གནས་མཆོག་རྡོ་རྗེའི་བྲག་རྫོངས་ལ་ཆ་ཙམ་བསྔགས་པ་ཐར་ལམ་མྱུར་བགྲོད། མགོ་སྤྲུལ་འཇིགས་མེད་རྣམ་རྒྱལ།
གནས་མཆོག་རྡོ་རྗེའི་བྲག་རྫོངས་ལ་ཆ་ཙམ་བསྔགས་པ་ཐར་ལམ་མྱུར་བགྲོད་བཞུགས་སོ། །
༼ས་མུ་ངོས་༽
ཨེ་མ་ཧོ།
ཆོས་སྐུའི་སྟོན་མཆོག་ཀུན་བཟང་ཚེ་མཐའ་ཡས། །
ལོངས་སྤྱོད་རྫོགས་སྐུ་རིགས་ལྔ་གངས་ཆེན་མཚོ། །
སྤྲུལ་སྐུ་རབ་བདུན་མཆེད་བརྒྱད་བདེ་གཤེགས་སྟོང་། །
ཡོངས་འདུས་གུ་རུ་རིན་པོ་ཆེ་ལ་འདུད། །
གངས་ཅན་བོད་ཀྱི་ལྷ་སྐལ་སྤྱན་རས་གཟིགས། །
འགྲོ་བློའི་མ་རིག་མུན་སེལ་འཇམ་པའི་དབྱངས། །
གསང་ཆེན་རྒྱ་མཚོའི་མངའ་བདག་རྡོ་རྗེ་འཆང་། །
རིགས་གསུམ་འགྲོ་བའི་མགོན་པོ་ལ་ཕྱག་འཚལ། །
རྒྱལ་བ་ཀུན་འདུས་གུ་རུ་གྲོ་བོ་ལོད། །
ཡེ་ཤེས་སྤྱན་ལྡན་ལོ་ཆེན་བཻ་རོ་དང་། །
བྲག་རིར་ཐོག་མེད་དཔལ་ཆེན་དགའ་ལོ་སོགས། །
དཔོན་སློབ་བརྒྱུད་པར་བཅས་ལ་ཕྱག་འཚལ་ནས། །
རིགས་གསུམ་འཕགས་པས་བྱིན་གྱིས་བརླབས་པའི་གནས། །
ཨོ་རྒྱན་པདྨས་ཞབས་ཀྱིས་བཅགས་པའི་རི། །
བཻ་རོ་ཙ་ནས་སྒྲུབ་པ་མཛད་པའི་བྲག །
དཔལ་ཆེན་དགའ་ལོས་གྲུབ་རྟགས་བསྟན་པའི་རྫོངས། །
ཕྱི་ལྟར་ས་སྤྱོད་གནས་མཆོག་པོ་ཏ་ལ། །
ནང་ལྟར་མཁའ་སྤྱོད་དཔལ་རི་པདྨ་འོད། །
གསང་བ་འོག་མིན་ཞིང་མཆོག་བདེ་བ་ཅན། །
མཐུན་སྣང་མངོན་གྲུབ་རྡོ་རྗེའི་བྲག་རྫོངས་གནས། །
མཆོག་དམན་བར་མའི་གདུལ་བྱའི་བློ་ཁྱད་བཞིན། །
སྣང་ཚུལ་མ་ངེས་ཡོན་ཏན་བསམ་མི་ཁྱབ། །
དེ་ཕྱིར་མཐའ་དག་བརྗོད་པར་སྤོབས་མིན་ཡང་། །
དད་ལྡན་དྭངས་བ་འདྲེན་ཕྱིར་ཆ་ཙམ་འབྲི། །
སྤྱིར་ནི་བསྐལ་བཟང་འབྱུང་གནས་འཛམ་གླིང་འདིར། །
གནས་ཆེན་ཉེར་བཞི་ཡུལ་ཆེན་སུམ་ཅུ་གཉིས། །
