ཡོན་ཏན་རིན་པོ་ཆེའི་མཛོད་ཀྱི་དཀའ་འགྲེལ་ཉིན་བྱེད་སྣང་བ།
ཡོན་ཏན་རིན་པོ་ཆེའི་མཛོད་ཀྱི་དཀའ་འགྲེལ་ཉིན་བྱེད་སྣང་བ་ཞེས་བྱ་བ་བཞུགས་སོ། །
ན་མོ་ཛྙཱ་ན་ས་ཏྭཱ་ཡ། །ཡེ་ཤེས་ཡེ་ཤེས་འབྱུང་གནས་ཆེ། །ཡེ་ཤེས་ལྡན་པ་ཡོད་མེད་ཤེས། །ཚོགས་གཉིས་ཚོགས་ནི་བསགས་པ་པོ། །འཇམ་དཔལ་ཡེ་ཤེས་སེམས་དཔར་འདུད། །ཆོས་ཐམས་ཅད་གཞུང་ལམ་གཅིག་ཏུ་སྟོན་པའི་བསྟན་བཅོས་ཡོན་ཏན་རིན་པོ་ཆེའི་མཛོད་འཆན་པར་བྱེད་པ་ལ། བཤད་བྱའི་ཡན་ལག་བཤད་པ་དང༌། བཤད་བྱ་དངོས་བཤད་པ་གཉིས། དང་པོ་བཤད་བྱའི་ཡན་ལག་བཤད་པ་ལ། །སློབ་དཔོན་གྱིས་ཇི་ལྟར་འཆད་ཚུལ། །སློབ་མས་ཇི་ལྟར་ཉན་ཚུལ། །དེ་གཉིས་ཀས་འཆད་ཉན་ཇི་ལྟར་བགྱི་བའི་ཚུལ་དང་གསུམ། །དང་པོ་སློབ་དཔོན་གྱིས་ཇི་ལྟར་འཆད་ཚུལ་ལ་གསུམ་སྟེ། །སློབ་དཔོན་སངས་རྒྱས་ཀྱིས་ཆོས་ཇི་ལྟར་འཆད་ཚུལ། །སློབ་དཔོན་དགྲ་བཅོམ་
པས་ཆོས་ཇི་ལྟར་འཆད་ཚུལ། །སློབ་དཔོན་མཁས་པ་པཎྜི་ཏས་ཆོས་ཇི་ལྟར་འཆད་པའི་ཚུལ་ལོ། །དང་པོ་སློབ་དཔོན་སངས་རྒྱས་ཀྱིས་ཆོ་འཕྲུལ་གསུམ་ལ་བརྟེན་ནས་འཆད་དེ། །དེ་ཡང་སྐུ་རྫུ་འཕྲུལ་གྱི་ཆོ་འཕྲུལ། །སྨིན་མཚམས་ཀྱི་མཛོད་སྤུ་ནས་འོད་ཟེར་སྤྲོ་བ་སོགས་ཀྱིས་གདུལ་བྱ་འཁོར་དུ་མ་འདུས་པ་བསྡུས་ནས། །ལྗགས་ཀྱི་དབང་པོས་སྟོང་གསུམ་ཁེབས་པར་མཛད་པ་སོགས་ཀྱིས་གདུལ་བྱ་འཁོར་དུ་འདུས་པ་རྣམས་ཡིད་ཆེས་པར་མཛད། །ཐུགས་ཀུན་ཏུ་བརྗོད་པའི་ཆོ་འཕྲུལ་གྱིས་གདུལ་བྱ་འཁོར་དུ་འདུས་པ་དེ་དག་གི་བློ་དང་དབང་པོ་བག་ལ་ཉལ་བ་ཐམས་ཅད་མཁྱེན་པར་མཛད་ནས། །གསུང་རྗེས་སུ་བསྟན་པའི་ཆོ་འཕྲུལ་གྱིས་འགྲོ་བ་
རང་རང་གི་སྐད་དང་མཐུན་པའི་གསུང་ཚངས་དབྱངས་ཡན་ལག་དྲུག་ཅུ་དང་ལྡན་པའི་སྒོ་ནས་གང་ལ་གང་གིས་འདུལ་བའི་ཆོས་དེ་དང་དེ་འཆད་པའོ། །གཉིས་པ་སློབ་དཔོན་དགྲ་བཅོམ་པས། །དག་པ་གསུམ་ལ་བརྟེན་ནས་འཆད་དེ་ཉན་པ་པོའི་སྣོད་དག་པ། །གཞན་སེམས་ཤེས་པའི་མངོན་ཤེས་ཀྱིས་གདུལ་བྱ་དེའི་རྒྱུད་བརྟགས་ནས་རྒྱུད་སྣོད་རུང་དུ་གྱུར་ན་ཆོས་འཆད་པའོ། །འཆད་པ་པོའི་ངག་དག་པ་ཆགས་སོགས་ཉོན་མོངས་པའི་སྒྲིབ་པ་ལས་གྲོལ་བའི་ངག་ཚིག་དྲི་མ་མེད་པ་བརྡ་དག་སྙན་པའི་དབྱངས་ཀྱིས་འཆད། །གསུང་རབ་ཀྱི་བརྗོད་བྱ་དག་པ་ནི་རང་ཉིད་ཀྱི་ཡོངས་འཛིན་རྫོགས་པའི་སངས་རྒྱས་ལ་སོགས་པའི་ཞལ་ནས་ཇི་ལྟར་གསུངས་པ་ལྟར། །མི་བརྗེད་པའི་གཟུངས་ཀྱིས་བཟུང་སྟེ། ཚིག་ལ་ལྷག་ཆད་དང༌། །དོན་ལ་ནོར་འཁྲུལ་མེད་པར་འཆད་པའོ། །འོ་ན་ཉན་ཐོས་དགྲ་བཅོམ་པ་དེ་དག་གིས་ཆོ་འཕྲུལ་རྣམ་པ་གསུམ་ལ་བརྟེན་ནས་ཅིའི་ཕྱིར་ཆོས་མི་འཆད་ཅེ་ན། དེ་དག་ལ་མི་ཤེས་པའི་རྒྱུ་བཞི་ཡོད་པས་ཆོ་འཕྲུལ་གསུམ་ལ་བརྟེན་ནས་འཆད་མི་ནུས་ཏེ། གནས་ཀྱིས་བསྐལ་པས་མི་ཤེས་པ་འཕགས་པ་མོངྒལ་གྱི་བུ་ཆེན་པོས་རང་གི་མ་སངས་རྒྱས་ཀྱི་ཞིང་འོད་ཟེར་ཅན་དུ་སྐྱེས་པ་མ་ཤེས་པ་ལྟ་བུ། །དུས་ཀྱི་བསྐལ་པས་མི་ཤེས་པ་ཁྱིམ་བདག་དཔལ་སྐྱེས་ཀྱི་ཐར་པའི་ས་བོན་འཕགས་པ་ཤཱ་རིའི་བུས་མ་ཤེས་པ་
ལྟ་བུ། རྒྱུ་ཐུག་མེད་ཀྱི་འབྲས་བུ་ཐུག་མེད་མི་ཤེས་པ། ཇི་སྐད་དུ། རྨ་བྱའི་མདོངས་བཀྲ་གཅིག་ལ་ཡང༌། རྒྱུ་ཡི་དབྱེ་བ་ཐ་དད་པ། དེ་མཁྱེན་པ་ནི་ཀུན་མཁྱེན་ཏེ། ཀུན་མཁྱེན་ཡེ་ཤེས་མིན་པས་མིན། །ཞེས་སོ། །སངས་རྒྱས་ཀྱི་ཆོས་རབ་ཏུ་མང་པོ་མི་ཤེས་ཏེ། མི་འཇིགས་པ་བཞི་དང༌། མ་འདྲེས་པ་སོགས་མེད་པའོ། །སློབ་དཔོན་མཁས་པ་པཎྜི་ཏས་ཆོས་འཆད་ཚུལ་ལ་གཉིས། ཆོས་ཀྱི་འབྱུང་གནས་རྒྱ་གར་འཕགས་པའི་ཡུལ་ན་གཙུག་ལག་ཁང་ཆེན་པོ་གཉིས་ཡོད་པའི། དཔལ་ན་ལེནྡྲའི་གཙུག་ལག་ཁང་ན་བཞུགས་པའི་པཎྜི་ཏ་རྣམས་ཀྱིས་ནི། བཀའ་ཐམས་ཅད་ཕུན་སུམ་ཚོགས་པ་ལྔ་དང༌། བསྟན་བཅོས་ཐམས་ཅད་རྩིས་མགོ་ཡན་ལག་ལྔའི་སྒོ་ནས་འཆད། བི་ཀྲ་མ་ཤཱི་ལའི་གཙུག་ལག་ཁང་ན་བཞུགས་པའི་པཎྜི་ཏ་རྣམས་ཀྱིས། ཉན་པ་པོ་སྣོད་རུང་དུ་བྱ་བ་དང༌། བསྟན་པའི་རྣམ་གཞག་ངེས་པ་གཉིས་ཀྱི་སྒོ་ནས་འཆད། དེ་གཉིས་ལས་སྔ་མའི་རྗེས་སུ་འབྲངས་ནས་འཆད་དོ། །སྐབས་འདིར་བསྟན་བཅོས་ཡོན་ཏན་རིན་པོ་ཆེའི་མཛོད་ཉིད་རྩིས་མགོ་ཡན་ལག་ལྔའི་སྒོ་ནས་འཆད་པ་ལ། མཛད་པ་པོ་སུས་མཛད། ལུང་གང་ནས་བཏུས། ཕྱོགས་གང་དུ་གཏོགས། དབུ་ནས་ཞབས་སུ་བསྡུས་པའི་དོན་གང་ཡིན། དགོས་ཆེད་སུ་ཞིག་གི་དོན་དུ་མཛད་ཅེ་ན། དང་པོ་མཛད་པ་པོ་ནི། རང་བཞིན་རྫོགས་པ་ཆེན་པོ་གནས་ལུགས་བྱ་རྩོལ་་
དང་བྲལ་བའི་ཀློང་དུ་ཆོས་ཉིད་ཀྱི་བདེན་པ་མངོན་སུམ་དུ་གཟིགས་པས། དཀྱིལ་འཁོར་རྒྱ་མཚོའི་བདག་ཉིད་ཁྱབ་བདག་རྡོ་རྗེ་འཆང་དང་གཉིས་མེད་དུ་བཞུགས་ཤིང༌། རིག་རྩལ་སོ་སོར་རྟོག་པའི་ཡེ་ཤེས་སུ་འབར་བས་རིག་པའི་གནས་ཆེན་ལྔ་སོགས་ཤེས་བྱའི་ཆོས་ཐམས་ཅད་མ་བསླབ་པར་མཁྱེན་པའི་ཀློང་བརྡོལ་ཏེ་བསྟན་བཅོས་རྩོམ་པའི་རྒྱུ་གསུམ་ལེགས་པར་ཚང་ཞིང༌། ཁྱད་པར་མཆིམས་ཕུ་ནགས་ཀྱི་དུར་ཁྲོད་དུ་ལོ་གསུམ་སྙིང་པོའི་སྒྲུབ་པ་ལ་གཞོལ་པའི་ཚེ། ཀུན་མཁྱེན་ཆོས་ཀྱི་རྒྱལ་པོ་དྲི་མེད་འོད་ཟེར་དཔལ་ངག་གི་དབང་ཕྱུག་གིས་ཡེ་ཤེས་ཀྱི་སྐུས་རྗེས་སུ་བཟུང་ནས་སྐུ་གསུང་ཐུགས་ཀྱིས་བྱིན་གྱིས་བརླབས་ཏེ། དགོངས་པ་དབྱེར་མེད་དུ་གྱུར་ནས་བསྟན་པའི་མངའ་བདག་ཆེན་པོར་བཞུགས་པ་རིག་འཛིན་འཇིགས་མེད་གླིང་པའམ་པདྨ་དབང་ཆེན་ཡེ་ཤེས་རོལ་པའི་རྡོ་རྗེས་མཛད། ལུང་གང་ལས་བཏུས་ན། སངས་རྒྱས་ཀྱི་ཆོས་གསུངས་རབ་སྡེ་སྣོད་གསུམ་རྒྱུད་སྡེ་བཞི་དགོངས་འགྲེལ་དང་བཅས་པ་ལས་བཏུས། །ཕྱོགས་གང་དུ་གཏོགས་ན། སྤྱིར་ཐེག་པ་ཆེ་ཆུང་གཉིས་ལས་ཆེན་པོའི་ཕྱོགས་སུ་གཏོགས། ཐེག་ཆེན་མདོ་སྔགས་གཉིས་ལས་སྔགས་ཕྱོགས་གསང་སྔགས་ཕྱི་ནང་གཉིས་ལས་ནང་རྒྱུད་བླ་ན་མེད་པའི་ཕྱོགས་སུ་གཙོ་བོར་གཏོགས་སོ། །དབུ་ནས་ཞབས་སུ་བསྡུས་པའི་དོན་གང་ཡིན་ཞེ་ན། སྐྱེས་བུ་གསུམ་གྱི་ལམ་གྱི་རིམ་པ་ཐམས་ཅད་རང་བཞིན་རྫོགས་པ་
ཆེན་པོའི་ལམ་སྟེགས་སུ་བཀྲལ་ཏེ་བློ་རབ་འབྲིང་ཐ་གསུམ་མཐར་ཐུག་གི་ལམ་དུ་སྐྱེལ་སོ་མཐུན་པར་བྱས་པའོ། །དགོས་ཆེད་སུ་ཞིག་གི་དོན་དུ་མཛད་ཅེ་ན། སྔར་བཤད་པ་ལྟར་ཀུན་མཁྱེན་ཆོས་ཀྱི་རྒྱལ་པོའི་ཞལ་མཇལ་བའི་ཚེ་དཔེ་ཆ་བམ་པོ་ཞིག་གཏད་དེ་འདིར་ཤིང་རྟ་ཆེན་པོ་ནག་པ་པའི་ཚུལ་དུ་ཡོད་པ་ཐམས་ཅད་གསལ་བར་ཡོད་པ་ཡིན་ཞེས་བསྟན་བཅོས་རྩོམ་པའི་གནང་བ་བྱིན་པ་བཞིན། ཤིང་རྟ་ཆེན་པོར་རྒྱས་པར་མ་བཀྲལ་བའི་སོ་ཐར་དང་སྔགས་ཐུན་མོང་བའི་སྐོར་རྣམས་རྩལ་དུ་བཏོན་ནས་བཤད་དེ་ཕྱི་རབས་རྗེས་འཇུག་གི་གང་ཟག་རྣམས་ཀྱིས་བསྟན་པ་ཐམས་ཅད་འགལ་མེད་དུ་རྟོགས་པ་དང༌། རྒྱལ་བའི་གཞུང་ལ་མ་ནོར་བ་གང་ཟག་གཅིག་འཚང་རྒྱ་བའི་ལམ་དུ་བསྡུས་ནས་ཉམས་སུ་ལེན་ཤེས་པའི་དོན་དུ་མཛད་པ་སྟེ། དེ་ལྟར་རྩིས་མགོ་ཡན་ལག་ལྔས་གཏན་ལ་ཕབ་པས་ཉན་པ་པོ་ཡིད་ཆེས་ཐོབ་ནས་ཆོས་ཀྱི་སྣོད་རུང་དུ་འགྱུར་བའི་དགོས་པ་ཡོད་པའོ། །གཉིས་པ་སློབ་མས་ཇི་ལྟར་ཉན་པའི་ཚུལ་ལ། ཀུན་སློང་དང་ཀུན་སྤྱོད་གཉིས། དང་པོ་ཀུན་སློང་བསམ་པ་བཟང་པོ་བྱང་ཆུབ་ཀྱི་སེམས་ཀྱིས་ཟིན་པར་བྱ་བ་སྟེ། འདི་ལྟར་འཁོར་བ་ན་གནས་པའི་སེམས་ཅན་ཐམས་ཅད་ཐོག་མ་མེད་པའི་དུས་ནས་ཕ་མར་མ་གྱུར་པ་མེད་ལ་ཕ་མར་གྱུར་པའི་དུས་སུ་ད་ལྟའི་ཕ་མ་བཞིན་དུ་དྲིན་ཆེན་པོས་བསྐྱངས་ཏེ་ཟས་ཀྱི་ཕུད་བྱིན། གོས་ཀྱི་རྩེ་གཡོགས། ཤིན་ཏུ་
བྱམས་པས་སྐྱེད་བསྲིངས་པའི་དྲིན་ཅན་ཤ་སྟག་ཡིན་ལ། དྲི་ཅན་དེ་དག་ཐམས་ཅད་འདོད་པ་བདེ་བ་འདོད་ཀྱང་བདེ་བའི་རྒྱུ་ཆོས་དགེ་བ་ལ་སྤྱོད་མི་ཤེས་པར། སྡུག་བསྔལ་གྱི་རྒྱུ་མི་དགེ་བ་ཁོ་ན་དང་དུ་བླངས་ཏེ། ཞེ་འདོད་དང་ལག་ལེན་ཕྱིན་ཅི་ལོག་ཏུ་གྱུར་ནས། ལམ་ལོག་མགོ་རྨོངས་སུ་གྱུར། །ལོང་བ་ཐང་དཀྱིལ་དུ་ལུས་པ་ལྟ་བུའི་སེམས་ཅན་འདི་རྣམས་སྙིང་རེ་རྗེ། བདག་ད་རེས་དལ་འབྱོར་གྱི་མི་ལུས་ཐོབ་མཚན་ལྡན་གྱི་བླ་མ་མཇལ་ཡང་དག་པའི་ཆོས་ལ་སྤྱོད་དུ་ཡོད་པ་འདི་སྐལ་བ་བཟང་པས། ལེ་ལོ་དང་ཕྱི་བཤོལ་གྱི་དབང་དུ་མི་གཏོང་བར། དམ་པའི་ཆོས་ཟབ་མོ་འདི་ལྟ་བུ་ཉན་ནས་ཉམས་སུ་བླངས་ཏེ་མ་རྒན་སེམས་ཅན་ཐམས་ཅད་རིགས་དྲུག་སོ་སོའི་ལས་སྣང་སྡུག་བསྔལ་བག་ཆགས་ཐམས་ཅད་དང་བྲལ་ནས་རྣམ་མཁྱེན་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱའོ་སྙམ་དུ་སེམས་བསྐྱེད་པ་ནི་གལ་ཆེ་བའི་གནད་དམ་པའོ། །གཉིས་པ་ཀུན་སྤྱོད་ལ། སྤང་བྱའི་ཀུན་སྤྱོད་དང༌། བླང་བྱའི་ཀུན་སྤྱོད་གཉིས། དང་པོ་སྤང་བྱའི་ཀུན་སྤྱོད་ལ། སྣོད་ཀྱི་སྐྱོན་གསུམ། དྲི་མ་དྲུག །མི་འཛིན་པ་ལྔ་དང་བཅས་པ་སྤངས་དགོས་ཏེ། །དང་པོ་སྣོད་ཀྱི་སྐྱོན་གསུམ་ནི། རྣ་བ་མི་གཏད་ཁ་སྦུབ་ལྟ་བུའི་སྐྱོན། ཡིད་ལ་མི་འཛིན་ཞབས་རྡོལ་ལྟ་བུའི་སྐྱོན། ཉོན་མོངས་དང་འདྲེས་དུག་ཅན་ལྟ་བུའི་སྐྱོན། ཞེས་སོ། །དྲི་མ་དྲུག་ནི་རྣམ་བཤད་རིག་པ་ལས། ང་རྒྱལ་དང་ནི་མ་དད་དང༌།
དོན་དུ་གཉེར་བ་མེད་ཉིད་དང༌། །ཕྱི་རོལ་རྣམ་གཡེངས་ནང་དུ་སྡུད། །སྐྱོ་བས་ཉན་པ་དྲི་མ་ཡིན། །ཞེས་པ་ལྟར། །ཆོས་འཆད་པ་པོ་བླ་མ་ལས་ཀྱང་ང་མཁས་བསམ་པའི་ང་རྒྱལ། །ཆོས་དང་བླ་མའི་སྐྱོན་ལ་རྟོག་པའི་མ་དད་པ། །ཆོས་ཐོབ་ཀྱང་རུང་ལ་མ་ཐོབ་ཀྱང་རུང་སྙམ་པ་དོན་གཉེར་མེད་པ། སེམས་ཕྱི་རོལ་ཚོགས་དྲུག་གི་ཡུལ་ལ་གཡེངས་པ། །སེམས་དབང་ནང་དུ་སྡུད་ཆེས་པས་གཉིད་དང་རྨུགས་པར་འཆོར་བ། །ཆོས་ཐུན་རིང་དྲགས་པ་སོགས་ཀྱིས་སེམས་སྐྱོ་སུན་གྱི་དབང་དུ་སོང་བ་རྣམས་སྤང་ངོ༌། མི་འཛིན་པ་ལྔ་ནི། ཚིག་འཛིན་ལ་དོན་མི་འཛིན་པ། །དོན་འཛིན་ལ་ཚིག་མི་འཛིན་པ། །བརྡའ་མ་འཕྲོད་པར་འཛིན༌། གོང་འོག་ནོར་ནས་འཛིན་པ། དོན་གོ་ལོག་ཏུ་འཛིན་པ་རྣམས་སྤང་ངོ༌། །གཉིས་པ་བླང་བྱའི་ཀུན་སྤྱོད་ལ། །འདུ་ཤེས་བཞི་བསྟེན་པ། ཕ་རོལ་ཏུ་ཕྱིན་པ་དྲུག་དང་ལྡན་པ། །སྤྱོད་ལམ་གཞན་བསྟན་པའོ། །དང་པོ་འདུ་ཤེས་བཞི་བརྟེན་པ་ནི། སྡོང་པོ་བཀོད་པ་ལས། རིགས་ཀྱི་བུ་ཁྱོད་ཀྱིས་བདག་ཉིད་ལ་ནད་པའི་འདུ་ཤེས་བསྐྱེད་པར་བྱའོ། །ཆོས་ལ་སྨན་གྱི་འདུ་ཤེས་བསྐྱེད་པར་བྱའོ། །ནན་ཏན་ཉམས་སུ་ལེན་པ་ལ་ནད་ཉེ་བར་འཚོ་བའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་སྨན་པ་མཁས་པའི་འདུ་ཤེས་བསྐྱེད་པར་བྱའོ། །ཞེས་སོ། །ཕ་རོལ་ཏུ་ཕྱིན་པ་དྲུག་ནི། ཆོས་སྤྱོད་ཐམས་ཅད་ཀྱི་མན་ངག་མངོན་པར་རྟོགས་པའི་རྒྱུད་ལས། མེ་ཏོག་
སྟན་སོགས་རབ་འབུལ་ཞིང༌། །ས་ཕྱོགས་སྤྱོད་ལམ་སྡོམ་པ་དང༌། །སྲོག་ཆགས་ཀུན་ལ་འཚེ་མི་བྱེད། །བླ་མ་ལ་ནི་གསོལ་བ་འདེབས། མ་ཡེངས་བླ་མའི་གདམས་ངག་ཉན། དོགས་སེལ་ཕྱིར་ན་སྐྱོན་ཚིག་འདྲི། །སྒྲོལ་མ་ཡན་ལག་དྲུག་དང་ལྡན། ཞེས་སོ། །སྤྱོད་ལམ་གཞན་བསྟན་པ་ནི། །མི་དད་པ་ལ་ཆོས་མི་བཤད། །མི་ན་བཞིན་དུ་མགོ་དཀྲིས་དང༌། །གདུགས་དང་མཁར་བ་མཚོན་ཐོགས་དང༌། །མགོ་བོ་གཡོགས་པ་དག་ལ་མིན། །ཞེས་པ་ལ་སོགས་པའོ། །གསུམ་པ་དཔོན་སློབ་དེ་གཉིས་ཀྱིས་འཆད་ཉན་ཇི་ལྟར་བགྱི་བའི་ཚུལ་ལ། ཆིངས་ཆེན་པོ་ལྔའམ་གསུམ་གྱིས་བཅིངས་ནས་འཆད་དེ། དང་པོ་ཆིངས་ཆེན་པོ་ལྔ་ནི། རྣམ་བཤད་རིགས་པ་ལས། མདོ་དོན་སྨྲ་བར་འདོད་རྣམས་ལ། །མན་ངག་ཅུང་ཞིག་སྦྱིན་པར་བྱ། །དེ་ལ་མན་ངག་འདི་ཡིན་ཏེ། །དགོས་པ་བསྡུས་པའི་དོན་བཅས་དང༌། ཚིག་དོན་བཅས་དང་མཚམས་སྦྱོར་བཅས། བརྒལ་ལན་བཅས་ཏེ་བསྙད་པར་བྱ། ཞེས་སོ། །གཉིས་པ་ཆིངས་གསུམ་ནི། །དཀྱུས་ཀྱི་ས་གཅོད་པ་སྟག་མོའི་མཆོང་སྟབས་ལྟ་བུ། ཚིག་གི་འབྲུ་གནོན་པ་རུས་སྦལ་གྱི་ནུར་འགྲོས་ལྟ་བུ། སྐབས་ཀྱི་མཇུག་བསྡུ་བ་སེངྒེའི་འགྱིང་ལྟ་བུའོ། །གཉིས་པ་བཤད་བྱ་དངོས་བཤད་པ་ལ། ཐོག་མར་དགེ་བ་ཀླད་ཀྱི་དོན། བར་དུ་དགེ་བ་གཞུང་གི་དོན། ཐ་མར་དགེ་བ་མཇུག་གི་དོན་དང་གསུམ། དང་པོ་ཐོག་
མར་དགེ་བ་ཀླད་ཀྱི་དོན་ལ། མཚན་བརྗོད་པ། མཆོད་པར་བརྗོད་པ། རྩོམ་པར་དམ་བཅའ་བ་དང་གསུམ། །དང་པོ་མཚན་དོན་ཆིངས་ཆེན་པོ་ལྔའི་སྒོ་ནས་འཆད་པ་ལ། དང་པོ་དགོས་པའི་དོན་ནི། དབང་པོ་རབ་རྣམས་མཚན་དོན་ཤེས་པས་གཞུང་དོན་ཡོངས་རྫོགས་གཏན་ལ་ཕེབས་པ་དང༌། འབྲིང་རྣམས་ཐེག་པ་ཆེ་ཆུང་གང་གི་ཕྱོགས་སུ་གཏོགས་ཤེས་པ་དང༌། ཐ་ནའང་མིང་དོན་གྱི་འབྲེལ་པ་ཤེས་ནས་གླེགས་བམ་འཚོལ་སླ་བ་སོགས་ཀྱི་དགོས་པ་ཡོད་དེ། ཇི་སྐད་དུ། མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་མགོན་པོ་ཐབས་མཁས་པས། །ཆོས་རྣམས་མིང་དུ་གདགས་པར་མཛད། །ཅེས་སོ། །གཉིས་པ་མཚམས་སྦྱོར་གྱི་དོན་ནི། སྤྱིར་ཆོས་ཐམས་ཅད་གང་དང་གང་འཆད་ཀྱང་ཐོག་མར་ཀླད་དོན་ནས་འཆད་དགོས་ལ། དེ་ཡང་དང་པོར་མཚན་སྨོས་པ་འབྱུང་བ་ཡིན་ལ། མཚན་དེ་ཡང༌། ཆོས་ལ་ཡིད་ཆེས་སྐྱེ། སྐད་ལ་བག་ཆགས་འཇོག །རྒྱུད་ལ་བྱིན་རླབས་འབྱུང་བ་སྟེ་དགོས་པ་གསུམ་དང་ལྡན་པའི་ཕྱིར་སྐད་གཉིས་ཤན་སྦྱར་ནས་བཤད་པའི་དང་པོར་མཚན་རྒྱ་གར་སྐད་ལྟར་སྨོས་པ་ནི་རྒྱ་གར་ཞེས་པ་ལྟ་བུ། གསུམ་པ་ཚིག་གི་དོན་ནི། སྐྱེས་བུ་གསུམ་གྱི་ལམ་གྱི་རིམ་པ་ཐམས་ཅད་མ་ནོར་བར་ཉམས་སུ་བླངས་བའི་ལམ་དང་འབྲས་བུའི་ཡོན་ཏན་ཐམས་ཅད་ནི་ཡོན་ཏན། དེ་ཉམས་སུ་བླངས་པ་ལས་དོན་གཉིས་ཀྱི་འདོད་པ་ཐམས་ཅད་འབྱུང་བས་ན་
རིན་པོ་ཆེ། དེ་ལྟ་བུའི་བརྗོད་བྱ་ཕུན་སུམ་ཚོགས་པའི་ཚིག་དང་དོན་གྱི་མཛོད་ཡིན་པས་ན་མཛོད། རང་རྒྱུད་ལ་ལེགས་བྱས་དགེ་བའི་ལོ་ཏོག་བསྐྱེད་པར་འདོད་པའི་སྐལ་བ་བཟང་པོའི་གང་ཟག་ཐམས་ཅད་དགའ་བར་བྱེད་པའི་ཆར་པ་ལྟ་བུ་ཡིན་པས་དགའ་བའི་ཆར་ཞེས་བྱའོ། །བཞི་པ་བསྡུས་དོན་གྱི་དབང་དུ་བྱས་ན་ཡོན་ཏན་རིན་པོ་ཆེའི་མཛོད་ཅེས་བྱ་བ་སྟེ། ལམ་དང་འབྲས་བུའི་ཡོན་ཏན་ཐམས་ཅད་གང་ལས་འབྱུང་བའི་མཛོད་ལྟ་བུར་གྱུར་པའོ། །ལྔ་པ་བརྒལ་ལན་གྱི་དོན་ནི། དེ་ལ་ཁ་ཅིག་ན་རེ། དགའ་བའི་ཆར་ཞེས་བྱ་བ་མི་འཐད་དེ། ཆར་ཡིན་ན་དགའ་བར་བྱེད་པ་ཡིན་པས་མ་ཁྱབ་སྟེ། དམྱལ་བར་མེ་མདག་དང༌། ཀླུ་དང་ཡི་དྭགས་སོགས་ལ་བྱེ་ཚན་གྱི་ཆར་སོགས་འབེབས་པའི་ཕྱིར་ཟེར་ན། འདི་དཔེ་ལ་མཚན་དུ་གསོལ་བའི་དབང་དུ་བྱས་ཏེ་གང་དག་དགའ་བ་སྐྱེད་པའི་མཐོ་རིས་ལྷ་དང་མིའི་ཡུལ་གྱི་ཆར་པ་དག་དཔེར་བྱེད་ཀྱི་ངན་སོང་གི་ཆར་པ་དཔེར་བྱེད་པ་མ་ཡིན་པས་རྩོད་པ་དེ་ལ་སྙིང་པོ་མེད་དོ། །གཉིས་པ་མཆོད་པར་བརྗོད་པ་ལ་མཚན་སྨོས་པའི་སྒོ་ནས་བསྡུས་ཏེ་མཆོད་པར་བརྗོད་པ་དང༌། ཡོན་ཏན་དྲན་པའི་སྒོ་ནས་རྒྱས་པར་མཆོད་པར་བརྗོད་པ་དང་གཉིས། དང་པོ་མཚན་སྨོས་པའི་སྒོ་ནས་བསྡུས་ཏེ་མཆོད་པར་བརྗོད་པའི་སྐབས་སུ། དང་པོ་སངས་རྒྱས་ལ། ངོ་བོ། ངེས་ཚིག །དབྱེ་བ། སྒྲ་དོན་ནོ། །དང་པོ་སྤངས་རྟོགས་ཀྱི་ཡོན་ཏན་མཐར་
ཕྱིན་པ་སངས་རྒྱས་ཀྱི་ངོ་བོ། ངེས་ཚིག་མ་རིག་པའི་གཉིད་འཐུག་པོ་ལས་སངས་ཤིང་ཤེས་བྱའི་ཆོས་ཐམས་ཅད་ལ་བློ་གྲོས་ཀྱི་པདྨོ་རྣམ་པར་རྒྱས་པས་ན་སངས་རྒྱས་ཞེས་བྱའོ། །དབྱེ་ན་རྟེན་སྐུ་བརྟེན་པ་ཡེ་ཤེས། མཛད་པ་ཕྲིན་ལས་སོ། །སྒྲ་དོན་བུདྡྷ་ཁོང་དུ་ཆུད་པ་ལའོ། །ཞེས་པས་ཤེས་བྱ་ཐམས་ཅད་མཁྱེན་ཅིང་ཁོང་དུ་ཆུབ་པས་ན་སངས་རྒྱས་སོ། །གཉིས་པ་ཆོས་ལའང་སྔ་མ་ལྟར་བཞི་ལས། །ཉོན་ཤེས་ཀྱི་སྒྲིབ་པ་གང་རུང་སྤངས་པའམ་སྤོང་བྱེད་ཀྱི་ཐབས་སུ་གྱུར་པ་ཆོས་ཀྱི་ངོ་བོ། །ངེས་ཚིག་ནི་ནད་ལ་སྨན་གཏོང་བ་ལྟར་རང་རྒྱུད་ཀྱི་ཉོན་མོངས་པ་འཆོས་པས་ན་ཆོས་སོ། །དབྱེ་ན། ལུང་དང་རྟོགས་པའི་ཆོས་སམ་འགོག་ལམ་གྱི་བདེན་པ་གཉིས་སོ། །སྒྲ་དོན༌། ཞེས་པའི་སྒྲ་ལས་དྲངས་ན། འཛིན་པ་སྟེ་འཁོར་བ་དང་ངན་སོང་གི་ལམ་དུ་མི་འཛིན་ཅིང་ཡང་དག་པའི་ལམ་དུ་འཛིན་པས་ན་ཆོས་སོ། །གསུམ་པ། དགེ་འདུན་ལའང་བཞི་སྟེ། རིག་གྲོལ་གྱི་ཡོན་ཏན་གཉིས་དང་ལྡན་པ་དགེ་འདུན་གྱི་ངོ་བོ། ངེས་ཚིག་ཡང་དག་པ་དགེ་བའི་ལམ་དང་རང་རྒྱུད་མི་ཕྱེད་པར་འདུན་པས་ན་དགེ་འདུན་ནོ། །དབྱེ་ན། ཐེག་དམན་ཉན་རང་གི་དགེ་འདུན་དང༌། ཐེག་ཆེན་བྱང་ཆུབ་སེམས་དཔའི་དགེ་འདུན་ནོ། །སྒྲ་དོན་ནི། སངྒ་ཞེས་པའི་སྒྲ་ལས་དྲངས་ན་འདུས་པ་སྟེ། འགྲོ་བ་ལྷ་དང་བཅས་པའི་ལམ་ལས་མི་ཕྱེད་པས་ན་དགེ་འདུན་ནོ། །དཀོན་མཆོག་
ཅེས་པའི་སྒྲ་དོན་ནི། རྒྱུད་བླ་མ་ལས། འབྱུང་བ་དཀོན་ཕྱིར་དྲི་མེད་ཕྱིར། །མཐུ་ལྡན་ཉིད་དང་འཇིག་རྟེན་གྱི། །རྒྱན་གྱུར་ཉིད་དང་མཆོག་ཉིད་ཕྱིར། །འགྱུར་བ་མེད་ཕྱིར་དཀོན་མཆོག་ཉིད། །ཅེས་གསུངས་ཏེ་འཇིག་རྟེན་དུ་སངས་རྒྱས་འབྱོན་པ་དང༌། དེས་ཆོས་གསུངས་པ་དང༌། དེ་ཉམས་སུ་ལེན་པའི་དགེ་འདུན་རྣམས་ནི་འཇིག་རྟེན་ན་ཨུ་དུམྦ་རའི་མེ་ཏོག་ལྟར་དཀོན་པ་དང༌། མི་མཐུན་པའི་ཉེས་ཚོགས་ཀྱི་དྲི་མ་མེད་པ་དང༌། སྒྲིབ་གཉིས་དང་བདུད་བཞི་སོགས་བཅོམ་པའི་མཐུ་དང་ལྡན་པ་དང༌། གནས་སྐབས་དང་མཐར་ཐུག་གི་ཕུན་སུམ་ཚོགས་པ་ཐམས་ཅད་བསྐྱེད་པའི་རྒྱུ་ཡིན་པས་འཇིག་རྟེན་གྱི་རྒྱན་ཏུ་གྱུར་པ་དང༌། འགྲོ་བ་ལྷ་དང་བཅས་པའི་མགོན་དུ་བཞུགས་ཤིང༌། སྲིད་ཞིའི་ཁམས་ན་འགྲན་ཟླ་དང་བྲལ་བས་ན་མཆོག་ཉིད་དང༌། གནས་སྐབས་སུ་ཀུན་ཏུ་ཡོན་ཏན་གྱི་རང་བཞིན་ཉམས་པ་མེད་ཅིང་ཐུགས་རྗེ་རྒྱུན་ཆད་མེད་པས་ན་འགྱུར་བ་མེད་པ་སྟེ་དཀོན་མཆོག་ཅེས་བྱའོ། །གསུམ་པ་རྩོམ་པར་དམ་བཅའ་བ་ནི། དམ་པའི་ཆོས་མི་འཛིན་པའི་ཕན་ཡོན་ལ་བསམས་ཏེ་རྩོམ་པར་དམ་བཅའ་བ་དང༌། དམ་པའི་ཆོས་མི་འཛིན་པའི་ཉེས་དམིགས་ལ་བསམས་ཏེ་རྩོམ་པར་དམ་བཅའ་བ་གཉིས་སོ། །སྐབས་འདིར་དགོས་འབྲེལ་ཡན་ལག་བཞི་འཆད་པའི་སྲོལ་ལྟར་ན། སྤྱིར་ངག་ཙམ་ལ་ཡོད་པའི་དགོས་འབྲེལ་དང༌། དགོས་འབྲེལ་ངག་
ལ་ཡོད་པའི་དགོས་འབྲེལ། བསྟན་བཅོས་ལུས་ལ་ཡོད་པའི་དགོས་འབྲེལ་རྣམས་ཡོད་ཀྱང༌། དོན་བསྟན་བཅོས་ལུས་ལ་ཡོད་པའི་དགོས་འབྲེལ་ཡིན་པས་སྐྱེས་བུ་གསུམ་གྱི་ལམ་རིམ་གྱི་ཉམས་ལེན་རྣམས་ནི་བརྗོད་བྱ། དེ་ལྟ་བུའི་བརྗོད་བྱ་དང་ལྡན་པའི་བསྟན་བཅོས་འདི་ཐོས་བསམ་གྱིས་གཏན་ལ་ཕབ་ནས་ཐར་པར་འགྲོ་བའི་ལམ་མ་ནོར་བར་ཤེས་པ་ནི་དགོས་པ། །དེ་ལྟར་ཤེས་ནས་ཉམས་སུ་བླངས་པས་མཐར་ཐུག་གི་འབྲས་བུ་གྲུབ་པ་ནི་ཉིང་དགོས། དེ་གསུམ་གཅིག་ལ་གཅིག་བརྟེན་གྱིས་འབྲེལ་བར་གྲུབ་པ་ནི་འབྲེལ་པའོ། །གཉིས་པ་བར་དུ་དགེ་བ་གཞུང་གི་དོན་ལ། །གཞུང་དོན་ལེའུ་བཅུ་གསུམ་ཡོད་པའི། ལེའུ་དང་པོ་དལ་འབྱོར་རྙེད་དཀའི་སྐབས་སུ། འདུ་ཤེས་མེད་པའི་ལྷ་ཞེས་པ་ནི་འདུ་ཤེས་མེད་པའི་སྙོམས་འཇུག་བསྒོམས་པའི་འབྲས་བུ་སྟེ། སེམས་རྟོག་མེད་ཀུན་གཞིའི་སྟེང་དུ་ཚོགས་དྲུག་གི་ཤེས་པ་བཀག་ནས་སྒོམ་པ་གོམས་པ་སྟེ། འདི་དང་འགོག་པའི་སྙོམས་འཇུག་གི་ཁྱད་པར། འདིར་ཉོན་ཡིད་མ་བཀག་ལ་འགོག་པར་ཉོན་ཡིད་འགོག་པ་དང༌། འདི་ལ་སོ་སོའི་སྐྱེ་བོ་རྣམས་འཇུག་ཅིང་འཕགས་པ་རྣམས་མི་འཇུག་ལ་འགོག་པར་འཕགས་པ་རྣམས་འཇུག་གི་སོ་སྐྱེ་རྣམས་མི་འཇུག་གོ །ཡང་འདུ་ཤེས་མེད་པ་ནི་ཕྱི་རོལ་པ་རྣམས་ཐར་པའི་ལམ་དུ་འཁྲུལ་ནས་སྒོམ་ཞིང༌། འགོག་པ་ལ་ཉན་རང་འཕགས་པ་
རྣམས་མཐོང་ཆོས་སུ་བདེ་བར་གནས་ཀྱི་ཕྱིར་སྙོམས་པར་འཇུག་ལ། བྱང་སེམས་འཕགས་པ་རྣམས་ཏིང་ངེ་འཛིན་ལ་རྩལ་སྦྱང་བའི་ཕྱིར་སྙོམས་པར་འཇུག་གོ །དེ་ལྟ་བུའི་སྙོམས་འཇུག་དེ་གོམས་པས་ཤི་མ་ཐག་ཏུ་འདུ་ཤེས་མེད་པའི་ལྷར་སྐྱེས་པ་ཡིན་ཏེ། ལྷ་དེའི་གནས་བསམ་གཏན་བཞི་པའི་ལྷ་གནས་འབྲས་བུ་ཆེ་བའི་གནས་ན་གྲོང་ལས་དགོན་པའི་ཚུལ་དུ་ཡོད་པར་བཤད་དོ། །དེ་ལས་གཞན་པའི་ལྷ་གནས་རྣམས་སུ་ནི་ཉན་རང་འཕགས་པ་རྣམས་ཀྱང་སྐྱེ་བ་འཛིན་པས་ན་མི་ཁོམས་པའི་གནས་མིན་ནོ། །ལེའུ་གཉིས་པ་ཆེ་མི་རྟག་པའི་སྐབས་སྲིད་པ་བརྟན་གཡོ་ཆགས་གནས་འཇིག་སྟོང་སོགས་ཀྱི་དོན། །དང་པོ་ཕྱི་སྣོད་ཀྱི་འཇིག་རྟེན་མས་ནས་ཡར་ཆགས། ནང་བཅུད་ཀྱི་སེམས་ཅན་གཟུགས་ཁམས་ཀྱི་ལྷ་གནས་ནས་བཟུང་ཡས་ནས་མར་ཆགས་ཏེ་སྣོད་ཆགས་པ་ལ་བར་བསྐལ་གཅིག་དང༌། བཅུད་ཆགས་པ་ལ་བར་བསྐལ་བཅུ་དགུ་སྟེ་ཉི་ཤུ་ཡོད། གཉིས་པ་གནས་པའི་བསྐལ་པ་དང་པོ་ཚེ་ལོ་དཔག་མེད་ནས་བཅུ་པའི་བར་འགྲིབ་པ་ལ་ཐོག་རིང་མོ་བཅུ་པ་ནས་བརྒྱད་ཁྲིའི་བར་ཡར་འཕེལ་པ་དང༌། བརྒྱད་ཁྲི་ནས་བཅུ་པའི་བར་མར་འགྲིབ་པའི་འཕེལ་འགྲིབ་ཕྲུགས་རེ་ལ་བར་གྱི་ཁུག་པ་གཅིག་ཏུ་བརྩིས་པའི་བར་ཁུག་བཅོ་བརྒྱད་རྫོགས་རྗེས་བཅུ་པ་ནས་དཔག་མེད་ཀྱི་བར་ཡར་འཕེལ་བ་ལ་མ་ཐོག་རིང་མོ་བར་བསྐལ་གཅིག་སྟེ་བསྡོམས་པར་བསྐལ་ཉི་
ཤུའོ། །དེ་བཞིན་དུ་འཇིག་པ་ལ་བར་བསྐལ་ཉི་ཤུ། ཞིག་ནས་སྟོངས་ཏེ་ནམ་མཁའ་གཅིག་གི་རང་བཞིན་བར་བསྐལ་ཉི་ཤུར་གནས་པ་རྣམས་བསྡོམས་པས་བར་བསྐལ་བརྒྱད་ཅུ་ནི་བསྐལ་ཆེན་གཅིག་གོ །འཇིག་པའི་ཚེ་དམྱལ་བའི་གནས་སུ་སེམས་ཅན་གསར་དུ་མི་སྐྱེ་བ་ནས་མགོ་བརྩམས་ཏེ་འདོད་ལྷ་དང་མི་རྣམས་འོད་གསལ་གྱི་ལྷར་སྐྱེས་པའི་བར་བར་བསྐལ་བཅུ་དགུ། །། དེ་ནས་སྣོད་འཇིག་པའི་ཚེ་ཉི་མ་བདུན་ཤར་བས་དང་པོས་རྩི་ཤིང་དང་ནགས་ཚལ་ཐམས་ཅད་བསྲེགས། །གཉིས་ཀྱིས་ལྟེང་ཀ་དང་ཆུ་ཀླུང་ཐམས་ཅད་སྐེམ། །གསུམ་གྱིས་ཆུ་ཀླུང་ཆེན་པོ་ཐམས་ཅད་སྐེམ། །བཞི་པས་མཚོ་ཆེན་པོ་མ་དྲོས་པ་སྐེམ། །ལྔ་པས་རྒྱ་མཚོ་དཔག་ཚད་བརྒྱ་ནས་རིམ་གྱིས་ཆུ་ཐིགས་གཅིག་ཀྱང་མ་ལུས་པར་སྐེམ། དྲུག་གིས་ས་ཆེན་པོ་གངས་རི་དང་བཅས་པ་ཐམས་ཅད་བསྲེག །བདུན་གྱིས་རི་གླིང་གསེར་གྱི་ས་གཞིའི་བར་དུ་བསྲེག་གོ །དེ་ལྟ་བུའི་མེ་ལྕེ་གྱེན་དུ་འབར་བས་ཚངས་པའི་གཞལ་མེད་ཁང་སྟོང་པ་རྣམས་བསྲེགས་ཤིང་མེ་ལྕེ་ཐུར་དུ་འཁྱིལ་བས་མནར་མེད་ཀྱི་ས་གཞིའི་བར་བསྲེགས་ཏེ། བསྲེགས་པའི་བསྐལ་པ་ཆེན་པོ་མེས་འཇིག་པ་ཞེས་བྱའོ། །དེ་ནས་སྟོངས་ཏེ་ཐམས་ཅད་ནམ་མཁའ་གཅིག་གི་རང་བཞིན་དུ་གྱུར་ནས་བར་བསྐལ་ཉི་ཤུར་གནས་ཤིང་དེ་ནས་ཡང་སྔར་ལྟར་ཆགས་པའི་བསྐལ་པ་དང་གནས་པ་དང་ཡང་མེས་
འཇིག་པའི་བསྐལ་པ་རྣམས་སྔར་ལྟར་འབྱུང་ལ་དེ་ལྟར་བསྐལ་པ་ཆེན་པོ་བདུན་མེས་འཇིག་པའི་རྗེས་སུ་བསྐལ་པ་གཅིག་ཆགས་བདེ་ཆུས་འཇིག་སྟེ། དེའི་ཚེ་བསམ་གཏན་གཉིས་པའི་ལྷ་གནས་སུ་སྤྲིན་ཆུའི་སྙིང་པོ་ཅན་འཁྲིགས་པ་ལས་ཆར་བབས་ཏེ། སྟོང་གསུམ་ཐམས་ཅད་ལན་ཚྭ་ཆུར་ཞུ་བ་ལྟར་འཇིག་གོ །དེ་ལྟར་མེས་འཇིག་བདུན་རེའི་མཚམས་སུ་ཆུས་འཇིག་རེ་བྱུང་ནས་ཆུས་འཇིག་བདུན་མེས་འཇིག་བཞི་བཅུ་ཞེ་དགུ་རྫོགས་མཚམས་སུ་རླུང་གིས་སྐོར་གཅིག་འཇིག་སྟེ་འོག་གཞི་རླུང་གི་དཀྱིལ་འཁོར་གྱེན་དུ་འཁྲུགས་ནས་བསམ་གཏན་གསུམ་པའི་གནས་མན་ཆད་ཐལ་བ་རླུང་གིས་གཏོར་བ་ལྟར་འཇིག་པ་ཡིན་ཏེ། །མཛོད་ལས། མེ་ཡིས་བདུན་ནོ་ཆུ་ཡིས་གཅིག །མཐར་ནི་རླུང་གིས་གཏོར་བ། ཅེས་སོ། །ལེའུ་གསུམ་པ་ལས་རྒྱུ་འབྲས་ཀྱི་སྐབས་སུ་འཇིག་རྟེན་པའི་ཆོས་བཅུ་གསུམ་ལས་དང་པོ། །རིགས་གཟུགས་དབང་ཐང་ལ་སོགས་འཕང་བསྟོད་ཅེས་པ་རྒྱགས་པ་ལྔ་སྟེ། །རྒྱལ་རིགས་དང་བྲམ་ཟེའི་རིགས་ལ་སོགས་རིགས། །ཆེ་བ་དང་མཛེས་པ་ལ་སོགས་གཟུགས། །ལུགས་གཉིས་ཀྱི་རྣམ་གཞག་མང་པོ་ཤེས་པའི་ཐོས་པ། །དར་ལ་བབ་པའི་ལང་ཚོ། །སྡེ་རིས་དང་བྲན་གཡོག་ལ་སོགས་ལ་དབང་སྒྱུར་བའི་དབང་ཐང་སྟེ་རྒྱགས་པ་ལྔ། །སྙོམ་ལས་དང་དྲུག །ཆོས་ཉིད་ཀྱི་དོན་མ་རྟོགས་བཞིན་དུ་
རྟོགས་པར་རློམ་པའི་མངོན་པའི་ང་རྒྱལ་དང་བདུན། །དཀའ་ཐུབ་དཔལ་ལ་སྡང་བའི་སྲིན་པོ་ཆགས་སྡང་གཉིས་དང་དགུ། །རང་ལ་ཡོད་པའི་ཟས་ནོར་དང་ལོངས་སྤྱོད་ལ་སོགས་ཀྱི་རོ་ལ་ཡང་ཡང་མྱོང་བའི་བརྐམ་པ་དང་བཅུ། །གཞན་གྱི་ཟས་ནོར་སོགས་ལ་བརྣབ་སེམས་སྐྱེ་བའི་ཆགས་པ་དང་བཅུ་གཅིག །རང་ལ་ཡོན་ཏན་མེད་ཀྱང་ཡོད་པ་ལྟར་ཚུལ་འཆོས་པའི་གཡོ་དང་བཅུ་གཉིས། སྐྱོན་ཡོད་ཀྱང་མེད་པ་ལྟར་སྒྲིབ་པའི་སྒྱུ་དང་བཅུ་གསུམ་མོ། །དགེ་བ་བཅུ་ནི་སྲོག་གཅོད་པ་སོགས་མི་དགེ་བ་བཅུ་སྤོང་བའི་སེམས་བརྟན་པ་དེ་ལས་ལོགས་ན་མེད་ཀྱང༌། ཁྱད་པར་ཅན་གྱི་དབང་དུ་བྱས་ན། །སྲོག་གཅོད་སྤངས་ནས་སྲོག་བསྐྱབ། །མ་བྱིན་ལེན་པ་སྤངས་ནས་སྦྱིན་པ་གཏོང༌། འདོད་ལོག་སྤངས་ནས་ཚུལ་ཁྲིམས་བསྲུང༌། །རྫུན་སྤངས་ནས་བདེན་པར་སྨྲ། །ཕྲ་མ་སྤངས་ནས་འཁོན་པ་ཟླུམས། །ཚིག་རྩུབ་སྤངས་ནས་སྙན་པར་སྨྲ། །ངག་འཁྱལ་སྤངས་ནས་ཁ་ཏོན་ལ་བརྩོན། །བརྣབ་སེམས་སྤངས་ནས་གཏོང་སེམས་འཆང༌། །གནོད་སེམས་སྤངས་ནས་ཕན་སེམས་འཆང༌། །ལོག་ལྟ་སྤངས་ནས་ཡང་དག་པའི་ལྟ་བ་ལ་གནས་པའོ། །ལེའུ་བཞི་པའི་སྐབས་སུ། །བདེན་བཞི་བཤད་པ་ལ། །ངོ་བོ། རྣམ་པ། སྒྲ་དོན། གོ་རིམ་དང་བཞི། དང་པོ་བདེན་བཞི་རང་རང་གི་ངོ་བོ་ནི། སྡུག་བསྔལ་ནི་འཁོར་བའི་སྣོད་བཅུད་གཉིས་པོ་
