གསོ་སྦྱོང་།
འོ། །ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་ཐེག་པ་ཆེན་པོའི་གསོ་སྦྱོང་བླང་ནས་བསྲུང་བར་བྱ་སྙམ་པའི་བྱང་ཆུབ་མཆོག་ཏུ་སེམས་བསྐྱེད་པ་དང་བཅས་ཏེ་གསན་འཚལ། དེ་ཡང་དུས་ཁྲིམས་ཡན་ལག་བརྒྱད་པའི་སྡོམ་པ་བསྲུང་བ་ནི་ཐེག་དམན་གྱི་དུས་ན། བསྙེན་གནས་ཡན་ལག་བརྒྱད་པའི་སྡོམ་པ་ཞེས་ཁྱིམ་པས་དུས་སུ་བསྲུང་བྱ་དང༌། དེ་ཉིད་ཐེག་ཆེན་ཏུ་བྱང་ཆུབ་ཀྱི་སེམས་གྱིས་ཟིན་པའི་སྒོ་ནས་ཉམས་སུ་བླང་ན་ཉེས་སྤྱོད་སྡོམ་པའི་ཚུལ་ཁྲིམས་སུ་འགྱུར་ཞིང༌། འདིར་འཕགས་པ་སྤྱན་རས་གཟིགས་ཀྱི་བསྐྱེད་རིམ་ལྷའི་རྣལ་འབྱོར་དང་འབྲེལ་བར་ཉམས་སུ་བླང་ན་གསང་སྔགས་བྱ་བའི་རྒྱུད་ཀྱི་དཀའ་ཐུབ་དང་སྡོམ་པའི་ཡན་ལག་ཏུ་འགྱུར་བ་ཡིན། དེ་ཡང་སྔོན་གྱི་རྒྱལ་བ་སྲས་དང་བཅས་པ་རྣམས་ཀྱི་མཛད་པའི་ཚུལ་གང་ཡིན་པ། དེ་ཉིད་རང་རྒྱུད་ལ་ཁྲིམས་སུ་བཅའ་ཞིང༌། དེ་ལས་མི་འདའ་བར་སྡོམ་པས་ཚུལ་ཁྲིམས་སམ་སྡོམ་པ་ཞེས་གྲགས་པ་ཡིན་པས་ཇི་ལྟར་སྔོན་གྱི་ཞེས་པ་ལ་སོགས་རིམ་བཞིན་འབྲུ་འགྲེལ་ཅུང་ཟད་སྨོས་ན། དེ་ཡང་རྫོགས་པའི་སངས་རྒྱས་རྣམས་ནི་ཆོས་ཉིད་དེ་བཞིན་ཉིད་དང་རྗེས་སུ་མཐུན་པར་གཤེགས་པས་ན་དེ་བཞིན་གཤེགས་པ། བདུད་བཞིའི་དགྲ་དང་ཕྲལ་བས་ན་དགྲ་བཅོམ་པ། སྤང་རྟོགས་ཀྱི་ཡོན་ཏན་ཡང་དག་པར་རྫོགས་ཤིང་མ་རིག་
པའི་གཉིད་འཐུགས་ལྟ་བུ་སངས་ལ་ཤེས་བྱའི་ཆོས་ཐམས་ཅད་ལ་བློ་གྲོས་རྒྱས་པས་ན་ཡང་དག་པར་རྫོགས་པའི་སངས་རྒྱས། དཔེར་ན་འཁོར་ལོས་སྒྱུར་བའི་རྒྱལ་པོའི་རྟ་ཅང་ཤེས་དེ་དག་ནི་དགྲའི་གཡུལ་ལ་སོགས་པར་འཇུག་པ་ན་གང་ན་གནོད་པ་མེད་པ་ནས་འཇུག་རང་སྲོག་ཡལ་བར་དོར་ཏེ་རྒྱལ་པོ་དེ་ཉིད་བསྲུང་བ་བཞིན་ཏུ། སེམས་ཅན་ཐམས་ཅད་ལ་ཐར་བ་དང་ཐམས་ཅད་མཁྱེན་པའི་ལམ་མ་ནོར་བ་སྟོན་ཅིང་གཞན་དོན་ཁོ་ན་ལྷུར་མཛད་པས་ན་རྟ་ཅང་ཤེས་ལྟ་བུ། ནམ་མཁའ་དང་མཉམ་པའི་སེམས་ཅན་ཐམས་ཅད་ལ་མ་བཅོལ་བཞིན་ཏུ་ཕན་འདོག་པའི་ཐུགས་རྗེ་ཆེན་པོའི་ཁུར་བསྣམས་ཤིང་ཐེག་པ་ཆེན་པོ་བླ་ན་མེད་པའི་དོན་སྟོན་པས་ན་གླང་པོ་ཆེན་པོ། །རང་དོན་མཐར་ཕྱིན་པས་ན་བྱ་བ་བྱས་ཤིང༌། གཞན་དོན་ལྷུར་ལེན་པས་ན་བྱེད་པ་བྱེད་པ། ལས་ཉོན་གྱི་སྒྲིབ་པ་སྤང་བས་ན་ཁུར་བོར་བ། མྱ་ངན་ལས་འདས་པའི་གོ་འཕང་བརྙེས་པས་ན་རང་གི་དོན་རྗེས་སུ་ཐོབ་པ། འཁོར་བའི་གནས་ལས་མི་ཐར་བར་བྱེད་པ་ལྟ་ངན་དང་ཉོན་མོང་པ་ལས་ཐམས་ཅད་ཟད་པས་ན་སྲིད་པ་ཀུན་ཏུ་སྦྱོར་བ་ཡོངས་སུ་ཟད་པ། ཐོག་མཐའ་བར་དུ་དགེ་བའི་ཆོས་སྟོན་པས་ན། ཡང་དག་པའི་བཀའ། སྲིད་པའི་འཆིང་བ་ཐམས་ཅད་བཅད་པས་ན་ལེགས་པར་རྣམ་པར་གྲོལ་བའི་ཐུགས། རྣམ་པ་ཐམས་ཅད་མཁྱེན་པའི་ཡེ་ཤེས་མངའ་བས་ན་ལེགས་པར་རྣམ་པར་གྲོལ་བའི་ཤེས་རབ་ཅན། དེ་དག་གིས་
