ཨོ་རྒྱན་སངས་རྒྱས་གཉིས་པའི་སྐུ་ཚབས་གཙོ་བོར་གྱུར་པའི་སྐུ་གསུང་ཐུགས་རྟེན་ལ་གུས་པར་བྱེད་པའི་ཚུལ་བརྗོད་པ་ལེགས་ལམ་དམ་པའི་གསོས་སྨན།
ཨོ་རྒྱན་སངས་རྒྱས་གཉིས་པའི་སྐུ་ཚབས་གཙོ་བོར་གྱུར་པའི་སྐུ་གསུང་ཐུགས་རྟེན་ལ་གུས་པར་བྱེད་པའི་ཚུལ་བརྗོད་པ་ལེགས་ལམ་དམ་པའི་གསོས་སྨན་ཞེས་བྱ་བ་བཞུགས་སོ།།
ན་མོ་པདྨ་ཀཱ་རཱ་ཡེ། །རྒྱལ་ཀུན་གསུང་གི་རྡོ་རྗེ་འོད་དཔག་མེད། །སིན་དྷུའི་པད་མཚོར་མཚན་དཔེའི་སྐུར་སྣང་བ། །ཁབ་ཅན་གྱི་སྐྱབས་གཅིག་ཐུགས་རྗེའི་གཏེར། །ཨོ་རྒྱན་རྡོ་རྗེ་འཆང་གི་བྱིན་གྱིས་རློབས། །ཞེས་མཆོད་པར་བརྗོད་པ་ཅུང་ཟད་ཀྱིས་མདུན་བསུས་ནས་འདིར་གང་གླེང་བར་བྱ་བ་ནི། སྤྱིར་བདག་ཅག་གི་སྟོན་པ་ཐབས་མཁས་ལ་ཐུགས་རྗེ་ཆེན་པོའི་མངའ་བདག་རྒྱལ་བ་ཡང་དག་པར་རྫོགས་པའི་སངས་རྒྱས་དེ་ཉིད། །ཆོས་སྐུའི་གནས་སྐབས་ན་སྐུ་དང་ཡེ་ཤེས་རྒྱ་མཚོའི་བདག་ཉིད་དུ་མངོན་པར་རྫོགས་པར་བྱང་ཆུབ་ནས། གདུལ་བྱས་ཐོབ་པ་རྣམས་ཀྱི་སྣང་ངོར་ལོངས་སྤྱོད་རྫོགས་པའི་དབྱིངས་དང་སྐུའི་རྣམ་རོལ་ཚད་མེད་པ་བསྟན་ནས་ཐེག་པ་ཆེན་པོ་ཉག་གཅིག་གི་ཆོས་ཀྱི་གདུལ་བྱ་རྗེས་སུ་འཛིན་ལ། སྤྲུལ་པའི་སྐུའི་གནས་སྐབས་ན། བཟོ་
དང་སྐྱེ་བ་མཆོག་གི་སྤྲུལ་སྐུའི་རོལ་པ་ཚད་མེད་པ་ཉིད་ཀྱིས་དག་པ་དང་མ་དག་པའི་གདུལ་བྱ་བགྲང་བ་ལས་འདས་བདག་གང་ལ་གང་འདུལ་གྱི་སྒོ་ནས། བྱང་ཆུབ་གསུམ་ལ་འདྲེན་པར་མཛད་པ་ལས། །དང་པོར་གདུལ་བྱ་ལམ་ལ་གནས་པ་བསྒྲིབ་པ་ཤས་ཆུང་བས་དག་པ་རྣམས་ཀྱི་སྣང་ངོར་མཆོག་གི་སྤྲུལ་པའི་སྐུ་མཚན་དང་དཔེ་བྱད་ཀྱི་བདག་ཉིད་དུ་སྣང་ཞིང་གསུང་ཚངས་པའི་དབྱངས་ཀྱི་ཆོས་སྟོན་པར་གོ་ནས་བྱང་ཆུབ་ཀྱི་ལམ་དུ་ངེས་པར་མཛད། གདུལ་བྱ་རྒྱུད་དེ་ལས་དམན་ཞིང་སྒྲིབ་པ་ཤས་ཆེ་བ་དག་གི་སྣང་ངོར་སངས་རྒྱས་ཀྱི་སྐུ་གཟུགས་དང་། །གསུང་གླེགས་བམ་ཡོན་ཏན་དང་ཕྲིན་ལས་དགེ་བའི་བཤེས་གཉེན་ལྟར་སྣང་ནས་སེམས་ཅན་གྱི་དོན་མཛད་དེ། འཇམ་དཔལ་རྩ་བརྒྱུད་ལས། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་ལ་སྦྱོར་
བའི་དོན་བྱེད་དོ། །ཞེས་དང་། ཕལ་པོ་ཆེ་ལས། །ལྔ་བརྒྱའི་ཐ་མར་གྱུར་པ་ན། །ང་ནི་ཡི་གེའི་གཟུགས་སུ་སྣང་། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པ་གྱིས། །ཞེས་དང་། མྱང་འདས་ལས། །མྱ་ངན་མ་བྱེད་ཀུན་དགའ་བོ། །སྨྲེ་སྔགས་མ་འདོན་ཀུན་དགའ་བོ། །ང་ནི་སྙིགས་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་སོ། །དེས་ན་སྔོན་མཆོག་གི་སྤྲུལ་པའི་སྐུ་ཤཱཀྱ་ཐུབ་པར་སྣང་བ་དང་། །ད་ལྟ་བཟོ་གནས་སྤྲུལ་པའི་སྐུ་སྐུ་གཟུགས་སུ་སྣང་བ་གཉིས་གདུལ་བྱ་དག་མ་དག་གི་སྣང་ཚུལ་ཐ་དད་པ་ཙམ་ལས་ངོ་བོ་གཅིག་ཅིང་། །བསོད་ནམས་བསགས་པའི་ཞིང་ལ་ཁྱད་པར་མེད་པ་ཉིད་ཡིན་ཏེ། ཇི་སྐད་དུ་མདོ་ལས། ད་ལྟ་ང་ལ་མཆོད་པ་དང་། མ་འོང་སྐུ་གཟུགས་མཆོད་པ་གཉིས། །བསོད་ནམས་མཉམ་ཤིང་རྣམ་སྨིན་མཉམ། །འདི་གཉིས་ཐ་དད་ཅུང་ཟད་མེད། །ཅེས་སོ། །འདི་ལ་ལོག་ལྟ་ཅན་དག་གིས་སྐུ་གཟུགས་ནི་རྒྱུ་འཇིམ་པ་དང་གསེར་དངུལ་སོགས་ལ་ལྟོས་ཤིང་རྐྱེན་བཟོ་བོ་ལ་རག་ལས་པས་སངས་རྒྱས་ཀྱི་སྐུ་དངོས་ཇི་ལྟར་ཡིན་སྙམ་ན། དེ་ཡང་འདྲ་སྟེ། །སངས་རྒྱས་སྤྲུལ་པའི་སྐུ་ཤཱཀྱ་ཐུབ་པ་ཐུགས་རྗེའི་བདག་ཉིད་ཀྱི་མཚན་དང་དཔེ་བྱད་ཀྱི་སྐུ་དེ་ཡང་གདུལ་བྱའི་སྣང་ངོར་ཡབ་དང་ཡུམ་གྱི་རྒྱུ་ལ་བརྟེན་ནས་བྱུང་བ་ལྟར་སྣང་སྟེ། ཡབ་རྒྱལ་པོ་ཟས་གཙང་དང་ཡུམ་སྒྱུ་མ་ལྷ་མཛེས་ཞེས་ཡོངས་ལ་གྲགས་པ་དང་། །དོན་དམ་པ་ནི་སངས་རྒྱས་ལ་བེམ་བོ་རང་རྒྱུད་དུ་གྲུབ་པའི་སྐུ་མེད་དེ། མདོ་སྡེ་གསེར་འོད་དམ་པ་ལས། །སྐུ་ལ་རུས་པ་ཁྲག་
