ཞལ་གདམས་སྐོར།
ཤིང་མཆོག་དམ་པ་ནྱ་གྲོ་དྷ་ཡི་དྲུང་དུ། །སྡེ་དང་བཅས་པའི་བདུད་སྡེ་ཇི་སྙེད་མ་ལུས། །རང་ཉིད་གཅིག་པུའི་བྱམས་པའི་སྟོབས་ཀྱིས་བཏུལ་ནས། །མངོན་སངས་རྒྱས་པའི་སྟོན་པ་མཆོག་དེ་མཁྱེན་ནོ། །མགོན་པོ་ཁྱེད་ཀྱིས་འཁོར་ལོས་བསྒྱུར་བའི་རྒྱལ་སྲིད། །དུག་དང་འདྲེས་པའི་ཟས་བཞིན་ཡོངས་སུ་སྤང་སྟེ། །རང་ཉིད་གཅིག་པུ་དབེན་པའི་ནགས་སུ་གཤེགས་ནས། རྩེ་གཅིག་བསམ་གཏན་སྒྲུབ་པར་མཛད་ཅེས་ཐོས་སོ། །དེ་ཡི་ཕྱིར་ན་དབེན་པའི་རི་ངོགས་ཉམས་དགའ། །མགོན་པོ་མཆོག་དེའི་རྗེས་འཇུག་བུ་ལ་གནང་བའི། །ཕ་ཁྱིམ་ལགས་ཕྱིར་སྐྱོབས་པ་མཆོག་དེའི་བཀའ་བཞིན། །དབེན་པ་བསྟེན་པ་སྐྱིད་པའི་ཡང་རྩེ་ལོས་ཡིན། །ནགས་དང་དགོན་པ་བས་མཐའི་གནས་མལ་ལ་སོགས། །རྒྱལ་སྲས་རྣམས་ཀྱི་ཕྱི་ཡི་དབེན་པ་ལགས་ཏེ། །རང་འདོད་ཡིད་བྱེད་ཞུམ་པའི་བློ་ཆུང་སྤང་བ། །སེམས་དཔའ་རྣམས་ཀྱི་ནང་གི་དབེན་པ་དེ་ལགས། །དེ་ཕྱིར་ཕྱི་ཡི་དབེན་པ་དག་ལ་བསྟེན་ཏེ། །ནང་གི་ཉོན་མོངས་ཞི་ལྷག་སྟོབས་ཀྱིས་འདུལ་ཞིང་། །ཀུན་བཟང་སྤྱོད་མཆོག་སྨོན་པའི་ཡུལ་དུ་བཟུང་བའི། །སྐལ་བཟང་དེ་འདྲ་རྒྱལ་བའི་སྲས་པོ་ཡིན་ནོ། །ལྷུང་ལྷུང་བསིལ་བའི་ཕུ་ཆུ་སྙན་པར་འབབས་ཤིང་། །བྲག་རིའི་བ་གམ་ལྷ་ཡི་ཐེམ་སྐས་འགྲམས་ལ། །ཟླ་འོད་
དཀར་པོའི་ཟིལ་པ་དལ་གྱིས་འབབ་པའི། །དབེན་པའི་རི་དེ་ལྷ་ཡུལ་ལས་ཀྱང་ལྷག་གོ །འདོད་ཉོན་མི་སྐྱེ་རྐང་འཐུང་བུ་མོའི་ཟློས་གར། །ཆགས་སྡང་ཡུལ་མིན་བྱ་ཚོགས་སྙན་གླུས་བཟུང་ཞིང་། །རྟོག་མེད་དེ་ཡི་གྲིབ་བསིལ་འཇམ་པོས་འགེབ་པའི། །གཞོན་ནུའི་གྲོགས་དེ་སྐད་མེད་སྟོང་ལས་ལྷག་གོ །བསམ་གཏན་ཚེར་མ་སྒྲ་ཡི་ཅ་ཅོ་མེད་པའི། །གྲོགས་མེད་གཅིག་པུ་དབེན་པའི་གནས་བཟང་དེ་ན། །སེམས་ཀྱི་སྦྲེ་རྒན་ཡུལ་ལ་འཕྱན་པ་མེད་དེ། །ནང་དུ་གནས་ནས་ཉམས་མྱོང་སིམ་པ་སྤྱོད་དོ། །མང་ཚོགས་རྣམ་གཡེངས་ཉི་མའི་འོད་ཀྱིས་ནོན་པའི། །རང་སྐྱོན་རྟོག་ངན་རྒྱུ་སྐར་ལས་ཀྱང་མང་བ། །དབེན་གསུམ་བསིལ་ཟེར་བདུད་རྩིའི་རེག་ལས་མངོན་ཏེ། །གཉེན་པོའི་སྟོབས་ཀྱིས་གཞོམ་ལ་དཀའ་བ་མ་ལགས། །སྐྱོ་བའི་ཉམས་ཀྱིས་རྟོག་པའི་རྙོགས་མ་བགྲུད་བའི། །སེམས་ཀྱི་རྫིང་བུ་གཡོ་མེད་གནས་པའི་ངང་ལ། །དད་དང་སྙིང་རྗེའི་གཟུགས་བརྙན་འགོགས་མེད་འཆར་བའི། །ལྷོད་མེད་དེ་ལ་གཅིག་པུའི་སྐྱོ་གྲོགས་ཅི་དགོས། །སེམས་ཀྱི་མེ་ལོང་ཕྱིས་ཤིང་ཕྱིས་པའི་ངོས་ལ། །ཡུལ་རྐྱེན་མང་པོའི་གཟུགས་བརྙན་འཆར་བ་མེད་ན། །ཐོས་བསམ་བསྒོམ་པའི་རི་མོ་གསལ་ཞིང་བཀྲ་སྟེ། །ཉམས་མྱོང་ཆོས་ཀྱི་འོད་སྣང་འཆར་ལ་སུ་འགོགས། །
བཀྲེས་སྐོམ་གྲངས་སོགས་ལུས་ཀྱི་གདུང་བའི་ཚོགས་དང་། །སྐྱོ་འཇིགས་ལ་སོགས་སེམས་ཀྱི་དུཿཁ་དུ་མ། །ཆོས་བཞིན་སྤྱོད་ལ་སྒྲིབ་སྦྱང་ལམ་གྱིས་བོག་འདོན། །སྤང་བླང་ཅི་དགོས་སེམས་ཀྱི་རྒྱན་དུ་འཁྱེར་ཆོག །བླུན་པོས་སྨོན་པའི་འདོད་ལྔ་ཡུལ་གྱི་བདེ་བ། །དབེན་པའི་གནས་ན་ལྷ་བཞིན་ལྟམ་པ་མེད་ཀྱང་། །མཁས་པས་བསྔགས་པའི་ཆོས་ཀྱི་དགའ་བ་བརྒྱ་ཕྲག །དགའ་ལྡན་ལྷ་ལས་དབེན་པའི་ནགས་ན་མང་ངོ ། །སྡུག་བསྔལ་གདུང་བ་བརྩོན་པའི་གྲོགས་སུ་འཆར་བའི། །རྒྱལ་སྲས་དེ་ལ་ཆོས་ཀྱི་འགལ་ཟླ་མེད་དོ། །བྱེ་བ་བརྒྱ་ཕྲག་བདུད་སྡེ་དགྲ་རུ་ལངས་ཀྱང་། །རྐྱེན་ངན་གྲོགས་ཤར་མཁས་པ་དེ་ལ་ཅི་བྱ། །བླ་མའི་མན་ངག་བདུད་རྩིའི་འབྲས་བཟང་མྱོང་བ། །ཐོས་མང་ཚིག་གི་སྦུན་པ་འཕྱར་ཕྱིར་མི་རྒྱུག །ས་མཆོག་སེམས་དཔའི་ཐུགས་རྗེའི་འོད་སྣང་འདོད་དེ། །སོ་སྐྱེས་གཏམ་གྱིས་སྒྲོན་མེར་རེ་བ་མ་ཡིན། །སེམས་འདི་འདུལ་ལ་རྒྱན་བྱེད་མགར་བ་བཞིན་དུ། །ཤེས་ཤེས་མང་པོའི་ལག་ཆའི་བྱེ་བྲག་མི་དགོས། །ངེས་འབྱུང་སྙིང་རྗེའི་ཐོང་སོ་རྣོན་པོ་གཅིག་གིས། །རྒྱུད་ངན་ཐ་བ་སློག་རུལ་བཞིན་དུ་རློག་འགྲོ། །བླ་མའི་ཐུགས་རྗེའི་བདུད་རྩིའི་ཆར་བཟང་གཅིག་གིས། །ཡོན་ཏན་ལོ་ཏོག་སྙེ་མ་མགོ་ལྕོགས་ལྡེམ་ཚེ། །མོས་གུས་སྤྲིན་
ཕུང་ཡང་དང་ཡང་དུ་བསྡུས་ན། །བར་ཆོད་སད་ཀྱིས་བརྫི་དོགས་དགོས་པ་མ་ལགས། །གྲོགས་དང་བླ་མ་ཉེ་དུ་ཕ་མ་ལ་སོགས། །རྒྱང་ན་གནས་ཚེ་བརྩེ་དང་གདུང་སེམས་ཆེ་བ། །དྲུང་དུ་གཅར་ན་དེ་ལྟར་འོང་བ་དཀའ་སྟེ། །འདྲིས་སུན་ཁོང་ཁྲོ་ཤུགས་ཀྱིས་སྐྱེ་བ་དེ་ལགས། །དབེན་པའི་གནས་སུ་དད་དང་སྙིང་རྗེའི་བརྩེ་གདུང་། །མཆོག་དམན་བར་མའི་འགྲོ་ལ་འོས་བཞིན་སྒོམ་སྟེ། །སྨོན་པའི་ཐ་གུས་བྱང་ཆུབ་སྤྱོད་ཕྱིར་སྦྲེལ་ན། །ཚེ་རབས་ཀུན་ཏུ་འབྲལ་བ་ཡོད་པ་མ་ལགས། །ཁ་བཤད་ཚིག་གི་དྲི་ངད་ལོ་འདབ་ཆེ་ཡང་། །གཤིས་ངན་སྦྲུལ་གྱི་རེག་པ་རྩུབ་མོས་འཁྱུད་ལ། །དོན་གྱི་ཆ་ཕྲ་ཙན་དན་ལྟ་བུའི་གང་ཟག །ཁྱི་རྒན་ང་འདྲ་བྲལ་ཀྱང་མི་དགའ་ཅི་ཡོད། །ཁྱི་རྒན་མ་ཤི་ལོ་དགུའི་ཚེ་ཕུགས་ཐུབ་ན། །བཤད་ཡམ་ཁྱི་སྐད་ཀུ་ཅོ་ཉན་ལོང་འོང་གིས། །དམ་པའི་གང་ཟག་ཉམས་མྱོང་དྲོད་ཀྱིས་བཅོས་ལ། །ཞལ་རླང་མ་ཡལ་སྤྱོད་ལ་ཕྱི་བཤོལ་མི་རུང་། །སངས་རྒྱས་ཀུན་དངོས་དྲིན་ཆེན་བླ་མ་མཆོག་གི །ཞལ་ལུང་བདུད་རྩི་སྙིང་གི་དབུས་སུ་སིམ་པ། །ཉམས་ལེན་བརྩོན་པས་སྲོག་གི་བཅུད་དུ་ཁུག་ན། །འཆི་མེད་གོ་འཕང་ཚེ་འདིར་ཐོབ་ཞེས་གྲགས་སོ། །དབེན་པ་བསྟེན་ཀྱང་རང་རྒྱུད་དུལ་བ་མེད་ན། །བྱ་དང་རི་དྭགས་ནགས་ན་གནས་དང་འདྲ་ཞེས། །
རྒྱལ་བ་མཆོག་གིས་གསུངས་པ་དེ་ལྟར་ལགས་པས། །ཕྱི་ནང་དབེན་པ་ཡ་མ་བྲལ་བར་གཅེས་སོ། །ཉོན་མོངས་རྣམ་རྟོག་རག་པ་ཙམ་ཞིག་ཞི་ལ། །རང་རྒྱུད་དུལ་སྙམ་མངོན་པའི་ང་རྒྱལ་སྐྱེས་ནས། །འདུ་འཛི་སྤྱོད་པའི་གང་ཟག་གཞན་ལ་སྨོད་པ། །དགོན་དབེན་སྤྱོད་པའི་བདུད་ཀྱི་ལྕགས་ཀྱུར་གསུངས་སོ། །དེ་སླད་ཕྱི་རུ་གཞན་སྐྱོན་ལེགས་ཉེས་མི་རྟོག ནང་དུ་རང་རྒྱུད་ཆོས་ཀྱི་དགའ་བས་དགའ་ཞིང་། །སེམས་ཀྱི་ལྟད་མོ་སྒྱུ་མའི་ཚུལ་དུ་བལྟ་བའི། །རྩེ་དགའི་དུས་སྟོན་སྐྱོངས་ལས་སྐྱིད་པ་སུ་ཡོད། །སྣ་ཚོགས་རྣམ་རྟོག་རྩེད་མོའི་ཆས་བཞིན་བཀྲམ་ལ། །རིག་རྩལ་ཁྱེའུ་ཆུང་ཞེན་མེད་རྩེད་མོས་རོལ་ཞིང་། །འགྲོ་དྲུག་མ་རྒན་སྙིང་རྗེའི་དམིགས་སར་འདུག་པ། །དགེ་རྩའི་མཆོད་སྦྱིན་བསྔོ་བའི་ལག་བདེས་དྲང་མཛོད། །རྟོགས་རྟོགས་མཐོང་མཐོང་སྦུན་པ་ལྟ་བུ་ལགས་ཏེ། །བདེ་བདེ་གསལ་གསལ་ཉམས་ཀྱི་རྩེ་མོ་ཙམ་ཞིག །སྟོང་ཉིད་སྙིང་རྗེའི་སྙིང་པོའི་དོན་ལ་གོམས་ན། །རང་གཞན་དོན་གཉིས་ཤུགས་ཀྱིས་འགྲུབ་པ་ཡོད་སྐད། །འབྲས་བུ་རེ་བས་བརྩོན་པ་ལོ་རྒྱར་འབད་ཀྱང་། །མཆོག་གི་དངོས་གྲུབ་ཕར་ཕར་འགྲོ་ལས་མེད་སྐད། །ཆགས་བདུན་སྤང་བའི་ཕྱིན་དྲུག་ལམ་ལ་བསྡུས་ན། །ཚེ་གཅིག་སངས་རྒྱས་མ་ཐོབ་ནའང་མི་འགྱོད། །
དང་པོ་མཚན་ལྡན་མཆོག་གི་བླ་མ་མཇལ་ཞིང་། །བར་དུ་ངེས་འབྱུང་ཆོས་ལ་སྤྲོ་བ་སྐྱེས་ཏེ། །ད་ལྟ་དབེན་པའི་ནགས་སུ་སྒྲུབ་ལ་གཞོལ་བའི། །སྐལ་བཟང་གྲོགས་ཁྱེད་སྐལ་པ་བཟང་པོ་ལགས་སོ། །དམ་པ་མཇལ་ཡང་ཚུལ་དང་མཐུན་པར་མ་བསྟེན། །ཆོས་གང་བསླབ་ཀྱང་རང་གི་རྒྱུད་ལ་མ་འབྱོར། །དབེན་པ་བསྟེན་ཀྱང་ཡེངས་མེད་བརྩོན་འགྲུས་མ་ནུས། །ཁྱི་རྒན་ང་འདྲར་གྱུར་ན་སྡུག་པོར་འདུག་གོ། གྲོགས་ཁྱེད་སྐྱིད་དགུའི་འགོ་ནས་ཟིན་པ་ལགས་ཀྱི། །མོས་གུས་བརྩོན་པའི་རྒྱུད་ལ་ཐང་ལྷོད་མེད་པའི། །ང་རྒྱལ་རློམ་པའི་བདུད་ལ་དོགས་ཟོན་མཛད་ནས། །ཚེ་འདི་སྐྱིད་ཀྱིས་ཆོད་པར་མཛོད་ཅིག་ཨེ་གོ །ལྷ་མཐོང་འདྲེ་རིག་རྫུན་གྱི་རྐྱལ་ཆེན་མ་རྡོལ། །ཡོན་ཏན་ནོར་བུའི་སེམས་ཀྱི་བང་མཛོད་བཀང་ནས། །བཀའ་གདམས་གོང་མའི་རྗེས་ཤུལ་ཁྱེད་ཀྱིས་སྙོགས་པའི། །སྨོན་ལམ་བདེན་དབང་ཐོག་མའི་མགོན་ལ་ཞུའོ། །ཨ་བུ་ལས་ངན་རེ་ཞིག་ངན་འགྲོར་འཆི་ཡང་། །བླ་མའི་ཐུགས་རྗེས་ཐར་པའི་དུས་ཤིག་ཡོད་ཀྱི། །དེ་ཚེ་མ་རྒན་འགྲོ་ཀུན་ཟད་ཀྱི་བར་དུ། །བྱང་ཆུབ་སྤྱོད་མཆོག་ལྷན་ཅིག་སྐྱོང་བར་སྨོན་ནོ། །དྲང་པོའི་གཏམ་འདི་དྷི་ཆུང་དབེན་པའི་རི་ནས། །ཡིད་ཅིག་གྲོགས་དེའི་སྐྱོ་བ་སངས་པའི་ཆེད་དུ། །ཁ་ལ་འཇའ་ཤར་ཨ་བུ་ཧྲལ་པོས་ཕུལ་ལོ། །
བརྗོད་དོན་ལེགས་དགུ་མངོན་དུ་མཐོང་བར་ཤོག་ཅིག །འབྱ་བ་མདོ་སྔགས་ལ་གདམས་པའོ། ༈ །འཇིགས་རྟེན་འཁྲུལ་སྣང་འཁོར་བ་ཡི་གྲོང་ན། །ཟིན་དུས་མེད་པའི་བྱ་བྱེད་ཀྱི་རྣམ་གྲངས། །དགོས་འབྲས་མེད་པའི་མགོ་བསྐོར་འདི་མཐོང་ནས། །ཨ་བུའི་སེམས་པ་དབེན་རི་ལ་ཤོར་སོང་། །ཡུལ་དགོན་འབྲེལ་པའི་དགེ་འདུན་གྱི་སྡེ་ན། །སྙིང་པོ་མེད་པའི་རྣམ་གཡེང་གི་འདུ་ལོང་། །བྱ་བྱེད་བྲེལ་དོའི་ལས་ཀ་འདི་མཐོང་ནས། །ཨ་བུའི་སེམས་པ༴ སུ་ལ་བལྟས་ཀྱང་འཆི་ལ་ནི་ཁད་ཁད། །གང་ལ་བསམ་ཀྱང་འཆི་མེད་ཀྱི་རྟག་རྩིས། །ཡི་མུག་སྐྱེ་བའི་ཤོམ་ར་འདི་མཐོང་ནས། །ཨ་བུའི་སེམས་པ༴ སུ་དང་འགྲོགས་ཀྱང་ཆགས་སྡང་གི་སྣོན་མ། །གང་དང་འབྲེལ་ཀྱང་གཡོ་སྒྱུ་ཡི་མགོ་བསྐོར། །དགེ་རྐྱེན་མེད་པའི་གྲོགས་མང་འདི་མཐོང་ནས། །ཨ་བུའི་སེམས༴ ཉོན་མོངས་དགྲ་འདིའི་ཁམས་གསུམ་ཀུན་བསླུས་བསླུས། །རྣམ་གཡེངས་འཁོར་ལོ་རིགས་དྲུག་འདིས་བསྐོར་བསྐོར། །སྡུག་བསྔལ་བསྐྱེད་པའི་ལས་ཐབས་འདི་མཐོང་ནས། །ཨ་བུའི༴ བསླུ་མེད་མགོན་པོ་བླ་མ་དང་དཀོན་མཆོག །དབེན་པར་སླེབ་ནས་དབེན་གནས་སུ་སྲན་ཚུག །གནས་ལ་བརྟེན་ནས་ལུས་དབེན་དང་ངག་དབེན།
དེ་ལ་བརྟེན་ནས་སེམས་དབེན་ཀྱང་སྐྱེ་བའི། །དབེན་རི་ཟིན་པའི་བྱིན་རླབས་ཤིག་གནང་ཤོག ༈ །མཚུངས་མེད་བླ་མ་རྫོགས་པའི་སངས་རྒྱས། །རྒྱལ་བ་ཀུན་ལས་ཐུགས་རྗེ་ལྷག་པ། །སྙིང་གི་དབུས་སུ་འབྲལ་བ་མེད་པར། །བཞུགས་ནས་མགོན་དེས་བྱིན་གྱིས་རློབས་ཤིག །སྲིད་གསུམ་མི་རྟག་སྒྱུ་མའི་གྲོང་ཁྱེར། །འཁྲུལ་སྣང་འཁོར་བའི་ལས་ཚུལ་གཟིགས་དང་། །སྐྱོ་ཤས་ངེས་འབྱུང་མི་སྐྱེ་དབང་མེད། །ཐར་ལམ་ཆོས་ཀྱི་བསྐུལ་མར་འདུག་གོ །སྣ་ཚོགས་སྣང་བ་འཁྲུལ་པའི་གྲོང་ན། །འཁྲུལ་པས་བསླུས་པའི་འགྲོ་བ་འདི་དག །བདེ་བ་འདོད་པའི་རྣམ་རིག་བཀྲ་བཞིན། །སྡུག་བསྔལ་རྒྱུ་ལ་འབད་པ་ཨེ་གཟིགས། །དམ་པའི་ཆོས་ཀྱི་སྒོ་རུ་ཞུགས་ནས། །སྟོན་པའི་རྗེས་འཇུག་ཚུལ་ཙམ་འཛིན་ཀྱང་། །འདུན་པའི་རྩེ་མོ་ཚེ་འདིར་གཏད་པའི། །འདི་ཕྱི་གཉིས་མེད་དེ་འདྲ་མང་ངོ ། །ཁ་ཚིག་གཟུགས་ཀྱིས་བཅོས་མའི་ཆོས་པ། །ཡང་དག་ཆོས་དང་རྒྱང་ཐག་རིང་སྟེ། །ལུང་རྟོགས་ཡོན་ཏན་གང་དུ་སོང་བ། །སྙིགས་མའི་ཆོས་པས་ཤེས་ཚོད་མ་རེད། །ལུས་ངག་ཡིད་གསུམ་གཙོ་བོ་སེམས་ཞེས། །རྙིང་སྒོམ་རྒན་པོའི་ཁ་སྲོལ་བདེན་ན། །ལྷ་ཆོས་སྒྲུབ་ལ་སེམས་རང་གཙོ་ཡིས། །གཞན་གྱིས་མི་ཕན་ཟེར་རྒྱུ་མིན་ནམ། །
སེམས་ལ་རང་འདོད་ཕུགས་སུ་བཅུག་ནས། །བཅོས་མའི་སྤྱོད་ལམ་ལུས་འཁྱུག་ལྡེམ་ལྡེམ། །སྐྱབས་མགོན་རྗེ་ཞེས་གཅམ་བུས་འབོད་པ། །དམ་པ་བསྟེན་ཚུལ་ཆོས་མཐུན་མ་ལགས། །ཁ་གཏིང་མེད་པའི་མོས་གུས་དག་པས། །ཅི་མཛད་ལེགས་མཐོང་ངེས་ཤེས་ངང་ནས། །བླ་མའི་དྲུང་དུ་ཞབས་ཏོག་བསྒྲུབ་ན། །ཚོགས་གཉིས་ཟུང་འབྲེལ་དེ་རང་ལགས་སོ། །འཆི་བདག་མི་ཤེས་གྲྭ་སའི་གྲྭ་གཞོན། །འཆི་ཁ་ཆོས་མེད་སྤྱི་བརྟོལ་ལག་རྐྱང་། །འཆི་བ་དྲན་ནས་ལྷ་ཆོས་བསམ་པ། །ཡོད་རང་སྲིད་ན་ངོ་མཚར་ཆེའོ། །ཆོས་པ་ཡིན་མདོག་ཆོས་བརྫུའི་བསླུ་བྲིད། །ཆོས་གཏམ་གཏོང་བ་དེང་སང་མང་སྟེ། །ཆོས་བཞིན་སྤྱོད་འདོད་སེམས་ཀྱི་རྣམ་རྟོག །ཆོས་མཐུན་ཤར་ན་ངོ་མཚར་ཆེའོ། །ཆོས་གོས་ཟད་ཟད་ཆོས་གྲལ་འགྲིམས་ཀྱང་། །ཉིས་བརྒྱ་ལྔ་བཅུའི་མིང་ཙམ་གླེང་ན། །བཞིན་གྱི་རྣམ་འགྱུར་ཁྲོ་གཉེར་ངོམ་པའི། །དགེ་སློང་དེ་ལ་རྒྱལ་བ་མི་མཉེས། །རྡོར་དྲིལ་ཟད་ཟད་ཚོགས་གྲལ་འགྲིམས་ཀྱང་། །རིམ་གཉིས་ལམ་ལ་ཐན་དུ་བརྩི་བའི། །སྔགས་པ་དེ་འདྲ་ཕྱག་ལེན་མཁས་ཀྱང་། །རྡོ་རྗེ་འཆང་གི་རྗེས་འཇུག་མ་ཡིན། །ཆོས་སྒོར་ཞུགས་ནས་ཆོས་མིན་སྤྱོད་ཅིང་། །ཆོས་བཞིན་སྤྱོད་ལ་ཁྲེལ་གྱིས་འདེབས་པ། །དུས་
ངན་བདོ་བའི་མཐའ་དམག་སྟོང་ལས། །སྙིགས་མའི་སྤྱོད་ཚུལ་འདི་རང་ཐུའོ། །ལས་ངན་དུད་འགྲོའི་ལུས་མང་དོར་ལ། །དུས་ཀྱི་མཐའ་ཞེས་ཐམས་ཅད་སྡངས་ཀྱང་། །ངན་འགྲོར་ལྟུང་བ་དུས་ངན་མ་ལགས། །དུས་ངན་དངོས་ནི་སྤྱོད་ངན་ལགས་སོ། །སྤྱོད་ངན་འཕེལ་བའི་དུས་ངན་བདོ་བ། །སྙིགས་མའི་དུས་ཀྱི་རང་གཟུགས་ལགས་ཀྱང་། །ཆོས་མཐུན་སེམས་ལ་སྐྱིད་དགུ་འཆར་བ། །དྲང་པོའི་བློ་ཡི་བྱིན་རླབས་ལགས་སོ། །གཡོ་སྒྱུའི་ཚུལ་གྱིས་ཕྱི་སྤྱོད་བཅོས་བཅོས། །ཟོལ་མའི་མཁར་ལ་རེ་ཞིག་བརྟེན་ཡང་། །རྟོག་ངན་དུག་རོ་ཁོང་དུ་ཉལ་བ། །འཆི་ཁ་ཚུན་ལ་མི་མངོན་མི་སྲིད། །རང་སེམས་ཟོལ་མེད་དཔང་དུ་བཙུག་ནས། །དྲང་པོའི་ལམ་ལ་རང་བཞིན་གནས་ན། །ཆོས་དང་འཇིག་རྟེན་དེ་ལ་འདུ་སྟེ། །དེང་སང་འགྲོ་བ་དེ་ལ་མི་འགུ། །དྲང་པོའི་གཏམ་ལ་རྩུབ་མོར་བརྩི་ཞིང་། །དྲང་པོའི་སེམས་ལ་གླེན་པར་བརྩི་བའི། །དྲང་པོ་མེད་པའི་དེང་སང་འགྲོ་བས། །དྲང་པོའི་ལམ་ལ་སྨད་མཁན་མང་ངོ ། །ཕྱི་ཚུལ་འཁྱུག་འཁྱུག་བཅོས་མའི་སྤྱོད་ལམ། །ནང་ཚུལ་འཁྱུག་འཁྱུག་གཡོ་སྒྱུའི་རྣམ་རྟོག །དེང་སང་སྐྱེ་བོ་ཤིང་རྩེའི་བྱིའུ་ཆུང་། །འཁྱུག་ཤིང་འཁྱུག་ཤིང་མདོ་མེད་བྱེད་དོ། །གྲྭ་ས་ཡིན་ཞེས་
འགྲིག་འགྲིག་ཡིན་ཡིན། །གཡོ་སྒྱུའི་ལོ་མ་སྒྲིབ་བྱེད་བཟང་སྟེ། །རྒྱལ་བའི་ལམ་བཟང་བསླབ་པ་མེད་ན། །ཐར་ལམ་གྲྭ་ས་འཆོར་བར་འདུག་གོ །གཟན་ཤམ་གཅུ་པའི་གྲྭ་གཞོན་གྲལ་རྒྱུག །དབྱར་དགུན་མེད་པར་ཡོན་འབུལ་སྡུད་དེ། །འཆི་བདག་གཤིན་རྗེའི་ཡོན་བདག་བྱེད་ཚེ། །ད་ལྟའི་འདི་འདྲའི་ཡོན་བདག་མེད་འདྲ། །ཡོན་ཏན་མཁན་པོས་ཡོན་འབུལ་བསྡུས་བསྡུས། །མ་ཟོས་མ་བསགས་གར་སོང་མེད་པས། །བསགས་ཤིང་བསགས་ཤིང་ཇེ་ཉུང་འགྲོ་བ། །ཞབས་རྡོལ་སྣོད་དུ་བླུགས་པ་མིན་ནམ། །ནོར་འདོད་མཁན་པོས་ལོངས་སྤྱོད་བསགས་བསགས། །ཡོད་ཀྱིན་ཡོད་ཀྱིན་དགོས་རྒྱུ་མང་བས། །དུག་ཞིག་རྙེད་ཀྱང་ཟ་བར་འདུག་སྟེ། །ངན་འགྲོར་འགྲོ་བའི་སྔ་ལྟས་རེད་ཀོ། །འབྱོར་པས་ཁེངས་པའི་སྡང་མིག་ཡོན་པོ། །འཁོར་གྱི་དབུས་ན་བདུད་བཞིན་རྔམ་སྟེ། །འཆི་བདག་བདུད་པོས་ཐིབས་ཀྱིས་ནོན་ཚེ། །ཆེ་དགུའི་རང་ཚུགས་དེ་དུས་འཆོར་རོ། །ལྷ་གཡག་བཞིན་དུ་ཞོལ་ཞོལ་འགྱིངས་བའི། །མི་ལུས་གཡག་སེམས་སྣང་བ་མཐོ་སྟེ། །འཆི་བདག་བདུད་པོས་ཐིབས་ཀྱིས་ནོན་ཚེ། །མཆི་མ་ཙ་རེ་ཡི་མུག་སྐྱེའོ། །རང་དོན་ཕུག་བཅུག་བྱ་བའི་ཞོར་ལ། །ཁྲལ་དུ་བབ་པའི་ལས་སྒོ་སྒྲུབ་པ། །
བསྟན་དོན་བྱས་ཞེས་ཁ་བོ་བྱེད་དེ། །བསྟན་དོན་དངོས་དེ་དེ་ན་མེད་འདྲ། །བསྟན་པ་མི་ཤེས་བསྟན་དོན་སྒྲུབ་པའི། །བསྟན་འཛིན་དེ་འདྲ་དེང་སང་མང་སྟེ། །ཕན་བདེའི་འབྱུང་གནས་རྒྱལ་བསྟན་རིན་ཆེན། །རྨིང་ནས་བཤིགས་ལ་དེ་ཚོ་ཐུའོ། །ཞེས་པ་འདི་ནི་དུས་གནས་དང་མཐུན་པའི་མགུར་འདི་ལུང་རིགས་སྨྲ་བའི་ཉི་མ་ཨོ་རྒྱན་འཇིགས་མེད་ཆོས་ཀྱི་དབང་པོས་སྨྲས་པ་དགེ་ལེགས་འཕེལ།། །དགེའོ། ༈ །བླ་མའི་ཞབས་ལ་ཕྱག་འཚལ་ལོ། །ཁྱི་རྒན་དབེན་པར་གནས་པའི་ཚེ། །སྐྱབས་མགོན་དམ་པའི་གསུང་ཐོས་ནས། །ང་ཡང་དེ་འདྲ་སྨྲ་སྙིང་འདོད། །ངས་དང་པོ་བླ་མ་མཇལ་ཙ་ན། །དེད་དཔོན་གསེར་གླིང་སླེབ་པ་ལྟར། །འདོད་པ་གྲུབ་པའི་ཉམས་ཞིག་ཤར། །ཆོས་དོན་གཉེར་བ་དེ་ལྟར་ལགས། །བར་དུ་བླ་མ་མཇལ༴ ཉེས་ཆེན་དཔོན་དང་མཇལ་བ་བཞིན། །རང་གནོང་ཡོད་པའི་ཉམས་ཞིག་ཤར། །བཀའ་བཀྱོན་ཆེ་བ་དེ་ལྟར་ལགས། །ད་ལྟ་བླ་མ་མཇལ༴ ཕུག་རོན་ལྷ་ཁང་ཉལ་བ་ལྟར། །མཉམ་འགྲོགས་བྱེད་པའི་ཉམས་ཞིག་ཤར། །རྒྱང་རིང་སྡོད་པ་དེ་ལྟར་ལགས། །དང་པོ་གདམས་ངག་ཐོས་ཙ་ན། །བཀྲེས་པ་ཟས་དང་འཕྲད་པ་བཞིན། །འཕྲལ་དུ་སྤྱོད་འདོད་ཉམས་ཞིག་ཤར། །ཉམས་ལེན་བྱེད་ལོ་དེ་ལྟར་ལགས། །
བར་དུ་གདམས་ངག་ཐོས་ཙ་ན། །ཐག་རིང་རྒྱང་སྐད་ལབ་པ་བཞིན། །ཐེ་ཚོམ་ཆེ་བའི་ཉམས་ཞིག་ཤར། །སྒྲོ་འདོགས་མ་ཆོད་དེ་ལྟར་ལགས། །ད་ལྟ་གདམས་ངག་ཐོས་ཙ་ན། །སྐྱུག་པ་སླར་ལ་ཟ་བཅུག་བཞིན། །ཞེན་པ་ལོག་པའི་ཉམས༴ ཞུ་འདོད་མེད་པ་དེ༴ དང་པོ་དབེན་པ་བརྟེན་ཙ་ན། །མགྲོན་པོ་རང་ཁྱིམ་སླེབ་པ་ལྟར། །སེམས་བག་ཕེབས་པའི་ཉམས༴ སྡོད་སྙིང་བྲོད་པ་དེ༴ བར་དུ་དབེན་པ་བརྟེན་ཙ༴ མཛེས་མ་གཅིག་པུར་སྡོད་པ་བཞིན། །སྡོད་དུ་མི་ཚུགས་ཉམས༴ འགྲོ་འདུག་མང་བ་དེ་ལྟར་ལགས། །ད་ལྟ་དབེན་པ་བརྟེན༴ ཁྱི་རྒན་གད་འོག་འཆི་བ་བཞིན། །སྡོད་ས་བཟང་བའི་ཉམས༴ རོ་སྐུང་བྱེད་པ་དེ་ལྟར་ལགས། །དང་པོ་ལྟ་བ་བསམ་ཙ་ན། །རྒོད་པོ་ཚང་མལ་ཚོལ་བ་བཞིན། །མཐོ་ན་དགའ་བའི་ཉམས༴ ཁ་ལྟ་བྱེད་པ་དེ་ལྟར་ལགས། །བར་དུ་ལྟ་བ་བསམ༴ ཁ་བྲག་ལམ་དུ་ཞུགས་པ་འདྲ། །ནོར་ས་ཡོད་པའི་ཉམས༴ ཁ་རོག་སྡོད་པ་དེ༴ ད་ལྟ་ལྟ་བ་བསམ༴ རྒན་པོས་བྱིས་པ་འདྲིད་པ་བཞིན། །མགོ་སྐོར་ཡིན་པའི་ཉམས༴ བློ་གཏད་མེད་པ་དེ༴ དང་པོ་བསྒོམ་པ་བསམ་ཙ་ན། །ཡིད་མཐུན་ཕོ་མོ་འཕྲད་པ་བཞིན། །དགའ་བདེ་སྤྲོ་བའི་ཉམས༴ སྒོམ་སྙིང་བྲོད་པ་དེ༴ བར་དུ་