ཞེས་པས་ནི་གང་གིས་རྗེས་སུ་སློབ་པའི་དེ་བཞིན་གཤེགས་པའི་ཡོན་ཏན་བསྟན། དེའི་རྗེས་སུ་ཇི་ལྟར་སློབ་པའི་ཀུན་སློང་བྱང་ཆུབ་ཀྱི་སེམས་བསྟན་པར་བཞེད་ཅིང་རང་དོན་ཡལ་བར་དར་བས་ན་སེམས་ཅན་ཐམས་ཅད་ཀྱི་དོན་གྱི་ཕྱིར་དང༌། གནས་སྐབས་མངོན་མཐོ་ལ་འགོད་པས་ན་ཕན་པར་བྱ་བའི་ཕྱིར་དང༌། མཐར་ཐུག་ངེས་ལེགས་ལ་འགོད་པས་ན་གྲོལ་བར་བྱ་བའི་ཕྱིར་དང༌། སེར་སྣའི་ལས་འབྲས་སྦྱངས་པས་ན་མུ་གེ་མེད་པར་བྱ་བའི་ཕྱིར་དང༌། ཞེ་སྡང་གི་རྒྱུ་འབྲས་སྦྱངས་པས་ན་ནད་མེད་པར་བྱ་བའི་ཕྱིར་དང༌། ལམ་བྱང་ཆུབ་ཀྱི་ཕྱོགས་ཀྱི་ཆོས་རྣམས་ཡོངས་སུ་རྫོགས་པར་བྱ་བའི་ཕྱིར་དང༌། འབྲས་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ངེས་པར་རྟོགས་པར་བྱ་བའི་ཕྱིར་དང༌། ཇི་སྐད་དུ། ཨོ་རྒྱན་སངས་རྒྱས་གཉིས་པའི་ཞལ་ནས། །དགེ་བ་མཐའ་དག་ཡང་དག་གསོ་བ་དང༌། །སྡིག་པ་མ་ལུས་རྣམ་པར་སྦྱོངས་པ་སྟེ། །དགེ་གསོས་ཕྱིར་དང་སྡིག་པ་རྣམ་སྦྱོངས་ཕྱིར། །དེ་བཞིན་གཤེགས་པས་གསོ་སྦྱོང་བཀའ་སྩལ་ཏོ། །ཞེས་གསུངས་པ་ལྟར་གསོ་སྦྱོང་གི་སྡོམ་པ་ཇི་ལྟར་བླང་ཤིང་བསྲུང་བ་དེ་ལྟར་དུ་བདག་གིས་ཀྱང་སེམས་ཅན་ཐམས་ཅད་ཀྱི་དོན་དང་ཕན་པ་དང་གྲོལ་བ་ལ་སོགས་པ་དགོས་པ་དེ་དག་གི་ཕྱིར་དུས་ད་ལྟ་ནས་བཟུང་སྟེ་སངས་ཉི་མ་མ་ཤར་གྱི་བར་དུ་ཡན་ལག་བརྒྱད་པའི་སྡོམ་པ་བླངས་ནས་མ་ཉམས་པར་ཚུལ་བཞིན་ཏུ་བསྲུང་བར་བགྱིའོ་་
སྙམ་པས་འདི་བཞིན་རྗེས་ཟློས་མཛོད། ཇི་ལྟར་སྔོན་གྱི་སོགས་དེ་ཡང་དུས་ཁྲིམས་ཡན་ལག་བརྒྱད་པའི་སྡོམ་པ་ཞེས་བྱ་བ་ལ་ཚུལ་ཁྲིམས་ཀྱི་ཡན་ལག་བཞི། བག་ཡོད་ཀྱི་ཡན་ལག་གཅིག །བརྟུལ་ཞུགས་ཀྱི་ཡན་ལག་གསུམ་རྣམས་ཡོད་པ་ལས། དང་པོ་རང་རྒྱུད་ཀྱི་ཉེས་སྤྱོད་རྣམས་སྡོམ་པར་བྱེད་པ་ཚུལ་ཁྲིམས་ཀྱི་ཡན་ལག་བཞི་ནི་སྡོམ་པ་ཐམས་ཅད་ཀྱི་རྩ་བ་ཡིན་པས་ན་རྩ་བ་བཞི་ཞེས་གྲགས་ཏེ། དེ་ཡང་མིའི་འགྲོ་བ་ལྟ་ཅི་ཐ་ན་སྲོག་ཆགས་སུ་གཏོགས་པ་ཤིག་སྲོ་ཡན་ཆད་ཀྱི་སྲོག་མི་གཅོད་པ་དང་གཅིག །གཞན་གྱིས་བདག་ཏུ་བཟུང་བའི་རྒྱུ་རྫས་ཆེན་པོ་ལྟ་ཅི་སྨོས་ཐ་ན་ཁབ་རྐུད་པ་ཟས་ཁམ་གཅིག་ཀྱང་མ་བྱིན་པ་མི་ལེན་པ་དང་གཉིས། ཕོ་མོ་གཉིས་སྤྲད་དེ་འཁྲིག་པའི་བདེ་བ་དོན་ཏུ་གཉེར་བ་ལྟ་ཅི་སྨོས་ཆགས་སེམས་ཀྱིས་ཕན་ཚུན་ལྟ་བ་ཙམ་ཡང་མི་བྱེད་པ་ནི་མི་ཚངས་སྤྱོད་སྤངས་པ་དང་གསུམ། རང་ལ་ས་ལམ་གྱི་ཡོན་ཏན་མེད་ཀྱང་ཡོན་ཏན་ཡོད་པར་རྫུས་པའི་མི་ཆོས་བླ་མའི་རྫུན་ཆེན་པོ་ལྟ་ཅི། ཐ་ན་ཀུ་རེ་དང་རྩེད་མོའི་ཕྱིར་ཡང་གཞན་བསླུ་བར་བྱེད་པའི་རྫུན་མི་སྨྲ་བ་སྟེ་བཞི་ཡིན། བག་ཡོད་ཀྱི་ཡན་ལག་གཅིག་ནི། ཆང་སྤོངས་བ་ཡིན་ཏེ། འདི་མ་སྤང་ན་རང་རྒྱུད་བག་མེད་པར་འགྱུར་ཞིང་ཆང་གིས་མྱོས་ནས་བླང་དོར་གྱི་གནས་ཐམས་ཅད་མི་ཤེས་ཤིང་རང་ཉིད་ཀྱིས་སྡོམ་པ་བླང་བ་ཡང་བརྗེད་ནས་མི་དགེ་བ་སྤྱོད་པས་སྡོམ་པ་གང་ཡང་བསྲུང་མི་ནུས་པས་ན་གྲོ་ནས་སོགས་འབྲུའི་ཆང་དང་སྦྲང་དང་མེ་ཏོག་སོགས་གཞན་ཕབ་དང་སྦྱར་བ་
