ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྙེན་མཚམས།
བླ་མ་ལ་ཕྱག་འཚལ་ལོ། །ཟབ་ཆོས་ཞི་ཁྲོ་དགོངས་པ་རང་གྲོལ་གྱི་བསྙེན་མཚམས་བྱེད་པ་ལ། སྤྱིར་ཞི་བར་བསྙེན་ཅིང་ཁྲོ་བོར་སྒྲུབ་པ་ཡོངས་ལ་གྲགས་ཆེ་ཞིང༌། དོང་སྤྲུགས་དང་སྒྱུ་འཕྲུལ་སོགས་བསྙེན་པ་ཡང་དེ་ལྟར་བྱེད་པ་བརྒྱུད་པ་གོང་མའི་ཕྱག་བཞེས་ལ་ཡོད་འདུག་པ་ལྟར་འདིར་ཡང་ཞི་ཁྲོ་ཐ་དད་དུ་བསྙེན་པ་དོན་ལ་གནས་རྒྱུ་ཡིན་འདུག་རུང༌། ལས་བྱང་ཆེ་ཆུང་དང་ད་ལྟ་རང་རེའི་ཚོགས་འདོན་གྱི་ཕྱག་ལེན་བཞིན། ཞི་ཁྲོ་ཟུང་འཇུག་ཏུ་བསྒྲུབ་ཀྱང་འགལ་བ་མེད་པར་མ་ཟད་ཡོ་ག་གོང་མའི་དགོངས་པ་དང་འབྱོར་ཆེ་བས་དེ་ལྟར་བསྙེན་པ་བྱེད་རྒྱུའི་གོ་དོན་ཅུང་ཟད་བཤད་ན། སྤྱིར་བསྙེན་བསྒྲུབ་སོགས་ཉམས་ལེན་གང་བྱེད་ཐུན་དུ་གཅོད་པ་ནི་དགེ་སྦྱོར་གནད་དུ་འགྲོ་བའི་ཐབས་ཁྱད་པར་ཅན་ཡིན་ཞིང༌། དེ་ཡང་ཐུན་བཞིར་བྱེད་པ་ཕྱག་ལེན་ལ་བདེ་བས་ཐོར་ཐུན་དང་སྔ་ཐུན། ཕྱི་ཐུན་དང་སྲོད་ཐུན་བཞི་ལས། ཐོ་རེང་གི་དུས་གཏི་མུག་གཉིད་སྐྲོག་ནས་སྔོན་འགྲོ་རང་རྒྱུད་སྦྱོང་བའི་སྐོར་རྒྱས་པར་གཏོང་ཞིང༌། སྔོན་གཏོར་གཉིས་ཡོད་དམ་མེད་ཀྱང་རུང་སྟེ་མཚམས་བཅོད་ནས་བཟུང་ལས་བྱང་ཆེ་ཆུང་གང་བྱེད་གཞུང་ལྟར་ལ། བསྐྱེད་རིམ་གྱི་སྐབས་ཚོགས་གྲལ་གྱི་འདོན་པ་ལྟར་ཧྲུག་འདོན་ཁོ་ན་བྱས་པ་གནད་དུ་མི་འགྲོ་བས། །མཆོད་པ་བྱིན་རླབས་ཚར་འཕྲལ། རང་སེམས་ཁོང་གློད་དེ་ཆགས་སྡང་རྨོང་གསུམ་ལ་སོགས་པའི་རྟོག་པའི་རྗེས་ཕྱིར་མི་འབྲང་བར་རང་གི་ཉམས་ལེན་གང་ཤེས་དེ་གའི་རང་དུ་ཡུན་རིང་ཙམ་མཉམ་པར་བཞག །འདི་སྐབས་རྣམ་
རྟོག་འོག་འགྱུའི་འགྲེལ་ཆོད་ངེས་ཤིག་མ་བྱས་ན་ཆོ་གའི་དངོས་གཞི་ཚངས་མ་འཁྲུལ་འབྱམས་ཀྱི་དབང་དུ་འགྲོ་བས་རིག་པ་ཧུར་བསྐྱེད། འཁྲུལ་རྟོག་ཟད་ཆོད་དུ་བཏང༌། སེམས་བཟོ་མེད་ཀྱི་ངང་དུ་མཉམ་པར་བཞག་པ་དེ་ཁོ་ན་ཉིད་ཀྱི་ཏིང་ངེ་འཛིན་ཡིན། དེའི་ངང་ལ་དེ་ལྟར་མ་རྟོགས་པའི་སེམས་ཅན་རྣམས་ལ་དམིགས་མེད་སྒྱུ་མ་ལྟ་བུའི་སྙིང་རྗེ་ཅུང་ཟད་ཅིག་བསྒོམ་པ་ཀུན་སྣང་གི་ཏིང་ངེ་འཛིན་ཡིན། རྟོག་མེད་ཀྱི་ངང་ལས་སྙིང་རྗེ་དེས་འཕེན་བྱེད་བྱས་ནས། རང་གི་སེམས་ཀྱི་ངོ་བོ་ཡི་གེ་ཨཱཿམཐིང་ག་གསལ་འཚེར་འོད་དུ་འབར་བ། རྟེན་མེད་པའི་ནམ་མཁའ་སྟོང་པའི་དབྱིངས་ན་ལིང་ངེར་གནས་པ་ལ་སེམས་བཟུང་བ་རྒྱུའི་ཏིང་ངེ་འཛིན་ཡིན། ཏིང་ངེ་འཛིན་རྣམ་པ་གསུམ་འདི་བསྐྱེད་རིམ་ཐམས་ཅད་ཀྱི་གཞི་མ་གནད་ཆེ་ཤོས་ཤིག་ཡིན་པས་འདོན་ཞོར་ལ་གཤར་སྒོམ་ཙམ་བྱས་པས་མི་འཐུས་པས་དང་པོའི་རིང་ཡུན་རིང་རེར་མཉམ་པར་བཞག་ནས་བསྒོམ་པ་གལ་ཆེའོ། །སྒོམ་ནུས་ན་ཡི་གེ་ཨའི་ཏིང་ངེ་འཛིན་འདི་ཁོ་ནས་ཀྱང་ཐུན་མོང་གི་གྲུབ་པ་བརྒྱད་སྒྲུབ་ནུས་པ་ཡིན་པས། ཕྲ་བ་ཡིག་འབྲུ་ལ་བསླབ་པ་འདི་གནད་ཆེའོ། །དེ་ལྟར་ཏིང་ངེ་འཛིན་གསུམ་པོ་འདིའི་དང་པོ་དེ་བཞིན་ཉིད་ཀྱི་ཏིང་ངེ་འཛིན་འཆི་བའི་བག་ཆགས་སྦྱོང་བྱེད་ཡིན། སངས་རྒྱས་ཆོས་སྐུའི་གོ་འཕང་ཐོབ་པའི་རྟེན་འབྲེལ་སྒྲིགས་པ་ཡིན། གཉིས་པ་ཀུན་སྣང་འདི་བར་དོའི་སྲིད་པ་སྦྱོང་བྱེད་ཡིན། ལོངས་སྐུའི་རྟེན་འབྲེལ་སྒྲིགས། གསུམ་པ་ཨའི་ཏིང་ངེ་འཛིན་འདི་སྐྱེ་བ་ལེན་པའི་སྲིད་པ་སྦྱོང་བྱེད་ཡིན། སྤྲུལ་སྐུའི་རྟེན་
