འགྱོད་ཚངས་རྒྱལ་པོའི་འབྱུང་ཁུངས་ལོ་རྒྱུས།
ཟབ་ཆོས་ཞི་ཁྲོ་དགོངས་པ་རང་གྲོལ་ལས༔ འགྱོད་ཚངས་རྒྱལ་པོའི་འབྱུང་ཁུངས་ལོ་རྒྱུས་དང་བཅས་བཞུགས་སོ༔
རྒྱ་གར་སྐད་དུ༔ ན་ར་ཀ་པྲེ་ཏ་ཀ་ཏིར་ཡ་ཀ་ནི་དྷ་བ་པ་ཡ་ནི་བུད་དག་ཤ་ཀ་ན་མོ༔ བོད་སྐད་དུ༔ འགྲོ་བ་རིགས་དྲུག་དོང་སྤྲུགས་ཞེས་བྱ་བ༔ བཅོམ་ལྡན་འདས་དཔལ་ཀུན་ཏུ་བཟང་པོ་ལ་ཕྱག་འཚལ་ལོ༔ འགྱོད་ཚངས་ཀྱི་རྒྱལ་པོ་འདི་ཡི་འ བྱུང་ཁུངས་ནི༔ འདོད་པའི་ཁམས་ཀྱི་གནས་འདི་ན༔ བྲམ་ཟེ་དུང་གི་ཕྲེང་བ་ཅན་ཞེས་བྱ་བ༔ གོས་སུ་དུང་གི་ཕྲེང་བ་གྱོན་པ༔ རྫུ་འཕྲུལ་དང་ལྡན་པ་ཞིག་ལ༔ སློབ་མ་རྒྱལ་བུ་ཞིག་ཡོད་པ་ལ༔ བྲམ་ཟེས་སློབ་སྦྱོངས་རྫོགས་པར་བསླབས་སྟེ་རིག་པའི་གནས་ལྔ་ལ་མཁས་པར་གྱུར་པ་དང་༔ རྒྱལ་པོའི་ཕྲུ་གུའི་བསམ་པ༔ ང་ཡི་གོང་ན་བྲམ་ཟེ་འདི་{ལས་}མ་གཏོགས་གཞན་གང་ཡང་མེད་ན་འདི་གོང་དུ་མི་གཏོང་བསམ་ནས༔ བྲམ་ཟེ་ལ་རྒུན་ཆང་བླུད་ནས་བརྒྱལ་བ་དང་༔ མིག་ཁབ་ཀྱིས་གཙག༔ ལྕེ་ལྕགས་ཀྱུས་དྲངས་ཏེ་བཅད༔ ལུས་རུ་སྦལ་གྱི་ཁྲག་གིས་བསྐུས༔ བུད་མེད་མང་པོས་ལུས་ལ་བརྫིས༔ སྒྱིད་པ་བཅད་བཞག་པས༔ ནངས་པར་བྲམ་ཟེ་གཉིད་སད་དེ་མིག་ཕྱེ་ཀྱང་༔ ལོང་ནས་མེད༔ དྲུང་ན་སུ་འདུག་བོས་ཀྱང་ཅི་མེད༔ ལངས་འགྲོ་བར་བྱས་ཀྱང་སྒྱིད་པ་དང་བུད་མེད་མང་པོས་བརྫིས་པས་འགུལ་མ་ནུས༔ ལུས་ལ་རུས་སྦལ་གྱི་ཁྲག་བྱུག་པས་ཆུ་བུར་རྐང་པོ་དང་ནད་མང་དུ་བྱུང་སྟེ་ལུས་ཀྱང་འཁུམ༔ དྲན་པ་ཡང་ཉམས་བྱེད་དོ༔ དེ་ནས་བྲམ་ཟེས་བསམ་པ་འདི་ལྟར་ཉོན་མོངས་པར་གྱུར་པ་ཚེ་རབས་སྔོན་གྱི་ལས་འཕྲོའམ༔ རྣམ་སྨིན་གཅིག་ཡིན་ནམ༔ འོན་ཏེ་ཕྲག་དོག་དབང་གིས་གོང་དུ་ཤོར་དགོས་པ་གཅིག་བྱས་བསམ་པ་དང་༔ སློབ་མ་རྒྱལ་པོའི་ཕྲུག་གུས་བྱས་པར་རིག་ནས༔ བྲམ་ཟེས་དམོད་བོར་བ༔ རྒྱལ་པོའི་ཕྲུག་གུ་ཁྱེད་དང་པོ་དེ་ཙམ་བློ་སྦྱང་བྱས་པའི་ལན་དུ་ང་ལ་འདི་ལྟ་བུའི་ལས་བྱེད་པ༔ ཁྱོད་ཀྱང་སྐྱེ་བ་གཅིག་གི་ཚེ་ཐུང་སྟེ༔ སེམས་ཅན་ལུས་སྲུལ་པོའི་ལུས་གཅིག་ཏུ་སྐྱེས་ལ༔ དེ་ཡང་མིག་མེད་པ་དང་༔ ལྐུག་པ་དང་༔ མཛེ་ཅན་དང་༔ དིག་པ་དང་༔ ཤ་བཀྲ་དང་༔ བས་བལྡགས་དང་༔ ཆུ་བུར་དང་༔ ཤ་ཟ་མོ་སྟོང་གིས་ཚང་བཅའ་བ་དང་༔ རྐང་པ་ཆད་པ་དང་༔ ཚེ་འཕོས་ནས་ཀྱང་དམྱལ་ཁམས་བཅུ་དྲུག་གི་ཁ་འཁོར་ཏེ༔ ཐར་པའི་དུས་མེད་དེ་ཚེ་རབས་ཐམས་ཅད་དུ་འཕགས་པའི་ཞལ་ཉི་ཟེར་ཙམ་ཡང་མི་མཐོང་ཞིང་༔ བྱང་ཆུབ་ཀྱི་མྱུ་གུ་སྐམ་པར་གྱུར་ཅིག༔ ཅེས་དམོད་པ་བོར་བས༔ དེའི་མོད་ལ་རྒྱལ་པོའི་ཕྲུ་གུ་དེ་ཡང་ཤི་བར་གྱུར་ཏེ༔ རང་གིས་ཉེས་པ་བྱས་པའི་རྣམ་སྨིན་དང་༔ བྲམ་ཟེས་དམོད་པས་སེམས་ཅན་གྱི་ནང་ནས་ལུས་སྲུལ་པོ་གཅེར་བུ་ཅན་དུ་སྐྱེས་ཏེ༔ ལུས་ལ་ནད་སྣ་ཚོགས་དང་༔ ཤ་ཟ་མོ་སྟོང་གིས་ཚང་བཅས་ཏེ་བྱང་ཆུབ་ཀྱི་མྱུ་གུ་ནི་སྐམ་པར་གྱུར་ཏེ༔ སྡུག་བསྔལ་བ་ལས༔ གཅིག་ལ༔ རིགས་དྲུག་གི་སྡུག་བསྔལ་དུས་གཅིག་ལ་མྱོང་སྟེ༔ དེ་ཡང་དམྱལ་བའི་གནས་སུ་མནར་མེད་པའི་སྡུག་བསྔལ་མྱོང་༔ ཡི་དྭགས་ཀྱི་གནས་སུ་ཕྱི་ནང་གཉིས་ཀའི་སྒྲིབ་པ་ཅན་གྱི་སྡུག་བསྔལ་མྱོང་༔ བྱོལ་སོང་གི་གནས་སུ་གོར་མོའི་རྡོའི་བར་དུ་སྐྱེས་པའི་སྡུག་བསྔལ་མྱོང་༔ ལྷ་མ་ཡིན་གྱི་གནས་སུ་ལྷ་མིན་སྒྲ་གཅན་འཛིན་ཅེས་བྱ་བ་ལུས་ཆེ་བ་ལ་ལྟོག་པའི་སྡུག་བསྔལ་མྱོང་༔ ལྷའི་གནས་སུ་སུམ་ཅུ་རྩ་གསུམ་དགེ་བའི་ཚུལ་ཅན་ཞེས་བྱ་བ༔ ལྷ་མོས་ཡོངས་སུ་བསྐོར་བ་ལ༔ ལྟུང་བའི་སྡུག་བསྔལ་མྱོང་ནས་སྡུག་བསྔལ་བར་གྱུར་པ་ལ༔ ཕྱོགས་བཅུའི་བདེ་བར་གཤེགས་པ་རྣམས་ཀྱིས་ཐུགས་རྗེའི་བྱམས་པ་ཆེན་པོས་བཀའ་ནོད་པར་མཛད་པས༔ བདེ་བར་གཤེགས་པ་རྣམས་ཀྱི་ཐུགས་ཡེ་ཤེས་ལས༔ བཅོམ་ལྡན་འདས་དཔལ་ཀུན་ཏུ་བཟང་པོ་དང་༔ ཀུན་རིགས་རྣམ་པར་སྣང་མཛད་གཉིས་སྤྲུལ་ཏེ༔ ཀུན་ཏུ་བཟང་པོས་བྱིན་རླབས་ལས༔ རྡོ་རྗེ་སེམས་དཔའ་སྤྲུལ༔ རྣམ་པར་སྣང་མཛད་ཀྱིས་བྱིན་རླབས་ལས༔ ཕྱག་ན་རྡོ་རྗེར་སྤྲུལ་ཏེ༔ ཀུན་ཏུ་བཟང་པོ་དང་རྣམ་པར་སྣང་མཛད་གཉིས་ཀྱིས༔ བཛྲ་སཱ་ཏྭ་བཛྲ་པཱ་ཎི་གཉིས་ལ་བཀའ་སྩལ་པ༔ འདོད་པའི་ཁམས་མ་ཀི་ན༔ སློབ་མས་རྒྱུ་ལ་ཉེས་པ་བྱས་པའི་རྣམ་པར་སྨིན་པས༔ སེམས་ཅན་ལུས་སྲུལ་པོ་གཅེར་བུ་བྱ་བ་གཅིག༔ དུཿཁ་སྣ་ཚོགས་ཀྱིས་གདུང་བ༔ བྱང་ཆུབ་ཀྱི་མྱུ་གུ་སྐམ་ཏེ་ཚེ་འདས་ནས་ཀྱང་དམྱལ་བའི་ཁམས་གཅིག་པ་ལས་མི་ཐར་བས༔ དེ་ལས་བཟློག་ན་ལས་ཀྱི་རྣམ་སྨིན་གཞན་གྱིས་ངན་སོང་དུ་སོང་བ་ནི་ཐར་བར་སྲིད་ཀྱི༔ རྒྱུ་ལ་བརྙས་པ་བྱས་པའི་རྣམ་སྨིན་ནི་ཐར་བའི་དུས་མེད་དོ༔ ཅེས་བཀའ་སྩལ་པ་ལ༔ རྡོ་རྗེ་སེམས་དཔའ་དང་ཕྱག་ན་རྡོ་རྗེས་བདག་ཅག་གཉིས་ཀྱིས་འདུལ་བའི་དུས་ལ་བབས་ན༔ བདག་ཅག་གིས་དེ་ལ་གང་གིས་བཟློག་པའི་ཐབས་བསྟན་ཏུ་གསོལ༔ ཀུན་ཏུ་བཟང་པོས་རྡོ་རྗེ་སེམས་དཔའ་ལ་བཀའ་སྩལ་པ༔ རིགས་ཀྱི་བུ་རྣལ་འབྱོར་གྱི་སྤྱི་ཁྲུས་ན་རཀ་དོང་སྤྲུགས་འགྱོད་ཚངས་ཀྱི་རྒྱལ་པོ་འདི་སེམས་ཅན་དེའི་རྣ་བར་སྒྲོགས་ལ། ལུས་ངག་ཡིད་གསུམ་གྱི་འགྱོད་ཚངས་བྱེད་དུ་ཆུག་ལ་བཟློག་ཅིག༔ ཀུན་རིགས་རྣམ་སྣང་གིས་ཕྱག་ན་རྡོ་རྗེ་ལ་བཀའ་སྩལ་པ༔ རིགས་ཀྱི་བུ་ཕྱི་ནང་གསང་བ་གསུམ་གྱི་དབང་རིམ་བཞིན་རྫོགས་པར་བསྐུར་ལ་བཟློག་ཅིག༔ དེ་ནས་རྡོ་རྗེ་སེམས་དཔའ་དང་༔ ཕྱག་ན་རྡོ་རྗེ་གཉིས་ཀྱིས་སེམས་ཅན་ལུས་སྲུལ་པོ་དེའི་དྲུང་དུ་བྱོན་ཏེ༔ ཕྱི་ནང་གསང་གསུམ་གྱི་དབང་བསྐུར་བས༔ སྔོན་གྱི་ལས་ཀྱི་རྣམ་པར་སྨིན་པ་དྲན་ཏེ་འགྱོད་པ་སྐྱེས་སོ༔ སྒྲིབ་པ་བྱང་སྟེ་དཀྱིལ་འཁོར་གྱི་ལྷ་རྗེས་སུ་དྲན་ནོ༔ སྤྲུལ་པ་གཉིས་ལ་ངོ་གནོང་སྟེ༔ ཀྱཻ་མ་ཀྱི་ཧུད་ཀྱི་ཧུད་གནོང་༔ སངས་རྒྱས་སྤྲུལ་པས་བདག་ལ་སྐྱོབས༔ བདག་འདྲ་སྲུལ་པོ་ལུས་ངན་སྡུག་བསྔལ་ན༔ འདི་ལས་ཐར་ཐབས་བདག་ལ་སྩོལ༔ ཞེས་ཞུས་སོ༔ དེ་ནས་རྡོ་རྗེ་སེམས་དཔས་ལུས་སྲུལ་པོ་དེ་ལ་བཀའ་སྩལ་པ༔ ཉོན་ཅིག་ལས་ངན་སེམས་ཅན་གཅེར་བུ་ཁྱོད༔ ལུས་ཀྱིས་སྒོ་ནས་ཕྱག་འཚལ་ལོ༔ ངག་གིས་སྒོ་ནས་ཀྱང་དཀྱིལ་འཁོར་གྱི་ལྷ་ཚོགས་རྣམས་ཀྱི་མཚན་ནས་ཐོན་ཅིག༔ ཡིད་ཀྱིས་སྒོ་ནས་འགྱོད་པ་དྲག་པོ་བསྐྱེད་ལ༔ འགྱོད་བཤགས་དྲག་པོ་གྱིས་ཤིག༔ ཅེས་གསུངས་ནས༔ རྡོ་རྗེ་སེམས་དཔས་འགྱོད་ཚངས་ཀྱི་བཤགས་པ་རྣ་བར་བསྒྲགས་ཏེ་རྐྱང་ཕྱག་འཚལ་དུ་བཅུག་སྟེ་བཤགས་པ་བྱས་སོ༔ ཕྱག་ན་རྡོ་རྗེས་དབང་རིམ་པ་བཞིན་དུ་བསྐུར་བས་དེའི་མྱུ་གུ་སྔོན་པོ་སྐམ་པ་སླར་གསོས་ཏེ་ཀུན་གཞི་བྱང་ཆུབ་ཀྱི་སེམས་དང་འཕྲད་པར་བྱས་ཏེ༔ ༼བསྒོམ་པས་༽འཇུག་རིམ་རྣམ་པ་ལྔར་རིམ་གྱིས་བགྲོད་པར་གྱུར་ཏོ༔ དགེ་བ་གང་མཆིས་སེམས་ཅན་དོན་དུ་བསྔོ༔ ས་མ་ཡ༔ རྒྱ་རྒྱ་རྒྱ༔ ཤུ་བྷཾ༔