གནས་མཆོག་གྲུ་འཛིན་བདེ་ཆེན་འགྱུར་མེད་རྫོངས་དཔལ་ལྡན་ཡོན་ཏན་བརྩེགས་པའི་དགའ་ཚལ་ཆེན་པོར་ཅུང་ཟད་བསྟོད་པ་གཞན་གསོས་བུ་མོའི་དྲུག་འགྱུར། ཡི་དམ་རྡོ་རྗེ།

གནས་མཆོག་གྲུ་འཛིན་བདེ་ཆེན་འགྱུར་མེད་རྫོངས་དཔལ་ལྡན་ཡོན་ཏན་བརྩེགས་པའི་དགའ་ཚལ་ཆེན་པོར་ཅུང་ཟད་བསྟོད་པ་གཞན་གསོས་བུ་མོའི་དྲུག་འགྱུར་ཞེས་བྱ་བ།

༼གླ་ཡུམ༽

རྒྱལ་ཀུན་བརྩེ་ཆེན་མཚན་དཔེའི་སྐུར་སྨིན་ཁམས་གསུམ་འགྲོ་བའི་དཔལ་ཤར་ཡང་། །

སྨོན་ལམ་མཆོག་གི་སྤྱ༵ན་ར༵ས་ཡངས་པས་བསིལ་ལྡན་ཁ་བའི་ལྗོངས་ཉིད་དུ། །

རྣམ་ཀུན་གཟི༵གས་པའི་དམ་བཅའ་ལེགས་བཟུང་གང་འདུལ་སྤྲུལ་པའི་ཉིན་བྱེད་འབུམ། །

མངོན་པར་སྤྲོ་མཛད་གྲུ་འཛིན་མགོན་དེས་ཀུན་ནས་ཤིས་པའི་དགེ་ལེགས་སྩོལ། །

བསྟ༵ན་པའི་སྙིང་པོ་སྙིང་ཐིག་མན་ངག་ཞུན། །

སྙིང་གི་ཐིག་ལེར་སྲུ༵ང་ཞིང་ཚེ༵་ཆོས་འདིར། །

ས་ལམ་དབ༵ང་བར་འདུན་སོགས་བཞེད་སྐོང་ཕྱིར། །

གཞན་གསོས་བུ་མོའི་དྲུག་འགྱུར་སྒྲོག་ལ་བྲེལ། །

འཛམ་གླིང་ཡང་རྩེར་འགྱིང་བ་ཡི། །

གངས་ཅན་ཤར་ཕྱོགས་མདོ་ཁམས་སྨད། །

གཡུ་ལུང་དགའ་བ་བརྒྱ་ལྡན་པའི། །

ས་ཡི་རྟེན་ཕུར་འཕགས་པའི་གནས། །

གྲུ༵་འཛི༵ན་མགོན་པོས་གྲུ་འཛིན་ཞིང་ནས་བྱིན་རླབས་འོད་དཀར་འདི་རུ་སྤྲོས། །

རྒྱལ་བ་གཉིས་པས་རྒྱལ་བའི་བྱིན་ལྡན་ཟབ་གཏེར་གནས་འདིའི་ལྟོ་བར་བསྟིམས། །

གཡུ་མཚོའི་བདག་པོས་གཡུ་མཚོའི་ཀློང་ནས་གནས་གཏེར་བསྟན་པའི་སྲུང་མ་མཛད། །

བདེ༵་ཆེ༵ན་ཡེ་ཤེས་འགྱུ༵ར་བ་མེ༵ད་པ་ངང་གིས་འཆར་བའི་ཡང་རྫོ༵ངས་བསྔགས། །

སེང་ཆེན་རྗེ་དང་བཻ་རོ་གཡུ་སྒྲ་སྙིང་། །

ལྷ་ལུང་དཔལ་རྡོར་རྒྱལ་བ་ཀརྨ་པ། །

ཉི་ཟླ་སྙིང་པོ་ལུང་རིག་གླིང་པ་སོགས། །

དམ་པ་དུ་མས་ཞབས་བཅགས་བྱིན་གྱིས་བརླབས། །