འབྲེལ་སྒྲིགས་པ་ཡིན། བསྐྱེད་རིམ་དངོས་བཞི་བསྒོམ་སྐབས་ཀྱང༌། དེ་བཞིན་ཉིད་ཏིང་ངེ་འཛིན་ཉམས་ལེན་གྱི་ངང་དང་ཀུན་སྣང་སྙིང་རྗེའི་འཕེན་པ་གཉིས་པོ་མ་བྲལ་བའི་ངང་ནས་བསྐྱེད་རིམ་ལྷའི་གསལ་སྣང་ཅི་ཐོན་དགོས་རྒྱུ་ལས། དེ་ཏིང་ངང་ཀུན་སྣང་སྔ་སོར་བསྒོམ་ཙམ་བྱས་ནས་བསྐྱུར་བས་ནི་མི་ཆོག་གི་དེའི་རིང་ལ་གསལ་སྣང་མ་བྲལ་བ་དེ་གསལ་སྟོང་ཟུང་འཇུག་གམ་ཟབ་གསལ་དབྱེར་མེད་དམ། བསྐྱེད་རྫོགས་ཟུང་འཇུག་ཡིན། དེའི་སྙིང་རྗེའི་འཕེན་བྱེད་དང་མ་བྲལ་བ་དེ་ཐེག་ཆེན་གྱི་ལམ་གྱི་དངོས་གཞི་སྟོང་ཉིད་སྙིང་རྗེའི་སྙིང་པོ་ཅན་ཟེར་བ་དེ་ཡིན་པས་དེ་ཏིང་ཀུན་སྣང་གཉིས་པོ་འདི་ལས་གལ་ཆེ་བ་མེད་ངེས་ཡིན་པས་བརྗེད་མི་ཉན། དེ་ནས་རྟོག་བྲལ་བསྒོམ་མེད་དེ་བཞིན་ཉིད་སོགས་བསྐྱེད་རིམ་གསལ་འདེབས་ཀྱི་ཚིག་རྣམས་རིམ་པར་འདོན། སྐབས་སུ་དལ་བུས་འདོན་སྒོམ་སྒྲགས་ཤིང་གཙོ་བོར་སེམས་ཀྱི་དམིགས་པ་ལ་སེམས་གཏོད་པ་ལས། འདོན་ལྟ་སོགས་ལ་བསམ་བློ་མི་གཏོང་བར། བསྐྱེད་རིམ་གསལ་འདེབས་བརྗོད་པའི་ཚིག་གི་སྒོ་ཟེར་བ་དེ་ཡིན་པས། བྲེལ་འདོན་མི་བྱེད་པར་སེམས་ལྷོད་བབ་ནས་ཚིག་རེ་རེ་བཞིན་དམིགས་འདོན་ཡ་མ་བྲལ་བར་བྱ། སྐབས་སུ་ཡེངས་ཤོར་ན་ཡང་བསྐྱར་མགོ་ནས་བཟུང་ཕྱིར་ལོག་དགོས། དེ་ལྟར་བྱས་ན་ཕྱིན་ཆད་ཡེངས་མི་འཆོར་བ་ལའང་ཕན་ནོ། །ལྷ་བསྒོམ་དངོས་གཞི་ལས་བྱང་ཆེ་བ་ལྟར་ན་ཡི་གེ་སྤྲོས་ཏེ་བསྐྱེད་པ་འབྲུ་བསྐྱེད། ཆུང་བ་ལྟར་ན་ས་བོན་མེད་པ་ཐོལ་བསྐྱེད་དེ་གང་ལྟར་
ཡང་འདྲ་བར་འབྱུང་བ་བཞི་རིམ་བརྩེགས་དང་གཞལ་ཡས་ཁང་བསྐྱེད་པ། གཞུང་ལྟར་ལ། གདན་རྣམས་ཀྱང་གཞལ་ཡས་ཁང་དང་མཉམ་དུ་བསྐྱེད། དེ་འཕྲལ་རང་སེམས་ཨཱཿཡིག་ཕོ་བྲང་དབུས་ཀྱི་གདན་སྟེང་དུ་བབ་པ་སྐད་ཅིག་གིས་ཀུན་བཟང་ཡབ་ཡུམ་དུ་བསྐྱེད། དེ་ནས་རིམ་བཞིན་རིགས་ལྔ། སེམས་དཔའ། ཐུབ་དྲུག །སྒོམ་པ་རྣམས་གསལ་གདབ། རྣམ་སྣང་ཀུན་བཟང་ཡབ་ཡུམ་ཐོ་བརྩེགས་སུ་བསྒོམ་པ་མཆན་བུ་ལ་ཡོད་པ་ལྟར་རམ། ཡང་ན་རྣམ་སྣང་ཐུགས་ཀར་ཡེ་ཤེས་སེམས་དཔའི་ཚུལ་དུ་བཞུགས་པ་གང་ལྟར་བྱས་ཀྱང་མི་འགལ་ལ། བདག་པོ་ཀུན་བཟང་འཁོར་ལོས་བསྒྱུར། བཀའ་སྡོད་སྐྱེས་བུ་མདུན་ན་གནས། ཞེས་པ་ལྟར། ཀུན་བཟང་གི་མདུན་དུ་རྣམ་སྣང་བསྒོམ་ཀྱང་ཆོག་པར་སེམས། གང་ལྟར་ཡང༌། རིགས་ལྔ་རྣམས་དང༌། སེམས་དཔའ་ཡབ་ཡུམ་བཅས་ཚོམ་བུ་སོ་སོའི་ལྷ་རྣམས་ཕྱོགས་ཕྱོགས་ནས་གཙོ་བོ་ལ་ཞལ་ཕྱོགས་པ་དང༌། སྒོ་བ་རྣམས་སྒོ་ནང་ནས་ཞལ་ཕྱིར་ཕྱོགས་པ་ལྟར་བཞུགས་པར་བསྒོམ། ཁྲོ་བོའི་ལྷ་ཚོགས་རྣམས་སྟེང་ཁང་ན་བཞུགས་པ་དག་ཞི་ཁྲོ་བསྲེས་ནས་བསྒོམ་པ་སོགས་སྣ་ཚོགས་མཛད་འདུག་པ་གང་ལྟར་བྱས་པས་ཀྱང་ཆོག་མོད་ཀྱི། གཞལ་ཡས་ཁང་གཅིག་པ་དེར་སྟེང་འོག་བྱས་ནས་བསྒོམ་པ་རང་ལུགས་ངན་སོང་སྦྱོང་བ་སོགས་དང་མཚུངས་ཤིང༌། རྫོགས་ཆེན་སྐབས་གཞི་གནས་ཀྱི་དཀྱིལ་འཁོར་བཤད་པ་དང་མཚུངས་པས། དེ་ལྟར་བྱེད་ཚེ། ཞི་བའི་ལྷ་ཚོགས་ཀྱི་དབུའི་སྟེང༌། གཞལ་ཡས་ཁང་གི་ནང་གི་བར་སྣང་ལ། རང་བྱུང་རང་ཤར་གྱི་