མེད་ན། །རིང་བསྲེལ་ཡོད་པར་ག་ལ་འགྱུར། །ཞེས་དང་། རྡོ་རྗེ་གཅོད་པ་ལས། །གང་དག་ང་ལ་གཟུགས་སུ་མཐོང་། གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེ་བོ་དེ་དག་ང་མི་མཐོང་། །ཞེས་སོ། །དེས་ན་ད་ལྟའི་སྐུ་གཟུགས་ཀྱང་བཟོ་བོ་ལ་སོགས་པའི་རྒྱུ་རྐྱེན་ལས་བྱུང་བ་ལྟར་སྣང་བ་ནི་གདུལ་བྱའི་བློ་ངོར་ཡིན་གྱིས་དོན་ལ་སངས་རྒྱས་ཀྱི་སྐུ་གསུང་ཐུགས་རྟེན་རྣམས་ནི་སངས་རྒྱས་ཀྱི་ཐུགས་རྗེས་སྨོན་ལམ་དང་གདུལ་བྱའི་ལས་འཕྲོ་སྐལ་པ་གཉིས་གོང་འཛོམ་པ་ལས་རང་བཞིན་གྱི་སྣང་བ་ཡིན་ཏེ། །རྒྱུད་ལས། །བདེ་གཤེགས་སྐུ་གསུང་ཐུགས་རྟེན་ནི། །བསྟན་པ་ནུབ་ན་ཡོད་མིན་ཞིང་། །མུ་སྟེགས་ཀླ་ཀློ་དག་ལ་མེད། །དེ་ཕྱིར་སྐུ་གཟུགས་སྤྲུལ་པ་ཡིན། །ཞེས་སོ། །དོན་དེ་དག་གི་ཕྱིར་ད་ལྟ་སྙིགས་མར་གྱུར་ཅིང་འཇིག་རྟེན་གྱི་རྒུད་པ་ལ་སོགས་སྣ་ཚོགས་མངོན་དུ་གྱུར་བའི་སྐབས་འདིར། །རང་རང་གི་ཉེ་སྐོར་ན་ཡོད་པའི་གཙུག་ལག་ཁང་དང་སྐུ་གསུང་ཐུགས་ཀྱི་རྟེན་དག་ལ་ཕྱག་དང་བསྐོར་བ་སྡིག་པ་དང་མ་འདྲེས་པའི་མཆོད་པ་སོགས་འབད་པ་བྱས་ན་སངས་རྒྱས་དངོས་སུ་བཞུགས་པ་ལ་མཆོད་པ་དང་ཁྱད་མེད་ཅིང་། །གནས་སྐབས་འདོད་པའི་དོན་ཐམས་ཅད་འགྲུབ་ལ་མཐར་ཐུག་མྱ་ངན་ལས་འདས་པའི་གོ་འཕང་ཐོབ་པར་འགྱུར་བ་གདོན་མི་ཟ་སྟེ། །ཐེག་པ་ཆེན་པོའི་མདོ་སྡེ་སྙིང་རྗེ་པདྨ་དཀར་པོ་ལས། མི་གཞན་ཞིག་གི །།་སྐྲའི་ཉག་མ་གཅིག་བརྒྱར་གཤགས་པའི་རྩེ་མོས་ཆུ་ཐིག་པ་གཅིག་བླང་སྟེ་བདེ་བར་གཤེགས་པ་ལ་བཅོལ་ན་ཕྱིས་བསྐལ་པ་དཔག་ཏུ་མེད་པ་ཞིག་སོང་བའི་རྗེས་སུ་ཡང་། །རྫོགས་པའི་སངས་རྒྱས་ཀྱི་རྣམ་
མཁྱེན་གྱི་ཡེ་ཤེས་ཀྱིས་གཟིགས་ནས་སྔར་གྱི་ཆུ་ཐིག་དེ་མ་ཉམས་པ་སྤྲོད་ནུས་པའི་མཁྱེན་པ་མངའ་བ་དེས་སྔོན་དུ་བཏང་སྟེ། ད་ལྟ་སངས་རྒྱས་བཞུགས་པའམ། མ་འོང་མྱ་ངན་ལས་འདས་པའི་སྐབས་གང་ཡིན་ཡང་འདྲ་སྟེ། །སངས་རྒྱས་ཀྱི་མཚན་ཐོས་པ་དང་། །སངས་རྒྱས་ལ་ཕྱག་འཚལ་ལོ་ཞེས་པའི་སྒྲ་བརྗོད་པ་དང་། །སངས་རྒྱས་ལ་དམིགས་ནས་སེམས་དངས་བ་ཙམ་བྱེད་པ་དང་། སངས་རྒྱས་ལ་དམིགས་ནས་མེ་ཏོག་ཅིག་ནམ་མཁའ་ལ་དེང་བྱེད་པ་ཐམས་ཅད་ཀྱང་སངས་རྒྱས་ཀྱི་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་མཁྱེན་ཏེ་མྱ་ངན་ལས་འདས་པའི་བར་དུ་ཆུད་ཟ་བར་མི་འགྱུར་རོ། །ཞེས་ཤིན་ཏུ་རྒྱས་པར་བཀའ་སྩལ་བ་དང་། །མདོ་གཞན་ལས་ཀྱང་། །རྩིག་ངོས་ཤིང་བུ་སེན་མོས་གཟུགས་བྲིས་པ། །དངས་པའི་སེམས་ཀྱིས་བདེ་གཤེགས་ལྟ་ན་ཡང་། །དེ་དག་རྣམས་ཀྱི་བྱང་ཆུབ་མཆོག་འདི་ཐོབ། །ཅེས་དང་། །བྱིས་པ་རྩེད་མོ་དགའ་དང་དེ་བཞིན་དུ། །བྱེ་མ་ལ་ནི་མཆོད་རྟེན་བྱེད་པ་ཡང་། །དེ་དག་རིམ་གྱི་སངས་རྒྱས་བྱེ་བ་མཐོང་། །ཞེས་བྱིས་པ་རྩེད་མོའི་ཕྱིར་རྩིག་པ་ལ་སངས་རྒྱས་ཀྱི་སྐུ་བྲིས་པ་དང་། བྱེ་མ་ལ་མཆོད་རྟེན་བྱེད་པ་ཡང་མཐོང་བ་ཙམ་གྱིས་ཀྱང་རིམ་གྱིས་བླ་ན་མེད་པའི་བྱང་ཆུབ་ཐོབ་པར་འགྱུར་ཞེས་རྫོགས་པའི་སངས་རྒྱས་ཉིད་ཀྱིས་གསུང་བ་དང་། །སངས་རྒྱས་ལ་དམིགས་ནས་ཕྱག་དང་མཆོད་པ་ལ་སོགས་གང་བྱས་ཡུལ་གྱི་སྒོ་ནས་ཐར་བ་ཆ་མཐུན་གྱི་དགེ་བ་ཞེས་བྱ་སྟེ། རང་བློས་བྱང་ཆུབ་ཀྱི་རྒྱུར་བསྔོ་མ་ཤེས་ཀྱང་མཐར་ཐུག་བྱང་ཆུབ་ཀྱི་རྒྱུར་མི་འགྲོ་མི་སྲིད་པར་མདོ་རྒྱུད་མན་ངག་ཐམས་ཅད་ནས་བཀའ་
སྩལ་པ་ལ་ཡིད་ཆེས་པར་བྱ་ཞིང་། ཁྱད་པར་རང་རེ་བོད་ཁ་བ་ཅན་པ་དག་གི་ལྷ་དང་བླ་མའི་སྐལ་པ་ཇོ་བོ་སྤྱན་རས་གཟིགས་དང་གུ་རུ་པདྨ་འབྱུང་གནས་གཉིས་ཡིན་ཏེ། །ཇི་སྐད་དུ་ཨོ་རྒྱན་ཉིད་ཀྱི་ཞལ་ནས། བོད་ཀྱི་བླ་མའི་སྐལ་པ་གུ་རུ་ཉིད། །ལྷ་སྐལ་ཇོ་བོ་ཐུགས་རྗེ་ཆེན་པོ་ཡིན། །ཞེས་པ་ལྟར་སྔོན་ཁ་བ་ཅན་བོད་ཀྱི་ལྗོངས་འདིར་སངས་རྒྱས་ཀྱི་ཞབས་ཀྱིས་མ་བཅག །དམ་པའི་ཆོས་མ་དར། དཀོན་མཆོག་གསུམ་གྱི་སྒྲ་ཙམ་ཡང་མི་གྲགས་པར་ཆོས་མེད་མུན་པའི་ཡུལ་དུ་ཡོད་པའི་སྐབས་སུ་འཕགས་པ་སྤྱན་རས་གཟིགས་ཀྱིས་སྤྲུལ་པ་དུ་མའི་སྒོ་ནས་ཆོས་དར་བའི་རྟེན་འབྲེལ་བསྒྲིག་ཤིང་། །སྤྲུལ་པའི་རྒྱལ་པོ་སྲོང་བཙན་སྒམ་པོར་སྤྲུལ་ནས་ཐུགས་རྗེ་ཆེན་པོ་ནམ་མཁའི་རྒྱལ་པོ་བཅུ་གཅིག་ཞལ་རང་བྱུང་ལྔ་ལྡན་སྤྲུལ་པ་དང་། བྱིན་བརླབས་ཀྱི་སྒོ་ནས་སྣང་བར་བྱས་པ་ཉིད་བོད་ཁ་བ་ཅན་དུ་སྐུ་གཟུགས་བཞེངས་པའི་ཐོག་མར་བྱུང་ཞིང་། དེ་ནས་རྒྱལ་རབས་ལྔ་ནས་འཇམ་དཔལ་དབྱངས་ཀྱི་སྤྲུལ་པ་ཆོས་སྐྱོངས་པའི་རྒྱལ་པོ་ཁྲི་སྲོང་སྡེའུ་བཙན་གྱིས་སངས་རྒྱས་གཉིས་པ་ཨོ་རྒྱན་ཆེན་པོ་སྤྱན་དྲངས་ནས་བོད་ཁམས་ཀྱི་ས་གཞི་བརྟུལ་ལྷ་འདྲེ་མ་རུང་བ་ཐམས་ཅད་དམ་ལ་བཞག །སྐུ་རྟེན་དུ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་བཞེད། །གསུང་རྟེན་དུ་དམ་པའི་ཆོས་བསྒྱུར། །ཐུགས་རྟེན་དུ་དགེ་འདུན་གྱི་སྡེ་བཙུག་སྟེ་སངས་རྒྱས་ཀྱི་བསྟན་པ་ཉི་མ་ཤར་བ་ལྟ་བུ་མཛད། ཕྱི་རབས་མོས་གུས་ཀྱི་རྟེན་དང་། བསྟན་པའི་བཅོས་སུ་དགོངས་ཏེ་མཐའ་འདུལ་ཡང་འདུལ་གྱི་གཙུག་ལག་ཁང་དང་། །སྦས་ཡུལ་སྒྲུབ་
གནས་རྣམས་སུ་གུ་རུ་ཉིད་ཀྱི་སྐུ་ཚབ་མཐོང་བས་འདྲེན་པ་དུ་མ་བཞེངས་ཏེ་གུ་རུ་ཉིད་ཀྱི་རབ་གནས་མཛད། མ་འོང་དུས་ཀྱི་རྒུད་པ་དང་བསྟན་པའི་རྐྱེན་ཆགས་བཟློག་པ་ལ་དགོངས་ནས་སྐུ་ཚབས་ཉི་ཤུ་རྩ་ལྔ་ལ་སོགས་བོད་གཏེར་དུ་སྦས། ཕྱིས་བོད་ཀྱི་གདུལ་བྱ་རྫོགས་ནས་རྔ་ཡབ་གླིང་དུ་སྲིན་པོ་འདུལ་བ་ལ་འབྱོན་པའི་ཚེ། ལྷ་མ་མན་དཱ་ར་བས། །ཉིད་དང་མ་འཇལ་མ་འོང་སེམས་ཅན་རྣམས། །མ་རིག་མུན་པའི་སྒྲོན་མེ་གང་གི་བྱེད། དེ་བཞིན་སྤྱིན་པའི་བསོད་ནམས་གང་ལ་གསོག །ལུས་ཕུང་བདེ་བའི་མེ་ཏོག་གང་ལ་འབུལ། འཇིག་རྟེན་དག་ན་བདེ་བ་སྦྱིན་པའི་མཆོག །འཁོར་བའི་སྡུག་བསྔལ་རྒྱ་མཚོ་གང་གིས་སྐེམས། །བདེ་སྟོང་བླ་མེད་བརྒྱུད་པ་སུ་ཡིས་འཛིན། །པད་སྡོང་ལས་འཁྲུངས་དཀར་ལ་དམར་མདངས་ཅན། །བཟང་པོའི་མཚན་གྱི་སྐུལ་བརྒྱན་པས་གསུངས། །ཞེས་དོན་ཚན་ལྔའི་དྲི་བ་ཞུས་པའི་ཚེ། །གུ་རུའི་ཞལ་ནས། །ཉོན་ཅིག་ལྷ་མོའི་གཟུགས་ཅན་ཡིད་འོང་མ། །ང་དང་མ་འཕྲད་མ་འོང་སེམས་ཅན་རྣམས། །མ་རིག་མུན་པའི་སྒྲོན་མེ་སྐུ་འདྲས་བྱེད། །པད་འབྱུང་སྐུ་ཚབས་མཆོད་པའི་རྟེན་བཞེངས་པ། །འདི་ཕྱི་དོན་ལྡན་བསྟན་པའི་རྒྱལ་མཚན་འཛུག །དེ་ལ་འདུན་ཅིང་མོས་གུས་སུས་བྱེད་པ། །འདོད་པ་ཀུན་ཚོགས་རིན་ཆེན་ཕུང་པོ་འདྲ། །འཕེལ་འགྲེབ་མེད་པ་འགྱུར་མེད་བདེ་བའི་ཞིང་། །སྙིང་པོ་རྒྱུན་དུ་བཟླ་བ་གང་བྱེད་པ། །མི་རྣམས་སྨོན་ལམ་ཇི་ལྟར་བཏབ་པ་བཞིན། །ལེགས་པ་ཀུན་འབྱུང་ཨེ་མ་ངོ་མཚར་ཆེ། །ཞེས་དྲི་བ་དང་པོའི་དོན་གུ་རུ་ཉིད་བོད་དུ་མི་བཞུགས་པའི་ཚེ་མ་
རིག་མུན་པའི་སྒྲིན་མེ་སྐུ་འདྲས་བྱེད་པར་གསུང་ཤིང་། །དེའི་ཕྱིར་གུ་རུ་ཉིད་ཀྱི་སྐུ་ཚབས་གསར་དུ་བཞེངས་ན་སྐུ་གསུམ་ཐོབ་པའི་དོན་དང་ལྡན་ཞིང་བསྟན་པའི་རྒྱལ་མཚན་འཛུག་པ་དང་། གུ་རུའི་སྐུ་ཚབས་དེ་ལ་ཡིད་གུས་པའི་སྒོ་ནས་མོས་གུས་བྱེད། ངག་གུས་པས་སྙིང་པོ་བཛྲ་གུ་རུ་འཛབ་དབྱངས་ཀྱི་གསོལ་བ་འདེབས་པ་དང་། །ལུས་གུས་པས་ཕྱག་དང་བསྐོར་བ་ལ་སོགས་བྱས་ན། རང་གི་ཡིད་ལ་གང་འདོད་པའི་སྨོན་ལམ་ཐམས་ཅད་འགྲུབ་པར་ཞལ་གྱིས་བཞེས་ཤིང་། །དྲི་བ་གཉིས་པའི་ལན་དུ། འབྱུང་བའི་བཅུད་ལས་བསམ་འཕེལ་ནོར་འབྱུང་བཞིན། ཇི་ལྟར་ཚོགས་པ་བཤམས་པའི་འདོད་ཡོན་ལྔ། །བྱི་དོར་ལྡན་པའི་བཀྲ་ཤིས་འཕེལ་བར་འགྱུར། །ཞེས་སོགས་ཀྱིས་སྦྱིན་པའི་བསོད་ནམས་གསོགས་པའི་ཞིང་བླ་ན་མེད་པ་ཡང་གུ་རུའི་སྐུ་ཚབས་ཉིད་ཡིན་པར་བསྟན་ཏེ། རིམ་པ་བཞིན་སྨན་ལྔ་ཕུལ་ན་འདུ་བའི་ནད་ལས་གྲོལ། ན་བཟའ་ཕུལ་ན་ཡེ་ཤེས་ཀྱི་སྤྱན་དང་ལྡན། གདན་ཕུལ་ན་རེག་འཇམ་མཛེས་པའི་གདན་ཐོབ། མར་མེ་ཕུལ་ན་བློ་དང་རིག་པ་གསལ། རིན་པོ་ཆེའི་རིགས་ཕུལ་ན་དབུལ་ཕོངས་བྲལ། སྤོས་ལྔ་ཕུལ་ན་ཀུན་གྱི་ཡིད་དུ་འོང་། སྙིང་པོ་ལྔ་ཕུལ་ན་བདེ་བའི་མཆོག་ཐོབ། དྲི་བཟང་ཕུལ་ན་གནས་གཙང་དྲི་མ་མེད་པ་ཐོབ། འབྲུ་བཅུད་ཕུལ་ན་བདུད་རྩིའི་རྒྱ་མཚོ་ལ་སྤྱོད། མེ་ཏོག་ཕུལ་ན་ཉོན་མོངས་ལྔ་ཞི་ཞིང་སྒྲིབ་པ་བྱང་། དཀར་གསུམ་ཕུལ་ན་བདུད་རྩིའི་འདོད་འཇོའི་བ་ལ་ལོངས་སྤྱོད། །མངར་གསུམ་ཕུལ་ན་བདུད་རྩི་ཁ་ཟས་ཞིམ་དགུ་ཐོབ། སྤྱན་གཟིགས་
