བྱང་ཆུབ་སེམས་དཔའི་སྤྱོད་ཡུལ་ཡོངས་སུ་དག་པའི་སྨོན་ལམ་ཚིགས་སུ་བཅད་པ།
བྱང་ཆུབ་སེམས་དཔའི་སྤྱོད་ཡུལ་ཡོངས་སུ་དག་པའི་སྨོན་ལམ་ཚིགས་སུ་བཅད་པ་བཞུགས་སོ།། །།
ཁྱིམ། སྲིད་པའི་གྲོང་ཁྱེར་སྡུག་བསྔལ་མཛོད་གང་བའི། །གནས་ལ་སྐྱོ་བར་གྱུར་དེ་དེའི་སེམས་ཅན། །ཞི་བའི་ལམ་དུ་བྲོས་པའི་དབུགས་འབྱིན་ནི། །ཐར་པའི་གྲོང་བཟང་གཅིག་ཏུ་གནས་གྱུར་ཅིག །ཉལ། ཚོགས་བརྒྱད་སེམས་ཀྱི་སྤྲིན་ཕུང་ཆོས་སྐུའི་ཀློང་། །ཐིམ་ནས་གཉིས་འཛིན་དབང་པོའི་འཆིང་གྲོལ་བའི། །ཟུང་འཇུག་དབྱིངས་ཀྱི་མལ་ནས་མི་གཡོ་བར། །དག་པའི་དབྱིངས་ལ་འགྲོ་འདི་གཟིམ་གྱུར་ཅིག༢། རྨི་ལམ། སྲིད་འདིར་བདེན་ཞེན་འཛིན་པ་མི་དམིགས་པར། །སྣང་སེམས་དངོས་པོ་དུཿཁ་ལྟ་ཅི་ཞིག །ཡང་དག་ཡེ་ཤེས་སྒྱུ་མའི་བཀོད་པ་ཡང་། །སྣང་སྟོང་རྨི་ལམ་ལྟ་བུར་ཤེས་གྱུར་ཅིག །སད། ཡེ་ཤེས་སྣང་བས་མ་བཟུང་སྲིད་པའི་མུན། །
མཁྱེན་གཉིས་ཉི་མས་གསལ་བས་དེ་མ་ཐག །ཐེག་གསུམ་ངེས་པར་འབྱུང་བའི་ལྷའི་རྔ་སྒྲས། །འགྲོ་འདི་མ་རིག་གཉིད་ལས་སློང་གྱུར་ཅིག །ལྔ་པ། ཞི་བའི་དབྱིངས་སུ་མི་མནལ་དེའི་སྙིང་རྗེ། །སྲིད་པའི་ཁམས་འདི་སྟོང་བར་བགྱིད་སླད་དུ། །ཟུང་འཇུག་ཐབས་ཤེས་རྐང་པས་འདེགས་བཞིན་པར། །མཐའ་གཉིས་སྟན་ལས་ངེས་པར་ལྡང་གྱུར་ཅིག །གྱོན། སྡོམ་གསུམ་བདུད་རྩི་བཏུང་བའི་ལམ་པའམ། །ལམ་མིན་གཡང་ལ་འཕྱན་པ་རྒྱུད་ལྔའི་འགྲོ། །སྨད་འོས་སྡིག་ལྟུང་ལམ་ལ་ངོ་ཚ་བའི། །ཁྲེལ་ཡོད་གོས་ཀྱིས་དཀྲིས་པ་ཉིད་གྱུར་ཅིག །སྐ་རག །མི་འབྲལ་སྨོན་པའི་མདུད་པ་ལྷོད་མིན་པར། །ཡང་དག་འཇུག་པ་དམ་པའི་སྐ་རག་ནི། །སྲིད་པའི་ལམ་གྱིས་འཆིང་བ་དེ་
