བསྐྱེད་རིམ་ལྷའི་ཁྲིད་ཀྱི་དཀའ་གནད་ཅུང་ཟད་བཤད་པ།
བསྐྱེད་རིམ་ལྷའི་ཁྲིད་ཀྱི་དཀའ་གནད་ཅུང་ཟད་བཤད་པ་བཞུགས་སོ།། །།
བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །བསྐྱེད་རིམ་ལྷའི་ཁྲིད་ཀྱི་རིམ་པ་འོག་མིན་བགྲོད་པའི་ཐེམ་སྐས་འདི་འཆད་པ་ལ་སྤྱི་དོན་གསུམ་སྟེ། རྒྱུ་མ་ནོར་བ་བསྐྱེད་རིམ་ལ་འཇུག་པའི་གཞི། རྐྱེན་མ་འཁྲུལ་པ་ཇི་ལྟར་སྒོམ་པའི་ལམ། འབྲས་བུ་རྣམ་པར་དག་པ་ཟུང་འཇུག་གི་གོ་འཕང་ལ་སྦྱོར་ཚུལ་དང་གསུམ་ལས། དང་པོ་ལ་སྐྱེ་གནས་བཞིའི་བག་ཆགས་སྦྱོང་ཚུལ་གྱི་གོ་བ་བསྟན་པ་དང༌། བསྐྱེད་གཞི་ཏིང་ངེ་འཛིན་གསུམ་བཤད་པ་གཉིས་ཡོད། །དེའི་དང་པོ་ནི། སྤྱིར་འཁོར་བའི་རང་བཞིན་སྡུག་བསྔལ་དང་ཀུན་འབྱུང་གི་བདེན་པ་གཉིས་པོ་འདི་སྦྱངས་ནས། འབྲས་བུ་སངས་རྒྱས་ཀྱི་གོ་འཕང་ལམ་དུ་བྱེད་པ་ནི་ཐེག་པ་ཆེན་པོའི་ལམ་ཐམས་ཅད་ཀྱི་དོན་པོ་ཡིན་པས། འདིར་ཡང་སྡུག་བསྔལ་གྱི་བདེན་པ་ཇི་
སྙེད་པ་སྐྱེ་ཤི་གཉིས་སུ་འདུ་ཤིང༌། དེ་ཡང་སྐྱེ་བའི་རྩ་བ་ཅན་ཡིན་པས། སྐྱེ་བའི་རིམ་པ་སྦྱོངས་བྱེད་བསྐྱེད་རིམ་དང༌། འཆི་བའི་རིམ་པ་སྦྱོང་བྱེད་རྫོགས་རིམ་སྟེ་ལམ་རིམ་པ་གཉིས་སུ་གསང་སྔགས་ཀྱི་གཞུང་ཐམས་ཅད་འདུ། སྐྱེ་བ་དེ་ཡང་སྐྱེ་གནས་བཞིར་འདུ་བས། དེ་དང་བསྟུན་པའི་བསྐྱེད་རིམ་བསྡུས་འབྲིང་རྒྱས་པ་དང་རྒྱས་པ་ཆེན་པོའི་བསྐྱེད་རིམ་དང་བཞི་ཡོད་པ་ལས། བསྡུས་འབྲིང་གཉིས་གོ་སླ་ལ་རྒྱས་པ་ཆེན་པོའི་སྐབས་བདག་སྲས་དང་གཞན་སྲས་ཞེས་པའི་དོན་རྒྱུད་སྡེ་དང་བསྟུན་ན། །སྒྱུ་འཕྲུལ་ལས། རང་བྱུང་དངོས་དང་མི་འགལ་ཞིང༌། འབྲས་བུ་ཉིད་ལ་ལམ་ཤེས་པས། མ་ལུས་དཀྱིལ་འཁོར་ཐིག་ལེ་ཀུན། བདག་གི་སྲས་སུ་བསྒོམ་པར་བྱ། ཞེས་བདག་སྲས་དང༌། གང་གིས་གང་ལ་གསོལ་བཏབ་པས། ཐུགས་
ཞུགས་འདྲེས་པ་དབྱེར་མེད་ན། སྲས་གྱུར་དགོངས་པ་ཅི་ལ་གནས། ཞེས་གཞན་སྲས་བསྟན་ལ། ཡང་ཞུར་པའི་རྒྱུད་ལས། ཇི་ལྟར་སངས་རྒྱས་མཐུ་ལས་བྱུང༌། ལྷུན་གྱི་གྲུབ་པའི་ཆོ་ག་དང༌། ཆོ་གའི་ཡན་ལག་རྫོགས་པ་ལས། མཁས་པ་སངས་རྒྱས་སྲས་ཡིན་ནོ། །ཞེས་གཞན་སྲས་དང༌། སྲས་དང་བཙུན་མོར་བཅས་པ་ནི། འཁོར་བའི་ཆོས་ལས་སྐྱེས་པ་སྟེ། ཞེས་བདག་སྲས་བསྟན་པར་བཤད་པ་ལྟར་དང༌། སྒྲུབ་སྡེ་བཀའ་བརྒྱད་ལས་བདག་གི་སྲས་སུ་གཞན་བྱ་བ་ལ་ལྔ། ཞེས་སོགས་རང་གཞུང་ན་གསལ་བ་ལྟར་ཡིན་ཀྱང༌། འདི་དག་ལ་བདག་སྲས་དང་གཞན་སྲས་ཞེས་པའི་དོན་འདི་ལྟར་ཡིན་གྱི་བཤད་པ་གསལ་པོ་མ་བྱུང་བས་འཆད་དཀའ་བར་སྣང་ཡང༌། བརྟགས་ན། སྔ་ཕྱི་གཉིས་སུ་བསྐྱེད་གཞི་བདག་གི་ཆོས་ཉིད་བདེ་བར་གཤེགས་པའི་སྙིང་པོ་རྒྱུ་རྡོ་རྗེ་འཛིན་པའི་རྣམ་པར་གསལ་བས། གཞན་འཁོར་འདས་སུ་གཟུང་བའི་སྣང་ཞེན་ཐམས་ཅད། བར་སྲིད་བསྡུ་བ་དང་མངལ་འབྱིན་གྱི་སྒོ་ནས་སེམས་སུ་བསྐྲུན་པ་ལ་བདག་གི་སྲས་སུ་གཞན་བྱ་བ་དང༌། གཞན་འཁོར་འདས་སུ་སྣང་ཞིང་བཟུང་བ་ཐམས་ཅད་དཀྱིལ་འཁོར་གཙོ་བོ་རྡོ་རྗེ་འཛིན་པར་གསལ་བས་བདག་གི་ཕུང་ཁམས་སྐྱེ་མཆེད་དུ་འཛིན་པའི་ཚོགས་ཐམས་ཅད་ཡིག་འབྲུ་དང༌། མངལ་འབྱིན་གྱི་བྱ་བས་བསྐུན་པས་གཞན་གྱི་སྲས་སུ་བདག་བྱ་བ་ཞེས་བསྟན་ཞིང༌། བར་བར་ནི། བདག་འཁོར་བའི་སེམས་ཅན་དེ་ཉིད་གཞན་དུས་གསུམ་གྱི་སངས་རྒྱས་ཐམས་ཅད་མངོན་པར་རྫོགས་པར་བྱང་
ཆུབ་བའི་ཚུལ་ལྷུན་གྱི་གྲུབ་པའི་ཆོ་ག་དང་ཆོ་གའི་ཡན་ལག་ལྔ་ལ་སོགས་བ་རྫོགས་པའི་སྒོ་ནས་དཀྱིལ་འཁོར་གྱི་གཙོ་བོར་བསྐྱེད་པ་སངས་རྒྱས་ཀྱི་སྲས་སུ་བདག་བྱ་བ་དང༌། གཞན་དཀྱིལ་འཁོར་གྱི་འཁོར་ལོའི་ལྷ་ཚོགས་སུ་སྣང་བ་ཐམས་ཅད་བདག་འཁོར་བའི་སེམས་ཅན་གྱི་སྲིད་པ་སྐྱེ་བའི་རིམ་པ་དང་སྒོ་བསྟུན་ནས། ཡབ་ཡུམ་མཉམ་པར་སྦྱོར་བ་དང༌། མངལ་འབྱིན་གྱི་སྒོ་ནས་བསྐྱེད་པ་ལ་བདག་གི་སྲས་སུ་གཞན་ཞེས་བྱ་བ་སྔ་མ་གཉིས་བསྐྱེད་གཞིའི་སྒོ་ནས་དང༌། ཕྱི་མ་འདི་བསྐྱེད་ཚུལ་གྱི་སྒོ་ནས་བདག་སྲས་སུ་བཞག་ཚུལ་དགོངས་པ་ལེན་ཚུལ་ཅུང་ཟད་ཐ་དད་དམ་སྙམ་ཀྱང་རྣམ་མཁྱེན་ཤིང་རྟར་གསུམ་ཀ་ལྟོ་སྦྱར་ནས་བཤད་འདུག་པས། འདི་གའི་བཤད་སྲོལ་ལ་བློ་བྲོས་དང་ལྡན་པ་དག་གིས་ཤིན་ཏུ་བརྟག་ནས་ལེགས་བཤད་ཀྱི་སྒོ་འཕར་དབྱེ་བར་ཅིས་ཀྱང་བསྐུལ་ལོ། །རྒྱས་པའི་བསྐྱེད་ཚུལ་མངོན་བྱང་ལྔ་བསྐྱེད་ཀྱི་སྐབས་འདིར། གཞིའི་མངོན་བྱང༌། ལམ་གྱི་མངོན་བྱང༌། འབྲས་བུའི་མངོན་བྱང་དང་གསུམ་ལས། འདི་དག་ཀྱང་སྦྱང་གཞི་འཁོར་བའི་རང་བཞིན་ངོ་བོར་གནས་པ་དང༌། སྦྱོང་བྱེད་ལམ་གྱི་བྱེད་རྩོལ་ལ་བརྟེན་ནས་རྒྱུད་ལ་བསྐྱེད་པ་དང༌། སྦྱངས་འབྲས་མཐར་ཐུག་གི་འབྲས་བུ་མངོན་ཏུ་གྱུར་པའི་གནས་སྐབས་དང་གསུམ་གྱིས་དབྱེ་བ་ལས་དོན་དུ་སྟོང་བཞིའི་འོད་གསལ་ཟུང་འཇུག་དང་བཅས་པའི་ལྔ་བོ་ཉིད་ཡིན་པས་གསང་སྔགས་ཀྱི་ལམ་ཐམས་ཅད་ཀྱི་དོན་པོ་ཡིན། དེ་ཡང་ལུས་ངག་ཡིད་གསུམ་
