༈ ཁ་སྐོང་ཨུཏྤལ་ཆུན་པོ། ཡི་དམ་རྡོ་རྗེ།
རྩ་རྒྱུད་བླ་མ་ཡི་དམ་ཞི་ཁྲོའི་ལྷ། །
དཔའ་བོ་མཁའ་འགྲོ་དམ་ཅན་ཆོས་སྐྱོང་དང་། །
ཡུལ་ལྷ་གཞི་བདག་དཀར་ཕྱོགས་སྐྱོང་རྣམས་ཀྱིས། །
ལེགས་ཚོགས་བྱེ་བའི་མེ་ཏོག་ཆར་དུ་སྙིལ། །
དེ་ཡང་ཁ་བ་གངས་ཅན་གྱི་ལྗོངས་འདི་ནི་བདག་ཅག་གི་སྟོན་མཆོག་ཐུབ་པའི་དབང་པོས་འཕགས་མཆོག་སྤྱན་རས་གཟིགས་ཀྱི་གདུལ་ཞིང་དང་དམ་ཆོས་ཀྱི་ཉི་མ་འཆར་བར་ལུང་དུ་བསྟན་པར་མ་ཟད་རྒྱལ་དབང་པདྨ་ཀཱ་རས་གཏེར་སྦས་བྱིན་གྱིས་བརླབས་ཚུལ་ནི། གངས་ལྗོངས་ས་གཞི་རྟ་རྨིག་གང་ཙམ་ཡང༔ ཞབས་ཀྱིས་མ་བཅགས་མེད་པའི་བྱིན་རླབས་མཛད༔ གསུངས་པ་ལྟར་དང་།ཁྱད་པར་དུ་བཻ་རོའི་རྣམ་ཐར་པདྨའི་དགའ་ཚལ་དུ། དེ་ནས་བཻ་རོ་རྒྱལ་བློན་བཙུན་འབངས་བཅས༔ ཚ་བའི་རོང་གི་རྒྱལ་ཁམས་ཐམས་ཅད་ཉུལ༔ ཁྱད་པར་གནས་ཆེན་སུམ་ཅུ་རྩ་བརྒྱད་བཙལ༔ གནས་ཆེན་བྱིན་དབབ་ས་གཞི་བྱིན་གྱིས་བརླབས༔ ཟབ་མོའི་གཏེར་སྦས་སྲུང་མ་རྣམས་ལ་བཅོལ༔ བདེ་གཤེགས་སྤྱན་དྲངས་དངོས་སུ་བསྟིམས་བཞུགས་མཛད༔ རྒྱལ་བློན་འབངས་བཅས་བྱིན་ཆགས་བཞུགས་པ་ལ༔ བཻ་རོའི་ཐུགས་ལས་འོད་ཟེར་ནུབ་ཕྱོགས་འཕྲོས༔ རིག་འཛིན་གུ་རུ་པདྨ་འབྱུང་གནས་ལ༔ འཁོར་དུ་མཁའ་འགྲོ་སྡེ་བཞིའི་བསྐོར་ནས་བྱོན༔ ཞེས་སོགས་གསུངས་པའི་བོད་ཀྱི་རོང་ཆེན་བཞིའི་ནང་ཚན་ཤར་རྒྱལ་མོ་ཚ་བ་རོང་གི་ཆར་གཏོགས་པ་མདོ་ཁམས་གཡུ་མཁར་བདེ་སྐྱིད་ནོར་བུའི་ར་བ་རུ་གྲགས་པའི་གནས་མཆོག་འདིར་རྒྱལ་དབང་ཨོ་རྒྱན་ཆེན་པོ། ལོ་ཆེན་བཻ་རོ་ཙཱ་ན་སོགས་ཀྱིས་གཏེར་སྦས་བྱིན་དབབ། འཛམ་གླིང་གི་གནས་ཆེན་དག་དང་བྱིན་ནུས་མཉམ་པར་བྱིན་གྱིས་བརླབས་པའི་གནས་རྣམས་ཀྱི་གནས་ཡིག་ལོ་རྒྱུས་ཕལ་ཆེར་གོང་གསལ་ལྟར་ལས། དེ་དག་ཏུ་མ་འཁོད་པ་དང་། ལོ་རྒྱུས་ལྡན་པའི་གནས་རི་ཁ་ཤས་ཀྱི་ལོ་རྒྱུས་མདོར་བསྡུས་ཞར་བྱུང་ཁ་སྐོང་དུ་འགོད་ན། གཡུ་ཁྲོམ་གངས་ཀྱི་རི་བོར་རྒྱལ་དབང་པདྨས་སྒྲུབ་པ་མཛད་ཚུལ་ནི ། བདུད་འཇོམ་གླིང་པའི་བཀའ་བསྡུས་སུ། དེ་ནས་རྡོ་རྗེ་གཡུ་ཁྲོམ་དུ༔ ཞག་གསུམ་སྒྲུབ་པ་མཛད་ཅིང་བཞུགས༔ ཞེས་གསུངས་པ་དང་། རང་དགོན་གྱི་བླ་མ་རྒྱ་ཤུལ་ཆོས་དཔལ་རྒྱ་མཚོས་སྒྲུབ་གནས་ཁྱད་འཕགས་སུ་བསྔགས་ནས་ཁོང་ཉིད་ཡུན་རིང་བར་དེར་སྒྲུབ་ལ་གཞོལ་བ་དང་། གཡུ་མཚོའི་ཁ་ལ་བསྐོར་བ་ལན་གཅིག་བྱས་ན་སིདྡྷི་དུང་གཅིག་གི་ཕན་ཡོན་ཡོད་ཚུལ་གསུངས།
གཡུ་སྟོད་རྫ་ལུང་ནི་རྒྱ་ཤུལ་ཤེས་རབ་བཟང་པོས། ཐང་ཡིག་ཏུ། གཡུ་ཕུ་རྫ་ལུང་སྦས་པའི་གཏེར་ཁ་འདི༔ ཞེས་འབྱུང་བའི་གནས་ལག་དང་། ཁོང་རང་ཉིད་གཏེར་སྟོན་རྒྱ་ཞང་ཁྲོམ་གྱི་སྤྲུལ་པ་ཡིན་པར་ཞལ་གྱིས་བཞེས་ཤིང་གཏེར་བླངས་ཚུལ་གྱི་ལོ་རྒྱུས་ཡོད།
ཤུག་འདབ་སྟོད་ཀྱི་བྲག་ཆོས་རྩིག་གི་ཕུ་མདའ་རྣམས་རྗེ་འབངས་ཉེར་ལྔའི་སྒྲུབ་གནས་ཡིན་པར་གྲགས། དེ་ཡང་ཧཱུྃ་ལུང་ན་ཧཱུྃ་ཡིག་བཀྲ་བའི་རྫ་རི་གུ་རུའི་གནས་དང་། ཉི་མ་རབ་ཁ་ནམ་མཁའི་སྙིང་པོའི་གནས། སྟག་རྗེས་སོག་པོ་ལྷ་དཔལ་གྱི་གནས། ལྷ་གཡག་བདུད་གཡག་དྲན་པ་ནམ་མཁའི་གནས། ཕ་ཝཾ་དཀར་མོ་རྨ་ཐོག་རིན་ཆེན་གྱི་གནས། གནས་ལུང་དུ་མཚོ་རྒྱལ་གྱི་ཞབས་རྗེས་ཡོད་པ་ཡེ་ཤེས་མཚོ་རྒྱལ་གྱི་གནས། བྲག་ཆོས་རྩིག་གི་ངོས་རྣམས་སུ་དཔལ་གྱི་རྡོ་རྗེའི་ཐལ་བྱུང་དུ་ཕུག་པའི་བྲག་རི། གནུབ་ཆེན་སངས་རྒྱས་ཡེ་ཤེས་ཀྱིས་བྲག་ལ་བཏབ་པའི་ཕུར་རྗེས་སོགས་གྲུབ་བརྙེས་གཞན་རྣམས་ཀྱི་སྒྲུབ་གནས་སོ་སོར་ཡོད་ཅེས་མཁན་སྨན་བླས་གསུངས།
གསེར་གཞོང་ཁུག་གི་ལྗོན་ཤིང་ནི་སྔོན་མཁན་ཆེན་པདྨ་བཛྲ་གནས་འདིར་ཕེབས་སྐབས་ཕྱག་འཁར་སར་བཙུགས་ནས་བཞག་པ་སྐྱེས་ནས་ལྗོན་ཤིང་དུ་གྱུར་པ་ཞིག་ཡིན་ཞེས་བཤད་སྲོལ་ཡོད།
ན་སྣེ་དང་། དེའུ་འབེ། གཡུ་དགོན་ཉེ་འདབ་གསུམ་གྱི་ཚྭ་ཆུ་ནི་རིགས་གསུམ་སེམས་དཔས་བྱིན་གྱིས་བརླབས་པའི་གནས་ཚྭ་ཡིན་ཞེས་སྔོན་རྒྱ་ལྷས་གསུངས།