མིན་པའི། །ཕུན་ཚོགས་དགེ་བའི་གནས་ལ་འབྲེལ་གྱུར་ཅིག །འདུག །གཉིས་འཛིན་རྐང་པས་མི་འདེགས་ཡེ་ཤེས་ལུས། །བགྲང་ཡས་ཏིང་འཛིན་སྐྱིལ་ཀྲུང་གིས་བརྟེན་པ། །ཞི་བའི་གནས་ལ་མི་འགྱུར་རྡོ་རྗེའི་སྟན། །དེ་རུ་འགྲོ་བའི་གཡོ་བར་མ་གྱུར་ཅིག །སྟན། བཀོད་ལེགས་ལྷ་བརྒྱས་མ་བྱས་དེར་ལེགས་སྨིན། །སྣ་ཚོགས་རིན་ཆེན་དྲྭ་བས་མྱུར་དཀྲིས་པས། །བྱང་ཆུབ་ལྗོན་པའི་ཁོ་ལག་སྲིད་པའི་ཁྱོན། །ཕྲོག་དེ་ཀུ་ཤའི་སྟན་ལ་གནས་གྱུར་ཅིག །མེ་གཏོང་། སྙིང་རྗེའི་རླན་གྱིས་མ་བཟུང་ཉོན་མོངས་ཤིང་། །ཡོན་ཏན་འདབ་མ་སྐམ་པའི་ཕུང་པོ་ནི། །སྒྲིབ་བྲལ་ཡེ་ཤེས་སྣང་བའི་མེས་བཅོམ་ནས། །ཤེས་ཉོན་སོལ་བའི་ཕུང་པོའང་སྟོང་གྱུར་ཅིག །འབར། རྟོག་པའི་བུད་ཤིང་ཟོས་པའི་ཏིང་འཛིན་མེ། །སྲིད་པའི་རྒྱུད་ལ་ཞུགས་པས་དེ་མ་ཐག །མཁྱེན་གཉིས་སྣང་བ་གཅིག་པའི་དམར་འོད་ཀྱིས། །ལུས་ཅན་རྨོངས་པའི་མུན་པ་འཇོམས་གྱུར་ཅིག །གཡོས། ཞི་བའི་རྣམ་གྲོལ་ཡེ་ཤེས་བདུད་རྩིའི་ཟས། །བརྩེ་ཆེན་གཡོས་སུ་བསྐོལ་བའི་ཕྲིན་ལས་ཆུད། །ཕྱོགས་ལྷུང་གྲང་བའི་རེག་པར་མི་འཛའ་བའི། །འགྱུར་མེད་ཐབས་མཁས་རླངས་པ་འཕྱུར་གྱུར་ཅིག །བཟའ། མངོན་ཤེས་ཡེ་ཤེས་བཅུད་སྟོང་སྲིད་པའི་ལྟོར། །འཁྲུལ་པའི་བཀྲེས་སྣང་མི་གཏོང་གླལ་
བའང་། །རྩེ་གཅིག་བསམ་གཏན་ཟས་ཀྱིས་ཚིམ་གྱུར་ནས། །ཡོན་ཏན་ལུས་བཟང་བཀྲག་པ་ཉིད་ཐོབ་ཤོག །འགྲོ། ཀུན་རྨོངས་མུན་པ་འཐིབ་པའི་ཁོ་ར་ཁོར། །སྡང་ཞེན་ཚེར་མ་བཀྲམ་པའི་ཕྱོགས་ལྷུང་ཁྱིམ། །གཉིས་འཛིན་རིས་སུ་བཅད་པའི་རིགས་དྲུག་གི །གྲོང་ལས་སྲིད་པའི་འགྲོ་འདི་ཐར་གྱུར་ཅིག །སྐས་བབ། ཞི་བ་ཆེན་པོ་ཆོས་སྐུའི་བ་གམ་ལས། །བརྩེ་ཆེན་ཕྲིན་ལས་འཇུག་པ་མི་གཡེལ་བའི། །ཐབས་མཁས་ཐེམ་པ་བརྩེགས་པའི་རྐང་སྟེགས་ལས། །བབ་ནས་འགྲོ་དོན་སྲིད་ན་བགྱི་གྱུར་ཅིག །སྒོ་འབྱེད། སྣ་ཚོགས་ཐེག་པའི་སྒོ་འཕར་བརྒྱ་ཕྲག་ནི། །ཕྱེ་ནས་ཡང་དག་ཐར་པའི་ཁྱིམ་གཅིག་པུར། །འཇུག་པའི་ཐབས་ཤེས་སྦུས་འབྱེད་བླ་མེད་སྒོ། །བྱང་ཆུབ་སེམས་ཀྱིས་འབྱང་ལས་ཐར་གྱུར་ཅིག །གཅོད། །བཟོད་དཀའ་བསྲེག་གྲང་བཀྲེས་རྨོངས་དུཿཁ་བརྒྱར། །མི་གཏོང་ངན་འགྲོའི་གྲོང་འཕྱན་དུག་གསུམ་སྒོར། །ཞུགས་ཤེས་ཡང་དག་སྤང་པའི་སྒོ་གླེག་གིས། །ཉེས་སྤྱོད་མི་དགེའི་བུག་པ་གཅོད་གྱུར་ཅིག །ལམ་ཞུགས། ཡང་དག་ལྟ་དང་རྟོག་དང་ངག་ལས་མཐའ། །འཆོ་རྩོལ་ཏིང་འཛིན་དྲན་ཤེས་མ་རྒལ་བའི། །འཕགས་པའི་གང་ཟག་བགྲོད་པའི་ལམ་གཅིག་པུར། །འཁོར་བའི་གྲོང་དུ་ངེས་པར་འཇུག་གྱུར་ཅིག །གྱེན་ལ། སྲིད་
ན་ངན་འགྲོའི་དུཿཁས་གང་མནར་པ། །གྱེན་དུ་མཐོ་རིས་དམ་པའི་ལམ་སྙེགས་ནས། །གོང་ནས་གོང་དུ་ཞི་བའི་ལམ་བགྲོད་དེ། །ཐར་བའི་རི་དབང་རྩེ་ནས་མཐོང་གྱུར་ཅིག །ཐུར་དུ། དེ་ན་སྤྱིའུ་ཚུགས་དང་སྣྲེལ་གཞི་ཡི། །འགྲོ་བའི་ལམ་ངན་དེར་སོང་གང་དང་གང་། །ཆགས་དང་ཞེ་སྡང་མི་བཟོད་རྨོངས་པའི་རྒྱུ། །སྤོང་ནས་ཐར་ལམ་འདྲེན་པ་དེར་གྱུར་ཅིག །འཕྲད་ན། སྒྲིབ་བྲལ་ཡེ་ཤེས་ཀྱིས་མཚོན་མཚན་དཔེའི་སྐུ། །མཐོང་ན་མི་མཐུན་མེད་པའི་ཁྱད་ཆོས་ཅན། །ཞི་གྱུར་རྫོགས་པའི་སངས་རྒྱས་དེ་ཁོ་ན། །རྟག་པར་ལྷར་བཅས་འགྲོ་འདིས་མཇལ་གྱུར་ཅིག །རྐང་མགྱོགས། སྲིད་པའི་རྒྱ་མཚོར་སྲེད་པའི་ཆུ་སྲིན་ཅན། །རྨོངས་པའི་འདམ་ན་སྡུག་བསྔལ་རླབས་གཡོ་དུས། །འགྲོ་འདི་སྒྲོལ་ལ་མཐུན་པར་རྐང་མགྱོགས་ཞིང་། །གཞན་དོན་བརྩོན་པ་ནམ་ཡང་ཉམས་མ་གྱུར། །རྐང་འདེགས། ཐབས་མཁས་རྐང་པ་ཤེས་རབ་མཐུས་འདེགས་པས། །སྨོན་པའི་ལམ་དུ་སྟོབས་ཀྱིས་དབང་བྱས་ཏེ། །དག་པའི་ཡེ་ཤེས་རྙོགས་པ་མི་མངའ་བའི། །འགྲོ་ཀུན་འཁོར་བའི་འདམ་ནས་འདོན་གྱུར་ཅིག །རྒྱན་ལྡན། གྲངས་མེད་ལས་བྱས་གྲངས་མེད་བསྐལ་གོམས་པའི། །ཟོང་འདི་བཀྲམ་ནས་ལྷ་དབང་མཛོད་བདལ་ནས། །སུས་ཀྱང་བཙོང་མིན་མཚན་དཔེའི་མཆོག་གི་རྒྱན། །སྲིད་པའི་