འདི་ཐམས་ཅད་ཡིན། ཀུན་འབྱུང་ནི་ལས་དང་ཉོན་མོངས་པ་གཉིས་ཡིན་ཏེ། ལས་ནི་འཁོར་བར་འཕེན་བྱེད་དགེ་བ་དང་མི་དགེ་བ་སོགས་ཡིན། ཉོན་མོངས་པ་ནི་ལས་དེ་ཀུན་ནས་སློང་བའི་ཉོན་མོངས་པ་ཆགས་སྡང་རྨོངས་གསུམ་ཡིན། འགོག་པ་ནི། སྡུག་བསྔལ་དང་ཀུན་འབྱུང་གཉིས་པོ་དེ་ལམ་གྱི་མཐུས་སྤང་བའི་ཆ་དེ་དང༌། སྤང་གཞི་ཆོས་ཉིད་དེ་བཞིན་ཉིད་དང་གཉིས་ཀ་ཡིན། ལམ་ནི་ཁ་ཅིག་མཐོང་སྒོམ་གཉིས་ཁོ་ན་ལ་འདོད་ཀྱང་གཙོ་ཕལ་ཙམ་ལས་ལམ་ལྔ་ཡོངས་རྫོགས་ཡིན། དེ་དག་གི་རྣམ་པ་བཅུ་དྲུག་སྟེ། སྐད་ཅིག་གཅིག་གིས་སྐྱེ་འགག་བྱེད་པས་མི་རྟག་པ། གང་ཅི་ཚོར་ཡང་རུང་སྡུག་བསྔལ་ལས་མ་འདས་པས་སྡུག་བསྔལ་བ། ང་ཡི་བའི་དངོས་པོ་རྣམས་ལ་བདག་པོ་མེད་པས་སྟོང་པ། གང་ཟག་གི་གདགས་གཞི་མེད་པས་བདག་མེད་པ་སྟེ་སྡུག་བསྔལ་གྱི་རྣམ་པ་བཞི། འཁོར་བའི་སྡུག་བསྔལ་ཐམས་ཅད་འབྱུང་བས་ཀུན་འབྱུང༌། སྡུག་བསྔལ་ཐམས་ཅད་ཀྱི་རྩ་བར་གྱུར་པས་རྒྱུ། །སྡུག་བསྔལ་དྲག་པོ་འཕྲལ་དུ་སྐྱེས་པས་རབ་སྐྱེ། སྡུག་བསྔལ་ཉམས་སུ་མྱོང་བའི་མཚམས་སྦྱོར་བའི་རྐྱེན་དང་བཞི་སྟེ་ཀུན་འབྱུང་གི་རྣམ་པ། མ་འོངས་པའི་སྡུག་བསྔལ་དང་ཀུན་འབྱུང་གི་རྒྱུན་འགོག་པས་འགོག་པ། འཁྲུལ་བའི་ཉོན་མོངས་པ་ཐམས་ཅད་ཞི་བས་ཞི་བ། ཕུན་སུམ་ཚོགས་པ་མཆོག་གི་ཆོས་ཡིན་པས་གྱ་ནོམ་པ། སླར་མི་ལྡོག་པར་འཁོར་བ་ལས་
ངེས་པར་ཐར་བས་ངེས་པར་འབྱུང་བ་དང་བཞི་སྟེ། འགོག་པའི་རྣམ་པ། གོང་ནས་གོང་དུ་བགྲོད་པར་བྱ་བས་ལམ། ཉོན་མོངས་པའི་གཉེན་པོ་བྱེད་པས་རིགས་པ། སེམས་ཕྱིན་ཅི་མ་ལོག་པར་བསྒྲུབས་པས་སྒྲུབ་པ། གཏན་དུ་ཐར་པ་མྱ་ངན་འདས་ཀྱི་གནས་སུ་ཁྲིད་པས་ངེས་པར་འབྱིན་པ་དང་བཞི་ནི་ལམ་གྱི་རྣམ་པའོ། །སྒྲ་དོན་ནི། བསྟན་པ་དང་མི་མཐུན་པ་མེད་པས་ན་བདེན་པའོ། །ཞེས་གསུངས་པས་བདེན་པ་བཞིའི་མཚན་ཉིད་འདི་ལྟར་ཡིན་ནོ་ཞེས་སངས་རྒྱས་ཀྱིས་བསྟན་པའི་དོན་ཇི་ལྟ་བ་བཞིན་ཡུལ་བདེན་བཞི་རང་རང་གི་ངོས་ནས་མི་མཐུན་པ་མེད་པས་ན་ཡུལ་གྱི་ངོས་ནས་བདེན་པ་དང༌། བདེན་བཞིའི་མཚན་ཉིད་ཇི་ལྟར་བསྟན་པ་དེ་ལྟར་ཤེས་ན་ཤེས་པའི་བློ་དེ་ཡང་མ་ནོར་པ་ཡིན་པས་ན་ཡུལ་ཅན་གྱི་ངོས་ནས་བདེན་པའོ། །དེ་ཡང་བདེན་བཞི་རང་རང་གི་མཚན་ཉིད་ཇི་ལྟར་གནས་པ་དེ་འཕགས་པ་རྣམས་ཁོ་ནས་མཁྱེན་པས་ན་འཕགས་པའི་བདེན་པར་བཞག་ལ། སོ་སྐྱེ་རྣམས་ལ་སྡུག་བསྔལ་ཀུན་འབྱུང་སོགས་རང་ལ་ཡོད་ཀྱང་དེ་དག་གི་མཚན་ཉིད་ཇི་ལྟ་བ་བཞིན་མི་ཤེས་པས་ཕྱིན་ཅི་ལོག་ཏུ་འཛིན་པས་ན་དེ་དག་གི་བདེན་པར་མ་བཞག་གོ །བཞི་པ་གོ་རིམ་ནི། ལམ་མངོན་པར་རྟོགས་པའི་གོ་རིམ་དང་སྦྱར་ནས་བཞག་སྟེ། རྒྱུད་བླ་མ་ལས། ནད་ནི་ཤེས་བྱ་ནད་ཀྱི་རྒྱུ་ནི་སྤང་བྱ་ལ། །བདེར་གནས་ཐོབ་ཕྱིར་སྨན་ནི་བསྟེན་པར་བྱ་བ་ལྟར། །
སྡུག་བསྔལ་རྒྱུ་དང་དེ་འགོག་པ་དང་དེ་བཞིན་ལམ། ཤེས་བྱ་སྤང་བྱ་རིག་པར་བྱ་ཞིང་བསྟེན་པར་བྱ། ཞེས་པ་ལྟར་དང་པོ་སྡུག་བསྔལ་ཤེས་པར་བྱས་ནས་འཁོར་བ་ལ་ངེས་འབྱུང་བསྐྱེད། དེ་ནས་སྡུག་བསྔལ་གྱི་རྒྱུ་ཀུན་འབྱུང་སྤངས་ཏེ་འགོག་པ་མངོན་དུ་བྱ་བར་འདོད་པས་ལམ་རྒྱུད་ལ་བསྟེན་པའི་གོ་རིམ་དང་སྦྱར་ནས་དེ་ལྟར་བཞག་སྟེ། །དེ་ཡང་འཁོར་བའི་རྒྱུ་ཀུན་འབྱུང་ཡིན་ལ་དེའི་འབྲས་བུ་སྡུག་བདེན་ཡིན་པས་དེ་གཉིས་ཀུན་ནས་ཉོན་མོངས་པའི་ཕྱོགས་དང༌། མྱ་ངན་ལས་འདས་པའི་རྒྱུ་ལམ་བདེན་དང༌། འབྲས་བུ་འགོག་བདེན་ཏེ་དེ་གཉིས་རྣམ་པར་བྱང་བའི་ཕྱོགས་སོ། །ཡང་དམྱལ་བའི་སྡུག་བསྔལ་གྱི་སྐབས་སུ་ཚེ་ཚད་བཤད་པ་ནི། །འདོད་ལྷའི་ཚེ་དང་ཉིན་ཞག་མཉམ། ཞེས་པས་མི་ལོ་ལྔ་བཅུ་ལྷ་རྒྱལ་ཆེན་རིགས་བཞིའི་ཞག་གཅིག་ཏུ་བརྩིས་པའི་ལྷའི་རང་ལོ་ལྔ་བརྒྱ་དེ་དམྱལ་བ་ཡང་སོས་ཀྱི་ཞག་གཅིག་ཏུ་བརྩིས་པའི་རང་ལོ་ལྔ་བརྒྱ་ཐུབ་པོ། །དེ་བཞིན་ཏུ་མི་ལོ་བརྒྱ། ཉིས་བརྒྱ། བཞི་བརྒྱ། བརྒྱད་བརྒྱ། སྟོང་དྲུག་བརྒྱ་རྣམས་ལྷ་སུམ་ཅུ་རྩ་གསུམ། འཐབ་བྲལ། དགའ་ལྡན། །འཕྲུལ་དགའ། གཞན་འཕྲུལ་དབང་བྱེད་རྣམས་ཀྱི། ཞག་གཅིག་ཏུ་བརྩིས་པའི་རང་ལོ་སྟོང༌། ཉིས་སྟོང༌། བཞི་སྟོང༌། བརྒྱད་སྟོང༌། ཁྲི་དྲུག་སྟོང་རྣམས། དམྱལ་བ་ཐིག་ནག །བསྡུས་འཇོམས། ངུ་འབོད། ངུ་འབོད་ཆེན་པོ། །
ཚ་བ་རྣམས་ཀྱི་ཞག་རེར་བརྩིས་པའི་རང་ལོ་སྟོང༌། ཉིས་སྟོང༌། བཞི་སྟོང༌། བརྒྱད་སྟོང༌། ཁྲི་དྲུག་སྟོང་རྣམས་ཐུབ་ཅིང༌། རབ་ཏུ་ཚ་བས་བར་བསྐལ་ཕྱེད་དང༌། མནར་མེད་པས་བར་བསྐལ་གཅིག་ཐུབ་པོ། །གྲང་དམྱལ་གྱི་ཚེ་ཚད་ནི། ཡུལ་ཀོ་ས་ལའི་ཏིལ་ཁལ་ཉི་ཤུ་ཤོང་བའི་ཏིལ་སྦྱངས་ནས་ལོ་བརྒྱ་རེ་ལ་ཏིལ་ཉག་རེ་ཕྱུངས་བས་ཟད་པ་ན་ཆུ་བུར་ཅན་གྱི་ཚེ་ཚད་རྫོགས་པ་ཡིན་ལ་ལྷག་མ་རྣམས་ཉི་ཤུའི་འགྱུར་རོ། །ཉེ་འཁོར་ལྷག་པ་བཅུ་དྲུག་ནི། མདགས་མེའི་འོབས། རོ་མྱགས་ཀྱི་འདམ། རལ་གྲིའི་ནགས། ཆུ་བོ་རབ་མེད་དང་བཞི་པོ་ཤར་ན་བཞི། ལྷོ་ན་བཞི། ནུབ་ན་བཞི། བྱང་ན་བཞི་ཡོད་པས་ཉེ་འཁོར་ལྷག་པ་བཅུ་དྲུག་གོ། ཤལ་མ་ལི་ཤར་ལྷོ་ན་གཅིག །དེ་བཞིན་ལྷོ་ནུབ། ནུབ་བྱང༌། བྱང་ཤར་རྣམས་ནའང་རེ་རེ་ཡོད་པས་བཞི་ཡོད་ལ། དེ་བཞིན་དུ་སྤུ་གྲིའི་ཐང་གཞུང་འགའ་རེར་བཤད་པ་ལྟར་ཡོད་ཀྱང༌། རལ་གྲིའི་ནགས། སྤུ་གྲིའི་ཐང༌། ཤལ་མ་རི་དང་གསུམ་མཚོན་ཆའི་རིགས་ཡིན་པས་གཅིག་ཏུ་བསྡུས་ནས་ཏེ་འཁོར་བཅུ་དྲུག་ཏུ་བཞག་གོ །ཡི་དྭགས་ཀྱི་ཚེ་ཚད་ནི་སྤྱིར་མི་ཡི་ཟླ་བ་ཡི་དྭགས་ཀྱི་ཞག་གཅིག་ཏུ་བརྩིས་པས་རང་ལོ་ལྔ་བརྒྱ་ཐུབ་སྟེ་བྱེ་བྲག་ངེས་པ་མེད་དོ། །ཡང་ལྷའི་འཆི་ལྟས་ལྔ་ནི། བཤེས་སྤྲིང་ལས། །སྟན་ལ་མི་དགའ་མེ་ཏོག་ཕྲེང་རྙིང་དང༌། །གོས་ལ་དྲི་མ་ཆགས་དང་ལུས་
ལ་ནི། སྔོན་ཆད་མེད་པའི་རྡུལ་འབྱུང་ཞེས་བྱ་བ། །མཐོ་རིས་འཆི་འཕོ་སྦྲོན་བྱེད་སྔ་ལྟས་ལྔ། །ཞེས་སོ། །སྡུག་བསྔལ་དང་ཀུན་འབྱུང་གཉིས་ཀར་གཏོགས་པའི་ཕུང་པོ་ལྔ་བཤད་པ་ལ། མཚན་ཉིད་དང་དབྱེ་བ་གཉིས། །དང་པོ་མཚན་ཉིད་ནི་གཟུགས་སུ་རུང་བ་གཟུགས་ཀྱི་མཚན་ཉིད། ཉམས་སུ་མྱོང་བ་ཚོར་བའི་མཚན་ཉིད། །མཚན་མར་འཛིན་པ་འདུ་ཤེས་ཀྱི་མཚན་ཉིད། ཕུང་པོ་བཞི་ལ་མངོན་པར་ཞེན་པའི་རྒྱུ་རྐྱེན་གྱིས་འདུ་བྱེད་པ་འདུ་བྱེད་ཀྱི་མཚན་ཉིད། ཡུལ་དོན་རིག་པ་རྣམ་ཤེས་ཀྱི་མཚན་ཉིད་དོ། །གཉིས་པ་དབྱེ་བ་ནི། གཟུགས་ལ་དབྱེ་ན། རྒྱུ་གཟུགས་ས་ཆུ་མེ་རླུང་བཞི། འབྲས་གཟུགས་དབང་པོ་ལྔ་དང་ཡུལ་ལྔ་རྣམ་པར་རིག་བྱེད་མ་ཡིན་པའི་གཟུགས་དང་བཅུ་གཅིག་ལས་གཞན་རྣམས་གོ་སླ་ལ། །རྣམ་པར་རིག་བྱེད་མ་ཡིན་པ་ནི། མཛོད་ལས། །རྣམ་རིག་མིན་རྣམ་གསུམ་ཞེས་བྱ། །སྡོམ་དང་སྡོམ་པ་མིན་དང་གཞན། ཞེས་པ་ལྟར་དགེ་བ་དམ་བཅས་པ་སྡོམ་པ། མི་དགེ་བ་དམ་བཅས་པ་སྡོམ་མིན། དམ་བཅས་པ་མེད་པའི་དགེ་བ་དང་མི་དགེ་བ་རྣམས་པར་མ་སྟེ། དེ་དག་ཀྱང་ལུས་ངག་འབྱུང་བ་ཆེན་པོ་རྣམས་ལས་སྐྱེས་པ། སེམས་མེད་པ་དང་ཡེངས་པའི་གནས་སྐབས་རྣམས་སུའང་རྟག་ཏུ་རྗེས་སུ་འབྲང་བ་སྟེ་འདི་བྱེ་བྲག་སྨ་བ་ཁོ་ན་འདོད་ཀྱི་མདོ་སྡེ་པ་ཡན་ཆད་རྣམ་པར་རིག་བྱེད་མ་
ཡིན་པ་གཟུགས་མི་འདོད་དོ། །ཚོར་བ་ནི་བདེ་སྡུག་བར་མ་གསུམ་མོ། །འདུ་ཤེས་ནི་རྒྱ་ཆེ་ཆུང་བར་མ་གསུམ་མོ། །འདུ་བྱེད་ནི། ལྡན་པའི་འདུ་བྱེད་སེམས་བྱུང་ལྔ་བཅུ་རྩ་གཅིག་ལས་ཚོར་བ་དང་འདུ་ཤེས་གཉིས་མ་གཏོགས་འདུ་བྱེད་ཞེ་དགུའོ། །ལྡན་མིན་འདུ་བྱེད་ཉེར་གསུམ་ཡོད་དོ། །སེམས་བྱུང་ལྔ་བཅུ་རྩ་གཅིག་ནི། །ཚོར་འདུ་སེམས་པ་རེག་ཡིད་བྱེད། །འདི་དག་ཀུན་འགྲོ་ལྔ་ཡིན་ནོ། །འདུན་མོས་དྲན་ཏིང་ཤེས་རབ་སྟེ། །ཡུལ་ནི་སོ་སོར་ངེས་པ་ལྔ། །དད་དང་ངོ་ཚ་ཤེས་ཁྲེལ་ཡོད། །མ་ཆགས་མི་སྡང་གཏི་མུག་མེད། །བརྩོན་འགྲུས་ཤིན་སྦྱངས་བག་ཡོད་པ། །བཏང་སྙོམས་རྣམ་པར་མི་འཚེ་བ། །འདི་དག་དགེ་བ་བཅུ་གཅིག་གོ །འདོད་ཆགས་ཁོང་ཁྲོ་ང་རྒྱལ་དང༌། །མ་རིག་ཐེ་ཚོམ་ལྟ་བ་སྟེ། །རྩ་བའི་ཉོན་མོངས་དྲུག་ཡིན་ནོ། །ཁྲོ་བ་འཁོན་འཛིན་འཆབ་དང་འཚིག །ཕྲག་དོག་སེར་སྣ་གཡོ་སྒྱུ་རྒྱགས། །རྣམ་འཚེ་ངོ་ཚ་ཁྲེལ་མེད་རྨུགས། །རྒོད་བ་མ་དད་ལེ་ལོ་དང༌། །བག་མེད་བརྗེད་ངས་རྣམ་པར་གཡེངས། །ཤེས་བཞིན་མ་ཡིན་ཉེ་ཉི་ཤུ། །གཉིས་འགྱོད་རྟོག་དཔྱོད་གཞན་འགྱུར་བཞི། །ཞེས་སོ། །དེ་ཐམས་ཅད་ཀྱང་སེམས་ལས་རྫས་ཐ་དད་ཅིང༌། རྟེན་དང༌། དམིགས་པ་དང༌། རྣམ་པ་དང༌། དུས་དང༌། རྫས་ཏེ་མཚུངས་པ་ལྔའི་སྒོ་ནས་མཚུངས་པ་ཡིན་ནོ། །དེ་གཉིས་ཀྱང་རྟེན་དབང་པོ་གཅིག་ལ་
བརྟོན་པ་དང༌། ཡུལ་གཅིག་ལ་དམིགས་པ་དང་གཉིས་ཀས་ཀྱང་རྣམ་པ་གཅིག་འཛིན་པ་དང༌། དུས་གཅིག་ཏུ་སྐྱེ་བ་དང༌། རྫས་རེ་རེ་བར་མཉམ་པའོ། །དེ་དག་ཀྱང་སེམས་གཅིག་གི་འཁོར་ན་སེམས་བྱུང་མང་དུ་ཡོད་པའི་གཙོ་འཁོར་ཕན་ཚུན་མཚུངས་པ་ལྔས་མཚུངས་པས་ན་མཚུངས་ལྡན་ཞེས་བྱའོ། །རྣམ་པར་ཤེས་པའི་ཕུང་པོ་ནི། ཉན་ཐོས་རྣམས་དང་དབུ་མ་པ་ཕལ་ཆེར་ལྟར་ན་ཚོགས་དྲུག་དང༌། སེམས་ཙམ་པ་དང་དབུ་མ་པ་ཁ་ཅིག་དང་གསང་སྔགས་པ་རྣམས་ལྟར་ན་ཉོན་ཡིད་དང་ཀུན་གཞི་གཉིས་བསྣན་ནས་ཚོགས་བརྒྱད་དུ་འདོད་དེ། དེ་ལ་ཚོགས་དྲུག་ནི། མིག་གི་རྣམ་ཤེས། རྣ་བའི་རྣམ་ཤེས། སྣའི་རྣམ་ཤེས། ལུས་ཀྱི་རྣམ་ཤེས་དང་ལྔ་ནི་སྒོ་ལྔའི་རྣམ་ཤེས་ཡིན་ལ། དེའི་སྟེང་དུ་ཡུལ་རྣམས་ལ་དེ་དང་དེར་འཛིན་པ་ནི་ཡིད་ཀྱི་རྣམ་ཤེས་ཏེ་དྲུག་གོ །ཉོན་ཡིད་ནི་ཁ་ནང་བལྟས་ཀུན་གཞི་ལ་དམིགས་ནས་དུས་རྟག་ཏུ་ངའོ་སྙམ་དུ་བདག་གི་རྣམ་པར་རློམ་སེམས་པ་སྟེ་འཕགས་པའི་མཉམ་གཞག་གི་དུས་མིན་པར་སོ་སྐྱེའི་སར་ནམ་ཡང་མི་འགག་པའོ། །ཀུན་གཞིའི་རྣམ་ཤེས་ནི་ཤེས་ཙམ་གསལ་རིག་ཏུ་གནས་པ་མི་གསལ་བ་སྣོད་བཅུད་རྒྱ་ཆེན་པོ་ལ་དམིགས་པའོ། །དེ་ལྟ་བུའི་ཉེར་ལེན་གྱི་ཕུང་པོ་ལྔ་ནི་ཚེ་ཕྱི་མའི་སྡུག་བསྔལ་གྱི་རྒྱུ་བྱེད་པའི་ཆ་ནས་ཀུན་འབྱུང་དང༌། སྔ་མའི་ལས་ཀྱིས་བསྐྱེད་པའི་ཆ་ནས་
སྡུག་བསྔལ་གྱི་བདེན་པའི་མཚན་གཞི་ཡིན་ཏེ། ཟག་བཅས་རྒྱུ་འགྱུར་བའི་ཕུང་པོ་ལྔ་ཀུན་འབྱུང་དང་ཟག་བཅས་འབྲས་བུར་གྱུར་པའི་ཕུང་པོ་ལྔ་སྡུག་བསྔལ་ཞེས་བྱའོ། །དེས་ན་ཀུན་འབྱུང་ལ་སྡུག་བསྔལ་གྱིས་ཁྱབ་ཀྱང་སྡུག་བསྔལ་ལ་ཀུན་འབྱུང་གིས་མ་ཁྱབ་སྟེ་སྣོད་ཀྱི་འཇིག་རྟེན་ལ་སོགས་པའོ། །ཞེས་འཆད་དོ། །ཡང་བདེན་པ་བཞི་པོ་དེས་ཤེས་བྱའི་ཆོས་ཐམས་ཅད་བསྡུས་སམ་ཞེ་ན། མ་བསྡུས་ཏེ། ནམ་མཁའ་དང་སོ་སོར་བརྟག་མིན་གྱི་འགོག་པ་སོགས་འགག་ཞིག་མ་བསྡུས་ཞེས་བཞེད་ལ། འཕགས་པའི་ལམ་གྱི་མངོན་རྟོགས་ཐམས་ཅད་བདེན་པ་བཞིས་བསྡུས་སམ་ཞེ་ན་བསྡུས་པར་འདོད་དགོས་པ་ཡིན་ནོ། །དེས་ན་བདེན་བཞིའི་ནང་ཚན་གྱི་འགོག་པ་ནི་སོ་སོར་བརྟག་འགོག་ཁོ་ན་ཡིན་པས། བརྟག་མིན་འགོག་པ་དང༌། འགོག་པའི་སྙོམས་འཇུག་འགོག་བདེན་དུ་མི་གཏོགས་པ་ཤེས་དགོས་སོ། །རྟེན་འབྲེལ་ཡན་ལག་བཅུ་གཉིས་བཤད་པ་ལ། དགོས་པ། སོ་སོའི་ངོ་བོ། རྣམ་གཞག །ཚེ་དུ་ལ་རྫོགས། སྒོམ་ཚུལ་ལོ། །དང་པོ་ནི། འཁོར་འདས་ཀྱི་ཆོས་ཐམས་ཅད་རྟེན་འབྲེལ་སྒྱུ་མའི་སྣང་བ་ཙམ་དུ་ཤེས་ནས་ལྟ་བ་ངན་པ་ལ་མི་འཇུག་ཅིང་མཐར་ཐུག་མྱ་ངན་ལས་འདས་པའི་དགོས་པ་ཡོད་དོ། །དེ་ཡང་མདོ་ལས། འདི་ཡོད་པས་འདི་འབྱུང༌། འདི་སྐྱེས་པས་འདི་སྐྱེ་སྟེ། འདི་ལྟ་སྟེ། །
མ་རིག་པའི་རྐྱེན་གྱིས་འདུ་བྱེད་ཅེས་པ་ལ་སོགས་གསུངས་ཏེ། འདི་ཡོད་པས་འདི་འབྱུང་ཞེས་གསུངས་པས་ཆོས་ཐམས་ཅད་རྒྱུ་ཡོད་པ་ཁོ་ན་ལས་སྐྱེ་བར་བསྟན་པས་རྒྱུ་མེད་ལས་སྐྱེ་བར་འདོད་པ་འགོག །འདི་སྐྱེས་པས་འདི་སྐྱེ་ཞེས་གསུངས་པས། རྒྱུ་དེ་ཡང་རྐྱེན་ལས་སྐྱེ་བར་བསྟན་པས་རྒྱུ་རྟག་པ་ལས་སྐྱེ་བར་འདོད་པ་འགོག །འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་སོགས་གསུངས་པས་བློ་ཡི་གཡོ་བ་སྔོན་དུ་བཏང་བས་དབང་ཕྱུག་ལ་སོགས་པའི་རྒྱུ་ལས་བྱུང་བར་འདོད་པ་འགོག་གོ །གཉིས་པ་སོ་སོའི་ངོ་བོ་ནི། མ་རིག་པ་ནི་བདེན་བཞི་དང༌། ལས་རྒྱུ་འབྲས་ཀྱི་རང་བཞིན་ལ་རྨོངས་ནས་བདག་ཏུ་འཛིན་པའོ། །འདུ་བྱེད་ནི་དེ་ལྟར་བདག་ཏུ་བཟུང་བས་བདག་ལ་ཆགས་པའི་དབང་གིས་ལས་དགེ་བ་བསོད་ནམས་ཆ་མཐུན་དང༌། མི་དགེ་བ་དང༌། ཁམས་གོང་མར་སྐྱེ་བའི་རྒྱུ་མི་གཡོ་བའི་ལས་གསུམ་གསོག་པའོ། །རྣམ་ཤེས་ནི་ལས་དེས་འཕངས་པས་རྣམ་པར་ཤེས་པ་ཕྱི་མའི་གནས་སུ་འཕེན་པ་སྟེ་འདི་ལ་ལས་གསོག་དུས་ཀྱི་རྣམ་ཤེས་ལ་རྒྱུ་དུས་ཀྱི་རྣམ་ཤེས་དང༌། འབྲས་བུ་མྱོང་དུས་ཀྱི་རྣམ་ཤེས་ལ་འབྲས་དུས་ཀྱི་རྣམ་ཤེས་ཏེ་གཉིས་ཡོད། །མིང་གཟུགས་ནི་རྣམ་པར་ཤེས་པ་མའི་མངལ་ལ་སོགས་པར་ཞུགས་ནས་ཕུང་པོ་རིམ་གྱིས་འགྲུབ་པའི་གནས་སྐབས་ཏེ་ཚོར་བ་འདུ་ཤེས་འདུ་བྱེད་རྣམ་ཤེས་ཏེ་མིང་བཞི་དང་གཟུགས་སོ། །སྐྱེ་
མཆེད་ནི་མིག་རྣ་བ་སྣ་ལྕེ་ལུས་ཡིད་དེ་ནང་གི་སྐྱེ་མཆེད་དྲུག་གོ །རེག་པ་ནི་ཕྱིའི་ཡུལ་ནང་གི་རྣམ་ཤེས་བར་དབང་པོ་གསུམ་འདུས་ནས་ཡུལ་གཅོད་པའོ། །ཚོར་བ་ནི། དེ་ལྟར་ཡུལ་དང་དུ་བླངས་པས་ཚོར་བ་བདེ་སྡུག་བར་མ་གསུམ་སྐྱེས་པའོ། །སྲེད་པ་ནི། དེའི་ཚེ་ཚོར་བ་བདེ་བ་ལ་དང་དུ་ལེན་འདོད་ཀྱི་སྲེད་པ། སྡུག་བསྔལ་ལ་སྤོང་འདོད་ཀྱི་སྲེད་པ་སྐྱེས་པའོ། །ལེན་པ་ནི་སྲེད་པ་སྐྱེས་པས་འདོད་པའི་ཡུལ་དང་དུ་ལེན་པའི་ཕྱིར་རྒྱུག་པའོ། །སྲིད་པ་ནི། སྲེད་ལེན་གྱིས་གསོས་པས་ཚེ་ཕྱི་མ་འགྲུབ་ངེས་ཀྱི་ལས་གྲུབ་པའོ། །སྐྱེ་བ་ནི། ལས་དེའི་རྒྱུས་ཡང་ཕྱི་མའི་གནས་རིས་སུ་སྐྱེ་བའོ། །རྒ་ཤི་ནི། སྐྱེ་བའི་གནས་སྐབས་ནས་བརྩམས་ཏེ་འཆི་བའི་བར་རྒ་བ་དང༌། དེ་ནས་འཆི་བ་ནི་ཤི་བའོ། །འདི་གཉིས་ཡན་ལག་གཅིག་ཏུ་བཞག་པ་ནི་མ་རྒས་པར་འཆི་བའང་ཡོད་པས་ཐམས་ཅད་ལ་རིམ་གྱིས་འབྱུང་བར་མ་ངེས་པའོ། །གཞན་མི་འདོད་པ་བྱུང་ནས་ཡིད་གདུང་བ་མྱ་ངན་དང༌། མྱ་ངན་དེ་ལས་སྐྱེས་པ་ངག་གིས་བརྗོད་པ་སྨྲེ་སྔགས་དང༌། ལུས་ལ་སྡུག་བསྔལ་འབྱུང་བ་སྡུག་བསྔལ་དང༌། །སེམས་ལ་སྡུག་བསྔལ་སྐྱེས་པས་ཡིད་མི་བདེ་བ་དང༌། ཕན་ཚུན་མི་མཐུན་པར་རྩོད་པས་འཁྲུགས་པ་ལ་སོགས་པའང་ཐམས་ཅད་ལ་འབྱུང་བར་མ་ངེས་པས་ཡན་ལག་ཏུ་མ་བཞག་ལ་སྐྱོ་བ་བསྐྱེད་པའི་ཕྱིར་རྒ་ཤིའི་
འཁོར་དུ་གསུངས་སོ། །གསུམ་པ་རྣམ་པར་གཞག་པ་ལ་བཞི། དང་པོ་ནི། སྔོན་གྱི་མཐའ་མི་ཤེས་པ་དང༌། ཕྱི་མའི་མཐའ་མི་ཤེས་པ་དང༌། ད་ལྟར་བྱུང་བ་མི་ཤེས་པ་སྟེ་རྨོངས་པ་གསུམ་བཟློག་པའི་དོན་དུ་རྟེན་འབྲེལ་ཡན་ལག་བཅུ་གཉིས་སུ་བཞག་སྟེ། མ་རིག་འདུ་བྱེད་གཉིས་སྐྱེ་བ་སྔོན་མའི་སྐབས་དང༌། སྐྱེ་བ་རྒ་ཤི་གཉིས་ཕྱི་མའི་སྐབས་དང༌། བར་གྱི་བརྒྱད་ད་ལྟའི་སྐབས་ཏེ་དེ་གསུམ་ལ་རྨོངས་པ་བཟློག་གོ །གཉིས་པ་ལམ་གསུམ་དུ་རྣམ་པར་བཞག་ན། །དང་པོ་བརྒྱད་པ་དགུ་ཉོན་མོངས། གཉིས་དང་བཅུ་པ་ལས་ཡིན་ཏེ། ལྷག་མ་རྣམས་ནི་སྡུག་བསྔལ་ལོ། །ཞེས་གསུངས་པ་ལྟར་ཉོན་མོངས་པའི་ལམ་གསུམ། ལས་ཀྱི་ལམ་གཉིས། སྡུག་བསྔལ་གྱི་ལམ་བདུན་ནོ། །གསུམ་པ་སྐྱེ་བ་འགྲུབ་པའི་རྒྱུ་འབྲས་ཀྱི་དབང་དུ་བཞག་ན། ལས་གཉིས་ཉོན་མོངས་གསུམ་དང་ལྔ་རྒྱུ་དུས་ཀྱི་རྣམ་ཤེས་དང་དྲུག་ནི་རྒྱུ་ཡིན་ལ། མིང་གཟུགས་སོགས་སྡུག་བསྔལ་དྲུག་འབྲས་དུས་ཀྱི་རྣམ་ཤེས་དང་བདུན་ནི་འབྲས་བུའོ། །ཡང་ན་རྣམ་ཤེས་རྒྱུར་བ་གྲངས་ནས་རྒྱུ་དྲུག་དང་འབྲས་བུ་དྲུག་ཅེས་ཀྱང་ཟེར་རོ། །འདི་དག་སྔ་མ་སྔ་མ་ལས་ཕྱི་མ་ཕྱི་མ་སྐྱེ་བས་ཐམས་ཅད་ལ་རྒྱུ་འབྲས་གཉིས་ཀའི་ཆ་ཡོད་ཀྱང༌། འདིར་སྐྱེ་བ་འགྲུབ་པའི་རྒྱུ་འབྲས་ཀྱི་དབང་དུ་བྱས་སོ། །བཞི་པ་འཕེན་བྱེད་སོགས་ཀྱི་སྒོ་ནས་བཞག་ན། མ་རིག་པ་བདག་འཛིན་མཚུངས་
ལྡན་དང་བཅས་པས་ཀུན་ནས་བསླངས་ཏེ་ལས་བསགས་པས་སྐྱེ་བ་ཕྱི་མར་འཕེན་པས་ན་འཕེན་བྱེད་ཡིན་ལ། རྣམ་ཤེས་ལ་རྒྱུ་དུས་ཀྱི་རྣམ་ཤེས་འཕེན་བྱེད་དང༌། འབྲས་དུས་ཀྱི་རྣམ་ཤེས་འཕང་བ་ཡིན་ནོ། །འབྲས་དུས་ཀྱི་རྣམ་ཤེས་དེ་དང་བཅས་པ་ཚོར་བ་ཡན་ལྔ། ལས་དེས་འཕངས་པའི་འབྲས་བུ་ཡིན་པས་འཕངས་པའོ། །སྲེད་ལེན་སྲིད་པ་གསུམ་ནི་སྐྱེ་བ་ཕྱི་མ་འགྲུབ་བྱེད་དང༌། སྐྱེ་བ་རྒ་ཤི་གཉིས་ནི་གྲུབ་པ་སྟེ། འཕེན་བྱེད་གཉིས། འཕང་པ་ལྔ། འགྲུབ་བྱེད་གསུམ། གྲུབ་པ་གཉིས་སོ། །ཚེ་དུ་ལ་རྫོགས་ནི། རིང་བའི་དབང་དུ་བྱས་ན་ཚེ་གསུམ་ལ་རྫོགས་ཏེ། འཕེན་བྱེད་གཉིས་ཚེ་གཅིག །འཕང་བ་ལྔ་དང་འགྲུབ་བྱེད་གསུམ་དང་བརྒྱད་ཚེ་གཅིག །གྲུབ་པ་གཉིས་ཚེ་གཅིག་གོ །དེ་ལྟར་ན་སྐྱེ་བ་རེ་རེའི་སྐབས་སུ་ཡང་མ་རིག་པའི་སྒོ་ནས་ལས་གསོག་པ་ནི་ཕྱི་མའི་སྐྱེ་བ་འཕེན་བྱེད་ཡིན་པས་རྟེན་འབྲེལ་གཞན་གྱི་མགོ་ཡིན་ལ། སྔ་མའི་འཕེན་བྱེད་ཀྱིས་ད་ལྟའི་མིང་གཟུགས་སོགས་ལྔ་པོ་འདི་འཕངས་པ་ནི་རྟེན་འབྲེལ་གཞན་གྱི་རྐེད་པ་ཡིན། །ཡང་ཚེ་རབས་སྔ་མའི་སྔ་མ་དེའི་ལས་ཀྱིས་སྔ་མ་དེ་འཕངས་ནས། སྐབས་དེའི་འགྲུབ་བྱེད་ཀྱིས་ད་ལྟའི་སྐྱེ་ཤི་འདི་གཉིས་གྲུབ་པ་ནི་རྟེན་འབྲེལ་གཞན་གྱི་མཇུག་ཡིན་པས་དེ་ལྟར་ཐོག་མ་མེད་པ་ནས་འཁོར་རོ། །ཡང་ན་ཉེ་བའི་དབང་དུ་བྱས་ན་ཚེ་གཉིས་ལ་རྫོགས་པར་འདོད་དེ། འཕེན་
བྱེད་གཉིས་ཀྱིས་ལས་བསགས་པ་དེ་ཉིད་སྲེད་ལེན་གྱིས་གསོས་བཏབ་པས་སྐྱེ་བ་ཕྱི་མ་འགྲུབ་ངེས་སུ་བྱས་པ་ནི་སྲིད་པ་ཡིན་པས་རྒྱུ་དུས་ཀྱི་རྣམ་ཤེས་དང་བཅས་པ་དྲུག་ཚེ་གཅིག་ལ་རྫོགས་ལ་རྒྱུ་དེས་ཕྱི་མའི་གནས་སུ་སྐྱེས་ནས་མིང་གཟུགས་སོགས་བཞི་རིམ་པས་འགྲུབ་ནས་ཤི་ནས་འབྲས་བུ་དྲུག་ཚེ་གཅིག་ལ་རྫོགས་པའོ། །དེ་ཡང་འཕེན་བྱེད་ཀྱི་ལས་ཡོད་ཀྱང་འཆི་ཀ་ཚུན་སྲེད་ལེན་གྱིས་གསོས་མ་བཏབ་ན་སྐྱེ་བ་ཕྱི་མ་མི་འགྲུབ་པས་འཕེན་བྱེད་དང་འགྲུབ་བྱེད་ཚེ་གཅིག་ལ་རྫོགས་དགོས་ལ། །འཕངས་པ་དེ་ཡང་སྐྱེ་དགོས་པ་དང༌། དེ་ལ་འཆི་བ་ཡོད་པས་འཕང་བ་དང༌། གྲུབ་པ་ལྷན་ཅིག་གོ །འཕེན་ཕྱེད་དང་འཕངས་པ་དེ་གཉིས་ཀྱི་བར་དུ་ནི་ཚེ་དུ་མས་ཆོད་པ་སྲིད་ལ། འགྲུབ་བྱེད་དང་གྲུབ་པ་གཉིས་ཀྱི་བར་དུ་ཚེ་རབས་གཞན་གྱིས་ཆོད་པ་མི་སྲིད་དོ། །དེ་ལྟར་ན་ཚེ་གསུམ་གྱིས་མ་རྫོགས་སོ་ཞེ་ན། འཕེན་བྱེད་དང་འཕངས་པའི་བར་དུ་ཚེ་རབས་དུ་མས་ཆོད་ཀྱང་དེ་དག་རྟེན་འབྲེལ་གཞན་གྱི་ཚེ་ཡིན་པས་སྐྱོན་མེད་དོ། །དེས་ན་ཚེ་གསུམ་དང་གཉིས་ཀྱིས་རྫོགས་པ། གཉིས་ཀ་ཡོད་ལ་དེ་ལས་ལྷག་པ་ནི་མེད་དོ། །དོན་འདི་དག་ལ་ལེགས་པར་དཔྱད་ནས་འཁོར་བར་སྐྱེ་བ་འགྲུབ་བྱེད་ཀྱི་རྩ་བ་སྲེད་ལེན་ཡིན་པ་དང༌། སྲེད་ལེན་གྱི་རྩ་བ་ཆོད་ན་ལས་ཡོད་ཀྱང་སྐྱེ་བ་མི་ལེན་པ་དང༌། དུས་ཐམས་ཅད་དུ་སྡུག་བསྔལ་ཅི་སྐྱེས་སྲེད་ལེན་ཀུན་འབྱུང་གིས་མཚམས་སྦྱར་
ནས་ཉམས་སུ་མྱོང་བ་སོགས་ལ་གོ་བའི་གཏིང་རྙེད་པར་བྱའོ། །སྒོམ་ཚུལ་ནི། ལུགས་འབྱུང་ལུགས་ལྡོག་གི་སྒོ་ནས་སྒོམ་པ་སྟེ། ལུགས་འབྱུང་ལྡོག་འདི་ལ་འཇོག་ཚུལ་གཉིས་ཏེ། འཁོར་བར་སྐྱེ་བའི་རིམ་པ་ལ་ལུགས་འབྱུང་དང༌། འཁོར་བ་འགག་པའི་རིམ་པ་ལ་ལུགས་ལྡོག་ཏུ་བཞག་པ་ཞིག་དང༌། མ་རིག་པ་ནས་རིམ་པས་བགྲང་ན་སྐྱེ་རིམ་དང་འགོག་རིམ་གང་ཡིན་ཀྱང་ལུགས་འབྱུང་དང༌། རྒ་ཤི་ནས་རིམ་མིན་དུ་ཡར་བགྲང་ན་སྐྱེ་རིམ་དང་འགག་རིམ་གང་ཡིན་ཀྱང་ལུགས་ལྡོག་ཏུ་བཞེད་པ་གཉིས་ཡོད། །དང་པོ་ལྟར་ན་མ་རིག་པའི་རྐྱེན་གྱིས་འདུ་བྱེད། །འདུ་བྱེད་ཀྱི་རྐྱེན་གྱིས་རྣམ་ཤེས་ལ་སོགས་པའམ། རྒ་ཤི་ཅི་ལས་བྱུང་ན་སྐྱེ་བ་ལས་བྱུང་སོགས་གང་ཡིན་ཀྱང་ལུགས་འབྱུང་དུ་བཞེད། །མ་རིག་པ་འགག་པས་འདུ་བྱེད་འགག། འདུ་བྱེད་འགག་པས་རྣམ་ཤེས་འགག་སོགས་སམ། རྒ་ཤི་གང་གིས་འགག་ན་སྐྱེ་བ་འགག་པས་འགག་སོགས་གཉིས་ཀ་ལུགས་ལྡོག་ཏུ་བཞེད་ཕྱི་མ་ལྟར་ན་མ་རིག་པའི་རྐྱེན་གྱིས་འདུ་བྱེད་སོགས་སམ་མ་རིག་པ་འགག་པས་འདུ་བྱེད་འགག་པ་སོགས་གང་ཡིན་ཀྱང་ལུགས་འབྱུང་དང༌། རྒ་ཤི་ཅི་ལས་བྱུང་ན་སྐྱེ་བ་ལས་བྱུང་སོགས་སམ། །སྐྱེ་བ་འགགས་པས་རྒ་ཤི་འགག །སྲིད་པ་འགགས་པས་སྐྱེ་བ་འགག་སོགས་གང་ཡིན་ཀྱང་ལུགས་ལྡོག་ཏུ་བཞེད། ལུགས་འབྱུང་ལྡོག་ཕྱི་མ་འདི་ལྟར་ལ་བདེན་བཞི་ཤེས་པའི་གོ་རིམ་དང་སྦྱར་བ་མངོན་པ་ཀུན་བཏུས་
ལས་བྱུང་བ་ལྟར་ན། སྐྱེ་རིམ་ལུགས་འབྱུང་དང་སྦྱར་ན་ཀུན་འབྱུང་གི་བདེན་པ་གཏན་ལ་ཕེབས་ལ། སྐྱེ་རིམ་ལུགས་ལྡོག་དང་སྦྱར་ན་སྡུག་བདེན་གཏན་ལ་ཕེབས། དེ་བཞིན་དུ་འགགས་རིམ་ལུགས་འབྱུང་ལྡོག་གཉིས་ཀྱིས་ལམ་དང༌། འགོག་པ་གཉིས་གཏན་ལ་ཕེབས་ཏེ། དེ་ཡང་ཀུན་འབྱུང་ཉོན་མོངས་པ་ཐམས་ཅད་ཀྱི་རྩ་བ་མ་རིག་པ་ཡིན་ལ། དེ་ལས་འདུ་བྱེད་ཀྱིས་ལས་བསགས་པའི་ཕྱིར། །དང་པོ་ཀུན་འབྱུང་ལས་ཉོན་གཉིས་ནས་བརྩམས་ཏེ་མ་རིག་པའི་རྐྱེན་གྱིས་འདུ་བྱེད་སོགས་ཤེས་རབ་ཀྱིས་གཏན་ལ་འབེབས་པ་ནི། ཀུན་ནས་ཉོན་མོངས་ཕྱོགས་ཀྱི་རྒྱུ་ཀུན་འབྱུང་གཏན་ལ་འབེབས་པ་ཡིན་ལ། ཡང་འཁོར་བའི་སྡུག་བསྔལ་ཐམས་ཅད་ཀྱི་གཙོ་བོ་སྐྱེ་བ་དང་རྒ་ཤི་གཉིས་ཡིན་ལ། དེས་ན་རྒ་ཤི་ཅི་ལས་བྱུང་ན་སྐྱེ་བ་ལས་བྱུང༌། སྐྱེ་བ་ཅི་ལས་བྱུང་ན་སྲིད་པ་ལས་བྱུང༌། སྲིད་པ་ཅི་ལས་བྱུང་ན་ལེན་པ་ལས་བྱུང་བ་སོགས་ལུགས་ལྡོག་དང་སྦྱར་བས་ཀུན་ཉོན་ཕྱོགས་ཀྱི་འབྲས་བུ་སྡུག་བདེན་གཏན་ལ་ཕེབས། ཡང་ཀུན་འབྱུང་མ་རིག་པའི་རྩ་བ་ལམ་བདེན་གྱི་ངོ་བོ་བདག་མེད་རྟོགས་པའི་ཤེས་རབ་ཀྱིས་དཔྱད་པས། མ་རིག་པ་འགགས་པས་འདུ་བྱེད་འགགས་སོགས་འགག་རིམ་ལུགས་འབྱུང་གཏན་ལ་ཕེབས་པས་རྣམ་བྱང་ཕྱོགས་ཀྱི་རྒྱུ་ལམ་བདེན་གཏན་ལ་ཕེབས། ཡང་སྤང་བྱ་འཁོར་བའི་སྡུག་བསྔལ་གྱི་གཙོ་བོ་སྐྱེ་ཤི་གཉིས་འགགས་པ་ནི་འགོག་བདེན་ཡིན་ལ། དེས་
ན་སྐྱེ་བ་འགགས་པས་རྒ་ཤི་འགག །སྲིད་པ་འགགས་པས་སྐྱེ་བ་འགག །ལེན་པ་འགགས་པས་སྲིད་པ་འགགས་སོགས་ནས། མ་རིག་པ་འགགས་པས་འདུ་བྱེད་འགག་གི་བར་དུ་བསམ་པས་རྣམ་བྱང་གི་འབྲས་བུ་འགོག་བདེན་གཏན་ལ་ཕེབས་པ་ཡིན་ནོ། །འདི་དག་ལ་ཞིབ་ཏུ་བརྟགས་ནས་འཁོར་བའི་སྡུག་བསྔལ་གྱི་ཕུང་པོ་ཆེན་པོ་འདིའི་རྩ་བ་བདག་འཛིན་མ་རིག་པ་ལས་བྱུང་བ་དང༌། ལམ་ཐམས་ཅད་ཀྱི་རྩ་བ་བདག་མེད་རྟོགས་པའི་ཤེས་རབ་ཡིན་པ་སོགས་ཀྱི་དོན་ཐོས་བྱུང་ལས་འདས་ནས་བསམ་བྱུང་གིས་ངེས་པ་རྙེད་པ་ལ་འབད་དགོས་ཏེ་རྟེན་ཅིང་འབྲེལ་བར་འབྱུང་བ་འདི་ནི་རྒྱལ་བ་བདེན་པར་སྨྲ་བའི་གསུང་གི་མཛོད་ཟབ་མོའི་གཅེས་པ་ཡིན་པའི་ཕྱིར་རོ། །ལེའུ་ལྔ་པ་འཁོར་ལོར་ཆེན་པོ་བཞིའི་སྐབས་སུ་ལོག་འཚོ་ལྔ་ནི། ཐབས་ཀྱིས་བརྐུ་བའམ་གཞོག་སློང་ནི་རང་ལ་ཡོད་པ་སྤངས་ནས་གཞན་གྱིས་ཐོས་པར་མེད་སྐད་འདོན་པ་སོགས་དངོས་སུ་མི་སློང་བར་ཐབས་གྱིས་རྙེད་པ་ཚོལ་བའོ། །རྙེད་པས་རྙེད་འཚོལ་ནི་སྔར་གཞན་གྱིས་རང་ལ་བྱིན་པ་ལ་ཡང་ཡང་བསྔགས་པ་བརྗོད་ཅིང་ཐབས་དེས་རྙེད་པ་འཚོལ་བའོ། །ཁ་བསགས་ནི། ཕ་རོལ་པོ་ལ་བསྔགས་པ་བརྗོད་པ་སོགས་ངོ་དགས་རྙེད་པ་ཚོལ་བའོ། །ཚུལ་འཆོས་ནི། །རང་ལ་ཡོན་ཏན་མེད་ཀྱང་ཡོད་པ་ལྟར་བཅོས་ནས་དད་པས་སྦྱིན་པ་འཚོལ་བའོ། །ཐོབ་འཇལ་ནི། སྦྱིན་བདག༌།།།་མོས་
བདག་རྙེད་པ་འདི་ལྟ་བུ་བྱིན་གྱིས་ཁྱོད་ཀྱིས་ཀྱང་དགོས་སོ་ཞེས་ཟེར་བའམ་ཡང་ན་བདག་ལྟ་བུའི་ཡོན་ཏན་དང་ལྡན་པ་ལ་རྙེད་པ་འདི་ལྟ་བུའི་མི་འོས་སོ་ཞེས་འཁང་པའོ། །མཐོ་རིས་ཡོན་ཏན་བདུན་ནི། །ཚེ་རིང་དེ་བཞིན་ནད་མེད་དང༌། །གཟུགས་དང་སྐལ་བ་བཟང་དང་རིགས། །ནོར་དང་ཤེས་རབ་དག་དང་བདུན། །ལེའུ་དྲུག་པ་སྐྱབས་འགྲོའི་སྐབས་སུ་འཇིགས་པ་གསུམ་ནི་སྤྱིར་འཁོར་བ་སྡུག་བསྔལ་གྱི་འཇིགས་པ། སྒོས་རང་དོན་ཡིད་བྱེད་ཀྱིས་འཇིགས་པ། ཉིང་སྒོས་ཐ་མལ་འཁྲུལ་འཛིན་གྱིས་འཇིགས་པའོ། །ཡང་ཐུབ་པ་རྣམས་ཀྱི་ཡོན་ཏན་མཐའ་ཡས་ཏེ། སོགས་ཀྱི་སྐབས་སུ་སྤངས་པ་གཉིས་ནི་མཐོང་སྤངས་དང་སྒོམ་སྤངས་ཏེ། །དང་པོ་མཐོང་སྤངས་བརྒྱ་དང་བཅུ་གཉིས་ནི། །ཆགས་ཁྲོ་ང་རྒྱལ་རྨོངས་ཐེ་ཚོམ། །འཇིག་མཐར་ལོག་ལྟ་ལྟ་མཆོག་འཛིན། །ཚུལ་ཁྲིམས་བརྟུལ་ཞུགས་མཆོག་འཛིན་པ། །ལྟ་མིན་ལྔ་དང་ལྟ་བ་ལྔ། མཐོང་སྤངས་རྩ་བ་བཅུ་ཡིན་ནོ། །དེ་དག་བདེན་པ་བཞི་པོ་ལ། །འཇིག་མཐར་ལོག་རྨོངས་ཐེ་ཚོམ་དངོས། །ཁོང་ཁྲོ་དབང་གིས་ལོག་པར་འཇུག །ལྷག་མ་རྣམ་ནི་བརྒྱུད་ནས་འཇུག །འདོད་པའི་ཁམས་ན་བཅུ་ག་སྟེ། །གཟུགས་དང་གཟུགས་མེད་ཁོང་ཁྲོ་མིན། །དེ་ལྟར་བརྒྱ་དང་བཅུ་གཉིས་སོ། །ཞེས་པའི་དང་པོ་མཐོང་སྤངས་རྩ་བ་བཅུ་སྟེ། འདོད་ཆགས་ཁོང་ཁྲོ་ང་རྒྱལ་མ་རིག་པ་ཐེ་ཚོམ་སྟེ་ལྟ་
མིན་ལྔ། འཇིག་ལྟ་མཐར་ལྟ་ལོག་ལྟ་ལྟ་བ་མཆོག་འཛིན་ཚུལ་ཁྲིམས་བརྟུལ་ཞུགས་མཆོག་འཛིན་ཏེ་ལྟ་བ་ལྔ་དང་བཅུའོ། །དེ་དག་བདེན་པ་བཞི་ལ་ལོག་པར་ཞུགས་ཚུལ་གྱི་སྒོ་ནས་བརྒྱ་དང་བཅུ་གཉིས་ཏེ། འདོད་ཁམས་ན་བདེན་པ་བཞི་པོ་རེ་རེ་ལ་ལོག་པར་བཅུ་རེ་འཇུག་པས་བཞི་བཅུ། ཁམས་གོང་མ་གཉིས་ན་ཁོང་ཁྲོ་མ་གཏོགས་དགུ་རེ་ཞུགས་པས་དགུ་བཞི་སུམ་ཅུ་རྩ་དྲུག་པ་གཉིས་ཏེ་བདུན་ཅུ་རྩ་གཉིས། སྔར་གྱི་བཞི་བཅུ་དང་བསྡོམས་པས་བརྒྱ་དང་བཅུ་གཉིས་སོ། །དེ་དག་ཇི་ལྟར་ལོག་པར་འཇུག་ན། ལྟ་བ་གསུམ་ལྟ་མིན་གཉིས་དང་ལྔ་ནི་དངོས་སུ་ལོག་པར་འཇུག་སྟེ། བདེན་པ་དེ་དག་ལ་དམིགས་ནས་འཇིག་ལྟས་བདག་དང་བདག་གིར་ལྟ། མཐར་ལྟས་རྟག་ཆད་དུ་ལྟ། ལོག་ལྟས་མེད་པར་ལྟ། མ་རིག་པས་བདེན་པ་དེའི་དོན་མི་ཤེས། ཐེ་ཚོམ་གྱིས་བདེན་ནམ་མི་བདེན་སྙམ་དུ་ཐེ་ཚོམ་ཟ་བའོ། །དེ་དག་ལ་བདེན་པ་དང་བར་དུ་གཞན་གྱིས་མཆོད་པར་འཇུག་པས་ན་དངོས་སུ་ལོག་ཞུགས་ཡིན་ནོ། །ལྟ་བ་གཉིས་དང་ལྟ་མིན་གཉིས་ཏེ་བཞི་ནི་བརྒྱུད་ནས་ལོག་པར་འཇུག་སྟེ། །བདེན་པའི་དོན་ལྟ་བས་ཇི་ལྟར་བཟུང་བའི་ལྟ་ངན་དེ་ལ་འདོད་ཆགས་ཀྱིས་ཆགས། ང་རྒྱལ་གྱིས་ལྟ་ངན་དེས་སེམས་ཁེངས། ལྟ་བ་མཆོག་འཛིན་གྱིས་ལྟ་ངན་ལ་མཆོག་ཏུ་འཛིན། ཚུལ་ཁྲིམས་དང་བརྟུལ་
