ངོ་སྤྲོད་གནད་ཀྱི་མེ་བཙའ།
༈ ངོ་སྤྲོད་གནད་ཀྱི་མེ་བཙའ་བཞུགས། །དུས་དང་རྣམ་པ་ཐམས་ཅད་དུ་བཟང་ངན་གྱི་རྟོག་ཚོགས་གང་ཤར་གྱི་ངོ་བོ་ལ་ཕར་བལྟས་པས་སྟོང་ཞིང་སྟོང་པ་ཉིད་དོ་སྙམ་པའི་བློ་དེ་ཉིད་ལས་མ་འདས་པའི་ངང་གིས་ཡུལ་སྟོང་པ་འཁོར་ཡུག་གི་རང་གཞིན་ཅན་འདྲའི་སྟོང་ཆ་ཆེན་པོ་སྟོང་པའི་ཕྱོགས་ནས་སྣང་བ་གཏད་མེད་རྒྱ་ཡན་ལྷུག་པ་འདྲ་བ་ཞིག་ནམ་ཡང་འདུག་པའི་དུས་སྐབས་སུ་དེ་ཡི་ངང་དུ་མཉམ་བཞག་བྱེད་པ་དེ་ལ་དགོས་པ་ཅི་ཡང་མི་འདུག་སྟེ། སྟོང་ཆ་དེ་ཉིད་ཡོད་ཀྱང་ཆོག་སྟེ་མེད་ཀྱང་ཆོག །དོན་ལ་སྒོམ་པ་ཁ་ཕྱིར་བལྟས་སུ་ཤོར་བའི་སྟོབས་ཀྱིས་ཡུལ་སྟོང་ཕྱོགས་སུ་སྣང་བ་ཙམ་རེ་འདྲའོ། །མདོར་ན་ཁ་ཕྱི་རུ་རྣམ་རྟོག་གི་ཆ་ལ་མི་བལྟ། ཁ་ནང་དུ་ངོ་བོ་རང་རིག་གི་གཤིས་སུ་ལྟོས་ལ་ཡང་ནས་ཡང་དུ་རིག་པ་ཧུར་ཕྱུང་བ་ནི་གནད་ཆེའོ། །ལྟ་སྒོམ་ལ་ཉམས་ལེན་གནད་དུ་དེ་ལྟར་བྱས་ནས་རིག་གདངས་གསལ་བའི་མདངས་ལ་ངར་བའི་ཆ་དང་བཅས་པའི་གཤིས་དེར་རྣམ་རྟོག་འཆར་དུ་མེད་པས་བཟང་ངན་གྱི་རྟོག་པ་ལ་རིས་སུ་ཕྱེ་རྒྱུ་མེད་པ་དེའོ། །དེ་སྟོང་ངོ་བསམ་རྒྱུ་སྤུ་ཙམ་མེད་དེ་སྤང་
ལ་བེ་ཕུར་བཏབ་པ་བཞིན་དུ་ལྷན་ནེར་སྡོད་ཚུགས་པ་ཞིག་བྱུང་བར་གྱུར་ན་དེ་ནི་གནད་ཆེ་སྟེ། ཤེས་རིག་རང་ཚུགས་ཟིན་པ་མཆོག་ཏུ་ལྷག །ཅེས་གསུངས་པས། དེ་ལྟར་དུ་ངོ་བོ་རང་ཚུགས་སྐྱོང་བའི་མུ་བྱས་པས་མི་ཆོག་པ་ནི་ནམ་ཡང་ལོས་ཡོད་དེ། དེས་མི་ཆོག་ན་ནི་ངས་ཅང་མི་ཤེས་སོ། །ལར་ལམ་བསླབ་པ་གསུམ་པོ་ཇི་བཞིན་དུ་གོ་དགོས། དེ་ཡང་གོ་བ་ཙམ་གྱིས་མི་ཆོག་སྟེ་གནད་དུ་ཐེང་དགོས། གནད་དུ་མ་ཐེང་པའི་ཆོས་ཐོས་བསམ་སྒོམ་གསུམ་གྱིས་ཅི་བྱེད་དོན་མེད་དོ། །སྡོམ་པ་དེ་ཡང་མདོ་དོན་ནི། ཉེས་སྤྱོད་སྡོམ་པའི་ཚུལ་ཁྲིམས་རྣམ་པར་དག་པས་རང་རྒྱུད་དོན་ཡོད་དུ་སྡོམ་པར་བྱ་བ་གལ་ཆེ་ཆེ། ནང་པ་སངས་རྒྱས་ཀྱི་བསྟན་པའི་སྒོར་ཞུགས་པའི་རྩ་བའི་དོན་དམ་གང་ཡིན་པ་དེ་ནི་ལེགས་པར་ངོ་ཤེས་དགོས། ངོ་མ་ཤེས་ན་རྒྱལ་བའི་རྗེས་འཇུག་ནི་མིན་པས། དེ་ཤེས་ནས་དོན་གྱི་རྩ་བ་དེ་ཉམས་སུ་ལེན་པར་བྱ་དགོས་ངེས། རྣལ་འབྱོར་རང་བཅའ་བ་རྔ་རང་ལྕགས་ཟེར་བའི་དཔེ་དོན་ལྟར་ཡིན་པ་ནི་ལོས་གོ །དེ་གོ་ནས་བཟུང་སྟེ་དགྲ་འདུལ་གཉེན་སྐྱོང་སོགས་འཇིག་རྟེན་འཁོར་བའི་བྱ་བྱེད་ཕལ་ཆེར་ཐམས་ཅད་རྣལ་འབྱོར་པའི་ཐུགས་དམ་མིན་ཏེ་ཉམས་ལེན་གྱི་རྩ་བ་མ་ཡིན་མོད། རྣལ་འབྱོར་པའི་ཉམས་ལེན་ཐུགས་དམ་གྱི་རྩ་བ་གང་ལ་མཛད་ན་རྒྱལ་བའི་བསྟན་པ་རིན་པོ་ཆེ་ལམ་བསླབ་པ་གསུམ་སྟེ་ལུང་རྟོགས་ཀྱི་ཆོས་རྣམས་ཉམས་ལེན་ཞིབ་ཏུ་མཛད་དགོས། དེ་ཡང་སངས་རྒྱས་ཀྱི་རྗེས་འཇུག་ཡིན་པ་ལ་ཡིན་པའི་རྟགས་ཡོད་དགོས་པས། གྲུབ་ཐོབ་གོང་མའི་ཉམས་མགུར་
དང་རྣམ་ཐར་སོགས་ལ་བལྟས་ཏེ། ལེགས་པར་དེའི་རྗེས་སུ་སྙོགས་པ་ནི་དོན་གྱི་གལ་ཆེའོ། །ཞེས་དཔལ་སྤྲུལ་པས་སོ།། ༈ །བླ་མ་ལ་ཕྱག་འཚལ་ལོ། །བསམ་གྱིས་མི་ཁྱབ་རྫོགས་པ་ཆེན་པོའི་དོན། །ཡེ་གྲོལ་རང་བཞིན་རྗེན་པར་སྟོན་མཛད་པའི། །ཀུན་མཁྱེན་ཡབ་སྲས་བརྒྱུད་པ་བཅས་རྣམས་དང༌། །དཔལ་མགོན་བླ་མའི་ཞབས་ལ་ཕྱག་འཚལ་ལོ། །སྐྱོན་ཡོན་གྲུབ་བསལ་སྤང་བླང་ལས་འདས་པའི། །ད་ལྟའི་ཤེས་པ་རང་བབ་ལྷུག་པ་ནི། །བཅོས་ཤིང་བསྒྱུར་མེད་རིག་པའི་ཡེ་ཤེས་ཏེ། །ངང་དེར་གནས་ན་ལྟ་བསྒོམ་ཟུང་དུ་འཇུག །བསྒོམ་པ་ཤེས་ཀྱང་གྲོལ་བར་མ་ཤེས་ན། །བསམ་གཏན་ལྷ་དང་འདྲ་བར་གསུངས་པས་ན། །རྟོགས་པའི་གདེངས་ཚད་གྲོལ་ཐོག་བཟུང་བ་གཅེས། །མི་གནས་སེམས་འཛིན་གནས་ཆའི་བསམ་གཏན་གྱིས། །གནས་སྐབས་ཉོན་མོངས་མགོ་བོ་ནོན་གྱུར་ཀྱང༌། །རང་གྲོལ་རྟོགས་པའི་གནད་གསང་མ་ཤེས་ན། །རྐྱེན་དང་འཕྲད་ཚེ་རྟོག་པའི་དུག་རོ་སྡང༌། །རང་ཤར་རང་གྲོལ་རྟོགས་པའི་གནད་ཤེས་ན། །སྤང་བླང་རྣམ་རྟོག་ཆུ་ཡི་རི་མོ་བཞིན། །འཕྲལ་ལ་སྐྱེ་ཡང་ཚུགས་མི་ཐུབ་པར་འཇིག །སྐྱེས་གྲོལ་དུས་མཉམ་རང་ཚུག་མི་ཐུབ་པའི། །ངན་རྟོག་སྐྱེས་ཀྱང་ལས་ངན་མི་གསོག་སྟེ། །སྐད་ཅིག་རྟོག་པས་སུ་ལ་ཕན་གནོད་ཡོད། །རང་སར་གྲོལ་བའི་གནད་དང་མི་ལྡན་ན། །འོག་འགྱུའི་རྣམ་རྟོག་ཉོན་མོངས་རྒྱུན་འབྱམས་ལ། །རང་ངོ་ཤེས་ཙམ་དྲན་པས་ཟིན་ན་ཡང༌། །བཟང་ངན་
རྟོག་པས་རེ་དོགས་བསྐྱེད་པ་ཡིས། །འདུ་བྱེད་ལས་བསགས་འཁོར་བའི་རྒྱུ་རུ་འགྱུར། །དེ་ཕྱིར་སེམས་གནས་ཉམས་མྱོང་སྟོང་ལས་ཀྱང༌། །རང་གྲོལ་རིག་པའི་སྐད་ཅིག་གཅིག་ལྷག་པས། །ཡེ་གྲོལ་རང་གྲོལ་ཤར་གྲོལ་ཅེར་གྲོལ་སོགས། །ལྟ་བསྒོམ་སྤྱོད་པའི་གནད་ཀུན་གཅིག་ཡིན་ཕྱིར། །རང་གྲོལ་རྟོགས་པའི་གནད་ལ་གོམས་པར་མཛོད། །གནད་འདི་ཤེས་ན་ལྟ་བསྒོམ་གཞན་མི་དགོས། །བཟང་རྟོགས་ཐམས་ཅད་ཞེན་མེད་རྒྱན་དུ་འཆར། །དགེ་བར་བརྩོན་ཡང་མཆོག་འཛིན་རློམ་སེམས་མེད། །ངན་རྟོག་ཐམས་ཅད་སྤྲུལ་མདུད་བཞིན་ཏུ་འཇིག །དུག་ལྔ་སྐྱེས་ཀྱང་སྐད་ཅིག་རང་སར་གྲོལ། །བར་མའི་རྟོག་ཚོགས་རང་བཞག་རིག་པའི་ཀློང༌། །རང་ཤར་རང་གྲོལ་མཁའ་ལ་བྱ་རྗེས་འདྲ། །འཁོར་བའི་རྩ་བ་འཁྲུལ་པའི་རྣམ་པར་རྟོག །རྣམ་རྟོག་ལམ་ཁྱེར་གྲོལ་བའི་གདེངས་ལྡན་ན། །འཁོར་བ་མྱང་འདས་དབྱིངས་སུ་གྲོལ་ཞེས་བྱ། །གྲོལ་ཚད་གདེང་གིས་རྐྱེན་ངན་ལམ་སློང་བའི། །གནད་འདི་མེད་ན་ཁ་ལྟ་སྟོང་སྐད་ཀྱིས། །གོ་ཡུལ་རྟོགས་པའི་ཁ་བོ་སྨྲ་ན་ཡང༌། །རང་གཤིས་ངན་པའི་རང་མཚང་ལྷུག་པར་སྟོན། །དུག་ལྔའི་ཨ་འཐས་ཐ་མར་པ་ལས་ཐུ། །དེ་འདྲ་གང་ཡིན་གྲོལ་ཚད་མི་ཤེས་སྐྱོན། །དེ་ཕྱིར་ལྟ་བསྒོམ་སྤྱོད་པའི་གནད་འགགས་དོན། །གྲོལ་ལུགས་རྟོགས་པའི་གདེངས་ཚད་འདིར་ཐུག་པས། །རྐྱེན་དང་སྲེས་ནས་རྟོགས་པའི་ལམ་ཁྱེར་གཅེས། །དེ་སྐད་རང་གི་རྒྱུད་ལ་ཡོད་མིན་ཡང༌། །ཀུན་མཁྱེན་བླ་མ་སངས་རྒྱས་སྐུ་དངོས་དེའི། །གསུང་ལ་བརྟེན་ནས་འཁྲུལ་མེད་བྲིས་
པ་འདི། །ཉམས་ལེན་གནད་འགགས་ཡིན་གྱིས་ཐུགས་ལ་ཆོངས། །སརྦ་མངྒ་ལཾ།། །། ༈ རིམ་རྩོལ་སྤྲོས་པས་མ་ཡིན་ཇི་བཞིན་ཉིད། །སྐད་ཅིག་རང་ངོ་མཐོང་བས་གདོད་མའི་གཞིར། །ལྷུན་རྫོགས་རྒྱལ་ཐབས་ཁྲི་ལས་མི་གཡོ་བའི། །མི་འགྱུར་མཆོག་གི་ཉེ་ལམ་གཟིགས་ཁྱོད་རྒྱལ། །སྔགས་རིག་གྲུབ་བརྙེས་བརྒྱུད་པའི་ལྷ་གྲལ་ནས། །གསང་ཆེན་བདུད་རྩིའི་མྱོས་པའི་ཉམས་ལེན་ལྟོའི། །ཆོས་བརྒྱད་འགོ་ལྤགས་ལྷོད་པའི་དལ་བག་ཅན། །སྔ་འགྱུར་བསྟན་པའི་མལ་ན་བརྗིད་པ་ཉིད། །གནས་དབེན་སྤོས་ཀྱི་རི་ལ་བག་ཕབ་ཅིང༌། །ཡང་དག་རྟོགས་པའི་མྱོས་བུམ་མཐོ་བའི་ཁུར། །ངེས་འཛིན་བྱ་བྲལ་ས་སྲུང་དབང་པོ་ལ། །བསྟོད་བསྔགས་གསེར་གྱི་དྲྭ་བས་བརྒྱན་པར་འོས། །གང་ན་བཤད་བསྒྲུབ་གསེར་གྱི་འཁོར་ལོ་ཡིས། །ཕྲིན་ལས་རྩིབས་སྟོང་གཡོ་བས་མདུན་བཏེགས་སྟེང༌། །བཀའ་བབས་ཐེག་པའི་རྒྱལ་སྲིད་བདུན་ལྡན་གྱིས། །མི་གཏོང་གང་ཁྱོད་ཡང་དག་འཁོར་ལོའི་བསྒྱུར། །གང་གི་གསང་གསུམ་ཕྲིན་ལས་འོད་སྟོང་གཟི། །ཉེས་ཕྱོགས་ལྷ་མིན་ཁ་ཕྲུས་མ་རེག་པར། །ལེགས་ལམ་རླུང་གི་ཤིང་རྟས་བཏེགས་འགྲོས་གཏམ། །འདི་རུ་རྣ་བའི་བདུད་རྩི་གཅིག་ཏུ་ཆས། །གཞན་ཕན་བདུད་རྩིའི་ཟིལ་དངར་འབུམ་ཕྲག་ཐིག །མཐའ་ཡས་སྐལ་བཟང་སྐྱེ་བོའི་གདུང་གཞིལ་སྨན། །གཅིག་ཏུ་ངེས་པའི་ངང་ཚུལ་དེ་ཤེས་ནས། །སྙིང་གི་ཀུནྡ་མི་དགོད་ཡོངས་མ་མཆིས། །འདི་ན་འདི་སྣང་སྲིད་པའི་སྒྱུ་མ་ལ། །