ཚོགས་བ་དང་བཅས་བའམ་དཀར་དམར་རླུང་སེམས་ཚོགས་པ་དང་བཅས་པ་ཡེ་ནས་ཡེ་ཤེས་ལྔའི་ངོ་བོར་སངས་རྒྱས་པ་ནི་གཞི་དུས་ཀྱི་མངོན་བྱང༌། ཚོགས་སྦྱོར་དུ་དཔེའི་ཡེ་ཤེས་དང་མཐོང་སྒོམ་དུ་དོན་གྱི་འོད་གསལ་མངོན་དུ་བྱས་པའི་སྟོང་བཞི་ཟུང་འཇུག་དང་བཅས་པ་ནི་ལམ་གྱི་མངོན་བྱང༌། དེ་རྒྱུད་ལ་བསྐྱེད་བྱེད་བསྐྱེད་རིམ་ཏུ་ཟླ་ཉི་སོགས་ལྔ་པོ་བསྒོམ་པ་དང༌། རྫོགས་རིམ་ཏུ་དཀར་དམར་རླུང་སེམས་ཆ་དང་བཅས་པ་ལ་གནད་དུ་བསྣུན་པའི་ཡེ་ཤེས་ལྔ་བོ་དང་བཅས་པ་ལམ་གྱི་མངོན་བྱང༌། མཐར་ཐུག་འབྲས་བུའི་གནས་སྐབས་ན་དཀར་ཆ་སྐུ་རྡོ་རྗེ། དམར་ཆ་གསུང་རྡོ་རྗེ། ཤེས་རིག་ཐུགས་རྡོ་རྗེར་དག་ནས་ཐུགས་ཆོས་སྐུའི་ཡེ་ཤེས་མཐར་ཐུག་འབྲས་བུའི་འོད་གསལ་དང་དབྱེར་མེད་པའི་ལོངས་སྐུ་མཚན་དཔེ་ཡོན་ཏན་རྒྱ་མཚོའི་བདག་ཉིད་དུ་བཞེངས་པ་ནི་མི་སློབ་པའི་ཟུང་འཇུག་སྟེ་མཐར་ཐུག་འབྲས་བུའི་མངོན་བྱང་ཡིན་ལ། འདི་དག་སྦྱངས་གཞི་ཤིན་ཏུ་ཕྲ་བའི་དཀར་དམར་རླུང་སེམས་ཀྱི་ཆ་མ་དག་པའི་དུས་ན་ལུས་ངག་ཡིད་གསུམ་གྱི་རྟེན་བྱེད་པ་དང༌། སྣང་གསུམ་གྱི་སྒྲིབ་བྱེད་ཕྲ་མོ་དོན་གྱི་འོད་གསལ་ཇི་བཞིན་རྫོགས་པའི་གེགས་སུ་གྱུར་པའི་གཉེན་པོ་ནི་རྡོ་རྗེ་ཐེག་པའི་ལམ་ཁོ་ནར་བསྟན་པས་ན་གསང་སྔགས་བགྲོད་པ་གཅིག་པའི་ལམ་དུ་བསྟན་པ་དེའི་རྒྱུ་མཚན་གྱི་ས་ཡིན་པས། འདི་དག་གི་སྦྱོང་གཞི་སྦྱོང་བྱེད་སྦྱངས་འབྲས་བཅས་ལ་ལྟོ་སྦྱར་ནས་ལེགས་པར་ཤེས་ན་རྡོ་རྗེ་ཐེག་པའི་ལམ་གནད་ཐུན་མོང་མ་ཡིན་པ་ཐམས་ཅད་རིག་པར་འགྱུར་རོ། །གཉིས་པ་ཏིང་ངེ་འཛིན་རྣམ་
གསུམ་ནི་སྔ་འགྱུར་རྙིང་མའི་བཤད་སྲོལ་ཐུན་མོང་མ་ཡིན་པ་ཡིན་ཏེ། གཞན་རྣམས་ཡེ་ཤེས་ཚོགས་བསགས་ཀྱི་རྗེས་སུ་བར་སྲིད་བསྐྱེད་པ་ལས་མི་འབྱུང་ལ། འདིར་ནི་སྟོང་ཉིད་སྙིང་རྗེའི་སྙིང་པོ་ཅན་གྱི་འཕེན་པས་སྤྲུལ་པའི་ལྷ་སྐུ་ཞལ་ཕྱག་གི་རྣམ་པར་བཞེངས་ནས་ཕྲིན་ལས་རྣམ་པ་བཞིའི་གཞན་ཕན་སྒྲུབ་པ་ནི་ཚོགས་གཉིས་ཟུང་དུ་འཇུག་པའི་ཐེག་ཆེན་གྱི་ལམ་མ་ནོར་བ་ཡིན་ཞིང༌། མར་མ་དག་འཁོར་བའི་དུས་ན་ཡང་སྐྱེ་གནས་གང་དུ་འཕེན་བྱེད་ཀྱི་ལས་དེ་སྲེད་ལེན་གྱིས་གསོས་མ་བཏབ་ན་མངལ་དུ་འཇུག་མི་ནུས་པས་སྲེད་ལེན་གྱི་གསོས་བཏབ་ནས། འཇུག་པ་ལྟར། འདིར་ཡང་ཐུགས་རྗེ་ཆེན་པོའི་འཕེན་པས་གསོས་བཏབ་ནས་འོད་གསལ་སྟོང་ཉིད་ཀྱི་ངང་ལས་དཀྱིལ་འཁོར་གྱི་ལྷའི་སྐྱེ་བར་འཛིན་པས་མར་སྦྱང་བྱ་དང་མཐུན། མཐར་ཐུག་འབྲས་བུའི་གནས་སྐབས་ན་ཡང་རྟོག་པ་དང་བྲལ་བའི་ཐུགས་རྗེ་ཆེན་པོ་ཆོས་སྐུའི་ངང་ལས་གཟུགས་སྐུར་བཞེངས་ནས་ནམ་མཁའི་མཐའ་ཁྱབ་ཀྱི་འགྲོ་དོན་མཛད་པ་དང་ཆོས་མཐུན། སྟོང་ཉིད་སྙིང་རྗེའི་རྩི་དང་མ་བྲལ་བས་བསྐྱེད་རིམ་རང་རྒྱུད་དུ་གོལ་མི་སྲིད་ཅིང་ལམ་ངེས་རྫོགས་ལྟར་བསྒོམ་ནས་དེ་ཏིང་ལ་བརྟན་པ་ཐོབ་པ་བྱས་ན་བསྐྱེད་རྫོགས་ཟུང་འཇུག་ཏུ་འགྱུར་ཞིང་སློབ་དཔོན་སངས་རྒྱས་ཡེ་ཤེས་ཀྱི་བཞེད་པའི་ཟབ་གསལ་གཉིས་མེད་ཀྱིས་རྫོགས་རིམ་མཚན་ཉིད་བརྒྱུད་ལ་སྐྱེ། དེས་ན་ཡེ་ཤེས་ཞབས་ཀྱི་བསྐྱེད་རིམ་ལ་རྫོགས་རིམ་གྱིས་རྒྱས་བཏབ་ནས་སྒོམ་པ་བཞེད་པ་ལ་སྔ་མ་དག་དགོངས་པ་མ་ལོན་ཞེས་གསུངས་པ་ཡང་སྔ་
འགྱུར་བའི་ཆོས་སྐད་ཐུན་མོང་མ་ཡིན་པ་དང་མཐུན། འདི་ལྟ་བུའི་ཏིང་ངེ་འཛིན་གསུམ་པོ་ཡང་ལམ་ངེས་རྫོགས་ལྟར་བསྒོམ་ན་དང་པོ་དབང་དང་དམ་ཚིག་ལ་གནས་པས་ཤེས་བྱ་ལྟ་བའི་དེ་ཉིད་ངོ་སྤྲོད་དང་གཏན་ཚིག་ལ་བསྟེན་ནས་ཡིད་ཆེས་པར་བྱས་ཏེ། མཐོང་བའི་རྗེས་ལ་འཇོག་པ་དང༌། རིག་པ་སྤྱི་བླུགས་སུ་འཇོག་པའི་བཞག་ཐབས་གཉིས་པོ་གང་རུང་གིས་སེམས་མ་བཅོས་སྤྲོས་བྲལ་རང་བབས་སུ་ལྷོད་ཀྱིས་ཀློང་ལ་དྲན་རྟོག་གི་འགྱུ་བའི་སྤུན་ཐག་བཅད་དེ་བྱིང་རྒོད་ཀྱི་སྐྱོན་དང་བྲལ་བར་བཞག་ཅིང༌། དེ་ཉིད་གོམས་པས་རླུང་སེམས་དབུ་མར་འདུས་པ་སྟེ་རྟགས་བཅུའི་མཐོང་སྣང་རྫོགས་ཤིང་རབ་ཀྱི་སྣང་གསུམ་ལ་བརྟེན་པའི་དཔེའི་ཡེ་ཤེས་ཀྱང་སྐྱེད་ནུས། དེ་ལྟར་མིན་ཀྱང་སྟོང་ཉིད་སྤྲོས་པ་དང་བྲལ་བའི་གོ་ཡུལ་དང་མ་བྲལ་བའི་སེམས་གནས་ལ་བརྟན་པ་ཐོབ་ཚེ་མེད་བཞིན་དུ་སྣང་བའི་འཁོར་བ་ལ་བལྟས་ནས་འཛིན་མེད་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཏུ་སྒོམ་ལ་བློ་སྦྱངས། དེ་ཉིད་གོམས་པས་སྟོང་ཉིད་ལ་བློ་བཞག་ཚེ་དེ་ལྟར་མ་རྟོགས་པའི་སེམས་ཅན་མེད་སྣང་འཁྲུལ་པས་བསླུས་པ་ལ་སྙིང་རྗེ་རྩོལ་མེད་དུ་སྐྱེ་ཞིང་སྙིང་རྗེ་བསྒོམ་ཀྱང་བདག་གཞན་ཨ་འཐས་སུ་མི་གོལ་ཞིང་རྟེན་ཅིང་འབྲེལ་འབྱུང་སྒྱུ་མ་ལྟ་བུའི་སྣང་བ་ལས་དོན་ཏུ་རང་བཞིན་མ་གྲུབ་པའི་སྟོང་ཉིད་ཀྱི་ངེས་ཤེས་སྐྱེས་པ་ན་སྟོང་ཉིད་སྙིང་རྗེའི་སྙིང་པོ་ཅན་ལ་གོམས་པར་བྱ་བ་ནི་དེ་ཏིང་དང་ཀུན་སྣང་གཉིས་ཀའི་དོན་ཡིན་པས་ལམ་འདི་གཉིས་རེ་རེ་དང་བྲལ་བས་ཀྱང་རྫོགས་པའི་བྱང་ཆུབ་