རྒྱལ་བ་བྱང་ཆུབ་སྤྲུལ་པའི་རོལ་ག༵ར་དག་སྣང་ཆོས་ལ་མངའ་དབ༵ང་བསྒྱུར། །

བསམ་ཡས་ཆོས་ཚུལ་རྒྱ་མཚོའི་མཐར་སོན་འཇི༵གས་མེ༵ད་སྤོབས་པའི་མཆོག་ཐོབ་ཅིང་། །

མི་མཐུན་རྒོལ་བའི་ཕྱོགས་ལས་རྣ༵མ་རྒྱ༵ལ་གྲགས་སྙན་ཕྱོགས་སུ་གཡོ་བ་དེས། །

རབ་ཚེས་མེ་མོ་སྦྲུལ་་གྱི་ལོ་ལ་གནས་འདིའི་ཐོག་མའི་སྒོ་འཕར་ཕྱེས། །

གནས་འདིའི་ཕྱི་དབྱིབས་རྒྱལ་ཀུན་སྙིང་རྗེའི་གཏེར། །

སྡུག་བསྔལ་རང་གྲོལ་མགོན་གྱི་སྐུའི་རང་བཞིན། །

ཕྱོགས་ཀྱི་རི་ཕྲན་བྱེ་བས་འདུད་པ་ནི། །

ལྷ་བརྒྱའི་གཙུག་གི་ནོར་བུས་མཆོད་པ་འདྲ། །

ཕྱི་ལྟར་ས་སྤྱོད་ཞིང་ཁམས་པོ་ཏ་ལ། །

ནང་ལྟར་བཅོམ་ལྡན་བདེ་མཆོག་འཁོར་ལོའི་གནས། །

གསང་བ་འོག་མིན་ཆོས་དབྱིངས་ཕོ་བྲང་དངོས། །

དཔ༵ལ་ལྡ༵ན་ཡོ༵ན་ཏ༵ན་བརྩེ༵གས་པ༵འི་དག༵འ་བའི་ཚ༵ལ། །

ཡིད་འོང་ལྗོན་པའི་ཚལ་རྣམས་ཉམས་དགའ་ཞིང་། །

མེ་འབྲས་ལོ་མའི་སྐྱེད་ཚལ་མིག་གི་དཔྱིད། །

རི་སྐྱེས་རྩེད་འཇོར་རོལ་བ་བག་གྲོ་བས། །

མཐོ་རིས་དཔལ་ཡོན་ས་ལ་འཕོས་པ་འདྲ། །

ཤ༵ར་གྱི་མཐོངས་ཡངས་གྲོགས་ལམ་དཀར་པོར་རྒྱ་སྟ༵ག་ཁྲ་མོའི་འཛུམ་དྲུག་བཀྲ། །

ལྷོ༵་ཡི་རི་སྤུང་གཡང་གི་ལམ་མཛེས་གཡུ་འབྲུ༵ག་སྔོན་མོ་ཚང་ནས་རྡོལ། །

ནུ༵བ་རི་བཙན་པོས་འགག་སྒོ་ལེགས་བསྡམ་མཁ༵འ་ལྡི༵ང་དབང་པོས་སྒྲོ་གཤོག་བརྐྱངས། །

བྱ༵ང་རི་དར་གྱི་ཡོལ་བ་ལེགས་བྲེས་རུ༵ས་སྦ༵ལ་རྒྱལ་པོ་མཚོ་རུ་རྩེན། །

གནས་འདིར་རྒྱལ་ཀུན་གསང་གསུམ་བཀོད་པ་རྫོགས། །

འབྲེལ་ཚད་སྐུ་གསུང་ཐུགས་སུ་འགྲུབ་པའི་བརྡར། །

ཨོཾ་ཨཱཿཧཱུཾ་གསུམ་མ་བྲིས་རང་བྱོན་ལ། །

རྩ་གསུམ་ལྷ་དང་སྲུང་མའི་བྱིན་འོད་འཐིབ། །

གནས་དབུས་སྤྱ༵ན་གཟི༵གས་བྲ༵ག་གི་མདུན་ངོས་ན། །

གངས་ཅན་འགྲོ་བའི་སྐྱབས་གཅིག་འཇིག་རྟེན་དབང་། །

མ་བཀོད་མངོན་པར་གསལ་བའི་དགེ་མཚན་གྱིས། །