ཕུལ་ན་བསོད་ནམས་དང་ལོངས་སྤྱོད་འཕེལ། འབྲུ་ལྔ་ཕུལ་ན་མ་རྨོས་པའི་ལོ་ཏོག་ལ་ལོངས་སྤྱོད། །འཕན་གདུག་ཕུལ་ན་ཆོས་ཀྱི་བཤད་པ་བླ་ན་མེད་པ་ཐོབ། དར་དཔྱང་ཕུལ་ན་ལྷ་ཡི་ན་བཟའ་ཐོབ། །སིལ་སྙན་ཕུལ་ན་དབྱངས་སྙན་ཞིང་ངག་བདེ། རོལ་མོ་ཕུལ་ན་སྟོབས་ཆེ་ཞིང་གཟུགས་བཟང་། གསེར་དངུལ་གཡུ་ལྕགས་དུང་ཟངས་སྣག་ཚ་རྣམས་ཕུལ་ན་རྒྱལ་སྲིད་བདུན་ཐོབ་ཅིང་ལོངས་སྤྱོད་རྫོགས་པའི་ཞིང་ཁམས་མཐོང་། །སྤྱན་ལ་སྤྱན་དབྱེ་བྱས་ན་ཡེ་ཤེས་ཀྱི་སྤྱན་དང་ལྡན། སྙན་ལ་སྙན་ཤལ་དར་དཔྱངས་ཕུལ་ན་ལྷའི་སྙན་དང་ལྡན། ཤང་ལ་དྲི་ཞིམ་མཆོད་ན་དྲི་བསུང་ངད་ལྡན་གྱི་གནས་ཐོབ། ཚེམས་ལ་དཀར་མདངས་བཏོན་ན་དུག་གསུམ་རྩད་ནས་གཅོད། ལྗགས་ལ་རོ་མཆོག་ཕུལ་ན་འགྲོ་ཀུན་འཁོར་བ་ལས་སྒྲོལ་བའི་ཆོས་འཆད་པའི་ལྗགས་དང་ལྡན། །སྐུ་ཚབས་བཞུགས་ཁང་གི་གཞལ་ཡས་ཁང་ཕུལ་ན་ལྷའི་ཕོ་བྲང་ནང་དུ་སྐྱེ། སྐུ་ཚབས་བཞུགས་ཁང་བཞེངས་པའི་ལས་དཔོན་བྱས་ན་ཆོས་ཀྱི་འཁོར་ལོས་བསྒྱུར་བ་ཐོབ། སྐུ་འདྲའི་བཟོ་གནས་བྱས་ན་འདི་ཕྱི་ཀུན་ཏུ་རིག་པའི་གནས་ལྔ་ལ་མཁས། སྐུ་ཚབས་རྒྱུའི་འདམ་རྫབ་སྦྱར་ན་བསོད་ནམས་གོང་ནས་གོང་དུ་འཕེལ། སྐུ་འདྲ་ལ་རྡུལ་ཕྱིས་བྱས་ན་གཟུགས་བཟང་བ་དང་། ཆོས་གོས་ལེགས་པ་དང་ཁ་དོག་མཛེས་པ་ཐོབ། སྐུ་ཁྲུས་གསོལ་ན་དྲི་མ་མེད་ཅིང་ཡིད་དུ་འོང་བའི་ཁ་དོག་དང་ལྡན། སྐུ་ཚབས་ཀྱི་མཆོད་གཡོག་བྱས་ན་རྫུ་འཕྲུལ་གྱི་རྐང་པ་དང་ལྡན། ཕྱག་དང་བསྐོར་བ་བྱས་ན་འཁོར་བའི་སྡུག་བསྔལ་ཐམས་ཅད་ཞི་ནས་མྱ་ངན་འདས་པའི་བདེ་བ་ཐོབ། བསྐྱེད་རྫོགས་དང་ལྡན་པས་རབ་
གནས་བྱས་ན་ཡུལ་དེར་དམག་འཁྲུགས་དང་མུ་གེ་ནད་ཡམས་ལ་སོགས་བཞི། སྐུ་ཚབས་ལ་རྟེན་བཤད་བྱས་ན་སེམས་བསྐྱེད་དང་ཏིང་ངེ་འཛིན་ལ་གནས། གཞན་ལ་ཕྱག་མཆོད་དང་བསྐོར་བ་སོགས་བྱེད་པར་བསྐུལ་མ་བཏབ་ན་འབྲེལ་ཚད་དོན་དང་ལྡན་ཞིང་འགྲོ་བ་མང་པོའི་ལས་སྒྲིབ་དག་པར་གསུངས། གཞན་ཡང་ཇི་ལྟར་སྨོན་པའི་དོན་འབྲས་ཐམས་ཅད་གུ་རུའི་སྣང་བརྙན་ལ་གསོལ་བ་བཏབ་པ་ལས་འབྱུང་སྟེ། སྐྱེ་རྒུའི་ཚེ་འཕེལ་པད་འབྱུང་སྐུ་འདྲ་ནི། །ང་ཡི་ཐུགས་ལས་ཡེ་ཤེས་འོད་འཕྲོས་ནས། །མ་འོང་མོས་པའི་རྟེན་དུ་གཏད་པ་ཡིན། །འདོད་དགུ་འབྱུང་བའི་ཡིད་བཞིན་ནོར་བུ་འདྲ། ཞེས་དང་། གཞན་ཡང་རྨོང་པོ་བུ་མེད་པ་དག་བུ་འདོད་ན་ལུས་སེམས་དཔང་དུ་བཙུག་པའི་དད་པ་དང་དག་སྣང་རྩེ་གཅིག་པའི་སྒོ་ནས་བསྐོར་བ་བྱས་ན་ཆུང་སྲི་ཐེའུ་རང་ལ་སོགས་དཔག་ཚད་དང་རྒྱང་གྲགས་སུ་འབྲོས་ཤིང་ཡིད་དུ་འོང་བའི་བུ་སྐྱེ་བར་གསུངས་ཤིང་། །དཔང་པོ་བུད་མེད་ང་ལ་གསོལ་བ་ཐོབ། །ལུས་སེམས་དཔང་བཙུག་རྐང་པས་བསྐོར་བ་གྱིས། །ལོག་འདྲེན་བར་ཆད་དཔག་ཚད་རྒྱང་གྲགས་བྲོས། །ཡིད་འོང་ཉམས་དགའི་དངོས་པོ་དཔང་དུ་སྐྱེས། །ཞེས་དང་དབུལ་པོ་ནོར་མེད་པ་ལོངས་སྤྱོད་དང་བཟའ་བཏུང་ཐོབ་པར་འདོད་ན་ཡང་། ཨོ་རྒྱན་སྐུ་ཚབས་ལ་ཕྱག་རྒྱ་མཆོད་བསྐོར་བ་སོགས་བྱས་ནས་གསོལ་བ་བཏབ་པས། གུ་རུའི་སྐུ་ལས་འོད་ཟེར་སྣ་ཚོགས་སྤྲོས་ཏེ་འཇིག་རྟེན་ཁམས་ཀྱི་བཟའ་བཏུང་དང་ལོངས་སྤྱོད་ཀྱི་བཅུད་ཐམས་ཅད་བསྡུས་ཏེ་བདག་ལ་སྩལ་བར་བསྒོམ་ན་