བསྒྲུབ་མི་ནུས་ན་གཉིས་ཀ་དང་བྲལ་བས་ལྟ་ཅི་སྨོས་ཏེ། ས་ར་ཧས་སྙིང་རྗེ་དང་བྲལ་སྟོང་པ་ཉིད་ལྟ་བ། དེས་ནི་ལམ་མཆོག་རྙེད་པ་མ་ཡིན་ཏེ། གལ་ཏེ་སྙིང་རྗེ་འབའ་ཞིག་སྒོམ་ན་ཡང༌། འཁོར་བ་འདིར་གནས་ཐར་པ་ཡོད་དམ་ཅི། ཞེས་སོ། །དེས་ན་འདི་གཉིས་ནི་བསྐྱེད་རིམ་ཐེག་ཆེན་གྱི་ལམ་དུ་གྱུར་བའི་བྱེད་པོ་ཡིན་པས་འདི་དང་བྲལ་བའི་བསྐྱེད་རིམ་དག་ནི་མུ་སྟེགས་ཅན་དང་ཐུན་མོང་ཡིན་ནོ། །དེ་ལྟ་བུའི་སྟོང་ཉིད་སྙིང་རྗེའི་སྙིང་པོ་ཅན་གྱི་རྩལ་སྣང་རྒྱུའི་ས་བོན་ཨའམ་ཧཱུྃ་ཡིག་དང་ཧྲཱི་ཡིག་ལ་སོགས་པའི་རྣམ་པར་བསྒོམ་ཞིང༌། དེ་ཉིད་གོམས་ནས་ཇི་ཙམ་འདོད་ཀྱི་བར་དུ་མཉམ་པར་བཞག་ནུས་པའི་སྐབས་སུ་ཡིག་འབྲུ་དེ་ལས་དེ་འདྲ་བ་གྲངས་མེད་པ་སྤྲོས་ཏེ་ནམ་མཁའི་ཁྱོན་གང་བ་དང༌། སླར་ཡང་ཡིག་འབྲུ་དེ་ཉིད་ལ་བསྡུས་ཏེ་མཉམ་པར་འཇོག་པ་སོགས་གསལ་བརྟན་གྱི་ཚད་བརྒྱད་མ་ཐོབ་ཀྱི་བར་དུ་བསླབ་པ་ནི་ཕྲ་བ་ཡིག་འབྲུ་ལ་བསླབ་པ་ཞེས་བྱ་སྟེ་འདི་ཁོ་ན་གོམས་པས་ཀྱང་ཐུན་མོང་གི་དངོས་གྲུབ་དང་གྲུབ་རྟགས་ཐམས་ཅད་སྒྲུབ་ནུས། དེ་ལྟར་ཏིང་ངེ་འཛིན་གསུམ་པོ་ལམ་ངེས་རྫོགས་ལྟར་སྒོམ་མ་ནུས་ཀྱང༌། མོས་སྒོམ་དུ་བྱེད་ཚེ་ཡང་ཐུན་ཐམས་ཅད་ཀྱི་མགོར་ཚིག་ཙམ་གྱི་ཆོག་ཤེས་མི་བྱ་བར་ཆོ་གའི་ཡན་ལག་རྣམས་རྫོགས་པ་དང་བློ་ལྷོད་ཀྱིས་ཀློད་ལ་དེ་ཏིང་དང་ཀུན་སྣང་ལ་སེམས་མ་ཟིན་གྱི་བར་དུ་མཉམ་པར་བཞག །དེ་ནས་རྒྱུ་ཏིང་སོགས་རིམ་པ་ལྟར་བསྒོམ་ཞིང་ཉམས་ལེན་གྱི་གཙོ་བོ་སྟོང་ཉིད་སྙིང་རྗེ་གཉིས་དང་མ་བྲལ་བའི་བསྐྱེད་རིམ་མ་བརྟན་
གྱི་བར་དུ་བཟླས་པ་དང་སྤྲོ་བསྡུ་སོགས་དོ་གལ་མི་བྱ། མོས་སྒོམ་དང་ངེས་རྫོགས་གང་ལྟར་བསྒོམས་ཀྱང་བསྐྱེད་རིམ་གྱི་སྐབས་ཐམས་ཅད་དུ་ཏིང་ངེ་འཛིན་གསུམ་ཡ་མ་བྲལ་བར་བསྒོམ་པ་ལས་རེས་འཇོག་ལྟ་བུའི་མི་འཐུས། དེ་ཡང་དཔེར་ན་རྩིག་ངོར་རི་མོ་བྱེད་པའི་ཚེ་རྩིག་པ་ནི་གཞི་ཡིན་པས་དེ་མེད་ན་རི་མོ་གང་ལ་བྱེད། རྩིག་པ་ཡོད་ཀྱང་ཞལ་བ་མེད་ན་རྩིག་ངོར་རི་མོ་འདྲི་མི་ནུས་པས་ཞལ་པ་ནི་རི་མོའི་ལྷན་ཅིག་བྱེད་པའི་རྐྱེན། རི་མོ་བྲིས་ཟིན་པའི་གནས་སྐབས་ན་ཡང་རྩིག་པ་དང་རི་མོ་ཞལ་བ་དང་བཅས་པ་ཕུན་སུམ་ཚོགས་པ་ཡོད་པ་ལྟར་རྒྱུ་ཏིང་ལས་དཀྱིལ་འཁོར་གྱི་འཁོར་ལོ་རྫོགས་པ་བསྒོམ་པའི་གནས་སྐབས་ན་ཡང་སྟོང་ཉིད་སྙིང་རྗེའི་རྩལ་སྣང་ལྷར་ཤར་བས་གསུམ་ཀ་ཡ་མ་བྲལ་བར་ཡོད་དགོས་ཉེ་ཐ་མལ་གྱི་སྣང་བ་སྟོང་ཉིད་དུ་མ་དག་ན་དཀྱིལ་འཁོར་གྱི་འཁོར་ལོ་གང་དུ་བསྒོམ་དེས་ན་ཆོས་ཐམས་ཅད་སྟོང་པ་ཉིད་ཡིན་པ་དང༌། འཁོར་འདས་དབྱེར་མེད་ཡིན་པའི་རྒྱུ་མཚན་གྱིས་དཀྱིལ་འཁོར་གྱི་འཁོར་ལོ་བསྒོམ་ནས་མངོན་དུ་བྱེད་ནུས་པ་ཡིན་ཞིང་སྟོང་ཉིད་ནི་བསྐྱེད་རིམ་ཀྱི་གཞི་ཡིན་ཏེ། གང་ལ་སྟོང་པ་ཉིད་རུང་བ། དེ་ལ་ཐམས་ཅད་རུང་བར་འགྱུར། ཞེས་སོ། །ཆོས་ཐམས་ཅད་སྟོང་པ་ཉིད་མ་ཡིན་ཞིང་ཐ་མལ་གྱི་སྣང་བ་བདེན་པར་གྲུབ་ན་ནི་བསྐྱེད་རིམ་བསྒོམ་མི་ནུས་ཏེ། ཇི་སྐད་དུ། བྲ་སྲན་འབྲས་སུ་དབང་བསྐུར་ཡང༌། །དེ་ལ་འབྲས་ཀྱི་དངོས་སྣང་མེད། ཅེས་པ་ལྟར་རོ། །དེ་ལྟར་ཆོས་ཐམས་ཅད་སྟོང་ཉིད་དུ་ཤེས་ཀྱང་སྙིང་རྗེ་ཆེན་པོའི་འཕེན་
པ་དང་བྲལ་ན་ནི་གཞན་དོན་ཏུ་གཟུགས་ཀྱི་སྐུར་བཞེངས་མི་ནུས་ཏེ་ཉན་རང་འགོགས་པར་ཞུགས་པ་ལ་གཟུགས་སྐུའི་འགྲོ་དོན་མཛད་པ་མི་འབྱུང་བ་བཞིན་དང༌། དེ་ཡི་ཆོས་ཀུན་སྒྱུ་མ་ལྟ་བུ་དང༌། སྐྱེ་བ་སྐྱེད་མོའི་ཚལ་འགྲོ་ལྟར་རྟོགས་ནས། ཞེས་པ་ལྟར། ཤེས་པས་སྲིད་ལ་མི་གནས་ཤིང༌། སྙིང་རྗེའི་ཞི་ལ་མི་གནས་པ་ནི་རྒྱལ་སྲས་སྤྱིའི་ལམ་ཆེན་ཡིན་པས་ནམ་ཡང་ཏིང་ངེ་འཛིན་གསུམ་ཡ་མ་བྲལ་བ་ནི་གནད་ཆེ་སྟེ། དེང་སང་བསྐྱེད་རིམ་ལ་གོམས་ཆ་ཅུང་ཟད་བྱས་པ་ཕལ་ཆེར་འཆི་ཁ་ཞེ་སྡང་དྲག་པོ་རེས་གསོས་བཏབ་ནས་གཤིན་རྗེའི་འཇིག་རྟེན་དུ་སྐྱེས་ཏེ་རུ་དྲར་གོལ་ནས་སེམས་ཅན་ལ་གནོད་པ་སྐྱེལ་བ་སྟོང་ཉིད་སྙིང་རྗེའི་སྙིང་པོ་ཅན་དུ་མ་གོམས་པའི་རྒྱུ་མཚན་གྱིས་ཡིན་ཏེ། སྟོང་ཉིད་ཀྱི་གོ་ཡུལ་ཡོད་པ། བསྐྱེད་རིམ་གྱི་གསལ་སྣང་ཐོན་པ། །བཟླས་པའི་གྲངས་འཁྱོལ་བ་དུ་མ་རྒྱལ་འགོང་དུ་སྐྱེས་པ་ནི་མཐོང་ལ། སྙིང་རྗེ་ཆེན་པོའི་རྩི་དང་མ་བྲལ་བའི་གདུག་འདྲེ་ནི་གང་དུའང་མ་མཐོང་བའོ། །གཉིས་པ་རྐྱེན་མ་འཁྲུལ་བ་ཇི་ལྟར་བསྒོམ་པའི་ལམ་ལ། །དབང་པོའི་རིམ་པ་དང་བསྟུན་ནས་ལམ་མས་སྦྱང་དུ་སློབ་ཚུལ། བསྙེན་བསྒྲུབ་ཡན་ལག་བཞིའི་ཁོངས་སུ་རིག་འཛིན་བཞིའི་གོ་འཕང་ལ་སྦྱོར་ཚུལ་བཤད་པ་གཉིས། དང་པོ་ལ་ས་བཅད་བདུན་ལས་དང་པོ་གོ་སླ། གཉིས་པའི་སྐབས་སུ་འགྱུར་བའི་སྐྱོན་བཅུ་གཉིས་ནི། ལྷའི་སྣང་བ་གསལ་ཙམ་ལ་སྐུ་མདོག་དང་ཞལ་ཕྱག་སོགས་ཇི་བཞིན་མ་ངེས་པའི་རབ་རིབ། དཀར་དམར་མཐིང་ཁ་ལ་སོགས་པའི་ཁ་དོག་
