དཔལ་རྡོ་རྗེ་ཕུར་པའི་གནས་རི་ཕྲིན་ལས་གྲུབ་པའི་ཡང་རྫོངས་ལ་ཅུང་ཟད་བསྔགས་པ་ངོ་མཚར་སྤྲིན་གྱི་རོལ་མོ། ཡི་དམ་རྡོ་རྗེ།
རང་བཞིན་ཆོས་དབྱིངས་ཞི་ལས་མ་གཡོས་ཀྱང་། །
རང་གདངས་མ་འགགས་ཁྲོ་བོའི་སྐུར་བཞེངས་པ། །
རང་རིག་དབྱེར་མེད་བཛྲ་ཀུ་མ་རར། །
རང་བབ་གཉུག་མའི་ངང་ནས་གཅིག་ཏུ་འདུད། །
འཛམ་གླིང་གོ་ལ་ཟླུམ་པོའི་ཡང་རྩེ་ན། །
མངོན་པར་མཐོ་བ་བསིལ་ལྡན་བོད་ཀྱི་ཡུལ། །
སྒང་དྲུག་མདོ་ཁམས་སྨད་ཀྱི་སའི་ཐིག་ལེ། །
གཡུ་ལྗོངས་ཕྱུག་མོའི་ཆ་ཤས་འཁྱིལ་ཆེན་དུ། །
ཁྲག་འཐུང་ཁྲོ་བོའི་རྒྱལ་པོ་ཀཱི་ལ་ཡས། །
ས་དགུའི་རྟོག་པ་རྩད་ནས་གཞོམ་པའི་ཕྱིར། །
བཞད་པ་བརྒྱད་ཀྱིས་རྡོ་རྗེའི་གླུ་བླངས་པས། །
ཧ་ཧི་ཞེས་གྲགས་ལུང་དགུར་གྱེས་པའི་མདོར། །
སྔོན་ཚེ་ཨོ་རྒྱན་རྗེ་དང་སེང་ཆེན་རྒྱལ། །
རྣམ་སྣང་ལོ་ཙཱ་རྒྱལ་མོ་གཡུ་སྒྲ་སྙིང་། །
ཀརྨ་པ་དང་དཔལ་ཆེན་དགའ་ལོ་སོགས། །
སྐྱེས་ཆེན་དུ་མས་ཞབས་བཅགས་བྱིན་གྱིས་བརླབས། །
ལྕགས་ཡོས་ས་ཟླའི་དམར་ཕྱོགས་བཅོ་ལྔའི་ཉིན། །
རྒྱ་སྤྲུལ་ལུང་རྟོགས་ཆོས་ཀྱི་ཉི་མ་ཡིས། །
ཐུགས་བསྐྱེད་རབ་དཀར་ཟླ་བའི་ཟེགས་མ་འབུམ། །
གནས་འདིར་ལེགས་པར་བྲན་པའི་བཀའ་དྲིན་ལྕི། །
མཐིང་སྔོན་ནམ་མཁའ་རྩིབས་བརྒྱད་འཁོར་ལོའི་དབྱིབས། །
ལྷུན་སྟུགས་ས་འཛིན་པདྨའི་རིས་སུ་བཀྲ །
དྭངས་བསིལ་ཆུ་བོ་མདུན་ནས་གཡས་སུ་འབབ། །
སྣ་ཚོགས་ལྗོན་པའི་དྲྭ་བ་ཡིད་དུ་འོང་། །
ཤར་ཕྱོགས་ཉི་ཟླའི་བགྲོད་ལམ་རབ་ཡངས་ཤིང་། །
ལྷོ་རི་རིན་ཆེན་ཕུང་པོ་མདུན་དུ་སྤུང་། །
ནུབ་ཕྱོགས་ས་སྲུང་གླང་པོའི་གཙུག་གིས་གཡོར། །
བྱང་གི་རི་བྲག་བཙན་པོས་འགག་སྒོ་བསྡམས། །
ཕྱི་ལྟར་དམ་པ་དུ་མས་བྱིན་བརླབས་པའི། །