བསྒོམ་པ་བསམ༴ ཤེད་མེད་ཁུར་གྱིས་ནོན་པ་བཞིན། །ངལ་དུབ་ཆད་པའི་ཉམས༴ སྒོམ་ཡུན་ཐུང་བ་དེ་ལྟར་ལགས། །ད་ལྟ་སྒོམ་པ་བསམ༴ རྒྱ་ཁབ་རྡོ་ཐོག་བསླང་བ་བཞིན། །སྐད་ཅིག་མི་གནས་ཉམས༴ སྒོམ་འདོད་མེད་པ་དེ༴། །དང་པོ་སྤྱོད་པ་བསམ་ཙ་ན། །རྟ་རྒོད་སྒྲོགས་སུ་བཅུག་པ་བཞིན། །སྡོམ་པས་སྡོམ་པའི་ཉམས༴ ཚུལ་འཆོས་བྱེད་པ་དེ་ལྟར༴ བར་དུ་སྤྱོད་པ་བསམ༴ ཁྱི་རྒན་རྟོད་ཕུར་ཐོན་པ་བཞིན། །གང་དགར་ཡན་པའི་ཉམས༴ སྡོམ་པ་ཤོར་བ༴ ད་ལྟ་སྤྱོད་པ་བསམ་ཙ༴ འཕྱོན་མ་ངོ་སུན་བུད་པ་བཞིན། །མདོ་འདྲ་མ་ཡི་ཉམས༴ སྐྱིད་སྡུག་མེད་པ་དེ༴ དང་པོ་འབྲས་བུ་བསམ་ཙ་ན། །གཡོ་ཅན་ཚོང་ཟོང་བསྔགས་པ་བཞིན། །ཐོབ་བྱ་བཟང་བའི་ཉམས༴ རེ་འདོད་ཆེ་བ་དེ༴ བར་དུ་འབྲས་བུ་བསམ་ཙ་ན། །རྒྱ་མཚོའི་ཕ་རོལ་ཚུ་རོལ་བཞིན། །ཁ་ཐག་རིང་བའི་ཉམས༴ ཡིད་སྨོན་ཆུང་བ་དེ༴ ད་ལྟ་འབྲས་བུ་བསམ༴ འཇབ་རྐུན་མཚན་མོ་ཟད་པ་བཞིན། །ཐབས་དང་བྲལ་བའི༴ རེ་ཐག་ཆོད་པ་དེ༴ དང་པོ་བཤད་པ་བྱེད་ཙ་ན། །མཛེས་མ་ཁྲོམ་གསེབ་སླེབས་པ་ལྟར། །རང་མཁས་ངོམ་པའི་ཉམས༴ བཤད་སྒྲོས་འདོད་པ་དེ༴ བར་དུ་བཤད་པ་བྱེད༴ རྒན་པོས་གནའ་སྒྲུངས་འཆད་པ་ལྟར། །
ཆོས་རྒྱུས་ཆེ་བའི་ཉམས༴ བཤད་ཚོགས་མང་བ་དེ༴ ད་ལྟ་བཤད་པ་བྱེད༴ འདྲེ་ངན་སྔགས་པས་གཟིར་བ་བཞིན། །རང་མཚངས་འཆད་པའི་ཉམས༴ ངོ་རེ་ཚ་བ་དེ༴ དང་པོ་རྩོད་པ་བྱེད་ཙ་ན། །གྱོད་ངན་ཁྲིམས་སར་གཏུག་པ་བཞིན། །རང་ཁེ་འདོད་པའི་ཉམས༴ ཁོང་ཁྲོ་མང་བ་དེ༴ བར་དུ་རྩོད་པ་བྱེད༴ གཟུ་བོས་བདེན་དཔང་ལྟ་བ་ལྟར། །ངེས་དོན་ཚོལ་བའི་ཉམས༴ རིག་པ་བསྒྲིམ་པ་དེ༴ ད་ལྟ་རྩོད་པ་བྱེད༴ རྫུན་མས་ས་མཐའ་འགྲིམ་པ་བཞིན། །གང་སྨྲས་ཆོག་པའི་ཉམས༴ ཟང་ཐལ་བུད་པ་དེ༴ དང་པོ་རྩོམ་པ་བྱེད་ཙ་ན། །གྲུབ་ཐོབ་དོ་ཧ་འཆད་པ་ལྟར། །ཤུགས་ཀྱིས་རྡོལ་བའི་ཉམས༴ བཅས་བཅོས་མེད་པ་དེ༴ བར་དུ་རྩོམ་པ༴ མཁས་པས་སྙན་ངག་བྱེད་པ༴ ཚིག་ལ་བསྒྲིམས་པའི་ཉམས༴ སྡེབས་ལེགས་སྒྲིགས་པ་དེ༴ ད་ལྟ་རྩོམ་པ༴ རྒྱུས་མེད་ལམ་ཡིག་བྲི་བ། །དགོས་པ་མེད་པའི་ཉམས༴ སྣག་ཤོག་མི་གྲོན་དེ༴ དང་པོ་མཆེད་གྲོགས་འགྲོགས་ཙ་ན། །སྟག་ཤར་མདའ་གྲལ་འཚོགས་པ། །འགྲན་སེམས་ཆེ་བའི་ཉམས༴ ཆགས་སྡང་བྱེད་པ་དེ༴ བར་དུ་གྲོགས་མཆེད་འགྲོགས༴ སྨད་འཚོང་ཚོང་དུས་ཕྱིན་པ་བཞིན། །ཀུན་དང་མཐུན་པའི་ཉམས༴ ཤག་པོ་མང་བ་དེ༴
ད་ལྟ་གྲོགས༴ མཛེ་བོ་ཚོགས་སུ་ཕྱིན་པ༴ མི་ཁྱུར་མི་ཚུད་ཉམས༴ གཅིག་པུར་སྡོད་པ༴ དང་པོ་ནོར་རྫས་མཐོང་ཙ་ན། །བྱིས་པས་མེ་ཏོག་ཐུ་བ་ལྟར། །འཕྲལ་དགའ་ཙམ་གྱི་ཉམས༴ གསོག་འཇོག་མེད་པ་དེ༴ བར་དུ་ནོར་རྫས་མཐོང་ཙ༴ ཞབས་རྡོལ་སྣོད་དུ་བཅུད་བླུགས་ལྟར། །ཁེང་དུ་མེད་པའི་ཉམས༴ རྙེད་ཆོས་ཉུང་བ་དེ༴ ད་ལྟ་ནོར་རྫས་མཐོང་ཙ་ན། །སྤྲང་རྒན་བུ་མང་སྐྱེས་པ་ལྟར། །ཁུར་དུ་ལྕི་བའི་ཉམས༴ མེད་ན་དགའ་བ་དེ༴ དང་པོ་འཁོར་གཡོགས་བརྟེན་ཙ་ན། །གླ་མི་ལས་གྲལ་འདུས་པ་ལྟར། །བཀོལ་དུ་སྡུད་པའི་ཉམས༴ ཕན་སེམས་བྱེད་པ་དེ༴ བར་དུ་འཁོར་གཡོགས་བརྟེན༴ བཙུན་ཆུང་དགེ་རྒན་བསྟེན་པ་བཞིན། །རང་དབང་འཆོར་བའི་ཉམས༴ འབྲེལ་ཐག་གཅོད་པ་དེ༴ ད་ལྟ་འཁོར་གཡོག༴ ཁྱི་རྐུན་ཁྱིམ་དུ་ཞུགས་པ༴ གང་ཡོད་བརླག་པའི༴ ཁེར་འགྲོས་བྱེད་པ་དེ༴ དང་པོ་སློབ་མ་བྱུང་ཙ་ན། །དཔོན་སར་གཡོག་གིས་བཟུང་བ །རང་ཆེ་འདོད་པའི་ཉམས༴ ལེགས་སོ་བྱེད་པ་དེ༴ བར་དུ་སློབ་མ༴ གནས་ཆེན་མགྲོན་པོ་སླེབ་པ༴ བློ་གཏད་བྱེད་པའི་ཉམས༴ གང་ཕན་བྱེད་པ་དེ༴ ད་ལྟ་སློབ་མ་བྱུང་ཙ་ན། །གཉེན་སའི་ལྷ་འདྲེ་སློང་བ་བཞིན། །ཅོ་འདྲི་བྱེད་པའི་ཉམས་ཞིག་ཤར། །རྡོ་དེད་
བྱེད་པ་དེ་ལྟར་ལགས། །རྡོ་དེད་བྱེད་པའི་གསུང་ལན་རྫོགས་སོ། །དགེའོ། །དགེའོ། །དགེའོ། ༈ སྣང་བ་སྒྱུ་མའི་ཡུལ་ལ། །འཁྲུལ་པའི་ཞེན་པ་བརྟག་ན། །སྒྱུ་མ་འཁྲུལ་པ་བསླུ་སྲིད། །སྣང་སེམས་ཆུ་དང་ཟླ་གཟུགས། །ཤེས་ན་དུ་མ་རོ་གཅིག །གཞོན་ནུའི་ལང་ཚོ་དར་ལ། །རྒན་པོའི་མིག་དབང་གཡེང་ན། །ཞེན་པའི་དུག་རོ་ལྡང་སྲིད། །ལུས་འཛིན་དབྱིངས་སུ་གྲོལ་ན། །རྒན་གཞོན་དུ་མ་རོ་གཅིག །སྐྱེ་བའི་རིམ་པ་གསུམ་ལ། །ཞེན་པའི་རྟག་འཛིན་ཆེ་ན། །འཆི་བའི་སྡུག་བསྔལ་ཆེ་སྲིད། །རིག་པའི་ཐིག་ལེ་གཅིག་ལ། །སྐྱེ་ཤི་དུ་མ་རོ་གཅིག །འདུས་པའི་སྤུན་ཟླ་མཛའ་བཤེས། །བརྩེ་བའི་ཕྲེང་ཐག་དམ་ན། །འབྲལ་བའི་སྡུག་ཡུས་ཆེ་སྲིད། །འཁོར་བའི་སྣང་ཚུལ་ཤེས་ན། །འདུ་འབྲལ་དུ་མ་རོ་གཅིག །ལྷ་ལ་རེ་བ་ཆེ་ན། །འདྲེ་ལ་དོགས་པ་སྐྱེ་ཡོང་། །སྣང་སྲིད་ལྷ་རུ་ཤེས་ན། །ལྷ་འདྲེ་དུ་མ་རོ་གཅིག །རྟོག་པའི་རྗེས་མཐའ་དེད་ན། །བྱ་བའི་སྣེ་བརྒྱ་ལྡང་ཡོང་། །རྟོག་མེད་སེམས་ལ་བལྟས་ན། །བྱར་མེད་རོ་ཉལ་རྒྱབ་ཆོག །ཟེར་ཚད་ཁ་ལ་ཉན་ན། །འདི་བྱེད་བྱེད་ཚོད་མེད་ཀྱང་། །རང་ཐག་རང་གིས་བཅད་ན། །བློ་སྣ་བཙན་
ཐབས་སྟུངས་ཆོག །བཟང་མཐོང་གཞན་གྱིས་ཆེ་ཡང་། །རང་སྐྱོན་རང་གིས་མཐོང་ན། །བཟང་རྫུ་བྱེད་དོན་མི་འདུག །ངན་པས་རོ་སྐུང་བྱེད་རན། །ཝ་ཡིས་རྒྱལ་ས་གཟུང་གཟུང་། །དོན་འབྲས་སྔར་ཡོད་དེ་ཙམ། །དོན་མེད་ལྷག་པས་གདུང་ཚེ། །ཝ་རྒན་ཁུང་ཕུག་སྙོགས་རན། །སྨར་བས་ཟེར་ཚད་བསྒྲུབ་ན། །རྡོ་ཡུལ་མཐོང་བར་དཀའ་ལ། །འགྲོ་ཚོད་རང་གིས་བཟུང་ན། །རྡོ་སྨར་ལ་ཁའི་ལྟོ་རྒྱབ། །ཧ་ཧ་སྐྱོ་གཏམ་དེ་ལགས། །ཧེ་ཧེ་དོན་མེད་ཆ་ཙམ། །ཧོ་ཧོ་ཐོལ་བྱུང་ཐལ་ལོ། །དཔལ་སྤྲུལ་པས་སོ།། ༈ །སྐྱབས་གསུམ་ཀུན་འདུས་རྡོ་རྗེ་འཆང་ཆེན། །རྩ་བའི་བླ་མ་སངས་རྒྱས་ཀུན་དངོས། །རྟག་ཏུ་མི་འབྲལ་སྤྱི་བོར་བཞུགས་ཤིང་། །དུས་གསུམ་འབྲལ་མེད་བྱིན་གྱིས་རློབས་ཤིག །སྙིང་ནས་ཆོས་ལ་མོས་པའི་གྲོགས་ཁྱེད། །སྙིང་གཏམ་ཡི་གེ་བྲིས་ལ་བྱིན་ཞེས། །སྙིང་འདྲའི་ཚིག་གིས་ཡང་ཡང་བསྐུལ་ངོར། །སྙིང་ནས་བརྩེ་བའི་མཆིད་འདི་ཞུའོ། །ཐར་པའི་ལམ་གྱི་འཇུག་སྒོ་དང་པོ། །ཡང་དག་བླ་མ་བསྟེན་ལ་ཐུག་པས། །ཚུལ་མཐུན་མོས་གུས་ལྟེམ་བརྐྱངས་མེད་པར། །ཅི་གསུང་བཀའ་བཞིན་བསྒྲུབ་གལ་ཆེའོ། །འོན་ཀྱང་དེང་སང་སྙིགས་མའི་དུས་འདིར། །ཚེ་འདིའི་འདོད་པ་སྙིང་ལ་བཅིངས་སྟེ། །གཡོ་རྒྱུའི་
བླ་མ་བསྟེན་མཁན་མང་བས། །དེ་འདྲའི་ཚུལ་ལས་ལྡོག་པ་གཅེས་སོ། །དེ་ཡི་ཕྱིར་ན་རང་གི་འདོད་པ། །གང་ཡིན་སྙིང་པོ་ཡང་དང་ཡང་དུ། །སྦ་གསང་མེད་པར་སྙིང་གི་ཁོང་ནས། །དྲན་གསོ་ངག་གིས་ཞུ་བསྐུལ་དགོས་སོ། །དགོས་འདོད་འབྱུང་བ་ནོར་བུ་ཡིན་ཀྱང་། །ཁྲུས་བྱས་རྒྱལ་མཚན་རྩེ་མོར་ཕྱར་ནས། །གསོལ་འདེབས་སྨོན་ལམ་འདེབས་མཁན་མེད་ན། །ནོར་བུ་ཡིན་ཀྱང་དགོས་འདོད་མི་འབྱུང་། །ཆོས་ཀྱི་འབྱུང་གནས་བླ་མ་ཡིན་ཀྱང་། །ཟབ་ཆོས་ཞུ་བའི་བསྐུལ་མ་མེད་ན། །ཆོས་ཟབ་གནང་བའི་དུས་ཤིག་མེད་པས། །འདོད་དོན་ལྷ་ཆོས་ཞུ་གལ་ཆེའོ། །སྔ་མ་གང་གནང་ཉམས་ལེན་མེད་པར། །ད་དུང་ཐོབ་འདོད་གདུང་བ་བསྐྱེད་ཀྱང་། །ཐུགས་སུན་བཀའ་བཀྱོན་རྒྱུ་ལས་མེད་པས། །རྒྱུན་དུ་དགེ་སྦྱོར་རིམ་པ་གལ་ཆེ། །གནད་དོན་ཤེས་པས་ཉམས་སུ་ལེན་དགོས། །ཆོས་ཀྱི་སྙིང་པོ་སྐྱབས་འགྲོ་སེམས་བསྐྱེད། །འདི་གཉིས་ཁོ་ནས་སངས་རྒྱས་འགྲུབ་པས། །ཟབ་ཟབ་མང་པོའི་འདོད་གདུང་མི་དགོས། །ཆོས་ཀྱི་འཇུག་སྒོ་བློ་ལྡོག་རྣམ་བཞི། །ཇི་བཞིན་རྒྱུད་ལ་སྐྱེ་བ་མེད་ན། །ཆོས་གཞན་ཐོས་ཀྱང་ཆུད་ཟོས་འཆོར་བས། །འབད་པས་རང་རྒྱུད་འདུལ་བ་གལ་ཆེ། །བྱིན་ན་མི་ཟ་བཞག་ན་རྐུ་དེས། །ཐོབ་པའི་ཆོས་
རྣམས་ཡལ་བར་བོར་ནས། །དེ་མིན་གཞན་ཞིག་སྒྲུབ་ཁུལ་བྱས་ཀྱང་། །ཆོས་དྲེད་དམ་ཉམས་རྒྱུ་ལས་མེད་དོ། །བློ་སྦྱང་རང་སེམས་དུལ་བ་མེད་པར། །ལུས་ངག་ཆོས་ཀྱིས་སེམས་ལ་མི་ཕན། །དེས་ན་བློ་ལྡོག་བཞི་དང་སེམས་བསྐྱེད། །ཡང་ཡང་སེམས་ཀྱིས་བསྒོམས་པ་གལ་ཆེ། །འདི་དག་ཇི་བཞིན་རྒྱུད་ལ་སྐྱེས་ནས། །རང་བློ་གཡོ་མེད་ཆོས་ལ་ཚུད་ན། །གོང་མ་གོང་མའི་གདམས་ཟབ་མཐའ་དག །རིམ་བཞིན་བླ་མ་མཆོག་གིས་གནང་འོང་། །མ་ཀི་དལ་འབྱོར་རྙེད་དཀའ་ནས་བཟུང་། །གསང་སྔགས་བསྐྱེད་རྫོགས་རྩ་རླུང་གཏུམ་མོ། །རྫོགས་ཆེན་ཉེ་ལམ་ཁྲེགས་ཆོད་ཉམས་ལེན། །འདིར་མ་འདུས་པའི་ཆོས་ཞིག་མེད་དོ། །དེས་ན་སྡོག་ཆད་གང་ཐོབ་དེ་ལས། །ལྷག་ཞིག་ད་གདོད་ཞུ་དགོས་མེད་པས། །ཐོབ་ཚད་ཆོས་ལ་ཐེ་ཚོམ་ཆོད་པའི། །དོགས་སེལ་ཞུན་མཐར་ཞུ་གལ་ཆེའོ། །སྐྱབས་འགྲོ་ལ་སོགས་འབུམ་ལྔ་སྦྱངས་ནས། །མོས་གུས་གསང་ལམ་བླ་མའི་རྣལ་འབྱོར། །འབུམ་ཕྲག་བརྒྱ་ཡི་བསྙེན་པ་སྐྱེལ་བ། །བརྒྱུད་པ་འདི་ཡི་ཕྱག་སྲོལ་ལགས་མོད། །དེས་ན་སྔོན་འགྲོའི་སྦྱངས་པ་ཙམ་ཡང་། །ཇི་བཞིན་མཐའ་རྒྱུད་འཁྱོལ་བར་བྱས་ན། །ཕྱི་མ་ཟངས་མདོག་དཔལ་རིར་སྐྱེ་ངེས། །ཞལ་བཞེས་འདུག་པ་ཁྲིད་ཡིག་
གཟིགས་མཛོད། །མ་བཅོས་རང་རིག་ཐ་མལ་ཤེས་པ། །ཟངས་ཀ་རྒྱ་ཡན་གཉུག་མའི་ཆོས་སྐུ། །སེམས་ཀྱི་དེ་ཉིད་རྗེན་པར་གཟིགས་ལ། །རྩལ་སྣང་རྣམ་རྟོག་ཤར་གྲོལ་སྐྱོངས་མཛོད། །དེ་ལས་གཞན་དུ་ཉམས་ལེན་གནད་འགགས། །སྔོན་ཆད་ཡང་ཡང་ཞུ་བསྐུལ་ཕུལ་བ། །དེ་ལས་ལྷག་ཞིག་འཆད་རྒྱུ་མེད་པས། །དེ་དག་རྣམས་ལ་ཉམས་ལེན་མཛད་ཞུ། །དེ་སྐད་ཆོས་མཐུན་གྲོགས་ཀྱིས་བསྐུལ་ནས། །མདོ་མེད་འཁྱམས་པོ་དེ་ཡིས་བྲིས་ལ། །ངེས་ངེས་དོན་བཟང་ཟབ་མོ་མེད་ཀྱང་། །དྲངས་པོས་སྙིང་གཏམ་རྗེན་པ་ལགས་སོ། །དགེ་བ་དེ་ཡིས་ཚེ་རབས་ཀུན་ཏུ། །ཚོམ་བུ་གཅིག་ཏུ་འབྲལ་བ་མེད་པར། །གྲུབ་དབང་བླ་མ་ལྕམ་དྲལ་དྲུང་དུ། །སྐྱེས་ནས་ཆོས་ཀྱིས་དགའ་བར་སྤྱོད་སྨོན། །བཀྲ་ཤིས་དགེའོ། ༈ ན་མོ་གུ་རུ། གང་ལ་བརྟེན་ན་ཉེས་ཚོགས་ཀུན་འཇོམས་ཤིང་། །དགེ་ལེགས་ཡོན་ཏན་རྒྱ་མཚོ་འབྱུང་བའི་གཞི། །སྐྱབས་གསུམ་ཀུན་འདུས་ངོ་བོ་ཆོས་ཀྱི་རྗེ། །ཡོངས་འཛིན་དགེ་བའི་བཤེས་གཉེན་ལ་བཏུད་ནས། །ཐུབ་དབང་ཆོས་ཀྱི་ཉི་མ་སྐྱེ་དགུའི་མིག །སྐྱོབས་པ་དེ་ཡི་བཀའ་དང་རྗེས་འབྲེལ་བའི། །ཕན་པའི་ངག་འདི་ཁྱོད་ལ་གསོལ་བགྱིད་ན། །རང་ལ་བརྩེ་བས་ཡིད་ལ་བཅག་པར་ཞུ། །
སྲིད་པའི་བདེ་འབྱོར་གཡོ་བའི་ཟློས་གར་མཁན། །འདི་གཅིག་ཁོ་ནས་སྔར་ཡང་འགྲོ་རྣམས་བསླུས། །ཚེ་གང་འགྲོགས་ཀྱང་འཆི་བའི་ཤུལ་ལམ་དུ། །ཞུགས་པའི་ཚེ་ན་བདག་ཉིད་གཅིག་པུར་འདོང་། །གཏམ་སྙན་གྲགས་པ་བྱེ་མའི་ཁང་བུ་འདྲ། །སྒྲུབ་དཀའ་འཇིག་སླ་བྱིས་པ་བསླུ་བའི་ཆོས། །ཤ་ཐང་ཆད་པར་འབད་པས་བསྒྲུབ་གྱུར་ཀྱང་། །ནམ་ཞིག་ཙ་ན་སྒྱུ་མའི་རང་མཚང་ངོམ། །དུས་ངན་མཛའ་བཤེས་ཇི་ལྟར་བཀུར་ན་ཡང་། །རང་གི་བསམ་བཞིན་ཁོང་རྣམས་མགུ་བར་དཀའ། །བཟང་བྱས་མི་ཚོར་ཅུང་ཟད་ཙམ་གྱིས་ཀྱང་། །ངན་རྐྱེན་མི་ཤོང་ཁྲོ་བའི་རྣམ་འགྱུར་སྟོན། །བྱམས་པའི་འཛུམ་དང་སྙན་པའི་གཏམ་གྱིས་ཀྱང་། །མཁོ་བའི་ཡོ་བྱད་དག་གིས་བསྙེན་བཀུར་ཡང་། །རང་ཉིད་དབུལ་ཚེ་རུལ་བའི་རོ་བཞིན་དུ། །འདོར་བའི་གྲོགས་ལ་སུ་ཞིག་ཡིད་རྟོན་བྱེད། །སྡིག་ལ་འཛེམ་མེད་སྡུག་བསྔལ་ཁྱད་དུ་བསད། །རྒྱ་དབུས་ས་མཐའ་སྲོག་དང་བརྡོས་ནས་ཀྱང་། །འབད་དེ་བསྐོར་ཞིང་བསོགས་པའི་ནོར་ཅན་འགའ། །ཕལ་ཆེར་ལྟོག་གྲིར་ཤི་བ་མཐོང་ལགས་སམ། །ཡར་ལ་དཀོན་མཆོག་མཆོད་པ་འབུལ་མ་བྲ། །མར་ལ་ངན་སློང་རྣམས་ལ་སྦྱིན་མ་སྤོབས། །བར་དུ་རང་གིའང་སྤྱོད་པར་མ་ནུས་པའི། །སེར་སྣས་བཅིང་བའི་ཟས་ནོར་ཕལ་
ཆེར་ཞིག །ཤི་བའི་ཚེ་ན་དོན་མེད་མི་རྣམས་ཀྱིས། །འཐབ་རྩོད་གཡོ་རྒྱུ་སྣ་ཚོགས་ཐབས་མང་པོས། །རང་གར་ཁྱེར་ན་སྡིག་དང་རྣམ་སྨིན་དག །ཁོ་ལ་བཞག་ནས་སོང་བ་གཟིགས་ལགས་སམ། །སྤྱིར་ན་འདུས་བྱས་ཆོས་ལ་ཡིད་མི་རྟོན། །ཁྱད་པར་དེང་སང་སྙིགས་མའི་སྐབས་འདིར་ནི། །ཕས་ཀྱང་བུ་ལ་ཡིད་ཆེས་མི་ནུས་ཤིང་། །གྲོགས་ཀྱི་དངས་མ་དགྲ་ཡི་རྩེ་མོར་འགྲོ། །ཁར་སང་བཤད་པ་དེ་རིང་བརྫུན་དུ་འགྱུར། །གསང་ཚིག་བཅོལ་ན་རྒྱལ་ཁམས་ཡོངས་ལ་འཆད། །ངོས་ལ་བསྟོད་ཅིང་ལྐོག་དུ་མི་སྙན་སྨྲ། །ཕན་པའི་སྙིང་གཏམ་སྨྲས་ན་རྣ་བ་གཟོན། །ཀྱཻ་མ་དུས་ངན་སྐྱེ་བོ་ཆོ་རིགས་ངན། །འདི་འདྲའི་ངོ་འཛིན་བྱེད་པ་ཤིན་ཏུ་འཁྲུལ། །མི་སེམས་བཟུང་བས་མི་ཟིན་ཞོག་ལ་ཐོང་། །བློ་སྙིང་བླ་མར་གཏོད་དང་དེ་ཀ་རང་། །དེང་སང་དུས་ཀྱི་བཤེས་གཉེན་ཕལ་པ་འགའ། །བཙན་ཕྱུག་གོལ་ས་མཐོན་པོའི་མི་ལ་དགའ། །གདམས་ངག་ཞུ་འདོད་མེད་ཀྱང་ངས་སྦྱིན་ཟེར། །ཆོས་ཀྱི་ཕྱག་རྟེན་ཐོགས་ནས་རྗེས་ལ་སྙོགས། །དད་གསུམ་ལྡན་ཀྱང་འབྱོར་པས་མ་ཆོག་ན། །ཆོས་སྦྱིན་ལྟ་ཅི་ཞལ་འཛུམ་དཀར་ཙམ་ཡང་། །སྟོན་པའི་གོ་སྐབས་སྤྲིན་བར་ཉི་ཞུར་འདྲ། །འདི་འདྲར་སེམས་དང་སྐྱོ་བ་མི་འཕེལ་ལམ། །ཆོས་འདོད་
ཡིན་ཟེར་གཡོན་པོའི་བསམ་སྦྱོར་ཅན། །དད་པ་མེད་པའི་ཕྱག་གིས་ཐལ་ཚུབས་སློབ། །མོས་གུས་མེད་པའི་ཁམས་འདྲི་སྙུན་ཞུ་གསོལ། །ངན་སྤྱོད་རྟོག་པའི་མིག་གིས་བྱར་བྱེད། །ཆོས་མཐོང་སྤུ་ཙམ་མེད་བཞིན་བླ་མ་བསྐུར། །གཡོ་སྒྱུའི་སྤྱོད་པའི་དགྱེ་རྒུ་ཀྱང་ཀྱོག་བྱེད། །མདོ་སྔགས་སྤྱི་བཤད་ཙམ་གྱིས་མི་ཆོག་པར། །བསྐྱེད་རྫོགས་བསྒོམ་ཁྲིད་རྫོགས་ཆེན་ཞུ་དོན་སྐད། །སྔགས་ཀྱི་རྩ་ལྟུང་དཀའ་བའི་རིན་གྱིས་ཉོས། །བསམ་བཞིན་རང་གི་རང་ཉིད་དམྱལ་བར་འཕེན། །ཆོས་ལ་འཆད་ཉན་བྱེད་བཞིན་ཆོས་སྨྲ་བའི། །སྐྱོན་མཚང་འབྲུ་ཞིང་དམ་ཚིག་རིས་སུ་འདོར། །དེ་འདྲའི་ཆོས་ཀྱི་ཅི་བྱེད་དེ་བས་རང་། །སོས་དལ་ཉི་མ་ཕུལ་ནས་བསྡད་པ་དགའ། །ལུང་མ་བསྟན་པའི་ལས་ཡིན་ཁེ་ཉེན་མེད། །འོན་ཀྱང་དེ་འདྲའི་དོ་གལ་བགྱིད་འདི། །ཆོས་བརྒྱད་ཕུག་བཅུག་ཚེ་འདིའི་ཆེ་ཐབས་ལ། །མཁས་པའི་གྲགས་པ་ཐོག་ཏུ་རེ་བས་ལེན། །བླ་མ་གླ་བ་ཆོས་ལ་གླ་ཙི་དང་། །རང་ལ་རྔོན་པ་ནན་ཏན་མདའ་འཕེན་པ། །ཆོས་འགྲུབ་འབྲས་བུ་གཞན་ཏུ་འཆོར་བའི་ཚུལ། །འདུ་ཤེས་ལོག་པ་ལྔ་ཉིད་དང་དུ་བླང་། །འདི་འདྲའི་དུས་ངན་འཆད་ཉན་བྱེད་ལོ་དང་། །བླ་མ་བསྟེན་ལོའི་དགོས་པ་མི་འདུག་པས། །དབེན་པའི་རི་ལ་རྒྱལ་བ་རྗེས་དྲན་བཞིན། །རྩེ་གཅིག་དད་
པས་གསོལ་བ་འདེབས་ཤེས་ན། །དངས་པའི་མཚོ་ལ་ཟླ་གཟུགས་འཆར་བ་བཞིན། །སྟོན་པའི་ཐུགས་རྗེ་དུས་ལས་ཡོལ་བ་མེད། །ཡང་དག་མཚན་ལྡན་བཤེས་དང་འཕྲད་པའི་ཚེ། །མཉམ་འགྲོགས་མ་བྱེད་སངས་རྒྱས་དངོས་སུ་ལྟོས། །ངན་སྤྱོད་མ་རྟོག་ཅི་མཛད་ལེགས་པར་སོམས། །ཁྱད་དུ་མ་གསོད་ཅི་གསུངས་ཚད་མར་ཟུང་། །ངོ་ལྐོག་མ་བྱེད་དམ་ཚིག་ཐུབ་པར་གྱིས། །དེ་ལྟར་བྱས་ན་རང་ཉིད་ཟབ་དོན་གྱི། །སྣོད་དུ་འགྱུར་གྱིས་བླ་མར་དགོས་ཆེད་མེད། །སྣོད་དང་མི་ལྡན་རང་གཞན་གཉིས་ཕུང་ལ། །གསང་དོན་སྨྱོན་པ་མིན་པ་སུ་ཞིག་སྒྲོགས། །དེ་ཕྱིར་ཟབ་མོའི་གསང་སྔགས་ཐོབ་འདོད་ན། །དམ་པ་བསྟེན་ཚུལ་རྒྱུད་ལས་བཤད་བཞིན་མཛོད། །གདམས་ངག་ཐོབ་ནས་ཉམས་སུ་ལེན་པའི་ཚུལ། །གང་ཟག་མཐོ་སྙབས་བྱས་པས་མི་འོང་གིས། །རང་གི་དབང་པོ་གང་མཚམས་སྐབས་དང་སྦྱོར། །དམིགས་པ་གང་ཡིན་བསམ་ཐོག་གནད་དུ་དྲིལ། །ཡོལ་ཡོལ་དང་དུ་ལོ་ཟླ་མང་པོས་ཀྱང་། །དྲོད་རྟག་བཟང་པོ་རྒྱུད་ལ་སྐྱེ་བ་དཀའ། །བཀའ་གཏེར་དག་སྣང་ཆོས་གང་ཉམས་ལེན་ལ། །དེ་ཡི་ཐོག་མཐའ་ཀུན་ལ་མཁས་པར་སློབ། །ཐོས་བསམ་དགྲ་རུ་བལྟས་པའི་སྒོམ་ཆེན་འགའ། །མཆོག་ཐུན་དངོས་
གྲུབ་སྐལ་བ་ཆད་ལ་ལྟོས། །དངོས་གྲུབ་ཀུན་གྱི་རྩ་བ་དམ་ཚིག་ཡིན། །སྡོམ་པ་གསུམ་དང་འགལ་བ་མེད་པ་དགོས། །དེ་ཕྱིར་དམ་སྡོམ་མིག་གི་འབྲས་བཞིན་སྲུངས། །སྡོམ་དང་འགལ་ན་བསྐྱེད་རྫོགས་བཟླས་བརྗོད་ལ། །ཇི་ལྟར་བརྩོན་ཀྱང་སྐྱོབས་པར་མི་འགྱུར་བར། །ངན་འགྲོར་འགྲོ་ཞེས་ཐུབ་པའི་དབང་པོས་གསུངས། །མདོ་སྔགས་ལམ་བཟང་ཀུན་གྱི་སྲོག་གཅིག་པུ། །དམིགས་པ་མཐའ་དག་འཇིག་པའི་སྟོང་ཉིད་དང་། །ཟུང་དུ་ཆུད་པའི་སྙིང་རྗེ་ཆེན་པོ་ཡིན། །འདི་དག་འོལ་སྤྱི་ཙམ་ལ་མ་བཞག་མཛོད། །བསྐྱེད་རིམ་བསྒོམ་ཚེ་བསྲུང་བའི་རྭ་གུར་ནས། །གཙོ་བོའི་ཐུགས་སྲོག་ཡེ་ཤེས་སེམས་དཔའ་ཚུན། །སྔ་ཕྱི་མེད་པར་ཡིད་ལ་དུས་གཅིག་ཏུ། །བརྟེན་དང་རྟེན་པར་ལམ་གྱིས་འཆར་བ་དགོས། །དེ་ཡང་རབ་རིབ་ཐོ་ཡོལ་ཙམ་ཞིག་གིས། །མི་འོང་སྤྱན་གྱི་དཀར་ནག་ཞལ་གྱི་སྒྲོས། །ཕྱག་ཞབས་རི་མོ་དང་བཅས་གསལ་བ་ལ། །མཚན་དང་དཔེ་བྱད་རྣམ་འགྱུར་རྫོགས་པར་དགོས། །ཞི་བའི་ཉམས་དགུ་ཁྲོ་བོའི་གར་དགུ་དང་། །རྒྱན་ཆ་བཅུ་གསུམ་དུར་ཁྲོད་དཔལ་གྱི་ཆས། །རང་རང་མཚན་ཉིད་དཔྱངས་མདུད་བགོ་བའི་ཚུལ། །ཇི་བཞིན་ཉིད་དུ་རྣམ་འགྱུར་ཐོན་པ་དགོས། །བེམ་པོའི་རང་བཞིན་ལྡེར་ཚོ་འཇའ་རིས་ལྟར། །མ་ཡིན་མཁྱེན་བརྩེ་ནུས་པའི་
བདག་ཉིད་ཅན། །དབང་པོའི་མངོན་ཤེས་ཉེར་ལྔ་ལ་སོགས་པའི། །ཡེ་ཤེས་ཕུང་པོའི་སྐུ་རུ་གསལ་བར་དགོས། །རྫོགས་རིམ་སྤྲོས་བཅས་སྤྲོས་མེད་གང་བསྒོམ་ཀྱང་། །རང་རང་ལུགས་ཀྱི་རྩ་རླུང་ཐིག་ལེ་ལ། །གནད་དུ་བསྣུན་ནས་ཡེ་ཤེས་འཆར་བའི་ཚུལ། །ཟབ་མོའི་མན་ངག་སྲང་དུ་ཚུད་པ་དགོས། །རང་རེའི་ལུགས་ལ་ཟབ་གསལ་གཉིས་མེད་དང་། །ངང་བསྒོམ་ལ་སོགས་སྤྲོས་མེད་གཙོར་སྟོན་མོད། །དེ་ལྟར་ནའང་ཐབས་དེ་ལ་བརྟེན་ནས། །ལྷར་ཞེན་མཚན་རྟོག་སྡོམ་དང་བདེ་ཆེན་འདྲེན། །ཤེས་སྒྲིབ་སྦྱངས་ཞིང་དོན་གྱི་ཡེ་ཤེས་ལ། །སྦྱོར་བའི་ཚུལ་དང་རླུང་སེམས་དག་ལུགས་བཅས། །རྒྱུད་སྡེ་སྤྱི་ལ་གྲགས་པའི་ལམ་གནད་ཀུན། །ཚིག་ཙམ་མིན་པར་འདུས་པའི་གནད་ཤེས་དགོས། །ལས་བཞིའི་ཕྲིན་ལས་གང་ལ་འཇུག་ཀྱང་རུང་། །རྒྱུ་ཡི་ཀུན་སློང་རྒྱལ་བའི་ལམ་ཆེན་དང་། །དུས་ཀྱི་ཀུན་སློང་དམིགས་པའི་མདེའུ་རྣམས། །ཐབས་ལ་མཁས་པའི་འགལ་མེད་ཁྱད་ཆོས་ཅན། །ཤེས་བཞིན་གནས་དུས་གང་དུ་བསྒྲུབ་ཀྱང་རུང་། །མཐའ་ཀླས་ཞིང་དུ་གང་འདུལ་ཐབས་མཁས་ཀྱིས། །ཚད་མེད་རྒྱལ་བའི་ཕྲིན་ལས་ལ་འཇུག་པའི། །ཏིང་འཛིན་རྒྱ་ཆེན་སྤྱོད་ལ་མ་ཞུགས་ན། །ཁྱིམ་པ་ཕོ་མོའི་