གང་ཡིན་ཀྱང་གསལ་འཚེར་བཀྲག་མདངས་དང་ལྡན་པ་ཉི་མ་སྟོང་གི་འོད་བཀྲག་ལྟ་བུའི་གཟི་བྱིན་བཟོད་པར་དཀའ་བ་མ་ཡིན་པར་དཀར་མོག་དམར་མོག་ལྟ་བུར་སྣང་བ་དཀར་དམར་ལ་སོགས་པའི་མི་ཕྱེད་པ་མོག་མོག །ལྷའི་གསལ་སྣང་ལ་བློ་བཞག་ཚེ་ཡིད་ངོར་གྲིབ་མ་ལྟ་བུའི་མུན་པས་འགེབས་པའམ་མིན་ཀྱང་ཕྱག་ཞབས་ཀྱི་ཕྲ་སྦོམ་ཞལ་དང་སྤྱན་གྱི་ཡངས་དོགས་ཀྱི་དབྱིབས་ཕྱེད་པར་མི་འཆར་བ་ཐོ་ཡོར་རམ་གྲིབ་མ་ལྟ་བུའི་ཡོར་ཡོར་སྣང་གྲིབ་མ་ཅན། ནས་འབྲུ་ཙམ་བསྒོམ་ཀྱང་ཚོན་གང་ཙམ་དུ་འཆར་བ་ལྟ་བུ་དང་ཞི་བ་དང་ཁྲོ་བོའི་ལྷ་སྐུ་རང་རང་གི་ཕྱག་ཚད་ཐིག་ཁོང་ནས་འབྱུང་བ་ལྟར་མ་ཡིན་པར་ཆེ་ཆུང་ངུ་འགྱུར་བ་སོགས་ཚད་འགྱུར་བ། གར་གྱི་ཆས་དགུ་དང་ཞི་བའི་རྒྱན་ཆས་སོགས་བསྒོམ་པ་ལྟར་མི་འགྱུར་བར་ཆ་ལུགས་འགྱུར་བ། ཞི་བའི་ཞལ་ཏིལ་དབྱིབས་ལྟ་བུར་བསྒོམ་པ་ན་ལྷ་མོའི་ཞལ་དབང་དབྱིབས་ལྟ་བུར་འཆར་བ་དབྱིབས་འགྱུར་བ། ཞལ་གསུམ་པ་ལ་ཞལ་བཞི་དང༌། གཙོ་བོ་ཉུང་བའི་མང་པོ་འཆར་བ་ལྟ་བུ་གྲངས་འགྱུར་བ། སྐྱིལ་ཀྲུང་དང་ཕྱེད་སྐྱིལ་སོགས་བཞུགས་ཚུལ་འགྱུར་བ། ཁ་དོག་དཀར་དམར་སོགས་ཀྱི་དབྱེ་བ་འབའ་ཞིག་སྣང་གིས་ཕྲ་སྦོམ་སོགས་དབྱིབས་མི་གསལ་བ། དབྱིབས་འབའ་ཞིག་སྣང་ཞིང་ཁ་དོག་མི་སྣང་བ། བསྡུ་རིམ་མ་བྱས་ཀྱང་རིམ་པར་མི་གསལ་དུ་འགྲོ་བ་རིམ་པར་ནུབ་པ། ཞལ་ཕྱག་དང་གཙོ་འཁོར་ལ་སོགས་རེ་རེ་གསལ་ཚེ་རྫོགས་པར་གསལ་མི་ནུས་པ་རྣམ་པ་མ་རྫོགས་པ་རྣམས་སོ། །དེ་དག་གི་གཉེན་པོ་ཞི་བའི་ཚུལ་
དགུ་ནི། སྐུ་དང་ཞལ་ཕྱག་སོགས་གྱོང་ཁེངས་རུས་པ་དང་ཤིང་ལྟ་བུ་མ་ཡིན་པར་མཉེན་པ། ཕྲ་སྦོམ་་སོགས་རིམ་པར་སྐབས་ཕྱེད་པས་ལྷུགས་པ། སྐུ་ཤ་ལྷོད་པོར་མགྱུར་བས་འཁྲིལ་བག་ཆགས་པ། ཚིག་འཚམས་སོགས་འཕྲུལ་ལྡེམ་དང་ལྡན་པས་ལྡེམ་བག །སྐུ་ཤ་རྒྱས་ཤིང་ལྤགས་པ་སྲབ་པ་གཞོན་ཚུལ། ཁ་དོག་མ་འདྲེས་པར་གསལ་བས་གསལ་བ། དེ་དག་ཀྱང་མུ་མེད་པའི་འོད་ཟེར་འཕྲོ་འཚེ་རབ། སྐུ་སྐྱེས་སུ་ཆེན་པོའི་མཚན་དང་ལྡན་པའི་བརྗིད་བག་གྱིས་མཛེས་པ་ལྷུན་སྡུག་པ། ཐམས་ཅད་ཟིལ་གྱིས་གནོན་པའི་གཟི་བྱིན་ལྡན་པ་སྟེ་དགུ་དང༌། ཁྲོ་བོ་ལ། ཆགས་ཉམས་ཀྱི་སྒེགས་པ། ཁྲོ་ཉམས་ཀྱི་དཔའ་བ། རྨོང་ཉམས་ཀྱི་མི་སྡུག་པ་སྟེ་སྐུའི་ཉམས་གསུམ། ཧ་ཧ་དང་ཧི་ཧི་ལ་སོགས་བཞད་པའི་གད་མོ་འབྱིན་པ་དགོད་པ། ཟུང་ཤིག་རྒྱོབ་ཤིག་སོགས་གཤེབ། དེ་དག་ཀྱང་འབྲུག་སྟོང་དུས་གཅིག་འདིར་པའམ་ཐོག་སྟོང་དུས་གཅིག་ལྷུང་བ་ལྟ་བུའི་སྒྲ་གདངས་དང་ལྡན་པ་དྲག་ཤུལ་ཏེ་གསུང་གི་ཉམས་གསུམ། རྨོངས་པའི་འགྲོ་ཁམས་རྗེས་སུ་འཛིན་པའི་སྙིང་རྗེ། མ་རུང་བའི་སེམས་ཅན་ཁྲོ་བས་འདུལ་བའི་རྔམ་པ། ཐམས་ཅད་ཆོས་ཉིད་དུ་རོ་མཉམ་པའི་ཞི་བ་སྟེ་གར་དགུའོ། །གསུམ་པ་དང་བཞི་པ་གོ་སླ། ལྔ་པའི་སྐབས་གསལ་བརྟབ་གྱི་ཚད་བརྒྱད་ནི། དེ་ལྟར་ལྟ་གང་སྒོམ་ཡང་སྐུའི་སྣང་ཆ་སྤྱན་གྱི་དཀར་ནག་ཚུན་ཆད་མ་འདྲེས་པར་གསལ་བས་གསལ་ལེ། དེ་ཡང་རིག་པའི་
གསལ་ངར་དང་བྲལ་བའི་བྱིང་ཉམས་ཅན་མ་ཡིན་པ་གསལ་སྟོང་སེང་བག་དང་བཅས་པའི་རིག་པ་ངར་དང་ལྡན་པས་སེང་ངེ། བསྒོམ་པའི་ལྷ་དེ་དག་ཀྱང་སེམས་མེད་བེམ་པོའི་རྣམ་པ་འཇའ་ཚོན་ལྟ་བུ་མ་ཡིན་པར་བ་སྤུའི་ཁོང་བུ་དང་དབུ་སྐྲའི་ཉག་མ་ཚུན་ཆད་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་ཟིན་པས་དབང་ཤེས་དངས་པའི་ཡོན་ཏན་བརྒྱ་ཕྲག་ཏུ་འཆར་ཞིང་བཀྲ་ཧྲིག་གེ་བཞུགས་པས་ན་ལྷག་གེ། དེ་ལྟ་བུའི་ལྷ་སྐུ་དེ་ཡང་དེ་ལྟར་ཡིན་ནོ་དང་ཡོད་དོ་ཙམ་གྱི་རྗེས་དཔག་གི་བློ་རྟོག་མ་ཡིན་པར་ཡིད་ངོར་ན་མངོན་སུམ་ལྟ་བུ་བཀྲ་ལྷང་ངེ་འཆར་བ་ལྷང་ངེ་བ་སྟེ་གསལ་བའི་ཚད་བཞི། །བརྗེད་ངེས་དང་ལེ་ལོ་ལ་སོགས་ཕྱིའི་སྐྱོན་གྱིས་མི་གཡོ། རབ་རིབ་མོག་མོག་ལ་སོགས་འགྱུར་བའི་སྐྱོན་གྱིས་མི་འགྱུར། དེ་ཡང་ཡུན་ཐུང་ངུ་ཙམ་མ་ཡིན་པར་ཉིན་དང་མཚན་དུ་མཉམ་པར་བཞག་ཀྱང་རྣམ་རྟོག་ཕྲ་མོས་ཀྱང་མི་བརྫི་བར་གསལ་བ་མངོན་པར་མི་འགྱུར། སྐུ་མདོག་དང་ཞལ་ཕྱག་དང་བྱོན་བཞུགས་དང་འོད་ཟེར་སྤྲོ་བསྡུའི་རྣམ་པ་ལ་སོགས་ཇི་ལྟར་བསྒོམ་ཡང་དེ་ལྟར་འབྱུང་བ་ནི་ཅིར་ཡང་བསྒྱུར་དུ་བཏུབ་པ་སྟེ་བརྟན་པའི་ཚད་བཞི་དང་བརྒྱད་དོ། །ལར་ལྷ་བསྒོམས་པའི་དུས་གསལ་ཞིང་བཞག་པས་བཞག་བཏུབ་པ་ནི་ཡོན་ཏན་ཡིན་ཅིང༌། བསྒོམ་པའི་དུས་ཧ་ཅང་མི་གསལ་ཞིང༌། མ་སྒོམ་ཡང་ལྷ་སྐུའི་རྣམ་པ་ཡིད་ངོར་ལམ་ལ་མ་གསལ་བ་དང༌། གསལ་བའི་དེ་ཉིད་ལ་ཞེན་པ་ཡོད་ན་སྐྱོན་ཡིན་པས་གསལ་སྣང་གོམ་ནས་བསྡུ་རིམ་ལ་བྱང་དགོས་ཏེ། དེང་སང་ཕལ་ཆེར་ཐུན་རྗེས་མ་