ཞུགས་མཆོག་འཛིན་གྱིས་ལྟ་ངན་དེ་དང་འབྲེལ་བའི་སྤྱོད་ངན་ལ་དག་གྲོལ་ངེས་འབྱིན་དུ་ལྟ་བའོ། །འདི་དག་ལྟ་བས་བདེན་པ་ལ་དམིགས་ཤིང་འདི་དག་གིས་ལྟ་བ་ལ་དམིགས་པས་བདེན་པ་དང་བར་དུ་ལྟ་ངན་དེས་ཆོད་པས་བརྒྱུད་ནས་ལོག་པར་ཞུགས་པའོ། །ཁོང་ཁྲོ་ནི། དབང་གིས་ལོག་ཞུགས་ཡིན་ཏེ་ལྟ་ངན་དེ་བརྒྱུད་ན་ཡོད་པའི་དབང་གིས་དེ་དང་མི་མཐུན་པའི་ལྟ་བ་གཞན་ལ་ཁོང་ཁྲོ་བ་སྟེ་འདི་ནི་བདེན་པ་དང་རང་གི་ལྟ་བ་གཉིས་ཀ་ལ་མ་དམིགས་པས་དབང་གིས་ལོག་ཞུགས་ཡིན་ནོ། །འདི་དག་འགོག་ལམ་གཉིས་ལ་འཇུག་ཚུལ་ལ་ཞིབ་ཆ་ཅུང་ཟད་ཡོད་ཀྱང་འདི་ཙམ་གྱིས་ཀྱང་མི་ཆོག་པ་མེད་དོ། །སྒོམ་སྤངས་བཞི་བརྒྱ་བཅུ་བཞི་ནི། འདོད་ཆགས་ཁོང་ཁྲོ་ང་རྒྱལ་རྨོངས། །འཇིག་ལྟ་མཐའ་ལྟ་སྒོམ་སྤངས་དྲུག །འདོད་པར་དྲུག་ཡོད་གཟུགས་གཟུགས་མེད། །ཁོང་ཁྲོ་མ་གཏོགས་ལྔ་རེ་ཡོད། །དེ་ལས་དང་ཆེ་འབྲིང་གིས། །ཕྱེ་བས་བཞི་བརྒྱ་བཅུ་བཞིའོ། །ཞེས་པས་སྒོམ་སྤངས་རྩ་བ་དྲུག་སྟེ། །འདོད་ཆགས་ཁོང་ཁྲོ་ང་རྒྱལ་མ་རིག་པ་འཇིག་ཚོགས་ལ་ལྟ་བ་མཐར་འཛིན་པའི་ལྟ་བ་དང་དྲུག་གོ །དེ་ཡང་འདོད་ཁམས་ན་དྲུག །གཟུགས་གཟུགས་མེད་གཉིས་ན་ལྔ་རེ་སྟེ་ཁམས་ཀྱིས་ཕྱེ་ན་བཅུ་དྲུག་གོ །དེ་ཡང་འདོད་ཁམས་ན་དྲུག །གཟུགས་གཟུགས་མེད་གཉིས་ན་ལྔ་རེ་སྟེ་ཁམས་ཀྱིས་ཕྱེ་ན་བཅུ་དྲུག་གོ །ཡང་འདོད་ཁམས་ན་དྲུག །བསམ་གཏན་བཞི་རེ་རེ་ན་ལྔ་རེ་སྟེ་ལྔ་བཞི་ཉི་ཤུ། གཟུགས་མེད་བཞི་རེ་རེ་ན་ལྔ་རེ་སྟེ་ཉི་ཤུ་
བསྡོམས་པས་སའི་སྒོ་ནས་དབྱེ་ན་བཞི་བཅུ་ཞེ་དྲུག་གོ །དེ་དག་ས་དང་ཆེ་འབྲིང་གི་སྒོ་ནས་དབྱེ་ན་བཞི་བརྒྱ་བཅུ་བཞི་སྟེ། སའི་སྒོ་ནས་དབྱེ་བའི་ཞེ་དྲུག་པོ་རེ་རེ་ལའང་དགུ་རེ་ཕྱེ་བས་སམ། ཡང་ན་ཁོང་ཁྲོ་མ་གཏོགས་པའི་ཉོན་མོངས་ལྔ་པོ་ས་དགུ་དང་ཆེ་འབྲིང་དགུས་ཕྱེས་པས་བརྒྱད་ཅུ་རྩ་གཅིག་སྟེ། །བརྒྱད་ཅུ་རྩ་གཅིག་པ་ལྔ་བསྡོམས་པས་བཞི་བརྒྱ་དང་ལྔ་འདོད་ཁམས་ཀྱི་ཁོང་ཁྲོ་དགུ་བསྣན་པས་བཞི་བརྒྱ་དང་བཅུ་བཞིའོ། །ཁམས་ནི་གསུམ་སྟེ། འདོད་ཁམས། གཟུགས་ཁམས། གཟུགས་མེད་ཀྱི་ཁམས་སོ། །ས་ནི་དགུ་སྟེ། འདོད་ཁམས། བསམ་གཏན་དང་པོ། །གཉིས་པ། གསུམ་པ། བཞི་པ། ནམ་མཁའ་མཐའ་ཡས། རྣམ་ཤེས་མཐའ་ཡས། ཅི་ཡང་མེད་པ། །ཡོན་མིན་མེད་མིན་ཏེ་ཁམས་གསུམ་ས་དགུ་པའོ། །ཆེ་འབྲིང་ནི་འདོད་པའི་འདོད་ཆགས་ལྟ་བུ་ལའང༌། ཆེན་པོའི་ཆེན་པོ། ཆེན་པོའི་འབྲིང་པོ། ཆེན་པོའི་ཆུང་ངུ༌། །འབྲིང་པོའི་ཆེན་པོ། འབྲིང་པོའི་འབྲིང་པོ། །འབྲིང་པོའི་ཆུང་ངུ༌། ཆུང་ངུའི་ཆེན་པོ། ཆུང་ངུའི་འབྲིང་པོ། ཆུང་ངུའི་ཆུང་ངུ་དང་དགུའོ། །སྤོང་ཚུལ་ནི་མཐོང་སྤངས་ཀུན་བརྟགས་ཡིན་པས་བདེན་བཞིའི་རང་བཞིན་མཐོང་བ་ཙམ་གྱིས་སྤངས་ལ། སྒོམ་སྤངས་རྣམས་ལྷན་སྐྱེས་ཡིན་པས་བདེན་པ་མཐོང་བ་ཙམ་གྱིས་སྤོང་མི་ནུས་པས་མཐོང་ཟིན་གོམས་
པར་བྱེད་པའི་སྒོ་ནས་རིམ་གྱིས་སྤང་དགོས་སོ། །དེ་ཡང་ཐེག་དམན་རྣམས་མཐོང་སྤངས་ནི་འདས་ལམ་ཁོ་ནས་སྤང་དགོས་ཀྱང༌། སྒོམ་སྤངས་ནི་འཇིག་རྟེན་པའི་ལམ་གྱིས་ཀྱང་སྤང་ནུས་པས་མཐོང་སྤངས་ཀྱི་སྔོན་དུ་ཡང་འདོད་པའི་སྒོམ་སྤངས་སྤོང་བ་སྲིད་པས་དེ་འདྲ་དེ་ལ་ལམ་ཐོད་རྒལ་པ་ཞེས་ཟེར་ཞིང་ཕྱིར་འོང་ཞུགས་པ་དང་ཕྱིར་མི་འོང་ཞུགས་པ་གཉིས་ཀ་ཡོད་པར་བཞེད། ཐེག་ཆེན་ལྟར་ན་སྒོམ་སྤངས་ཡང་འཇིག་རྟེན་པའི་ལམ་གྱིས་སྤང་མི་ནུས་ཏེ། འཇིག་རྟེན་པའི་ལམ་གྱིས་སྤང་བྱའི་མགོ་གནོན་པ་ཙམ་ལས་རྩ་བ་དྲུང་ནས་འབྱིན་མི་ནུས་ཞེས་བཞེད། དེ་ཡང་འཇིག་རྟེན་པའི་ལམ་ཞེས་པ་ནི་ཤེས་རབ་ལྷག་མཐོང་དང་མ་འབྲེལ་བའི་བསམ་གཟུགས་ཀྱི་ཏིང་ངེ་འཛིན་རྐྱང་པ་ཡིན་ལ། འཇིག་རྟེན་ལས་འདས་པའི་ལམ་ནི་བདག་མེད་རྟོགས་པའི་ཤེས་རབ་དང་འབྲེལ་བའི་ཞི་ལྷག་ཟུང་འཇུག་གོ །མཐོང་སྤངས་རྣམས་སྤོང་ཚུལ་ཡང་ཐེག་དམན་ལྟར་ན་མཐོང་ལམ་སྐད་ཅིག་མ་བཅུ་དྲུག་ཡོད་པ་ལས། དཔེར་ན་སྡུག་བདེན་མཐོང་བས་མཐོང་ལམ་སྐད་ཅིག་བཞིའི་དང་པོ་སྡུག་བསྔལ་ཆོས་བཟོད་ཀྱི་སྐབས་སུ་འདོད་ཁམས་ཀྱི་སྡུག་བསྔལ་མཐོང་སྤངས་བཅུ་སྤང༌། ཆོས་ཤེས་ཀྱི་སྐབས་སུ་གཉེན་པོའི་ཡེ་ཤེས་སྐྱེ། རྗེས་བཟོད་ཀྱི་
སྐབས་སུ་གཟུགས་དང་གཟུགས་མེད་ཀྱི་སྡུག་བསྔལ་མཐོང་སྤངས་བཅོ་བརྒྱད་སྤང༌། རྗེས་ཤེས་ཀྱི་སྐབས་སུ་གཉེན་པོའི་ཡེ་ཤེས་སྐྱེ། དེ་ལྟར་བདེན་པ་གཞན་གསུམ་ལའང་སྦྱར་བས་ཉི་ཤུ་རྩ་བརྒྱད་པ་ཚན་པ་བཞི་སྤངས་པས་མཐོང་སྤངས་བརྒྱ་དང་བཅུ་གཉིས་སོ། །ཐེག་ཆེན་ལྟར་ན་ཁམས་གསུམ་གའི་མཐོང་སྤངས་རྣམས་ཅིག་ཅར་དྲིལ་ནས་སྤངས་ཏེ། དེ་ཡང་བདེན་པ་རང་རང་གི་ཆོས་ཤེས་ཀྱི་སྐབས་ཁོ་ནར་སྤོང་བར་འདོད་དོ། །དེས་ན་མཐོང་ལམ་སྐད་ཅིག་བཅུ་དྲུག་པོ་འདི་ལ་ཐེག་དམན་ལྟར་ན་ཉན་ཐོས་སྡེ་པ་རྣམས་ཀྱང་བཞེད་པ་མི་འདྲ་བ་དུ་མ་ཡོད་པར་གསུངས་ལ། ཐེག་ཆེན་པའང་སློབ་དཔོན་སངྒཻ་བཟང་པོ་ནི། སྤྱིར་ཁ་ཅིག་སོ་སོར་རྟོག་པའི་སྐད་ཅིག་མ་ལ་ལྟོས་ནས་བཅུ་དྲུག་རིམ་གྱིས་འབྱུང་ཞིང་དེ་ཁོ་ན་ཉིད་ཀྱི་སྐད་ཅིག་ལ་ལྟོས་ན་སྐད་ཅིག་གཅིག་ཏུ་བཞེད་པ་དང༌། ཡང་ཁ་ཅིག་སོ་སོར་རྟེན་པའི་སྐད་ཅིག་དང་དེ་ཁོ་ན་ཉིད་ཀྱི་སྐད་ཅིག་གཉིས་ཀར་སྐད་ཅིག་མ་གཅིག་ཏུ་བཞེད་པའི་ལུགས་གཉིས་ཡོད་པར་བཤད་ཅིང༌། རང་ལུགས་ལ་སྐད་ཅིག་མ་བཅུ་དྲུག་ལ་རིམ་གྱིས་འབྱུང་པར་བཞེད། དེ་ཡང་སོ་སོར་རྟོག་པའི་སྐད་ཅིག་ཅེས་པ་ནི། གཏན་ལ་དབབ་བྱའི་ཡུལ་ལ་ལྟོས་ནས་བདེན་པ་བཞི་གཅིག་ཆར་ལ་སྒྲོ་འདོགས་ཆོད་པ་མི་སྲིད་པས། བདེན་བཞི་སོ་སོར་སྒྲོ་འདོགས་རིམ་གྱིས་གཅོད་པ་ལ་ལྟོས་ནས་སྐད་ཅིག་
བཅུ་དྲུག་ཡིན་ལ། དེ་ཁོ་ན་ཉིད་ཀྱི་སྐད་ཅིག་ཅེས་པ་རྟོགས་བྱ་ཆོས་ཉིད་ལ་དབྱེ་བ་མེད་པས་བདག་མེད་མངོན་སུམ་མཐོང་བའི་སྐད་ཅིག་གཅིག་ཏུ་འདོད་པ་ཡིན་ནོ། །འཕགས་པ་ཐོགས་མེད་ཀྱི་གཞུང་ལས། བདེན་བཞི་སྐད་ཅིག་བཅུ་དྲུག་འདི་ལྟར་བཞེད་དེ། དང་པོ་སྡུག་བསྔལ་ཆོས་བཟོད་པའི་སྐབས་སུ་མཐོང་སྤངས་རྣམས་སྤངས། ཆོས་ཤེས་ཀྱི་སྐབས་སུ་གཉེན་པོའི་ཡེ་ཤེས་སྐྱེ། རྗེས་བཟོད་ཀྱིས་ཆོས་བཟོད་ཆོས་ཤེས་ཀྱི་ཡེ་ཤེས་གཉིས་པོ་དེ་ཡང་འཕགས་པའི་ལམ་གྱི་རྟེན་གཞི་ཡིན་ནོ་སྙམ་དུ་ངེས་པར་བྱེད། རྗེས་ཤེས་ཀྱིས་རྗེས་བཟོད་དེ་ཡང་འཕགས་པའི་ལམ་གྱི་རྟེན་གཞི་ཡིན་ནོ་སྙམ་དུ་ཤེས་པའོ། །དེས་ན་ཆོས་བཟོད་ཆོས་ཤེས་གཉིས་ནི་ཡུལ་བདེན་པ་ལ་དམིགས་པས་གཟུང་པའི་ཡུལ་ཅན་ཡིན་ལ། རྗེས་བཟོད་རྗེས་ཤེས་གཉིས་ནི་ཡུལ་ཅན་ཡེ་ཤེས་ལ་དམིགས་པ་འཛིན་པའི་ཡུལ་ཅན་ཡིན་ནོ་ཞེས་བཞེད། འདིའི་ལུགས་ཀྱིའནག་བཅུ་དྲུག་ཏུ་བཞག་པ་རྗེས་ཐོབ་ལ་ངེས་པ་འདྲེན་ཚུལ་གྱི་དབང་དུ་བྱས་ནས་བསྟན་པ་གནས་པ་སྤྲོས་པ་ལ་དགའ་བའི་ཕྱིར་རྣམ་གྲངས་སུ་བཞག་པ་ཙམ་ཡིན་གྱི། མཉམ་གཞག་རང་ངོ་ལ་ལྟོས་ནས་སྤྲོས་མེད་ཀྱི་དབང་དུ་སྐད་ཅིག་མ་གཅིག་གོ་ཞེས་བཞེད་དོ། །སློབ་དཔོན་ཀླུ་སྒྲུབ་ཀྱི་གཞུང་ལས་ནི། །སྐད་ཅིག་བཅུ་དྲུག་ཏུ་བཞག་པ་བདེན་བཞི་ལ་སྒྲོ་འདོགས་ཆོད་ཚུལ་གྱི་ཆས་དབྱེ་བ་ཙམ་སྟེ། དེ་ཡང་ཆོས་བཟོད་ཀྱིས་བདེན་བཞིའི་ཆོས་ཉིད་ལ་ཡིད་ཆེས་ནས་མི་སྐྲག་པའི་བཟོད་
པ་ཐོབ། ཆོས་ཤེས་ཀྱིས་བདེན་བཞིའི་ཆོས་ཉིད་མངོན་གསུམ་དུ་མཐོང༌། རྗེས་བཟོད་ཀྱིས་ལམ་རྗེས་ཐོབ་གྱི་ཚེ་ཡང་ཆོས་ཉིད་ལ་མི་སྐྲག་པའི་ནུས་པ་ཐོབ། །རྗེས་ཤེས་ཀྱིས་ལམ་རྗེས་ཐོབ་ཀྱི་ཚེ་བདེན་བཞིའི་ཆོས་ཉིད་ཇི་ལྟ་བ་བཞིན་ཤེས་པའི་ནུས་པ་ཐོབ་པ་ལ་ལྟོས་ནས་གཞག་པ་ཡིན་ལ། དོན་དུ་ཤེས་བྱའི་ཆོས་ཐམས་ཅད་སྐྱེ་མེད་སྤྲོས་བྲལ་དུ་མཐོང་བའི་སྐད་ཅིག་ལ་དབྱེ་བ་མེད་དེ། མདོ་ལས། སྐྱེ་བ་མེད་པ་བདེན་པ་གཅིག་ཡིན་ཏེ། བྱིས་པ་རྣམས་ནི་བདེན་པ་བཞི་ཞེས་སྨྲ། བྱང་ཆུབ་སྙིང་པོར་ཞུགས་ནས་བདེན་གཅིག་ཀྱང༌། །གྲུབ་པ་མེད་ན་བཞི་ལྟ་ག་ལ་ཡོད། །ཅེས་གསུངས་སོ། །དེས་ན་མཉམ་གཞག་སྐད་ཅིག་གཅིག་ལ་ལྡོག་ཆས་དབྱེ་བ་ཙམ་དུ་བཞེད་དོ། །སྒོམ་སྤངས་རྣམས་ནི་ལམ་སྒོམ་པའི་སྟོབས་ཀྱིས་གཉེན་པོ་སྒོམ་ལམ་ཆུང་ངུའི་ཆུང་ངུ་ནས་རིམ་གྱིས་སྐྱེས་པས་སྤང་བྱ་ཆེན་པོའི་ཆེན་པོ་ནས་རིམ་གྱིས་སྤོང་བར་འདོད་དེ་འོག་ཏུ་འཆད་དོ། །དེ་ཡང་མཐོང་སྤངས་ཀུན་བརྟགས་དང་སྒོམ་སྤངས་ལྷན་སྐྱེས་ཞེས་པའི་ཀུན་བརྟགས་དང་ལྷན་སྐྱེས་ཀྱི་དོན་ཀུན་བཏགས་ནི་བདག་ཏུ་ལྟ་བ་དང༌། རྟག་ཆད་དུ་ལྟ་བ་དང༌། ལོག་པར་ལྟ་བ་ལ་སོགས་གྲུབ་མཐའ་ངན་པས་གསར་དུ་བཏགས་པ་རྣམས་ཡིན་ལ། དེ་ཡང་ལམ་ངན་པ་ལ་ཞུགས་པའི་གང་ཟག་རྣམས་ལ་མངོན་གྱུར་དུ་ཡོད་ལ་གྲུབ་མཐས་བློ་མ་བསྒྱུར་བ་རྣམས་ལའང་ས་བོན་ཡོད་དོ། །ལྷན་སྐྱེས་ནི་ཡེ་ནས་རང་རྒྱུད་ལ་ཡོད་པའི་བདག་ལྟ།
དང་ཆགས་སྡང་སོགས་ཉོན་མོངས་པ་རྣམས་ཡིན་ཏེ། ཡུལ་ལ་དམིགས་པའི་ཆགས་པ་སོགས་སོ། །དེས་ན་མཐོང་སྤངས་ནི་བདེན་པའི་ཆོས་ཉིད་ལ་ལོག་པར་ཞུགས་ལ། སྒོམ་སྤངས་ནི་གཟུགས་སོགས་དབང་པོའི་ཡུལ་ལ་ལོག་པར་ཞུགས་པ་ཡིན་ནོ། །དེས་ན་ཡུལ་ལ་དམིགས་པས་ཞེ་སྡང་དྲག་པོ་ལྟ་བུ་སྒོམ་སྤངས་ཡིན་ཀྱང༌། །མཐོང་ལམ་སྐྱེས་པའི་འཕགས་པ་ལ་མེད་པས་སྒོམ་སྤངས་ཡིན་ཀྱང་འཕགས་ལམ་ཐོབ་ནས་རྒྱུད་ན་མེད་པ་དུ་མ་ཡོད་པར་བཞེད་དོ། །མཐོང་སྤངས་ནི་དེ་ལྟར་གྲུབ་མཐས་གསར་དུ་བཏགས་པའི་སྤང་བྱ་ཡིན་པས་མཐོང་ལམ་སྐྱེས་པའི་གང་ཟག་དེ་ནི་སྐྱེ་བ་ཐམས་ཅད་དུ་གཞན་ཕྱི་རོལ་པ་ལ་སོགས་པས་བློ་གཏན་ནས་བསྒྱུར་མི་ཐུབ་པ་ཞིག་དགོས་པ་ཡིན་ནོ། །སྤྱན་ལྔ་ནི། སྟོང་གསུམ་གྱི་གཟུགས་ཕྲ་རགས་ཐམས་ཅད་མཐོང་བ་ཤའི་སྤྱན། སེམས་ཅན་ཐམས་ཅད་གྱི་སྐྱེ་བ་དང་འཆི་བ་ཤེས་པ་ལྷའི་སྤྱན་ཆོས་ཐམས་ཅད་བདག་མེད་པར་རྟོགས་པ་ཤེས་རབ་ཀྱི་སྤྱན། ཆོས་ཀྱི་སྒོ་མོ་བརྒྱད་ཁྲི་བཞི་སྟོང་ལ་སོགས་མཁྱེན་པ་ཆོས་ཀྱི་སྤྱན། ཤེས་བྱའི་ཆོས་ཐམས་ཅད་མཁྱེན་པ་སངས་རྒྱས་ཀྱི་སྤྱན་ནོ། །མངོན་ཤེས་དྲུག་ནི། གཅིག་ལས་དུ་མ་དང༌། དུ་མ་ལས་མང་པོར་བསྒྱུར་བ་སོགས་རྫུ་འཕྲུལ་དུ་མ་ལ་དབང་བ་རྫུ་འཕྲུལ་གྱི་མངོན་ཤེས། སེམས་ཅན་ཐམས་ཅད་ཀྱི་འཆི་འཕོ་དང་སྐྱེ་བ་ཤེས་པ་ལྷའི་མིག་གི་མངོན་
ཤེས། སྟོང་གསུམ་གྱི་སྒྲ་ཆེ་ཆུང་ཐམས་ཅད་གསན་པ་ལྷའི་རྣ་བའི་མངོན་ཤེས། རང་དང་གཞན་གྱི་སྐྱེ་བ་སྔོན་མ་དུ་མ་ཤེས་པ་སྔོན་གནས་རྗེས་དྲན་གྱི་མངོན་ཤེས། སེམས་ཅན་གཞན་གྱི་སེམས་ཀྱི་བསམ་པ་ཐམས་ཅད་ཤེས་པ་གཞན་སེམས་ཤེས་པའི་མངོན་ཤེས། རང་གཞན་གྱི་རྒྱུད་ཀྱི་ལས་ཉོན་ཟད་པར་ཤེས་པ་ཟག་ཟད་ཀྱི་མངོན་ཤེས་དང་དྲུག་གོ །སྤྱན་དང་མངོན་ཤེས་གྱི་ཁྱད་པར་ནི། སྤྱན་ནི་ལས་དགེ་བའི་རྣམ་སྨིན་ལས་བྱུང་བ་ཡིན་ལ། མངོན་ཤེས་ནི་བསམ་གཏན་གྲུབ་པའི་ཏིང་འཛིན་གྱིས་ཐོབ་པ་ཡིན་ནོ། །དབང་བཅུ་ནི། བསྐལ་པའམ་བསྐལ་པ་ལས་ལྷག་པར་བཞུགས་པ་ཚེ་ལ་དབང་བ། ཏིང་ངེ་འཛིན་ལ་འཇུག་ལྡང་དང་སེམས་ཅན་ཐམས་ཅད་ཀྱི་བསམ་པ་དང་མཐུན་པར་འཇུག་པ་སེམས་ལ་དབང་བ། ནམ་མཁའ་མཛོད་ཀྱི་ལོངས་སྤྱོད་ལ་དབང་བསྒྱུར་བ་ཡོ་བྱད་ལ་དབང་བ། བཟོ་དང་ལས་ཀྱི་གནས་ཐམས་ཅད་ཤེས་པ་ལས་ལ་དབང་བ། འགྲོ་དྲུག་གང་དུ་སྐྱེ་བར་འདོད་པ་དེར་སྐྱེ་བའི་སྐྱེ་བ་ལ་དབང་བ། སྟོང་གསུམ་སངས་རྒྱས་ཀྱིས་གང་བར་སྟོན་པ་ལ་སོགས་མོས་པ་ལ་དབང་བ། གནས་ཀྱི་དབང་དུ་བྱས་པའི་སྨོན་ལམ་གང་བཏབ་འགྲུབ་པ་སྨོན་ལམ་ལ་དབང་བ། སྟོང་གསུམ་ཡུངས་འབྲུར་གཞུག་པ་ལ་སོགས་སྟོན་པ་རྫུ་འཕྲུལ་ལ་དབང་བ། ཤེས་བྱ་ཐམས་ཅད་མཁྱེན་པའི་ཡེ་ཤེས་བརྙེས་པ་ཡེ་ཤེས་ལ་
དབང་བ། ཆོས་སྒོ་ཐམས་ཅད་སྟོན་པ་ལ་ཐོགས་པ་མེད་པ་ཆོས་ལ་དབང་བ་དང་བཅུའོ། །གཟུངས་ཀྱི་སྒོ་བཞི་ནི། ཡི་གེ་ཨ་ལྟ་བུ་གཅིག་གི་དོན་ལ་བསམས་ནས་སྐྱེ་མེད་དུ་གཏན་ལ་ཕབས་པས་ཆོས་ཐམས་ཅད་སྐྱེ་མེད་དུ་གཏན་ལ་ཕེབས་པ་བཟོད་པ་ཐོབ་པའི་སྒོའི་གཟུངས། ཕན་གནོད་ཀྱི་ལས་སྒྲུབ་པའི་སྔགས་བརྩམས་ནས་ཏིང་ངེ་འཛིན་དང་ཤེས་རབ་ཀྱི་མཐུས་བྱིན་གྱིས་བརླབས་པས་བསྐལ་བའི་བར་དུ་ནུས་པ་འབྱུང་བ་ནི་སྔགས་ཀྱི་གཟུངས། ཆོས་ཀྱི་ཚིག་ཐམས་ཅད་མི་བརྗེད་པར་འཛིན་པ་ནི་ཚིག་གི་གཟུངས། །ཆོས་ཀྱི་དོན་ཐམས་ཅད་མི་བརྗེད་པར་འཛིན་པ་ནི་དོན་གྱི་གཟུངས་སོ། །སྟོབས་བཅུ་ནི། ལས་དགེ་བ་ལས་འབྲས་བུ་བདེ་བ་འབྱུང་བ་སོགས་གནས་དང༌། ལས་དགེ་བ་ལས་འབྲས་བུ་སྡུག་བསྔལ་འབྱུང་བ་སོགས་གནས་མ་ཡིན་པ་སྟེ། དེ་ལྟ་བུའི་ཚུལ་ཐམས་ཅད་མཁྱེན་པ་གནས་དང་གནས་མ་ཡིན་པ་མཁྱེན་པའི་སྟོབས། ལས་དགེ་བ་དང་མི་དགེ་བ་ལས་འབྲས་བུ་འདི་དང་འདི་ལྟ་བུ་འབྱུང་ངོ་ཞེས་རྒྱུ་འབྲས་ཀྱི་ཕྲ་ཞིབ་ཐམས་ཅད་མཁྱེན་པ་ལས་ཀྱི་རྣམ་པར་སྨིན་པ་མཁྱེན་པའི་སྟོབས་སེམས་ཅན་གྱི་དབང་པོ་རྣོ་རྟུལ་ཐམས་ཅད་མཁྱེན་པ་དབང་པོ་མཆོག་དང་མཆོག་མ་ཡིན་པ་མཁྱེན་པའི་སྟོབས། ཉན་ཐོས་ཀྱི་རིགས་ཅན་ལ་སོགས་པ་སེམས་ཅན་ཐམས་ཅད་གྱི་ཁམས་དང་ས་ཆུ་མེ་རླུང་ལ་སོགས་པ་འབྱུང་བའི་ཁམས་ཐམས་ཅད་མཁྱེན་པ་ཁམས་
སྣ་ཚོགས་མཁྱེན་པའི་སྟོབས། ཆོས་རྒྱ་ཆེན་པོ་ལ་མོས་པ་དང༌། ཟབ་མོ་ལ་མོས་པ་ལ་སོགས་པ་མཁྱེན་པ་མོས་པ་སྣ་ཚོགས་མཁྱེན་པའི་སྟོབས། ངན་འགྲོའི་ལམ་དང༌། མཐོ་རིས་ཀྱི་ལམ་དང༌། ཐར་པའི་ལམ་ལ་སོགས་པ་མཁྱེན་པ་ཀུན་ནས་འགྲོ་བའི་ལམ་མཁྱེན་པའི་སྟོབས། །བསམ་གཏན་བཞི་དང་རྣམ་ཐར་བརྒྱད་སོགས་ཏིང་ངེ་འཛིན་གྱི་སྒོ་བསམ་གྱིས་མི་ཁྱབ་པ་མཁྱེན་པ་བསམ་གཏན་རྣམ་པར་ཐར་པ་མཁྱེན་པའི་སྟོབས། རང་གཞན་གྱི་སྔོན་གྱི་སྐྱེ་བ་གྲངས་མེད་པ་མཁྱེན་པ་སྔོན་གནས་རྗེས་དྲན་མཁྱེན་པའི་སྟོབས། སེམས་ཅན་ཐམས་ཅད་འདི་ནས་འཆི་འཕོས་ཏེ་འདིར་སྐྱེ་ཞེས་པ་ལྟ་བུ་ཕྱི་མའི་སྐྱེ་གནས་དུ་མ་མཁྱེན་པ་འཆི་འཕོ་དང་སྐྱེ་བ་མཁྱེན་པའི་སྟོབས། སྒྲིབ་གཉིས་བག་ཆགས་དང་བཅས་པ་མ་ལུས་པ་ཟད་པར་མཁྱེན་པ་ཟག་པ་ཟད་པ་མཁྱེན་པའི་སྟོབས་སོ། །མི་འཇིགས་པ་བཞི་ནི་ངས་སྒྲིབ་གཉིས་བག་ཆགས་དང་བཅས་པ་ཐམས་ཅད་སྤངས་སོ་ཞེས་སྤང་བ་ཕུན་སུམ་ཚོགས་སུ་དམ་བཅས་པ་ལ་ལྔ་དང་བཅས་པའི་འཇིག་རྟེན་ན་ཆོས་བཞིན་དུ་རྒོལ་ནུས་སུ་ཡང་མེད་པས། ཞུན་པ་དང་བག་ཚ་བ་མེད་པ་ཐོབ་ཅིང་ཁྱུ་མཆོག་གི་གནས་རླབས་པོ་ཆེ་ལྟ་བུ་ཞལ་གྱིས་བཞེས་ལ། འཁོར་གྱི་ནང་དུ་མི་འཇིགས་པ་སེངྒེའི་སྒྲ་བསྒྲགས་ཏེ། འཇིག་རྟེན་ན་ཚངས་པའི་འཁོར་ལོ་ལྷ་དང་བདུད་དང་ཚངས་པ་དང་དགེ་སྦྱོང་
དང་བྲམ་ཟེར་བཅས་པ་སུས་ཀྱང་བསྐོར་བར་མ་ནུས་པའི་ཆོས་ཀྱི་འཁོར་ལོ་ངོ་མཚར་རྨད་དུ་བྱུང་བ་བསྐོར་ཏོ། །དེ་བཞིན་དུ་ངས་ཤེས་བྱའི་ཆོས་ཐམས་ཅད་མངོན་པར་རྫོགས་པར་སངས་རྒྱས་སོ་ཞེས་རྟོགས་པ་ཕུན་སུམ་ཚོགས་སུ་དམ་བཅས་པ་ལ་ལྷ་དང་སོགས་སྔར་དང་འདྲའོ། །ཡང་འདི་ནི་འཕགས་པ་ངེས་པར་འབྱིན་པའི་ལམ་སྟེ་ལམ་འདི་ལྟ་བུ་ལ་བརྟེན་ན་ངེས་པར་འབྱིན་པར་མི་འགྱུར་བདེན་གནས་མེད་དོ། །ཞེས་གཞན་དོན་ལམ་གྱི་གེགས་དམ་བཅའ་བ་ལ་སོགས་སོ། །ཡང་འདི་ནི་ལམ་ལ་བར་དུ་གཅོད་པའི་ཆོས་ཏེ་གནས་འདི་ལྟ་བུ་ལ་སྤྱོད་ན་ལམ་གྱི་བར་ཆད་དུ་མི་འགྱུར་བ་དེ་ནི་གནས་མེད་དོ། །ཞེས་གཞན་དོན་ལམ་གྱི་གེགས་དམ་བཅའ་བ་ལ་སོགས་པ་བཞིའོ། །དེ་ཡང་སྐུ་མ་ཞུམ་པའི་དབང་གིས་དབུ་འཕང་དམའ་བ་དང༌། སྤྱན་རིག་རིག་ཏུ་གཟིགས་པ་སོགས་མེད་པར་ཁྱུ་མཆོག་རླབས་པོ་ཆེའི་གནས་ཞལ་གྱིས་བཞེས་ཤིང༌། གསུང་བག་ཚ་བ་མེད་པས་གསུང་འདར་བ་དང་ལྡབ་འཆོལ་བ་ལ་སོགས་མེད་པར་རྒོལ་བ་ཐམས་ཅད་ཟིལ་གྱིས་མནན་ཏེ་འཁོར་གྱི་ནང་དུ་སེངྒེའི་སྒྲ་སྒྲོགས་པ་དང༌། ཐུགས་མི་འཇིགས་པ་ཐོབ་པས་འཇིག་རྟེན་དུ་ཚངས་པ་ཆེན་པོ་བཞིན་དུ་ཆོས་ཀྱི་འཁོར་ལོ་བསྐོར་བའོ། །ཡང་ལྷ་ནི་མངོན་ཤེས་དང་རྫུ་འཕྲུལ་སོགས་ཀྱིས་རིགས་དྲུག་ལས་མཆོག་ཏུ་གྱུར་བ་དང༌། བདུད་སྡེ་དང་ཚངས་པ་ནི་འདོད་ཁམས་དང༌། གཟུགས་ཁམས་ན་ང་རྒྱལ་གྱིས་དྲེགས་པ་དང༌། དགེ་སྦྱོང་དང་
བྲམ་ཟེ་ནི་མཁས་པར་གྲགས་པའོ། །སོ་སོ་ཡང་དག་པར་རིག་པ་བཞི་ནི། ཆོས་ཀྱི་སྒོ་མོ་བསམ་གྱིས་མི་ཁྱབ་པའི་ཚིག་ཐམས་ཅད་མ་འདྲེས་པར་མཁྱེན་པ་ཆོས་སོ་སོ་ཡང་དག་པར་རིག་པ། ཚིག་དེ་ལ་བརྟེན་པའི་དོན་ཐམས་ཅད་མ་འདྲེས་པར་མཁྱེན་པ་དོན་སོ་སོ་ཡང་དག་པར་རིག་པ། ཆོས་དེ་གཞན་ལ་སྟོན་པ་ན་མིང་ཐམས་ཅད་དང་སྐད་ཐམས་ཅད་མ་འདྲེས་པར་མཁྱེན་པ་ངེས་པའི་ཚིག་སོ་སོ་ཡང་དག་པར་རིག་པ། དེ་ལྟར་འཆད་པའི་ཚེ་ཆོས་ཀྱི་སྒོ་གཅིག་ལས་བརྩམས་ཏེ་བསྐལ་པའམ་བསྐལ་པ་ལས་ལྷག་པའི་བར་དུ་བསྟན་ཀྱང་བློ་གྲོས་ཟད་མི་ཤེས་པས་སྤོབས་པ་སོ་སོ་ཡང་དག་པར་རིག་པའོ། །དེ་ཡང་གཞན་ལ་ཆོས་སྟོན་པའི་ཚེ་རྟེན་ཚིག་དང་བརྟེན་པའི་དོན་གཉིས་པོ་བཤད་བྱ་དང༌། གསུང་གིས་སེམས་ཅན་རང་རང་གི་སྐད་དང་མིང་དང་མིང་དེ་ཅིའི་ཕྱིར་བཏགས་པའི་རྒྱུ་མཚན་ངེས་ཚིག་དང༌། དེ་དག་གི་ཟབ་ཅིང་རྒྱ་ཆེ་བའི་དོན་ཐམས་ཅད་ཐུགས་ཀྱིས་མཁྱེན་པས་ན་སོ་སོ་ཡང་དག་པར་རིག་པ་བཞི་སྟེ། མདོ་སྡེའི་རྒྱན་ལས། །རྟེན་དང་བརྟེན་པ་བཤད་བྱ་དང༌། །གསུང་དང་མཁྱེན་པ་འཆད་བྱེད་ལ། །བློ་གྲོས་རྟག་ཐོགས་མི་མངའ་བའི། །ལེགས་འདོམས་ཁྱོད་ལ་ཕྱག་འཚལ་ལོ། །ཞེས་སོ། །མ་འདྲེས་པ་བཅོ་བརྒྱད་ནི། །སྤྱོད་ལམ་མ་འདྲེས་པ་དྲུག །རྟོག་པ་མ་འདྲེས་པ་དྲུག །ཡེ་ཤེས་མ་འདྲེས་པ་གསུམ། ཕྲིན་ལས་མ་འདྲེས་པ་
གསུམ་མོ། །དང་པོ་སྤྱོད་ལམ་མ་འདྲེས་པ་དྲུག་ནི། །སྐུ་འཁྲུལ་པ་མེད་པ་ནི་ཉན་རང་དགྲ་བཅོམ་པ་རྣམས་ལ་བག་ཆགས་ཀྱི་སྒྲིབ་པ་མ་སྤངས་པས་ལམ་དུ་སྦྲུལ་ནག་པོ་རྐང་པས་བརྗི་བ་ལ་སོགས་པ་སྤྱོད་ལམ་ཉེས་པའི་ཆ་ཡོད་ལ་སངས་རྒྱས་ལ་དེ་མེད་པས་སྤྱན་གྱིས་འབྱེད་འཛུམ་དང་ཕྱག་གིས་བརྐྱང་བསྐུམ་ཙམ་ལ་ཡང་གཞན་ཕན་འབའ་ཞིག་ཏུ་ངང་གིས་འབྱུང་བའོ། །གསུང་ཅ་ཅོ་མེད་པ་ནི་ཉན་ཐོས་དག་ནགས་ཐིབ་པོར་ལམ་སྟོར་ནས་ཅ་ཅོ་སྒྲོགས་པ་དང༌། གད་མོ་རྟ་གད་དུ་དགོད་པ་སོགས་ངག་མ་བསྡམས་པའི་སྤྱོད་ལམ་ཡོད་ལ་སངས་རྒྱས་ལ་དེ་མེད་པས་གསུང་བསལ་བའི་སྒྲ་ཙམ་ལ་ཡང་ངང་གིས་གཞན་དོན་དུ་འགྱུར་བའོ། །ཐུགས་དྲན་པ་ཉམས་པ་མི་མངའ་བ་ནི་ཉན་རང་ལ་བྱ་བ་འགའ་ཞིག་བརྗེད་པ་དང་མ་བསམ་པར་མངོན་ཤེས་མི་འཇུག་པས་རང་ལ་གནོད་པ་འབྱུང་བ་སོགས་དང་པོར་མི་ཤེས་པ་སྲིད་ལ་སངས་རྒྱས་ཀྱི་མཛད་པ་ཐམས་ཅད་དུས་ལས་མི་ཡོལ་ཞིང༌། མཁྱེན་པ་ལ་རྩོལ་བྱུང་མེད་པས་བསམ་བསམ་མེད་པར་དུས་གསུམ་གྱི་ཤེས་བྱ་ཐམས་ཅད་རྟག་ཏུ་གཟིགས་པའོ། །མཉམ་པར་མ་བཞག་པའི་ཐུགས་མི་མངའ་བ་ནི། །ཉན་རང་རྣམས་ཏིང་ངེ་འཛིན་ལ་མཉམ་པར་བཞག་ནས་ཏིང་ངེ་འཛིན་དེ་ལས་ལངས་ཏེ་སྤྱོད་ལམ་ལ་འཇུག་པ་ལས་མཉམ་པར་བཞག་བཞིན་དུ་སྤྱོད་ལམ་ལ་འཇུག་མི་ནུས་པ་ལས། །སངས་རྒྱས་རྣམས་མཉམ་པར་བཞག་བཞིན་དུ་ཆོས་སྟོན་པ་དང༌།
བསོད་སྙོམས་ལེན་པ་སོགས་མཛད་པས་རྟག་ཏུ་མཉམ་པར་མ་བཞག་པ་མེད་པའོ། །ཐ་དད་པའི་འདུ་ཤེས་མི་མངའ་བ་ནི། ཉན་རང་ལ་མྱ་ངན་ལས་འདས་པ་ལ་ཞི་བའི་འདུ་ཤེས་དང་འཁོར་བ་ལས་སྐྱོ་བ་སོགས་བཟང་ངན་གཉིས་བཅས་ཀྱི་འདུ་ཤེས་ཡོད་པ་ལ་སངས་རྒྱས་ལ་འཁོར་འདས་གཉིས་མེད་དུ་གཟིགས་པས་གཉིས་ཆོས་ཐམས་ཅད་གཉིས་མེད་ཀྱི་ཀློང་དུ་དག་པའོ། །སོ་སོར་མ་བརྟགས་པའི་བཏང་སྙོམས་མི་མངའ་བ་ནི། སེམས་ཅན་གང་དང་གང་ཐབས་གང་དང་གང་གིས་དུས་ནམ་དང་ནམ་གྱི་ཚེ་འདུལ་བ་ཐམས་ཅད་དགོངས་ནས་དུས་དེར་ཐབས་དེས་གདུལ་བ་དུས་ལས་མི་ཡོལ་བར་མཛད་ལ། ཉན་རང་རྣམས་ཀྱིས་རང་གི་གདུལ་བྱ་ཡིན་ཀྱང་མ་བརྟགས་པས་དུས་ལས་ཡོལ་བའམ་ཐབས་མི་ཤེས་པས་ཕྱིས་གདུལ་མི་ནུས་པ་ཡོད་པའོ། །རྟོགས་པ་མ་འདྲེས་པ་དྲུག་ནི། རྟག་ཏུ་གཞན་དོན་ལ་དགྱེས་པའི་འདུན་པ། འགྲོ་དོན་ཐུགས་ཀྱིས་མི་འདོར་བའི་དྲན་པ། སེམས་ཅན་གཅིག་གི་ཕྱིར་དུ་བསྐལ་པ་བརྒྱ་ཕྲག་མང་པོར་བཤོས་མི་གསོལ་བར་ཆོས་སྟོན་པ་ཡང་མི་ངལ་བ་བརྩོན་འགྲུས། ཤེས་བྱ་ཐམས་ཅད་མཁྱེན་པའི་ཤེས་རབ། སེམས་རྩེ་གཅིག་ཏུ་གནས་པའི་ཏིང་ངེ་འཛིན། སྒྲིབ་གཉིས་བག་ཆགས་དང་བཅས་པ་ལས་གྲོལ་བའི་རྣམ་གྲོལ་རྣམ་པ་ཐམས་ཅད་མཁྱེན་པའི་ཡེ་ཤེས་ཐོབ་པས་རྣམ་གྲོལ་ཡེ་ཤེས་གཟིགས་པ་ཉམས་པ་མེད་པ་སྟེ་ཉན་རང་དགྲ་བཅོམ་ལ་འདི་དག་
ཉམས་པ་ཡོད་དོ། །ཉམས་པ་དེ་ཡང་མ་ཐོབ་པས་ཉམས་པ་དང༌། ཐོབ་ཟིན་ཉམས་པ་གཉིས་ལས། སངས་རྒྱས་གྱི་ཐུགས་རྒྱུད་ན་ཡོད་པའི་ཁྱད་པར་ཅན་རྣམས་མ་ཐོབ་པས་ཉམས་པ་ཡོད་ལ། ཉན་རང་རང་རྒྱུད་ལ་ཡོད་པའི་ཐོབ་ཟིན་རྣམས་ཀྱང་ཉམས་པར་འགྱུར་བ་ཡོད་པར་ཉན་ཐོས་སྡེ་པ་ཁ་ཅིག་འདོད་དོ། །ཡེ་ཤེས་མ་འདྲེས་པ་གསུམ་ནི། འདས་པའི་དུས་ཀྱི་ཤེས་བྱ་ཐམས་ཅད་ལ་མ་ཆགས་མ་ཐོགས་པའི་ཡེ་ཤེས་ཀྱིས་གཟིགས་པ་འཇུག །ད་ལྟའི་དུས་ཀྱི་ཤེས་བྱ་ཐམས་ཅད་ལ་མ་ཆགས་མ་ཐོགས་པའི་ཡེ་ཤེས་ཀྱི་གཟིགས་པ་འཇུག་པའོ། །མ་ཆགས་མ་ཐོགས་པ་ནི་ཉོན་སྒྲིབ་སྤངས་པས་མ་ཆགས་ལ་ཤེས་སྒྲིབ་སྤངས་པས་མ་ཐོགས་པའོ། །འདི་དག་དགྲ་བཅོམ་པ་རྣམས་ལ་ཆགས་ཐོགས་ཡོད་དེ་སྔར་མི་ཤེས་པའི་རྒྱུ་བཞི་བཤད་པ་བཞིན་ནོ། །ཕྲིན་ལས་མ་འདྲེས་པ་གསུམ་ནི། སྐུའི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བའོ། །ཐུགས་ཀྱི་ཕྲིན་ལས་ཐམས་ཅད་ཡེ་ཤེས་སྔོན་དུ་འགྲོ་ཞིང་ཡེ་ཤེས་ཀྱི་རྗེས་སུ་འབྲང་བའོ། །དེ་ཡང་ཡེ་ཤེས་སྔོན་དུ་འགྲོ་ཞིང་ཡེ་ཤེས་རྗེས་སུ་འབྲང་ཞེས་པ་ནི། དང་པོ་ཤེས་བཞིན་དང་བཅས་པའི་ཡེ་ཤེས་སྔོན་དུ་བཏང་ནས་དེ་རྗེས་སུ་སྤྱོད་ལམ་དེ་འབྲང་བ་
ལྟ་བུ་ལ་དགོངས་སོ། །ཉན་ཐོས་དགྲ་བཅོམ་ལ་ཤེས་བཞིན་ཉམས་པ་ཡོད་དེ། སྔར་སྤྱོད་ལམ་གྱི་མ་འདྲེས་པར་བཤད་པ་ལྟ་བུའོ། །འདི་ལྟར་བཤད་པའི་མ་འདྲེས་པ་བཅོ་བརྒྱད་ནི་ཐེག་ཆེན་གྱི་ལུགས་ཡིན་ལ། ཐེག་དམན་པ་རྣམས་ནི་སྟོབས་བཅུ། མི་འཇིགས་པ་བཞི། མ་འདྲེས་པའི་དྲན་པ་ཉེར་གཞག་གསུམ་ཐུགས་རྗེ་ཆེན་པོ་རྣམས་ལ་མ་འདྲེས་པ་བཅོ་བརྒྱད་ཅེས་བཞེད་དོ། །དེས་ནས་སངས་རྒྱས་ཀྱང་རྟག་ཏུ་མཉམ་པ་བཞག་པ་སོགས་མི་བཞེད་དོ། །ཆོས་ཀྱི་ཡོན་ཏན་གྱི་སྐབས་སུ། ལུང་གི་ཆོས་གསུང་རབ་ཡན་ལག་བཅུ་གཉིས་ནི། ཚིག་མདོར་བསྡུས་ཤིང་དོན་སྡེ་ཚན་དུ་བཅད་པས་ན་མདོ་སྡེ། སྔར་ཚིག་ལྷུག་པའི་སྒོ་ནས་རྒྱས་པར་གསུང་བ་དེ་དག་སླར་ཡང་ཚིགས་སུ་བཅད་པའི་དབྱངས་ཀྱིས་བསྙད་པ་ནི་དབྱངས་བསྙད། མ་འོངས་པ་ན་འབྱུང་འགྱུར་གྱི་གནས་ལུང་བསྟན་པ་ནི་ལུང་བསྟན། དང་པོ་ནས་ཚིགས་སུ་བཅད་པ་ཁོ་ནས་གསུངས་པ་ནི་ཚིགས་བཅད། ཞུ་བ་པོ་གཞན་གྱིས་ཞུ་མ་དགོས་པར་བསྟན་པ་གནས་པར་བྱ་བའི་ཕྱིར་རང་གི་ཆེད་དུ་གནང་བ་ཆེད་དུ་བརྗོད་པ། གང་ཟག་འགའ་ཞིག་གིས་ཉེས་པ་བྱས་པ་དེ་ལ་བཅས་པ་མཛད་པ་ལྟ་བུ་གཏམ་གླེང་བའི་གཞི་ལས་རྒྱ་ཆེར་བསྟན་གླེང་གཞི། དེ་ལྟ་བུའི་གང་ཟག་གཞན་འགའ་ཞིག་གི་ལོ་རྒྱུས་གསུངས་པ་ནི་རྟོགས་བརྗོད། སྔ་རབས་སུ་བྱུང་བའི་གཏམ་
རྒྱུད་ཀྱི་སྦྱོར་བ་ནི་དེ་ལྟ་བུ་བྱུང་བ། བྱང་ཆུབ་སེམས་དཔའི་སྐྱེ་བའི་ཕྲེང་བ་དག་བརྗོད་པ་ནི་སྐྱེས་རབས། ཟབ་པ་དང་རྒྱ་ཆེ་བའི་ཆོས་ཚད་མེད་པ་དག་བསྟན་པ་ནི་ཤིན་ཏུ་རྒྱས་པ། །ངོ་མཚར་རྨད་དུ་བྱུང་བའི་ཆོས་སྔར་མ་གྲགས་པའི་ཟབ་དོན་འགའ་ཞིག་བསྟན་པ་ནི་རྨད་དུ་བྱུང་བ། འཁོར་བའི་ཆོས་ཕུང་པོ་ཁམས་དང་སྐྱེ་མཆེད་ཀྱི་རབ་དབྱེ། ལམ་གྱི་ཆོས་ས་ལམ་ཏིང་ངེ་འཛིན་གྱི་རྣམ་གཞག །འབྲས་བུའི་ཆོས་སྐུ་དང་ཡེ་ཤེས་ཀྱི་རྣམ་གྲངས་ལ་སོགས་པ་འདུལ་བ་དང་མདོ་སྡེའི་དོན་ཐམས་ཅད་ཞིབ་པར་གཏན་ལ་དབབ་པ་གཏན་ཕབ་པོ། །དེ་དག་ཀྱང་སྡེ་སྣོད་གསུམ་དུ་བསྡུ་ན། །མདོ་སྡེ་དབྱངས་བསྙད་ལུང་བསྟན་ཚིགས་བཅད་ཆེད་བརྗོད་དང་ལྔ་ནི་ཐེག་དམན་གྱི་མདོ་སྡེ། གླེང་གཞི་རྟོགས་བརྗོད་དེ་ལྟ་བུ་བྱུང་གསུམ་ཐེག་དམན་གྱི་འདུལ་བ། སྐྱེས་རབས་ནི་ཐེག་ཆེན་གྱི་འདུལ་བ་ཤིན་ཏུ་རྒྱས་པ་དང་རྨད་དུ་བྱུང་བ་གཉིས་ནི་ཐེག་ཆེན་གྱི་མདོ་སྡེ། གཏན་ལ་ཕབ་པ་ནི་ཐེག་པ་ཆེ་ཆུང་གཉིས་ཀའི་མངོན་པའོ། །དེ་ལྟར་རྗོད་བྱེད་སྡེ་སྣོད་གསུམ་གྱི་བརྗོད་བྱ་ནི་ལམ་ལྷག་པའི་བསླབ་པ་གསུམ་སྟེ། འདུལ་བའི་སྡེ་སྣོད་ཀྱི་བརྗོད་བྱ་ལྷག་པ་ཚུལ་ཁྲིམས་ཀྱི་བསླབ་པའོ། །མདོ་སྡེའི་བརྗོད་བྱ་ལྷག་པ་ཏིང་ངེ་འཛིན་གྱི་བསླབ་པའོ། །མངོན་པའི་བརྗོད་བྱ་ལྷག་པ་ཤེས་རབ་ཀྱི་བསླབ་པའོ། །ཆོས་ནི་བསོད་ནམས་ལམ་དང་མྱ་ངན་འདའ། ཞེས་པའི་སྐབས་སུ་སྤྱིར་ཆོས་ཞེས་པ་
