ལས་ཀྱི་གཞི།
༈ ལས་ཀྱི་གཞི་ནི། ཕལ་ཆེར་དྲུག་སྡེ་དག་ལ་བརྟེན་ནས་བཅས་སྟེ། དེ་ཡང་དགེ་འདུན་གྱི་ལས་སུ་བྱ་བ་མང་པོ་ཞིག་ཏེ། དགེ་སློང་གང་ཞིག་ལྟུང་བ་བྱུང་ཞིང་ལྟུང་བ་བྱུང་བ་དེ་གླེང་ཞིང་དྲན་པར་བྱས་ནས་ལྟུང་བ་ལ་ལྟུང་བར་ཁས་མ་བླང་བར་གནས་ནས་དབྱུང་བ་མི་བྱ་བ་དང༌། དགེ་འདུན་གྱི་ལས་རྣམས་ལས་དགེ་སློང་ལྔའི་ཚོགས་ཀྱི་དགགས་དབྱེ་བྱ་ཞིང་
དེ་ལས་ཉུང་བས་མི་བྱེད་པ་དང༌། དེ་བཞིན་དུ་བཅུས་བསྙེན་པར་རྫོགས་པ་དང་ཉི་ཤུས་གནས་ནས་དབྱུང་བ་བྱ་ཞིང་དེ་ལས་གཞན་པའི་ལས་གང་བྱེད་ཀྱང་བཞིའི་ཚོགས་ཡན་ཆད་ཀྱིས་བྱ་ཡི་གཅིག་དང༌། གཉིས་དང་གསུམ་གྱིས་མི་བྱ་བ་དང་ཡང་གསོལ་གཉིས་དང་གསོལ་བཞི་ལ་སོགས་པའི་ལས་གང་བྱེད་ཀྱང་དེ་དག་མ་ཚང་བར་གསོལ་བ་མེད་པར་ལས་སུ་བྱ་བ་གཉིས་སམ་གསུམ་བཟླས་པ་ཙམ་དང་ལས་བྱ་བ་མེད་པར་གསོལ་བ་འབའ་ཞིག་གིས་བྱེད་པ་རྣམས་ཀྱང་མི་བྱ་ཞིང་ཁས་བླང་བའི་ལས་མི་བྱེད་པ་དང་སྡིག་པའི་ལྟ་བ་འཛིན་པ་མི་སྤོངས་བར་གནས་དབྱུང་བྱེད་པ་དང༌། གཤེ་བ་དང་བསྐྲད་པར་འོས་པ་ལ་དེ་ལྟར་མི་བྱེད་པ་དང༌། གནས་ནས་དབྱུང་བར་འོས་པ་སོགས་བག་ཡངས་སུ་བཞག་པར་མི་བྱ་བ་ལ་སོགས་པ་མང་པོ་ཞིག་གོ། །།