འཇིག་རྟེན་ཟང་ཟིང་གི་འབྱོར་པ་ཐོབ་སྟེ། །དབུལ་པོ་ནོར་མེད་ང་ལ་གསོལ་བ་ཐོབ། །གསང་སྔགས་གསུངས་རབ་པད་འབྱུང་བཀོད་པ་ལས། །རོ་འབྱུང་བཅུད་བསྡུས་དོན་ལ་ཐིམ་པར་བསྒོམ། །འཇིག་རྟེན་ཟང་ཟིང་ནོར་གྱིས་ལག་མི་ཐོག་ཅེས་དང་། གཞན་ཡང་འཕྲལ་གྱི་འདོད་པའི་དོན་གང་དང་གང་ཡིན་ཀྱང་པད་འབྱུང་གི་སྐུ་ཚབས་ལ་མཆོད་པ་ཕུལ་ནས་གསོལ་བ་བཏབ་ན་ཡིད་བཞིན་གྱི་ནོར་བུ་རིན་པོ་ཆེ་ལ་གསོལ་བ་བཏབ་པ་ལྟར་དགོས་འདོད་ལྷུན་གྲུབ་ཏུ་འབྱུང་བས་ན། །བྱེས་སུ་འགྲོ་བའི་ལམ་ལྷ་གཞི་ལ་སྡོད་པའི་སྲུང་མ། ནད་གདོན་གྱི་ཉེན་པའི་རིམ་གྲོ་སོགས་གང་དང་གང་ལ་ཡང་གུ་རུའི་སྐུ་ཚབས་ཀྱི་དྲུང་དུ་གསོལ་བ་བཏབ་པ་ལས་ལྷག་པ་མེད་དེ། དོན་དང་མི་ལྡན་ང་ལ་གསོལ་བ་ཐོབ། རིག་པའི་སེམས་ལ་འཁོར་བའི་སྐྱོན་མེད་དེ། ནོར་བུ་རིན་ཆེན་རང་ལ་ཡོད་མོད་ཀྱང་། བཀུར་སྟི་རིམ་གྲོ་མཆོད་པ་མ་བྱས་ན། །འདོད་པའི་ཡོན་ཏན་གང་ཡང་འཕེལ་མི་འགྱུར། །སྨོན་ལམ་གང་བཏབ་དེ་ཡིས་དེ་ཐོབ་བྱེད། །གསོལ་བཏབ་པད་འབྱུང་ང་ལ་དགོས་འདོད་འབྱུང་། ཅེས་སོ། །ཡང་རྨོངས་པ་གང་དག་དེ་ལྟ་བུའི་ཡོན་ཏན་འབྱུང་བ་ནི་སྔོན་གུ་རུ་ཉིད་ཀྱིས་བྱིན་གྱིས་བརླབས་པའི་སྐུ་ཚབས་རིན་པོ་ཆེ་མཚོ་སྐྱེས་རྡོ་རྗེ་ལ་སོགས་པ་ཡིན་གྱི་གུ་རུའི་སྣང་བརྙན་ཡིན་ནོ་ཅོག་ལ་མ་ཡིན་ནོ་སྙམ་ན། དེ་ནི་མ་ཡིན་ཏེ་གུ་རུའི་ཐུགས་རྗེ་ལ་ཉེ་རིང་མེད་ཅིང་སྐུ་བརྙན་ལ་ཁྱད་པར་མེད་པ་དང་། གུ་རུ་ཉིད་ཀྱི་སྐུ་ཚབས་ཡིན་ནོ་ཅོག་ལ་གུ་རུའི་རབ་གནས་མ་བྱས་པ་ཡང་ཡོད་མི་སྲིད་དེ། རྒྱལ་པོ་བཀའ་ཐང་ལས། །བྱང་ཆུབ་སེམས་དཔའི་སྐུ་གདུང་ལུང་
བསྟན་པའི་སྐབས་སུ། རབ་གནས་ལྷོ་ནུབ་སྲིན་ཡུལ་ནས། །ཨོ་རྒྱན་པདྨ་ང་ཡིས་བྱེད། །ཅེས་གསུངས་པ་ལྟར། །གུ་རུ་ཉིད་ཀྱི་ཐུགས་རྗེས་སྤྱིར་ཁམས་གསུམ་རིགས་དྲུག་གི་སེམས་ཅན་ཀུན་ལ་གཟིགས་ཀྱང་ཡང་དགོས་བོད་ཡུལ་གྱི་འགྲོ་བ་ཀུན་ལ་སྨོན་ལམ་གྱི་དབང་གིས་ཐུགས་རྗེས་ལྷག་པར་དུ་གཟིགས་ཤིང་སྐུ་གསུང་ཐུགས་ཀྱི་རྟེན་རྙིང་པོ་དང་གསར་དུ་བྱས་པ་ཐམས་ཅད་འཕྲལ་ལ་བྱིན་གྱིས་བརླབས་ཏེ་གུ་རུ་ཉིད་དང་ཁྱད་པར་མེད་པར་མཛད་པ་ཤ་སྟག་ཡིན་པས་ན་ཕྱག་དང་མཆོད་པ་ལ་སོགས་གང་བྱས་ཀྱང་ཕན་ཡོན་གོང་ལྟར་འབྱུང་ཞིང་ཁྱད་པར་གུ་རུ་ཉིད་ཀྱིས་རྗེས་སུ་འཇུག་པ་དག་གིས་ནི་གུ་རུའི་སྐུ་བརྙན་གྱི་དྲུང་དུ་ཡར་ངོ་ཚེས་བཅུའི་དུས་མཆོད་བཟུང་ནས་གསོལ་བ་འདེབས་པ་ནི། ངེས་པར་གལ་ཆེ་ཞིང་ཕན་ཡོན་ཀྱང་ཚད་ལས་འདས་པ་དང་ལྡན་པར་མ་ཟད། །ཡར་ངོ་དང་མར་ངོའི་ཚེས་བཅུ་ལ་ཚོགས་ཀྱི་འཁོར་ལོ་བྱེད་པ་དང་། དཔའ་བོ་དང་དཔའ་མོའི་དགའ་སྟོན་ལ་སོགས་པ་བྱེད་པ་ནི་གསར་རྙིང་གི་རྒྱུད་སྡེ་ཐམས་ཅད་ནས་བཤད་དེ། བདེ་མཆོག་རྩ་རྒྱུད་ལས། །མར་གྱི་ངོ་ཡི་ཚེས་བཅུ་དང་། །ཟླ་བ་ཡར་ངོའི་ཚེས་བཅུ་ལ། །མྱུར་དུ་འབད་པས་མཆོད་བྱ་སྟེ། །ཞེས་དང་། རྣལ་འབྱོར་ཀུན་སྤྱོད་ལས། །དགུན་འབྲིང་ལ་སོགས་ཟླ་བ་ཡི། བཅུ་པ་ལ་ནི་རབ་ཏུ་མཆོད། ཅེས་དང་། ཀུན་མཁྱེན་ཆོས་ཀྱི་རྒྱལ་པོས་ཀྱང་། ཚེས་བཅུ་ཡར་ངོ་མར་ངོའི་ཉིན་དང་མཚན། །བསྙེན་བསྒྲུབ་ཚོགས་མཆོད་བསྐང་བཤགས་འབད་པར་བྱ། །ཞེས་གསུངས་པ་ལྟར། །ཡར་ངོའི་ཚེས་
བཅུའི་ཉིན་མོ་དང་། མར་ངོའི་ཚེས་བཅུའི་མཚན་མོའི་ཁྱད་པར་གྱི་དངོས་གྲུབ་མྱུར་བས་དུས་ཆེན་ཡིན་ཞིང་ལྷག་པར་ཨོ་རྒྱན་སངས་རྒྱས་གཉིས་པ་ཉིད་ཀྱིས་མཛད་པ་རྒྱ་ཆེན་པོ་ཐམས་ཅད་ཡར་ངོའི་ཚེས་བཅུ་ཁོ་ན་ལ་མཛད་པ་ཤས་ཆེ་བས་ཟླ་བ་བྱུང་ངོ་ཅོག་གི་ཚེས་བཅུ་ཐམས་ཅད་ཀྱང་ཨོ་རྒྱན་ཉིད་ཀྱི་མཛད་པ་ཕྲིན་ལས་ཀྱི་དུས་ཆེན་ཁོ་ན་ཡིན་ཏེ། སྤྲེལ་གྱི་ཟླ་བའི་ཚེས་བཅུ་ལ་དྷ་ན་ཀོ་ཤར་པདྨའི་སྦུབ་ལས་སྐུ་འཁྲུང་བའི་དུས་ཆེན་ཡིན་པར་གཏེར་གཞུང་ཚད་ལྡན་དུ་མ་ནས་བཤད་ཅིང་། དེ་ཡང་བོད་འདིར་རྩིས་གཞུང་འགྱུར་མགོ་མི་འདྲ་བའི་དབང་གིས་སྤྲེལ་ཟླའི་ངོས་འཛིན་མི་འདྲ་བ་གསུམ་དུ་འབྱུང་ཞིང་དེའི་དབང་གིས་རྗེས་འཇུག་རྣམས་ཚེས་བཅུ་ཆེན་མོ་བྱེད་པའི་དུས་ཚིག་མི་འདྲ་བ་དུ་མ་བྱུང་ཡང་འདིར་ཨོ་རྒྱན་རིན་པོ་ཆེ་ཉིད་ཀྱིས་རྡོ་རྗེའི་གསུང་དུ་འཁྲུལ་པ་མེད་པ་བླ་མ་དགོངས་པ་འདུས་པའི་ཚེས་ཁང་རེའུ་མིག་ལ་ཧོར་ཟླ་བཅུ་གཉིས་པ་རྒྱལ་གྱི་ཟླ་བ་ཉིད་སྟག་ཟླར་བྱས་ནས་བགྲང་བའི་རྗེས་སུ་འབྲང་སྟེ་མཁས་གྲུབ་ཀརྨ་ཆགས་མེད་ལ་སོགས་དམ་པ་དུ་མ་ཞིག་གིས་རྩིས་གཞུང་བཀོད་ཅིང་། ཁྱད་པར་ཚེས་བཅུའི་དུས་ཚིགས་གནད་བྱང་ཐུགས་ཀྱི་སྒྲོམ་བུ་ལས། །སྤྲེལ་ལོ་སྤྲེལ་ཟླའི་ཚེས་བཅུ་ལ། །པདྨ་ང་དང་དངོས་སུ་མཇལ། །ཞེས་རྡོ་རྗེའི་ལུང་གིས་བསྔགས་པའི་རིག་འཛིན་ཆེན་པོ་འཇིགས་མེད་གླིང་པ་ཉིད་ཀྱིས། ཧོར་ཟླ་དྲུག་པའི་ཚེས་བཅུའི་ཉི་ཤར་ལ། དྷ་ན་ཀོ་ཤར་པདྨའི་སྦུབས་ལ་བྱོན། ཅེས་ཐག་ཆོད་པར་གསུངས་པ་ཉིད་ཀྱི་རྗེས་སུ་འབྲང་ན་ཧོར་ཟླ་བཅུ་གཉིས་པ་སྟག་གི་ཟླ་བ་ལ་ཨོ་རྒྱན་གྱི་རྒྱལ་པོ་ཨིན་དྲ་བྷོ་དྷིས་སྤྱན་
དྲངས། རྒྱལ་སར་མངའ་གསོལ། ཟླ་བ་དང་པོ་ཡོས་ལ་རྒྱལ་སྲིད་སྤངས་ནས་དུར་ཁྲོད་ཆེན་པོ་བསིལ་བའི་ཚལ་དུ་བརྟུལ་ཞུགས་ཀྱི་སྤྱོད་པ་མཛད། གཉིས་པ་འབྲུག་ཟླར་སློབ་དཔོན་པྲ་བྷ་ཧསྟི་ལས་རབ་ཏུ་བྱུང་། གསུམ་པ་སྦྲུལ་ལ་ཟ་ཧོར་རྒྱལ་པོས་གསོན་བསྲེག་མཛད་ཚེ་མེ་ཉིད་ཆུར་བསྒྱུར་བའི་རྫུ་འཕྲུལ་བསྟན། །བཞི་པ་རྟ་ལ་ཨོ་རྒྱན་རྒྱལ་པོས་གུ་རུ་ཡབ་ཡུམ་གཉིས་ཙནྡ་གྱི་མེར་བསྲེག་ཀྱང་མ་ཚིག་པར་དད་པའི་གནས་ལ་བཀོད། ལྔ་པ་ལུག་ལ་ལྷོ་ཕྱོགས་ཀྱི་རྒྱལ་ཁམས་སུ་བསྟན་ལ་འཚེ་བའི་མུ་སྟེགས་པ་རྣམས་ཐོག་གིས་བསྒྲལ། །དྲུག་པ་སྤྲེལ་ལ་སིནྡྷུའི་རྒྱ་མཚོར་སྐུ་འཁྲུངས། །བདུན་པ་བྱ་ལ་མཐའ་འཁོབ་ཀྱི་རྒྱལ་པོས་ཟངས་ཁ་སྦྱོར་དུ་བཅུག་ནས་ཆུ་ལ་བསྐུར་ཀྱང་རྫུ་འཕྲུལ་གྱི་ནམ་མཁར་བྱོན། །བརྒྱད་པ་ཁྱི་ལ་མུ་སྟེགས་ངན་པས་ཟས་དུག་ཅན་དྲངས་ཀྱང་ཟད་ཀྱང་མ་གནོད་པར་གཟི་མདངས་ལྷག་པར་རྒྱས་པའི་ཚུལ་བསྟན། དགུ་པ་ཕག་ལ་བལ་ཡུལ་ཡང་ལེ་ཤོད་དུ་ཕེབས་ཏེ་དཔལ་རྡོ་རྗེ་གཞོན་ནུའི་སྐུར་བཞེངས་ནས་བལ་ཡུལ་དང་བོད་ཀྱི་ལྷ་འདྲེ་ཐམས་ཅད་དམ་ལ་བཏགས། བཅུ་པ་བྱི་བར་བོད་ཡུལ་དུ་ཕེབས་ནས་ཧས་པོ་རིའི་རྩེར་ལྷ་སྲིན་དམ་ལ་བཞག་སྟེ་བསམ་ཡས་ཀྱི་ས་བཏུལ། །བཅུ་གཅིག་པ་གླང་གི་ཟླ་བའི་ཚེས་བཅུར་ལྷོ་ནུབ་སྲིན་པོའི་ཡུལ་དུ་གཤེགས་པར་དགོངས་ནས་བསམ་ཡས་མཆིམ་ཕུར་ཡོན་མཆོད་བཀའ་བགྲོས་མཛད་དེ་གཏེར་ཁ་སྦས་པའི་སྟ་གོན་དུ་ལྷ་འདྲེ་དབང་དུ་བསྡུས་ཏེ་གཏེར་གྱི་གཉེར་བྱང་གཏད་པའི་དུས་ཆེན་ཡིན་ཞིང་། གུ་རུ་
ཉིད་ཀྱི་ཞལ་ནས། །དབང་ཆེན་སྤྲེལ་ཟླའི་ཚེས་བཅུ་དང་། །དུས་ཀྱི་ཚེས་བཅུ་ཐམས་ཅད་ལ། །སྤྲུལ་པ་འཛམ་གླིང་ཁྱབ་པར་འགྱེད། །མཆོག་ཐུན་དངོས་གྲུབ་ང་ཡིས་སྟེར། །མི་ཚེ་བླ་མའི་སྒྲུབ་པ་ལ། །བསྐྱལ་ན་ཚེ་ཡི་དུས་བྱས་ཚེ། །ཨོ་རྒྱན་ང་ཡི་ཐུགས་ཀར་ཐིམ། ཞེས་དང་། །པདྨ་བཀའ་ཐང་ལས། །ཚེས་བཅུ་བྱུང་རེས་ང་ཉིད་བོད་དུ་འོང་། །རླུང་ཁྱེར་རྫས་བཞིན་ཅི་ཡོད་ཚོགས་སུ་ཕུལ། ཞེས་དང་། གསོལ་འདེབས་བསམ་པ་ལྷུན་གྲུབ་ལས། །ཉི་ཟེར་འཆར་སྡུད་མདངས་ལ་ཆིབས་ཏེ་བྱོན། །ཡར་ངོའི་ཚེས་བཅུའི་དུས་སུ་དངོས་སུ་བྱོན། །ཞེས་སོགས་གསུངས་པ་བཞིན་ཡར་ངོའི་ཚེས་བཅུ་ནམ་ཤར་དུ་གུ་རུ་ཉིད་སྐུ་དངོས་ཀྱི་བོད་ཡུལ་དུ་བྱོན་ནས་དད་པ་ཅན་ལ་བྱིན་གྱིས་བརློབས་པར་ཞལ་གྱིས་བཞེས་པ་ཡིན་ཞིང་ཁྱད་པར་བྱིན་བརླབས་བླ་མའི་སྒྲུབ་པ་གང་བྱེད་ཀྱི་རྣམ་གཡེང་མེད་པའི་བསྐྱེད་རིམ་གསལ་བའི་དུས་དང་། སེར་སྣ་སྤངས་ཏེ་མཆོད་གཏོར་བཤམས་པའི་དུས་ཉིད་གུ་རུ་ང་ཉིད་དེའི་དྲུང་དུ་ཐེ་ཚོམ་མེད་པར་བྱོན་ཏེ། གསང་འདུས་ཞལ་གདམ་ལས། །སྒྲུབས་ཐབས་གང་ཡིན་བསྐྱེད་རིམ་ནི། །གསལ་བར་བསྒོམ་པའི་དུས་ན་ཡང་། །ང་ཉིད་དེ་ཡི་དྲུང་ན་གནས། །མཎྜལ་མཆོད་པ་གཏོར་མ་ཡི། །བཅའ་གཞི་བཤམས་པའི་དུས་ན་ཡང་། །ང་ཉིད་ཐེ་ཚོམ་མེད་པར་བྱོན། །ཞེས་དང་། །ཤ་མེད་འོད་ཀྱི་གཟུགས་ཅན་ནི། །པདྨ་འབྱུང་གནས་སྐུ་རུ་བསྒོམ། །དེ་དུས་ཆེ་བའི་ང་རྒྱལ་བསྐྱེད། །སྲོག་གི་སྙིང་པོ་ཐོད་ཕྲེང་རྩལ། །
