རྣམ་བཅུའི་ཐིག་བཤད་བཻ་དཀར་ནས་གསུངས་པ་
རྣམ་བཅུའི་ཐིག་བཤད་བཻ་དཀར་ནས་གསུངས་པ་བཞུགས་སོ།། །།
འཇམ་དཔལ་སྒྱུ་དྲྭའི་ཆོས་དབྱིངས་ཡེ་ཤེས་ཀྱི་བསྟོད་པའི་སྟོད་ཆ་ལས། ཕ་རོལ་ཕྱིན་བཅུ་ཐོབ་པ་སྟེ། ཞེས་སོགས་གསུངས་པས། ཕར་ཕྱིན། ས། ཤེས་པ། སྟོབས། དབང་རྣམ་བཅུའི་རང་བཞིན་རྣམ་བཅུ་དབང་ལྡན་དང༌། དེ་ཡང་རྣམ་བཅུ་དབང་ལྡན་ནི་ངེས་དོན་གྱི་འཇིག་རྟེན་ཡིན་ཏེ། ཕྱི་ནང་གི་འཇིག་རྟེན་བཅུ་པོ་གང་ལས་འབྱུང་བ་དང་དག་མ་དག་གི་སྣང་བ་མཐའ་དག་རང་གི་ཤིན་ཏུ་ཕྲ་བའི་རླུང་སེམས་ཆོས་དབྱིངས་བཅས་ལས་འབྱུང་དེར་སྡུད་པ་འདིར་རྣམ་པ་བཅུ་ནི། རླུང་མེ་ཆུ་ས་རི་རབ་སྟེ་བརྟན་པ་རྣམ་པ་ལྔ། འདོད་གཟུགས་གཉིས་གཅིག་ཏུ་བྱས་པ་དང༌། ལྷག་མཐོང་མི་བསྐྱེད།
པ་གཟུགས་མེད་དང༌། བར་སྣང་གི་ཟླ་བ་ཉི་མ་གཉིས་ཏེ་གཡོ་བའི་རྣམ་པ་བཞི་ཀུན་ཁྱབ་སྒྲ་གཅན་གྱི་མིང་ཅན་ནམ་མཁའ་སྟེ་བཅུ་དང༌། འདི་རྣམས་གཞན་དཀྱིལ་འཁོར་ལ་བསྒོམ་པ་ནི། བརྟན་པ་ལྔ་མིང་ལྟར་དང༌། གཡོ་བ་རི་རབ་སྟེང་དུ་པདྨ། ཟླ་བ། ཉི་མ་སྒྲ་གཅན་རྣམས་ཡིན་ཞིང༌། ཁྱབ་བྱེད་ནམ་མཁའི་ཆོས་འབྱུང་ངོ༌། །མངལ་སྐྱེས་ཀྱི་མའི་ལུས་དང་སྦྱར་བའི་སྐབས་སུ་མའི་དཔྲལ་བར་རླུང༌། མགྲིན་པར་མེ། སྙིང་ཀ་ཆུ། ལྟེ་བ་ས་སྟེ་རི་རབ། གསང་གནས་པདྨ། མས་སྣའི་རྩ་གསུམ་ཟླ་བ་ཉི་མ་སྒྲ་གཅན། ལུས་རིམ་པ་ཀུན་གྱི་ཁྱབ་བྱེད་འདོད་ལ། ལུས་ཀྱི་སྐབས་སུ། སྐྲ་དང་
ཁ་སྤུ་ནམ་མཁའ་འམ། ཤ་ལྤགས་རླུང༌། ཁྲག་དང་དམར་ཆ་མེ། རྡུལ་དང་དྲི་ཆུ་ཆུ། རྐང་དང་རུས་པས། རྩ་དང་རླུང་ཡེ་ཤེས། རོ་རྐྱང་གཉིས། དབུ་མའི་ཡས་སྣ་དང་མས་སྣ་རྣམས། ཉི་མ་ཟླ་བ། སྒྲ་གཅན། དུས་མེ་སྟེ་རྡོ་རྗེ་བཞི་དང་སྦྱར་ནས་བཤད་དེ་རི་རབ་དང་བཅུད་ཀྱི་སེམས་ཅན་ལ་སྦྱར་ཞིང༌། ཕྱི་ནང་གཞན་ཀུན་གྱི་འབྱུང་སྡུད་ཀྱི་གཞི་ནི་ནང་ལུས་ལ་གནས་ལ། དེའི་ཡང་རྩ་བ་མཐར་ཐུག་ནི། ཤིན་ཏུ་ཕྲ་བའི་སེམས་དང་རླུང་དང་ཐིག་ལེ་རྣམས་ངོ་བོ་གཅིག་ཏུ་གྱུར་བ་ལ་གཞོམ་མེད་གཞིའི་དུས་འཁོར། ཆ་མེད་ཀུན་འགྲོའི་ཆོས་དབྱིངས་ཀྱི་རྟེན་དུ་གྱུར་བ་འདི་ཉིད