ཞི་ཁྲོ་དགོངས་པ་རང་གྲོལ་གྱི་ལྶ་འགྲིགས།
ཞི་ཁྲོ་དགོངས་པ་རང་གྲོལ་གྱི་ལས་འགྲིགས་བཞུགས་སོ།།
ཀུན་བཟང་ཧེ་རུ་ཀ་དཔའ་རིག་བརྒྱའི་ལྷ། །དབྱེར་མེད་བླ་མའི་ཞབས་ལ་ཕྱག་འཚལ་ལོ། །དགོངས་པ་རང་གྲོལ་ཆོ་གའི་ལག་ལེན་འགྲིགས། །ལས་ཀྱི་རྡོ་རྗེས་ཅི་ལྟར་བྱ་བ་བྲི། །དེ་ལ་དང་པོ། །སྦྱོར་བ་ཡོ་བྱད་ཀྱི་བཤམ་གནས་ཁང་བྱི་དོར་དང་ཆག་ཆག་ལ་སོགས་པ་ལེགས་པར་བྱ་སྟེ། ས་གཞི་བརྟགས་སྦྱངས་སྔོན་དུ་འགྲོ་བའི་དཀྱིལ་འཁོར་གྱི་ས་མདའ་གང་གྲུ་བཞི་ཡ་ཡོ་དང་འབར་འབུར་མེད་པ་རས་བྲིས་སམ་སྟེགས་ཁེབ་ལ་ཚོམ་བུའི་དཀྱིལ་འཁོར་བཀོད། །དེའི་དབུས་སུ་རྣམ་རྒྱལ་བུམ་པ་ཆས་ལྡན་གྱི་ནང་དུ་སྨན་ལྔ་དང་དྲི་བཟང་གི་ཆུས་གང་ཞིང་ཀུན་བཟང་དང་རྣམ་སྣང་ཡབ་ཡུམ་གྱི་
སྐུ་ཙཀ་ཁ་རྒྱན་ལ་དགོད། །དེའི་མདུན་དུ་འབྲུ་ལྔའི་བུམ་པ་དང་ཤར་ཕྱོགས་པའི་ལྷ་དྲུག་གི་སྐུ། གཡས་སུ་རིན་འབྱུང་གི་རིན་ཆེན་ལྔའི་བུམ་པ་དང་ལྷོ་ཕྱོགས་གི་ལྷ་དྲུག་གི་སྐུ། །རྒྱབ་ཏུ་སྣང་མཐའི་དྲི་ལྔའི་བུམ་པ་དང་ནུབ་ཀྱི་ལྷ་དྲུག་གི་སྐུ། གཡོན་དུ་དོན་གྲུབ་ཀྱི་སྙིང་པོ་ལྔའི་བུམ་པ་དང་བྱང་གི་ལྷ་དྲུག་གི་སྐུ་ཙཀ་ཁ་རྒྱན་ལ་བཀོད་དོ། །དེ་དག་གི་གཡས་སུ་ཤེལ་རྡོ། །གཡོན་དུ་བྷ་ནྡྷ་ཡོངས་རྫོགས། མདུན་དུ་ཐུབ་དྲུག་ཕྱིན་གྱི་ལྷ་ཙག་ཡོངས་རྫོགས། །རྒྱབ་ཏུ་མཐའ་བརྟེན་དང༌། དེའི་ཕྱིར་ཤར་ཏུ་ཞི་བའི་གཏོར་མ་ཟླུམ་པོ་པད་འདབ་ཅན་འཁོར་བཞི་པ་དང་སྨན་
རག་གཏོར་གསུམ་ལྷ་བཤོས་ཚོགས་རིལ་མཐེབ་ཀྱུ་བཅས་ཉེར་ལྔ་རེ་གྲངས་ཚང་ལྷོར་རྒྱས་གཏོར་གྲུ་བཞིར་ད་འདབ་ཙན་འཁོར་བཞི་བ་དང་སྨན་རག་སོགས་གྲངས་ཚང༌། །ནུབ་ཏུ་དབང་གཏོར་ཟླ་གམ་པད་འདབ་ཅན་འཁོར་བཞི་པ་དང་སྨན་རག་སོགས་བྱང་དུ་དྲག་དུ་གཏོར་གྲུ་གསུམ་འཁོར་བཞི་བ་སྨན་རཀ་སོགས། དེ་དག་གྲུབ་བཞི་པ་ལེགས་པར་བཀོད་པའི་མདུན་ཏུ་མཆོད་གཏོར་རིན་ཆེན་འབར་བ་སྤྱི་མཐུན། དེའི་གཡས་སུ་ཞི་བ་ཡོངས་རྫོགས་ཀྱི་བསྐང་གཏོར་ཟླུམ་པོ་འདབ་བཞི་རྒྱན་ལྡན་མཐེབ་ཀྱུ་ཞེ་གཉིས་ཀྱིས་བསྐོར། གཡོན་ཁྲོ་བོའི་བསྐང་གཏོར་རིན་ཆེན་འབར་བ་ཐེབ་ཀྱུ་ལྔ་བཅུ། ཞི་བའི་བསྐང་གཏོར་གྱི་གཡས་སུ་ཆོས་སྐྱོངས་སྤྱི་གཏོར་གྲུ་གསུམ་རང་འདྲ་བ་དགུ་དང་མཐེབ་ཀྱུ་གྲངས་མང༌། ཁྲོ་བོའི་བསྐང་གཏོར་གྱི་གཡོན་ཏུ་སྡེ་བདུན་གྱི་གཏོར་མ་གཙོ་བོ་དཔལ་བཤོས་བརྗིད་ལྡན་གཡས་སུ་མོ་རྒྱུད་སྤྱི་གཏོར་སྙིང་གིས་མཚན་པ། གཡོན་ཏུ་མ་མོར་སྤྱི་གཏོར་ལིང་གས་མཚན། མདུན་དུ་ལས་བྱེད་སྤྱི་གཏོར་གྲུ་གསུམ། དེ་དག་གི་གཡས་སུ་གཟའ་བཤོས་གཡས་གཅུས། གཡོན་ཏུ་དམ་ཅན་མཁར་ཐབས་ར་མགོ །གཙོ་བོས་རྒྱབ་ཏུ་གཞི་བདག་དཀར་གཏོར་དང༌། གནོད་སྦྱིན་སྤྱི་གཏོར་གཉིས་བཅས་མཐར་མཐེབ་ཀྱུའི་བསྐོར་བར་བཀོད། གཏོར་མ་ལྔ་ཀའི་གཡས་སུ་སྨན་གྱི་ཀ་པ་ལི་སྦྲེང་ཐུར་བཅས་དང་གཡོན་རྐྟ། དེ་དག་གི་མདུན་དུ་མཆོད་མགོ་གཡས་ནས་བརྩམ་པའི་ཞི་མཆོད་དང༌། གཡོན་ནས་བརྩམ་པའི་དྲག་མཆོད་བཤམ་ཞིང་ནང་མཆོད་ཀྱི་
ཟེག་མ་ཡང་ཕྱི་མཆོད་ལ་མ་འཐོར་བར་བྱའོ། ༈ །གཞན་དུ་ཡར་གཞིའི་ཚུལ་དུ་རྩ་གསུམ་བཤམ་པ་ནི་ཡི་དམ་སྤྱི་འདུས་དང་པོ་འདོན་པའི་ལུགས་སུ་བྱས་ཀྱི་འདིར་མེད་ཀྱང་རུང་ལ་བུམ་པ་གཅིག་ལས་མེད་ན་དཀྱིལ་འཁོར་དབུས་སུ་དགོད་ཅིང་བུམ་རྫས་སོ་ལྔར་བྱས་ཏེ་ལྷ་ཙཀ་རྣམས་སྦོམ་ཏེ་འཇོག་ཅིང་གཞན་འདྲའོ། །ལས་བུམ་ནི་སློབ་དཔོན་གྱི་མདུན་ཏུ་བཤམས་རྒྱུ་ཡིན་ཀྱང་རྣམ་བུམ་གྱི་གཡོན་ཏུ་བཞག་ཀྱང་འགལ་བ་མེད་དམ། དཀྱིལ་འཁོར་གྱི་བྱང་ཤར་དུ་ཆད་ཐོའི་གཏོར་མ་གྲུབ་གསུམ་དང་ཤར་ལྷོར་བརྟན་མའི་གཏོར་མ་དབུས་སུ་ནག་པོ་གཡས་དམར་གཡོན་དཀར་པོ། །མཐེབ་ཀྱུ་གསུམ་རེ་དང་ལྡན་པ་རྒྱན་བཅས་དགོད་ཅིང༌། དཀྱིལ་འཁོར་མདུན་སྟེགས་ལ་དཀར་བགེགས་ཇ་ཕུད་སྤོས་མེ་ཚོགས་ཀྱི་ཡོ་བྱད་ལ་སོགས་ཉེ་