རྐྱེན་བཟློག་ཉི་ཚེ་ལ། །དམིགས་ནས་དཀྱིལ་འཁོར་གཉན་པོའི་ཞལ་འབྱེད་པ། །ཁྲིམས་ལ་དབང་བའི་རྒྱལ་པོ་ཕྱག་དར་ལ། །འདྲེན་པའི་ལས་བཞིན་མི་མཚམ་ཉེས་ཆེ་བ། །ནད་པའི་རིམ་གྲོ་གཤིན་པོའི་ཡར་འདྲེན་ལ། །འགྲོ་ཚེ་ཚད་མེད་སྙིང་རྗེའི་ཀུན་སློང་གིས། །རིམ་པ་གཉིས་དང་རྗེས་འབྲེལ་གསང་སྔགས་ཀྱི། །ཆོ་ག་ཟབ་མོའི་ཕན་བཏགས་རྒྱལ་བའི་གསུངས། །འོན་ཀྱང་མངོན་ཤེས་མེད་བཞིན་ཡོད་རློམ་གྱིས། །ནོར་རྫས་ཞེ་ལ་བརྣགས་ནས་རྫུན་རླབས་ཕྱུང་། །སེམས་ཅན་བསད་པའི་ཤ་ལ་ཞིམ་ཟས་བྱེད། །ད་རུང་ལས་འབྲས་ཆོས་སྐད་བྱེད་དོ་སྐད། །ཀྱེ་མ་བླུན་པོའི་མགོ་བསྐོར་ངན་འགྲོའི་ལམ། །དེ་འདྲའི་ཟླ་བོར་མ་བྱེད་རང་ལ་སོམས། །མདོར་ན་རང་ཉིད་གཅིག་པུར་གནས་ཀྱང་རུང་། །མི་མང་གསེབ་ཏུ་ཀུན་སྤྱོད་འདྲེས་ཀྱང་རུང་། །རང་གི་སེམས་ལ་བརྟག་དཔྱད་རིམ་དུ་གྱིས། །དགེ་སྡིག་གཉིས་ཀ་རྣམ་རྟོག་ཁོ་ན་ཡིན། །དམུ་རྒོད་སྐྱེ་བོ་མགུ་རུང་མ་མགུ་རུང་། །བླུན་པོ་རྣམས་ཀྱིས་བསྟོད་དམ་སྨད་ཀྱང་རུང་། །ཤི་ཚེ་རང་ལ་འགྱོད་པ་མེད་པ་ཞིག །བྱུང་ཚེ་དེ་ལས་ལྷག་པའི་ཆོས་མི་དགོས། །དེ་སྐད་ཕན་པའི་ཁ་ཏ་ལབ་དགོས་ཞེས། །བསྐུལ་ཚེ་ཚིག་སྙན་སྡེབ་སྦྱོར་མི་མཁས་ཀྱང་། །རང་གི་སེམས་ལ་གང་ཤར་དྲན་པའི་གཏམ། །སྨྲས་
འདིས་རང་གཞན་དོན་གཉིས་འགྲུབ་པར་ཤོག །བཀྲ་ཤིས་སོ། ༈ སྟོབས་བཅུ་མངའ་བ་རྒྱལ་དང་དེ་ཡི་སྲས། །སེམས་དཔའ་ཆེན་པོ་མཚུངས་མེད་བློ་མངའ་བ། །ཞིང་མང་གྲགས་འབར་དེ་དང་དེ་དག་གི །ཞབས་ལ་སྒོ་གསུམ་གུས་པས་ཕྱག་འཚལ་ལོ། །ཐུབ་པའི་ཆོས་ཚུལ་ཡོན་ཏན་རིན་པོ་ཆེ། །ཕུལ་བྱུང་གཏམ་གྱི་འབྱུང་གནས་བདུད་རྩིའི་རྒྱུན། །བློ་ཆེན་འཕགས་པའི་སྐྱེ་བོ་བརྒྱ་ཕྲག་གི །འཇུག་ངོགས་འཁྲུལ་པ་མེད་པ་དེ་རུ་བས། །སྲིད་པའི་བློ་ལ་ཞི་བའི་བསིལ་སྦྱིན་ཞིང་། །ཞི་བའི་རྒྱུད་ལ་སྙིང་རྗེའི་རླན་སྟེར་བ། །ཚད་མེད་བྱང་ཆུབ་སེམས་མཆོག་རིན་པོ་ཆེ། །སྲིད་ཞིའི་ཁམས་ན་ཡིད་བཞིན་ནོར་བུ་གཅིག །འདི་ནི་དམ་ཆོས་ཀུན་གྱི་བརྗོད་བྱ་སྟེ། །འདི་ནི་རྒྱལ་བ་ཀུན་གྱི་གཤེགས་ཤུལ་ཡིན། །འདི་ནི་སེམས་དཔའ་ཀུན་གྱི་སྤྱི་ནོར་སྟེ། །འདི་ནི་སངས་རྒྱས་ཀུན་གྱི་བླ་མ་ཡིན། །ཕྱོགས་བཅུ་ཀུན་ན་རྒྱལ་དང་རྒྱལ་བའི་སྲས། །ཇི་སྙེད་དམ་ཆོས་འཆད་དང་འཛིན་པ་ཡང་། །རོ་གཅིག་བྱང་ཆུབ་སེམས་སུ་འདུས་པ་དང་། །བྱང་ཆུབ་སེམས་ཀྱི་གཞི་ལས་འཕྲོ་བར་སྣང་། །འདི་ལས་མ་གཏོགས་རྒྱལ་བའི་ལམ་མེད་དེ། །འདི་ལས་ལྷག་པའི་རྒྱལ་བའི་ལམ་ཡང་མེད། །
འདི་ལས་མ་འཕྲོས་རྒྱལ་བའི་ལམ་མེད་དེ། །འདི་རུ་མ་འདུས་རྒྱལ་བའི་ལམ་ཡོད་མིན། །དེ་ཕྱིར་རྒྱལ་ཀུན་བགྲོད་པ་གཅིག་པུའི་ལམ། །བྱང་ཆུབ་སེམས་ཀྱི་ནོར་བུ་རིན་པོ་ཆེ། །ཐར་འདོད་སྐལ་བཟང་ལག་རྩེར་ལེན་པ་ལ། །བརྒྱུད་པ་གསུམ་གྱི་མན་ངག་ལྡན་པ་དགོས། །ཟབ་མོ་ལྟ་བ་རྒྱ་ཆེན་སྤྱོད་པའི་ལམ། །ཟབ་ཅིང་རྒྱ་ཆེ་ཐེག་པ་ཆེན་པོའི་གཞུང་། །ལྟ་སྤྱོད་ས་ལམ་ཏིང་འཛིན་རྒྱ་ཆེ་ཞིང་། །ཐབས་མཁས་ཡེ་ཤེས་རྣམ་གྲངས་ཆེས་ཟབ་པའི། །འཕགས་པས་བཀྲལ་བའི་གཞུང་བཟང་བརྟེན་དགོས་ཕྱིར། །འཕགས་ཡུལ་ཤིང་རྟའི་སྲོལ་འབྱེད་རྣམ་གཉིས་དང་། །བོད་ཡུལ་ཐུབ་བསྟན་རྒྱན་གཅིག་ཀློང་ཆེན་པའི། །གཞུང་ལས་ཕྱི་རོལ་གྱུར་ལ་ཐར་ལམ་མེད། །བྱང་ཆུབ་སེམས་ཀྱི་མན་ངག་མི་ལྡན་པར། །སྙིགས་དུས་འདི་ན་སྔགས་པར་རློམ་པ་ཕལ། །ཁ་ཆོས་མཐོན་པོས་ནམ་མཁའ་འགེངས་བགྱིད་མོད། །ཅི་ཙམ་བཟང་ཡང་འབྱུང་པོའི་ཆོས་ལུགས་ཡིན། །ཐེག་ཆེན་གཞུང་ལ་སྦྱང་བ་མ་བྱས་ཤིང་། །ཡང་དག་གཞུང་ལུགས་དགྲ་ལྟར་ལྟ་བྱེད་པ། །དེ་ཡི་རྒྱུད་ལ་རྒྱལ་བའི་ལམ་མེད་དེ། །བྱང་ཆུབ་སེམས་མཆོག་དེ་ཡིས་ཇི་ལྟར་ཤེས། །ལྷ་དང་བཅས་པའི་སྟོན་པ་དེས་ཀྱང་ནི། །གྲངས་མེད་གསུམ་དུ་ཐོས་པའི་མཛོད་བསགས་ནས། །ཐེག་ཆེན་ལམ་
བཟང་ད་གདོད་སྙོན་མཛད་ན། །བོད་རྒན་བླུན་པོའི་རང་གར་ཤེས་རེ་ཀན། །བསམ་པ་བཟང་དང་སྙིང་རྗེ་ཕྱོགས་རེ་བས། །གནས་སྐབས་མིག་ཆུ་གཡོ་བར་སླ་བ་ཕལ། །བླུན་པོའི་བྱང་ཆུབ་སེམས་དཔར་སྒྲོ་འདོགས་ཀྱང་། །དེ་འདྲ་བྱང་ཆུབ་སེམས་མཆོག་ཡིན་རེ་ཀན། །བཟླས་བརྗོད་བརྩོན་དང་བསམ་གཏན་བསྒོམ་ལོ་ཕལ། །རྒྱལ་བའི་ལམ་དུ་རློམ་པ་བྱེད་མོད་ཀྱང་། །ཐོག་མཐའ་བར་གྱི་མན་ངག་མ་ཤེས་ན། །དེ་འདྲ་རྒྱལ་སྲས་སྤྱོད་མཆོག་ཡིན་རེ་ཀན། །མཚུངས་པ་མེད་པ་ལྷ་དང་བཅས་པའི་སྐྱབས། །ཡོན་ཏན་འབྱུང་གནས་དཀོན་མཆོག་རིན་པོ་ཆེ། །ཡིད་ཆེས་སྐྱབས་སུ་ངེས་པ་མ་རྙེད་ན། །དེ་འདྲ་ནང་པ་སངས་རྒྱས་ཡིན་རེ་ཀན། །སངས་རྒྱས་དེ་སུ་ཡོན་ཏན་ཇི་ལྟ་བུ། །དེ་ལ་སྐྱབས་འོས་རྒྱུ་མཚན་ཇི་ཡིན་པ། །ཕྱོགས་ཙམ་མི་ཤེས་སྐྱབས་འགྲོ་འབུམ་སྒྲོགས་ཀྱང་། །དེ་འདྲ་ལམ་གྱི་སྐྱབས་འགྲོ་ཡིན་རེ་ཀན། །སྐུ་གསུམ་ཡེ་ཤེས་ལྔ་ལྡན་དེ་སངས་རྒྱས། །ཡོན་ཏན་རྣམ་གྲངས་བསམ་གྱིས་མི་ཁྱབ་པ། །དེ་ནི་འཁོར་བའི་འཆིང་བྱེད་ཀུན་གྲོལ་བའི། །བསླུ་བ་མེད་པ་གཏན་གྱི་སྐྱབས་གནས་ལགས། །དམ་པའི་ཆོས་དང་རྒྱལ་སྲས་སེམས་དཔའི་ཚོགས། །མ་ལུས་ཡོན་ཏན་ཀུན་གྱི་གངས་ཆེན་མཚོ། །ལྷར་བཅས་འགྲོ་བའི་ཕན་བདེ་མཆོག་གི་གཏེར། །འདི་དག་མཁས་པ་རྣམས་ཀྱི་སྐྱབས་གནས་ཡིན། །རྒྱལ་དང་རྒྱལ་སྲས་སེམས་དཔའ་ཆེ་
རྣམས་ཀྱི། །དགོངས་སྤྱོད་རྒྱ་མཚོ་དཔག་གིས་མི་ལང་བ། །ཡོན་ཏན་མཆོག་གི་རང་བཞིན་དེ་ཤེས་ནས། །འགྱུར་མེད་དད་བཅས་མཁས་པའི་སྐྱབས་འགྲོ་ཡིན། །གནས་སྐབས་རང་བློས་དུཿཁ་དང་བླང་ནས། །ཉམ་ཐག་མཆི་མའི་རླན་གྱིས་གདོང་བཀྲུ་ཡང་། །ཡིད་ཆེས་མཆོག་གསུམ་ཡུལ་ལ་མ་ཐོབ་པའི། །བཅོས་མའི་འོ་དོད་བླུན་པོའི་སྐྱབས་འགྲོ་ཡིན། །རྒྱུ་དང་ཡུལ་དང་སྐྱབས་སུ་འགྲོ་བའི་ཚུལ། །བསླབ་བྱ་དང་བཅས་འཁྲུལ་མེད་མ་ཤེས་ན། །དེ་ཡི་རྒྱུད་ལ་ཐུན་མོང་མ་ཡིན་པའི། །སྐྱབས་འགྲོའི་ཁྱད་པར་ཇི་ལྟར་ཡོད་པར་འགྱུར། །འདི་མེད་ལམ་རྣམས་ཀུན་གྱི་རྟེན་མེད་ལ། །ཡོན་ཏན་ལོ་ཏོག་བསྐྱེད་པའི་ཞིང་ས་མེད། །ཐར་པའི་ལམ་དུ་འགྲོ་བའི་བཤེས་མེད་དེ། །ནང་པ་སངས་རྒྱས་གྲལ་དུ་ཚུད་པ་མེད། །འདི་ཡོད་དཀོན་མཆོག་གསུམ་གྱི་སྐྱབས་འོག་ཚུད། །ཅི་བྱས་ཐར་པའི་ལམ་དུ་ངེས་པར་འགྲོ། །ངན་སོང་མི་སྐྱེ་ཡང་དག་ལྟ་དང་མཇལ། །ཚེ་རབས་ཀུན་ཏུ་ལམ་བཟང་རྙེད་པར་འགྱུར། །དེ་ཕྱིར་གང་ལ་བརྟེན་ན་དུས་ཀུན་ཏུ། །མི་བསླུ་ངེས་པ་དཀོན་མཆོག་རིན་པོ་ཆེ། །ཡུལ་དུ་བྱས་ནས་སྐྱེས་བུ་ཆེན་པོའི་བློས། །སྐྱབས་འགྲོ་བྱེད་པ་བྱང་ཆུབ་སེམས་ཀྱི་རྟེན། །རང་དོན་ཡིད་བྱེད་འཆིང་བའི་རྒྱ་རལ་ཏེ། །གཞན་
གྱི་ཡང་དག་རྫོགས་བྱང་དོན་གཉེར་བློས། །ཀུན་ཏུ་བཟང་པོའི་སྤྱོད་པས་ཡོངས་བསྔོ་བའི། །ཕྱིན་དྲུག་ལ་སྤྱོད་བྱང་ཆུབ་སེམས་དངོས་ལགས། །སྨོན་འཇུག་གཉིས་དང་ཀུན་རྫོབ་དོན་དམ་སོགས། །དབྱེ་སྒོ་མང་ཡང་འདིར་ནི་ཀུན་འདུས་ཏེ། །ཡོན་ཏན་ཀུན་གྱི་འབྱུང་གནས་རིན་པོ་ཆེ། །བྱང་ཆུབ་སེམས་ཞེས་བྱ་བ་འདི་ཉིད་ཡིན། །སེམས་འདི་བསྐྱེད་པ་ཙམ་ནས་རྒྱལ་བའི་སྲས། །ལྷ་དང་བཅས་པའི་མཆོད་རྟེན་གྱུར་པ་སྟེ། །ཕན་ཡོན་ཁྱད་པར་དཔག་གིས་མ་ལང་ཡང་། །ཁྱད་ཆོས་ངེས་པར་ཐོབ་པ་བཞི་ཡིན་ཏེ། །དགེ་རྩ་བྱང་ཆུབ་བར་དུ་མི་ཟད་དང་། །འབྲས་བུ་བསོད་ནམས་ཤུགས་ཀྱིས་འཕེལ་བ་དང་། །སྡིག་དང་ཉོན་མོངས་གཉེན་པོ་བྱེད་པ་དང་། །རྒྱལ་བའི་སྲས་སུ་མིང་དོན་འགྱུར་བའོ། །སེམས་དེ་ལེགས་པར་བསྐྱེད་ནས་དེའི་ཉམས་ལེན། །བརྒྱུད་པ་གསུམ་གྱི་མན་ངག་བདུད་རྩིའི་ཀླུང་། །གང་ཡང་བྱང་ཆུབ་སེམས་སུ་རོ་གཅིག་པ། །ལྟ་དང་བསྒོམ་དང་སྤྱོད་པ་རྣམ་དག་གོ། ལྟ་བ་ཟབ་མོ་སྤྲོས་བྲལ་དེ་བཞིན་ཉིད། །རྒྱལ་བའི་ཡུམ་དུ་དངོས་བསྟན་སྟོང་པ་ཉིད། །སོ་སོ་རང་རིག་མཉམ་བཞག་སྤྱོད་ཡུལ་བ། །ངེས་ཤེས་བློ་བྲལ་དབུ་མ་ཆེན་པོ་ཡིན། །དོན་འདི་ཟབ་མོ་ལྟ་བརྒྱུད་མན་ངག་སྟེ། །སངས་རྒྱས་
གཉིས་པ་ཀླུ་སྒྲུབ་ཡབ་སྲས་ཀྱི། །བརྒྱུད་པའི་མན་ངག་རང་བཟོས་མ་བསླད་པའི། །མཁས་པའི་གཞུང་ལ་བརྟེན་ནས་སྒྲོ་འདོགས་བཅད། །བསྒོམ་པའི་ཏིང་འཛིན་ཤེར་ཕྱིན་དངོས་བརྒྱད་ལས། །མཁྱེན་གསུམ་ཡུལ་ན་མི་གནས་མི་སྦྱོར་བའི། །སྒོམ་མེད་སྒོམ་པ་མཉམ་ཉིད་ཏིང་འཛིན་ལ། །རྟག་ཏུ་མཉམ་བཞག་ས་ལམ་བགྲོད་པ་ཡིན། །དོན་འདི་ཟབ་དང་རྒྱ་ཆེའི་མན་ངག་སྟེ། །རྒྱལ་བའི་རྒྱལ་ཚབ་མ་ཕམ་ཐོགས་མེད་ཀྱིས། །ལེགས་བཤད་ལམ་བཟང་རྟོག་གེས་མ་བསླད་པའི། །གཞུང་ལུགས་བརྟེན་ནས་ཇི་བཞིན་ཉམས་སུ་བླང་། །སྤྱོད་པ་རྒྱ་ཆེ་ཀུན་ཏུ་བཟང་པོའི་སྤྱོད། །རྒྱལ་སྲས་སྤྱོད་མཆོག་མུ་མཐའ་མི་གཏུགས་པ། །བསྡུས་པའི་སྡོམ་གཅིག་ལུས་དང་ལོངས་སྤྱོད་དང་། །དུས་གསུམ་དགེ་ཚོགས་བཏང་སྲུང་དག་སྤེལ་ལོ། །དོན་འདི་རྒྱ་ཆེན་སྤྱོད་པའི་མན་ངག་སྟེ། །རྒྱལ་བའི་རྒྱལ་སྲས་མཚུངས་མེད་ཞི་བ་ལྷའི། །གཞུང་བཟང་བསླབ་ཀུན་བཏུས་དང་སྤྱོད་འཇུག་གཞུང་། །བརྩོན་པས་མཉན་བསམ་བཀླག་ནས་དང་དུ་བླང་། །འོན་ཀྱང་བསྲུང་བྱའི་གཙོ་བོ་རྩ་ལྟུང་སྟེ། །བརྒྱུད་པ་སྔ་མའི་རྗེས་འབྲང་བཅོ་བརྒྱད་དང་། །བར་མའི་
བཞི་ཡིན་དེ་དག་ཀུན་བསྡོམ་ནས། །སྨོན་སེམས་འདོར་བསྣན་ཉེར་གཉིས་ཕྱི་མས་སོ། །སྤེལ་བའི་གཙོ་བོ་ཕྱིན་དྲུག་སྤྱོད་པ་སྟེ། །གོ་སླ་མན་ངག་གནད་དུ་བརྡེག་པའི་ཆོས། །སྤྱོད་འཇུག་གཞུང་འདྲ་རྒྱ་བོད་གཉིས་ཆར་མེད། །འདི་ལ་མ་བརྟེན་སངས་རྒྱས་ཇི་ལྟར་ཡོད། །དེ་ལྟར་བརྒྱུད་གསུམ་མན་ངག་བདུད་རྩིའི་ཀླུང་། །གང་དུ་འདུས་པ་ལེགས་བཤད་མ་གྲོས་མཚོ། །བློ་སྐྱོན་རྙོག་མའི་དུག་དང་མ་འདྲེས་པ། །ཀུན་མཁྱེན་གཞུང་ལུགས་ཤིང་རྟ་ཆེན་པོ་ཡིན། །མང་ཐོས་བདུད་རྩིའི་རྒྱ་མཚོ་བསྲུབ་ལས་སྐྱེས། །ལེགས་བཤད་མར་བཅུད་ཕྱི་རབ་བཅུད་ལེན་དུ། །བཞག་འདི་དད་གསུམ་ལྕེ་ཡིས་མི་མྱོང་ན། །ཀུན་མཁྱེན་ཕྱག་གིས་ཇི་ལྟར་ཅོ་ནས་འདྲེན། །གཞུང་འདི་མདོ་སྔགས་ཀུན་གྱི་སྤྱི་འགྲེལ་ཏེ། །བརྒྱུད་པ་བསམ་གྱིས་མི་ཁྱབ་མན་ངག་རྫོགས། །རྒྱལ་བའི་གཞུང་ཀུན་ཚང་ལ་མ་ནོར་བ། །ལེགས་བཤད་འདི་འདྲ་སྔོན་ཆད་འབྱུང་བ་མེད། །ཐུབ་པའི་གཞུང་ལུགས་ལང་ཚོ་རྒྱས་པའི་ལུས། །རྗོད་བྱེད་ཚིག་རྫོགས་རིན་ཆེན་རྒྱན་བཀྲ་ཞིང་། །བརྗོད་བྱའི་དོན་ཟབ་རེག་བདེའི་དཔལ་འཛིན་པ། །ཐེག་དགུའི་ཡན་ལག་ཆ་ཤས་ཚང་བ་འདི། །ཕྱོགས་རེས་བློ་ཁེངས་གསར་རྙིང་གཅན་ཟན་ཁྱུས། །རློམ་པའི་ང་རོ་སྒྲོགས་བཞིན་ལྷུར་གཏུབ་ནས། །ཟ་ཡང་
ཕྱོགས་རེའི་ལམ་གྱི་ལྟོ་འགྲང་ལས། །རྒྱལ་བསྟན་ཡོངས་རྫོགས་རྩེ་དགས་མྱོང་བ་མེད། །སྐུ་གསུམ་ཡོངས་རྫོགས་ཆོས་ཀྱི་ཕོ་བྲང་དུ། །རྒྱལ་བསྟན་ཡོངས་རྫོགས་ཐིག་ལེ་མཆོག་མའི་ལུས། །རེག་པའི་རྩེ་དགའ་ཐེག་དགུའི་གླུར་ལེན་པ། །འཛམ་གླིང་འདི་ན་ཀུན་མཁྱེན་ཡབ་སྲས་ཙམ། །གཞུང་ལུགས་འདི་འདྲ་རྒྱལ་བའི་བསྟན་པ་ཀུན། །ཚང་བ་ལགས་ཀྱིས་དེ་ལས་གཞན་གྱུར་པའི། །བསྟན་བཅོས་ཐམས་ཅད་ཕྱོགས་རེ་ནས་ཟབ་ཀྱང་། །ཐེག་དགུའི་ཟབ་གནད་ཐུས་ཀ་མ་ཚང་ནོངས། །སྙིགས་དུས་འདི་ན་རྒྱལ་བསྟན་ཕྱོགས་རེར་གཅོད། །རྟོག་གེ་ཟོལ་མས་མཚན་ཉིད་གཞུང་ལུགས་བསླད། །རྫུན་གཏེར་ཟོག་པོས་གསང་སྔགས་བསྟན་པ་བསྣུབ། །སུས་ཀྱང་གང་དུ་རང་བཟོ་བགྱིད་དུས་འདིར། །ལུང་རིགས་མཁས་པའི་གཞུང་དང་ཆོས་མཐུན་ལ། །ཉམས་མྱོང་གྲུབ་པའི་མན་ངག་མ་ནོར་བ། །ཡིད་ཆེས་རྒྱལ་བའི་བཀའ་དང་དབྱེར་མེད་པ། །ཀུན་མཁྱེན་གཞུང་བཟང་འདི་ལས་གཞན་གྱིས་ཅི། །གཞུང་བཟང་འདི་དག་མེ་ཏོག་ཕྲེང་བཞིན་དུ། །སྤྱི་བོས་བླང་ནས་ཉན་འཆད་འཛིན་པ་དེ། །སྐལ་བཟང་འདི་ལགས་བསྟན་འཛིན་སྐྱེས་བུ་དེ། །ཀུན་མཁྱེན་བླ་མའི་རྗེས་སུ་འཇུག་པའང་དེ། །དེ་ལས་གཞན་དུ་ཆོས་བརྒྱད་བསྒྲུབ་པའི་བློས། །མཁས་པའི་གཞུང་
ལུགས་དཀྲུགས་པ་མི་མཛེས་ཏེ། །ཀུན་མཁྱེན་གསུང་གི་རྗེས་གནང་མ་ཐོབ་པར། །ལེགས་བཤད་རྐུ་བ་བསྟན་འཛིན་ཇི་ལྟར་ཡིན། །གང་ཡང་རྒྱལ་བའི་གསུང་དང་དབྱེར་མེད་པ། །ལེགས་བཤད་འདི་འདྲ་རྙེད་པར་དཀའ་བས་ན། །སེམས་ལྡན་ཡོད་ན་གཞུང་བཟང་འདི་དག་ལ། །བརྩོན་པས་ཉན་འཆད་སྒྲུབ་པར་ཅིས་ཀྱང་བསྐུལ། །འདི་འདྲའི་ལེགས་བཤད་སྔོན་ཆད་མ་བྱོན་ན། །ཕྱིན་ཆད་འབྱོན་འགྱུར་གཏན་ནས་ཅི་ལྟར་ཡོད། །མན་ངག་སྟོང་གི་གཏེར་ཁ་འདི་ཡིན་གྱིས། །གཏེར་འདི་འབྱེད་ལ་བློ་གྲོས་གཟུང་རྣོན་བརྡོར། །དད་པ་གསུམ་དང་ཤེས་རབ་སྐལ་པ་ཡིས། །ཀུན་མཁྱེན་བླ་མའི་དགོངས་པའི་གཏེར་བླང་ནས། །རང་གིས་ཉམས་བླང་གཞན་ལ་སྤེལ་བརྩོན་པ། །གཏེར་སྟོན་དེ་ཡིན་གྲུབ་ཐོབ་དངོས་ཀྱང་དེ། །དེ་ལས་གཞན་དུ་ཉམས་ཆོས་ཟ་ཟི་དང་། །བསྐྱེད་རྫོགས་མེད་པའི་སྒྲུབ་ཐབས་དུམ་བུའི་ཆོས། །ཅི་ཙམ་མང་ཡང་མཁས་པས་ཞེ་ཁྲེལ་ཞིང་། །སངས་རྒྱས་གཉིས་པའི་བསྟན་པའི་བླ་འཚོང་ཡིན། །སངས་རྒྱས་དངོས་དང་འདྲ་བའི་མཁས་གྲུབ་ཀྱི། །གསུང་ལ་ཡིད་ཆེས་ཉམས་ལེན་མི་བགྱིད་པར། །སོ་སྐྱེས་འཁྲུལ་པ་ལས་ཀྱང་ཉིད་འཁྲུལ་གྱི། །གཏམ་ལ་རེ་བ་ཆོས་སྐལ་ཆད་པའི་
རྟགས། །ཉམས་ལེན་ཡིན་ན་ཌཱ་དྲིལ་ཁྲོལ་ཁྲོལ་དང་། །ཕྲེང་བ་ཁྲོག་ཁྲོག་ཅིས་ཀྱང་མི་དགོས་ཀྱི། །ངལ་བསོ་གསུམ་དང་ཡོན་ཏན་རིན་པོ་ཆེར། །གཞུང་ལུགས་གདམས་པར་ཤར་བའི་ཉམས་ལེན་དགོས། །ཉམས་ལེན་ཁ་ལ་ཁྱེར་བས་ཅི་ཕན་གྱིས། །ཚིག་དོན་གོ་བ་བླང་ནས་སྐྱོར་སྦྱང་དང་། །དགོས་དོན་སེམས་དང་བསྲེས་ནས་བློ་སྦྱང་ཞིང་། །གནད་དོན་ཐུན་དུ་བཅད་ལ་ཉམས་ལེན་དགོས། །དེ་ལྟར་ཤེས་ན་རྒྱལ་བའི་རྗེས་སུ་ཞུགས། །བཤད་དང་སྒྲུབ་པའི་བསྟན་པ་དུས་གཅིག་ཟིན། །ལུང་དང་རྟོགས་པའི་ཆོས་ལ་རང་དབང་བསྒྱུར། །མི་རིང་ཆོས་རབ་རྣམ་འབྱེད་རྟོགས་པ་སྐྱེ། །དེ་ལས་གཞན་དུ་ཆོས་ཅན་མི་ཤེས་པའི། །ཆོས་ཉིད་རྟོགས་བློ་འཕགས་པའི་ཡེ་ཤེས་མིན། །ཇི་ལྟ་མཁྱེན་ཅིང་ཇི་སྙེད་མི་མཁྱེན་པའི། །འཕགས་པ་ཡོད་པ་རྒྱལ་བའི་གཞུང་ལུགས་མིན། །དེ་སླད་རྒྱལ་བ་ཀུན་གྱི་ལམ་པོ་ཆེ། །བྱང་ཆུབ་སེམས་མཆོག་བདེ་ནས་བདེ་བའི་ལམ། །ཆེ་འབྲེལ་ཆུང་འབྲེལ་གཅིག་ཏུ་འཚེར་བའི་ཆོས། །འདི་གཅིག་བསྒོམ་ན་སངས་རྒྱས་ལག་རྩེར་ཡོད། །དེས་ན་བདག་དང་ཁྱོད་ཀྱང་ཀུན་མཁྱེན་རྗེའི། །གཞུང་བཟང་འདི་དང་ནམ་ཡང་མི་འབྲལ་ཞིང་། །བྱང་ཆུབ་སེམས་ཀྱི་སྤྱོད་པས་རྒྱུད་གྲོལ་ནས། །ནམ་མཁར་མཉམ་པའི་འགྲོ་
ལ་ཕན་ཕྱིར་སྨོན། །ཉམས་སུ་མ་ལོན་ནེ་ཚོའི་འདོན་པ་ལྟའི། །ཆོས་བཤད་སྨྲ་བའི་མོས་པ་ཡོད་མིན་ཡང་། །རྒྱལ་བ་གཉིས་པ་ཀུན་མཁྱེན་ཡབ་སྲས་ཀྱི། །གསུངས་གིས་མི་བསླུ་བ་ཡི་དབང་བགྱིས་ནས། །ཆོས་མཐུན་གྲོགས་ཀྱིས་ཡང་ཡང་བསྐུལ་བའི་ལན། །ཅིས་ཀྱང་མ་ལྡོག་རྫ་སྟོད་ཆར་སྐྱེས་པའི། །ཨ་བུ་ཧྲལ་པོས་བདེན་གཏམ་ཟང་མ་བྲིས། །ཀུན་གྱིས་ཡིད་ཆེས་གནས་སུ་འགྱུར་བར་ཤོག །དགེའོ། དགེའོ། དགེའོ། ༈ ངེས་འབྱུང་སོ་ཐར་རྩ་བ་བརྟན་པ་ལ། །གཞན་ཕན་བྱང་སེམས་ལོ་འདབ་རྣམ་པར་རྒྱས། །གསང་སྔགས་ཟབ་ལམ་འབྲས་བཟང་དར་བབ་པའི། །ལེགས་བཤད་གཞུང་འདི་བཟའ་ཤིང་ལྗོན་པ་བཞིན། །སྐལ་བཟང་གང་ཞིག་ལམ་མཆོག་འབྲས་བཟང་རོ། །མྱོང་འདོད་དད་གསུམ་མཆུ་སྒྲོས་སྐྱོང་བ་གང་། །ཐབས་ཤེས་གཤོགས་པས་ཆོས་དབྱིངས་མཁར་བགྲོད་དེ། །སྐུ་བཞིའི་གླིང་དུ་མི་ཐོགས་འགྲོ་བར་ངེས། །དེ་ཕྱིར་འཆད་རྩོད་རྩོམ་པའི་རྣམ་དཔྱོད་ཀྱི། །ལང་ཚོའི་ཉིན་བྱེད་བཤད་རླབས་བཀྲག་འབར་བ། །བློ་གསལ་བློ་ཡི་པདྨོ་ཁ་འབྱེད་པའི། །སྐལ་བཟང་ཉིན་བྱེད་གཞོན་ནུ་དེང་ཤར་རོ། །ཉིན་མོའི་དཔལ་འདི་གང་གི་སྐལ་པ་རུ། །ཐོབ་དེ་
ཆུད་མ་ཟོས་པ་དེའི་འོད་སྣང་། །བློ་གྲོས་པདྨོའི་གཉེན་དུ་འཐུང་ཤེས་ན། །ལེགས་ལམ་དཔལ་བརྒྱ་མ་བོས་བཞིན་དུ་འདུ། །ཞེས་པའང་དཔལ་སྤྲུལ་པས་སོ། ༈ །གྲོགས་བཟང་པོའི་ཀུན་སྤྱོད་འདི་ལྟར་འགོ །གྲོགས་ཤེས་རབ་ཅན་བརྟེན་ནས་བློ་གྲོས་འཕེལ། །གྲོགས་སྙིང་རྗེ་ཅན་བརྟེན་ན་བྱང་སེམས་སྐྱེ། །གྲོགས་ཆོག་ཤེས་ཅན་བརྟེན་ན་འདོད་པ་ཆུང་། །གྲོགས་གཏོང་ཕོད་ཅན་བརྟེན་ན་གཏོང་སེམས་འབྱུང་། །གྲོགས་ཞི་དུལ་ཅན་བརྟེན་ན་རང་རྒྱུད་བཟང་། །གྲོགས་སྐྱོ་ཤས་ཅན་ལས་སྐྱོ་ཤས་དང་། །གྲོགས་ངེས་འབྱུང་ཅན་བརྟེན་ལས་ཐར་འདོད་འབྱུང་། །གྲོགས་ཕྱི་མ་གཉེར་བརྟེན་དགེ་བ་དྲན། །གྲོགས་བཟང་པོ་བརྟེན་ལས་ངེས་འབྱུང་སྐྱེ། །གྲོགས་ཆོས་པ་བརྟེན་ནས་ཆོས་སྒྲུབ་དྲན། །གྲོགས་འདོད་པ་ཆུང་བརྟེན་ཆོག་ཤེས་འབྱུང་། །གྲོགས་བརྩོན་འགྲུས་ཅན་ལས་སྙིང་སྟོབས་ཆེ། །གྲོགས་དམ་པ་དང་འགྲོགས་ན་ཡོན་ཏན་འགོ །གྲོགས་ཐར་འདོད་ཅན་བརྟེན་གཏན་བདེ་གཉེར། །གྲོགས་དགེ་སེམས་ཅན་ལས་དགེ་བློ་འབྱུང་། །གྲོགས་དག་སྣང་ཅན་ལས་དད་པ་སྐྱེ། །གྲོགས་བློ་ལྡན་དང་འགྲོགས་ན་གཏན་འདུན་འགྲུབ། །གྲོགས་བཟང་པོའི་ཀུན་སྤྱོད་དེ་ལྟར་ཡིན། །དོན་དེ་ཕྱིར་དགེ་བའི་གྲོགས་པོ་བརྟེན། །