བྲག་ཁ་དག་ནས་ཆུ་འབབ་བཞིན། །དྲག་པོ་བར་མཚམས་མེད་པར་བགྲངས། །ང་ཉིད་རང་དབང་མེད་པར་བྱོན། །ཨོ་རྒྱན་པདྨ་ང་ཉིད་ལ། །མོས་གུས་གདུང་ཤུགས་དྲག་པོ་ཡིས། །གསོལ་བ་དྲག་ཏུ་བཏབ་པའི་ཚེ། །ང་ཉིད་དེ་ཡི་དྲུང་དུ་འོང་། །ཞེས་སོ། །དེས་ན་ཚེས་བཅུ་འདི་དག་གི་སྐབས་སུ་གུ་རུ་ཉིད་ཐུགས་བསྐྱེད་སྨོན་ལམ་གྱི་དབང་གིས་བོད་ཡུལ་དུ་བྱོན་པ་དང་གནས་ཡུལ་གྱི་དཔའ་བོ་མཁའ་འགྲོ་ཆོས་སྐྱོང་རྣམས་ཀྱང་འཛམ་བུའི་གླིང་ཁྱབ་པར་ཉུལ་ཞིང་ཚོགས་ཁང་དང་སྒྲུབ་གནས་གང་ཡོད་དུ་སྒྲུབ་པ་པོའི་རྒྱུད་ཚོད་ཉུལ་ཏེ་ཚུལ་བཞིན་སྤྱོད་པ་ལ་དངོས་གྲུབ་སྟེར། ཉེས་པ་སྤྱོད་པ་ལ་ཆད་པ་གཅོད་པ་ཡིན་པས་ཚེས་བཅུའི་དུས་མཆོད་ཀྱི་སྐབས་སུ་གུ་རུ་ཉིད་ལ་མོས་གུས་ཀྱི་གདུང་ཤུགས་བསྐྱེད་ཅིང་བསྐྱེད་རྫོགས་ཀྱི་དོན་ལས་མི་གཡེལ་བར་ཚུལ་བཞིན་དུ་སྤྱོད་པ་ལས། སྲེད་ཞེན་གྱི་དབང་གི་བཟའ་བཏུང་ལ་ལྷག་པར་སྤྱོད་པ་དང་། ཆང་བཟི་ཀུ་ཅོ་སོགས་བྱས་ན་ནི་དམ་ཚིག་གི་རྫས་བག་མེད་སྤྱད་པའི་རྩ་ལྟུང་དང་། ཚོགས་ཀྱི་འཁོར་ལོའི་དུས་ན་ལུས་ངག་རྩོད་པའི་ཡན་ལག་སྦོམ་པོའི་ལྟུང་བའི་ཉེས་པ་གཉིས་འབྱུང་ཞིང་སྒྲུབ་པ་པོ་ཇི་ཙམ་འདུས་པའི་གྲངས་ཀྱི་འཕེལ་དང་། དུས་ཆེན་གྱི་དབང་གིས་འབུམ་འགྱུར་དུ་འགྲོ་ལ། ཨོ་རྒྱན་གྱི་ཐུགས་ཁྲེལ་དང་མཁའ་འགྲོས་བཀའ་ཆད་རིན་གྱིས་ཉོས་པ་ཡིན་པས་བག་མེད་དུ་ཉེས་པ་ཅི་ཆེ་མི་བྱེད་པ་ཚེས་བཅུའི་དུས་སུ་སྡིག་དང་མ་འདྲེས་པའི་མཆོད་པ་
ཡོན་ཆབ་མར་མེ་སོགས་དངོས་གཙང་རྩལ་དུ་འདོན་ཞིང་གསང་སྔགས་ཀྱི་རྫས་ཤ་ཆང་སོགས་རྟེན་འབྲེལ་གྱི་རྫས་ཙམ་ཚོགས་ན་ཡང་བག་མེད་དུ་མི་སྤྱད་བཟའ་བཏུང་གི་རྣལ་འབྱོར་དང་ལྡན་པར་བྱ་ཞིང་ཁྱད་པར་སེམས་སྐད་ཅིག་ཀྱང་མ་ཡེངས་བར་གུ་རུ་ཉིད་ལ་དད་པའི་གདུང་ཤུགས་བསྐྱེད་པ་གལ་ཆེ་སྟེ། གསང་འདུས་ལས། ལེགས་ཉེས་སྐྱིད་སྡུག་མཐོ་དམན་དང་། །ཤི་གསོན་ཚེ་འདི་ཕྱི་མ་སོགས། །གནས་སྐབས་མཐར་ཐུག་ཐམས་ཅད་དུ། །སྐྱིད་སྡུག་རེ་ལྟོས་ཁྱོད་ཤེས་པས། །བདག་ལ་རེ་ས་གཞན་ན་མེད། །ཨོ་རྒྱན་མཁྱེན་ནོ་སྙམས་པ་ཡིས། །བློ་ནི་ཡང་ཡང་གཏད་པར་བྱ། །ཞེས་སོ། །དེ་ལྟ་བུའི་དད་བརྩོན་དང་ལྡན་པས་ཚེས་བཅུའི་དུས་མཆོད་ལན་གཅིག་བཟུང་ཀྱང་གང་འདོད་པའི་དོན་ཐམས་ཅད་འགྲུབ་པ་ཉིད་རིག་འཛིན་འཇིག་མེད་གླིང་པའི་ཞལ་ནས། དེ་ཕྱིར་བྱུང་ངོ་ཅོག་གི་ཚེས་བཅུ་རྣམས། །ཁྱོད་ཀྱི་མཛད་པ་ཕྲིན་ལས་དུས་ཆེན་དང་། །མ་དང་མཁའ་འགྲོ་འདུ་བའི་དུས་ཡིན་པས། །ནང་དུ་རྡོ་རྗེའི་ལུས་ལ་རྩ་ཐིག་རླུང་། །འདུ་བ་ངོ་མཚར་ཅན་གྱི་རྟེན་འབྲེལ་ལས། །རྣམ་བཞིའི་ཕྲིན་ལས་ཀུན་ལ་དབང་འབྱོར་ཞིང་། །ཆར་ཆུ་དུས་འབེབས་མི་ཕྱུག་ནད་ཡམས་ཞི། །དམགས་འཁྲུགས་དབུལ་ཕོངས་སད་སེར་བཙའ་ཐན་སོགས། །འཇིག་རྟེན་དུས་ཀྱི་རྒུད་པ་ཇི་སྙེད་པ། །ཚེས་བཅུའི་དུས་མཆོད་བཟུང་ནས་གསོལ་འདེབས་ཀྱི། །བྱིན་རླབས་ཁོ་ནས་ཞི་བ་མངོན་སུམ་ཉིད། །ཅེས་གསུངས་སོ། །དེས་ན་ད་ལྟ་རང་རེ་སངས་རྒྱས་ཀྱི་
བསྟན་པ་དར་བའི་ཡུལ་དུ་སྐྱེས། བདེ་བར་གཤེགས་པའི་སྐུ་གསུངས་ཐུགས་རྟེན་དང་མཇལ་དུ་ཡོད་པ་འདི་སྔོན་བསོད་ནམས་བསགས། །ད་ལྟ་སྐལ་པ་བཟང་བ་ཡིན་པས་མཆོག་དམན་སེར་སྐྱ་བུད་མེད་སུ་དང་གང་ཡིན་ཀྱང་རང་རང་གི་ཉེ་སྐོར་ན་གནས་པའི་ལྷ་ཁང་དང་རྟེན་གསུམ་སྤྱིར་སྒེར་སུས་དབང་པ་ཡིན་ཀྱང་གུས་པ་དང་ཞེ་ས་བསྐྱེད། །ཕྱག་དང་བསྐོར་བ་རང་འབྱོར་དང་བསྟུན་པའི་མཆོད་པ། དཀར་མེ། སྙན་ཤལ། །སེར་སྣ་མེད་པའི་དངོས་རྫས་མེ་ཏོག་དང་ཡོན་ཆབ་སོགས་འབད་པས་ཕུལ་ན་འདི་ཕྱི་ཀུན་ཏུ་བསོད་ནམས་རྒྱུན་ཆད་མེད་པར་འབྱུང་ཞིང་། །ཚེ་འདིར་བསམ་པའི་དོན་ཐམས་ཅད་འགྲུབ་པ་དང་། ཕྱི་མ་ལྷ་མིའི་ལུས་རྟེན་ཁྱད་པར་ཅན་ཐོབ་པར་འགྱུར་ལ་ཐ་ན་གཙུག་ལག་ཁང་གི་ཕྱི་ནང་དུ་རྡུལ་ཕྱག་ཙམ་བྱས་ན་ཡང་ཕན་ཡོན་ཚད་མེད། །འདུལ་བ་ལུང་ལས། ཕྱག་དར་བྱས་པ་ལ་ཕན་ཡོན་ལྔ་ཐོབ་སྟེ། རང་གི་སེམས་དངས་བར་འགྱུར་བ་དང་། གཞན་གྱི་སེམས་མོས་པར་འགྱུར། ལྷ་རྣམས་ཡིད་དགའ་བར་འགྱུར། མཛེས་པར་འགྱུར་བའི་དགེ་བའི་རྩ་བ་སོགས་པར་འགྱུར་རོ། །ལུས་ཞིག་ནས་ཀྱང་བདེ་འགྲོ་མཐོ་རིས་ཀྱི་འཇིག་རྟེན་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ཞེས་གསུངས་སོ། །དེས་ན་ལྷ་ཁང་གཙུག་ལག་ཁང་རྣམས་ཀྱི་དཀོར་གཉེར་དང་ཉེ་སྐོར་ན་གནས་པ་དག་གིས་ཀྱང་འབད་པ་དྲག་པོའི་ཞེ་ས་དང་གུས་པ་བསྐྱེད་དེ་ལྷ་ཁང་ཕྱི་ནང་རྡུལ་ཕྱག་དང་ཕྱག་དང་བསྐོར་བ་འབད་ཅིང་ཆུ་དང་མེ་ཏོག་གི་མཆོད་པ་འབུལ་བ་ལ་བརྩོན་ན་ཕན་ཡོན་རྒྱ་ཆེན་པོ་
