བདུད་ཀྱི་རྒྱུ་བརྟགས་ཏེ་སྤོང་ཚུལ་མན་ངག་བདུད་ལས་རྣམ་རྒྱལ།
བདུད་ཀྱི་རྒྱུ་བརྟགས་ཏེ་སྤོང་ཚུལ་གྱི་མན་ངག་བདུད་ལས་རྣམ་རྒྱལ་ཞེས་བྱ་བ་བཞུགས་སོ།། །།
བདུད་ཀྱི་ཚོགས་ལས་རྒྱལ་གྱུར་ཅིག །འགྲོ་བ་སྐྱོབས་པའི་སྐྱབས་གཅིག་པོ། །སྐྱབས་གསུམ་འདུ་འབྲལ་མེད་པ་ཡི། །རྒྱལ་བ་སྲས་དང་བཅས་ལ་འདུད། །བཅོམ་ལྡན་སྐྱེ་བོའི་དོན་ཆེད་དུ། །བཀའ་ལུང་མན་ངག་ལས་བྱུང་བའི། །བདུད་བརྟག་མན་ངག་མདོར་བསྡུས་བྲི། །སྤྱིར་རྟེན་གྱི་གང་ཟག་སངས་རྒྱས་ཀྱི་གོ་འཕང་སྒྲུབ་པའི་བརྩོན་འགྲུས་ཅན་ལ་ལམ་བརྟན་པ་མ་ཐོབ་བར་དུ་བསྒྲུབ་པ་ལ་བར་དུ་གཅོད་པའི་བདུད་ཀྱི་བྱེ་བྲག་བསམ་གྱིས་མི་ཁྱབ་པ་ཡོད་ཀྱང༌། མདོར་བསྡུ་ན། སྤྱིའི་བདུད་དང་བྱེ་བྲག་གི་བདུད་དོ། །དང་པོ་ལ་བཞི་ལས། བདག་འཛིན་གྱིས་བསྐྱེད་པའི་ཉོན་
མོངས་ཕྲ་རགས་དུ་མས་ལོག་ལམ་དུ་ཁྲིད་ཅིང་ཐར་ལམ་ལ་བར་དུ་གཅོད་པ་ནི་ཉོན་མོངས་པའི་བདུད་དོ། །ཟག་བཅས་ཀྱི་ཕུང་པོ་ལྔ་ལ་བདག་ཏུ་བཟུང་བས་འཁོར་བའི་སྡུག་བསྔལ་ལ་སྦྱོར་ཞིང་ཟག་མེད་ཀྱི་ལམ་གྱི་གེགས་བྱེད་པ་ནི་ཕུང་པོའི་བདུད་དོ། །ལམ་མཐར་ཕྱིན་ལོང་མེད་པར་དུས་དང་དུས་མ་ཡིན་པར་ཚེ་སྲོག་འཕྲོག་པ་འཆི་བདག་གི་བདུད་དོ། །ལྷའི་བདུད་འདོད་ཁམས་ཀྱི་བདག་པོ་དགའ་རབ་དབང་ཕྱུག་བཙུན་མོ་དང་འཁོར་དང་ཡང་འཁོར་བདུད་ཀྱི་རིགས་ལྷ་འཁོར་དཔག་མེད་ཡོད་པ་དེ་དག་གི་ལས་ནི་བདུད་སྡིག་ཅན་ཆུང་མ་དང་བཅས་པའི་སྨིན་མཚམས་ནས་དྲེགས་པར་བྱེད་པ་ལ་
སོགས་པ་མེ་ཏོག་གི་མདའ་ལྔ་འཕང་པས་གང་ལ་ཕོག་པ་དེའི་ཉོན་མོངས་ལྔ་ཤས་གང་ཆེ་བ་དེ་ཉིད་རབ་ཏུ་འབར་བར་གྱུར་ཏེ། དེའི་དབང་དུ་སོང་བས་བྱང་ཆུབ་ཀྱི་ལམ་ལས་ཉམས་པར་འགྱུར་རོ། །དེའི་འཁོར་འཇིག་རྟེན་སྐྱོང་བ་བཞི་ནི། འཐབ་པར་བྱེད་པའི་བདུད་ཀྱིས་ནི་ལམ་བསྒྲུབ་པ་རྣམས་གཞན་དང་འཐབ་རྩོད་འགྱེད་པའི་སྐྱོན་དུ་མ་འབྱུང་བར་བྱེད། གཡེང་བར་བྱེད་པའི་བདུད་ཀྱིས་གཡེང་བ་དང་འདུ་འཛི་ཉེ་བར་སྒྲུབ་ཅིང་ཐོས་བསམ་སྒོམ་པའི་དུས་ཀུན་ཏུ་གཉིད་དང་རྨུག་པ་འཕེལ་བར་བྱེད། ལྷག་པར་རབ་ཏུ་ཆགས་པར་བྱེད་པའི་བདུད་ཀྱིས་ནི་ཕལ་ཆེར་ཁྱིམ་པ་རྣམས་ལ་བར་དུ་གཅོད་དོ། །སྦྱིན་པ་བྱེད་དུས་ཟས་ནོར་འདི་དག་བདག་ཉིད་དང་བུ་སྨད་ལ་དགོས་སྙམ་དུ་སེམས་ཤིང་རང་གི་ཤ་གཅོད་པ་ཙམ་དུ་མི་ཕོད་པའི་འདུ་ཤེས་ཉེ་བར་སྐྱེ་བར་བྱེད་དོ། །འདུ་ཤེས་ལོག་པར་སྒྱུར་བའི་བདུད་ཀྱིས་ནི་ཕལ་ཆེར་རབ་བྱུང་རྣམས་ལ་འཚེ་སྟེ། རབ་ཏུ་བྱུང་བར་འདོད་པའི་ཚེ། འཁྲིག་པའི་བདེ་བ་དང༌། བཟའ་བཏུང་ཉེ་དུ་གླུ་གར་སོགས་དྲན་ཞིང་དེ་རྣམས་ལ་ཆགས་པ་དང༌། རང་གི་ཉེ་དུ་སོགས་ཀྱིས་འབྲིད་སྡིག་སྣ་ཚོགས་ཀྱིས་བཤོལ་དུ་འཇུག་པ་དང༌། རབ་ཏུ་བྱུང་ཟིན་པ་དག་ལ་་
ཡང༌། འཁྲིག་པའི་བདེ་བ་དང༌། སྔོན་གྱི་བརྩེ་རོགས་རྣམས་དང༌། ཚོང་དང་ཞིང་ལས་བཟོ་དང་སྨན་དཔྱད་རྣམས་ཡིད་ལ་དྲན་ཅིང༌། ཟང་ཟིང་ཉེ་བར་སྒྲུབ་འདོད་པ་དང༌། རྨི་ལམ་དུ་ཡང་བུད་མེད་དུ་སྤྲུལ་ནས་ཆགས་པ་སློང་ཞིང་ཁམས་ཉམས་པར་བྱེད་པ་སོགས་ཐབས་དུ་མས་ཚངས་སྤྱོད་འབེབས་པའམ་དྲི་མ་ཅན་དུ་བྱེད་དོ། །གཞན་ཡང་བདུད་བཞི་པོ་དེས་བསྐུལ་ནས་ཀླུ་དང་གནོད་སྦྱིན་མ་རུངས་པ་དག་གིས་ཆོས་དང་ལྡན་པ་རྣམས་ཀྱི་སྲོག་འཕྲོག་པ་དང་ལུས་ལ་ན་ཚ་གཏོང་བར་བྱེད། བདུད་རིགས་ཀྱི་ཡི་དྭགས་སུམ་ཅུ་རྩ་དྲུག་གིས། བསམ་གཏན་པ་རྣམས་ལ་གཟུགས་མི་སྡུག་པ་དང་སྒྲ་མི་སྙན་པ་དུ་མས་འཇིགས་པར་བྱེད་པ་དང༌། སངས་རྒྱས་ཀྱི་སྐུ་མཚན་དཔེས་སྤྲས་པ་སོགས་ཀྱང་བསྟན་ནས། ང་རྒྱལ་དང༌། རློམ་སེམས་བསྐྱེད་ནས་བར་དུ་གཅོད་དོ། །དེ་ལྟར་ཆོས་བྱེད་རྣམས་ལ་བདུད་ཀྱིས་སྡང་བའི་དོན་ཡང༌། དཔེར་ན་མི་ཞིག་རང་གི་རྗེ་དཔོན་ལ་ངོ་ལོག་པར་བྱས་ན། རྒྱལ་པོ་དེས་དེ་ལ་ཐབས་དུ་མས་རྒོལ་བ་ལྟར། སྐལ་ལྡན་གྱི་གང་ཟག་འཁོར་བར་བློ་ལོག་ཅིང༌། དཀོན་མཆོག་ལ་དད་པ་སྐྱེས་ནས་ཐོས་བསམ་སྒོམ་གསུམ་ལ་བརྩོན་པར་བྱེད་པ་ལ། བདུད་
ཀྱིས་འདི་ནི་བདག་ཅག་གི་སྤྱོད་ཡུལ་ལས་འདས་ནས་སངས་རྒྱས་བཅོམ་ལྡན་འདས་ཀྱི་སྤྱོད་ཡུལ་དུ་གྱུར་ཏེ་སེམས་ཅན་ཐམས་ཅད་ཀྱང་བདུད་ཀྱི་ཡུལ་ལས་འདས་པར་འགྱུར་རོ་སྙམ་དུ་ཡིད་མི་བདེ་ཞིང་ཅི་ནས་ཀྱང་བར་གཅོད་བྱེད་དོ། །ཡང་དཔེར་ན་དགྲའི་བུ་རྣམས་རིག་དྲུང་པ་ཞིག་མཐོང་ན་དོགས་པ་སྐྱེ་ཞིང་དེ་ཉིད་ཆེར་མ་སྨིན་པར་མེད་པའི་ཐབས་ལ་བརྩོན་པ་ལྟར་སྐྱེས་བུ་དད་བརྩོན་བློ་གྲོས་ལྷག་བསམ་ལྡན་པ་དག་ལ་བདུད་རིགས་རྣམས་ཀྱིས་སོ་སོ་སྐྱེ་བོའི་རྒྱུད་ལ་བྱང་ཆུབ་ཀྱི་སེམས་སྐྱེས་པར་གྱུར་པ་ན། བདུད་རིགས་རྣམས་ཀྱིས་འཚེ་བ་དུ་མ་འབྱུང་ངོ༌། །དེ་ལྟར་དམ་ཆོས་སྒྲུབ་པ་ལ་བདུད་ཀྱིས་ཀྱང་བར་ཆད་དུ་མ་ལ་བརྩོན་ཞིང༌། ཕྱོགས་བཅུའི་སངས་རྒྱས་རྣམས་ཀྱིས་ཀྱང་དེ་ཉིད་བར་ཆད་ལས་འགྲོལ་བར་བརྩོན་འགྲུས་མཛད་ཚུལ་མདོ་སྡུད་ལ་སོགས་སུ་གསལ་ལོ། །དེ་ཡང་ཆོས་སྒྲུབ་པའི་གང་ཟག་དེས་ཆོས་ལ་བརྩོན་འགྲུས་ཆེ་འབྲིང་ཆུང་གསུམ་ཇི་ལྟར་བྱས་པ་དེ་དང་མཐུན་པར་བདུད་ཀྱིས་ཀྱང་བར་དུ་གཅོད་པའི་བརྩོན་འགྲུས་ལ་གྲིམ་གློད་དེ་བཞིན་བྱེད་དེ། འཇམ་དཔལ་
