དཔལ་རྡོ་རྗེ་གཞོན་ནུའི་ཕོ་བྲང་མཁ༷འ་དབྱི༷ངས་ཆོ༷ས་འབྱུང༷་ཐ༷ང་གི་གནས་བསྟོད་རྡོ་རྗེ་སྲིན་པོ་དགྱེས་པའི་གླུ་དབྱངས། ཡི་དམ་རྡོ་རྗེ།
དཔལ་རྡོ་རྗེ་གཞོན་ནུའི་ཕོ་བྲང་མཁ༷འ་དབྱི༷ངས་ཆོ༷ས་འབྱུང༷་ཐ༷ང་གི་གནས་བསྟོད་རྡོ་རྗེ་སྲིན་པོ་དགྱེས་པའི་གླུ་དབྱངས་ཞེས་བྱ་བ།
ཁ་སྦྱོར་ཡན་ལག་བདུན་གྱི་ལང་ཚོའི་དཔྱིད། །
མཚན་དཔེའི་དཔལ་གྱིས་སྒེག་པའི་ཡེ་ཤེས་སྐུ། །
ཟག་མེད་ཡོན་ཏན་བྱེ་བའི་གཏེར་མངའ་བ། །
རང་བྱུང་པདྨ་རྒྱལ་པོས་དགེ་ལེགས་སྩོལ། །
འཇིགས་རུང་འཁོར་བའི་དུག་མཚོར་རྟག་སྦྱོར་བདག་རྟོག་ད༷མ་སྲི༷་བདུད་ཀྱི་དཔུང་།
རང་རིག་ཡེ་ཤེས་རྣོ་དབལ་ཕུར་བུས་ཐལ་འབྱིན་ཉིད་དུ་ཚ༷ར་གཅོ༷ད་ཅིང་། །
གཉིས་སུ་མེད་པའི་བྱང་ཆུབ་ཆེན་པོའི་གོ་འཕང་མཆོག་ལ་དབང་བསྒྱུར་བའི། །
རང་བྱུང་ལྷུན་གྲུབ་འཁོར་འདས་སྤྱི་དཔལ་བཅོམ་ལྡན་རྡོ༷་རྗེ༷་གཞོ༷ན་ནུ༷ར་འདུད། །
གངས་ལྗོངས་མདོ་ཁམས་སྨད་ཀྱི་སའི་ཐིག་ལེ། །
གཡུ་ཞེས་སྣོད་བཅུད་དགེ་མཚན་ཕུལ་བྱུང་བར། །
གནམ་ལྕགས་ཕུར་བུའི་དབྱིབས་དང་མཚུངས་པ་ཡི། །
འཁྱིལ་ཆེན་ཞེས་གྲགས་ཕུར་བའི་གནས་ལུང་རྔམ། །
སྟོད་ན་རྒྱ་མདུད་དང་མཚུངས་ཕྲིན་ལས་གྲུབ་པའི་ཡང་རྫོངས་ཆེ། །
བར་ན་འཆང་བཟུང་དང་མཚུངས་གླིང་དཀར་དཔའ་བོའི་ཤྭོ་རྡེལ་ཐང་། །
སྨད་ན་དབལ་སོ་དང་མཚུངས་མཁའ་དབྱིངས་ཆོས་འབྱུང་དཀྱིལ་འཁོར་སྟེ། །
གསུམ་གྱི་ཕྱི་མ་དང་འབྲེལ་བསྟོད་དབྱངས་ཅུང་ཟད་འཐེན་ལ་སྤྲོ། །
ཤར་ན་ཀུན་གསལ་ཉི་ཟླའི་བགྲོད་ལམ་ཡངས། །
ལྷོ་ཕྱོགས་གཡང་གི་རི་བོ་ནོར་བུར་སྤུང་། །
ནུབ་ན་ཟླ་གམ་དབང་གི་ལྷུན་པོས་གཡོར། །
བྱང་ཕྱོགས་དར་གྱི་ཤམ་བུ་ཀུན་ནས་མཛེས། །