ཧེ་རུ་ཀ་ཡི་གནས་བཅུ་དུར་ཁྲོད་བརྒྱད། །
གྲུ་འཛིན་རི་བོ་རྩེ་ལྔ་ཤམྦྷ་ལ། །
ཙ་རི་འབྲས་ལྗོངས་ཏན་ཏིག་ཡང་ཏིག་སོགས། །
སྦས་ཡུལ་སྒྲུབ་གནས་མང་བས་བྱིན་རླབས་ཆེ། །
ཁྱད་པར་རྒྱལ་མོ་རོང་འདིར་ཐུགས་ཆེན་སོགས། །
གནས་ཆེན་ཉེར་ལྔ་གནས་ལག་ལྔ་བཅུ་གཉིས། །
ཡང་ལག་བརྒྱ་རྩ་ལ་སོགས་མང་བཞུགས་ཕྱིར། །
དག་སྣང་ཅན་ལ་གང་བཞུད་སྐོར་ལམ་ཡིན། །
ཡང་སྒོས་གསང་ཆེན་རྡོ་རྗེའི་བྲག་རྫོངས་འདིར། །
སྔོན་ཚེ་པད་འབྱུང་སྟག་ལ་ཆིབས་ནས་བྱོན། །
བྱིན་ཆེན་དབབ་ཅིང་ཆོས་ནོར་གཏེར་མང་སྦས། །
སྡེ་བརྒྱད་དམ་བཏགས་གནས་གཏེར་སྲུང་མར་བསྐོས། །
བཻ་རོ་ཙཱ་ན་དཔོན་སློབ་སྒྲུབ་གནས་མཛད། །
གྲུབ་པའི་ཆུ་མིག་གཏེར་ནས་བཏོན་པ་དང་། །
སོ་སོའི་སྒྲུབ་ཕུག་ཡི་གེ་རང་བྱོན་མང་། །
གྲུབ་པའི་རྟགས་བཞག་བྱིན་དབབ་རབ་ཏུ་གནས། །
དགའ་ལོ་པ་ཞེས་ལྷ་ལུང་དཔལ་རྡོར་བྱོན། །
གནས་དབུས་ལྷ་ལུང་ཕུག་ཏུ་ཞག་བདུན་བཞུགས། །
གནས་འདིར་བྱིན་དབབ་ལྷ་འདྲེ་དམ་ལ་བཏགས། །
བཀའ་རྟགས་ཕྱག་གི་རི་མོ་རྡོ་ལ་བཀོད། །
རྔུལ་གཟན་བྱབས་པའི་རི་མོ་བྲག་ལ་དོད། །
སྲིན་མོ་བྲེད་སྔངས་བཤང་གཅི་ཤོར་རྗེས་ཡོད། །
མདུན་ཟུར་ནང་སྐོར་བྲག་གི་ངོས་གཡས་ལ། །
དགའ་ལོའི་ཕྱག་བྲིས་རྡོ་དཀར་ཡིག་དྲུག་དང་། །
དེ་འཕྲོར་རྡོ་བསྐོས་སྐུ་བརྙན་གསུང་བྱོན་མ། །
ཁྱད་འཕགས་བྱིན་རླབས་ལྡན་པའི་རྟེན་མཆོག་ཡིན། །
ཆུ་ཁར་སྲིན་མོ་ཕ་ཝཾ་ནང་གབ་ཚེ། །
དཔལ་ཆེན་དགའ་ལོས་ཕ་ཝཾ་འདམ་ལྟར་བརྫིས། །
གནས་ཡིག་འདིའི་མ་དཔེར་འདི་མན་མ་ཚང་། །
གནས་སྒོ་ཕྱེས་མཁན་དང་གནས་ཡིག་མཛད་པ་པོ་ནི་མགོ་སྤྲུལ་གར་དབང་འཇིགས་མེད་རྣམ་རྒྱལ་ལོ། །