མོས་ལྡན་སྐྱེ་བོའི་ལས་སྒྲིབ་སྦྱོང་བར་བྱེད། །

གཡས་ཕྱོགས་འཇ༵མ་དབྱ༵ངས་བྲ༵ག་གི་ངོས། །

རལ་གྲི་པུསྟི་མདའ་དང་གཞུ། །

གཡོན་ཕྱོགས་གས༵ང་བད༵ག་གན༵ས་རི༵་ལ། །

གནམ་ལྕགས་རྡོ་རྗེ་རང་བྱོན་གསལ། །

ཡིད་འཕྲོག་བྲག་རིའི་ངོས་ན་རང་ཤར་བའི། །

གཡས་སུ་འཁྱིལ་བ་བཀྲ་ཤིས་ཆོས་ཀྱི་དུང་། །

སྲིད་ཞིའི་ཁམས་ན་འུར་བའི་སྒྲ་དབྱངས་ཀྱིས། །

རྩ་གསུམ་དམ་ཅན་དུས་ཀུན་གནས་འདིར་བསྡུ། །

སྨྲ་བའི་དབང་ཕྱུག་ལོ་ཆེན་བཻ་རོ་དང་། །

རྒྱལ་མོ་རོང་པ་གཡུ་སྒྲ་སྙིང་པོའི་ཞབས། །

མི་སྲུན་མཐར་བྱེད་ལྷ་ལུང་དཔལ་རྡོར་བས། །

སྒྲུབ་པ་མཛད་པའི་སྒྲུབ་ཕུག་བྱིན་ནུས་ལྡན། །

ནོ༵ར་བུ༵་བྲ༵ག་གི་གཡས་ངོས་ན། །

སྒྲོལ་དཀར་ཡིད་བཞིན་འཁོར་ལོ་དང་། །

ཁྱུ༵ང་ཆེ༵ན་བྲ༵ག་གི་འདབ་རོལ་ན། །

ཐུབ་དབང་བཞེངས་སྐུ་རང་བྱོན་གསལ། །

གཞན་ཡང་གསུང་མཆོག་ཡི་གེ་དྲུག་མ་དང་། །

དཔལ་དགུའི་ཐུགས་སྲོག་ཧཱུྃ་ཡིག་དགུ་ཡིས་མཚོན། །

ཡིག་འབྲུ་ཕྱག་མཚན་བརྡ་རིས་མཆོད་རྫས་སོགས། །

མདུན་རོལ་བྲག་ངོས་རྣམས་སུ་མངོན་པར་བཀྲ། །

གནས་རིའི་དབུ་རྩེར་མཐོང་གྲོལ་ཆོ༵ས་རྩི༵ག་བྲ༵ག །

ཕྱི་ལྟར་གསུང་རབ་གླེགས་བམ་བརྩེགས་པའི་དབྱིབས། །

ནང་ལྟར་གཏེར་ཆོས་མཁའ་འགྲོའི་བརྡ་ཡི་མཛོད། །

གསང་བ་འབུམ་ཕྲག་རྒྱུད་ཀྱི་གཞལ་ཡས་ཁང་། །

གཡུ་སྒྲས་ཟར་གྱི་སྲིན་མོ་བཏུལ་བ་ཡི། །

བག་ཆགས་འཁོར་རྒྱུན་གཅོད་ཕྱིར་གནས་འདི་རུ། །

སྒྲུབ་པ་མཛད་ཚེ་བཻ་རོས་རྫུ་འཕྲུལ་གྱིས། །

གཏེར་ནས་བཏོན་པའི་སྒྲུབ་ཆུ་ནུས་བཅུད་ལྡན། །

གང་ཞིག་འཁོར་བའི་འཇིགས་པས་ཡིད་སུན་ནས། །

གཏན་བདེའི་ལམ་ལ་སྙིང་ནས་སྨོན་པ་རྣམས། །

སྐྱེ་འཆི་བར་དོ་སྒྲོལ་འཕྲང་ལ་ཞུགས་ན། །

ལུགས་འབྱུང་སྲིད་པའི་འཁོར་ལོ་ལྡོག་པར་འགྱུར། །

