མྱི་གསར་གནས་བསྟོད་རིན་ཆེན་སྣ་བདུན། ཡི་དམ་རྡོ་རྗེ།
མྱི་གསར་གནས་བསྟོད་རིན་ཆེན་སྣ་བདུན་ཞེས་བྱ་བ། །
༼ཉུག་སར་༽
ཨེ་མ།
སྔོན་ཚེ་རྒྱལ་དབང་པདྨས་བྱིན་གྱིས་བརླབས། །
བར་དུ་རྣམ་སྣང་ལོ་ཙཱས་ཞབས་ཀྱིས་བཅགས། །
དེ་རྗེས་གར་དབང་འཇིགས་མེད་རྣམ་རྒྱལ་བས། །
མངའ་རིའི་གསུང་གི་གནས་སུ་ངོས་འཛིན་མཛད། །
སྟོད་ཕྱོགས་མྱི༵་མིན་ཙན་ཏན་སྡོང་པོ་དེ། །
སྨད་ཀྱི་གནས་འདིའི་སྲུང་མར་གས༵ར་བསྐོས་པས། །
མྱི་གསར་ཞེས་གྲགས་ངོ་མཚར་ཞིང་མཆོག་འདིར། །
ཐོག་མར་སླེབས་ཚེ་བསྟོད་དབྱངས་འཐེན་ལ་སྤྲོ། །
གྲོགས་དང་གཡང་གི་ལམ་བུ་རིང་ལ་མཛེས། །
ཀ་བཞི་སྲུང་བཞིའི་ས་དཔལ་ཀུན་ནས་རྫོགས། །
རྩེ་བརྒྱད་ལྷུན་པོའི་སྤོ་ན་ཡངས་པའི་མཁའ། །
རྩིབས་བརྒྱད་འཁོ༵ར་ལོ༵་རི༵ན་ཆེ༵ན་རྣམ་པར་ཤར། །
ཕྱི་ན་སྨན་དང་ལྗོན་པའི་དྲྭ་བས་སྤྲས། །
ནང་ན་ཆོས་དང་ནོར་གྱི་གཏེར་ཁས་གཏམས། །
དུང་སེང་གངས་ལ་འགྱིང་འདྲའི་གཡུ་རི་བྲག །
འདོད་འབྱུང་ནོ༵ར་བུ༵་རི༵ན་ཆེ༵ན་ངང་ཚུལ་འཛིན། །
གནས་གཏེར་བཀའ་ཡི་སྲུང་མ་མཐུ་རྩལ་ཅན། །
ཆོས་དང་ནོར་གྱི་བདག་པོ་དཔལ་ཡོན་ཅན། །
མྱི་གསར་ལྷ་མགོན་རྡོ་རྗེ་འོད་རབ་འབར། །
ཁྱི༵མ་བད༵ག་རི༵ན་ཆེ༵ན་གང་གི་དཔལ་ཡོན་མངའ། །
མདུན་རོལ་གཡས་གཡོན་དགྱེས་སྐོང་ཀླུ་སྨན་མཆེད། །
ཕྱི་ལྟར་དྭངས་བསིལ་རྙོགས་མེད་བདུད་རྩིའི་སྐྱེམས། །
ནང་ལྟར་སྨན་དང་རཀྟ་མཆོད་པའི་རྫས། །
བཙུ༵ན་མོ༵་རི༵ན་ཆེ༵ན་འདི་ལས་གཞན་དུ་མེད། །
མདུན་ན་འཇིགས་རུང་རྫ་བྲག་ནགས་ཀྱི་རི། །
མྱི་རྒོད་ལ་སོགས་སྡེར་ཆགས་བག་ཡངས་རྒྱུ། །
ཙཱ་རིའི་ཡ་ཐུབ་གནས་སྲུང་དཔའ་བོ་ནི། །
དམ༵ག་དཔོ༵ན་རི༵ན་ཆེ༵ན་ང་ཞེས་སྒྲོགས་དང་མཚུངས། །
མདུན་གཡོན་ཟླུམ་ལ་བརྗིད་པ་སྤང་གི་རི། །
ལེགས་ཚོགས་བཅུད་དུ་དྲིལ་བའི་དཔལ་ཡོན་ཅན། །
ཡག་ཐོག་ཞེས་གྲགས་ངོ་མཚར་མིག་གི་དཔྱིད། །
སྟོབས་ལྡན་གླ༵ང་པོ༵་རི༵ན་ཆེ༵ན་ངང་ཚུལ་འཛིན། །
ཉེ་ཆར་གདོང་རིང་ནགས་དང་ལྗོན་ཚལ་གྱི། །
ཟེ་རྔོག་སྤྲིན་ལྟར་ཕྱུག་པའི་ས་འཛིན་དཔལ། །
འགྲོས་ལྡན་ཅང་ཤེས་བང་རྩལ་བསྐྱོད་འདྲ་བ། །
རྟ༵་མཆོ༵ག་རི༵ན་ཆེ༵ན་ས་ལམ་མྱུར་བགྲོད་རྟགས། །
དེ་ལྟར་རིན་ཆེན་བདུན་ལྡན་གནས་མཆོག་གི། །
རང་བཞིན་གསལ་བར་བྱས་པའི་དགེ་བའི་མཐུས། །
བདག་སོགས་མཁའ་ཁྱབ་འགྲོ་བ་མ་ལུས་པ། །
རྣམ་གྲོལ་ལམ་ལ་འཇུག་པའི་རྒྱུར་གྱུར་ཅིག །
ཞེས་པ་འདི་ཡང་རབ་བྱུང་བཅུ་བདུན་པའི་ས་གླང་སྣྲོན་ཟླའི་དམར་ཕྱོགས་བཟང་པོ་གསུམ་པ་ལ་ཡི་དམ་རྡོ་རྗེར་འབོད་པས་གནས་དེ་རུ་བྲིས་པ་དགེ་ལེགས་འཕེལ། །