ཙམ་མ་གཏོགས་བསྡུ་རིམ་མི་བྱེད་པ་དང༌། དུས་རྒྱུན་དཀྱིལ་འཁོར་གསུམ་དང་མ་བྲལ་བ་བྱེད་དགོས་པས་བསྡུ་རིམ་མི་བྱེད་ཟེར་བ་སོགས་ནི་བསྐྱེད་རྫོགས་ཀྱི་གནད་ཐུན་མོང་མ་ཡིན་པའི་ཕྱོགས་ཙམ་ཡང་མི་ཤེས་པ་དང༌། གྱ་ནོམ་ལྷར་ཞེན་གྱི་མཚན་འཛིན་ལ་སྐྱོན་དུམ་མཐོང་བའི་རྨོངས་པའི་རང་རྟགས་ཟང་མར་བསྟན་པར་ཟད་དོ། །དེས་ན་བསྡུ་རིམ་ནི། འཆི་བའི་བག་ཆགས་སྦྱོང་ཤིང་ཆོས་སྐུའི་རྟེན་འབྲེལ་སྒྲིག་པ་དང༌། སྒྱུ་ལུས་འོད་གསལ་དུ་བསྡུ་བའི་རྫོགས་རིམ་ལམ་གྱི་སྨིན་བྱེད་ཡིན་པར་མ་ཟད། སྤྱིར་རྡོ་རྗེ་ཐེག་པའི་ལམ་གྱི་ཡོན་ཏན་ཐམས་ཅད་རྡོ་རྗེའི་ལུས་ལ་གནད་དུ་བསྣུན་ནས་རྩ་རླུང་ཐིག་ལེ་དབུ་མར་འདུས་པའི་བྱེད་པ་ལས་སྐྱེ་བ་ཤ་སྟག་ཡིན་ཞིང༌། དཔེ་དོན་གྱི་འོད་གསལ་གང་རྒྱུད་ལ་བསྐྱེད་ཀྱང་འབྱུང་བའི་སྡུད་རིམ་ལས་རྟག་ས་བཅུའི་སྣང་བ་འཆར་ཞིང་རང་བཞིན་གྱི་ཐིམ་རིམ་ལས་སྣང་གསུམ་གྱི་འོད་གསལ་ཤར་བའི་ཀློང་དུ་ཐ་མལ་གྱི་འཁྲུལ་སྣང་ཐམས་ཅད་ནུབ་ནས་སྣང་གསུམ་འོད་གསལ་དུ་ཐིམ་པའི་གནས་སྐབས་ན་ཆོས་ཉིད་སྤྲོས་པ་དང་བྲལ་བའི་ཡེ་ཤེས་འཆར་བ་ཤ་སྟག་ཡིན་པས། མཚན་མོ་གཉིད་འཐུག་དང༌། རྨི་ལམ་གྱི་དགེ་སྦྱོར་ལ་བརྩོན་པར་འདོད་པ་དང༌། ཉིན་མོ་རལླུང་སེམས་དབུ་མར་འདུས་པའི་ཐབས་ལ་སྤྲོ་བ་ཡོད་པ་དང༌། ཐུན་མོང་མ་ཡིན་པའི་རྫོགས་རིམ་སྒྱུ་ལུས་འོད་གསལ་ལ་མངོན་དུ་བྱེད་འདོད་པ་དང༌། དེ་ལས་ཐ་མལ་གྱི་ལུས་རྟེན་དོར་ནས་
སློབ་པའི་ཟུང་འཇུག་གི་ལྷ་སྐུར་བཞེངས་འདོད་པ་དང༌། མཐར་ཐུག་མ་རིག་བག་ཆགས་ཀྱི་ས་བའི་ཡིད་ལུས་ཀྱང་འོད་གསལ་དུ་བསྡུས་ནས་མི་སློབ་པའི་ཟུང་འཇུག་གི་གོ་འཕང་མངོན་དུ་བྱེད་པར་འདོད་པ་དང༌། གལ་ཏེ་ཚེ་འདིར་མ་གྲོལ་ཀྱང་བར་དོ་དང་པོའི་འོད་གསལ་ཆོས་སྐུའི་དགོངས་པ་ལ་མཉམ་པར་བཞག་ནས་ཟུང་འཇུག་གི་ལོངས་སྤྱོད་རྫོགས་སྐུར་བཞེངས་པར་འདོད་པ་རྣམས་ཀྱིས་ནི་བསྐྱེད་རིམ་ལས་ཀྱང་བསྡུ་རིམ་ལ་དོ་གལ་དུ་བྱ་དགོས་སོ། །དེ་ལྟར་མ་ཡིན་པ་ཡི་དམ་གྱི་གསལ་སྣང་དང་སྤྲོ་བསྡུའི་དམིགས་པ་ཙམ་ལ་བརྟེན་ནས་འདྲེ་འདུལ་དང་བསྲུང་སྐྱོབས་ཀྱི་ཕྲིན་ལས་ཕྲན་བུར་རེ་སྒྲུབ་པར་འདོད་པ་རྣམས་ལ་ནི་ལས་ངན་གྱི་ལ་ཡོག་མ་ལྟུང་བར་དུ་མུ་སྟེགས་བྱེད་དང་ཐུན་མོང་བའི་གསལ་སྣང་དང་ང་རྒྱལ་དེ་གས་ཆོག་གོ །དེ་ལྟར་ཡིན་ཀྱང་ཁྱོད་ཀྱི་སྒྱུ་ལུས་དང་འོད་གསལ་ལ་སོགས་གསར་མ་དང་འདྲེས་པའི་ཆོས་སྐད་དེས་ཅི་བྱ་ཟེར་ན། གསང་བ་ཡོངས་རྫོགས་དང༌། ཧེ་རུ་ཀ་གལ་པོ་སོགས་རྒྱུད་སྡེ་མ་མཐོང་ཞིང་ནང་རྒྱུད་ཡོ་ག་གསུམ་གྱི་སྤྱི་གཞུང་མི་ཤེས་པའི་རྙིང་མ་པ་དེ་ཡང་ངོ་རེ་ཚའོ། །འོན་ཀྱང་སྔ་འགྱུར་ཐུན་མོང་མ་ཡིན་པའི་ཁྱད་ཆོས་ཐེག་རྩེ་རྡོ་རྗེ་རྩེ་མོའི་དབྱིངས་སུ་དགོངས་པའི་བཙན་ས་འཛིན་པར་འདོད་པ་ཡིན་ཟེར་ན་ནི། བསྐྱེད་རིམ་ལ་སོགས་པ་རང་བཞིན་བཅུའི་བློ་འཚུབས་ཀྱི་ཙབ་ཙུབ་དེ་ཡང་སྤོངས་ལ་རིག་སྟོང་ཟང་ཐལ་རྗེན་པ་ཆོས་དབྱིངས་རིན་པོ་ཆེའི་མཛོད་དུ་
ངལ་བསོས་ལ་རྫོགས་པའི་སངས་རྒྱས་དྲི་མེད་འོད་ཟེར་གྱི་རྗེས་སུ་སྤོགས་ཤིག་དང་ཁོ་བོའི་ཡིད་ལྷག་པར་རྗེས་སུ་ཡི་རང་བ་ཡིན་ནོ། །དྲུག་པ་ནི་གཞུང་ན་གསལ་བ་ལྟར་དང༌། བདུན་པ་ལྷ་དོན་ལ་སྦྱར་བ་ནི། བསྐྱེད་རིམ་གྱི་བོག་འདོན་ནམ། ཉེ་རྒྱུའི་སྤྱོད་པས་མཚམས་སྦྱར་བ་ཞེས་བྱ་བ་དེ་ཡིན་ཏེ། དེ་ལྟར་བསྐྱེད་རིམ་སྒོམ་པའི་དོན་པོ་སྤྱོད་པའི་དུས་གྲངས་ངེས་པའི་མཚམས་སྦྱོར་གྱི་རྣལ་འབྱོར་ལ་བསྟེན་ནས་འཇིག་རྟེན་པའི་ལམ་གྱི་ལ་དོར་ནས་འཇིག་རྟེན་ལས་འདས་པ་མཐོང་ལམ་ཕྱག་རྒྱ་ཆེན་པོ་མཆོག་གི་དངོས་གྲུབ་ལ་དངོས་སུ་སྦྱོར་བས་ན་སྤྱོད་པས་ལ་དོར་ཞེས་པའི་དོན་ཡང་འདི་ཡིན། དེས་ན་ཤིང་རྟ་བཟང་པོར་བསྐྱེད་རིམ་ལ་སོགས་པའི་ལམ་རྣམས་ཇི་ལྟར་བཟང་ཡང་རང་རང་གི་ངོ་ག་དེས་མི་གྲོལ་གྱིས་བོག་འདོན་སོགས་ལ་བརྟེན་དགོས་པར་གསུང་བ་ལྟར་བསྐྱེད་རིམ་གྱི་ལམ་དུ་གསལ་བརྟན་གྱི་ཚད་བརྒྱད་གྱད་དུ་གྱུར་པ་ཞིག་ཡིན་ཀྱང་སྲོག་སྡོམ་གཟེར་བཞིའི་མན་ངག་ལ་བསྟེན་ནས་སྤྱོད་པས་འོག་མ་དབྱུང་ན་འབྲས་བུ་རིག་འཛིན་ལ་སྦྱོར་བ་ནི་མི་སྲིད་པ་ཡིན་པས། དེས་ན་ལྷ་དོན་ལ་སྦྱར་བ་ཞེས་བྱ་བ་འདིའི་སྐབས་སུ་ལམ་ངེས་རྫོགས་སུ་བསྒོམ་ནས་དེ་ཏིང་སྟོང་པ་ཆེན་པོ་ནས་དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ཕྱག་རྒྱ་སྤྲོས་བཅས་ཀྱི་བར་རིམ་པས་གོམས་པར་བྱས་ཤིང་གསལ་བརྟན་གྱི་ཚད་བརྒྱན་གྱད་དུ་གྱུར་པ་ཞིག་ཡིན་ན་ནི། འདིར་