རྣམ་པར་རོལ་པའི་མདོ་ལས། ལྷའི་བུས་སྨྲས་པ། འཇམ་དཔལ་བྱང་ཆུབ་སེམས་དཔའ་རྣམས་ཀྱིས་བདུད་རྩི་ལས་འབྱུང་བར་རིག་པར་བྱ། འཇམ་དཔལ་གྱིས་སྨྲས་པ། ལྷའི་བུ་བྱང་ཆུབ་སེམས་དཔའ་རྣམས་ཀྱི་བདུད་ཀྱི་ལས་ནི་བརྩོན་འགྲུས་ལས་འབྱུང་བར་རིག་པར་བྱའོ། །དེ་ཅིའི་ཕྱིར་ཞེ་ན། མི་བརྩོན་པ་ལ་ནི་བདུད་ཀྱིས་ཅི་ཞིག་བྱ་སྟེ། དེ་ཉིད་བདུད་ཡིན་པའི་ཕྱིར་རོ། །ཞེས་གསུངས་སོ། །དེས་ན་རྟེན་གྱི་གང་ཟག་སྔོན་བསོད་ནམས་བསགས་མ་བསགས་དང༌། བཤེས་གཉེན་དམ་པས་ཟིན་མ་ཟིན་དང༌། ཤེས་རབ་ཆེ་ཆུང༌། སྙིང་སྟོབས་ཆེ་ཆུང༌། གདམས་ངག་ཆེ་ཆུང༌། བློ་བརྟན་མི་བརྟན་སོགས་ཀྱི་བྱེ་བྲག་གིས་བདུད་ཀྱི་དབང་དུ་འགྲོ་བ་དང་མི་འགྲོ་བ་སྣ་ཚོགས་འབྱུང་གི །བདུད་ཀྱི་རྩོལ་བ་ནི་ངེས་པར་འབྱུང་བར་བརྟག་ཅིང་སྤང་པ་གཅེས་སོ། །སྤྱིའི་བདུད་བཞི་དེ་དག་སྤོང་ཐབས་ཀྱི་གཉེན་པོ་འོག་ནས་སྟོན། གཉིས་པ་བྱེ་བྲག་གི་བདུད་ལ་ཕྱི་ནང་གསང་བ་གསུམ། དང་པོ་ཕྱིའི་བདུད་ལ་དྲུག་སྟེ། དགྲ་གཉེན་ཆགས་སྡང་གི་བདུད་ནི། དང་པོ་ཆོས་སྒོར་འཇུག་པའི་ཚེ། དགྲ་སྡང་བས་གཙེས་པའམ། གཉེན་བྱམས་
པས་བརྩེ་གདུང་གིས་བཤོལ་བཏབས་ཏེ་ཆོས་གེགས་བྱེད་པའོ། །དེ་ལ་དད་པ་བརྟན་པོ་གལ་ཆེ། འབྱུང་པོ་ལོག་འདྲེན་གྱི་བདུད་ནི་ཆོས་ལམ་དུ་ཞུགས་ནས་བརྩོན་འགྲུས་བྱེད་པའི་ཚེ། བདུད་རིགས་ཀྱི་ཡི་དྭགས་བསེན་མོ་པེ་དཀར་ལ་སོགས་པ་མ་བཟོད་ནས་གནོད་པ་སྐྱེལ་དུ་འོང་སྟེ། ཆོས་པའི་ཤེས་པ་མི་བདེ་ཞིང་བློ་ཆོས་སུ་བཀོལ་མི་བཏུབ་པ་བྱེད། ལུས་ལ་ན་ཚ་གཏོང༌། སྲོག་འཕྲོག །འཚོ་བ་ལ་དགྲ་རྐུན་གཏོང༌། གལ་ཏེ་རང་གིས་མཚུགས་ན་གནས་དེའི་གཞི་བདག་ལ། མི་མ་ཡིན་ཆེན་པོ་གཞན་དང་དབྱེན་གཅུག་ནས་གནོད་པ་སྐྱེལ་དུ་འོང༌། དེ་ལ་བྱམས་སྙིང་རྗེ་བསྒོམ་གཞི་བདག་ལ་རྒྱུན་གཏོར་བཏང༌། ཡི་དམ་ཁྲོ་བོ་གང་རུང་གི་བསྒོམ་བཟླས་བྱ་བ་གལ་ཆེ། གཞན་ཡང་ཕྱི་རོལ་གྱི་འབྱུང་པོ་དེས་བསྒྲུབ་པ་པོ་དེའི་སློབ་དཔོན་དང༌། ཡོན་བདག་གྲོགས་པོའི་བར་དུ་དབྱེན་བྱེད་ཅིང༌། འདུ་ཤེས་ལོག་པར་བསྒྱུར་ཞིང་ཐུགས་རྗེ་དང་མོས་པ་མེད་པར་བྱེད། གཞན་ཡང་འཇིག་རྟེན་གྱི་གྲགས་པ་ངན་པ་དང༌། མ་ཉེས་པའི་ཁ་ཡོགས་ལ་སོགས་པས་ཡིད་མི་བདེ་བར་བྱེད་དོ། །དེ་ལ་ནི་དད་པ་བརྟན་པོས་རང་གི་སྒོ་གསུམ་ཟུངས་ཐུབ་པར་བྱ། བདུད་དུ་ཤེས་པས་
བཟོད་པ་གནད་དུ་ཆེ། དཔོན་གྲོགས་བདུད་ཁྱེར་གྱི་བདུད་ནི། སློབ་དཔོན་ངན་པ་བདུད་ཀྱིས་ཁྱེར་བ་དང་འཕྲད་པ་དང༌། གྲོགས་ངན་པ་དང་འགྲོགས་པའི་རྐྱེན་གྱིས་བསྒྲུབ་པའི་བཀའ་ཐུབ་ཉམས་པར་བྱེད་ཅིང་ཆོས་མིན་ལ་སྦྱོར་བས། དེ་འདྲའི་དཔོན་གྲོགས་ཐབས་ཀྱིས་སྤངས་ཏེ་དམ་པ་བསྟེན་པར་བྱའོ། །བསོད་ནམས་འདུ་འཛིའི་བདུད་ནི། སྒྲུབ་པ་པོ་ལ་འཇིག་རྟེན་གྱི་མི་ནོར་ལ་སོགས་པའི་བསོད་ནམས་བྱུང་བས་དེའི་འདུ་འཛིའི་སེམས་རྣམ་པར་གཡེང་ཞིང་སྒྲུབ་པའི་བརྩོན་འགྲུས་ཉམས་པར་འགྱུར་བས། བརྟན་པ་མ་ཐོབ་བར་དུ་འདུ་འཛིའི་གནས་ཐམས་ཅད་རྒྱང་སྲིང་བར་བྱའོ། །ཟས་ནོར་འཛིན་ཆགས་ཀྱི་བདུད་ནི། ཆོས་བྱེད་རྣམས་ཀྱི་བསམ་པ་ལ་སྒྲུབ་པ་བྱེད་པ་ལ་འཚོ་བའི་ཡོ་བྱད་ངན་པས་མི་ཆོག་སྟེ། ཕུན་སུམ་ཚོགས་པ་གཅིག་དགོས་འདུག་སྙམ་ནས་ཟས་ནོར་འཚོལ་ཐབས་དང་སྐྱེད་འཕེལ་སོགས་བྱས་པས་འདོད་པ་འཕེལ་ཏེ་མི་ཚེ་གྲབས་སུ་ཟད་ནས་ཆོས་མེད་དུ་འཆི་བ་འབྱུང་བས་འཚོ་བའི་ཡོ་བྱད་ངན་ངོན་ཙམ་གྱིས་ཆོག་ཤེས་བྱས་ཏེ་བསྒྲུབ་པ་བྱའོ། །ཤེས་གཉེན་ཡོན་ཏན་གྱི་བདུད་ནི། སྨན་སྔགས། རྟེན་འབྲེལ། བྱིན་རླབས།
ལག་བཟོ་སོགས་ཡོན་ཏན་གྱིས་རང་དབང་མེད་པར་ཁྲིད་ནས་འདུ་འཛི་སྐྱེད་ཅིང་ཐོས་བསམ་སྒོམ་གསུམ་གྱི་བར་ཆད་བྱེད་པས། སེམས་ལ་བརྟན་པ་མ་ཐོབ་བར་དུ་ཡོན་ཏན་ནུས་མཐུ་ཐམས་ཅད་རུས་སྦལ་གྱི་ཡན་ལག་བཞིན་དུ་སྦ་བར་བྱའོ། །དེ་རྣམས་ཀྱི་ཕྱི་རོལ་རྐྱེན་གྱིས་ལམ་གྱི་བར་ཆད་དུ་འོང་བས་བརྟགས་ཏེ་སྤང་བར་བྱའོ། །ནང་གི་བདུད་ལའང་དྲུག་སྟེ། ང་བདག་རྩ་བའི་བདུད་ནི་མ་རིག་པ་སྟེ། ང་མེད་ངར་འཛིན། བདག་མེད་བདག་འཛིན་གྱི་བདུད་འདི་ལས་འཁོར་བའི་སྡུག་བསྔལ་ཐམས་ཅད་འབྱུང་བས། བདག་མེད་ཀྱི་དོན་ལ་ཐོས་བསམ་སྒོམ་གསུམ་འབད། ཉོན་མོངས་དུག་རྒྱས་ཀྱི་བདུད་ནི། དུག་ལྔ་གཉེན་པོས་མ་ཟིན་པར་ཁ་ཡན་དུ་ཤོར་བས་དགེ་རྩ་ཐམས་ཅད་འཇོམས་ཤིང༌། མི་དགེ་བ་མང་པོ་འཕེལ་བས་འཁོར་བ་དང་ངན་སོང་ལ་སྦྱོར་བས་ཉོན་མོངས་ཐམས་ཅད་གཉེན་པོས་ཟིན་པར་བྱའོ། །རྣམ་རྟོག་ཁུ་འཁྲིག་གི་བདུད་ནི། །རང་ལ་གཅེས་པར་འཛིན་པ་སྟེ། །དེའི་རྐྱེན་གྱིས་རེ་དོགས་དགག་སྒྲུབ་སྣ་ཚོགས་སློང་ཞིང་ཕྱི་རོལ་གྱི་བདུད་གཡོ་བས། ལུས་སྲོག་གཅེས་འཛིན་འདོར་བར་བྱའོ། །བཏང་སྙོམས་ལེ་ལོའི་བདུད་ནི། དྲན་ཤེས་ཉམས་ནས་རྣམ་གཡེང་འདུ་འཛིའི་གཏམ་ལབ་ལ་སོགས་
