ཐ་མ་དགེ་བ་མཇུག་གི་དོན།
༈ དོན་གསུམ་པ་ཐ་མར་དགེ་བ་མཇུག་གི་དོན་ལ། དེ་ལྟར་རྩམ་པའི་དགེ་བ་བསྔོ་བ། གང་གིས་བརྩམ་པའི་བརྩམ་བྱང་གཉིས། དང་པོ་བསྔོ་བ་ལ། བསྔོ་རྒྱུའི་དགེ་རྩ་བསྟན་པ་དང༌། བསྔོ་བ་དངོས་གཉིས། དང་པོ་བསྔོ་རྒྱུའི་དགེ་རྩ་བསྟན་པ་ལ། བདག་འཇིག་ཞལ་ལམ་གྱིས་བསྟན་བཅོས་བརྩམ་པའི་རྒྱུ་ཕུན་སུམ་ཚོགས་པ་བསྟན། དེ་བླ་ཐོས་རང་གིས་གཅོམ་བསྐྱུང་སྟེ་མཐོལ་བཤགས་མཛད། ཆོས་མཉམ་ཇི་ཡང་གིས་གཟེངས་བསྟོད་དེ་རྗེས་འཇུག་ལ་གདམས་པའོ། །གཉིས་པ་བསྔོ་བ་དངོས་ལ་གསུམ། དགེ་རྒྱལ་སྒྲིབ་བྱང་གིས་མཐར་ཐུག་རྫོགས་བྱང་དུ་བསྔོས། ནགས་དུས་དྲང་སྙིང༌། སྤྲུལ་སྐྱོ་ཅ་དབང་གིས་གནས་སྐབས་དབེན་པར་བསྔོས། ལྟ་སྤྱོད་ནམ་རླབས་ཀྱིས་ལྟ་སྤྱོད་ཕུན་ཚོགས་སུ་བསྔོ་བའོ། །གཉིས་པ་བརྩམ་བྱང་ལ་བཞི། བརྩམ་བྱ་བསྟན་བཅོས། བསྐུལ་བ་པོ་སློབ་མ། མཛད་པ་པོ་སློབ་དཔོན། གང་དུ་བརྩམ་པའི་གནས་དང་བཞི། ཡོན་ཏན། ལ་སྟོད། སངས་རྒྱས། དཔལ་ལྡན་ཞེས་པ་རྣམས་རིམ་པ་ལྟར་རོ།། །།དེ་ལྟར་ཆོས་ཚུལ་ཤིན་ཏུ་རྨད་བྱུང་བ། །ལམ་དང་འབྲས་བུ་ཡོན་ཏན་དུ་མའི་མཛོད། །གདུལ་བྱའི་ཞིང་སར་སྐུ་
བཞིའི་འབྲས་བསྐྱེད་པ། །རབ་དགའ་སྦྱིན་པའི་ཞི་བསིལ་ཆར་བ་ཡིན། །བསྟན་པ་ཡོངས་རྫོགས་ཀུན་མཁྱེན་རྒྱུད་པའི་གཞུངས། །ཚིག་གཅིག་ཐོས་ཀྱང་ཐར་པའི་ལམ་འགྲོ་ཞིང༌། །དོན་ཀུན་རྟོགས་ན་ཚེ་གཅིག་འཚང་རྒྱ་བའི། །གཞུང་བཟང་འདི་འདྲ་སྔོན་མེད་རིན་པོ་ཆེ། །ཐུབ་པ་ཉི་མ་རྒྱལ་བས་གང་བསྟན་པའི། །ཆོས་ཚུལ་དྲི་མེད་ཤིན་ཏུ་མཐའ་ཡས་པ། །མ་ལུས་གཞུང་ལམ་གཅིག་ཏུ་སྟོན་པའི་མཛོད། །བསྟན་བཅོས་འདི་འདྲ་རྙེད་པར་དཀའ་བ་རྙེད། །སྐལ་བཟང་གྲོགས་དག་རབ་དགའི་ཤུགས་བསྐྱེད་ལ། །དད་དང་བརྩོན་འགྲུས་ཤེས་རབ་དྲན་སེམས་ཀྱིས། །ཉན་འཆད་བསྒོམ་ལ་འབད་པར་མཛོད་ཅིག་དང༌། །དོན་གཉིས་ལྷུན་གྱིས་གྲུབ་པ་འདིར་འབྱུང་ངེས། །དེ་སླད་ཁོ་བོ་འཆད་རྩོད་རྩོམ་པའོ། །དབང་བ་མིན་ཡང་བརྒྱུད་པ་རིན་པོ་ཆེར། །མོས་བློས་བྱིན་ལས་གཞུང་དོན་མེ་ཏོག་གི །ཕྲེང་བཞིན་བསྡེ་བ་འདི་སྤྱི་བོའི་བླངས་པར་རིགས། །དགེ་བ་དེ་ཡིས་མ་ལུས་འགྲོ་བ་ཀུན། །རྒྱལ་བའི་རིང་ལུགས་རྙོགས་མེད་འདིར་ཞུགས་ནས། །བྱང་ཆུབ་སྤྱོད་པ་ཡིད་འོང་མཐར་བགྱིས་ཏེ། །རྒྱལ་བས་གང་གཟིགས་རྒྱལ་བ་ཉིད་གྱུར་ཅིག །བདག་ཀྱང་དེང་ནས་ནམ་མཁའ་ཇི་སྲིད་དུ། །
རྒྱལ་བའི་སྲས་པོ་ཤེས་དང་བརྩེ་བའི་བློ། །རྒྱས་པར་གྱུར་ནས་སྲས་བཅས་རྒྱལ་བའི་གཞུང༌། །བཟུང་ནས་འགྲོ་ལ་སྦྱིན་པ་པོར་གྱུར་ཅིག། །ཡོན་ཏན་རིན་པོ་ཆེའི་མཛོད་ཀྱི་བསྡུས་དོན་མེ་ཏོག་གི་ཕྲེང་བ་ཞེས་བྱ་བ། སྐལ་བཟང་གི་གྲོགས་པོ་ཆོས་དོན་གཉེར་པ་དུ་མས་བསྐུལ་ནས། བརྒྱུད་པ་རིན་པོ་ཆེར་གསོལ་བ་འདེབས་པའི་མོས་ལྡན་ཨ་བུ་ཧྲལ་པོས་དམར་ཕྱོགས་ཀྱི་མཁའ་འགྲོ་འདུ་བའི་ཚེས་ལ་དགེ་བའི་ལྟས་དང་བཅས་གྲུབ་པར་བགྱིས་པའོ།། །།དགེའོ།། །།དགེའོ།། །།དགེའོ།། །།སརྦ་དཱ་མངྒ་ལཾ།། །།