གྲོགས་ངན་པའི་ཀུན་སྤྱོད་འདི་ལྟར་འགོ །གྲོགས་གཏི་མུག་ཅན་བརྟེན་ཤེས་རབ་འགྲིབ། །གྲོགས་ཞེ་སྡང་ཅན་བརྟེན་རང་རྒྱུད་ངན། །གྲོགས་འདོད་ཆགས་ཅན་བརྟེན་ན་ན་ཆུང་དྲན། །གྲོགས་སེར་སྣ་ཅན་བརྟེན་ན་སེར་སྣ་སྐྱེ། །གྲོགས་ང་རྒྱལ་ཅན་བརྟེན་ན་འགྱིང་ཚུགས་དྲན། །གྲོགས་ངེས་འབྱུང་མེད་བསྟེན་ཚེ་འདིར་ཆགས། །གྲོགས་འདིར་སྣང་གཉེར་བསྟེན་ཕྱི་མ་བརྗེད། །གྲོགས་ཐ་ཆད་བསྟེན་ལས་སོ་ནམ་དྲན། །གྲོགས་ཁེ་སྤོགས་ཅན་བསྟེན་ཚོང་བྱེད་སེམས། །གྲོགས་ནོར་སྲེད་ཅན་བརྟེན་གསོག་འཇོག་དྲན། །གྲོགས་ལེ་ལོ་ཅན་བརྟེན་སྒྱིད་ལུགས་འགྱུར། །གྲོགས་རྣམ་གཡེངས་ཅན་བརྟེན་གཡེང་བས་འཁྱེར། །གྲོགས་སྣང་ཤས་ཅན་བསྟེན་ཚེ་འདིར་གཡེངས། །གྲོགས་སྡིག་ལྡན་དང་འགྲོགས་སྡིག་སེམས་སྐྱེ། །གྲོགས་དད་མེད་དང་འགྲོགས་དག་སྣང་ཆུང་། །གྲོགས་མདོ་ཤོར་དང་འགྲོགས་མི་དགེ་དྲན། །གྲོགས་ངན་པའི་ཀུན་སྤྱོད་དེ་ལྟར་ཡིན། །དོན་དེ་ཕྱིར་སྡིག་པའི་གྲོགས་པོ་སྤོངས། །ཞེས་པ་འདི་བླ་མ་རིག་འཛིན་རྒྱ་མཚོའི་ངོར་དཔལ་སྤྲུལ་པས་སོ། །དགེའོ། ༈ ན་མོ་མཉྫུ་ཤྲཱི་ཡེ། རྒྱལ་བ་ཀུན་གྱི་རྨད་བྱུང་མཁྱེན་པའི་དཔལ། །བརྩེ་བའི་ཐུགས་རྗེ་གཟུགས་ཀྱི་སྐུར་བསྟན་ནས། །ནུས་པའི་སྟོབས་ཀྱིས་འགྲོ་བའི་མགོན་མཛད་པ། །རྒྱལ་སྲས་
སེམས་དཔའ་འཇམ་དཔལ་དཔའ་བོས་སྐྱོངས། །དལ་བའི་རང་བཞིན་སྐྱོན་དང་བྲལ་རྙེད་ནས། །འབྱོར་པའི་ཡོན་ཏན་ཚང་བའི་གཞོན་ནུ་ཁྱེད། །ཚུལ་བཞིན་རྒྱལ་བའི་བསྟན་ལ་སློབ་འདོད་ན། །ཐོས་བསམ་བསྒོམ་གསུམ་ཚང་པའི་ཉམས་ལེན་དགོས། །ཐོས་པ་མེད་པའི་བསྒོམ་པ་བྱེད་ལོ་ཕལ། །གནད་མེད་དགེ་སྦྱོར་མུན་པའི་མདའ་འཕེན་གྱིས། །རང་རྒྱུད་མ་དུལ་ཆོས་པའི་གཟུགས་བརྙན་ཅན། །ཡང་དག་ཆོས་ལ་རྒྱབ་འགལ་སོང་བ་མང་། །ཐོས་པ་གང་ལས་ཐོས་པར་བྱ་བའི་ཡུལ། །མཁས་ཤིང་བརྩེ་བས་སྟོན་ལ་མི་ངལ་བའི། །ཡང་དག་སློབ་དཔོན་བརྟེན་ལ་རགས་ལས་པས། །ཡོན་ཏན་ཚོགས་མངའ་འབད་པས་བཙལ་བར་བྱ། །འབྲི་ཀློག་སྒྲ་དང་རིག་པའི་གནས་མཐའ་དག །ཐོས་བསམ་སྒོམ་པའི་ཆོས་ཀྱི་རྟེན་ཡིན་པས། །ཤེས་བྱའི་ཆོས་ཀུན་སྤང་བླང་བྱ་བའི་ཕྱིར། །ཤེས་ནས་ཡོན་ཏན་སྣ་ཁ་མང་དུ་ཚོལ། །གཞོན་ནུའི་དུས་སུ་སློབ་གཉེར་མ་བྱས་ན། །ན་སོ་སོན་ནས་འགྱོད་པའི་བློ་སྐྱེ་བས། །ད་ལྟའི་སྐབས་འདིར་བསླབ་སྦྱང་ཁོ་ན་གཙོ། །བསླབ་བྱའི་གནས་དང་གང་ལས་སློབ་པའི་ཡུལ། །འདམ་ཀ་མི་བྱེད་སུ་ཡིས་ཅི་ཤེས་པ། །དེ་དང་དེ་ལས་འཕྲལ་དུ་བསླབ་གྱུར་ན། །ཐིག་པ་བསགས་པས་རྒྱ་མཚོར་འགྱུར་བ་བཞིན། །
ཡོན་ཏན་ཚོགས་ཀྱིས་རང་བློ་ཁེངས་པར་འགྱུར། །སྐྱོན་བརྒྱ་ཚང་བའི་མི་ངན་ཕལ་པ་ལ། །ཤེས་བྱ་རིག་པའི་ཡོན་ཏན་གཅིག་སྣང་ཡང་། །སྐྱོན་ལ་མི་སེམས་ཡོན་ཏན་དེ་བླང་སྟེ། །ངང་པས་ཆུ་ལས་འོ་མ་འབྱེད་པ་བཞིན། །ཐོས་པ་ལས་ཀྱང་ཉམས་ལེན་གནད་ཚོལ་ཞིང་། །མང་དུ་ཐོས་ཀྱང་ང་རྒྱལ་སྤངས་པའི་བློས། །ཐོས་པས་རང་རྒྱུད་གྲོལ་བའི་ཚུལ་ཤེས་ནས། །དང་པོ་ཐོས་པ་ཁོ་ན་རྩལ་དུ་ཐོན། །ཅུང་ཟད་ཉམས་ལེན་ཆོས་ཀྱི་གནད་ཤེས་ནས། །རང་བློ་གཏིང་ནས་མོས་པ་མ་ཐོབ་བར། །ནེ་ཙོའི་འདོན་པ་སྤྲེའུའི་མཉམ་བཞག་ལྟའི། །ཁ་ཐོན་དགེ་སྦྱོར་བྱེད་བློ་ངལ་བའི་རྒྱུ། །དེས་ན་གཞོན་ནུ་རིག་པ་རྣོ་བའི་དུས། །བླུན་སྒོམ་རྒན་པོའི་ལད་མོ་མི་བྱེད་པར། །ཡང་དག་ཐོས་པའི་ཆོས་ཀྱི་མིག་བཙལ་ནས། །གང་ཐོས་ཆོས་དེ་རང་གི་རྒྱུད་དང་བསྲེ། །ཐོས་པས་ཉམས་ལེན་ཆོས་ཀྱི་གནད་ཤེས་ནས། །ཐོས་དོན་གོ་ཡུལ་ཙམ་དུ་མི་བཞག་པར། །བློ་ལྡོག་བཞི་དང་དད་དང་སྙིང་རྗེ་སོགས། །བསམ་བྱའི་ཆོས་ཀྱིས་རང་རྒྱུད་འདུལ་བ་གནད། །བསམ་པས་རང་བློ་གཏིང་ནས་ཆོས་ལ་འགྱུར། །ཚེ་འདིའི་ཞེན་པ་རྩད་ནས་ལེགས་ཆོད་ཅིང་། །བཅོས་མ་མིན་པའི་ངེས་འབྱུང་བྱང་ཆུབ་སེམས། །རྒྱུད་ལ་སྐྱེས་ན་ད་གཟོད་བསྒོམ་ལ་ཞུགས། །
དེ་ནས་རི་ཁྲོད་དབེན་པའི་གནས་བཙལ་ནས། །སྙིང་ནས་དམ་བཅའ་བརྟན་པོ་མི་འགྱུར་བས། །ཚེ་འདི་ཁོ་ནས་ལམ་མཆོག་མཐར་ཕྱིན་ཏེ། །རང་གཞན་དོན་གཉིས་ལྷུན་གྱིས་གྲུབ་པར་མཛོད། །དེ་ལྟར་མ་བྱས་གོ་རིམ་འཛོལ་བའི་ཆོས། །གཞོན་ནུས་བསྒོམ་དང་རྒན་པོས་བསློབ་གཉེར་གྱིས། །རང་ལ་མི་ཕན་གཞན་དག་འཕྱ་བས་ན། །དུས་དང་བསྟུན་པའི་བསྟན་པའི་གོ་རིམ་གཅེས། །དེ་ལྟར་ཐོས་བསམ་སྒོམ་ལས་བརྩམ་པའི་གཏམ། །གང་ཞིག་སྨྲས་ཀུན་ཁྱེད་ཀྱིས་ལེགས་བསྒྲུབས་ནས། །འཁྲུལ་མེད་རྒྱལ་བའི་བསྟན་པ་རིན་པོ་ཆེ། །ཚུལ་དང་མཐུན་པར་རྒྱུད་ལ་འབྱོར་བར་ཤོག །རྒྱལ་བསྟན་ལུང་དང་རྟོགས་པའི་དམ་ཆོས་ཀྱིས། །རང་རྒྱུད་ལམ་གྱི་ཆོས་ཀུན་ཡོངས་རྫོགས་ནས། །མཐའ་ཀླས་འགྲོ་བ་ཀུན་གྱི་དོན་སླད་དུ། །ཡང་དག་རྒྱལ་བའི་གོ་འཕང་ཐོབ་པར་ཤོག །གནས་སྐབས་སུ་ཡང་ཚེ་རིང་ནད་མེད་ཅིང་། །བསམ་དོན་ཀུན་འགྲུབ་ཐོས་བསམ་སྒོམ་ལྡན་པའི། །ཡང་དག་བཤེས་གཉེན་རྙེད་ནས་མཉེས་བྱེད་ཅིང་། །དེ་ཡི་ཐུགས་མཛོད་བདུད་རྩི་ལོན་པར་ཤོག །བསླབ་ན་འཇམ་དཔལ་གཞོན་ནུའི་མཁྱེན་པ་རྒྱས། །བསྒྲུབས་ན་སྤྱན་རས་གཟིགས་དབང་བརྩེ་བ་ཐོབ། །གཞན་དོན་ཕྱག་ན་རྡོ་རྗེའི་ནུས་པ་རྙེད། །རྒྱལ་
སྲས་རིགས་གསུམ་མགོན་དང་དབྱེར་མེད་ཤོག །གཞོན་ནུ་པདྨ་དཔལ་བཟང་གི་བཞེད་ངོར་དཔལ་དགེས་སོ། །དགེའོ། ༈ བསྐལ་བཟང་ཐུབ་པ་རྫོགས་སངས་རྒྱས་དང་། ཉེ་བའི་སྲས་ཆེན་འཇམ་པའི་རྡོ་རྗེའི། །བྱིན་རླབས་གཟི་དེས་ཁྱེད་བློའི་ཉོན་མོངས། །དྲྭ་བ་བཅད་པའི་ཤིས་པས་སྐྱོངས་ཤིག །མཛེ་བོ་སྨྱོན་པ་ཨ་བུ་ཧྲལ་པོ། །དུག་ལྔ་མེ་འབར་རང་གཤིས་ལགས་ཀྱང་། །རྒ་བའི་གྲོང་སྒོ་རྡོག་པས་ནོན་ཞིང་། །འཆི་བའི་ནད་ཀྱིས་ཐེབས་པ་ཤེས་དགོས། །མ་འཁྲུལ་མ་འཁྲུལ་རང་བསམ་ཐོང་ལ། །རང་གི་སོ་ནམ་གཏན་ལ་ཕབ་ནས། །འཆི་ནད་ཐེབས་པའི་བློ་སྣ་དགོས་ཀྱིས། །འཆི་མེད་ལྷ་འདྲའི་བག་མེད་མ་བྱེད། །ཡང་ནས་ཡང་དུ་བསམ་བློ་བཏང་ནས། །རང་གི་གནས་སྐབས་རང་གིས་བརྟགས་ན། །ཡེངས་པས་གློ་བུར་མྱོས་པ་སྲིད་ཀྱང་། །རང་གི་རང་དབང་ཕལ་ཆེར་ཡོད་འགྲོ། །ཅུང་ཟད་ཅུང་ཟད་རྐྱེན་གྱིས་མྱོས་པའི། །འཁྲུལ་པའི་གཞན་དབང་མེད་མི་སྲིད་ཀྱང་། །ཧ་ཅང་ཐལ་བའི་སེམས་ཀྱི་ཟུག་རྔུ། །བག་ཕེབས་བྱེད་ལ་དོགས་ཟོན་རེ་མ་དགོས། །ཡུལ་ཕྱོགས་འདི་ན་རང་ལས་ངན་པ། །མེད་པར་ཤེས་པའི་ཉམས་ཆུང་ངང་ནས། །འབྲེལ་འདྲིས་ཉུང་ཞིང་མལ་ས་ནོན་པའི། །རང་
མགོ་དམ་པའི་ཆོས་ཀྱིས་འདོན་མཛོད། །དྲོ་འཇམ་མལ་ན་ལྷ་ཡུལ་མཛེས་པའི། །དཀར་དམར་མེ་ཏོག་བཀྲ་བ་མེད་ཀྱང་། །ལྷ་ལས་ལྷག་པའི་བདེ་སྐྱིད་ཡོད་ཀྱིས། །བག་ཞིག་ཕབ་ན་འདི་རུ་ཕོབ་མཛོད། །གང་དང་འགྲོགས་ན་ཉོན་མོངས་འཕེལ་ཞིང་། །མ་བརྟགས་སྤྱོད་པ་ཤུགས་ཀྱིས་འགོ་བས། །གྲོགས་ངན་གནས་ལ་བག་ཟོན་གྱིས་དང་། །ཀུན་མཐུན་གཤིས་བཟང་མིན་ཀྱང་བཟོད་དོ། །རང་གི་རྒྱུད་ལ་ལྷག་པར་ལྡང་བའི། །ཉོན་མོངས་དེ་ལ་གཉེན་པོ་མེད་ན། །ཆོས་ཀྱིས་སེམས་ལ་ཇི་ཞིག་བགྱི་ཡིས། །དུག་ལྔའི་རྟོག་ངན་འབུར་འཇོམས་རེམ་དགོས། །དགེའོ། ༈ །སྐྱབས་གསུམ་རྒྱལ་བ་ཀུན་གྱི་ངོ་བོ། །མཚུངས་མེད་ཐུགས་རྗེ་མཆོག་གི་གཏེར་མཛོད། །དྲིན་ཆེན་རྩ་བའི་བླ་མ་མཁྱེན་ནོ། །ཚེ་རབས་ཀུན་ཏུ་ཐུགས་རྗེས་ཟུང་ཤིག །ཀྱེ་མ་དེང་སང་སྙིགས་མའི་དུས་འདིར། །ཆོས་ཁྲིམས་དར་གྱི་མདུད་པ་ལྷོད་ཅིང་། །རྒྱལ་ཁྲིམས་གསེར་གྱི་གཉའ་ཤིང་ཆག་ནས། །བྱ་སྤྱོད་ཐམས་ཅད་ལོག་པར་སོང་མཐུས། །སྣོད་བཅུད་ཐམས་ཅད་སྡུག་བསྔལ་རང་བཞིན། །སྤྱོད་ལམ་ཐམས་ཅད་མ་རབས་ལད་མོ། །སྨྲ་བརྗོད་ཐམས་ཅད་རྫུན་གྱི་འཁོར་ལོ། །ལོངས་སྤྱོད་ཐམས་ཅད་སྡིག་པའི་གཡོ་བཀོལ། །སྙིགས་མའི་
རང་མཚང་འདི་འདྲ་ལགས་སོ། །ངེས་འབྱུང་བྱང་སེམས་ཆོས་ཀྱི་རྩ་བས། །རང་རྒྱུད་འདུལ་བ་ཡལ་བར་དོར་ནས། །སྔགས་སྤྱོད་ཐོ་ཅོས་མི་འགོ་བསྐོར་བསྐོར། །ཕྱི་མའི་འབྲས་བུ་དམ་སྲི་རྒྱལ་འགོང་། །བསྐྱེད་རྫོགས་མེད་པའི་མནན་བསྲེགས་འཕང་གསུམ། །ངག་ནུས་མེད་པའི་མཐུ་གཏད་བྱད་གསུམ། །དཔའ་དཔུང་མེད་པའི་དམེ་འཁྲུགས་གྱོད་གསུམ། །དུས་ངན་འབོད་པའི་གཡབ་མོ་འདུག་གོ །གཏད་ན་མི་བསླུ་དཀོན་མཆོག་རིན་ཆེན། །སྐྱབས་གནས་གཅིག་ཆོག་ཡལ་བར་དོར་ནས། །ལྷ་ལ་བོས་ཀྱང་ལྷ་བསྲུང་མི་འགོ །མི་ལ་རྒྱབ་བརྟེན་མེད་པ་དེ་ལགས། །འཕྲལ་ཕུག་དགེ་བ་བདེན་གཏམ་ཟོལ་མེད། །དྲང་པོའི་གཞུང་ལམ་ཡལ་བར་བོར་ནས། །གཡོ་སྒྱུའི་བསྐོར་ཡུས་ཆེད་དུ་གཉེར་ཡང་། །ནམ་ཕུག་ཕུང་པའི་བློ་ཉེས་དེ་ལགས། །ཕ་རོལ་ཟིལ་གནོན་བསོད་ནམས་གཟི་བརྗིད། །དཀོན་མཆོག་མཆོད་པའི་རང་འབྲས་ལགས་ན། །གཞན་འབྱོར་མི་བཟོད་ཕྲག་དོག་སྤྱོད་པའི། །བསམ་ངན་མཚོན་ཆ་རང་ལ་འཁོར་འོང་། །རྒྱལ་པོའི་སྲིད་དང་ཡུལ་གྱི་དར་གུད། །སྐབས་རེ་སྐབས་རེའི་དུས་ཀྱི་འགྱུར་བ། །རྟག་བརྟན་མེད་པ་འཁོར་བའི་མཚན་ཉིད། །གཏིང་ནས་གོ་ན་དགའ་སྡུག་ཅི་དགོས། །ཅུང་ཟད་
ལེགས་ན་ཁེངས་པ་སྐྱེ་ཞིང་། །ཕྲན་ཚེགས་ཉེས་ན་སེམས་རྩ་ཞུམ་པ། །དཔའ་བརྟན་སྐྱེ་བོའི་སྤྱོད་པ་མ་ལགས། །མི་ཁེངས་མི་ཞུམ་དམ་པའི་རང་གཤིས། །དོན་ཆེན་བསྒྲུབ་ལ་ངང་ཆེན་བསྲིང་ན། །ཆོས་དང་སྲིད་ཀྱི་བྱ་བ་གང་ཡང་། །འདི་འདྲ་འདི་དགོས་སྐབས་སུ་བབས་དུས། །ལེགས་ལམ་འགྱུར་མེད་ཤུགས་ཀྱིས་འཁོར་འོང་། །འདོད་འབྱུང་ནོར་བུ་བསམ་པ་བཟང་པོ། །དབུ་གཉེན་མེད་པར་རྒྱུད་ལ་སྐྱེས་ན། །བསམ་པའི་དོན་ཀུན་མི་འགྲུབ་མི་སྲིད། །རྒྱལ་སྲས་སྤྱི་ཡི་ལམ་ཆེན་དེ་ཡིན། །བྱ་བའི་ལེགས་ཉེས་ལས་ཀྱིས་བརྐོས་པས། །འདི་བྱ་འདི་བྱེད་བསམ་བློ་མ་མང་། །རང་སེམས་གཡེང་བ་གྲོག་སྐམ་ཉ་རྒྱ། །རེ་འདོད་འབྲས་བུ་འབྱོར་པ་དཀའ་འོང་། །ཀུན་ལ་ཕན་འདོད་བསམ་པ་བཟང་པོ། །གཞི་རུ་བཟུང་ན་ལུས་ངག་བྱ་སྤྱོད། །ཅི་ལྟར་བྱས་ཀྱང་དམ་པའི་ཆོས་ཡིན། །གཅིག་ཆོག་འདི་ལ་གཅིག་ཏུ་དྲིལ་མཛོད། །བྱང་ཆུབ་སེམས་དཔའི་སྤྱོད་པ་ཤེས་ན། །ཆོས་དང་སྲིད་ཀྱི་བྱ་བ་མི་འགལ། །དེ་ཡི་རྩ་བ་གཞན་ཕན་སྙིང་རྗེ། །སྐད་ཅིག་རེ་བཞིན་མི་བརྗེད་དྲན་མཛོད། །གདོས་བཅས་ལུས་འདི་རང་དབང་མེད་ཀྱང་། །རྣམ་རྟོག་སེམས་འདི་གཞན་དབང་མི་འགྱུར། །ཆོས་དང་རང་སེམས་འཕྲལ་འཕྲལ་བསྲེས་ན། །ལྷ་ཆོས་
བསྒྲུབ་ཟེར་གཡེལ་ཆེན་མི་དགོས། །དད་དང་སྙིང་རྗེ་རྒྱུད་ལ་བརྟེན་ན། །མ་བྱེད་ཟེར་མཁན་སུ་ཡང་མི་འོང་། །མཆོག་གསུམ་བླ་མར་གསོལ་བ་བཏབ་ན། །ཆོས་མཐུན་བྱ་བ་ཤུགས་ཀྱིས་འགྲུབ་འོང་། །མཁར་ལས་རྩིགས་བཟོའི་གྲབ་ཤམ་ལྟ་བུ། །ཐར་ལམ་བསྒྲུབ་ལ་དགོས་པ་མ་ལགས། །སྐད་ཅིག་གཅིག་ལ་སེམས་ཀྱི་རྣམ་རྟོག །ཆོས་ཕྱོགས་བསྒྱུར་བ་དེ་ག་ལགས་མོད། །འཇིག་རྟེན་བྱ་བ་ཐམས་ཅད་བཞག་ནས། །ཆོས་བསྒྲུབ་ཟེར་བ་ད་ལྟ་དཀའ་བས། །འཇིག་རྟེན་བྱ་བ་ཅི་བྱེད་ཐམས་ཅད། །བསམ་པ་བཟང་པོའི་གསེར་འགྱུར་རྩིས་ཐོབ། །དེ་ལྟར་མཛད་ན་ལུགས་གཉིས་ལྗོན་བཟང་། །དཔག་བསམ་དཔལ་མོའི་འབྲས་བུ་བཟུང་ནས། །ལྷ་ཡི་རྒྱལ་སྲིད་དབུ་རྨོག་བཙན་པའི། །རབ་དཀར་དགེ་བའི་སྨོན་འདུན་ཞུའོ། །རྒན་པོའི་མིག་བརྟུལ་བློ་རིག་རྒུད་ཅིང་། །སྣག་ཤོག་སོགས་ཀྱི་འབྱོར་པ་དཀོན་པས། །གང་ཐུགས་དགྱེས་པའི་འཕྲིན་ཡིག་དཀའ་ཡང་། །དམ་པའི་བཀའ་གསུང་གཅོག་པར་མ་ནུས། །གཅོས་གཏམ་དུམ་ཆོད་ཡི་གེར་བྲིས་ནས། །འཕྲལ་དུ་གང་དྲན་ཕུལ་བ་དེ་ལགས། །དགོངས་འཚམས་མེད་པར་བརྩེ་བ་ཁོ་ནས། །སྤྱན་གྱིས་གཟིགས་ཕྱོགས་གནང་བར་ཞུའོ།། །།
ཤར་རྒྱལ་མོ་རོང་བ་གར་དབང་སོགས་ཐོས་པ་ཆུང་ཞིང་ཆོས་ལ་མོས་པ་ཡོད་པ་རྣམས་ཀྱིས་ལག་ལེན་གྱི་གནད། །དང་པོ་ཆོས་སྒྲུབ་འདོད་ཡོད་ཀྱང་ཇི་བཞིན་ཐོག་ཏུ་མི་ཁེལ་བ་རང་གི་བློ་ཐག་གཏིང་ནས་མཆོད་པས་ལན། །འདིའི་སྐབས་སུ་རང་གི་བློ་ཐག་རྦད་ཀྱིས་བཅད་དེ་མཚན་ལྡན་གྱི་བླ་མ་མ་གཏོགས་སུའི་ཁ་ལ་ཡང་མི་ཉན་པ་སྨྱོན་པ་འུར་ལངས་བ་ལྟ་བུ་ཞེས་པ་དེ་དགོས། འོན་ཀྱང་སྔོན་འགྲོ་བློ་ལྡོག་རྣམ་བཞིས་རང་རྒྱུད་ལེགས་པར་བཏུལ་ཏེ་སྐྱིད་སྡུག་གང་གི་སྐབས་སུའང་འཁོར་བའི་བྱ་བ་ཐམས་ཅད་སྙིང་པོ་ཏིལ་འབྲུ་ཙམ་མེད་པར་ཤེས་ནས་མཁྲིས་ནད་ཅན་ལ་བཙོ་ཟན་བྱིན་པ་ལྟ་བུའི་ཞེ་ལོག་པ་ཞིག་མེད་ན་གློ་བུར་གྱི་ངེས་འབྱུང་སད་སུད་ལ་བརྟེན་ནས་བྱ་བཏང་བྱེད་སྔ་བྱས་ན་བྱ་བྲལ་བྱ་བྱེད་མང་བ་གླང་མཇུག་སྐར་ཁུང་དུ་འཐོག་པའམ། རྟོགས་ལྡན་ཕྱིར་ལོག་རྒྱབ་པ་སྒོམ་ཆེན་རྙིང་པ་ཨ་ཁྲད་ཆུ་བརྡུང་བྱེད་པ་དེ་འོང་། །དེས་ན་དང་པོ་བློ་ལྡོག་རྣམ་བཞི་སེམས་ཐོག་ཏུ་སྦྱང་ནས་ཚེ་འདིའི་བྱ་བ་ཐམས་ཅད་སྙིང་ཐག་པ་ནས་བློས་གཏོང་ནུས་པ་ཞིག་མ་བྱུང་བར་དུ་ཆོས་ཁ་ལ་མི་འདོན། ལག་ཏུ་མི་ལེན། བྱ་བཏང་མི་བྱེད་པ་གལ་ཆེ། སྙིང་ཐག་པ་ནས་ངེས་འབྱུང་དང་སྐྱོ་ཤས་ཞེན་ལོག་དང་མོས་གུས་
འགྱུར་བ་མེད་པ་རང་ལ་རང་ཡིད་ཆེས་པ་ཞིག་རྒྱུད་ལ་སྐྱེས་པའི་ཚེ་ཁྲེལ་མེད་རྡོ་རྗེ་སྔོན་དུ་ལེགས་པར་བཏང་ཟིན་པ་དེའི་དུས་ལ་བབ་པ་ཡིན་ཏེ། དེའི་ཚེ་དགྲ་གཉེན་རིང་དུ་བཞག །ཞིང་ཐ་རེངས་དུ་བཏང་། འཇིག་རྟེན་གྱི་བྱ་བ་བྱེད་འཕྲོ་ལ་བོར། །གཉེན་གྲོགས་དང་བཟའ་ཚང་གི་ངོ་ལ་མི་བལྟ། །གོང་དཔོན་དང་ཉེ་དུའི་ཁ་ལ་མི་ཉན། རང་ཐག་རང་གིས་བཅད། སྣ་ཐག་མགོ་ལ་དཀྲིས་ཏེ་རི་དྭགས་རྒྱ་ནང་ནས་ཤོར་བ་ལྟ་བུ་ཞིག་བྱེད་དགོས་པ་ཡིན་པར་འདུག །དེ་ནས་ཆོས་དངོས་གཞི་སྒྲུབ་པའི་དུས་ལུས་ངག་གཡོག་པོའི་སྒྲུབ་པའི་ཆོས་དེས་གོ་ཆེན་པོ་རུང་མི་ཆོད། སེམས་དཔོན་པོས་བསྒྲུབ་པའི་ཆོས་དེ་ཆོད་ཆེ་བ་ཡིན། བསྒྲུབ་བྱའི་ཆོས་ལའང་སྐྱབས་སེམས་རྩ་བ་ལྟ་བུའི་ཆོས་དེ་མེད་ན། བསྲུང་སྡོམ་སྡོང་པོ་ལྟ་བུའི་ཆོས་དེ་མི་འབྱུང་། དེ་མེད་ན་ལྟ་སྤྱོད་མེ་ཏོག་ལྟ་བུའི་ཆོས་དེ་མི་སྐྱེ། དེ་མ་སྐྱེས་ན་བསྐྱེད་རྫོགས་འབྲས་བུའི་ཆོས་དེ་མི་སྨིན་པས། ཐམས་ཅད་ཀྱི་རྩ་བ་སྐྱབས་འགྲོ་སེམས་བསྐྱེད་གཉིས་ལ་ཐུག །འདི་གཉིས་པོ་འདི་ཆོས་སྒོ་བརྒྱད་ཁྲི་བཞི་སྟོང་། ཐེག་པ་རིམ་པ་དགུའི་རྩ་བ་ཡིན། གཞི་མ་ཡིན། སྙིང་པོ་ཡིན། གཞུང་ཤིང་ཡིན། །སྲོག་ཡིན། འདི་གཉིས་དང་མ་འབྲེལ་བའི་
ཆོས་ཐམས་ཅད་ཤི་བའི་རོ་ཡིན། རོའི་དུམ་བུ་ཡིན། སྙིང་པོ་ཅུང་ཟད་ཀྱང་མེད། རྩ་བ་འདི་གཉིས་ལ་རྒྱས་པར་བཤད་ན་མང་པོ་ཡོད་ཀྱང་། བསྡུ་ན་དཀོན་མཆོག་གསུམ་ལ་ཡིད་ཁྱེད་ཤེས་ཀྱི་བློ་གཏད་ཁེལ་བ་དང་། མཐའ་ཡས་པའི་སེམས་ཅན་ཐམས་ཅད་ཕ་མར་ཤེས་ནས་གནས་སྐབས་ཕན་བདེ་བསྒྲུབ་པ་དང་། མཐར་ཐུག་སངས་རྒྱས་ཐོབ་འདོད་ཀྱི་བློ་དང་མི་འབྲལ་བར་བྱེད་པ་འདི་གཉིས་པོར་འདུ་བ་ཡིན། དེས་ན་འདི་གཉིས་ཉམས་སུ་ལེན་ཚུལ་གནད་ཚིག་གི་སྤུ་ལ་མི་འཇུ་བར་ཉམས་ལེན་གྱི་རྐང་པ་ནས་ཟིན་པ་ཞིག་དགེ་བའི་བཤེས་གཉེན་ལ་བསླབ་སྟེ་ཤེས་འཕྲལ་བླ་མའི་རྣལ་འབྱོར་དང་འཕོ་ལུང་སོགས་ཉེ་ལམ་དང་མྱུར་ལམ་ཁྱད་པར་བ་རྣམས་ཤེས་ན་དབང་ཐོབ་ནས་ཉམས་སུ་ལེན་ཆོག །མ་ཤེས་ཀྱང་སྐྱབས་སེམས་ལ་གཞི་བཅོལ་ནས་བསམ་པ་བཟང་པོས་མ་ཎི་འདྲེན་གྱིན་བསྡད་ན་ཆོག་འདུག །ལར་བརྩོན་འགྲུས་སྲོག་དང་བརྡོས་ཏེ་ལམ་བར་མ་ཆད་དུ་ཉམས་སུ་ལེན་པ་ཞིག་མ་བྱུང་ན་རིམ་དགུའི་ཐེག་པའི་གཞུང་ལུགས་ཤེས་ཀྱང་ཚེ་གཅིག་གིས་འཚང་ནི་མི་རྒྱ་བར་འདུག །དཀོན་མཆོག་རིན་པོ་ཆེ་རྣམ་པ་གསུམ་གྱི་མཚན་ཙམ་ཐོས་པའང་ནམ་ཞིག་ནི་འཚང་རྒྱ་བར་འདུག །དེ་ཤེས་པར་གྱིས། ཤྲཱི་སེང་ནས་དཔལ་དགེས་བྲིས། །དགེའོ། ༈ །འདྲེ་མོ་ལྟས་བརྒྱ་མ་ཞེས་བྱ་བ་བཞུགས། ཇི་སྐད་དུ་
རྒྱལ་སྲས་ཆེན་པོ་ཞི་བ་ལྷས། །ཕོ་ཉ་ཕོ་ཉ་མོ་ཡིས་སྔོན། །གང་ཕྱིར་དུ་མར་གསོལ་བཏབ་ཅིང་། །སྡིག་པ་རྣམས་སམ་གྲགས་མིན་ལ། །གང་གི་དོན་དུ་མ་འཛེམ་པར། །འཇིགས་པ་ལ་ཡང་བདག་ཞུགས་ཤིང་། །རྫས་ཀྱང་ཟད་པར་བྱས་གྱུར་ཏེ། །གང་ལ་ཡོངས་སུ་འཁྱུད་པ་ན། །མཆོག་ཏུ་དགའ་གྱུར་དེ་དག་ཉིད། །ཀེང་རུས་ཉིད་ཡིན་གཞན་མིན་ནོ། །ཞེས་གསུངས་པ་ལྟར། འཇིག་རྟེན་གྱི་སྐྱེ་བོ་ཤིན་ཏུ་རྨོངས་པ་འདོད་པའི་དབང་དུ་གྱུར་པ་བུད་མེད་ཀྱིས་བྲན་དུ་བཀོལ་བ་རང་དབང་ཅུང་ཟད་ཀྱང་མེད་པ་དག་གིས་བུད་མེད་ཀྱི་ལུས་ཀེང་རུས་རྒྱུས་པས་སྦྲེལ་བ་གཤང་ལྕི་དང་མི་གཙང་བས་གང་བ། དྲི་ང་བ། ཡིད་དུ་མི་འོང་བ། བྱུར་ཐམས་ཅད་ཀྱི་སྣ་འདྲེན་དེ་ལ་འདོད་བྱ་ཡིད་འོང་གི་དངོས་པོ་ལྷའི་བུ་མོ་ལྟར་བལྟས་ནས། སྲིན་མོ་གདོང་དམར་མ། །འདྲེ་མོ་འགོ་ཁྲ་མ། ཕོང་མོ་གཤིས་ངན་མ་དེ་བདག་གིར་བྱ་བའི་ཆེད་དུ། གསེར་དངུལ་རྟ་མཛོ་གནག་ལུགས་སོགས་གཅེས་པའི་རྒྱུ་རྫས་མང་པོ་བཏང་། འདྲེ་མོ་ལྟས་ངན་བརྒྱའི་ཐོག་མ་ཉིན་པར་གྱི་འུག་རྒན་ལྟ་བུ་དེ་ཁྱིམ་དུ་འོང་བ་ལ་དགའ་བའི་སྟོན་མོར་བྱེད་པར་རློམ་ཤིང་། སེམས་ཅན་མང་པོའི་སྲོག་བཅད་རང་གཞན་གཉིས་ཀ་དམྱལ་བ་བསྡུས་འཇོམས་ཀྱི་ཡུལ་ནས་བར་བསྐལ་མང་པོར་མི་ཐར་པའི་རྒྱུ་དེ་འདྲ་ཤེས་ལྡན་བསམ་ཡོད་ཀྱི་མི་ཞིག་ཡིན་ཕྱིན་ཆད་
གཏན་ནས་བྱེད་ཐབས་མི་འདུག་པས་དཔོན་གྱི་ངག་བཀོད་བཞིན་བྱེད་ངན་དེ་འདྲ་ཕྱིན་ཆད་རྒྱུན་ཆོད་ངེས་བྱས་ན། སྣ་ས་ཕ་མིང་ཁྱོ་ཤུགས་གྱོས་རྒྱུགས་སོགས་ཐམས་ཅད་ལ་འདི་ཕྱི་ཀུན་ཏུ་དགེ་བ། རྒྱལ་བའི་བཀའ་བླ་མའི་གསུངས་མཐོང་ཆོས་མྱོང་བ་ཐམས་ཅད་ཀྱིས་ཚད་མ་ཡིན་པས་དེ་ལུགས་སྡེ་སྤྱིའི་སྐྱ་སེར་ནས་ཡིད་འཇགས་ཡོད་པར་གྱིས། །ཆུ་བྱ་ཟླ་ཚེས་ལ། སྐྱབས་མགོན་བླ་མ་མཆོག་གི་གདན་ས། །ཡུལ་སྐྱོངས་ཟླ་རྒྱལ་འཕེན་པོའི་མདུན་ཞོལ། རྒྱལ་བསྟན་བཤད་སྒྲུབ་གཉིས་ཀྱིས་སྐྱོང་བའི་ཆོས་སྡེ་ཆེན་པོ་ནས་མཁས་པ་དཔལ་སྤྲུལ་རྒྱལ་པོས་སྤྲིང་། ༈ ན་མོ་གུ་རུ་བྷཻ་ཥ་ཛྱེ། སྲིད་པའི་ཟུག་རྔུ་དྲུང་འབྱིན་པའི། །མཆོག་གི་སྨན་པ་ཐམས་ཅད་མཁྱེན། །ལྷ་དང་མི་ཡི་རྗེར་གྱུར་བའི། །སྐྱོབས་པ་དེ་ལ་ཕྱག་འཚལ་ལོ། །གཞན་ཕན་བྱང་ཆུབ་སེམས་ཀྱི་སྨན། །མཐའ་ཡས་འགྲོ་བའི་གཉེན་གཅིག་པུ། །སྲིད་པའི་གདུང་བར་བསིལ་སྦྱིན་པའི། །ཟླ་བའི་འོད་ཟེར་དེ་ཁོ་ན། །གང་ཞིག་སྲིད་པའི་ཟུག་རྔུ་ནི། །ཇི་སྙེད་མཆིས་ཀུན་མ་རིག་པའི། །རྩ་བ་ཅན་དེ་དེ་ལ་ཡང་། །བདག་ལྟས་ལོ་འདབ་བསྐྱེད་པ་ལགས། །རྟེན་འབྲེལ་བཅུ་གཉིས་འཁོར་བ་ཡི། །རྩ་བ་གཅོད་པའི་ཤེས་རབ་མཚོན། །གང་གིས་འཆང་བ་དེ་ཁོ་ན། །སྲིད་