དཀྱིལ་འཁོར་སྒྲས་བསྟན་པ་ལྟར་གྱི་དབུས་དང་ཕྱོགས་སོ་སོར་ཁྲོ་བོར་བསྐྱེད་པ་ཡིན་ལ། དེ་ཡང་ལས་བྱང་ཆེ་བ་ལྟར་ན་དབུས་སུ་ཆེ་མཆོག་དང་བུདྡྷ་ཧེ་རུ་ཀ་གཉིས་ཀ་དང༌། ཆུང་བ་ལྟར་ན་བུདྡྷ་ཧེ་རུ་ཀ་ཁོ་ན་དང༌། རྒྱལ་བ་རིགས་བཞིའི་དབུའི་སྟེང་གི་བར་སྣང་ལ་ཁྲག་འཐུང་ལྔ་དང༌། དེའི་ཕྱི་རིམ་ཀཻ་སེང་སྒོ་བ་སོགས་བསྐྱེད། དེའི་ཕྱིར་དབང་ཕྱུག་རྣམས་ཀྱང་ཕྱོགས་བཞིར་བདུན་རེ་བསྐྱེད་དེ་འདི་ཞི་བ་རྣམས་དང་ཐོག་རྩེགས་མར་བྱས་ནས་མི་བསྒོམ་པར། སྟེང་གི་བར་སྣང་ལ་ཡར་བགྱེད་ནས་མེ་རི་དང་མེ་དཔུང་གི་ཀློང་ན་བཞུགས་པར་བསྒོམ་པ་ཡིན། མདུན་བསྐྱེད་བུམ་བསྐྱེད་གཉིས་པོ་བསྙེན་པའི་ཚེ་མི་དགོས་པས། བདག་བསྐྱེད་ཁོ་ན་དང༌། དེ་ལས་ཀྱང་དང་པོར་གཙོ་བོ་ཡབ་ཡུམ་ལ་སེམས་འཛིན་པ་གལ་ཆེ། བསྐྱེད་རིམ་གྱི་དོན་པོ་ལྷ་ལ་སེམས་འཛིན་པའི་ཞི་གནས་སྒྲུབ་པའི་ཐབས་ཁྱད་པར་ཅན་ཡིན་པས། རྟོགས་པ་ཀློང་དུ་གྱུར་པའི་ཆོས་སྐད་ཀྱིས་མཐོ་གཏམ་མི་བྱེད་པར་རྣམ་པ་གསལ་བ་ལ་རིག་པ་གཅུན་ནས་སྒོམ་པ་གལ་ཆེ། ཚོགས་བསགས་སྐོང་ཆོག་དང་འབྲེལ་སྐབས་དང༌། སྒྲུབ་པ་དང་སྒྲུབ་ཆེན་གྱི་ཚེ་མདུན་བསྐྱེད་དགོས་ཀྱང༌། ཆོ་ག་གཅིག་པོ་དེའི་ཁོང་ནས་བདག་མདུན་མཉམ་བསྐྱེད་བྱེད་པ་ཡིན། གཞན་དོན་དབང་སྐུར་གནས་འདྲེན་སོགས་དང༌། བདག་འཇུག་སོགས་ཀྱི་ཚེ་བུམ་བསྐྱེད་ཀྱང་དགོས་པས་གསུམ་པོ་ཆོ་ག་གཅིག་པོ་དེའི་ཁོང་ནས་བསྐྱེད་པ་ཡིན་ཏེ། བསྐྱེད་ཚུལ་ཁྱད་པར་མེད་པས། བདག་བསྐྱེད་མདུན་བསྐྱེད་ཐོལ་བསྐྱེད་དང༌། འབྲུ་བསྐྱེད་བུམ་བསྐྱེད་གང་བྱེད་ཀྱང༌། བསྒོམ་ཁོག་བློ་ལ་བྱང་བ་
གཅེས། གསུངས་པ་ཡིན། དེ་ནས་སྤྱན་འདྲེན། བཞུགས་གསོལ། ཕྱག་འཚལ་སོགས་འདོན་སྒོམ་བསྒྲགས་ནས་བྱེད། ཕྱག་དང་མཆོད་པ་སོགས་ཀྱི་སྐབས་ཀྱང་འཕྲུལ་དགའི་ལྷ་རྣམས་རང་གི་སྤྲུལ་པའི་ལོངས་སྤྱོད་ལ་ལོངས་སྤྱོད་པ་ལྟར་ལས། ཕྱག་འཚལ་མཁན་དང་འཚལ་ཡུལ་ཐ་དད་དུ་མི་དགོས། ཕྱག་ཞེས་པའང་ལུས་ངག་ཡིད་གསུམ་གུས་པ་འདུད་པའི་དོན་ཡིན་པས་འཚལ་མཁན་དམིགས་བསལ་མ་དགོས། མཆོད་པ་རྣམས་ཀྱང་དཀྱིལ་འཁོར་གྱི་འདོད་སྣམ་ལ་འཁོད་པའི་མཆོད་པའི་ལྷ་མོ་རྣམས་ཀྱིས་མཆོད་པར་མོས་པ་ཡིན། བསྟོད་པ་འདི་རྣམས་རྣམ་དག་དྲན་པའི་དོན་པོ་ཡིན་པས་ཚིག་དོན་ལ་སེམས་གཞོལ་ནས་ལྷར་སྣང་གི་རྣམ་པ་དེ་དག་ཀྱང་དོན་ལ་ཡེ་ཤེས་ལྔ་ལ་སོགས་པའི་རྣམ་རོལ་ལམ། མཚོན་པའི་བརྡར་ཤར་བ་ཙམ་ལས། འཇིག་རྟེན་གྱི་སྣོད་བཅུད་རང་མཚན་པ་ལྟ་བུ་མེད་པའི་དོན་ལ་ངེས་ཤེས་འདྲོང་བར་བྱ། བཟླས་པའི་ཚེ་ལྷ་ཚོགས་ཞི་བ་རྣམས་ཀྱིས་ཐུགས་ཀར་ཟླ་བ་དང༌། ཁྲོ་བོ་རྣམས་ཀྱི་ཐུགས་ཀར་ཉི་མའི་གདན་སྲན་མ་བཀས་པ་ཙམ་གྱི་ཆུང་ངུ་དེའི་སྟེང་དུ་རང་སྲོག་ས་བོན་སྤུས་བྲིས་པ་ལྟ་བུ་ཕྲ་མོ་རེ་སྔགས་ཕྲེང་གིས་བསྐོར་བར་སྒོམ་པ་ཡིན། འདི་རྣམས་ཅི་ཙམ་ཕྲ་ན་སེམས་ཟིན་པ་ལ་ཕན་པ་ཡིན། བདག་བསྐྱེད་ཁོ་ན་ལས་མེད་ཚེ་མདུན་བསྐྱེད་ཀྱི་ལྷ་ལ་ཕོག་ཅེས་པའི་ཚིག་བསྒྱུར་ནས་བདག་བསྐྱེད་ཀྱི་ཐུགས་ཀའི་སྔགས་ཕྲེང་ལས་སྤྲོ་བསྡུ་བྱེད་པ་ཡིན་ཀྱང༌། དང་པོའི་རིང་སྔགས་ཕྲེང་རང་ལ་སེམས་མ་འཛིན་པ་ལས་སྤྲོ་བསྡུ་སོགས་མང་པོ་མ་བྱས་ཀྱང་ཆོག་སྔགས་བཟླས་པའི་ཚེ་སྔགས་འབྲུ་རྣམས་
ཀྱང་རང་སྒྲ་ཏི་རི་རི་སྒྲོགས་པ་དང༌། ལྷ་ཚོགས་ཐམས་ཅད་ཀྱང་ཞལ་ནས་སྔགས་ཀྱི་སྒྲ་འུར་དིར་གསུངས་ཤིང༌། སྣོད་བཅུད་སྐྱེ་འགྲོ་རྩི་ཤིང་ལ་སོགས་པ་ཐམས་ཅད་ཀྱང་ལྷའི་རང་བཞིན་གྱུར་ནས་སྔགས་ཀྱི་སྒྲ་འུར་དིར་རེ་སྒྲོགས་པར་བསམ་པ་ཕན་ཡོན་དང་ནུས་པ་ཆེ་བ་ཡིན། དེ་དག་ཐམས་ཅད་ཀྱི་སྐབས་སུ་བསྐྱེད་རིམ་ལ་བརྟེན་ནས་ཐ་མལ་གྱི་སྣང་ཞེན་སྦྱོང་བ་ལན་བསྒོམ་པའི་དོན་འབྲས་ཡིན་པས། དེ་ལ་རྣམ་པ་གསལ་བ། རྣམ་དག་དྲན་པ། ང་རྒྱལ་བརྟན་པ་དང་གསུམ་ཡོད། དེ་ཡང་དང་པོ་སྣང་ཞེན་ཞེས་པ་དེ་ལ་སྣང་བ་དང་ཞེན་པ་གཉིས་ཡོད་པའི་དང་པོ་སྣང་བ་ནི། རང་གི་དབང་པོ་ལྔའི་ཡུལ་དུ། གཟུགས་སྒྲ་དྲི་རོ་རེག་བྱ་ལྔ་དང༌། ཡིད་ཡུལ་དུ་ཆོས་ཁམས་ཀྱི་རྣམ་རྟོག་སྣང་བ་དེ་ཡིན་པས། དེ་སྦྱོང་བྱེད་དུ་རྣམ་པ་གསལ་བ་གསུང་སྟེ། སྣོད་བཅུད་ལྷ་དང་གཞལ་ཡས། སྒྲ་གྲགས་སྔགས་ཀྱི་རང་བཞིན་དུ་གསལ་ནས། སེམས་ཡུལ་ལ་མི་འཕྲོ་བ་དེ་ཡིན། ཞེན་པ་ཞེས་པ་ལ། བདག་ཏུ་ཞེན་པ་དང༌། དངོས་པོར་ཞེན་པ་གཉིས་ཡོད་པའི་དང་པོ་བདག་ཏུ་ཞེན་པ་ནི། ཐོག་མ་མེད་པའི་དུས་ནས་ངའོ་སྙམས་པའི་ངར་འཛིན་འདི་ཡིན་པས། དེའི་གཉེན་པོར་ང་རྒྱལ་བརྟེན་པ་གསུངས་ཏེ་ངའམ་བདག་ཐ་མལ་དུ་འཛིན་པ་དོར་ནས་ཡི་དམ་གྱི་ལྷ་ཡིན་ནོ་སྙམ་པའི་ངེས་ཤེས་བརྟན་པོ་བྱེད་པ་དེ་ཡིན། རྣམ་པ་གསལ་བ་དང༌། ང་རྒྱལ་བརྟན་པ་འདི་གལ་ཆེ་སྟེ། རང་ལྷ་ཡིན་པའི་ངེས་ཤེས་མེད་ན་རྣམ་པ་གསལ་བ་ཡང་རྒྱུད་ཐ་མལ་པ་ཡིན་པས་དོན་མེད། རང་
ངེས་པར་ལྷ་ཡིན་པའི་ང་རྒྱལ་ཡོད་ན་བདག་འཛིན་འཇིག་ཅིང་རྣམ་པའང་ཤུགས་ཀྱིས་གསལ་འོང་བ་ཡིན། དངོས་པོར་ཞེན་པ་ཞེས་པ་དེ་སྣོད་བཅུད་དུ་སྣང་བའི་བདེན་བདེན་རྟག་རྟག་ཏུ་ཡོད་པར་ཞེན་པའི་ཨ་འཐས་ཆོས་ཀྱི་བདག་ཟེར་བ་དེ་ཡིན་པས་དེའི་གཉེན་པོར་རྣམ་དག་དྲན་པ་གསུངས་ཏེ། སྣོད་བཅུད་ལྷ་དང་གཞལ་ཡས་སུ་སྣང་བ་དེ་ཡང་དོན་ལ་དེ་ལྟ་བུའི་ལྷ་དང་གཞལ་ཡས་ཁང་དུ་གྲུབ་པ་མེད་དེ། སངས་རྒྱས་ཀྱི་ཐུགས་རྒྱུད་ལ་ཡོད་པའི་ཡོན་ཏན་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པའི་རང་བཞིན་གཞལ་ཡས་ཁང་དང༌། ཡེ་ཤེས་ལྔ་མཚོན་པའི་རིགས་ལྔ་དེ་ཡང་ཆོས་སྐུ་སྐྱེ་བ་མེད་པ་མཚོན་ཕྱིར་ཞལ་གཅིགཏཧབས་ཤེས་མཚོན་པའི་ཕྱག་གཉིས་ལ་སོགས་པའི་བརྡའ་ཙམ་མམ་རྣམ་པ་ཙམ་ཡིན་པས། དོན་ལ་ལྷ་དང་ཞལ་ཕྱག །སྐུ་མདོག་ཕྱག་མཚན་སོགས་བདེན་གྲུབ་ཏུ་འཛིན་པའི་ཞེན་པ་སྤྱོད་པ་ཡིན་པས་འདི་གསུམ་གལ་ཆེ་བས་རེས་མོས་ཀྱིས་བློ་སྦྱངས། འདི་རྣམས་མཚན་ཉིད་ཀྱི་ཐེག་པ་ལྟར་སྣང་བའི་གཉེན་པོ་རྡུལ་ཕྲན་དུ་བསིལ་བ་སོགས་དང༌། བདག་གི་གཉེན་པོར་བདག་མེད་བསྒོམ་པ་སོགས་སྤངས་གཉེན་འགལ་བར་སྤྱོད་པ་མ་ཡིན་ཏེ། གསང་སྔགས་ཐབས་ལ་མཁས་པའི་ཁྱད་པར་གྱིས། དཔེར་ན་རྣ་བར་ཆུ་སོང་བ་ཆུ་བླུགས་ནས་འདོན་པ་དང༌། མེའི་ཚིག་པའི་ཟུག་རྔུ་སླར་མེ་ལ་བསྲོ་བ་ལྟར། འཁྲུལ་སྣང་གི་གཉེན་པོ་ལྷ་སྣང་དང༌། བདག་ཏུ་ང་རྒྱལ་བའི་གཉེན་པོར་ལྷའི་ང་རྒྱལ་བསྐྱེད་པ་སོགས། རྣམ་རྟོག་གི་གཉེན་པོར་
རྣམ་རྟོག་བསྒོམ་པས་མ་དག་པའི་རྣམ་རྟོག་མེད་པར་བྱེད་པ་སྔགས་ཀྱི་ཐབས་མཁས་ཡིན་པས་ཐབས་བསྐྱེད་པའི་རིམ་པ་ཟེར་དོན་ཡང་དེ་ཡིན་ནོ། །རྣམ་རྟོག་དང་ཉོན་མོངས་པ་མི་སྤོང་ཟེར་བ་འདི་ལྟ་བུ་ལ་ཟེར་བ་ཡིན་གྱི་ཐ་མལ་གྱི་རྣམ་རྟོག་དང་ཉོན་མོངས་མི་སྤོང་པ་མིན་པ་ཤེས་དགོས། དེ་ལྟར་བསྒོམ་པའི་ཚེ་ཤེས་པ་མི་གསལ་བ་དང༌། བྱིང་ཞིང་འཐིབ་པ་དང་བསྒོམ་སྙིང་མི་འདོད་པ་སོགས་བྱུང་ན་ཤེས་པ་ཧུར་བཏོན། བློའི་ཤོངས་ཡང་བསྐྱེད། ལྷ་རི་རྣམ་པ་སྐུ་མདོག་ཕྱག་མཚན་ལྟ་བུའི་ཕྱོགས་སུ་ཤེས་པ་གུད་དུ་མི་གཅོད་པར། སྣོད་བཅུད་ལྷ་དང་གཞལ་ཡས། འོད་དང་འོད་ཟེར་གྱིས་རང་བཞིན་དུ་བཀྲ་ལམ་ལམ་གཡོ་འགུལ་ཤིག་ཤིག་སྒྲ་གྲགས་སྔགས་ཀྱི་རང་བཞིན་དུ་འུར་དི་རི་རི། དྲན་རྟོག་ཆོས་ཉིད་ཀྱི་རང་བཞིན་དུ་ཕྱལ་ལ་བཏང་སྟེ་ཧཱུྃ་གླུ་ལེན་ཞིང་ཤེས་པ་རྒྱ་བསྐྱེད། དབང་བསྟོད། རྟོག་ཚོགས་དུམ་བུར་རྦུད་རྦུད་བཅད། ཧ་ཀྱང་གནས་ན་མི་གནས་ན། གསལ་ན་མི་གསལ་ན་སྙམ་པའི་གུ་དོགས་སྤངས་ཏེ་ཁྲོ་ལེར་བསྒོམ། ཡང་ཤེས་པ་ཧ་ཀྱང་རྒོད་པ་དང༌། འཕྲོ་བརྒྱ་འབྱམས་ན་བསྙན་པ་སོགས་བཟླ་བ་ཅུང་ཟད་མཚམས་བཅད། རླུང་རོ་བུས། ཤེས་པ་ལྷོད་ཀྱིས་གློད་ནས་རང་ངོ་ཅེར་གྱིས་བལྟས། དེའི་ངང་ནས་ཐུགས་སྲོག་ས་བོན་ལ་དམིགས་པ་གཅུར་དེ་སེམས་གཏད་ནས་སྒོམ། ཧ་ཀྱང་དམིགས་པ་སོགས་ཨེ་གསལ་རེ་དོགས་ཆེ་བའི་གུ་དོགས་དང་གསལ་མི་གསལ་མེད་པར་ཁ་ཁྲལ་འཇལ་བ་ལྟ་བུའི་གུ་ཡངས་གཉིས་ཀ་མི་བྱ་བར་གུ་ཡང་དོགས་ཚོད་
ཟིན་པར་བྱ། སྐབས་སྐབས་སུ་དེ་ལྟར་ལྷ་བསྒོམ་པ་དང༌། རྣམ་པ་གསལ་མི་གསལ་སོགས་ཀྱི་བྱེད་པོ་ཁོ་རང་གི་ངོ་ལ་ཁ་ཚུར་ལོག་ནས་བལྟ། དེ་ཡང་བལྟ་བྱ་དང་བལྟ་མཁན་ལ་སོགས་པའི་རྟོག་པ་ཕྲ་མོ་རྒྱ་ཁྲོ་ལེ་བཏང་ནས། གང་ཡིན་དང་འདི་ཡིན་མེད་པའི་ཤེས་པ་ཧ་ཆད་དེ་བདེའི་ངང་བསྐྱངས། དེ་ལྟར་དགོངས་པ་མི་འགྱུར་བ་ཆོས་ཉིད་ཀྱི་གཟེར་དང༌། ཏིང་ངེ་འཛིན་ལྷའི་གཟེར་གཉིས། རེས་མོས་ཟུང་འཇུག་བློས་གང་འཆུན་བྱེད་ཅིང་དེ་དག་ཀུན་གྱི་དུས་སུ་བཟླས་པ་སྔགས་ཀྱི་གཟེར། རྩ་བསྙེན་རྒྱུན་ཆད་མེད་པར་བཟླ། ཐུན་འཇོག་ཀ་དང༌། བསྙེན་འཚམས་གྲོལ་ཀ་རྣམས་སུ་འཕྲོ་འདུ་ཕྲིན་ལས་ཀྱི་གཟེར་འོད་ཟེར་སྤྲོ་བསྡུ་སོགས་བསྙེན་ཡིག་རྣམས་ནས་བཤད་པ་ལྟར་བྱེད་པ་ནི་སྲོག་སྡོམ་གཟེར་བཞི་ཞེས་སྔ་འགྱུར་རྙིང་མའི་ཆོས་སྐད་ཨོ་རྒྱན་སངས་རྒྱས་གཉིས་པའི་མན་ངག་ཐུན་མོང་མ་ཡིན་པས་ཅིས་ཀྱང་གལ་ཆེ། ལྷ་བསྒོམ་པའི་དུས་སུ་བརྗེད་རྐྱེན་པ། རྟོག་པ་སྔར་ལས་མང་བ་ལྟ་བུ་དང༌། སྤྱིར་བསྙེན་མཚམས་སོགས་ལ་བསྡད་ནས་ལུས་ངག་ཡིད་ལ་མི་བདེ་བ་མང་པོ་ཚུ་བཟང་ངེ་ལང་འོང་བ་ལྟ་བུ་དེ། གཡོ་བའི་ཉམས་རིག་ཟར་གྱི་འབབ་ཆུ་ལྟ་བུ་ཟེར་བ་ཡོན་ཏན་འགོ་མ་སྐྱེ་བ་ཡིན་པས་སྐྱོན་དུ་མི་བལྟ། ཐུན་མཚམས་རྣམས་སུ་ཐུན་འཇོག་ཀ་ལྷར་སྣང་རྣམས་མཐའ་ནས་རིམ་པར་བསྡུ་བ་རིམ་བསྡུ་དང༌། འཇའ་ཚོན་ནམ་མཁའ་རུ་ཡལ་བ་ལྟ་བུར་བསྡུ་བ་འཇའ་ཡལ་ལམ། ཡང་ན་སྔ་མ་རྗེས་གཞིག་དང༌། ཕྱི་མ་རིལ་འཛིན་ཟེར་བ་ཡིན་པས་གང་ལྟར་བསྡུས་ཀྱང་འདྲ་ཡང་ལས་དང་པོའི་ཚེ་རྗེས་
གཞིག་བྱེད་པ་གལ་ཆེ་བས། ཕྱི་སྣོད་གཞལ་ཡས། གཞལ་ཡས་འཁོར། འཁོར་རྣམས་གཙོ་བོ། གཙོ་བོ་ཡང་རིམ་གྱིས་སྔགས་ཕྲེང༌། དེ་ཐུགས་སྲོག་དེ་ཡང་ཇེ་ཕྲར་མི་དམིགས་པའི་རང་ལ་ཅུང་ཟད་མཉམ་པར་བཞག །དེ་ལས་སླར་ཡང་རྒྱུད་སྤྱོད་གྱི་ལྷ་གཙོ་བོ་ཡབ་ཡུམ་གསང་ཆེན་རིགས་གཅིག་ཡིན་ལ། རིགས་བརྒྱ་འདུས་པའི་ངོ་བོར་ངེས་ཤེས་བསྐྱེད། བསྡུ་རིམ་འདི་ཡང་འཆི་ཀའི་ཉམས་ལེན་ཁྱད་པར་ཅན་ཡིན་པས་ཐུན་ཐམས་ཅད་ཀྱི་མཇུག་ཏུ་བྱེད། ལྷའི་གསལ་སྣང་ལ་ཞེན་པ་ཡོད་ན་ཅིས་ཀྱང་བསྡུ་རིམ་བྱེད་དགོས། ཡོ་ག་གོང་མ་བ་རྣམས་གཤེགས་གསོལ་མང་པོ་མི་བྱེད་པ་ལྟར་བསྡུ་རིམ་ཀྱང་མི་བྱེད་པ་ནི་གནད་མ་གོ་བའི་རྟགས་ཡིན། བསྡུ་རིམ་རིམ་བསྡུ་བྱས་ནས། སྙིང་དབུས་ཀྱི་ཐུགས་སྲོག་ལ་སེམས་བཟུང་ནས་དེ་ཡང་མི་དམིགས་པའི་ངང་ལ་འཇོག