ལྷ་ཁང་ཡོངས་བསྔོ།
༈ ལྷ་ཁང་ཡོངས་བསྔོ་བཞུགས། །དེ་མཐུས་རྒྱལ་བའི་གོ་འཕང་མངོན་བྱས་ནས། །འབད་དང་རྩོལ་བ་མེད་པའི་ཕྲིན་ལས་ཀྱིས། །ཁམས་གསུམ་འཁོར་བའི་རྒྱ་མཚོ་སྟོང་གྱུར་ཏེ། །ཀུན་ཀྱང་རྡོ་རྗེ་འཛིན་པའི་ས་ཐོབ་ཤོག །གནས་སྐབས་སུའང་ལེགས་བྱས་མཆོག་འདིའི་མཐུས། །རྒྱལ་ཁམས་ཀུན་ཏུ་ནད་མུག་འཁྲུག་རྩོད་མེད། །ཆར་ཆུ་དུས་འབེབས་ལོ་ཕྱུག་རྟག་ཏུ་ལེགས། །མངོན་མཐོའི་ཡོན་ཏན་མཆོག་གིས་འབྱོར་གྱུར་ཅིག །རྟེན་མཆོག་འདི་དག་གང་གིས་མཐོང་བ་དང༌། །ཐོས་དང་དྲན་དང་ཕྱག་མཆོད་བཀུར་སྟི་བགྱིས། །ཐ་ན་རླུང་ཙམ་གྱིས་རེག་འགྲོ་བ་ཀུན། །གནས་སྐབས་མཐར་
ཐུག་དོན་གཉིས་ལྷུན་གྲུབ་ཤོག །འདི་བཞེངས་ཚེ་ན་ལུས་ངག་ཡིད་གསུམ་གྱིས། །འབྲེལ་བ་ཐོགས་པའི་རྟ་ཕྱུག་དུད་འགྲོ་ཡན། །ཞོར་ལ་ཤི་བའི་སྲོག་ཆགས་ཕྲ་མོ་ཚུན། །ཀུན་ཀྱང་ཐར་པའི་ས་བོན་ཐེབས་གྱུར་ཅིག །གཙུག་ལག་ཁང་ནི་ཆོས་བཞིན་ལེགས་བསྒྲུབ་པའི། །བསླབ་བའི་གནས་ཀུན་འབད་མེད་ལོབ་རྐྱེན་ཞིང༌། །བསྒྲུབ་པའི་ལས་ཀུན་ཐོགས་པ་མེད་པར་འགྲུབ། །མཆོག་ཐུན་དངོས་གྲུབ་དཔལ་ལ་སྤྱོད་གྱུར་ཅིག །ཆོས་དང་ཟང་ཟིང་ལོངས་སྤྱོད་རྒྱ་ཆེ་ཞིང༌། །དལ་བའི་རྟེན་མཆོག་ལེགས་པར་འཚོ་ནུས་པའི། །མཐའ་གཉིས་སྤངས་པའི་ཟས་གོས་གནས་མལ་ལ། །བརྟེན་ནས་ཐར་ལམ་བྱང་ཆུབ་སྒྲུབ་གྱུར་ཅིག །འདུས་པའི་སྡེ་ཀུན་ཐོས་བསམ་བསྒོམ་གསུམ་གྱི། །མཛད་བཟང་ཡར་ངོའི་ཟླ་ལྟར་གོང་འཕེལ་ནས། །རྒྱལ་བ་དགྱེས་པའི་ལམ་མཆོག་སྲིད་མཐར་ཡང༌། །མི་ཉམས་བཤད་དང་སྒྲུབ་པས་འཛིན་གྱུར་ཅིག །བསྟན་ལ་དགའ་བའི་དཀར་ཕྱོགས་ལྷ་ཀུན་དང༌། །མཐུ་ཆེན་དམ་ཅན་དྲེགས་པའི་ཚོགས་རྣམས་ཀྱིས། །རྟག་ཏུ་གཡེལ་མེད་མེལ་ཚེས་ལེགས་བསྲུང་ཞིང༌། །ཕུན་སུམ་ཚོགས་པའི་དཔལ་ཀུན་སྡུད་གྱུར་ཅིག །བསྟན་ལ་སྡང་དང་བསྟན་འཛིན་ལ་འཁུ་དང༌། །དགེ་