ནི་སྒྲ་དོན་བཅུ་ལ་འཇུག་སྟེ། །ཆོས་ནི་ཤེས་བྱ་ལམ་དང་ནི། །མྱ་ངན་འདས་དང་ཡིད་ཀྱི་ཡུལ། །བསོད་ནམས་ཚེ་དང་གསུང་རབ་དང༌། །འབྱུང་འགྱུར་ངེས་དང་ཆོས་ལུགས་ལའོ། །ཞེས་བཤད་པའི་ནང་ཚན་ཤེས་པའི་ཡུལ་དུ་གྱུར་ཚད་ཤེས་བྱ་དང༌། ཕྱིའི་སྐྱེ་མཆེད་དྲུག་གི་ནང་ཚན་ཆོས་ནི་ཡིད་ཀྱི་ཡུལ་དང༌། སྲོག་ཅི་ཙམ་འཚོ་བའི་ཡུན་ནི་ཚེ་དང༌། །ད་གདོད་འབྱུང་བར་འགྱུར་བ་ནི་འབྱུང་འགྱུར་དང༌། དོན་གང་ཡང་མ་ནོར་བར་གྱུར་པ་ནི་ངེས་པ་དང༌། རང་རང་གི་ལུགས་སྲོལ་ལྟ་བུ་ནི་ཆོས་ལུགས་ཏེ། དེ་དྲུག་ནི་ཆོས་ཞེས་པའི་སྒྲ་ཙམ་འཇུག་པའོ། །འདིར་དམ་པའི་ཆོས་ཀྱི་སྒྲ་འཇུག་པ། བསོད་ནམས་དང༌། ལམ་དང༌། མྱ་ངན་ལས་འདས་པ་དང༌། གསུང་རབ་བཞི་ཡིན་ལ་དེ་ལས་སྔ་མ་གསུམ་ནི་རྟོགས་པའི་ཆོས་སོ། །ཕྱི་མ་ནི་ལུང་གི་ཆོས་སོ། །རྟོགས་པའི་ཆོས་ནི་དྲན་པ་ཉེར་གཞག་སོགས་རིམ་བཞིན་ལམ་ལྔའི་ཡོན་ཏན་ཅེས་པའི་སྐབས་སུ། བྱང་ཕྱོགས་སོ་བདུན་སྡེ་ཚན་བདུན་ནོ། །དེ་ཡང་དང་པོ་དྲན་པ་ཉེར་གཞག་བཞི་ལ། དམིགས་པ་རྣམ་པ། སྒྲ་དོན་དང་གསུམ་ལས། དམིགས་པ་ནི་ལུས་ལ་སོགས་པ་བཞིའོ། །དེ་ཡང་ལུས་ནི་གཟུགས་ཀྱི་ཕུང་པོ་སྟེ། དེ་ལ་གསུམ་སྟེ། ཕྱིའི་ལུས་ནི་ས་ཆུ་མེ་རླུང་ལ་སོགས་འབྱུང་བཞིས་བསྡུས་པའི་སྣོད་ཀྱི་འཇིག་རྟེན་ནོ། །ནང་གི་ལུས་ནི་རང་གི་ལུས་སོ། །བར་གྱི་ལུས་ནི་སེམས་ཅན་གཞན་གྱི་ལུས་སོ། །ཚོར་
བ་ནི་ཚོར་བའི་ཕུང་པོ་བདེ་སྡུག་སོགས་སོ། །སེམས་ནི་རྣམ་པར་ཤེས་པའི་ཕུང་པོ་ཚོགས་བརྒྱད་དམ་ཚོགས་དྲུག་གོ །ཆོས་ནི་འདུ་ཤེས་དང་འདུ་བྱེད་ཀྱིས་མཚོན་པའི་ཆོས་ཐམས་ཅད་དོ། །རྣམ་པ་ནི། ཐེག་དམན་རྣམས་ལུས་མི་གཙང་བ་དང༌། ཚོར་བ་སྡུག་བསྔལ་བ་དང༌། སེམས་མི་རྟག་པ་དང༌། ཆོས་ཐམས་ཅད་བདག་མེད་པར་བསྒོམས་ལ། ཐེག་ཆེན་པ་རྣམས་བཞི་ག་ཡང་མཉམ་བཞག་ཏུ་སྤྲོས་བྲལ་ནམ་མཁའ་ལྟ་བུ་དང༌། རྗེས་ཐོབ་ཏུ་སྒྱུ་མ་དང་རྨི་ལམ་ལྟར་བསྒོམ་མོ། །གཞན་ཡང་ཐེག་པ་ཆེ་ཆུང་གི་དྲན་པ་ཉེར་གཞག་ལ་ཁྱད་པར་གསུམ་སྟེ། དམིགས་པའི་ཁྱད་པར་ཐེག་དམན་གྱིས་རང་གི་ལུས་སོགས་བཞི་ཙམ་ལ་དམིགས་ལ། །ཐེག་ཆེན་གྱིས་རང་གཞན་ཐམས་ཅད་ཀྱི་ལུས་སོགས་བཞི་ལ་དམིགས་པ་དང༌། རྣམ་པའི་ཁྱད་པར་ཐེག་དམན་གྱིས་མི་གཙང་བ་སོགས་སུ་བསྒོམས་ལ། །ཐེག་ཆེན་གྱིས་སྟོང་ཉིད་དུ་བསྒོམ་པའོ། །དགོས་པའི་ཁྱད་པར་ཐེག་དམན་གྱིས་ཟག་བཅས་ཀྱི་ལུས་སོགས་དང་བྲལ་བའི་ཕྱིར་བསྒོམས་ལ། ཐེག་ཆེན་གྱིས་འབྲལ་མི་འབྲལ་གཉིས་ཀའི་ཕྱིར་མི་བསྒོམ་གྱི་མི་གནས་པའི་མྱ་ངན་ལས་འདས་པ་ཐོབ་པའི་དོན་དུ་བསྒོམ་མོ། །སྒྲ་དོན་ནི་ལུས་ལ་སོགས་པའི་སྤྱི་དང་རང་གི་མཚན་ཉིད་ཤེས་རབ་ཀྱིས་སོ་སོར་ཕྱེས་ནས་དེའི་རྒྱུན་དྲན་པས་སྐྱོང་པས་ན་ཤེས་རབ་ཀྱི་ཡུལ་ལ་དྲན་པ་ཉེ་བར་འཇོག་པའོ། །དམིགས་པའི་ཡུལ་དྲན་པས་མི་བརྗེད་པར་ཤེས་རབ་ཀྱི་མ་དཔྱད་པས་བདག་མེད་དུ་གཏན་ལ་འབེབས་
པས་ན་དྲན་པའི་ཡུལ་ལ་ཤེས་རབ་ཉེ་བར་འཇོག་པའོ། །གཉིས་པ་ཡང་དག་པར་སྤོང་བ་བཞི་ནི། སྡིག་པ་མི་དགེ་བའི་ཆོས་མ་སྐྱེས་པ་མི་བསྐྱེད་པའི་ཕྱིར་འདུན་པ་བསྐྱེད་དོ། །འབད་དོ། །བརྩོན་འགྲུས་བརྩམ་མོ། །སེམས་རབ་ཏུ་འཛིན་ནོ། །སེམས་རབ་ཏུ་འཇོག་གོ །དེ་བཞིན་དུ་སྐྱེས་པ་རྒྱུན་གཅོད་པའི་ཕྱིར་འདུན་པ་སོགས་སོ། །ཡང་དགེ་བའི་ཆོས་མ་སྐྱེས་པ་བསྐྱེད་བའི་ཕྱིར་འདུན་པ་སོགས་དང༌། སྐྱེས་པ་གོང་ནས་གོང་དུ་སྤེལ་བའི་ཕྱིར་འདུན་པ་སོགས་སོ། །དེ་ལ་འདུན་པ་བསྐྱེད་པ་ནི། དང་པོར་བླང་དོར་ལ་ཡིད་ཆེས་པའི་ཚུལ་གྱིས་སོ། །འབད་པ་ནི་སེམས་དེ་ལས་གཞན་དུ་མི་ཡེངས་པའི་ཚུལ་གྱིས་སོ། །བརྩོན་འགྲུས་རྩོམ་པ་ནི་བྱིང་རྒོད་ལ་སོགས་པ་ཞི་བར་བྱ་བའི་དོན་དུའོ། །སེམས་རབ་ཏུ་འཛིན་པ་ནི་བྱིང་རྨུགས་སུ་གྱུར་ན་རྒྱལ་བའི་སྐུ་དང་ཡོན་ཏན་ལ་སོགས་སེམས་སྤྲོ་བར་གྱུར་བའི་གནས་ལ་དམིགས་ནས་སེམས་རབ་ཏུ་འཛིན་པའོ། །སེམས་རབ་ཏུ་འཇོག་པ་ནི་འཕྲོ་རྒོད་དུ་གྱུར་ན་འཁོར་བའི་སྡུག་བསྔལ་སོགས་སྐྱོ་བར་འགྱུར་བའི་ཡུལ་ལ་དམིགས་ནས་སེམས་རབ་ཏུ་འཇོག་པའོ། །འདིར་མི་དགེ་བ་སྐྱེས་བ་དང་མ་སྐྱེས་པ་གཉིས། དགེ་བ་སྐྱེས་པ་དང་མ་སྐྱེས་པ་གཉིས་དང་བཞི་ནི་དམིགས་པ་ཡིན་ལ། འདུན་པ་བསྐྱེད་པ་སོགས་ནི་རྣམ་པའོ། །སྒྲ་དོན་ནི་མི་དགེ་བ་སྐྱེས་མ་སྐྱེས་གཉིས་སྤོང་བའི་ཕྱོགས་གཅིག་གིས་མིང་བཏགས་པ་སྟེ། ཕྱུགས་ཀྱི་ངོ་དགར་བ་ལག་པ་ཞེས་མིང་འདོགས་པ་བཞིན་ནོ། །གསུམ་པ་རྫུ་འཕྲུལ་
གྱི་རྐང་པ་བཞི་ལ་གསུམ། དང་པོ་དམིགས་པ་ནི་གཅིག་ཏུ་གྱུར་ནས་མང་པོར་འགྱུར་བ་དང༌། མང་པོར་གྱུར་ནས་གཅིག་ཏུ་འགྱུར་པ་ལ་སོགས་པའོ། །རྣམ་པ་ནི་རྫུ་འཕྲུལ་གྱི་རྣམ་གནས་རྣམས་ཏེ་རྫུལ་གྱི་མངོན་ཤེས་ཀྱི་རྣམ་གནས་ནི་ལུས་ཡང་བར་ཡིད་ལ་བྱེད་པའོ། །ལྟ་བའི་མིག་ལ་ཕྱོགས་ཐམས་ཅད་སྣང་བས་ཁྱབ་པར་རོ། །རྣ་བ་ལ་ཕྱོགས་ཐམས་ཅད་སྒྲས་ཁྱབ་པར་རོ། །གཞན་སེམས་ཤེས་པ་ལ་བདག་ལུས་འདི་འདྲ་བ་ལ་ཡིད་འདི་འདྲ་བ་ཡོད་ཀྱི་གཞན་ཡང་ལུས་འདི་འདྲ་བ་ལ་ཡིད་དི་འདྲ་བ་ཡོད་དོ་ཞེས་ཡིད་ལ་བྱེད་པའོ། །སྔོན་གནས་རྗེས་དྲན་ནི་ཡིད་ཤེས་ད་ལྟ་འགགས་མ་ཐག་པ་ནས་མཚམས་བཟུང་ལ་ཕུང་པོ་ཉིང་མཚམས་སྦྱོར་བའི་བར་ལུགས་ལྡོག་ཏུ་ཡིད་ལ་བྱེད་པའོ། །དེ་ལ་དབྱེ་ན་འདུན་པའི་ཏིང་ངེ་འཛིན་སྤང་བའི་འདུ་བྱེད་དང་ལྡན་པའི་རྫུ་འཕྲུལ་གྱི་རྐང་པ། བརྩོན་པའི་སོགས། སེམས་པའི་སོགས་དཔྱོད་པའི་སོགས་བཞི། དང་པོར་བསྒོམ་བྱའི་དོན་ལ་ཡིད་ཆེས་པས་དོན་དུ་གཉེར་བ་ནི་འདུན་པ། སྤྲོ་བཞིན་དུ་འཇུག་པ་ནི་བརྩོན་འགྲུས། ངེས་སེམས་རྩེ་གཅིག་པའི་ཏིང་ངེ་འཛིན་དུ་སོང་བ་ནི་ཏིང་ངེ་འཛིན། དེ་ལ་བྱིང་རྒོད་ལ་སོགས་པའི་སྐྱོན་ཞུགས་མ་ཞུགས་དཔྱོད་པ་ནི་དཔྱོད་པའོ། །སྤོང་བའི་འདུ་བྱེད་དང་ལྡན་པའི༌།རྫུ་འཕྲུལ་གྱི་རྐང་པ་ཞེས་པའི་དོན་མི་ཉེས་པ་ལྔ་སྤང་འདུ་བྱེད་བརྒྱད་བསྟེན་པ་སྟེ། ཉེས་པ་ལྔ་ནི། ལེ་ལོ། །བརྗེད་ངས། བྱིང་རྒོད། འདུ་མི་བྱེད་པ། འདུ་བྱེད་དོ། །འདི་དག་སྐྱོན་དུ་འགྱུར་ཚུལ་ནི། །ལེ་ལོ་ནི་དང་
པོར་སྦྱོར་པའི་དུས་ན་སྐྱོན་ཡིན་ཏེ། ཏིང་ངེ་འཛིན་ལ་བརྩོན་པས་མི་སྦྱོར་བའི་ཕྱིར་རོ། །བརྗེད་ངས་ནི་སྦྱོར་བ་བྱེད་བའི་དུས་ན་སྐྱོན་ཡིན་ཏེ་ཏིང་ངེ་འཛིན་སྒོམ་ཚུལ་གདམས་ངག་རྣམས་བརྗེད་པར་འགྱུར་བའི་ཕྱིར་རོ། །བྱིང་རྒོད་ནི་ཏིང་ངེ་འཛིན་རྒྱུད་ལ་སྐྱེས་པའི་དུས་ན་སྐྱོན་ཡིན་ཏེ། དེས་ཏིང་ངེ་འཛིན་སྐྱོན་ཅན་དུ་བྱེད་པའི་ཕྱིར་རོ། །འདུ་མི་བྱེད་པ་ནི། བྱིང་རྒོད་བྱུང་བའི་དུས་ན་སྐྱོན་ཡིན་ཏེ་དེས་བྱིང་རྒོད་ཀྱི་གཉེན་པོ་འདུ་མི་བྱེད་པ་ནི་བྱིང་རྒོད་ཞི་བའི་དུས་ན་སྐྱོན་ཏེ། བྱིང་རྒོད་ཞི་ནས་ཀྱང་ད་དུང་དེའི་གཉེན་པོ་ཚལ་ན་སེམས་སླར་ཡང་གཡེང་བར་འགྱུར་བའི་ཕྱིར་རོ། །དེ་དག་གི་གཉེན་པོ་ནི་སྤོང་བའི་འདུ་བྱེད་བརྒྱད་དེ། འདུན་པ་དང༌། དད་པ་དང༌། བརྩོན་འགྲུས་དང༌། ཤིན་ཏུ་སྦྱང་བ་དང༌། དྲན་པ་དང༌། ཤེས་བཞིན་དང༌། སེམས་པ་དང༌། བཏང་སྙོམས་སོ། །དང་པོ་བཞི་ལེ་ལོའི་གཉེན་པོ་སྟེ། གཉེན་པོ་དངོས་ནི་བརྩོན་འགྲུས་དང༌། གཞན་གསུམ་དེའི་ཡན་ལག་གོ །དེ་ཡང་རྒྱུ་དང་འབྲས་བུ་དང༌། རྟེན་དང་བརྟེན་པ་ཡིན་ཏེ། དོན་གཉེར་གྱི་འདུན་པ་ཡོད་ན་བརྩོན་འགྲུས་འབྱུང་བས་འདུན་པ་ནི་རྒྱུ་ལ། བརྩོན་འགྲུས་ནི་འབྲས་བུའོ། །རྒྱུ་འདུན་བའི་རྟེན་ནི་དད་པ་ཡིན་ཏེ་ཡིད་ཆེས་ཀྱི་དད་པ་ཡོད་ན་དོན་གཉེར་གྱི་འདུན་པ་འབྱུང་བའི་ཕྱིར་རོ། །འབྲས་བུ་བརྩོན་འགྲུས་ལ་བརྟེན་པ་ནི་ཤིན་སྦྱང་ཡིན་ཏེ་བརྩོན་པས་འབད་ན་ལུས་སེམས་ལ་ཤིན་ཏུ་སྦྱངས་པ་སྐྱེ་བའོ། །བརྗེད་ངས་ཀྱི་གཉེན་པོ་ནི་དྲན་པ་ཡིན་ཏེ་དེས་
དམིགས་རྣམ་མི་བརྗེད་པའི་ཕྱིར་རོ། །བྱིང་རྒོད་ཀྱི་གཉེན་པོ་ནི་ཤེས་བཞིན་ཡིན་ཏེ་དེས་ཀྱང་བྱིང་རྒོད་བྱུང་མ་བྱུང་རྟོགས་པའི་ཕྱིར་རོ། །འདུ་མི་བྱེད་པའི་གཉེན་པོ་ནི་སེམས་པ་སྟེ་དེས་བྱིང་རྒོད་ཀྱི་གཉེན་པོ་སེམས་པའི་ཕྱིར་རོ། །འདུ་བྱེད་པའི་གཉེན་པོ་ནི་བཏང་སྙོམས་ཏེ་དེས་ཀྱང་བྱིང་རྒོད་ཞི་བའི་ཚེ་རྣལ་དུ་འཇོག་པའོ། །རྫུ་འཕྲུལ་གྱི་རྐང་པའི་སྒྲ་དོན་ནི། །རྫུ་འཕྲུལ་ནི་མངོན་ཤེས་ལྔ་སོགས་ཡིན་ལ། དེ་འགྲུབ་བྱེད་ཀྱི་རྩ་བ་ལྟ་བུ་ཡིན་པས་ན་རྫུ་འཕྲུལ་གྱི་རྐང་པའོ། །བཞི་པ་དབང་པོ་ལྔ་ནི། དམིགས་ཡུལ་ནི་འདི་དག་མཐོང་ལམ་གྱི་སྦྱོར་བ་ཡིན་པས། མཐོང་ལམ་དང་དམིགས་ཡུལ་གཅིག་སྟེ་བདེན་པ་བཞི་ལ་དམིགས་པའོ། །རྣམ་པ་ནི་བདེན་པ་བཞི་སོ་སོའི་མཚན་ཉིད་ལ་དམིགས་ནས་དད་པས་ཡིད་ཆེས་པའི་ཚུལ་གྱིས་འཇུག །བརྩོན་འགྲུས་ཀྱིས་སྤྲོ་བའི་ཚུལ་གྱིས་འཇུག །དྲན་པས་དམིགས་རྣམ་མི་བརྗེད་པའི་ཚུལ་གྱིས་འཇུག །ཏིང་ངེ་འཛིན་གྱིས་སེམས་རྩེ་གཅིག་པའི་ཚུལ་གྱིས་འཇུག །ཤེས་རབ་ཀྱིས་དོན་རྣམ་པར་འབྱེད་པའི་ཚུལ་གྱིས་འཇུག་གོ །སྒྲ་དོན་ནི་རྣམ་བྱང་གི་ཡོན་ཏན་བསྐྱེད་པ་ལ་དབང་བྱེད་པས་ན་དབང་པོ་ལྔའོ། །ལྔ་པ་སྟོབས་ལྔ་ནི། །དམིགས་རྣམ་དབང་པོ་དང་འདྲ་ལ། །སྒྲ་དོན་ནི་དད་སོགས་རང་རང་གི་མི་མཐུན་ཕྱོགས་ཀྱི་དབང་དུ་མི་འགྱུར་བར་སྟོབས་སུ་གྱུར་པས་ན་སྟོབས་སོ། །དྲུག་པ་བྱང་ཆུབ་ཀྱི་ཡན་ལག་བདུན་ལ། དམིགས་པ་ནི་བདེན་པ་བཞིའོ། །རྣམ་པ་
ནི་དྲན་པས་བདེན་པས་གཞིའི་དམིགས་རྣམ་མི་བརྗེད་པར་འཛིན། ཆོས་རབ་ཏུ་རྣམ་འབྱེད་ཀྱིས་བདེན་བཞིའི་ཆོས་ཅན་དང་ཆོས་ཉིད་ཀྱི་མཚན་ཉིད་ཇི་བཞིན་པ་གཏན་ལ་འབེབས། །བརྩོན་འགྲུས་ཀྱིས་དེ་ལ་སྤྲོ་བཞིན་དུ་འཇུག །དགའ་བས་བདེན་བཞིའི་ཆོས་ཉིད་གསར་དུ་མཐོང་བ་ལ་དགའ་བ་སྐྱེ། ཤིན་ཏུ་སྦྱངས་པས་ལུས་དང་སེམས་ལས་སུ་རུང་བར་བྱེད། ཏིང་ངེ་འཛིན་གྱིས་སེམས་གཞན་དུ་མི་གཡེང་བར་བྱེད། །བཏང་སྙོམས་ཀྱིས་སེམས་བྱིང་རྒོད་མེད་པར་རྣལ་དུ་འཇུག་པར་བྱེད་དོ། །སྒྲ་དོན་ནི་རྣམ་པར་མི་རྟོག་པའི་ཡེ་ཤེས་ཆོས་རབ་ཏུ་རྣམ་པར་འབྱེད་པ་ནི་བྱང་ཆུབ་ཡིན་ལ། གཞན་རྣམས་དེའི་ཡན་ལག་ཏུ་གྱུར་པས་ན་བྱང་ཆུབ་ཀྱི་ཡན་ལག་བདུན་ནོ། །བདུན་པ་འཕགས་པའི་ལམ་ཡན་ལག་བརྒྱད་ལ། །དམིགས་པ་ནི་མཐོང་ཟིན་གོམས་པ་བྱེད་པ་ཡིན་བས་མཐོང་ལམ་དང་གཅིག་སྟེ་བདེན་པ་བཞིའོ། །རྣམ་པ་ནི་ཡང་དག་པའི་ལྟ་བས་སྔར་མཐོང་ལམ་གྱི་དུས་ན་བདེན་པ་བཞིའི་ཆོས་ཉིད་འདི་ལྟར་དུ་རྟོགས་སོ་ཞེས་ཡོངས་གཅོད་ཀྱི་སྒོ་ནས་ངེས་པར་བྱེད། རྟོག་པས་དེ་ལྟ་བུའི་རྟོགས་པ་དེ་རྟགས་དང་གཏན་ཚིགས་ཀྱི་སྒོ་ནས་རྟོགས་ཤིང་དེ་ཇི་ལྟར་གཞན་ལ་མཚོན་པའི་ཚུལ་གྱིས་གཏན་ལ་འབེབས་ཤིང་གོ་བར་བྱེད། ངག་གིས་ཆོས་ཉིད་སྤྲོས་བྲལ་གྱི་རྟོགས་པ་དེའི་རང་བཞིན་ཐ་སྙད་ཙམ་དུ་ཚིག་གིས་མཚོན་ནས་འཆད་རྩོད་རྩོམ་གསུམ་གྱི་སྒོ་ནས་གཞན་ལ་སྟོན་ཅིང་ལྟ་བ་རྣམ་དག་ཏུ་ཡིད་
ཆེས་པར་བྱེད། ལས་ཀྱི་མཐས་སྤྱོད་ལམ་ཐམས་ཅད་དང་མི་མཐུན་པ་མེད་ཅིང་ཆོས་དང་མཐུན་པའི་ཚུལ་ཁྲིམས་རྣམ་དག་ཏུ་ཡིད་ཆེས་པར་བྱེད། འཚོ་བས་ལོག་འཚོ་སྡིག་པའི་ཟས་དང་མ་འདྲེས་ཤིང་ཡང་དག་པའི་འཚོ་བས་འཚོ་བ་རྣམ་དག་ཏུ་ཡིད་ཆེས་པར་བྱེད། རྩོལ་བས་ནི་མཐོང་ཟིན་ཆོས་ཉིད་ཀྱི་དོན་ལ་ཡང་དང་ཡང་དུ་གོམས་པར་བྱེད་པས་སྒོམ་སྤངས་ཉོན་མོངས་པའི་གཉེན་པོར་བྱེད། དྲན་པས་ཞི་ལྷག་གི་དམིགས་རྣམ་མི་བརྗེད་པར་འཛིན་པས་ཉེ་ཉོན་བརྗེད་ངེས་ཀྱི་གཉེན་པོ་བྱེད། ཏིང་ངེ་འཛིན་གྱིས་བྱིང་རྒོད་ལ་སོགས་པའི་སྐྱོན་མེད་པའི་ཏིང་ངེ་འཛིན་བསྒྲུབས་ཤིང་ལམ་གྱི་ཡོན་ཏན་གོང་ནས་གོང་དུ་འཕེལ་བས་མི་མཐུན་ཕྱོགས་ཀྱི་གཉེན་བོར་བྱེད་དོ། །དེ་ཡང་དབུས་མཐའ་ལས། ཡོངས་སུ་གཅོད་དང་གོ་བྱེད་དང༌། རྣམ་གསུམ་གཞན་ཡིད་ཆེས་པར་བྱེད། །ལྷག་མ་གཉེན་པོའི་ཡན་ལག་གོ །ཞེས་སོ། །དེ་ལྟར་བྱང་ཆོས་སོ་བདུན་ཀྱང་རྫས་སུ་བསྡུ་ན་བཅུའམ་བཅུ་གཅིག་སྟེ། དད་བརྩོན་དྲན་པ་ཏིང་ངེ་འཛིན་ཤེས་རབ་དང་ལྔ། དགའ་བ་ཤིན་སྦྱང་བཏང་སྙོམས་རྟོག་པ་ཚུལ་ཁྲིམས་དང་བཅུའོ། །དེ་ཡང་དྲན་པ་ཉེར་གཞག་བཞི་ནི་ཤེས་རབ་ཏུ་འདུ། ཡང་དག་སྤོང་བ་བཞི་ནི་བརྩོན་འགྲུས་སུ་འདུ། །རྫུ་འཕྲུལ་གྱི་རྐང་པ་བཞི་ནི་ཏིང་ངེ་འཛིན་དུ་འདུའོ། །ཆོས་རབ་ཏུ་རྣམ་འབྱེད་དང་ཡང་དག་པའི་ལྟ་བ་ནི་ཤེས་རབ། །ངག་ལས་མཐའ་འཚོ་བ་དང་གསུམ་
ཚུལ་ཁྲིམས་སོ། །ཡང་ན་ངག་སོ་སོར་པ་གྲངས་པས་བཅུ་གཅིག་གོ །བསྐྱེད་དང་རྫོགས་པ་གཟུངས་དང་ཟད་པར་དང༌། ཞེས་བསྐྱེད་རྫོགས་ནི་ལེའུ་བཅུ་པར་འཆད་པ་ལྟར་ཡིན་ལ། གཟུངས་ནི་ཆོས་ཀྱི་ཚིག་དོན་ལ་སོགས་པ་མི་བརྗེད་པར་འཛིན་པའི་དྲན་པ་དང་ཤེས་རབ་བོ། །ཟད་པ་ཡང་འཆད་པར་འགྱུར་རོ། །སློབ་ལམ་བཞིའི་ངོ་བོར་གྱུར་པའི་རྒྱུའི་ས་བཅུའི་དང་པོ་རབ་ཏུ་དགའ་བའི་ས་ལ་བདུན་ཏེ། ངོ་བོ་ཐེག་ཆེན་མཐོང་ལམ་གྱི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག་ནི། མདོ་སྡེའི་རྒྱན་ལས། བྱང་ཆུབ་ལ་ནི་ཉེ་བ་དང༌། །སེམས་ཅན་དོན་སྒྲུབ་མཐོང་བ་ལས། །རབ་ཏུ་དཀའ་བ་སྐྱེ་འགྱུར་པས། །དེ་ཕྱིར་རབ་དགའ་ཞེས་བརྗོད་དོ། །སྤང་བའི་ཁྱད་པར་མཐོང་སྤངས་བརྒྱ་དང་བཅུ་གཉིས་སྤངས། །རྟོགས་པའི་ཁྱད་པར་ཆོས་ཉིད་ཀུན་ཏུ་འགྲོ་བའི་དོན་རྟོགས། ཀུན་རྫོབ་ཀྱི་ཡོན་ཏན་དུས་སྐད་ཅིག་ལ་ཏིང་ངེ་འཛིན་བརྒྱ་ལ་རྣམ་པར་འཇུག་ཅིང་ལྡང༌། སངས་རྒྱས་བརྒྱའི་ཞལ་བལྟ། སངས་རྒྱས་བརྒྱས་བྱིན་གྱིས་བརླབས་པར་ཤེས། སངས་རྒྱས་ཀྱི་ཞིང་བརྒྱར་འགྲོ། ཞིང་བརྒྱ་གཡོ་བར་བྱེད། ཞིང་བརྒྱ་སྣང་བར་བྱེད། །ཆོས་ཀྱི་སྒོ་བརྒྱ་འགྱེད། སེམས་ཅན་བརྒྱ་སྨིན་པར་བྱེད། དུས་བསྐལ་པ་བརྒྱར་གནས་པ་སྟོན། སྔོན་དང་ཕྱི་མའི་གནས་བརྒྱ་ལ་ཡེ་ཤེས་ཀྱི་གཟིགས་པ་འཇུག །ལུས་བརྒྱ་རོ་སྟོན། ལུས་རེ་རེ་ལ་འཁོར་ཕུན་སུམ་ཚོགས་པ་
བརྒྱ་རེས་བསྐོར་བར་སྟོན་པ་རྣམས་ཐོབ། ཤས་ཆེ་བའི་ཁྱད་པར་སྦྱིན་པའི་ཕ་རོལ་ཏུ་ཕྱིན་པ་ཤས་ཆེ། སྐྱེ་བ་འཛིན་པའི་ཁྱད་པར་ཛམྦུའི་གླིང་གི་རྒྱལ་པོའི་སྐྱེ་བ་འཛིན་ནུས་པའོ། །ས་གཉིས་པ་དྲི་མ་མེད་པ་ལ། །ངོ་བོ་ཐེག་ཆེན་སྒོམ་ལམ་ཆུང་ངུའི་ཆུང་ངུའི་གནས་སྐབས་ཀྱི་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག །འཆལ་ཚུལ་རྩོལ་བའི་དྲི་བྲལ་ཕྱིར། །དྲི་མ་མེད་པའི་ས་ཞེས་བྱ། །ཞེས་སོ། །སྤང་བའི་ཁྱད་པར་ཁམས་གསུམ་གྱི་སྒོམ་སྤངས་ཆེན་པོའི་ཆེན་པོ་ཞེ་དྲུག་སྤང༌། རྟོགས་པའི་ཁྱད་པར་ཆོས་ཉིད་མཆོག་གི་དོན་དུ་རྟོགས། ཀུན་རྫོབ་ཀྱི་ཡོན་ཏན་སྟོང་ཕྲག་བཅུ་གཉིས་ཐོབ། །ཤས་ཆེ་བའི་ཁྱད་པར་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཤས་ཆེ། སྐྱེ་བ་འཛིན་པའི་ཁྱད་པར་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོའི་སྐྱེ་བ་འཛིན་ནུས། །ས་གསུམ་པ་འོད་བྱེད་པ་ལ། ངོ་བོ་ཐེག་ཆེན་སྒོམ་ལམ་ཆུང་ངུའི་འབྲིང་པོའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག །ཆོས་ཀྱི་སྣང་བ་ཆེན་པོ་ནི། བྱེད་པའི་ཕྱིར་ན་འོད་བྱེད་པ། ཞེས་སོ། །སྤང་བའི་ཁྱད་པར་ཁམས་གསུམ་གྱི་སྒོམ་སྤངས་ཆེན་པོའི་འབྲིང་པོ་ཞེ་དྲུག་སྤང༌། རྟོགས་པའི་ཁྱད་པར་ཆོས་ཉིད་རྒྱུ་མཐུན་པའི་དོན་གྱི་མཆོག་ཏུ་རྟོགས། དེའི་དོན་སྔར་ཐོས་པ་བྱས་པ་དེ་ཆོས་ཉིད་ཀྱིས་རྟོགས་པའི་རྒྱུ་མཐུན་པའི་དོན་དུ་རྟོགས་ནས་སྟོང་གསུམ་མེ་འོབས་ཀྱིས་གང་པའང་འབོགས་ནས་ཆོས་འཚོལ་བའོ། །
ཀུན་རྫོབ་ཀྱི་ཡོན་ཏན་འབུམ་ཕྲག་བཅུ་གཉིས་ཐོབ། །ཤས་ཆེ་བའི་ཁྱད་པར་བཟོད་པའི་ཕ་རོལ་ཏུ་ཕྱིན་པ་ཤས་ཆེ། སྐྱེ་བ་འཛིན་པའི་ཁྱད་པར་ལྷའི་དབང་པོའི་སྐྱེ་བ་འཛིན་པའོ། །ས་བཞི་པ་འོད་འཕྲོ་བ་ལ། །ངོ་བོ་ཐེག་ཆེན་སྒོ་ལམ་ཆུང་ངུའི་ཆེན་པོའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག །འདི་ལྟར་བྱང་ཆུབ་ཕྱོགས་མཐུན་ཆོས། །རབ་ཏུ་སྲེག་བྱེད་འོད་ལྟ་བུ། །དེ་དང་ལྡན་ཕྱིར་ས་དེ་ནི། །གཉིས་པོ་སྲེག་པའི་འོད་འཕྲོ་ཅན། ཅེས་སོ། །སྤང་བའི་ཁྱད་པར་ཁམས་གསུམ་གྱི་སྒོམ་སྤངས་ཆེན་པོའི་ཆུང་ངུ་ཞེ་དྲུག་སྤངས། རྟོགས་པའི་ཁྱད་པར་ཆོས་ཉིད་ཡོངས་སུ་འཛིན་པ་མེད་པའི་དོན་དུ་རྟོགས་པའོ། །དེའི་ཚེ་བདག་ཏུ་འཛིན་པ་མེད་པས་ཆོས་ཀྱི་དབྱིངས་ལ་བདག་གིར་འཛིན་པ་མེད་པར་རྟོགས་པའོ། །ཀུན་རྫོབ་ཀྱི་ཡོན་ཏན་བྱེ་བ་ཕྲག་བཅུ་གཉིས་ཐོབ། ཤས་ཆེ་བའི་ཁྱད་པར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཤས་ཆེ། སྐྱེ་བ་འཛིན་པའི་ཁྱད་པར་འཐབ་བྲལ་ལྷའི་རྒྱལ་པོའི་སྐྱེ་བ་འཛིན་ནུས་པའོ། །ས་ལྔ་པ་སྦྱང་དཀའ་བ་ནི། ངོ་བོ་ཐེག་ཆེན་སྒོམ་ལམ་འབྲིང་པོའི་ཆུང་ངུའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིགྱོན་ཏན་གྱི་རྟེན་བྱེད་པ་དང༌། ངེས་ཚིག །སེམས་ཅན་རྣམས་ཡོངས་སྨིན་བྱེད་ཅིང༌། རང་གི་སེམས་ཀྱང་སྲུང་བའི་ཕྱིར། །བློ་ལྡན་རྣམས་ཀྱི་སྦྱང་དཀའ་བ། །དེ་ཕྱིར་སྦྱང་དཀའ་ཞེས་བརྗོད་དོ། །ཞེས་སོ། །
སྤང་བའི་ཁྱད་པར་ཁམས་གསུམ་གྱི་སྒོམ་སྤངས་འབྲིང་པོའི་ཆེན་པོ་ཞེ་དྲུག་སྤངས། རྟོགས་པའི་ཁྱད་པར་ཆོས་ཉིད་གཉིས་སུ་མེད་པའི་དོན་དུ་རྟོགས། ཀུན་རྫོབ་ཀྱི་ཡོན་ཏན་བྱེ་བ་སྟོང་ཕྲག་བཅུ་གཉིས་ཐོབ། ཤས་ཆེ་བའི་ཁྱད་པར་བསམ་གཏན་གྱི་ཕ་རོལ་ཏུ་ཕྱིན་པ་ཤས་ཆེ། སྐྱེ་བ་འཛིན་པའི་ཁྱད་པར་དགའ་ལྡན་ལྷའི་རྒྱལ་པོའི་སྐྱེ་བ་འཛིན་ནོ། །ས་དྲུག་པ་མངོན་དུ་གྱུར་པ་ལ། །ངོ་བོ་ཐེག་ཆེན་སྒོམ་ལམ་འབྲིང་པོའི་འབྲིང་གི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག །ཤེས་རབ་ཕ་རོལ་ཕྱིན་བརྟེན་ནས། །འཁོར་བ་དང་ནི་མྱ་ངན་འདས། །གཉིས་པོ་མངོན་དུ་གྱུར་པའི་ཕྱིར། །མངོན་དུ་གྱུར་པའི་ས་ཞེས་བྱ། །ཞེས་སོ། །སྤང་བའི་ཁྱད་པར་ཁམས་གསུམ་ཀའི་སྒོམ་སྤངས་འབྲིང་པོ་ཞེ་དྲུག་སྤངས། རྟོགས་པའི་ཁྱད་པར་ཆོས་ཉིད་རྣམ་པར་དག་པའི་དོན་དུ་རྟོགས། ཀུན་རྫོབ་ཀྱི་ཡོན་ཏན་བྱེ་བ་འབུམ་ཕྲག་བཅུ་གཉིས་ཐོབ། ཤས་ཆེ་བའི་ཁྱད་པར་ཤེས་རབ་ཕར་ཕྱིན་ཤས་ཆེ། སྐྱེ་བ་འཛིན་པའི་ཁྱད་པར་འཕྲུལ་དགའི་ལྷའི་རྒྱལ་པོའི་སྐྱེ་བ་འཛིན་ནུས་སོ། །ས་བདུན་པ་རིང་དུ་སོང་བ་ལ། ངོ་བོ་ཐེག་ཆེན་སྒོམ་ལམ་འབྲིང་པོའི་ཆེན་པོའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག །བགྲོད་ཅིག་ལམ་དང་འབྲེལ་བའི་ཕྱིར། །རིང་དུ་སོང་བའི་སར་འདོད་དོ། །ཞེས་སོ། །བགྲོད་གཅིག་ལམ་ནི་ལམ་ལ་འབད་རྩོལ་ཞི་བའི་ས་བརྒྱད་པ་ཡིན་ལ་དེ་དང་འབྲེལ་བར་གནས་པས་
འཁོར་བ་ལས་རིང་དུ་སོང་བའོ། །སྤང་བའི་ཁྱད་པར་ཁམས་གསུམ་གྱི་སྒོམ་སྤངས་འབྲིང་པོའི་ཆུང་ངུ་ཞེ་དྲུག་སྤངས། རྟོགས་པའི་ཁྱད་པར་ཆོས་ཉིད་ཐ་དད་མེད་པའི་དོན་དུ་རྟོགས། སངས་རྒྱས་ཀྱི་ཆོས་མདོ་རྒྱས་པ་དུ་མར་གསུངས་ཀྱང་དོན་ཆོས་ཀྱི་དབྱིངས་ལ་ཐ་དད་མེད་པར་རྟོགས་པའོ། །ཀུན་རྫོབ་ཀྱི་ཡོན་ཏན་བྱེ་བ་ཁྲག་ཁྲིག་འབུམ་ཕྲག་བཅུ་གཉིས་ཐོབ། ཤས་ཆེ་བའི་ཁྱད་པར་ཐབས་ཀྱི་ཕར་ཕྱིན་ཤས་ཆེ། སྐྱེ་བ་འཛིན་པའི་ཁྱད་པར་གཞན་འཕྲུལ་དབང་བྱེད་ཀྱི་རྒྱལ་པོའི་སྐྱེ་བ་འཛིན་པའོ། །ས་བརྒྱད་པ་མི་གཡོ་བ་ནི། ངོ་བོ་ཐེག་ཆེན་སྒོམ་ལམ་ཆེན་པོའི་ཆུང་ངུའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག །འདུ་ཤེས་གཉིས་ཀྱིས་མི་གཡོ་བ། །མི་གཡོ་བ་ཡི་སར་འདོད་དོ། །ཞེས་སོ། །འདུ་ཤེས་གཉིས་ནི། མཚན་མའི་འདུ་ཤེས་དང༌། མཚན་མ་མེད་པའི་འདུ་ཤེས་སོ། །སྤང་བའི་ཁྱད་པར་ཁམས་གསུམ་གྱི་སྒོམ་སྤངས་ཆུང་ངུའི་ཆེན་པོ་ཞེ་དྲུག་སྤངས། རྟོགས་པའི་ཁྱད་པར་ཆོས་ཉིད་བྲི་གང་མེད་པ་དང་རྣམ་པར་མི་རྟོག་པ་དང་ཞིང་དག་པ་ལ་དབང་བའི་གནས་སུ་རྟོགས། ཀུན་རྫོབ་ཀྱི་ཡོན་ཏན་སྟོང་ཆེན་འབུམ་ཕྲག་གཅིག་གི་རྡུལ་དང་མཉམ་པ་ཐོབ། ཤས་ཆེ་བའི་ཁྱད་པར་སྟོབས་ཀྱི་ཕ་རོལ་ཏུ་ཕྱིན་པ་ཤས་ཆེ། སྐྱེ་བ་འཛིན་པའི་ཁྱད་པར་སྟོང་གི་བདག་པོ་ཚངས་པའི་སྐྱེ་བ་འཛིན་ནུས་པའོ། །ས་དགུ་པ་ལེགས་པའི་བློ་གྲོས་ནི། ངོ་བོ་ཐེག་ཆེན་སྒོམ་
ལམ་ཆེན་པོའི་འབྲིང་པོའི་སྐབས་ཀྱི་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག །སོ་སོ་ཡང་དག་རིག་བློ་བཟང༌། །ས་དེ་ལེགས་པའི་བློ་གྲོས་ཡིན། ཞེས་སོ། །སྤང་བའི་ཁྱད་པར་ཁམས་གསུམ་གྱི་སྒོམ་སྤངས་ཆུང་ངུའི་འབྲིང་པོ་ཞེ་དྲུག་སྤངས། རྟོགས་པའི་ཁྱད་པར་ཆོས་ཉིད་ཡེ་ཤེས་ལ་དབང་བའི་གནས་སུ་རྟོགས། ཀུན་རྫོབ་ཀྱི་ཡོན་ཏན་སྟོང་ཆེན་འབུམ་ཕྲག་བཅུའི་རྡུལ་གྱི་གྲངས་དང་མཉམ་པ་ཐོབ། ཤས་ཆེ་བའི་ཁྱད་པར་སྨོན་ལམ་གྱི་ཕར་ཕྱིན་ཤས་ཆེ། སྐྱེ་བ་འཛིན་པའི་ཁྱད་པར་སྟོང་གཉིས་ཀྱི་བདག་པོ་ཚངས་པ་ཆེན་པོའི་སྐྱེ་བ་འཛིན་པའོ། །ས་བཅུ་པ་ཆོས་ཀྱི་སྤྲིན་ནི། ངོ་བོ་ཐེག་ཆེན་སྒོམ་ལམ་ཆེན་པོའི་སྐབས་ཀྱིས་ཡེ་ཤེས་ཁྱད་པར་ཅན་གང་ཞིག །ཡོན་ཏན་གྱི་རྟེན་བྱེད་པ་དང༌། ངེས་ཚིག །སྤྲིན་བཞིན་གཉིས་ཀྱིས་ནམ་མཁའི་ཁམས། །ཁྱབ་པའི་ཕྱིར་ན་ཆོས་ཀྱི་སྤྲིན། །ཞེས་སོ། །གཉིས་ནི། གཟུངས་དང་ཏིང་ངེ་འཛིན་གྱི་སྤྲིན་གཉིས་ཀྱིས་རང་རྒྱུད་ཀྱི་ནམ་མཁའ་ཁྱབ་པའོ། །སྤང་བའི་ཁྱད་པར་ཁམས་གསུམ་གྱི་སྒོམ་སྤངས་ཆུང་ངུའི་ཆུང་ངུ་ཞེ་དྲུག་སྤངས། རྟོགས་པའི་ཁྱད་པར་ཆོས་ཉིད་ཕྲིན་ལས་ལ་དབང་བའི་གནས་སུ་རྟོགས། ཀུན་རྫོབ་ཀྱི་ཡོན་ཏན་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་གྱི་གྲངས་དང་མཉམ་པ་ཐོབ། ཤས་ཆེ་བའི་ཁྱད་པར་ཡེ་ཤེས་ཀྱི་ཕ་རོལ་ཏུ་ཕྱིན་པ་ཤས་ཆེ། སྐྱེ་བ་འཛིན་པའི་ཁྱད་པར་གནས་གཙང་ལྷའི་རྒྱལ་པོའི་སྐྱེ་བ་འཛིན་པར་
ནུས་པའོ། །དག་པ་ས་གསུམ་པོ་འདིར་དབང་བཞི་ཐོབ་སྟེ། ས་བརྒྱད་པ་ལ་ཉོན་ཡིད་གནས་འགྱུར་བས། རྣམ་པར་མི་རྟོག་པ་དང༌། སྒོ་ལྔ་གནས་འགྱུར་བས་ཞིང་དག་པ་ལ་དབང༌། ས་དགུ་པར་རྣམ་པར་རྟོག་པ་ཡིད་ཤེས་གནས་འགྱུར་བས་ཡེ་ཤེས་ལ་དབང༌། ས་བཅུ་པར་ཡིད་ཤེས་ཀྱི་འཆར་གཞི་ཀུན་གཞིའི་ཤེས་པ་གནས་འགྱུར་བས་འཕྲིན་ལས་ཕུན་སུམ་ཚོགས་པ་ལ་དབང་འབྱོར་ཏེ་གང་དུ་རྟོགས་པའི་ཁྱད་པར་བཤད་པ་དང་གཅིག་གོ །འབྲས་བུའི་ས་གསུམ་ནི་གསང་སྔགས་རྡོ་རྗེ་ཐེག་པའི་ལུགས་ཏེ། སྔར་གྱི་ས་བཅུ་པོའི་སྟེང་དུ་བཅུ་གཅིག་ཀུན་ཏུ་འོད་སྤྲུལ་སྐུའི་ས་དང༌། བཅུ་གཉིས་མ་ཆགས་པདྨ་ཅན་ལོངས་སྐུའི་ས་དང༌། བཅུ་གསུམ་རྡོ་རྗེ་འཛིན་པའམ་ཡི་གེ་འཁོར་ལོ་ཚོགས་ཆེན་གྱི་ས་དང་བཅུ་གསུམ་མོ། །ཡང་ན་བཅུ་གཅིག་པ་དཔེ་མེད་པ། བཅུ་གཉིས་པ་ཡེ་ཤེས་ལྡན། བཅུ་གསུམ་རྡོ་རྗེ་འཛིན་པའོ། །ཡང་ན། ཀུན་ཏུ་འོད་དང༌། བདུད་རྩི་འོད་དང༌། ནམ་མཁའ་འོད་དང༌། རྡོ་རྗེ་འོད་དང༌། རིན་ཆེན་དང༌། པདྨ་འོད་དང༌། ལས་ཀྱི་འོད་དང༌། དཔེ་མེད་པ་དང༌། དཔེ་དང་བྲལ་བ་དང༌། ཤེས་རབ་འོད་དང༌། ཐམས་ཅད་མཁྱེན་པ་དང༌། སོ་སོའི་བདག་ཉིད་དག་པའི་ས་སྟེ་བཅུ་གཉིས་སོ། །དེ་དག་ཀྱང་སྐུ་ལྔ་ཡེ་ཤེས་ལྔ་དབྱིངས་དང་ཡེ་ཤེས་ཀྱི་ཆ་ལ་བཏགས་པའོ། །དེས་ན་འབྲས་བུའི་སའི་རྣམ་གྲངས་མི་འདྲ་བ་དུ་མ་ཡོད་ཀྱང་སྐུ་གསུམ་མམ། སངས་རྒྱས་ཀྱི་ཡོན་ཏན་ལ་སོགས་པའི་ལྡོག་ཆལ་བཏགས་པ་ལས་རྒྱུའི་
ས་ལམ་ལྟར་གོང་ནས་གོང་དུ་བགྲོད་དུ་མེད་དོ། །དགེ་འདུན་གྱི་ཡོན་ཏན་འཆད་པའི་སྐབས་སུ། ཉན་རང་སྐྱེས་བུ་ཟུང་བཞིའམ། གང་ཟག་ཡ་བརྒྱད་ནི། རྒྱུན་དུ་ཞུགས་པ་དང༌། ལན་ཅིག་ཕྱིར་འོང༌། ཕྱིར་མི་འོང༌། དགྲ་བཅོམ་པ་དང་བཞི་ནི་སྐྱེས་བུ་ཟུང་བཞི་ཡིན། དེ་རེ་རེ་ལ་ཞུགས་གནས་གཉིས་རེ་ཕྱེ་བས་ཡ་བརྒྱད་དོ། །དེ་དག་གི་ས་མཚམས་ནི་མངོན་པ་འོག་མ་ལྟར་ན་མཐོང་ལམ་སྐད་ཅིག་བཅོ་ལྔ་ལ་གནས་པ་དང༌། གོང་མ་ལྟར་ན་སྦྱོར་ལམ་པ་དང༌། མཐོང་ལམ་སྐད་ཅིག་བཅོ་ལྔ་ལ་གནས་པ་གཉིས་ཀ་རྒྱུན་དུ་ཞུགས་པ་ཞུགས་པ། མཐོང་ལམ་སྐད་ཅིག་མ་བཅུ་དྲུག་པ་ལམ་རྗེས་སུ་ཤེས་པ་ཐོབ་ནས་རྒྱུན་དུ་ཞུགས་པ་འབྲས་གནས། རྒྱུན་ཞུགས་དེས་འདོད་པའི་སྒོམ་སྤངས་གཅིག་ནས་ལྔའི་བར་སྤངས་པ་ཕྱིར་འོང་ཞུགས་པ། །འདོད་པའི་སྒོམ་སྤངས་དྲུག་པ་སྤངས་ན་ཕྱིར་འོང་འབྲས་གནས། འདོད་པའི་སྒོམས་སྤངས་བདུན་པ་དང་བརྒྱད་པ་གང་རུང་སྤངས་ལ་དགུ་པ་མ་སྤང་ན་ཕྱིར་མི་འོང་ཞུགས་པ། འདོད་པའི་སྒོམ་སྤངས་རིལ་གྱིས་སྤངས་ན་ཕྱིར་མི་འོང་འབྲས་གནས་སོ། །ཕྱིར་མི་འོང་འབྲས་གནས་དེས་ཁམས་གོང་མའི་སྒོམ་སྤངས་སྤོང་བ་ལ་ཞུགས་པ་ནས་བཟུང༌། སྲིད་རྩེའི་སྒོམ་སྤངས་བརྒྱད་པ་སྤངས་པའི་བར་འདི་དགྲ་བཅོམ་ཞུགས་པ། ཁམས་གསུམ་ཀའི་སྒྲིབ་པ་ལྷག་མ་མ་ལུས་པར་སྤངས་པ་ནི་དགྲ་བཅོམ་པ་འབྲས་གནས་སོ། །དགྲ་བཅོམ་དེ་ལ་ཡང་ཤེས་རབ་ཀྱི་ཆ་ལས་རྣམ་པར་གྲོལ་བ་དང༌། གཉིས་ཀའི་ཆ་