སྤྱོད་པའི་དུས་གྲངས་ངེས་པའི་ལམ་ཞེས་བྱ་སྟེ། ཟླ་དྲུག་བཅུ་བཞི་བཅུ་དྲུག་གིས། དབང་བསྒྱུར་རིགས་ཀྱི་དམ་པ་འགྲུབ། ཅེས་པ་ལྟར་ཟླ་དྲུག་སྤོག་ཆོག་དང་བཅས་པས་རིག་འཛིན་གྱི་གོ་འཕང་ལ་མི་སྦྱོར་མི་སྲིད་པ་ཡིན་ལ། དེ་ལྟར་མིན་ཀྱང་བསྐྱེད་རྫོགས་ཀྱི་ལམ་གནད་མ་འཆུགས་པར་ཤེས་ཤིང༌། སྲོག་སྡོམ་གཟེར་བཞིའི་མན་ངག་ལ་བསྟེན་ནས་དང་པོ་ཉིད་ནས་བསྙེན་བསྒྲུབ་དང་འབྲེལ་པར་ལམ་མོས་བསྒོམ་དུ་བྱེད་པ་རྣམས་ཀྱང་བྱས་པའི་ཆོས་ལ་གྲུབ་པའི་མཐའ་དགོས་ཞེས་པ་ལྟར་བློ་ཚོད་དང་བསྟུན་པའི་ཡོན་ཏན་ཅི་རིགས་པ་རྒྱུད་ལ་སྐྱེ་བ་ཡིན་ལ། དེ་ལས་གཞན་དུ་བསྐྱེད་རྫོགས་ཀྱི་གནད་ལ་རྒྱབ་ཀྱིས་ཕྱོགས་ཏེ་བསྙེན་བསྒྲུབ་ཏུ་མིང་བཏགས་ནས་ལོ་འཚམས་ཀྱི་སྡུག་ཡུས་འདྲེན་པ་དང༌། སྙིང་པོ་དུང་ཕྱུར་སྐྱེལ་བ་སོགས་ལ་ལམ་རྟགས་ཀྱི་ཡོན་ཏན་ཐུན་མོང་གི་དྲོད་ཙམ་ཡང་མེད་པ་ནི་ལམ་གྱི་གནད་དོན་སྟོར་ནས་གཟུགས་བརྙན་ལ་སྙིང་རུས་བསྐྱེད་པའི་ལག་རྗེས་ཡིན་ནོ། །འདིའི་ཏིང་འཛིན་ལྷའི་གཟེར་གྱི་སྐབས་སུ་ཡུལ་གསུམ་གྱད་དུ་གྱུར་པ་ཞེས་པ་ནི། དང་པོ་བསམ་པའི་ཡུལ་དུ་གསལ། གཉིས་པ་མཐོང་བའི་ཡུལ་དུ་གསལ། གསུམ་པ་རེག་པའི་ཡུལ་དུ་གསལ། ཞེས་པའམ། དང་པོ་ཡིད་ཀྱི་ཡུལ་དུ་གསལ་བ། གཉིས་པ་དབང་པོའི་ཡུལ་དུ་གསལ་བ། གསུམ་པ་ལུས་ཀྱི་ཡུལ་དུ་གསལ་ཞེས་པའི་དོན་ནོ། །དང་པོ་ལྷར་སྣང་ལ་གོམས་པ་མ་སྐྱེས་པའི་གནས་སྐབས་ན་བསམ་པའི་བློ་རྟོག་གམ་ངག་
གི་བརྗོད་པ་ཙམ་གྱིས་བདག་ལྷ་ཡིན་ནོ། །ལྷ་ཡང་དེ་དང་དེ་ལྟ་བུའི་ཡིན་ནོ་སྙམ་དུ་རྟོག་དཔྱོད་ཀྱི་བློ་ངོར་གསལ་བས་ན་བསམ་པའི་ཡུལ་དུ་གསལ་བའམ་ཡིད་ཀྱི་ཡུལ་དུ་གསལ་བ་ཞེས་བྱ། །དེ་ལྟར་གོམ་པའི་ལྷ་སྣང་ལ་བརྟན་པ་ཐོབ་ནས་འདི་ལྟར་ཡིན་ནོ་པའི་རྟོག་དཔྱོད་རྒྱས་འདེབས་མི་དགོས་པ་མིག་གི་དབང་པོ་སྐྱོན་མེད་ཀྱིས་ཡུལ་ལ་བལྟས་པ་ལྟར། རྟོག་མེད་ཞི་གནས་ཀྱི་རྩི་དང་མ་བྲལ་བའི་ངང་ནས་སྣང་ཆ་སྦྱན་གྱི་དཀར་ནག་ཚུན་ཆད་མ་འདྲེས་པར་གསལ་བ་ནི་མཐོང་བའི་ཡུལ་དུ་གསལ་བའམ་དབང་པོའི་ཡུལ་དུ་གསལ་བ་ཞེས་བྱ། མཐར་བསྐྱེད་རིམ་གྱད་དུ་གྱུར་ཏེ་རྣམ་སྨིན་རིག་འཛིན་ལ་སྦྱོར་བའི་དུས་སུ་སྣང་ཆ་ལྷའི་དཀྱིལ་འཁོར་དང་འདྲེས་ནས་རང་ངོར་ཐ་མལ་མ་དག་པའི་སྣང་བ་གཏན་དུ་མི་འཚང་ཞིང་སྒྱུ་ལུས་སམ་ཟུང་འཇུག་གི་ལྷ་སྐུ་མངོན་དུ་གྱུར་པའི་གནས་སྐབས་ནི། ལུས་ཀྱི་ཡུལ་དུ་གསལ་བའམ་རེག་པའི་ཡུལ་དུ་གསལ་བ་ཞེས་བྱ། འདིར་སྲོག་སྡོམ་གཟེར་བཞིའི་མན་ངག་ནི། འཁོར་འདས་ཀྱི་སྟོང་སྲོག་ལ་དབང་བསྒྱུར་བའི་མན་ངག་གི་གནད་ཡིན་ཏེ་དེ་ཡང་མར་འཁོར་བའི་གནས་སྐབས་ན་ལུས་ངག་ཡིད་གསུམ་བྱ་བ་དང་བཅས་པ་ཡར་སངས་རྒྱས་ཀྱི་གནས་སྐབས་ན་སྐུ་གསུང་ཐུགས་ཕྲིན་ལས་དང་བཅས་པ་དབྱེར་མེད་དུ་ལྟོ་སྦྱར་ནས་སྲོག་གཟེར་བུས་བསྡམས་པ་ལྟ་བུའི་གནད་ལ་འདྲིས་པའི་ཚེ་ན་འཁོར་འདས་ཐམས་ཅད་ལ་རང་དབང་བསྒྱུར་ནས་མ་དག་པའི་སྒོ་གསུམ་སྐུ་གསུང་ཐུགས་སུ་དག་སྟེ་ཞི་རྒྱས་དབང་དྲག་གི་ཕྲིན་ལས་བསམ་
གྱིས་མི་ཁྱབ་པས་ད་ལྟ་ཉིད་ནས་སངས་རྒྱས་ཀྱི་མཛད་པ་སྒྲུབ་པ་ཡིན་པས་བསྐྱེད་རིམ་ལམ་གྱི་གནད་དོན་ནི། སྲོག་སྡོམ་གཟེར་བཞི་ཡིན་ལ། འདི་དང་བྲལ་བའི་ལམ་གཞན་ནི། ཡུགས་བརྐྱང་བ་ཞེས་བྱ་སྟེ། ཡུག་པ་ནི་རྐང་པའི་མིང་སྟེ། རྐང་པ་བརྐྱང་བའམ་ཐང་ཆད་པ་དོན་གཅིག་ལ། དོན་དུ་ངལ་ཞིང་དུབ་པ་ཙམ་ཁོ་ན་འབྲས་བུར་ཟད་དོ། །དེར་མ་ཟད་པ་སྒོམ་བྱའི་ལྷ་ལ་ཡེ་ཤེས་དང་འཇིག་རྟེན་པར་དབྱེ་བ་ཡང་སྟོང་ཉིད་རྟོགས་མ་རྟོགས་ལས་ཡིན་པས། དགོངས་པ་མི་འགྱུར་བ་ཆོས་ཉིད་ཀྱི་གཟེར་དང་ལྡན་ན་ནི་རྣམ་པ་འཇིག་རྟེན་གྱི་དྲེགས་པ་ལྟར་སྣང་བ་རྣམས་ཀྱང་བདག་བསྐྱེད་དུ་བྱར་ཡང་རུང་ལ། དེས་ཀྱང་མཆོག་གི་དངོས་གྲུབ་ཀྱང་སྟེར་བར་ནུས་སོ། །དགོངས་པ་མི་འགྱུར་བའི་གཟེར་མེད་བར་ལྷ་དང་རང་རྒྱུད་ཐ་དད་དུ་བལྟ་བའི་རིགས་ཅན་གྱིས་ནི་འཇིག་རྟེན་ལས་འདས་པའི་ཡི་དམ་བསྒོམ་ཡང་མཆོག་གི་དངོས་གྲུབ་སྟེར་མི་ནུས་ལ། ཁྲོ་ཆགས་ཀྱི་རྣམ་བར་བློ་འབྱོངས་པས་འཕྲལ་དུ་ཡང་རང་གི་རྒྱུད་མ་རུང་བར་འགྱུར་ཏེ་གདུག་རྩུབ་སོགས་སུ་ལས་ཆེ་ཞིང་སྙིང་རྗེ་མེད་པའི་དམར་ཆོག་སོགས་ཀྱིས་འཇིག་རྟེན་གྱི་འབྱུང་པོ་མཐུ་བོ་ཆེ་རྣམས་འགྲུབ་ཏེ་རང་ཉིད་ཀྱང་དེའི་དབང་དུ་སོང་ནས་གསང་སྔགས་སུ་བཏགས་ཀྱང་དོན་འབྱུང་པོའི་ཆོས་ལུགས་ཞེས་དུས་འཁོར་དུ་སྤངས་པ་བྱར་བསྟན་པ་དེ་ཁོ་ནར་སོང་ནས་བདུད་དང་སྲིན་པོར་གོལ་བ་དེ་འབྱུང་བ་ཡིན་ནོ། །ས་བཅད་བདུན་པ་སྤྱོད་ཡུལ་ལམ་དུ་ཁྱེར་བ་ནི་ཤེས་
སླའོ། །གཉིས་པ་བསྙེན་བསྒྲུབ་ཡན་ལག་བཞིའི་ཁོངས་སུ་རིག་འཛིན་བཞིའི་ས་ལམ་བགྲོད་ཚུལ་བསྟན་པ་ནི། སྤྱིར་བསྙེན་བསྒྲུབ་ཡན་ལག་བཞི་པོ་འདི་ཆོ་ག་ཚར་གཅིག་ལ་སྦྱར་བ་དང༌། སྒྲུབ་པའི་དུས་གྲངས་དང་སྦྱར་བ་སོགས་གང་ལྟར་སྦྱར་ཡང་རུང་མོད་ཀྱིས་འདིར་ལམ་གྱི་རིམ་པ་དང་སྦྱར་ནས་སྟོན་པ་སྟེ། དེ་ཡང་ཚོགས་ལམ་དུ་དབང་བསྐུར་གྱི་ལྷ་ངོ་བསྟན་ནས་གཏད་དེ་དབང་སྲོག་དམ་ཚིག་དང་མི་འགལ་བའི་སྒོ་ནས་ཡི་དམ་གྱི་ལྷ་དང་རང་རྒྱུད་དབྱེར་མེད་དུ་བསྙེན་ཏེ་ཚོགས་ལམ་གྱི་རྣལ་འབྱོར་བཞི་རྫོགས་ནས། །སྦྱོར་ལམ་དུ་སྤྱོད་པའི་བོག་འདོན་ལ་བསྟེན་པས་དྲོད་རྩེ་བཟོད་གསུམ་གྱི་ལམ་རྟགས་མངོན་དུ་བྱས་ནས་ཆོས་མཆོག་ཆེན་པོར་རྣམ་སྨིན་རིག་འཛིན་གྱི་གོ་འཕང་མངོན་དུ་བྱས་པ་ནི་བསྙེན་པ། མཐོང་ལམ་དུ་དོན་གྱི་འོད་གསལ་མངོན་སུམ་པ་རྒྱུད་ལ་སྐྱེས་ནས་འབྱུང་བ་སྙིགས་མའི་ལུས་ཡེ་ཤེས་ཀྱི་མེས་སྦྱང་ཏེ་སྐྱེ་འཆི་མེད་པའི་གོ་འཕང་བརྙེས་པ་ཡི་དམ་གྱི་ལྷ་དང་སྔ་རབས་ཀྱང་ཉེ་བས་ན་ཉེ་བསྙེན། བསྒོམ་ལམ་དུ་ཡི་དམ་གྱི་ལྷ་དང་རྣམ་པ་འདྲ་བའི་ཕྱག་རྒྱ་ཆེན་པོའི་རིག་འཛིན་མངོན་དུ་བྱས་ཏེ་རང་གཞན་གྱི་དོན་གཉིས་མཉམ་དུ་བསྒྲུབ་པས་ན་སྒྲུབ་པ། མཐར་ལམ་དུ་རང་དོན་ལམ་གྱི་རྩོལ་བ་ཆད་དེ་རྗེས་ཐོབ་དེ་བཞིན་གཤེགས་པ་དང་མཉམ་པའི་ཕྲིན་ལས་ཀྱི་འགྲོ་དོན་མཛད་པ་ནི་སྒྲུབ་པ་ཆེན་པོ་ཡིན་ནོ། །འདིའི་ཚོགས་ལམ་གྱི་སྐབས་སུ་འབྱུང་ལྔའི་རླུང་