་ཡིན་ལ། འདིའི་སྟེང་ན་ལུས་ཀྱི་རླུང་སོགས་ཁམས་རགས་པ་བཞི་དང༌། དེ་རྣམས་འདུས་པའི་རྩ་རླུང་རགས་པ་དང༌། ནང་གི་རྩ་ཁམས་ཕྲ་བ་དཀར་དམར་རྣམས་ཡེ་ཤེས་བཞི་དང༌། ཀུན་ལ་ཁྱབ་པའི་ནམ་མཁའ་རྣམས་ཀྱིས་ནུས་པ་ཁྱད་པར་བའི་ཆ་བཅུ། རང་གི་ཆོས་དབྱིངས་དང་བཅས་ཡོད་པ་ནི། ངེས་དོན་གཞིའི་རྣམ་བཅུ་དབང་ལྡན་ཡིན་ཞིང༌། དེ་རྣམས་ལས་ཡི་གེ་བཅུ་འགྲུབ་སྟེ། དེ་ཡང་ཕྲ་རིམ་གྱི་འགྲུབ་པས་ན་གཡོན་སྐོར་དུ་བརྩམ་པས་ཐིག་ལེ། ཚེག་དྲག་མ་ཡིག །ཨི་ཡིག །ཏི་ཨུ། ལྀ། མཱ། ཀྵ། ཧཱ་རྣམས་དགོད་བར་བྱ་ཞིང༌། དེ་རྗེས་དབྱངས་ཅན་མ་ལྟར་ན། ཨི་ཡ་ལོ་ཞེས་པའི་ཨི་ཡིག་ཡ་དང༌། ཨུ་ཝའོ་ཞེས་པས་ཨུའི་ཡི་གེ་ཝ། རི་རའོ་ཞེས་
པའི་རའི་ཡི་གེར། ལི་ལའོ་ཞེས་པའི་ལའི་ཡི་གེ་ཕ་རོལ་གྱིས་མཐོང་བའི་ལ་རུ་བསྒྱུར། དེ་བཞིན་དུ་ཨུ་ཝ་དང༌། རི་ར་དང༌། ཨི་ཡ་རྣམས་སུ་བསྒྱུར་ཞིང༌། དེ་རྣམས་དབྱིངས་ཀྱི་དམན་པ་ཕ་རོལ་ཏུ་ཡང་དག་པར་སྦྱོར་རོ། །ཞེས་ཡ་སྲོག་མེད་ཨའི་སྟེང་དང་དེ་ནས་རིམ་པར་ར་བ་ལ་མ་ཧ་ཀྵ་རྣམས་ལ་ཨ་ཡིག་གི་སྟེང་དུ་དྲངས་སྟེང་ཨ་ཡིག་སྲོག་ཏུ་བཅུག་པའི་སྟེང་དུ་ཚེག་དྲག་ཟླ་བྱེད་དུ་བྱས། ཐིག་ལེ་དཱའི་མཚན་པ་བསྣན་པས་རྣམ་བཅུ་དབང་ལྡན་གྱི་ཡི་གེ་འགྲུབ་ཅིང་དེ་ཡང་མས་ནས་ཡ་ར་ཝ་ལ་མ་ཀྵ་ཧ་བདུན་དང་དེའི་སྟེང་ཟླ་ཕྱེད་ཐིག་ལེ་གཉིས་ཏེ་དགུ། ཀུན་གྱི་སྲོག་ལ་ཨ་ཡིག་ཏེ་རྣམ་བཅུའོ། །དེ་བཅུ་ལས་གོང་དུ་བརྗོད་པའི་བརྟན་གཡོ་ཐ་སྙད་ཙམ་དུ་འགྲུབ་ཅིང་དེ་དག་མཐར་ཡི་གེ་བཅུ་དང༌། དེ་ཡང་གཞིའི་ངེས་དོན་གྱི་རྣམ་བཅུ་དབང་ལྡན་དང༌། ཤིན་ཏུ་ཕྲ་བའི་རླུང་སེམས་ཆོས་ཅན་དུ་གྱུར་པ་ལ་བསྡུས་ནས་དེ་ཐ་སྙད་ཐོག་མཐའ་མེད་པར་གནས་པ་དང༌། ལུས་ནུས་སྨིན་རིམ་གྱི་སྔར་བཞིན་འགྲུབ་ཅིང༌། འཕེན་པ་ཚར་གཅིག་གི་ནུས་པ་ཟད་ཚེ་སྡུད་ལ། དོན་དུ་ན་སྤྲོས་བྲལ་ཆོས་དབྱིངས་ཀྱི་རང་བཞིན་ལས་མ་འདས་སོ། ༈ །རྣམ་བཅུ་ནི། སྣ་ཚོགས་པདྨ་ཉི་མ་ཟླ་བ་དང༌། སྒྲ་གཅན་དུས་མེ་སོགས་ཀྱི་གདན་གྱི་སྟེང༌། རླུང་ཁམས་ཡ་ལྗང་ར་དམར་མེ་ཡི་ཁམས། ཝ་དཀར་ལྕགས་ཁམས་ལ་སེར་ས་ཡི་ཁམས། མ་ནི་སྣ་ཚོགས་ཁམས་ལས་གྲུབ་