རྣམ་གཡེང་རྣམ་པར་འཁྲུལ་པའི་བྷུ་སུ་ཀུ། །ལེགས་ལམ་ལེགས་པར་སྤྱོད་པའི་སྐབས་ཕྲ་ཡང༌། །ལྔ་ཕུང་ལྔ་པའི་ལམ་དུ་མ་གྱེས་ཙམ། །ཀྱེ་མ་ལྷུན་གྲུབ་འོད་གསལ་དབྱིངས་ཀྱི་གཞི། །འཕོ་མེད་ཀུན་བཟང་དགོངས་པའི་ལྷ་ལམ་དུ། །གཅེན་གྱུར་རིམ་གཉིས་གཤོག་ལྡན་ཁྱུ་གཤེགས་ཏེ། །ནུ་སྡུག་དཔལ་སྤྲུལ་སྨྱོན་པ་འཁོར་མཚོར་ལུས། །རྟག་འཛིན་ཤེ་མོང་རྒྱས་པའི་ཁུར་ལྕིད་ཀྱིས། །མི་སྤང་འཕྲལ་སྣང་ཞེན་པའི་མི་ལུས་འདི། །ཉེ་ལམ་ཐེག་རྩེའི་འཕུར་འགྲོས་སྦྱང་དཀའ་ཡང༌། །ངེས་འབྱུང་རྐང་གིས་གོམ་འདེགས་སྤང་དེ་འགྱོད། །ད་གདོད་ཡིད་ཀྱི་འཁྲི་ཤིང་འཁྱོགས་པོའི་རྩེར། །དད་གསུམ་འདབ་མ་གཡོ་བའི་པུཥྤ་ཀས། །ཉམས་ལེན་སྙིང་པོའི་སྦྲང་རྩིའི་རོ་མངར་བཅུད། །འཛིན་འདོད་རྟེན་འབྲེལ་སྨོན་པ་སྙིང་ལ་བཅང༌། །འོན་ཀྱང་ལེགས་སྨོན་ཆབ་ཀྱིས་མ་དྲན་པའི། །འཁྲུལ་སྣང་ཚ་ཟེར་རྣོན་པོའི་རེག་བྱ་འདིས། །སྙིང་གི་ཐ་རྒོད་བསྲེག་པའི་བྱེ་ཚན་ལ། །ཆོས་མཐུན་ངེས་པའི་འབྲས་བུ་མི་སྨིན་དོག །དེ་སྐད་འཕྲོས་འོས་གཏམ་གྱི་གླེང་སློང་ཚིག །རང་ཚུལ་ངེས་པའི་ཞུ་འཕྲིན་ཙམ་ལགས་ཏེ། །ད་དུང་ཁྱེད་ཕྱོགས་བཏུད་པའི་སོར་བཅུའི་འདབ། །དད་འདུན་སྙིང་དུ་ཟླུམ་སྟེ་ཆེད་མོས་དོན། དེང་སྐུ་རིན་པོ་ཆེ་གསུང་གི་དབེན་གནས་མཆིམས་ཕུའི་ཡང་དབེན་ཆེན་པོར་སྒྲུབ་པ་ནན་ཏན་གྱི་འཁོར་ལོ་སྒྲུབ་བརྒྱུད་བསྟན་པའི་སྲོག་རྩ་སྦོམ་པོར་བཅས་ཏེ། སླར་ཡང་སྨིན་གྲོལ་བདུད་རྩིའི་སྒོ་འབར་བརྒྱ་ཕྲག་ཏུ་ཕྱེ་བའི་རིག་འཛིན་འདུ་བའི་གླིང་