འཇིག་རྟེན་གྱི་བྱ་བ་ངན་པ་རྩད་མཆོད་པ་དང༌། གལ་ཆུང་སྒྱིད་ལུགས་སྙོམས་ལས་གཉིད་རྨུག་སོགས་ཀྱིས་དུས་དོན་མེད་དུ་འདས་ཤིང་དལ་འབྱོར་ཆུད་ཟོས་སུ་འགྱུར་བས་རྟག་ཏུ་དྲན་ཤེས་བརྟེན་ནས་བརྩོན་པ་མི་འདོར་བ་གནད་ཆེའོ། །ཐེ་ཚོམ་ཡིད་གཉིས་ཀྱི་བདུད་ནི། ལྟ་སྤྱོད་ལ་ངེས་པ་མ་རྙེད་པ་སྟེ། སེམས་སུམ་མདོར་ལུས་ནས་གང་ཡང་བྱེད་ངོ་མི་ཤེས་པ་དང་ཤེས་པ་ཕར་འཚུབ་ཚུར་འཚུབ་ཏུ་ཤོར་ནས་ཡི་དམ་གྱི་སྤང་ལེན་དུ་མ་བྱས་པས་དངོས་གྲུབ་མི་ཐོབ་པས་གང་བྱེད་བླ་མ་ལ་དྲི་བ་དང༌། བླ་མ་དམ་པའི་རྣམ་ཐར་ལ་བསླབ་བོ། །གཉིས་འཛིན་འཁྲུལ་པའི་བདུད་ནི། དངོས་པོར་འཛིན་པ་སྟེ། ཕྱི་ནང་གི་ཆོས་ཐམས་ཅད་ཡུལ་སེམས་ཐ་དད་རང་རྒྱུད་དུ་ཤོར། བདེན་གཉིས་ཐ་དད་དུ་ཤོར་ནས་ལམ་ཐམས་ཅད་མཁྱེན་པའི་རྒྱུར་མི་འགྲོ་བས། གཉིས་མེད་དོན་ལ་ལྟ་སྒོམ་བྱ་བ་གནད་དོ། །དེ་དག་ནི་ནང་རང་གི་ལས་ངན་གྱིས་སེམས་རྒྱུད་འཁྲུགས་པས་ལམ་གྱི་གེགས་བྱེད་པ་སྟེ་བརྟགས་ཤིང་སྤང་ངོ༌། །གསང་བའི་བདུད་ལའང་དྲུག་སྟེ། ཞི་འདོད་ཕྱོགས་རིས་ཀྱི་བདུད་ནི། རང་གི་ལྟ་ཕུགས་དང་གྲུབ་མཐའ་ལ་ཞེན་ནས་དེར་འདོད་པས་གྲུབ་མཐའ་གཞན་དང་ཕྱོགས་རིས་སུ་ཆད་པའོ། །འཛིན་པ་
ང་རྒྱལ་གྱི་བདུད་ནི། ཤེས་བྱའི་ལྟ་བ་སྟོང་པ་ཉིད་ཁོ་ནར་འཛིན་ཅིང་ཟབ་མོའི་དོན་ངས་རྟོགས་སོ་སྙམ་ནས་ང་རྒྱལ་དང་རློམ་སེམས་སུ་བྱེད་པས་ཆོས་དང་གང་ཟག་གཞན་ཁྱད་དུ་གསོད་པ་དང་བརྙས་པར་བྱེད་པའོ། །ཕྱོགས་མེད་ཕྱལ་བའི་བདུད་ནི། ཁ་ལྟ་ཕྱོགས་མེད་དུ་སྨྲ་ཞིང་དོན་ལ་ཉམས་མྱོང་མེད་པས་ཁ་སྟོང་ཕྱལ་པར་སོང་བས་སྤྱོད་པ་འཇིག་རྟེན་པ་དང་ཁྱད་པར་མེད་པའོ། །གྲུབ་རྟགས་རེ་རློམས་ཀྱི་བདུད་ནི། ཐུན་མོང་གི་གྲུབ་རྟགས་རེ་ཞིང་འདོད་པས་ཡི་དམ་ལྷའི་ཞལ་མ་མཐོང་ན་མཐོང་བརྫུན། མངོན་ཤེས་མེད་པར་ཡོད་བརྫུན། ཉམས་རྟོགས་མེད་པ་ལ་ཡོད་བརྫུན་འདེབས་པ་དང༌། གྲུབ་རྟགས་ཕྲ་མོ་ལ་མཚན་མར་འཛིན་ཅིང་དེས་རློམ་སེམས་སྐྱེ་བའོ། །དད་པ་བློས་བརྡུམས་ཀྱི་བདུད་ནི། ནང་གི་ཤེས་རྒྱུད་མ་གྲོལ་བར་སྒོམ་ཚུགས་འཛིན་སྔ་བ་གཅིག་ལ་དགའ་ཞིང་ཐོས་པ་ལ་མི་དགའ་བའོ། །སྙིང་རྗེ་ལམ་ནོར་གྱི་བདུད་ནི། རང་ལ་ནུས་པ་མེད་བཞིན་དུ་ལས་དང་པོ་པས་སྙིང་རྗེའི་འགྲོ་དོན་བྱེད་ཅིང་མཉམ་གཞག་ལ་དོན་དུ་མི་བྱེད་པའོ། །ཡར་འགྲོ་དོན་སྔོན་ལ་བྱས་ནས་ཉམས་ལེན་རྗེས་ནས་བྱེད་པ་དེའོ། །གཞན་ཡང་རྣལ་འབྱོར་སྒྲུབ་པ་པོ་ལ་གསང་བའི་བདུད་དྲུག་འབྱུང་སྟེ། སྦྱིན་པ་གཡེང་བའི་བདུད་ནི། བསམ་གཏན་སྒོམ་པའི་ཚེ།
གཞན་ལ་ཆོས་བཤད་དང༌། ཟང་ཟིང་འགྱེད་པའི་བྱ་བས་སེམས་གཡེང་ཤིང་བསམ་གཏན་གྱི་བར་ཆད་བྱེད་པའོ། །ཚུལ་ཁྲིམས་དཀའ་སྤྱད་ཀྱི་བདུད་ནི། དབེན་པར་བསམ་གཏན་སྐྱོང་བའི་ཚེ། ཁ་ཟས་དང་སྤྱོད་ལམ་ཧ་ཅང་དམ་ཆེན་ཏིང་ངེ་འཛིན་མི་སྐྱེ་ལ། ན་ཚ་བྱུང་བའི་ཚེ་གནང་བཀག་གི་དུས་ཚོད་མ་ཤེས་ཤིང་འབྱུང་བ་སྙོམ་པའི་ཁ་ཟས་སྤངས་པས་ལུས་སྲོག་གི་བར་ཆད་དུ་འགྱུར་བའོ། །བཟོད་པ་སྲན་ཚུགས་ཀྱི་བདུད་ནི། ལུས་ལ་འགལ་སྦྱོར་ཆེ་བས་ནད་ཞུགས་པ། ན་ཚ་བྱུང་བའི་ཚེ་སྨན་དཔྱད་སོགས་གཉེན་པོ་མ་བརྟེན་པར་ཚུགས་པས་ལུས་སྲོག་གི་བར་ཆད་བྱེད་པའོ། །བརྩོན་འགྲུས་ཐང་ཆད་ཀྱི་བདུད་ནི། སྦྱོར་བ་ཧ་ཅང་གྲིམ་ཆེ་བས་ཁམས་ཀྱིས་མ་ཐུབ་པ་དང་བློ་སུན་ནས་ཕྱིར་ལོག་པར་འགྱུར་བའོ། །བསམ་གཏན་མངོན་ཞེན་གྱི་བདུད་ནི། སེམས་གནས་པ་ཙམ་ལ་དོན་དམ་དུ་བཟུང་ནས་བློ་གྲོལ་བར་བྱེད་པའི་རྒྱུ་ཟབ་མོའི་ཐོས་བསམ་ལ་མི་འབད་པའོ། །ཤེས་རབ་དུག་རྒྱས་ཀྱི་བདུད་ནི། ཐོས་བསམ་སྒོམ་གསུམ་གྱི་ཤེས་རབ་གསུམ་གྱིས་ང་རྒྱལ་སོགས་པའི་ཉོན་མོངས་པ་འཕེལ་བའོ། །དེའི་གཉེན་པོ་བླ་མ་མཁས་པ་བསྟེན་ཅིང་ཐོས་བསམ་
ལ་འབད་དོ། །དེ་རྣམས་ནི་སྨན་མ་ཞུ་བ་ནད་དུ་སོང་བ་ལྟར། ལམ་གྱི་གེགས་བྱེད་པས་གསང་བའི་བདུད་དེ་བརྟགས་ཤིང་སྤངས་སོ། །མདོར་ན་རྣལ་འབྱོར་པའི་ཤེས་རྒྱུད་ལ་གནོད་ཅིང་གྲོལ་དུ་མི་བཅུག་པ་དེ་ཐམས་ཅད་བདུད་དུ་ཤེས་པར་བྱས་ལ་སྤང་བར་བྱའོ། །ད་ནི་བདུད་དེ་དག་འཇུག་པའི་རྒྱུ་བསྟན་པ་ནི། ལམ་ལ་བརྩོན་འགྲུས་མ་རྩོམས་ན་བདུད་འཇུག་པའི་རྒྱུ། ཤེས་རབ་ཆུང་ན་བདུད་དངོས་ཡིན་གསུང༌། ཉོན་མོངས་ཆེ་ན་བདུད་འཇུག་པའི་རྒྱུ། རྣམ་རྟོག་ཆེ་ན་བདུད་ཀྱི་གཡབ་མོ། །བློ་སྣ་མང་ན་བདུད་འཇུག་པའི༴ བླ་མ་དམ་པས་མ་ཟིན་ན༴ སྐྱེལ་མ་མེད་དང་འདྲ། གདམས་ངག་མི་ཟབ་ན༴ གྲོགས་ངན་པ་དང་འགྲོགས་ན༴ འཛིན་ཆགས་ཆེ་ན༴ འཁྲིགས་པའི་འདོད་ཆགས་ཤས་ཆེ་བ་བདུད་ཀྱིས་ཟིན་པ། ཤ་ཆང་གི་སྲེད་པ་ཆེ་ན༴ བློ་ཡང་ཞིང་རྩོལ་ཆུང་ན༴ བདུད་ཀྱིས་འཁྱེར། འདུ་ཤེས་ཆུང་ཞིང་བཅོས་སུ་མི་བཏུབ་ན༴ ཁེངས་ཤིང་ང་རྒྱལ་ཆེ་ན༴ ལས་དང་པོ་པ་གཅིག་ཏུ་དབེན་པ་ལ་དགའ་ན༴ ཚོང་དུས་གྲོང་ཁྱེར་ཆེན་པོ་དང་ཉེ་བར་གནས་ན༴ སྡེ་པ་དང་གང་ཟག་མི་མཐུན་པའི་སར་གནས་ན༴ ཉམས་འོག་ཏུ་མི་ཚུད་པའི་དམ་བཅའ་མང་ན༴ མན་ངག་མེད་པའི་སྡུག་སྲན་གྱི་བྱང་ཆུབ་སྒྲུབ་ན༴ བདུད་ཀྱིས་འཁྱེར། བློ་མི་བརྟན་ཞིང་དམ་བཅའ་ལ་ཆེད་དུ་མི་གཉེར་ན་