ཤ༷ར་གྱི་བྲག་དམར་ཚོམ་བུར་བརྡལ་བ་རྒྱ༵་སྟ༷ག་མ་བུ་ཚང་ནས་ལང་། །
ལྷོ༷་ཆུ་གཡས་ནས་གཡས་སུ་འབབ་པ་གཡུ༷་འབྲུག༷་སྔོན་མོའི་འཁྱུག་འགྲོས་བརྗིད། །
ནུབ༷་ཀྱི་ལྷུན་པོ་ནགས་ཀྱིས་ཕྱུག་པ་བྱ༵་ཁྱུ༵ང་རྒྱལ་པོས་འཇུམ་རྩལ་ངོམས། །
བྱང༵་དུ་བྲག་དཀར་སེ༷ང་གེ༷་འགྱིང་དང་རུ༵ས་སྦ༵ལ་ནུར་འདྲའི་དཔྱད་ཀྱིས་སྒེག །
རྩིབས་བརྒྱད་འཁོ༷ར་ལོ༷འི་རི་མོ་མཁའ་ལ་ཤར། །
ཐེག་བརྒྱད་གྲུབ་མཐའི་ཕྱོགས་སུ་མ་ལྷུང་རྟགས། །
འདབ་བརྒྱད་པ༷དྨ༵འི་རང་མདངས་ས་ལ་བཞད། །
ཐེག་རྩེ་ཟེའུ་འབྲུའི་བཅུད་ལ་རོལ་བའི་རྟགས། །
རྒྱབ་རི་རྨ་བྱའི་བསི༷ལ་གདུ༵གས་ལྟ་བུར་མཛེས། །
རྩ་བརྒྱུད་བླ་མའི་བྱིན་རླབས་འཇུག་པའི་རྟགས། །
མདུན་རི་བསོད་ནམས་གཏེར་གྱི་བུ༵མ་པ༵་བརྗིད། །
ཡི་དམ་ལྷ་ཡིས་དངོས་གྲུབ་སྩོལ་བའི་རྟགས། །
མདུན་གཡས་བྲག་ལ་དཔ༵ལ་བེ༵འུ་ཁུག་མདུད་བཀྲ། །
མ་སྲིང་མཁའ་འགྲོས་བརྩེ་གདུང་ཆེ་བའི་རྟགས། །
དེ་གོང་སྤང་རི་དུ༵ང་དཀ༵ར་གཡས་སུ་འཁྱིལ། །
ཆོས་སྐྱོང་ཕྲིན་ལས་སྲིད་ན་སྙན་པའི་རྟགས། །
གཡོན་རི་རྒྱ༵ལ་མཚ༷ན་ཤམ་བུ་ལྟ་ན་སྡུག །
རྒྱལ་བསྟན་མི་ནུབ་སྲིད་རྩེར་བསྒྲེང་བའི་རྟགས། །
གཡོན་ཞོལ་ཐབས་ཤེས་གསེ༷ར་ཉ༷་ཆབ་ལ་རྩེན། །
ལྷ་ཆོས་མི་ཆོས་ཟུང་དུ་འབྲེལ་བའི་རྟགས། །
རྩ་བརྒྱད་སྟོང་སྦྱར་སྨན་གྱི་བཅུད་ལྡན་བདུ༵ད་རྩི༵འི་ཆུ་བོ་གཡས་ན་འབབ། །
ཉོན་མོངས་རྒྱུ་དྲུག་དབྱིངས་སུ་བསྒྲལ་བའི་ར༵ཀྟ༵འི་རྦ་ཀློང་གཡོན་ན་འཕྱོ། །
ཕྲིན་ལས་ཕུར་པའི་ལྷ་དང་གཉིས་མེད་དཔལ་གྱི་གཏོ༵ར་མ༵་དབུས་ན་རྔམ། །
གསང་ཆེན་གསང་བའི་ཐུན་མིན་སྒྲུབ་རྫས་མ་བཀོད་རང་བྱུང་ལྷུན་གྱིས་གྲུབ། །
དེ་དབུས་གདུག་པའི་ཤིང་གིས་མཐའ་བསྐོར་ཞིང་། །