ནས་རྒྱལ་བའི་བཀའ་འཁོར་ལོ་གསུམ་གྱི་འཆད་ཉན་དྲི་མ་མེད་པའི་ཁུར་བཞེས་པ་ནི་བསྟན་པའི་སྤྱི་རྒྱ་ལ་སྨན་ཞིང༌། ངོས་ཅག་ལྟོས་བཅས་ཀྱི་རྣ་བའི་བདུད་རྩི་གཅིག་ཏུ་ངེས་པས་བཀའ་དྲིན་བླ་ན་མེད་པར་འཁུམས་ཤིང༌། དྲེགས་ལྡན་ཆེ་དགུའི་རལ་ཀླུང་ལ་བརྫི་བའི་མི་ཆོས་ཀྱི་གོ་ས་མཐོ་བ་ཙམ་ནི་བརྒྱུད་པ་རིན་པོ་ཆེ་འདིའི་ཕྱག་སྲོལ་དུ་ཐུགས་རྩེ་གཏོད་པའི་སྨོན་ཡུལ་དུ་མི་མཛད་པ་མཁྱེན་བཞིན་ལགས་ཤིང༌། ཅོར་ཆུང་མགོ་ཡང་གི་སྐྱེ་བོའི་ཁ་སྨོན་ལ་རྒྱུ་མཚན་གང་ཡང་མེད་པས། ཉིད་རིན་པོ་ཆེ་སྙོམས་ཆུང་ཀུ་སུ་ལུའི་སྤྱོད་པ་ཁོ་ནས་ཡབ་མེས་ཀྱི་སྲོལ་བཟུང་བ་ལ་རྗེས་སུ་ཡི་རང་བགྱིད་པ་ནི་ཁོ་བོ་ཙམ་དུ་བས་ལགས། འདི་ཕྱོགས་ནའང་ཆོས་བརྒྱད་ཀྱི་མགོ་བསྐོར་དང༌། འདི་སྣང་གི་འགྲོ་དོན་ལ་མོས་པ་སྙིང་པོར་བྱེད་པ་ཙམ་ལས། ཡང་དག་པའི་བཤད་སྒྲུབ་ཀྱི་བྱ་བརླབས་ཆེན་པོ་ལ་ཟླ་དུས་མང་པོར་ཁོམ་པ་ནི་སུ་ཡང་མེད་ཕྱིར་ཁ་ཙམ་གྱི་སྐད་ཆ་སྙིང་ནས་འོང་བའི་ངེས་པ་མེད་པས། ད་དུང་ཡང་རིན་པོ་ཆེའི་དགོངས་པ་སྔ་མུ་ལས་མི་གཡོ་བས། ཨོ་རྒྱན་ཆེན་པོའི་སྒྲུབ་གནས་གང་ཡང་རུང་བར་སྒྲུབ་པའི་རྒྱལ་མཚན་བཙུགས་ནས་བརྒྱུད་པ་རིན་པོ་ཆེའི་ཕ་ཆོས་ཟིན་པ་དང༌། རྗེས་འཇུག་གི་སྐྱེ་བོའི་མིག་སྲོལ་ལེགས་ཤིང༌། སྙོམས་ལས་མཁན་བདག་ལྟ་བུ་དགའ་
པའི་གར་སྙིང་དབུས་སུ་རྩེ་ཞིང༌། གང་གི་རྗེས་སུ་སློབ་པའི་བརྩོན་པའི་གོ་ཆ་མི་འདོར་བར་དངོས་མཇལ་གྱི་དགའ་སྟོན་ལ་སྤྱོད་པའི་གསོལ་བ་འདེབས་པ་ལགས་ཤིང༌། གལ་སྲིད་ཤར་ཕྱོགས་ཀྱི་ཉི་མ་འཆར་དུ་བྱུང་ན་ཉི་ཐིག་གར་ཡོད་དུ་ཉི་གཟིགས་གཟོད་ཕེབས་དང་ཆོག་པ་དེ་