ལས་རྣམ་པར་གྲོལ་བ་གཉིས་ཡོད་དེ། བསམ་གཏན་དང་པོའི་ཉེར་བསྡོགས་མི་ལྕོགས་མེད་པ་ལ་བརྟེན་ནས་འཇིག་རྟེན་ལས་འདས་པའི་ལམ་གྱིས་ཁམས་གསུམ་ཀའི་སྒྲིབ་པ་མ་ལུས་པ་སྤངས་ནས་དགྲ་བཅོམ་པའི་གོ་འཕང་ཐོབ་ནས་ཀྱང༌། རྣམ་པར་ཐར་པ་བརྒྱད་ལ་སྙོམས་པར་འཇུག་མི་ནུས་པ་ནི་ཤེས་རབ་ཀྱི་ཆ་ལས་རྣམ་གྲོལ་དང༌། འཇིག་རྟེན་དང་འཇིག་རྟེན་ལས་འདས་པ་གཉིས་ཀའི་སྒོ་ནས་སྒོམ་སྤངས་སྤངས་པ་བསམ་གཟུགས་སོགས་སྙོམས་འཇུག་དགུ་ག་ལ་སྙོམས་པར་འཇུག་ནུས་པ་ནི་གཉིས་ཀའི་ཆ་ལས་རྣམ་གྲོལ་ལོ། །འདས་ལམ་བདག་མེད་རྟོགས་པའི་ཤེས་རབ་ཀྱིས་ཉོན་མོངས་པའི་སྒྲིབ་པ་ཙམ་སྤངས་པས་ཤེས་རབ་ཀྱི་ཆ་ལས་རྣམ་གྲོལ་དང༌། འཇིག་རྟེན་པ་དང་འདས་ལམ་གཉིས་ཀའི་སྒོ་ནས་ཉོན་མོངས་པ་དང་སྙོམས་འཇུག་གི་སྒྲིབ་པ་གཉིས་ཀ་ལས་གྲོལ་བ་ནི་གཉིས་ཀའི་ཆ་ལས་རྣམ་གྲོལ་ལོ། །སྙོམས་འཇུག་གི་སྒྲིབ་པ་ཞེས་པ་ནི་བསམ་གཏན་གྱི་སེམས་ཐོབ་པའི་གེགས་བྱིང་རྒོད་སོགས་སྒྲིབ་པ་རྣམས་ལས་གྲོལ་བའོ། །ཟུང་བཞི་པོ་དེ་དག་གི་ངེས་ཚིག་ནི། འབྲས་བུ་ཐོབ་པའི་ལམ་གྱི་རྒྱུན་ལ་ཞུགས་པས་ན་རྒྱུན་ཞུགས། འདོད་པར་སྐྱེ་བ་ལན་གཅིག་ལེན་པས་ན་ལན་ཅིག་ཕྱིར་འོང༌། ད་ཕྱིན་ཆད་འདོད་པའི་ཁམས་འདིར་མི་སྐྱེ་བས་ན་ཕྱིར་མི་འོང༌། ཉོན་མོངས་པའི་དགྲ་ཐམས་ཅད་ཆོམས་པས་ན་དགྲ་བཅོམ་པའོ། །ཞུགས་པ་བཞིའི་འབྲས་བུ་དེ་དག་ཐོབ་པའི་ཕྱིར་བརྩོན་པ་ལ་ཞུགས་
པས་ན་ཞུགས་པའོ། །དེ་དག་ལམ་གང་ལ་གནས་ན་མངོན་པ་འོག་མ་པ་རྣམས་ནི། ལམ་རྗེས་ཤེས་སྒོམ་ལམ་དུ་བཞེད་ཅིང༌། འབྲས་གནས་ཡིན་ན་སྒོམ་ལམ་ཐོབ་པས་ཁྱབ་པར་བཞེད་པས་རྒྱུན་ཞུགས། །ཕྱིར་འོང་ཕྱིར་མི་འོང་གསུམ་སྒོམ་ལམ་དང༌། དགྲ་བཅོམ་པ་མི་སློབ་པའི་ལམ་མོ། །མངོན་པ་གོང་མ་ལྟར་ན་ལམ་རྗེས་ཤེས་མཐོང་ལམ་དུ་བཞེད་པས་རྒྱུན་ཞུགས་མཐོང་ལམ། ཕྱིར་འོང་མི་འོང་གཉིས་སྒོམ་ལམ། དགྲ་བཅོམ་པ་མི་སློབ་པའི་ལམ་མོ། །དེ་དག་དམན་ལམ་ས་བརྒྱད་དང་སྦྱར་ན། སྦྱོར་ལམ་དུ་ཉན་ཐོས་ཀྱི་རིགས་ངེས་པ་ཐོབ་པ་ནི་རིགས་ཀྱི་ས། རྒྱུན་ཞུགས་ཞུགས་པ་ནི་བརྒྱད་པའི་ས་སྟེ། དགྲ་བཅོམ་འབྲས་གནས་ནས་ཡར་ལུགས་ལྡོག་ཏུ་བགྲངས་པས་བརྒྱད་པ་ཡིན་པས་སོ། །རྒྱུན་ཞུགས་འབྲས་གནས་ནི་མཐོང་བའི་ས་སྟེ་བདེན་བཞིའི་དོན་དང་པོར་མཐོང་བའོ། །ཕྱིར་འོང་འབྲས་གནས་ནི་སྲབ་པའི་ས་སྟེ་འདོད་ཉོན་ཆུང་ངུ་གསུམ་མ་གཏོགས་སྤངས་པས་འདོད་པའི་འདོད་ཆགས་སྲབ་པའོ། །ཕྱིར་མི་འོང་འབྲས་གནས་ནི་འདོད་ཆགས་དང་བྲལ་བའི་ས་སྟེ་འདོད་ཉོན་དགུ་ག་སྤངས་པས་འདོད་པའི་འདོད་ཆགས་དང་བྲལ་བའོ། །དགྲ་བཅོམ་པ་ནི་བྱས་པ་རྟོགས་པའི་ས་སྟེ། རང་དོན་གྱི་བྱ་བ་ཐམས་ཅད་བྱས་ཟིན་ནས་ཟད་དང་མི་སྐྱེ་ཤེས་པའི་ཡེ་ཤེས་བརྙེས་པའོ། །ཟད་དང་མི་སྐྱེ་ཤེས་པ་ནི། ཁམས་གསུམ་གྱི་ཉོན་མོངས་སྔར་ཡོད་པ་རྣམས་ཟད་པ་དང༌། ཕྱིན་ཆད་མི་སྐྱེ་བར་ཤེས་པའོ། །ཕྱིར་འོང་ཞུགས་པ། ཕྱིར་མི་འོང་
ཞུགས་པ། དགྲ་བཅོམ་པ་ཞུགས་པ་གསུམ་ནི་ཉན་ཐོས་ཀྱི་ས་ཞེས་ཀྱང་བྱ། དེའི་སྟེང་དུ་རང་རྒྱལ་གྱི་ཞུགས་གནས་བརྒྱད་ཀ་གཅིག་ཏུ་བརྩིས་ནས་རང་སངས་རྒྱས་ཀྱི་ས་ཞེས་དམན་ལམ་ས་བརྒྱད་དོ།། ༈ སྐྱབས་འགྲོའི་དབྱེ་བའི་སྐབས་རྒྱུའི་སྐྱབས་འགྲོ་ནི་གཞན་རྒྱུད་ལ་བྱོན་ཟིན་པའི་དཀོན་མཆོག་གསུམ་ལ། སྟོན་པ་དང་ལམ་དང་གྲོགས་ཀྱི་ཚུལ་གྱིས་སྐྱབས་སུ་འགྲོ་བ་ཡིན་ལ། །འབྲས་བུའི་སྐྱབས་འགྲོ་ནི། མ་འོངས་པ་ན་རང་རྒྱུད་ལ་དཀོན་མཆོག་གསུམ་ཐོབ་པར་སྨོན་པའོ། །འདི་དང་སྨོན་སེམས་ཀྱི་ཁྱད་པར་གང་ཡིན་ཅེ་ན། རྗེ་བཙུན་བསོད་ནམས་རྩེ་མོས་ནི། སྨོན་སེམས་ལ་ངེས་པར་དམ་བཅས་པ་ཞིག་དགོས་པས་འདི་གཉིས་ཀྱི་ཁྱད་པར་དམ་བཅས་པའི་ལྕགས་ཀྱུས་རང་དབང་དུ་བྱས་མ་བྱས་ཀྱི་ཁྱད་ཡིན་ནོ་ཞེས་གསུངས། ཀུན་མཁྱེན་ཆོས་ཀྱི་རྒྱལ་པོས་ནི། སྨོན་སེམས་གཞན་དོན་དང༌། འདི་རང་དོན་ལ་དམིགས་པའི་ཁྱད་པར་རོ། །ཞེས་གསུངས་སོ། །འོན་ཀྱང་བསྟན་བཅོས་འདི་ཉིད་ཀྱི་སྐབས་སུ་རྒྱུ་མཚན་ཉིད་ཀྱི་ཐེག་པའི་སྐྱབས་འགྲོ་རྒྱུའི་སྐྱབས་འགྲོ་དང༌། འབྲས་བུ་གསང་སྔགས་ཀྱི་ཐེག་པའི་སྐྱབས་འགྲོ་ལ་འབྲས་བུའི་སྐྱབས་འགྲོ་ཞེས་བཞག་ནས་དེ་གཉིས་ཀ་ལའང་སྔར་ལྟར་རྒྱུ་འབྲས་ཀྱི་སྐྱབས་འགྲོ་གཉིས་རེ་སྟེ། མཚན་ཉིད་ཐེག་ཆེན་པ་ལྟར་ན་སྐུ་བཞི་ཡེ་ཤེས་ལྔ་ལྡན་གྱི་སངས་རྒྱས་ལུང་དང་རྟོགས་པའི་བདག་ཉིད་ཀྱི་དམ་ཆོས། །
རྒྱལ་སྲས་སར་གནས་པའི་འཕགས་པའི་དགེ་འདུན་ཏེ་གསུམ་ལ་སྟོན་པའམ་གྲོགས་ཀྱི་ཚུལ་གྱིས་སྐྱབས་སུ་འགྲོ་བ་རྒྱུའི་སྐྱབས་འགྲོ། །ད་ལྟ་ལམ་བསྒྲུབ་པས་མ་འོངས་པ་ན་རང་རྒྱུད་ལ་དཀོན་མཆོག་གསུམ་འབྱོན་པར་སྨོན་པ་ནི་འབྲས་བུའི་སྐྱབས་འགྲོའོ། གསང་སྔགས་ལྟར་ན་སྔར་གྱི་དཀོན་མཆོག་གསུམ་པོ་དེའི་སྟེང་དུ་མེ་ཏོག་གང་ལ་ཕོག་པའི་ལྷ་དེ་གཙོས་ཡི་དམ་དཀྱིལ་འཁོར་གྱི་གཙོ་བོར་སངས་རྒྱས་དང་རྒྱུད་སྡེ་བཞིའམ་དྲུག་བསྐྱེད་རྫོགས་དང་བཅས་པ་ཆོས། །གནས་གསུམ་གྱི་དཔའ་བོ་མཁའ་འགྲོ་དམ་ཅན་ཆོས་སྲུང་དང་བཅས་པ་དགེ་འདུན་ཡིན་ལ། དེ་དག་ཐམས་ཅད་ཀྱང་རྩ་བའི་བླ་མ་སངས་རྒྱས་ཀུན་དངོས་ཡིན་ཏེ་དེའི་སྐུ་དགེ་འདུན་གསུང་དམ་ཆོས། །ཐུགས་སངས་རྒྱས་ཏེ་དཀོན་མཆོག་གསུམ་ཀུན་འདུས་སུ་ཤེས་ཤིང་བསྐྱབ་བྱ་དང་སྐྱོབ་བྱེད་ཀྱང་ཐ་དད་དུ་མི་འཛིན་པར་གཉིས་མེད་ཀྱི་ངང་ནས་སྐྱབས་སུ་འགྲོ་བ་ནི་རྒྱུའི་སྐྱབས་འགྲོ་དང༌། །ཡེ་ཤེས་གྲུབ་པ་ལས། ངག་ཐོབ་བྲལ་བའི་སེམས་སངས་རྒྱས། །མི་འགྱུར་དྲི་མེད་ཆོས་དང་ནི། །ཡོན་ཏན་ལྷུན་རྫོགས་དགེ་འདུན་ཉིད། །ཡིན་ཕྱིར་རང་གི་སེམས་ཉིད་མཆོག །ཅེས་པ་ལྟར་རང་སེམས་འོད་གསལ་བའི་ཡེ་ཤེས་སྐྱོན་ཡེ་ཟད་དུ་གནས་པས་དག་བྱ་དང་བྲལ་ཞིང༌། ཡོན་ཏན་ཡེ་ལྡན་དུ་གནས་པས་གསར་ཐོབ་དང་བྲལ་བ་ནི་སངས་རྒྱས་དང༌། ཡེ་ནས་འགྱུར་བ་མེད་པའི་ཆོས་ཉིད་དྲི་བྲལ་གྱི་ངོ་བོ་ནི་ཆོས། ཡོན་ཏན་དབྱེར་མེད་པར་འདུས་པ་
ནི་དགེ་འདུན་ཏེ་ད་ལྟ་ཉིད་ནས་རང་སེམས་དཀོན་མཆོག་གསུམ་གྱི་བདག་ཉིད་དུ་ཤེས་པ་ནི་འབྲས་བུའི་སྐྱབས་འགྲོའོ། །ཞེས་འཆད་དགོས་སོ། །གནས་གསུམ་ནི། གནས་ཉེར་བཞི། ཡུལ་སོ་གཉིས། དུར་ཁྲོད་བརྒྱད་དོ། །ལེའུ་བདུན་པ་ཚད་མེད་བཞིའི་སྐབས་སུ་བདེ་བ་དང་མི་ལྡན་པའི་སེམས་ཅན་ལ་དམིགས་ནས་དེ་བདེ་བ་དང་ལྡན་པར་འདོད་པ་བྱམས་པ་དང༌། སྡུག་བསྔལ་གྱིས་གདུང་བའི་སེམས་ཅན་ཞིག་ལ་དམིགས་ནས་དེ་སྡུག་བསྔལ་དང་བྲལ་བར་འདོད་པ་སྙིང་རྗེ་དང༌། སྡུག་བསྔལ་མེད་པ་བདེ་བ་དང་ལྡན་པའི་སེམས་ཅན་ཞིག་ལ་དམིགས་ནས་དེ་དང་མི་འབྲལ་བར་འདོད་པ་དགའ་བ། ཆགས་སྡང་ཅན་ལ་དམིགས་ནས་བདེ་སྡུག་གི་རྒྱུ་ཉེ་རིང་ཆགས་སྡང་དང་བྲལ་བར་ཤོག་ཅིག་སྙམ་པ་བཏང་སྙོམས་སོ། །དེས་ན་བྱམས་པ་དང་སྙིང་རྗེ་གཉིས་ཀྱི་ཁྱད་པར། ཡུལ་ནད་པ་ལྟ་བུ་ནད་ལས་གྲོལ་འདོད་དུ་འདྲ་ཡང༌། ནད་མེད་པའི་བདེ་བ་དང་མི་ལྡན་པ་ཞིག་དེ་དམིགས་ཡུལ་དུ་བྱས་ནས་དེ་དང་ལྡན་པར་འདོད་ན་བྱམས་པ། ནད་ཀྱི་སྡུག་བསྔལ་ལ་དམིགས་ནས་དེ་དང་འབྲལ་བར་འདོད་ན་སྙིང་རྗེ་ཡིན་ཏེ་དོན་གཞན་ཕན་གྱི་བློར་ཐམས་ཅད་གཅིག་ཀྱང་དམིགས་རྣམ་གྱིས་ཁྱད་པར་འབྱེད་པའོ། །ཡང་བཏང་སྙོམས་ལའང་གཉིས་ཏེ། སེམས་ཅན་ཐམས་ཅད་ཐོག་མ་མེད་པའི་དུས་ནས་སྡུག་བསྔལ་འབའ་ཞིག་ལ་སྤྱོད་པ་འདི་ཆགས་སྡང་གིས་ལན་
པ་ཡིན་པས་སེམས་ཅན་ཐམས་ཅད་ཉེ་རིང་ཆགས་སྡང་དང་བྲལ་བར་ཤོག་ཅིག་སྙམ་དུ་སྒོམ་པ་དང༌། ཡང་སེམས་ཅན་ཐམས་ཅད་ཕ་མར་མ་གྱུར་མེད་པ་ལ་ཉེ་རིང་དང་ཆགས་སྡངས་བྱེད་པ་འདི་རེ་ངན་སྙམ་དུ་ཐམས་ཅད་ལ་ཕ་མ་བུ་ཚའི་འདུ་ཤེས་བསྒོམ་པའི་སྒོམ་ཚུལ་ཞིག་དང་གཉིས་ཡོད་པ་ལས་སྔ་མ་ནི་གཞུང་ལུགས་རྣམས་ལས་རྒྱ་ཆེར་འབྱུང་ལ། །ཕྱི་མ་ནི་ཁྲིད་ཡིག་རྣམས་ན་མང་ངོ༌། །འོན་ཀྱང་དེ་གཉིས་མི་འགལ་ཏེ། སེམས་ཅན་ཐམས་ཅད་ཆགས་སྡང་དང་བྲལ་ན་རང་ཡང་དེའི་ཁོངས་སུ་འདུ་ལ། རང་རྒྱུད་ཀྱི་ཆགས་སྡང་ཞི་ན་གཞན་ལའང་དེ་ལྟར་ཞི་འདོད་ཀྱི་བློ་སྐྱེ་བས་སོ། །མདོར་ན་ལྡན་འདོད་བྲལ་འདོད་མི་འབྲལ་ཞི་བར་འདོད་པ་བཞིའི་སྒོ་ནས་ཚད་མེད་བཞི་འབྱེད་པ་ཡིན་ནོ།། །།ལེའུ་བརྒྱད་པ་བྱང་ཆུབ་ཀྱི་སེམས་ཡོངས་སུ་བཟུང་བའི་ལེའུའི་སྐབས་སུ་གང་ལ་རང་དོན་སེམས་པ་ཡོད་མ་ཡིན། ཞེས་པའི་སྐབས་སུ་བྱང་ཆུབ་སེམས་ཀྱི་ངོ་བོ་ནི། མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། ཅེས་པ་ལྟར་དོན་གཉིས་སམ་ཟུར་གཉིས་དང་ལྡན་པ་སྟེ། གང་གི་ཆེད་དུ་བྱ་བ་སྙིང་རྗེས་གཞན་དོན་ལ་དམིགས་པ་དང༌། གང་ཆེད་དུ་བྱ་བ་ཤེས་རབ་ཀྱིས་རྫོགས་བྱང་ལ་དམིགས་པ་གཉིས་སོ། །དེ་གཉིས་ཀ་མ་ཚང་ན་གཞན་ལ་ཕན་འདོད་ཙམ་དང་རྫོགས་བྱང་ཐོབ་འདོད་ཙམ་ནི་སེམས་བསྐྱེད་དུ་མི་འགྲོ་སྟེ། མཐར་ཐུག་རྫོགས་བྱང་ཐོབ་པར་མི་འདོད་ན་སེམས་ཅན་གཞན་ལ་
གནས་སྐབས་དང་མཐར་ཐུག་གི་ཕན་བདེ་གཞན་ཇི་ལྟ་བུ་འདོད་ཀྱང་བྱམས་པ་དང་སྙིང་རྗེ་ཙམ་ལས་མི་འདའ་ལ། རང་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པ་ཙམ་ཉན་ཐོས་ཀྱི་གཞུང་ལས་ཀྱང་བཤད་པས་མདོར་ན་སེམས་ཅན་ཐམས་ཅད་ཀྱི་དོན་དུ་སྙམ་པ་དང༌། རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ་སྙམ་པའི་ཟུར་གཉིས་པོ་འདི་མ་ཚང་ན་བྱང་ཆུབ་ཀྱི་སེམས་སུ་མི་འགྲོ་བས་བྱམས་སྙིང་རྗེ་བྱང་ཆུབ་ཀྱི་སེམས་གསུམ་གྱི་ཁྱད་པར་འདི་ཤིན་ཏུ་ཞིབ་པར་ཤེས་དགོས་ཏེ་ཐེག་ཆེན་གྱི་ལམ་ཐམས་ཅད་ཀྱི་རྩ་བ་ཡིན་པས་ཁ་བཤད་ཙམ་ལ་གདེངས་བཅས་པས་མི་འོང་ངོ། །སེམས་བསྐྱེད་ཀྱི་དབྱེ་བའི་སྐབས་སུ་ལམ་ལྔའི་རྗེས་འགྲོ་སེམས་བསྐྱེད་ལྔ་ནི། ཚོགས་ལམ་ན་ལས་དང་པོ་པའི་སེམས་བསྐྱེད། སྦྱོར་ལམ་ན་ཡོངས་སུ་སྦྱོང་བ་བྱས་པའི་སེམས་བསྐྱེད། མཐོང་ལམ་ན་ཆོས་མཐོང་བའི་སེམས་བསྐྱེད། སྒོམ་ལམ་དུ་རྣམ་པར་གྲོལ་བའི་སེམས་བསྐྱེད། མི་སློབ་པའི་ལམ་དུ་བསམ་གྱིས་མི་ཁྱབ་པའི་སེམས་བསྐྱེད་དོ། །ས་མཚམས་དབྱེ་བ་ཉི་ཤུ་རྩ་གཉིས་ནི། རྒྱན་ལས། །དེ་ཡང་ས་གསེར་ཟླ་བ་མེ། །གཏེར་དང་རིན་ཆེན་འབྱུང་གནས་མཚོ། །རྡོ་རྗེ་རི་སྨན་བཤེས་གཉེན་དང༌། །ཡིད་བཞིན་ནོར་བུ་ཉི་མ་གླུ། །རྒྱལ་པོ་མཛོད་དང་ལམ་པོ་ཆེ། །བཞོན་པ་བཀོད་མའི་ཆུ་དང་ནི། །སྒྲ་བརྙན་ཆུ་བོ་སྤྲིན་རྣམས་ཀྱི། །རྣམ་པ་ཉི་ཤུ་རྩ་
གཉིས་སོ། །ཞེས་པ་དེ་དག་དཔེ་ཡིན་ལ། དཔེ་དེས་མཚོན་ནས་སེམས་བསྐྱེད་ཀྱི་གྲོགས་ཉེར་གཉིས་དང༌། །དཔེ་དང་དཔེ་ཅན་གཉིས་ཀྱི་ཆོས་མཐུན་པ་ཉི་ཤུ་རྩ་གཉིས་རྣམས་རིམ་བཞིན་སྦྱར་ནས་འཆད་དོ། །གྲོགས་བྱང་ཆུབ་དོན་གཉེར་གྱི་འདུན་པ་དང་མཚུངས་ལྡན་དུ་གྱུར་པའི་སེམས་བསྐྱེད་ཆོས་ཅན། །དཔེ་ས་ལྟ་བུ་ཡིན་ཏེ། ཆོས་དཀར་པོའི་ཡོན་ཏན་ཐམས་ཅད་ཀྱི་རྟེན་བྱེད་པའི་ཕྱིར། དེ་བཞིན་དུ་གཞན་ལའང་སྦྱར་ཏེ། གྲོགས་གཞན་ལ་ཕན་ཕྱིར་ཕྱིན་དྲུག་ལ་སྦྱོར་འདོད་ཀྱི་བསམ་པ་དང་མཚུངས་ལྡན། དཔེ་གསེར་ལྟ་བུ། གནས་སྐབས་ཐམས་ཅད་དུ་འགྱུར་བ་མེད་པའི་ཕྱིར། གྲོགས་བསམ་པ་དེ་ཉིད་ལྷག་པར་གྱུར་པས་ལྷག་པའི་བསམ་པ་དང༌། དཔེ་ཟླ་བ་ཚེས་པ་ལྟ་བུ། དཀར་པོའི་ཡོན་ཏན་གོང་ནས་གོང་དུ་འཕེལ་བའི་ཕྱིར། གྲོགས་ཕར་ཕྱིན་དྲུག་ལ་དངོས་སུ་སྦྱོར་བས་སྦྱོར་བ་དང་མཚུངས། དཔེ་མེ་ལྟ་བུ། ཤིང་གི་བྱེ་བྲག་གི་མེ་བཞིན་གོང་ནས་གོང་དུ་འགྲོ་བའི་ཕྱིར། གྲོགས་སྦྱིན་པའི་ཕ་རོལ་ཏུ་ཕྱིན་པ་དང༌། དཔེ་གཏེར་ལྟ་བུ། མི་ཟད་ཅིང་རེ་བ་སྐོང་བའི་ཕྱིར། གྲོགས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། དཔེ་རིན་པོ་ཆེའི་འབྱུང་གནས་དང་འདྲ་སྟེ། ཡོན་ཏན་རིན་པོ་ཆེ་ཐམས་ཅད་ཀྱི་འབྱུང་ཁུངས་ཡིན་པའི་ཕྱིར། གྲོགས་བཟོད་པའི་ཕ་རོལ་ཏུ་ཕྱིན་པ། དཔེ་མཚོ་ལྟ་བུ། མེ་མཚོན་ལ་སོགས་པའི་གནོད་པས་མི་ཚུགས་
པའི་ཕྱིར། །གྲོགས་བརྩོན་འགྲུས་ཀྱི་ཕ་རོལ་ཏུ་ཕྱིན་པ། །དཔེ་རྡོ་རྗེ་ལྟ་བུ། མི་ཤིགས་ཤིང་སྲ་པ་ཉིད་ཀྱིས་གང་ལའང་ཐོགས་པ་མེད་པའི་ཕྱིར། གྲོགས་བསམ་གཏན་གྱི་ཕ་རོལ་ཏུ་ཕྱིན་པ། དཔེ་རི་ལྟ་བུ། །རྣམ་རྟོག་གི་རླུང་གིས་མི་གཡོ་བའི་ཕྱིར། གྲོགས་ཤེས་རབ་ཀྱི་ཕ་རོལ་ཏུ་ཕྱིན་པ། དཔེ་སྨན་ལྟ་བུ། ཉོན་མོངས་པའི་ནད་སེལ་བའི་ཕྱིར། གྲོགས་ཐབས་ལ་མཁས་པ་དང༌། དཔེ་བཤེས་གཉེན་ལྟ་བུ། དུས་ཐམས་ཅད་དུ་ཕན་པ་འབའ་ཞིག་སྒྲུབ་པའི་ཕྱིར། །གྲོགས་སྨོན་ལམ་གྱི་ཕ་རོལ་ཏུ་ཕྱིན་པ༴་དཔེ་ཡིད་བཞིན་གྱི་ནོར་བུ་ལྟ་བུ། གང་ལྟར་འདོད་པའི་དོན་ཐམས་ཅད་འགྲུབ་པའི་ཕྱིར། གྲོགས་སྟོབས་ཀྱི་ཕ་རོལ་ཏུ་ཕྱིན་པ། དཔེ་ཉི་མ་ལྟ་བུ། གདུལ་བྱའི་རྒྱུད་ཀྱི་ལོ་ཏོག་ཐམས་ཅད་བསྐྱེད་པའི་ཕྱིར། གྲོགས་ཡེ་ཤེས་ཀྱི་ཕ་རོལ་ཏུ་ཕྱིན་པ། དཔེ་གླུ་དབྱངས་ལྟ་བུ། ཀུན་གྱི་ཡིད་དང་མཐུན་པར་ཆོས་སྟོན་པའི་ཕྱིར། གྲོགས་མངོན་པར་ཤེས་པ་དང་མཚུངས། དཔེ་རྒྱལ་པོ་ལྟ་བུ། བྱ་བ་ཐམས་ཅད་ལ་རང་དབང་དང་བཅས་པའི་ཕྱིར། གྲོགས་བསོད་ནམས་དང་ཡེ་ཤེས་ཀྱི་ཚོགས་གཉིས་དང༌། དཔེ་མཛོད་ཁང༌། བསོད་ནམས་དང་ཡེ་ཤེས་ཀྱི་ཚོགས་མང་པོའི་གནས་ཡིན་པའི་ཕྱིར། གྲོགས་བྱང་ཆུབ་ཀྱི་ཕྱོགས་ཀྱི་ཆོས་དང༌། དཔེ་ལམ་་པོ་ཆེ། དུས་གསུམ་གྱི་འཕགས་པ་རྣམས་གཤེགས་ཤིང་རྗེས་སུ་གཤེགས་པའི་ལམ་པོ་ཆེ་ལྟ་བུ་
ཡིན་པའི་ཕྱིར། གྲོགས་ཞི་གནས་དང་ལྷག་མཐོང་དང་མཚུངས། དཔེ་བཞོན་པ་བཟང་པོ་ལྟ་བུ། མཐའ་གཉིས་སུ་མི་གོལ་བར་དབུ་མའི་ལམ་དུ་འགྲོ་བའི་ཕྱིར། གྲོགས་གཟུངས་དང་སྤོབས་པ་དང༌། དཔེ་བཀོད་མའི་ཆུ་བོ་ལྟ་བུ། ཆོས་ཀྱི་ཚིག་དོན་མི་ཟད་པར་འཛིན་ཅིང་གཞན་ལ་སྟོན་པའི་ཕྱིར། གྲོགས་ཆོས་ཀྱི་དགའ་སྟོན་དང༌། དཔེ་སྒྲ་བརྙན་ལྟ་བུ། གདུལ་བྱ་འདུན་པར་བྱེད་པའི་ཆོས་སྟོན་པའི་ཕྱིར། གྲོགས་བགྲོད་པ་གཅིག་པའི་ལམ་དང༌། དཔེ་ཆུ་བོ་ལྟ་བུ། རྣམ་པ་ཐམས་ཅད་མཁྱེན་པའི་རྒྱ་མཚོར་ངང་གིས་འབབ་པའི་ཕྱིར། གྲོགས་ཆོས་ཀྱི་སྐུ་དང་མཚུངས་པར་ལྡན་པའི་སེམས། དཔེ་སྤྲིན་ལྟ་བུ་ཡིན་ཏེ། །དགའ་ལྡན་གྱི་གནས་ན་བཞུགས་པ་ལ་སོགས་པ་སྟོན་པའི་ཕྱིར། ཞེས་སོ། དེ་དག་གི་ས་མཚམས་ནི། དང་པོ་གསུམ་ཚོགས་ལམ་གསུམ། སྦྱོར་བ་མེ་ལྟ་བུ་སྦྱོར་ལམ། དེ་ནས་ཕ་རོལ་ཏུ་ཕྱིན་པ་བཅུ་ས་བཅུ་མངོན་ཤེས། ལྔ་སོགས་དག་པ་ས་གསུམ་སྤྱི་ལ་ཡོད། ཆོས་ཀྱི་དགའ་སྟོན་སོགས་གསུམ་ས་བཅུ་པ་ཁོ་ན་ལ་ཡོད་དེ། །ཡང་མི་ཟད་པ་བརྒྱད་ཅུ་དང་སྦྱར་ན་འདུན་པ་ནས་ཤེས་རབ་ཀྱི་བར་སྔར་དང་འདྲ་ལ། དེ་ནས་ཚད་མེད་པ་བཞི་བཤེས་གཉེན་ལྟ་བུ་ཡིན་ཏེ། གནས་སྐབས་ཐམས་ཅད་དུ་ཕན་པར་འདོད་པའི་ཕྱིར། མངོན་པར་ཤེས་པ་ལྔ་ཡིད་བཞིན་གྱི་ནོར་བུ་ལྟ་བུ་ཡིན་ཏེ། གཞན་དོན་སྒྲུབ་པ་ལ་མ་ཐུ་ཐོབ་པའི་ཕྱིར། བསྡུ་དངོས་པ་ནི་ཉི་མ་ལྟ་བུ་ཡིན་ཏེ་གདུལ་
བྱའི་རྒྱུད་ཀྱི་ལོ་ཏོག་འཕེལ་བར་བྱེད་པའི་ཕྱིར། །སོ་སོ་ཡང་དག་པར་རིག་པ་བཞི་གླུ་དབྱངས་ལྟ་བུ་ཡིན་ཏེ། གདུལ་བྱ་འདུལ་བའི་ཆོས་སྟོན་པའི་ཕྱིར། རྟོན་པ་བཞི་རྒྱལ་པོ་ལྟ་བུ་ཡིན་ཏེ་ཀུན་གྱི་ཡིད་ཆེས་པའི་གནས་ཡིན་པའི་ཕྱིར། །ཚོགས་གཉིས་བྱང་ཕྱོགས་ཞི་ལྷག་གསུམ་འདྲ་ལ། གཟུངས་དང་སྤོབས་པ་དང་ལྡན་པ་ནི་བཀོད་མ་ལྟ་བུ་སྟེ། ཆུ་འཛིན་ཞིང་མི་ཟད་པར་འབྱིན་པ་དང་ཆོས་མཐུན་པར་ཐོས་པ་དང༌། མ་ཐོས་པའི་ཆོས་ཀྱི་ཚིག་དང་དོན་འཛིན་ཞིང་མི་ཟད་པ་འབྱིན་པའི་ཕྱིར་རོ། །ཆོས་ཀྱི་སྡོམ་བཞི་སྟོན་པ་སྒྲ་བརྙན་ལྟ་བུ་སྟེ། གདུལ་བྱའི་ཡིད་དང་མཐུན་པའི་ཆོས་སྟོན་པའི་ཕྱིར། ལྷག་མ་གཉིས་ཀྱང་འདྲའོ། །འདིར་བཤད་པ་ཀུན་བསྡོམས་ན་བརྒྱད་ཅུ་ཡོད་པ་དེ་དག་བྱང་ཆུབ་སེམས་དཔའ་རྣམས་ལ་ཟད་མི་ཤེས་པ་ཡོད་པས་མི་ཟད་པ་བརྒྱད་ཅུ་ཞེས་བྱ་སྟེ་བློ་གྲོས་མི་ཟད་པའི་མདོ་ལས་བྱུང་བའོ། །དེ་ལས་གཞན་རྣམས་གོ་སླ་ལ། །རྟོན་པ་བཞི་ནི། དྲང་དོན་ལ་མི་རྟོན་ངེས་དོན་ལ་རྟོན། །ཀུན་རྫོབ་ལ་མི་རྟོན་དོན་དམ་ལ་རྟོན། །གང་ཟག་ལ་མི་རྟོན་ཆོས་ལ་རྟོན། །རྣམ་ཤེས་ལ་མི་རྟོན་ཡེ་ཤེས་ལ་རྟོན་པའོ། །རྟོན་ཅེས་པ་ནི་ཡིད་ཆེས་པར་བྱ་བའི་དོན་ཏོ། །ཆོས་ཀྱི་སྡོམ་བཞི་ནི། །འདུས་བྱས་ཐམས་ཅད་མི་རྟག་པ། །ཟག་པ་དང་བཅས་པ་ཐམས་ཅད་སྡུག་བསྔལ་བ། །ཆོས་ཐམས་ཅད་སྟོང་ཞིང་བདག་མེད་པ། །མྱ་ངན་ལས་འདས་པ་ཞི་བའོ། །
འདིར་ས་མཚམས་ཀྱིས་དབྱེ་བའི་སེམས་བསྐྱེད་བཤད་ཚུལ་གཉིས་བྱུང་བའི་སྔ་མ་ནི་ཡུམ་གྱི་མདོ་དང་སྦྱར་བ་ཡིན་ལ། ཕྱི་མ་ནི་བློ་གྲོས་མི་ཟད་པའི་མདོ་དང་སྦྱར་བའོ། །གང་ལྟར་ཡང་འདུན་པ་ལ་སོགས་པ་རྣམས་ནི་གྲོགས་ཡིན་པས། སེམས་བསྐྱེད་ནི་གཞན་དོན་དུ་རྫོགས་བྱང་དོན་གཉེར་གྱི་སེམས་བསྐྱེད་ཉིད་ཡིན་ལ་གྲོགས་རྣམས་ནི་སྐབས་དེ་དང་དེར་ལྷག་པར་གྱུར་པ་ཙམ་སྟེ་དཔེར་ན། ས་དང་པོ་ལ་སྦྱིན་པ་ལྷག་པར་གྱུར་པ་ལྟ་བུའོ། །འདི་དག་ལ་དཔལ་ཡེ་ཤེས་གྲགས་པ་ལ་སོགས་པས་དང་པོ་གསུམ་སྨོན་སེམས་དང༌། ལྷག་མ་བཅུ་དགུ་འཇུག་སེམས་སུ་བཞེད་ཀྱང༌། །ཀུན་མཁྱེན་ཆེན་པོས་ནི་ཐམས་ཅད་ལའང་བསམ་པས་སྨོན་པའི་ཆ་དང༌། འཇུག་པས་ལག་ལེན་ལ་ཁྱབ་པར་བྱེད་པའི་ཆ་གཉིས་རེ་ཡོད་དོ་ཞེས་གསུངས་སོ། །དེའང་ཡིན་ཏེ་དཔེར་ན་འདུན་པ་ལྟ་བུ་ལའང་བློས་བྱང་ཆུབ་ལ་འདུན་པ་ཙམ་ནི་སྨོན་པའི་སེམས་ཡིན་ལ། འདུན་པ་དེས་དྲངས་ནས་བྱང་ཆུབ་སེམས་དཔའི་སྤྱོད་པ་གཞན་ལ་སློབ་པའི་ཆ་ནས་འཇུག་སེམས་ཡིན་ནོ། །སྤྱིར་སྨོན་འཇུག་གི་ཁྱད་པར་ལའང་རྒྱ་བོད་ཀྱི་མཁས་པ་རྣམས་བཞེད་པ་མི་འདྲ་བ་མང་དུ་སྣང་སྟེ། སོ་སོའི་སྐྱེ་བོའི་སེམས་བསྐྱེད་སྨོན་པ་དང༌། །འཕགས་ལམ་ཐོབ་ནས་འཇུག་པར་བཞེད་པ་དང༌། །ཆོ་གས་མ་བླང་བ་སྨོན་པ་དང༌། །བླངས་པ་འཇུག་པར་བཞེད་པ་དང༌། །ཉམས་ལེན་གྱི་བྱ་བས་མ་ཟིན་པ་ནི་སྨོན་སེམས་དང༌། ཟིན་ནས་འཇུག་པར་བཞེད་པ་དང༌། །འབྲས་བུར་དམ་བཅའ་བ་
སྨོན་སེམས་དང༌། །རྒྱུ་ལ་དམ་བཅའ་པ་འཇུག་སེམས་སུ་འདོད་པ་ལ་སོགས་པ་མང་ཡང་སྐྱེ་འཕགས་ཀྱི་སེམས་བསྐྱེད་ལ་འདོད་པ་ཙམ་མ་གཏོགས་གཞན་རྣམས་ཕལ་ཆེར་རྒྱལ་སྲས་ཞི་བ་ལྷའི་ལུང་གི་རྗེས་སུ་འབྲང་བ་འདྲ་ཡང་ལུང་དོན་དགོངས་པ་ལེན་ཚུལ་མི་འདྲའོ། །ཕྱུགས་དང་གླང་པོ་ཤིང་རྟ་ཉི་ཟླ་སོགས། ཞེས་པའི་སྐབས་སུ། །ཕྱུགས་ཀྱི་ཤིང་རྟ་ལྟ་བུས་འགྲོ་བ་དང༌། །གླང་པོ་ཆེའི་ཤིང་རྟ་ལྟ་བུས་འགྲོ་བ་དང༌། །ཉི་མ་དང་ཟླ་བ་ལྟ་བུས་འགྲོ་བ་དང༌། །ཉན་ཐོས་ཀྱི་རྫུ་འཕྲུལ་ལྟ་བུས་འགྲོ་བ་དང༌། དེ་བཞིན་གཤེགས་པའི་རྫུ་འཕྲུལ་ལྟ་བུས་འགྲོ་བའོ། །དེ་ལས་སྔ་མ་གཉིས་ཕྱིར་ལྡོག་ལ་ཕྱི་མ་གསུམ་ཕྱིར་མི་ལྡོག་པའོ། །དང་པོ་ནི་སྐྱེས་བུ་ལ་ལ་ཞིག་གིས་སངས་རྒྱས་ཀྱི་ཞིང་ལྔའི་རྡུལ་སྙེད་ཀྱི་འཇིག་རྟེན་གྱི་ཁམས་འདའ་བར་འདོད་ནས་ཕྱུགས་ཀྱི་ཤིང་རྟ་ལ་ཞོན་ཏེ་སོང་བས་ཡུན་རིང་མོ་ནས་དཔག་ཚད་བརྒྱར་ཕྱིན་པ་ལས། ཕྱིར་དཔག་ཚད་བརྒྱར་ཚུར་རླུང་གིས་ཕུལ་ནས་སོང་ན་དེས་འཇིག་རྟེན་གྱི་ཁམས་དེ་སྙེད་འདའ་མི་ནུས་པ་ལྟར་ཐེག་ཆེན་གྱི་སྡེ་སྣོད་མི་འཛིན་མི་ཀློག་ཁ་ཏོན་མི་བྱེད་ཚུལ་བཞིན་ཡིད་ལ་མི་བྱེད་པར་ཉན་ཐོས་དག་ལ་བརྟེན་ཅིང་ཉན་ཐོས་ཀྱི་སྡེ་སྣོད་ཀློག་པ་ལ་སོགས་པ་སྟེ། དེ་ནི་བྱང་ཆུབ་ལས་ཕྱིར་ལྡོག་གོ །ཡང་ལ་ལ་ཞིག །འཇིག་རྟེན་གྱི་ཁམས་དེ་སྙེད་འདའ་བར་འདོད་ནས་གླང་པོ་ཆེའི་ཤིང་རྟ་ལ་ཞོན་ཏེ་སོང་ནས་ལོ་བརྒྱས་དཔག་ཚད་ཉིས་སྟོང་དུ་སོང་ནས་སྔར་ལྟར་ཕྱིར་དེད་པ་ལྟར་ཐེག་པ་ཆེ་ཆུང་མཉམ་པར་ཀློག་པ་སོགས་བྱེད་པའང་
བྱང་ཆུབ་ལས་ཕྱིར་ལྡོག་གོ །ཡང་སངས་རྒྱས་ཀྱི་ཞིང་དེ་སྙེད་འདའ་བར་འདོད་པས་ཉི་མ་དང་ཟླ་བའི་རླུང་གི་ཤིང་རྟས་སོང་ན་རིང་མོ་ནས་སླེབས་པ་ལྟར། ཉན་ཐོས་ཀྱི་ཐེག་པ་ཚིག་གཅིག་ཙམ་ཡང་ཀློག་པ་སོགས་མི་བྱེད་པ་ནི་རིང་མོ་ཞིག་ནས་རྫོགས་པའི་བྱང་ཆུབ་འགྲུབ་པའོ། །ཞིང་དེ་དག་འདའ་བར་འདོད་ནས་ཉན་ཐོས་ཀྱི་རྫུ་འཕྲུལ་གྱིས་འགྲོ་ན་སྔ་མ་ལས་མྱུར་ཡང་ཧ་ཅང་མྱུར་དུ་འདའ་མི་ནུས་པ་ལྟར་ཐེག་པ་ཆེན་པོ་འབའ་ཞིག་ཀློག་པ་སོགས་བྱེད་ཅིང་བྱང་ཆུབ་སེམས་དཔའ་རྣམས་ལ་གུས་པ་དང་ཞེ་སས་བསྟེན་ཅིང་ཆོས་འཚོལ་ལ་སྲོག་གི་ཕྱིར་ཡང་ཐེག་ཆེན་མི་སྤང་ཞིང་བྱང་ཆུབ་སེམས་དཔའ་མ་ལོབ་པ་རྣམས་ལ་མི་བརྙས་པ་དེ་ནི་སྔ་མ་ལས་ཆེས་མྱུར་བར་རྫོགས་བྱང་འགྲུབ་པའོ། །ཡང་ཞིང་དེ་དག་འདའ་བར་འདོད་ནས་དེ་བཞིན་གཤེགས་པའི་རྫུ་འཕྲུལ་ལྟ་བུས་འགྲོ་ན་སེམས་ཀྱི་སྐད་ཅིག་གིས་ཕྱིན་པ་ལྟར་བྱང་ཆུབ་ཏུ་སེམས་བསྐྱེད་ནས་ཟབ་ཅིང་རྒྱ་ཆེ་བའི་ཆོས་ལ་མོས་ཤིང་གཞན་དོན་འབའ་ཞིག་སེམས་པས་བྱམས་སྙིང་རྗེ་དྲུག་རྟོན་བཞི་སོགས་ལ་རང་གནས་ནས་གཞན་ཡང་འགོད་པ་ནི་ཆེས་མྱུར་བར་རྫོགས་པའི་བྱང་ཆུབ་འགྲུབ་པའོ། །དེ་ཡང་དང་པོ་གཉིས་སོ་སྐྱེས་མི་བརྟེན་པ། གསུམ་པ་སོ་སྐྱེས་བརྟེན་པ། བཞི་པ་མ་དག་ས་བདུན་པ། ལྔ་པ་དག་པ་ས་གསུམ་ལ་གནས་པའོ། །ཞེས་གསུངས་སོ། །རིག་དང་ཞབས་སུ་ལྡན་སོགས། །ཞེས་པའི་དོན། བདུད་བཞི་བཅོམ་ཞིང་སྤངས་རྟོགས་ཀྱི་ཡོན་་ཏན་དང་ལྡན་ལ་སྲིད་ཞི་གཉིས་
ལས་འདས་པས་ན་བཅོམ་ལྡན་འདས་དང༌། འདས་ཞེས་པའི་དོན་ལེགས་སྦྱར་ལ་མེད་ཀྱང༌། བོད་སྐད་དུ་བྱའོ། །ཆོས་ཉིད་དེ་བཞིན་ཉིད་དང་རྗེས་སུ་མཐུན་པར་གཤེགས་པས་ན་དེ་བཞིན་གཤེགས་པ། ལས་ཉོན་གྱི་དགྲ་ཐམས་ཅད་བཅོམ་ཞིང་འཇིག་རྟེན་གསུམ་གྱི་མཆོད་འོས་གྱུར་པས་ན་དགྲ་བཅོམ་པའོ། །དགྲ་བཅོམ་གྱི་དོན་ཨཱརྡ་ཏེ་ཞེས་པའི་སྒྲ་ལས་མཆོད་འོས་ལ་འཇུག་པའོ། །ཤེས་བྱའི་ཆོས་ཐམས་ཅད་ཆགས་ཐོགས་དང་བྲལ་བར་ཡང་དག་པར་མཁྱེན་པས་ན་ཡང་དག་པར་རྫོགས་པའི་སངས་རྒྱས། བུདྡྷ་ཁོང་དུ་ཆུད་པའི་དོན་གྱིས་སངས་རྒྱས་ཞེས་པ་མཁྱེན་པའི་དོན་ནོ། །ཤེས་རབ་ལྷག་མཐོང་གིས་ཆོས་ཐམས་ཅད་ཀྱི་གནས་ལུགས་གཟིགས་པས་ན་སྤྱན་ལྟ་བུ་རིག་པ་དང༌། སྙིང་རྗེས་གཞན་དོན་ལ་གཤེགས་པས་ན་ཞབས་སུ་ལྡན་པ། ལམ་བདེ་བ་བྱང་ཆུབ་སེམས་དཔའི་ཐེག་པ་ནས་འབྲས་བུ་བདེ་བ་སངས་རྒྱས་ཀྱི་སར་གཤེགས་པས་ན་བདེ་བར་གཤེགས་པ། ཕུང་པོ་ལྔའི་འཇིག་རྟེན་གྲངས་མེད་པ་མཁྱེན་པས་ན་འཇིག་རྟེན་མཁྱེན་པ། གདུལ་བར་དཀའ་བའི་སེམས་ཅན་རྣམས་ཀྱང་ཐབས་ཞི་བས་འདུལ་བས་ན་སྐྱེས་བུ་འདུལ་བ། ཁམས་གསུམ་གྱི་སེམས་ཅན་ཐར་པའི་ལམ་དུ་འདྲེན་པས་ན་ཁ་ལོ་བསྒྱུར་བ། སྲིད་ཞི་ཐམས་ཅད་ལས་མཆོག་ཏུ་གྱུར་པས་ན་བླ་ན་མེད་པ། །རིགས་དྲུག་གི་གཙོ་བོ་ལྷ་དང་མི་རྣམས་ཀྱི་ཆོས་སྟོན་པས་ན་ལྷ་དང་མི་རྣམས་ཀྱི་སྟོན་པ་ལ་སོགས་པའོ། །ཆོས་འཁོར་
གྱི་སྐབས་སུ། རྩིབས་རྣོན་མུ་ཁྱུད་འཛིན་ཅེས་པའི་དོན། སྤྱིར་ཆོས་ཀྱི་འཁོར་ལོ་ལ་བཞེད་ཚུལ་མི་འདྲ་བ་ཡོད་དེ། སྔར་བཅོམ་ལྡན་འདས་ཀྱིས་བདེན་པ་བཞིའི་ཆོས་གསུངས་པས་ཀུན་ཤེས་ཀཽཎྜི་ནྱའི་རྒྱུད་ལ་མཐོང་ལམ་སྐྱེས་པ་ན་ལྷ་རྣམས་ཀྱིས། ཀྱེ་མ་བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་རོ། །ཞེས་སྒྲ་བསྒྲགས་པའི་ཕྱིར། དེ་ཡང་ཡིན་ཏེ། འཁོར་ལོས་སྒྱུར་བའི་འཁོར་ལོ་རིན་པོ་ཆེ་དང་ཆོས་མཐུན་པ་མཐོང་ལམ་ན་ཡོད་དེ། མྱུར་བར་འགྲོ་བ་དང༌། སྔ་མ་འདོར་བ་དང༌། ཕྱི་མར་འཇུག་པ་དང༌། མཐོ་བར་འཕར་བ་དང༌། དམའ་བར་འབབ་པ་དང༌། མ་རྒྱལ་བ་ལས་རྒྱལ་བ་དང༌། རྒྱལ་བ་རྣལ་དུ་འགོད་པའོ། །དེ་བཞིན་དུ་མཐོང་ལམ་གྱིས་དམིགས་ཡུལ་མྱུར་དུ་གཅོད་པ་དང༌། དམིགས་རྣམ་སྔ་མ་འདོར་བ་དང༌། ཕྱི་མར་འཇུག་པ་དང༌། །ཁམས་གོང་མའི་བདེན་པ་ལ་དམིགས་པས་མཐོ་བར་འབར་བ་དང༌། །འོག་མའི་བདེན་པ་ལ་དམིགས་པས་དམའ་བར་འབབ་པ་དང༌། བར་ཆད་མེད་ལམ་གྱིས་སྤང་བྱའི་ཐོབ་པ་གཅོད་པས་མ་རྒྱལ་བ་ལས་རྒྱལ་བ་དང༌། །རྣམ་གྲོལ་ལམ་གྱིས་སྤང་བྱ་སྤངས་པས་བྲལ་ཐོབ་འདྲེན་པས་རྒྱལ་བ་རྣལ་དུ་འགོད་པ་དང་ཆོས་མཐུན་ནོ་ཞེས་བཞེད། ཁ་ཅིག་འཕགས་ལམ་བརྒྱད་ཆོས་འཁོར་ཡིན་ཏེ། ངག་ལས་མཐའ་འཚོ་བ་གསུམ་ཚུལ་ཁྲིམས་ཀྱི་བསླབ་པས་བསྡུས་པས་བརྟན་པའི་ལྟེ་བ་དང༌། ལྟ་བ་རྟོགས་པ་གཉིས་
ཤེས་རབ་ཀྱི་བསླབ་པས་བསྡུས་པས་གཅོད་པའི་རྩིབས་ལྟ་བུ་དང༌། ལྷག་མ་གསུམ་ཏིང་ངེ་འཛིན་གྱི་བསླབ་པས་བསྡུས་པས་སྡུད་པའི་མུ་ཁྱུད་ལྟ་བུ་ཡིན་ནོ་ཞེས་བཞེད། །འོན་ཀྱང་ཐེག་ཆེན་པ་རྣམས་ནི་ལུང་དང་རྟོགས་པའི་ཆོས་ཐམས་ཅད་ཆོས་འཁོར་དུ་བཞེད་དོ། །དེ་དག་དམ་པའི་ཆོས་ཀྱི་ངོ་བོ་ཡིན་པ་དང༌། རྫོགས་པའི་སངས་རྒྱས་ནས་ད་ལྟའི་གང་ཟག་གི་ཕར་རྒྱུད་གཅིག་ནས་གཅིག་ཏུ་འཁོར་བའི་ཕྱིར་ཞེས་བཞེད་པ་ཡིན་ནོ། །ལེའུ་དགུ་པ་བྱང་སེམས་ཀྱི་བསླབ་བྱའི་སྐབས་སུ། བསླབ་པ་བསྲུང་ཐབས་དྲན་ཤེས་བག་ཡོད་གསུམ་ནི། བསླབ་པའི་གནས་མི་བརྗེད་པ་དྲན་པ། སྒོ་གསུམ་གྱི་སྤྱོད་ལམ་ཐམས་ཅད་ལ་བརྟགས་པ་ཤེས་བཞིན། འཇུག་ལྡོག་གི་གནས་ལ་གཟོབ་པ་ལྷུར་ལེན་པ་བག་ཡོད་དོ། །འདི་དག་ཀྱང་ཤིན་ཏུ་གནད་གལ་པོ་ཆེ་ཡིན་པས་དབྱེ་འབྱེད་སེམས་ཐོག་ནས་ཤེས་པར་བྱའོ། །ཉམས་ལེན་ཐམས་ཅད་ཀྱི་གནད་འདི་གསུམ་ལ་འདུ་བ་ཡིན་ནོ། །ཤིན་ཏུ་གལ་ཆེའོ། །སྨོན་སེམས་ཀྱི་སྐབས་སུ་རྒྱུ་འབྲས་ཡན་ལག་བདུན་ནི། །མར་ཤེས་པ། དྲིན་དྲན་པ། དྲིན་གཟོ་བ། ཡིད་འོང་གི་བྱམས་པ། བརྩེ་བའི་སྙིང་རྗེ། ལྷག་བསམ་རྣམ་དག །རང་འབྲས་བླ་ན་མེད་པའོ། །སྡོམ་པ་གསུམ་ལྡན་གྱི་སྐབས་སུ། །བཞེད་པ་མི་འདྲ་བ་དྲུག་ཡོད་པས། ས་པཎ་སོགས། རིང་ལུགས། མཁས་གྲུབ་དགེ་ལེགས་དཔལ་བཟང་སོགས། །བཀའ་བརྒྱུད་དང་སྒམ་པོ་སོགས། ཨ་བྷྱཱ་ཀཱ་ར། ཤྲཱིའི་སློབ་མ་བི་བྷཱུ་ཏི་