བའི་མིག་མཁན་རྒྱལ་པོ་ལགས། །མ་རིག་རྨོངས་པའི་རྟེན་འབྲེལ་ལས། །ཆགས་སྡང་གྲང་དང་ཚ་བའི་ནད། །སྲིད་པའི་གདུང་བ་ཇི་སྙེད་པའི། །ཕྱི་མོ་ཉིད་དུ་ངེས་པར་གྲུབ། །དུག་གསུམ་དུག་གི་ས་བོན་ལས། །རླུང་འཁྲིས་བད་ཀན་འདུ་བ་གསུམ། །རྣམ་པར་མ་གྱུར་གྱུར་པ་ཡི། །ལུས་དང་ནད་ཀྱི་གཞི་མར་གྲུབ། །དེ་ལ་མཚན་ཉིད་ཉི་ཤུ་དང་། །དབྱེ་བ་བཞི་བརྒྱ་རྩ་བཞི་སོགས། །སྲིད་པའི་ཉེ་ཉོན་ཉི་ཤུ་དང་། །བརྒྱད་ཁྲི་བཞི་སྟོང་རྒྱུ་ལས་བྱུང་། །དེ་སླད་སྲིད་པའི་ཉོན་མོངས་ནད། །ཇི་སྙེད་ས་བོན་བཅས་སྤང་པ། །བྱང་ཆུབ་སེམས་ཀྱི་བདུད་རྩི་ནི། །གང་གིས་སྟོན་པ་སྨན་མཁྱེན་གཙོ། །དེ་སླད་གཞན་ལ་ཕན་དགོངས་པའི། །རྒྱལ་སྲས་སྨན་པ་བླ་མེད་དག །སྦྱིན་པའི་རོ་མངར་འཇིག་རྟེན་ན། །མཐའ་ཡས་གདུང་བ་སེལ་ཞེས་གྲགས། །ཉེས་སྤྱོད་དྲི་མ་རྣམ་སྦྱོང་ཞིང་། །དགེ་ཚོགས་བཞིན་རས་སྡུད་འགྱུར་བའི། །ཚུལ་ཁྲིམས་སྐྱུར་རྩིས་འཇིག་རྟེན་གསུམ། །ཕན་བདེའི་འགྲམ་ཆུ་སློང་མིན་ནམ། །གནོད་དང་ཟབ་མོའི་དོན་མཆོག་ལ། །སྐྱོ་བ་མི་མངའ་མི་སྐྲག་པའི། །དཀའ་ཐུབ་མཆོག་གི་རླན་སྡུད་པ། །བཟོད་པ་ལན་ཚྭའི་རོ་བཞིན་ལེན། །གདུང་བ་དང་དུ་ལེན་པའི་བློ། །སྲིད་པའི་དྲི་མ་དག་ཕྱིར་དེ། །བརྩོན་འགྲུས་ཁ་བའི་རོ་མཆོག་བཞིན། །དཀའ་
བ་དང་དུ་ལེན་མིན་ནམ། །སེམས་ཀྱི་སྒྲིབ་པ་སྲེགས་བྱེད་པ། །མངོན་ཤེས་ཡེ་ཤེས་དྲོད་བསྐྱེད་པའི། །བསམ་གཏན་ཚ་བའི་རོ་བདའ་བས། །སྒྲིབ་གཉིས་དྲུང་ནས་འབྱིན་པར་བྱེད། །ཤེས་རབ་མཆོག་གི་སྨན་བཟང་ནི། །སྟོང་པའི་ལྕེ་ལ་རྗེས་ཆགས་པའི། །བསྐ་པའི་རོ་བཞིན་སྲིད་ཞི་རུ། །ཡོན་ཏན་ཁ་དོག་གསལ་བར་བྱེད། །ཕྱིན་དྲུག་སྤྱོད་པའི་རྣམ་གྲངས་ཀྱིས། །གོ་ཆའི་སྒྲུབ་པ་ལ་སྤྱོད་པའི། །དྲན་བཞི་མངར་བའི་ཞུ་རྗེས་ཀྱིས། །ཚོགས་ལམ་འདུ་བའི་ཐོག་ཐ་བསྐྱེད། །འཇུ་བྱེད་མེ་འདྲའི་བརྩོན་པ་ནི། །རྣམ་བཞིའི་དྲོད་ཀྱིས་ལེགས་བཞུ་བའི། །སྤྱོད་མཆོག་སྐྱུར་བའི་ཞུ་རྗེས་ཀྱིས། །ཚོགས་ལམ་འདུ་བའི་བར་པ་བསྐྱེད། །ཡིད་བྱེད་མི་མཉམ་ཐབས་བཅས་པས། །རྟོག་པའི་དངས་སྙིགས་བྱེད་པའི་སེམས། །ཏིང་འཛིན་ཁ་བའི་ཞུ་རྗེས་ཀྱིས། །ཚོགས་ལམ་འདུ་བའི་ཐ་ཐོག་བསྐྱེད།། །། ༈ །གཞན་ཕན་ཐུགས་བསྐྱེད་རྩ་བ་བརྟན་ཞིང་། །ཕན་བདེའི་འབྲས་བུའི་ཡལ་ག་ལྕི་ལ། །མཐའ་བྲལ་ལྟ་བའི་ཁོ་ལག་ཡངས་པ། །ཡས་འབེབས་ཐེག་རྩེའི་གྲིབ་མ་སྣུམ་མོ། །གང་གཞན་བསྐལ་པར་གོམས་དཀའི་ཚོགས་གཉིས། །འགྲོ་ཕན་སྨོན་མཐུས་ཡིད་ཀྱིས་འགྲུབ་པའི། །གྲུབ་མཐའ་དེ་ལ་ཁྱེད་ཅིག་དགྱེས་པས། །དཔག་ཡས་འགྲོ་ཕྱིར་ཐུགས་བསྐྱེད་བརྟན་ནོ། །བདག་པས་
གཞན་གཅེས་བློ་སྟོབས་ཆེན་པོས། །སྲིད་ཞིའི་ཕན་བདེ་འགྲོ་ལ་འགྱེད་པའི། །ཐུགས་བསྐྱེད་མཐའ་ལ་ཐུག་པ་མེད་ཕྱིར། །ཐུགས་རྗེ་ཡས་སྤྲུལ་རྒྱལ་བ་ཁྱེད་ཡིན། །དགྲ་གཉེན་བདག་གཞན་འཛིན་པ་དོར་བའི། །སྙོམ་པའི་འགྲོ་ཕན་ཐབས་བརྒྱས་བསྒྲུབས་ནས། །ཐེག་རྩེའི་གྲུབ་མཐའ་སྙིང་ལ་བཅིང་སྟེ། །ལམ་བཟང་གཞལ་ཡས་འགྲོ་ལ་སྟོན་ནོ། །འདི་ལ་ཉེ་ལམ་གཞན་ཞིག་མེད་ཅེས། །བདེ་སྟོང་ཕྱག་རྒྱས་ཕན་ཚུན་འདེབས་པས། །རྣམ་རྟོག་འགྱུ་བ་མཐའ་དག་ཟ་བ། །དཔྱིད་ཀྱི་ཐིག་ལེའི་ཡས་བབས་བཞེད་དམ། །གང་ལ་ལྟོས་ན་ལམ་གཞན་འཆིང་བྱེད། །གང་དང་ལྡན་ན་འགྲོ་ཕན་ལྟ་ཅི། །གང་ཡང་ལམ་ཞེས་གྲུབ་མཐའ་འཆའ་བའི། །རྣམ་མང་ཐབས་ཚུལ་བགྲང་ཡས་མཁྱེན་ནམ། །གཉིས་ཆོས་འབྱེད་པའི་གྲུབ་མཐའ་གཞན་གྱིས། །མཉམ་ཉིད་རྟོགས་པའི་དོན་ལ་ཕན་མེད། །ཚུལ་ཆེན་ཐེག་པའི་ཉེ་ལམ་མཐའ་དག །རྟོགས་པའི་ཀློང་ནས་ཡེ་ཤེས་ཡས་བབ། །དོན་འདི་མ་རྟོགས་རྩོལ་སྒྲུབ་ལམ་གཞན། །ཐར་མཆོག་ཉེ་ལམ་སྒྲུབ་ལ་མི་ཕན། །ཁ་བཤད་ཚིག་ལམ་གཉེར་བའི་གྲུབ་མཐའ། །ཉམས་ལེན་གནད་དུ་འབེབས་ཚེ་སྲ་ཡས། །ཀྱེ་ལགས་གཅན་ཟན་རྒྱལ་པོའི་རྒྱལ་རྒྱུད། །དམན་ལམ་སྤྱོད་པའི་རྟོག་པས་ལྟ་ཅི། །བྱར་མེད་བྱུང་རྒྱལ་གཡུ་རལ་བསིག་ནས། །གངས་སྟོང་འགྲིམ་ལ་
དགྱེས་པ་ཡོད་དམ། །ཡར་ལ་བགྲོད་པའི་ཡང་དབེན་ཞིག་ན། །མེས་བརྒྱས་མནན་པའི་རྒྱལ་ས་ཡོད་སྐད། །རྒྱལ་རིགས་སྐལ་ལྡན་ཁྱེད་གཅིག་ལགས་ན། །བརྟན་པའི་དམ་བཅའ་དོན་ཡོད་དགོས་སོ། །ཀུན་འཇིགས་དུས་ཀྱང་འཇིགས་པར་བྱེད་པའི། །དུས་དགྲའི་དབང་པོའི་ཕོ་བྲང་དེ་ན། །གྲུབ་གཉིས་ནོར་བུའི་མཛོད་ཀྱི་སྒོ་འཕར། །ཐབས་མཆོག་སྡེ་མིག་ཁྱེད་ལ་ཡོད་སྐད། །ཐར་མཆོག་ཐར་པ་གང་ལ་བསྟེན་ན། །ཐར་ལམ་འདི་ཞེས་ལག་རྩེར་གཏོད་པའི། །པད་ཅན་དྲྭ་བའི་པདྨ་རྣམ་རྒྱས། །མཆོག་སྦྱིན་ལྷ་མོའི་སྒུགས་ཡུན་མ་བསྲིངས། །གྲུབ་བརྒྱའི་སྤྱི་མེས་སངས་རྒྱས་ཡེ་ཤེས། །གྲུབ་ཚུལ་ཟླ་མེད་མེ་ལོང་རྡོ་རྗེ། །གྲུབ་བརྒྱས་བརྟེན་པའི་སྐུ་ཡི་དབེན་གནས། །གྲུབ་པས་སྟོང་པའི་དུས་འདིས་ནོངས་སོ། །མེས་ཀྱི་ཚྭ་སྐྱེས་ཚར་ལ་ཉེ་ཚེ། །ལྟར་སྣང་བཅོས་མའི་ཝ་སློག་དོར་རན། །ཡང་མེས་སྟག་སླག་ཐབས་ཀྱི་ཐང་ཤམ། །ལྷུབ་པོར་བགོས་པའི་འབྱོར་འགྲོས་མ་འཕྱི། །ཆོས་བརྒྱད་སྣང་བ་སྒྱུ་མའི་གྲོང་ན། །རྟོག་པའི་གར་མཁན་ལྟད་མོས་ཅི་བྱེད། །བྱིས་བློའི་བློ་འཚུབ་ཤུལ་བུ་སྐྱུར་དང་། །བྱིས་པའི་མཁར་སོ་རྨོངས་པས་བསྒྲུབ་འགྲོ། །ལུང་རྟོགས་ཡོན་ཏན་རྒྱལ་བསྟན་ལགས་ན། །སྡེ་རིས་གཅོད་པའི་གྲུབ་མཐས་ཅི་བྱེད། །ཆགས་སྡང་སྐྱུར་ལ་དབེན་རི་སྙོགས་དང་། །ཕྱོགས་རིས་རྩོད་པ་
ཁོང་ཚོ་མཁས་འགྲོ། །སྙིགས་མའི་རྒྱལ་བསྟན་པུང་པས་མི་ཐེག །རང་འདོད་གྲུབ་མཐའ་ཚིག་གིས་མི་ཟིན། །ཐུབ་བསྟན་རི་མོ་ཐུགས་ལ་བྲི་ནས། །ཡབ་མེས་གོང་མའི་གདན་ས་འཛིན་རན། །ཐུགས་བསྐྱེད་བརྟན་ཀྱང་གཞན་རྒྱུད་ཐུལ་དཀའ། །སྒྲོ་བསྐུར་གཡབ་མོས་གཡབ་འདོར་ལགས་ན། །དབྱིངས་ཕྱུག་མཁའ་འགྲོ་དབྱིངས་ནས་ཁྲེལ་ཏེ། །རེག་འཇམ་དཀར་པོའི་དར་ལམ་བརྐྱང་འོང་། །སྦས་བརྒྱའི་སྦུབ་ནས་སྐུ་ཚེའི་སྣང་བྱེད། །ལེགས་ལམ་ངང་དུ་འབར་ཡུན་རིང་ན། །དོན་གཉིས་ལྷུན་གྲུབ་ངམ་ངམ་ཤུགས་ཤུགས། །གཞན་ཕན་སྒྲུབ་ལ་སྒྲོབ་རྒྱག་ཅི་དགོས། །ཆོས་ཡོལ་ཕག་ནས་འདི་སྣང་སྒྲུབ་པའི། །ངོ་བསྟོད་འཁོར་གྱི་ངོ་དགས་ཅི་བྱེད། །བཅོས་མའི་ཁྱུ་ལས་ཐག་རིང་བཤོལ་དང་། །ཆེ་འདོད་དཔོན་ལ་ཁོང་ཚོ་བཏུད་འགྲོ། །ཡན་པ་བློ་བདེ་རྒན་པོའི་བུ་བརྒྱུད། །འདི་སྣང་བྱིས་པའི་རྩེ་གྲོགས་མི་ཁོམས། །བྱར་མེད་ལྷུག་པའི་བག་ཡང་དེ་ལ། །དགྱེས་པ་ཡོད་ན་དེ་ཤུལ་སྙོག་རན། །ནམ་མཁའི་རྡོ་རྗེ་རྒྱ་གྲོལ་རྣལ་འབྱོར། །བླ་མའི་གསུངས་ལ་རང་འདོད་གར་ཡོད། །གྲྭ་སའི་བརྫུ་བའི་རྫུན་གྱིས་བསླུ་བྲིད། །དེ་ལ་གསན་པ་ཐུགས་དགོངས་ཆུང་ངམ། །རྡོ་རྗེའི་ཚིག་ཡིན་དང་པོའི་ལུང་བསྟན། །འཁྲུལ་མེད་བཀའ་ཡིན་བར་གྱི་གསུང་སྒྲོས། །
གཙོ་བོའི་ཞལ་ལ་འཁོར་གྱི་ཞིང་རྨོས། །རང་དོན་སྙི་མ་ས་རྫི་ཀ་ལགས། །སྣ་ཆེན་སྣ་བོའི་གཏམ་དང་ལོངས་སྤྱོད། །མཆོག་ཏུ་བརྩི་ན་འདི་སྣང་མཁན་པོ། །གསེར་དང་བོང་བ་མཉམ་པར་གཟིགས་པའི། །དམ་པ་ཁྱེད་ལ་དེ་འདྲ་སྲིད་དམ། །བསྟན་པའི་ཆོ་ལོ་རྒྱལ་སྲས་སྤྱི་ལ། །ཐུབ་པས་བྱིན་པའི་མིང་ཡིག་ལགས་ན། །ཞལ་བཞེས་མང་ལ་ཕྱག་བཞེས་ཉུང་བ། །དམ་པ་ཁྱེད་ལ་འོས་པ་ཡིན་ནམ། །བསྟན་པ་ཟོལ་མའི་གཉེར་ཁའི་བྲེལ་ཚུབ། །མཛད་པ་མང་སྟེ་འགྲུབ་མཁན་ཉུང་བས། །སྙིང་པོར་འཇུག་ས་ཕྱག་འཛུབ་ཐེག་དང་། །འཛུག་ས་དངོས་དེ་གང་ཞིག་རེད་ལགས། །ཙི་ནའི་དཔོན་ཚུལ་ཤུབས་ན་འགྱིང་བའི། །རྟ་ཐོག་བླ་མས་བསྟན་པ་ཅི་ཤེས། །རྣམ་གསུམ་ཆོས་གོས་སྐུ་ལ་བཞེས་ཚེ། །སྦྱང་ཡོན་བཅུ་གཉིས་གཏན་གྲོགས་མིན་ནམ། །ཚུལ་འཆོས་རྒྱ་ཡིས་རང་རྒྱུད་བཅིང་བའི། །ལོག་འཚོ་མཁན་པོས་བསླབ་གསུམ་ཅི་ཤེས། །ཐུབ་བསྟན་ཡོངས་རྫོགས་ཐུགས་ལ་བཞེས་ཚེ། །ཐུབ་ཚུལ་རྨ་མེད་རང་ལུགས་མིན་ནམ། །རང་དོན་ཡིད་བྱེད་ལམ་གོལ་འཁྱམས་པའི། །བློ་ཆུང་བློ་ཡིས་ཐེག་ཆེན་མི་ཤེས། །ནམ་མཁའ་ལྟ་བུའི་ཐེག་མཆོག་ཞོན་ནས། །ལམ་གྱི་མྱུར་ལམ་གཉེར་བྱ་མིན་ནམ། །འཁོར་འདས་ཆོས་ལ་སྤུ་རིས་འབྱེད་པའི། །སྤང་བླང་མཁན་པོས་མཉམ་ཉིད་ཅི་ཤེས། །གང་ཡང་ཞེན་མེད་ལམ་
དུ་འཁྱེར་ལ། །གཏད་མེད་འཆིང་བྲལ་མཐར་ཐུག་མིན་ནམ། །ཐབས་དང་བྲལ་བའི་སྟོང་སྒོམ་མུན་རྡོས། །མི་ཚེ་སྐྱེལ་ནས་ཐབས་མཆོག་ཅི་ཤེས། །སྙན་རྒྱུད་སྒོམ་པའི་དབང་བཞིའི་རྣལ་འབྱོར། །སྤྱོད་པའི་བོག་འདོན་ལ་བཟླ་མིན་ནམ། །འགྱུར་མེད་དོན་གཉེར་དམན་ལམ་འགྲོ་བས། །འགྱུར་བ་མེད་པའི་ཁྱད་ཆོས་ཅི་ཤེས། །འཕོ་མེད་བདེ་ཆེན་དོན་དུ་གཉེར་བས། །འཛག་མེད་ཚུལ་ཁྲིམས་བསླབ་བྱ་མིན་ནམ། །བསྐྱེད་པས་བསྐྱེད་ནུས་སོ་སྐྱེའི་ལམ་མཐའ། །རྫོགས་པའི་རྣལ་འབྱོར་སྐྱེ་འཕགས་མཚམས་སྦྱོར། །རྫོགས་ཆེན་རྟོགས་པའི་འཕགས་ལམ་འཁྲུལ་མེད། །རྩ་མདུད་གྲོལ་བའི་ལག་རྗེས་མིན་ནམ། །སོར་མོས་མ་ཡིན་སྙུགས་གུའི་ལྟ་ཅི། །དགོངས་རྒྱུད་ཁྲོལ་དཀའ་འཁོར་ལྔའི་མདུད་རྒྱ། །གང་གིས་གཞིག་ནུས་བཅོམ་ལྡན་ལྡན་པ། །གྲུབ་བརྒྱས་བརྟེན་པའི་བཞེས་འཕྲོ་མིན་ནམ། །སྟག་ཤམས་ཐིག་ལེའི་འཛུམ་ཆེན་དགོངས་དང་། །ཟླུམ་པོའི་མཐིང་གོས་པུས་མོའི་འཆིང་ཐགས། །བསླབ་པའི་བཙོན་བུའི་སྡོམ་པའི་སྒྲོགས་ལ། །རོ་མཉམ་རིག་སྔགས་ད་ནི་འདེབས་རན། །རྒྱན་དྲུག་རི་མོའི་འཕྱང་འཕྲུལ་དགོངས་དང་། །ཟླུམ་ཚལ་སྣམ་ཕྲན་དཀྲོལ་བའི་འཆིང་ཐག །བླང་འདས་བརྩི་བའི་གུད་དོགས་བརྩོན་ཁང་། །སྤང་བླངས་མེ་སྒྱོགས་ད་ནི་བརྡེག་རན། །ཐོར་ཚུགས་འཁོར་
ལོའི་མཛེས་པ་དགོངས་དང་། །མགོ་རེག་བརྟུལ་ཞུགས་དཀྱིལ་འཁོར་བརྙས་བཅོས། །གསོ་སྐྱོང་བསྒྲིགས་བཅད་འཛིན་པའི་བཙོན་སྲུང་། །གཏད་སོའི་སྲོག་དང་ད་ནི་འབྲལ་རན། །ཕ་གཅིག་པདྨའི་ཚོམ་བུའི་ཚོགས་སུ། །སྨོན་ལམ་མཐུན་པའི་སྤྱོད་པའི་བོགས་འབྱིན། །བརྒྱུད་པ་ཀུན་ལ་བགོ་སྐལ་ལགས་ན། །སྟོན་མོའི་རང་སྐལ་ད་ནི་བཞེས་རན། །ཨ་ལ་ལ་ཧོ་ཆགས་མེད་ཞེན་བྲལ། །ཨེ་མ་ཧོ་དེ་གང་བྱས་གུ་ཡང་། །ཀློང་ཆེན་བརྒྱུད་པའི་ཁྱད་ཆོས་དེ་ཀོ། །དེ་ཀ་ཡིན་ནམ་སྐྱབས་རྗེ་ཁྱེད་དགོངས། །ཨ་བུ་སྨྱོན་པའི་རྩེད་མོའི་གླུ་ཆུང་། །ཐོལ་བྱུང་ངང་ནས་གང་དྲན་ཕུལ་བ། །འབྲེལ་མེད་གཏམ་ལ་བརྗོད་བྱ་མེད་ཀྱི། །བཀའ་བཀྱོན་མེད་པའི་བཀའ་དྲིན་ཞུ་ཞུ།། ༈ ཉིས་ཀྱི་བདེན་པ་གཉིས་པ་དོན་དམ་ཇི་བཞིན་ཐུགས་སུ་ཆུད། །དང་པོའི་ཀུན་རྫོབ་སྣང་བ་འགགས་མེད་འཆར་ན་ཡང་། །གསུམ་སྐུ་གྱི་ཐོག་མའི་ཆོས་སྐུའི་དབྱིངས་སུ་འུབ་ཆུབ་ཚེ། །བཞི་ཡི་སྣང་བ་ཐ་མའི་སྐབས་སུ་ཆོས་ཉིད་ཟད་པ་འཕོས་དེར་བསྔགས། །ཕུལ་བྱུང་བཅུ་གཉིས་སྡེ་སྣོད་གསུང་གི་དང་པོ་མདོ་སྡེ་མཆོག །བཅུ་ཡི་ཐ་མ་རྒྱུན་མཐའ་རྫོགས་པའི་སྐལ་བཟང་ལ། །ཀུན་ནས་ལྔ་ཡི་དབང་པོ་གཉིས་པར་རྣ་བར་བསྒྲགས་པའི་ཚེ། །བཞི་ཡི་བདེན་པ་ཐོག་མ་སྡུག་བདེན་
ཉམས་ལ་མངོན་གྱུར་སྙམས། །འགོག་བདེན། །རྣམ་དག བསླབ་པ་་གསུམ་གྱི་དང་པོ་་ཚུལ་ཁྲིམས་་ལ་གནས་ཤིང་། །གསུམ་གྱི་་སྦྱོར་དངོས་རྗེས་་ཐོག་མ་བར་དང་ཐ་མ་རུ། །དྲུག་གི་་ཕར་ཕྱིན་་བཞི་་བརྩོན་འགྲུས་་བར་གཞོལ་ལ་ཐུགས་བསྐྱེད་ཀྱིས། །གསུམ་གྱི་་ཁམས་གསུམ་གནས་ནས་མྱུར་ཏུ་འདའ་བར་མཛོད། །དེ་སྐད་གསུམ་སྒོ་གྱི་གཉིས་ངག་པའི་ལམ་ནས་དྲངས། །ལྔ་ཡི་་སོར་མོ་་གཅིག་གིས་་མཐེ་བོང་གཉིས་པ་་འཛུམ་མོ་་དང་པོའི་རྩེར། སྨྱུ་གུ། གཉིས་ལ་་ཆུ་སྣག་གཉིས་་ཕྱིན་པའི་གཅིག་གི་་བྲི་བ་་བྱེད་ལས་ཀྱིས། །ཀུན་ནས་མང་པོར་་ཡིག་གཟུགས་་སྤེལ་བའི་མཐུ་ལྡན་ཤོག། ༈ །།ཚོགས་མགུར་རྩ་གསུམ་དགྱེས་པའི་མཆོད་སྤྲིན་སྐབས་ཡར་ཞུ། །ཀྱེ་ཧོ། །འདིར་འཚོགས་རྡོ་རྗེ་སློབ་དཔོན་མཆེད་ལྕམ་འདུས་པ་རྒྱ་མཚོ། །དཀྱིལ་འཁོར་གཅིག་ལ་བསྡུས་པའི་རྩ་རྒྱུད་དཔལ་ལྡན་བླ་མ། །མཁའ་སྤྱོད་དག་པའི་ཞིང་ནས་རྒྱལ་སྲས་སློབ་མར་བཅས་པ། །ཞེན་མེད་སྙིང་རྗེ་ཆེན་པོས་ཚོགས་ཀྱི་དགའ་སྟོན་རོལ་མཛོད། །གནས་ཡུལ་ཉེར་བཞིའི་ཞིང་ན་གྲངས་མེད་དཔའ་བོ་དང་མཁའ་འགྲོ། །སྣང་སྲིད་རྟེན་འབྲེལ་ཤར་བའི་ཆེ་དགུ་གཉན་བཅུའི་འཁོར་ཚོགས། །གྲངས་མེད་བསྐལ་པར་བསགས་པའི་རེ་ལྟོས་ལན་འཇལ་གང་ཡོད། །ས་ལམ་ཡོན་ཏན་
རྫོགས་ཕྱིར་ཚོགས་ཀྱི་འཁོར་ལོར་རོལ་མཛོད། །རང་ལུས་རྒྱལ་བའི་དཀྱིལ་འཁོར་ཕུང་ཁམས་ལྷ་ཡི་སྐྱེ་མཆེད། །རྩ་འཁོར་ལྔ་ཡི་ཞིང་ན་རྩ་གསུམ་ཞི་ཁྲོ་རབ་འབྱམས། །ཚོགས་ཀྱི་འཁོར་ལོའི་བཟའ་བཏུང་གྱ་ནོམས་འདི་ལ་རོལ་དང་། །འདོད་སྲེད་སྣང་སྟོང་དབྱེར་མེད་སྐྱེ་འགགས་གནས་གསུམ་དང་བྲལ་ལོ། །ཞེས་གཅོད་སྨྱོན་འདྲེ་ཧྲུད་ཀྱིས། གོང་གི་ཨ་བུ་ཧྲལ་པོའི་སྐུ་མདུན་དུ་བཟའ་བཏུང་ཚོགས་ཀྱི་མཆོད་པ་ཕུལ་ནས་སྨྱོ་སྤྱོད་གཙོང་པོའི་ཞུས་པ་ཧ་ཧ་ཨ་ཙི་ཕོ་ཚོད་ཁྱི་རྐུན་གྱི་དཔེའོ་ཞུས་པའི་ལན་དུ་གསུངས་པ། ༈ བརྟུལ་ཞུགས་རྣལ་འབྱོར་སྤྱོད་པའི་དཔའ་བོ་དེ་བཞུགས་ནས། །སྐལ་ལྡན་འཁོར་གྱིས་བསྐོར་བའི་དམ་ལྡན་གྱི་མི་ཚོགས། །འཁོར་འདས་དབྱེར་མེད་རྟོགས་པའི་རིག་རྩལ་གྱི་དཀྱིལ་འཁོར། །དམ་ཡེ་ཡེ་ནས་དབྱེར་མེད་དགྱེས་ལྡན་གྱི་ལྷ་ཚོགས། །གཙང་རྨེ་གཉིས་རྟོག་འཇོམ་པ་མཉམ་ཉིད་ཀྱི་དམ་རྫས། །འབྱོར་ལྡན་ཡོ་བྱད་ཚོགས་ཀྱི་ལོངས་སྤྱོད་དང་ལྡན་པའི། །ཚོགས་གསུམ་ཕུན་སུམ་འཚོགས་པའི་ཚོམ་བུ་དེ་མཛེས་སོ། །བདེ་སྟོང་འདུ་འབྲལ་མེད་པའི་ཉམས་མྱོང་གིས་མྱོས་པའི། །བདེ་ཆེན་ཉམས་པ་རྒྱས་སྒེགས་པའི་རྣལ་འབྱོར་དེ་དཔའ་བོ། །སྣང་སྲིད་བདེ་བར་རོལ་པའི་ཡོ་ལང་གི་ངང་ནས། །སྡུག་བསྔལ་དབྱིངས་སུ་སངས་པའི་སྐྱིད་གླུ་རང་འཐེན་ནོ། །ཐ་མལ་མཚན་
རྟོག་མེད་དེ་བསྐྱེད་རྫོགས་ཀྱི་རྣལ་འབྱོར། །ཨ་འཐས་རྩོལ་བསྒྲུབ་མེད་དེ་རྫོགས་ཆེན་གྱི་རྟོགས་ལྡན། །བག་མེད་ལེ་ལོ་མེད་དེ་སྒྲུབ་བརྩོན་གྱི་དཔའ་བོ། །བརྩོན་དང་མི་བརྩོན་ཐམས་ཅད་མཉམ་ཉིད་དུ་ཕྱམས་གདལ། །སེར་སྣ་འཇུར་འགེགས་མེད་དེ་གཏོང་ཕོད་ཀྱི་སྦྱིན་བདག །ཤག་དང་ཀུ་ཅོ་མེད་དེ་གསང་སྤྱོད་ཀྱི་ཚོགས་གྲལ། །ཐ་མལ་འབག་གཏམ་མེད་དེ་སྨྲ་བཅད་ཀྱི་བཟླས་བརྗོད། །གསུམ་ལྡན་རྡོ་རྗེ་འཛིན་པའི་ཚོགས་གྲྭལ་དེ་བརྗིད་དོ། །ཞིང་བཅུ་ཐབས་ཀྱིས་སྒྲོལ་བའི་མཛད་སྤྱོད་ལ་མཁས་ཀྱང་། །ཨ་ཁུ་ར་བཤའ་རྔ་བརྡུང་དེ་འདྲ་ནི་མ་ཡིན། །བདེ་སྟོང་དབྱིངས་སུ་སྦྱོར་བའི་གསང་སྤྱོད་ལ་མཁས་ཀྱང་། །གྲོང་སྔགས་སྐྱ་མིན་སེར་མིན་དེ་འདྲ་ནི་མ་ཡིན། །གསང་ཆེན་གསང་བའི་དམ་རྫས་ཚོགས་འཁོར་དུ་རོལ་ཡང་། །ཟ་འདོད་ཤ་དགའ་ཆང་སྲེད་དེ་འདྲ་ནི་མ་ཡིན། །གུ་ཡངས་རྫོགས་ཆེན་རྟོགས་པའི་བྱར་མེད་ལ་གནས་ཀྱང་། །བག་མེད་ལེ་ལོས་བཅོམ་པའི་མདོ་ཤོར་དེ་མ་ཡིན། །སྒྲ་གྲགས་སྔགས་སུ་ཤེས་པའི་དགོངས་སྤྱོད་དང་ལྡན་ཡང་། །འཛད་མེད་འཆལ་གཏམ་སྨྲ་བའི་གཅོས་རྒན་དེ་མ་ཡིན། །བསྒུར་བསྐྱོད་ཕྱག་རྒྱར་ཤེས་པའི་ལྷ་སྣང་དང་ལྡན་ཡང་། །རྒྱུག་མཆོད་རྩེ་འཇོར་ཞེན་པའི་བན་རྒོད་དེ་མ་ཡིན། །ཅི་སྲེད་ཅི་ལ་སྲེད་ཀྱང་སྲེད་པ་དེ་སྤང་བྱ། །གང་
ཞེན་གང་ལ་ཞེན་ཀྱང་ཞེན་པ་དེ་བདུད་གཅོད། །ཞེན་ཡུལ་སྒྱུ་མར་ཤེས་པའི་གདེང་ཚད་དང་ལྡན་ན། །ཐམས་ཅད་ཐམས་ཅད་རོལ་ཡང་ཚོགས་འཁོར་གྱི་རྣལ་འབྱོར། །བསོད་ནམས་ཚོགས་ཆེན་རྫོགས་པའི་གཏོང་ཕོད་ཞིག་མེད་ན། །ལྷ་ཚོགས་མཆོད་པ་ཡིན་ཞེས་རྔ་བརྡུང་གི་འུར་ཆོམ། །བསྲུང་བཟློག་ཁ་གྲངས་སོང་ཡང་སྐུ་རིམ་ནི་མི་འོང་། །བླ་མཆོད་གལ་ལ་འཛུད་པའི་དུས་བསྲུང་དེས་ཅི་བྱ། །བསྐྱེད་རྫོགས་གནད་དང་ལྡན་པའི་རྣལ་འབྱོར་ཞིག་མེད་ན། །བོན་གྱེར་སྐད་གསང་མཐོན་པོས་ཁྱི་ནག་གི་ཟུག་ཟུག །མཆོད་མཆོད་འུར་སྒྲ་ཙམ་གྱིས་ལྷ་ཚོགས་ནི་མི་དགྱེས། །བསྐང་བསྐང་ཁ་གྲངས་གསགས་པའི་བསྐང་གསོ་དེས་ཅི་བྱ། །སྣང་སེམས་དབྱེར་མེད་རྟོགས་པའི་ཉམས་མྱོང་ཞིག་མེད་ན། །སོད་སོད་ཁུག་ཁུག་ཙམ་གྱིས་དགྲ་བགེགས་ནི་མི་སྒྲོལ། །བསམ་ངན་ཞེ་སྡང་འབར་བའི་ཚིག་རྩུབ་ཀྱི་བྷྱོ་བཟློག །ཟན་གོང་གྲིས་གཏུབ་བྱེད་པའི་བསྒྲལ་ལས་དེས་ཅི་བྱ། །ངོ་སྐོག་ཁ་གཏིང་མེད་པའི་དམ་ཚིག་ཞིག་མེད་ན། །གཏོར་ཚོགས་རི་ལྟར་སྤུངས་ཀྱང་དམ་ཅན་ནི་མི་འདུ། །ལྷ་མཆོད་འདྲེ་ཡིས་ཟ་བའི་ཤ་ཁྲག་གི་དམར་ཆོག །རེ་འཁངས་བསྲུང་མར་བྱེད་པའི་མཆོད་སྒྲུབ་དེས་ཅི་བྱ། །རྣམ་དག་དམ་ཚིག་གཙང་མ་དམ་ཅན་གྱི་བླ་རྡོ། །ཡེངས་མེད་བསྐྱེད་རྫོགས་དབྱེར་མེད་རང་གཞན་གྱི་ཚོགས་