ཚུལ་དགོངས་ཀློང་རིན་པོ་ཆེར་བསྟི་འཇགས་ཞུ་ཞིང༌། སླད་མར་ཡང་ཚིགས་སུ་བཅད་དེ་གསོལ་བ། །གང་རི་ཐོད་དཀར་རིན་ཆེན་སྙིང་པོའི་མགུར། །མངོན་སུམ་འོད་གསལ་དགོངས་པ་མི་གཡོ་བའི། །དྲི་མེད་འོད་ཟེར་སངས་རྒྱས་གཉིས་པ་དེ། །བཀའ་བབས་བརྒྱུད་པའི་ཁྲི་འཕང་དཔང་མཐོ་བ། །གང་ལ་མཆིས་ཏེ་ཆོས་བརྒྱད་མལ་འོག་ཏུ། །ཉལ་མིན་པ་ཆོས་སྙིང་ཐིག་ཡིད་བཞིན་ནོར། །སྙིང་བཅིང་དབེན་པའི་གནས་སུ་གསང་ཆེན་གྱི། །ཉམས་ལེན་ཁོ་ནར་གཞོལ་བ་ཁྱད་ཆོས་ཡིན། །ཀློང་ཆེན་དགོངས་པའི་ཡང་བཅུད་བདུད་རྩིའི་དྭངས། །འཆི་མེད་ཉོན་མོངས་གདུང་སེལ་ལེགས་བཤད་རྒྱུན། །ཐུགས་ཀྱི་དཔལ་བེར་སིམ་པའི་མྱོས་མིག་ཟུར། །འདི་སྣང་དགའ་བའི་དོ་རར་གཡོ་བ་མེད། །དེང་དུས་སྙིགས་མའི་བྱ་སྤྱོད་ཤུགས་དྲག་པོས། །སྙིང་ལ་དགོངས་མལ་བཏབ་པའི་སྟོན་ཆེན་གཟུགས། །སྡིག་སྤྱོད་མི་ཆེན་སྐྱེ་བོའི་ངོ་འཛིན་ཙམ། །གཅིག་ཏུ་འབད་པས་སྒྲུབ་ལ་སུ་ཡིད་གཏོད། །སྨོན་འཇུག་བྱང་ཆུབ་
སེམས་ཀྱི་ཕྲིན་ལས་སྟོབས། །མིག་ཡེལ་སྙིང་སྟོབས་ཆེར་སྤྱོད་རྒྱལ་བའི་སྲས། །བདེ་བའི་རྡོ་རྗེ་སྙིང་གི་མ་ཎི་ཀ༌།བསྟན་འགྲོའི་ཉི་མ་དེ་ཡང་གུང་ལ་བསྟོད། །དེས་ན་བརྒྱུད་པ་རིན་ཆེན་བསྟན་པའི་སྲོག །ཡབ་མེས་གོང་མའི་ཕ་ཆུས་དམ་པའི་སྲིད། །བཤད་སྒྲུབ་འཁོར་ལོ་གཉིས་ཀྱི་སྐྱོངས་པའི་ཁུར། །ཁྱོད་གཅིག་ཁོ་ནར་བབས་ཀྱི་གཞན་ལ་མིན། །དེ་སླད་ལྟོས་བཅས་རེ་བའི་དཔལ་སྐོང་ཞིང༌། །སྒྲུབ་བརྒྱུད་བསྟན་པའི་ཕྱག་བཞེས་རྒྱུན་བསྐྱང་སྟེ། །མཆོག་ཏུ་མི་འགྱུར་རྡོ་རྗེའི་ཆོས་བདུན་ཀློང༌། །ཞབས་པད་བསྐལ་བརྒྱར་བརྟན་པའི་བཀྲ་ཤིས་ཤོག། །།རྟེན་ལྷ་རེག་བཅས་དཔལ་སྤྲུལ་པས་གུས་པས་ཕུལ་བ་ལགས། །དགེའོ།། །