ཆོས་སྐྱོང་ཕྲིན་བཅོལ་བཀྲ་ཤིས་དགེ་ལེགས།
ཆོས་སྐྱོང་ཕྲིན་བཅོལ་བཀྲ་ཤིས་དགེ་ལེགས་བཞུགས།། །།
ཀྱེ་དཔལ་གྱི་ཉི་མ་ཤར་རོ། །དཔལ་འབར་དབྱིངས་ཀྱི་ཁྲོ་མོ། །སྔགས་སྲུང་ཨེ་ཀ་ཛ་ཊཱི། ནམ་མཁའ་དང་མཉམ་པ། ནམ་མཁའི་སྐུ་ཅན། ཡེ་ཤེས་ཀྱི་མཁྱེན་པ་ནམ་མཁའ་ལྟར་རྒྱ་ཆེ་བ་ལགས་ཀྱི། འབོད་ཡང་མ་དགོས། བསྐུལ་ཡང་མ་དགོས། བྱང་ཆུབ་ཀྱི་སེམས་སྙིང་རྗེ་ཆེན་པོའི་རང་གཟུགས། དཔལ་ལྡན་མ་ཧཱ་ཀ་ལ། ཡེ་ཤེས་ཀྱི་འོད་ཟེར་དྲང་སྲོང་གཟའ་མཆོག་ཆེན་པོ། །ཕྲིན་ལས་ཀྱི་མངགས་གཞུག་སྐྱེས་མཆོག་རྡོ་རྗེ་ལེགས་པ། བདེ་སྟོང་གི་རང་རྩལ་སྨན་བཙུན་ཆེན་པོ་མཆེད་ལྔ་ལ་སོགས་རྡོ་རྗེའི་ཆོས་སྐྱོང་བའི་སྲུང་མ་རྣམས་ཀྱང་ཐུགས་ནམ་མཁའ་ལྟར་རྒྱ་ཆེ་བ་དང་། ཕྲིན་ལས་ས་གཞི་ལྟར་འབད་རྩོལ་མེད་པ། མངོན་ཤེས་ཀྱི་ཐུགས་དང་ལྡན་པ། ཡེ་ཤེས་ཀྱི་སྤྱན་དང་ལྡན་པ། རྫུ་འཕྲུལ་གྱི་སྙན་དང་ལྡན་པ། གར་ཡང་ཁྱབ་པ། ཀུན་ཏུ་འགྲོ་བ། ཁྱབ་བདག་ཆེན་པོ། །རྒྱལ་བའི་ཕྲིན་ལས་ལ་མངའ་དབང་འབྱོར་པ། རྒྱལ་སྲས་ཀྱི་སྤྱོད་པ་ལ་གོམས་པར་བགྱིས་པ་ལགས་པས་ཆེད་དུ་མཆོད་པ་དང་། བསྟོད་པ་དང་། སྒྲུབ་པ་ལ་མ་ལྟོས་ཤིང་། ཕྲིན་ལས་བཅོལ་ཡང་མ་དགོས་མོད། །འོན་ཀྱང་རང་ཉིད་ཀྱི་རྟོག་པའི་དབང་གིས། ལྷ་མཆོག་ཁྱེད་རྣམས་དང་གཉིས་མེད་དུ་མ་གྱུར་པ་དེས་ན་དད་པ་དང་གུས་པའི་ཤུགས་བསྐྱེད་དེ་ལྷ་ཁྱེད་རྣམས་ལ་གསོལ་ལོ། །མཆོད་དོ། །བརྟེན་ནོ། །སྒྲུབ་བོ། །རེ་ལྟོས་སུ་བྱེད་དོ། །ཕྲིན་ལས་སུ་བཅོལ་བའི་མདོ་ནི་སྤྱིར་སངས་རྒྱས་ཀྱི་བསྟན་པ་དར་བ་དང་། སེམས་ཅན་ལ་བདེ་སྐྱིད་འབྱུང་བ། ལས་བཞིའི་ཕྲིན་ལས་འགྲུབ་པ་སོགས་བདག་གི་བསམ་པའི་དོན་ཐམས་ཅད་ཡིད་བཞིན་དུ་གྲུབ་པར་མཛད་དུ་གསོལ། །