རྨི་ལམ་ལ་ཆེད་དུ་འཛིན་ན། བདུད་ཀྱིས་བསླུས་པ། རྟགས་དང་མཚན་མ་ལ་དགའ་ན། རྐྱེན་འགའ་ཞིག་གིས་ཤེས་པ་སྒྱིད་ལུགས་ཤིང་འཕང་ཤེ་བ། རང་གཞན་གྱི་རྐྱེན་གྱིས་རྣལ་འབྱོར་པ་ཡིད་མི་བདེ་ཞིང་མྱ་ངན་གྱིས་གཟིར་ན་བདུད་འཇུག་པའི་རྒྱུ་ཡིན་པས་དེ་རྣམས་བརྟགས་ཤིང་སྤང་བར་བྱའོ། །བདུད་ཀྱི་ལས་དང་སྤྱོད་ཡུལ་ནི། མཚན་ཉིད་དང་མི་ལྡན་པའི་སློབ་མ་བརྟེན་ན་བདུད་ཀྱི་ལས། སྐལ་པ་དང་མི་ལྡན་པའི་སློབ་མ་བརྟེན་ན་བདུད་ཀྱི་ལས། སློབ་དཔོན་དང་སློབ་མ་ལྟ་སྤྱོད་མི་མཐུན་པར་འགྲོགས་པ༴ ལམ་དུ་མི་འགྲོ་བའི་ཐོས་བསམ་ལ་དཀའ་བ་སྤྱོད་པ༴༌།གནད་དུ་མི་འགྲོ་བའི་བརྩོན་འགྲུས་དྲག་པོ༴ ཁེ་གྲགས་དང་འགྲོགས་པ༴ ང་རྒྱལ་གྱིས་འཁོར་སྡུད་ཅིང་ཆོས་འཆད་པ། རང་ལ་ཡོན་ཏན་མེད་ཀྱང་གཞན་གྱི་སློབ་དཔོན་བྱེད་པ། སེམས་ལ་དད་གུས་མེད་པས་དཀོན་མཆོག་གསུམ་དང་འགྲོགས་པ། ཤེས་ལོང་མེད་པར་འཆད་ལ་དགའ་བ༴ སྒྲུབ་ལོང་མེད་པར་དངོས་གྲུབ་འདོད་པ༴ འཚོ་བའི་ཆེད་དུ་སྨན་སྔགས་རྟེན་འབྲེལ་ལ་སོགས་བྱེད་པ། ཆོས་པ་ཚོང་དང་ལོག་འཚོས་འཚོ་བ། ལོག་འཚོ་ལྔས་འཚོ་བ༴ སློབ་འཁོར་ཟང་ཟིང་ལ་དགའ་ཞིང་རྒྱུ་ལེན་པ༴ སེམས་ལ་གནོད་པའི་ཡུལ་ངན་མི་སྤོང་ཞིང་བརྟེན་པ་
འཇིག་རྟེན་གྱི་རོལ་རྩེད་ལ་དགའ་ཞིང་འདུན་པ༴ འདུ་འཛི་དང་གཡེང་བའི་གསེབ་ཏུ་འཇུག་པ༴ ཁེང་དྲེགས་དང་ང་རྒྱལ་སྐྱེ་བའི་རྒྱུ་བརྟེན་པ༴ རྟ་དང་གོས་བཟང་སོགས༴ བག་མེད་ཤེས་བཞིན་མ་ཡིན་པར་སྤྱོད་པ༴ བུད་མེད་དང་ཤ་ཆང་གཉིད་ལ་བག་མེད་སྤྱོད་པ༴ གང་ཡང་འཇིག་རྟེན་ཆོས་བརྒྱད་ཀྱིས་ཀུན་ནས་བསླང་བ༴ བྱ་བྱེད་མང་པོ། །འགྲོ་འདུག་མང་པོ། །སྨྲ་བ་མང་པོ། །བློ་སྣ་མང་པོ་རྣམས་བདུད་ཀྱི་ལས་མདོར་ན་ཆོས་དང་མི་མཐུན་པའི་སྤྱོད་པ་ཐམས་ཅད་བདུད་ཀྱི་ལས་དང་བདུད་ཀྱི་སྤྱོད་ཡུལ་དུ་ཤེས་པར་བྱས་ལ་ཡོངས་སུ་སྤང་བར་བྱའོ། །བདུད་ཀྱིས་བྱིན་གྱིས་རླབས་པའི་རྟགས་ནི་གཉིས་ཏེ། དང་པོ་ཐུན་མོང་གི་རྟགས་ནི། བདག་རྒྱུད་ཀྱི་ཉོན་མོངས་པ་དུག་ལྔ་སྔར་བས་ཆེར་འབར་ཞིང༌། དེའི་ཀུན་སློང་གི་རྐྱེན་མང་ན་བདུད་ཀྱིས་བྱིན་གྱིས་རླབས་པའི་རྟགས་ཡིན། རྐྱེན་མེད་པར་ཁམས་ཀྱི་ནུས་པ་ཟད་ཅིང་ཏིང་ངེ་འཛིན་ཤོར་ན༴ ན་ཚ་སྡུག་བསྔལ་ལ་སོགས་པ་གློ་བུར་གྱི་རྐྱེན་མང་ན༴ དྲན་པ་ཉམས་ཤིང་གཏི་མུག་ཆེར་འཐིབས་ན༴ དོན་མེད་དུ་ཡིད་མི་བདེ་ཞིང་སེམས་མི་དགའ་ན༴ ཤི་བར་འདོད་ནས་ལྕེབ་པའི་སྦྱོར་བ་སོགས་བྱེད་ན༴
དུས་ལ་མ་བབས་པར་རང་ལུས་ཀྱི་ཤ་ཁྲག་དང་ཡན་ལག་སོགས་གཞན་ལ་གཏོང་ན༴ རང་གི་ལུས་ཀྱིས་སྐྱོ་ཞིང་ལུས་ལ་བརྙས་པར་བྱེད་པ་དང་ལུས་ཀྱི་ཤ་དང་ཡན་ལག་ལ་སོགས་པ་དོན་མེད་དུ་གཅོད་ཅིང་ལུས་ལ་བརྔན་སྣ་ཚོགས་བྱེད་ན༴ བྱང་ཆུབ་ཀྱི་སེམས་ཉམས་ཤིང་ཆོས་ཕྱིར་སྡུག་བསྔལ་ཅི་ཡང་མི་བཟོད་ན༴ ལོག་ལྟ་ཆེར་སྐྱེ་ཞིང་ལོག་སྤྱོད་བྱེད་སྙིང་འདོད་ན༴ ཆོས་ལ་ཡིད་མི་ཆེས་ཤིང་ཐེ་ཚོམ་ཟ་ན༴ འཇིག་རྟེན་གྱི་ཕུན་སུམ་ཚོགས་པ་ལ་ཡིད་སྨོན་སྐྱེ་ན༴ ཕྱིའི་ལོངས་སྤྱོད་དང་ནང་གི་སེམས་ཅན་ལ་འདོད་ཆགས་ཆེར་འབར་ན༴ ལུས་ངག་གི་སྤྱོད་ལམ་མཐོ་དམན་སྣ་ཚོགས་པ་དང་ཁྲེལ་དང་ངོ་ཚ་མེད་ཅིང་གཅེར་བུར་བྱེད་ན་བདུད་?ྱི༴ ངང་ཐུང་ཞིང་ཚིག་པ་ཕྱོགས་མེད་དུ་ཟ་ན༴ ལྟོ་གོས་ཀྱི་འདུན་པ་ཆེར་སོང་བ་དང་འཁྲིག་པའི་འདོད་ཆགས་ཆེར་འབར་བ་དང་ཐ་ན་རྨི་ལམ་དུ་ཡང་དེ་དག་གི་འདུན་པ་དང་མི་འབྲལ་ན༴ ཚོང་དང་ཞིང་ལས་དང་ལོག་འཚོ་ལྔའི་སྦྱོར་བ་བྱེད་པ་ལ་སྤྲོ་ཞིང་དགེ་སྦྱོར་ལ་བློ་མི་འཇུག་ཅིང་ལེ་ལོ་དང་སྙོམ་ལས་ལ་དགའ་ན༴ དགེ་སྦྱོར་ལ་ངང་གིས་བཅུག་ཀྱང་བློ་བགོལ་དུ་མི་བཏུབ་པ་དང་དགེ་སྦྱོར་ལ་ནམ་ཞུགས་པ་དེའི་ཚེ་ཕྱི་ནང་གི་
འགལ་རྐྱེན་མང་ན༴ ཐོས་བསམ་སྒོམ་གསུམ་གྱིས་བློ་སུན་པ་དང་འགལ་རྐྱེན་བག་ཙམ་གྱིས་སྒྱིད་ལུག་ན༴ རྨི་ལམ་བཟང་ཐལ་ངན་ཐལ་མཐོ་དམན་སྣ་ཚོགས་བྱུང་ན༴ སྡོད་སྙིང་མི་འདོད་འགྲོ་སྙིང་འདོད་པ་དང་དུག་ལྔ་པོ་རེ་རེ་ཞི་དུས་རེ་རེ་སླེབ་པས་བར་མེད་དུ་སྐྱེ་བ་དང༌། ཕྲག་དོག་དང་ང་རྒྱལ་ཆེ་བ་དང་སེར་སྣ་དང་འདོད་ཆགས་ལྷག་པར་ཆེན༴ བདག་ལ་བསྟོད་ཅིང་གཞན་ལ་སྨོད་ན༴ དཀོན་མཆོག་གསུམ་ལ་བཟང་ངན་དང་ཕྱོགས་རིས་སུ་བཅད་ནས་སྐུར་པ་འདེབས་པ་དང༌། བླ་མ་དམ་པ་རྣམས་ལ་དད་གུས་ཤོར་ཅིང་སྐྱོན་བརྗོད་པ་དང་གང་ཟག་དམ་པ་རྣམས་ལ་སྐུར་པ་འདེབས་པ་དང༌། ཁྱད་པར་དུ་དུར་སྨིག་ཅན་རྣམས་ལ་སྡང་ན༴ འདུ་འཛི་གཡེང་བ་རྩེ་འཇོ་རོལ་མོ་སོགས་ལ་དགའ་བ་དང་བསམ་སྒོམ་མི་འདོད་ཅིང་ཆོས་འཆད་འདོད་པ་དང༌། སྔགས་འདེབས་པ་དང༌། གྲོང་ཆོག་བྱེད་འདོད་ན་ཆོས་ཉན་པ་དང་ཁ་ཐོན་འཛིན་ཀློག་བྱེད་དུས་རྟག་པར་གཉིད་འདོད་ན༴ མཚན་མོ་འཇིགས་ཤིང་སྔངས་པ་དང༌། སྙིང་ཆུ་ཞིང་སྤྲུག་པ་དང༌། ལུས་ཀྱི་གཟི་མདངས་ཉམས་ན༴ མ་ཉེས་པའི་ཁ་ཡོགས་དང་གྲགས་པ་ངན་པ་དོན་མེད་དུ་མི་རྣམས་ཀྱིས་སྡང་བ། གྲོགས་པོ་དང་