ཡིད་བཞིན་འདོད་འཇོ་རིན་ཆེན་གཏེར་གྱི་རི། །
ནོར་བུ་ཙིནྡ་མ་ཎིའི་གཟུགས་སུ་མཛེས། །
གསང་བ་མཐའ་བྲལ་དབྱིངས་ཀྱི་གཞལ་ཡས་ཁང་། །
ནང་ལྟར་རྡོ་རྗེ་གཞོན་ནུའི་ཕོ་བྲང་ཆེ། །
བར་ཆད་དམ་སྲིའི་བདུད་དཔུང་ཚར་གཅོད་པའི། །
གཙོ་དང་སྲས་འཁོར་ཟ་གསོད་སྤྲུལ་པར་བཅས། །
ཕྲིན་ལས་ཕུར་པའི་ལྷ་ཚོགས་བཀྲ་དཔུང་ངེ་། །
གཡས་ན་བདུད་རྩིའི་རྒྱུན་བཟང་དལ་གྱིས་འབབ། །
གཡོན་ན་རཀྟའི་ཆུ་བོའི་རྦ་རླབས་གཡོ། །
དབུས་རི་དཔལ་གྱི་གཏོར་མ་རང་གྲུབ་པས། །
གསང་ཆེན་སྒྲུབ་རྫས་མ་བཤམས་ལྷུན་གྱིས་གྲུབ། །
གྲུབ་པའི་དབང་ཕྱུག་དཔལ་ཆེན་དགའ་ལོ་པས། །
རང་བྱུང་བྲག་གི་ངོས་ལ་ཕྱག་འཁར་གྱིས། །
བཙུགས་ལས་ལེགས་ཐོན་དྲོ་འཇམ་ཁྲུས་རྫིང་གིས། །
མི་འདོད་ནད་ཀྱི་ཟུག་རྔུ་སེལ་བར་བྱེད། །
མཆོད་རྟེན་རང་བྱོན་དགའ་ལོའི་ཕྱག་རྗེས་དང་། །
ཆིབས་རྟའི་རྗེས་སོགས་གྲུབ་པའི་རྟགས་དུ་མ། །
མངོན་སུམ་མིག་གི་བདུད་རྩིར་བཞག་པ་འདི། །
མ་སྨད་བསོད་ནམས་བྱེ་བའི་དཔལ་ལས་གྲུབ། །
གཡུ་ཁོག་དཔོན་བླ་དགེ་འདུན་རྒྱ་མཚོ་མཆོག །
འོད་གསལ་སྙིང་པོའི་སྒྲུབ་ལ་གཞོལ་བ་ཡིས། །
འབྲེལ་ཚད་དོན་དང་ལྡན་པར་གྲུབ་པའི་གནས། །
གླག་ཚང་དཔལ་རི་གཉིས་པ་གནས་འདིའི་རྒྱན། །
རྔམ་བརྗིད་བྲག་རི་ནགས་ཀྱི་རྒྱན་ཕྲེང་ཅན། །
ངམ་གནག་ངོས་གཟར་ཤིན་ཏུ་སྐྱི་གཡའ་ཞིང་། །
འཇིགས་རུང་མཚོན་ཆའི་རུ་མཚོན་གཟེངས་འདྲ་བ། །
འཇམ་དཔལ་ཁྲོས་པ་གཤིན་རྗེའི་གནས་སུ་གྲགས། །
དབུ་རྨོག་བཙན་པའི་ཟོ་དོར་གནས་འཆའ་བའི། །
ས་འཛིན་ལྷུན་པོ་སྤྲིན་གྱི་ལ་ཐོད་ཅན། །
རྨོག་མཐོ་སེང་རྫོང་བཀྲ་ཤིས་ལྷ་རྩེ་སོགས། །
དཀར་ཕྱོགས་སྐྱོང་བ་དུ་མས་གནས་འདི་བསྲུང་། །
སྙིགས་དུས་མཐའ་དམག་དམ་སྲི་ཁ་དར་ཞིང་། །