བཅོས་པའི་ཆང་དང༌། གཞན་ཡང་ཤིང་ཏོག་དང་རྩ་བ་ལ་སོགས་མྱོས་པར་བྱེད་པའི་བཟའ་བཏུང་ཐམས་ཅད་སྤངས་དགོས་པ་དེ་ཡིན། བརྟུལ་ཞུགས་ཀྱི་ཡན་ལག་གསུམ་ནི། རང་ཉིད་སྡོམ་ལྡན་ཡིན་པའི་དྲན་པ་གསོ་བའི་ཆེད་དུ་ཁྱིམ་ན་གནས་པས་ཇི་ལྟར་སྤྱོད་པའི་སྤྱོད་པ་དེ་དག་བརྟུལ་ནས། རྒྱལ་སྲས་ཀྱི་མཛད་སྤྱོད་བཟང་པོའི་རྗེས་སུ་ཞུགས་པས་བརྟུལ་ཞུགས་ཏེ། འཕྱོར་སྒེགས་དང༌། མཛེས་ཆོས་ཀྱི་བསམ་པས་ག་བུར་དང་ཙནྡན་སོགས་དྲི་ཞིམ་པོ་ལུས་ལ་བཀུ་བ། མེ་ཏོག་དང་རིན་པོ་ཆེ་ལ་སོགས་པའི་ཕྲེང་བས་ལུས་ལ་བརྒྱན་པར་བྱེད་པ། དེ་མ་ཡིན་པའི་རྣ་ཆ་དང་གདུ་བུ་ལ་སོགས་སྤངས་པ་ནི། རྒྱན་གྱི་རིགས་གསུམ། རྩེད་མོ་དང་བཞད་གད་གྱི་ཆེད་དུ་ལུས་ཀྱི་ཡན་ལག་གཡོ་བ་དང༌། ངག་གི་གཏམ་སྣ་ཚོགས་སྨྲ་བ་སོགས་སྤོང་བ་ནི། གར་གྱི་རྣམ་པ་རྩེ་བ་དང༌། དེ་བཞིན་འགྱུར་ཁུག་དང་འདེགས་འཇོག་དང་ལྡན་པའི་ངག་གིས་གླུ་ལེན་པ། པི་ཝཾ་དང་གླིང་བུ་སོགས་རོལ་མོ་འབུད་དཀྲོལ་བྱེད་པ་རྣམས་སྤོང་པ་རྩེད་མོའི་རིགས་བྱེད་གསུམ། དུས་མ་ཡིན་པ་ཉི་མ་ཡོལ་ཕན་ཆད་སྐོམ་པའི་གདུང་བ་སེལ་བའི་ཆུ་དང་ཇ་སོགས་བཏུང་བ་ལས་བཀྲེས་པ་སེལ་བར་བྱེད་པའི་ཟན་དང་ཆན་ཡོས་ཤིང་ཏོག་ལ་སོགས་བཟའ་བཅའ་རྣམས་ལོངས་མི་སྤྱད། གྲུ་གང་ལས་ལྷག་པའི་ཁྲི་སྟན་མཐོན་པོ། །རང་བཞིན་ཕལ་པར་མི་འོས་པའི་དར་གོས་དང་སྟག་
གཟིག་གི་སྟན་སོགས་ཁྲི་སྟན་ཆེན་པོ་ལ་མི་འདུག་པ་རྣམས་ལས། གར་སོགས་རྩེད་མོའི་རིགས་གསུམ་དང༌། །ཕྲེང་སོགས་རྒྱན་གྱི་རིགས་གསུམ་པོ་གཅིག་ཏུ་བརྩིས་པའི་བརྟུལ་ཞུགས་ཀྱི་ཡན་ལག་གསུམ་སྟེ། ཡན་ལག་བརྒྱད་པོ་འདི་ཇི་སྲིད་སངས་ཉི་མ་མ་ཤར་གྱི་བར་དུ་མི་ཉམས་པར་བསྲུངས་པར་བགྱིའོ། །སྙམ་པས་འདིའི་རྗེས་ཟློས་མཛོད། དེང་ནས་སྲོག་གཅོད་སོགས༴ དེ་ལྟ་བུའི་ཚུལ་ཁྲིམས་དེ་ཉིད་མཐར་ཕྱིན་པར་བྱ་བའི་ཆེད་དུ་འཕགས་པ་དོན་ཡོད་ཞགས་པའི་ཕ་རོལ་ཏུ་ཕྱིན་པ་དྲུག་གི་སྙིང་པོའི་གཟུངས་ལས་བྱུང་བ་ཚུལ་ཁྲིམས་རྣམ་དག་གི་གཟུངས་འདི་བཟླས་པས་དུས་གསུམ་གྱི་རྒྱལ་བ་སྲས་དང་བཅས་པའི་ཚུལ་ཁྲིམས་ཀྱི་ཕུང་པོ་ཐམས་ཅད་རང་རྒྱུད་ལ་རྫོགས་པར་བྱེད་པ་དང༌། སྔོན་ཆད་ཚུལ་ཁྲིམས་འཆལ་བའི་ཉེས་པ་ཐམས་ཅད་དག་པར་བྱེད་ཅིང་ཕྱིན་ཆད་མི་ཉམས་པར་བྱེད་པ་སོགས་ཕན་ཡོན་དུ་མ་དང་ལྡན་པའི་སྔགས་འདི་འདིའི་རྗེས་ཟློས་མཛོད། ཨོཾ་ཨ་མོ་གྷ་སོགས་དང་དེ་ནས་སྔོན་བྱང་ཆུབ་སེམས་དཔའ་བྱམས་པས་བྱང་ཆུབ་ཀྱི་སྤྱོད་པ་སྤྱད་པའི་ཚེ་ཉིན་ལན་གསུམ་མཚན་ལན་གསུམ་དུ་བསམ་པ་དྲག་པོའི་སྨོན་ལམ་བཏབ་པ་ལ་བརྟེན་ནས་ལམ་བདེ་བ་དང་འཇུག་པ་བདེ་བ་བསྐལ་པ་མང་པོའི་ཚོགས་རྫོགས་པར་མཛད་པ་བྱམས་པའི་སྨོན་ལམ་ལས་བྱུང་བའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པའི་སྨོན་ལམ་འདིའི་རྗེས་ཟློས་མཛོད། ཁྲིམས་ཀྱི་ཚུལ་ཁྲིམས་སོགས་དང༌། དཔལ་མགོན་འཕགས་པ་ཀླུ་སྒྲུབ་ཀྱི་ཞལ་ནས། །གསོ་སྦྱོང་འདོད་