དབུ་མར་ཞུགས་པའི་ཐུན་མོང་གི་རྟགས་ལྔ་ནི། ས་རླུང་དབུ་མར་ཞུགས་པས་དུ་བ་ལྟ་བུ། ཆུ་རླུང་དབུ་མར་ཞུགས་པ་སྨིག་སྒྱུ་ལྟ་བུ། མེ་རླུང་དབུ་མར་ཚུད་པས་མེ་ཁྱེར། རླུང་གི་རླུང་དབུ་མར་ཚུད་པས་མར་མེ། ནམ་མཁའི་རླུང་དབུ་མར་ཚུད་པས་ནམ་མཁའ་སྣང་སྟེ་ལྔ་པོ་ནི་སྣང་བའི་ཉམས་ཡིན་པས་དབང་པོའི་མངོན་སུམ་དུ་སྣང་ཞིང༌། མིག་གིས་གར་བལྟས་ཐམས་ཅད་དུ་བ་ལྟ་བུ་སྔོ་ཕྱུ་རུ་རུ་འོང་བ་དང༌། སྨིག་སྒྱུ་ལྟ་བུ་མེ་རེ་རེ་བྱེད་པ་དང༌། མེ་ཁྱེར་ལྟར་དམར་ཙིག་ཙིག་པ་དང༌། མར་མེ་འབར་བ་ལྟར་དམར་སེར་དུ་སྣང་བ་དང༌། སྤྲིན་མེད་པའི་ནམ་མཁའ་ལྟ་བུའི་དུམ་བུ་འཁོལ་བུར་སྣང་བ་སྟེ་དེ་དག་ཀྱང་གཙོ་བོ་མཉམ་བཞག་གི་སྐབས་ཁོ་ནར་སྣང་བ་ཡིན་ནོ། །སྦྱོར་ལམ་དྲོད་རྩེ་བཟོད་གསུམ་ནི་གོ་སླ་ལ། ཆོས་མཆོག་རྣམ་སྨིན་རིག་འཛིན་གྱི་སྐབས་སུ་རྒྱ་མིག་རྒྱ་ས་ཇི་བཞིན་དུ་ཞེས་པའི་རྒྱ་མིག་ནི་ཐེལ་ཚེའི་ངོའི་རི་མོ་དང༌། རྒྱས་ནི་ལ་ཅ་དང་སྦྲ་ཚིལ་སོགས་རྒྱ་འདེབས་ས་དེ་ཡིན་པས་དོན་དུ་ན་སཙྪ་སྐོལ་ཕོར་ནས་བྱུང་བའི་དཔེ་དང་སྦྱར་ཡང་འདྲ་སྟེ་སེམས་ལྷ་སྐུར་སྨིན་ཟིན་ཀྱང་རྣམ་སྨིན་གྱི་ལུས་རྟེན་དང་མ་བྲལ་བའི་དོན་ཡིན་ལ། དབང་བསྒྱུར་རིགས་ཀྱི་དམ་པ་ཞེས་པ་ནི། དབང་ཕྱུགས་ཆེན་པོ་ཞེས་པ་གཙང་རིས་ལྷའི་རྒྱལ་པོ་ཡིན་པས་དེ་དང་ཆ་མཐུན་པས་དྭངས་མ་འོད་ཀྱི་ལུས་རྟེན་འགྲུབ་ནས་གཟུགས་ཁམས་ཀྱི་ལྷ་དང་སྐལ་པ་མཉམ་པས་སམ། ཡང་ན་ཡི་
དམ་གྱི་ལྷ་རྫོགས་པའི་སངས་རྒྱས་ལ་དབང་ཕྱུགས་ཆེན་པོ་ཞེས་བཤད་ཀྱང་ཆོག་གོ །ཚེ་དབང་རིག་འཛིན་གྱི་སྐབས་རྒྱུ་ཤེས་པའི་མཚན་ཉིད་ལྟ་བ་འཁོར་འདས་དབྱེར་མེད་ཀྱི་དོན་མཐོང༌། རྐྱེན་འཇུག་པའི་མཚན་ཉིད་ཏིང་ངེ་འཛིན་ཡིན་པས་ཚོགས་ལམ་གྱི་རྣལ་འབྱོར་བཞི་མཐར་ཕྱིན་པ་ཞིག་གིས། སྦྱོར་ལམ་ཚོམ་བུ་ཚོགས་སྒྲུབ་ལ་བརྟེན་ནས་སྤྱོད་པའི་བོག་འདོན་གྱིས་མཐོང་ལམ་ལ་སྦྱོར་བ་སྟེ་དེའི་ཚེ་ལུས་རང་དབང་མེད་པར་འདོར་བ་དང་ན་ཚ་ལ་སོགས་རང་དབང་མེད་པར་འབྱུང་བ་ལུས་ཀྱི་ཟག་པ། བསམ་གཏན་གྱི་སེམས་གྲུབ་ནས་བསམ་བཞིན་ཏུ་འདོད་ཁམས་སུ་སྐྱེ་བ་འཛིན་མི་ནུས་པ་ཁམས་ཀྱི་ཟག་པ། སྐྱེ་གནས་པ་ཞི་གང་རུང་དུ་རང་དབང་མེད་པར་འཇུག་པ་སྐྱེ་གནས་ཀྱི་ཟག་པ་གསུམ་ཟད་དེ་སྐྱེ་འཆི་མེད་པ་རྡོ་རྗེའི་ལུས་སུ་གྱུར་པ་ཡིན་ནོ། །ཆོ་འཕྲུལ་བཞི་ནི། དགོངས་འདུས་ལས་མི་འདྲ་བ་གཉིས་གསུངས་ཀྱང༌། ཀུན་བརྗོད། རྗེས་བསྟན། རྫུ་འཕྲུལ་གྱི་ཆོ་འཕྲུལ་གསུམ། ཆོས་སྣང་བའི་ཆོ་འཕྲུལ་དང་བཞི་པོ་འདི་འཆད་བདེ་སྟེ། དེ་ལྟར་ན་མངོན་པར་ཤེས་པས་གཞན་རྒྱུད་མཁྱེན་པ་ནི་ཐུགས་ཀུན་བརྗོད་པའི་ཆོ་འཕྲུལ། །རྫུལ་འཕྲུལ་གྱི་མི་དད་པ་དད་པར་བྱེད་པ་སོགས་གདུལ་བྱའི་སྣང་བ་བསྒྱུར་བ་ནི་རྫུ་འཕྲུལ་གྱི་ཆོ་འཕྲུལ། གདུལ་བྱ་གང་ལ་གང་འདུལ་དུ་ཐེག་གསུམ་གྱི་ཆོས་སྟོན་པ་ནི་གསུང་རྗེས་སུ་བསྟན་པའི་ཆོ་འཕྲུལ། །དེ་ལྟར་ཆོས་སྟོན་པའི་ཚེ་ས་ཆེན་པོ་རྣམ་པ་དྲུག་ཏུ་གཡོ་བ་དང༌།
ལྟས་ཆེན་པོ་བཅོ་བརྒྱད་སྣང་བ་ལ་སོགས་པ་ནི་ཆོས་སྣང་བའི་ཆོ་འཕྲུལ་སྟེ་བཞི་ཡིན་ནོ། །བསྒོམ་ལམ་ཕྱག་ཆེན་རིག་འཛིན་གྱི་སྐབས་སུ་ས་དགུའི་དྲི་མ་ཞེས་པ་ནི་ས་གཉིས་པ་ཡན་ཆད་ཀྱི་བསྒོམ་ལམ་ས་དགུ་ཐུན་མོང་པ་ཡིན་ནོ། །མཐར་ལམ་ལྷུན་གྲུབ་རིག་འཛིན་གྱི་སྐབས་སུ་སངས་རྒྱས་ས་ཡི་ཤེས་རབ་གསུམ་ཞེས་པ་ནི་རིག་པ་གསུམ་དང་དོན་གཅིག་སྟེ། རྒྱ་ཆེ་རོལ་པ་ལས་བདག་ཅག་གི་སྟོན་པས་བྱང་ཆུབ་མངོན་དུ་མཛད་པའི་ཚེ་རིག་པ་གསུམ་པ་རྙེས་པར་གསུངས་པ་ལྟར་སྔོན་གྱི་མཐའི་བསྐལ་བ་བསམ་གྱིས་མི་ཁྱབ་པ་མཁྱེན་པ་སྔོན་གནས་རྗེས་དྲན་མཁྱེན་པའི་རིག་པ། སེམས་ཅན་གཞན་མ་ལུས་པ་འདི་ནས་ཤི་འཕོས་ནས་འདིར་སྐྱེ་ཞེས་པ་ལྟ་བུ་འཆི་འཕོ་དང་སྐྱེ་བ་བསམ་གྱིས་མི་ཁྱབ་པ་མཁྱེན་པ་འཆི་འཕོ་དང་སྐྱེ་བ་བསམ་གྱིས་མི་ཁྱབ་པ་མཁྱེན་པ་འཆི་འཕོ་དང་སྐྱེ་བ་མཁྱེན་པའི་རིག་པ། རང་གཞན་གྱི་རྒྱུད་ཀྱི་ཟག་པ་ཟད་མི་ཟད་ཐམས་ཅད་ཇི་བཞིན་དུ་མཁྱེན་པ་ནི་ཟག་པ་ཟད་པའི་རིག་པ་ཡིན་ཏེ། རིག་པ་གསུམ་པོ་འདི་ཉན་རང་དང་བྱང་སེམས་རྣམས་ལ་རྗེས་མཐུན་པ་ཙམ་ཡོད་ཀྱང་རྫོགས་པའི་སངས་རྒྱས་ཀྱི་རིག་པ་གསུམ་ནི་མཐར་ཕྱིན་པའམ་ཡོངས་སུ་རྫོགས་པ་ཡིན་པས་དེ་འདྲ་བ་གཞན་མེད་དོ། །ཐུན་མོང་མ་ཡིན་པའི་མཚན་དཔེ་ནི་རྒྱུད་བཤད་ལས་འབྱུང་བ་ལྟར་ཏེ། རང་སྣང་འོག་མིན་གྱི་ཞིང་དུ་ཡེ་ཤེས་གཅིག་གི་རྣམ་རོལ་ལས་ཞིང་དང་གཞལ་ཡས་གཙོ་འཁོར་ལ་སོགས་པར་སྣང་བའི་སྐབས་སུ་འཁོར་རིགས་ཆུང་གི་སེམས་དཔའ་བཅུ་དྲུག་ཡུམ་དང་བཅས་པ་ནི་མཚན་དང༌། ཡབ་རྣམས་ལ་