ཡོན་བདག་སློབ་འཁོར་སྙིང་དང་འདྲ་བ་རྣམས་དང་དོན་མེད་དུ་འབྲལ་བ་ལ་སོགས་པ་ནི་བདུད་ཀྱིས་བྱིན་གྱིས་བརླབས་པའི་རྟགས་སོ། །ཐུན་མོང་མ་ཡིན་པའི་རྟགས་ནི། རྣལ་འབྱོར་པས་ལམ་ལ་བརྩོན་འགྲུས་ཆེར་བརྩམས་པའི་ཚེ་བདུད་ཀྱིས་འདི་ལྟར་བྱིན་གྱིས་རློབས་ཏེ། ཡི་དམ་ལྷའི་ཞལ་མངོན་སུམ་དུ་མཐོང་བ་དང༌། སངས་རྒྱས་དང་བྱང་ཆུབ་སེམས་དཔའི་ཞལ་དངོས་སུ་མཐོང་བ་དང༌། མངོན་སུམ་མམ་སྒྲས་བདག་ལ་སངས་རྒྱས་པར་ལུང་སྟོན་པ་དང༌། སྐྱེ་བ་ཁྱད་པར་ཅན་དུ་ལུང་སྟོན་པ་དང༌། ཆོས་ཤོད་ཅིག་ཅེས་ལུང་སྟོན་པ་དང༌། རྨི་ལམ་རྣོན་པོ་དང་མངོན་ཤེས་ཕྲ་མོ་འབྱུང་བ་དང༌། སེམས་ཅན་ལ་སྙིང་རྗེ་མི་བཟོད་པ་འབྱུང་ཞིང་མཆི་མ་འབྱུང་བ་དང༌། ཕྱི་ནང་གི་ཆོས་ཐམས་ཅད་ལ་ཤེས་རབ་ཐོགས་པ་མེད་པ་འབྱུང་བ་དང༌། ནམ་མཁའ་ལ་གསེར་གྱི་མེ་ཏོག་ཡི་གེ་བཀོད་པ་ལ་སོགས་པ་མཐོང་ཞིང་ཤེས་པ། སྐྱེ་བོ་མང་པོ་འདུ་ཞིང་ཟང་ཟིང་གི་རྙེད་པ་ཆར་ལྟར་འབབ་པ་དང༌། ཀླུའི་བུ་མོས་མེ་ཏོག་གི་ཕྲེང་བ་དང་རོལ་མོས་བདག་ལ་མཆོད་པ་བྱེད་པ་དང༌། རེས་འགའ་ཤ་ཟ་དང་སྲིན་པོ་དང་གནོད་སྦྱིན་ལ་སོགས་པ་འཇིགས་པའི་ཆ་བྱད་ཅན་ལག་ན་མཚོན་ཆ་སྣ་ཚོགས་
ཐོགས་པས་བདག་ལ་བསྡིག་ཤིང་བརྡེག་པ་དང༌། རེས་འགའ་བདག་གི་ལས་བྱེད་པར་ཁས་ལེན་པ་དང༌། རེས་འགའ་བདག་གི་ཕ་མའམ་སློབ་དཔོན་ལ་སོགས་པའི་ཆ་བྱད་དུ་བྱས་ཏེ་བྱང་ཆུབ་ཀྱི་སེམས་བསྒྱུར་ཞིང་ཐེ་ཚོམ་སྐྱེད་པར་བྱེད་པ་དང༌། རང་ལུས་ལས་འོད་འབྱུང་བ་དང༌། མཚན་མོ་ཕྱི་རོལ་ཐམས་ཅད་འོད་ཀྱིས་ཁེངས་པ་དང༌། རང་ལུས་རྩིག་པ་སོགས་ལ་ཐོགས་མེད་དུ་འགྲོ་བ་དང༌། ཆུ་ལ་མི་བྱིང་བ། མེས་མི་འཚིག་པ། ནམ་མཁར་འགྲོ་བ། ཕྱོགས་བཅུའི་སངས་རྒྱས་ཐམས་ཅད་ཀྱི་སྐུ་སྟོན་ཅིང་ཕྱག་གཡས་པ་གསེར་གྱི་ཁ་དོག་ཅན་བརྐྱང་ནས་བདག་གི་སྤྱི་བོར་འཇོག་པ་དང༌། ཕྱོགས་བཅུའི་སངས་རྒྱས་བྱང་སེམས་རྣམས་ཀྱིས་རང་རང་གི་ཞིང་ནས་ཆོས་སྟོན་པ་མཐོང་བ་དང༌། སྤྲུལ་པ་འགྱེད་པ་མཐོང་བ་དང༌། ལམ་རྒྱུད་དྲུག་གི་སེམས་ཅན་ཐམས་ཅད་ཀྱི་སྣང་ཚུལ་མཐོང་བ་དང༌། སེམས་ཅན་ཐམས་ཅད་ཀྱི་སྐད་ཐམས་ཅད་ཤེས་ཤིང༌། རང་སྐད་ཀྱིས་ཆོས་སྟོན་ནུས་པ་དང༌། རང་གི་ཚེ་སྔ་ཕྱི་དྲན་ཅིང་གསལ་བ་དང༌། ད་ནི་བདག་གིས་གཞན་དོན་ཐོགས་པ་མེད་པར་ནུས་སོ་སྙམ་པ་དང༌། ཕྱོགས་གར་སོང་དུ་སྐྱེ་བོ་ཐམས་ཅད་དབང་དུ་འདུ་བ་དང༌། ནད་པའི་དྲུང་
དུ་ཕྱིན་པའམ། སྔགས་བཟླས་པ་ཙམ་མམ། བདེན་པ་བདར་བ་ཙམ་གྱིས་ནད་གདོན་ཞི་བ་དང༌། ཐུན་མོང་གི་འདོད་པ་ཐམས་ཅད་ཡིད་ལ་བསམ་པ་ཙམ་གྱིས་འགྲུབ་ཅིང༌། སྨོན་ལམ་ཅི་བཏབ་འགྲུབ་པ་ལ་སོགས་པར་བྱིན་གྱིས་རློབས་ཅིང་བདག་རྒྱུད་ལ་ང་རྒྱལ་དང་རློམ་སེམས་བསྐྱེད་ནས་བར་དུ་གཅོད་ལ། རེས་འགའ་ཐེ་ཚོམ་དང་ཡིད་གཉིས་བསྐྱེད་ནས་བར་ཆད་བྱེད་དོ། །དེ་སྐད་དུ་མདོ་ལས། བདུད་ཀྱིས་བྱིན་གྱིས་རློབ་པ་ནི། ལ་ལ་ལ་མངོན་སུམ། ལ་ལ་ལ་བརྒྱུད་པས། ཁ་ཅིག་ལ་འཇམ་པོས། ཁ་ཅིག་ལ་དྲག་པོས་བྱིན་གྱིས་བརློབ་ཅིང་ཅི་ནས་ཀྱང་རྣལ་འབྱོར་པ་དང་ཆོས་པའི་སེམས་བསྒྱུར་ཞིང་བྱང་ཆུབ་ཀྱི་སེམས་ཉམས་པར་བྱེད་དོ། །ཞེས་སོ། །དེ་ཡང་སྔར་བཤད་པའི་ཐུན་མོང་གི་རྟགས་དེ་དག་ཤེས་སླ་ཡང༌། ཐུན་མོང་མ་ཡིན་པའི་རྟགས་འདི་ནི་ལམ་རྟགས་དང་དབྱེ་དཀའ་བས་འདི་ལྟར་ཤེས་པར་བྱ་སྟེ། རང་རྒྱུད་ཀྱི་ལོག་རྟོག་ཀུན་ནས་གྲོལ་ཞིང༌། མཉམ་ཉིད་ཀྱི་རྟོགས་པ་རྒྱུན་ཇེ་རིང་ལ་སོང༌། ཉོན་མོངས་པ་མཐའ་དག་ཇེ་ཆུང་ཇེ་ཞིར་སོང༌། འཇིག་རྟེན་ཆོས་བརྒྱད་མགོ་སྙོམས་པས་རྟག་ཏུ་ཤེས་པ་ཉམས་དགའ། དབང་པོ་མདངས་དང་ལྡན། ནང་གི་རྒྱུད་དངས་ཤིང་ཏིང་འཛིན་བཟང་པོ་དུས་སུ་འབྱུང་ལ། དེ་ལ་ང་རྒྱལ་དང་ཐེ་ཚོམ་
ཡིད་གཉིས་ཅི་ཡང་མེད་པར། ཆོས་ཐམས་ཅད་རྨི་ལམ་ལ་སོགས་པའི་སྒྱུ་མའི་དཔེ་བརྒྱད་ལྟ་བུར་རྟོགས་ཤིང་རྗེས་བཟང་ན་ཡང་དག་པའི་རྟགས་ཡིན། དེ་དག་ལ་མི་ལྡན་ཞིང་རྗེས་ངན་ན་བདུད་ཀྱིས་བྱིན་གྱིས་རླབས་པའི་རྟགས་སོ། །རྗེས་ལ་ཉམ་ང་བ་དང་སྙིང་མི་དགའ་ཞིང་བློ་བཀོལ་དུ་མི་འདོད་པ་དང་ང་རྒྱལ་ལ་སོགས་པའི་ཉོན་མོངས་པ་ཆེར་སོང་བ་ལ་སོགས། མདོར་ན་ཚོགས་ལམ་ཆེན་པོའི་ཏིང་ངེ་འཛིན་ཐོབ་པའི་རྟགས་ནས་བཟུང་སྟེ་ས་བཅུའི་རྟོགས་པ་སྐྱེས་པའི་རྟགས་མན་ཆད་བྱུང་ཡང༌། དེ་དག་གི་མཚན་ཉིད་མ་ཤེས་ཏེ་དངོས་པོ་དང་མཚན་མར་འཛིན་ཅིང༌། སེམས་ལ་དགའ་མི་དགའ་དང་བཅས་པས་རེ་དོགས་དང་ང་རྒྱལ་དང་རློམ་སེམས་སུ་གྱུར་ན་བདུད་ཀྱི་བྱིན་གྱིས་བརླབས་པའི་རྟགས་སོ། །བློའི་ཡུལ་ཅི་ཤར་ཅི་བྱུང་ཡང་སེམས་ཆོས་ཉིད་ལས་མི་གཡོ་ཞིང༌། དེ་དག་གི་མཚན་ཉིད་ཡོངས་སུ་ཤེས་ན་ཡང་དག་པའི་རྟགས་སོ། །ད་ནི་བདུད་དེ་དག་ཞི་བར་བྱ་བའི་ཐབས་བསྟན་པ་ལ་དྲུག་སྟེ། དང་པོ་ཆོས་ཉིད་སྟོང་པ་ཉིད་ཀྱི་ཏིང་ངེ་འཛིན་གྱིས་ཞི་བར་བྱ་བ་ནི། སྤྱིར་བདུད་ཐམས་ཅད་ཀྱི་རྩ་བར་མེད་ལ་ངར་འཛིན་པའི་སེམས་རིག་རིག་ཏུར་ཏུར་པོ་འདི་ཡིན་ཏེ། སྤྱོད་འཇུག་ལས། འཇིག་རྟེན་