ཐོབ་ཅིང་དེ་ལས་གཞན་དུ་ལྷ་ཁང་ལ་བརྙས་བཅོས་སོགས་བྱས་ན་མཚམས་མེད་པའི་སྡིག་པ་དང་འདྲ་བའི་ཉེས་པ་འབྱུང་། ཐ་ན་གཙུག་ལག་ཁང་གི་ཕྱགས་མས་རང་ཁྱིམ་ཕྱགས་ན་ཕྱགས་མ་ལྟ་བུའི་དམྱལ་བར་སྐྱེ་བ་དང་། རྩིག་པ་དང་ཀ་བ་ལ་སྣབས་སོགས་བགོས་ན་ཀ་བ་དང་རྩིགས་པ་ལྟ་བུའི་དམལ་བར་སྐྱེ་བར་འགྱུར་ཞེས་འདུལ་བ་ལུང་ལས་གསུང་ཞིང་། །ཁྱད་པར་ལྷ་ཁང་གི་རྫས་དང་མཆོད་ཐེབས་རྟེན་བཞག་སོགས་ལོངས་སྤྱད་ན་ཉེས་པ་མཚམས་མེད་དང་འདྲ། དཀོན་མཆོག་གི་དཀོར་འཕྲོག་པས་བྱང་ཆུབ་སེམས་དཔའི་རྩ་ལྟུང་འབྱུང་། ཤི་མ་ཐག་ཏུ་ཁྲོ་ཆུ་ཁོལ་མ་འཐུང་བའི་དམྱལ་བར་སྐྱེ་ཞིང་དེ་ནས་ཀྱང་ཡི་དྭགས་གི་ལུས་སྟོང་ཕྲག་ལ་སོགས་པ་ལེན་པར་འགྱུར་བ་དང་། ཐ་ན་ལྷ་ཁང་དུ་སྔ་དྲོ་འབུལ་རྒྱུའི་མཆོད་རྫས་ཕྱི་དྲོ་འབུལ་བ་དང་། དབྱར་ཕུལ་ཞིག་ཟེར་བའི་མཆོད་རྫས་སྟོན་འབུལ་བ་དང་། ད་ལྟ་ཕུལ་ཞིག་ཟེར་བའི་མཆོད་རྫས་དུས་མཆོད་ལ་སོགས་པའི་བར་དུ་འཇོག་པའི་བསྔོས་བརྒྱུར་བྱས་ཚེ་ཕྱི་མ་ལ་རྐེད་པ་ཆད་པའི་ཆ་རྒྱུས་པ་ཕྲ་མོས་སྤྲེལ་ནས་སྡུག་བསྔལ་མྱོང་བའི་ཉི་ཚེ་བའི་དམྱལ་བར་སྐྱེ་བར་འདུལ་བ་ནས་གསུངས་པས་ཤིན་ཏུ་གཟབ་པར་བྱ་ཞིང་། ཇི་ལྟར་བཤད་པའི་ཕན་ཡོན་དང་ཉེས་པ་འབྱུང་ཚུལ་རྒྱལ་བའི་བཀའ་ནས་འབྱུང་བ་རྣམས་ལ་ཡིད་ཆེས་པར་བྱས་ཏེ། དཀོན་མཆོག་གི་རྟེན་གང་བཞུགས་པ་ལ་དད་པ་དག་སྣང་བསྐྱེད་དེ་ཕྱག་སྐོར་དང་མཆོད་པ་ལ་བརྩོན་པ་བསྐྱེད་ན་གནས་སྐབས་མཐར་ཐུག་ཀུན་ཏུ་ལེགས་ཚོགས་ཀྱི་དཔལ་ཡོན་གོང་ནས་གོང་འཕེལ་དུ་འགྱུར་བ་ཡིན་པས་
སྙིང་ཐག་པ་ནས་འབད་པར་མཛོད་ཅིག །ཅེས་ཁོ་བོས་ཐལ་མོ་སྦྱར་ཏེ་མཆོག་དམན་ཀུན་ལ་གསོལ་བ་འདེབས་པ་ལགས་ན་དེ་དེ་བཞིན་དུ་མཛད་དུ་གསོལ་ལོ། །རྒྱལ་བ་སྲས་དང་བཅས་པའི་བདེན་སྟོབས་དང་། མཆོག་གསུམ་བསླུ་བ་མེད་པའི་ཐུགས་རྗེ་དང་། དྲིན་ཅན་རྩ་བརྒྱུད་བླ་མའི་ཐུགས་བསྐྱེད་མཐུས། །ཁོ་བོའི་བདེན་པའི་ཚིག་འདི་འགྲུབ་གྱུར་ཅིག །སྐྱབས་མཆོག་དཀོན་མཆོག་རིན་ཆེན་དབུ་འཕང་མཐོ། །བསྟན་འཛིན་དགེ་འདུན་འདུས་སྡེ་མཛད་སྤྱོད་ལེགས། གཙུག་ལག་ཁང་རྣམས་བཤད་སྒྲུབས་མཆོད་ཚོགས་རྒྱས། ཕན་བདེའི་འབྱུང་གནས་རྒྱལ་བསྟན་དར་གྱུར་ཅིག །ཐ་མལ་སྐྱེ་བོ་ཀུན་གྱི་དཀོན་མཆོག་མཆོད། མཆོག་གསུམ་ཐུགས་རྗེ་བྱིན་རླབས་འགྲོ་ལ་ཞུགས། །སྣོད་བཅུད་ཀུན་ཀྱང་ལེགས་ཚོགས་ཡོན་ཏན་རྒྱས། །འབད་མེད་རྫོགས་ལྡན་དཔལ་ལ་སྤྱོད་པར་ཤོག །བདག་ཀྱང་ཚེ་རབས་ཀུན་ཏུ་དཀོན་མཆོག་གསུམ། །བསླུ་མེད་སྐྱབས་གཅིག་ཁྱོད་དང་མི་འབྲལ་ཞིང་། །གཞན་ལའང་ལེགས་བྱས་ཚུལ་འདི་ལེགས་འདོམས་པའི། །བདེན་ཚིག་རྒྱལ་བ་བཞིན་དུ་འགྲུབ་གྱུར་ཅིག །ཅེས་ཨོ་རྒྱན་སངས་རྒྱས་གཉིས་པའི་སྐུ་བརྙན་གཙོ་བོར་གྱུར་བའི་རྒྱལ་བའི་སྐུ་གསུངས་ཐུགས་རྟེན་ལ་གུས་པར་བྱེད་པའི་ཚུལ་བརྗོད་པ་ལེགས་ལམ་དམ་པའི་གསོས་སྨན་ཞེས་བྱ་བ་འདི་ཡང་མཐའ་ཡས་པའི་སེམས་ཅན་ལ་ཕན་འདོད་ཀྱི་བསམ་པ་དུང་དང་ཟླ་བ་ལྟར་དཀར་བ་དང་། །ཁྱད་པར་སྔར་འདྲིས་ཀྱི་གྲོགས་པོ་སྒྲུབ་བརྩོན་དམ་པ་བླ་མ་ཚེ་དབང་བཟང་པོའི་ཚེས་བཅུའི་གཙུག་ལག་ཁང་གསང་དུ་བཞེངས་པའི་སྐབས་སུ་བདག་གིས་ཀྱང་རྗེས་
སུ་ཡི་རང་བའི་སེམས་ཀྱི་ཟང་ཟིང་ཞབས་རྟོག་བཅས་བཙུན་གཟུགས་དཔལ་དགེ་ཧྲལ་པོ་ལས་ངན་དུག་ལྔ་མེ་འབར་དུ་འབོད་བས་རང་གཤིས་ཉོན་མོངས་པའི་དུག་དང་མ་འདྲེས་པ་རྒྱལ་ཕགས་རི་ཁྲོད་ལྗོན་པའི་ཚལ་ཉམས་དགའ་བར་བྲིས་པ་དེ་ཁོ་ན་བཞིན་འགྲུབ་པར་གྱུར་ཅིག །དགེའོ།། །།