ཁྱད་པར་དུ་རིགས་དང་དཀྱིལ་འཁོར་ཀུན་གྱི་ཁྱབ་བདག་དྲིན་ཆེན་རྩ་བའི་བླ་མ་མཚུངས་མེད་རྡོ་རྗེ་འཆང་ཆེན་འཇིགས་མེད་ཡེ་ཤེས་རྡོ་རྗེ་ལྕམ་དྲལ་བཀའ་འཁོར་དང་བཅས་པ་རྣམས་ཀྱི་སྐུ་ཚེ་བསྐལ་བརྒྱར་བརྟན་ཅིང་དྲིན་ལས་ནམ་མཁའ་དང་མཉམ་པར་མཛད་དུ་གསོལ། གནས་སྐབས་དང་མཐར་ཐུག་གི་ཐུགས་བཞེད་ཐམས་ཅད་གེགས་མེད་ཡིད་བཞིན་དུ་འགྲུབ་པར་མཛད་དུ་གསོལ། བདག་གི་ལུས་དང་། ལོངས་སྤྱོད་དང་། འཁོར་འབངས་དང་། ཐ་ན་སེམས་ཀྱི་རྣམ་རྟོག་ཡན་ཆད་བླ་མ་དང་བསྟན་པའི་ཞབས་ཏོག་ཏུ་འགྱུར་བར་མཛད་དུ་གསོལ། །དེ་ལྟར་འགྱུར་བ་ལ་བར་དུ་གཅོད་པའི་རྐྱེན་ཕྱིའི་དགྲ། ནང་གི་བདུད། གསང་བའི་ཉོན་མོངས། གདུག་རྩུབ་ལྷ་འདྲེའི་འཚེ་བ་ཐམས་ཅད་མིང་ཡང་མི་གྲགས་པར་མཛད་དུ་གསོལ། གནས་སྐབས་དང་མཐར་ཐུག་གི་རྟེན་འབྲེལ་ཐམས་ཅད་ལེགས་པའི་ཕྱོགས་སུ་འགྲིགས་ཏེ་ཕན་བདེ་ནམ་མཁའ་དང་མཉམ་པར་མཛད་དུ་གསོལ། གདུལ་བྱ་སེམས་ཅན་རྣམས་ཀྱང་དད་པ་དང་དམ་ཚིག་རྣམ་པར་དག་པ་དང་ལྡན་ཞིང་ཟབ་ལམ་གསང་ཆེན་གྱི་བསྟན་པ་ཉི་མ་ཤར་བ་ལྟར་འགྱུར་བར་མཛད་དུ་གསོལ། དང་པོ་ཐོས། ཐོས་དོན་བསམ། བསམ་དོན་སྒོམས་ཀུན་ཀྱང་རྩེ་གཅིག་གི་སྒྲུབ་པ་ལ་གཞོལ་ཏེ་ཉམས་ལེན་སྒྲུབ་རྒྱུད་ཀྱི་བསྟན་པ་རྫོགས་ལྡན་ལྟར་རྒྱས་པར་མཛད་དུ་གསོལ། སྒྲུབ་པ་ཉམས་སུ་ལེན་པའི་གང་ཟག་རྣམས་ཀྱང་སྒྲུབ་འབྲས་མངོན་དུ་གྱུར་ཏེ་རང་གཞན་གྱི་དོན་གཉིས་ལྷུན་འགྲུབ་ཏུ་འབྱུང་བར་མཛད་དུ་གསོལ། སློབ་མའི་དད་པས་བླ་མའི་ཐུགས་རྒྱུད་བསྐུལ། །བླ་མའི་ཐུགས་རྗེས་སློབ་
མའི་རྒྱུད་གྲོལ་ཞིང་། །དཔོན་སློབ་རྟེན་འབྲེལ་ལེགས་པའི་ཕྱོགས་སུ་འགྲིགས། །ཚོམ་བུ་གཅིག་ཏུ་མངོན་སངས་རྒྱ་བར་ཤོག །མི་ཡི་དམ་ལ་ལྷ་དང་དམ་ཅན་འདུ། །ལྷ་ཡི་དམ་ཚིག་སྒྲུབ་པའི་ཕྲིན་ལས་སྒྲུབ། །ལྷ་མིའི་རྟེན་འབྲེལ་ལེགས་པའི་ཕྱོགས་སུ་འགྲིགས། །འདུ་འབྲལ་མེད་པར་དོན་གཉིས་འགྲུབ་པར་ཤོག །སྣོད་ཀྱི་དགེ་མཚན་བཅུད་ཀྱི་གསོས་སུ་གྱུར། །བཅུད་ཀྱི་དགེ་ཚོགས་སྣོད་ཀྱི་གཡང་དུ་འཁྱིལ། །སྣོད་བཅུད་རྟེན་འབྲེལ་ལེགས་པའི་ཕྱོགས་སུ་འགྲིགས། །འཕྲལ་ཡུན་ཀུན་ཏུ་བཀྲ་ཤིས་དཔལ་འབར་ཤོག །ཨ་བུ་ཧྲལ་པོས་སྙིང་ཐག་པ་ནས་བྲིས་པ་དགེའོ།། །།