དགགས་དབྱེ།
༈ དགགས་དབྱེ་ནི། གླེང་གཞི་མཉན་ཡོད་དུ་ལྗོངས་ཞིག་དུ་དབྱར་གནས་པའི་དགེ་སློང་མང་པོ་ལ་བརྟེན་ཏེ་བཅས་སོ། །དེ་ནི་དབྱར་གནས་ཚར་ནས་བྱ་བ་སྟེ་གཙུག་ལག་ཁང་ཕྱག་དར་དང་ཆག་ཆག་བྱ་བ་སོགས་དང་ཉི་མ་འདི་སྙེད་ནས་དགེ་འདུན་གྱི་དགགས་དབྱེ་བྱེད་པར་འགྱུར་རོ་ཞེས་སྤྱོད་ཡུལ་གྱི་གྲོང་དུ་གོ་བར་བྱ་བ་སྔོན་དུ་སོང་ནས། དགགས་དབྱེ་བྱེད་པའི་དགེ་སློང་བསྐོ་སྟེ་དེ་དང་པོ་རང་ཉིད་ལ་སྤྲོ་བ་དྲི་དེ་ནས་གསོལ་བ་དར་གཉིས་ཀྱི་ལས་ཀྱིས་བསྐོ་བར་བྱ་ཞིང་བསྐོས་པའི་དགེ་སློང་གིས་འཇགས་མ་བྲིམ་པ་བྱས་ནས་དགེ་སློང་གནས་བརྟན་གྱིས་དགེ་འདུན་གྱི་དགགས་དབྱེ་བྱེད་པར་གསོལ་བ་འབའ་ཞིག་པ་དང་དེ་ནས་
རང་ཉིད་ཀྱི་མཐོང་ཐོས་དོགས་གསུམ་གྱི་དགགས་དབྱེ་བརྗོད་ཅིང་གཞོན་རིམ་ཀྱི་མཐའི་བར་དུ་བྱ་དེ་ནས་དགགས་དབྱེ་བྱེད་པའི་དགེ་སློང་རང་གིས་བྱ། དེ་ནས་དགེ་སློང་མ་དང་དགེ་སློང་མ་དགེ་ཚུལ་ཕ་མའི་བར་གྱི་དགགས་དབྱེ་གྲུབ་ནས་དགགས་དབྱེ་བྱེད་པའི་དགེ་སློང་གིས་དགེ་འདུན་གྱི་དགགས་དབྱེ་མཛད་ལགས་སོ། །ཞེས་བརྗོད་ཅིང་ཐམས་ཅད་ཀྱིས་དགགས་དབྱེ་ལེགས་པར་མཛད་ཟིན་ཏོ་སོགས་བརྗོད། ལྟུང་བ་དྲན་ན་ཆོས་བཞིན་ཕྱིར་བཅོས་བྱ་བ་རྣམས་ཏེ་དབྱར་གྱི་ཚེ་དེར་བྱུང་བའི་འགལ་ལྟུང་ཕྱིར་བཅོས་པའི་བྱ་བ་སྟེ་དེ་གྲུབ་འཕྲལ་དབྱར་གྱི་རྙེད་པ་རྣམས་ལེགས་པར་བགོ་བར་བྱེད་པ་སོགས་སོ།། །།