ནད་མུག་མཚོན་གྱི་བསྐལ་ངན་འཆར་ཉེའི་ཚེ། །
ཕྲིན་ལས་ཕུར་པའི་ལྷ་ལ་བརྟེན་གྱུར་ན། །
དུས་ཀྱི་རྒུད་མུན་དབྱིངས་སུ་ཞི་བར་འགྱུར། །
ཀཱི་ལ་འབྲུ་དགུ་རྡོ་རྗེ་སྙིང་པོའི་སྲོག །
ཕྲིན་ལས་ཀུན་འདུས་བཟླས་པ་སུས་བགྱིད་ན། །
བར་ཆད་བདུད་བཞིའི་འཇིགས་པ་ལས་གྲོལ་ཏེ། །
མཆོག་ཐུན་ལས་བཞིའི་དངོས་གྲུབ་འཐོབ་པར་འགྱུར། །
ཁྲོ་རྒྱལ་ཆེན་པོའི་སྐུ་གཟུགས་མཇལ་ཙམ་གྱིས། །
སྐྱེ་བ་བདུན་ནས་མ་བསྒོམ་སངས་རྒྱས་ཞེས། །
ཚད་མར་གྱུར་པའི་ལུང་ལས་གསུངས་གྱུར་ན། །
ཕྱག་བསྐོར་མཆོད་པའི་ཕན་ཡོན་སུ་ཡིས་དཔོགས། །
ལྷ་བརྒྱའི་དབུས་ན་ལྷ་ཡི་དབང་པོ་དང་། །
རྒྱུ་སྐར་ཁྲོད་ན་ཉིན་བྱེད་གཞོན་ནུ་བཞིན། །
ཕལ་བའི་གནས་ཀྱིས་དོ་ཟླ་མ་མཆིས་པས། །
མོས་ལྡན་ཀུན་གྱིས་དད་ཕྱག་བསྐོར་བར་རིགས། །
གནས་འདིར་བཟང་ངན་ལས་གྱིས་འབྲེལ་བ་ཀུན། །
ཚེ་འདིར་ཚེ་རིང་ནད་མེད་གང་བསམ་འགྲུབ། །
མཐར་ཐུག་ཀ་དག་གདོད་མའི་གཞི་ཀློང་དུ། །
ཁྲག་འཐུང་རྒྱལ་པོའི་གཏན་སྲིད་ཟིན་པར་སྨོན། །
རིག་པའི་ཕུར་བུས་བདག་རྟོག་དབྱིངས་སུ་བསྒྲལ། །
སྙིང་རྗེའི་ཕུར་བུས་འགྲོ་ཁམས་རྗེས་སུ་འཛིན། །
རྫས་ཀྱི་ཕུར་བུས་ཉེས་ཅན་རྩད་ནས་གཅོད། །
ཕྲིན་ལས་ཕུར་པའི་འགྲོ་དོན་མཐའ་རྒྱས་ཤོག །
ཅེས་ཟག་པ་མེད་པའི་ཆོས་སྡེ་ཉེར་གཅིག་གི་གྲངས་ལྡན་གྲངས་ལྡན་ཚིགས་སུ་བཅད་པའི་བསྟོད་ཚིག་འདི་ནི་ཡི་དམ་རྡོ་རྗེར་འབོད་པའི་སྙོམ་ལས་མཁན་དེས། བོད་རབ་བྱུང་བཅུ་བདུན་པའི་ནང་ཚན་ཆུ་སྦྲུལ་ས་ག་ཟླ་བའི་དམར་ཕྱོགས་བཅོ་ལྔའི་ཉིན་གནས་དེའི་ཉེ་འགྲམ་ནས་བྲིས་པ་འགྲོ་ཀུན་དཔལ་རྡོ་རྗེ་གཞོན་ནུའི་གོ་འཕང་ལ་འགོད་པའི་རྒྱུར་གྱུར་ཅིག དགེའོ། །
དགེའོ། །
དགེའོ། །