བར་མཁོ་བ་ཐམས་ཅད་ཚང་བར་བྱ་ཞིང༌། ཡོལ་བ་བླ་རེ་འཕན་གདུག་རྒྱ་མཚན་དྲྭ་ཕྱེད་མདའ་བཞི་དང་གྲི་བཞི་སོགས་དཀྱིལ་འཁོར་གྱི་རྒྱན་ཐམས་ཅད་མ་ཚང་བ་མེད་པ་བཀོད་ལེགས་ཤིང་དངས་ལ་འདྲེན་པར་བྱའོ། །སློབ་དཔོན་གྱི་མདུན་ཏུ་ནང་མཆོད་རྡོར་དྲིལ་ནས་བཟེད་ཌཱ་མ་རུ་ལ་སོགས་ཉེ་བར་མཁོ་བ་མ་ཚང་བར་མེད་པར་བྱའོ། ༈ །གཉིས་པ་དངོས་གཞི་ཆོ་གའི་བྱ་བ་ནི། སྔོན་འགྲོ་མཐར་ཆགས་སུ་གཏོར་ཞིང་མཎྜལ་ཀྱང་ཕུལ། ལས་བྱང་མགོར་
དཀར་གཏོར་ལ་ལས་བུམ་གྱི་ཆུས་བྲན་ཞིང་བྱིན་གྱིས་བརླབས། ཚངས་པ་བརྒྱ་བྱིན་མ་རྫོགས་མཐར་ཐུད་བཅས་མཆོད། བགེགས་གཏོར་བྱིན་གྱིས་བརླབས་ཤིང་སུམ་བྷ་ནིའི་དུས་ཕྱིར་དོར། དེ་ནས་རྡོར་དྲིལ་བྱིན་རླབས་དང་ཡན་ལག་བདུན་པ་སོང་ནས། ལས་བུམ་གྱི་ཆུས་ཕྱི་ནང་གི་མཆོད་རྫས་ཐམས་ཅད་ལ་བྲན་སྨན་རཀ་གི་ཁ་ལེབ་བསལ་ཏེ་བྱིན་རླབས་རྫོགས་མཐར་ཡོན་པོར་དགབ། དེ་ནས་བསྐྱེད་རིམ་རྫོགས་ནས་སྤྱན་འདྲེན་སྐབས་སྤོས་རིང་བསྲེགས་ཤིང་དར་སྣ་ཚོགས་ཀྱི་གཡབ་དར་ཀྱང་ཕྱར། བཞུགས་གསོལ་ཕྱག་འཚལ། ཕྱི་མཆོད་རྣམས་སོང་ནས། རིགས་ལྔ་ཡབ་ཡུམ་ཀྱི་མགོར་སྨན་གྱི་ཀ་པ་ལི་ལག་གཡས་དང་སྦྲེང་ཐུར་གཡོན་གྱིས་འཛིན་པའི་ཁ་ཧཱིས་མཚམས་སུ་ཕྱར། ཧཱུྃ་རིགས་ལྔ་ཡབ་ཡུམ་སྦྱོར་བའི་མགོར་ཀ་བ་ལི་ཕར་བཞག་ཅིང་གཡས་མཐིལ་དུ་བདུད་རྩིའི་ཐིག་པ་བླུག་ལ་གཡོན་པའི་སྲིན་འཛུབ་གྱིས་སྤྱི་མགྲིན་སྙིང་ཀར་རེག་ཅིང་ཀ་ཡ་སིདྡྷི་སོགས་བརྗོད། མ་ཧཱ་རཀྟ་ལ་ཁ་ཧཱིའི་ཚེ་རྐྟ་སྦྲིང་ཐུར་གྱིས་གཏོར་མ་ལ་བྲན། དེ་ནས་གཏོར་མཆོད་བསྟོད་བཤགས་འཛབ་བཟླས་རྣམས་སོང་ནས་བུམ་པ་བསྒྲུབ་པའི་ཚེ་ནས་འཐོར་ཞིང་པད་སྐོར་དང་བཅས་པས་གཟུང་ཐག་སློབ་དཔོན་ལ་ཕུལ། ལས་བུམ་མགོར་གཟུང་རྡོར་ལས་བུམ་ལ་སྤོར། དབྱངས་གསལ་བཟླ་ཚེ་གཟུང་ཐག་བསྡུ། །
