དམོད་ངན་དུག་གི་མེ་ཏོག་ཅན།
དམོད་ངན་དུག་གི་མེ་ཏོག་ཅན་བཞུགས་སོ།། །།
ཧོ་དགོངས་སུ་གསོལ་ལོ། །ཧོ་དགོངས་སུ་གསོལ་ལོ། །ཧོ་དགོངས་སུ་གསོལ་ལོ། །སྙན་གསན་ཅིང་དགོངས་སུ་གསོལ། །ཆོས་དབྱིངས་སྤྲོས་པ་དང་བྲལ་བས་དབྱིངས་དང་ཡེ་ཤེས་གཉིས་སུ་མེད་ལ་ཞི་ཁྲོ་སྤྲིན་གྱི་དཀྱིལ་འཁོར་མ་ལུས་ཤིང་ལུས་པ་མེད་པ་ཐམས་ཅད་སྙན་གསན་ཅིང་དགོངས་སུ་གསོལ། རང་བཞིན་ཆོས་ཀྱི་དབྱིངས་ལ་རོལ་ཞིང་རྣམ་རོལ་གདུག་པའི་གཤེད་དུ་ཁྲོས་པ་རང་སྣང་རྒྱུད་སྡེའི་དཀྱིལ་འཁོར་གཞན་སྣང་སྒྲུབ་སྡེའི་ཁྲོ་བོ། །སྤྲུལ་པ་དབྱིངས་ཀྱི་བཀའ་ཉན་བསམ་ཡས་ལྷུན་གྱིས་གྲུབ་པ་ཐམས་ཅད་སྙན་གསན་ཅིང་དགོངས་སུ་གསོལ། ཧོ་དགོངས་སུ་གསོལ་ལོ། །ཕ་བཀའ་བརྒྱུད་ཀྱི་བླ་མ་ཡབ་རིག་འཛིན་གྱི་ཚོམ་བུ། །རྒྱལ་བ་དགོངས་པའི་བརྒྱུད་པ། །རིག་འཛིན་བརྡ་ཡི་བརྒྱུད་པ། །གང་ཟག་སྙན་ཁུང་དུ་བརྒྱུད་པ། །མཁའ་འགྲོའི་
གཏད་རྒྱའི་བརྒྱུད་པ། བཀའ་བབ་ལུང་བསྟན་གྱི་བརྒྱུད་པ། ཤོག་སེར་ཚིག་གི་བརྒྱུད་པ། རྫོགས་ཆེན་བརྒྱུད་པ་དྲུག་ལྡན་གྱི་བླ་མ་བྱིན་བརླབས་ཀྱི་སྤྲིན་གཏིབས་པ། །དངོས་གྲུབ་ཀྱི་ཆར་འབེབས་པ། རྫུ་འཕྲུལ་གྱི་སྟོབས་མངའ་བ། ཉི་ཟླའི་སྤྱན་འཁྱིལ་བ། ལྟ་སྟངས་ཀྱིས་སྲིད་གསུམ་འདར་བ། སྡིགས་འཛུབ་ཀྱིས་གནམ་ལྕགས་འཕེན་པ། རྗེས་འཇུག་ལ་སྲས་བཞིན་གཟིགས་པ་ཐམས་ཅད་སྙན་གསན་ཅིང་དགོངས་སུ་གསོལ། ཧོ་དགོངས་སུ་གསོལ་ལོ། །བཀའ་སྲུང་དམ་ཅན་རྒྱ་མཚོ་དྲག་ཤུལ་གྱི་ལས་ལ་དབང་བ། ཞིང་བཅུའི་གཤེད་དུ་བསྐོས་པ། ཉམས་པའི་སྲོག་ལ་དབང་བ། སྒྲུབ་པ་པོ་ལ་སྙིང་ཉེ་བ། དམ་ཚིག་ཅན་ལ་ཕྲིན་ལས་སྒྲུབ་པ། གསང་སྔགས་བཀའ་ཡི་མེལ་ཙེ་བྱེད་པ། རྣལ་འབྱོར་གྱི་ཚོགས་ཁང་འགྲིམ་པ། སྲིད་གསུམ་གྱི་སྲོག་