དག་ན་འཚེ་བ་གང་ཡོད་དང༌། །འཇིགས་དང་སྡུག་བསྔལ་ཇི་སྙེད་ཡོད་གྱུར་པ། །དེ་ཀུན་བདག་ཏུ་འཛིན་པ་ལས་བྱུང་ན། །འདྲེ་ཆེན་དེས་ཀོ་བདག་ལ་ཅི་ཞིག་བྱ། །ཞེས་པ་དང༌། བདུད་ནི་རང་གི་སེམས་ཡིན་ཏེ། །རང་སེམས་ནམ་མཁའ་དག་པར་བྱ། །ཞེས་དང༌། རང་གི་སེམས་ནི་བདུད་ཅེས་བྱ། །རང་གི་སེམས་ནི་བགེགས་ཡིན་ནོ། །ཞེས་སོ། །དེས་ན་བར་དུ་བཅད་བྱའི་བདག་དང་གཅོད་བྱེད་ཀྱི་བདུད་དང༌། བར་གཅོད་དངོས་དང་གསུམ་ཀ་རང་གི་སེམས་ཀྱི་རྣམ་རྟོག་ཡིན། རྣམ་རྟོག་དེ་ཡང་མེད་སྣང་སྒྱུ་མ་ལྟ་བུ་ཡིན། སྒྱུ་མ་ལ་རང་བཞིན་གང་ཡང་མེད་པས་ཡེ་ནས་སྟོང་པ་ཉིད་ཡིན་ལ། དེས་ན་བར་དུ་བཅད་བྱ་དང༌། གཅོད་བྱེད་དང༌། བར་གཅོད་དངོས་གསུམ་ཀ་རང་གི་རྣམ་རྟོག་ཏུ་རོ་གཅིག །དེ་ཡང་སྒྱུ་མ་ལྟ་བུར་རོ་གཅིག །དེ་ཡང་ཆོས་ཉིད་སྟོང་པར་རོ་གཅིག་པས། ཆོས་ཉིད་ལས་མ་གཏོགས་པའི་བདུད་ཅིག་ལོག་ནས་སྤང་དུ་མེད་ལ། བདུད་ལས་མ་གཏོགས་པའི་ཆོས་ཉིད་གཅིག་ལོག་ནས་བཙལ་དུ་མེད་དོ། །བདུད་ཆོས་ཉིད་ཀྱི་རྒྱན་དང༌། སྤྲུལ་པ་དང༌། རྟགས་སུ་ཤར་ཏེ། དབྱིངས་ནས་ཤར། དབྱིངས་ན་གནས། དབྱིངས་སུ་ནུབ་པ་
ལ་རེ་དོགས་དང་སྤང་བླང་ལ་སོགས་པའི་གཉིས་འཛིན་གྱི་རྒྱུ་མ་རྙེད། རིག་པ་འཛིན་མེད་རྩ་བྲལ་དུ་སོང་བ་ལ་བདུད་དང་བདུད་ཀྱི་རིགས་ཀྱིས་བར་དུ་བཅད་བྱ་མེད་པར་རིག་པར་བྱའོ། །དེ་ལྟ་བུའི་རྣལ་འབྱོར་པ་རྟོགས་པ་དང་ལྡན་པ་ལ་བདུད་ཀྱིས་གླགས་དང་སྐབས་རྙེད་པར་མི་འགྱུར་ཏེ། སྡུད་པ་ལས། གང་ཚེ་མཁས་པ་དེ་དག་བསམ་པ་རབ་ལྡན་པས། །ཉིན་མཚན་ཤེས་རབ་ཕ་རོལ་ཕྱིན་པ་མཆོག་དོན་ལྟ། །དེ་ཚེ་ལུས་སེམས་དག་ནི་མཁའ་འགྲོ་བྱ་བཞིན་རྒྱུ། །ནག་པོའི་རྩ་ལག་རྣམས་ཀྱིས་གླགས་རྙེད་ག་ལ་འགྱུར། །ཅེས་དང༌། ཡང༌། ཤེས་རབ་ཕ་རོལ་ཕྱིན་པ་གང་ལ་མགོན་སྤྱོད་པ། །དེ་ལ་དུག་དང་མཚོན་དང་མེ་དང་ཆུས་མི་ཚུགས། །བདུད་དང་བདུད་ཀྱི་ཕྱོགས་ཀྱིས་གླགས་ཀྱང་རྙེད་མི་འགྱུར། །ཅེས་དང༌། ཡུམ་ལས། སྟོང་པ་ཉིད་ཀྱིས་སྟོང་པ་ཉིད་ལ་གླགས་མི་རྙེད་དོ། །མཚན་མ་མེད་པས་མཚན་མ་མེད་པ་ལ༴ སྨོན་པ་མེད་པས་སྨོན་པ༴ ཞེས་དང༌། སྟོང་པ་ཉིད་ནི་སྒོམ་བྱས་ན། འཆི་བདག་གིས་ཀྱང་མི་ཚུག་སྟེ། །བདུད་རྣམས་བྱེ་བ་དག་གིས་ཀྱང༌། །གནོད་པར་འགྱུར་བ་ག་ལ་སྲིད། །ཅེས་དང༌། གནོད་པའི་མཚན་མ་ཅི་བྱུང་ཡང༌། །ཆོས་ཉིད་སྟོང་པའི་ངང་གནས་ན། །
ཁམས་གསུམ་སེམས་ཅན་དགྲར་ལངས་ཀྱང༌། །གནོད་པ་གང་གིས་ཚུགས་མི་འགྱུར། །ཅེས་པ་ལ་སོགས་པ་གསུངས་སོ། །གཉིས་པ་བྱམས་སྙིང་རྗེ་བྱང་ཆུབ་ཀྱི་སེམས་ཀྱིས་ཞི་བར་བྱ་བ་ནི། སྤྱིར་སེམས་ཅན་ཐམས་ཅད་ལ་བྱམས་པ་དང་སྙིང་རྗེ་རྒྱུན་མ་ཆད་པར་སྒོམ་ཞིང༌། རྒྱུད་ལ་སྐྱེས་ན་ཕ་རོལ་གྱི་གནོད་པ་དང་འཚེ་བ་དག་གིས་མི་ཚུགས་ཤིང་རང་སར་ཞི་བར་འགྱུར་ལ། ཁྱད་པར་དུ་བདུད་ལ་བྱམས་སྙིང་རྗེ་ཞེ་ཐག་པ་ནས་སྐྱེས་ན་བདུད་རང་བཞིན་གྱིས་ཞི་བར་འགྱུར། དཔེར་ན་འཇིག་རྟེན་ན་ཕན་བཏགས་པའི་ལན་དུ་གནོད་པ་སྐྱེལ་བ་ཤིན་ཏུ་དཀའ་ལ། གནོད་ལན་དུ་ཕན་འདོགས་པའང་ཤིན་ཏུ་དཀའ་བ་དེ་བཞིན་དུ་བདག་ལ་གནོད་པ་སྐྱལ་བའི་བདུད་ལ། ལན་དུ་ཕན་འདོགས་པའི་བློ་བཅོས་མ་མ་ཡིན་པ་སྐྱེས་ན་བདུད་དང་བདུད་ཀྱི་ཕྱོགས་ཐམས་ཅད་ཀྱི་གནོད་སེམས་དང་ནུས་མཐུ་ཐམས་ཅད་སྐྱེངས་ཤིང་རབ་ཏུ་ཞི་ནས་ཕྱིར་ལྡོག་པར་འགྱུར་ཏེ། རྡོ་རྗེ་བཀོད་པ་ལས། བར་དུ་གཅོད་པའི་བདུད་རྣམས་ཀྱང༌། །གཉེན་པོ་བྱང་ཆུབ་སེམས་མཆོག་གིས། །ཞི་བ་ཆེན་པོའི་ངང་དུ་ལྡོག །ཅེས་དང༌། རྒྱ་ཆེར་རོལ་པ་ལས་ཀྱང༌། བཅོམ་ལྡན་འདས་ལ་བདུད་ཀྱི་དམག་བྱེ་བ་དུང་ཕྱུར་གྱིས་མཚོན་ཆའི་ཆར་ཕབ་
པའི་ཚེ། བཅོམ་ལྡན་འདས་ཀྱིས་བྱམས་པ་ཆེན་པོའི་ཏིང་ངེ་འཛིན་ལ་བཞུགས་པས་མཚོན་ཆའི་ཆར་ཐམས་ཅད་མེ་ཏོག་གི་ཆར་དུ་འགྱུར་ཏོ། །རྒྱོབ་སོད་ལ་སོགས་པའི་སྒྲ་ཐམས་ཅད་སངས་རྒྱས་ཀྱི་སྒྲ་དང་ཆོས་ཀྱི་སྒྲ་དང་དགེ་འདུན་གྱི་སྒྲར་འགྱུར་ཏེ། བདུད་ཀྱི་དམག་དཔུང་ཐམས་ཅད་སྐྱིངས་བཞིན་དུ་རང་གི་གནས་སུ་དེངས་སོ། །ཞེས་གསུངས་སོ། །གསུམ་པ་མོས་གུས་དང་སྔགས་དང་རྟེན་འབྲེལ་ཟབ་མོས་ཞི་བར་བྱ་བ་ནི། གཙོ་བོར་བླ་མ་ལ་སངས་རྒྱས་སུ་ལྟ་ཞིང་མོས་གུས་ཀྱི་གདུང་བ་བར་མ་ཆད་ན་བདུད་ཀྱིས་མི་ཚུགས་ཏེ། ལམ་ཟབ་མོ་བར་ཆད་མེད་པ་བླ་མའི་མོས་གུས་ཡིན་པར་གསུངས་སོ། །དཀོན་མཆོག་གསུམ་ལ་མོས་གུས་དང་མཆོད་པ་རྒྱུན་མ་ཆད་ན་བདུད་ཀྱིས་མི་ཚུག་སྟེ། དཀོན་མཆོག་གསུམ་གྱི་བྱིན་གྱིས་བརློབ་པས་སོ། །ལུས་ངག་ཡིད་གསུམ་དཀྱིལ་འཁོར་གསུམ་དང་མི་འབྲལ་ཞིང༌། གསང་སྔགས་ཀྱི་བཟླས་པ་ཚད་དུ་ཕྱིན་ན། བདུད་རིགས་ཀྱི་ཡི་དྭགས་ཀྱིས་མི་ཚུག་སྟེ། རིག་པ་མཆོག་གི་རྒྱུད་ལས། བགེགས་ཀྱི་བསོད་ནམས་མ་ལུས་ཟད་པར་བྱེད། །བགེགས་དང་བྲལ་བས་བསོད་ནམས་རྣམ་པར་འཕེལ། །དེ་ཕྱིར་གསང་སྔགས་བཟླས་ལ་བརྩོན་པར་བྱ། །ཞེས་སོ། །གཞན་ཡང་སྨན་གྱི་སྦྱོར་བ་