མཆོད་བསྟོང་མཐར་དུང་ཆོས་ཀྱི་ཆུ་བུམ་པར་ཕུལ། དངོས་གྲུབ་ལེན་པའི་ཚེ་བུམ་པ་བླ་མའི་ཕྱག་ཏུ་ཕུལ་ཞིང་བདག་འཇུག་ལྟར་བྱའོ། །དེ་ནས་སྡེ་བདུན་རྒྱུན་གཏོར་ལ་ཆབ་བྲན་ཞིང་ཕྲིན་ལས་བཅོལ་ཇ་ཕུད་མཆོད། ༈ །དེ་ནས་ཚོགས་རྫས་བཟའ་བ་གཡས་བཏུང་བ་གཡོན་བསྒྲལ་བའི་ལིང་ཀ་དང་བཅས་ལེགས་པར་བཀོད་དེ་ཚོགས་རྫས་ལ་ཆབ་བྲན། བྱིན་གྱིས་རླབས་ཤིང་ཕྱི་མཆོད་བསྐང་བ་སོང་འཕལ་སྔར་གྱི་སྨན་མཆོད་དུས་ལྟར་སྨན་སྦྲིང་བཞིན། ཀུན་གཞི་ཀློང་ཡང་སོགས་བརྗོད། ལག་གཡོན་རྐྟ་འཛིན་ཅིང་གཡས་པས་ཕྱར་ཏེ་སྤྱི་གཙུག་བདེ་ཆེན། དེ་ནས་གཏོར་མ་དང་མར་མེ་བསྐང་བ་རྫོགས་ནས་མར་མེ་བྲིམ་ཤིང་སྨོན་ལམ་བྱ། སྤོས་རིང་དང་བཅས་ཚོགས་སྤྱན་འདྲེན་ཚོགས་ཆ་ལྔར་བསྒོས་ཏེ་དང་པོའི་ཚོགས་མཆོད་ཞི་ཁྲོའི་སྤྱི་གཏོར་ལ་ཕུལ། །གཉིས་པ་ཆོས་སྐྱོང་སྡེ་བདུན་ལ། གསུམ་པ་བཤགས་པ་སྤྱི་གཏོར། བཞི་བ་སྡེ་བདུན། ལྔ་པ་ཉ་བོ་དང་བཅས་སློབ་དཔོན་གྱི་མདུན་ཏུ་བཞག་སྟེ། བསྒྲལ་ལས་བྱ་ཞིང་བསྟབས་པའི་ཚེ་གཏོར་སྐྱོག་གིས་གཏོར་མ་ཐམས་ཅད་ལ་ཕུལ། དེ་ནས་ལྷ་ཚོགས་ཡོངས་རྫོགས་སྡེ་བདུན་དང་བཅས་པའི་བསྐང་བ་རྫོགས་ནས་དྲངས་པ་བྱ་བའོ། ༈ །གསུམ་པ་དབང་བསྐུར་གནས་འདྲེན་གྱི་བྱ་བ་ནི། དང་པོ་སྟེགས་སུ་རྒྱབ་ཡོལ་
ཅན་ལ་མིའི་ཐུབ་པ་སོགས་ཐུབ་དྲུག་གི་སྐུ་རིམ་པར་བཤམ་ལ་དེ་དག་གི་མདུན་རིགས་དྲུག་གི་ས་བོན་དང་བླུད་གཏོར་དྲུག་རྣམས་དང་དམྱལ་བའི་ས་བོན་གྱི་སྟེང་དུ་མཚན་བྱང་དགོད། གཞན་ཡང་མེ་ལོང༌། ཁྲུས་དར་འདོད་ཡོན་ལ་སོགས་ཚང་བར་བྱའོ། །དེ་ནས་རྟེན་བསྐྱེད་དང་འགུགས་པ་སོང་ནས་གཏོར་ཆུང་གསུམ་དར་ཏིང་ལོ་གསུམ་བྱིན་གྱིས་བརླབས་ཤིང་སྔགས་ཚན་དྲུག་གིས་བསྔོས་ཏེ་བཀའ་བསྒོའི་དུས་དོར། མཚམས་བཅད་དང་གཞུག་པ་སོང་ནས་ལག་གཡས་ཁྲུས་བུམ་དང་གཡོན་མེ་ལོང་འཛིན་པས་སྐུ་རྟེན་གྱི་གཟུགས་བརྙན་ཤར་བ་ལ་འཁྲུས་གསོལ་བྱ་ཞིང་ན་བཟའ་ཕུལ། ཁྲུས་ཆུ་བུམ་པར་བླུག །མེ་ལོང་ནས་མཚན་བྱང་ལ་ཁྲུས་སོགས་བྱ་བ་ནས་མེ་ཆུས་དབང་ཡན་སོང་ནས་དབུས་ཀྱི་བུམ་པའི་དབང་བསྐུར། བགེགས་གཏོར་བྱིན་རླབས་བྱ་ཞིང་དོར་བྲབ་པ་དང་ཁྲུས་སོང་ནས་མཚན་བྱང་ཡི་དྭགས་གི་ས་བོན་ལ་སྦར། དམྱལ་བའི་ས་བོན་བསྡུ། རིགས་དྲུག་གཞན་ལ་དེ་འགྲེས་སོ། །མིའི་དུས་སུ་ཕྱོགས་བཞིའི་བུམ་ཆུ་གཙོ་བུམ་དུ་བསྡུས་ལ་བྱའོ། །དེ་ནས་དབང་དང་གནས་སྤར་ལ་སོགས་པ་ནི་སློབ་དཔོན་གྱི་བྱ་བ་ཁོ་ན་ཡིན་ཞིང་ལག་ལེན་ཀྱང་གོ་སླའོ། །བཞི་པ་རྗེས་ཀྱི་རིམ་པ་ནི། ཚོགས་ཀྱི་གཙང་ལྷག་དམེ་ལྷག་གཅིག་ཏུ་བསྲེ་ཞིང་སློབ་དཔོན་གྱི་སྨན་ཕུད་ཀྱི་ཁ་ཕྲུ་གདབ་སྟེ་ཞིང་ལྤགས་ཀྱི་དཀྱིལ་འཁོར་དུ་གྲལ་མཐའ་བཀོད་ནས་མཐར་ལས་རྡོར་གྱི་ཞ་མོ་དང་
བཅས་མཚན་མོ་ཡིན་ན་དཔལ་འབར་དང་བཅས་མཁའ་ལྡིང་གི་ཕྱག་རྒྱས་བཏེག་སྟེ་ཕྱིར་དོར། དཔལ་འབར་ཐོག་སྟེ་ནང་དུ་འོང་ནས་ཆད་ཐོ་འཕེན། བསྟན་མ་སྐྱོང༌། བྲོ་བརྡུང༌། བཀྲ་ཤིས་སོགས་བྱའོ། ༈ བར་དུ་གཉིས་མེད་ལ་གཙང་ལྷག་ད་མེ་ལྷག་གཉིས་བསྲེ་ཁ་ཕྲུ་ཞུ། པཉྩ་ཨ་མྲྀ་ཏ་སོགས། དཔལ་གྱི་བཀའ་ཉན་གྱི་མཇུག་ལྷག་གཏོར་བཞེས་ལ་ཞེས་པའི་སྐབས་ལྷག་མ་མཆོད་ལ། ན་མོ་དཀོན་མཆོག་གསུམ་ཞེས་པའི་སྐབས་སྨན་རཀ་གཉིས་བྲན་ལ་རྣམ་དག་ཆོས་དབྱིངས་སོགས། བཀའ་དང་དམ་ཚིག་སོགས་དང༌། མ་ནིང་ནག་པོ་ལ། སྡེ་བདུན་རྒྱུན་གཏོར་དང་ཇ་ཕུད་མཆོད། དུས་གསུམ་དུས་མེད་སོགས་ནས། ཤར་ཕྱོགས་སྒོ་མའི་མཇུག་ཏུ་ཆད་ཐོ་གཏོང༌། བསྟན་མ་སྐྱོངས་མཛད་མཇུག་ཏུ་བརྟན་མ་མཆོད། ན་མོ་དཀོན་མཆོག་གསུམ་ཞེས་པའི་སྐབས། གཏོར་གཞོང་སྟེང་དུ་རྡོ་རྗེ་རྒྱ་གྲམ་བྱ། གཏོར་གཞོང་བསོད་ནམས་ཞེས་པའི་སྐབས་གཏོར་གཞོང་ཁ་ཕྱེ། བླ་མ་ཀུན་བཟང་ལ་སྨན་རག་དང་མཆོད་པ་ཁ་གསོ། །ཧེ་རུ་ཀ་དཔལ་ལྷག་མ་བསྲེ་ཁ་ཕྲུ་ཞུ། པཉྩ་ཨ་མྲྀ་ཏ། ལྷག་ལ་དབང་བ། ལྷག་མ་མཆོད། ཅེས་པ་འདི་ལངས་པ་བུས་སྨྲས་པའོ།། །།