གསོག །ཞེན་མེད་ཅི་ཡང་རོལ་པ་འདོད་ཡོན་གྱི་ཚོགས་འཁོར། །ང་ཅག་ཅི་ལྟར་བྱས་ཀྱང་སྐྱིད་པོ་རང་འདུག་གོ །དབེན་པའི་རྣལ་འབྱོར་སྨྱོན་པ་རྒྱལ་ཁམས་ཀྱི་གཅེས་ཕྲུག །ལྷག་བསམ་བྱང་སེམས་འབྱུང་བ་འགྲོ་ཀུན་གྱི་སྐྱབས་མགོན། །ང་ཁྱོད་ཕྱོགས་རིས་སྤངས་པ་ཐམས་ཅད་ཀྱི་བྱམས་ཡུལ། །ང་ཅག་གང་དུ་སོང་ཡང་སྐྱིད་པོ་རང་འདུག་གོ །རང་དོན་དབེན་པར་སྒོམ་ཡང་གཞན་ཕན་གྱི་སེམས་བསྐྱེད། །གཞན་དོན་གྲོང་དུ་སྒྲུབ་ཀྱང་རང་རྒྱུད་ཀྱི་སྒྲིབ་སྦྱོང་། །དོན་གཉིས་དབྱེ་བ་མེད་པ་ཐེག་གསུམ་གྱི་རྣལ་འབྱོར། །ད་ནི་ཇི་ལྟར་བྱས་ཀྱང་སྐྱིད་པོ་རང་འདུག་གོ །ཨ་བུ་ཧྲལ་བོས་གང་ཤར་སྨྲས་སོ། ༈ །རྟོགས་པའི་སྐྱིད་གླུ། ཉིན་བྱེད་སྣང་བ་ཤར་ནས་ཆས་པས། །ལྷ་ལམ་འོད་སྣང་གཟི་བརྗིད་རྒྱལ་པོ། །བདུད་རྩི་ལྷ་ཆར་ཁ་ནས་བབ་པས། །དོགས་མོ་ས་ལ་འབྲས་དྲུག་རྒྱས་སོང་། །ཐུབ་པ་ཉི་མ་འཇིག་རྟེན་བྱོན་པས། །བསྐལ་བཟང་སྐྱེ་བོས་ཐར་ལམ་སྙེགས་སོང་། །མཉམ་བཞག་གནས་ལུགས་རང་ངོ་མཐོང་བས། །སྣ་ཚོགས་འཁྲུལ་པའི་བུན་ལང་ཡལ་སོང་། །མཚན་ལྡན་བླ་མ་སྤྱི་བོར་བསྒོམ་པས། །ཉམས་མྱོང་རྟོགས་པའི་ཕ་ཕོག་ཐོབ་སོང་། །ཚེ་རབས་ཡི་དམ་སྙིང་ལ་བཅིང་བས། །འཁྲུལ་པའི་ནད་གདོན་སྤྲིན་བཞིན་ཡལ་སོང་། །
གསོལ་འདེབས་རྒྱང་འབོད་གདུང་གླུའི་བོས་པས། །རྩ་གསུམ་བྱིན་རླབས་སྤྲིན་བཞིན་འཐིབ་སོང་། །གང་ཡང་གཏད་མོད་ཆོས་སྐུར་སྦྱངས་པས། །འཁྲུལ་པའི་ཨ་འཐས་རྡུལ་དུ་ཞིག་སོང་། །བློས་བྱས་རྩོལ་བའི་བྱ་བྱེད་དོར་བས། །བྱར་མེད་ངང་དུ་མཉམ་པར་བརྡལ་སོང་། །ཡང་དག་དོན་ལ་དབུ་མར་བཞག་པས། །དགག་སྒྲུབ་གྲུབ་མཐའི་འཆིང་བ་གྲོལ་སོང་། །གཟུང་འཛིན་གྲོགས་ཀྱི་ཁྱུ་ལས་རིང་བས། །གཅིག་པུར་བག་ཡང་སེམས་རྩ་ལྷོད་སོང་། །བདེ་བདེ་སྐྱིད་སྐྱིད་སྔོན་གྱི་ལས་དབང་། །ལྷོད་ལྷོད་འབོལ་འབོལ་སྔོན་གྱི་ལག་རྗེས། །བག་ཡང་ཉམས་དགའ་བླ་མའི་བྱིན་རླབས། །འདི་ཕྱི་ཀུན་ཏུ་དེ་འདྲ་ཡིན་ནོ། །ཨ་བུ་ཧྲལ་བོས་མཚར་གཏམ་དེའོ། ༈ །རིང་ནས་མཐའ་ཀླས་འགྲོ་ལ་བརྩེ་བའི་རླབས། །དུས་ལས་ཡོལ་མིན་ཡོན་ཏན་རིན་ཆེན་བརྒྱའི། །འབྱུང་གནས་སྐལ་བཟང་གཟིགས་བརྒྱས་བསྟེན་འོས་པ། །དམ་པའི་མཚོ་ཆེན་རྙོགས་པ་མེད་མཆོག་དྲུང་། །སྲིད་པའི་སྐྱོན་མང་བཀྲུ་ལ་རླབས་ཆེན་གྱིས། །སྨོན་པའི་ཀེ་ཏ་ཀ་མཐུས་བགྲུངས་གྱུར་ན། །གང་མཚན་ཞི་བསིལ་བདུད་རྩིའི་བྲན་བྱས་པས། །ཞུ་མཆིང་མེ་ཏོག་གསར་པའི་མཆོད་སྤྲིན་སྤྲོ། །རྒྱལ་ཀུན་ཐུགས་ཀྱི་གསང་བ་རྡོ་རྗེའི་དབྱིངས། །གང་དུ་ཁྱོད་དགྱེས་ཆོས་སྐུའི་རྒྱལ་ཁབ་ནས། །གཡོས་
མིན་མཐའ་ཀླས་འགྲོ་བའི་བློ་མཚོ་ན། །གཟུགས་སྐུའི་རྣམ་རོལ་མཁའ་མཐས་འགྲན་ཟླར་ཆས། །སྡེ་གསུམ་ནང་རྒྱུད་བདུད་རྩིའི་རྒྱུན་བཟང་ཆབ། །འབེབས་པའི་མ་དྲོས་མཚོ་བདག་སྒྲོ་ཕུག་པའི། །རྣམ་རོལ་འོད་སྟོང་ཡོངས་རྫོགས་བསྟན་པའི་མཁར། །རྒུད་པའི་མུན་སྟུག་བཅིལ་ལ་ཤར་བ་བཞིན། །སྲིད་ན་སྲིད་པའི་སྙེམས་རྒྱུས་རྒྱག་ལྡན་བརྒྱས། །དོ་ཀེར་ནོར་བུའི་འོད་ཀྱིས་དམར་བྱས་རྡུལ། །ཁྱོད་ཞབས་པདྨའི་ངོ་མཚར་གྱིས་བཟུང་བ། །དབང་བཅུའི་དབང་གིས་ཕྱུག་པའི་མཐུ་ཁོ་ན། །དབང་ཕྱོགས་ས་ཡི་ཐིག་ལེར་སའི་ཚངས་པས། །ས་ཆེན་བྱམས་པས་བཟུང་བའི་འཁོར་ཡུག་ཁྱོན། །ཁྱོད་བྱིན་རྩིབས་མ་རྒྱབ་པས་རྒྱས་དཀའ་བའི། །མངོན་མཐོའི་གྲིབ་མ་སྣུམ་ལ་བསྟེན་པ་ཡིན། །དེ་སླད་ཁྱོད་ཞལ་བསོད་ནམས་བྱེ་བའི་མཛོད། །མཐོང་བའི་སྐལ་བས་བཟུང་མིན་འཁོས་དམན་ཡང་། །ཁྱོད་ཐུགས་ཐུགས་རྗེས་རིང་ནས་བསྐྱང་བའི་དྲིན། །དྲན་པས་དད་ཕྱག་བརྩེགས་ལ་ལྷག་པར་རིངས། །མ་ཞེས་མིང་གི་ཆོ་ལོ་མཁའ་མཉམ་འགྲོར། །སྦྱིན་བ་རྒྱལ་སྲས་རྒྱལ་པོ་སྤྱིའི་ཆོས་ཉིད། །ལགས་མོད་ཡོངས་རྫོགས་བསྟན་པའི་སྟོན་པ་རུ། །ཕེབས་པ་ཁྱོད་དང་རྒྱལ་བའི་ཐུན་མོང་ཆོས། །ཆོས་བརྒྱད་སྲིད་པའི་སྒྱུ་མ་ཐར་ལམ་གྲོང་། །བགྲོད་དུ་མེད་ཀྱང་
སྙིགས་མཐའི་གཡང་ཟབ་མོར། །ལྷུང་བའི་ཐུབ་བསྟན་རྩོད་མང་གཅོང་རོང་དུ། །འཁྱམས་ལ་ཁྱོད་ཅིག་འདྲེན་མཆོག་གཅིག་ཏུ་བཞུགས། །ཆོས་སྤངས་མུན་པ་འཐིབ་ལ་སྣང་བ་རུ། །བལྟ་བའི་ཕྱོགས་ལྷུང་མིག་ལྡན་འབྱུང་པོའི་བྱ། །མངོན་འདོད་གོ་སྐབས་གཅོད་ལ་ཉིན་བྱེད་ཁྱོད། །རྒྱལ་བའི་རིང་ལུགས་མཁའ་ལ་དྲང་པོར་རྒྱུ། །བློ་བཟང་རྒྱལ་བ་གཉིས་པའི་རིང་ལུགས་བསྟན། །གཞུང་བཟང་སྟོང་གི་ཆུ་བོ་འདུ་བའི་མཛོད། །བཤད་དང་སྒྲུབ་པའི་ཕྲག་པར་འཛིན་བཟོད་པ། །ཁྱོད་གཅིག་འཇམ་དཔལ་དབྱངས་ཞེས་སྲིད་ན་གླིང་། །རྣམ་པར་སྣང་མཛད་ཡེ་ཤེས་སྒྱུ་མའི་འཕྲུལ། །དེས་གསུང་གདམས་པའི་ཆང་གིས་ཆེས་མྱོས་པས། །གསང་འཛིན་དཔའ་བོ་ཉིད་ཅེས་མིག་ཡངས་བརྒྱས། །མཁའ་སྤྱོད་གྲོང་ན་གླུ་ཡི་གླེང་གཞིར་བྱེད། །མདོ་སྔགས་གཞུང་བརྒྱ་རྒྱལ་བའི་ལམ་གཅིག་ཏུ། །སྡུད་པའི་ཚུལ་ཤེས་རྣམ་པ་འཇིག་པའི་སྒོ། །ཇི་སྙེད་མ་འགལ་གདམས་པར་འཆར་བཟོད་པ། །འཇམ་མགོན་བླ་མའི་རིང་ལུགས་དེང་འདིར་བསླང་། །རྒྱུ་དེས་པད་རག་ཞུན་དང་གསེར་བཙོ་མའི། །མདངས་འཛིན་ཅོད་པན་གཡོ་བའི་མཁས་པ་བརྒྱས། །ཁྱད་མེད་རིགས་ཀྱི་བདག་ཞེས་ཁྱོད་ཞབས་རྡུལ། །སྤྱི་བོར་ལེགས་བསྟེན་བསྟན་པའི་གཙོ་བོ་བཞིན། །དེ་སླད་མཁས་པའི་གྲལ་དང་མཐོན་པོའི་ཁྱུར། །སྙེགས་འདོད་
གཅམ་བུའི་མ་ཡིན་ངེས་ཤེས་སྤྲིན། །ཡིད་མཁར་འདུས་ལས་དེས་བསྐུལ་ཚིགས་བཅད་འཕྲིན། །མཛེས་པ་མེད་ཀྱང་ཁྱོད་སྙན་གཙེར་ལ་ཆས། །རྣམ་མཁྱེན་ཐུགས་ཀྱི་དགོངས་པས་བརྩེ་སྦྱིན་ཞིང་། །བྱམས་བརྩེའི་གསུང་གིས་རིང་དུ་གདམས་པ་དང་། །མཚན་དཔེའི་ཞལ་བཟང་བལྟ་ལ་མི་ངོམས་པའི། །སྐལ་པ་དགེ་བའི་བཀྲ་ཤིས་དེས་བདག་སྐྱོངས། །རྡོ་རྗེ་གསུམ་གྱི་རང་བཞིན་སྲིད་མཐར་ཡང་། །བསྟན་འཛིན་རྒྱུ་སྐར་བྱེ་བའི་མགོན་གཅིག་པུ། །ཡོན་ཏན་ཆ་ཤས་གང་བའི་སྟོན་མཚན་རྒྱན། །ཚེ་མཐའ་ཡས་པའི་ངོ་བོར་འཚོ་གཞེས་གསོལ།། ༈ མཐའ་ཀླས་འགྲོ་ལ་མ་མ་སྡུག་གུ་ལྟར། །བྱམས་པའི་ཕྱག་གིས་ཡང་དང་ཡང་བྱབ་ཅིང་། །སྙིང་རྗེའི་ཆུ་ཡིས་འཁྲུད་པ་ལྷུར་བཞེས་པ། །རྒྱལ་སྲས་སེམས་དཔའ་ཆེ་དེའི་ཞབས་དྲུང་དུ། །གུས་བཅས་སྤྱི་བོར་ཛུམ་པའི་སོར་བཅུའི་འདབ། །སེན་མོའི་འོད་ཕྲེང་དགོད་པའི་འཛུམ་ངོམས་ཤིང་། །སྙིང་ལ་རབ་དགའ་རྒྱས་པ་དད་བརྒྱའི་གླུ། །ཞུ་མཆིད་ཤོག་བུའི་དོ་རར་གར་དུ་རྩེ། །འཇམ་དཔལ་དཔའ་བོའི་བྱིན་རླབས་ཉི་མའི་གཟིས། །མང་བརྟེན་བཀྲ་ཤིས་སྟོང་གི་འབྱུང་གནས་སུ། །ངེས་བྱས་དབང་པོས་ལེགས་བསྲུང་ལྗོངས་ཆེན་པོ། །མཁས་དང་གྲུབ་པ་སྟོང་གིས་བཟུངས་ཞེས་ཐོས། །དེ་ན་དམ་པའི་ཡོན་ཏན་འབུམ་ཕྲག་ཀྱང་། །
གང་ཐུགས་དཔལ་བེར་འཁྱིལ་བའི་རླབས་འཕྱུར་ནས། །སྙན་གྲགས་རྒྱ་མཚོའི་གོས་ཅན་གཞིར་ཁྱབ་པ། །དེ་ལ་རབ་དགའི་མེ་ཏོག་སུ་མི་འཕེན། །ཡོན་ཏན་ཟིལ་མངར་འཛིན་པའི་ཨུཏྤ་ལ། །བསླབ་གསུམ་ནགས་མའི་ལྗོངས་ལ་བསྟེན་བྱས་ཚེ། །སྐལ་བཟང་རྐང་དྲུག་དད་བརྒྱའི་འཕུར་ལྡིང་གིས། །བསྔགས་བརྗོད་གླུ་དབྱངས་ལེན་པ་ཆོས་ཉིད་ཡིན། །ལྷ་ཡུལ་མིག་སྟོང་ལྡན་པའི་འདུན་ས་ཆེའི། །མངོན་བརྗོད་མིང་ཡིག་ཕྲོག་པ་མ་ཡིན་ཡང་། །ལེགས་བྱས་བདུད་རྩིའི་མྱོས་པའི་སྐལ་བཟང་འགྲོ། །གང་ལ་བསྟེན་འོས་སུམ་རྩེན་གྲོང་བཞིན་གནས། །འཆད་པའི་གཡུ་རལ་བརྗིད་པའི་གཟི་ངོམ་ཞིང་། །རྩོད་པའི་སྡེར་མོས་རྒོལ་ངན་ཀླད་པ་འགེམ། །རྩོམ་པའི་རྩལ་གསུམ་རྫོགས་པའི་གདོང་ལྔ་པ། །རྒྱལ་བསྟན་གངས་རིའི་ལྗོང་ན་འགྲན་ཟླ་བྲལ། །སྟོན་པས་ལེགས་གསུང་རྣམ་མང་ཐེག་པའི་གཞུང་། །བསྟན་འཛིན་སྟོང་གི་བློ་གྲོས་མཐུས་ཕྱེ་བའི། །ཐུབ་བསྟན་འོ་མཚོ་ཁ་གཏིང་མེད་དཀར་བ། །སྤྱོད་པའི་བློ་གྲོས་ལུས་དཀར་དབང་པོ་བཞིན། །ཐོས་པའི་སྙན་དབང་གཞུང་ལུགས་བརྒྱར་འགྲོགས་ཀྱང་། །བསམ་པའི་རྣམ་དཔྱོད་ཕྱོགས་རེར་མ་ལྷུང་བས། །སྒོམ་པའི་ཟབ་དོན་རྡོ་རྗེའི་རྣལ་འབྱོར་ལ། །གཞོལ་དེས་གྲུབ་བརྒྱའི་རིང་ལུགས་གསར་དུ་བསླང་། །དེ་སླད་ཡོན་ཏན་མཆོག་མངའ་དམ་པའི་མགོན། །རིང་བར་་
གནས་ཀྱང་སྐྱེ་དགུའི་མ་འདྲིས་བཤེས། །མཚུངས་པ་མེད་པར་ཤེས་ནས་དེང་འདིར་ཡང་། །ཞུ་མཆིད་ཚིག་གི་ཕྲེང་བས་བསྟི་སྟངས་བྱས། །དུས་ཀུན་བྱམས་པའི་ཐུགས་ཀྱིས་མི་འདོར་ཞིང་། །གདམས་འོས་བདུད་རྩིའི་གཏམ་གྱིས་རྗེས་འཛིན་པས། །བདག་སོགས་ལྷར་བཅས་འགྲོ་བའི་མགོན་གཅིག་ཏུ། །ཞབས་པད་རྡོ་རྗེའི་ཁྲི་ལ་བརྟན་གྱུར་ཅིག ༈ །ཟླ་གཞོན་ཐིག་ལེས་བྲིས་མིན་ལྷའི་མེ་ཏོག །གཡོ་བའི་འཕྱང་འཕྲུལ་འཛིན་ལྡན་མཚོ་སྲས་མ། །པང་ན་ཏམ་བུར་མཚན་གཡོན་མིག་ལ། །རྗེས་ཆགས་འཇམ་དཔལ་དཔའ་བོས་ཁྱོད་ལ་སྲུང་། །གང་ན་ལུས་ཕྲ་མིན་ཀྱང་ནགས་ལན་བུར། །གཡོ་བའི་ལྷུན་བོ་སྦོམ་པོའི་ཕང་བ་ན། །སྣང་མཛད་སྤྲུལ་པའི་ལོ་ཆེན་བྱིན་རླབས་གཟི། །འཛིན་འགྱུར་སྤོང་བའི་གནས་ཤིག་ཡོད་ཅེས་མཆི། །དེ་ན་གཡེམ་ཚུལ་མ་ཡིན་བློའི་ཟུར་མིག །གཡོ་བའི་སྨིན་འཁྱོགས་གར་གྱིས་རིག་ལམ་གྲོགས། །མང་ཞིག་རང་དབང་བགྱིད་མོད་འཕྱོན་མ་ཞེས། །འབོད་མིན་བློ་གསལ་གཞོན་ནུ་ལོས་རེ་དགའ། །དེ་ན་སྦྲེལ་བཞིའི་ཡུལ་མིན་སྙན་ཚིག་སྒྲོགས། །གཡོ་བའི་སྤྲིང་ཡིག་ངང་པའི་བུ་མོ་ཞིག །དོན་བཟང་རྐང་དྲུག་མཛོད་ལས་བསྐུལ་བའི་རོ། །མངར་དགུའི་ཕ་འབབས་སྦྱིན་སླད་འདི་ན་རྒྱུ། །དེ་ཚེ་བཏང་སྙོམས་མ་ཡིན་བློས་འདབ་སྟོང་། །གཡོ་བའི་རབ་དགའི་གེ་སར་འཛུམ་ཤོར་ཏེ། །
རྙོགས་མིན་མཛའ་བཅུག་ཡིད་ཀྱི་རྫིང་དྭངས་པར། །ཞལ་རས་ཆུ་ཟླའི་བརྙན་པོ་གསར་དུ་བྲིས། །ཉེ་མིན་ཞགས་ལྡན་འདོམས་པ་བགྲོད་བྱེད་ཟུང་། །གཡོ་བའི་འགྲོས་ཀྱིས་བགྲོད་དཀའི་འཕྱེ་བཞིན་ཀྱང་། །གཅུག་གྱུར་མདུད་པ་ལྷོད་མིན་སྙིང་གི་དར། །གཅིག་པོས་ལན་བརྒྱར་དཀྲིས་ཕྱིར་རིངས་པ་མིན། །འདི་ན་ལུགས་གཉིས་འདབ་ཡང་ཕང་ཕུང་དུ། །གཡོ་བའི་ངང་ཚུལ་ལས་རིང་སྡོང་དུམ་ཀྱང་། །བག་ཡངས་སྙོམས་ལས་མལ་ན་གློས་ཕབ་དཔལ། །དེ་གཅིག་དགེ་བར་འཛིན་ལྟས་རིང་ཞིག་སོང་། །གླུན་ཚུལ་བྲང་གི་བགྲོད་པ་མཆོངས་རྒྱང་དུ། །གཡོ་བའི་ལག་འགྲོའི་ཁྱུ་རུ་ཉལ་ཆེས་པས། །ལྔ་རིག་སྦྲང་རྩིའི་དོགས་པ་ཆུད་ཟོས་ནས། །ཡིད་རྡུལ་འཁྱགས་སྦྲམ་དགུན་ཟླའི་ཆུ་བཞིན་མཆིས། །འོན་ཀྱང་སྐྱབས་མགོན་ཐུགས་རྗེའི་བྱིན་ཤུགས་རྟགས། །གཡོ་བའི་རླབས་ཀྱིས་མི་མཐུན་མེ་གསོད་པ། །བག་ཡངས་ཕུན་ཚོགས་འཁྱིལ་པའི་འོ་མཚོ་ན། །མ་བརྟགས་ཉམས་དགའི་ཡུལ་ལ་ཞེན་ཅིང་མཆིས། །ཐུན་མཚམས་བླ་གོས་འཛིན་པའི་གྲལ་རིང་དུ། །བརྟན་པའི་སྐྱིལ་ཀྲུང་འཆར་བའི་སྐལ་དབེན་ཡང་། །མཆོག་གསུམ་སྐྱབས་ཀྱི་ཡུལ་དེ་མ་དོར་ཙམ། །བག་མེད་ཤྲཱི་སྨྱོན་པའི་གནས་ཚུལ་ལགས། །དེ་ན་གསང་ཆེན་སྙིང་པོའི་རིང་ལུགས་ལ། །བསྟན་པའི་ངེས་ཤེས་འཆང་བའི་བློ་གསལ་ཁྱེད། །ཉམས་
ལེན་སྙིང་པོའི་བཅུད་བཟང་གཞིབ་པའི་གཏམ། །གསར་པས་ཡིད་ལ་རབ་དགའ་ལན་བརྒྱར་བྱིན། །ཀུན་རྟོག་གཡོ་བ་དངས་བའི་སྤྲོས་བྲལ་གཤིས། །བརྟན་པའི་མཉམ་བཞག་དྲན་པའི་གཤིས་གཅིག་པོ། །སྡེ་སྣོད་བྱེ་བའི་བརྗོད་དོན་མཐར་ཐུག་པར། །དགོངས་ནས་ཡོངས་གྲུབ་གཤིས་ལ་དགའ་བར་བྱོས། །ཕྱོགས་ཕྱོགས་རྙེད་ཕྱིར་རྒྱུ་བའི་ཚུལ་བཏང་ནས། །བསྟན་པའི་སྒྲུབ་ཚུགས་རིམ་གཉིས་ལྷབ་ལྷུབ་ཅན། །སྔོན་བྱོན་རིག་འཛིན་བྱེ་བའི་མཛའ་གཅུགས་མ། །དེ་ཉིད་ལགས་ཀྱིས་དེ་ལ་ཅི་དགའ་འཁྱུད། །བརྒྱུད་གསུམ་བྱིན་རླབས་སྤྲིན་གྱི་ཕང་ཕུང་ལ། །བསྟེན་པའི་དད་གསུམ་གདུང་བ་ཆེར་བསྐྱེད་ནས། །ཟབ་ལམ་གནད་ཀྱི་ཟློས་གར་བྱོས་ཤིག་དང་། །ཁྱོད་ཡིད་དོན་བརྒྱུད་རྟོགས་པས་སྦྲུམ་པར་ངེས། །སྣ་ཚོགས་རིག་ལམ་སྒྱུ་མའི་རྩེད་འཇོ་ལ། །བརྟེན་པའི་འདུ་ཤེས་སྦྱངས་ཡང་དེའི་འབྲས་བུ། །རྒ་ན་འཆི་བར་ཕན་པ་མེད་དགོངས་ནས། །ཐོས་པའི་འོ་མཚོ་བསྒོམ་པའི་མར་དུ་སྲུབས། །ཀྱེ་མ་རྒྱལ་བསྟན་རིན་ཆེན་ཡུན་རིང་པོར། །བརྟན་པའི་གདེངས་ཤིག་མཆིས་ན་དེའི་རྒྱན་དུ། །ལྔ་རིགས་མེ་ཏོག་ཕྲེང་བ་མཛེས་བཏུས་ན། །དོན་གཉེར་ན་ཆུང་སྟོང་ལ་ཕན་གྱུར་མོད། །འོན་ཀྱང་སྙིགས་མའི་རང་རྟགས་འབུམ་གཤེས་ལ། །བསྟེན་པའི་
བརྟན་གཡོའི་སྣང་ཚུལ་འདི་གཟིགས་ན། །ད་ནི་རང་རྒྱུད་གདུལ་བའི་ཐབས་ཁོ་ན། །ཟབ་པ་ལགས་སྙམ་བདག་ནི་ཡང་ཡང་སེམས། །གང་ཞིག་སྐྱེས་སྦྱངས་མཁྱེན་དཔྱོད་བློས་སྣང་བ། །བརྟན་པའི་སྐལ་བཟང་ཉི་མ་ཁྱེད་ལགས་ན། །འཁོས་དམན་སྲིན་བུའི་སྣང་བས་ཅི་བགྱི་ཡང་། །ལྡབ་ལྡིབ་མེ་སྟག་ཙམ་འདིའི་བསམ་བཟང་བགྱིས། །བསྟི་བའི་གནས་གཅིག་ཁོ་ནར་ཡུན་རིང་པོར། །བརྟེན་པའི་བློ་ཐག་ཁོ་བོས་བཅད་མིན་ཡང་། །བགྲོད་འདོད་རི་བོའི་རྐང་པ་གཡོ་བའི་གཤིས། །སྐྱབས་མཆོག་དབང་པོས་བྲེག་དེས་རོ་བཞིན་གྱུར། །དེ་རུ་འདུ་ཤེས་གསུམ་དང་སྒྱིད་ལུགས་ཁུར། །བརྟེན་པའི་རང་གཤིས་ལང་ཚོ་དར་བབ་སྟེ། །ལུགས་གཉིས་འོ་འཛིན་གཞིབ་པའི་ཚུལ་བསྐྱུངས་ནས། །བྲེས་ན་བླང་རྒན་ཉལ་བའི་ངང་ཚུལ་བཟུང་། །དེ་ཚེ་དཎྜིའི་རང་ལུགས་ལྷའི་བརྗོད་པ། །བརྟན་པའི་སྙན་ཚིག་གཏམ་གྱི་སྤྲིང་ཡིག་གིས། །རྟོག་བྲལ་སོ་ལྡན་ཉལ་བའི་གཉིད་སད་ནས། །བརྗོད་འདོད་སྣ་ཞགས་བརྐྱང་འདི་དགོངས་མཛོད་ཀྱི། །འབྱུང་འགྱུར་བསྐལ་བརྒྱའི་ཆར་ཡང་ཚེ་དང་ཆོས། །བརྟན་པའི་ཕུན་ཚོགས་རྡོ་རྗེའི་མདུད་པ་ཅན། །ཁྱོད་གཅིག་ཁོ་ནའི་དཔུང་པའི་རྒྱན་ཉིད་དུ། །བརྟེན་པའི་རྟེན་འབྲེལ་གདུ་བུ་བཞེས་བཞིན་པར། །ཡིད་འོང་གཏམ་གྱི་སྤྲིངས་ཡིག་ལྷའི་ཆུ་བོ། །བརྟན་པའི་
རྒྱུན་བཟང་སྲིད་པའི་མཐའ་གཏུག་ཏུ། །ཡིད་མཐུན་སྐལ་ལྡན་ཤིང་རྟའི་སྐལ་པ་རུ། །ཡང་ཡང་ཛ་ཧུའི་རྒྱུན་བཞིན་འབེབས་པར་རིགས། །དེ་སྐད་བརྩེགས་པའི་རྡུལ་ཕྲན་བགྲངས་ཡས་ཁྱོན། །བརྟན་པའི་གཡུང་དྲུང་རི་བོའི་འདབ་ཞོལ་ནས། །རྣམ་འགྱུར་གཟུགས་ཀྱི་བརྗོད་དོན་སྟོན་བའི་བཟོ། །བག་ཡངས་ཤྲཱི་ཧྲུལ་བོས་བགྱིས་ཏེ་ཕུལ།། ༈ །།མཁའ་སྤྱོད་མངོན་དགའི་ཕོ་བྲང་སྐུ་གསུམ་གྱི་དཀྱིལ་འཁོར། །དྲི་མེད་ཆོས་སྐུའི་བླ་མ་སྟོང་གཟུགས་སུ་མ་བཞུགས། །འཇིགས་མེད་མཁྱེན་གཉིས་སྨྲ་བའི་ཕྱག་རྒྱ་རུ་བཞེངས་ནས། །འཇའ་སྤྲིན་མེ་ཏོག་ཐིག་ལེའི་བྱིན་འོད་ཅིག་ཕོབ་ཤོག །བར་སྣང་འོད་དཀར་ཐིག་ལེ་ཟླུམ་འཁྱིལ་གྱི་གདན་ལ། །འབུམ་ཕྲག་རིག་འཛིན་མཁའ་འགྲོ་གང་ཐབས་སུ་བཞུགས་དང་། །རོ་མཆོག་དངོས་བཤམས་མཆོད་པ་ལོངས་སྤྱོད་ཀྱི་སྐལ་བ། །སྙན་འགྱུར་མགྲིན་པའི་རྫ་རྔ་གཞོན་པ་ངས་བརྡུང་ངོ ། །ཟང་ཐལ་གྲུབ་བརྒྱའི་གཤེགས་ཤུལ་བློ་བྲལ་གྱི་ཕོ་བྲང་། །སྒོམ་མེད་གཟིམ་ལ་ཡུར་བ་རིག་འཛིན་གྱི་ཞབས་དྲུང་། །བྱང་སེམས་མཆེད་ཀྱིས་བསྐོར་བའི་ཚུལ་མཐོང་དེ་སྐྱིད་དོ། །མིག་ཡངས་མཁལ་ལ་བརྩོན་པའི་གླུ་གར་དེ་དྲན་ནོ། །གཞོན་ཆུང་དྷུ་མ་ཐ་ལའི་ལྷ་གྲལ་ན་ཚོགས་དུས། །ཐོར་ཚུག་མུ་ཏིག་དཀར་པོའི་ཟླ་ཚེས་
ཤིག་ཡོད་དེ། །མཚུངས་མེད་རིག་འཛིན་བླ་མའི་ཞབས་དྲུང་དུ་འོང་དུས། །ཨ་མ་བདེ་གསལ་ལྷ་མོའི་སྐར་གསལ་བཏགས་ཡོད། །ལྟོ་སྟོང་རུས་པའི་འཁོར་ལོ་ཟླུམ་པོ་དེ་ཡོད་ན། །དཔའ་བོའི་ལྕང་ལོ་མི་བྲེག་ཟུར་ཕུད་ཅིག་འཆང་སྟེ། །རྒྱན་མེད་རལ་རྫིང་འཐུག་པོའི་འཕྱང་སྡེབ་དེའི་སུན་ནས། །སོར་གསུམ་གཙུག་སྐྲའི་མཆོད་པ་མཁན་སློབ་ལ་ཕུལ་བཏང་། །མཐིང་འོང་ཤུགས་འཆང་ལྷ་མོས་སྐྱོ་གྲོགས་ཤིག་མཛད་ན། །ཡིད་འོང་རྡོ་རྗེའི་གླུ་སྒྲ་མཁའ་ལམ་ནས་བསྒྱུར་དང་། །གཉིས་མཉམ་རེག་བྱའི་སྟོན་མོ་ཡིད་ཡུལ་ན་མེད་ཀྱིས། །ཚངས་སྤྱོད་དགེ་སྦྱོང་གཞོན་ནུའི་བླ་གོས་ལ་མ་རེག །འཛུམ་དྲུག་སྟག་ཤམ་ཐིག་ལེ་སྤངས་བའང་མིན་དེ། །ཚུལ་མཐོང་མཐར་གོས་ཟླུམ་པོའི་སྣམ་ཕྲན་དེ་འགྲིགས་ནས། །ཡིད་འོང་འཛུམ་དཀར་ལྷ་མོའི་བཀའ་བཀྱོན་ལ་མ་བསམ། །ལྕུགས་ཕྲན་སྣལ་མ་སེར་བོའི་སྐ་རགས་ཀྱང་བཅིང་བཏང་། །དབྱིངས་ཕྱུག་དྲིན་ཅན་བླ་མ་གདན་འདྲེན་ལ་བྱོན་ན། །གཞོན་ནུའི་གཡེར་ཁ་དྲ་བའི་འཕྱང་འཕྲུལ་དེ་མ་སྐྱུར། །ཕུ་བོ་མཐའ་རུ་སྟོར་བའི་སྣང་ཤེས་འདིས་སྐྱོ་ནས། །མི་འགྱང་ཛ་ལནྡྷ་རང་འོང་མོས་ཤིག་འདུག་གོ །རྟོག་མེད་རོ་ལ་ཞོན་ནས་བརྟུལ་ཞུགས་ཀྱིས་རྒྱུ་བའི། །དྲན་མེད་ནམ་མཁའི་རྣལ་འབྱོར་དེ་འདྲ་ཞིག་སྙམ་ཏེ། །རོ་མཐོང་ཤི་བའི་གཞོན་པ་རློམ་སེམས་ཀྱིས་ལེན་པའི། །ལས་ངན་ཟོག་པོའི་
གྲལ་དུ་ལྷུང་ལ་ཁད་བྱུང་ངོ ། །ཐེག་གསུམ་སྐྱ་བ་འཛིན་པའི་གྲུ་གཟིངས་ཤིག་བཅས་ནས། །མ་རྒན་ནོར་བུའི་གླིང་དུ་ཁྲིད་སྣང་ཞིག་ཤར་སྟེ། །ཕ་རྒན་མདའ་རྒྱག་རྒྱལ་པོའི་བརྟུལ་ཞུགས་དེ་མིན་ན། །གཞོན་ནུ་བུ་ཆུང་ཙམ་ནས་ཆུ་རླབས་ཀྱིས་ཕྱག་སོང་། །བུ་སྐྱེས་ལང་ཚོ་མ་སྨིན་གོམ་འགྲོས་ཀྱང་འཁྱོལ་ལོ། །བསླབ་བསླབ་སྨྲ་ལྕེ་བདེ་ཡང་སེམས་ཤེད་ནི་མ་རྫོགས། །བསྡུ་བཞིའི་ཁྱིམ་སོ་ཟིན་པ་ད་དུང་ནི་མེད་ཀྱིས། །ཁྱེའུ་ཆུང་སྣང་བ་དམ་པ་བརྩེ་གྲོགས་ལ་ཕེབས་ཤོག །བརྟུལ་ཞུགས་སྟོད་ཤ་རྒྱས་པའི་ལུས་བང་ཞིག་ཐོབ་ན། །མེས་པོའི་ཚངས་སྐུད་རལ་བའི་དོ་ཤལ་དེ་དཀྲིས་ནས། །ཚངས་ཆེན་ཤི་བའི་ལུས་ལ་གྲོང་འཇུག་ཞིག་སྙམ་སྟེ། །གཞོན་ནུའི་ཚུལ་ལ་དཔག་ན་ཡིད་སྨོན་ལས་མི་འདུག །ཀུན་མཉམ་ཟླུམ་པའི་མལ་ན་བཞད་གད་ཞིག་ནུས་ཀྱང་། །ལས་ངན་ཨ་མས་བསྣུན་པའི་ཁའོ་དེ་ཙར་རེ། །གདུང་གླུ་ལག་པ་གཡོ་བའི་བསམ་བློ་ཞིག་ཡོད་ཀྱི། །ཐུགས་རྗེའི་ཕྱག་ཡངས་རྐྱོངས་ཤོག་བརྒྱུད་གསུམ་གྱི་བླ་མ། །སྔོན་བཞུགས་དུར་ཁྲོད་གནས་ནས་གདན་འདྲེན་གྱི་གླིང་བུས། །ལྟ་བསྒོམ་གཤོག་ཡངས་འགེབས་པའི་རྒོད་པོ་འདི་མ་འབོད། །བག་ཡངས་ཉི་དྲོད་སྐྱོང་བའི་བྲག་ཚང་འདི་སྟོང་ན། །ཤེས་མེད་འཐུམ་པོར་ཉལ་བའི་སྒོང་རློན་ངས་ཅི་བྱེད། །བུ་ཆུང་སྣང་ཤེས་མྱོས་པའི་སྐྱོ་