རྩ་ལག་ན་གནས་པ་ཐམས་ཅད་སྙན༴ ཧོ་དགོངས་སུ་གསོལ་ལོ། །ཀུན་ཏུ་བཟང་མོ་དབྱིངས་ཀྱི་ཡུམ་ཆེན། སྤྲུལ་པ་ལས་ཀྱི་རྗེ་མོ། །ས་གསུམ་འཇིག་རྟེན་གྱི་གཙོ་མོ། །འདོད་པ་ཁམས་ཀྱི་བདག་མོ། །སྲིད་པ་གསུམ་གྱི་མངའ་བདག །འབྱུང་བ་གཡོ་འཁྲུགས་ཀྱི་བྱེད་པོ། །གཡོག་མོ་ལྔ་བཅུ་ལྔ་རྩ་བརྒྱད། ཡང་གཡོག་འབུམ་ཁྲི་འབུམ་སྟོང་དང་བཅས་པ་སྙན༴ ཧོ་དགོངས་སུ་གསོལ་ལོ། །སྦྱོར་བ་ཐབས་ཀྱི་གིང་ཆེན། དཔལ་ལྡན་མ་ཧཱ་ཀཱ་ལ། སྟེང་ལྷ་ཁམས་ཀྱི་དམག་དཔོན། འོག་ཀླུ་ཁམས་ཀྱི་གཉའ་ནོན། བར་ལྷ་མིན་གྱི་གཤེད་མ། ཀི་ཡིས་རི་འདར་བ། བསྭོ་ཡིས་མཚོ་དཀྲུགས་པ། ཆ་ཡིས་སྟོང་གསུམ་འགེངས་པ། སྐུ་སྟ་གཞོན་བདུད་ཀྱི་དམག་དཔོན། །གསུང་བིང་དམར་སྲོག་གི་གཤེད་མ། ཐུགས་གྲི་གུག་ལས་ཀྱི་ཤན་པ། ལེགས་ལྡན་ཡོན་ཏན་གྱི་སྲིན་པོ། ཕྲིན་ལས་ཀྱི་ཕོ་ཉ། སྟེང་ལྷ་ཁམས་ན་ཆེ་བའི་ལྷ་བརྒྱད། འོག་ཀླུ་ཁམས་ན་གཉན་པའི་ཀླུ་བརྒྱད། བར་སྣང་གི་གཉན་ཆེན་སྡེ་བརྒྱད། ཆེ་བའི་རྒྱལ་ཆེན་བཞི། སྲིད་པའི་འཇིགས་བྱེད་དགུ། རྒྱུ་སྐར་ཉི་ཤུ་རྩ་བརྒྱད། ཕྱོགས་སྐྱོང་དྲེགས་པ་བཅུ། དཔལ་མགོན་བདུན་ཅུ་རྩ་ལྔ། ཡང་འཁོར་ལྷ་སྲིན་སྡེ་བརྒྱད་དང་བཅས་པ་སྙན༴ ཧོ་དགོངས་སུ་གསོལ་ལོ། །སྒྲོལ་བ་ལས་ཀྱི་གིང་ཆེན་དམ་ཅན་རྡོ་རྗེ་ལེགས་པ་གནམ་ས་ཕྱེད་ཀྱི་བདག་པོ། །གདུག་བྱེད་མགར་བ་ནག་པོ། །སྒྲོལ་བྱེད་བཙན་གྱི་དམག་དཔོན། །མོན་ནག་དུག་གི་སྤུ་གྲི། ཐེའུ་བྲང་སྟོང་གི་སྤྱི་རྗེ། བཙན་དམར་སྟོང་གི་སྣ་འདྲེན། མོན་པ་འབུམ་གྱི་གཙོ་བོ། །སྲིད་གསུམ་སྲོག་གི་ཤན་པ། ཐོག་སེར་ལྟས་ངན་གྱི་བདག་པོ། །དགྲ་གསད་པའི་མཚོན། བགེགས་བཤའ་བའི་གྲི། ཉེས་ཅན་འཇོམས་