དང༌། ཀླུ་གྲུབ་ཀྱིས་ནག་པོ་དགུ་སྦྱོར་དང༌། དབྱུག་པ་དང༌། མ་རྒྱུད་ནས་བྱུང་བའི་དབྱུག་པ་རྒྱན་འཁོར་སོགས། དུད་པའི་སྦྱོར་བ། བསྲུང་བའི་འཁོར་ལོ། །སོ་སོར་འབྲང་མ་སོགས། བླ་མ་དང་གྲོགས་མཆེད་ཀྱི། སྔགས་མདུད་ལ་སོགས་པའི་རྟེན་འབྲེལ་ཟབ་མོ་ལ་བརྟེན་ན་ཡང༌། བདུད་ཀྱི་རིགས་ཀྱིས་མི་ཚུགས་ཤིང་ཕྱིར་འབྲོས་པར་འགྱུར་རོ། །བཞི་པ་བསོད་ནམས་ལས་ཁྱད་པར་ཅན་གྱིས་ཞི་བར་བྱ་བ་ནི། མདོ་རྒྱུད་ཟབ་མོ་འབྲི་ཀློག་བྱ་བ། སྐུ་གཟུགས་དང་མཆོད་རྟེན་བཞེངས་པ། ཚ་ཚྭ་འདེབས་པ། དཀོན་མཆོག་གི་མཆོད་པ། དགེ་འདུན་གྱི་བསྙེན་བཀུར། གཏོར་མ། སྦྱིན་སྲེག །ཉེའུ་འདོན་པ། ལམ་འཕྲང་བཅོས་པ་ལ་སོགས་པ་བསོད་ནམས་བསགས་པ་ལ་འབད་པས་བར་ཆོད་ཐམས་ཅད་འཕྲལ་དུ་ཞི་བར་འགྱུར་ལ། དེ་ཞི་ནས་བསོད་ནམས་ཆེར་འཕེལ་བས་བསོད་ནམས་མ་ཡིན་པའི་རྒྱུ་ཐམས་ཅད་ཞི་བར་འགྱུར་རོ། །ལྔ་པ་དད་པ་བརྟན་པོས་ཞི་བར་བྱ་བ་ནི། རྣལ་འབྱོར་པ་ལ་ཕྱིའི་དགྲ་སྡང་བ་དང༌། གཉེན་བྱམས་པ་དང༌། གྲོགས་ངན་པ་དང༌། བླ་མ་ངན་པ་ལ་སོགས་པའི་རྐྱེན་གྱིས་ཐོས་བསམ་སྒོམ་གསུམ་ལ་བར་ཆོད་འགལ་རྐྱེན་བྱེད་པ་དང༌། ནང་གི་ཉོན་མོངས་པ་དང་འཇིག་རྟེན་ཆོས་བརྒྱད་ལ་སོགས་པའི་འགལ་རྐྱེན་ཅི་བྱུང་
ཡང༌། དེ་དག་བདུད་དུ་ཤེས་པར་བྱས་ལ། དེའི་ཚེ་མི་རྟག་འཆི་བ་རྗེས་དྲན་སྒོམ་ཞིང་འཁོར་བ་དང་ངན་སོང་གསུམ་གྱི་སྡུག་བསྔལ་བསམ། གོ་ཆ་དང་སྙིང་སྟོབས་ཆེན་པོ་བསྐྱེད་དེ་ཕྱིའི་རྐྱེན་རྣམས་ཀྱིས་བཀྲི་བར་མི་ཚུགས་པའི་དད་པ་བརྟན་པོ་དང་ལྡན་ཞིང༌། ནང་གི་ཚེ་འདིའི་ཞེན་པའི་དབང་དུ་མི་འགྲོ་བའི་ཕྱིར་མི་ལྡོག་པའི་བརྩོན་འགྲུས་དྲག་པོ་བརྩམ་པར་བྱ་སྟེ། དད་བརྩོན་གཉིས་དང་ལྡན་པ་ལ་བར་དུ་གཅོད་པས་མི་ཚུག་སྟེ། མདོ་ལས། དཔེར་ན་ཆུ་བོ་ཆེན་པོ་གྱེན་ལ་བཟློག་པར་དཀའ་བ་དེ་བཞིན་དུ། བྱང་ཆུབ་སེམས་དཔའ་བློ་གྲོས་དང་ལྡན་ཞིང་དད་པ་བརྟན་པོ་དང་ཕྱིར་མི་ལྡོག་པའི་བརྩོན་འགྲུས་དང་ལྡན་པའི་སྙིང་སྟོབས་ཅན་དག་ལ་ནི་བདུད་དང་བདུད་ཀྱི་རིགས་ཀྱིས་ལམ་ལས་བཟློག་ཅིང་བར་དུ་གཅོད་པར་དཀའ་འོ། །ཞེས་གསུངས་སོ། །དྲུག་པ་རྣལ་འབྱོར་པའི་སེམས་བཅོས་པས་ཞི་བར་བྱ་བ་ནི། སྤྱིར་ཕྱི་ནང་གི་བདུད་ཐམས་ཅད་རང་གི་མངོན་དུ་རྒྱུ་བའི་ཉོན་མོངས་པ་དང༌། འཁུ་འཁྲིག་གི་རྣམ་པར་རྟོག་པ་དང༌། འཇིག་རྟེན་པའི་ཆོས་བརྒྱད་ལས་འབྱུང་སྟེ། རྡོ་རྗེ་བཀོད་པ་ལས། རྣལ་འབྱོར་ངེས་པར་སྤྱོད་པ་ལས། །བར་དུ་གཅོད་པའི་བདུད་ལྔ་འབྱུང༌། །རྣམ་རྟོག་འཁྲིག་པའི་བདུད་ཉིད་དང༌། །དེ་བཞིན་བཏང་
སྙོམས་ལེ་ལོའི་བདུད། །ལོངས་སྤྱོད་འདོད་ཆགས་གཡེང་བའི་བདུད། །ཚིག་རྩུབ་མཚོན་ཆ་རྣོན་པོའི་བདུད། །ཁྲོ་གཏུམ་ངང་ཐུང་འཁྲུལ་པའི་བདུད། །རྣལ་འབྱོར་པ་ཡི་བདུད་ལྔ་པོ། །ཡང་དག་དོན་ལ་སྒྲིབ་པ་སྟེ། །ཞེས་དང༌། སྡུད་པ་ལས། བདག་བསྟོད་གཞན་ལ་སྨོད་པའི་བྱང་ཆུབ་སེམས་དཔའ་དེ། །བདུད་ཀྱིས་ཡོངས་སུ་བསླད་ཅིང་བློ་ཆུང་རིག་པར་བྱ། །ཞེས་དང༌། ཡང༌། སྡང་ཞིང་བཟོད་དང་བྲལ་ལ་བྱང་ཆུབ་ག་ལ་ཡོད། །དེ་ཚེ་བདུད་རྣམས་ཕྱོགས་དང་བཅས་ཏེ་དགའ་བར་འགྱུར། །ཅེས་དང༌། གཅིག་པུར་དོན་ཉིད་མི་སེམས་ཤིང༌། །གདུལ་དཀའི་སེམས་ནི་མི་འདུལ་བར། །འཁོར་མང་ནང་དུ་ཆོས་འཆད་པ། །ཁེ་གྲགས་གཡེང་བ་བདུད་ཀྱི་ལས། །ཞེས་དང༌། འཕགས་པ་ནམ་མཁའ་མཛོད་ཀྱིས་ཞུས་པའི་མདོ་ལས། དཔེར་ན་བུ་ག་ནས་རླུང་འཇུག་པ་དེ་བཞིན་དུ་རྣལ་འབྱོར་པའི་སེམས་གང་དང་གང་ན་སྐྱོན་ཡོད་པ་དེ་དང་དེ་ལ་བདུད་འཇུག་ཅིང་གླག་རྙེད་དོ། །དེ་བས་ན་བྱང་ཆུབ་སེམས་དཔའི་སེམས་ལ་ཉོན་མོངས་པ་ལ་སོགས་པའི་སྐྱོན་མེད་པར་བྱའོ། །སེམས་ལ་སྐྱོན་མེད་པ་ནི་འདི་ཡིན་ཏེ། འདི་ལྟར་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཡོངས་སུ་རྫོགས་པར་བྱའོ། །
ཞེས་གསུངས་སོ། །དེ་བས་ན་རྣལ་འབྱོར་པ་སྤྱོད་ལམ་རྣམ་བཞི་དུས་དང་གནས་སྐབས་ཐམས་ཅད་དུ་རང་གི་སེམས་རྒྱུད་ལ་ལྟ་ཞིང་རྟག་ཏུ་དྲན་པ་དང་ཤེས་བཞིན་བརྟེན་ཏེ། འདོད་ཆགས་ཀྱི་སེམས་དང༌། ཞེ་སྡང་གི་སེམས་དང༌། གཏི་མུག་གི༴ ང་རྒྱལ་གྱི༴ ཕྲག་དོག་གི་སེམས་ལ་སོགས་པ་ཉོན་མོངས་པ་མཐའ་དག་གི་སེམས་ཀྱིས་གནས་པར་མི་བྱའོ། །གཅེས་པར་འཛིན་པའི་སེམས་དང༌། ཁུ་འཕྲིག་དང་ཡང་བ་དང༌། འཇིགས་པའི་སེམས་དང༌། དགའ་མི་དགའི་སེམས་དང༌། ཐེ་ཚོམ་དང་ཡིད་གཉིས་ཀྱི་སེམས་དང༌། རེ་བ་དང་དོགས་པའི་སེམས་ལ་སོགས་པ་རྣལ་འབྱོར་རྟོག་པ་མཐའ་དག་གི་སེམས་ཀྱིས་གནས་པར་མི་བྱའོ། །རྙེད་པ་དང་བཀུར་སྟི་ལ་དགའ་བ་དང༌། དེ་མེད་ན་མི་དགའ་བ་དང༌། བདེ་ཞིང་སྐྱིད་ན་དགའ། སྡུག་ན་མི་དགའ་བ་དང༌། བསྟོད་ན་དགའ་སྨད་ན་མི་དགའ་བ་དང༌། སྙན་པ་དང་གྲགས་ན་དགའ། མི་སྙན་ཅིང་མ་གྲགས་ན་མི་དགའ་བ་ལ་སོགས་པའི་འཇིག་རྟེན་ཆོས་བརྒྱད་ཀྱིས་གནས་པར་མི་བྱའོ། །མདོར་ན་ཆོས་ཐམས་ཅད་དངོས་པོ་དང་མཚན་མར་ཞེན་པས་ང་དང་ང་ཡིར་འཛིན་པ་ཐམས་ཅད་རབ་ཏུ་སྤང་སྟེ། འདི་ལྟར་ཆོས་ཐམས་ཅད་སྟོང་པ་ཉིད་དུ་ཤེས་པའི་ཚུལ་གྱིས་གནས་