ཙནྟ་སོགས་སོ་དེ་ལ་གནས་འགྱུར་ངོ་བོ་གཅིག་པ་ནི། སྡོམ་པའི་ངོ་བོ་དང་ལྡོག་པ་གཉིས་ཀ་གནས་འགྱུར་དུ་འདོད་པས་དབང་བསྐུར་ཐོབ་ནས་སྔགས་སྡོམ་ཁོ་ན་བསྲུང་བས་ཆོག་པར་འདོད་པའོ། །དེ་ནི་མཉམ་པ་ཆེན་པོའི་རྟོགས་པས་རྒྱུད་གྲོལ་བའི་རྣལ་འབྱོར་པ་རྣམས་ལ་ནི་འཐད་པ་ཡིན་ཡང༌། ལས་དང་པོ་པས་དེ་ལྟར་བྱས་ན་འོག་མ་ཁྱད་དུ་བསད་པའི་ལྟུང་བའི་ཆར་པ་འབབ་བོ། །གནས་འགྱུར་ངོ་བོ་གཅིག་ལ་གཞི་མི་མཐུན་དུ་འདོད་པ་ནི། ངོ་བོ་གནས་འགྱུར་ལྡོག་པ་ཐ་དད་དུ་བཞེད་པ་ཡིན་ནོ། །གསུམ་པ་རྫས་འགལ་གོང་འཕེལ་དུ་འདོད་པ་ནི། སྡོམ་གསུམ་རྫོགས་པའི་གང་ཟག་དེ་ལ་སྡོམ་པ་གསུམ་ཀ་ངོ་བོ་གཅིག་ལ་རྫས་ཐ་དད་པའི་ཚུལ་དུ་ཡོད་པའི་ཚེ་ཡོན་ཏན་གྱི་ངོས་ནས་གོང་འཕེལ་གྱི་དབང་གིས་སོ་བྱང་གཉིས་སྔགས་སྡོམ་ཀྱི་ཡན་ལག་ཏུ་ཡོད་པར་འདོད་ཅིང་དེ་ཡང་རྟེན་དང་བརྟེན་པའི་ཚུལ་དུ་ཡོད་པ་འདོད་དེ། །དེ་ཡང་གོང་མའི་ཐབས་ཤེས་ཀྱིས་འོག་མ་ཟིལ་གྱིས་གནོན་པར་མི་ནུས་པའི་བློ་ངོ་ན་ཐ་དད་དུ་ཡོད་པ་མི་འགལ་ཡང༌། རྟེན་དང་བརྟེན་པ་ཐམས་ཅད་ལ་ཁྱབ་མཉམ་དུ་འདོད་ན་རྟེན་སོ་ཐར་འདོད་པའི་ཚེ་བརྟེན་པ་སྔགས་བྱང་གཉིས་ཀྱང་གཏོང་བར་འགྱུར་བས་མི་འཐད་དོ། །གཏོང་ཐོབ་མཚམས་ནས་རྣམ་པར་དབྱེ་བ་ནི། གོང་མ་ཐོབ་པའི་ཚེ་འོག་མ་གཏོང་བར་འདོད་པ་སྟེ། དེ་ཡང་དབང་བསྐུར་ཙམ་ཐོབ་པ་ལ་ཁག་བཞག་ནས། གོང་མའི་ཐབས་ཤེས་ཁྱད་པར་ཅན་གང་ཡང་མེད་པར་རབ་བྱུང་གི་བསླབ་ཁྲིམས་
ཡལ་བར་འདོར་བ་ལ་དགོངས་ནས་ལམ་སྒྲོན་དུ། །གསང་བ་ཤེས་རབ་དབང་བསྐུར་ནི། །ཚངས་པར་སྤྱོད་པས་བླང་མི་བྱ། །ཞེས་པ་ལྟ་བུ་གནས་སྐབས་དགོས་དབང་གིས་བཞག་པ་ཡིན་ནི་འཐད་དུ་རུང་ལ། ངེས་པར་དེ་ལྟར་འདོད་ན། སུམ་ལྡན་རྡོ་རྗེ་འཛིན་པ་མི་སྲིད་པར་འགྱུར་པས་མི་འཐད་དོ། །དོང་ཙེ་བརྩེགས་ལྟར་མ་འདྲེས་པར་འདོད་པ་ཡང༌། སྡོམ་གསུམ་མཉམ་བར་རྫས་ཐ་དད་སོ་སོར་འདོད་པ་ཡང༌། སྡོམ་པའི་རང་ལྡོག་མ་འདྲེས་པའི་ངོས་ནས་འཐད་ཀྱང༌། ངོ་བོ་ལ་དེ་ལྟར་འདོད་ན་སྲོག་གཅོད་སྤོང་བའི་སེམས་པ་ལྟ་བུ་སེམས་བྱུང་རིགས་མཐུན་གསུམ་དུས་ཐ་དད་པར་གང་ཟག་གཅིག་གི་རྒྱུད་ན་གནས་པར་འགྱུར་བའི་ཕྱིར་མི་འཐད་དོ། །ཉི་ཟླ་སྐར་གསུམ་རིམ་ཅན་ཚོགས་པ་ལྟར་འདོད་པ་ནི། ཉི་ཟླ་སྐར་གསུམ་འཛོམ་ན་ཟླ་སྐར་གཉིས་ཉི་མའི་འོད་ཀྱིས་ཟིལ་གྱིས་མནན་ནས་མི་མཐོང་བ་ལྟར་སྔགས་སྡོམ་ཐོབ་པའི་ཚེ་འོག་མ་ཟིལ་གྱིས་མནན་ནས་ཡོད་ཀྱང་མི་མངོན་པར་འདོད་དོ། །དེ་ཡང་སྡོམ་གསུམ་མཚན་ཉིད་སོ་སོར་འཛིན་བཞིན་དུ་བག་ལ་ཞ་བ་མི་འཐད་དོ། །བླང་འདས་སོ་སོར་བསྲུང་དགོས་ན་ནི་བག་ལ་མ་ཞ་ལ་མི་དགོས་ན་སོ་སོར་ཡོད་པ་མི་རུང་བས་མི་འཐད་དོ། །ཞེས་བཤད་པ་ཡིན་ནོ། །བསམ་གཏན་གྱི་སྐབས་སུ་བསམ་གཏན་བཞི་དང༌། གཟུགས་མེད་བཞི་ཡིས། དང་པོ་བསམ་གཏན་བཞི་ལ། ཉེར་བ་སྔོགས་དང་དངོས་གཞི་གཉིས་ལས། དང་པོ་ཉེར་བསྡོགས་ལ་སྒོམ་ཚུལ་མང་ཡང་འཇིག་རྟེན་པའི་ལམ་རྐྱང་པ་ལ་
ཞི་རགས་ཀྱི་རྣམ་པ་ཅན་དུ་སྒོམ་པ་ཤས་ཆེ་བས་དེ་ལྟར་ན། དང་པོ་འདོད་པའི་སེམས་ནི་རགས་པ་དང༌། མ་ཞི་བ་དང༌། མཚན་མར་དམན་པར་བལྟས་ནས། །བསམ་གཏན་དང་པོ་ནི། དེ་བས་ལྷག་པར་ཡང་ཞི་བ་དང་བདེ་བ་དང་གྱ་ནོམས་པའོ་སྙམ་ནས་ཐོས་བསམ་འདྲེས་པའི་ཚུལ་གྱིས་ཡང་དང་ཡང་དུ་ཡིད་ལ་བྱས་པས་ནམ་ཞིག་ཐོས་བསམ་ལས་འདས་ནས་སྒོམ་བྱུང་དུ་སོང་སྟེ་འདོད་པའི་ཉོན་མོངས་ཆེ་འབྲིང་དྲུག་སྤངས་པའི་བར་ནི་བསམ་གཏན་གྱི་ཉེར་བསྔོག་གོ །དེ་ནས་འདོད་པའི་ཉོན་མོངས་པ་ཆུང་ངུ་གསུམ་སྤངས་པའི་ཚེ་ན་བསམ་གཏན་དངོས་གཞིའི་སེམས་ཐོབ་པའོ། །བསམ་གཏན་དང་པོ་ལ་ཡན་ལག་ལྔ་སྟེ། རྟོག་པ་དང༌། དཔྱོད་པ་དང༌། དགའ་བ་དང༌། བདེ་བ་དང༌། ཏིང་ངེ་འཛིན་དང་ལྔའོ། །རྟོག་དཔྱོད་གཉིས་ནི། མཛོད་ལས། རྟོག་དང་དཔྱོད་བ་རྩིབ་ཞིབ་ཉིད། ཅེས་པ་ལྟར་སེམས་ཏིང་ངེ་འཛིན་སྐྱོན་མེད་དུ་གནས་མི་གནས་རགས་པར་རྟོག་པ་དང༌། ཞིབ་པར་དཔྱོད་པ་དང༌། སེམས་ཏིང་ངེ་འཛིན་ལ་གནས་པས་ཡིད་ཤེས་བདེ་བས་ཁྱབ་པ་དགའ་བ་དང༌། དེའི་སྟོབས་ཀྱིས་ལུས་ལ་ཤིན་སྦྱང་གི་བདེ་བ་སྐྱེས་པ་བདེ་བ། སེམས་རྩེ་གཅིག་པའི་ཏིང་ངེ་འཛིན་ལ་གནས་པ་ཏིང་ངེ་འཛིན་ནོ། །བསམ་གཏན་གཉིས་པ་ལ་ཡན་ལག་བཞི་སྟེ། རབ་དང༌། དགའ་བ་དང༌། བདེ་བ་དང༌། ཏིང་ངེ་འཛིན་ནོ། །དྲན་པ་དང་ཤེས་བཞིན་དང་བཏང་སྙོམས་ཀྱི་ངོ་བོ་ཡིན་ཡང༌། འདིར་དགའ་བའི་གཡོ་བ་དང༌།
མ་བྲལ་བའི་ཕྱིར་རབ་དྭང་གི་སྒྲས་བསྟན་ཏོ། །ལྷག་མ་གསུམ་ནི་སྔར་བཞིན་ནོ། །བསམ་གཏན་གསུམ་པ་ལ་ཡན་ལག་ལྔ་སྟེ། བདེ་བ་དང༌། བཏང་སྙོམས་དང༌། དྲན་པ་དང༌། ཤེས་བཞིན་དང༌། ཏིང་ངེ་འཛིན་དང་ལྔའོ། །བདེ་བ་ནི་སྔར་དང་འདྲ་ལ། བཏང་སྙོམས་ནི་སེམས་བྱིང་རྒོད་མེད་པར་གནས་པའི་ཚེ་རང་བབས་སུ་འཇོག་པའོ། །དྲན་པ་ནི། ཏིང་ངེ་འཛིན་མི་བརྗེད་པའོ། །ཤེས་བཞིན་ནི་བྱིང་རྒོད་ལ་སོགས་བྱུང་མ་བྱུང་རྟོགས་པའོ། །ཏིང་ངེ་འཛིན་ནི་སྔར་ལྟར་རོ། །བསམ་གཏན་བཞི་པ་ལ་ཡན་ལག་བཞི་སྟེ་དྲན་པ་དང༌། ཚོར་བ་བཏང་སྙོམས་དང༌། འདུ་བྱེད་བཏང་སྙོམས་དང༌། ཏིང་ངེ་འཛིན་ནོ། །དྲན་པ་དང་ཏིང་ངེ་འཛིན་ནི་སྔར་དང་འདྲ་ལ། ཚོར་བ་བཏང་སྙོམས་ནི་ལུང་མ་བསྟན་དང༌། འདུ་བྱེད་བཏང་སྙོམས་ཀྱང་སྔར་དང་འདྲའོ། །དེ་ཡང་རྟོག་དཔྱོད་ལ་སོགས་ཡན་ལག་ལྔ་དང་ལྡན་པ་ནི་བསམ་གཏན་དང་པོའི་དངོས་གཞི་ཙམ་པོ་བ་ཡིན་ལ། དེ་ལས་རྟོག་པ་མེད་ལ་དཔྱོད་པ་དང་བཅས་པ་ནི་དངོས་གཞི་ཁྱད་པར་ཅན་ནོ། །རྟོག་དཔྱོད་གཉིས་ཀ་སྤང་བ་ནི་བསམ་གཏན་གཉིས་པའོ། །རྟོག་དཔྱོད་དགའ་བ་གསུམ་སྤངས་པ་ནི་བསམ་གཏན་གསུམ་པའོ། །དེ་གསུམ་བདེ་བ་དང་བཞི་སྤངས་པ་ནི་བསམ་གཏན་བཞི་པའོ། །བསམ་གཏན་དངོས་གཞི་མ་ཐོབ་ཀྱང་བསམ་གཏན་དང་པོའི་ཉེར་བསྡོགས་ཡང་དག་པ་དེས་ཀྱང་ལྷག་མཐོང་གི་རྟེན་བྱེད་
པས་ན་ཉེར་བསྡོགས་མི་ལྕོགས་མེད་ཅེས་བྱ་ལ། ཉེར་བསྡོགས་དེ་དང་དང་པོའི་དངོས་གཞི་ལ་ཙམ་ཁྱད་གཉིས། ལྷག་མ་གསུམ་དང་དྲུག་ལ་བསམ་གཏན་ས་དྲུག་ཅེས་བྱའོ། །གཉིས་པ་གཟུགས་མེད་རྣམས་ནི་ཡན་ལག་གི་དབྱེ་བ་མེད་པས་དམིགས་རྣམ་གྱིས་འབྱེད་དེ། །བསམ་གཏན་བཞི་པ་ཐོབ་པ་དེས། །གྲུ་བཞི་ཟླུམ་པོ་ལ་སོགས་དབྱིབས་ཀྱི་འདུ་ཤེས། །དཀར་སེར་དམར་ལྗང་ལ་སོགས་ཁ་དོག་གི་འདུ་ཤེས། །རི་དང་ཁང་ཁྱིམ་ལ་སོགས་ཐོགས་རེག་གི་འདུ་ཤེས་གསུམ་ཀ་བཀག་ནས་ཆོས་ཐམས་ཅད་ནམ་མཁའ་ལྟར་བསྒོམས་པས། གཟུགས་ཀྱི་འདུ་ཤེས་ཐམས་ཅད་ལས་འདས་ནས་ནམ་མཁའ་ལྟ་བུའི་ངང་དུ་གནས་པ་ནི་ནམ་མཁའ་མཐའ་ཡས། །ནམ་མཁའ་ཙམ་དུའང་འཛིན་པ་སྤངས་ནས་ནམ་མཁའོ་སྙམ་བྱེད་རྣམ་ཤེས་ཙམ་གྱི་ངང་དུ་གནས་པ་ནི་རྣམ་ཤེས་མཐའ་ཡས། །རྣམ་ཤེས་ཙམ་དུ་འཛིན་པ་ཡང་སྤངས་ནས་ཅི་ཡང་མེད་དོ། །སྙམ་དུ་གནས་པ་ནི་ཅི་ཡང་མེད་པ། ཅི་ཡང་མེད་དོ་སྙམ་དུ་འཛིན་པ་ཡང་སྤངས་ནས་ཅི་ཡང་མེད་དོ་སྙམ་མཁན་གྱི་འདུ་ཤེས་ལ་བརྟགས་ནས་འདུ་ཤེས་ཀྱི་འགྱུ་བ་རགས་པ་ཐམས་ཅད་བཀག་ནས་འདུ་ཤེས་ཕྲ་མོ་ཙམ་ལ་གནས་པ་ནི་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་དོ། །འདི་ལ་ཡོད་མིན་མེད་མིན་ཡང་ཟེར་རོ། །ཡང་མཉམ་གཞག་དང་རྗེས་ཐོབ་ཀྱི་དབྱེ་བ་ལ་གཉིས། །མཉམ་རྗེས་ངོ་བོ་གཅིག་པ་དང༌། །ངོ་བོ་ཐ་དད་པའོ། །དང་
པོ་ངོ་བོ་གཅིག་པ་ནི། སེམས་རྩེ་གཅིག་མཉམ་པར་བཞག་པའི་ཚེ། སེམས་དང་སེམས་བྱུང་གི་འགྱུ་བ་རགས་པ་ཐམས་ཅད་ནུབ་ནས་སེམས་རྟོག་མེད་དུ་གནས་པ་ནི་མཉམ་བཞག་ཡིན་ལ། དེའི་ཚེ་དབང་ཤེས་མ་འགགས་པ་ལ་ཡུལ་སྣང་ཐམས་ཅད་སྣང་ལ་འཛིན་པ་མེད་པར་གསལ་བའི་ཆ་ནི་རྗེས་ཐོབ་པོ། །གཉིས་པ་མཉམ་རྗེས་ཐ་དད་པ་ནི། སེམས་རྩེ་གཅིག་ཏུ་མཉམ་པར་གཞག་པའི་ཚེ་ན་མཉམ་གཞག་ཡིན་ལ། དེ་ལས་ལངས་ནས་ཟ་ཉལ་ལ་སོགས་པའི་སྤྱོད་ལམ་གྱི་ཚེ་སྒྱུ་མ་ལྟ་བུའི་དྲན་རྫི་དང་མ་བྲལ་བ་ནི་རྗེས་ཐོབ་པོ། །རྗེས་ཐོབ་རྒྱ་ཡན་པ་ཞེས་པ་ནི། སེམས་དྲན་ཤེས་དང་བྲལ་ནས་འཁྲུལ་འབྱམས་སུ་སོང་བའོ། །དེས་ན་རྒྱ་ཡན་པ་འདི་ནི་དག་ས་ཐོབ་ནས་མེད་ལ། །མཉམ་རྗེས་ཀྱི་ཁྱད་པར་ཙམ་ནི་སངས་རྒྱས་མ་ཐོབ་བར་དུ་ཡོད་དོ། །མཉམ་པར་བཞག་བཞིན་དུ་སྤྱོད་ལམ་མཛད་པ་སངས་རྒྱས་ཁོ་ནའི་ཁྱད་ཆོས་ཡིན་པའི་ཕྱིར་རོ། །གྲུབ་མཐའི་སྐབས་སུ་གཟུང་བ་རྡུལ་ཕྲན་ཆ་མེད་དང༌། ཤེས་པ་སྐད་གཅིག་ཆ་མེད་དོན་དམ་དུ་འདོད་པ་ནི་བྱེ་བྲག་སྨྲ་བ་ཡིན་ཏེ། མཛོད་ལས། གང་ལ་བཅོམ་དང་བློ་ཡིས་གཞན། བསལ་ན་དེ་བློ་མི་འཇུག་པ། །བུམ་ཆུ་བཞིན་དུ་ཀུན་རྫོབ་ཏུ། །ཡོད་དེ་དོན་དམ་ཡོད་གཞན་ནོ། །ཞེས་སོ། །དེ་ཡང་བཅོམ་ན་དེའི་བློ་མི་འཇུག་པ་བུམ་པ་ལྟ་བུ། བློས་གཞན་བསལ་ན་དེའི་བློ་མི་འཇུག་པ་ཆུ་ལྟ་བུ། རགས་པ་
དེ་ནི་ཀུན་རྫོབ་ཏུ་ཡོད་དེ། །ཡོད་དམ་དུ་ཡོད་པ་ལས་གཞན་མེད་པའོ། །བཅོམ་པ་དང་བློས་བསལ་མི་ནུས་པ་ནི་རྡུལ་ཕྲན་དང་སྐད་གཅིག་ཆ་མེད་དེ་དོན་དམ་དུ་ཡོད་པའོ། །མདོ་སྡེ་པ་ནི། དོན་བྱེད་ནུས་པ་དངོས་པོ་ཡིན་པས། དོན་བྱེད་ནུས་པ་དེ་ནི་དོན་དམ་དུ་ཡོད་ལ། དོན་བྱེད་ནུས་པ་ལས་གཞན་དོན་བྱེད་མི་ནུས་པ་དངོས་མེད་ནི་ཀུན་རྫོབ་བདེན་པའོ། །དེ་ཡང་རྣམ་འགྲེལ་ལས། །དོན་བྱེད་ནུས་པ་གང་ཡིན་པ། །དེ་འདིར་དོན་དམ་ཡོད་པ་ཡིན། །གཞན་ནི་ཀུན་རྫོབ་ཡོད་པ་སྟེ། །དེ་དག་རང་སྤྱིའི་མཚན་ཉིད་བཤད། །ཅེས་སོ། །དེ་ཡང་དོན་རང་མཚན་ཐམས་ཅད་དོན་དམ་དང༌། སྤྱི་མཚན་ཐམས་ཅད་ཀུན་རྫོབ་བོ། །དོན་རང་མཚན་དོན་དམ་བདེན་པ། །དངོས་པོ། མི་རྟག་པ་རྣམས་དོན་གཅིག །དོན་སྤྱི་མཚན་ཀུན་རྫོབ་བདེན་པ། དངོས་མེད། རྟག་པ་རྣམས་དོན་གཅིག་གོ །དེ་ཡང་ཆུ་སྐྱོར་བའི་དོན་བྱེད་ནུས་པའི་བུམ་པའི་རང་མཚན་ནི་དངོས་པོ་དང་དོན་དམ་གཉིས་ཀ་ཡིན་ལ། ཡིད་རྟོག་པའི་སྣང་ཡུལ་དོན་སྤྱི་མཚན་དངོས་མེད་ནི་ཀུན་རྫོབ་བདེན་པ་ཡིན་ནོ། །སེམས་ཙམ་གྱི་སྐབས་སུ་ཀུན་བརྟགས་གཞན་དབང་ཡོངས་གྲུབ་གསུམ་ལས། གཟུང་བ་ཕྱིའི་ཡུལ་དང༌། ཡུལ་དེ་འཛིན་པའི་སེམས་དང༌། དེ་གཉིས་ལ་བཏགས་པའི་མིང་ཐམས་ཅད་ནི་ཀུན་བརྟགས་ཡིན་ལ། དེ་ཐམས་ཅད་ཀྱི་ངོ་བོ་ནི་སེམས་དང་སེམས་བྱུང་ཡིན་ཏེ།
དེ་ནི་གཞན་དབང་ངོ༌། །གཞན་དབང་དེ་ལ་ཀུན་བརྟགས་མེད་པའི་ཆ་གང་ཡིན་པ་ནི་ཡོངས་གྲུབ་བོ། །དེ་ལ་དཔེར་ན་རྡེའུ་དང་ཤིང་བུ་ལ་རིགས་སྔགས་བཏབ་པས་གླང་དུ་སྣང་དུས་རྡེའུ་དང་ཤིང་བུ་ལྟ་བུ་ནི་གཞན་དབང་བ་དེ་ལ་རྟ་གླང་སྣང་བ་ལྟ་བུ་ནི་ཀུན་བརྟགས། རྟ་གླང་སྣང་ཡང་རྡེའུ་དང༌། ཤིང་བུའི་རང་བཞིན་ལས་རྟ་གླང་གིས་སྟོང་པ་ལྟ་བུ་ནི་ཡོངས་གྲུབ་པོ། །དེ་ལ་ཀུན་བརྟགས་ནི་ཀུན་རྫོབ་དང༌། གཞན་དབང་ཆོས་ཅན་དོན་དམ་དང༌། །ཡོངས་གྲུབ་ཆོས་ཉིད་དོན་དམ་མོ། །དབུ་མ་པ་ནི། །ཆོས་ཐམས་ཅད་ཀུན་རྫོབ་རྟེན་ཅིང་འབྲེལ་འབྱུང་སྒྱུ་མ་ལྟ་བུ་དང༌། དོན་དམ་སྤྲོས་པའི་མཐའ་བརྒྱད་དང་བྲལ་བར་འདོད་པའོ། །གྲུབ་མཐའ་བཞི་པོ་དེ་ཡང༌། དོན་བསྡུ་ན་ཕྱི་དོན་འདོད་རང་རིག་མི་འདོད་པ་བྱེ་བྲག་སྨྲ་བ། ཕྱི་དོན་རང་རིག་གཉིས་ཀ་འདོད་པ་མདོ་སྡེ་བ། ཕྱི་དོན་མི་འདོད་རང་རིག་འདོད་པ་སེམས་ཙམ་པ། ཕྱི་དོན་རང་རིག་གཉིས་ཀ་མི་འདོད་པ་དབུ་མ་པའོ། །ཕྱི་དོན་འདོད་མི་འདོད་ཕྱི་རོལ་གྱི་དོན་དུ་སྣང་བའི་གཟུགས་སྒྲ་སོགས་ཀྱི་དངོས་པོ་དོན་དམ་པར་ཡོད་མེད་ཡིན་ལ། རང་རིག་འདོད་མི་འདོད་ནི་ཐ་སྙད་དུ་ཤེས་པས་རང་རིག་པར་འདོད་པ་དང་མི་རིག་པར་འདོད་པའི་ཁྱད་པར་རོ། །འབྲས་བུའི་སྐབས་སུ། །སྟོབས་བཅུ་དང་ནི་མི་འཇིགས་བཞི། །མཐའ་དག་མངོན་གྱུར་སངས་རྒྱས་ཡིན། ཞེས་པའི་སྐབས་སུ་ལམ་མཐར་ཕྱིན་པའི་འབྲས་བུ་བཤད་པ་ལ་གསུམ། རྟེན་སྐུ། བརྟེན་པ་ཡེ་ཤེས། མཛད་
པ་ཕྲིན་ལས་སོ། །དང་པོ་རྟེན་སྐུ་ལ་སངས་རྒྱས་ཐམས་ཅད་ཀྱི་སྐུ་ནི་གཅིག་སྟེ། །སྤངས་རྟོགས་ཀྱི་ཡོན་ཏན་མཐར་ཕྱིན་པའི་རྣམ་པ་ཐམས་ཅད་མཁྱེན་པའི་ཡེ་ཤེས་ཆོས་ཀྱི་སྐུའོ། །ཡང་ན་སྐུ་གཉིས་ཏེ། ཆོས་སྐུ་དང་གཟུགས་སྐུའོ། །ཡང་ན་སྐུ་གསུམ་སྟེ། ཆོས་སྐུ་ལོངས་སྐུ་སྤྲུལ་སྐུའོ། །ཡང་ན་སྐུ་བཞི་སྟེ། ངོ་བོ་ཉིད་སྐུ། ཡེ་ཤེས་ཆོས་སྐུ། ལོངས་སྤྱོད་རྫོགས་སྐུ། སྤྲུལ་སྐུའོ། །དང་པོ་ངོ་བོ་ཉིད་སྐུ་ནི། །མངོན་རྟོགས་བརྒྱན་ལས། ཐུབ་པའི་ངོ་བོ་ཉིད་སྐུ་ནི། །ཟག་པ་མེད་པའི་ཆོས་གང་དག །ཐོབ་གྱུར་རྣམ་ཀུན་རྣམ་དག་པ། །དེ་དག་རང་བཞིན་མཚན་ཉིད་ཅན། །ཞེས་གསུངས་པས་མཐར་ཐུག་སངས་རྒྱས་ཀྱི་སའི་ཟག་པ་མེད་པའི་ཡེ་ཤེས་སྡེ་ཚན་ཉི་ཤུ་རྩ་གཅིག་ལ་སོགས་པ་དེ་དག་གི་རང་བཞིན་ནམ་ཆོས་ཉིད་དེ་བཞིན་ཉིད་དག་པ་གཉིས་དང་ལྡན་པ་གང་ཡིན་པའོ། །གཉིས་པ་ཡེ་ཤེས་ཆོས་སྐུ་ནི། མཁྱེན་ཆ་ཡེ་ཤེས་ཀྱི་རྣམ་གྲངས་སངས་རྒྱས་ཉིད་ཀྱི་ཐུགས་རྒྱུད་ན་བཞུགས་པའི་རྟོགས་པའི་ཆོས་རྣམས་ཏེ་སྔ་མ་ལས། བྱང་ཆུབ་ཕྱོགས་མཐུན་ཚད་མེད་དང༌། །རྣམ་པར་ཐར་དང་མཐར་གྱི་ནི། །སྙོམས་འཇུག་དགུ་ཡི་རང་བཞིན་དང༌། ཟད་པར་བཅུ་ཡི་བདག་ཉིད་དང༌། ཟིལ་གྱིས་གནོན་པའི་སྐྱེ་མཆེད་ནི། །རབ་ཏུ་དབྱེ་བ་རྣམ་བརྒྱད་དང༌། །ཉོན་མོངས་མེད་དང་སྨོན་མཁྱེན་དང༌། །མངོན་ཤེས་སོ་སོ་ཡང་དག་རིག །རྣམ་
པ་ཐམས་ཅད་དག་བཞི་དང༌། །དབང་བཅུ་དང་ནི་སྟོབས་བཅུ་དང༌། །མི་འཇིགས་པ་ནི་བཞི་དག་དང༌། །བསྲུང་བ་མེད་པ་རྣམ་གསུམ་དང༌། །དྲན་པ་ཉེར་བཞག་རྣམ་གསུམ་དང༌། །བསྙེལ་བ་མི་མངའི་ཆོས་ཉིད་དང༌། །བག་ཆགས་ཡང་དག་བཅོམ་པ་དང༌། །སྐྱེ་ལ་ཐུགས་རྗེ་ཆེན་པོ་དང༌། །ཐུབ་པ་ཁོ་ནའི་མ་འདྲེས་ཆོས། །བཅོ་བརྒྱད་བཤད་པ་གང་ཡིན་དང༌། །རྣམ་པ་ཐམས་ཅད་མཁྱེན་ཉིད་དང༌། །ཆོས་ཀྱི་སྐུ་ཞེས་བརྗོད་པ་ཡིན། །ཞེས་པ་ལྟར་སྡེ་ཚན་ཉེར་གཅིག་ལས། །དང་པོ་བྱང་ཕྱོགས་སོ་བདུན་ནི། །སྔར་ལམ་གྱི་དུས་ན་ཚོགས་ལམ་ནས་བཟུང་སྟེ་བྱང་ཕྱོགས་རིམ་གྱིས་རྫོགས་པ་རྣམས་ཐོབ་ལ་མ་ཉམས་པའི་ཚུལ་དུ་ཐུགས་བརྒྱུད་ལ་བཞུགས་པ་སྟེ་སྔ་མ་དག་དང་རྣམ་གྲངས་འདྲའོ། །ཚད་མེད་པ་བཞི་ནི་མདོ་སྡེའི་རྒྱན་གྱི་ལུང་དོན་སྔར་བཤད་པ་ལྟར་རོ། །རྣམ་པར་ཐར་པ་བརྒྱད་ནི། དང་པོ་སྤྲུལ་པའི་ལམ་རྣམ་ཐར་གསུམ་དང༌། གཟུགས་མེད་ཀྱི་རྣམ་ཐར་བཞི། འགོག་པའི་རྣམ་པར་ཐར་པ་དང་བརྒྱད་དོ། །དང་པོ་སྤྲུལ་ལམ་ལ་གསུམ་ལས། དང་པོ་གཟུགས་ཅན་གཟུགས་ལ་བལྟ་བའི་རྣམ་པར་ཐར་པ་ནི། ནང་གཟུགས་ཡོད་པར་འདུ་ཤེས་པས་ཕྱི་རོལ་གྱི་གཟུགས་རྣམས་ལ་བལྟས་ནས་སྤྲུལ་པ་དང་བསྒྱུར་བ་ལ་སོགས་པ་བྱེད་པ་གཟུགས་ཅན་གཟུགས་ལ་བལྟ་བའི་རྣམ་ཐར། ནང་གཟུགས་མེད་པར་འདུ་ཤེས་པས་དེ་ལྟར་བྱེད་པར་གཟུགས་མེད་གཟུགས་ལ་བལྟ་བའི་རྣམ་ཐར། དེ་ལྟར་སྤྲུལ་པར་གོམས་ཀྱང་གཟུགས་མཛེས་པ་དང་ཡིད་དུ་འོང་བ་སོགས་སྤྲུལ་འདོད་ཀྱང་མི་མཛེས་པ་དང་ཡིད་དུ་མི་འོང་བ་སོགས་ལ་སྤྲུལ་མི་
འདོད་པ་ལྟ་བུ་བྱུང་ན་སྤྲུལ་པ་མི་རྫོགས་པས་དེའི་ཕྱིར་གཟུགས་མཛེས་པ་དང་མི་མཛེས་པ་གཉིས་ཀའང་ཕན་ཚུན་ལྟོས་པ་ཙམ་དང་བློས་བཏགས་པ་ཙམ་ལས་དོན་ལ་མེད་ཅིང་མཉམ་པར་བལྟ་བ་སྡུག་པའི་རྣམ་པར་ཐར་པ་དང་གསུམ། གཉིས་པ་གཟུགས་མེད་ཀྱི་རྣམ་པར་ཐར་པ་བཞི་ནི། ནམ་མཁའ་མཐའ་ཡས་སྐྱེ་མཆེད་ཀྱི་རྣམ་པར་ཐར་པ། རྣམ་ཤེས་མཐའ་ལས་སྐྱེ་མཆེད་ཀྱི་རྣམ་པར་ཐར་པ། ཅི་ཡང་མེད་པའི་སྐྱེ་མཆེད་ཀྱི་རྣམ་པར་ཐར་པ། ཡོད་མིན་མེད་མིན་སྐྱེ་མཆེད་ཀྱི་རྣམ་པར་ཐར་པའོ། །འགོག་པའི་རྣམ་པར་ཐར་པ་ནི། བསམ་གཟུགས་བརྒྱད་ཀ་ཐོབ་པའི་འཕགས་པས་ཚོགས་བདུན་འཁོར་དང་བཅས་པ་བཀག་ནས་ཀུན་གཞི་མ་གཏོགས་པའི་སེམས་མེད་པའི་འདུ་ཤེས་དང་ཚོར་བ་འགོགས་པའི་སྙོམས་འཇུག་ལ་སྙོམས་པར་ཞུགས་པའོ། །འདི་ལ་ཉན་ཐོས་རྣམས་རྣམ་པར་ཤེས་པ་ཚོགས་དྲུག་ལས་མི་བཞེད་པས་ཚོགས་དྲུག་བཀག་པའི་ལུས་ཙམ་མ་གཏོགས་སེམས་ཀྱི་རྒྱུན་མེད་ཀྱང་ཕྱིས་སེམས་འབྱུང་བ་ན་སྔར་འགགས་པའི་སེམས་ཀྱི་ས་བོན་ལས་སྐྱེ་བར་འདོད་པ་དང༌། ཁ་ཅིག་ལུས་ལ་སེམས་ཀྱི་ས་བོན་ཡོད་པ་ལས་སྐྱེ་བར་འདོད་པ་དང༌། ཡང་འགའ་ཞིག་ཡིད་ཤེས་ཕྲ་བ་མི་འགག་པར་འདོད་པ་སོགས་ཡོད་ཀྱང་ཐེག་ཆེན་པ་རྣམས་ཀུན་གཞི་ལས་སྐྱེ་བར་འདོད་དོ། །འདི་ལ་འཇུག་ནུས་པ་ནི་ཐེག་དམན་ལྟར་ན་གཉིས་ཏེ།
དགྲ་བཅོམ་པ་གཉིས་ཀའི་ཆ་ལས་རྣམ་གྲོལ་དང༌། ཕྱིར་མི་འོང་བསམ་གཟུགས་བརྒྱད་ཐོབ་པ་ཞིག་སྙོམས་པར་འཇུག་ནུས་སོ། །དེ་ལས་གཞན་གྱིས་མི་ནུས་ཏེ། སོ་སྐྱེ་ཐམས་ཅད་ནི་དུས་དང་རྣམ་པ་ཐམས་ཅད་དུ་ངར་འཛིན་དང་འབྲལ་མི་ཤེས་པས་ཉོན་ཡིད་དགག་མི་ནུས་ལ། །རྒྱུན་ཞུགས་དང་ཕྱིར་འོང་ལ་སྲིད་རྩེའི་སེམས་ཐོབ་པ་མི་སྲིད་པས་དེ་ཤིན་ཏུ་ཕྲ་བའི་འགོག་པ་ལ་སྙོམས་པར་འཇུག་མི་ནུས་སོ། །དགྲ་བཅོམ་ཤེས་རབ་ཀྱི་ཆ་ལས་རྣམ་པར་གྲོལ་བ་ཡང་སྲིད་རྩེའི་སེམས་མི་ཐོབ་པས་སྙོམས་པར་འཇུག་མི་ནུས་སོ། །དེས་ན་འགོག་པར་སྙོམས་པར་འཇུག་པ་ལ་ཕྱིས་གོམས་པའི་སྐབས་སུ་བསམ་གཟུགས་གང་རུང་ངམ། །འདོད་པའི་སེམས་ལས་ཀྱང་འགོག་སྙོམས་ལ་འཇུག་ནུས་ཀྱང་དང་པོ་གསར་དུ་ཐོབ་པའི་ཚེ་ན། ཕྲ་བ་ཕྲ་བའི་མཇུག་ཐོག་ཏུ། ཞེས་གསུངས་པས་སྲིད་རྩེའི་སེམས་དེ་འགྱུ་བ་ཕྲ་བས། དེ་ལ་བརྟེན་པའི་འདུ་ཤེས་དང་ཚོར་བའི་འགྱུ་བ་ཕྲ་རགས་འགོག་སླ་བས། །དེ་ལ་བརྟེན་ནས་འཇིག་རྟེན་ལས་འདས་པའི་ལམ་གྱིས་ཉོན་མོངས་པ་ཅན་གྱི་ཡིད་བཀག་ནས་འགོག་སྙོམས་མངོན་དུ་བྱེད་དོ། །མཐར་གྱིས་གནས་པའི་སྙོམས་འཇུག་དགུ་ནི། །བསམ་གཏན་བཞི། གཟུགས་མེད་བཞི། འགོག་པའི་སྙོམས་འཇུག་དང་དགུའོ། །རྣམ་ཐར་དང་སྙོམས་འཇུག་གི་ཁྱད་པར་ནི། རང་
སའི་སྒྲིབ་པ་ལས་རྣམ་པར་ཐར་པས་ན་རྣམ་པར་ཐར་པ་དང༌། ལུས་ཀྱི་འབྱུང་བ་ཆེན་པོ་རྣམས་དང༌། སེམས་དང་སེམས་བྱུང་ཆ་སྙོམས་པར་བྱེད་པས་ན་སྙོམས་འཇུག་གོ །མཐར་གྱིས་གནས་པ་ཞེས་པ་ནི་སྙོམས་འཇུག་དགུ་པོ་འདི་དང་པོ་མངོན་དུ་བྱེད་པའི་ཚེ་མཐར་ཆགས་སུ་རིམ་གྱིས་རྒྱུད་ལ་སྐྱེ་བའི་བསམ་གཏན་དང་པོ་མ་ཐོབ་གོང་དུ་གཉིས་པ་ཐོབ་པ་ལྟ་བུ་མི་སྲིད་པའི་ཕྱིར་རོ། །ཟད་པར་གྱི་སྐྱེ་མཆེད་བཅུ་ནི། །འབྱུང་བའི་ཟད་པ་བཞི། ཁ་དོག་གི་ཟད་པར་བཞི། ནམ་མཁའ་རྣམ་ཤེས་གཉིས་དང་བཅུའོ། །དེ་དག་གི་སྒོམ་ཚུལ་ནི། དང་པོ་ཟད་པར་རང་རང་གི་དམིགས་རྟེན་ལ་བརྟེན་ནས་ས་ས་ཞེས་པ་ལ་སོགས་པ་ལས་སེམས་གཞན་དུ་མི་ཡེངས་པར་རྩེ་གཅིག་ཏུ་ཡིད་ལ་བྱེད་ཅིང་སེམས་ཟིན་པ་ན་ས་ལ་སོགས་པ་རྒྱ་ཆེན་པོར་སྤྲོས་ཏེ་བསྒོམས་པས་འགྲུབ་པའོ། །དམིགས་རྟེན་ནི་ས་ལ་ཆུའི་སྟེང་ན་གནས་པའི་སའི་ཟམ་པ་ལ་སོགས་པ་དང༌། ཆུ་ལ་ནམ་མཁའ་ནས་ཆུ་དྲི་མ་མེད་པ་འབབ་པ། མེ་ལ་འོག་ཏུ་བུད་ཤིང༌། བར་དུ་མེ། སྟེང་དུ་དུ་བ་དང་བཅས་པའི་མེ། རླུང་ལ་སྐར་ཁུང་ལ་སོགས་པ་ནས་རླུང་འོང་བས་ལུས་ལ་རེག་པ། ཁ་དོག་བཞི་པོ་མཐིང་ག་ལ་སོགས་པའི་ཚོན་གྱིས་དཀྱིལ་འཁོར་ཟླུམ་པོ་ཁ་དོག་གཞན་གྱིས་མཐའ་ཆོད་དང་བཅས་བྲིས་པ་དང༌། ནམ་མཁའ་ལ་རྩིག་པ་ལ་སོགས་པའི་བུག་པའི་ནང་གི་ནམ་མཁའ། རྣམ་ཤེས་ལ་རྩིག་ཁུང་
སོགས་ནས་ཉི་ཟླ་དང་སྒྲོན་མེའི་འོད་ཤར་བའི་འོད་ཀྱི་ཐིག་ལེ་རྣམས་སོ། །དེ་ལྟར་བསྒོམས་པས་གྲུབ་པ་ན། ས་གྲུབ་པས་ཆུ་ལས་བཞིན་དུ་བྱེད་པ་དང༌། ནམ་མཁའ་སར་བསྒྱུར་བ་དང༌། ལུས་སར་བསྒྱུར་བ་སོགས་དང༌། ཆུ་གྲུབ་པས་ཆུའི་ཆར་འབེབས་པ་དང༌། ས་ལ་ཡང་ཆུ་ལྟར་བྱེའུ་འཛུལ་གྱིས་འགྲོ་བ་དང༌། ལུས་ཆུར་བསྒྱུར་བ་སོགས་བྱེད། །མེ་གྲུབ་པས་ལུས་མེ་དཔུང་དུ་བསྒྱུར་བ་དང༌། དངོས་པོ་གཞན་དང་ཐ་མལ་གྱི་མེ་ལ་སོགས་པའང་སྲེག་པ་དང༌། རླུང་གྲུབ་པས་རླུང་ལྟར་ཐོགས་པ་མེད་པར་འགྲོ་བ་དང༌། ལུས་རླུང་དུ་བསྒྱུར་བ་དང༌། ཁ་དོག་རྣམས་གྲུབ་པས་ལུས་དང་སྣང་བ་ཐམས་ཅད་སྔོན་པོ་སེར་པོ་དཀར་པོ་དམར་པོ་རྩ་བའི་ཁ་དོག་རང་རང་དུ་བསྒྱུར་བ་དང༌། ནམ་མཁའ་དང་རྣམ་ཤེས་གྲུབ་པས་ལུས་དང་དངོས་པོ་མི་སྣང་བ་དང༌། ལྷའི་མིག་གིས་ཡུལ་སྣང་བར་བྱེད་པ་ལ་སོགས་པའོ། །ཟིལ་གནོན་གྱི་སྐྱེ་མཆེད་བརྒྱད་ནི། ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆེན་པོ་རྣམས་ཟིལ་གྱིས་མནན་ནས་ཤེས། ཟིལ་གྱིས་མནན་ནས་མཐོང་བ་དང༌། ནང་གཟུགས་སུ་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་ཐམས་ཅད་ཟིལ་གྱིས་མནན་སོགས་སྔར་ལྟར། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆེན་པོ་ཐམས་ཅད་སོགས་སྔར་ལྟར། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་གཟུགས་ཆུང་ངུ་ཐམས་ཅད་སོགས་སྔར་ལྟར་ཏེ་དབྱིབས་
ཟིལ་གྱིས་གནོན་པ་བཞི། ནང་གཟུགས་མེད་པར་འདུ་ཤེས་པས་ཕྱི་རོལ་གྱི་ཁ་དོག་སྔོན་པོ། སེར་པོ་དང༌། དཀར་པོ་དང༌། དམར་པོ་ཐམས་ཅད་ཟིལ་གྱིས་མནན་ནས་ཤེས། ཟིལ་གྱིས་མནན་ནས་མཐོང་བ་སྟེ་ཁ་དོག་ཟིལ་གྱིས་གནོན་པ་བཞི་དང་བརྒྱད་དོ། །དེ་དག་གི་དོན་རང་གི་ལུས་ལ་གཟུགས་མེད་པའི་འདུ་ཤེས་བཞག་པ་དང༌། ཡང་རང་གི་ལུས་ལ་གཟུགས་ཀྱི་འདུ་ཤེས་མི་བཤིག་པ་གཉིས་ཀྱི་སྒོ་ནས་ཕྱི་རོལ་གྱི་གཟུགས་མཛེས་པ་དང་མི་མཛེས་པ་བཟང་པོ་དང་ངན་པ་སོགས་ལ་མཐའ་གཅིག་ཏུ་མི་ཞེན་པར་བལྟས་ནས་དེ་ལས་ཆེ་དང་ཆུང་བ་སོགས་གཞན་དུ་བསྒྱུར་བས་སྤྲུལ་བསྒྱུར་བྱེད་པ་སྟེ། དེ་ཡང་ཞི་གནས་ཀྱི་སྒོ་ནས་ཟིལ་གྱིས་མནན་ནས་ཤེས། ལྷག་མཐོང་གི་སྒོ་ནས་ཟིལ་གྱིས་མནན་ནས་མཐོང་བའོ། །ནང་གཟུགས་ཡོད་པ་དང་མེད་པར་འདུ་ཤེས་པའི་དོན་ནི་སྤྲུལ་པ་བྱེད་པའི་ཚེ་སྤྲུལ་པ་བྱེད་པ་པོ་རང་གཞན་ལ་སྣང་བ་དང་མི་སྣང་བའི་ཁྱད་པར་རོ། །ཡང་ན་གཟུགས་མེད་པར་འདུ་ཤེས་པ་ནི་གཟུགས་མེད་ཀྱི་སེམས་ཐོབ་པ་ཡིན་ན་ནི་སླ་ལ་མིན་ཀྱང་གཟུགས་མེད་པའི་འདུ་ཤེས་ཙམ་བཞག་དགོས་སོ། །ནང་གཟུགས་སུ་འདུ་ཤེས་པ་ནི་གཟུགས་མེད་པ་མ་ཐོབ་པ་ཡིན་ན་སླ་ལ་མིན་ཀྱང་གཟུགས་མངོན་དུ་མི་བྱེད་པར་གཟུགས་ཀྱི་འདུ་ཤེས་ཙམ་བཞག་པའོ། །དེས་ན་གཟུགས་མེད་ཀྱི་སེམས་ཐོབ་པ་ཡིན་ན་བསམ་གཟུགས་གང་རུང་ལ་བརྟེན་པ་དང༌། གཟུགས་མེད་པ་མ་ཐོབ་པ་ཡིན་ན་བསམ་གཏན་
བཞི་པ་ལ་བརྟེན་ནས་ཟིལ་གནོན་རྣམས་བསྒོམ་པར་བཞེད་དོ། །ཉོན་མོངས་མེད་པ་ནི། ཉན་ཐོས་ཉོན་མོངས་མེད་པའི་ལྟ། མི་ཡི་ཉོན་མོངས་ཡོངས་སྤང་ཉིད། །གྲོང་སོགས་སུ་དེའི་ཉོན་མོངས་རྣམས། །རྒྱུན་གཅོད་རྒྱལ་བའི་ཉོན་མོངས་མེད། །ཅེས་གསུངས་པ་ལྟར། ཉན་ཐོས་རྣམས་ཀྱིས་གྲོང་སོགས་སུ་འགྲོ་བའི་ཚེ་རང་ལ་བརྟེན་ནས་གཞན་ཆགས་སྡང་སོགས་སྐྱེ་བར་འགྱུར་མི་འགྱུར་མངོན་ཤེས་ཀྱིས་བརྟགས་ནས་སྐྱེ་བར་འདུག་ན་དེར་མི་འགྲོ་བ་དང༌། རྫོགས་པའི་སངས་རྒྱས་ཀྱིས་ནི་དེ་ལྟར་དགོངས་ཚེ་དེར་ཆེད་དུ་གཏད་ནས་ཕེབས་ཏེ་ཆོས་སྟོན་པ་དང་རྫུ་འཕྲུལ་སོགས་ཀྱིས་བཏུལ་ནས་དེའི་རྒྱུད་ལ་ཕྱིན་ཆད་ཉོན་མོངས་པ་རྒྱུན་གཅོད་པའི་ཐབས་མཛད་པའོ། །སྨོན་གནས་མཁྱེན་པ་ནི། ཉན་ཐོས་ཀྱིས་ཡིད་ཀྱིས་འདོད་པའི་དོན་གང་ཤེས་པར་འདོད་ཀྱང་དང་པོ་དོན་འདི་དང་འདི་ཤེས་པར་བྱའོ་སྙམ་ནས་རབ་མཐའི་བསམ་གཏན་ལ་སྙོམས་པར་ཞུགས་ནས་བརྟགས་པས་ཤེས་སོ། །སངས་རྒྱས་ཀྱིས་ནི། །སངས་རྒྱས་སྨོན་གནས་མཁྱེན་པ་ནི། །ལྷུན་གྱིས་གྲུབ་དང་ཆགས་སྤང་དང༌། །ཐོགས་པ་མེད་དང་རྟག་གནས་དང་དྲི་བ་ཀུན་ལན་འདེབས་པར་བཞེད། །ཅེས་གསུངས་པ་ལྟར་འབད་རྩོལ་ལམ་ལྟོས་པར་ལྷུན་གྱིས་གྲུབ་པ་དང༌། །ཉོན་སྒྲིབ་སྤངས་བས་མ་ཆགས་པ་དང༌། ཤེས་སྒྲིབ་སྤངས་པས་མ་ཐོགས་པ་དང༌། རྒྱུན་ཆད་མེད་
པས་རྟག་ཏུ་གནས་པ་དང༌། ཁམས་གསུམ་གྱི་སེམས་ཅན་ཐམས་ཅད་ཀྱིས་དུས་གཅིག་ཏུ་སྐད་མི་འདྲ་བ་དུ་མའི་སྒོ་ནས་སོ་སོར་དྲིས་ཀྱང་རང་རང་གི་སྐད་དང་བསམ་པ་བཞིན་ལན་མཉམ་དུ་འདེབས་པ་དང༌། ཁྱད་ཆོས་ལྔ་ལྡན་ནོ། །མངོན་ཤེས་ལྔ་དང་སོ་སོ་ཡང་དག་པར་རིག་པ་བཞི་ནི་སྔར་བཤད་པ་དང་འདྲའོ། །རྣམ་པ་ཐམས་ཅད་དག་པ་བཞི་ནི། ལུས་ལེན་པ་དང༌། གནས་པ་དང༌། གཏོང་བ་ལ་མངའ་བརྙེས་པ་རྟེན་ལུས་དག་པ་དང་གཟུགས་དང་སྒྲ་དང་དྲི་དང་རོ་དང་རེག་བྱ་སོགས་སྤྲུལ་པ་དང་བསྒྱུར་བ་ལ་མངའ་བརྙེས་པས་ལོངས་སྤྱོད་དག་པ་དམིགས་པ་དག་པ་དང༌། ཏིང་ངེ་འཛིན་ལ་མངའ་བརྙེས་པས་དག་པ་ཐུགས་དག་པ་དང༌། ཤེས་རབ་ལ་མངའ་བརྙེས་པས་ཡེ་ཤེས་ཡོངས་སུ་དག་པ་ཞེས་བྱའོ། །དབང་བཅུ་སྟོབས་བཅུ་མི་འཇིགས་པ་བཞི་རྣམས་སྔར་དང་འདྲ། བསྲུང་བ་མེད་པ་རྣམ་པ་གསུམ་ནི་སྐུ་གསུང་ཐུགས་ཀྱི་མཛད་སྤྱོད་ཐམས་ཅད་ངང་གིས་དགེ་བས་སྤྱོད་ལམ་ཐམས་ཅད་ལ་གཞན་གྱིས་ཤེས་ཀྱིས་དོགས་ནས་བཅབ་དགོས་པའི་འཁྲུལ་པ་མི་མངའ་བའོ། །དྲན་པ་ཉེར་གཞག་རྣམ་གསུམ་ནི། སངས་རྒྱས་རྣམས་ཆོས་འཆད་པའི་ཚེ་ཁ་ཅིག་གུས་པ་དང་བཅས་ཞེ་ས་དང་བཅས་རྣ་བ་བླགས་ཏེ་ཆོས་ཉན་པར་བྱེད་ཀྱང་དེ་ལ་རྗེས་སུ་ཆགས་པ་མེད། ཡང་ཁ་ཅིག་མ་གུས་པ་དང༌། ཞེ་ས་མེད་པ་དང༌། རྣ་བ་གཏད་དེ་ཆོས་ཉན་པར་མི་བྱེད་ཀྱང༌། དེ་ལ་ཐུགས་ཁྲོ་བ་མེད་པ་དང༌། ཡང་