པ་སྟེ། ཀྵ་ནི་ཆོས་ཀྱི་བདག་མེད་རྟོགས་གྱུར་པ། བདེ་སྟོང་ཧི་དཀར་སྐྱེ་མེད་དོན་སྟོན་པ། དེ་སྟེང་ཆུ་ཤེལ་ལས་གྲུབ་ཟླ་བ་དཀར། དེ་སྟེང་མེ་ཤེལ་ལས་གྲུབ་ཉི་མ་དམར། ན་དཱ་སྔོན་པོའམ་དུ་བའི་མདོག་ཅན་ནོ། །སྤྲིན་རི་སྨུག་པོ་པདྨའི་ཚད་དང་མཉམས། ཡིག་རྐང་མང་ཉུང་རྒྱ་གར་ཡུལ་རིག་ཁྱད། ཅེས་སོ། །ཕྱི་ནང་གཞན་གསུམ་དེ་ཉིད་དོན། །ཇི་བཞིན་གཟིགས་ཕྱིར་གུས་བཏུད་ནས། །དུས་གསུམ་རྒྱལ་བ་ཐམས་ཅད་དང༌། །ཁྱད་པར་དུས་ཀྱི་འཁོར་ལོ་ཡི། །སྙིང་པོ་རྣམ་བཅུ་དབང་ལྡན་མཆོག །ལཉྫ་ན་ཡི་ཡིག་གཟུགས་སུ། །བྲི་བའི་ཆ་སྙོམ་ཐིག་དང་ནི། །ཚོན་གྱི་ཁ་དོག་བཤད་པར་བྱ། །དེ་ཡང་ཅི་ཙམ་འདོད་པ་ཡི། །གཞི་དང་འཚམས་པའི་ངོས་འཇམ་ལ། །སྟེང་འོག་ཆ་ཕྲན་ཉི་ཤུ་དང༌། ཕྲེད་ལ་ཆ་ཕྲན་བཅུ་གཅིག་བཏབ། །སྟེང་ནས་རིམ་པ་བཞིན་དུ་ནི། །མགོ་བོར་ཆ་གསུམ་ཧ་ལ་གཉིས། །ཀྵ་དང་མ་ལ་ཆ་གསུམ་ཏེ། །ལ་ཝ་ཆ་ཕྲན་གཉིས་རེ་དང༌། །ར་ལ་གཅིག་དང་འ་ལ་གཉིས། །ཉི་གདན་པ་གཅིག་ཟླ་བ་དང༌། །སྒྲ་གཅན་གཉིས་ཀ་ཆ་གཅིག་སྟེ། །ཆ་ཕྲན་ཉི་ཤུ་དེ་ཡི་ཚང༌། །འཕྲེད་ལ་ཡི་གེའི་ཁོག་པ་རྣམས། །ཆ་ཆུང་གསུམ་དུ་ངེས་ན་ཡང༌། །ཆ་ཕྱེད་ཕྱི་ལ་འགྱེད་ན་མཛེས། །ཡ་ལ་རྐང་པ་གཉིས་ཡིན་ཏེ། །གཞན་རྣམས་རྐང་པ་རེ་རེའོ། །རྐང་པ་བརྒྱད་པོ་ཐམས་ཅད་ལ། །ཆ་ཕྲན་རེ་རེ་ཁོ་ན་བྱ། །ཉི་གདན་ཡིག་འབྲུ་གསུམ་ཙམ་བྱ། །སྟེང་གི་ཟླ་ཚེས་ཐིག་ལེ་དང༌། །འོག་གི་པད་གདན་ལ་སོགས་པ། །ཇི་ལྟར་མཛེས་པར་བྱེད་གསུངས་ཀྱང༌། །
ཟླ་ཚེས་ཐིག་ལེ་ན་དཱ་གསུམ། །ཆ་ཕྲན་རེ་རེའི་ཚད་ཙམ་བྱ། །འོག་གི་ཟེའུ་འབྲུ་ཆ་གཅིག་དང༌། །པད་གདན་ཆ་ཕྲན་གསུམ་ཙམ་མོ། །བསྡུས་པ་རྐང་པ་ལྔ་པ་ནི། །སྟེང་འོག་སྔ་མ་ཇི་བཞིན་དང༌། །འཕྲེད་ལ་ཆ་ཕྲན་དགུ་བྱས་པའི། །ཡི་གེའི་ཁོག་པ་ཆ་བཞི་དང༌། །རྐང་པ་ལྔ་པོ་ཆ་རེའོ། །ཟླ་ཉི་ལ་སོགས་གོང་དང་མཚུངས། །དེ་ཡི་རྒྱས་བསྡུས་གཉིས་ཀ་འགྲུབ། །ཧ་དང་ཀྵ་ལ་རྐང་པ་རེ། །ཡ་ལ་རྐང་པ་གཉིས་ཡིན་ཏེ། །གཞན་རྣམས་རྐང་པ་ཐམས་ཅད་གཅིག །རྐང་པ་ལྔ་པོ་དེ་ཡི་འགྲུབ། །