ཕྱག་ཆེན་གནས་ཀྱི་རང་བཞིན་ཅུང་ཟད་བརྗོད་པ་བཻཌཱུརྱའི་ཕྲེང་བ། ཡི་དམ་རྡོ་རྗེ།

༈ ཕྱག་ཆེན་གནས་ཀྱི་རང་བཞིན་ཅུང་ཟད་བརྗོད་པ་བཻཌཱུརྱའི་ཕྲེང་བ་བཞུགས། ལྷ་ཀླུ་གནོད་སྦྱིན་དྲང་སྲོང་རིག་པ་འཛིན། །སྲིད་ན་ཆེ་ཞིང་མཐོ་བའི་རིགས་ཀུན་གྱིས། །རལ་བའི་ཟུར་ཕུད་ཞབས་ལ་གཏུགས་པའི་ཡུལ། །པདྨ་རྒྱལ་པོའི་བཀའ་དྲིན་དྲན་པས་འདུད། །ཙ་འདྲ་ཕག་མོའི་གནས་ཀྱི་ཡན་ལག་ཏུ། །ངོ་མཚར་སྒྲུབ་པའི་གནས་བཞི་བཞུགས་པ་ལས། །ནུབ་ཕྱོགས་ཕྱག་ཆེན་ཐུགས་ཀྱི་གནས་མཆོག་གི། །རང་བཞིན་ཅུང་ཟད་བརྗོད་ལ་སྤྲོ་བ་བརྟས། །ཕྱི་ལྟར་གཏེར་གྱི་རི་བོ་ནོར་བུའི་དབྱིབས། །ནང་ལྟར་མཁའ་འགྲོ་དམ་ཅན་འདུ་བའི་གནས། །གསང་བ་གསང་ཆེན་ཨ་ཏིའི་ཆོས་ཀྱི་མཛོད། །དད་ལྡན་ཀུན་གྱིས་དད་པས་བཀུར་བར་འོས། །རྒྱལ་ཀུན་ཐུགས་གསང་མཛོད་འཛིན་ཕྱག་ན་རྡོར། །མ་བཅོས་བྲག་གི་ངོས་ལ་རང་བྱོན་བཀྲ། །ལྷ་སྐུ་ཡིག་འབྲུ་ཕྱག་མཚན་སྣ་ཚོགས་ཀྱིས། །ལས་ཅན་མིག་ལ་དག་པའི་བདུད་རྩི་འགྱེད། །སྔོན་ཚེ་རྒྱལ་བའི་དབང་པོ་པདྨ་འབྱུང་། །རྣམ་སྣང་ལོ་ཙཱས་དད་པས་སྤྱན་དྲངས་ཚེ། །གནས་འདིར་ཞབས་ཀྱིས་བཅགས་ཤིང་བྱིན་གྱིས་བརླབས། །ངེས་གསང་ཆོས་ཀྱིས་བུ་སློབ་སྨིན་པར་མཛད། །རྫོགས་ཆེན་སྡེ་གསུམ་ཀློང་དགུའི་ཟབ་གནད་སྐོར། །རིམ་གསུམ་ཆོས་རྩིག་བྲག་ལ་གཏེར་དུ་སྦས། །འགྱུར་མེད་ཐུགས་ཀྱི་ཡི་གེའི་རྒྱ་ཡིས་བཏབ། །ལས་ཅན་བུ་ལ་འཕྲད་པའི་གཏད་རྒྱ་མཛད། །དེ་ཡང་སེམས་ལས་གཞན་ཆོས་ལོགས་ཤིག་ཏུ། །བཙལ་ཏུ་མེད་པ་སྣ་ཚོགས་སེམས་ཀྱི་སྡེ། །ཆོས་ཉིད་ཀུན་ཏུ་བཟང་མོའི་ཀློང་རྒྱན་ལས། །གཞན་དུ་ཡོད་པར་མི་སྨྲ་ཀློང་གི་སྡེ། །ཡིན་ལུགས་གནད་ཀྱི་ཐོག་ཏུ་ཕེབས་པ་ནི། །གནས་ལུགས་རང་གསལ་ཟབ་པ་མན་ངག་སྡེ། །ལྟ་སྤྱོད་དལ་དབང་དམ་ཚིག་ཕྲིན་ལས་དང་། །ས་ལམ་དགོངས་པ་འབྲས་བུའི་ཀློང་དགུའོ། །བཀའ་འདི་སྔགས་སྲུང་དབྱིངས་ཀྱི་རྒྱལ་མོ་དང་། །གཏེར་སྲུང་དུང་གི་ཕྲེང་བ་ཅན་ལ་གཏད། །དམ་ལྡན་རྣལ་འབྱོར་བུ་བཞིན་སྐྱོང་བ་དང་། །དམ་མེད་རྡུལ་དུ་རློག་པའི་ཐ་ཚིག་བསྒྲགས། །སྔོན་ཞིག་གནས་འདིར་སྒྲུབ་པ་ཉམས་བཞེས་ནས། །གྲུབ་པ་བརྙེས་ཤིང་འོད་སྐུར་གྲོལ་བ་ཡི། །དམ་པའི་སྐྱེས་བུ་མང་དུ་བྱོན་གྱུར་ཞེས། །རིག་འཛིན་གོང་མས་དཔལ་གྱི་མགུར་ནས་གསུངས། །གསང་བདག་གནས་འདིར་ཕྱག་སྐོར་སུས་བྱས་ན། །ས་བདག་ཀླུ་གཉན་གནོད་པ་མ་ལུས་ཞི། །མཐར་ཐུག་ངེས་གསང་སྙིང་པོའི་དགོངས་པའི་དོན། །མངོན་དུ་འགྱུར་བ་ཕྱག་ན་རྡོ་རྗེའི་མཐུ། །ཚིག་འདི་དགོངས་པའི་ཀློང་ནས་བརྡོལ་བ་མིན། །ས་དང་རྡོ་ཡི་སྲུབ་ནས་བླངས་པ་མིན། །རྡོ་རྗེའི་མཆེད་ཀྱི་རྡོ་རྗེའི་བཀའ་ལྕི་བས། །དམ་པའི་གསུང་ལ་བརྟེན་ནས་བྲིས་པ་ཡིན། །ཉེས་འགལ་མཆིས་ན་ལྷ་དང་སྲུང་མར་བཤགས། །ལེགས་ཆ་སྲིད་ན་མཁའ་མཉམ་འགྲོ་བ་རྣམས། །གནས་སྐབས་མཐར་ཐུག་དགེ་བའི་འོད་སྣང་གིས།།

 ཕན་དང་བདེ་བའི་དགའ་སྟོན་འགྱེད་གྱུར་ཅིག །ཅེས་ཕྱག་ཆེན་གནས་ཀྱི་རང་བཞིན་ཅུང་ཟད་བརྗོད་པ་བཻཌཱུརྱའི་ཕྲེང་བ་ཞེས་པ་འདི་ནི་ཐུན་མིན་ཆོས་ཀྱི་མཆེད་པོ་འགའ་དང་ལྷན་དུ་གནས་དེར་ཕྱིན་སྐབས་ཡི་དམ་རྡོ་རྗེར་འབོད་པའི་སྙོམ་ལས་མཁན་དེས་ཆུ་ཡོས་ཁྲུམས་ཟླའི་དམར་ཕྱོགས་བཟང་པོ་དང་པོ་ལ་བྲིས་པའོ།།