་པས་འཆི་དུས་ཀྱི་འབྱུང་བ་ཐིམ་རིམ་སོགས་དང་ཆོས་མཐུན་ཞིང༌། གོམས་པ་བརྟན་ན་སྣང་མཆེད་ཐོབ་གསུམ་ཀྱང་ངེས་པར་འདྲེན་ནུས་པ་ཡིན་པས་རྫོགས་རིམ་གྱི་དོན་པོ་ཞིག་འདི་ཡིན་པས་འདི་ཡང་མི་དྲན་པའམ་གལ་ཆུང་ངུ་མི་བསམ། ཐུན་བར་རྣམས་སུ་སྤྱོད་ལམ་ཀྱི་ལྷ་གསང་ཆེན་རིགས་གཅིག་རྡོ་རྗེ་སེམས་དཔའི་ང་རྒྱལ་དང་མ་བྲལ་བའི་ངང་ནས་བཟའ་བཏུང་ཚོགས་འཁོར་དུ་རོལ་པ་དང༌། རྗེས་ཆགས་ཀྱི་དཀྱིལ་འཁོར་མཆོད་པ་དང༌། གཉིད་འོད་གསལ་དུ་སྤ་བ་དང༌། བྱེད་སྤྱོད་ཕྱག་རྒྱར་སྤྱོད་པ་སོགས་ཡིན་ཀྱང༌། གཉིས་པ་དགེ་སློང་རྡོར་འཛིན་ལ་མི་མཁོ་བས་ལྷག་རྣམས་ཉམས་བཞེས་བྱ། དེ་དག་
གི་སྐབས་ཐམས་ཅད་དུ་རང་ལ་རང་གིས་བརྙས་ནས། དེ་ལྟ་བུ་ངས་ག་ལ་ནུས་ག་ལ་ཤེས་སྙམ་ནས། བཅོམ་བསྐྱུངས་ཏེ། སྙོམས་ཆུང་བཟང་མདོག་ལྟ་བུ་ཁོ་ན་ལ་སྐྱབས་བཅོལ་བ་ནི། སྒྱིད་ལུག་པ་དང༌། བདག་ཉིད་བརྙས་པའི་ལེ་ལོ་ཟེར་བ་དེ་ཡིན་པས། ཐེག་ཆེན་པ་ཡིན་ན་ཕོ་ཚོད་གནམ་སྔོན་པོ་ཙམ་བསྐྱེད་ནས་སྙིང་རུས་བྱེད་དགོས་པ་ཡིན་པས། དང་པོ་ནས་ཤེས་མཁན་དང་ནུས་མཁན་ཞིག་ཡིན་ན་སློབ་དང་སྒྲུབ་ཀྱང་ཅི་དགོས་པས་ཐུགས་གུ་མི་དོགས་ངོས་ནས། དུས་དང་གནས་སྐབས་ཐམས་ཅད་དུ་ངེས་འབྱུང་སྐྱོ་ཤས། བྱམས་སྙིང་རྗེ་ལ་སོགས་རྩ་བའི་བླ་མའི་ཞལ་གདམས་རྣམས་ལ་ཐུགས་བསམ་གཏང་བ་ནི་གལ་ཆེ་སྟེ། ཐུན་མཚམས་རྣམས་སུ་རྟོག་པ་རྒྱ་འབྱམས་ཤོར་ན་ཐུན་ཡང་ལད་འགྲོ་ཞིང་ཐུན་མཚམས་སུ་ངེས་འབྱུང་སྐྱོ་ཤས་སོགས་བསྐྱེད་ནས་ཐུན་ལ་འཇུག་ཀར་ཤེས་པ་སྐྱོ་ཆད་དེ་ཡོད་ན་ཐུན་དེ་ཡང་གོ་ཆོད་ངེས་ཤིག་འོང་ཞིང༌། དེས་སྤྲོ་བ་བསྐྱེད་ནས་ཐུན་རྗེས་མ་རྣམས་ཀྱང་དེ་ལྷག་ཙམ་རེ་འོང་ཞིང༌། དེའི་མཚོན་བསྒྲུབ་པ་བྱས་ཚད་ཇེ་བཟང་ཇེ་བཟང་ལ་སོང་ནས་མཐར་གྲུབ་པ་ཡང་ཐོབ་འགྲོ་བ་ལགས་ཤིང༌། ཐུན་མཚམས་སུ་རྟོག་པ་ཡུལ་ལ་གཡེང་ནས་འབྱམས་ཤོར་ན་ཐུན་དེའི་མུར་འཁྲུལ་འབྱམས་སུ་འགྲོ། །དེ་ནས་ཐུན་ཕྱི་མ་རྣམས་ཀྱང་བསྡུ་རྒྱུ་བདག་རྒྱུ་མེད་པར་ཇེ་འཁྲུལ་ཇེ་ངན་ལ་སོང་ནས། སྒྲུབ་པ་བྱས་ཚད་ལ་སྙིང་པོ་སྤུ་ཙམ་མེད་པའི་ཆོས་དྲེད་ང་རང་ལྟ་བུ་ཞིག་རེད་འགྲོ་བ་ཡིན་པས། དུས་ཐམས་ཅད་དུ་མི་རྟག་སྐྱོ་ཤས་ཀྱི་ལྕག་བྲབ་སྟེ། བསྐྱེད་
རྫོགས་ལ་བརྩོན་འགྲུས་བྱས་ནས་དཔལ་མགོན་རྩ་བའི་བླ་མའི་དགོངས་པ་ཟིན་པ་ཞིག་དགོས་པ་ལགས་སོ། །ཆོས་དང་འཇིག་རྟེན་བྱ་བ་གང་ལ་ཡང༌། །ཉམས་མྱོང་མེད་ཀྱང་ཁ་བཤད་བདེན་བདེན་མོ། །ཉམས་མྱོང་ཡོད་པ་ལྟར་དུ་བཅོས་པ་འདི། །ཨ་བུ་སྨྱོན་པའི་མཚན་ཉིད་མ་ལགས་སམ། །ལས་ངན་རླུང་འཚུབ་ལང་བའི་དབུས་ཤིག་ན། །སྤྱོད་ངན་རྒྱན་དུ་ཐོགས་པའི་རྣམ་འགྱུར་བཅས། །གཤིས་ངན་སྤྲེའུ་སྨྱོན་པའི་གང་བྱེད་པ། །གྲོགས་ངན་བདག་འདྲའི་རྗེས་སུ་མ་འབྲང་བར། །བསོད་ནམས་དཔལ་གྱི་ལྷུན་པོ་རྟག་བཅའ་ཞིང༌། །བག་ཡོད་བསླབ་གསུམ་དགེ་བའི་མཛད་སྤྱོད་ཅན། ཚངས་སྤྱོད་ཚངས་པར་སྤྱོད་པའི་རྗེས་བསླབ་སྟེ། །ཁྱོད་བློ་དམ་པའི་ཆོས་དང་འདྲེས་པར་ཤོག །དགེའོ། །དགེའོ། །དགེའོ། །རྡོར་དྲིལ་རྣམ་བཤད་བཞུགས། །སྐུ་དང་ཡེ་ཤེས་བསམ་མི་ཁྱབ་པའི་མཛོད། །ཐབས་ཀྱི་རང་བཞིན་རྡོ་རྗེས་མཚོན་པར་བྱ། །ཟུང་འཇུག་དབྱིངས་འདི་སངས་རྒྱས་ཐམས་ཅད་ཀྱི། །དགོངས་པའི་ཀློང་དེ་སེམས་ཅན་ཀུན་གྱི་ངང༌། །དོན་གྱི་ཆོས་ཉིད་བྱང་ཆུབ་སེམས་ཀྱང་དེ། །དེ་ཕྱིར་འདིར་ནི་གཞི་ལམ་འབྲས་བུའི་ཆོས། །མ་ལུས་ཀུན་འདུས་རང་བཞིན་མཚོན་པར་བྱེད། །དབྱེ་ན་དྲིལ་བུ་ཤེས་རབ་ཡུམ་གྱི་མཁའ། །ཀུན་ཏུ་བཟང་མོ་རྒྱལ་བ་བསྐྱེད་པའི་ཡུམ། །སྟོང་ཆེན་ཡེ་བརྡལ་ཡེ་ནས་རང་བཞིན་མེད། །སུས་ཀྱང་མ་བྱས་བྱུང་བ་མེད་པའི་ཀློང༌། །ཡེ་ཤེས་རྡོ་རྗེ་ཐབས་ཆེན་ཡབ་ཀྱི་ངང༌། །ཀུན་ཏུ་བཟང་པོ་
