ཆ་མདའ་བློ་གྲོས་རབ་གསལ་ནི།
རབ་བྱུང་བཅུ་བཞི་པའི་མཇུག་ཏུ་གཡུ་ཁོག་ཆ་མདའ་བའི་ཁྱིམ་དུ་སྐུ་འཁྲུངས། ཆ་མདའ་ཚང་ནི་བྲག་འགོའི་ཆ་ནང་ལུང་མདའ་ནས་གཡུ་ཁོག་ཏུ་འོངས་བས་ཆ་མདའ་བ་ཐོགས་པ་ཡིན་པར་ཐོས། རྫོགས་ཆེན་སོགས་སུ་གྲྭ་སར་ཕེབས། དཔོན་སློབ་བཞི་པ་འཇིགས་མེད་ཆོས་དབྱིངས་འོད་གསལ་དང་། རྒྱ་ལྷ་མོ་ཚེ་རིང་། ཧོར་བླ་གཞན་ཕན་སོགས་ལས་སྨིན་གྲོལ་གྱི་གདམས་པ་དུ་མ་མནོས། རྟེན་སྔགས་འཆང་། དུས་རྒྱུན་སྐྱ་ཆས་སྤྲས། གྲི་རིང་སྐེད་ལ་དྲངས། དབུ་སྐྲ་སླས་མ་བྱས་ཤིང་དུང་ཟླུམ་བརྒྱུས། སྙན་ལ་དུང་གི་ཝ་མིག་བརྒྱན་པ། ཆང་དང་དུ་བ་རྒྱུན་གསོལ་མཛད་ཅིང་། དུ་བ་གསོལ་ཚེ་མཚམས་རེར་ཕྱག་སོར་བཅུའི་རྩེ་ནས་དུ་བ་སྤོས་དུད་ལྟར་སྤྲོ་བ་དང་། གཤིན་པོའི་སྔས་མགོར་བྱོན་ཚེ་དུ་བ་ཚགས་རེ་འཐེན་ཅིང་རོ་མགོར་བརྡབས་ནས་སྐྲ་རྟགས་ལེན་མཁན་ཞིག་ཡིན་པར་བཤད། མཚན་སྔགས་ནག་བློ་གྲོས་རབ་གསལ། རྨད་བྱུང་བདེ་ཆེན་དགྱེས་པའི་རྡོ་རྗེ། ཡོངས་གྲགས་སུ་ཆ་མདའ་རབ་ལོ་ཞེས་འབོད། འཕགས་ཡུལ་གྱི་གྲུབ་ཆེན་ས་ར་ཧ་པ་དང་། གུ་རུའི་ཐུགས་ཀྱི་གཟུངས་མ་བལ་མོ་ཤཀྱ་དེ་ཝ་སོགས་ཀྱི་སྤྲུལ་བར་གྲགས། རབ་བྱུང་བཅོ་ལྔ་པའི་ཤིང་སྦྲུལ་ས་ག་ཟླ་བའི་ཡར་ཚེས་ལ་རྒྱ་ལྷ་མོ་ཚེ་རིང་གིས་གཡུ་སྒྲ་སྙིང་པོའི་གསོལ་ཐོད་དུམ་བུ་གཅིག་པ་འདོད་དགུའི་རྫས་ཀྱིས་བཀང་བ་དང་། ཁོང་གི་གཏེར་བྱོན་མ་འོངས་ལུང་བསྟན་གསལ་བྱེད་སྒྲོན་མེ་གཉིས་གནང་ཤིང་། ཨོ་རྒྱན་མཁའ་སྤྱོད་གླིང་པ་ཞེས་མཚན་བཏགས་ཏེ་རྩ་བའི་ཆོས་བདག་ཏུ་མངའ་གསོལ། ཧོར་བླ་གཞན་ཕན་པའི་གཏེར་བྱོན་དྲང་སྲོང་སྨུག་ནག་འོད་འཕྲོ་སོགས་ཀྱི་ཆོས་བདག་ཀྱང་ཡིན་པར་གསལ། ནོར་ནད་བྱུང་བ་ལ་ཐུན་གྱིས་བྲབས་པས་ནད་ངན་རྒྱུན་ཆད་པ་དང་། རྫེ་ཐ་རྒྱལ་ངན་འཁྱིལ་ཆེན་ཕྱོགས་ནས་གཡུ་ཁོག་ཏུ་འོང་དུས་ཁོང་གིས་འུར་དེད་བྱས་ཤིང་ཕྱིར་བསྐྲད་པ་དང་། གྲི་རིང་ལ་མདུད་པ་བརྒྱབ་པ་སོགས་གྲུབ་པའི་རྟགས་མཚན་དུ་མ་མངའ། གཡུ་དགོན་ཁྲོ་བོ་མཆོད་ཆོག་གི་ཁྲི་བཞུགས་མཛད། འདའ་ཁར་ནང་མི་རྣམས་ལ་ང་ཤི་རྗེས་ཁྱེད་ཚོས་ཡང་སྤྲུལ་རྩད་གཅོད་བྱེད་མི་དགོས། ཉིན་ཞིག་གཡག་སྣ་ལོ་མ་ཁྲིད་མཁན་ཞིག་ཁྱིམ་འདིར་འོང་ན་དེ་ང་ཡིན་སོགས་གསུངས་ནས་འཁྱིལ་ཆེན་ལྕང་ཤར་མདོ་རུ་རེ་ཞིག་ཞི་བར་གཟིམ་པའི་ཚུལ་བསྟན་ཏོ།།