འཁྱིལ་ཆེན་ཁོག་གི་ཉིན་ཕྱོགས་ན་མ་གཤིན་ཕུར་གསུམ་གྱི་གནས་སྒོ་འབྱེད་རྒྱུ་ཡོད་པར་སྔོན་ཁྱི་ཤུལ་བླ་མ་རིག་བཟང་དང་། ཨ་རིག་གཉིས་ཀྱིས་གསུངས། དེ་ཡང་ཤོག་ཤོག་ནང་གི་རྡོ་ཕག་རང་བྱུང་ཡོད་པའི་རི་དེ་འོད་ཟེར་ཅན་མའི་གནས་དང་། གཤིན་རྗེའི་བྲག་སྟེ་གཤིན་རྗེའི་བསྙེན་པ་རང་བྱོན་ཡོད་པ་དེ་གཤིན་རྗེའི་གནས་དང། ཧ་མདོའི་བྲག་དེའུ་དེ་རྡོ་རྗེ་ཕུར་པའི་གནས་ཡིན་པར་བཞེད། འཁྱིལ་ཆེན་ཉིན་སྲིབ་ཀྱི་ཚྭ་གཉིས་པོ་ནི་དཔལ་དགའ་ལོ་པའི་གཏེར་ཚྭ་ཡིན་པ་དང་། ཉིན་ཚྭའི་བྲག་ངོས་སུ་ཕྱག་རྗེས་དང་། ལྷ་མོའི་དྲེལ་རྗེས། གྲི་བཙན་གྱི་ཁྱི་རྗེས། མཆོད་རྟེན་རང་བྱོན། གཏེར་སྒོ་གྲུ་བཞི། གཞན་ཡང་རྒྱལ་བ་ཀརྨ་པའི་རྟ་རྗེས་བཅས་མཇལ་རྒྱུ་ཡོད།
གླག་ཚང་ནི་དཔོན་བླ་དགེ་འདུན་རྒྱ་མཚོས་བགྲང་བྱ་དུ་མའི་རིང་སྒྲུབ་པ་མཛད་པའི་གདན་ས་དང་། ཁོང་གི་ཐུགས་སྲས་བླ་མ་ཚུལ་ཁྲིམས་བསྟན་འཛིན་ནས་ཟངས་མདོག་དཔལ་རིའི་གནས་དང་གནས་སྲུང་བཀྲ་ཤིས་ལྷ་རྩེ་ཡིན་པར་གསུངས། སྐུ་དབེན་ནི་མགོ་སྤྲུལ་འཇིགས་མེད་རྣམ་རྒྱལ་སྐུ་ཚེའི་སྨད་ཀྱི་བཞུགས་གནས་དང་། གཡས་ཕྱོགས་སྐུ༵་གསུམ་དབེ༵ན་གནས་ཞེས་པར་རིགས་དྲུག་གི་བཀོད་པ་དང་། ཐུབ་དྲུག་གི་ས་བོན་སོགས་རང་བྱོན་སྣ་ཚོགས་ཡོད་པར་བཤད་ཅིང་། གནས་བདག་ཀླུ་སྨན་ལྕམ་དྲལ་ཡིན་པར་གསལ། ཙར་ཡ་ནི་ཙ་རིའི་གནས་དང་བྱིན་ནུས་མཉམ་པའི་གནས་ཞིག་ཡིན་པར་བཤད་སྲོལ་ཡོད་ལ། ཁ་ཅིག་གིས་རས་པ་འབུམ་ཐར་གྱིས་གནས་སྒོ་ཕྱེས་པར་བཤད། ཁ་ཅིག་གིས་མགོ་སྤྲུལ་གྱིས་ཕྱེས་ཟེར། མགོ་སྤྲུལ་གྱིས་བྲིས་པའི་བསང་མཆོད་ཞིག་ཏུ། ཙཱ་རིའི་ཡ་ཐུབ་གནས་སྲུང་བསང་། ཞེས་འབྱུང་། སྔོན་ཆད་ཤོག་བུའི་ངོས་ལ་བྲིས་ནས་ཤིང་ལེབ་ལ་སྦྱར་བའི་གནས་ཡིག་ཞིག་གནས་མདུན