རྒྱལ་ཀུན་གསུང་གི་དབང་ཕྱུག་དབྱངས་ཅན་མ། །

གདུལ་དཀའི་གཤེད་དུ་ཁྲོས་པ་རེ་མ་ཏི། །

བཀའ་ཉན་མཁའ་འགྲོ་ཆུ་སྲིན་གདོང་ཅན་བཅས། །

ཆོ༵ས་སྐྱོ༵ང་བྲ༵ག་གི་ངོས་ན་ལམ་མེར་གསལ། །

ལྷ་སྲིན་སྡེ་བརྒྱད་བྲན་དུ་བཀོལ་ཕྱིར་ཁྲོ་འཁྲུགས་རྔམ་པའི་དབུ་བརྒྱད་བརྗིད། །

སྒྲུབ་པ་པོ་ལ་དངོས་གྲུབ་སྟེར་ཕྱིར་ཞི་ཞིང་བཞད་པའི་ཞལ་རས་མཛེས། །

བྱ་ར་བགྱིད་པའི་བྱ་རོག་དབུ་དང་སྤྱན་སྟོང་རབ་འབར་རཱ་ཧུ་ལའི། །

འཇིགས་རུང་སྐུ་བརྙན་རང་བྱོན་བཀྲ་བ་དམ་ལྡན་སྙིང་གི་དགའ་སྟོན་ཉིད། །

ཁམས་གསུམ་ལེགས་ཉེས་འབྱེད་པའི་སྤྱན་གཅིག་འཕྲུལ། །

དགྲ་སྙིང་དྲུང་ནས་འབྱིན་པའི་ཚེམས་གཅིག་གཙིགས། །

སྒྲུབ་མཆོག་བུ་བཞིན་སྐྱོང་བའི་ནུ་གཅིག་མ། །

རལ་གཅིག་དབྱིངས་ཀྱི་རྒྱལ་མོ་བཀྲག་ཏུ་འབར། །

བདེ༵་གཤེ༵གས་དབྱི༵ངས་ཀྱི༵་སྒྲུ༵བ་ཕུ༵ག་ན། །

དཔལ་དགུའི་བསྲུང་བཟློག་འཁོར་ལོ་རྣམས། །

བསྲུང་དང་བཟློག་པའི་ནུས་ལྡན་པ། །

ལས་སྐལ་ལྡན་པའི་གཅེས་ནོར་ཉིད། །

གཡས་ཀྱི་ལུང་པར་རྡོ་རྗེ་གླུ༵་མ༵་ཡིས། །

རྒྱུད་མང་དབྱངས་དང་བསྡེབས་པའི་བརྡ་གླུ་ལེན། །

གཡོན་གྱི་ལུང་པར་རྡོ་རྗེ་གླི༵ང་བུ་མས། །

སྙན་འཇེབས་གླིང་བུའི་སྒྲ་ཡིས་བསྟོ༵ད་པར་བྱེད། །

མདུན་ཐང་རྡོ༵་རྗེ༵་ག༵ར་མ༵འི་བྲོ༵་ར༵་ན། །

གནས་གསུམ་དཔའ་བོ་མཁའ་འགྲོས་བྲོ་གར་འཁྲབ། །

མཆོ༵ད་སྤྲི༵ན་བྲ༵ག་ལ་རྡོ་རྗེ་མེ་ཏོག་མས། །

པདྨ་དཀར་པོའི་ཆར་བ་འབེབས་ཚུལ་མཛེས། །

འཇིགས་མེད་རྣམ་པར་རྒྱལ་བའི་ཕྱག་སོར་ལས། །

རྣམ་པར་འཕྲུལ་བའི་ཐུན་མིན་ཆ་ཚད་ཅན། །

སྒྲིབ་སེལ་མཆོད་རྟེན་སྤྱན་གཟིགས་ཡིག་དྲུག་སོགས། །

མཐོང་བ་དོན་ལྡན་རྟེན་མཆོག་བགྲང་ལས་འདས། །

རྒྱབ་དུ་རྔམ་བརྗིད་རྫ་སྤང་ལྷུན་པོ་སྤྲིན་དང་སྨུག་པའི་མགུལ་ཆིང་ཅན། །