སྤྱོད་ལྷ་ལུས་ཡིད་འོང་པ། །སྐྱེས་པ་བུད་མེད་རྣམས་ལ་རྩོལ་བར་བགྱིད། །ཅེས་གསུངས་པ་ལྟར་སྔོན་བཅོམ་ལྡན་འདས་ཞལ་བཞུགས་པའི་སྐབས་རང་དོན་ཡིད་བྱེད་དང་བཅས་པས་བསྙེན་གནས་ལན་རེ་བསྲུང་བ་རྣམས་ཀྱང་སུམ་བཅུ་རྩ་གསུམ་གྱི་ལྷ་ཡུལ་དུ་སྐྱེས་ཤིང༌། བསྙེན་གནས་ཅུང་ཟད་ཉམས་པ་རྣམས་ཀྱང་རྒྱལ་ཆེན་རིགས་བཞིའི་ལྷ་གནས་སུ་སྐྱེ་བས་ཕན་ཡོན་དཔག་ཏུ་མེད་པར་གསུངས་ཤིང༌། དེ་ལས་ཀྱང་ཁྱད་པར་དུ་ཟླ་བ་སྒྲོན་མེའི་མདོ་ལས། །གང་ཞིག་སྐལ་པ་བསམ་གྱིས་མི་ཁྱབ་པར། །རྒྱལ་བ་བྱེ་བ་མང་ལ་མཆོད་བྱས་ལས། །གང་ཞིག་དམ་ཆོས་རབ་ཏུ་འཇིག་པ་དང༌། །བདེ་གཤེགས་བསྟན་པ་འགག་པར་གྱུརྤཱི་ཚེ། །ཉིན་མཚན་དུ་ནི་བསླབ་པ་གཅིག་སྤྱོད་པ། །དེ་ནི་དེ་བས་བསོད་ནམས་འཕགས་པར་གསུངས། །ཞེས་པ་ལྟར་སྔོན་བསྟན་པ་རྒྱས་པའི་ཚེ་ཡུན་རིང་པོར་སྡོམ་པ་བསྲུང་པ་ལས་ད་ལྟ་སངས་རྒྱས་ཀྱི་བསྟན་པ་མཐར་ཐུག་པའི་སྐབས་འདིར་ཉིན་མཚན་གཅིག་ཏུ་སྡོམ་པ་སྣ་གཅིག་བསྲུང་བ་ཕན་ཡོན་ཆེ་ཞིང༌། དེ་ཡང་བྱང་ཆུབ་ཀྱི་སེམས་ཀྱིས་ཟིན་པའི་སྡོམ་པའི་ཕན་ཡོན་ནམ་མཁའ་ལྟར་ཚད་གཟུང་མེད་ཅིང་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འགྱུར་ལ། ཁྱད་པར་ད་རེས་ཀྱི་སྐབས་སུ་གསང་སྔགས་རྡོ་རྗེ་ཐེག་པའི་ལྷ་དང་སྔགས་ཀྱི་རྣལ་འབྱོར་ཟབ་མོ་དང་འགྲེལ་པར་ཉམས་སུ་བླང་པས་ཚེ་འདིར་རིག་འཛིན་གྱི་གྲལ་དུ་འཁོད་ཅིང༌། ཇི་ཙམ་འགོར་ཡང་མི་ཚེ་བཅུ་དྲུག་ལས་མི་འགྱང་བར་
ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་བྱེད་པ་ཡིན་པས་དགའ་བ་བསྒོམ་ཞིང་དེ་ལྟ་བུའི་དགེ་བ་དེ་ཡང་མཇུག་བསྔོ་བས་རྒྱས་མ་ཐེབ་ན་ཁོང་ཁྲོ་སོགས་རྐྱེན་འགའ་ཞིག་གིས་ཟད་པར་འགྱུར་བ་ཡིན་པས་དེས་ན་དགེ་རྩ་བྱང་ཆུབ་ཆེན་པོར་བསྔོ་བ་འདིའི་རྗེས་ཟློས་མཛོད། །བསོད་ནམས་འདི་ཡི་སོགས་བསྔོ་བས་མཐའ་བརྒྱན་པར་བྱའོ། ༈ །བར་དོའི་ངོ་སྤྲོད་བསྡུས་པ་བཞུགས་སོ། །སྤྱིར་ལུས་ཅན་རྣམས་འཆི་བའི་ཚེ་དང་པོ་རགས་པའི་ཐིམ་རིམ་ཉི་ཤུ་ནི། །གཟུགས་ཀྱི་ཕུང་པོ་ཐིམ་པས་ཡན་ལག་ཐམས་ཅད་ཕྲ་བ་དང༌། ལུས་ཀྱི་ཉམས་ཞན་ཅིང་ནུས་པ་མེད་པར་འགྱུར། མེ་ལོང་ལྟ་བུའི་ཡེ་ཤེས་ཐིམ་པས་སེམས་མི་གསལ་ཞིང་རབ་རིབ་ཏུ་འགྱུར། སའི་ཁམས་ཐིམ་པས་ལུས་ཐམས་ཅད་སྐམ་པར་འགྱུར། མིག་གི་དབང་པོ་ཐིམ་པས་མིག་མི་གསལ་བར་འགྱུར་ཞིང་ཟླུམ་པར་འགྱུར། །ཡུལ་གཟུགས་ཐིམ་པས་ལུས་ཀྱི་མདངས་མེད་ཅིང་ཉམས་པར་འགྱུར། ཡང་ཚོར་བའི་ཕུང་པོ་ཐིམ་པས་ཚོར་བ་ཉམས་སུ་མི་མྱོང༌། མཉམ་ཉིད་ཡེ་ཤེས་ཐིམ་པས་ཚོར་བ་གསུམ་དྲན་པར་མི་འགྱུར། ཆུའི་ཁམས་ཐིམ་པས་རང་ལུས་ཀྱི་མཆུ་དང་རྡུལ་དང་གཅིན་དང་ཁུ་ཁྲག་སོགས་སྐམ་པར་འགྱུར། རྣ་བའི་དབང་པོ་ཐིམ་པས་ཕྱི་ནང་གི་སྒྲ་མི་ཐོས། ཡུལ་སྒྲ་ཐིམ་པས་རང་ལུས་ཀྱི་སྒྲ་མི་ཐོས། ཡང་འདུ་ཤེས་ཀྱི་ཕུང་པོ་ཐིམ་པས་རྐང་གཉིས་ལ་སོགས་པའི་སེམས་ཅན་རྣམས་མི་དྲན། །སོ་སོར་རྟོགས་པའི་ཡེ་ཤེས་ཐིམ་པས་ཕ་མ་བུ་སྲིང་ལ་སོགས་པའི་མིང་མི་དྲན། མེའི་ཁམས་ཐིམ་པས་ཟས་མི་འཇུ། སྣའི་དབང་པོ་ཐིམ་པས་སྟེང་རླུང་དལ་གྱིས་འགྲོ། །ཡུལ་གྱི་དྲི་ཐིམ་པས་རང་གི་ལུས་ལ་དྲི་མི་བྲོའོ། །ཡང་འདུ་བྱེད་ཀྱི་ཕུང་པོ་ཐིམ་པས་ལུས་ཀྱི་བྱ་བ་ཐམས་ཅད་ལ་འཇུག་པར་མི་འགྱུར། བྱ་བ་གྲུབ་པའི་ཡེ་ཤེས་ཐིམ་པས་འཇིག་རྟེན་
ཀྱི་བྱ་བ་དང་དགོས་པ་མི་དྲན། རླུང་གི་ཁམས་ཐིམ་པས་རླུང་བཅུ་གནས་ནས་འཕོ། །ལྕེའི་དབང་པོ་ཐིམ་པས་ལྕེ་སྦོམ་ཞིང་ཐུང་ལ་རྩ་བ་སྔོན་པོར་འགྲོ། །ཡུལ་གྱི་རོ་ཐིམ་པས་རོ་དྲུག་ཉམས་སུ་མི་མྱོང་ངོ༌། །དེ་ལྟར་རགས་པ་ཉི་ཤུ་ཐིམ་ནས། །ཕྲ་བ་ནང་གི་འབྱུང་བའི་ཐིམ་ལུགས་ནི། །ས་ཆུ་ལ་ཐིམ་པས་ལུས་བསྒུལ་བསྐྱོད་མི་ནུས་ཤིང་ཟུང་མི་ཐུབ། ལུས་ས་ལ་བྱིང་བ་སྙམས་བྱེད། ནང་རྟགས་རྨིག་རྒྱུ་ལྟ་བུ་སྔོ་མེར་མེར་བ་དང༌། ཆར་ཟིམ་དང་ཆུ་གཡོ་བའི་རྣམ་པ་ལྟ་བུ་འབྱུང༌། ཆུ་མེ་ལ་ཐིམ་པས། ཁ་སྣ་སྐམ་ཞིང་ལྕེ་སྐན་ཕུག་ཏུ་འགྲོ། །ནང་རྟགས་སུ་དུ་བ་འཕྱུར་བ་ལྟ་བུ་དང༌། དུ་ཐང་ཆགས་པ་ལྟ་བུ་འབྱུང༌། མེ་རླུང་ལ་ཐིམ་པས་ལུས་ཀྱི་དྲོད་མཐའ་ནས་སྡུད་ཅིང་ཕོ་བའི་མེ་དྲོད་ཉམས། ནང་རྟགས་སུ་སྲིན་བུ་མེ་ཁྱེར་ལྟ་བུ་དམར་ཙག་ཙག་དང༌། དམར་ཕྲམ་ཕྲོམ་འབྱུང༌། རླུང་རྣམ་ཤེས་ལ་ཐིམ་པས། དབུགས་ཕྱིར་རིང་དུ་རྒྱུ་ཞིང་ནང་དུ་སྡུད་མི་ཤེས་པར་རགས་པའི་རྒྱུ་བ་ཆད། ནང་རྟགས་སུ་མར་མེ་འབར་བའི་སྣང་བ་དང༌། སྒྲོན་མེའི་ཕྲེང་བ་བསྒྲིགས་པ་ལྟ་བུ་འབྱུང༌། རྣམ་ཤེས་ནམ་མཁའ་ལ་ཐིམ་པས་ནང་རྟགས་སུ་ཤེས་པ་དངས་པ་དང༌། ཕྱི་རྟགས་སུ་སྤྲིན་མེད་པའི་ནམ་མཁའ་ལྟ་བུ་འབྱུང༌། དེ་ནས་ནམ་མཁའ་འོད་གསལ་ལ་ཐིམ་པས། སྣང་བཞི་རིམ་གྱིས་འཆར་ཏེ། དང་པོ་སྤྱི་བོ་ནས་ཕ་ལས་ཐོབ་པའི་ཐིག་ལེ་དཀར་ཆ་དེ་ཉིད་ཐུར་དུ་བབས་
ནས་སྙིང་ཀར་སོན་པ་ན་སྣང་བ་ཞེས་བྱ་སྟེ། ཕྱི་རྟགས་སུ་སྣང་བ་ཐམས་ཅད་སྤྲིན་བྲལ་གྱི་ནམ་མཁའ་གཡའ་དག་པ་ལ་ཟླ་འོད་ཀྱིས་ཁྱབ་པ་ལྟ་བུ་དཀར་ལམ་བ་འབྱུང༌། ནང་རྟགས་སུ་གཟུང་བའི་རྣམ་རྟོག་རགས་པས་སྟོང་པའི་ཤེས་པའི་རང་གདངས་གསལ་བར་སྣང་བ་འཆར། གཉིས་པ་དབུ་མའི་མས་སྣའི་ཁམས་དམར་ཆ་དངས་མ་གྱེན་དུ་སོང་པས་སྣང་བའི་ཡེ་ཤེས་འཆར་པ་ལ་ཐིམ། ཕྱི་རྟགས་སུ་སྤྲིན་མེད་པའི་ནམ་མཁའ་ཉི་འོད་ཀྱིས་ཁྱབ་པ་ལྟ་བུ་དམར་ལམ་པ་འཆར། ནང་རྟགས་སུ་འཛིན་པའི་རྣམ་རྟོག་རགས་པའི་ཆོས་སྟོང་པའི་སེམས་ཤིན་ཏུ་གསལ་བར་སྣང་བ་འཆར། གསུམ་པ་དངས་མ་དཀར་དམར་སྙིང་གར་ཕྲད་པའི་དུས་སུ་མཆེད་པའི་ཡེ་ཤེས་ཐོབ་པ་ལ་ཐིམ་པས། ཕྱི་རྟགས་སུ་ནམ་མཁའ་ལ་མུན་ནག་གིས་ཁྱབ་པ་ལྟར་ནག་ཐིབས་ཀྱིས་འགྲོ་བའི་ནག་ལམ་དང༌། ནང་རྟགས་སུ་ཤིན་ཏུ་ཕྲ་བའི་གཟུང་འཛིན་གྱི་རྟོག་པའི་ཆོས་ཆེར་སྟོང་པ་སྣང་ཆའི་སྟེང་དུ་ཐ་དད་པའི་མཚན་མ་ཐམས་ཅད་ནུབ་པས་སེམས་འགགས་པ་ལ་ཕྱོགས་པ་སྣང་བ་ཐོབ་པའི་ཡེ་ཤེས་འཆར། བཞི་པ་དེ་ནས་སྙིང་གའི་རྩ་དར་དཀར་གྱི་སྐུད་པ་འདྲ་བའི་ནང་གི་ཁྲག་དབུགས་ཀྱི་དངས་མ་ཐིག་ལེ་ཨ་ཧི་སོགས་རྫོགས་པར་ཐིམ་པས་འཆི་ཁའི་གཞི་དུས་ཀྱི་འོད་གསལ་འཆར་སྟེ། ཕྱི་རྟགས་སུ་སྤྲིན་དང་བྲལ་བའི་ནམ་མཁའ་གཡའ་དག་པ་ལྟ་བུ་དང་སྟོང་གསལ་མཐའ་དབུས་མེད་པའི་སྣང་བ་དང༌། ནང་རྟགས་སུ་རྣམ་པར་མི་རྟོག་པ་ལྷན་ཅིག་སྐྱེས་པ་ཤིན་ཏུ་སྤྲོས་པ་དང་བྲལ་བའི་ཡེ་
