ངེས་ལེགས་གནས་ཀྱི་རང་བཞིན་བརྗོད་པ་དད་པའི་གསོས་སྨན། ཡི་དམ་རྡོ་རྗེ།
སྲས་བཅས་རྒྱལ་བའི་བརྩེ་བའི་སྙིང་རྗེ་ཀུན། །
གཅིག་བསྡུས་གངས་རིའི་མདངས་འཛིན་གངས་རིའི་མགོན། །
སྤྱན་རས་གཟིགས་དབང་སྙིང་རྗེའི་གཏེར་འཆང་དེས། །
དགེ་ལེགས་བྱེ་བའི་མེ་ཏོག་ཆར་དུ་སྙིལ། །
གང་གི་གདུལ་ཞིང་ཁ་བའི་ལྗོངས། །
དེ་ཡི་མཛེས་རྒྱན་གཡུ་ཡི་མཁར། །
གནས་ཀྱི་བྱེ་བྲག་ངེས་ལེགས་ཀྱི། །
རང་བཞིན་བརྗོད་པ་ཅུང་ཟད་གླེང་།
དེ་ལ་ངེས་ལེགས་ཐེག་ཆེན་བསམ་གཏན་གླིང་ནི། ངན་ལམ་རྒྱལ་བ་མཆོག་དབྱངས་ཀྱི་རྣམ་སྤྲུལ་གཏེར་སྟོན་བསམ་གཏན་སྙིང་པོའམ་ངེས་ལེགས་བླ་མ་ཆུ་སྐྱེས་ཀྱིས་གདན་ས་བཏབ་ཅིང་བྱིན་གྱིས་བརླབས། དེ་ནས་རིམ་བཞིན་ངེས་ལེགས་བླ་མ་རིམ་བྱོན་གྱིས་སྒྲུབ་གནས་བྱས་ཤིང་། གཙུག་ལག་ཁང་རྟེན་བརྟེན་པར་བཅས་པ་གསར་བཞེངས་མཛད་ཚུལ།
རིག་འཛིན་ལུང་རིག་གླིང་པས།
གྲུབ་པའི་རྣལ་འབྱོར་གདན་ས་ཁྱད་པར་ཅནཿ
རྙིང་མའི་རྒྱུད་དང་བཀའ་དགོངས་ཕུར་བ་སོགསཿ
བཀའ་གཏེར་རྒྱུད་ཀྱི་གླེགས་བམ་མང་བཞུགས་ཤིངཿ ཞེས་དང་།
རྫོགས་སྤྲུལ་བཞི་པས།
རྒྱལ་བའི་རྟེན་གསུམ་མགོན་པོ་ཚོགས་ཀྱི་བདག །
ཙིའུ་དམར་པོ་དབང་གི་ལྷ་རྣམས་སྤྲོ། ཞེས་དང་།
བྱང་གི་ཕྱོགས་ལ་འཁོར་ལོའི་དྲྭ་བས་བསྐོར། ཞེས་སོགས་གསུངས་པ་ལྟ་བུའོ། །
ཁྱད་པར་རྫོགས་སྤྲུལ་བཞི་པ་མི་འགྱུར་ནམ་མཁའི་རྡོ་རྗེ་དང་། རྒྱ་རོང་གཏེར་ཆེན་རྣམ་གཉིས་ཀྱིས་ཐུགས་རྗེ་ཆེན་པོའི་ཡོན་ཏན་གྱི་གནས་སུ་ངོས་འཛིན་མཛད། རིག་འཛིན་ལུང་རིག་གླིང་པས་ཀྱང་། ཡོན་ཏན་གནས་མཆོག་ཐུགས་ཆེན་སྟོད་ཀྱི་ཆར། ཞེས་གསུངས། གནས་འདིའི་ཕྱོགས་སོ་སོའི་བྲག་ངོས་རྣམས་སུ། ཡིག་འབྲུ་དང་ཕྱག་མཚན་རྫས་བརྒྱད་དང་ཆོས་རྔ་སོགས་རང་བྱོན་སྣ་ཚོགས། བཻ་རོ་ཙ་ནའི་སྒྲུབ་ཕུག །གྲུབ་བརྙེས་རིག་འཛིན་དུ་མའི་ཞབས་རྗེས་སོགས་ཡོད། དཔལ་མགོན་ཚོགས་ཀྱི་བདག་པོ། གནོད་སྦྱིན་ཙིའུ་དམར་པོ། ཟོ་དོར་སྐུ་བླ་དུང་རྩེ། ངེས་ལེགས་པདྨ་དྲེགས་འདུལ་སོགས་ཡེ་ཤེས་དང་འཇིག་རྟེན་གྱི་ཆོས་སྐྱོང་དང་ཟོ་དོར་དུ་མས་རྣམ་ཀུན་མེལ་ཙེ་མཛད་ཅིང་གནས་འདི་བསྲུང་བར་གྲགས། གནས་འདི་ལ་ཕྱག་སྐོར་བྱས་པའི་ཕན་ཡོན་ཀྱང་། ནང་སྐོར། བར་སྐོར། ཕྱི་སྐོར་གསུམ་གྱི་དང་པོ་ལ་ཡིག་དྲུག་དུང་ཕྱུར་བདུན་གྱི་ཕན་ཡོན་ཐོབ་པ་དང་། གཉིས་པ་ལ་བཅུ་གསུམ། གསུམ་པ་ལ་ཉེར་ལྔའི་ཕན་ཡོན་ཐོབ་པའོ། གནམ་ལོ་ཤིང་བྱི་ནམ་ཤར་ལ་རྒྱ་བོད་ཀྱི་གནས་ཀུན་གྱི་བྱིན་ནུས་གནས་འདིར་འདུ་བས། དེའི་ཚེ་ཕྱག་སྐོར་གང་བྱས་དུང་ཕྱུར་བྱེ་བ་འབུམ་འགྱུར་དུ་འགྲོ་བར་གསུངས།གཞན་ཡང་རྫོགས་སྤྲུལ་གཉིས་པས། གནས་དེར་འབྲེལ་ཐོག་སེམས་ཅན་ཀུན། ཕྱི་མ་བདེ་ཆེན་སར་བསྒྲོད་འགྱུར།
ཞེས་དང་། ཚེ་ཟད་མ་གཏོགས་རྐྱེན་ངན་བཟློག ཞེས་གསུངས།
དེ་བཞིན་དུ་རྫོགས་སྤྲུལ་བཞི་པས་ཀྱང་།
མཐོང་ཐོས་དྲན་རེག་འགྲོ་བ་སེམས་ཅན་རྣམས།
བདེ་ཆེན་དག་པའི་ཞིང་དུ་འདྲེན་པར་འོང་། །
ཞེས་དང་།
རིག་འཛིན་ལུང་རིག་གླིང་པས།
ཚེ་ཟད་མ་གཏོགས་རྐྱེན་ངན་སེལ་ངེས་སོཿ
ཁྱད་པར་གནོད་སྦྱིན་དམར་པོ་དབང་གི་ལྷའིཿ
གསོལ་མཆོད་བརྒྱ་རྩ་གནས་འདིར་བསྒྲུབ་པ་ནཿ
མི་དེའི་འདོད་དོན་ཡིད་བཞིན་འགྲུབ་ངེས་སོཿ
ཞེས་སོགས་ཐུན་མོང་དང་ཐུན་མིན་གྱི་ཕན་ཡོན་བརྗོད་ལས་འདས་པའོ།
དེ་ལྟར་གནས་ཀྱི་རང་བཞིན་མདོར་བསྡུས་ཙམ། །
དམ་པའི་གསུང་རྗེས་འབྲང་ནས་ངས་འདིར་བཀོད། །
འགལ་འཁྲུལ་མཆིས་ཚད་ཡེ་ཤེས་ལྷ་ལ་བཤགས། །
ལེགས་བྱས་འགྲོ་ཀུན་བྱང་ཆུབ་ཐོབ་ཕྱིར་བསྔོ། །
ཅེས་པ་འདི་བླ་མ་མཐུ་ཆེན་ནས་འབྲི་གཞི་བཅས་ནན་བསྐུལ་ངོར་ཡི་དམ་རྡོ་རྗེས་ས་བྱི་དབོ་ཟླའི་དམར་ཕྱོགས་རྒྱལ་བ་གཉིས་པ་ལ་བྲིས་པ་འགྲོ་ཀུན་རི་བོ་ཏཱ་ལར་སྐྱེ་བའི་རྒྱུར་གྱུར་ཅིག །