གཏོར་དབང་རེག་པ་དོན་ལྡན།
ཟབ་ཆོས་ཞི་ཁྲོ་དགོངས་པ་རང་གྲོལ་ལས་གཏོར་དབང་རེག་པ་དོན་ལྡན་བཞུགས་སོ༔
ཞི་ཁྲོ་རྩ་གསུམ་ལྷ་ལ་ཕྱག་འཚལ་ལོ༔ ཟབ་ཆོས་ཞི་ཁྲོ་དགོངས་པ་རང་གྲོལ་གྱི༔ གཏོར་དབང་རེག་པ་དོན་ལྡན་བསྐུར་བ་ནི༔ རྒྱུད་ལས༔ མཐའ་བརྟེན་གཏོར་མའི་དབང་བསྐུར་ནི༔ སྨོན་ལམ་དང་བཅས་བུ་ལ་བསྐུར༔ ཞེས་པས༔ གཏོར་མའི་རྒྱུ་ནི་སྤོད་སྣ་ཚོགས་དང་༔ མངར་གསུམ་གར་ཆང་གིས་སྦྲུས་པ་ལ༔ གཏོར་མ་ཟླུམ་པོ་པད་འདབ་བརྒྱད་ཀྱིས་བསྐོར་བའི་རྩེ་མོ་རྡོ་རྗེ་ཕྱེད་པས་མཚན་པ༔ གཡས་གཡོན་གཉིས་སུ་ཉི་ཟླས་བརྒྱན་པ༔ དཀར་དམར་མཐིང་ག་༼ཐིག་༽གུར་དང་རྩ་བ་གསུམ་གྱི་ཙཀླིའི་བརྒྱན༔ དར་སྣ་ལྔའི་གུར་ཕུབ༔ ཟས་སྣ་དང་སྨན་སྣས་བྲན༔ དཀྱིལ་འཁོར་གྱི་དབུས་སུ་བཀོད༔ གཏོར་ཚོགས་དང་ཕྱི་ནང་གསང་མཆོད་ཀྱིས་བསྐོར༔ རོལ་མོ་སྣ་ཚོགས་སྦིར་ཞིང་༔ ལས་བྱང་རྒྱས་བསྡུས་འབྲིང་གསུམ་གང་རུང་བསྲང་༔ ཚོགས་འཁོར་རྒྱས་པར་ཐོན་ནས་དུས་ལ་བབས་དུས༔ རྒྱལ་ཐེབས་ཀྱིས་གཏོར་ཆེན་བཟུང་༔ བླ་མ་རྒྱན་དང་ལྡན་པས་རྡོ་རྗེ་དྲིལ་བུ་ཐོགས༔ གཟུངས་མས་བདུད་རྩི་ཀ་པཱ་ལ་ཁྱེར༔ ལས་གཡོག་པས་སྤོས་བསྲེེག༔ རོལ་མོ་སྣ་ཚོགས་སྦིར་ཞིང་༔ གཏོར་ཆེན་སློབ་བུའི་སྤྱི་བོར་བཞག་ལ་འདི་སྐད་དོ༔ འོ་སྐལ་ལྡན་རིགས་ཀྱི་བུ༔ དད་པ་དང་དམ་ཚིག་ལྡན་པ་རྣམས་ཉོན་ཅིག༔ གཏོར་མའི་སྣོད་གཞལ་ཡས་ཁང་སུམ་ཐོག་གི་ནང་ན༔ རྩེ་མོ་ན་བླ་མ་རྣམས་བཞུགས་པ༔ བར་ན་ཡི་དམ་ལྷ་ཚོགས་རྣམས་བཞུགས་པ༔ འོག་ན་མ་དང་མཁའ་འགྲོ་རྣམས་བཞུགས་པ༔ འདབས་འཁོར་ན་ཆོས་སྐྱོང་རྣམས་ཁྲོམ་ཚོགས་པ་བཞིན་དུ་བཞུགས་པར་བསམ༔ ལྷ་ཚོགས་དེ་དག་རྣམས་ཀྱི་སྐུ་གསུང་ཐུགས་ནས་བདུད་རྩི་འོད་ཟེར་དང་བཅས་པ་ཁྱེད་རང་རྣམས་ཀྱི་སྤྱི་བོ་ནས་མར་ལན་གསུམ་བབས་པས༔ དང་པོས་སྡིག་སྒྲིིབ་རྣམས་དག༔ གཉིས་པས་ལུས་ཁེངས༔ གསུམ་པས་གནས་གསུམ་དུ་འབྲུ་གསུམ་གྱིས་བརྒྱན་པར་སྒོོམས་ལ༔ མོས་གུས་དྲག་པོ་སྐྱེད་ཅིག༔ ༀ་ཨཱཿཧཱུྃ༔ སྐྱེ་མེད་དབྱིངས་ཀྱི་གཏོར་སྣོད་དུ༔ འགགས་མེད་སྣང་བའི་གཏོར་ཆེན་བཤམས༔ རོལ་རྩལ་སྣ་ཚོགས་རྒྱན་གྱིས་སྤྲས༔ རྩ་བ་གསུམ་གྱི་ལྷ་ཚོགས་ཀྱི༔ དབང་འདི་ཁྱོད་ལ་བསྐུར་བར་བྱ༔ དབང་མཆོག་འདི་ཡི་བྱིན་རླབས་ཀྱིས༔ སྐྱེ་གནས་བར་དོར་གྲོལ་བར་ཤོག༔ རྨི་ལམ་བར་དོར་ངོ་ཤེས་ཤོག༔ བསམ་གཏན་བར་དོར་གདིང་ཐོབ་ཤོག༔ འཆི་ཁ་བར་དོར་རང་གྲོལ་ཤོག༔ ཆོས་ཉིད་བར་དོར་ངོ་ཤེས་ཤོག༔ སྲིད་པ་བར་དོར་དབུགས་དབྱུང་ནས༔ གཞན་དོན་དཔག་མེད་འགྲུབ་པ་དང་༔ སྐུ་གསུམ་ལྷུན་གྱིས་གྲུབ་པར་ཤོག༔ གུ་རུ་དྷེ་ཝ་དྷཱ་ཀི་ནཱི་སརྦ་སིདྡྷི་ཕ་ལ་ཨ་བྷི་ཥིཉྩ་ༀ་ཨཱཿཧཱུྃ་ཧྲཱི༔ ཞེས་བརྗོད་པས་རང་རང་རྣམས་རྩ་བ་གསུམ་གྱི་ངེས་ཤེས་གདེངས་དང་ལྡན་པར་བྱའོ༔ དེ་ནས་གཡས་སུ་དངོས་གྲུབ༔ གཡོན་དུ་བྷནྡྷའི་བདུད་རྩི་བསྣམས༔ ངག་ཏུ༔ ཀཱ་ཡ་སིདྡྷི་ༀ༔ ཝཱཀ྄་སིདྡྷི་ཨཱ༔ ཙིཏྟ་སིདྡྷི་ཧཱུྃ༔ སརྦ་སིདྡྷི་ཧྲཱི༔ ཞེས་ཚར་གསུམ་བརྗོད་ཅིང་རང་ཡི་དམ༔ མགྲིན་པར་བླ་མ༔ ལྟེ་བར་མཁའ་འགྲོ་ཆོས་སྐྱོང་རྣམས་གསལ་བས་དུས་གཅིག་རོལ་བར་བྱའོ༔ ཚེག་ཆུང་དོན་ཆེ་དངོས་གྲུབ་མྱུར༔ གཏོར་དབང་རེག་པ་དོན་ལྡན་འདི༔ རྒྱུད་ལ་བརྟེན་ཏེ་པདྨས་བཀོད༔ མཚོ་རྒྱལ་བདག་གིས་ཟིན་བྲིས་བྱས༔ ཕྱི་རབས་རྣམས་ལ་ཕན་ཐོགས་ཤོག༔ ས་མ་ཡ༔ རྒྱཿརྒྱཿརྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གྲུབ་ཐོབ་ཀརྨ་གླིང་པས་སྒམ་པོ་གདར་གྱི་རི་བོ་ནས་བཏོན་པའོ།། །།