ཟབ་མོ་ལྟ་བའི་བརྒྱུད་པ་ཐེག་ཆེན་དབུ་མའི་ལུགས་ཀྱི་སེམས་བསྐྱེད་འབོགས་ཆོག
ཟབ་མོ་ལྟ་བའི་བརྒྱུད་པ་ཐེག་ཆེན་དབུ་མའི་ལུགས་ཀྱི་སེམས་བསྐྱེད་འབོགས་ཆོག་བཞུགས་སོ།། །།
དབུ་མ་ལུགས་ཀྱི་སེམས་བསྐྱེད་གཞན་ལ་འབོགས་པའི་ཆོ་ག་ལ། དང་པོ་བླ་མ་རང་ཉིད་ཀྱིས་སེམས་བསྐྱེད་རྒྱས་བསྡུས་གང་རིགས་ཀྱི་སྒོ་ནས་བླངས། དེ་ནས་ཆོས་ཀྱི་ཁྲི་ལ་བཞུགས་ནས། འོ་ན་དུས་གསུམ་གྱི་རྒྱལ་བ་ཐམས་ཅད་གཤེགས་ཤིང་རྗེས་སུ་གཤེགས་པའི་ལམ་པོ་ཆེ་ལྟ་བུ། རྒྱལ་སྲས་བྱང་ཆུབ་སེམས་དཔའ་རྣམས་ཀྱི་བགྲོད་པ་གཅིག་པའི་ལམ། སྲིད་ཞིའི་ལེགས་ཚོགས་ཐམས་ཅད་ཀྱི་རྩ་བ། རིན་ཆེན་བྱང་ཆུབ་ཀྱི་སེམས་ལེགས་པར་བསྐྱེད་ནས་རང་རྒྱུད་ལ་འཛིན་པར་བྱེད་པ་ལ། སྦྱོར་བ་དངོས་གཞི་རྗེས་དང་གསུམ་དུ་ཡོད་པ་ལས། དང་པོ་སྦྱོར་བ་དེ་ཡང་༌། ཁྱད་པར་ཅན་བཞི་ཡོད་པ་ལས།
དང་པོ་ཡུལ་ཁྱད་པར་ཅན་སློབ་དཔོན་ལ་མཎྜལ་ཕུལ་ནས་གསོལ་བ་འདེབས་དགོས་པས་དང་པོ། །དགེ་བའི་བཤེས་གཉེན་ལ་སངས་རྒྱས་དངོས་ཀྱི་འདུ་ཤེས་བསྐྱེད་ནས་ཡིད་ཆེས་ཀྱི་དད་པ། བྱང་ཆུབ་ཀྱི་སེམས་ལ་ཡིད་བཞིན་གྱི་ནོར་བུ་ལས་ཀྱང་ལྷག་པའི་བསམ་པས་དོན་གཉེར་གྱི་འདུན་པ་དྲག་པོ་བསྐྱེད་དེ། མཎྜལ་འབུལ་བར་ཞུ། དེས་མཎྜལ་ཕུལ་བའི་རིམ་པ་སོང་ནས། གཉིས་པ་གསོལ་བ་འདེབས་པ་འདིའི་རྗེས་ཟློས་མཛོད། །ངན་འགྲོ་རྣམས་ནི་བཟློག་སོགས། །བྱང་ཆུབ་སེམས་མཆོག་སྩལ་དུ་གསོལ། །ལན་གསུམ། དེས་གསོལ་བ་འདེབས་པ་སོང་ནས། གཉིས་པ་གདམས་ངག་ཁྱད་པར་་
ཅན་སྲིད་པའི་མཐའ་ལ་སྐྱོ་བ་བསྐྱེད། ཞི་བའི་མཐའ་ལ་ཞེན་པ་དགག །མཐའ་གཉིས་ལ་མི་གནས་པའི་བྱང་ཆུབ་སེམས་ཀྱི་བསྔགས་པ་བརྗོད་པ་གསུམ་གྱིས་སློབ་མའི་རྒྱུད་སྣོད་རུང་དུ་སྒྲུབ་དགོས་པ་ལས། གདམས་ངག་དེ་དག་གི་དོན། སྤྱོད་འཇུག་ལེའུ་དང་པོ་འདིར་འདུས་པར་གདའ་བས། དེ་བཞིན་ཏུ་འཆད་པར་བྱེད་པ་ལ། སེམས་བསྐྱེད་སྤྱིའི་ཕན་ཡོན། སྨོན་འཇུག་སོ་སོའི་ཕན་ཡོན། སེམས་བསྐྱེད་རྒྱུད་ལྡན་གྱི་གང་ཟག་གི་ཆེ་བ་དང་གསུམ་དུ་ཡོད་པ་ལས། དང་པོ་སེམས་བསྐྱེད་སྤྱིའི་ཕན་ཡོན་དེ་ལ་ཡང་༌། སེམས་བསྐྱེད་ཀྱི་རྟེན་ཁྱད་པར་ཅན་ཐོབ་པ་ལ་བསམ་ནས། །དོན་གཉེར་གྱི་བློ་བསྐྱེད་པ་དང་༌། ཕན་ཡོན་དངོས་གཉིས་ལས། དང་པོ་སེམས་བསྐྱེད་ཀྱི་རྟེན་ཁྱད་པར་ཅན་བསམ་པ་ལ་ཡང་ལུས་ཀྱི་རྟེན་ཁྱད་པར་ཅན་བསམ་པ་དང་༌། སེམས་ཀྱི་རྟེན་ཁྱད་པར་ཅན་བསམ་པ་གཉིས་ཀྱི། དང་པོ་ནི་དལ་འབྱོར་འདི་ནི་སོགས༴ གཉིས་པ་སེམས་ཀྱི་རྟེན་ནི། ཇི་ལྟར་མཚན་མོ་སོགས༴ སེམས་བསྐྱེད་སྤྱིའི་ཕན་ཡོན་དངོས་ནི། དེ་ལྟའི་དགེ་བ་སོགས༴ སྨོན་འཇུག་སོ་སོའི་ཕན་ཡོན་ནི། བྱང་ཆུབ་སེམས་དེ་སོགས༴ སེམས་བསྐྱེད་རྒྱུད་ལྡན་གྱི་གང་ཟག་གི་ཆེ་བ་ནི་ཕན་བཏགས་ལན་གདོན་སོགས་ནས་སྐྱབས་སུ་མཆིའི་བར། དོན་ཚངས་བ་བླ་མས་གསུངས་གྲུབ་ནས། དེས་གདམས་ངག་ཁྱད་པར་ཅན་གྱིས་བློ་སྦྱངས་པ་སོང་ནས། གསུམ་པ་ཐབས་ཁྱད་པར་ཅན་ཡན་ལག་བདུན་གྱིས་ཚོགས་བསགས་
པ་ལ། དངོས་འབྱོར་ཡིད་སྤྲུལ་ལ་སོགས་པའི་མཆོད་པ་འབུལ་བ། ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་འཚལ་བ། སྡིག་ལྟུང་གཉེན་པོ་སྟོབས་བཞིའི་སྒོ་ནས་བཤགས་པ། སྐྱེས་བུ་གསུམ་གྱི་དགེ་རྩ་ལ་རྗེས་སུ་ཡི་རང་བ། རྒྱལ་བ་རྣམས་ལ་ཆོས་ཀྱི་འཁོར་ལོ་བསྐོར་བར་བསྐུལ་བ། མྱ་ངན་ལས་མི་འདའ་བར་བཞུགས་པར་གསོལ་བ་འདེབས་པ། སྙིང་རྗེ་བསྒོམ་པ་དང་སྟབས་གཅིག་དགེ་རྩ་ཐམས་ཅད་སེམས་ཅན་སྡུག་བསྔལ་ཅན་རྣམས་ཀྱི་དོན་དུ་བསྔོ་བ་དང་བདུན་ལས། དང་པོ་མཆོད་པ་ལ་ཡང་༌། དངོས་འབྱོར་གྱི་མཆོད་པ། ཡིད་སྤྲུལ་གྱི༴ སྨོན་ལམ་སྟོབས་ཀྱི༴ བླ་ན་མེད་པའི༴ བསྟོད་པ་དབྱངས་ཀྱིས་མཆོད་པ་དང་ལྔ་ལས། ཐོག་མར་མཆོད་པའི་མཎྜལ་ཞིག་ཕུལ། དངོས་འབྱོར་གྱི་མཆོད་པ་ལ་ཡང་༌། བདག་པོས་བཟུང་བའི་མཆོད་པ། བདག་པོས་མ་བཟུང་བའི་མཆོད་པ། ལུས་འབུལ་བའི་མཆོད་པ་དང་གསུམ། དང་པོ་བདག་པོས་བཟུང་བའི་མཆོད་པ་ནི། དངོས་སུ་ཅི་འབྱོར་གྱི་མཆོད་པ་བཤམས་ཤིང་བཀོད་པ་འདི་དག་དམིགས་རྟེན་ཙམ་དུ་བྱས་ནས། རང་གི་ལུས་ལོངས་སྤྱོད་ཚེ་བསོད་ནམས། ཁ་རྗེ་དབང་ཐང་གཉེན་ཉེ་འབྲེལ་དུས་གསུམ་གྱི་དགེ་རྩ་དང་བཅས་པ་ལ་ཆགས་ཞེན་གྱི་འཁྲི་བ་ཐམས་ཅད་བཅད་ནས་དག་པ་གསུམ་ལྡན་དུ་འབུལ་བ་ཡིན་ཏེ། དེ་ཡང་༌། རིན་ཆེན་སེམས་དེ་སོགས༴ ལེགས་པར་མཆོད་ཀྱི་བར། ཞེས་གསུངས་པའི་དོན། ད་རེས་ཀྱི་སྐབས་སུ། རིན་ཆེན་བྱང་ཆུབ་
ཀྱི་སེམས་རང་རྒྱུད་ལ་སྐྱེ་བར་བྱ་བའི་ཕྱིར་དུ་མཆོད་པ་འབུལ་བ་ཡིན་པས། དེ་ལྟ་བུའི་བསམ་ལས་ཟིན་ན་བསམ་པ་དག །འབུལ་བའི་ཡུལ་དེ་བཞིན་གཤེགས་པ་སངས་རྒྱས་རྣམས་དང་༌། དམ་པའི་ཆོས་དཀོན་མཆོག་དྲི་མ་མེད་པ་དང་༌། སངས་རྒྱས་ཀྱི་སྲས་ཡོན་ཏན་རྒྱ་མཚོའི་བདག་ཉིད་ཅན་གྱི་འཕགས་པའི་དགེ་འདུན་ཏེ། སྐྱབས་གནས་དཀོན་གསུམ་ལ་འབུལ་བ་ཡིན་པས་ཞིང་དག །ལེགས་པར་མཆོད་ཅེས་པས་ཅི་འབྱོར་གྱི་མཆོད་པ་བཤམས་པ་འདི་དག་ཀྱང་༌། གཞན་ལས་འཕྲོག་པ་དང་བརྐུས་པ་དང་༌། གཡོ་སྒྱུས་བསྒྲུབ་པ་སོགས་མ་ཡིན་ཞིང་༌། སེར་སྣ་མེད་པར་དད་པས་ཕུལ་བ་ཡིན་པས་དངོས་པོ་དག་པ་གསུམ་གྱི་སྒོ་ནས་ལེགས་པར་འབུལ་བར་བགྱིའོ་སྙམ་པས་འདིའི་རྗེས་ཟློས་མཛོད། རིན་ཆེན་སེམས་དེ་སོགས༴འདི་མན་གྱི་མཆོད་པ་ཐམས་ཅད་བླ་མས་དམིགས་པ་ཕོག་ནས་རྗེས་ཟློས་བྱ། གཉིས་པ་བདག་པོའི་མ་བཟུང་བའི་མཆོད་པ་ནི་མེ་ཏོག་འབྲས་བུ་སོགས། ཉིད་ཀྱི་མཐུས་བཞེས་ཤིག །གསུམ་པ་ལུས་འབུལ་བའི་མཆོད་པ་ནི། རྒྱལ་དང་དེ་སྲས་སོགས༴ མི་བགྱིད་དོ། ༈ །མཆོད་པའི་རྣམ་གྲངས་གཉིས་པ་ཡིད་སྤྲུལ་གྱི་མཆོད་པ་ལ་བརྒྱད་ལས་བླ་མས་ཁྲུས་ཁང་གི་དམིགས་པ་ཕོགས་ནས། དང་པོ་ཁྲུས་དང་སྐུ་ཕྱི་སོགས་ཀྱི་མཆོད་པ། བྱིང་འདྲེན་པས་བསྐུལ་ཏེ་ཁྲུས་ཀྱི་ཁང་པ་སོགས་ཐམས་ཅད་ཀྱིས་ཐུན་