དབུ་རྒྱན་གྱི་ལྷ་ལྔ་རེ་ཡོད་པ་ནི་དཔེ་བྱད་དེ་ནང་གི་མཚན་དཔེའོ། །ཡབ་ཡུམ་ཀྱི་དགའ་བར་ཞི་རེ་རེ་ལའང་ནང་གསེས་ཀྱི་དགའ་བ་བཞི་བཞི་སྟེ་བཅུ་དྲུག་ཕྲག་གཉིས་ནི་མཚན་དང༌། ཡབ་ཀྱི་དགའ་བ་རེ་རེ་ཡང་ཡེ་ཤེས་ལྔ་ལྔའི་རོ་ཉམས་དང་ལྡན་པས་བཅུ་དྲུག་པ་ཕྲག་ལྔ་དཔེ་བྱད་དེ་གསང་བའི་མཚན་དཔེ་ཡིན་ནོ། །མཛད་པ་བཅུ་གཉིས་འདི་ལ་འདྲ་མིན་འགའ་རེ་སྣང་རུང་རྒྱུད་བླ་མའི་ལུང་གི་རྗེས་སུ་འབྲང་བའམ། ཡོངས་གྲགས་པ་གཉིས་གང་ལྟར་བྱས་ཀྱང་ཆོག་གོ །སྤྱི་དོན་གསུམ་པ་འབྲས་བུའི་རྣམ་པར་བཞག་པ་ཟུང་འཇུག་གི་གོ་འཕང་ལ་འབྲས་བུའི་ངོ་བོ་སྤྱིར་བསྟན་པ་དང༌། སྔགས་ཀྱི་ཁྱད་ཆོས་བྱེ་བྲག་ཏུ་བཤད་པ་གཉིས་ལས། དང་པོའི་དོན་གཞུང་ནས་རྒྱས་པར་བཤད་པས་ཅུང་ཟད་གོ་སླ་ལ། དེ་དག་གི་དོན་ཚིག་འབྲེལ་དུ་བཤད་ན་ཧ་ཅང་མང་བར་འགྱུར་བས་མ་བྲིས་ལ་དཀའ་གནས་ཟུང་པ་ཡང་མེད་དམ་སྙམ་མོ། །གཉིས་པ་སྔགས་ཀྱི་ཁྱད་ཆོས་བཤད་པ་ནི། སྤྱིར་མདོ་སྔགས་གཉིས་པོ་ལམ་ཉེ་རིང་ཙམ་ལས་འབྲས་བུ་སངས་རྒྱས་ཀྱི་གོ་འཕང་ཐོབ་པ་ལ་ཁྱད་མེད་པར་བཞེད་པ་དང༌། གསང་སྔགས་རྡོ་རྗེ་ཐེག་པའི་ལམ་ལ་མ་བསྟེན་པར་མཐར་ཐུག་རྫོགས་པའི་བྱང་ཆུབ་ཀྱི་གོ་འཕང་མངོན་དུ་བྱེད་མི་ནུས་པར་འདོད་པ་དང༌། མདོ་ལམ་ནས་རང་ལམ་གྱི་ས་བཅུ་གཅིག་ཀུན་ཏུ་འོད་ཀྱི་སའི་བར་འགྲོ་ནུས་ཀྱང་མདོ་ལམ་གྱི་སངས་རྒྱས་བཏགས་པ་བདེས་སྔགས་སུ་བསྟན་པའི་སྐུ་དང་ཡེ་ཤེས་རྒྱ་མཚོའི་བདག་
ཉིད་ཟུང་འཇུག་རྡོ་རྗེ་འཆང་གི་གོ་འཕང་མཚན་ཉིད་པ་དེའི་དོད་མི་ཐུབ་པས་མདོ་སྔགས་ཀྱི་སངས་རྒྱས་ལ་ཁྱད་པར་དབྱེ་བའི་ལུགས་དང་གསུམ་ལས། ཕྱི་མ་གཉིས་པོ་འདི་ལེགས་པར་བརྟགས་ན་དགོངས་པའི་གནད་གཅིག་ཏུ་འབབས་པ་ཡིན་ཏེ། བཞེད་པ་སྔ་མས་ཀྱང་མདོ་ལམ་དུ་མི་སློབ་པའི་ལམ་བཅུ་གཅིག་ཀུན་ཏུ་འོད་ཀྱིས་སངས་རྒྱས་ཀྱི་གོ་འཕང་མཐར་ཐུག་གི་བསྒྲུབ་བྱར་བསྟན་པར་ནི་བཞེད་དགོས་ལ། མདོ་རང་ལམ་ནས་བཤད་པའི་འབྲས་བུ་དེ་ལམ་དེའི་ཐོབ་མི་ནུས་ན་ནི་ལམ་དང་འབྲས་བུ་ཡ་བྲལ་བ་མུ་སྟེགས་བྱེད་ཀྱི་ཐར་ལམ་ལྟར་འགྱུར་བས་མཚན་ཉིད་ཐེག་པ་ལ་སྐུར་བ་མི་བཟད་པ་བཏབ་པར་འགྱུར་ལ། ཕྱི་མས་ཀྱང་མདོ་ལམ་ནས་བཤད་པའི་སངས་རྒྱས་ཀྱི་གོ་འཕང་དེ་སྒྲུབ་ཟིན་ནས་སྔགས་ལམ་དུ་ད་བཟོད་ངེས་པ་ཞུགས་ཏེ་ཟུང་འཇུག་རྡོ་རྗེ་འཆང་གི་གོ་འཕང་ཐོབ་པ་ནི་བཞེད་དགོས་ལ། དེ་ལྟར་མ་ཡིན་པ་མདོ་ལམ་གྱི་སངས་རྒྱས་དེ་ཡང་རང་ལམ་གྱི་མཐར་ཐུག་པ་ཡིན་ཞིང༌། དེ་སྔགས་ལམ་དུ་མི་འཇུག་པར་བཞེད་ན་ནི་མཐར་ཐུག་ཐེག་པ་གཉིས་སུ་འགྱུར་ཞིང༌། སྔགས་ཀྱི་ཐེག་པ་ཐེག་པ་གསུམ་དུ་མི་འདུ་བའི་སྐྱོན་དུ་འགྱུར་རོ། །དེས་ན་བཞེད་པ་གཉིས་པོ་མཁས་གྲུབ་དུ་མའི་བཞེད་པ་ཡིན་ཞིང་ཁྱད་པར་མདོ་སྔགས་ཀྱི་སངས་རྒྱས་ལ་ཁྱད་འབྱེད་པ་ནི་སྒྱུ་འཕྲུལ་དང་མཚན་བརྗོད་ཀྱི་ལུང་གིས་ཀྱང་སྒྲུབ་ཏུ་ཡོད་ལ། འཕགས་ཡུལ་གྱི་སློབ་དཔོན་སངས་རྒྱས་ཡེ་ཤེས་ཞབས་ཀྱི་རྩལ་དུ་བཏོན་ནས་བཤད་ཅིང༌། དེ་ལས་གཞན་
པའི་ལུང་ཡང་དུ་མ་ཡོད་པས་གནས་སྐབས་ཀྱི་འདོད་པ་གྱི་ན་ཙམ་དུ་བལྟ་བ་ནི་མི་བྱའོ། །དེ་ལྟར་ཀུན་མཁྱེན་བརྒྱུད་པའི་ལེགས་བཤད་གཞུང༌། །ཚིག་གཅིག་ཐོས་པའི་སྐལ་བཟང་བསམ་འདས་ན། །འཆད་རྩོད་རྩོམས་པས་གཏན་ལ་འབེབས་པ་འདི། །བསྐལ་མར་བསོད་ནམས་མཐུ་ལས་ཡིན་ནོ་སྙམ། །དེ་སླད་ཐོས་དང་བསམ་དང་བསྒོམ་པ་ཡིས། །རང་བློ་ངེས་པ་རྙེད་པ་ཅུང་མེད་ཀྱང༌། །སྐལ་བཟང་དོན་མཐུན་འགའ་ལ་ཕན་བློ་དང༌། །རང་ཉིད་གོམས་པ་སྐྱེ་ཕྱིར་སྙམ་ནས་བྲིས། །ཐོས་པའི་མཐའ་རྒྱ་ཆོད་པའི་མཁས་པ་དང༌། །སྒོམ་པའི་ཉམས་མྱོང་ཡོད་པའི་རྣལ་འབྱོར་དང༌། །བརྒྱུད་པའི་མན་ངག་ཡོད་པའི་སྐལ་བཟང་རྣམས། །ཚུལ་འདི་གཟིགས་ནས་ཐུགས་བརྩེས་བྱི་དོར་མཛོད། །མ་རྟོགས་ལོགས་རྟོགས་ཕྱོགས་ཙམ་རྟོགས་པའི་དྲིས། །བསླབ་པའི་སྐྱོན་ཏུ་གྱུར་པ་ཚར་བཅད་ནས། །ཀུན་མཁྱེན་བརྒྱུད་པའི་ལེགས་བཤད་གསལ་ནུས་པའི། །གཞུང་བརྒྱ་འབྱེད་པར་མཁས་རྣམས་ཀུན་ལ་བསྐུལ། །འདི་དུ་ལེགས་པར་བཤད་པའི་ཆ་མཆི་ན། །དགེ་ཚོགས་ཐུབ་བསྟན་སྙིང་པོ་གསལ་བ་དང༌། །དེར་འཛིན་བཤད་སྒྲུབ་འཁོར་ལོས་དུས་འདའ་བའི། །མཆོག་གསུམ་ཡུན་ཏུ་གནས་པའི་རྒྱུ་རུ་བསྔོ། །ཞེས་པའང་སྐྱེས་སྦྱངས་ཀྱི་བློ་གྲོས་རྣམ་པར་གསལ་བ་དཔལ་རི་བ་ལྷུ་འགྲུབ་རྡོ་རྗེའི་བཀས་བསྐུལ་ངོར་བག་མེད་ཨ་བུ་ཧྲལ་པོས་གང་དྲན་དུ་བྲིས་པའོ།། །།དགེའོ།། །།སརྦ་མངྒ་ལཾ།།