དབྱེན་གྱི་གཞི།
༈ དབྱེན་གྱི་གཞི་ནི། རྒྱལ་པོའི་ཁབ་ཏུ་ལྷ་སྦྱིན་དང་དེའི་གྲོགས་བྱེད་པའི་དགེ་སློང་བཞིས་དགེ་འདུན་གྱི་དབྱེན་བྱེད་པར་རྩོམ་པ་ན་བཅས་ཏེ། དེ་ཡང་དགེ་འདུན་གྱིས་དང་པོར་དབྱེན་བགྱིད་པའི་དགེ་སློང་དེ་ལ་དགེ་འདུན་མ་དབྱེ་ཞིག་ཅེས་བཞམ་ཏེ་བསྒོ་བར་བྱ་ཞིང་དེས་ཀྱང་མ་བཏུབ་ན་གསོལ་བ་དང་བཞིའི་ལས་ཀྱིས་བཞམ་ཏེ་བསྒོའོ། །གྲོགས་བྱེད་པ་རྣམས་ལ་ཡང་དགེ་འདུན་འབྱེད་པའི་གྲོགས་མ་བྱེད་ཅིག་ཅེས་བསྒོ་ཞིང་དེས་ཀྱང་མ་བཏུབ་ན་གསོལ་བཞིའི་ལས་ཀྱིས་བསྒོ་བར་བྱའོ། །ཞེས་གསུངས་པ་རྣམས་ཏེ་དགེ་འདུན་གྱི་དབྱེན་ནི་སངས་རྒྱས་མི་བཞུགས་པ་ན་མི་འབྱུང་ངོ། །དེས་ནི་དགེ་འདུན་གྱི་སོ་སོར་ཐར་བའི་གཞི་བཅུ་བདུན་པོ་དག་ཚང་བ་ཡིན་ཏེ་དེ་ལས་ཁང་པ་དང་གོས་རྣམས་ཀྱི་ཚད་ནི་ཅི་ཞེ་ན། གནས་ཁང་ནི་སྲིད་དུ་བདེ་བར་གཤེགས་པའི་མཐོས་མཐོ་བཅུ་གཉིས་ཞིང་དུ་བདུན་ཏེ་ཕལ་པའི་ཁྲུས་སྲིད་དུ་བཅོ་བརྒྱད་དང་ཞིང་དུ་ཕྱེད་བཅུ་གཅིག་
པའོ། །སྣམ་སྦྱར་ནི་གསུམ་སྟེ། ཚེ་ཚད་ནི་སྲིད་དུ་ཁྲུ་ལྔ་དང་ཞིང་དུ་གསུམ་མོ། །འབྲིང་ཚད་ནི་དེ་ལས་ཅུང་ཟད་ཆུང་བ་དང༌། ཆུང་ཚད་ནི་ཞིང་དུ་ཁྲུ་ཕྱེད་གསུམ་དང་སྲིད་དུ་ཕྱེད་ལྔ་པ་སྟེ་དེ་ལ་སྣམ་ཕྲན་གྱི་གྲངས་ནི། དགུ་པ་དང་བཅུ་གཅིག་པ་དང༌། བཅུ་གསུམ་པ་ཆུང་སྐོར་གསུམ་དང༌། བཅོ་ལྔ་པ་དང༌། བཅུ་བདུན་པ་དང༌། བཅུ་དགུ་པ་སྟེ་འབྲིང་སྐོར་གསུམ་དང༌། ཉེར་གཅིག་པ་དང༌། ཉེར་གསུམ་པ་དང༌། ཉེར་ལྔ་པ་སྟེ་ཆེ་སྐོར་གསུམ་གྱི་དགུ་པོ་གང་བྱས་ཀྱང་རུང་ལ་དེ་ཡང་སྣམ་ཕྲན་གྱི་ཚད་སྔ་མ་གསུམ་ཕྱེད་གསུམ་དང༌། བར་བ་གསུམ་ཕྱེད་བཞི། ཕྱི་མ་གསུམ་ཕྱེད་ལྔ་པའོ། །བླ་གོས་ནི་ཚད་སྣམ་སྦྱར་དང་འདྲ་ལ་རྡུལ་གཟན་དང་དེས་གཟན་ཀྱང་ཚད་དེ་དང་འདྲ། མཐང་གོས་སྲིད་དུ་ཁྲུ་ལྔའམ་བཞི། ཞིང་དུ་དོའོ། །གདིང་བ་ནི་སྲིད་དུ་ཁྲུ་གསུམ་ཞིང་དུ་ཁྲུ་དོ་དང་སོར་དྲུག་གོ །དེ་ལ་སྲིད་དུ་ཁྲུ་གང་བསྲིང་ཀྱང་འགལ་བ་ནི་མེད་དོ། །གཡན་དག་པ་ནི་སྲིད་དུ་ཁྲུ་དྲུག །ཞིང་དུ་ཁྲུ་གསུམ་མོ། །རས་ཆེན་ནི་སྲིད་དུ་ཁྲུ་དགུ་ཞིང་དུ་ཁྲུ་གསུམ་དང་སོར་བཅོ་བརྒྱད་དོ། །ཤམ་ཐབ་དང་དེས་གཟན་ནི་མཐང་གོས་དང་འདྲ་བའོ།། །།