གླུ་ཞིག་ཡོད་དེ། །དགའ་སྟོན་ཚོགས་གླུ་ལེན་ཕྱིར་དེ་རིང་ནི་མི་ཟེར། །ཀྱི་ཧུད་ཤུགས་ཀྱིས་ཤོར་ནས་སྙན་རྒྱུ་ཞིག་མེད་པས། །འབྱུང་འགྱུར་ལེགས་སྨོན་ཞུ་ན་མཐུན་གྱུར་དེ་གནང་ཤོག །སྐྱིད་པོ་ལྷ་ཡུལ་ལགས་མོད་མེ་ཏོག་གི་དོ་ར། །བརྒྱུད་གསུམ་གླེང་གཞི་འབྱུང་བ་གསང་འཛིན་གྱི་ཕོ་བྲང་། །དགེ་བཅུའི་ཐེམ་སྐས་བཙུག་ན་ཐག་རིང་ཞིག་མ་རེད། །ལམ་མཁན་དེད་དཔོན་གསུང་གིས་བསུ་མ་ཞིག་ཕེབས་འོང་། །མཐོན་པོ་མཁའ་སྤྱོད་ལགས་མོད་རིག་འཛིན་གྱི་བཞུགས་གྲལ། །དམ་ཚིག་གཤོག་རྩལ་རྒྱས་ལ་རིང་རྒྱུ་ཞིག་མི་སྣང་། །བསྲུང་སྡོམ་མི་ཚེ་བསྐྱང་ནས་དུས་འདའ་ཞིག་བྱུང་ན། །མི་འབྲལ་ཚོམ་བུ་གཅིག་ཏུ་བྱ་ཁྱུ་བཞིན་འཕུར་འགྲོ། །མཛེས་པ་འཇའ་སྐུ་ལགས་མོད་ཐེག་རྒྱལ་གྱི་ཁྱད་ཆོས། །ལྟ་བསྒོམ་བརྩོན་འགྲུས་ནུས་ལ་དཀའ་རྒྱུ་ཞིག་མ་རེད། །ཚེ་དང་བསྒྲུབ་པ་མཉམ་པའི་རྟེན་འབྲེལ་ཞིག་འགྲིགས་ན། །སྐལ་ལྡན་དབང་གཞུ་བཞིན་ཏུ་མཁའ་ལམ་ལ་ཤར་འོང་། །དགའ་སྟོན་ཚོགས་འཁོར་ལགས་མོད་བརྟུལ་ཞུགས་ཀྱི་སྤྱོད་པ། །སེམས་རིག་ལ་ཤན་འབྱེད་ལ་དཀའ་རྒྱུ་ཞིག་མ་རེད། །དུར་ཁྲོད་རོ་ཁང་རྔམས་པ་མཁའ་འགྲོ་ཡི་ཚོགས་གྲལ། །ཞེན་མེད་གཡེལ་ཁ་ཁྲོ་ལེ་སྨྱོན་པ་ངས་འགྲིམ་འགྲོ།། །།
མཐོན་མཐིང་ཟུར་ཕུད་ལྔ་པའི་དཀྱིལ་འཁོར། །ཡོངས་རྫོགས་རྒྱལ་བའི་ངོ་བོར་ངོམ་པའི། །ཨ་བུའི་སྐྱབས་གཅིག་འཇམ་དཔལ་དཔའ་བོས། །ཁྱོད་ལ་ཤིས་པའི་མེ་ཏོག་སྩོལ་ཅིག །དང་པོ་འཕྲད་ནས་ད་ལྟའི་བར་དུ། །བརྩེ་བས་འགྲོགས་པ་ཁྱོད་གསུངས་བདེན་ཀྱང་། །སྐྱོ་རྒྱུ་ཅི་ཡོད་འདུས་མཐའ་བྲལ་བ། །འདུས་བྱས་རང་མཚན་ཡིན་པ་ལོས་དགོངས། །དུག་ལྔའི་རང་གཟུགས་ཨ་བུ་ཧྲལ་པོའི། །ཞལ་ཚབས་ཁམས་གསུམ་འཁོར་བའི་རྒྱུད་ན། །མེ་བཞིན་འབར་ཞིང་ཆུ་བཞིན་ཁོལ་སྟེ། །ཁྱོད་ལ་མེད་ན་ངོ་མཚར་ཆེའོ། །གྲུབ་པའི་ཉམས་རྩལ་དོ་ཧའི་གླུ་དང་། །ཟོག་པོའི་བསླུ་ཚིག་རྐང་ཆགས་ཚིགས་བཅད། །མགུར་མར་འདོད་ཀྱང་ཐ་མར་འགྲོ་ལ། །དེ་འདྲ་ཡོད་དོན་གཉིས་ཀ་མེད་དོ། །དེས་ན་ཆོས་མེད་ཨ་བུ་ཧྲལ་བོ། །མཁས་པའི་གཞུང་ལ་སྦྱངས་པ་ཡོད་ཀྱང་། །གྲུབ་པའི་ཉམས་ལ་འདྲིས་ཆ་མེད་པས། །ཉམས་རྩལ་མགུར་མ་ཅི་ལྟར་འཐེན་ལགས། །ཟང་ཟིང་ནོར་ལ་ཆགས་སྲེད་ཆེ་ཡང་། །ཟས་གོས་འཚོ་བས་ཕོངས་པ་མེད་ཅིང་། །ལྟ་སྣང་བཀུར་སྟིས་སྣང་བ་སུན་པས། །ཟོག་པོའི་རྫུན་ཚིག་སྨྲ་འདོད་མེད་དོ། །ཆོས་བཞིན་སྨྲས་ན་རང་མཚང་འབྲུ་འདྲ། །ཆོས་མིན་སྨྲས་ན་ཉེས་པ་ཆེ་བས། །རྗོད་བྱེད་ཚིག་ལ་ང་རང་མཁས་ཀྱང་། །
བརྗོད་བྱའི་དོན་གྱིས་ཕོངས་ནས་འདུག་གོ །དེ་སླད་ཚིག་དང་དོན་དུ་མཐུན་པའི། །གཏམ་ཞིག་སྨྲ་རྒྱུའི་སྐལ་བ་དབུལ་ཡང་། །ཁྱེད་གསུང་མི་གཅོག་རྩེད་མོའི་ཕྱིར་དུ། །ཆོས་དང་མཐུན་པའི་ཁ་གཡང་འབོད་དོ། །ཡར་ལ་གཟིགས་དང་ལྷ་ལམ་དཀྱིལ་འཁོར། །ཉིན་བྱེད་སྣང་བས་ཡོངས་སུ་བསྐོར་ཏེ། །ནུབ་རིའི་ཕང་ན་རང་ལམ་གཉེར་བ། །དོན་གྲུབ་མགྲོན་པོ་ཁྱེད་དང་འདྲའོ། །མར་ལ་གཟིགས་དང་ཆུ་ཤིང་རང་ལོག །ཀུན་ལས་དམན་སར་རོ་ཉལ་ཆེ་བས། །ཡལ་འདབ་ཁོང་སྙིང་ས་ལ་རུལ་བ། །ཉལ་སྲེད་ཁོང་རུལ་ང་དང་འདྲའོ། །ཡིད་འོང་རྐང་དྲུག་གླུ་སྒྲ་ལེན་བཞིན། །གེ་སར་ཟིལ་མངར་འཐུང་ནས་འགྲོ་བ། །ཡང་དག་པད་ལྗོན་བླ་མའི་དྲུང་ནས། །ཆོས་དོན་ལེན་པ་ཁྱེད་དང་འདྲའོ། །ཡིད་འོང་མཚོ་སྐྱེས་འདབ་མའི་གཡུར་ལ། །ཡུན་རིང་འགྲོགས་པའི་སྦལ་པ་རྒན་པོ། །རྩི་བཅུད་གཞིབ་པའི་ཡིག་བྲལ་བ། །ཆོས་མེད་འདིར་གནས་ང་དང་འདྲའོ། །དམ་ཆོས་ཚོལ་བའི་འདུན་པས་བསྐུལ་བས། །བཤེས་གཉེན་ཚོལ་བའི་དཀའ་བས་ངལ་བ། །དམ་པ་མཐོང་ནས་རབ་དགའ་ཞི་བ། །ཁྱེད་གཅིག་མཁས་པ་ནོར་བཟང་འདྲའོ། །མཚུངས་མེད་བླ་མའི་ཞལ་གསུང་བདུད་རྩི། །གང་ཞིག་གནང་བ་སྙིང་ལ་བཅག་ནས། །དབེན་པའི་གནས་སུ་མངོན་དུ་མཛོད་དང་། །ཁྱེད་ཀྱང་རྗེ་དང་
མཚུངས་པར་འགྱུར་རོ། །རྒྱལ་བའི་ལམ་བཟང་ཡོངས་སུ་རྫོགས་པའི། །ལམ་དེ་བྱང་ཆུབ་སེམས་མཆོག་ལགས་ཀྱིས། །སེམས་མཆོག་འདི་ལ་བརྩོན་པར་མཛོད་དང་། །ཁྱེད་ཀྱང་མི་རིང་རྒྱལ་བར་འགྱུར་རོ། །ལམ་ཀུན་ཉེ་ལམ་རྫོགས་པ་ཆེན་པོ། །ཀ་དག་ལྷུན་གྲུབ་ཟུང་དུ་འཇུག་པའི། །ལམ་དེར་བརྩོན་པ་གནད་དུ་བསྣུན་དང་། །གྲོགས་ཁྱེད་ཚེ་འདིར་གཏན་སྲིད་ཟིན་ནོ། །ངན་སྤྱོད་སྣ་དགུ་བྱུང་རྒྱལ་སྤྱོད་པའི། །ང་དང་ང་འདྲའི་སྤྱོད་ཚུལ་ལྟོས་ལ། །བག་མེད་གནས་དེར་དུག་བཞིན་འཛེམས་དང་། །གྲོགས་ཁྱེད་འཕྲལ་དུ་དམ་པར་འགྱུར་རོ། །འདོད་དགུའི་འབྱུང་གནས་ཡིད་བཞིན་ནོར་བུ། །མཚུངས་མེད་བླ་མ་སྤྱི་བོར་སྒོམ་ལ། །མོས་གུས་གདུང་བས་གསོལ་བ་ཐོབ་དང་། །གྲོགས་ཁྱེད་བསམ་དོན་ཆོས་བཞིན་འགྲུབ་བོ། །ནམ་ཡང་མི་བསླུ་སྐྱབས་གནས་དཀོན་མཆོག །ཡིད་ཆེས་གཅིག་པུས་བློ་གཏད་ཆོས་ལ། །བརྗེད་པ་མེད་པའི་སྐྱབས་འགྲོ་འབུང་དང་། །གྲོགས་ཁྱེད་འགལ་རྐྱེན་གཡུལ་ལས་རྒྱལ་ལོ། །བསླུ་བྲིད་ཟོག་པོའི་རྒྱལ་ཁམས་གང་ལ། །མ་བསྟོད་མ་སྨད་རྗེས་སུ་མ་འབྲང་། །འབྲེལ་བ་ཆོད་ལ་རང་ཚུག་ཟུང་དང་། །གྲོགས་ཁྱེད་ཡང་དག་ལམ་དུ་འགྲོའོ། །གྲོགས་མཆོག་གསོན་དང་མཐའ་མཁོབ་ཡུལ་ན། །ཡིད་བཞིན་ནོར་མཆོག་ཁྱེད་ཀྱི་
རིགས་བདག །སྤྲུལ་པའི་སྐུ་དེ་ཁོ་ན་ལགས་ཀྱིས། །དེ་ལས་གཞན་པའི་བློ་གཏད་སུ་དགོས། །འབྱོར་ཡང་ཟང་ཟིང་ཆགས་སྲེད་བྲལ་ལ། །ཤེས་ཀྱང་ཁ་བཤད་འུར་རྒོག་མི་མཛད། །མགུ་ཡང་ཟོག་པོའི་རང་མཐོང་སྤང་བའི། །ཁོང་གི་རྣམ་ཐར་དེ་འདྲ་དཀའ་འོ། །ད་ལྟའི་དུས་སུ་སྙིགས་མའི་སྐྱེ་བོ། །དམ་པར་རློམ་ཡང་ཟླ་རེའི་ཡུན་ལ། །སྤྱོད་པ་མི་རྟག་འཕྲལ་ལ་འགྱུར་བའི། །བྱ་སྤྱོད་སྣ་དགུའི་སྤྱོད་ལ་གཟིགས་དང་། །དབེན་པའི་གནས་སུ་སྒྲུབ་ཚུག་ཟིན་ཀྱང་། །མི་ཆོས་བླ་མའི་རྫུན་ཟོལ་མེད་པའི། །དམ་པའི་མཛད་བཟང་དེ་དང་དེ་འདྲ། །སྤྱི་བོས་བཏུད་དེ་གུས་ཕྱག་འཚལ་ལོ། །ཁྱེད་ཀྱང་དམ་པ་དེ་རྗེས་སློབ་དང་། །ཙནྡན་ནགས་སུ་སཱ་ལའི་ཤིང་བཞིན། །ཡོན་ཏན་དྲི་བཟང་ཤུགས་ཀྱིས་འགོས་ནས། །དམ་པའི་ཡོན་ཏན་ལྡན་པར་འགྱུར་རོ། །ཕུན་ཚོགས་ལེགས་བྱས་གནས་ལས་བརྩམ་པའི། །ལེགས་བཤད་གཏམ་འདིའི་ཁྱེད་ཐུགས་དགྱེས་ནས། །སྐྱོ་བའི་བློ་སྣ་ཡུད་ལ་སངས་ཏེ། །རབ་དགའི་དཔལ་ལ་སྤྱོད་པར་ཤོག་ཅིག །རྒྱལ་ཀུན་ཡབ་གཅིག་གཞོན་ནུའི་སྐུ་ཅན། །མཁྱེན་པའི་ལྷ་དེའི་བྱིན་རླབས་འོད་སྣང་། །ཁྱོད་བློའི་ཐོས་བསམ་གྲོགས་སུ་གྱུར་པའི། །བཀྲ་ཤིས་མཆོག་དེས་གཏན་དུ་དགེའོ། །མིག་མི་འཛུམ་པ་སྙིང་རྗེའི་མངའ་བདག །རྒྱལ་བའི་སྲས་དེའི་བྱིན་རླབས་
སྦྲང་ཆར། །ཁྱོད་བློའི་བྱང་ཆུབ་སེམས་མཆོག་བསྐྱེད་པའི། །བཀྲ་ཤིས་གཉིས་པ་དེ་ཡང་དགེའོ། །གསང་བའི་བདག་པོ་རྒྱལ་བའི་གདུང་འཛིན། །ཁྱོད་ལ་གསང་སྔགས་ལམ་བཟང་སྟོན་ཅིང་། །ཁྱོད་བློ་བར་ཆད་གཡུལ་ལས་རྒྱལ་བའི། །བཀྲ་ཤིས་གསུམ་པ་དེ་ཡང་དགེའོ།། །དགེའོ་ཡུན་དུ་དགེའོ་གྲོགས་ཁྱེད། །ཚེ་དང་དམ་པའི་ཆོས་སྤྱོད་སྙོམས་ཤིག །སྲིད་དང་བྱང་ཆུབ་སེམས་མཆོག་འགྲོགས་པས། །ཐོག་མཐའ་བར་གསུམ་ཀུན་ཏུ་དགེའོ། །དགེའོ། །དགེའོ། །དགེའོ། །ཚ་ཁ་བ་འོད་གསལ་ལ་གདམས་པའོ།། ༈ །།ན་མོ་གུ་རུ་ལོ་ཀཱི་ཤྭ་ར་ཡ། །རྒྱལ་དབང་སྙིང་རྗེའི་རང་གཟུགས་སྤྱན་རས་གཟིགས། །ལྗོང་འདིས་འགྲོ་ལ་ལྷག་པར་ཐུགས་བརྩེ་བས། །མཚུངས་བྲལ་དགེ་བའི་བཤེས་ཀྱི་ཚུལ་བཟུང་བ། །ཁྱབ་བདག་འཇིགས་མེད་རྒྱལ་བའི་མྱུ་གུ་དེས། །ཚེ་རབ་ཀུན་ཏུ་འདུ་འབྲལ་མེད་པར་སྐྱོངས། །དེང་སང་དུས་ངན་སྙིགས་མ་ལྔ་བདོ་ལ། །སྐྱེ་བོ་ཕལ་ཆེར་བདུད་ཀྱི་ལྕགས་ཀྱུས་ཟིན། །དགེ་བའི་བཤེས་གཉེན་ཀུན་ལ་དགྲ་བཞིན་སྡང་། །ཆོས་བཞིན་སྤྱོད་པ་རྣམས་ལ་ལྷག་པར་གཤེ། །ལེགས་བཤད་དམ་པའི་གཏམ་ལ་ཞེན་པ་ལོག །དམ་ཆོས་འདུལ་བ་ཐོས་ཚེ་སེམས་ཁོང་འཁྲུགས། །རབ་ཏུ་
བྱུང་བའི་རྟགས་ལ་ཐན་ཏུ་ལྟ། །སྡེ་སྣོད་གསུམ་གྱིས་བསྟན་ལ་གནོད་ཆེས་གླེང་། །བཤད་དང་བསྒྲུབ་པས་ལྷ་སྲུང་ཁྲོས་སོ་ཟེར། །ཚད་མས་གྲུབ་པའི་བསྟན་འཛིན་བདུད་དུ་འཛིན། །སྔ་འགྱུར་བཀའ་དང་གཏེར་རྙིང་རྒྱབ་ཏུ་དོར། །ཟོག་པོ་ཕལ་ཆེར་གཙུག་གི་ནོར་ལྟར་མཆོད། །འབྱུང་པོས་བརླམ་པའི་ཆོས་ལ་ལྷག་པར་གུས། །དམ་སྡོམ་འཆོར་ལ་གྲུབ་ཐོབ་སྤྱོད་པ་ཟེར། །བྱི་པོ་བྱེད་ལ་གཏེར་ཡུམ་འཚོལ་བར་བརྗོད། །ཆགས་སྡང་བྱེད་ལ་རྟེན་འབྲེལ་འཆུགས་སོ་སྐད། །བླུན་རྨོངས་འགའ་ཞིག་དེ་ཉིད་བདེན་པར་བརྩི། །ངན་སྤྱོད་མཁན་རྣམས་གཅིག་རྒྱབ་གཅིག་གིས་སྐྱོར། །བན་བཙུན་སྡོམ་ཉམས་ཐམས་ཅད་ངོ་སོ་མཐོ། །རྒྱལ་བའི་བསྟན་པ་འཛིན་རྣམས་དབུ་འཕང་སྨད། །དགེ་འདུན་འདུས་པའི་གཙུག་ལག་ཁང་དག་ཏུ། །སྐྲ་ཡག་གོས་མཛེས་བན་ཧོར་དམུ་རྒོད་རྣམས། །འདུས་ནས་དམག་དང་བུད་མེད་ཚོང་གི་གཏམ། །འུར་སྒྲོགས་ཧབ་བགད་ཤེད་ངོམ་སྦང་འཛིང་བྱེད། །བསྐྱེད་རྫོགས་ཕར་ཞོག་མ་ཎི་རྡོག་པོ་གཅིག །མེད་པར་གཤིན་གསོན་རྫས་ལ་ཧབ་ཤ་བྱེད། །ཉིན་མོ་སེར་གོས་གྱོན་ནས་དཀོར་ལ་ཟ། །མཚན་མོ་ཆང་འཐུང་བུད་མེད་སྟེང་དུ་རྩོད། །ངན་སྤྱོད་སྣ་དགུ་བྱེད་གྱིན་ངོ་སོ་མཐོ། །ད་དུང་ཨུ་འུས་བསྟན་པ་དར་ཞེས་གླེང་། །ངོ་ཚ་མི་ཤེས་
པ་གླང་མི་ཐོད་ཅན། །འདི་མཐོང་སྐྱོ་བ་མི་འཕེལ་སེམས་ལྡན་སུ། །བསྟན་འཛིན་སྐྱེས་བུའི་སྐུ་ཚེར་བར་ཆད་ལྡང་། །ཆོས་འདོད་རྣམས་ཀྱང་གཞན་ཡུལ་འགྲོ་བར་བྱེད། །འཆི་ཆོས་བྱེད་རྣམས་བས་མཐའི་གནས་ལ་སྤྲོ། །རང་རྒྱུད་འདུལ་རྣམས་འདུན་མ་སེམས་ལ་གླེང་། །བསྟན་འགྲོར་སེམས་རྣམས་ཤུགས་རིང་ནར་ནར་འབྱིན། །བསམ་ཞིང་བསམ་ན་སྐྱོ་བ་ཁོང་ནས་འཕེལ། །བསམ་ཞིང་བསམ་ན་རྩོད་ལྡན་འགྲོ་བ་ལགས། །བསམ་ཞིང་བསམ་ན་ཐུབ་པའི་བསྟན་ཞབས་བསྡུས། །བསམ་ཞིང་བསམ་ན་སྙིགས་མའི་རང་མཚན་དུས། །ཀྱེ་མ་ཀྱེ་ཧུད་ཀུན་མཁྱེན་་ཏོག །གདུལ་དཀའི་འགྲོ་བ་འདུལ་བའི་སྙིང་སྟོབས་ལ། །དཔའ་ཆེན་དུ་མའི་ནང་ནས་པད་དཀར་ལྟར། །བསྔགས་པའི་རྔ་ཆེན་བསྒྲགས་དེ་ཁྱོད་མིན་ནམ། །གསེར་ཐུབ་མགོན་གྱི་བསྟན་པའི་ཉི་མ་གཟིམ། །མི་ཕམ་དུང་གི་ཟླ་བ་ཚེས་མ་གྱུར། །སྐབས་འདིར་མགོན་པོ་ཁྱོད་ཀྱང་ཞིར་བཞུགས་ན། །རྨོངས་པ་འདི་ཀུན་སུ་ཡིས་སྐྱོབས་པ་ལགས། །ཚུལ་ཁྲིམས་རྐང་ཆགས་ཤེས་རབ་འདྲེན་བྱེད་ལྡོང་། །ཐར་པའི་སྲོག་ལ་རྒོལ་བའི་མདའ་ལྔ་ཡིས། །དཔུང་གིས་བསྐོར་ཚེ་ལུས་ཅན་བདག་ཅག་ལ། །སྐྱོབས་པ་མཛད་སླད་ཁྱོད་བརྩོན་མི་བགྱིད་ན། །བྱམས་པའི་གོ་ཆ་སྙིང་རྗེའི་ཡ་
ལད་དང་། །ཤེས་རབ་རལ་གྲི་ཚོགས་གཉིས་དཔུང་གི་གཡུལ། །གྲངས་མེད་གསུམ་གྱི་གོང་ནས་བཤམས་བཤམས་པ། །དེ་ལ་དགོས་པ་ཅི་ཞིག་བདོག་པར་དགོངས། །ཁྱོད་ཀྱི་བྱ་རྒོད་སྤུངས་བའི་རི་བོ་ལ། །ལྷ་དང་བཅས་པའི་འགྲོ་འདི་ཟིལ་མནན་ཏེ། །ཞི་བསིལ་ཚངས་པའི་འཁོར་ལོ་བསྐོར་བའི་ཚེ། །མགོན་པོ་ཁྱོད་ཉིད་དབང་དུ་བཙུགས་ནས་སུ། །ལྔ་བརྒྱའི་ཐ་མལ་དགེ་བའི་བཤེས་བགྱིད་ནས། །མདོ་སྡེ་རིན་ཆེན་འཛིན་པར་བགྱིའོ་ཞེས། །སེང་གེ་ལྟ་བུའི་སྒྲ་ཆེན་སྒྲོག་བྱེད་པའི། །རྒྱལ་སྲས་དེ་རྣམས་ད་ལྟ་གང་ན་བཞུགས། །དེང་སང་དུས་ཀྱི་འགྲོ་འདི་མི་དགོངས་ཤིང་། །བསྟན་པ་རིན་ཆེན་མཛོད་འདི་མི་བསྲུང་ན། །ཀུན་མཁྱེན་ཁྱོད་ཀྱི་ནང་གི་ཆོས་མཛོད་ལ། །དབང་བའི་སྲས་ཀྱི་བྱ་བ་བྱས་ལགས་སམ། །རྗེ་བཙུན་མཁྱེན་པའི་གཏེར་དང་འཇིག་རྟེན་དབང་། །གསང་བའི་བདག་པོ་ཞེས་གྲགས་དཔའ་ཆེན་རྣམས། །ད་དུང་ཆོས་རྒྱལ་པཎ་གྲུབ་རྣམ་རོལ་གྱིས། །ཞིང་འདིས་འགྲོ་བ་སྐྱོང་བར་མི་བགྱིད་ན། །ཐུབ་པའི་དབང་པོས་འགྲོ་འདི་དུས་རིང་ནས། །བཟུང་བའི་ཕྲིན་ལས་ལྷག་མ་ཁྱེད་རྣམས་ལ། །གཞོན་ནུའི་དཔེ་དང་བཅས་པས་ཡོངས་གཏད་པ། །གྲགས་པ་ཙམ་དུ་བས་པར་མི་འགྱུར་གྲང་། །ཀྱེ་མ་ཀྱེ་ཧུད་དཀོན་མཆོག་ཐུགས་རྗེ་ཅན། །རྒྱལ་བའི་རྒྱལ་
ཚབས་སློབ་མར་བཅས་པ་རྣམས། །སྙིགས་མའི་འགྲོ་ལ་ལྷག་པར་བརྩེ་བར་མཛོད། །བསྟན་པ་རིན་ཆེན་གསལ་བར་མཛད་དུ་གསོལ། །རྒྱལ་བའི་སྤྱན་སྔར་བསྟན་པའི་མཛོད་སྐྱོང་ཤིང་། །སྐལ་ལྡན་རྗེས་བཟུང་བསྟན་བཤིག་ཚར་གཅོད་པར། །དབྱར་དམ་རང་གིས་བཅས་པའི་ཚངས་པ་དང་། །བརྒྱ་བྱིན་རྒྱལ་ཆེན་སྡེ་བཞི་བྲན་འཁོར་བཅས། །ཁྱེད་ཅག་སྔོན་གྱི་ཐ་ཚིག་བརྗེད་དམ་ཅི། །བརྗེད་ན་བདག་གིས་བསྐུལ་བའི་ཚིག་འདི་གསོན། །མ་བརྗེད་རང་གི་དམ་བཅའ་ཇི་བཞིན་གྱིས། །ཕྲིན་ལས་སྐྱོང་བའི་དུས་ནི་འདི་ཡིན་ནོ། །རྒྱལ་བསྟན་ཕྱོགས་ཀུན་གསལ་བའི་བཀྲ་ཤིས་ཞུ།། ༈ །།ན་མོ་གུ་རུ། །བསྐལ་མང་གོང་ནས་གཡོ་སྒྱུ་སྤངས་པའི་ཐུགས། །བཅོས་མའི་ཚུལ་སྤངས་དྲང་ཞིང་བདེན་པའི་གསུངས། །ཚུལ་འཆོས་མི་མངའ་ཚུལ་དང་མཐུན་པའི་སྐུ། །ཐུབ་པ་དྲང་སྲོང་ཆེན་པོ་ལ་ཕྱག་འཚལ། །ཐུབ་པ་དེ་སྲས་བདེན་པའི་དོན་གཟིགས་པའི། །བདེན་གསུངས་མངའ་བ་བདེན་ཚིག་གྲུབ་པའི་ཚོགས། །ཐེག་པ་གསུམ་གྱི་ཐར་བའི་ལམ་ཞུགས་པ། །དེ་དག་ཀུན་ལ་གུས་པས་ཕྱག་འཚལ་ལོ། །བདག་ནི་དེང་ནས་སྐྱེ་དང་ཚེ་རབས་སུ། །རྒྱལ་བ་སྲས་བཅས་ཁྱེད་དང་མི་འབྲལ་ཞིང་། །རྒྱལ་བ་སྲས་བཅས་
ཁྱེད་ཀྱིས་རྗེས་བཟུང་ནས། །རྒྱལ་བ་སྲས་བཅས་ཁྱེད་བཞིན་འགྲུབ་པར་ཤོག །ལུས་སྤྱོད་ཚུལ་འཆོས་མེད་པར་དུལ་བ་དང་། །ངག་ཚིག་རྫུན་གཏམ་མེད་པར་བདེན་པ་དང་། །སེམས་སྤྱོད་གཡོ་སྒྱུ་མེད་པར་དྲང་བ་ཡིས། །ཆོས་མཐུན་གྲོགས་དང་བཤེས་གཉེན་བསྟེན་པར་ཤོག །ཐར་བའི་ལམ་ལ་དང་པོ་འཇུག་པའི་སྒོ། །འཁོར་བའི་གནས་ནས་དང་པོར་བྲོས་པའི་ལམ། །ཉམས་ལན་ཆོས་རྣམས་ཀུན་གྱི་དང་པོའི་འགོ །བཅོས་མེད་ངེས་འབྱུང་རྒྱུད་ལ་སྐྱེ་བར་ཤོག །ཡོད་ན་སངས་རྒྱས་སྒྲུབ་ལ་དེས་ཆོག་ཅིང་། །མེད་ན་སངས་རྒྱས་སྒྲུབ་ལ་ཐབས་ཆགས་པ། །སངས་རྒྱས་འགྲུབ་བའི་ས་བོན་མ་ནོར་བ། །རྣམ་དག་བྱང་ཆུབ་སེམས་མཆོག་བསྐྱེད་པར་ཤོག །གོང་ནས་གོང་དུ་བྱང་ཆུབ་སེམས་མཆོག་འཕེལ། །ཚེ་རབས་ཀུན་ཏུ་བྱང་ཆུབ་སེམས་མི་བརྗེད། །ཡང་དང་ཡང་དུ་བྱང་ཆུབ་སེམས་བསྒོམ་ནས། །བྱང་ཆུབ་སེམས་དཔའི་སྤྱོད་ལ་འཇུག་པར་ཤོག །ཐུབ་པ་མཆོག་དང་འཇམ་དཔལ་དཔའ་བོ་དང་། །ཀུན་ཏུ་བཟང་པོའི་སྤྱོད་པ་གང་ཡིན་པ། །བདག་གི་ཚེ་རབས་སྤྱོད་ཀུན་དེ་འདྲ་བར། །གྱུར་ནས་དོན་གཉིས་སྤྱོད་པ་ལྷུན་གྲུབ་ཤོག །ཚེ་གཅིག་སངས་རྒྱས་སྒྲུབ་པའི་ལམ་བཟང་ཅན། །དུས་གཅིག་དོན་གཉིས་སྒྲུབ་པའི་ཐབས་མཁས་པོ། །ཚུལ་
གཅིག་འཁོར་འདས་དབྱེར་མེད་ལྟ་བ་ཡིས། །ལམ་གཅིག་རྡོ་རྗེ་ཐེག་པར་འཇུག་པར་ཤོག །ལམ་འདིའི་ལམ་སྒོམ་རྡོ་རྗེ་འཛིན་པའི་ཚོགས། །ཀུན་ལ་བདེ་སྟོང་བསྐྱེད་པའི་གྲོགས་བགྱིད་ཅིང་། །ལྷན་ཅིག་སྐྱེས་པ་མཚོན་པའི་སྒོར་གྱུར་པའི། །ལམ་གཅིག་མཁའ་འགྲོའི་གླིང་དུ་རོལ་བར་ཤོག །བཅོས་མ་སྤང་བའི་སེམས་ཉིད་གཉུག་མའི་ཞལ། །བཅོས་མ་མིན་པར་རང་ངོ་རྗེན་པར་མཐོང་། །བཅོས་བསླད་བྲལ་བའི་མཉམ་གཞག་རྒྱུན་བསྐྱངས་ཏེ། །བཅོས་མེད་དོན་གྱི་འབྲས་བུ་ཐོབ་པར་ཤོག །གནས་སྐབས་སུ་ཡང་བསམ་པའི་དོན་ཀུན་འགྲུབ། །གསོན་པའི་ཚེ་ན་བསམ་པ་ངན་པ་མེད། །འཆི་བའི་ཚེ་ན་གནད་གཅོད་སྡུག་བསྔལ་མེད། །ཤི་ནས་འཁྲུལ་སྣང་འཇིགས་སྐྲག་མེད་པར་ཤོག །བདག་མཐོང་ཐོས་དང་དྲན་རེག་འགྲོ་བ་ཀུན། །ངེས་འབྱུང་བྱང་ཆུབ་སེམས་དང་ལྷན་ཅིག་སྐྱེས། །ཇི་ལྟར་རིག་པ་ཇི་བཞིན་རྒྱུད་སྐྱེས་ནས། །མྱུར་ཏུ་རྫོགས་པའི་སངས་རྒྱས་ཐོབ་པར་ཤོག །སངས་རྒྱས་ཉི་མ་མཚན་དཔེའི་ཞལ་མཐོང་ཞིང་། །དམ་ཆོས་ཉི་མ་སྙིང་གི་བདུད་རྩིར་སྤྱོད། །དགེ་འདུན་ཉི་མ་ཐར་པའི་གྲོགས་གྱུར་ནས། །མཆོག་གསུམ་ཉི་མའི་འོད་དང་མི་འབྲལ་ཤོག །སྒྲུབ་པ་པོ་ཉི་མའི་ཐུགས་བཞེད་བཞིན་བཙུན་གཟུགས་དཔལ་དགེས་བྲིས་པའོ། །དགེའོ། །དགེའོ། །དགེའོ།། །།
དུས་དང་གནས་སྐབས་ཐམས་ཅད་དུ་རང་རྒྱུད་ལ་འཕྲལ་འཕྲལ་དུ་བརྟགས་དཔྱད་བྱས་ནས། །སེམས་ལ་དགེ་མི་དགེའི་རྣམ་རྟོག་གང་སྐྱེས་ངོས་ཟིན་པར་བྱས་ཏེ་མི་དགེ་བ་རེ་སྐྱེས་ན་དེ་མ་ཐག་ཏུ་ཉེས་དམིགས་ལ་བསམ་ནས་གདོང་བཟློག་གལ་ཆེ་མ་གཏོགས། །འདོད་སོགས་ཉོན་མོངས་པ་རེ་སྐྱེ་ཉེས་ཀྱིས། །དེ་སྒྲུབ་བཞག་ན་ཚེ་མཇུག་འདི་ལ་ལས་མཐའ་ཅི་འགྱུར་གོ་དཀའ། །མཁས་པ་ཆེན་པོ་རེའི་གོས་མ་ཐོབ་ཀྱང་། དཀོན་མཆོག་གསུམ་ལ་དད་པ་བརྟན་པོ་དང་། །གཞན་ལ་བསམ་པ་བཟང་པོ་རེ་རྒྱུད་ལ་ཨེ་སྐྱེ་ལྟོས། །ཚེ་འདི་བས་ཕྱི་མ་ཡུན་རིང་བ་ཡིན་པས། །ཚེ་འདིའི་ཆེ་འདོད་གྲགས་འདོད་སོགས་སྒྲུབ་ནས་ཕྱི་མ་རྐྱང་དུ་མ་བོར། །འདུན་མ་གཏན་ལེགས་གཏན་ཉེས་ཚེ་མཇུག་འདི་ལ་ཐུག་ཡོད་པས། །རང་རྒྱུད་ཆོས་ཀྱི་ཨི་ཐུལ་ལྟོས། ཡར་འགྲོ་མར་འགྲོའི་ས་མཚམས་ལུས་འདི་ཡི་ཚེ་ཡིན། །འཆི་བའི་མལ་མགོ་ནས་ཡར་འགྲོ་མར་འགྲོས་ས་མཚམས་ཡིན་ཟེར་དུས་ཕྱི་ཚར། །གཞན་ལ་ཡོན་ཏན་ཡོད་མེད་རང་རེའི་གོ་དཀའ། གཞན་གྱིས་རང་ལ་བསྟོད་སྨད་གང་བྱས་ཀྱང་རང་གི་བློ་ཐོག་ནས་ཆགས་སྡང་སྤང་དགོས། །དོན་ལ་དགེ་བ་རྒྱ་ཆེར་མ་འགྲུབ་ཀྱང་སྡིག་པའི་ལས་ཚབ་ཆེན་དང་། །སྐྱེས་བུ་དམ་པ་སུ་ཡིན་མི་ཤེས་པས་གཞན་ལ་སྐུར་འདེབས་དང་། སེམས་ཅན་ལ་བསམ་ངན་སྤངས། རང་ལ་ཟས་གོས་སོགས་འབྱོར་པ་ཅི་ཡོད་པ་དེ་ཉིད་ཀྱི་ཆོག་པ་དང་འཁྱོལ་བར་བྱས་ལ་ཁ་རོག་རྒུར་སྡོད། ཉིན་གཅིག་དལ་ཁོམ་མེད་པར་རི་ལུང་ཀུན་དུ་གཞན་གྱི་མིག་བརྫད་ནས་དམར་འཛོ་འཛོ་ཁྱི་སྡོམ་ཉུག་ཉུག་བྱེད་གྱིན་མ་འདུག །དཔལ་སྤྲུལ་པས་བྲིས་པ་དགེའོ།། །།
