རྒྱལ་བའི་རྒྱལ་ཚབ་སོགས་ཞབས་བརྟེན་ཁག
རྒྱལ་བའི་རྒྱལ་ཚབ་རྗེ་བཙུན་བླ་མ་མཆོག །སྐུ་ཚེ་བསྐལ་བརྒྱའི་བར་དུ་བརྡལ་བ་དང་། །ཕྲིན་ལས་རྣམ་བཞི་གསེར་གྱི་འཁོར་ལོ་ཡིས། །གླིང་བཞིའི་ཁྱོན་ཀུན་ཁྱབ་པར་དབང་བསྒྱུར་གསོལ། །མངྒ་ལཾ། ༈ བླ་མ་དཀོན་མཆོག་ཐུགས་རྗེའི་བྱིན་རླབས་ཀྱིས། །རྒྱལ་བའི་མྱུ་གུ་ཡུན་རིང་འཚོ་བཞེས་ཤིང་། །འབྲེལ་ཚད་བྱང་ཆུབ་སྙིང་པོར་དབུགས་དབྱུང་བའི། །ཕན་བདེའི་ཕྲིན་ལས་མཁའ་ཁྱབ་རྒྱས་པར་གསོལ། །མངྒ་ལཾ། ༈ རྒྱལ་བའི་དབང་པོ་ཚེ་དཔག་མེད་མགོན་དང་། །རྒྱལ་ཡུམ་ཡིད་བཞིན་འཁོར་ལོའི་མཐུ་བྱིན་དང་། །བདག་གིས་མོས་གུས་དད་པས་གསོལ་བཏབ་མཐུས། །རྒྱལ་བའི་རྒྱལ་ཚབ་རིག་འཛིན་བླ་མ་རྗེ། །དབང་བཅུའི་དང་པོ་དཔེ་བྱད་རིགས་ལྔའི་རྩེར། །མ་ཆགས་པདྨ་ཅན་གྱིས་ལུང་བསྟན་པའི། །སྐུ་ཚེ་སྔ་མའི་རྟེན་འབྲེལ་འཕྲོར་གྱུར་པ། །སྐུ་ཚེ་འདི་ལ་ཕྱག་ཏུ་སོན་ནས་ཀྱང་། །ལུང་བསྟན་བདེན་པ་མངོན་དུ་འགྱུར་བར་ཤོག །མངྒ་ལཾ། ༈ རྒྱལ་བ་ཚེ་དཔག་མེད་མགོན་གྱི། །ཐུགས་བསྐྱེད་སྨོན་ལམ་མཐའ་ཡས་པའི། །བདེན་ཚིག་བསླུ་བ་མེད་པ་དང་། །བདག་གི་རྩེ་གཅིག་ཟོལ་མེད་པས། །མོས་གུས་གསོལ་བ་བཏབ་པའི་མཐུས། །རྒྱལ་བའི་རྣམ་འཕྲུལ་བླ་མ་རྗེ། །ཞབས་པད་ཡུན་ཏུ་བརྟན་པ་དང་། །ལས་ངན་བདག་ཀྱང་ཚེ་འདི་རུ། །དམ་ཚིག་ཉམས་ཆགས་ཀུན་བྱང་
ནས། །འཆི་ཁ་གནད་གཅོད་མེད་པ་དང་། །སྐྱེ་བ་ཚེ་རབས་ཐམས་ཅད་དུ། །བླ་མ་རྗེ་དང་འབྲལ་མེད་ཤོག །མངྒ་ལཾ། ༈ རྡོ་རྗེ་འཆང་དངོས་རྡོ་རྗེའི་རིག་པ་འཛིན། །པདྨ་ལས་འཁྲུངས་པདྨའི་རྒྱལ་ཚབ་མཆོག །འཇམ་དཔལ་དབྱངས་དངོས་འཇམ་དབྱངས་མཁྱེན་བརྩེའི་ལྷ། །བསྐལ་བརྒྱར་འཚོ་གཞེས་སྐལ་བཟང་མཐོང་གྱུར་ཅིག །རྒྱལ་ཀུན་རིགས་ཀྱི་བདག་པོ་ཚེ་མཐའ་ཡས། །རྒྱལ་ཀུན་ཕྲིན་ལས་དབང་བསྒྱུར་རྣམ་རྒྱལ་མ། །རྒྱལ་ཀུན་བསྐྱེད་ཡུམ་ཡིད་བཞིན་འཁོར་ལོའི་ཞབས། །ཚེ་ཡི་ལྷ་མཆོག་གསུམ་ལ་གསོལ་བ་འདེབས། །འཆི་བ་མེད་པའི་ཚེ་ལ་མངའ་བརྙེས་ཤིང་། །རྒ་བ་མེད་པའི་ལང་ཚོར་རང་དབང་འབྱོར། །སྐྱེ་འཆི་མེད་པའི་དབྱིངས་དང་རོ་གཅིག་པ། །འཆི་མེད་ལྷ་མཆོག་གསུམ་གྱི་བདེན་སྟོབས་ཀྱིས། །དཔལ་ལྡན་བླ་མ་སྐུ་ཚེ་རབ་བརྟན་ཞིང་། །སྐུ་ཡི་དཀྱིལ་འཁོར་འབྱུང་བཞིའི་འདུ་འཁྲུགས་མེད། །གསུང་གི་ཕྲིན་ལས་མཐའ་ཀླས་འགྲོ་བ་འདུལ། །རྒྱལ་བསྟན་རིན་ཆེན་སྲོག་ཤིང་བརྟན་གྱུར་ཅིག །ལས་ངན་བདག་ཀྱང་ལུས་ངན་འདོར་བའི་ཚེ། །གནད་གཅོད་དྲག་པོའི་སྡུག་བསྔལ་མི་འབྱུང་ཞིང་། །སྒྲིབ་པ་ཐམས་ཅད་དག་ནི་ཕྱིར་བསལ་ཏེ། །བདེ་བ་ཅན་གྱི་ཞིང་དེར་སྐྱེ་བར་ཤོག །ཤུ་བྷཾ། ༈ རྡོ་རྗེ་འཆང་ཆེན་རྡོ་རྗེའི་རིག་པ་འཛིན། །འཇམ་དཔལ་གཞོན་
ནུ་འཇམ་དབྱངས་མཁྱེན་བརྩེའི་གཏེར། །པད་སྡོང་ལས་འཁྲུངས་པདྨའི་རྒྱལ་ཚབ་ཆེ། །བསྐལ་བརྒྱར་འཚོ་གཞེས་སྐལ་བཟང་མཐོང་གྱུར་ཅིག །རྗེ་བཙུན་བླ་མ་མཆོག་གི་ཞབས་དྲུང་དུ། །ཚེ་མཐའ་ཡས་པའི་སྣང་བརྙན་ཕུལ་བའི་མཐུས། །སྐུ་ལ་བསྙུན་དང་བགྲེས་རྒུད་མེད་པ་རུ། །ཡུན་རིང་སྐུ་ཚེའི་འདུ་བྱེད་བརྟན་པར་ཤོག །ལས་ངན་བདག་ཀྱང་དམ་ཚིག་ཉམས་ཆགས་ཀུན། །བྱང་ནས་ངན་སོང་གནས་སུ་མི་སྐྱེ་ཞིང་། །རྗེ་བཙུན་མི་ལ་ལྟ་བུའི་བརྩོན་འགྲུས་ཀྱིས། །ཟབ་མོའི་ལམ་གྱི་གནད་ཀུན་མངོན་གྱུར་ཤོག །ལྕེ་བཙུན་ཆེ་དང་བཀའ་གདམས་པ་ལྟར་དང་། །རྒྱལ་མཆོག་ལྔ་པ་དྲུག་བརྒྱ་གྲུབ་ཆེན་ལྟར། །བྱ་བྲལ་འདི་ཡང་གདམས་ཟབ་སྒོ་གཅིག་གིས། །རྗེས་བཟུང་འཕོ་ཆེན་འོད་ལུས་འགྲུབ་པར་ཤོག ༈ ན་མོ་མཉྫུ་ཤྲཱི་ཡེ། རྡོ་རྗེ་རྣོན་པོ་རལ་གྲི་ཆེ། །ཡི་གེ་མཆོག་སྟེ་རྣམ་པར་དག །ཐེག་པ་ཆེན་པོ་སྡུག་བསྔལ་གཅོད། །འཇམ་དཔལ་ཡེ་ཤེས་སེམས་དཔས་སྐྱོངས། །རྒྱལ་བའི་སྒྱུ་མ་སྒྱུ་འཕྲུལ་གར། །སྒྱུ་འཕྲུལ་སྣང་བ་བྲིད་མཁས་པོ། །འགྲོ་ངོར་ཅིག་ཆར་ཅིར་ཡང་འཆར། །འཆར་ནུབ་བྲལ་བའི་བཀྲ་ཤིས་ཤོག །རྡོ་རྗེའི་རང་བཞིན་རྡོ་རྗེའི་སྐུ། །ལུང་དང་རྟོགས་པའི་སྙིང་པོ་འཛིན། །འགྲོ་ལ་ཕན་བདེའི་ཟེར་སྤྲོ་བ། །རྡོ་རྗེའི་ཁྲི་ལ་ཞབས་བརྟན་གསོལ། །
ཟབ་གསང་གདམས་ངག་མཆོག་གི་དབང་བཞིའི་ཆུས། །སྐལ་ལྡན་སྐུ་བཞིའི་ལམ་དུ་སྨིན་མཛད་ཅིང་། །ལུང་དང་རྟོགས་པའི་ཆོས་རབ་འཕེལ་བའི་གཉེན། །རྗེ་བཙུན་བླ་མ་ཞབས་པད་བརྟན་གྱུར་ཅིག །སངས་རྒྱས་རྟག་པ་བརྟན་པ་འདུས་མ་བྱས། །བསླུ་མེད་དགེ་འདུན་བདེན་པའི་བྱིན་རླབས་ཀྱིས། །གློ་བུར་ཉེར་འཚེའི་སྤྲིན་ཚོགས་ལས་གྲོལ་ནས། །བསྟན་པའི་ཉི་མ་ཕྱོགས་བརྒྱར་གསལ་གྱུར་ཅིག །གང་གསུང་བདུད་རྩིར་སྤྱོད་པའི་སྐལ་ལྡན་རྣམས། །རྣམ་རྟོག་བཅོས་མའི་སྦུབས་རྒྱ་ལས་གྲོལ་ནས། །དོན་དམ་ཆོས་ཉིད་རྟོགས་པའི་གདེང་ཆེན་གྱིས། །གཞི་དབྱིངས་ཆོས་སྐུའི་བླ་མར་དབྱེར་མེད་ཤོག །བླ་མ་སྨོན་ལམ་གྱིས་གསུང་ངོར་གསོལ་བ་བཏབ་པའོ། །འཛམ་ཐང་རྩང་པ་དགེ་སློང་གི་ཞབས་བརྟན་ནོ། ༈ ཞབས་དཀར་སྤྲུལ་སྐུ་མྱུར་འབྱོན་བཞུགས། །གང་གིས་ཐོག་མེད་བསྐལ་པའི་དུས་རིང་ནས། །མཁའ་ཁྱབ་འགྲོ་ལ་བུ་གཅིག་ལྟར་བརྩེ་བའི། །ཐུགས་རྗེའི་སྤྱན་གྱིས་གཟིགས་པ་མི་འདོར་བ། །སྤྱན་རས་གཟིགས་དབང་བླ་མའི་ཞབས་ལ་འདུད། །མགོན་ཁྱོད་སྙིགས་མའི་དུས་འདིར་བསམ་བཞིན་ཏུ། །འགྲོ་བའི་དོན་ཏུ་གཟུགས་སྐུ་བསྟན་ལགས་ན། །ལས་ངན་གདུལ་བྱ་ཡུན་རིང་མི་སྐྱོང་བར། །ཞི་བའི་དབྱིངས་སུ་གཟིམ་པ་ཇི་ལྟར་འོས། །འདི་ནི་
མོས་གུས་གདུང་བའི་མིག་གཉིས་པོ། །མཆི་མས་རབ་ཏུ་བརླན་ཞིང་གསོལ་འདེབས་ངག །བུས་པས་མ་ལ་ཇི་བཞིན་བརྩེར་འབོད་པའི། །ལས་ངན་ཐ་མའི་གདུལ་བྱ་ལུས་བཞིན་ཏུ། །གློ་བུར་ཆོས་སྐུར་གཟིམ་པ་བདེན་ནམ་ཅི། །མགོན་ཁྱོད་ཁོ་ན་དྲན་པའི་གདུང་ཡུས་ཀྱིས། །ཉིན་མཚན་མྱ་ངན་མེ་ཡིས་སྙིང་བསྲེགས་པའི། །མི་ལུས་དམྱལ་མྱོང་འོ་དོད་འབོད་བཞིན་ཏུ། །རྒྱང་ནས་ཡལ་བར་འདོར་བ་རིགས་སམ་ཅི། །ཀྱི་ཧུད་ཉིན་མཚན་ཆ་ཡང་དབྱེར་མ་ཤེས། །སྐྱབས་མགོན་ཐུགས་རྗེའི་ཉི་འོད་ཀྱིས་བཏང་བའི། །ལས་ངན་མགོན་མེད་འགྲོ་བ་བདག་སོགས་ཀུན། །སུ་ལ་གང་དུ་ཇི་ལྟར་རེ་ལྟོས་བྱ། །ཟུགས་དུས་ཟིན་པའི་སྙིང་འདི་ཁོང་བ་ན། །བྱེ་ཚན་བཏོན་པའི་ཉ་བཞིན་འགྲེ་ཞིང་ལྡོག །སྐལ་དམན་འདི་འདྲ་མ་མཐོང་གོང་དུ་བདག །ཕ་རོལ་མི་ཁྲིད་འཆི་བདག་སྙིང་རྗེ་མེད། །མགོན་ཁྱོད་བཀའ་དྲིན་ལྷ་ཆོས་མ་འགྲུབ་ན། །གཡོ་བའི་རོ་འདི་བྱ་ཁྱིས་ཟོས་ཀྱང་རུང་། །ཁྱོད་ཞལ་བལྟ་བའི་སྐལ་པ་མི་ལྡན་ན། །དཔྲལ་སྐྱེས་ཆུ་བུར་འདིས་ཀོ་ཅི་ཞིག་བྱ། །ད་ནི་མི་ཚེའི་ལྷག་མ་ཅི་ཙམ་པར། །སྙིང་པོའི་སྒྲུབ་ལ་གཞོལ་བར་དམ་འཆའ་ན། །མགོན་ཁྱོད་དག་པའི་ཞིང་ཁམས་གར་བཞུགས་ཀྱང་། །ཐུགས་རྗེའི་སྤྱན་གྱིས་དབྱེར་མེད་གཟིགས་སུ་གསོལ། །ལས་ངན་བདུད་ཀྱིས་ཁྱེར་རམ་
གཡེངས་པས་བསླུས། །འཁྲུལ་སྣང་ཚེ་འདིར་ཞེན་པའི་བློ་ནམ་སྐྱེས། །ཁྱོད་སྐུའི་སྣང་བ་དངོས་ཉམས་རྨི་ལམ་དུ། །བསྟན་ནས་ཡང་དག་ལམ་ལ་བསྐུལ་དུ་གསོལ། །ཇི་ལྟར་སྤྲེའུ་མི་ཡི་ལད་མོ་བཞིན། །མགོན་པོ་ཁྱེད་ཀྱི་རྣམ་ཐར་རྗེས་བསླབ་སྟེ། །བྱང་ཆུབ་སེམས་གཉིས་བསྒོམ་པའི་བློ་སྐྱེས་ཚེ། །ཐུགས་རྗེ་མཆོག་གིས་མ་ཡིས་བུ་བཞིན་སྐྱོངས། །གཏུམ་མོ་སྒྱུ་ལུས་འོད་གསལ་རྨི་བར་འཕོ། །ཟབ་དོན་རྫོགས་ཆེན་ཀ་དག་ལྷུན་གྲུབ་གནད། །རྩེ་གཅིག་སེམས་ཀྱིས་དབེན་པར་ཉམས་ལེན་ཚེ། །ཉམས་རྟོགས་རྩལ་བསྐྱེད་གེགས་སེལ་བསམ་དོན་སྩོལ། །ཁྱེད་ཐུགས་ཆོས་སྐུའི་དགོངས་པ་འགགས་མེད་ལས། །སྣ་ཚོགས་གཟུགས་སྐུའི་རྣམ་རོལ་མཐའ་ཡས་པ། །སྣ་ཚོགས་གདུལ་བྱའི་བློ་དང་སྐལ་བ་བཞིན། །ཡང་ཡང་མཚན་དཔེའི་སྐུ་མཆོག་བསྟན་དུ་གསོལ། །རིང་ནས་མཁའ་མཉམ་འགྲོ་ཕྱིར་ཐུགས་བསྐྱེད་དེ། །ད་དུང་མཁའ་མཉམ་སྡུག་བསྔལ་འགྲོས་བརྟེན་ན། །ཁྱེད་ཐུགས་ཆོས་སྐུའི་ཀློང་དུ་མ་དགྱེས་པར། །བྱང་ཆུབ་སྤྱོད་པའི་དངོས་འབྲས་མངོན་མཛད་གསོལ། །མགོན་ཁྱོད་རྟག་ཏུ་གཞན་ཕན་དགོངས་པ་ལ། །ཡང་དང་ཡང་དུ་བསྐུལ་ལྟ་མི་འཚལ་ཡང་། །བདག་བློ་གདུང་བའི་ཤུགས་འདི་མ་བཟོད་པར། །གསོལ་བ་བཏབ་འདི་མངོན་སུམ་མཛད་དུ་གསོལ། །ཅེས་སྐྱབས་མགོན་ཞབས་དཀར་རིན་པོ་ཆེའི་གཟུགས་སྐུ་ཆོས་དབྱིངས་སུ་བསྡུས་པ་ཐོས་ཚེ། རྗེ་དེ་ཉིད་ཀྱི་
སློབ་བུ། མདོ་སྔགས་རྒྱ་མཚོ་དང་། བསོད་ནམས་རྣམ་རྒྱལ་གཉིས་ཀྱིས་ཀྱང་བསྐུལ་ཏེ་དཔལ་དགེ་མཆོག་སྤྲུལ་རིན་པོ་ཆེས་གསུངས་པའོ། །དགེའོ།