ཁ་ཅིག་གུས་པས་ཉན་པར་བྱེད། ཁ་ཅིག་མ་གུས་པས་ཉན་པར་མི་བྱེད་ཀྱང་དེ་ལ་ཆགས་སྡང་མི་མངའ་བའོ། །བསྙེལ་བ་མི་མངའ་བའི་ཆོས་ཉིད་ནི། །སྔོན་བསྐལ་པ་དཔག་ཏུ་མེད་པའི་གོང་དུ་བྱུང་བ་རྣམས་ཀྱང་ཐུགས་ཀྱིས་མི་བརྗེད་པར་ད་ལྟ་བཞིན་དུ་མཁྱེན་པའོ། །བག་ཆགས་ཡང་དག་པར་བཅོམ་པ་ནི། ཉན་རང་དགྲ་བཅོམ་པ་རྣམས་ནི་ཉོན་མོངས་ཐམས་ཅད་སྤངས་ཀྱང་ཉོན་མོངས་པའི་བག་ཆགས་མ་བཅོམ་པའི་དབང་གིས་ལུས་ངག་གི་འཁྲུལ་པ་ཅུང་ཟད་མངའ་ལ། སངས་རྒྱས་རྣམས་ཀྱིས་བག་ཆགས་ཐམས་ཅད་ཟད་པར་བཅོམ་པས་ཉེས་སྤྱོད་འཁྲུལ་བའི་ཆ་ཙམ་ཡང་མི་འབྱུང་བའོ། །སྐྱེ་ལ་ཐུགས་རྗེ་ཆེན་པོ་ནི། སངས་རྒྱས་རྣམས་ནི་ཐུགས་རྗེ་ཆེན་པོས་སེམས་ཅན་ཐམས་ཅད་ལ་དུས་དང་རྣམ་པ་ཐམས་ཅད་དུ་གཟིགས་ནས། སུ་ནི་དར། སུ་ནི་རྒུད། སུ་ནི་ངན་སོང་གི་སྡུག་བསྔལ་ལས་དྲངས་ནས་མཐོ་རིས་དང་ཐར་པའི་ལམ་བདེ་བ་ལ་འགོད། སུ་ནི་ཉོན་མོངས་པའི་འཆིང་བ་ཐམས་ཅད་ལས་དགྲོལ་བར་བྱ་སྙམ་པ་སོགས་ཉིན་ལན་གསུམ་མཚན་ལན་གསུམ་དུ་དགོངས་པའོ། །མ་འདྲེས་པ་བཅོ་བརྒྱད་ནི་སྔར་བཤད་པ་དང་འདྲའོ། །རྣམ་པ་ཐམས་ཅད་མཁྱེན་ཉིད་དང༌། ཞེས་པས་དང་སྒྲས་བསྡུས་པ་གཉིས་དང༌། མཁྱེན་པ་གསུམ་སྟེ། །རྣམ་པ་ཐམས་ཅད་མཁྱེན་པ་ཉིད་དང༌། །ལམ་ཐམས་ཅད་མཁྱེན་པ་ཉིད་དང༌། གཞི་ཐམས་ཅད་མཁྱེན་པའོ། །
དེ་ལ་དང་པོ་ཤེས་བྱའི་ཆོས་ཐམས་ཅད་ཀྱི་རྣམ་པ་ཐ་དད་པ་མ་འདྲེས་པར་མཁྱེན་པའོ། །གཉིས་པ་ནི་ཉན་ཐོས་རང་རྒྱལ་བྱང་ཆུབ་སེམས་དཔའི་ལམ་གསུམ་ཀ་དོན་དམ་པར་སྐྱེ་བ་མེད་པ་དང་ཀུན་རྫོབ་ཏུ་རྒྱུ་ངོ་བོ་འབྲས་བུ་དང་བཅས་པ་མཁྱེན་པའོ། །གསུམ་པ་ནི་གཞི་ཕུང་པོ་ཁམས་དང་སྐྱེ་མཆེད་ཐམས་ཅད་གང་ཟག་གི་བདག་གིས་སྟོང་པར་ཤེས་པའོ། །དེ་ལྟར་མཁྱེན་པའི་ཡེ་ཤེས་སྡེ་ཚན་ཉི་ཤུ་རྩ་གཅིག་པོ་དེ་དག་ལས་སྟོབས་བཅུ། །མི་འཇིགས་བཞི། །མ་འདྲེས་བཅོ་བརྒྱད། དྲན་པ་ཉེར་གཞག་གསུམ། སྲུང་བ་མེད་པ་གསུམ། བག་ཆགས་ཡང་དག་བཅོམ་པ་ཐུགས་རྗེ་ཆེན་པོ་རྣམས་སངས་རྒྱས་ཁོ་ནའི་ཡོན་ཏན་ཡིན་ལ། །དབང་བཅུ་སོ་སོ་ཡང་དག་པར་རིག་པ་བཞི་རྣམས་བྱང་སེམས་རྣམས་དང་ཐུན་མོང་དང༌། བྱང་ཕྱོགས་སྙོམས་འཇུག་རྣམ་ཐར་སོགས་ཉན་རང་བྱང་སེམས་སངས་རྒྱས་ཐམས་ཅད་ཀྱི་ཐུན་མོང་པའི་ཡོན་ཏན་ནོ། །དེ་དག་ཉན་རང་དང་བྱང་སེམས་ཀྱི་ཐུགས་རྒྱུད་ན་བྱང་ཕྱོགས་སོགས་མཚན་ཉིད་པ་ཡོད་པ་ཙམ་ལ་ལྟོས་ནས་ཆོས་དབང་བཙན་དུ་བྱས་ཏེ་ཐུན་མོང་པའི་ཡོན་ཏན་ཞེས་བཞག་གིས། སངས་རྒྱས་ཀྱི་ཐུགས་རྒྱུད་ལ་བཞུགས་པའི་ཁྱད་པར་ཅན་ལ་ལྟོས་ནས་རྒྱུད་དབང་བཙན་དུ་བྱས་ན་ནི་སྡེ་ཚན་ཉེར་གཅིག་པོ་ཐམས་ཅད་ཀྱང་སངས་རྒྱས་ཀྱི་ཐུན་མོང་མ་ཡིན་པའི་ཡོན་ཏན་ནོ། །འདི་ལ་ཟིལ་གནོན་དང་རྣམ་ཐར་ལ་སོགས་པ་དང་པོ་སྒོམ་ཚུལ་དང༌།
མཐར་ཡང་ཏིང་ངེ་འཛིན་ལ་བརྟེན་ནས་མངོན་དུ་བྱེད་ཚུལ་སོགས་བཤད་པ་རྣམས་ནི་སྤྱིའི་དབང་དུ་བྱས་ཀྱི། སངས་རྒྱས་ཀྱིས་ནི་སྤྲུལ་པ་ལ་སོགས་དེ་དག་བཞེད་པ་ཙམ་གྱིས་ལྷུན་གྱིས་གྲུབ་པས་རྩོལ་བྱུང་གི་དགེ་བ་ཅུང་ཟད་ཀྱང་མི་མངའ་ལ་འགོག་པའི་སྙོམས་འཇུག་གསུངས་པའང་འགོག་པ་ལ་སྙོམས་པར་འཇུག་ནུས་པ་ཙམ་ལ་དགོངས་ཀྱི། དངོས་སུ་རྫོགས་པའི་སངས་རྒྱས་འགོགས་པ་ལ་སྙོམ་པར་འཇུག་པ་མི་སྲིད་ཅེས་གསུངས་སོ། །དེ་ལྟ་བུའི་ཡོན་ཏན་གྱི་རྣམ་གྲངས་བསམ་གྱིས་མི་ཁྱབ་པ་རྣམས་སངས་རྒྱས་ཀྱི་ཐུགས་རྒྱུད་ཀྱི་རྟོགས་པའི་ཆོས་ཡིན་པས་རྟོགས་པ་ཡེ་ཤེས་ཀྱི་ཆོས་སྐུའོ། །གསུམ་པ་ལོངས་སྐུ་ནི་མཚན་ནི་སུམ་ཅུ་རྩ་གཉིས་དང༌། །དཔེ་བྱད་བརྒྱད་ཅུའི་བདག་ཉིད་ནི། །ཐེག་ཆེན་ཉེ་བར་ལོངས་སྤྱོད་ཕྱིར། །ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་གསུངས་པས། འོག་མིན་གྱི་གནས་སུ་བྱང་སེམས་བཅུ་པ་རྣམས་ལ་སྣང་བའི་སངས་རྒྱས་ཀྱི་གཟུགས་སྐུ་མཚན་དང་དཔེ་བྱད་ཀྱི་བདག་ཉིད་ཅན་དེ་ནི་དུས་རྟག་པ་རྒྱུན་གྱི་འཁོར་ལོ་ཆོས་ཐེག་པ་ཆེན་པོ་ཁོ་ན་ལ་ལོངས་སྤྱོད་པའི་ཕྱིར་ན་ལོངས་སྤྱོད་རྫོགས་སྐུའོ། །མཚན་བཟང་པོ་སོ་གཉིས་ལ་བཅུ་ཚན་གསུམ་དང་གཉིས་ལས། དང་པོ་ནི། །ཕྱག་ཞབས་འཁོར་ལོའི་མཚན་དང་རུས་སྦལ་ཞབས། །ཕྱག་དང་ཞབས་སོར་དྲ་བས་འབྲེལ་བ་དང༌། །ཕྱག་ནི་ཞབས་བཅས་འཇམ་ཞིང་གཞོན་ཤ་ཆགས། །
འདི་ཡི་སྐུ་ནི་བདུན་དག་མཐོ་བ་དང༌། །སོར་མོ་རིང་དང་རྟིང་ཡངས་སྐུ་ཆེ་དྲང༌། །ཞབས་འབུར་མི་མངོན་སྤུ་ནི་གྱེན་དུ་ཕྱོགས། །ཞེས་པས་རུས་སྦལ་ཞབས་ནི་རུས་སྦལ་གྱི་ལྟོ་བ་ལྟར་ཞབས་ཀྱི་མཐིལ་ཐམས་ཅད་མཉམ་པར་ས་ལ་འཇོག་པས་ཞབས་མཐིལ་གྱི་གཤོང་བུ་མེད་པ་དང༌། བདུན་མཐོ་བ་ནི། ཕྱག་ཞབས་ཀྱི་རྒྱ་བཞི། ཕྲག་གོང་གཉིས། །ལྟག་པ་སྟེ་བདུན་པོར་གཤོང་བུ་མེད་པར་ཤས་གང་བས་མཐོ་པའོ། །ཞབས་འབུར་མི་མངོན་པ་ནི་ཞབས་ལོང་བུའི་འབུར་མི་མངོན་པའོ། །སྤུ་གྱེན་དུ་ཕྱོགས་པ་ནི། བ་སྤུ་ཐམས་ཅད་གཡས་སུ་འཁྱིལ་པའི་རྩེ་མོ་གྱེན་དུ་ཕྱོགས་པའོ། །གཞན་ནི་གོ་སླའོ། །བཅུ་ཚན་གཉིས་པ་ནི། བྱིན་པ་ཨེ་ན་ཡ་འདྲ་ཕྱག་རིང་མཛེས། །འདོམས་གྱི་སྦ་པ་སྦུབས་སུ་ནུབ་པའི་མཆོག །པགས་པ་གསེར་མདོག་པགས་པ་སྲབ་པ་དང༌། །སྤུ་ནི་རེ་རེ་ནས་གཡས་ལེགས་འཁྲུངས་དང༌། །ཞལ་མཛོད་སྤུས་བརྒྱན་རོ་སྟོང་སེངྒེ་འདྲ། །འདི་ཡི་དཔུང་པའི་མགོ་ཟླུམ་ཐལ་གོང་རྒྱས། ཞེས་པ་རྣམས་སོ། །བྱིན་པ་ཨེ་ན་ཡ་འདྲ་ཞེས་པས་ཨེ་ན་ཡ་ནི། སེངྒེ་ཤ་ར་བྷའམ་རྐང་པ་བརྒྱད་པའམ། བསེ་ཁ་སྒྲོ་ཞེས་པ་ཡིན་ཅེས་གཞུང་འགའ་ཞིག་ལས་བཤད། གང་ཡིན་ཀྱང་ཞབས་ཀྱི་བྱིན་པ་བྱིན་གྱིས་ཕྲ་ཞིང་སྙོམས་པའོ། །པགས་པ་གསེར་མདོག་ནི་གསེར་དྲི་མ་མེད་པ་ལྟར་དག་ཅིང་གསལ་བའི་དོན་ཡིན་གྱི་སེར་པོ་ཡིན་པའི་དོན་མིན་ཅེས་གསུངས་སོ། །
རོ་སྟོད་སེངྒེ་འདྲ་བ་ནི་རོ་སྟོད་འཕེལ་ཀ་ཆེ་བའོ། །ཐལ་གོང་ཞེས་པ་ནི་ཕྲག་པ་གཡས་གཡོན་གྱི་བར་ཏེ། །དེ་ན་སྒྲོག་རུས་ཀྱི་གཤོང་མེད་པར་ཤས་གང་བའོ། །བཅུ་ཚན་གསུམ་པ་ནི། །འདི་ལ་རོ་མི་ཞིམ་པ་རོ་མཆོག་སྣང༌། །སྐུ་ནི་ནྱ་གྲོ་དྷ་ལྟར་ཆུ་ཞིང་གབ། །གཙུར་ཏོར་དབུར་ལྡན་ལྗགས་རིང་མཛེས་པ་དང༌། །ཚངས་དབྱངས་འགྲམ་པ་སེངྒེ་འདྲ་དང་ཚེམས། །ཤིན་ཏུ་དཀར་དང་ཚད་མཉམ་ཐགས་བཟང་དང༌། གྲངས་ནི་བཞི་བཅུ་ཐམ་པ་ཚང་བ་དང༌། །ཞེས་སོ། །རོ་མཆོག་སྣང་བ་ནི། རྟ་ཆས་ཀྱི་ནས་རུལ་པ་གསོལ་ཀྱང་ཚེམས་པར་དུ་སླེབས་ནས་ལྷའི་ཞལ་ཟས་རོ་བརྒྱ་བ་ལྟར་བསོད་པའོ། །ནྱ་གྲོ་དྷ་ལྟར་ཆུ་ཞིང་གབ་པ་ནི་ཤིང་གི་རྒྱལ་པོ་ནྱ་གྲོ་དྷ་ལྟར་ཆུ་དབུའི་སྤྱི་བོ་ནས་ཞབས་མཐིལ་གྱི་བར་དང༌། །ཞེང་དུ་ཕྱག་སོར་གྱི་རྩེ་ནས་ཕྱག་སོར་གྱི་རྩེའི་བར་འདོམས་གང་ཚད་ཤིན་ཏུ་མཉམ་ཞིང་རིང་ཐུང་མེད་པའོ། །ལྗགས་རིང་ཞིང་མཛེས་པ་ནི། །རྫུ་འཕྲུལ་གྱི་རྣམ་རོལ་མ་མཛད་ཀྱང་ལྗགས་བརྐྱངས་པས་ཞལ་གྱི་དཀྱིལ་འཁོར་སྐྲ་མཚམས་ཀྱི་བར་ཁེབས་པའོ། །རྫུ་འཕྲུལ་གྱི་སྤྲུལ་པའི་དབང་དུ་བྱས་ན་ནི་སྟོང་གསུམ་ལ་སོགས་པ་ཁེབས་པའོ། །ཚངས་དབྱངས་ནི་གསུང་ཚངས་པའི་སྐད་ལྟར་སྙན་ཞིང་ཡིད་དུ་འོང་བ་དང༌། དྲུང་ནས་ཉན་ཡང་གསུང་ཆེ་བར་མི་མངོན་ལ། རྒྱང་རིང་པོ་ནས་ཉན་ཡང་ཆུང་བར་མི་འགྱུར་བའོ། །འགྲམ་པ་སེངྒེ་འདྲ་བ་ནི། འགྲམ་པ་
འཁྱིལ་ཆེ་ཞིང་ཟླུམ་པོར་འདུག་པའོ། །ཚད་མཉམ་པ་ནི་ཚེམས་ཐམས་ཅད་ཆེ་ཆུང་དང་རིང་ཐུང་མེད་པའོ། །ཐགས་བཟང་བ་ནི་ཚེམས་ཀྱི་བར་ན་བར་སྟོང་མེད་པའོ། །ལྷག་མ་གཉིས་ནི། སྤྱན་ནི་མཐོན་མཐིང་སྤྱན་རྫི་བ་མཆོག་གི །འདྲ་བ་འདི་དག་སུམ་ཅུ་རྩ་གཉིས་མཚན། ཞེས་པ་ལྟར། སྤྱན་རིན་པོ་ཆེ་མཐོན་ཀ་ཆེན་པོ་ལྟར་མཐིང་གར་འདུག་པ་དང༌། སྤྱན་གྱི་རྫི་མ་བ་མཆོག་གི་རྫི་མ་ལྟར་འཇིང་ཞིང་དྲི་མ་མེད་པའོ། །དཔེ་བྱད་བརྒྱད་ཅུ་ནི་བཅུ་ཚན་བརྒྱད་དེ། བཅུ་ཚན་དང་པོ་ནི། །ཐུབ་པའི་སེན་མོ་ཟངས་མདོག་དང༌། །མདོག་སྣུམ་མཐོ་དང་སོ་སོར་རྣམས། །ཟླུམ་རྒྱས་བྱིན་གྱིས་ཕྲ་བ་དང༌། །རྩ་མི་མངོན་དང་མདུད་པ་མེད། །ལོང་བུ་མི་མངོན་ཞབས་མཉམ་དང༌། །ཞེས་པས་སོར་མོ་རྣམས་བྱིན་གྱིས་ཕྲ་བ་ནི་ཕྱག་སོར་རྣམས་ཚིགས་མདུད་མེད་པར་རྩ་བ་ནས་རིམ་གྱིས་ཕྲ་བའོ། །མདུད་པ་མེད་པ་ནི་རྩ་མདུད་མེད་པའོ། །ལོང་བུ་མི་མངོན་ཞེས་པའི་སྐབས་མཚན་བཟང་དུ་གཏོགས་པ་ནི་ལོང་བུ་ཆེན་པོ་ཡིན་ལ། དཔེ་བྱད་དུ་གཏོགས་པ་ནི་ལོང་བུ་ཆུང་ངུ་ཡིན་ཞེས་གསུངས་སོ། །ཞབས་མཉམ་པ་ནི། ཞབས་གཡས་གཡོན་གཉིས་རིང་ཐུང་མེད་པར་མཉམ་པའོ། །བཅུ་ཚན་གཉིས་པ་ནི། སེངྒེ་གླང་ཆེན་བྱ་དང་ནི། །ཁྱུ་མཆོག་སྟབས་གཤེགས་གཡས་ཕྱོགས་དང༌། །མཛེས་གཤེགས་དྲང་དང་འཁྲིལ་བག་ཆགས།
བྱི་དོར་བྱས་འདྲ་རིམ་པར་འཚམས། ཞེས་པས་མི་ཟིལ་གྱིས་གནོན་པ་ལ་མཁས་པས་སེངྒེ་ལྟར་གཤེགས་པ་དང༌། ཀླུ་ཟིལ་གྱིས་གནོན་པ་ལ་མཁས་པས་གླང་ཆེན་ལྟར་གཤེགས་པ་དང༌། ནམ་མཁའ་ལ་འགྲོ་བ་བྱའི་རྒྱལ་པོའི་སྟབས་སུ་གཤེགས་པ་དང༌། ཚོགས་ཀྱི་སྣ་འདྲེན་པ་ལ་མཁས་པ་བ་གླང་དང༌། །གླང་པོ་ཁྱུ་མཆོག་ལྟར་གཤེགས་པ་དང་སྟབས་གཤེགས་བཞི། གཡས་ཕྱོགས་ནི། ཞལ་བསྐོར་ནས་གཤེགས་པའི་ཚེ་དུས་ནམ་ཡང་གཡས་ཕྱོགས་སུ་བསྐོར་ནས་གཤེགས་པ་དང༌། མཛེས་གཤེགས་དང་དྲང་པོར་གཤེགས་པ་ཡན་གཤེགས་སྟབས་སོ། །འཁྲིལ་བག་ཆགས་པ་ནི། སྐུ་ཤ་མི་ལྷོད་པའོ་རིམ་པར་འཚམས་པ་ནི། ཆེ་ཆུང་དང་སྦོམ་ཕྲ་རིམ་པར་འཚམས་པའོ། །བཅུ་ཚན་གསུམ་པ་ནི། །གཙང་དང་འཇམ་དང་དག་བའི་སྐུ། །མཚན་ནི་ཡོངས་སུ་རྫོགས་པ་དང༌། །སྐུ་ཡི་ཁོ་ལག་ཡངས་ཤིང་བཟང༌། གོམས་སྙོམས་པ་དང་སྤྱན་གཉིས་ནི། དག་དང་གཞོན་ཤ་ཅན་ཉིད་དང༌། སྐུ་ཞུམ་མེད་དང་རྒྱས་པ་དང༌། ཞེས་པས། །སྐུ་དྲི་མ་མེད་པས་གཙང་བ་དང༌། །པགས་པ་འཇམ་པ་དང༌། །སྐུ་གནག་བག་མེད་པར་འཇམ་པ་དང༌། སྐུའི་ཁྱོན་ཆེ་བས་ཁོ་ལག་ཡངས་པ་དང༌། གཤེགས་པའི་ཚེ་གོམ་པ་ཆེ་ཆུང་མེད་པར་གོམ་པ་སྙོམས་པ་དང༌། །སྤྱན་གྱི་དྲི་མ་མེད་པས་དག་པ་དང༌། །སྐུ་ཤ་མི་སྐེམ་པས་
ཞུམ་པ་མེད་པ་སོགས་སོ། །བཅུ་ཚན་བཞི་པ་ནི། །ཤིན་ཏུ་གྲིམ་པའི་སྐུ་ཉིད་དང༌། །ཡན་ལག་ཤིན་ཏུ་རྣམ་འབྱེས་དང༌། །གཟིགས་པ་སྒྲིབ་མེད་དག་པ་དང༌། །དཀུ་ཟླུམ་སྐབས་ཕྱིན་མ་རྙོང་དང༌། །ཕྱང་ངེ་བ་དང་ལྟེ་བ་ནི། །ཟབ་དང་གཡས་ཕྱོགས་འཁྱིལ་བ་དང༌། །ཀུན་ནས་ལྟ་ན་སྡུག་པ་དང༌། །ཞེས་པས་ཡན་ལག་འབྱེས་པ་ནི། །ཡན་ལག་གི་སྐབས་ཕྱེད་པ་དང༌། །གཟིགས་པ་སྒྲིབ་མེད་ནི། །སྤྱན་རབ་རིབ་ལ་སོགས་མེད་པ་དང༌། །དཀུ་ཟླུམ་ནི་ལྟེ་བའི་ཐད་ཀྱི་སྐེད་པ་ཟླུམ་པོར་ཡོད་པ་དང༌། །སྐེད་པ་ཕྲ་སྦོམ་མཚམས་ལེགས་པར་དོད་པའི་སྐབས་ཕྱིན་པ་དང༌། །མ་རྙོང་བ་ནི་མི་རིང་པས་དཀུ་མ་རྙོང་བ་རྣམས་སོ། །ཕྱང་ངེ་བ་ནི་ཕྱལ་ཕྱང་ངེ་ཞེས་ལྟོ་བའི་ངོས་ཁོད་མི་མཉམ་པ་མེད་པ་དང༌། ཀུན་ནས་ལྟ་ན་སྡུག་པ་ནི་སྐུ་ཐམས་ཅད་དོ། །བཅུ་ཚན་ལྔ་པ་ནི། །ཀུན་སྤྱོད་གཙང་དང་སྐུ་ལ་ནི། །སྨེ་བ་གནག་བག་མེད་པ་དང༌། །ཕྱག་ནི་ཤིང་བལ་ལྟར་འཇམ་དང༌། །ཕྱག་རིས་མདངས་ཡོད་ཟབ་རིང་དང༌། །ཞལ་ནི་ཧ་ཅང་མི་རིང་དང༌། །མཆུ་ནི་བིམྤ་ལྟར་དམར་དང༌། །ལྗགས་མཉེན་པ་དང་སྲབ་པ་དང༌། །ཞེས་པས་ཕྱག་རིས་མདྭངས་ཡོད་པ་དང༌། །ཕྱག་རིས་ཟབ་པ་དང༌། ཕྱག་གི་རི་མོ་རིང་བ་དང༌། མཆུ་བིམྤ་ལྟར་དམར་བ་སོགས་སོ། །བཅུ་ཚན་དྲུག་པ་ནི། དམར་དང་འབྲུག་གི་སྒྲ་ཉིད་དང༌། །
གསུང་གཉེན་མཇམ་དང་མཆེ་བ་ཟླུམ། །རྣོ་དང་དཀར་དང་མཉམ་པ་དང༌། །བྱིན་གྱིས་ཕྲ་དང་ཤངས་མཐོ་དང༌། །མཆོག་ཏུ་དག་པ་དག་དང་ནི། །ཞེས་པས། ལྗགས་དམར་བ་དང༌། མཆེ་བ་ཟླུམ་པ་ནས་བྱིན་གྱིས་ཕྲ་བའི་བར་དང༌། ཤངས་གཟེངས་མཐོ་བ་དང༌། །ཤངས་སྣབས་ལུད་མེད་པ་སོགས་མཆོག་ཏུ་དག་པ་སོགས་སོ། །བཅུ་ཚན་བདུན་པ་ནི། །སྤྱན་ཡངས་པ་དང་རྫི་མ་སྟུག །པདྨའི་འདབ་མ་འདྲ་བ་དང༌། །སྨིན་ཚུགས་རིང་དང་འཇམ་པ་དང༌། །སྣུམ་དང་སྤུ་ནི་མཉམ་པ་དང༌། །ཕྱག་རིང་རྒྱས་དང་སྙན་མཉམ་དང༌། །ཉམས་པར་རྣམ་པར་སྤངས་པ་དང༌། ཞེས་པས། དེ་ཡང་མིག་གི་སྟེང་ན་སྐྱེ་བའི་སྤུ་ནི་སྨིན་མ་ཡིན་ལ། །མིག་སྒོར་སྐྱེ་བ་ནི་རྫི་མའོ། །པདྨའི་འདབ་མ་འདྲ་བ་ནི། ཞེས་པདྨ་འདབ་མ་དང་ཟེའུ་འབྲུར་བཅས་ཁ་ཚང་བར་ཡོད་པ་ལྟར་དཀར་ནག་གི་མཚམས་ཕྱེད་ཅིང་མཛེས་པའོ། །སྙན་མཉམ་ནི་སྙན་གཡས་གཡོན་མཉམ་པ་དང༌། ཉམས་པ་རྣམ་པར་སྤངས་པས་དྲི་མ་མེད་པའོ། །བཅུ་ཚན་བརྒྱད་པ་ནི། །དཔྲལ་བ་ལེགས་པར་འབྱེས་པ་དང༌། །དབྱེས་ཆེ་བ་དང་དབུ་རྒྱས་དང༌། །དབུ་སྐྲ་བུང་བ་ལྟར་གནག་དང༌། །སྟུག་དང་འཇམ་དང་མ་འཛིང་དང༌། །མི་གཤོར་དྲི་ཞིམ་སྐྱེས་བུ་ཡི། །ཡིད་ནི་འཕྲོག་པར་བྱེད་པ་དང༌། །དཔལ་གྱི་བེའུ་དང་བཀྲ་ཤིས་ནི། །གཡུང་དྲུང་འཁྱིལ་པས་མཚན་པ་སྟེ།
སངས་རྒྱས་དཔེ་བྱད་བཟང་པོར་བཞེད། ཅེས་པས། དཔྲལ་བ་ལེགས་པར་འབྱེས་པ་ནི་དཔྲལ་བའི་སྐྲ་མཚམས་ལེགས་པར་དོད་པ་དང༌། དབྱེས་ཆེ་བ་ནི་དཔྲལ་བའི་ཁྱོན་ཆེ་བ་དང༌། དབུ་སྐྲ་མ་འཛིང་པ་ནི་དབུ་སྐྲ་ཉག་མ་ཕན་ཚུན་མ་འདྲེས་པ་དང༌། །ནག་ནོག་ཏུ་གྱུར་པ་མེད་པ་དང༌། །མི་གཤོར་བ་ནི། དབུ་སྐྲ་གྱེན་དུ་མ་བརྫེས་པ་དང༌། དབུ་སྐྲ་ལ་དྲི་ཞིམ་པོར་བྲོ་བས་སྐྱེས་བུའི་ཡིད་འཕྲོག་པར་བྱེད་པ་དང༌། ཐུགས་ཀ་ན་དཔལ་གྱི་བེའུ་དང་ཕྱག་དང་ཞབས་ཀྱི་མཐིལ་ན་རི་མོ་གྲུ་བཞི་པ་བཀྲ་ཤིས་པ་དང༌། །གཡུང་དྲུང་འཁྱིལ་བ་ལ་སོགས་པས་བརྒྱན་པའོ། །མཚན་དང་དཔེ་བྱད་འདི་དག་ཉིད་སངས་རྒྱས་ཀྱི་གཟུགས་སྐུའི་ཡོན་ཏན་ཡིན་ལ། སངས་རྒྱས་ཀྱི་གཟུགས་ཀྱི་སྐུ་དངོས་ནི་ལོངས་སྤྱོད་རྫོགས་སྐུ་ཡིན་པས། །འདི་དག་ལོངས་སྐུ་ལ་བཞག་པ་ཡིན་ལ། སྤྲུལ་སྐུ་ལའང་མཆོག་གི་སྤྲུལ་སྐུ་ལ་མཚན་དཔེ་འདི་དག་ཡོད་མོད་ཀྱང༌། སྤྲུལ་སྐུ་གཞན་དོན་གདུལ་བྱར་སྣང་བ་ཙམ་ཡིན་པས་མཚན་དཔེ་དངོས་མ་བཞག་གོ །མཚན་བཟང་རྣམས་ལས་དབུ་གཙུག་ཏོར་དང༌། མཛོད་སྤུ་གཉིས་མ་གཏོགས་གཞན་རྣམས་འཁོར་ལོས་བསྒྱུར་བ་ལའང་ཆ་འདྲ་ཙམ་ཡོད་ཀྱང༌། སངས་རྒྱས་ཀྱི་མཚན་བཟང་གསལ་བ་དང་མཛེས་པ་སོགས་ཁྱད་པར་ཆེའོ། །མཚན་དང་དཔེ་བྱད་ཀྱི་སྒྲ་དོན་ནི། །སྐྱེས་བུ་ཆེན་པོར་མཚོན་པར་བྱེད་པས་ན་མཚན་དང༌། །ནང་གི་ཡོན་ཏན་གྱི་དཔེ་ལྟ་བུ་ཕྱི་རོལ་ན་སྣང་བས་ན་དཔེ་བྱད་དོ། །སྤྲུལ་
སྐུ་ནི། གང་གིས་སྲིད་པ་ཇི་སྲིད་དུ། འགྲོ་ལ་་ཕན་པ་སྣ་ཚོགས་དག །མཉམ་དུ་མཛད་པའི་སྐུ་དེ་ནི། །ཐུབ་པའི་སྤྲུལ་སྐུ་རྒྱུན་མི་འཆད། །ཅེས་གསུངས་པས། སྲིད་པ་འཁོར་བའི་འཇིག་རྟེན་མ་སྟོངས་ཀྱི་བར་དུ་ཕན་པ་དེ་བསམ་གྱིས་མི་ཁྱབ་པར་མཛད་པའི་སྤྲུལ་སྐུ་གྲངས་མེད་པ་དུས་མཉམ་དུ་སྣང་ཞིང༌། །དེ་ཡང་འཁོར་བ་མ་སྟོངས་བར་དུ་རྒྱུན་མི་འཆད་པའོ། །གཉིས་པ་བརྟེན་པ་ཡེ་ཤེས་ནི། ལེའུ་བཅུ་གསུམ་པར་བཤད་པ་ལྟར་མེ་ལོང་ལྟ་བུ་ལ་སོགས་པ་དང༌། དེ་དག་ཀྱང་བསྡུ་ན་ཇི་ལྟ་ཇི་སྙེད་མཁྱེན་པའི་ཡེ་ཤེས་གཉིས་དང༌། དེ་ཡང་བསྡུ་ན་རྣམ་པ་ཐམས་ཅད་མཁྱེན་པའི་ཡེ་ཤེས་གཅིག་གོ །གསུམ་པ་མཛད་པ་ཕྲིན་ལས་ནི། གདུལ་བྱ་རྣམས་ལམ་གྱི་རྟེན་ལ་འགོད་པ་དང༌། ལམ་ལ་འགོད་པ་དང༌། འབྲས་བུ་ལ་འགོད་པའོ། །དང་པོ་ལམ་གྱི་རྟེན་ལ་འགོད་པ་ནི། ངན་སོང་གི་སེམས་ཅན་རྣམས་ཐུགས་རྗེའི་འོད་ཟེར་ལྔ་ཕོགས་པས་རྒྱུད་སྦྱངས་ནས་མངོན་མཐོ་ལྷ་མིའི་ལུས་རྟེན་ཁྱད་པར་ཅན་ཡང་དག་པའི་ཆོས་ཀྱི་སྣོད་དུ་རུང་བ་ལ་འགོད་པའོ། །གཉིས་པ་ནི་རིགས་ཅན་གསུམ་གྱི་གདུལ་བྱ་རང་རང་གི་སྐལ་པ་དང་མཐུན་པར་ཐེག་པ་གསུམ་གྱི་ལམ་ལ་འགོད་པའོ། །གསུམ་པ་ནི་ལམ་དེ་དག་གི་འབྲས་བུ་མྱ་ངན་ལས་འདས་པ་ལ་འགོད་པའོ། །ཕྲིན་ལས་དེ་དག་ཀྱང་བྱ་བ་ཡུལ་ལ་ཡོད་པའི་ཕྲིན་ལས་དང༌། བྱེད་པོ་ཡུལ་ཅན་ལ་ཡོད་པའི་ཕྲིན་ལས་སོ། །དང་པོ་ནི། །
གདུལ་བྱ་རྣམས་མཐོ་རིས་ཐོབ་པ་དང་ལམ་རྒྱུད་ལ་སྐྱེ་བ་སོགས་གདུལ་བྱའི་རྒྱུད་ཀྱིས་བསྡུས་ལ། གཉིས་པ་ནི། དེ་ལྟར་མཛད་པའི་ཐབས་སམ་ནུས་པ་སྟེ་སངས་རྒྱས་ཉིད་ཀྱི་ཐུགས་རྒྱུད་ཀྱིས་བསྡུས་པའོ། །ལམ་གྱི་སྦས་དོན་གསང་སྔགས་རྡོ་རྗེ་ཐེག་པ་ལྟར་བཤད་པའི་སྐབས་སུ། །སྔགས་ཀྱི་ཐེག་པ་ཞེས་པའི་དོན་ནི། །མན་ཡིད་དང་ཏྲ་ཡ་སྐྱོབ་པའི་སྒྲས་བསྡུས་པས་མནྟྲ་ཞེས་བྱ་སྟེ། ཡིད་ཤེས་བདེ་མྱུར་གྱིས་སྐྱོབ་པས་ན་གསང་སྔགས་སོ། །འབྲས་བུའི་ཐེག་པ་ཞེས་པའི་དོན་ནི་གཞི་གཏན་ལ་དབབ་པའི་དུས་སུ་མཐར་ཐུག་གི་སངས་རྒྱས་ཀྱི་སྐུ་དང༌། ཡེ་ཤེས་ཀྱི་ཆོས་ཁམས་རྒྱ་མཚོ་ལྟ་བུ་སེམས་ཉིད་བདེ་གཤེགས་སྙིང་པོའི་རང་རྩལ་དུ་རྫོགས་པས་འབྲས་བུ་གཞི་ལ་གནས་པར་འདོད་པ་དང༌། ལམ་ཉམས་སུ་ལེན་པའི་དུས་སུ་འབྲས་བུ་སྐུ་དང་ཡེ་ཤེས་ཀྱི་བཞུགས་ཚུལ་དང་མཐུན་པའི་ལམ་སྒོམ་པས་འབྲས་བུ་ལམ་དུ་བྱེད་པ་དང༌། །འབྲས་བུ་མངོན་དུ་བྱེད་པའི་དུས་སུ་མི་ལུས་གཅིག་གིས་འབྲས་བུ་མངོན་དུ་བྱེད་པས་འབྲས་བུའི་ཐུས་ཀ་ཡིན་པའི་ཕྱིར་ན་འབྲས་བུའི་ཐེག་པ་ཞེས་བྱའོ། །རྡོ་རྗེའི་ཐེག་པ་ཞེས་པའི་དོན་ནི། །མཚོན་བྱེད་དཔེའི་རྡོ་རྗེ་དང་རྗེས་སུ་མཐུན་པའི་ཆོས་ཉིད་དོན་དམ་པའི་རྡོ་རྗེ་བདེ་གཤེགས་སྙིང་པོའི་ཡིན་ལུགས་བླ་མས་ངོ་སྤྲད་པ་དེ་ཉིད་ཕར་མཚན་མའི་རྣམ་རྟོག་ཐམས་ཅད་ཀྱིས་གླགས་མི་རྙེད་པས་ན་རྡོ་རྗེ་ཡིན་ལ། དོན་དམ་ཉམས་ལེན་གྱི་གཙོ་བོར་བརྟེན་པས་ན་རྡོ་རྗེ་ཐེག་པ་ཞེས་བྱའོ། །ཐབས་
ཀྱི་ཐེག་པ་ཞེས་པའི་དོན་ནི། །སྦྱིན་པ་ལྟ་བུ་སྤྱོད་པའི་སྒོ་རེ་རེ་ཡང་ཐབས་དུ་མའི་སྒོ་ནས་སྒྲུབ་པས་ཐབས་མང་བ་དང༌། ཉོན་མོངས་པ་ལྔ་ཡང་ལམ་དུ་བྱེད་པས་ཐབས་མཁས་པ་དང༌། འདོད་ཡོན་མ་སྤངས་པས་ཐབས་བདེ་བ་དང༌། ཚེ་ལུས་གཅིག་གིས་འགྲུབ་པས་ཐབས་མྱུར་བའོ། །རིག་པ་འཛིན་པའི་སྡེ་སྣོད་ཅེས་པའི་དོན་ནི། རིག་པ་བདེ་གཤེགས་སྙིང་པོའི་ཆོས་ཉིད་བླ་མས་ངོ་སྤྲད་པ་དེ་ཉིད་མི་འབྲལ་བར་འཛིན་པའི་རིག་འཛིན་ནི་གསང་སྔགས་ཉམས་སུ་ལེན་པའི་གང་ཟག་རྣམས་ཡིན་ལ། དེ་དག་གིས་ཉམས་སུ་བླང་བྱའི་སྡེ་སྣོད་ཡིན་པས་ན་རིག་པ་འཛིན་པའི་སྡེ་སྣོད་དོ། །སྡེ་སྣོད་ཅེས་པའི་དོན་ནི། ཚིག་དོན་གྱི་སྡེ་ཚན་དུ་མའི་སྣོད་ཡིན་པས་ན་སྡེ་སྣོད་དོ། །ལམ་སྨིན་བྱེད་ཀྱི་དབང་བཤད་པའི་སྐབས་སུ་ཕྱི་ནང་གསང་བའི་དེ་ཉིད་བཅུ་ནི། རྡོ་རྗེ་སྙིང་པོ་རྒྱན་གྱི་རྒྱུད་ལས། ཕྱིར་བཟློག་གཉིས་ཀྱི་ཆོ་ག་དང༌། གསང་དང་ཤེས་རབ་ཡེ་ཤེས་དང༌། །ཁ་སྦྱོར་འབྱེད་པའི་ཆོ་ག་དང༌། །གཏོར་མ་རྡོ་རྗེའི་བཟླས་པ་དང༌། །དྲག་ཤུལ་སྒྲུབ་པའི་ཆོ་ག་དང༌། །རབ་ཏུ་གནས་དང་དཀྱིལ་འཁོར་སྒྲུབ། །གསང་བའི་དེ་ཉིད་བཅུ་ཡིན་ནོ། །དཀྱིལ་འཁོར་ཏིང་འཛིན་ཕྱག་རྒྱ་དང༌། །སྟངས་སྟབས་འདུག་སྟངས་བཟླས་བརྗོད་དང༌། །སྦྱིན་སྲེག་མཆོད་པ་ལས་སྦྱོར་དང༌། །སླར་སྡུད་པ་ཡི་རྣམ་པ་ནི། །ཕྱི་ཡི་དེ་ཉིད་བཅུ་ཡིན་ནོ། །ཞེས་སོ། །ཕྱིར་བཟློག་
གཉིས་ནི་ཁྲོ་བཅུ་ལ་སོགས་པའི་སྲུང་འཁོར་བསྒོམས་ནས་བར་ཆད་ཐམས་ཅད་ཕྱིར་བཟློག་པ་དང༌། བྲིས་པའི་སྲུང་འཁོར་གྱི་སྒོ་ནས་བཟློག་པ་ཡིན་ནོ། །ཕྱིའི་དེ་ཉིད་བཅུ་པོ་གསང་སྔགས་ནང་རྒྱུད་དང་བསྟུན་པའི་དཀྱིལ་འཁོར་བྲི་བ་དང་ཏིང་ངེ་འཛིན་སྒོམ་པ་སོགས་ནང་གི་དེ་ཉིད་བཅུ་དང་ཕྱི་རྒྱུད་སྡེ་གསུམ་དང་བསྟུན་ན་ཕྱིའི་དེ་ཉིད་བཅུའོ། །ཆོ་གའི་ཡན་ལག་བཅུ་དྲུག་བཤད་པའི་སྐབས་སུ། བསྙེན་པ་ལ་གཞི་བསྙེན་དང་ལས་བསྙེན་གཉིས་ལས། གཞི་བསྙེན་ལ་གྲངས་དུས་མཚན་མའི་བསྙེན་པ་དང་གསུམ། ལས་བསྙེན་སློབ་མ་ལ་དབང་བསྐུར་བའི་དུས་སུ་བསྙེན་པ་ཁ་གསོ་བ་སྟེ། དེ་གཉིས་ཀ་ལ་བསྙེན་སྒྲུབ་ཡན་ལག་བཞི་ཀ་ཚངས་པར་བསྒོམ་དགོས་ཏེ། དེ་ཡང་ཆོ་གའི་ཐུན་གཅིག་དང་སྦྱར་ན་ཏིང་ངེ་འཛིན་གསུམ་སྒོམ་པ་ཡན་ཆད་བསྟེན་པ། རང་ལྷ་གཙོ་བོར་སྒོམ་པ་ཉེ་བསྙེན། །འཁོར་གྱི་ལྷ་ཚོགས་ཚང་བར་སྒོམ་པ་སྒྲུབ་པ་དབང་བསྐུར་རྒྱས་གདབ་སྤྱན་འདྲེན་སོགས་ནས་བཟླས་པ་མཆོད་བསྟོད་སོགས་སྒྲུབ་པ་ཆེན་པོའོ། །ཡང་ན་བསྙེན་པ་ཇི་ཙམ་བྱེད་པའི་ཞག་གྲངས་ཀྱིས་བསྙེན་སྒྲུབ་ཡན་ལག་བཞི་ཚང་བ་ཡིན་ཏེ། ཞག་དང་པོ་སྒྲུབ་རྫས་དང་ཡོ་བྱད་སྟ་གོན་བྱས་ནས་ཆོ་ག་ཚར་གཅིག་གཏོང་བ་བསྟེན་པ། དེ་ནས་སྒྲུབ་པ་ཇི་ཙམ་བྱེད་པའི་ཞག་གྲངས་གྱི་ཕྱེད་ཚུན་ཆད་འོད་ཟེར་དཀར་པོའི་སྤྲོ་བསྡུས་སྡིག་སྒྲིབ་སྦྱངས་པའི་དམིགས་པ་གཙོ་བོར་བྱེད་པ་ཉེ་
བསྙེན། དེ་ཕྱིན་ཆད་ཕྱེད་ཕྱི་ལ་འོད་ཟེར་དམར་པོའི་སྤྲོ་བསྡུས་མཆོག་ཐུན་མོང་གི་དངོས་གྲུབ་རང་ལ་བསྡུ་བའི་དམིགས་པ་གཙོ་བོ་བྱེད་པ་སྒྲུབ་པ། །ཞག་ཐ་མ་ལ་དངོས་གྲུབ་ལེན་པ་སྒྲུབ་པ་ཆེན་པོའོ། །དེ་ནས་ས་ཆོག་ལ་ཡན་ལག་བཞི་སྟེ། དང་པོ་ས་བསླང་བ་ལ་སྣང་བ་མི་ལས་བསླང་བ་རྒྱལ་པོ་ལ་སོགས་ལ་རིན་གྱིས་གཞལ་བའམ་ཚིག་གིས་བཀྲོལ་ནས་ས་གཞི་རང་དབང་ཐོབ་པར་བྱ། མི་སྣང་བ་སའི་ལྷ་མོ་ལས་བསླང་བ་སའི་ལྷ་མོ་ས་བདག་གཞི་བདག་གི་འཁོར་དང་བཅས་པ་ལ་གཏོར་མ་ཕུལ་ནས་གནང་བ་ཞུ་བ་དང་གཉིས་སོ། །གཉིས་པ་ས་སྦྱང་བ་ལ་བཞི། །དང་པོ་ལྟོ་འཕྱེ་བརྟགས་ནས་སྦྱང་བ་ནི། ས་བདག་ལྟོ་འཕྱེའི་ཐིག་ལེགས་པར་བཏབ་སྟེ་དེའི་ལྟོ་བའི་ཐད་ནས་བརྐོའོ། །གཉིས་པ་སའི་ཟུག་རྔུ་དབྱུང་བ་ནི། །དཀྱིལ་འཁོར་གཞིར་ལུས་ཕྱེད་ནུབ་པ་ལ་སོགས་པའི་ས་བརྐོས་ནས་རུས་པ་གྱོ་མོ་རྡོ་སྐྲ་སོགས་སའི་ཟུག་རྔུ་རྣམས་དབྱུང་བའོ། །གསུམ་པ་རྫས་སྔགས་ཏིང་ངེ་འཛིན་གྱིས་སྦྱང་བ་ནི། བ་བྱུང་དྲི་བཟང་གི་ཆུ་ལ་སོགས་པའི་རྫས། །ཨོཾ་ཧ་ན་ཧ་ན་ཧཱུྃ་ཕཊ། ཅེས་སྔགས་དང༌། ལག་པ་རྡོ་རྗེའི་རང་བཞིན་ལས་འཕྲོས་པའི་འོད་ཀྱིས་ས་གཞི་རྡོ་རྗེར་བྱིན་གྱིས་བརླབས་པའི་ཏིང་ངེ་འཛིན་རྣམས་ཀྱིས་སྦྱང་བའོ། །བཞི་པ་ཆོས་ཉིད་བསམ་གྱིས་མི་ཁྱབ་པས་སྦྱང་བ་ནི། སྦྱང་བྱ་སྦྱང་བྱེད་ཀྱི་སྤྲོས་པ་ཞི་བའི་ཆོས་ཉིད་ལ་
མཉམ་པར་འཇོག་པའོ། །གསུམ་པས་གཟུང་བ་ནི། རྐང་པ་བྱིན་གྱིས་བརླབས་ཏེ་རྡོ་རྗེའི་འགྲོས་དང་གར་གྱིས་ས་བཅག་པའོ། །བཞི་པས་སྲུང་བ་ནི། བགེགས་ཀྱི་གཙོ་བོ་རྣམས་ལ་ཕུར་བུས་བཏབ་སྟེ་སྲུང་བའོ། །གསུམ་པ་སྟ་གོན་ལ་ཡན་ལག་བཞི་སྟེ། ས་ཡི་ལྷ་མོ་སྟ་གོན་དང༌། དཀྱིལ་འཁོར་གྱི་ལྷ་སྟ་གོན་དང༌། བུམ་པ་སྟ་གོན་དང༌། སློབ་མ་སྟ་གོན་ནོ། །དང་པོ་ནི། ས་ལྷ་སྤྱན་དྲངས་ཏེ་གཏོར་མ་ཕུལ་ནས་ཕྲིན་ལས་བཅོལ་བ་སྔར་ལྟར་རོ། །གཉིས་པ་ནི། དཀྱིལ་འཁོར་གྱི་གཞིར་ཚོམ་བུ་བཀོད་པ་ལ་ལྷ་བསྐྱེད་བསྟིམ་སོགས་བྱས་ནས་གནང་བ་ཞུ་བའོ། །གསུམ་པ་ལྷ་གྲངས་སམ། རྣམ་རྒྱལ་དང་ལས་བུམ་ཙམ་སྒྲུབ་པའོ། །བཞི་པ་ནི་སློབ་མ་ལ་ཆོས་བཤད་ནས་སོ་ཤིང་ཁྱོར་ཆུ་སྲུང་སྐུད་ཀུ་ཤ་རྣམས་བྱིན་ཏེ་དངོས་གྲུབ་ཀྱི་ལྟས་བརྟགས་པའོ། །བཞི་པ་སློབ་མ་འཇུག་ཅིང་སྨིན་པ་ལ་ཡན་ལག་བཞི་སྟེ། །སློབ་དཔོན་རང་ཉིད་འཇུག་པ་དང༌། །སློབ་མ་འཇུག་པར་གནང་བ་ཞུ་བ་དང༌། །སློབ་མ་དཀྱིལ་འཁོར་དུ་གཞུག་པ་དང༌། ཞུགས་པ་ལ་དབང་བསྐུར་བའོ། །དང་པོ་ནི། །རྒྱས་པར་བདག་ཉིད་འཇུག་པ་དང༌། །བསྡུ་ན་རིག་པའི་མེ་ཏོག་དོར་བ་ཙམ་གྱིས་འཇུག་གོ །གཉིས་པ་ནི། སློབ་མ་གཞུག་པར་གནང་བ་ཞུས་པས། གནང་བ་བྱིན་པར་བསམ་མོ། །གསུམ་པ་ནི། སྡོམ་པ་རྣམས་ཕོག་པ་ནས་བཟུང་དཀྱིལ་འཁོར་བསྟན་པའི་བར་ཕྱི་འཇུག་དང༌། ཡེ་ཤེས་ཕེབས་པ་ནང་འཇུག་གོ །བཞི་པ་ནི། །
དབང་བཞི་རྒྱས་པར་བསྐུར་བའོ། །དབང་བཞི་རྒྱས་པར་བཤད་པའི་སྐབས་སུ། །དབང་རེ་རེ་ལའང་འདོད་ཆགས་ཀྱི་འཇུག་ཚུལ་བཞི་ལས། གང་གི་གཉེན་པོར་ཆ་བ། དཀྱིལ་འཁོར་གང་ལ་བརྟེན་པ། དབང་གང་བསྐུར་བ། སྒྲིབ་པ་གང་འདག །ལྟ་བ་གང་རྟོགས། ལམ་གང་སྒོམ་པ་ལ་དབང༌། །གྲུབ་མཐའ་གང་སྙོགས། འདའ་ཀ་མའི་མན་ངག་གང་ཡིན། འབྲས་བུ་གང་ཐོབ་པ་དང་དགུ་རེ་ཡོད་པ་ལས། །དང་པོ་བུམ་དབང་གི་སྐབས་སུ། །བལྟས་པས་ཚིམ་པའི་འདོད་ཆགས་ཀྱི་གཉེན་པོར་བྱེད། །དཀྱིལ་འཁོར་ཕྱི་རྡུལ་ཚོན་གྱི་དཀྱིལ་འཁོར་ལ་བརྟེན། དབང་བུམ་དབང་བསྐུར། །ལུས་ཀྱི་སྒྲིབ་པ་དག །ལྟ་བ་ངོ་བོ་ཉིད་གསུམ་རྟོགས། དེ་ཡང་སྣང་བ་ལྷ་ཡི་དཀྱིལ་འཁོར་དུ་གསལ་བ་སྣང་ཕྱོགས་ཀྱི་ངོ་བོ་ཉིད་དང༌། དེའི་རང་བཞིན་སྟོང་ཉིད་དུ་ཤེས་པ་སྟོང་ཕྱོགས་ཀྱི་ངོ་བོ་ཉིད་དང༌། དེ་གཉིས་ཟུང་དུ་འཇུག་པ་ཟུང་འཇུག་གི་ངོ་བོ་ཉིད་དོ། །དང་པོ་གཉིས་རྒྱུ་དུས་ཀྱི་ལྟ་བ་དུག་ཅན་དང༌། ཕྱི་མ་འབྲས་དུས་ཀྱི་ལྟ་བ་དུག་མེད་དོ། །ལམ་བསྐྱེད་རིམ་དབྱིབས་ཀྱི་ལམ་བསྐྱེད་པའི་རིམ་པ་སྒོམ་པ་ལ་དབང༌། གྲུབ་མཐའ་གང་རྟོགས་ན་འཁོར་འདས་དབྱེར་མེད་རྟོགས། དེ་ཡང་འདི་མན་ཆད་གྱི་གྲུབ་མཐའ་སྙོགས་པ་ཐམས་ཅད་རང་རང་གིས་ལྟ་བ་མངོན་སུམ་དུ་རྟོགས་པ་ཡིན་པ་ལས། ཐོབ་པའམ་རིག་འཛིན་གྲུབ་པ་ཡིན་ནོ། །འཁོར་འདས་དབྱེར་མེད་ནི། །འཁོར་བ་དང་མྱ་ངན་ལས་