ཤེས་ལ་གནས་པ་སྟེ་འདི་ངོས་ཟིན་ནས་ད་ལྟའི་ཉམས་ལེན་གྱི་ངང་དུ་བཞག་ན་འོད་གསལ་མ་བུ་འདྲེས་ཏེ་བར་དོ་དང་པོ་ལ་གྲོལ་བ་ཡིན་ནོ། །འདི་ནི་སྟོང་པའི་འོད་གསལ་རྒྱུད་སྡེ་སྤྱི་དང་མཐུན་པར་བཤད་པ་ཡིན་ལ་འདིའི་སྐབས་སུ་སྣང་བའི་འོད་གསལ་ལྷ་སྐུ་དང༌། ཐིག་ལེ་ལ་སོགས་པ་འཆར་ཚུལ་རྫོགས་ཆེན་གྱི་རྒྱུད་སྡེ་རྣམས་ནས་བཤད་པ་ཡོད་ཀྱང་ཇི་ལྟ་བར་གྲོལ་བ་ལོང་ཡོད་དུ་འཆར་དཀར་བར་སྣང་ངོ། །དེ་ནས་སྣང་གསུམ་ཐིམ་པའི་འོད་གསལ་དེ་ལས་སླར་ཡང་རིམ་གྱིས་མཆེད་དེ་སྲིད་པ་བར་དོའི་ལུས་སུ་འགྲུབ་པ་ནི། བར་དོར་ཅི་ཙམ་གནས་པའི་ཕྱེད་སྔ་མ་ལ་ཚེ་སྔ་མའི་གཟུགས་དང༌། ཕྱི་མ་ལ་ཕྱི་མ་གང་དུ་སྐྱེ་འགྱུར་གྱི་གཟུགས་ཀྱི་རྣམ་པ་ཅན་དབང་པོ་ཐམས་ཅད་ཚང་ཞིང༌། མའི་མངལ་མ་གཏོགས་པར་རྫུ་འཕྲུལ་གྱིས་ཐོག་མེད་དུ་རྒྱུ་བ་བར་དོ་རིགས་མཐུན་པ་རྣམས་དང་ལྷའི་མིག་དག་པ་ཐོབ་པ་རྣམས་མ་གཏོགས་གཞན་གྱིས་མི་མཐོང་བ། དཔེར་ན་རྨི་ལམ་གྱི་ལུས་ལྟ་བུར་སྐད་ཅིག་ལ་སྐྱེས་ནས་སྣང་བའང་མ་ཡིན་མུན་པའང་མ་ཡིན་པའི་སྣང་མུན་འོད་ཀྱི་བར་དོ་ཞེས་བྱ། འདིའི་སྐབས་སུ་ཤི་བ་ངོ་ཤེས་དཀའ་བས། ནམ་མཁར་བལྟས་ན་ཉི་ཟླ་མི་མཐོང་བ་དང༌། ས་ལ་རྐང་རྗེས་དང༌། གྲིབ་མ་མེད་པ་སོགས་བར་དོ་ཡིན་པའི་རྟགས་སུ་བཤད། འདིའི་ཚེ་ལས་དག་མ་དག་གི་སྣང་བ་བཟང་ངན་སྣ་ཚོགས་དང༌། ཁྱད་པར་
འཇིགས་པའི་སྒྲ་བཞི་ཞེས་པ་ས་རླུང་ལས་རི་ཉིལ་བ་ལྟ་བུའི་སྒྲ། ཆུ་རླུང་ལས་རྒྱ་མཚོའི་རླབས་འཆོལ་བའི་སྒྲ། །མེ་རླུང་ལས་ནགས་ལ་མེ་མཆེད་པའི་སྒྲ། རླུང་གི་རླུང་ལས་འབྲུག་སྒྲ་སྟོང་དུས་གཅིག་ཏུ་ལྡིར་བའི་སྒྲ། ཉམ་ང་བའི་གཡང་ས་གསུམ་ནི། དུག་གསུམ་གྱི་རང་གཟུགས་གཡང་ས་དཀར་དམར་ནག་གསུམ་མཐོང་ནས། དེར་ལྟུང་བ་ན་མངལ་དུ་ཆུད་པ་སོགས་འབྱུང༌། འདི་དག་གི་ཚེ་སྐྱེ་གནས་ཚོལ་བ་དང༌། གནས་ལུས་ལ་སྲེད་པ་སོགས་རྒྱུན་མར་འབྱུང་བ་ཡིན་ཞིང༌། འོད་ཀྱི་འཁོར་ལོ་དང༌། ས་ཕུག་དང༌། གང་སྟོང་དང༌། དུད་འགྲོ་ཕོ་མོ་དང༌། མི་ཕོ་མོ་ལ་སོགས་པ་མངལ་སྒོ་དང་སྐྱེ་གནས་ཀྱི་སྣང་བ་མི་འདྲ་བ་སྣ་ཚོགས་འཆར་བ་ཡིན་ནོ། །དེ་དག་གི་ཚེ་ཉམས་ལེན་གྱི་གནད་ནི། དང་པོ་འཆི་ངེས་པར་བློ་ཐག་ཆོད་པའི་ཚེ་ཚེ་འདིའི་ཞེན་པ་དང་འབྲེལ་བ་ཐམས་ཅད་བཅད། དམ་ཚིག་ཉམས་ཆགས་དང་སྡིག་ལྟུང་སོགས་ལ་སྙིང་ཐག་པ་ནས་བཤག་པ་བྱ། རང་བྱས་ཀྱི་སྡིག་པ་དྲན་ནས་འགྱོད་པ་དང༌། འཆི་བ་ལ་འཇིགས་སྐྲག །ཚེ་འདིའི་ཞེན་པ་སོགས་སྐད་ཅིག་ཙམ་ཡང་མི་བྱ་བར། དགའ་ཡལ་ལེ། སྤྲོས་དང༌། ད་རེས་འཆི་བ་འོད་གསལ་ངོས་ཟིན་པར་བྱ་བའམ་མིན་ཀྱང་བར་དོར་འོག་མིན་མཁའ་སྤྱོད་ཀྱི་གནས་སམ་ཟངས་མདོག་དཔལ་རི། བདེ་བ་ཅན་ལ་སོགས་པར་ངེས་པར་འགྲོ་ཆོག་པས་རེ་དགའ། དག་པའི་ཞིང་ཁམས་དེ་དག་ཏུ་འགྲོ་བར་བྱའོ་སྙམས་པའི་འདུན་པ་དྲག་པོ་མ་བརྗེད་པར་བྱ།