རྩེ་མོ་དགུང་སྔོན་དབྱིངས་སུ་སྙེགས་པས་ཉི་ཟླ་རྣ་བའི་རྒྱན་དུ་སྤྲས། །

གཡས་གཡོན་གཡུ་མཚོ་ཟུང་གིས་མཛེས་པས་སྨན་གཏོར་རཀྟའི་མཆོད་པ་ཚང་། །

གནས་གཏེར་སྲུང་མ་སྐུ་ལྷ་དངུལ་རྫི་རྡོ་རྗེ་དབང་བསྡུད་རྩལ་དུ་གྲགས། །

བཀའ་ཉན་བློན་པོ་གསུམ་གྱིས་བསྟན་པ་སྐྱོང་། །

དགྱེས་སྐོང་ཀླུ་སྨན་གསུམ་གྱིས་ལོ་ཕྱུག་སྤེལ། །

ཡིད་འོང་ལྷ་སྲས་གསུམ་གྱིས་ཕྱྭ་གཡང་སྡུད། །

རབ་ཁྲོས་ལས་མཁན་གསུམ་གྱིས་བསྟན་དགྲ་སྒྲོལ། །

དུས་འགྱུར་འཚུབ་མས་སྐྱེ་འགྲོའི་རྒྱུད་གཡོས་རྟེན་གསུམ་བཤིག་བསྲེག་གཅོག་པའི་སྐབས། །

སྒྲིབ་ཀུན་སེལ་བའི་མཆོད་རྟེན་ཞལ་ཁེབ་འབྲོག་མིས་སྦྲ་ཡི་སྒོར་བཞག་ཚེ། །

གནས་གཏེར་བདག་པོས་རྡོ་ཡི་ཆར་ཕབས་རྒད་པོ་བྲེད་ཅིང་སྔངས་བྱས་ཕྱིར། །

སུས་ཀྱང་གནས་འདི་གཞོམ་མ་ནུས་པའི་ངོ་མཚར་གཏམ་གྱིས་དྭངས་བ་འདྲེན། །

གྲུབ་པའི་དབང་ཕྱུག་ལུང་རྟོགས་རྒྱལ་མཚན་གྱིས། །

སྒྲིབ་མེད་ཡེ་ཤེས་སྤྱན་གྱིས་ཉེར་གཟིགས་ཚེ། །

མནོལ་རྩོག་ཉམས་པའི་གྲིབ་ཀྱིས་མ་གོས་པའི། །

གནས་འདི་བྱིན་ལྡན་གཞན་ལས་འཕགས་ཅེས་བསྔགས། །

ཤར་རིའི་ཕྲག་ནས་ཆས་པའི་ཉིན་བྱེད་དབང་། །

དད་པའི་ཤུགས་ཀྱིས་གནས་འདིའི་མདུན་བདར་ཡང་། །

ངོ་མཚར་ཞིང་གི་བཀོད་པས་ཡིད་ཕྲོག་ནས། །

ཆུ་ལྷའི་པང་ནས་ཕྱི་མིག་ཡང་ཡང་ཤོར། །

སྒྲ་དབྱངས་ལྷ་མོའི་མིང་པོ་རི་བོང་འཛིན། །

གནས་འདིའི་སྙན་དང་གྲགས་པས་དྲངས་གྱུར་ནས། །

རྒྱུ་སྐར་ལྷ་མོ་རྣམས་དང་ལྷན་ཅིག་ཏུ། །

གླིང་བཞིའི་མཁའ་ལ་རྒྱུ་བའི་ཟོལ་གྱིས་ལྷགས། །

དྭངས་བསིལ་གཡུ་ཆུ་སྔོན་མོ་སྒེག་འགྲོས་ཀྱིས། །

མཐའ་བྲལ་ཀླུང་དུ་ལྟད་མོར་ཆས་པ་ཡང་། །

འཕགས་པའི་གནས་ཀྱི་ལང་ཚོར་ཡིད་ཆགས་ནས། །