འདུན་འདུས་པའི་ཞལ་དུ་འདུ་བའི་སྒོ། །རྐུ་དང་འཕྲོག་པའི་མ་རུང་ལས་ཅན་ལ། །མངོན་སྤྱོད་དམོད་པའི་རྣོ་དཔལ་འབར་གྱུར་ཅིག །མཐར་ཐུག་དཀར་ནག་ལས་ཀྱིས་འབྲེལ་ཚད་ཀུན། །ཡང་དག་ཐར་པའི་ལམ་གྱི་སྣོད་གྱུར་ནས། །ཀུན་ཀྱང་ཐེག་གསུམ་ལམ་གྱི་ངེས་འབྱུང་ལ། །བརྟེན་ནས་འཁོར་བའི་རྒྱ་མཚོ་སྟོང་གྱུར་ཅིག །འདི་ན་བཤད་སྒྲུབ་རྒྱལ་བསྟན་གནས་བཞིན་དུ། །བསྟན་སྲུང་ཚོགས་ཀྱིས་མེལ་ཚེ་གཡེལ་གྱུར་ན། །རྒྱལ་བའི་བཀའ་དང་རྡོ་རྗེའི་དམ་འགལ་བའི། །བཀའ་ཆད་དྲེགས་སྡེའི་སྙིང་ལ་འབབ་པར་ངེས། །དེ་སླད་མ་གཟའ་རྡོར་སོགས་སྲུང་མའི་ཚོགས། །ཇི་སྙེད་གཙུག་ལག་ཁང་འདིར་རྟག་བཞུགས་ནས། །ལེགས་སྤེལ་ཉེས་སྐྱོབས་འགལ་བྱེད་ཆམས་ལ་ཕོབས། །ཕྲིན་ལས་རྣོ་དཔལ་འཕྲལ་དུ་མངོན་སུམ་མཛོད། །ཅེས་གཙུག་ལག་ཁང་ཆེན་བཞེངས་སྐབས་ཀྱི་ཞལ་འདེབས་ཇི་ལྟར་བྱུང་ཐོའི་མཇུག་སྨོན་ཚིག་ཉུང་ངུ་འདིའང་ཐེག་གསུམ་ཆོས་གྲྭས་བཟུང་བའི་དབེན་གནས། ཤྲཱི་སེང་ནས་དཔལ་སྤྲུལ་པས་བྲིས་པ་དགེ་ཞིང་བཀྲ་ཤིས་པར་གྱུར་ཅིག །དགེའོ།། ༈ སྐྱབས་འགྲོ་ནི། སངས་རྒྱས་ཆོས་དང་ཚོགས་སོགས་ལན་གསུམ། སེམས་བསྐྱེད་ནི། སེམས་ཅན་ཐམས་ཅད་བདེ་བ་སོགས་ལན་གསུམ། ཨོཾ་སྭ་
བྷ་ཝ་སོགས། སྟོང་པའི་ངང་ལས་པདྨ་ཟླ་བའི་སྟེང༌། །རང་སེམས་དྷཱིཿལས་བདག་ཉིད་འཇམ་དཔལ་དབྱངས། །དམར་སེར་ཕྱག་གཉིས་རལ་གྲི་པུ་སྟི་བསྣམས། །རིན་རྒྱན་དར་གོས་ཀྱིས་སྤྲས་རྡོར་དཀྱིལ་་བཞུགས། །ཐུགས་ཀར་ཟླ་སྟེང་དྷཱིཿམཐར་སྔགས་ཕྲེང་ལས། །འོད་འཕྲོས་སྒྲིབ་གསལ་ཤེས་རབ་སྣང་བ་རྒྱས། །ཨོཾ་ཨ་ར་པ་ཙ་ན་དྷཱིཿསོགས་ཅི་ནུས་བཟླས། མཚན་བརྗོད་འདོན་ཞིང་དགེ་བ་བསྔོ། །བརྩེ་ལྡན་ཁྱེད་ཀྱི་མཁྱེན་རབ་སོགས་ཀྱིས་གསོལ་བ་གདབ། ཤྲཱི་མིང་གིས་བྲིས་པའོ། ༈ དཔལ་རྡོ་རྗེ་སེམས་དཔའ་ལ་བསྟོད་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གངས་ཀྱི་རི་བོ་ལྟ་བུར་རབ་དཀར་སྐུ། །ཕུན་སུམ་ཚོགས་པ་ཆོས་སུ་སྒྲོགས་པའི་གསུངས། །ཟབ་ཡངས་མཁྱེན་གཉིས་རང་བཞིན་ནམ་མཁའི་ཐུགས། །བཅོམ་ལྡན་སེམས་དཔའ་ཁྱོད་ལ་ཕྱག་འཚལ་ལོ། །བསྐལ་པར་བསགས་པའི་ལས་ངན་སྒྲིབ་པའང༌། །གང་མཚན་སྐད་ཅིག་དྲན་པས་འཇོམས་མཛད་པ། །མགོན་པོ་ཁྱོད་འདྲ་གཞན་ནམ་མཆིས་པས། །ཡང་ནས་ཡང་དུ་དད་པས་ཕྱག་འཚལ་ལོ། །རིགས་བརྒྱ་རིགས་ལྔ་རིགས་གསུམ་དཀྱིལ་འཁོར་ལྷ། །རིགས་བདག་དྲུག་པ་ཁྱེད་ལས་གཞན་མེད་དོ། །གསང་མཛོད་བཀའ་རྣམས་
