བྲམ་ཟེ་དུང་ཕྲེང་ཅན་གྱི་ལོ་རྒྱུས།
ཞི་ཁྲོ་ན་རཀ་བསྐང་བཤགས་ལས་བྲམ་ཟེ་དུང་ཕྲེང་ཅན་གྱི་ལོ་རྒྱུས་ཟུར་ཙམ་བཞུགས་སོ༔ རྒྱ་གར་སྐད་དུ༔ ན་ར་ཀ༔ པྲེ་ཏ་ཀ༔ ཏིར་ཡ་ཀ༔ ནི་བྷན་ཤན་དྷེ་ཝ༔ ཨ་ལི་བྷི་ཤུད་དྷེ༔ དག་ཤ་ཀ་ཤུད་དྷེ་ན་མ༔ བོད་སྐད་དུ༔ དམྱལ་བ༔ ཡི་དྭགས༔ བྱོལ་སོང་༔ ལྷ་དང་༔ མི་དང་༔ ལྷ་མ་ཡིན༔ འགྲོ་དྲུག་དོང་སྤྲུགས་པ་ཞེས་བྱ་བ༔ བཅོམ་ལྡན་འདས་ཆོས་སྐུ་རྡོ་རྗེ་འཆང་ཆེན་དཔལ་ཀུན་ཏུ་བཟང་པོ་ལ་ཕྱག་འཚལ་ལོ༔ འདི་སྐད་བདག་གི་ཐོས་པ་དུས་གཅིག་ན༔ འཇིག་རྟེན་གྱི་ཁམས་མི་མཇེད་འདི་ན༔ བྲམ་ཟེ་དུང་གི་ཕྲེང་བ་ཅན་ཞེས་བྱ་བ༔ རྒྱལ་བ་རྣམས་ལ་བསྙེན་བཀུར་བྱེད་ཅིང་རིགས་པའི་གནས་ལྔ་ལ་མཁས་པ༔ བྱང་ཆུབ་སེམས་དཔའི་རིགས་ཅན་གཅིག་བས་མཐའི་དུར་ཁྲོད་གཅིག་ཏུ་སྒྲུབ་པ་བྱེད་པ་ལ༔ ཡུལ་ཁམས་སྐྱོང་བའི་རྒྱལ་པོའི་བུ་གཅིག་སློབ་བུ་བྱས་ནས་རིགས་པའི་གནས་ལྔ་ལ་མཁས་པར་གྱུར་ཏོ༔ རྒྱལ་བུས་བྲམ་ཟེ་སློབ་དཔོན་དེ་ཁོ་རང་གི་གོང་ན་གནས་པ་དེ་ལ་ཕྲག་དོག་བྱས་ཏེ་ངན་སེམས་བསྐྱེད་ནས༔ སློབ་དཔོན་ལ་ཚུལ་མ་ཡིན་པའི་གསོད་ལུགས་སྣ་ཚོགས་བྱས་ཏེ་སློབ་དཔོན་བཀྲོངས་སོ༔ དེ་ནས་རྒྱལ་བུ་ཚེ་འཕོས་སེམས་ཅན་ལུས་སྲུལ་པོ་གཅེར་བུ་ཅན་ཞེས་བྱ་བ༔ ལུས་གཅིག་ལ་དམྱལ་བ་ཡི་དྭགས་བྱོལ་སོང་ལྷ་དང་མི་དང་ལྷ་མ་ཡིན་དང་༔ འགྲོ་དྲུག་གི་སྡུག་བསྔལ་མྱོང་བ་ཞིག་ཏུ་སྐྱེས་སོ༔ དམྱལ་བའི་གནས་སུ་མནར་མེད་པའི་རྡོ་རྗེ་དམྱལ་བ་ཞེས་བྱ་བའི་སྡུག་བསྔལ་མྱོང་༔ ཡི་དྭགས་ཀྱི་གནས་སུ་ཕྱི་ནང་གཉིས་ཀའི་སྒྲིབ་པ་ཅན་གྱི་སྡུག་བསྔལ་མྱོང་ངོ་༔ ལྷའི་གནས་སུ་སུམ་ཅུ་རྩ་གསུམ་དགེ་བའི་ཚུལ་ཞེས་བྱ་བ༔ ལྷ་མོས་ཡོངས་སུ་བསྐོར་བ་ལ་ལྟུང་བའི་སྡུག་བསྔལ་མྱོང་ངོ་༔ མིའི་གནས་སུ་སེམས་ཅན་ལུས་སྲུལ་པོ་གཅེར་བུ་ཅན་ཞེས་བྱ་བ༔ ལུས་ལ་ནད་སྣ་ཚོགས་པ་དང་༔ ཤ་ཟ་མོ་སྟོང་གིས་ཚང་བཅས་པ་གཅིག་ཏུ་སྐྱེས་སོ༔ འགྲོ་བ་རིགས་དྲུག་གི་སྡུག་བསྔལ་ཐམས་ཅད་དུས་གཅིག་ལ་མྱོང་བ་ལ༔ ཕྱོགས་བཅུ་དུས་གསུམ་གྱི་བདེ་བར་གཤེགས་པའི་ཡེ་ཤེས་ཀྱི་བདག་ཉིད༔ བཅོམ་ལྡན་འདས་ཆོས་སྐུ་རྡོ་རྗེ་འཆང་ཆེན་པོ་དཔལ་ཀུན་ཏུ་བཟང་པོ་དང་༔ དུས་གསུམ་གྱི་བདེ་བར་གཤེགས་པ་ཐམས་ཅད་ཀྱི་གཙོ་བོ་བཅོམ་ལྡན་འདས་ལོངས་སྐུ་ཀུན་རིགས་རྣམ་པར་སྣང་མཛད་ཀྱིས༔ ཕྱོགས་བཅུའི་བདེ་བར་གཤེགས་པ་ཐམས་ཅད་བསྐུལ་མ་མཛད་དོ༔ ཐུགས་རྗེས་ལུས་སྲུལ་པོ་དེ་ལ་གཟིགས་ནས༔ ཀུན་ཏུ་བཟང་པོས་ཐུགས་ཀ་ནས་རྡོ་རྗེ་སེམས་དཔའ་སྤྲུལ་ཏེ༔ ཀུན་ཏུ་བཟང་པོས་རྡོ་རྗེ་སེམས་དཔའ་བསྐུལ༔ རྣམ་པར་སྣང་མཛད་ཀྱིས་ཕྱག་ན་རྡོ་རྗེ་སྤྲུལ་ཏེ༔ ཀྱཻ་སྤྲུལ་པ་རྣམས་གཉིས་འདོད་ཁམས་ཀྱི་གནས་མ་ཀི་ན༔ སེམས་ཅན་ལུས་སྲུལ་པོ་གཅེར་བུ་ཅན་ཞེས་བྱ་བ༔ ལུས་གཅིག་ལ་འགྲོ་བ་རིགས་དྲུག་དུས་གཅིག་བླངས་ནས༔ འགྲོ་བ་རིགས་དྲུག་གི་སྡུག་བསྔལ་དུས་གཅིག་ལ་མྱོང་བ་ཅན་ཞེས་ཤིན་ཏུ་སྡུག་བསྔལ་བ་དེ་ཁྱོད་གཉིས་བ ཟློག་ཅིག༔ འདི་ཁྱེད་གཉིས་ཀྱིས་མ་བཟློག་ན༔ ལས་ཀྱི་རྣམ་པར་སྨིན་པ་གཞན་མི་མཛད་༼འཛད་༽ཅིང་༔ ཐར་པའི་དུས་མི་འོང་གི༔ སློབ་དཔོན་ལ་སློབ་མས་དམ་ཚིག་ཉམས་པ་ནི༔ བྱང་ཆུབ་ཀྱི་མྱུ་གུ་སྔོན་མོ་སྐམ་སྟེ་ཐར་བའི་དུས་མེད་དོ༔ ཅེས་བཀའ་སྩལ་པ་དང་༔ སྤྲུལ་པ་གཉིས་ཀྱིས་ཞུས་པ༔ ཆོས་སྐུ་རྡོ་རྗེ་འཆང་དཔལ་ཀུན་ཏུ་བཟང་པོ༔ སེམས་ཅན་ལུས་སྲུལ་པོ་འདི༔ བདག་ཉིད་ཀྱིས་འདུལ་བའི་དུས་ལ་བབས་ན༔ འགྲོ་དྲུག་གི་སྡུག་བསྔལ་ལས་འདྲེན་པའི་ཐབས་བསྟན་ཏུ་གསོལ༔ ཞེས་ཞུས་པས༔ ཆོས་སྐུ་རྡོ་རྗེ་འཆང་དཔལ་ཀུན་ཏུ་བཟང་པོས༔ རྡོ་རྗེ་སེམས་དཔའ་ལ་བཀའ་སྩལ་པ༔ སྤྲུལ་སྐུ་རྡོ་རྗེ་སེམས་དཔའ་ཁྱེད་ཀྱིས་ཞི་ཁྲོའི་དཀྱིལ་འཁོར་གྱིས་ཟློག་ཅིག༔ ལྷ་རྣམས་ཀྱི་མཚན་བརྗོད་ཅིང་ཕྱག་འཚལ་བ་དང་༔ རིགས་ལྔའི་ཡི་གེ་བརྒྱ་པའི་གསང་མཚན༔ སེམས་ཅན་ལུས་སྲུལ་པོའི་རྣ་བར་སྒྲོགས་ལ་ཐོན་ཅིག༔ ཅེས་བཀའ་སྩལ་ཏོ༔ ལོངས་སྐུ་ཀུན་རིགས་རྣམ་པར་སྣང་མཛད་ཀྱིས༔ སྤྲུལ་སྐུ་ཕྱག་ན་རྡོ་རྗེ་ལ་བཀའ་སྩལ་པ༔ སྤྲུལ་སྐུ་ཕྱག་ན་རྡོ་རྗེ་ཁྱོད་ཀྱིས་སེམས་ཅན་ལུས་སྲུལ་པོ་དེ་ལ་ཕྱི་ནང་གསང་གསུམ་གྱི་དབང་བསྐུར་ལ་ཐོན་ཅིག༔ ཅེས་བཀའ་སྩལ་ནས༔ དེ་ནས་སྤྲུལ་སྐུ་གཉིས་སེམས་ཅན་ལུས་སྲུལ་པོ་དེའི་གནས་སུ་བྱོན་ཏེ༔ ལག་ན་རྡོ་རྗེས་ཕྱི་ནང་གསང་གསུམ་གྱི་དབང་བསྐུར་བས༔ སྔོན་གྱི་རྣམ་པར་སྨིན་པ་དྲན་ཏེ༔ འགྱོད་པ་སྐྱེས༔ སྒྲིབ་པ་བྱང་ཏེ༔ དཀྱིལ་འཁོར་གྱི་ལྷ་རྣམས་རྗེས་སུ་དྲན་ནོ༔ རྡོ་རྗེ་སེམས་དཔའ་དང་ལག་ན་རྡོ་རྗེ་གཉིས་ལ་ངོ་གནོང་ཏེ༔ ཀྱེ་མ་ཀྱི་ཧུད་ཀྱི་ཧུད་གནོང་༔ སངས་རྒྱས་སྤྲུལ་པས་བདག་ལ་སྐྱོབས༔ བདག་འདྲ་སྲུལ་པོ་ལུས་ངན་ནས༔ འདི་ལས་ཐར་ཐབས་བདག་ལ་གནང་དུ་གསོལ༔ ཞེས་ཞུས་པ་དང་༔ རྡོ་རྗེ་སེམས་དཔས་ལུས་སྲུལ་པོ་དེ་ལ་བཀའ་སྩལ་པ༔ ཉོན་ཅིག་ལས་ངན་གཅེར་བུ་ཁྱོད༔ ལུས་ཀྱི་སྒོ་ནས་ཕྱག་འཚལ་ལོ༔ ངག་གི་སྒོ་ནས་དཀྱིལ་འཁོར་གྱི་ལྷ་རྣམས་ཀྱི་མཚན་ཐོན་ཅིག༔ ཡིད་ཀྱི་སྒོ་ནས་འགྱོད་པ་དྲག་པོས་བཤགས་ཚངས་གྱིས་ཤིག༔ ཅེས་གསུངས་སོ༔ ན་རཀ་དོང་སྤྲུགས་གླེང་གཞིའི་ལེའུ་སྟེ་དང་པོའོ༔ དེ་ནས་རྡོ་རྗེ་སེམས་དཔས་བཀའ་སྩལ་པ༔ ཨ་ལ་ལ་ཧོ༔ སྟོང་གསུམ་གྱི་སྟོང་ཆེན་པོའི་འཇིག་རྟེན་ཀྱི་ཁམས་ན༔ རང་བཞིན་རྣམ་པར་དག་པ་ན་བཞུགས་པའི་བདེ་བར་གཤེགས་པ་རྡོ་རྗེའི་རིགས་དང་༔ དེ་བཞིན་གཤེགས་པའི་རིགས་དང་༔ རིན་པོ་ཆེའི་རིགས་དང་༔ པདྨའི་རིགས་དང་༔ ལས་ཀྱི་རིགས་ལ་སོགས་པ་འཁོར་རྒྱལ་བ་རྒྱ་མཚོའི་ཚོགས་དང་བཅས་པ་ལ་ཕྱག་འཚལ་ལོ༔ ཡིད་བྱེད་པ་པོ་ཀུན་ཏུ་བཟང་པོ་ལ་ཕྱག་འཚལ་ལོ༔ ཆོས་བྱ་བ་མོ་ཀུན་ཏུ་བཟང་མོ་ལ་ཕྱག་འཚལ་ལོ༔ བཅོམ་ལྡན་འདས་དཔལ་རྣམ་པར་སྣང་མཛད་ལ་ཕྱག་འཚལ་ལོ༔ བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ བཅོམ་ལྡན་འདས་རིན་ཆེན་འབྱུང་ལྡན་ལ་ཕྱག་འཚལ་ལོ༔ སོགས་བརྗོད༔ ཞེས་ཞི་ཁྲོའི་རིགས་བརྒྱའི་ལྷ་སོ་སོའི་གསང་མཚན་བརྗོད་པ་སོགས་མང་དུ་འདུག་ཀྱང༔ ཡི་གེ་མང་གི་འཇིགས་ནས་མ་བྲིས་སོ༔ ཉེས་འགལ་ཅི་མཆིས་ལྷ་དང་བསྲུང་མ་རྣམས་ལ་བཤགས༔ ༀ་བཛྲ་ས་ཏྭ་ཧཱུྃ༔