དུག་གསུམ་དབྱིངས་སྒྲོལ་གྲུ་གསུམ་སུམ་རིམ་ལྡན། །
སྐུ་གསུམ་ལྷུན་གྲུབ་ས་དབྱིབས་ཟུར་གསུམ་པ། །
མཁའ་དབྱིངས་ཆོས་འབྱུང་ཕུར་པའི་ཕོ་བྲང་བརྗིད། །
ཨེ་ཡིག་སྟོང་དབྱིངས་འཁོར་ལོ་རྒྱས་འདེབས་མ། །
ཝཾ་ཡིག་སྣང་ཆ་རྡོ་རྗེ་གཞོན་ནུ་དང་། །
ཐབས་ཤེས་དབྱེར་མེད་ཟུང་དུ་འཇུག་པའི་རྩལ། །
ཕྲིན་ལས་ཕུར་པའི་ལྷ་ཚོགས་ཡོངས་སུ་རྫོགས། །
མདུན་གཡོན་རི་བྲག་བཅུ་དྲུག་གྲལ་འགྲིགས་པ། །
ཕྱི་ལྟར་མཆོད་པའི་ལྷ་མོ་བཅུ་དྲུག་ལ། །
ནང་ལྟར་ཕུར་སྲུང་དམ་ཅན་བཅུ་དྲུག་དང་། །
གསང་བ་དགའ་བཞི་ཡེ་ཤེས་བཅུ་དྲུག་མཚོན། །
རིན་ཆེན་དང་པོས་ལེགས་གཏམས་པའི། །
མཐའ་སྐོར་ནེའུ་གསིང་དོ་ར་ནི། །
དབང་ཆེན་གསེར་གྱི་ས་གཞི་ཞེས། །
རང་བྱུང་ལྷུན་གྲུབ་མཎྜལ་དངོས། །
སྔོན་ཚེ་རྒྱལ་བའི་དབང་པོ་པདྨ་འབྱུང་། །
སྟག་ཞོན་རྡོ་རྗེ་ཁྲོ་བོའི་སྐུར་བཞེངས་ཏེ། །
མདོ་ཁམས་སྨད་ཀྱི་གནས་ཆེན་གནས་ཕྲན་ཀུན། །
བྱིན་གྱིས་བརླབས་ཤིང་གཏེར་ཁ་དཔག་མེད་སྦས། །
གྲུབ་པ་མཆོག་བརྙེས་དཔལ་ཆེན་དགའ་ལོ་པས། །
གཡུ་ལུང་སྤྱི་དང་བྱེ་བྲག་འཁྱིལ་ཆེན་གྱི། །
ཕུ་མདའ་ཀུན་ལ་དངོས་སུ་ཞབས་ཀྱི་བཅགས། །
མི་སྲུན་དམ་ལ་བཏགས་པའི་རྗེས་ཤུལ་གསལ། །
མི་རྗེ་སེང་ཆེན་ནོར་བུ་དགྲ་འདུལ་མཆོག །
དཔའ་ཐུལ་ཕུ་ནུ་ལྷ་འཁོར་བཅས་པ་ཡིས། །
གཡུ་རོང་རྒྱལ་པོ་དབང་དུ་བསྡུས་པའི་སྐབས། །
གནས་འདིར་ཆིབས་ཀྱི་ཁ་ལོ་ལན་མང་བསྒྱུར། །
གཞན་ཡང་པཎ་ཆེན་བཻ་རོ་གཡུ་སྒྲ་སྙིང་། །
ཆོས་དབྱིངས་རང་གྲོལ་ལུང་རྟོགས་བསྟན་འཛིན་སོགས། །
མཁས་དང་གྲུབ་པའི་སྐྱེས་ཆེན་དུ་མ་ཡིས། །
བྱིན་རླབས་མེ་ཏོག་གཏོར་བ་ལན་གཅིག་མིན། །
སྤྲུལ་པའི་གཏེར་ཆེན་ལུང་རིག་གླིང་པ་དང་། །