སངས་རྒྱས་ཀུན་གྱི་ཡབ། །དབྱིངས་ལ་ཡེ་ཤེས་རང་སྣང་རང་ཤར་བའི། །འདི་ནི་ཆོས་སྐུའི་དཀྱིལ་འཁོར་ཉག་གཅིག་ཡིན། །ཤེས་རབ་རང་བཞིན་རྡོ་རྗེ་བདག་མེད་མ། །དབྱིངས་ཀྱི་དབང་ཕྱུག་སྤྲོས་པ་བྲལ་བའི་ཞལ། །ཁམས་ལྔ་རྣམ་དག་བདེ་ཆེན་ཡུམ་མཆོག་ལྔ། །སྤྱན་དང་མཱ་ཀི་གོས་དཀར་དམ་ཚིག་སྒྲོལ། །དབྱིངས་ཕྱུག་ལྷ་སྟེ་རྩེ་མོ་ཡུམ་ལྔའི་དལ། །སྐྱོན་གྱིས་མ་གོས་འདབ་བརྒྱད་པདྨའི་ཚུལ། །སྲིད་ཞིར་མི་གནས་དག་པའི་སེམས་མ་བརྒྱད། །ཟག་མེད་བཅུད་ལྡན་བུམ་མཆོག་འཕོ་འགྱུར་མེད། །དབྱིངས་ལས་རང་སྣང་དྲྭ་ཕྱེད་འཕྱང་འཕྲུལ་ཅན། །ཡུམ་ལྔ་དཀྱིལ་ཡིན་སེམས་མ་འཁོར་གྱི་ཚུལ། །ཤེས་རབ་དྲིལ་བུ་ཡུམ་གྱི་མཎྜལ་ལ། །ཆོས་དབྱིངས་མེ་ལོང་མཉམ་ཉིད་སོ་སོར་རྟོགས། །བྱ་གྲུབ་ཡེ་ཤེས་རང་སྣང་འགོད་པའི་ཚུལ། །རྣམ་སྣང་མི་བསྐྱོད་རིན་འབྱུང་སྣང་མཐའ་ཡས། །དོན་ཡོད་གྲུབ་སྟེ་རིགས་ལྔ་ཕྱོགས་ཀྱི་རྭ། །སྐྱོན་བྲལ་པདྨ་སེམས་དཔའ་སངས་རྒྱས་སྲས། །གཉིས་མེད་སྤྲོས་བྲལ་ལྟེ་བ་ཀུན་ནས་ཟླུམ། །ཐབས་ཀྱི་རྡོ་རྗེ་ཡབ་ཀྱི་མཎྜ་ལ། །བདེ་ཆེན་ལོངས་སྐུའི་དཀྱིལ་འཁོར་ཉག་གཅིག་ཡིན། །གདུལ་བྱའི་ཡུལ་ལ་སྣང་བ་མི་འགོགས་པའི། །སངས་རྒྱས་ཀུན་གྱི་ཐུགས་ཀྱི་ཡེ་ཤེས་སྩོལ། །དབྱིངས་ལས་རང་སྣང་རྡོ་རྗེ་དྲིལ་བུ་ཤར། །སེམས་ཅན་ཁམས་ལ་སངས་རྒྱས་མཛད་པ་བྱེད༌།སྐལ་བར་ལྡན་ལ་གཞི་དབྱིངས་རང་ངོ་སྤྲོད། །འདི་ནི་སྤྲུལ་སྐུའི་དཀྱིལ་འཁོར་ཉག་གཅིག་ཡིན། །སངས་རྒྱས་རིགས་ལྔ་མཚོན་བྱེད་དཔེ་ཡིན་ཉལ། །
རྒྱལ་བ་ཀུན་འདུས་སངས་རྒྱས་ཀུན་གྱི་ངང༌། །ཇི་སྙེད་འཇིག་རྟེན་མགོན་པོ་མ་ལུས་པ། །རིགས་ལྔའི་སངས་རྒྱས་དཀྱིལ་འཁོར་གཅིག་ཏུ་རྫོགས། །བརྗོད་མེད་རང་སྒྲས་སྐྱེ་མེད་ཆོས་མཚོན་ཏེ། །ཐེག་གསུམ་ཆོས་ཕུང་ཇི་སྙེད་བསྟན་པ་དང༌། །སྐྱེ་མེད་ངང་ལས་འགགས་མེད་བབ་ཀྱིས་གྲུབ། །བརྗོད་མེད་ཀློང་འདི་བརྗོད་པ་ཀུན་གྱི་གཞི། །དེ་ཕྱིར་བརྗོད་བྲལ་དམ་པའི་ཆོས་སྐུ་དང༌། །སེམས་དཔའ་སེམས་མ་སངས་རྒྱས་ཀུན་གྱི་སྲས། །གཉིས་མཐར་མི་གནས་དོན་གཉིས་ལྷུན་གྱིས་གྲུབ། །འཕགས་པའི་གང་ཟག་ས་མཐོར་གཤེགས་པའི་ཚུལ། །ས་བོན་གྱིས་མཚོན་དགེ་འདུན་དེ་ཁོ་ན། །སངས་རྒྱས་སྐུ་ལྔ་མི་ཕྱེད་རྡོ་རྗེའི་སྐུ། །སྣང་སྟོང་དབྱེར་མེད་དྲིལ་བུ་སྐུ་ཡི་རྟེན། །བརྗོད་མེད་གསུང་ནི་ཆོས་ཀྱི་ངོ་བོ་སྟེ། །ས་བོན་ཡི་གེ་སངས་རྒྱས་གསུང་གི་རྟེན། །ཡེ་ཤེས་རྡོ་རྗེ་ཐུགས་ལྔའི་དེ་ཁོ་ན། །མཚོན་པའི་རྡོ་རྗེ་རྒྱལ་ཀུན་ཐུགས་ཀྱི་རྟེན། །བླ་མའི་དམ་ཚིག་རྡོ་རྗེ་སློབ་དཔོན་གྱི། །དབང་ལས་རྗེས་གནང་ཐབས་ཤེས་མཚོན་པ་སྟེ། །ཡི་དམ་རིགས་ལྔ་སངས་རྒྱས་རང་བཞིན་ལ། །ཡེ་ཤེས་རང་སྣང་བཀོད་པའི་དཀྱིལ་འཁོར་མཆོག །མ་ཚོགས་མཁའ་འགྲོ་དབྱིངས་ནས་བསྐུལ་བའི་རྫས། །བརྗོད་མེད་རང་སྒྲ་སྟོང་པ་ཡུམ་ཀྱི་ངང༌། །འདི་ནི་རྡོ་རྗེའི་དམ་ཚིག་བླ་ན་མེད། །འདི་མཐོང་རྒྱལ་བའི་དཀྱིལ་འཁོར་ཐམས་ཅད་མཐོང༌། །སྐུ་གསུམ་དབྱིངས་ཀྱི་རང་བཞིན་གཏན་ལ་ཕབ། །བསྐལ་མང་བསགས་པའི་སྡིག་ལྟུང་ཡུད་ཀྱིས་འདགས། བློ་