་དུ་ཡོད་པར་གྲགས་ཀྱང་དུས་འགྱུར་གྱི་འཚུབས་མས་མི་སྣང་བའི་གཡང་ས་ཞིག་ཏུ་བསྐྱུར། ཆུ་དབར་མཚོ་མདའི་དེའུ་དེ་གཟན་དཀར་རིན་པོ་ཆེ་པདྨ་དངོས་གྲུབ་རོལ་པའི་རྡོ་རྗེས་ཟངས་མདོག་དཔལ་རིའི་གནས་སུ་ངོས་བཟུང་བྱིན་གྱིས་བརླབས། ཉེ་ཆར་མཆོག་སྤྲུལ་ཐུབ་བསྟན་ཉི་མས་ཀྱང་གནས་གཟིགས་དང་འབྲེལ་བྱིན་གྱིས་བརླབས་པར་མཛད་དོ། །
ཡུལ་གྲོང་སྐྱེ་བོ་རྣམ་ལ་སྤྲིང་བའི་བཀའ།
ༀ་བདེ་ལེགས་སུ་གྱུར་ཅིག༔
མཁའ་སྤྱོད་བདེ་ལྡན་ཟངས་མདོག་དཔལ་རིའི་ཟླ༔
ས་སྤྱོད་སྦས་ཡུལ་གྲུབ་བརྒྱའི་བསྟི་སྟངས་གནས༔
རྩ་གསུམ་མཆོད་པའི་སྤྲིན་ཚོགས་ཐིབས་སེ་བ༔
གནས་དེ་དྲན་པས་བྱང་ཆུབ་རྒྱུད་ལ་འདྲོང༔
ཕྱག་སྐོར་ཚོགས་བསགས་བྱས་ཚད་བདེ་ཆེན་བགྲོད༔
སྦས་ཡུལ་ངོ་མཚར་ཅན་དེར་སྙིང་ནས་འདུད༔
སྔོན་ཚེ་རྡོ་རྗེ་གྲོ་ལོད་བཻ་རོ་དང༔
རྒྱལ་མོ་གཡུ་སྒྲ་ལྷ་ལུང་དཔལ་རྡོ་རྗེས༔
བྱིན་རླབས་བྱིན་དབབ་ཕྱག་གིས་མེ་ཏོག་འཐོར༔
གནས་སྲུང་བཀའ་བསྒོས་བསྟན་པའི་བྱ་རར་བཞག༔
བར་དུ་ཧཱུྃ་རལ་ཆོས་རྒྱལ་གླིང་པ་སོགས༔
བན་བོན་རིག་འཛིན་གྲུབ་བརྙེས་དུ་མ་ཡིས༔
གནས་བསྟོད་དབུགས་དབྱུང་སྲུང་མ་གཟའ་ཀླུ་དང༔
རྒྱལ་བཙན་རྡོ་རྗེ་གཡུ་ཁྲོམ་སོགས་ལ་གཏད༔
དམ་ཚིག་གཉན་པོའི་ཐ་ཚིག་མང་པོ་བསྒྲགས༔
ཁས་བླངས་དམ་བཅའི་རི་མོ་སྙིང་ལ་སིམ༔
ཨོ་རྒྱན་ཆེན་པོའི་བཀའ་ཡི་གསུང་ལས་ཀྱང༔
ལྷ་འདྲེ་རྣམས་ལ་བཀའ་གཏད་འདི་བཞིན་བསྒྲགས༔
མ་འོངས་ང་ཡི་སྒྲུབ་གནས་གཏེར་གནས་ལ༔
ཐོ་འཚམ་ལོག་པའི་ངན་སྤྱོད་འཆང་བ་ལ༔
ལྷ་འདྲེའི་བཀའ་ཆད་གནམ་ལྕགས་ཐོག་མདའ་རྒྱོབས༔
མི་འདོད་ལོག་ལམ་ཁྲིད་ལ་ཚེ་མཇུག་སྟུངས༔