བསྡུ་མཛད་དེ་ཡང་ཁྱེད། །རྒྱལ་ཀུན་ཡོངས་འདུས་ཁྱེད་ལ་ཕྱག །ཆ་ཡིས་ཡོངས་གང་ཟླ་བའི་དཀྱིལ་འཁོར་དང༌། །ཉེས་པའི་སྐྱོན་སྤངས་པད་དཀར་འདབ་བརྒྱད་ལ། །སྲིད་ཞིར་མི་གནས་རྫོགས་པའི་སྐྱིལ་ཀྲུང་ཅན། །ནོར་བུའི་ཞབས་གདུབ་འཛིན་ལ༴༌།སྣ་ཚོགས་དར་གོས་དབང་པོའི་གཞུ་བཞིན་མཛེས། །རིན་ཆེན་རྒྱན་མང་དོ་ཤལ་འཕྱང་འཕྲུལ་གཡོ། །སྣང་སྟོང་དབྱེར་མེད་རྡོར་དྲིལ་ཕྱག་རྒྱ་ཅན། །རིགས་ལྔའི་དབང་བསྐུར་རྫོགས་ལ༴༌།བདེ་ཆེན་ཡེ་ཤེས་ཁ་སྦྱོར་ཐིག་ལེའི་སྐུ། །དགྱེས་སྤྲིན་བདུད་རྩི་ཨ་བྷི་ཥིཉྩའི་ཆུས། །རྣམ་དག་དབང་ལྔའི་བདུད་རྩི་སྦྱིན་མཛད་པ། །གཉིས་མེད་སྙེ་བར་རོལ་ལ་ཕྱག་འཚལ་ལོ། །རིག་པའི་རང་བཞིན་སྙིང་པོ་སྔགས་ཀྱི་གནད། །འོག་མིན་གནས་སུ་གང་གིས་བཀའ་སྩལ་ཞིང༌། །བཟླས་དང་དྲན་པས་ཉམ་ཆགས་ཀུན་སྦྱོངས་པའི། །ཡང་སྙིང་ཡི་གེ་བརྒྱ་ལ་ཕྱག་འཚལ་ལོ། །མཚན་ནས་འབོད་དང་ཐུགས་དམ་གནད་བསྐུལ་བ། །རིགས་ལྔའི་རང་བཞིན་སྙིང་པོ་ཡང་སྙིང་སྟེ། །རྒྱུ་རྐྱེན་བཟླས་དང་སྔགས་གསུམ་ཡོངས་སུ་རྫོགས། །མདོར་བསྡུས་ཡི་གེ་དྲུག་ལ་ཕྱག་འཚལ་ལོ། །གདུལ་དཀའ་མ་རུང་ཡོངས་སུ་འཇོམས་པ་དང༌། །མཆོག་གི་དངོས་གྲུབ་མཆོག་ཏུ་སྦྱིན་མཛད་ལྷ། །གར་དགུའི་རྣམ་རོལ་མགོན་པོ་རྡོ་རྗེ་སེམས། །ཧེ་རུ་ཀཿདཔལ་ཉིད་ལ་ཕྱག་འཚལ་ལོ། །གསང་བའི་མཛོད་འཛིན་ས་བཅུའི་དབང་
ཕྱུག་ཚུལ། །རྡོ་རྗེ་གཏུམ་པོ་བགེགས་ཀྱི་དགྲ་གཅིག་པུར། །རིགས་ལྔའི་རང་བཞིན་མཁའ་ལྡིང་འཕྲོ་འདུ་ཅན། །གཏི་མུག་ཀླུ་གཤེད་ཁྱོད་ལ་ཕྱག་འཚལ་ལོ། །ལྷ་ཡི་ལྷ་མཆོག་བཅོམ་ལྡན་རྡོ་རྗེ་སེམས། །སྐྱབས་ཀྱི་མཆོག་ཏུ་མགོན་པོ་ཁྱེད་བཟུང་ནས། །ཡང་ནས་ཡང་དུ་སྐུ་གསུང་ཐུགས་དྲན་ན། །བྱིན་གྱིས་རློབས་ཤིག་སེམས་དཔའ་རྡོ་རྗེ་ཆོས། །ཨོཾ་བཛྲ་ས་ཏྭ་ཧཱུྃ། །དཔལ་སྤྲུལ་པས་སོ། །དགེའོ། །དགེའོ། །དགེའོ། །