ད་ལྟའི་རང་རྒྱུད་ཀྱི་ཉམས་ལེན་གང་གསལ་དེ་གའི་ངང་དུ་བློ་ལྷོད་ཀྱིས་བཞག་ནས་ཚེའི་འདུ་བྱེད་གཏོང་བ་ལས། ད་ལྟ་གོམ་འདྲིས་མེད་པའི་མན་ངག་གཞན་དེའི་ཚེ་ཉམས་སུ་མི་ལོན་པས་ད་ལྟ་རང་གི་ཉམས་ལེན་གང་གསལ་བ་དེའི་ངང་དུ་འཇོག་པ་དང༌། ཟངས་མདོག་དཔལ་རི་སོགས་དག་པའི་ཞིང་དུ་འགྲོ་སྙམས་པའི་འདུན་པ་གཉིས་པོ་འདི་ལས་ལྷག་པ་མེད་དོ། །ཁྱད་པར་རང་ཉིད་གང་ལ་འདུན་པ་གཏད་པའི་དག་པའི་ཞིང་ཁམས་དེར་འགྲོ་བར་བྱའོ་སྙམས་པའི་འདུན་པ་ཡང་དང་ཡང་དུ་ཡིད་ལ་བྱ་བ་ནི་གནད་ཁྱད་པར་ཅན་ཡིན་པས་ད་ལྟའནག་ཉིན་མཚན་རྒྱུན་དུ་ཡིད་ལ་མི་འབྲལ་བར་ཤེས་པར་གནད་གལ་པོ་ཆེ་ཡིན་ནོ།། ༈ །།ཐེག་ཆེན་ལམ་གྱི་རྩ་བ་དམ་པ་གསུམ་ཡིན་ཏེ། དེ་གང་ཞེ་ན་འདི་ལྟར། དང་པོ་དགེ་བ་ཐབས་ཀྱིས་ཟིན་པའི་སེམས་བསྐྱེད། དངོས་གཞིའི་དགེ་བ་རྐྱེན་གྱིས་མི་བཤིག་པའི་དམིགས་མེད། མཇུག་དགེ་བ་གོང་འཕེལ་དུ་འགྲོ་བའི་བསྔོ་བ་རྣམས་ནི་དམ་པ་གསུམ་ཡིན་ལ། དང་པོ་སྦྱོར་བ་སེམས་བསྐྱེད་དམ་པ་ནི། འདི་ལྟར་ནམ་མཁའ་དང་མཉམ་པའི་སེམས་ཅན་ཐམས་ཅད་ཡེ་ཐོག་མའི་དུས་ནས་ད་ལྟའི་བར་དུ་རང་གི་ཕ་མར་མ་གྱུར་པ་ནི་གཅིག་ཀྱང་མེད། ཕ་མར་གྱུར་པའི་དུས་སུ་ད་ལྟའི་ཕ་མ་བཞིན་དུ་ཟས་ཀྱི་ཕུད་བྱིན། གོས་ཀྱི་བརྩེས་གཡོག །ཤིན་ཏུ་བྱམས་པའི་བསམ་སྦྱོར་གྱིས་བསྐྱེད་བསྲེངས་པའི་དྲིན་ཆེན་ཤ་སྟག་ཡིན་མོད། དེ་དག་ཐམས་ཅད་ཀྱིས་འདོད་པ་བདེ་བ་རེ་འདོད་ཀྱང་བདེ་བའི་རྒྱུ་དགེ་བ་བཅུ་པོ་བསྒྲུབ་མི་ཤེས།
སྡུག་བསྔལ་མི་འདོད་ཀྱང་སྡུག་བསྔལ་གྱི་རྒྱུ་མི་དགེ་བ་བཅུ་པོ་འཆོལ་ཉོག་ཏུ་སྤྱོད་ནས་ལམ་ལོག་མགོ་རྨོངས་ལོང་བ་ཐང་དཀྱིལ་དུ་འཁྱམས་པ་ལྟ་བུའི་སྐྱབས་མེད་མགོན་མེད་དུ་གྱུར་པའི་སེམས་ཅན་འདི་རྣམས་སྙིང་རེ་རྗེ། འདི་དག་ཐམས་ཅད་རྣམས་མཁྱེན་རྫོགས་པའི་སངས་རྒྱས་ཀྱི་གོ་འཕང་ཐོབ་པའི་ཆེད་དུ་བདག་གིས་དམ་པའི་ཆོས་འདི་ཉན་ནས་ཉམས་སུ་བླང་བར་བགྱིའོ། །སྙམ་པ་ཐེག་པ་ཐུན་མོང་གི་སེམས་བསྐྱེད་ཡིན། གསང་སྔགས་རྡོ་རྗེ་ཐེག་པའི་ཁྱད་པར་ནི་བདག་དང་མཐའ་ཡས་པའི་སེམས་ཅན་ཐམས་ཅད་ཡེ་ནས་སངས་རྒྱས་པའི་རང་བཞིན་ཡིན་ཀྱང༌། རང་ངོ་མ་ཤེས་པས་འཁྲུལ་པས་འཁོར་བའི་ལམ་ལ་ཁ་འཁྱམས་པ་འདི་དག་ཐམས་ཅད་ལ་རང་གནས་གྱི་ཡེ་ཤེས་ངོ་སྤྲད་ནས་ཚེ་ལུས་གཅིག་གིས་རྡོ་རྗེ་འཆང་གི་གོ་འཕང་ཐོབ་པའི་ཕྱིར་བདག་གིས་བསྐྱེད་རྫོགས་ཟབ་མོ་སོགས་ལ་བསླབ་པར་བྱའོ་སྙམ་དུ་སེམས་བསྐྱེད། །དངོས་གཞི་དམིགས་མེད་དམ་པ་ནི་སྣོད་བཅུད་དག་མཉམ་ཆེན་པོའི་རང་བཞིན་དུ་ཡེ་ནས་གནས་པ་དེ་ཡིན་པ་ལྟར་གསལ་བཏབ་ནས་ཆོས་བྱེད་པ་པོ་བདག་དང་བྱ་རྒྱུའི་ཆོས་བྱ་བ་དང་བཅས་པ་དམིགས་མེད་ཕྱམ་གདལ་དུ་ཐག་ཆོད་ན་དེ་ཡིན། དེ་མིན་ན་དེ་དང་རྗེས་སུ་མཐུན་པ་རང་གིས་སྔར་བླ་མའི་དྲིན་གྱིས་རྟོགས་པའི་ལྟ་དོན་ཇི་ལྟ་བུ་ཞིག་ཡིན་ཀྱང༌། དེའི་དང་ནས་རྣམ་རྟོག་གྱ་གྱུའི་དབང་དུ་མི་གཏོང་བར་དགེ་སྦྱོར་ལ་འབད་པར་བྱའོ། །རྗེས་སུ་བསྔོ་བ་དམ་པ་ནི། བདག་གཞན་སེམས་ཅན་ཐམས་ཅད་ཀྱི་