གོ་འགྱོ་བླ་མ་པདྨ་རྡོ་རྗེ་ལ་གདམས་པ། །ཇི་སྐད་དུ། །ངལ་བ་དོན་མེད་སྤྱོད་པ་ལྷུར་ལེན་ཚེ། །གསོལ་བ་འདེབས་སོ་འཕགས་པའི་ཐུགས་རྗེས་གཟིགས། །ཞེས་པ་ལྟར། ཀཿདཔལ་རྫོགས་གསུམ། །རྫོང་སར། རྒྱ་རོང་སོགས་ཚད་ལྡན་གྱི་སྐྱེས་མཆོག་དུ་མ་བཞུགས་ཤིང་། །ཆོས་འཆད་ཉན་སོགས་ལུང་རྟོགས་ཀྱི་བསྟན་པ་ཉི་མ་ཤར་བ་ལྟ་བུའི་ཆོས་ཚིགས་ཀྱི་ཡུལ་དབུས་ཡིན་ངེས་པ་དེ་དག་ལམ་ཁའི་རྡོ་བཞིན་དུ་བོར་ནས་མཐའ་འཁོབ་བྱང་རྫ་ཆུ་ཁ། །རྐྱང་འབྲོང་གཉིས་ཀྱི་ས་ཆ། །ཨར་ཇག་དང་རྔོན་པའི་ཡུལ་ཁམས། །སྡིག་པའི་ན་བུན་འཐིབ་ས་འདིར་འོང་ནས། །རང་དོན་འགང་ཆེན་ཡིན་པར་རློམ་པ་དེ་ཧ་བྷོ་ན་དེ་ཧ་བྷོ། ཧ་བྷོ། ཨོ་ཧ་བྷོ། ཡང་། རོ་ཞེས་བྱ་མཐོང་ན་འཇིགས་པ་དེ། །དུས་ད་ལྟ་ལུས་ཀྱི་རྩ་ན་གདའ། །ཞེས་གསུངས། བན་རྒན་ནད་རོ་མ་ཞིག་གི་རོ་རྒོག་ལ་ལྟ་བ་དང་རེག་པ་ཙམ་ལ་དོན་གཉེར་ཆེན་པོ་བྱེད་པ་དེ་ཡང་ཧ་བྷོ། །དེ་ལ་དགོས་ནུས་སྤུ་ཙམ་ཡོད་རེ་ཀན། ལར་དད་པ་ཡོད་ཁུལ་གྱི་ས་འདི་གར་འོང་བ་ཐམས་ཅད། །བཤད་ཚད་བདེན་པར་མི་འཛིན། །སྨྲས་ཚད་ཁ་ལ་མི་ཉན། །རྩ་བའི་བླ་མ་སངས་རྒྱས་་
དངོས་ཀྱི་སྐུ་གདུང་ཡིད་བཞིན་ནོར་བུ་ལྟ་བུ་སྨོན་ལམ་གང་བཏབ་འགྲུབ་པ་འདི་ལ་ཕྱག་མཆོད་ཙམ་ཡང་མི་བྱེད། གསུང་མཆོག་ཡི་གེ་དྲུག་མ། །རྡོ་མཁར་ཆོས་ཀྱི་ཕུང་པོ་མཐོང་ཐོས་དྲན་རེག་ཐན་རླུང་གིས་ཕོག་པ་ཡན་ཆད་ཕྱིར་མི་ལྡོག་པའི་ས་ཐོབ་པར་རྒྱལ་བའི་མདོ་སྡེ་ལས་ཡང་ཡང་གསུངས་པས། །འདི་ལ་ཕྱག་བསྐོར་རེ་གྱིས་བྱས་ཀྱང་མི་ཉན། ཁྱི་རྒན་གོད་རོ་བསྲུང་བ་ལྟར་ང་རང་གི་སྒོ་མནན་ནས་ཕག་ལྟས་དང་ཉན་རྣ་བྱེད་པ་དེ་ཡང་ཧ་བྷོ། ད་ཁྱེད་བྱ་བ་དོན་ཡོད་པ་ཞིག་བྱེད་ན་ཀཿརྫོགས། །རྫོང་སར། རྒྱ་རོང་རྣམས་སམ། །མིན་ཀྱང་ཡ་མ་རྒྱ་མཚོ་ལྟ་བུའི་དྲུང་ནས་སྤྱོད་འཇུག་ཉམས་ལེན་ལ་སྦྱར་བ་ཞིག་ཁྲིད་ནས། དད་པ་ཟེར་བ་ཅི་ཡིན། བླ་མ་ཅིའི་ཕྱིར་མཇལ། །ངལ་བ་དོན་ཡོད་ཀྱི་སྤྱོད་པ་དེ་གང་ཡིན། །དོན་མེད་དེ་གང་ཡིན་སོགས་ཆོས་དང་ཆོས་མིན་གྱི་རྣམ་དབྱེ་ཅུང་ཟད་ཤེས་པར་གྱིས། སྤྱོད་འཇུག་ལས། ཅི་ནས་གནས་སྐབས་འདི་དག་ཏུ། །དྲན་པ་གོམ་པ་ཉིད་འགྱུར་ཞེས། །རྒྱུ་འདི་ཡིས་ནི་ཕྲད་པའམ། །རིག་པའི་ལས་ནི་འདོད་པར་བྱ། །ཞེས་པའི་དོན་ཡང་ཅི་ཡིན་ཀུན་ལ་དྲིས། །ང་ལྟ་བུ་འབྲོག་རྒན་ཤི་ལ་ཁད་ཞིག་གི་རོ་མཐོང་བ་དང་། རེག་པས་དྲན་པ་ཅུང་ཟད་ཀྱང་གོམས་པར་འགྱུར་རེ་ཀན། མཚམས་
དང་བཟླས་བརྗོད་སོགས་བྱེད་ཀྱང་དང་པོར་བླ་མ་དམ་པ་མན་ངག་རྒྱ་མཚོའི་གཏེར་མཛོད་ཀོང་སྤྲུལ་རིན་པོ་ཆེའམ། །ཞབས་དྲུང་མཁྱེན་བརྩེ་རིན་པོ་ཆེ་གང་རུང་ཞིག་གི་དྲུང་ནས་ལྷ་གཅིག་གི་དབང་ལུང་ཁྲིད་དང་བཅས་པ་ཆོས་དང་བླ་མ་གཞན་ལ་འགྲམ་ཆུ་ལྡང་མི་དགོས་པ་རང་གི་བློ་ཐག་ཆོད་པ་ཞིག་ཞུས་ནས་སྒྲུབ་པ་མཛད་པ་མ་གཏོགས་སྟོང་སྒོམ་མུན་པ་རྡོ་འཕེན་གྱི་མཚམས་དད་ཤིང་ཁ་ཤོག་ལྕེའི་བཟླས་བརྗོད་ལ་སྙིང་པོ་ཅི་ཡང་མེད་པའང་ཤེས་པར་གྱིས། །འདི་དག་སྙིང་དམར་པོ་བཏོན་པའི་ཁ་ད་བདེན་གཏམ་ཡིན་ཀྱང་དེ་འདྲ་བྱས་ན་ཐམས་ཅད་ནས་བཀའ་བཀྱོན་དང་ཁ་ངན་ལྟ་བུར་གོ་གྱིན་འདུག་པ་ཁྱེད་ཀྱང་དེ་ལྟར་ལོས་ཡིན་ཀྱང་བྱེད་རྒྱུ་རང་མེད། ཨོ་ཧ་བྷོ། །ཨ་ཧ་ཧ།། ༈ །།བླ་མ་ལགས། ང་རང་ཆུང་ནས་ཆོས་དང་མཇལ། ཆོས་སྒོར་ཞུགས། །སློབ་གཉེར་སོགས་བྱས་ཀྱང་རང་རྒྱུད་ཉོན་མོངས་རག་པའི་དབང་གིས་སོ་ཐར་དང་སྔགས་ཀྱི་དམ་སྡོམ་ཐམས་ཅད་དང་འགལ་བས་ཚེ་གཅིག་ཉམས་ལེན་ལ་འབད་ཀྱང་སེམས་གནས་ཕྲ་མོ་ཙམ་ཡང་སྐྱེ་མ་ནུས། །དེ་ལྟར་ཚུལ་ཁྲིམས་དང་སེམས་ཀྱི་བསླབ་པ་གཉིས་མེད་པའི་ཤེས་རབ་ཀྱི་བསླབ་པ་དང་གནམ་ས་ལྟར་རིང་། སློབ་གཉེར་མང་
ཞིག་བྱས་པས་ལུང་གི་ཡོན་ཏན་མདོ་སྔགས་གཉིས་ཀའི་ཚིག་དོན་བཤད་པ་དང་རྩོམ་པ་གང་བྱས་ཀྱང་ལེགས་པ་རེ་འོང་བས། ཇི་སྐད་དུ། སྙན་གྲགས་བདུད་ཀྱི་ཕྱེ་གཏོར་ཡིན། །དུག་ལ་སྨན་དུ་མ་འཛིན་ཨང་། །ཞེས་པ་ལྟར་བདུད་ལས་ཀྱི་དབང་གིས་སམ་གཞན་ཀུན་གྱིས་བསྟོད་བཀུར་དང་སྙན་གྲགས་བྱུང་། །ཁྱེད་ལ་གསར་རྙིང་ཐམས་ཅད་མོས་པས་སྐྱེ་བོ་ཀུན་ལ་ཞལ་མཇལ་གསུང་ཐོས་རེ་གྱིས་དང་། དེས་ཆོག་པ་ཡོད་ཟེར་ནས་ཁ་ད་བྱེད་པ་ཡང་བྱུང་མོད། །དེ་ལྟར་བྱས་ན་སོས་དལ་ཞིང་ལྟོ་གོས་འབོལ་བ་ཞིག་འབྱུང་བར་ཤེས་ཀྱང་། སྤྱོད་འཇུག་ལས། བདག་ནི་རྙེད་མང་བཀུར་སྟིར་བཅས། །བདག་ལ་མང་པོ་དགའ་འོ་ཞེས། །དེ་འདྲའི་སྙེམས་པ་འཆང་གྱུར་ན། །ཤི་བའི་འོག་ཏུ་འཇིགས་པ་སྐྱེ། །ཞེས་པ་དེ་ལ་བསམས་ཏེ་ཟོལ་ཟོག་བྱེད་མ་ཕོད། །གཞན་གྱིས་ཁྱོད་གྲུབ་ཐོབ་རེད། །བཟང་པོ་རེད་ཟེར་བ་སོགས་ཡིན་ཁུལ་བྱས་ནས་དང་དུ་བླངས་ན་མི་ཆོས་བླ་མའི་རྫུན་དུ་འགྱུར་བར་གསུངས་པ་དེ་ལ་སྐྲག་ནས་རང་ཚུལ་རྗེན་པར་བདེན་གཏམ་ཡང་ཡང་ཀུན་ལ་སྨྲ་བའི་རྒྱུ་མཚན་དེ་ཡིན། །ང་ལྟ་བུ་ལུང་གི་ཡོན་ཏན་ཅུང་ཟད་ཡོད་ཀྱང་རྟོགས་པའི་ཡོན་ཏན་སྤུ་ཙམ་མེད་པ་སྔོན་གྱི་དགེ་སློང་དྲུག་སྡེ་སོགས་ལྟ་བུ་ཞིག་གི་ཁ་ངོ་ལྟ་བ་
དང་། ལག་པས་རེག་པ་སོགས་དོན་མེད་པ་ལ་དོན་ཡོད་པ་ལྟར་བྱས་ནས་གཞན་མགོ་བསྐོར་མ་ཕོད་པ་ཡིན་མ་གཏོགས། །ཕ་རོལ་ཕྱུག་དབུལ་གྱི་ཁྱད་པར་དང་། །ཨ་བུ་དང་བླ་མ་ཚང་སོགས་ཟེར་ལུགས་ཀྱི་ཁྱད་པར་ཙམ་ལ་དགའ་མི་དགའ་བྱེད་པ་ག་ལ་ཡིན་མི་ཤེས་པ་རྣམས་ལྟ་ཅི་སྨོས། །ཅུང་ཟད་ཤེས་ཁུལ་གྱི་ལུང་འདྲེན་མང་པོ་བྱེད་མཁན་རྣམས་ཀྱང་སྟོང་འུད་ཀྱི་རྗེས་སུ་འབྲང་ནས་ངལ་བ་དོན་མེད་འདི་ཙམ་བྱེད་པ་སྙིང་རེ་རྗེ་ནས་མགོ་གཡོག་མ་ཕོད་པ་ལ་ཡིད་ཆད་མི་བྱེད་པར་ཞུ། །ལར་དད་པ་ཟེར་བ་དེ་དཀོན་མཆོག་གསུམ་ལ་ཡིད་ཆེས་པ་ལ་ཟེར། །དཀོན་མཆོག་གསུམ་ལས་ཀྱང་སངས་རྒྱས་དང་དགེ་འདུན་ཁྱད་པར་ཅན་དུ་བྱེད་མཁན་ཆོས་ཡིན་པས་དམ་པའི་ཆོས་ལ་ཡིད་ཆེས་ཀྱི་དད་པ་བྱེད་དགོས། །ཆོས་དེ་ཡང་བདེན་བཞིའི་བླང་དོར་སྟོན་པ་ཡིན་ལ། །དེའང་ལས་རྒྱུ་འབྲས་ཤེས་པ་ལ་འདུས་པས་རྒྱུ་འབྲས་ཡིད་ཆེས་ཀྱི་དད་པ་ཞེས་མདོ་རྒྱུད་བསྟན་བཅོས་ཀུན་ནས་གསུངས་པ་ཡིན། །དེ་ལས་གཞན་གང་ཟག་ཞིག་གི་རྒྱུད་ཚོད་ལ་རང་གིས་བརྟགས་ལོ་དང་། །གཞན་གྱིས་ཟེར་ལོ་ལ་མཉན་ནས་དད་པ་བྱེད་ཁུལ་བྱེད་པ་དེ་གང་ལྟར་ཡང་སྒྲོ་འདོགས་དང་སྐུར་འདེབས་གང་རུང་ལས་མི་
འདའ་བས་ལོག་ལྟ་ཡིན། །ཆོས་བྱེད་པ་དེ་ནང་དུ་རང་རྒྱུད་ཀྱི་ཉོན་མོངས་འདི་ལ་བྱ་ར་བྱས་ནས་གཉེན་པོས་འདུལ་ཅི་ཐུབ་བྱེད་པ་དེ་ཡིན་ཏེ། ཨོ་རྒྱན་ཆེན་པོས། ཉོན་མོངས་ཟད་ན་ཆོས་ལ་བྱ་རྒྱུ་མེད། །ཅེས་གསུངས་པ་དེ་རྣམས་མགོ་བར་ཕྱི་རོལ་དུ་གནས་ཡིན་ཟེར་བའི་ས་རྡོ་རི་བྲག་དང་། བླ་མ་བཟང་པོ་ཡིན་ཟེར་བའི་བན་རྒན་སོགས་ལ་བལྟས་ནས་དེ་དག་ལས་བྱིན་རླབས་འབྱུང་བར་རེ་བ་ལ་ཚེས་དྲེད་དུ་འགྲོ་བའི་རྒྱུ་ཙམ་ལས་ཕན་པ་ཅུང་ཟད་ཀྱང་མེད། །བླ་མ་ལ་མོས་གུས་དང་གསོལ་འདེབས་བྱས་ན་ཡོན་ཏན་མང་པོ་ཡོད་སྐད་ཀྱི་ལུང་འདྲེན་བྱེད་པ་དེ་ཡང་བཀའ་དྲིན་སུམ་ལྡན་གྱི་བླ་མ་ལ་ཟེར་བ་ཡིན་གྱི་གང་རུང་རུང་གི་བན་རྒན་ཞིག་ལ་ཟེར་བ་མིན། །བླ་མའི་རྣལ་འབྱོར་གྱི་ཁྲིད་ཡིག་ལས་ཀྱང་དཀྱིལ་འཁོར་གང་དུ་ཧེ་རུ་ཀའི་ངོ་བོར་དབང་རྫོགས། །ཞེས་མོས་གུས་བྱེད་ས་དབང་དང་གདམས་ངག་ཐོབ་པའི་བླ་མ་དེ་ཡིན་པར་བཤད། །བླ་མ་ལ་དད་པ་བྱེད་པ་དེ་ཡང་བཀའ་དྲིན་ལ་བསམ་ནས་མོས་གུས་བྱེད་དགོས་པ་ཡིན་གྱི་ཡོན་ཏན་ལ་བསམ་ནས་མོས་གུས་བྱེད་པ་ག་ལ་ཡིན། བླ་མ་ལ་སངས་རྒྱས་ལས་ལྷག་པའི་མོས་གུས་བྱེད་དགོས་པར་བཤད་པས་ཡོན་ཏན་ལ་བསམ་ན་སངས་
རྒྱས་ལས་ལྷག་པ་ཞིག་ག་ལ་ཡོད། །དེས་ན་རང་སེམས་ཆོས་སྐུར་ངོ་སྤྲོད་པས། བདག་ལ་སངས་རྒྱས་ཀུན་ལས་ལྷག། ཞེས་པ་དང་། རྩ་བའི་བླ་མ་བཀའ་དྲིན་ཅན་ཞེས་ཀུན་ལ་གྲགས། །བཀའ་དྲིན་དེ་ཡང་བླ་མ་དེའི་ཐུགས་རྗེས་རང་རྒྱུད་ལ་ཡོན་ཏན་གང་སྐྱེས་དེ་ལ་ཟེར་བ་ཡིན་གྱི། །བླ་མས་ཆོས་བཤད་བཤད་པ་དང་། །དབང་བསྐུར་བསྐུར་བ་སོགས་ཀྱིས་མིན་ཏེ། །ཇོ་བོ་རྗེས། བླ་མ་ཐམས་ཅད་ལས་གསེར་གླིང་པ་མཆོག་ཏུ་མཛད་པའི་རྒྱུ་མཚན་གསུངས་པ་ལྟ་བུ་ཡིན་ཏེ། །དཔེར་ན་སྤྲང་པོའི་བསམ་པ་དགའ་བ་དེ་ཡང་སྦྲུ་ཁུག་ཏུ་ཙམ་པ་བླུགས་རྒྱུ་དེས་ཡིན་གྱི། །ཕྱུག་པོ་ལ་ཙམ་པ་མང་བས་སྤྲང་པོ་ལ་ཅི་ཕན། །ཕ་མ་ལ་བཀུར་སྟི་དགོས་པ་མདོ་འདུལ་ཀུན་ལས་གསུངས་པ་དེ་ཡང་ཕ་མའི་དྲིན་ལ་བསམ་པ་ཡིན་གྱི་ཕ་མའི་ཡོན་ཏན་ལ་བསམ་པ་ག་ལ་ཡིན། །དེ་ལ་དད་པ་ཟེར་བ་དངོས་ཅི་ཡིན་དེ་དང་། ཆོས་བྱེད་ཟེར་བ་ཅི་ཡིན་དང་མོས་གུས་གསོལ་བ་འདེབས་པའི་བླ་མ་དེ་གང་ཡིན་གསུམ་པོ་འདི་མཁས་པར་རློམ་པ་རྣམས་ཀྱིས་ཀྱང་ཅི་བཞིན་མི་ཤེས་འདུག་པས་རྒྱལ་བའི་བཀའ་དང་མི་འགལ་བར་ཁྱེད་ལ་བཤད་པ་ཡིན་པས་དེ་ལ་ཆོས་འབྲེལ་མཛོད། །ཡི་གེ་འདི་
ཀུན་ལ་སྟོན། དོན་འདི་དག་ཀུན་ལ་ཤོད། །བདེན་པར་བཟུང་མཁན་རེ་གཉིས་ཡོད་སྲིད་པས་དེ་ལྟར་མཛོད་ལ། །ད་ནི་ཕེབས་སོང་། །ལོ་དགུར་བསྡད་ཀྱང་། ཕྱག་དབང་འཇོག་མདོག་དང་། །སྨོན་ལམ་འདེབས་ཁུལ་སོགས་དགོས་པ་མེད་པ་དེ་འདྲ་མི་བྱེད་ངེས་ཅན་ཡིན་པས་ཐུགས་ལ་ཞོག །ཨོཾ་མ་ཎི་པདྨེ་ཧཱུྃ།། །དགེའོ།། ༈ །།རྒྱལ་བ་ཀུན་གྱི་ཡེ་ཤེས་གཅིག་བསྡུས་པ། །མཚུངས་མེད་བླ་མ་འཇའ་ལུས་རྡོ་རྗེ་ནི། །གངས་ལྗོངས་འཛིན་མའི་ཐ་གྲུར་འགྲན་བྲལ་བ། །འགྲོ་མགོན་མཆོག་དེས་ཁྱོད་ལ་ཤིས་པ་སྩོལ། ༡ །ཁྱོད་འདྲ་ཁྱོད་ལས་ལྷག་པ་གཞན་ཡོད་ཀྱང་། །ཉེས་པས་མ་ཡིན་མཐུན་པའི་སྐལ་བཟང་ལ། །ཕན་པའི་ཤ་ཚ་སྙིང་ཉེའི་གྲོས་གཏམ་ཞིག །སྙིང་གྲོགས་ཁྱོད་ལ་བཤད་ཀྱིས་ད་དགོངས་ཤིག་༢ །སྔོན་བསགས་འོ་མཚོ་གཅིག་ཏུ་འཁྱིལ་བ་ལས། །རྣམ་དཀར་རླབས་ཕྲེང་དཀར་པོ་གཡོ་བའི་རྩེར། །དལ་བའི་རྟེན་བཟང་འདོད་འབྱུང་མ་ཎི་ཀ །ཐོབ་པ་ཡལ་བར་མ་དོར་སྙིང་གི་བུ། ༣ །རྟག་བརྟན་རྡོ་རྗེའི་སྐུ་མཆོག་ཉེར་སྨིན་པ། །ཐུབ་དབང་མཚན་དཔེའི་ཉི་མ་ཡོལ་མཛད་ན། །སྙིང་པོ་མེད་པའི་ཆུ་ཤིང་རུལ་ལྟའི་ལུས། །འཇིག་སླ་ངེས་པ་མེད་དོ་
སྙིང་གི་བུ། ༤ །དཀར་ནག་ལས་ཀྱིས་བདེ་སྡུག་མྱོང་བསྒྲུབ་པ། །བདེན་གསུང་རྒྱལ་བའི་བཀའ་ན་ཡང་ཡང་དུ། །གསུངས་ན་དུས་དང་རྣམ་ཀུན་རྣམ་དཀར་བསྒྲུབས། །ནམ་ཞིག་བསླུ་བ་མེད་དོ་སྙིང་གི་བུ། ༥ །སྲིད་པའི་གནས་རིགས་མཐོ་དམན་གར་སྐྱེས་ཀྱང་། །བདེ་བའི་གོ་སྐབས་སྐྲ་རྩེ་ཙམ་མེད་ན། །གཞུང་བཟང་དམ་པའི་ལེགས་བཤད་ལ་བསྟེན་ནས། །ཞི་བའི་གོ་སར་བགྲོད་དགོས་སྙིང་གི་བུ། ༦ །སྲིད་པའི་ཚ་གདུང་ཞི་བ་རྣམ་མཁྱེན་གྲོང་། །ཟག་པ་ཡོངས་ཟད་ཀུན་གཟིགས་ཡེ་ཤེས་ལ། །དབང་བསྒྱུར་ལྷུན་གྲུབ་རྒྱལ་པོའི་གོ་འཕང་དེ། །གཏན་གྱི་བདེ་བ་ཡིན་ནོ་སྙིང་གི་བུ། ༧ །མཚན་ལྡན་བླ་མ་སངས་རྒྱས་དངོས་དང་མཚུངས། །ཡོན་ཏན་འབུམ་སྡེས་རང་རྒྱུད་ཕྱུག་པའི་སྲོག །ལམ་བཟང་སྟོན་པའི་དེད་དཔོན་དགེ་བའི་བཤེས། །འབྲལ་བ་མེད་པར་བསྟེན་དགོས་སྙིང་གི་བུ། ༨ །གཏན་བདེ་ཐར་བའི་ཁང་བཟང་བསྒྲུབ་འདོད་ན། །ཐོག་མར་རྩ་བ་སྐྱབས་འགྲོའི་རྨིང་བཏིང་དགོས། །ཕྱི་རོལ་ལས་འཕགས་ནང་པའི་གྲལ་ལ་འཛུད། །མི་མཁོ་ཀ་མེད་ཡིན་ནོ་སྙིང་གི་བུ། ༩ །ཐེག་པ་ཆེན་པོའི་གྲྭལ་ལ་ཐུགས་ཙ་ན། །སེམས་བསྐྱེད་རྒྱལ་
སྲས་སྤྱོད་ལ་བསླབ་དགོས་ཕྱིར། །སྨོན་དང་འཇུག་པའི་གོ་རིམ་ཚུལ་བཞིན་སྒོམ། །ལྷག་བསམ་བཟང་པོ་བསྐྱེད་དང་སྙིང་གི་བུ། ༡༠་ཁྲིམས་གཙང་རང་རྒྱུད་དུལ་བའི་ཞིང་ས་ལ། །དགེ་བའི་ལོ་ཏོག་འདེབས་པའི་འདུ་བྱེད་ཀྱིས། །རྣམ་གྲོལ་འབྲས་བུ་གཡུར་དུ་ཟ་བའི་ཕྱིར། །བསླབ་པར་གཅེས་སྤྲས་མཛོད་དང་སྙིང་གི་བུ། ༡༡ །གསང་སྔགས་རྡོ་རྗེ་ཐེག་པར་འཇུག་པའི་སྒོ། །དབང་བཞི་ཡིན་ཏེ་དེ་ཡང་ཐོབ་ཙམ་གྱིས། །མི་འོང་ཡེ་ཤེས་བསྐྱེད་དང་དམ་ཚིག་ལ། །གཅེས་སྤྲས་ཤིན་ཏུ་གལ་ཆེ་སྙིང་གི་བུ། ༡༢ །དེའི་ལམ་ཐབས་གྲོལ་གཉིས་སུ་མ་འདུས་མེད། །གང་ལྟར་རིམ་གཉིས་ལ་བསྟེན་དེའི་ཕྱིར་ན། །སྲིད་ཞིའི་འཇུག་རིམ་ལ་བསྟུན་བསྐྱེད་རྫོགས་དོན། །བླ་མའི་ཞལ་ལས་ཉོན་དང་སྙིང་གི་བུ། ༡༣ །སྣང་སྲིད་འཁོར་དང་འདས་པའི་ཆོས་རྣམས་ཀུན། །རང་རིག་བྱང་ཆུབ་སེམས་ཀྱི་ཀློང་ན་གཅིག །འོན་ཀྱང་མ་རིག་གཟུང་འཛིན་མཐུ་བརྟས་པས། །མེད་བཞིན་ཡོད་པར་སྣང་ངོ་སྙིང་གི་བུ། ༡༤ །སྣང་ཚུལ་ལོག་རྟོག་འཁྲུལ་བའི་རྫུན་རིས་ལ། །རྟག་ཞེན་སྲིད་པའི་དྲ་བར་ཡོངས་སུ་འཐུམ། །ཡིན་ཚུལ་དོན་གྱི་ངོ་ན་ཅིར་སྣང་ཡང་། །གང་དུ་གྲུབ་པ་མེད་དོ་སྙིང་གི་བུ། །༡༥ །འཁྲུལ་
སྣང་འདི་ཉིད་དོན་དམ་མ་ཡིན་ཏེ། །འདི་ལས་གཞན་པའི་ཡིན་ཚུལ་འང་མི་རྙེད་ལ། །དཔེར་ན་ཆུ་དང་ཆབ་རོམ་ཇི་བཞིན་དུ། །ཤེས་པར་གྱིས་དང་རང་སློབ་སྙིང་གི་བུ། ༡༦ །དེ་བཞིན་འདོད་ཆགས་ལ་སོགས་དུག་ལྔ་ཡང་། །སྤང་བྱ་མ་ཡིན་ཡེ་ཤེས་རྒྱུ་མ་མཆིས། །སྒྲུབ་བྱ་མ་ཡིན་རང་གར་སྤྱད་པས་ཕུང་། །གནད་དོན་འགལ་བ་མི་དགོས་སྙིང་གི་བུ། ༡༧ །བདེན་པ་དབྱེར་མེད་ཤེས་པའི་ལྟ་བ་དང་། །དེར་འཇུག་ཏིང་ངེ་འཛིན་གྱི་བསྒོམ་པ་དང་། །གནས་སྐབས་གཙོར་སྤྱོད་གྲོལ་ལམ་སྤྱོད་པ་བདུན། །གནད་ཀྱི་ཚིག་གསུམ་ཡིན་ནོ་སྙིང་གི་བུ། །༡༨ །གནད་དོན་ཐོག་ཏུ་མ་ཁེལ་སྙན་སྙན་གྱི། །ལེགས་བཤད་ཁོ་ནས་དོན་གོ་མི་ཆོད་ལ། །བདག་དང་བདག་འདྲའི་གཟེབ་ཏུ་ཆུད་དོགས་པས། །གནད་དོན་སྙིང་ནས་མ་བོར་སྙིང་གི་བུ། ༡༩ །ཡང་ཅིག་གསོན་དང་སྔོན་བསགས་ལས་འཕྲོ་ཅན། །འཁོར་འདས་བསྐྲུན་པའི་ཀུན་བྱེད་རྒྱལ་པོ་དེའི། །ཡིན་ལུགས་ནང་ནས་གྲོལ་ན་གནད་བདོག་པས། །མ་བརྗེད་སྙིང་ལ་ཕུར་དང་སྙིང་གི་བུ། ༢༠ །དང་པོ་ལུས་ངག་ཡིད་གསུམ་ནང་ནས་ཀྱང་། །སེམས་གཙོ་བཙལ་བས་ལུས་ནི་བེམ་པོ་ལ། །ངག་ནི་རླུང་གི་རང་བཞིན་
བྱེད་རྩོལ་ཅན། །དབང་བསྒྱུར་མཁན་པོ་སེམས་ལགས་སྙིང་གི་བུ། ༢༡ །དེ་ལྟའི་སེམས་ལ་བྱུང་གནས་འགྲོ་གསུམ་བརྟགས། །དང་པོ་བྱུང་ས་མེད་དོ་གཞི་རྩ་སྟོང་། །བར་དུ་གནས་ས་མེད་དོ་སྐྱེ་བ་མེད། །ཐ་མ་འགྲོ་འོང་བྲལ་ལོ་སྙིང་གི་བུ། ༢༢ །རང་བཞིན་མ་གྲུབ་རང་གི་ངོ་བོས་སྟོང་། །དཔྱོད་བྱེད་བློ་ཡི་ཡུལ་ལས་ནམ་ཡང་འདས། །གང་དུ་ཁས་ལེན་མ་མཆིས་རིག་སྟོང་གཤིས། །རྟོགས་ན་རང་ཞལ་མཐོང་ངོ་སྙིང་གི་བུ། ༢༣ །དེར་ཡང་རང་ངོ་འཕྲོད་ནས་གོམས་འདྲིས་ནི། །དྲན་ཤེས་གཉེན་པོས་ཡང་ཡང་བྱ་ར་མཛོད། །ཡེངས་བསྒོམ་རེས་མོས་རྒྱུན་དུ་མ་བརྗེད་པ། །ཉམས་རྟོགས་རྒྱས་པའི་ཐབས་ཡིན་སྙིང་གི་བུ། ༢༤ །ཧ་ཅང་ལྷོད་ན་རྣམ་རྟོག་དབང་དུ་འགྱུར། །སྒྲིམ་ཤས་ཆེ་ན་བྱིང་འཐིབ་ཤུགས་ཆེ་བས། །གྲིམ་ལྷོད་རན་པར་བསྒོམ་དགོས་མ་ཅིག་གིས། །གསུངས་ཕྱིར་གནད་དོན་ཡོད་དོ་སྙིང་གི་བུ། ༢༥ །ཕྱི་རོལ་ཚོགས་དྲུག་ཡུལ་སྣང་གང་ཤར་ཡང་། །དེར་འཛིན་མེད་པར་མེ་ལོང་གཟུགས་བརྙན་བཞིན། །སྣང་ཙམ་ཉིད་ནས་སྐྱོན་དུ་མ་གྱུར་བས། །ཞེན་པའི་འཁྲི་བ་ཆོད་དང་སྙིང་གི་བུ། ༢༦ །གསལ་སྣང་མངོན་ཤེས་ཕྲ་མོ་འཆར་སྙམ་དང་། །བདེ་བདེ་
འབྲལ་མི་ཕོད་པའི་དགའ་བདེའི་ཉམས། །ཧད་པོར་སོང་བའི་སྟོང་ཉམས་འདིའི་ཅི་ཤེས། །ཁམས་གསུམ་རྒྱུ་ལས་མ་འདས་སྙིང་གི་བུ། ༢༧ །ཅེར་གྱིས་གཏད་པའི་གཏད་འཛིན་ཕྲ་མོ་དང་། །ཐོམ་མེར་བསྡད་པའི་ལུང་མ་བསྟན་པའི་ཀློང་། །རྣམ་རྟོག་རྒྱས་འདེབས་བྱེད་པའི་ཐུགས་དམ་རྣམས། །ཅུང་ཟད་སྐྱོན་དུ་འགྱུར་སྙམས་སྙིང་གི་བུ། ༢༨ །ད་ལྟའི་ཤེས་པ་བསྒྱུར་བཀོད་མ་བྱས་པའི། །ཐ་མལ་ཤེས་པ་དྲན་རིག་སྐད་ཅིག་ལ། །མ་དོར་ཙམ་གྱི་རང་ཚུགས་མ་ཤོར་ན། །གོལ་ས་མེད་དོ་ཨི་གོ་སྙིང་གི་བུ། ༢༩ །ཨ་བུ་སྤྲུལ་ཆུང་རང་ཉིད་ངན་ན་ཡང་། །འདི་ཉིད་བརྒྱུད་ལྡན་བླ་མའི་ཞལ་གདམས་ཡིན། །མན་ངག་ཚད་མའི་གནད་དོན་སྙིང་ཐིག་ཡིན། །དེ་ཕྱིར་གསན་པར་འོས་སོ་སྙིང་གི་བུ། ༣༠ །དེང་སང་དུས་ཀྱི་སྙིགས་མའི་མར་གཤམ་འདིར། །ཕན་པའི་སྙིང་གཏམ་གཅེས་དགུ་བཤད་པ་བས། །ཁ་འཛུམ་ཆགས་སྡང་གླེང་མོ་གཅིག་གི་དགའ། །དེ་འདྲ་མ་མཛད་གཅེས་ཕྲུག་སྙིང་གི་བུ། ༣༡ །ཚེ་འདིར་བླ་མ་བསྟེན་ལ་ཐོས་བསམ་མཛོད། །གདམས་ངག་ཉམས་སུ་ལོང་དང་ཕྱི་མ་མཁོ། །གལ་ཆུང་མི་ཆོས་འཇིག་རྟེན་ཕྱོགས་ལ་གྱིས། །
གལ་ཆེན་ཆོས་ལ་གྱིས་དང་སྙིང་གི་བུ། ༣༢ །གནོད་སེམས་གཡོ་སྒྱུའི་བྱ་བ་ཕྲ་མོ་ཙམ། །ཡོད་པར་གྱུར་ན་དེ་སྤོང་ཐབས་ལ་བརྩོན། །རྣམ་དཀར་བྱ་བ་རི་བོ་ཙམ་ཡོད་ཀྱང་། །སློབ་པར་བརྩོན་དང་ལས་ལྡན་སྙིང་གི་བུ། ༣༣ །སྙིང་གི་བུ་ཞེས་འབོད་པ་དོན་ལྡན་མཛོད། །ངན་སྤྱོད་སྣ་དགུ་དག་གིས་ཁྱོད་མྱོས་ན། །ཕ་རྒན་ངོ་ཚའི་འཇིགས་པས་གདུང་བ་ཡིས། །ཕན་པའི་ཞལ་གདམས་མ་ནོར་སྙིང་གི་བུ། ༣༤ །ཁྱོད་གདོང་པད་དཀར་བཞད་པའི་ལང་ཚོ་ལ། །ཆགས་པའི་ངོ་ལོན་མ་ཡིན་ལྷག་བསམ་གྱིས། །ཕན་དུ་རེ་ནས་ཞིབ་བཀྲོལ་གྱིས་བཤད་ན། །མ་ནོར་དང་དུ་ལོང་དང་སྙིང་གི་བུ། ༣༥ །ན་ཚོད་ཐལ་བའི་བན་རྒན་བདག་འདྲ་ཡང་། །ཁྱོད་མཚན་མཛེས་སྡུག་ལང་ཚོས་མྱོས་གྱུར་ནས། །གཅེས་དགུའི་གདམས་ངག་མ་སྦས་བཤད་ཟིན་པས། །སྙིང་གི་ཐིག་ལེར་བསྟིམ་དང་སྙིང་གི་བུ། ༣༦ །བསླབ་བྱ་ཤོག་དྲིལ་མ་བོར་སྐུ་ཚེ་རིང་། །དུས་རྒྱུན་བལྟ་རྟོག་མཛོད་དང་ལོ་བརྒྱ་བོ། །གཞན་ལ་ངོམ་ཆོས་མ་བྱེད་བསམ་དོན་འགྲུབ། །རང་ལ་མཁོ་བ་ཡིན་ནོ་སྙིང་གི་བུ། ༣༧ །འདིར་སྨྲས་མདོ་ཁམས་
སྨད་དུ་སྐྱེས་པའི་མི། །དུག་གསུམ་མེ་ལྟར་འབར་བའི་བཙུན་ཆུང་པོ། །ཨ་བུ་མདོ་མེད་ཁྱི་རྒན་ལྷོད་པོ་དེས། །སྙིང་གྲོགས་ཁྱོད་ལ་ཕུལ་བ་དགེ་གྱུར་ཅིག། །།མངྒ་ལཾ། །དགེའོ།། །།