པའི་ཐོབ། མཆེད་འཁོར་སུམ་བརྒྱ་དྲུག་ཅུ། ཐེའུ་རང་མོན་པ་སྟོང་སྡེ་དང་བཅས་པ་སྙན༴ ཧོ་དགོངས་སུ་གསོལ་ལོ། །གསང་བ་ལས་ཀྱི་བསྟན་སྲུང་སྒྲོལ་བྱེད་ཐབས་ཀྱི་ཤན་པ། གསོད་བྱེད་དུག་གི་སོག་ལེ། །གཟའ་བདུད་སྲོག་གི་སྤུ་གྲི། ཀཾ་ཀིང་ཐོག་སེར་གྱི་བདག་པོ། །ཧུར་ཐུམ་རྒྱུག་འགྱེལ་གྱི་བྱེད་པོ། །ཉི་ཟླ་ཟས་སུ་ཟ་བ། སྲིད་པ་གདན་དུ་གཏིང་བ། རོལ་མཚོ་གཏིང་ནས་དཀྲུགས་པ། འཕྲད་པ་དང་གསོད་པ་མཉམ་དུ་བྱེད་པ། དགྱེས་བྱེད་གདོང་མོ་བཞི། དྲེགས་པ་གཟའ་ཆེན་བརྒྱད་དང་བཅས་པ་སྙན༴ ཧོ་དགོངས་སུ་གསོལ་ལོ། །སྦས་པ་ནང་གི་དཀོར་སྲུང་། ཞིང་སྐྱོང་དུར་ཁྲོད་ཀྱི་ལྷ་མོ། །ནོར་སྲང་གང་གིར་མདའ་བྱེད་པ། །རྩྭ་ཕྱག་གང་གི་རྗེས་སུ་སྙོགས་པ། །བརྙབ་ལག་རིང་གི་འདྲེ་མོ། །འཛིན་མཁས་ཐབས་ཀྱི་རྐུན་མོ། །གསོན་སྙིང་དམར་འབྱིན་གྱི་བདུད་མོ། །སྙིང་ཁ་ནས་འབྱིན་པ། མིག་དཔྲལ་ནས་འདྲུ་བ། སྙིང་ཁྲག་ཧུབ་ཀྱིས་འདེབས་པ་མིང་སྲིང་བརྒྱད་དང་བཅས་པ་སྙན་གསན༴ ཧོ་དགོངས་སུ་གསོལ་ལོ། །ཤ་ཟ་ལས་ཀྱི་བསྟན་མ། མི་སྲུན་ཚེ་རིང་མཆེད་ལྔ། བསླུ་བྱེད་འགྲུལ་གྱི་སྨན་མོ། །འཛིན་མིག་བསྒྱུར་གྱི ། བཀའ་ལས་འདའ་བའི་གཤེད་མ། དམ་ལས་འགལ་བའི་སྲོག་བདག །དུས་བཞི་གསང་བའི་དྲོད་འཛིན། འབྱུང་ལྔ་སྲིད་པའི་བདག་མོ། །མ་སྲིང་བསྟན་མ་བཅུ་གཉིས། རྡོ་རྗེ་དྲག་རྒྱལ་འབར་བ། ཡང་འཁོར་བྱེ་བ་དུང་ཕྱུར་དང་བཅས་པ་སྙན་ཀྱི་དགོངས་ཤིག་དེ་རིང་དམ་ལྡན་གྱི་རྣལ་འབྱོར་པ་བདག་ཅག་གི་གདུང་བའི་ཚིག་གིས་བོས། ཡུས་པའི་སྨྲེ་སྔགས་
བཏོན། བདེན་པའི་ཤགས་ཀྱིས་བཏག །གཙང་མའི་གསེར་སྐྱེམས་བཤམས། བརྒྱུད་གསུམ་བླ་མ་ལ་མཁྱེན་པར་གསོལ། ཡི་དམ་གྱི་ལྷ་ལ་སྙན་གསན་ཕབ་ནས། བཀའ་སྲུང་དམ་ཅན་རྒྱ་མཚོ་ཁྱེད་རྣམས་ལ་འབོད་པ་དོན་དང་ལྡན་པ་ལགས་ཏེ། །སངས་རྒྱས་ཀྱི་བསྟན་པ་འཇིག་པ་ལ་ཐུག་ལགས་སོ། །སེམས་ཅན་གྱི་བདེ་སྐྱིད་ནི་ཉམས་པ་ལ་ཐུག་ལགས་སོ། །དམ་ལྡན་སྒྲུབ་པ་པོ་ནི་ཁས་དམན། ཁྲེལ་མེད་རྐུན་པོ་མགོ་འཕང་མཐོ། །དམ་མེད་སྐྱེ་བོ་ནི་ལངས་ལ་ཤོར་ནས་དམ་པ་ལ་སྐུར་པ་འདེབས། དགེ་འདུན་གྱི་དཀོར་ལ་རྐུ། ཁ་འོ་མ་བས་དཀར། སྙིང་ཚེར་མ་བས་ནག །རིགས་ནས་སློང་། གབས་ནས་རྐུ། ཉེས་པ་སྣ་དགུ་ཁོང་དུ་སྦས་ནས་འདུག་ཀྱང་གསང་བའི་འདུ་བ་ལ་འོང་། སྨིན་བྱེད་ཀྱི་དབང་གྲལ་ན་སྡོད། བླ་མ་ནི་བསླུ། མཆེད་གྲོགས་ནི་བརྡོས། དགོན་སྡེ་ནི་དཀྲུགས། ཁྱེད་བཀའ་སྲུང་དམ་ཅན་རྒྱ་མཚོ་ཁྱད་དུ་བསད་ནས་དམ་ལྡན་སྒྲུབ་པ་པོ་ལ་བརྙས་བཅོས་སུ་བྱེད་པ་འདི་རྣམས་དྲག་པོ་མངོན་སྤྱོད་ཀྱི་ལས་ཀྱིས་ཚར་གཅོད་པར་མ་མཛད་ན་དགེ་བྱེད་བཀའི་སྲུང་མ་མེད་པ་དང་འདྲའོ། །སྲུང་མ་དམ་ཅན་རྒྱ་མཚོ་བརྟེན་ཅིང་མཆོད་པ་དོན་མེད་དུ་འགྱུར་རོ། །ཁྱད་པར་དུ་བླ་མའི་བཀའ་ལ་མི་བརྩི། མཆེད་གྲོགས་ཀྱི་དམ་ལ་མི་གནས། དམ་ཅན་གྱི་མཐུ་ལ་མི་སྐྲག །མི་དམ་ལྡན་ལ་ལྷ་མེད་སྙམ་པ། ལྷ་ཆོས་སྐྱོང་ལ་མཐུ་མེད་སྙམ་པ། མཐུ་བུ་ལོན་བཞིན་དུ་སྙོགས་པ། གཏད་རྟ་ཕོ་བཞིན་དུ་ཉོ་བ། དུག་བདུད་རྩི་བཞིན་དུ་ཟ་བ། དཀོན་མཆོག་གི་སྤྱི་དགྲ་ལགས་ཏེ་སངས་རྒྱས་ཀྱི་བསྟན་པ་ལ་གནོད་དོ། །བླ་མའི་སྐུ་དགྲ་ལགས་ཏེ་ཆོས་མཛད་ཀྱི་
སྐུ་ཚེ་ལ་གནོད་དོ། །དམ་ལས་ཉམས་པ་ལགས་ཏེ་འདི་ཕྱི་ཆུ་ལ་ཕོས་སོ། །དམ་ལས་ལོག་པ་ལགས་ཏེ། ཁྲེལ་མེད་ལང་ལ་ཤོར་རོ། །དམ་ལས་འཁུ་བ་ལགས་ཏེ་དམ་ལྡན་གྱི་རྣལ་འབྱོར་ལ་གནོད་དོ། །དམ་ཚིག་གི་དགྲ་ལགས་ཏེ་ཤེས་བཞིན་ཏུ་ཁྱད་དུ་གསོད་དོ། །ངན་པའི་ངང་ཚུལ་ཅན་ལགས་ཏེ་ཉེས་སྤྱོད་སྣ་དགུ་བྱེད་དོ། །གསང་བའི་འདུ་བར་འོང་སྟེ་སྦེད་ཐབས་ཀྱིས་དབང་གྲལ་དུ་འཚང་ངོ ། །ཡོངས་ལ་གནོད་པ་ལགས་ཏེ་ཡུལ་སྡེ་ཕུང་བར་བྱེད་དོ། །ངན་སོང་གསུམ་གྱི་རྒྱུ་བསྒྲུབ་པ་ལགས་ཏེ་སྐྱེ་འགྱུར་གྱི་ལས་ཚངས་པའོ། །དེས་ན་འདི་ནི་བསྒྲལ་བའི་ཞིང་བཅུ་ཚངས་པ་ལགས་ཏེ། ཞིང་བཅུ་ཚང་བའི་དགྲ་འདིས་ནི་དམ་ལྡན་བདག་ཅག་རྣམས་ལ་དོ་བསྔོས་སོ། །ཕོད་བཙུག་གི་འགྲན་ཚོལ། ལྷ་བསྐལ་པའི་བར་དུ་བརྟེན་ཅིང་མཆོད་ན་དྲག་ཤུལ་གྱི་ལས་ལ་བསྐུལ་ཞིང་རྦད་པ་ནི་ད་རེས་ཙམ་ལགས་ན་ལྷའི་ཡེ་ཤེས་ཀྱི་སྤྱན་གྱིས་གཟིགས། ཏིང་ངེ་འཛིན་གྱི་སྙན་གྱིས་གསོན། མངོན་ཤེས་ཀྱི་ཐུགས་ཀྱིས་དགོངས་ལ་ཉམས་པ་ཅན་ལ་ཆད་པ་ཆོད་ཅིག །འགལ་བ་ཅན་ལ་དྲག་ཤུལ་སྟོན་ཅིག །ད་ལྟ་ཉིད་དུ་ཕྲིན་ལས་མཛོད་ཅིག །རོལ་མོ། །ཧོ་དགོངས་སུ་གསོལ་ལོ། །ཁྱད་པར་དུ་ཡང་འགུགས་བྱེད་ཀྱི་ཕོ་ཉ། སྒྲོལ་བྱེད་ཀྱི་སྲིན་པོ། །གསོད་བྱེད་ཀྱི་ཤན་པ། བཀའི་འཁོར་ན་གནས་པ་རྡོ་རྗེ་འཆང་གི་དམ་ལ་གནས་པ། བང་རླུང་བས་མགྱོགས་པ། རྩལ་བདུད་ལས་ཆེ་བ། སྲོག་ལ་ཟ་བའི་དབང་ཐོབ་པ། ཟས་སུ་ཉམས་པའི་ཤ་ལ་དགྱེས་པས་སྲིད་པ་གསུམ་གྱི་ཤ་ལ་ཟོས་ཀྱང་མ་ངོམས་པར་སྐན་སྦྲ་ཐག་ཐག་ཏུ་བྱེད་པ། སྐོམ་དུ་ཉམས་པའི་ཁྲག་ལ་དགྱེས་པས་ཁམས་གསུམ་ཁྲག་གི་རྒྱ་མཚོར་བསྐྱིལ་ཡང་གླལ་བ་གློགས་
དམར་ལྟར་འཚུབས་པ། ལས་སུ་གསོད་གཅོད་བཤན་དམར་ལ་དགྱེས་ཤིང་སྒྲོལ་བའི་ལས་ལ་དཔའ་རྩལ་དང་ལྡན་པ། གཏུམ་རྔམས་འཇིག་རྟེན་གྱི་དྲེགས་པ་གྲི་ཐབས་ཆོ་འཕྲུལ་གྱི་བདག་པོ། ཁ་རླངས་ནད་དུ་གཏིབས་པ། སྤྲུལ་པ་ལྟས་ངན་དུ་གཏོང་བ། ཆོ་འཕྲུལ་དངོས་སུ་འགྱེད་པ། མངོན་ཤེས་སྟོབས་ཀྱི་བདག་པོ། །དམ་ལྡན་རྣལ་འབྱོར་གྱི་སྲུང་མ། །དམ་མེད་ལས་ངན་གྱི་གཤེད་མ། །བོས་ན་སྙན་གསང་བ། བསྐུལ་ན་ལས་མྱུར་བ། རྦད་ན་མཐུ་ཆེ་བ། ཚེ་ལ་ཧབ་ལེན་བྱེད་པ། སྲོག་ལ་ཧུར་ཐུམ་བྱེད་པ། དབུགས་ལ་ཧུབ་ཀྱིས་འདེབས་པ། དྲག་པོ་མངོན་སྤྱོད་ཀྱི་ལས་ལ་དབང་བ་ཁྱེད་རྣམས་ཀྱིས་དམ་ཉམས་པའི་དགྲ་བོ་ལས་ངན་པ་འདི་རྣམས་དུས་ད་ལྟ་ཉིད་དུ་སྙིང་ལྕགས་ཀྱུས་ཟུངས། རྐེ་ཞགས་པས་ཆིངས། ཡན་ལག་ལྕགས་སྒྲོགས་ཀྱིས་སྡོམ། སེམས་དྲིལ་བུས་མྱོས་པར་གྱིས་ལ་སྐྱོབ་བྱེད་ཀྱི་ལྷ་དང་ཕྲོལ། གནོད་བྱེད་ཀྱི་བདུད་དང་སྤྲོད་ལ་ད་ལྟ་ཉིད་དུ་རྡུལ་དུ་རློག་ཅིག །རོལ་མོ། །ཧོ་དགོངས་སུ་གསོལ་ལོ། །ཁྱད་པར་དུ་ཡང་གཟའ་བདུད་དུག་གི་སྤུ་གྲི་དུག་ལྔ་ལས་ཀྱི་སྲིན་པོ། །རྫོགས་ཆེན་བཀའི་སྲུང་མ་མིག་སྟོང་དགྲལ་གཟིགས་ཤིང་། དགྲ་དང་ཟུན་དུ་མ་ནོར། དབུ་དགུ་སྲིན་ཞལ་ཁྲོས་པ། ཁ་རླངས་ནད་དུ་གཏིབས་པ། དུག་གི་རླངས་པས་དགྲ་བོ་མྱུར་དུ་སོད་ཅིག །རྭ་ཡི་མདའ་གཞུ་འགེངས་པས་དགྲ་བོའི་སྙིང་ལ་བརྡེག་ཅིག །སྦྲུལ་ནག་ཞགས་པས་ཆིངས་ཤིག །དུག་གི་ཁ་ཕྲུ་ཐོབ་ཅིག །ཐན་གྱི་སྒོ་བརྡུངས་གྱིས་ཤིག །སྟེང་ནས་ཐོག་སེར་ཕོབས་ཤིག །འོག་ནས་ཀླུ་ནད་ཐོང་ཤིག །གཉན་གྱི་ཚད་དཔལ་ཕོབ་ལ་འགྲོ་བཞིན་པ་ལ་གདོང་ཐུག་ན་སྡོད་པའི་ལོང་མ་གཏད། སྡོད་བཞིན་པའི་
སྔོན་ཏུ་སླེབ་ན་གཡོ་འགུལ་བྱེད་ལོང་མ་གཏད་པར་ཁ་ཟུར་ལ་དཀྱུས། མིག་ལྟག་པར་ཐོན། སྙིང་ཁུང་བརླག་ཏུ་ཐོང་ལ་བསད་པའི་རྟགས་ཐོན་པར་གྱིས་ཤིག །ཕ་སྲིན་པོ་དང་བསྡོང་ནས་ཞེ་སྡང་མེ་གཟའ་གཡས་ནས་རྒྱོབས་ཤིག །མ་ཀླུ་མོ་དང་བསྡོང་ནས་འདོད་ཆགས་ཆུ་གཟའ་གཡོན་ནས་རྒྱོབས་ཤིག །བུ་སྒྲ་གཅན་གཏི་མུག་དང་བསྡོང་ནས་ས་གཟའ་སྨད་ནས་རྒྱོབས་ཤིག །འཁོར་སྡེ་བརྒྱད་དང་བསྡོང་ནས་ཕྲག་དོག་རླུང་གཟའ་སྟོད་ནས་རྒྱོབས་ཤིག །ཐམས་ཅད་ཡོ་ལོག་ཏུ་ཐོང་ལ་ང་རྒྱལ་ནམ་མཁའི་གཟའ་རྒོད་སྙིང་ལ་རྒྱོབས་ཤིག །ཁ་ནས་ཁྲག་སྐྱུག་ཏུ་ཆུག་ཅིག །སྙིང་ལ་སྨྱོ་འབོགས་དུ་ཆུག་ཅིག །མིག་ནང་ནས་མཆིལ་མ་འབབ་ཏུ་ཆུག་ཅིག །མཐར་གྱི་འཆི་བ་ནི་སེམས་ཅན་ཀུན་ལ་ཡོད་ན། ལོ་ཟླ་བ་ཞག་ཟ་མ་སྐད་ཅིག་སྔ་ཕྱི་མ་སྡོད་པར་དུས་ད་ལྟ་ཉིད་དུ་ཅལ་ཕོག་རྒྱུག་འགྱེལ་དུ་ཐོངས་ཤིག །རང་བཞིན་གྱིས་འཆི་བ་ནི་སེམས་ཅན་ཀུན་ལ་ཡོད་ན་བསད་པའི་རྟགས་སྟོན་ཅིག །ཉེས་པ་དྲན་དུ་ཆུག་ཅིག །དྲན་ཞིང་སྨྲ་རུ་ཆུག་ཅིག །སྨྲ་ཞིང་སྨྱོ་རུ་ཆུག་ཅིག །སྨྱོ་ཞིང་གྲི་རུ་སོད་ཅིག །མཐུ་རྩལ་གྱི་ཆེ་བ་སྟོན་ཅིག །དྲག་པོའི་ཁྱད་ཆོས་སྟོན་ཅིག །རོལ་མོ། །ཀྱེ་ཡང་ཡང་དགོངས་ཤིག་དམ་ཅན་རྒྱ་མཚོ། །དྲགས་པོ་ལས་བྱེད་བྱེ་བ་འབུམ་སྡེ། རྒྱལ་བའི་བཀའ་ལ་ཉན་པ། གསང་སྔགས་ཀྱི་དམ་ལ་གནས་པ། དཀྱིལ་འཁོར་གྱི་མཐའ་ལ་གནས་པ། ལྷ་ཁྱེད་རྣམས་ནི་ཡེ་ཤེས་ཀྱི་སྤྱན་དང་ལྡན་པ་ལགས་ཏེ། བསྐུལ་བ་པོ་དམ་ལྡན་གྱི་རྣལ་འབྱོར་པ་ལགས་པས་རྦད་ས་ནས་ཚུར་མ་ལོག །བསྐུལ་རྒྱུའི་ལྷ་མཐུ་རྩལ་གྱི་ཕོ་ཉ་ཡིན་པས་སྒྲོལ་བའི་ལས་ལ་རྒྱུག་ཅིག །བསྐུལ་བའི་ཡུལ་
དམ་ཉམས་ཀྱི་དགྲ་བོ་ཡིན་པས་གཞན་དུ་མ་འབྱམས་པར་ཉེས་པ་ཅན་མ་ནོར། ཉམས་པ་ཅན་མ་སྐྱུར། བདག་ལ་གནོད་སེམས་འཆང་བའི་དགྲ་བོ་དེ་ཕུ་ནུ་དང་ཉེ་བ་བྲན་གཡོག་ཡིན་ཀྱང་མ་བཞག །རྐུན་པོ་དང་ཉེས་ཅན་ཡིན་ན་དགེ་འདུན་གྱི་ཚོགས་གྲལ་ན་ཡོད་ཀྱང་མ་སྐྱུར། བདག་ཅག་ནི་སོ་སོའི་སྐྱེ་བོ་ལགས་པས་ཉེས་པ་ཅན་གར་ཡོད་ཀྱང་མི་ཤེས། ཉམས་པ་ཅན་སུ་ཡིན་ཀྱང་མི་ཤེས་ན། ལྷའི་མངོན་ཤེས་ཐུགས་ཀྱིས་དགོངས་ལ་དམ་ཉམས་པའི་དགྲ་བོ་གང་ན་ཡོད་ཀྱང་བརྒྱ་བྲལ་ནས་བཤའ་ལུག་བཞིན་དུ་ཟུངས། སྟོང་གྲལ་ནས་བཙོན་པ་བཞིན་དུ་ཁྲིད་ལ་དུས་ད་ལྟ་ཉིད་དུ་རྡུལ་དུ་རློགས་ཤིག །བཀའ་སྲུང་དམ་ཅན་རྒྱ་མཚོ་ཁྱེད་རྣམས་ནི་ལེགས་ཉེས་ཀྱི་སྟངས་འཛིན་བདེན་རྫུན་གྱི་ཤན་འབྱེད། ཡོ་དྲང་གི་དྲང་ཐིག་གྱིས་ལ་ཕྱིའི་དགྲ་ལ་ཡང་ཁོང་ཡང་མ་སྐྱེད། སྒྲུབ་པ་པོ་ལ་འཁུ་ལྡོག་མ་རྐྱེན། ཅུང་ཟད་ཙམ་ལ་བྱས་ཡུས་མ་ཆེ་བར་དམ་ཉམས་ཁྱིམ་ན་ཡོད་ཀྱང་སྲོག་རྩ་ཆོད་ཅིག །དམ་ལྡན་ཕྱི་རུ་སོང་ཀྱང་བུ་བཞིན་སྐྱོངས་ཤིག །དམ་ཉམས་པའི་དགྲ་བོ་དེ་རྣམས་གཤིན་རྗེའི་ཁྲམ་ལ་ཐོབ་ཅིག །བཙན་གྱི་ཞགས་པས་ཟུངས་ཤིག །མ་མོའི་ཁ་རླངས་ཐོབ་ཅིག །གཟའི་དུག་རླངས་རྒྱོབས་ཤིག །བདུད་ཀྱི་སྟྭ་རེས་གཏུབས་ཤིག་ཕོ་རྒྱུད་སྐྱེས་པ་ཡིན་ན་སྒོ་ང་བྲག་ལ་བརྒྱབ་པ་བཞིན་དུ་ཐོངས་ཤིག །མོ་རྒྱུད་བུད་མེད་ཡིན་ན་ལྕག་ཕྲན་ཟོར་བས་བརྔས་པ་བཞིན་དུ་ཐོངས་ཤིག །ཆུང་གསུམ་བྱིས་པ་ཡིན་ན་མེ་ཏོག་སད་ཀྱིས་ཁྱེར་བ་བཞིན་ཏུ་ཐོངས་ཤིག །དམ་ཉམས་བཙུན་གཟུགས་ཡིན་ན་བྲག་ཐོག་གིས་གཏོར་བ་བཞིན་ཏུ་ཐོངས་ཤིག །ཤི་ཤུལ་དུ་མི་མི་འཁོར་བར་གྱིས་ཤིག །རོ་ཐོག་ཏུ་བྱ་མི་འབབ་པར་གྱིས་ཤིག །བདུན་རྒྱུད་ལ་ལྷ་མི་འཁོར་བར་གྱིས་ཤིག །ཐན་གྱི་ཚངས་ཆོས་ཤིག །ནད་ཀྱི་ཆར་ཕོབས་ཤིག །བགེགས་ཀྱི་སྒར་ཐོབས་ཤིག །
མཐའ་བསྐོར་ཞིང་མིང་ནས་བོས་ཤིག་ཁྱིམ་ཉུལ་ཞིང་སྐྲ་ནས་འཐོན་ཅིག །བསྟན་དགྲ་དམ་ཉམས་ཀྱི་ཚོགས་རྣམས་དུས་ད་ལྟ་ཉིད་དུ་རྡུལ་དུ་རླག་ནས་སྒྲུབ་པ་པོ་ལ་སྙིང་རྗེ་ཞིང་བཀྲ་ཤིས་སྟེ་ཆོས་བཞིན་དུ་བྱེད་པའི་མཐུན་རྐྱེན་སྒྲུབ་པའི་ཕྲིན་ལས་དམ་པ་རྒྱ་ཆེན་པོ་ཡོངས་སུ་འགྲུབ་པར་མཛད་དུ་གསོལ། །སྐད་གསང་མཐོ་ཞིང་ཚིག་འབྲུ་གསལ། །འཇེབས་ཆ་མི་བྱེད་རྔོམས་ཆར་འདོན། །ཧ་ཅང་མི་དལ་ཅུང་ཟད་མྱུར། །དབུགས་ཐག་མི་ཐུང་རིང་བ་དང་། །སྒྲ་ལོག་མི་ཟེར་སྔོན་ནས་བྱང་། །གཅོད་མཚམས་མ་ནོར་འགྲིག་པ་ན། །འཇིགས་ཟིལ་ཆེ་བ་ཁྱད་ཆོས་ཡིན། །གཤིས་ལ་སྙན་ཆ་ཡོད་པ་སྟེ། །སྙན་ངག་མཁས་པའི་སྡོང་པོ་ཡིན། །གདོན་ལ་འཇིགས་ཟིལ་ཡོད་པ་སྟེ། །དམོད་ངན་དུག་གི་མེ་ཏོག་ཡིན། །ཐོས་མཐོང་སྐྲག་ཟིལ་ཡོད་པ་སྟེ། །ཚིག་ངན་སྦྲུལ་གྱི་འཁྲི་ཤིང་ཡིན། །སྨན་པ་དུག་གི་མེ་ཏོག་ཅན། །ཤྲཱི་སྨྱོན་པའི་མྱོས་གཏམ་ཡིན། །ཁ་ངན་ང་འདྲ་མ་གཏོགས་པར། །བསམ་ངན་གཞན་གྱི་འདི་མི་ཤེས། །མི་ངན་ཨ་བུ་ཧྲལ་པོ་ལ། །དམོད་ངན་ཐོགས་མེད་བྲིས་ཤིག་ཅེས། །ཆོས་ཁྲིམས་ཁྲོས་པའི་བཀའ་ནན་བབ། །འཁྲུག་སློང་ལྷ་ལ་ང་མི་སྐྲག །བརྐུས་སྙམས་སྤྲང་པོ་ང་མི་ཁྲོ། །དགེའོ། །དགེའོ། །དགེའོ།། །།