མོང་དུ་གསུང་མཛད་པས་འཐུས་པར་གདའ་བས་དེ་བཞིན་དུ་མཛད་པར་ཞུ། གཉིས་པ་དྲི་བཟང་གི་བྱུག་པ་འབུལ་བ་ནི། སྟོང་གསུམ་ཀུན་ཏུ་སོགས༴ གསུམ་པ་མེ་ཏོག་གི་མཆོད་པ། ཐུབ་དབང་མཆོད་གནས་སོགས༴ བཞི་བ་བདུག་སྤོས་ཀྱིས་མཆོད་པ་སྤོས་མཆོག་ཡིད་འཕྲོགས་སོགས༴ ལྔ་པ་ཞལ་ཟས་ཀྱི་མཆོད་པ་ཞལ་ཟས་བཟའ་བཏུང་སོགས༴ དྲུག་པ་མར་མེའི་མཆོད་པ། གསེར་གྱི་པད་མ་སོགས༴ བདུན་པ་ས་གཞི་དང་གཞལ་མེད་ཁང་གི་མཆོད་པ། ས་གཞི་བལྟར་བ་སོགས༴ བརྒྱད་པ་རིན་པོ་ཆེའི་གདུགས་ཀྱི་མཆོད་པ། རིན་ཆེན་གདུགས་མཛེས་སོགས༴ དེས་ཡིད་སྤྲུལ་གྱི་མཆོད་པའི་རྣམས་གྲངས་བརྒྱད་པོ་དེ་སོང་ནས། གསུམ་པ་སྨོན་ལམ་སྟོབས་ཀྱི་མཆོད་པ། དེ་ལས་གཞན་ཡང་སོགས། བཞི་པ་བླ་ན་མེད་པའི་མཆོད་པ། ཇི་ལྟར་འཇམ་དབྱངས་སོགས༴ ལྔ་པ་བསྟོད་པ་དབྱངས་ཀྱི་མཆོད་པ་ཡོན་ཏན་རྒྱ་མཚོ་སོགས༴ དེས་ཡན་ལག་བདུན་གྱི་དང་པོ་མཆོད་པ་འབུལ་བའི་ཡན་ལག་དེ་སོང་ནས། གཉིས་པ་ཕྱག་འཚལ་བའི་ཡན་ལག་ནི། རྡུལ་ཅིག་གི་སྟེང་ན་རྡུལ་སྙེད་ཀྱི་སངས་རྒྱས་བཞུགས་པ་ཡིད་ཀྱིས་མངོན་སུམ་དུ་བྱས་ནས། དེ་དག་གི་སྤྱན་སྔར་རང་གི་ལུས་རྡུལ་སྙེད་དུ་སྤྲུལ་ནས་སེམས་ཅན་ཐམས་ཅད་དང་བྱ་བྱེད་ཐུན་མོང་དུ་གྱུར་ཏེ་ཕྱག་འཚལ་བའི་མོས་པ་དང་བསྒྲགས། ཕྱག་
འཚལ་བའི་ཚིག་འདི་དག་གི་རྗེས་ཟློས་མཛོད། དུས་གསུམ་བཞུགས་པའི་སོགས༴ དེས་ཡན་ལག་གཉིས་པ་ཕྱག་འཚལ་བའི་ཡན་ལག་དེ་སོང་ནས། འདིར་རྟེན་ཁྱད་པར་ཅན་དཀོན་མཆོག་གསུམ་ལ་སྐྱབས་སུ་འགྲོ་བ་ཡོད་ཀྱང་འོག་ནས་འབྱུང་བས་འདིར་མི་དགོས་ལ། གསུམ་པ་སྡིག་པ་བཤགས་པའི་ཡན་ལག་འདིར་བཤགས་ཡུལ་མངོན་དུ་བྱ་བ། སྡིག་ལྟུང་སྤྱིར་བཤགས་པ། གཉེན་པོ་སྟོབས་བཞིས་སྒོ་ནས་བཤགས་པའི་དོན་རྣམས་བླ་མས་གསུངས། སྔར་བྱས་ཀྱི་ལས་ལ་འགྱོད་པ་སུན་འབྱིན་པའི་སྟོབས། སྙིང་ཐག་པ་ནས་དཀོན་མཆོག་གསུམ་ལ་སྐྱབས་སུ་འགྲོ་བ་རྟེན་གྱི་སྟོབས། ལུས་ཀྱི་ཕྱག་འཚལ་ངག་གིས་བཤགས་ཚིག་བརྗོད། ཡིད་ཀྱིས་གདུངས་ཤུགས་དྲག་པོ་བསྐྱེད་པ་གཉེན་པོ་ཀུན་སྤྱོད་ཀྱི་སྟོབས། ཕྱིན་ཆད་སྲོག་ལ་བབ་ཀྱང་མི་བགྱིད་སྙམ་པ་སོར་ཆུད་པའི་སྟོབས་ཏེ། གཉེན་པོ་སྟོབས་བཞིའི་དག་པ་དྲན་པའི་སྒོ་ནས་ལྟུང་བཤགས་ཚར་གསུམ་དང་༌། སྤྱི་བཤགས་ཚར་གཅིག་བཅས་ལྷན་དུ་འདོན་པར་ཞུ། ༈ །བཞི་པ་རྗེས་སུ་ཡི་རང་བའི་ཡན་ལག་གི་དོན་བླ་མས་གསུངས་ནས། རྗེས་ཟློས་བྱ། སེམས་ཅན་ཀུན་གྱིས་སོགས། རྗེས་ཟློས་བྱ་བ་ཡན་ལག་འོག་མ་རྣམས་ལ་འདྲེས། ལྔ་པ་ཆོས་འཁོར་བསྐོར་བར་བསྐུལ་བའི་ཡན་ལག་ནི། ཕྱོགས་རྣམ་ཀུན་གྱི་སོགས༴ དྲུག་པ་མྱ་ངན་ལས་མི་འདའ་བར་གསོལ་བ་འདེབས་པ་ནི། རྒྱལ་བ་མྱ་ངན་སོགས༴ བདུན་པ་སྙིང་རྗེ་བསྒོམ་པ་དང་སྟབས་གཅིག་དགེ་རྩ་ཐམས་ཅད་སེམས་ཅན་
སྡུག་བསྔལ་ཅན་རྣམས་ཀྱི་དོན་དུ་བསྔོ་བ་ནི། དེ་ལྟར་འདི་དག་སོགས༴ དེ་ཡན་ཆད་གྱིས་ཐབས་ཁྱད་པར་ཅན་ཡན་ལག་བདུན་གྱིས་ཚོགས་བསགས་པ་སོང་༌། དེ་ལྟར་ན་དེ་ཡན་ཆད་ཀྱིས་སྤྱོད་པའི་ཆོས་སོང་ནས། དངོས་གཞི་ལ་བློ་སྦྱོང་བ་དང་དམ་བཅའ་བ་གཉིས་ཀྱི་དང་པོ་བློ་སྦྱངས་བ་ནི། གཞུང་གཞན་ནས་ཚད་མེད་བཞིས་བློ་སྦྱངས་པ་འབྱུང་ཡང་༌། འདིར་བདག་འཛིན་བཙན་ཐབས་སུ་གཅོད་པའི་ཐབས་བདག་ཏུ་འཛིན་པའི་གཞི་ལུས་ལོངས་སྤྱོད་དུས་གསུམ་གྱི་དགེ་བ་ཐམས་ཅད་གཞན་སེམས་ཅན་རྣམས་ལ་ཕངས་པ་མེད་པར་བཏང་བར་བགྱིའོ་སྙམ་པ་འདིའི་རྗེས་ཟློས་མཛོད། ལུས་དང་དེ་བཞིན་སོགས༴ ལན་གསུམ། དེས་འཐད་པ་དགོད་པ་ལུས་བྱེ་བྲག་ཏུ་གཏོང་བ་གཉིས་ཀྱི་དོན་བླ་མས་གསུང་ནས་བློ་སྦྱང་གི་འབྲས་བུ་སེམས་ཅན་ལ་བསྔོ་བའི་དམིགས་པ་ཕོག །དེ་ལྟ་བུའི་བསམ་པ་དང་ལྡན་པའི་ངང་ནས་འདིའི་རྗེས་ཟློས་མཛོད། བདག་ནི་མགོན་མེད་རྣམས་སོགས༴ སྒྱུར་ཡང་ཤོག་པར་བྱ། དེས་བློ་སྦྱང་བ་སོང་ནས། དངོས་གཞི་དམ་བཅའ་བ་ལ། འདི་སྐབས་དགོངས་སུ་གསོལ་བ་གསུམ་སྔོན་དུ་འགྲོ་དགོས་པས། ཕྱོགས་བཅུ་ན་བཞུགས་པའི་སངས་རྒྱས་བཅོམ་ལྡན་འདས་ཐམས་ཅད་དང་ས་བཅུ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང་བླ་མ་རྡོ་རྗེ་འཛིན་པ་ཆེན་པོ་རྣམས་བདག་ལ་དགོངས་སུ་གསོལ། ལན་གཅིག །
དེ་ནས་སྐྱབས་འགྲོ་དང་སེམས་བསྐྱེད་ཀྱི་དམིགས་པ་རྒྱས་པར་ཕོག་པ་དང་ཁོ་བོས་སེ་གོར་གཏོགས་པ་དང་མཉམ་དུ་ཁྱེད་རང་གི་རྒྱུད་ལ་སྡོམ་བསྐྱེས་བྱུང་སྙམ་པའི་སྒོ་ནས། བྱང་ཆུབ་སྙིང་པོ་སོགས༴ ཇི་ལྟར་སྔོན་གྱི་སོགས༴ སྦྲེལ་ནས་ལན་གསུམ་བརྗོད། དེས་ཁྱེད་རང་གི་རྒྱུད་ལ་སྡོམ་པ་ཐོབ་པ་ཡིན་ནོ་ཞེས་བརྡའ་སྦྱར། དེ་ཡན་གྱི་དངོས་གཞི་དམ་བཅའ་བ་སོང་ནས། རྗེས་རང་དགའ་བ་བསྒོམ་པའི་ཁྲིད་བླ་མས་གསུངས་ནས་དེང་དུས་སོགས་རྗེས་ཟློས་བྱ། དེ་ནས་གཞན་དགའ་བ་བསྒོམ་དུ་བཞུགས་པའི་དམིགས་པ་ཕོག་ནས་བདག་གི་དེ་རིང་སོགས་རྗེས་ཟློས་བྱའོ། །དེ་ལྟར་བྱང་ཆུབ་ཀྱི་སེམས་རིན་པོ་ཆེ་རང་རྒྱུད་ལ་ལེགས་པར་ཐོབ་པའི་བཀའ་དྲིན་བཏང་རག་གི་ཆེད་དུ་མཎྜལ་འབུལ་བར་ཞུ། དེ་ནས་བླ་མ་དང་སློབ་དཔོན་ཀྱི་བཀའ་དྲིན་དྲན་པའི་སྒོ་ནས་ཕྱག་འཚལ་བ་དང་བསྦྲགས་ཏེ་འདི་བཞིན་རྗེས་ཟློས་ཀྱིས། གང་གི་དྲིན་སོགས། ལན་གསུམ། དེ་ནས་ལྷན་དུ། བྱང་ཆུབ་སེམས་མཆོག་སོགས་དང་༌། བསྔོ་བའི་ལེའུ་བཟང་སྤྱོད་སོགས༴ བསྔོ་བ་སྨོན་ལམ་གྱིས་མཐའ་བརྒྱན་པར་བྱའོ།། །།