གཞི་བཅུ་བདུན་པོའི་ངེས་ཚིག
༈ གཞི་བཅུ་བདུན་པོའི་ངེས་ཚིག་ནི། ཁྱིམ་དང་འཁོར་བ་ལས་རབ་ཏུ་འབྱུང་བས་ན་རབ་བྱུང༌། བསླབ་པ་ཉམས་པ་གསོ་ཞིང་ཉེས་པ་སྦྱོང་བ་གསོ་སྦྱོང༌། དབྱར་ཟླ་བ་གསུམ་དུ་དགགས་པ་བྱས་པའི་བསླབ་པ་ལ་སྐབས་ཕྱེ་བས་དགགས་དབྱེ། དབྱར་ཟླ་བ་གསུམ་གནས་གཅིག་ཏུ་གནས་པས་དབྱར་གནས། ཀོ་བ་དང་ལྤགས་པའི་གདན་གོས་རུང་མི་རུང་བསྟན་པ་ཀོ་ལྤགས། བཀྲེས་སྐོམ་དང་ནད་ལ་སྨན་དུ་གྱུར་པའི་བཟའ་བཏུང་གི་བྱེ་བྲག་རུང་བ་དང་མི་རུང་བ་བསྟན་པ་སྨན་གྱི་གཞི། གོས་ཀྱི་བྱེ་བྲག་མཚན་མས་གདབ་པ་དང་ཁ་དོག་སོགས་སྟོན་པ་གོས། ཆོས་གོས་ཀྱི་གཞིར་སྤང་ལེབ་ལྟར་བཏིང་བ་སྲ་བརྐྱང༌། ཀཽ་་དགེ་སློང་མང་པོ་ལ་བཅས་པས་ཀཽ༌། དགེ་འདུན་གྱི་ལས་གཙོ་བོ་དག་སྟོན་པ་ལས་ཀྱི། དམར་སེར་ཅན་གྱི་དགེ་སློང་མང་པོ་ལ་བཅས་པ་དམར་སེར་ཅན། གང་ཟག་རེ་རེ་ལ་ལྟུང་བ་བཅབ་པ་དང་མ་བཅབ་པའི་བྱེ་བྲག་སྟོན་པ་གང་ཟག །དེ་དག་ལ་ཟླ་ཕྱེད་སོགས་ཀྱི་སྤོ་བ་སྦྱིན་པ་སྤོ། ཉེས་པ་དུ་མ་ལ་བརྟེན་དེ་གསོ་སྦྱོངས་བཞག་པར་བྱ་བ་གསོ་སྦྱོངས་བཞག །གནས་ཁང་པ་དང་མལ་ཁྲི་སྟན་སོགས་ཀྱི་བྱེ་བྲག་སྟོན་པ་གནས་མལ། དགེ་འདུན་གྱི་རྩོད་པ་ཕལ་ཞི་བར་བྱ་བ་
རྩོད་པ། དགེ་འདུན་ལྟ་བ་དང་སྟོན་པ་ཐ་དད་དུ་གྱུར་སྟེ་ཆ་གཉིས་སུ་ཕྱེ་བ་བསྡུམ་པ་དབྱེན་གྱི་གཞིའོ།། །།ལེགས་གསུང་འདུལ་བ་བསྟན་པའི་གཞི་ཡིན་ཀྱང༌། །སྙིགས་མའི་རྒུད་པས་བཀབ་པའི་རབ་བྱུང་ཁྱུད། །ཡང་དག་ཕྱག་བཞེས་མཐོང་ཐོས་སྤངས་དེས་ཕྱིར། །སྔ་འགྱུར་གཞུང་གི་དགོངས་པ་ལ་དཔྱད་ནས། །ཆག་བཞག་ཙམ་དུ་དཔལ་སྤྲུལ་སྨྱོ་རོམ་བྲིས། །ནོར་འཁྲུལ་གྱུར་ན་མཁས་པས་བཅོས་འཚལ་ཞིང༌། །འཕྱ་བར་མི་བྱ་སྙིགས་མའི་གདོན་ལ་རྟོགས། །མངྒ་ལཾ།།
་