འགྲོ་འདིས་རང་དབང་བགྱིད་གྱུར་ཅིག༢༤། རྒྱན་མེད། འཕྱོར་ཕྱིར་མ་ཡིན་ངོ་ཚ་ཤེས་པའི་གོས། །རྒྱལ་བས་གནང་བའི་ཆོག་ཤེས་ཕྱགས་དར་ཁྲོད། །སྦྱངས་པའི་ཡོན་ཏན་དམ་པའི་ལམ་གནས་པ། །རྒྱགས་པས་བརྒྱལ་བའི་རྒྱན་དང་བྲལ་གྱུར་ཅིག །གང་བ། ལས་དང་ཉོན་མོངས་བགྲང་ཡས་སྲིད་པའི་རྒྱུད། །སྟོབས་དང་མི་འཇིགས་མ་འདྲེས་མཚན་དཔེ་བྱད། །འབྲས་བུ་ཡོན་ཏན་ཕ་མཐར་མི་དཔོགས་པས། །གང་བ་ཁོ་ན་ཀུན་གྱི་རྒྱུད་བགྱིད་ཤོག །སྟོང་པ། ལས་དང་ཉོན་མོངས་བགྲང་ཡས་སྲིད་པའི་རྒྱུར། །འགྱུར་དང་འདུ་བྱེད་མི་ཟད་སྣོན་འགྱུར་བའི། །འཁོར་བའི་སྐྱོན་ཉིད་ངེས་པར་ཟད་བྱེད་ཅིང་། །འགྲོ་བའི་སེམས་སྣོད་སྟོང་སྟེ་གང་མ་གྱུར། །དགའ་བ། ཐུབ་པའི་ལམ་ཉིད་ཐར་པའི་མཆོག་སྦྱིན་པའི། །ཐེག་པ་གཅིག་ཏུ་ཐོགས་པ་མེད་བགྲོད་པ། །ཐུགས་རྗེ་མངའ་བ་རྒྱལ་དང་རྒྱལ་སྲས་ཀྱི། །ཐབས་ཤེས་ཆོས་ལ་ཀུན་ཀྱང་དགའ་གྱུར་ཅིག །མི་དགའ། འདུས་བྱས་ཁམས་འདི་འཇིག་པར་འགྱུར་བ་སྟེ། །བྱས་དང་མི་རྟག་དངོས་པོ་རུ་གཅིག་པས། །བསླུ་བའི་སྒྱུ་འདིའི་རང་མཚང་གཏིང་མཐོང་ནས། །བྱིས་པའི་ལམ་ལ་དགའ་བར་མ་གྱུར་ཅིག །བདེ་བ། བདེ་བའི་ལམ་ལས་བདེ་བར་འགྲོ་གྱུར་པ། །བདེ་འགྲོ་ཙམ་མིན་བདེ་མཆོག་རྒྱལ་སྲས་ཏེ། །སྲིད་
བདེ་ཙམ་མིན་བདེ་ལྡན་ཞིང་བཞིན་དུ། །བདེ་གཤེགས་ལམ་ལས་བདེ་ཆེན་ཐོབ་གྱུར་ཅིག །སྡུག་བསྔལ། སྡུག་གུར་ཞེན་ལས་སྡུག་བསྔལ་མཚོར་ལྷུང་ཞིང་། །སྡང་བར་བལྟས་ལས་དགྲ་དང་འཕྲད་གྱུར་ལ། །འདོད་པ་མི་འགྲུབ་མི་འདོད་དེར་འདུ་བས། །སྡུག་བསྔལ་སྡོང་པོའི་རྩ་བ་གཅོད་གྱུར་ཅིག །ནད་པ། དུག་ལྔའི་དུག་དེས་འདུ་བ་བསྐྱེད་དཀྲུགས་པས། །སྒྲིབ་པའི་ལུས་ལ་གནོད་པའི་ནད་ཞུགས་པ། །ཡེ་ཤེས་སྨན་གྱིས་འཁོར་བའི་དུག་བཅོམ་ནས། །ནད་མེད་ཉི་མ་སངས་རྒྱས་དེ་མཐོང་ཤོག །དྲིན་གཟོ། རྒྱལ་བས་རྒྱལ་བའི་ལམ་བསྟན་དེའི་སྲས་པོ། །ལམ་དེ་ལེགས་པར་ལེན་ནས་གཞན་དོན་དུ། །དཀའ་བས་དཀོན་སར་ཕྱིན་ནས་དཀར་པོའི་ཆོས། །བསྟན་པ་བསྟན་པའི་དྲིན་གཟོ་དྲན་གྱུར་ཅིག །མི་གཟོ། །དོན་དམ་སྟོང་སྟེ་སྣང་བའི་རྒྱུ་འབྲས་ལས། །འདའ་བར་མི་འགྱུར་ཐུབ་དེའི་མཁྱེན་པ་སྟེ། །གཞན་དུ་སྟོན་གཞན་ལོག་པའི་ལམ་ཡིན་པར། །ཤེས་ནས་སུ་ཡང་དྲིན་གཟོར་མ་གྱུར་ཅིག །རྒོལ་བ། །ལོག་པའི་ལམ་ནི་ལེགས་པ་ལ་སྡང་སྟེ། །ལུགས་གཉིས་མཐུན་པར་རྒོལ་བའི་ལོངས་སྤྱོད་ལ། །རྒྱལ་བའི་བ་དན་རྒྱལ་བ་ཐུབ་པའི་རྗེས། །ངེས་པར་བསྒྲེང་ནས་ཆོས་སྒྲ་སྒྲོགས་གྱུར་ཅིག །བསྟོད་པ། ཡོན་ཏན་མཆོག་
གིས་ངེས་པར་གང་ཆེན་མཚོ། །ཐུབ་དང་དེ་སྲས་ཡོན་ཏན་རྒྱ་མཚོ་སྟེ། །ཡོན་ཏན་མཐོང་ནས་སྲིད་པའི་འགྲོ་ཀུན་ཀྱང་། །ཡོན་ཏན་བསྔགས་པ་ངེས་པར་སྒྲོགས་གྱུར་ཅིག །ཆོས་གཏམ། བགྲང་ཡས་བསྐལ་པར་ཆོས་ཀྱི་ཚུལ་གཅིག་ལས། །ངེས་པར་བརྩམ་སྟེ་མངོན་པར་འཆད་གྱུར་ཀྱང་། །ཟད་པར་མི་འགྱུར་ཡང་དག་རིག་པ་བཞིའི། །སྤོབས་པའི་མཛོད་བཟང་རྒྱལ་དང་མཉམ་གྱུར་ཅིག །སྐུ་གཟུགས། སྲིད་པའི་ལུས་ཅན་སྒྲིབ་པའི་ལིང་ཏོག་ལ། །ཡེ་ཤེས་མཐོང་བ་དག་པའི་སྨན་བཙལ་ནས། །ལྷར་བཅས་དྲེགས་ལྡན་སྤྱི་བོའི་ལ་ཐོད་ཆེས། །གང་ལ་བཏུད་ཀྱང་སྙེམས་པར་འགྱིང་མིན་ཏེ། །སྲིད་པའི་བསོད་ནམས་ཟོད་ལ་དེས་བསྐྱེད་པའི། །འགྲོ་བའི་མཆོད་རྟེན་རྒྱལ་བ་དེར་གྱུར་ཅིག །ཚོངས་པ། ལེགས་སྨོན་ཟོང་གིས་རྙེད་གྱུར་འཕགས་པའི་ནོར། །མཐའ་ཡས་མི་ཟད་དད་གཏོང་ཚུལ་ཁྲིམས་དང་། །ཐོས་དང་ཁྲེལ་ཡོད་ངོ་ཚ་ཤེས་ལྡན་ཞིང་། །ཤེས་རབ་ཕུན་ཚོགས་ཀུན་ལ་འབྱོར་གྱུར་ཅིག །ཕྱག་འཚལ། རྫུ་འཕྲུལ་ལུས་དང་གནས་ཀྱིས་མངོན་མཐོ་བའི། །དྲེགས་པས་ལྟ་བས་ལྟ་ཅི་དེའི་སྤྱི་གཙུག །མཐོང་བས་ས་བཅུའི་དབང་ཕྱུག་ཀྱང་མིན་པའི། །རྒྱལ་བའི་མཚན་བཟང་དེ་འདྲས་ཀུན་མཛེས་ཤོག །དགེའོ། །