གཡས་འཁྱིལ་ལན་དགུའི་དུང་བའི་ཟུར་མིག་ཤོར། །

ཕ་རོལ་རྨ་ལུང་དཀྱིལ་འཁོར་སྒང་ན་ལྷང་ངེར་བརྗིད་པའི་དེའུ་ཡང་། །

རིན་ཆེན་གཡུ་ཡི་མཆོད་སྟེགས་སྟེང་དུ་འདོད་འབྱུང་ཡིད་བཞིན་དབང་གི་རྒྱལ། །

ལེགས་པར་བཀོད་དེ་འཕགས་པའི་གནས་འདིར་མཆོད་སྤྲིན་སྟོབས་པའི་ངང་ཚུལ་དུ། །

ཕུན་ཚོགས་བྱེད་པོས་ཆེད་དུ་བསྐྲུན་པའི་ཡ་མཚན་ལྟད་མོ་མིག་གི་དཔྱིད། །

གནས་འདིར་ཕྱག་སྐོར་རྟེན་བཞེངས་སྒྲུབ་བརྩོན་ན། །

བྱིན་ནུས་སྟོབས་མྱུར་ཕན་ཡོན་རྒྱ་ཆེ་བ། །

གཞན་མའི་གནས་ལས་ཁྱད་པར་འཕགས་པའི་ཕྱིར། །

དུས་ཀུན་དགེ་ལ་འབུངས་ཤིག་གྲོགས་པོ་དག །

གནས་འདིའི་རང་བཞིན་ཐོས་པའི་ཚེ། །

སྐྱེ་བོ་ཕྱོགས་རེའི་མིག་ཅན་དག །

ཆགས་སྡང་གཏམ་ལ་མི་ཞུགས་པར། །

གནས་འདིར་ལན་ཅིག་ཕེབས་པར་འཚལ། །

བདག་སོགས་སྐྱེ་དང་སྐྱེ་བའི་ཕྲེང་བ་རུ། །

གནས་འདིར་དགེ་ལ་བརྩོན་པའི་གྲོགས་སུ་གྱུར། །

མཐར་ཐུག་མི་འབྲལ་ཚོམ་བུ་གཅིག་ཉིད་ཏུ། །

ངེས་དོན་སྤྱན་གཟིགས་རང་ཞལ་མཇལ་བར་སྨོན། །

དེ་ལྟར་ངོ་མཚར་གྲུ་འཛིན་གནས་མཆོག་ལ། །

བསྟོད་ཚིག་སྙན་པའི་གླུ་རུ་བླངས་པའི་དགེས། །

འགྲོ་ཀུན་ཞི་བ་མཆོག་གི་ལམ་བགྲོད་ནས། །

གྲུ་འཛིན་མགོན་པོའི་ཞབས་དྲུང་འཁོད་གྱུར་ཅིག །

ཅེས་གནས་བསྟོད་གཞན་གསོས་བུ་མོའི་དྲུག་འགྱུར་ཞེས་པ་འདི་ནི། མདོ་ཁམས་གཡུ་རོང་ཕྱོགས་ཀྱི་ཐུན་མིན་ཆོས་ཀྱི་མཆེད་པོ་དུ་མས་ལན་མང་བསྐུལ་བའི་ཞལ་ངོ་མི་ལྡོག་ཆེད། གང་དྲན་སྨྲ་བའི་སྨྱོན་པ་ཡི་དམ་རྡོ་རྗེར་འབོད་པས་རང་ཉིད་གནས་འདིར་ཐོག་མར་སླེབས་པའི་དུས་སྐབས་ཏེ། བོད་རབ་བྱུང་བཅུ་བདུན་པའི་ལྕགས་སྟག་ཧོར་ཟླ་གཉིས་པའི་དམར་ཕྱོགས་མཁའ་འགྲོ་འདུ་བའི་དུས་ཆེན་ཉིན་གནས་དེ་རུ་སྦྱར་བ་འགྲོ་ཀུན་འཕགས་པས་རྗེས་སུ་འཛིན་པའི་རྒྱུར་གྱུར་ཅིག །