པར་བྱའོ། །མཚན་མ་མེད་པའི་ཚུལ་གྱིས་གནས༴ སྨོན་པ་མེད་པའི་ཚུལ་གྱིས༴ བྱམས་དང་སྙིང་རྗེའི་བྱང་ཆུབ་ཀྱི་སེམས་ཀྱིས༴ ཆོས་ཐམས་ཅད་མཉམ་པ་ཉིད་ཀྱི་སེམས་ཀྱིས། ཆོས་ཐམས་ཅད་རྨི་ལམ་དང་སྒྱུ་མ་ནམ་མཁའ་ལྟ་བུའི་སེམས༴ ཆོས་ཐམས་ཅད་མི་རྟག་ཅིང་མི་བརྟན་ལ་ཐེར་ཟུག་མ་ཡིན་པར་འགྱུར་བའི་ཆོས་ཅན་གྱི་སེམས་ཀྱིས༴ རྟག་ཏུ་ཞི་བའི་སེམས་ཀྱིས༴ དུལ་བའི་སེམས་ཀྱིས༴ དྲང་པོའི་སེམས་ཀྱིས༴ དྲན་པ་དང་ལྡན་པའི་སེམས་ཀྱིས༴ ཤེས་བཞིན་དང་ལྡན་པའི་སེམས་ཀྱིས༴ བག་དང་ལྡན་པའི་སེམས་ཀྱིས༴ དེ་ལྟར་གནས་པས་རང་གི་སེམས་རྒྱུད་དག་ཅིང་སྐྱོན་མེད་ན་ཕྱི་ནང་གི་བདུད་ཀྱིས་གླགས་དང་སྐབས་རྙེད་པར་མི་འགྱུར་ཏེ། སྡུད་པ་ལས། འགྲོ་འཆག་ཉལ་དང་འདུག་པར་ཤེས་བཞིན་རབ་ཏུ་ལྡན། །གཉའ་ཤིང་གང་ཙམ་ལྟ་ཞིང་འགྲོ་ལ་སེམས་འཁྲུལ་མེད། །གཙང་ཞིང་གཙང་མའི་གོས་འཆང་གསུམ་པོ་དབེན་ཞིང་དག །རྙེད་འདོད་མ་ཡིན་ཁྱུ་མཆོག་རྟག་ཏུ་ཆོས་འདོད་པ། །བདུད་ཀྱི་ཡུལ་ལས་འདས་ཤིང་གཞན་གྱི་དྲིང་མི་འཇོག །ཅེས་དང༌། ཡང༌། རྒྱུ་རྣམ་བཞི་ཡིས་བྱང་ཆུབ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་
པར་ཤེས་ཤིང་སེམས་ཅན་ཡོངས་སུ་མི་གཏོང་དང༌། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཅེས་སོ། །འཕགས་པ་དཀོན་མཆོག་བརྩེགས་པ་ལས། །ཆོས་བཞི་དང་ལྡན་ན་འདུལ་བར་བྱེད་དོ། །བཞི་གང་ཞེ་ན། གཞན་གྱི་རྙེད་པ་ལ་ཕྲག་དོག་མི་བྱེད་པ་དང༌། །ཕྲ་མའི་ཚིག་ཡོངས་སུ་སྤངས་པ་དང༌། །སྐྱེ་བོ་མང་པོ་དགེ་བའི་རྩ་བ་ཡོངས་སུ་འཛིན་དུ་འཇུག་པ་དང༌། །སྒྲིབ་པ་མེད་པའི་བྱམས་པ་སྒོམ་པའོ། །ཞེས་པ་དང༌། དཔེར་ན་ནོར་མེད་པ་ལ་རྐུན་མ་མི་ཡོང་ངོ༌། །ཁུར་མེད་པ་ལ་དགྲ་མི་ཡོང་ངོ༌། །དེ་བཞིན་དུ་རྣམ་རྟོག་མེད་པ་ལ་བདུད་མི་འཇུག་གོ །ཞེས་པ་དང༌། དྲན་དང་ཤེས་བཞིན་རྟག་བརྟེན་ན། །ལོག་རྟོག་མཚན་མས་ཉེ་མི་ནུས། །ཞེས་གསུངས་སོ། །དེ་ལྟར་བདུད་བཟློག་པའི་ཐབས་ལ་མཁས་པའི་གང་ཟག་ལ་ཕྱི་ནང་གི་བདུད་ཐམས་ཅད་ལམ་གྱི་གྲོགས་སུ་འབྱུང་སྟེ། བརྩོན་འགྲུས་ཀྱི་བསྐུལ་མ། རྟོགས་པའི་ནང་བྱ་ན། དངོས་གྲུབ་ཀྱི་མཚམས་སྦྱོར། ཉམས་མྱོང་གི་བོགས་འདོན་གྱི་རྐྱེན་ཡིན་པས། བདུད་སངས་རྒྱས་ཀྱི་སྤྲུལ་པ། བསྟན་པའི་ཆ་རྐྱེན་ཡིན་ཏེ། དུས་གསུམ་གྱི་སངས་རྒྱས་ཐམས་ཅད་ཀྱིས་བདུད་དང་མུ་སྟེགས་ཐམས་ཅད་མགོ་སྨད་ཅིང་རྩད་ནས་མ་བསྒྲལ་བའི་
དགོངས་པ་དེ་ཡིན་ནོ། །དད་བརྩོན་ལྡན་པའི་གང་ཟག་ལ། །ཕྱི་ནང་གསང་བའི་བདུད་རྣམས་ཀྱིས། །བར་གཅོད་ཆེ་ཆུང་འབྱུང་མོད་ཀྱང༌། །བདུད་བརྟགས་མན་ངག་འདི་ཡོད་ན། །སྔོན་གྱི་རྣམ་སྨིན་མ་གཏོགས་པ། །བདུད་ཀྱི་དབང་དུ་འགྲོ་མི་འགྱུར། །གོ་ཆ་སྙིང་སྟོབས་ལྡན་གྱུར་ཅིང༌། །བླ་མ་དམ་པས་ཟིན་གྱུར་ན། །བདུད་ཀྱིས་བར་ཆོད་ཅི་བྱུང་ཡང༌། །དད་བརྩོན་བསྐུལ་མའི་ལྕགས་འདེབས་ཡིན། །འཁོར་བར་ཞེན་པ་གཏིང་ལོག་ཅིང༌། །ཤེས་རབ་ཆེ་ཞིང་ཐོས་མང་ན། །བདུད་ཀྱི་བར་ཆོད་ཐམས་ཅད་ནི། །རྣལ་འབྱོར་ལམ་གྱི་གྲོགས་སུ་ཆེ། །དོན་དམ་གཤིས་ཀྱི་གནས་ལུགས་རྟོགས། །ཆོས་ཅན་དྲན་སྣང་མཚན་ཉིད་ཤེས། །རྣལ་འབྱོར་དེ་ལ་ཅི་བྱུང་ཡང༌། །རྟོགས་པ་ཉམས་ཀྱི་གསལ་འདེབས་ཡིན། །མཉམ་ཉིད་དོན་ལ་སེམས་བརྟེན་པ། །ཆགས་མེད་རྩིས་མེད་ངང་སྤྱོད་ན། །རྐྱེན་ངན་ཅི་བྱུང་ཅི་ཤར་ཡང༌། །རྣལ་འབྱོར་རིག་པའི་རྒྱན་དུ་ཆེ། །བླ་མ་དམ་པས་མ་ཟིན་དང༌། །བློ་ངན་ཐོས་ཆུང་མན་ངག་མེད། །སྔོན་ལས་ངན་པས་འདས་པ་རྣམས། །དད་བརྩོན་ལྡན་ཡང་བདུད་ཀྱིས་འཁྱེར། །དེ་བས་དད་དང་བརྩོན་པ་ཡིས། །སེམས་ལ་བརྟན་པ་མ་ཐོབ་བར། །རྟག་ཏུ་བླ་མ་དམ་པ་བསྟེན། །དེ་མེད་གདམས་ངག་ཕྱོགས་མེད་བསྟེན། །
གཅིག་ཏུ་བདུད་བརྟགས་མན་ངག་གཅེས། །ཆོས་རྣམས་སྟོང་པར་རྟོགས་པ་དང༌། །སེམས་ཅན་སྙིང་རྗེ་མི་སྤོང་དང༌། །ཁས་བླང་ཡིད་དམ་བརྟན་པ་དང༌། །བླ་མ་དཀོན་མཆོག་མོས་གུས་དང༌། །བཞི་པོ་དེ་དག་སུ་ལྡན་པ། །བདུད་ལས་རྣམ་པར་རྒྱལ་བ་ཡིན། །ལར་དོན་དམ་གཤིས་ཀྱི་གནས་ལུགས་ལ། །བདུད་ཅེས་བྱ་བའི་མིང་ཡང་མེད། །འཇིག་རྟེན་ཀུན་རྫོབ་བདུད་རྣམས་ནི། །གང་ཟག་འཁྲུལ་པའི་བློས་བརྟགས་ཡིན། །དོན་དམ་རྟོགས་པའི་རྣལ་འབྱོར་ལ། །ཀུན་རྫོབ་གདོན་བགེགས་གྲོགས་སུ་ཆེ། །བདུད་བགེགས་རིག་པའི་ལྟ་ཡུལ་ཡིན། །བདུད་བགེགས་མེད་ན་ལྟ་ཡུལ་མེད། །བདུད་བགེགས་སེམས་ཀྱི་སྒོམ་ཡུལ་ཡིན། །བདུད་བགེགས་མེད་ན་སྒོམ་ཡུལ་མེད། །བདུད་བགེགས་སེམས་ཀྱི་སྤྱོད་ཡུལ་ཡིན། །བདུད་བགེགས་མེད་ན་སྤྱོད་རྒྱུ་མེད། །བདུད་བགེགས་སེམས་ཀྱི་བསྐུལ་མ་ཡིན། །བདུད་བགེགས་མེད་ན་བསྐུལ་མ་མེད། །བདུད་བགེགས་ཉམས་ཀྱི་བོགས་འདོན་ཡིན། །བདུད་བགེགས་མེད་ན་བོགས་མི་ཐོན། །བར་ཆོད་དངོས་གྲུབ་མཚམས་སྦྱོར་ཡིན། །བར་ཆོད་མེད་ན་དངོས་གྲུབ་མེད། །སྡུག་བསྔལ་བདེ་བའི་ལམ་པ་ཡིན། །སྡུག་བསྔལ་མེད་ན་་
བདེ་བ་མེད། །ཉོན་མོངས་ཡེ་ཤེས་ངོ་བོ་ཉིད། །ཉོན་མོངས་མེད་ན་ཡེ་ཤེས་མེད། །རྣམ་རྟོག་ཆོས་ཉིད་མེ་ལོང་ཡིན། །རྣམ་རྟོག་མེད་ན་ཆོས་ཉིད་མེད། །ཤེས་རིག་ལྡན་པའི་རྣལ་འབྱོར་ལ། །ཡོན་ཏན་མིན་པ་གང་ཡང་མེད། །རྐྱེན་ངན་ཐམས་ཅད་གྲོགས་ཀྱི་མཆོག །ཅི་བྱས་ཅི་བྱུང་ལེགས་པའི་ལམ། །མན་ངག་རིན་པོ་ཆེ་སྤུངས་པ་ལས་བདུད་བརྟགས་ཏེ་སྤོང་ཚུལ་གྱི་ལེའུ་ལས་དོན་བསྡུས་ཏེ་ཚིག་སྣ་ཅུང་ཟད་རེ་བསྡུས་ནས་ཟིན་ཐུན་དུ་སྤེལ་བའོ།། །།མངྒ་ལམ།། །།