གསུངས་པ་བཞིན༔ རི་ཤིང་མེ་ལ་བསྲེགས་པ༔ གནས་ཆེན་ཚོ་ལ་རི་རྒྱ་བཤིགས་པ་དང༔ འགུག་རྙི་ཁྱི་བཀྱེ་བ་སོགས་སྡིག་པའི་བསམ་སྦྱོར་ངན་པ་དང་དུ་བླངས་བར་བྱས་ན༔ རང་རང་གི་ཚེ་བསོད་འགྲིབ་པ༔ མི་འདོད་སྡུག་བསྔལ་སྣ་ཚོགས་འབྱུང་བས་བག་ཡོད་བརྟེན་འཚལ༔ ཁྱད་པར་ཡུལ་འདིའི་མི་མཐོ་དམན་བར་གསུམ་ཀུན་གྱི་སེམས་ལ་ངེས་རྒྱུར༔ གནས་འདིའི་ཕྱི་སྐོར་ཡང་མཐའི་སྐོར་ལམ་ཚུན་ཆད་དུ་རི་དྭགས་གཤོར་བ༔ གནས་འབྲེལ་འཇོག་པའི་བླ་སེར་ཨ་ལྕོ་མི་སྐྱ་ཕོ་མོ་སུ་ལའང་བཙན་བཙུགས་གླེང་འདེབས༔ རྐུན་འབག་ཆོམ་པོ་སྤུ་ཙམ་ཡང་བྱེད་མི་ཆོག་ཐོག༔ འགུག་རྙི་མེ་མདའ་བྱི་སྒམ་བྱ་བྱིའུ་རྡོ་རྒྱབ་ཙམ་ཡང་མི་ཆོག་ངེས་ཅན་ཡིན༔ ཡིན་ལུགས་ཇི་ལྟར་ཡིན་ན༔ ལྷ་དང་སྲུང་མ་གནས་བདག་བྲག་དཀར་རྡོ་རྗེ་གཡུ་ཁྲོམ་སོགས་གཏེར་སྲུང་དྲག་རྩལ་ཅན་ཚོའི་བཀའ་ཆད་གནམ་ལྕགས་རྒྱོགས་རྡོས་བཙའ་སད་སེར་བ་འབྱུང༔ ཚེ་བསོད་དཔལ་འབྱོར་འཛད༔ མི་འདོད་སྡུག་བསྔལ་ངན་པས་ཚེ་འདི་དང་ཕྱི་མ་དག་ལ་མནར༔ བླ་མ་སེར་མོ་བ་དག་གིས་ཀྱང་ཐུགས་ཀྱིས་ཁྲེལ༔ བཀའ་ཡི་ཆད་པ་གཏོང༔ ཡུལ་མི་དཔོན་སྡེ་རྣམས་ཀྱིས་ཉེས་ཅན་དེ་ཡི་སྲོག་ལ་རྒོལ་ཞིང་ལོངས་སྤྱོད་འཕྲོག༔ མིས་འཕྱ་ཁྱིས་འགོམ་ཟེར་བ་དེ་ལའོ༔ དེ་ཕྱིར་བདག་ཅག་དང་སྔོན་ཚེ་རིག་འཛིན་དུ་མའི་བཀའ་བསྒོ་དམ་བཞག་དྲན་ཅིང་༔ གནས་འདིར་དད་གསུམ་བརྟན་པོས་རྣམ་དཀར་དགེ་བ་མཐའ་དག་སྒྲུབ་ཅིང་བསང་རི་མཆོད་གཙང་མ་ཕུལ་ཞིང་ཕྱག་སྐོར་གྱིས་དུས་འདའ༔ ཁ་ནས་ཅི་འདོད་ཀྱི་སྨོན་ལམ་ལེགས་པོ་བཏབ་ན་ཚེ་འདིར་ཚེ་རིང་ལོངས་སྤྱོད་འཕེལ༔ བཀྲག་མདངས་རྒྱས༔ སྙན་གྲགས་ཐོབ༔ ཚེ་ཕྱི་མར་ཡང་མངོན་མཐོ་ལྷ་མིའི་བདེ་འབྲས་དང་བདེ་ཆེན་དག་པའི་ཞིང་དུ་དབུགས་འབྱིན༔ མཐར་ཐུག་སངས་རྒྱས་འགྲུབ་པ་ཡིན་པས་ཀུན་གྱིས་སེམས་ལ་འཇོག་པར་ཞུ༔ རྣམ་དཀར་སོར་རྩེས་བསྒྲོན་པའི་མིག་སྨན་མས༔ ཡུལ་གྲོང་སྐྱེ་བོའི་སྙིང་ལ་སྡུག་པའི་གཏམ༔ ལེགས་བཤད་རིན་ཆེན་ཕྲེང་བའི་རི་མོ་འདིས༔ བདེ་ནས་བདེ་བའི་ལམ་ལ་འཇུག་པར་ཤོག༔ ཅེས་པའང་ཕན་པའི་མིང་གིས་སྨྲས་པའོ།། །།