དུས་གསུམ་གྱི་བསགས་པའི་དགེ་ཚོགས་ཐམས་ཅད་གཅིག་ཏུ་བསྡུས་ཤིང་བཟླུམ་ཏེ་བསྡོམ་ནས་འདས་མ་འོང་ད་ལྟའི་སངས་རྒྱས་རྣམས་ཀྱི་སེམས་ཅན་གྱི་དོན་དུ་བསྔོ་བ་ཇི་ལྟར་མཛད་པ་བཞིན་དུ་བདག་གིས་ཀྱང་ཡོངས་སུ་བསྔོ་བར་བགྱི་སྙམ་པ་ནི་སངས་རྒྱས་ཀྱི་རྗེས་སུ་བསྔོས་པ་ཡིན། འཇམ་དཔལ་དཔའ་བོ་དང་སྤྱན་རས་གཟིགས་སོགས་རྒྱལ་སྲས་རྣམས་ཀྱི་བསྔོ་བ་ལྟར་བསྔོས་ན་བྱང་སེམས་རྣམས་ཀྱི་རྗེས་སུ་བསྙོགས་ཏེ་བསྔོས་པ་ཡིན། གང་ལྟར་ན་སེམས་ཅན་རྣམས་ལ་དགེ་རྩ་བསྔོས་པའི་མཐུས་རྫོགས་པའི་སངས་རྒྱས་ཀྱི་གོ་འཕང་ཐོབ་པར་དམིགས་ཏེ་བསྔོ་བ་ཤེས་པར་བྱའོ། །མདོར་ན་དགེ་སྦྱོར་ཐམས་ཅད་ཀྱི་ཐོག་མར་དོན་གཉིས་ལྡན་པའི་སེམས་བསྐྱེད། དངོས་གཞི་བྱ་བྱེད་ལས་གསུམ་གྱི་དམིགས་པ་དང་བྲལ་བ། རྗེས་སངས་རྒྱས་དང་སེམས་དཔའ་རྣམས་ཀྱི་རྗེས་སུ་བསྙེགས་ཏེ་བསྔོས་ན་དམ་པ་གསུམ་གྱིས་ཟིན་པའི་དགེ་བ་ཐར་བ་དང་ཆ་མཐུན་པ་ལགས།། ༈ སྤྱིར་དགེ་བ་གང་བྱེད་ཐམས་ཅད་དམ་པ་གསུམ་གྱིས་ཟིན་པ་གལ་ཆེ་སྟེ། དང་པོ་དགེ་བ་གང་བྱེད་ལ་ཐབས་ཀྱིས་ཟིན་པ་སྦྱོར་བ་སེམས་བསྐྱེད། དགེ་བ་རྐྱེན་གྱིས་མི་བཤིག་པར་བྱེད་པ་དངོས་གཞི་དམིགས་མེད། དགེ་བ་གོང་འཕེལ་དུ་འགྲོ་བ་མཇུག་བསྔོ་བའོ། །དང་པོ་སེམས་བསྐྱེད་ནི། སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་དགེ་བ་སྒྲུབ་སྙམ་པ་དེ་ཡིན། སེམས་བསྐྱེད་འདི་ལ་སེམས་ཅན་གྱི་དོན་དུ་སྙམས་པ་དང༌། རྫོགས་
པའི་སངས་རྒྱས་ཀྱི་གོ་འཕང་ཐོབ་པར་བྱ་སྙམ་པ་དེ་གཉིས་ཚང་དགོས། འདི་གཉིས་མ་ཚང་ན་བྱམས་དང་སྙིང་རྗེ་ཙམ་གྱིས་སེམས་བསྐྱེད་ཀྱི་གོ་མི་ཆོད། དངོས་གཞི་དམིགས་མེད་ནི། ཕྱག་རྫོགས་ཀྱི་ཉམས་ལེན་ཤེས་མཁན་ཡིན་ན་རང་རང་གི་ཉམས་ལེན་སྐྱོང་བ་དེས་འཐུས། མཇུག་བསྔོ་བ་ནི། རྒྱལ་བ་སྲས་དང་བཅས་པས་ཇི་ལྟར་བསྔོས་པ་དེ་ལྟར་བསྔོ་སྙམ་པ་དེ་འཁོར་གསུམ་ཡང་དག་གི་བསྔོ་བ་རྗེས་མཐུན་པ་ཡིན་པས་དེ་ལས་ལྷག་པ་མེད། དུས་རྒྱུན་གསོལ་བ་འདེབས་པའི་ཡུལ་བླ་མ་སངས་རྒྱས་ཀུན་འདུས། དཀོན་མཆོག་ཀུན་འདུས་ཀྱི་ངོ་བོ་ཡིན་པས་འདི་གཅིག་པུ་ལ་གསོལ་བ་བཏབ་པས་འཐུས། དེ་ཡང་བླ་མའི་ཐུགས་རིག་པའི་ཡེ་ཤེས་སྣང་སྟོང་དབྱེར་མེད་དེ་ཡེ་སངས་རྒྱས་པའི་ཡེ་ཤེས་ཡིན་པས། སངས་རྒྱས་སྐུ་གསུམ་འདི་ལ་འདུས། བླ་མའི་ཐུགས་རྒྱུད་ན་བཞུགས་པའི་ཐོས་བསམ་སྒོམ་གསུམ་གྱི་ཡོན་ཏན་རྣམས་ཆོས་ཡིན་ཏེ། ཐོས་བསམ་ལུང་དང་སྒོམ་པ་རྟོགས་པ་གཙོ་ཆེ། བླ་མའི་ཐུགས་ཡེ་ཤེས་དང་ཐུགས་རྒྱུད་ཀྱི་ཡོན་ཏན་གཉིས་དབྱེར་མི་ཕྱེད་པའི་ཆ་ནི་དགེ་འདུན་ཡིན་ཏེ། ཚོགས་རྣམས་ཀྱི་མཆོག་ཡིན་པའི་ཕྱིར་རོ། །དེས་ན་སངས་རྒྱས་ལ་གསོལ་བ་བཏབ་ཀྱང་འདི་དང་འདྲ་ཞིང་བླ་མ་ཡང་དེར་འདུ། བླ་མ་དང་སངས་རྒྱས་གཉིས་གནས་སྐབས་གདུལ་བྱ་ལ་སྣང་ཚུལ་གྱི་ཁྱད་པར་ལས་ངོ་བོ་གཅིག་སྟེ། ཚེས་གསུམ་གྱི་ཟླ་བ་དང་བཅོ་ལྔའི་ཟླ་བ་བཞིན་ནོ། །ཡི་དམ་དང་མཁའ་འགྲོ་སོགས་ཀྱང་འདི་གཉིས་ལ་
མ་འདུས་པ་མེད་དོ། །ཤེར་ཕྱིན་གྱི་དོན་ནི། མི་གནས་པའི་གནས་པ་ནི་ཕྱི་ཡུལ་གྱི་བཟང་ངན་གཉིས་ཀྱི་ཞེན་པ་བཅད། མི་སྦྱོར་བའི་སྦྱོར་བ་ནི། མི་བསམ། མི་ཡེང་མི་སྒོམ། རང་བབ་འདུག་པའོ།། །།དགེའོ།། །།དགེའོ།། །།དགེའོ།།