རང་སྐལ་པ་ཆེན་པོ་མ་གཏོགས་པ། །ཀུན་གྱི་ཡུལ་མིན་རྡོ་རྗེ་ཐེག་པའི་རྫས། །འདི་འཆང་རྡོ་རྗེ་སེམས་དཔའ་རྒྱལ་བའི་སྲས། །རྡོ་རྗེའི་རིག་འཛིན་གསང་བའི་གྲལ་ལ་དབང༌། །ལྷ་དང་དྲང་སྲོང་གྲུབ་པའི་རིག་འཛིན་གྱིས། །གུས་པས་བཀུར་འོས་མཆོག་གི་དམ་ཚིག་རྫས། །རྒྱལ་ཀུན་དགྱེས་སྐོང་མཁའ་འགྲོ་དམ་ཅན་འདུ། །འདི་ནི་རྒྱལ་ཀུན་སྐུ་གསུང་ཐུགས་ཀྱི་རྟེན། །བརྙས་དང་མི་གུས་བབ་ཅོལ་སུས་བྱས་པ། །དཀོན་མཆོག་གསུམ་སྤངས་གསང་བའི་དམ་འགལ་བའི། །ཉམས་པ་ཅན་དེ་བསྲུང་བའི་ལྷས་འདོར་ཞིང༌། །མུ་མཐའ་མེད་པའི་རྡོ་རྗེ་དམྱལ་བར་འགྲོ། །ཟུང་འཇུག་ཆེན་པོ་སྣང་སྟོང་རྒྱལ་བའི་དལ། །ཆོས་རྣམས་མ་ལུས་རྡོ་རྗེ་དྲིལ་བུས་མཚོན། །ལམ་གྱི་གང་ཟག་མཉམ་ཉིད་དྲན་པའི་རྟེན། །འདི་འཆང་རྣམ་པ་ཀུན་ཏུ་འབྲལ་མི་བྱ། །སྔགས་དང་ཕྱག་རྒྱ་མི་སྤངས་དམ་ཚིག་ཆིངས། །འདི་འཆང་གང་ཟག་དེ་ལ་བབས་ཀྱིས་གྲུབ། །ཐུན་མོང་ལམ་ཡང་འདི་ཡིས་མཚོན་པ་སྟེ། །སྟོབས་ལྔ་དབང་ལྔ་འཕགས་ལམ་ཡན་ལག་བརྒྱད། །ལམ་ལྔ་ས་བཅུ་མ་ལུས་འདིས་མཚོན་ནུས། །གསང་བ་གསང་ཆེན་རྡོ་རྗེ་ཐེག་པའི་གནད། །ཀུན་ཀྱང་འདིས་མཚོན་རང་བཞིན་མཚུངས་པ་སྟེ། །བུམ་དབང་སྣང་སྟོང་རང་བཞིན་དབྱིབས་ཀྱི་ལྷ། །བསྐྱེད་རིམ་རྒྱལ་བའི་དཀྱིལ་འཁོར་ཀུན་རྫོགས་ཤིང༌། །སྣང་བའི་བརྡའ་ཡི་རང་སྣང་འགགས་པ་མེད། །སྟོང་པ་དབྱིངས་ཡིན་ནམ་མཁའ་གཅིག་གི་ཀློང༌། །སྣང་སྟོང་ཟུང་འཇུག་བུམ་པའི་དབང་གི་དངོས། །ཐབས་ཀྱི་རྡོ་རྗེ་དབང་པོ་ཡབ་ཀྱི་ངང༌། །དྲིལ་བུ་
ཡུམ་ཡིན་ཟུང་འཇུག་མཉམ་པའི་རྫས། །རྩ་བ་རླུང་ལྔ་ཁམས་ལྔ་རྣམ་དག་པའི། །ཡེ་ཤེས་ལྔ་རྫོགས་བླ་མེད་གསང་བའི་དབང༌། །གསལ་སྟོང་ཟུང་འཇུག་རྡོ་རྗེ་དྲིལ་བུས་མཚོན། །ཤེས་རབ་དབྱིངས་ནི་རྡོ་རྗེ་བཙུན་མོའི་མཁའ། །དགའ་བཞིའི་ཡེ་ཤེས་རྐྱེན་བྲལ་འདབ་བཞིའི་དབུས། །གསང་བའི་ཡེ་ཤེས་ཁྭ་ཁྭ་མུ་ཁའི་ཞལ། །ཀུན་རྟོག་ཟད་བྱེད་བདེ་ཆེན་ཐིག་ལེའི་ཀློང༌། །བསྐྱོད་པའི་དགྱེས་བསྐྱེད་དབྱིངས་ཀྱི་རོལ་མོ་སྟེ། །བདེ་སྟོང་ཡེ་ཤེས་ཤེས་རབ་ཟབ་མོའི་དབང༌། །རྣམ་ཀུན་མཆོག་ལྡན་མཆོག་གི་ཡེ་ཤེས་དངོས། །ཟུང་འཇུག་ཆེན་པོ་ཡེ་ནས་མཉམ་པའི་ངང༌། །རིག་སྟོང་ཆོས་སྐུ་རང་ཤར་ལྷུན་གྱིས་གྲུབ། །བཞི་པའི་དབང་ཡིན་རྡོ་རྗེ་གསང་བའི་གནས། །གསང་སྔགས་ཀུན་གྱི་ལམ་ནི་འདི་ཡིན་ཏེ། །དབང་བཞི་རིམ་པ་ཇི་སྙེད་སྐབས་ལའང༌། །འཆང་བའི་དམ་ཚིག་རྡོ་རྗེ་དྲིལ་བུས་མཚོན། །དེ་ཕྱིར་གསང་ཆེན་ངེས་པའི་སྐལ་ལྡན་རྣམས། །འདི་འཆང་ཟུང་འཇུག་ཐེག་པའི་གནད་རྟོགས་པས། །མཁའ་སྤྱོད་རིག་པ་འཛིན་པའི་གསང་ལམ་འདིས། །མཆོག་གི་ས་རྩེར་མངོན་འཚང་རྒྱ་བར་འགྱུར། །དེ་སྐད་དམ་པའི་གྲོགས་དེའི་རགས་བསྐུལ་བཞིན། །བཙུན་འཆལ་དཔལ་སྤྲུལ་ཧྲལ་པོས་གང་དྲན་བྲིས། །དངོས་ལུང་ཚིག་གི་རྒྱབ་སྐྱོར་མ་མཆིས་ཀྱང༌། །དོན་དུ་སངས་རྒྱས་ཀུན་གྱི་དགོངས་པར་འཐད། །དགེ་བ་དེ་ཡིས་སྲིད་པའི་ཁམས་གསུམ་འགྲོ། །ཀུན་ཀྱང་བླ་མེད་ལམ་བཟང་དེར་འཇུག་སྟེ། །ཚོམ་བུ་གཅིག་ཏུ་མངོན་པར་སངས་རྒྱས་ནས། །འོད་གསལ་མཆོག་གི་ཡེ་ཤེས་འགྲུབ་པ་ཤོག །