འདས་པ་གཉིས་ཀ་མཉམ་པ་ཉིད་དུ་རྟོགས་པའོ། །འདའ་ཀ་མའི་མན་ངག་ནི། ཚེ་འདིར་གྲུབ་མཐའ་མ་སྙོགས་ན་འོད་ཀྱི་གོང་བུས་འཕོ་བ་དང༌། སྒྲ་ཡི་གོང་བུས་འཕོ་བ་ལ་བརྟེན་ནས་དག་པའི་ཞིང་ངམ་སྔགས་ལ་སྤྱོད་པའི་རྟེན་ཅན་དུ་སྐྱེས་ཏེ་ལམ་གྱི་འཕྲོ་མཐུད་པའོ། །དེ་ཡང་འོད་ཀྱི་གོང་བུ་ནི་རྣམ་ཤེས་འོད་ཀྱི་ཐིག་ལེར་བསྒོམ་ནས་འཕོ་བ་དང༌། སྒྲའི་འཕོ་བ་ནི་ཧི་ཀ་ལ་སོགས་པའི་སྒྲས་འཕོ་བའོ། །ཚེ་འདིར་གྲུབ་མཐའ་སྙོགས་ན་འདའ་ཀ་མའི་མན་ངག་མི་དགོས་སོ། །འབྲས་བུ་ནི་རྩའི་འགྲོས་ཐིམ་ནས་སྤྲུལ་སྐུ་འགྲུབ་པའོ། །གཉིས་པ་གསང་དབང་ལའང་དགུ་སྟེ། དང་པོ་དགོད་པས་ཚིམ་པའི་འདོད་ཆགས་ཀྱི་གཉེན་པོར་བྱེད། །དཀྱིལ་འཁོར་རྩ་ཡི་གེ་བྷ་གའི་དཀྱིལ་འཁོར་ལ་བརྟེན། དབང་གསང་དབང་བསྐུར། །ངག་གི་སྒྲིབ་པ་དག་ལྟ་བ་རང་བྱུང་གི་ཡེ་ཤེས་རྟོགས། ལྟ་བ་འདི་ལ་བཞི་སྟེ། དང་པོ་སྙིང་གའི་ཉོན་མོངས་པའི་རྩ་འཁོར་དུ་རླུང་སེམས་འདུས་པས་ཉོན་མོངས་པ་སྔར་བས་རགས་པ་ལྟར་གྱུར་པས་ཉོན་མོངས་རང་བྱུང་ཡེ་ཤེས། དེ་ནས་རོ་རྐྱང་རྣམ་རྟོག་གི་རྩ་ལ་རླུང་སེམས་འདུས་པས་རྣམ་རྟོག་སྔར་བས་རགས་པ་ལྟར་གྱུར་པ་རྣམ་རྟོག་རང་བྱུང་ཡེ་ཤེས། དེ་ནས་དབུ་མའི་རྩ་འཕྲེད་བསྟན་འགའ་ཞིག་ཏུ་རླུང་སེམས་འདུས་པས་ཤེས་པ་སྔར་བས་རྨོངས་པ་ལྟར་གྱུར་པ་སྣེལ་ཞི་རང་བྱུང་ཡེ་ཤེས། དེ་ནས་དབུ་མར་རླུང་སེམས་འདུས་ནས་རིག་པ་
གསལ་དྭངས་སྔར་བས་ཁྱད་པར་དུ་འཕགས་པ་རྒྱུད་ལ་སྐྱེས་པ་གསལ་ཞིང་ཡངས་པ་རང་བྱུང་ཡེ་ཤེས་སོ། །སྔ་མ་གསུམ་ལྟ་བུ་དུག་ཅན་དང༌། ཕྱི་མ་དུག་མེད་དོ། །ལམ་བདག་བྱིན་གྱིས་རློབ་པའི་ལམ་གཏུམ་མོ་བསྒོམ་པ་ལ་དབང༌། གྲུབ་མཐའ་གང་སྙོགས་ན་མ་འདྲེས་ལ་ཡོངས་སུ་རྫོགས་པའི་གྲུབ་མཐའ་སྙོགས་ཏེ། འགྲོ་དྲུག་གི་སྒྲ་སྐད་ཆེ་ཆུང་ཐམས་ཅད་སངས་རྒྱས་ཀྱི་གསུང་དུ་རྟོགས་པའོ། །ཚེ་འདིར་གྲུབ་མཐའ་མ་སྙོགས་ན་འདའ་ཀ་མའི་མན་ངག་དཔེའི་འོད་གསལ་ཏེ་སྔར་གྱི་ལྟ་བ་དེའི་ངང་ནས་འཕོ་བའོ། །འབྲས་བུ་གང་ཐོབ་ན་ཡི་གེའི་འགྲོས་ཐིམ་ནས་ལོངས་སྐུ་འགྲུབ་པའོ། །གསུམ་པ་ཤེས་རབ་ཡེ་ཤེས་ཀྱི་དབང་ལའང་དགུ་སྟེ། དང་པོ་འདོད་ཆགས་བཞི་ལས་ལག་བཅང་གི་འདོད་ཆགས་ཀྱི་གཉེན་པོར་བྱེད། དཀྱིལ་འཁོར་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན། དབང་ཤེར་དབང་བསྐུར་ཡིད་ཀྱི་སྒྲིབ་པ་དག །ལྟ་བ་གང་རྟོགས་ན་བདེ་སྟོང་དགའ་བཞིའི་ལྟ་བ་རྟོགས། དེ་ཡང་དགའ་བ་དང་པོ་གསུམ་ལྟ་བ་དུག་ཅན། ཕྱི་མ་དུག་མེད་དོ། །ལམ་གང་སྒོམ་པ་ལ་དབང་ན་ཁམས་ཀྱི་ཞུ་བདེ་ལ་བརྟེན་ནས་སྣང་མཆེད་ཐོབ་གསུམ་གཞན་ལུས་ཕྱག་རྒྱའི་ལམ་སྒོམ་པ་ལ་དབང༌། གྲུབ་མཐའ་གང་རྟོགས་ན་བདེ་སྟོང་དབྱེར་མེད་ཀྱི་གྲུབ་མཐའ་རྟོགས། ཚེ་འདིར་གྲུབ་མཐའ་མ་སྙོགས་ན། འདའ་ཀ་མའི་མན་ངག་རྡོ་རྗེ་སེམས་
དཔའ་འབྱོན་པ་སྟེ། རྡོ་རྗེ་སྟོང་པ་ཉིད་དང༌། བདེ་བ་ཆེན་པོ་སེམས་ཏེ་བདེ་སྟོང་རྡོ་རྗེ་སེམས་དཔའི་རང་བཞིན་གཞི་དུས་ཀྱི་འོད་གསལ་ངོ་འཕྲོད་ནས་གྲོལ་བའོ། །འབྲས་བུ་གང་ཐོབ་ན་ཐིག་ལེའི་འགྲོས་ཐིམ་ནས་ཐུགས་རྡོ་རྗེ་ཆོས་སྐུ་འགྲུབ་པའོ། །བཞི་པ་ཚིག་དབང་རིན་པོ་ཆེ་ལ་ཡང་སྔར་ལྟར་དགུ་ལས། འདོད་ཆགས་བཞི་ལས་གཉིས་སྦྱོར་གྱི་འདོད་ཆགས་ཀྱི་གཉེན་པོར་བྱེད། དཀྱིལ་འཁོར་དོན་དམ་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་ནས། དབང་ཚིག་དབང་བསྐུར། སྒྲིབ་པ་གང་དག་ན་སྒོ་གསུམ་ཆ་མཉམ་གྱི་སྒྲིབ་པ་དག །ལྟ་བ་གང་རྟོགས་ན་རིག་སྟོང་བསམ་གྱིས་མི་ཁྱབ་པའི་ལྟ་བ་རྟོགས། ལམ་གང་སྒོམས་པ་ལ་དབང་ན་འོད་གསལ་ཕྱག་རྒྱ་ཆེན་པོའམ་རིག་སྟོང་རྫོགས་པ་ཆེན་པོ་སྒོམ་པ་ལ་དབང༌། གྲུབ་མཐའ་གང་རྟོགས་ན་བསམ་གྱིས་མི་ཁྱབ་པའི་ཡེ་ཤེས་བདེ་སྟོང་ཕྱག་རྒྱ་ཆེན་པོ་རྟོགས། ཚེ་འདིར་གྲུབ་མཐའ་མ་སྙོགས་ན་འདའ་ཀ་མ་གསང་ཆེན་ཕྱག་རྒྱ་ཆེན་པོ་རྟོགས། ཚེ་འདིར་གྲུབ་མཐའ་མ་སྙོགས་ན་འདའ་ཀ་མ་གསང་ཆེན་ཕྱག་རྒྱ་ཆེན་པོའི་ངང་དུ་འཕོ་བའོ། །འབྲས་བུ་གང་ཐོབ་ན་སྙིང་པོ་ཡེ་ཤེས་རླུང་གི་འགྲོས་ཐིམ་ནས་ཡེ་ཤེས་རྡོ་རྗེའི་ངོ་བོ་ཉིད་སྐུའི་གོ་འཕང་ཐོབ་པའོ། །སྐབས་འདིར་དག་པའི་ལྟ་བ་རྣམས་ནི་ཉམས་མྱོང་ཏིང་ངེ་འཛིན་གྱི་ལྟ་བ་ཞེས་བྱ་སྟེ། མཚན་ཉིད་ཐེག་པར་ཐོས་བསམ་གྱིས་གཏན་ལ་དབབ་པའི་ལྟ་བ་བཤད་པ་དང་མི་འདྲའོ། །རྩའི་འགྲོས་ཐིམ་བསམ་གྱིས་གཏན་ལ་དབབ་པའི་ལྟ་བ་བཤད་པ་དང་མི་འདྲའོ། །རྩའི་འགྲོས་ཐིམ་སོགས་ནི་མ་དག་པའི་རྩ་རླུང་ཐིག་ལེ་རྣམས་དག་པ་ཡེ་ཤེས་ཀྱི་ངང་དུ་ཐིམ་པའོ། །
མཐར་ཐུག་གི་འབྲས་བུ་རྣམས་ཐོབ་རུང་གི་ས་བོན་རྒྱུད་ལ་བཞག་པ་ཙམ་ཡིན་གྱི། དབང་དེ་དག་ཐོབ་པ་ཙམ་གྱིས་དངོས་སུ་ཐོབ་པ་ནི་མ་ཡིན་ནོ། །གྲུབ་མཐའ་ཡང་ལམ་དེ་བསྒོམས་པས་ད་གཟོད་གྲུབ་པའོ། །རྫོགས་རིམ་གྱི་སྐབས་སུ་ཚེས་དྲུག་ནི། ལམ་གྱི་རྩ་བ་གཏུམ་མོ། །ལམ་གྱི་གཞི་མ་སྒྱུ་ལུས། །ལམ་གྱི་དྲོད་ཚད་རྨི་ལམ། ལམ་གྱི་སྙིང་པོ་འོད་གསལ། ལམ་གྱི་སུན་མ་བར་དོ། །ལམ་གྱི་བློ་ཆོད་འཕོ་བ་དང་དྲུག་གོ །དང་པོ་ལམ་གྱི་རྩ་བ་གཏུམ་མོ་ལ། ལས་ཀྱི་གཏུམ་མོ། ཉམས་ཀྱི་གཏུམ་མོ། །མཆོག་གི་གཏུམ་མོའོ། །ལས་ཀྱི་གཏུམ་མོ་ནི། ལུས་ཀྱི་བྱེད་པ་བཅིངས་ཏེ་ཆོས་བདུན་གཡོ་མེད་དུ་བྱེད་པ། ངག་གི་བྱེད་པ་བཅིངས་ཏེ་རླུང་ཁ་སྦྱོར་དུ་འཆིང་བ་དང༌། སེམས་ཀྱི་བྱེད་པ་བཅིངས་ཏེ་གཏུམ་མོ་འབར་འཇག་སྒོམ་པ་སོགས་སོ། །ཉམས་ཀྱི་གཏུམ་མོ་ནི་དེ་ལྟར་བསྒོམས་པས་རླུང་སེམས་དབུ་མར་འདུས་པའི་རྟགས་སུ་དུ་བ་སྨིག་སྒྱུ་མེ་ཁྱེར་ལ་སོགས་པ་སྣང་ཞིང་སེམས་བདེ་སྟོང་གི་ཉམས་སྐྱེ་བའོ། །མཆོག་གི་གཏུམ་མོ་ནི། རླུང་སེམས་འདུ་ཚུལ་ལས་སྣང་བ་གསུམ་གྱིས་དྲངས་པའི་འོད་གསལ་མངོན་དུ་གྱུར་ནས་རྣམ་པར་མི་རྟོག་པ་མཆོག་གི་གཏུམ་མོ་རྒྱུད་ལ་སྐྱེ་བའོ། །གཉིས་པ་ལམ་གྱི་གཞི་མ་སྒྱུ་ལུས་ལའང༌། མ་དག་པའི་སྒྱུ་ལུས། དག་པའི་སྒྱུ་ལུས། སྦས་དོན་རླུང་སེམས་ཀྱི་སྒྱུ་ལུས་སོ། །དང་པོ་མ་དག་སྒྱུ་ལུས་ནི། ཕྱི་ནང་གི་སྣང་བ་
ཐམས་ཅད་སྒྱུ་མ་དང་རྨི་ལམ་ལྟར་སྒོམ་པའོ། །དག་པའི་སྒྱུ་ལུས་ནི་སྣང་བ་ཐམས་ཅད་ལྷ་སྐུ་སྒྱུ་མ་ལྟར་སྒོམ་པའོ། །སྦས་དོན་རླུང་སེམས་ཀྱི་སྒྱུ་ལུས་ནི། །དེ་ལྟར་སྣང་བ་ལྷ་གོམས་པ་དང༌། དེ་ཉིད་འོད་གསལ་དུ་འཇུག་པའི་བསྡུ་རིམ་གཉིས་ཀ་སྤེལ་ནས་གོམས་པས་བསྡུ་རིམ་ཚེ་ཐ་མལ་གྱི་ལུས་རགས་པའི་འཛིན་པ་དང་བྲལ་ནས། །རླུང་སེམས་ཙམ་ལས་གྲུབ་པའི་སྒྱུ་མ་ལྟ་བུའི་ལྷ་སྐུར་ལངས་པ་དེ་ཉིད་རང་ངོ་ལ་རྟག་པར་སྣང་ཞིང་གཞན་སྣང་དུ་སྔར་གྱི་ལུས་རགས་པ་དེ་ཉིད་མི་སྣང་བ་སྟེ་དེའི་ཚེ་སྒྱུ་ལུས་གྲུབ་པ་ཞེས་བྱའོ། །གསུམ་པ་ལམ་གྱི་དྲོད་ཚད་རྨི་ལམ་ནི། སྒྱུ་ལུས་ཀྱི་ཡན་ལག་སྟེ། དང་པོ་འདུན་སྟོབས་དང་རླུང་སྟོབས་གང་རུང་གིས་རྨི་ལམ་བཟུང་ནས་རྨི་ལམ་ལ་རྨི་ལམ་དུ་ངོ་ཤེས་པ་ལ་སྦྱངས། དེ་ནས་རྨི་ལམ་གྱི་སྣང་བ་སྤྲུལ་སྒྱུར་བྱེད་པ་དང་རྨི་ལམ་བཟུང་ནས་སངས་རྒྱས་ཀྱི་ཞིང་དང་སེམས་ཅན་གྱི་གནས་ལ་སོགས་པ་ཉུལ་བ་དང༌། འཇིགས་སྐྲག་གི་གནས་མེ་དང་ཆུ་དང་གཡང་ས་སོགས་ལ་ཐོག་བརྫིས་བྱ་བ་དང༌། མཐར་རྨི་ལམ་གྱི་སྣང་བ་ཐམས་ཅད་ལྷ་དང་གཞལ་ཡས་ཁང་གི་རང་བཞིན་དུ་བལྟས་ནས་སྒྱུ་མར་སྦྱོང་བ་དང༌། མཐར་སྒྱུ་མའི་ལྷ་སྐུ་ཡང་བསྡུ་རིམ་གྱིས་བསྡུས་ནས་འོད་གསལ་དུ་འཇུག་པ་སྟེ་མཐར་རྨི་ལམ་དབྱིངས་སུ་ནུབ་པའི་ཐབས་ལ་སློབ་པའོ། །བཞི་པ་ལམ་གྱི་སྙིང་པོ་འོད་གསལ་ནི། སྔར་སྒྱུ་ལུས་ཀྱི་སྐབས་ཀྱི་སྒྱུ་མ་ལྟ་བུའི་ལྷ་སྐུ་དེ་ཡང་བསྡུ་རིམ་གྱིས་འོད་གསལ་དུ་བསྡུས་ནས་གཏུམ་
མོ་རང་ལུས་དང་གཞན་ལུས་ཕྱག་རྒྱའི་ལམ་གང་རུང་ལ་བརྟེན་ནས་དགའ་བཞི་ལྷན་ཅིག་སྐྱེས་པའི་ཡེ་ཤེས་སོགས་ལ་གོམས་པ་ལས། སྟོང་པ་བཞིའམ་དགའ་བ་བཞིས་དྲང་བའི་འོད་གསལ་རྒྱུད་ལ་སྐྱེ་བའོ། །དེ་ཡང་སྟོང་པ་བཞི་ནི། དང་པོ་རྣམ་ཤེས་སྣང་བ་ལ་ཐིམ་པའི་སྐབས་སུ་ཞེ་སྡང་གི་རྟོག་པ་སོགས་གསུམ་འགག །ཕྱི་རྟགས་སུ་སྟོན་གནམ་ཟླ་འོད་ཀྱིས་བསླད་པ་ལྟར་དཀར་ལམ་ལམ་པའི་སྣང་བ་དང་ནང་རྟགས་སུ་གསལ་བའི་ཉམས་མཐའ་དབུས་མེད་པར་འཆར་ཏེ་སྟོང་པ་ཞེས་བྱ། དེ་ནས་སྣང་བ་མཆེད་པ་ལ་ཐིམ་པས་འདོད་ཆགས་ཀྱི་རྟོག་པ་བཞི་བཅུ་འགག །ཕྱི་རྟགས་སུ་སྟོན་གནམ་ཉི་འོད་ཀྱིས་བསླད་པ་ལྟ་བུའི་དམར་ལམ་པ་དང༌། །ནང་རྟགས་སུ་བདེ་བ་མུ་མཐའ་མེད་པར་འཆར་ཏེ་སྟོང་པ་ཆེན་པོ་ཞེས་བྱ། །དེ་ནས་མཆེད་པ་ཉེར་ཐོབ་ལ་ཐིམ་པས་གཏི་མུག་གི་རྟོག་པ་བདུན་འགག་ཕྱི་རྟགས་སུ་སྟོན་གནམ་སྨག་གིས་བསླད་པ་ལྟ་བུའི་ནག་ལམ་པ་དང་ནང་རྟགས་སུ་རྣམ་པར་མི་རྟོག་པའི་ཉམས་མཐའ་དབུས་མེད་པར་འཆར་ཏེ་ཤིན་ཏུ་སྟོང་པ་ཞེས་བྱ། །དེ་ནས་ཉེར་ཐོབ་འོད་གསལ་ལ་ཐིམ་པ་ཞེས་ཟེར་ཡང༌། དོན་དུ་སྔར་ཉེར་ཐོབ་ཀྱི་སྐབས་ཀྱི་མི་རྟོག་པ་དེ་ཉིད་ཅུང་ཟད་སངས་ནས་རང་བཞིན་གཞིར་གནས་ཀྱི་འོད་གསལ་དོན་དམ་ལྷན་ཅིག་སྐྱེས་པའི་ཡེ་ཤེས་པ་ཅེས་མིན་དུ་ཤར་བ་ནི་སྟོན་གྱི་དུས་སུ་ཐོ་རངས་ཀྱི་ནམ་མཁའ་བསླད་བྱེད་ཀྱི་སྐྱོན་གསུམ།
རང་བྲལ་བ་ལྟ་བུ་སྟེ་ཐམས་ཅད་སྟོང་པའི་འོད་གསལ་ཞེས་བྱའོ། །དེ་དག་གི་སྐབས་སུ་བཤད་པའི་ཞེ་སྡང་གི་རྟོག་པ་སོ་གསུམ་ནི། འདོད་ཆགས་དང་བྲལ་བ་དང༌། འདོད་ཆགས་དང་བྲལ་བ་བར་མ་དང༌། ཤིན་ཏུ་འདོད་ཆགས་དང་བྲལ་བ་དང༌། གང་ཡིད་ཀྱི་འོང་དག་དང༌། ཡིད་ཀྱིས་འགྲོ་བ་དང༌། སོང་བ་དང༌། མྱ་ངན་དང༌། མྱ་ངན་བར་མ་དང༌། ཤིན་ཏུ་མྱ་ངན་དང༌། ཞི་བ་དང༌། རྣམ་པར་རྟོག་པ་དང༌། འཇིགས་པ་དང༌། འཇིགས་པ་བར་མ་དང༌། ཤིན་ཏུ་འཇིགས་པ་དང༌། སྲིད་པ་དང༌། སྲེད་པ་བར་མ་དང༌། ཤིན་ཏུ་སྲེད་པ་དང༌། ཉེ་བར་ལེན་པ་དང༌། མི་དགེ་བ་དང༌། བཀྲེས་སྐོམ་པ་དང༌། ཚོར་བ་དང༌། ཚོར་བ་བར་མ་དང༌། ཤིན་ཏུ་ཚོར་བ་དང༌། རིག་པ་དང༌། རིག་པ་འཛིན་པའི་གཞི་དང༌། སོ་སོར་རྟོག་པ་དང༌། ངོ་ཚ་ཤེས་པ་དང༌། སྙིང་རྗེ་བ་དང༌། བརྩེ་བ་དང༌། བརྩེ་བ་བར་མ་དང༌། ཤིན་ཏུ་བརྩེ་བ་དང༌། དོགས་པ་དང་བཅས་པ་དང༌། སྡུད་པ་དང༌། སེར་སྣ་རྣམས་སོ། །འདོད་ཆགས་ཀྱི་རྟོག་པ་བཞི་བཅུ་ནི། འདོད་ཆགས་པ་དང༌། ཆགས་པ་དང༌། དགའ་བ་དང༌། དགའ་བ་བར་མ་དང༌། ཤིན་ཏུ་དགའ་བ་དང༌། རངས་པ་དང༌། རབ་ཏུ་མགུ་བ་དང༌། དོན་མཚར་བ་དང༌། དགོད་པ་དང༌། ཚིམ་པ་དང༌། འཁྱུད་པ་དང༌། འོ་བྱེད་པ་དང༌། འཇིབ་པ་དང༌། བརྟན་པ་དང༌། བརྩོན་པ་དང༌། ཁེངས་པ་དང༌། བྱེད་པ་དང༌། འཕྲོག་པ་དང༌། སྟོབས་དང༌།
སྤྲོ་བ་དང༌། ཚོམ་ཚོམ་མེད་པ་དང༌། ཚོམ་ཚོམ་མེད་པ་བར་མ་དང༌། ཤིན་ཏུ་ཚོམ་ཚོམ་མེད་པ་དང༌། དྲེགས་པ་དང༌། རྣམ་པར་སྒེག་པ་དང༌། འགྲས་པ་དང༌། དགེ་བ་དང༌། ཚིག་གསལ་བ་དང༌། བདེན་པ་དང༌། མི་བདེན་པ་དང༌། ངེས་པ་དང༌། ཉེ་བར་ལེན་པ་དང༌། སྦྱིན་པ་པོ་ཉིད་དང༌། བརྟུལ་བ་དང༌། དཔའ་བ་དང༌། ངོ་ཚ་མེད་པ་དང༌། གཡོ་ཅན་དང༌། གདུག་པ་ཅན་དང༌། མི་སྲུན་པ་དང༌། གྱ་གྱུ་ཆེ་བ་རྣམས་སོ། །གཏི་མུག་གི་རྟོག་པ་བདུན་ནི། འདོད་ཆགས་བར་མ་དང༌། བརྗེད་ངེས་དང༌། འཁྲུལ་པ་དང༌། མི་སྨྲ་བ་དང༌། སྐྱོ་བ་དང༌། ལེ་ལོ་དང༌། ཐེ་ཚོམ་རྣམས་སོ། །དེ་ལྟ་བུའི་སྣང་གསུམ་མམ། ཡང་ན་དགའ་བ་བཞིས་དྲངས་པའི་འོད་གསལ་གང་ཡིན་ཀྱང་འདྲ་སྟེ་དེ་ལ་འོད་གསལ་ཙམ་དུ་འདྲ་ཡང༌། དེའང་དཔེ་དོན་གྱི་འོད་གསལ་དུ་མ་དང༌། དཔེའི་འོད་གསལ་ལ་ཡང་མཆོག་དམན་གྱི་རིམ་པ་དུ་མ་ཡོད་ཀྱང༌། དེས་ན་མཐོང་ལམ་མ་སྐྱེས་ཚུན་ཆད་དུ་དཔེའི་འོད་གསལ་ཡིན་ལ། མཐོང་ལམ་གྱི་བདེན་པ་མཐོང་བ་ནི་དོན་གྱི་འོད་གསལ་ཡིན་ཏེ། དེ་ཡན་ཆད་དོན་གྱི་འོད་གསལ་ལ་འགྱུར་བ་མེད་དོ། །འཆི་དུས་ཀྱི་ཐིམ་རིམ་རྫོགས་པའི་མཐའ་དང་གཉིད་དུས་སོགས་སུ་འོད་གསལ་ཤར་བ་ནི་གཞིའི་འོད་གསལ་ཡིན་ལ། རྣལ་འབྱོར་པས་ལམ་གོམས་པའི་སྟོབས་ཀྱིས་དེ་ཉིད་ངོ་ཤེས་པར་བྱས་ནས་དཔེ་དོན་གྱི་འོད་གསལ་གང་
རུང་ལ་སྦྱར་རོ། །ལྔ་པ་ལམ་གྱི་སུན་མ་བར་དོ་ནི། རབ་འབྱུང་འཁྲུགས་འཆི་ཀའི་བར་དོ་ལ་སྣང་གསུམ་གྱིས་དྲངས་པའི་གཞིའི་འོད་གསལ་འཆར་བའི་ཚེ་སྔར་འདྲིས་ཀྱི་གདིང་ལ་བརྟེན་ནས་ངོས་བཟུང་སྟེ་འོད་གསལ་ཆོས་སྐུའི་ངང་དུ་གྲོལ་ལོ། །འབྲིང་སྣང་མུན་སྲིད་པའི་བར་དོར་སྒྱུ་ལུས་ལ་བརྟེན་ནས་སྒྱུ་མ་ལྟ་བུའི་ལྷ་སྐུར་ལྡང༌། ཐ་མ་སྲེད་ལེན་སྐྱེ་གནས་ཀྱི་བར་དོར་མངལ་སྒོ་བཟང་པོ་འདམ་པ་དང༌། མངལ་སྒོ་ངན་པ་འགེགས་པ་དང༌། དག་པའི་ཞིང་ཁམས་སུ་འཕེན་པ་གཏོད་པ་སོགས་ཀྱིས་གསང་སྔགས་ཀྱི་ཆོས་ལ་སྤྱོད་པའི་སྣོད་རུང་དུ་སྐྱེས་ནས་ལམ་གྱི་འཕྲོ་མཐུད་པའོ། །དྲུག་པ་ལམ་གྱི་བློ་ཆོད་འཕོ་བ་ནི། གང་ཟག་རབ་ཚེ་འདིར་ལྟ་བ་རྟོགས་པ་དང༌། གྲུབ་མཐའ་སྙོགས་པ་ཡིན་ན་འཕོ་བ་མི་དགོས་ཀྱང༌། ཇི་སྐད་དུ། ལམ་སྦྱང་པ་དམན་ན་འཕོ་བས་བསུ། །ཞེས་གསུངས་པ་ལྟར་ལམ་གྱི་སྦྱང་བགྲོད་དམན་བ་དག་གིས་འཆི་ལྟས་བརྟགས་པས་འཆི་བར་ངེས་ཤིང་མི་བསྐུ་བར་ཤེས་ནས། ཐིམ་རིམ་མ་བྱུང་གོང་དུ་སྔར་བཤད་པའི་འོད་ཀྱི་གོང་བུའི་འཕོ་བ་དང༌། སྐུ་ཡི་འཕོ་བ་སོགས་ཀྱིས་རྣམ་ཤེས་དག་པའི་ཞིང་དུ་འཕོ་བའོ། །དམ་ཚིག་གི་སྐབས་སུ་ཁྱད་པར་རིགས་ལྔའི་སྡོམ་པ་ལ། རྡོ་རྗེའི་རིགས་ལ་སྲོག་གཅོད་པ་ནི། ཕྱི་ལྟར་ན་ཞིང་བཅུ་ཚངས་པའི་དགྲ་བོ་དྲག་པོ་མངོན་སྤྱོད་ཀྱི་ལས་ཀྱིས་སྒྲོལ་བ་སྟེ་ཞིང་བཅུ་ནི་་
དཀོན་མཆོག་སློབ་དཔོན་སྐུ་དགྲ་གཉིས། །དམ་ཉམས་ལོག་པར་འཁུ་བ་དང༌། །དམ་དགྲ་ངན་པའི་ངང་ཚུལ་ཅན། །འདུ་བར་འོང་དང་ཡོངས་ལ་གནོད། །ངན་སོང་གསུམ་དང་བཅུ་པོ་ནི། །རྣལ་འབྱོར་ཀུན་གྱིས་དང་དུ་བླང༌། ཞེས་སོ། །ནང་ལྟར་གཟུང་འཛིན་ལས་རླུང་གི་སྲོག་དབུ་མ་སྒྲ་གཅན་གྱི་སྤུབས་སུ་གཅོད་པའོ། །གསང་བ་ལྟར་ན་རྣམ་རྟོག་གི་སྲོག་སྐྱེ་མེད་དུ་གཅོད་པའོ། །རིན་ཆེན་རིག་ལ་མ་བྱིན་ལེན་དུ་གསུངས་པ་ནི། ཕྱི་ལྟར་ན་སྦྱིན་གཏོང་སོགས་བསོད་ནམས་ཀྱི་ཆོ་གས་བསགས་པའི་སྐལ་བ་མེད་པའི་སེར་སྣ་ཅན་གྱི་ནོར་དང༌། གཞན་གསང་སྔགས་ཀྱི་དམ་རྫས་ཁྱད་པར་ཅན་སྐལ་པ་མེད་པར་འཁྱམས་པ་རྣམས་འཕྲོག་པ་དང༌། ནང་ལྟར་ན་མཚན་ལྡན་གྱི་གཟུངས་མ་ཐབས་ཀྱིས་དབང་དུ་བྱ་བ་དང༌། །དེའི་ཁམས་དམར་ཆ་རླུང་གི་སྟོབས་ཀྱིས་མ་བྱིན་པར་ལེན་པ་དང༌། གསང་བ་ལྟར་ན་ཆོས་ཉིད་སྟོང་པ་ཉིད་ཀྱི་དོན་གཞན་གྱིས་མ་བྱིན་པར་རང་གི་སྟོབས་ཀྱིས་ལེན་པའོ། །པདྨའི་རིགས་ལ་བུད་མེད་བསྟེན་པར་གསུངས་པ་ནི། ཕྱི་ལྟར་ན་དངོས་རིག་ལས་ཀྱི་ཕྱག་རྒྱ་དང་སྙོམས་པར་འཇུག་པ་དང༌། ནང་ལྟར་ན་ཡིད་རིག་ཆོས་ཀྱི་ཕྱག་རྒྱ་དང༌། གཏུམ་མོ་དམ་ཚིག་གི་ཕྱག་རྒྱ་སྒོམ་པ་དང༌། གསང་བ་ལྟར་ན་སྟོང་ཉིད་ཕྱག་རྒྱ་ཆེན་པོའི་དོན་སྒོམ་པའོ། །ལས་ཀྱི་རིགས་ལ་བརྫུན་དུ་སྨྲ་བར་གསུངས་པ་ནི། ཕྱི་ལྟར་ན་བླ་
མའི་ནོར་རྫས་དང༌། སེམས་ཅན་ཀྱི་སྲོག་རང་གི་དམ་ཚིག་སྲུང་བའི་ཕྱིར་བརྫུན་དུ་སྨྲ་བ་དང༌། ནང་ལྟར་ན་སྲོག་རླུང་སྙིང་གར་ཐིམ་པས་རང་ངོར་ཆོས་ཀྱི་རྣམ་གྲངས་གྲངས་མེད་པར་འཆར་བ་དང༌། །གསང་བ་ལྟར་ན་མེད་སྣང་འཁོར་བ་ལས་སྒྲོལ་བའི་རྫུན་ཚིག་སྨྲ་བའོ། །འཁོར་ལོའི་རིགས་ལ་ཤ་ཆེན་ལྔ་དང་ཆང་བསྟེན་པར་གསུངས་པ་ནི། ཕྱི་ལྟར་དམ་ཚིག་གི་རྫས་སུ་འོས་པ་དང༌། ཁམས་བྱང་ཆུབ་སེམས་འཕེལ་བའི་ཕྱིར་མི་ཤ་ཁྱི་ཤ་རྟ་ཤ་བ་གླང་གི་ཤ་གླང་པོ་ཆེའི་ཤ་སྟེ་ཁ་ཟས་ཀྱི་དོན་དུ་བསད་པར་མ་གྱུར་བའི་ཤ་ལྔ་བསྟེན་པ་དང༌། དེ་བཞིན་དུ་བདུད་རྩི་ལྔ་དང་ཆང་བསྟེན་པའོ། །ནང་ལྟར་ན་དབང་པོ་ལྔའི་དྭངས་མ་འཆིང་བ་དང༌། །རྣམ་པར་རྟོག་པ་ཐམས་ཅད་མི་རྟོག་པའི་ངང་དུ་བཟའ་བ་དང་ཡེ་ཤེས་ཡས་བབས་ཀྱི་བདུད་རྩིའི་ཞུ་བདེ་སྒོམ་པ་རྣམས་སོ། །གསང་བ་ལྟར་ན་སྣང་སེམས་ཐམས་ཅད་ཆོས་ཉིད་མཉམ་པ་ཆེན་པོར་བླང་དོར་དང་རྩོལ་སྒྲུབ་མེད་པའི་ངང་དུ་དག་པར་བྱེད་པའོ། །མི་སྤངས་པའི་དམ་ཚིག་གི་སྐབས་སུ་དངོས་བསྟན་ལྟར་ན། རང་བཞིན་ཤེས་ན་སྤང་བྱའི་གཞི་མ་གྲུབ་པས་མི་སྤངས་པ་སྨིག་སྒྱུ་ལ་ཆུ་རགས་མི་དགོས་པ་ལྟ་བུ་དང༌། ཐབས་ཀྱི་ཟིན་ན་གྲོལ་བའི་ལམ་ཡིན་པས་མི་སྤངས་པ་རྣ་བར་ཆུ་ཞུགས་པ་ཆུས་འགུགས་པ་ལྟ་བུ་དང༌། དོན་དམ་པར་རིགས་ལྔ་ཡེ་ཤེས་ལྔའི་རང་བཞིན་ཡིན་པས་མི་སྤངས་པ་སྣུམ་འདོད་པས་ཏིལ་འབྲུ་སྒྲུབ་པ་ལྟ་བུ་དང་གསུམ་ནི། གཞུང་
རྩ་བས་དངོས་བསྟན་ལྟར་ཡིན་ནོ། །མི་དོར་བ་ལྔ་ནི་བདུད་རྩི་ལྔའོ། །ཡན་ལག་གི་དམ་ཚིག་ཉིས་བརྒྱའི་དབྱེ་བ་ནི། །མི་སྤངས་པ་ལྔ་དང་མི་འདོར་བ་ལྔ་ཚན་རེ་ལ། ཐབས་ཀྱིས་ཟིན་པའི་ཆ་དང་ཤེས་རབ་དང་མ་བྲལ་བའི་ཆ་གཉིས་རེ་དབྱེ་བས་བཅུ། བཅུ་པོ་དེ་ལ་སྐུ་གསུང་ཐུགས་ཡོན་ཏན་ཕྲིན་ལས་ལྔས་དབྱེ་བས་ལྔ་བཅུ་རེ་སྟེ་བརྒྱའོ། །དེ་རེ་རེ་ལའང་ཤེས་རབ་ཐབས་སུ་ལྡན་པ་དང༌། ཐབས་ཉིད་ཤེས་རབ་དང་ལྡན་པའི་ཆས་དབྱེ་བས་ཉིས་བརྒྱའོ། །སྒྱུ་འཕྲུལ་ལས་བཤད་པའི་རྩ་བའི་དམ་ཚིག་ལྔ་ནི། །བླ་མེད་མི་སྤང་བླ་མ་བཀུར། །སྔགས་དང་ཕྱག་རྒྱ་རྒྱུན་མི་བཅད། །ཡང་དག་ལམ་དུ་ཞུགས་ལ་བྱམས། །གསང་བའི་དོན་ཕྱིར་སྨྲ་མི་བྱ། །ཞེས་པ་ལྟར་ལྔའོ། །གསང་བཅུ་མི་སྨྲ་བའི་སྐབས་སུ། སྤྱིར་གསང་བཞི་ནི། །ལྟ་ཟབ་སྤྱོད་པ་བརླབ་པོ་དང༌། ལྷའི་མིང་གཟུངས་དང་གྲུབ་རྟགས་རྣམས། སྤྱིར་གསང་རྣམ་པ་བཞི་ཡིན་ནོ། །ཞེས་དང༌། བར་གསང་བཞི་ནི། །སྒྲུབ་པའི་གནས་དུས་གྲོགས་དང་རྫས། །བར་དུ་གསང་ལ་བསྒྲུབ་པར་བྱ། །ཞེས་པ་ལྟར་བརྒྱད་དང༌། གསང་བར་འོས་པ་དང༌། གཉེར་གཏད་པ་གཉིས་དང་བཅུའོ། །ཡན་ལག་དམ་ཚིག་ཉེར་ལྔའི་སྐབས་སུ། སྤྱད་བྱ་ལྔ་ནི་ཕྱི་ནང་གི་བཤད་པ་བྱེད་ཚུལ་རིགས་ལྔའི་དམ་ཚིག་གི་སྐབས་བཤད་པ་ལྟར་ཡིན། མི་སྤོང་
བའི་སྐབས་སུ། སྦས་དོན་ཡང་དག་པའི་དུག་ལྔ་ནི། འཁོར་འདས་མཉམ་པ་ཉིད་དུ་རྟོགས་ནས་ལྟ་བ་ལ་ཕྱོགས་རིས་དང་སྤྱོད་པ་ལ་བླང་དོར་གྱིས་འབྱེད་པ་མེད་པ་གཏི་མུག །དེ་ལྟར་མ་རྟོགས་པའི་སེམས་ཅན་ཐམས་ཅད་ལ་ཐུགས་རྗེས་ཆགས་པ་འདོད་ཆགས། ལོག་པར་རྟོག་པ་རྣམས་སྒྲོལ་བ་ཞེ་སྡང༌། མཉམ་ཉིད་རྟོགས་པའི་ལྟ་བ་གཤོངས་སུ་མི་འབེབས་པ་ང་རྒྱལ། གཉིས་འཛིན་གྱི་ལྟ་སྤྱོད་ཆོས་ཉིད་ཀྱི་ཀློང་དུ་མི་ཤོང་བ་ཕྲག་དོག་གོ། དང་དུ་བླང་བའི་དམ་ཚིག་ལྔ་ནི། བདུད་རྩི་ལྔ་ཡེ་ནས་རྣམ་པར་དག་པ་གཙང་སྨེའི་རྟོག་པ་མེད་པའི་ཕྱིར་དང་དུ་བླང་པའོ། །དེ་ལ་ཡིན་པ་གསུམ་དང་གྲུབ་པ་བཞི་དང་ལྡན་པའི་ཕྱིར་དང་དུ་བླང་སྟེ། གྲུབ་པ་བཞི་ནི། ཆོས་ཉིད་ངོ་བོས་གྲུབ་པ། ཆོས་ཅན་རང་བཞིན་གྱིས་གྲུབ་པ། ནུས་པའི་མཐུས་གྲུབ་པ། བྱིན་གྱིས་བརླབས་པས་གྲུབ་པ་དང་བཞིའོ། །ཡིན་པ་གསུམ་ནི། ནད་ལྔ་སེལ་བའི་སྨན་ཡིན་པ། ཐུན་མོང་གི་དངོས་གྲུབ་ལྔ་སྒྲུབ་པའི་རྫས་ཡིན་པ། རིགས་ལྔ་ཡེ་ཤེས་ལྔའི་རང་བཞིན་ཡིན་པ་ལས། ནད་ལྔ་སེལ་བ་ནི། དྲི་ཆེན་གྱིས་དུག་ནད་སེལ། །དྲི་ཆུས་གག་པ། མཱཾ་སས་མཛེ། རྐྟས་གྲང་བ། བྱང་སེམས་དཀར་པོས་ཚ་བའི་ནད་སེལ་བའོ། །ཐུན་མོང་གི་དངོས་གྲུབ་ལྔ་སྒྲུབ་པ་ནི། དྲི་ཆེན་གྱིས་མཐུ་ཆེ། དྲི་ཆུས་སྐད་སྙན། མཱཾ་སས་ཚེ་རིང༌། རྐྟས་བཀྲག་
མདངས་གསལ། བྱང་སེམས་དཀར་པོས་མི་བརྗེད་པའི་གཟུངས་ཐོབ་པའོ། །རིགས་ལྔ་ཡེ་ཤེས་ལྔའི་རང་བཞིན་ཡིན་པ་ནི། དྲི་ཆེན་བུདྡྷའི་རིགས་ཆོས་ཀྱི་དབྱིངས་ཀྱི་ཡེ་ཤེས། །དྲི་ཆུ་ལས་རིགས་བྱ་གྲུབ། །མཱཾ་ས་རིན་པོ་ཆེའི་རིགས་མཉམ་ཉིད། །རྐྟ་པདྨའི་རིགས་སོར་རྟོགས། བྱང་སེམས་དཀར་པོ་རྡོ་རྗེའི་རིགས་མེ་ལོང་ཡེ་ཤེས་སོ། །དེ་ཡན་ཆད་བཅོ་ལྔ་ནི་སྤྱད་བྱ་སྤྱོད་པའི་དམ་ཚིག་བཅོ་ལྔའོ། །ཤེས་བྱ་ལྟ་བའི་དམ་ཚིག་ལྔ་ནི། །ཕུང་པོ་འབྱུང་ཡུལ་དབང་པོ་ཁ་དོག་ལྷར། །ཤེས་བྱ་ལྔ་ནི་ཤེས་རབ་སྟོབས་ཀྱིས་སྤྱོད། །ཅེས་པའི་སྐབས་སུ་གཟུགས་ཕུང་རྣམ་སྣང༌། །རྣམ་ཤེས་རྡོར་སེམས། ཚོར་བ་རིན་འབྱུང༌། འདུ་ཤེས་སྣང་མཐའ། འདུ་བྱེད་དོན་གྲུབ་སྟེ་རྒྱལ་བ་རིགས་ལྔ། ས་ཁམས་སངས་རྒྱས་སྤྱན། ཆུ་ཁམས་མཱ་མ་ཀཱི། མེ་གོས་དཀར་མོ། །རླུང་དམ་ཚིག་སྒྲོལ་མ། ནམ་མཁའ་དབྱིངས་ཕྱུག་མ་སྟེ། ཁམས་ལྔ་ཡུམ་ལྔ། ཡུལ་ལྔ་ནི། མཆོད་པའི་ལྷ་མོ་ལྔ། དབང་པོ་ལྔ་སེམས་དཔའ་ལྔ། ཁ་དོག་ལྔའི་དཀར་པོ་ཐམས་ཅད་མེ་ལོང་ཡེ་ཤེས། སེར་པོ་ཐམས་ཅད་མཉམ་ཉིད་ཡེ་ཤེས། དམར་པོ་ཐམས་ཅད་སོར་རྟོག །ལྗང་གུ་ཐམས་ཅད་བྱ་གྲུབ། མཐིང་ག་ཐམས་ཅད་ཆོས་དབྱིངས་ཡེ་ཤེས་ཀྱི་རང་གདངས་སུ་ཤེས་པར་བྱའོ། །གྲུབ་པ་བརྒྱད་ནི། མཁའ་སྤྱོད་
རལ་གྲི་རིལ་བུ་དང༌། རྐང་མགྱོགས་བུམ་པ་གནོད་སྦྱིན་ཁོལ། །བཅུད་ཀྱིས་ལེན་དང་མིག་སྨེན་དང༌། །ཞེས་སོ། །དབང་ཕྱུག་བརྒྱད་ནི། །ཕྲ་ཞིང་ཡང་ལ་ཕྲ་བར་ནུས་པ་དང༌། །སྤྱོད་པར་ནུས་དང་བདག་ཉིད་ཆེན་པོ་དང༌། །དགའ་མགུ་བྱེད་དང་ཐམས་ཅད་དབང་དུ་འགྱུར། །ཅི་འདོད་བྱེད་དང་དབང་ཕྱུག་རྣམ་བརྒྱད་དོ། །ཞེས་སོ། །ཁ་སྦྱོར་ཡན་ལག་བདུན་ནི། སློབ་དཔོན་ངག་གི་དབང་ཕྱུག་གྲགས་པའི་ཞལ་སྔ་ནས། །ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་གང་རྒྱུན་མི་ཆད་དང་འགོག་པ་མེད། །ཅེས་སོ། །རིག་འཛིན་བཞི་ནི་སེམས་ཉིད་ལྷའི་སྐུར་སྨིན་ཡང༌། །རྣམ་སྨིན་ལུས་རྒྱ་ལས་མགྲོལ་བ་རྣམ་སྨིན་རིག་འཛིན། །སྐྱེ་འཆི་མེད་པ་ཚེ་དབང་རིག་འཛིན། །ཕྱག་རྒྱ་ཆེན་པོའི་ལྷའི་སྐུར་གྱུར་པ་ཕྱག་ཆེན་རིག་འཛིན། །དྲུག་པ་རྡོ་རྗེ་འཆང་གི་རྒྱལ་ཚབ་མཛད་པ་ལྷུན་གྲུབ་རིག་འཛིན་ནོ། །རྫོགས་ཆེན་གྱི་སྐབས་སུ། །ཀུན་ཏུ་བཟང་པོའི་ཁྱད་ཆོས་དྲུག་ནི། །གཞི་ལས་འཕགས་པ། རང་ངོར་སྣང་བ། བྱེ་བྲག་ཕྱེད་པ། ཕྱེད་ཐོག་ཏུ་གྲོལ་བ། གཞན་ལས་མ་བྱུང་བ། །རང་སར་གནས་པའོ། །ཡིད་དྲུག་ནི། །མ་རིག་པ་དང་མཚུངས་པར་ལྡན་པའི་ཡིད་དང༌། ཡིད་ཀྱི་རྣམ་པར་ཤེས་པའི་ཡིད་དང༌། གཏན་ལ་འབེབས་
པའི་ཡིད་དང༌། །ཀུན་ཏུ་ཚོལ་བའི་ཡིད་དང༌། །རྣམ་པར་རེག་པའི་ཡིད་དང༌། ངེས་པར་འཇོག་པའི་ཡིད་དོ། །འདུལ་བ་བཞི་ནི། །སྐུ་བསོད་ནམས་ཆེན་པོས་འདུལ་བ། གསུང་ཐེག་པ་སྣ་ཚོགས་པས་འདུལ་བ། །ཐུགས་མངོན་པར་ཤེས་པས་འདུལ་བ། །ཕྲིན་ལས་བསམ་གྱིས་མི་ཁྱབ་པས་འདུལ་བས་འཁོར་བ་མ་སྟོངས་ཀྱི་བར་དུ་དོན་གཉིས་ལྷུན་གྱིས་གྲུབ་པའོ། །འདིར་སྨྲས་པ། །གང་ཞིག་ལེགས་བཤད་བདུད་རྩི་དངར་པོའི་སྐྱེས། །དོན་གཉེར་སྙིམས་པས་འཐུང་བའི་སྐལ་བཟང་གི །ཐོས་བསམ་སྒོམ་པའི་ཡི་ག་ཕྱེ་སྲིད་ན། །ཕུལ་བྱུང་གཏམ་འདི་རོ་བརྒྱའི་བཅུད་དུ་དངར། །ཐོས་པའི་མཐའ་རྒྱ་གཅོད་པའི་བློ་གསལ་དང༌། །བསམ་པའི་དོན་བཅུད་མྱོང་བའི་སྙིང་སྟོབས་དཔལ། །གུས་དང་རྟག་པའི་བརྩོན་འགྲུས་མི་དམན་པའི། །རྣམ་དཔྱོད་ལྡན་པའི་ཡུལ་ལ་དཔྱིད་དཔལ་བཞིན། །བློ་གྲོས་གཡེང་བའི་ཁོལ་དུ་རྒྱུག་དགའ་བའི། །རྣམ་རིག་ཡལ་གའི་རི་དྭགས་བཞིན་རྩེན་ལ། །དོན་བཟང་རི་མོ་བཀྲ་བའི་ཟ་འོག་བཀྲག །བཀྲམ་པའི་ལྟས་མོ་ངོམ་དུ་སུ་ཞིག་སྤྲོ། །དོན་གཉེར་དུལ་བའི་ངང་ཚུལ་ལས་རིངས་པའི། །སེམས་རྟ་ན་ཚོད་གསར་བའི་ཙབ་ཙུབ་ལ། །ཐོས་བསམ་ཁལ་ཆེན་འགེལ་བའི་ཤོ་མར་འདི། །
འབྲས་མེད་ངལ་ཁུར་རང་གིས་ལེན་པར་ཟད། །མཚན་དཔེའི་བྱད་ལས་ལེགས་འཕོས་རི་མོའི་ལྷ། །རེ་ཆེན་རྒྱལ་བར་རེ་བའི་གདུང་ཡུས་ཀྱིས། །ལེགས་བཤད་ངག་གི་མཎྜལ་ཕུལ་ཕུལ་ཡང༌། །ཐུགས་བརྩེས་བདག་གིར་བཞེས་སམ་སུ་ཡིས་ཤེས། །རང་དོན་སྙིང་པོའི་སྒྲུབ་པ་བློས་བཏང་ནས། །དོན་མེད་འཆད་དང་རྩོམ་པའི་གཟུགས་བརྙན་གྱི། །རྣམ་གཡེང་སྙིང་པོར་རེ་བའི་ཅོལ་ཆུང་འདི། །ཤེས་མེད་ཤྲཱི་ཧྲལ་པོའི་རང་གཤིས་ལགས། །ཆོས་དོན་ཟབ་པར་བཤད་ཀྱང་ངག་གི་ཁུར། །སྣ་ཚོགས་ཡི་གེར་བྲིས་ཀྱང་ཤོག་བུའི་གྲོན། །བདག་དང་བདག་འདྲ་བྱིས་པའི་བྱེད་སྤྱོད་འདི། །རང་དང་གཞན་བཅས་སུ་ཡི་དོན་དུ་འགྱུར། །ད་ནི་མི་ཚེའི་ལྷག་མ་ཅུང་ཟད་འདི། །དབེན་པའི་རི་ཁྲོད་མི་མེད་ལུང་སྟོང་དུ། །རྣམ་གཡེངས་སྤངས་པའི་རྩེ་གཅིག་ཉམས་ལེན་གྱིས། །ཚེ་འདིར་སྙིང་པོའི་དོན་ལ་འདྲིལ་བར་ཤོག །ཐུགས་རྗེས་གཟིགས་ཤིག་དྲིན་ཆེན་བླ་མ་རྗེ། །བྱིན་གྱིས་རློབས་ཤིག་ཡི་དམ་སྤྱན་རས་གཟིགས། །ལས་ངན་བདག་གི་བློ་སྣ་ལ་འུར་བསྟུང༌། །གོང་མའི་རྗེས་སུ་སྙེགས་པར་བྱིན་གྱིས་རློབས། །རྒྱལ་བ་ཀུན་ལས་རྒྱལ་བའི་མཛད་པ་ཅན། །སངས་རྒྱས་ཀུན་ལས་བཀའ་དྲིན་ཆེས་ལྷག་པ། །མགོན་མེད་བདག་གི་མགོན་གཅིག་རིན་པོ་ཆེ། །ཡང་
དང་ཡང་དུ་ཐུགས་རྗེའི་སྤྱན་གྱིས་གཟིགས། །ཡོན་ཏན་རིན་པོ་ཆེའི་མཛོད་འཆད་པའི་དཀའ་གནས་ཁ་ཤས་བརྗེད་ཐོར་བྱས་པའི་ཟིན་བྲིས་འདི་ཉིད་གྲུབ་དབང་བླ་མ་དམ་པའི་སྐུ་གསུང་ཐུགས་གྱི་སྲས་མཆོག་བདེ་ཆེན་རིག་པའི་རལ་གྲི་དཔོན་སློབ་ཀྱི་ཐུགས་གསོས་སུ་མདོ་མེད་དཔལ་དགེ་ཧྲལ་པོས་བློ་ཐོག་ནས་བྲིས་པའོ།། །།དགེའོ། །དགེའོ། །དགེའོ།། །།