དཔལ་རི་བདེ་ཆེན་རྫོངས་ཀྱི་གནས་བསྟོད་མདོར་བསྡུས་ལྷ་ཡི་གྲུ་ཆར། ཡི་དམ་རྡོ་རྗེ།
དཔལ་རི་བདེ་ཆེན་རྫོངས་ཀྱི་གནས་བསྟོད་མདོར་བསྡུས་ལྷ་ཡི་གྲུ་ཆར་ཞེས་བྱ་བ།
༼ས་དམར་དགོན་ཤར༽
རབ་འབྱམས་སྲས་བཅས་རྒྱལ་བའི་གསང་གསུམ་གར། །
གཅིག་བསྡུས་འོ་མ་ཅན་གྱི་མཚོ་གླིང་དུ། །
ངོ་མཚར་པདྨའི་རྩེར་འཁྲུངས་པདྨ་རྒྱལ། །
དུས་ཀུན་དད་དང་གུས་པའི་ཡིད་གྱིས་བསྙེན། །
འཛམ་གླིང་མདོ་ཁམས་གཡུ་ཞེས་གྲགས་པ་ཡི། །
བྱེ་བྲག་དབང་མདོག་དགའ་བ་ལྗོངས་ཀྱི་ཉིན། །
དཔལ་རི་བདེ་ཆེན་རྫོངས་ཀྱི་གནས་མཆོག་ལ། །
བསྟོད་ཚིག་ལྷ་ཡི་གྲུ་ཆར་ཅུང་ཟད་འཐོར། །
སྔོན་ཚེ་ལོ་ཙཱ་བཻ་རོ་ཙ་ན་ཡིས། །
ཐུགས་བསྐྱེད་དུས་བབ་རྒྱལ་མོ་རོང་དུ་ཕེབས། །
གནས་འདིར་ཟབ་གཏེར་སྟོང་དང་ལྔ་བརྒྱ་སྦས། །
རྒྱལ་དབང་པདྨ་སྤྱན་དྲངས་བྱིན་གྱིས་བརླབས། །
ཁྱད་པར་དབང་དྲག་དཀྱིལ་འཁོར་ཞལ་ཕྱེས་ནས། །
སྐྱེས་བུ་མཆེད་གསུམ་གནས་གཏེར་སྲུང་མར་བརྐོས། །
རྡོ་རྗེ་དགའ་བ་ཕྲིན་ལས་ཐོག་མེད་རྩལ། །
དབང་ཆེན་མཆོག་གྲུབ་རྩལ་ཞེས་མཚན་དུ་གསོལ། །
དེ་རྗེས་གར་དབང་འཇིགས་མེད་རྣམ་རྒྱལ་བས། །
རྫོངས་བདུན་གནས་ཀྱིས་འགྲོ་དོན་སྒོ་ཕྱེས་ཚེ། །
དཔལ་རི་བདེ་ཆེན་རྫོངས་ཀྱི་གནས་མཆོག་ཞེས། །
བགྲང་ཡས་འགྲོ་བའི་བསོད་ནམས་དཔལ་དུ་བསྐྲུན། །
དབུ་རྩེ་ཆོས་སྐུའི་གནས་མཆོག་ཉམས་དགའ་བ། །
བར་མཚམས་ལོངས་སྐུ་རིགས་གསུམ་མགོན་པོའི་རི། །
རི་འདབས་རྒྱལ་དབང་ཨོ་རྒྱན་ཆེན་པོ་ལ། །
རྗེ་འབངས་ཉེར་ལྔས་བསྐོར་བའི་གནས་སུ་གསུངས། །
སློབ་དཔོན་པདྨ་ཀཱ་རའི་སྐུ་ཡི་རྗེས། །
གཡུ་སྒྲའི་སྒྲུབ་ཕུག་སྤྲིན་གྱི་རི་མོ་ཅན། །
རྒྱལ་བ་མཆོག་དབྱངས་སྒྲུབ་ཕུག་གྲུབ་པའི་ཆུ། །
གནས་སྲུང་དྲེགས་པའི་གཙོ་བོའི་བླ་ཤིང་མཛེས། །
མཁའ་འགྲོའི་བྲོ་ར་དམ་པའི་རྐང་གླིང་དང་། །
སློབ་དཔོན་ཤནྟིཾ་གརྦྷའི་ཐུན་རའི་རྗེས། །
ཐང་རྒྱལ་སྒྲུབ་ཕུག་ཆོས་དུང་གཡས་སུ་འཁྱིལ། །
སྐྱེ་འཆི་བར་དོ་སྒྲོལ་འཕྲང་རྨད་དུ་བྱུང་། །
མ་མགོན་ལྕགས་སྤྱང་ཕུར་བུའི་རི་མོ་དང་། །
ལྷུང་བཟེད་དང་ནི་གནྚི་རང་བྱོན་གསལ། །
འབྲུ་གསུམ་དང་ནི་ཡིག་འབྲུ་སྣ་ཚོགས་ཀྱིས། །
ཁོར་ཡུག་བྲག་གི་ངོས་ཀུན་ཡོངས་སུ་ཁྱབ། །
གནས་འདིར་དད་པས་ཕྱག་སྐོར་སྒྲུབ་བརྩོན་ན། །
ཚེ་འདིའི་རྐྱེན་ཞི་ཕྱི་མའི་ལམ་སྣ་ཟིན། །
དྭངས་བའི་སེམས་ཀྱིས་ཐལ་མོ་སྦྱོར་བས་ཀྱང་། །
སྲིད་རྩ་ཧྲུལ་བོར་བགྱིད་པ་གདོན་མི་ཟ། །
དེ་ལྟར་གནས་ཀྱི་རང་བཞིན་མདོར་བསྡུས་པ། །
ཤིན་ཏུ་ཉུང་ངུའི་ངག་གིས་གླེང་བའི་དགེས། །
བགྲང་ཡས་འགྲོ་བ་རིག་དྲུག་དུཿཁ་ལས། །
རྣམ་གྲོལ་ཞི་བ་མཆོག་གི་སར་བགྲོད་ཤོག །
ཞེས་པ་འདི་ཡང་ཡི་དམ་རྡོ་རྗེར་འབོད་པས་ལྕགས་སྟག་ས་ཟླའི་ཡར་ཚེས་ལྔའི་ཉིན་བྲིས་པ་དགེ། །