་གཅིག དེ་ནས་ངེས་ལེགས་སུ་ཞག་གཅིག དེ་ནས་ཇུ་ནང་བརྒྱུད་ས་མུ་ནས་ཞག་གཅིག། དེ་ནས་སྦས་གནས་སུ་ཞག་གཅིག། དེ་ནས་རྒྱ་ཀི་ལོའི་སྟོད་ནས་ས་དམར་དགོན་ཤར་བསྐོར་རྫ་བྲག་མདོར་ཞག་གཅིག དེ་ནས་ཚེར་ཤར་བརྒྱུད་ཏཱ་རེའི་གནས་མདུན་དུ་བསྔོ་སྨོན་བཅས་ཞག་གཅིག་སྟེ་བཅུ་གསུམ་མོ། དེ་བཞིན་གསང་སྐོར་ནི་ཏཱ་རེའི་གནས་སུ་ཞག་གཅིག། དེ་ནས་སྲིབ་ཏཱ་རེའི་ནང་བརྒྱུད་གདུག་ཆེན་ནང་ནས་བབ་གནས་ལུང་དུ་ཞག་གཅིག དེ་ནས་གཡུ་སྙིང། སྒེགས། ངེས་ལེགས། དེ་ནས་ལྡོང་རི། དེ་ནས་འཁྱིལ་ཆེན་ཁོག་བརྒྱུད་ནས་ཏཱ་རེའི་གནས་སུ་བསྔོ་སྨོན་བཅས་སོ། རྟ་པ་ཞེས་པས་རྟ་ལ་བྲོ་ཆས་སོགས་བཀལ་ནས་ཁྲིད་ནས་སོང་བ་ཙམ་ལ་གོ་དགོས་མ་གཏོགས་རྟ་ཞོན་ནས་གང་མགྱོག་ཏུ་ཕྱིན་པ་ལ་ནི་གནས་སྐོར་གྱི་དོན་མེད་ཅིང་ཉིན་ཞག་མང་པོའི་འགོར་ལམ་ཡང་མི་འདུག དེ་ལྟར་བྱས་ན་ཕྱི་སྐོར་དང་བར་སྐོར་གྱི་ཕན་ཡོན་དང་གནས་སོ་སོའི་ཐུན་མིན་གྱི་ཕན་ཡོན་འཐོབ་པ་སོགས་ཕན་ཡོན་ཚད་ལས་འདས་པར་འགྱུར་སྙམ་མོ།