མཇུག་རྩོམ།
སླར་སྨྲས་པ། གངས་ལྗོངས་ས་ཡི་ཐིག་ལེ་མདོ་ཁམས་ཡུལ། །གཡུ་ཞེས་ངོ་མཚར་ལྷ་ཡི་དགའ་ཚལ་དུ། །ལས་སྨོན་དཔྱིད་ཀྱི་རྒྱལ་མོའི་ཤིང་རྟ་ཡིས། །ཆོས་སྲིད་མགྲོན་དུ་བོས་པའི་མཐའ་མ་དམིགས། །
མི་བརྟན་དུས་ཀྱི་སྲིན་མོའི་རྣམ་འགྱུར་དང་། །མི་རབས་གསར་རྙིང་བརྗེ་བའི་ཁུག་སོ་ནས། །གཡུ་ཁྲོམ་གངས་རིའི་འདབས་ཀྱི་གཏམ་རྒྱུད་དེ། །ལྷག་མེད་དབྱིངས་སུ་ཐིམ་པའི་དོགས་པ་ལྕི། །ཕ་མེས་གོང་མས་ཡི་གེར་མ་བཀོད་ཅིང་། །དེང་གི་གསར་བུས་ཉན་དུ་མི་འདོད་པ། །ཡིད་ལ་རིང་དུ་བསྲེལ་བའི་འདས་དོན་རྣམས། །གླེང་བའི་སྤྲོ་དགའ་སྙིང་གི་དཀྱིལ་ནས་འཛུམ། །ཆུང་དུས་རྣ་བའི་ལམ་དུ་མང་ཐོས་པ། །སྙིང་གི་སྒྲོམ་དུ་གཅེས་པར་མ་བཟུང་བས། །སྨྱུག་ཤོག་ལག་ཏུ་བླངས་པའི་དུས་སྐབས་རེར། །མེས་པོའི་ཞལ་རས་དྲན་པ་ལན་གཅིག་མིན། །སྲིད་པའི་གངས་རི་ཆགས་ནས་ད་ལྟའི་བར། །བྱུང་བའི་སྒྲུང་རིང་བརྗོད་པའི་མཐུ་ཆུང་ཡང་། །སྐྱེས་པའི་ལྟེ་ཁྲག་འཐོར་སའི་ཕ་ཡུལ་གྱི། །རང་བཞིན་བརྗོད་པ་ཁོ་བོའི་སྐལ་བར་ཐོབ། །ཁུངས་ལྡན་ཡིག་ཆ་དུས་འགྱུར་མེ་ལྕེས་ཟོས། །
མཁྱེན་ཡངས་རྒན་རབས་དག་ཀྱང་ཕྱི་མར་ཆས། །ལོ་ཟླའི་རླབས་ཕྲེང་བརྩེགས་པའི་མཚོ་མཐའ་ནས། །སྔོན་བྱུང་ལོ་རྒྱུས་འདི་ཙམ་ཁོ་བོས་རྙེད། །བགྲང་བྱ་སྟོང་ཕྲག་ལྷག་གི་ནང་བྱུང་བའི། །ལོ་རྒྱུས་ཐོར་བུའི་བང་སོ་གསར་པ་འདི། །གཡུ་ཁོག་པ་ལ་བཞག་པའི་རྩམ་རིན་ཡིན། །རྗེས་དྲན་གཟིགས་བསྐོར་མ་གཅོད་ཕྱི་རབས་རྣམས། །ཚུལ་འདི་ལྷག་བསམ་དག་པས་བྱས་མོད་ཀྱང་། །མ་རྟོག་ལོག་རྟོག་རྨོངས་པའི་གཞན་དབང་གིས། །འགལ་དང་མ་འབྲེལ་རྙོག་མས་སྦག་པ་ཀུན། །གཟུར་གནས་བློ་ལྡན་རྣམས་ལ་སྙིང་ནས་འཆགས། །ལེགས་ཆ་མཆིས་ན་རྒྱལ་བའི་བསྟན་པ་དར། །བསྟན་འཛིན་ཞབས་བརྟན་སྐྱེ་དགུ་བདེ་ཞིང་སྐྱིད། །འཛམ་གླིང་ཞི་བདེ་གངས་ལྗོངས་ཆོས་སྲིད་རྒྱས།།གང་བསམ་ལྷུན་གྱིས་འགྲུབ་པའི་རྒྱུ་རུ་ཤོག །འཛམ་གླིང་འཛིན་མའི་དབུ་རྩེ་བོད་ཀྱི་ཡུལ། །གངས་ཅན་སྒེག་མོའི་བཞིན་རས་མདོ་ཁམས་ལྗོངས། །སྒང་དྲུག་མཛེས་མའི་སྤྱན་མིག་གཡུ་ཡི་མཁར། །སྡེ་བཞིའི་དཔལ་གྱིས་ཀུན་ནས་འཁྱུད་གྱུར་ཅིག །ཅེས་མདོ་ཁམས་གཡུ་ཁོག་ཡུལ་གྱི་ཆོས་སྲིད་ཀྱི་བྱུང་བ་བརྗོད་པའི་དེབ་ཐེར་ངོ་མཚར་ལྷ་ཡི་རོལ་མོ་ཞེས་བྱ་བ་འདི་ནི་རིང་མོའི་དུས་ནས་རང་ཡུལ་གྱི་ལོ་རྒྱུས་ཕྱོགས་བསྡུས་ཤིག་ཡོད་ན་སྙམ་ཀྱང་བགྲང་བྱ་དུ་མའི་རིང་དེ་མུར་ལུས། ཤིང་ལུག་ལོའི་དགུན་དུས་སུ་མཁན་ཤེས་བྱ་ཀུན་གཟིགས་མཆོག་གིས་གང་ཟིན་གྱི་ལོ་རྒྱུས་ཕྱོགས་གཅིག་ཏུ་བསྡུ་དགོས་པའི་བཀའ་གསུང་སྤྱི་བོར་ཕེབས་པའི་ཕྱི་ཉིན་ནས་འབྲི་མགོ་བརྩམས་ཏེ། བོད་རབ་བྱུང་བཅུ་བདུན་པའི་མེ་སྤྲེལ་སྣྲོན་ཟླའི་དཀར་ཕྱོགས་རྒྱལ་བ་དང་པོ། དྲང་སྲོང་ལྷ་ཡི་བླ་མ། རྒྱུ་སྐར་རྒྱལ་དང་རྩེན་པའི་འགྲུབ་སྦྱོར་གྱི་ཉི་མ་ལ་གཡུ་ཁོག་པ་ཡི་དམ་རྡོ་རྗེར་འབོད་པས་གཡུ་མཁར་ཐེག་ཆེན་ཆོས་འཁོར་གླིང་གི་རང་སྤྱིལ་ནས་མཇུག་གྲུབ་པར་བགྱིས་པ་ཕྱིས་ལྕགས་བྱི་ཆུ་སྟོད་ཟླ་བའི་དཀར་ཕྱོགས་དགའ་བ་དང་པོའི་ཉིན་འཕྲི་སྣོན་དང་བཅས་ཏེ་སྤེལ་བར་བྱས་པ་དགེ་ལེགས་འཕེལ། །