འགྱུར་མེད་བློ་གྲོས་མཐའ་ཡས་ལ་སོགས་པས། །
མ་རུང་རྒྱལ་འགོང་གདུག་འདྲེའི་ཁ་གནོན་དུ། །
དྲག་བསྙེན་རྡོ་འབུམ་ལྷ་མིའི་མཆོད་སྡོང་བཞེངས། །
རིག་འཛིན་ལུང་རྟོགས་ཆོས་ཀྱི་ཉི་མའི་ཐུགས་བསྐྱེད་དུས་སུ་སྨིན་པ་ལས། །
མ་ཧཱ་ཙི་ནའི་ཐུན་མིན་བཟོ་རྩལ་ཁྱད་འཕགས་འཕྲུལ་ལས་ལེགས་བསྐྲུན་པ། །
ཀ་མ་རུ་པའི་རྡོ་དཀར་ལས་གྲུབ་ཕུར་པའི་བདུད་འདུལ་མཆོད་རྟེན་ཆེ། །
ལྔ་བདོ་སྙིགས་མའི་རུ་མཚོན་བསྙིལ་ཕྱིར་ངོ་མཚར་གནས་འདིའི་རྒྱན་དུ་བསུས། །
དེར་ནི་ཐུན་མོང་ཐུན་མིན་རྟེན་གསུམ་དང་། །
རིང་བསྲེལ་རྣམ་བཞིས་ཕྱུར་བུར་གཏམས་པ་ལས། །
མཐོང་ཐོས་དྲན་རེག་འབྲེལ་ཚད་དོན་ལྡན་པའི། །
ཆེ་བའི་ཡོན་ཏན་བརྗོད་པའི་མཐའ་དང་བྲལ། །
གང་ཟག་ཕོ་མོ་སུ་ཡང་རུང་། །
གནས་འདིར་དད་དང་མོས་པ་ཡིས། །
ཕྱག་མཆོད་བསྐོར་ལ་བརྩོན་བྱས་ན། །
ཐར་དང་རྣམ་མཁྱེན་རྒྱུ་རུ་ངེས། །
ཡི་དམ་ལྷག་པའི་ལྷ་མཆོག་ཀཱི་ལ་ཡའི། །
སྐུ་གསུང་ཐུགས་རྟེན་གནས་འདིར་བཞེང་བ་དང་། །
བསྙེན་སྒྲུབ་རྣམ་བཞིས་སྒྲུབ་པ་ཉམས་བླངས་ནས། །
དོན་གྱི་ཕུར་བ་མཇལ་ལ་འབད་པར་རིགས། །
འདི་བྲིས་དགེ་བས་མཁའ་ཁྱབ་འགྲོ་བ་ཀུན། །
གནས་སྐབས་ཚེ་རིང་ནད་མེད་གང་བསམ་འགྲུབ། །
མཐར་ཐུག་ཁྲག་འཐུང་རྡོ་རྗེ་གཞོན་ནུ་ཡི། །
གོ་འཕང་ཚེ་འདིར་འགྲུབ་པའི་རྒྱུར་གྱུར་ཅིག །
ཞེས་ཚིགས་སུ་བཅད་པ་འབྲས་ཆོས་ཉེར་ལྔའི་གྲངས་ལྡན་འདི་ཡང་གཡུ་སྨྱོན་ཡི་དམ་རྡོ་རྗེས་རབ་བྱུང་བཅུ་དྲུག་པའི་ཤིང་རྟ་ལོའི་བདུན་པ་གྲོ་བཞིན་ཟླ་བའི་དཀར་ཕྱོགས་དགའ་བ་དང་པོ་ལ་བྲིས་པ་འགྲོ་ཀུན་དཔལ་ཆེན་རྡོ་རྗེ་གཞོན་ནུའི་གོ་འཕང་མངོན་དུ་འགྱུར་བའི་རྒྱུར་གྱུར་ཅིག ། དགེའོ། །
དགེའོ། །
དགེའོ། །