དབང་གི་སྔོན་འགྲོ་ལྷན་ཐབས།

ཟབ་ཆོས་ཞི་ཁྲོ་དགོངས་པ་རང་གྲོལ་ལས་དབང་གི་སྔོན་འགྲོ་ལྷན་ཐབས་བཞུགས་སོ། །ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ། །སྐོང་བཤགས་ཉམས་ཆག་རང་གྲོལ་གྱི་དབང་གི་སྔོན་འགྲོའི་ལྷན་ཐབས་འདི་ལ་གསུམ་སྟེ། དཀྱིལ་འཁོར་གྱི་བཀོད་པ་བཤམས་ཞིང་བུམ་པ་སྟ་གོན་བྱ་བ་དང་གཅིག སློབ་མས་སྔོན་འགྲོའི་སྟ་གོན་གྱི་རིམ་པ་ལ་འཇུག་པ་དང་གཉིས། དལ་དུ་འཇུག་ཅིང་དབང་བསྐུར་བ་དང་གསུམ་མོ། །དང་པོ་དཀྱིལ་འཁོར་བཀོད་པ་ནི། དབེན་ཞིང་ཡིད་དུ་འོང་བའི་གནས་སུ། ཞི་ཁྲོའི་དཀྱིལ་འཁོར་བྲི་བ་རྒྱན་བཀོད་པ་མཆོད་གཏོར་དང་བུམ་པ་བཤམས་པ་ལ་སོགས་ཞི་ཁྲོ་གཞན་དང་འདྲའོ། །དབང་རྫས་རྣམས་རང་གཞུང་ནས་གསུངས་པ་ལྟར། སྟ་གོན་བྱའོ། །སློབ་མ་སྔོན་འགྲོའི་སྟ་གོན་ལ་བཅུ་སྟེ། དང་པོ་ཕྱི་རོལ་དུ་སློབ་བུ་རྣམས་རྡོ་རྗེ་རྒྱལ་ཐེབ་ཀྱིས་ཁྲིད། ལས་བུམ་གྱི་ཆུས་བཀྲུ་ཞིང་། ཁྲུས་ཚིག་འདི་བརྗོད་དོ། །ཧཱུྃ། བདེ་གཤེགས་རྒྱལ་བ་རྣམས་ཀྱི་ཐུགས་རྗེའི་ཆུ། །སྐལ་ལྡན་རྣམས་ཀྱི་ལུས་ངག་ཡིད་གསུམ་ལ། །གནས་པའི་ཉེས་སྐྱོན་སྒྲིབ་པའི་ཚོགས་རྣམས་ཀུན། །བཀྲུ་བར་བགྱིའོ་བྱང་ཞིང་དག་གྱུར་ཅིག །ༀ་བཛྲ་ཨ་མྲྀ་ཏ་ཀུཎྜ་ལཱི་ཧཱུྃ། སྡིག་པ་དང་སྒྲིབ་པ་སརྦ་པཱ་པཾ་ད་ཧ་ན་ཤཱནྟི་ཾཀུ་རུ་སྭཱ་ཧཱ། ཞེས་པས་བཀྲུ་ཞིང་། སློབ་མ་རྣམས་ལ་ཡང་ཡིག་བརྒྱ་བཟླར་གཞུག་གོ ། གཉིས་པ་མཆེད་ལྕམ་རྣམས་ལ་མེ་ཐུན་དང་ཆུ་ཐུན་བརྡེག་ཅིང་། གར་གིང་དང་ཁྲོ་བོའི་ཆ་ལུགས་ཀྱིས་བགེགས་བསྐྲད་པ་དང་། རྡོ་རྗེ་སློབ་དཔོན་གྱིས་སུམྦྷ་སོགས་དྲག་སྔགས་ཀྱིས་བསྐྲད་པར་བྱའོ། །གསུམ་པ་རྡོ་རྗེ་སློབ་དཔོན་ཁྲི་ལ་བཞུགས་ཤིང་། གཡས་སུ་རྡོ་རྗེ་རྒྱལ་ཐེབ་དང་། གཡོན་དུ་གཟུངས་མ། ཕོ་ཐམས་ཅད་གཡས་མོ་ཐམས་ཅད་གཡོན་དུ་གྲལ་ལ་འཁོད་ལ། ཐམས་ཅད་ཀྱིས་གུས་པས་ཕྱག་འཚལ་ཞིང་ཡན་ལག་བདུན་པ་བྱའོ། །བཞི་པ་མཎྜལ་འབུལ་ཞིང་། དེ་ནས་གསོལ་བ་གདབ་པ་ནི། ཨེ་མ་མགོན་པོ་ཐུགས་རྗེ་ཅན། །རིགས་དྲུག་གནས་སུ་ལྟུང་བ་ཡི། །སྐྱབས་བྲལ་མགོན་མེད་སེམས་ཅན་ལ། །ཐུགས་རྗེའི་ལྕགས་ཀྱུས་བཟུང་དུ་གསོལ། །ལན་གསུམ་བྱའོ། ༈ ལྔ་པ་ནི་སློབ་དཔོན་གྱིས་དལ་འབྱོར་རྙེད་པར་དཀའ་བ་འདི་ལྟ་བུའི་ཆོས་དང་འཕྲད་པར་དཀའ་བའི་ཚུལ་དང་། འགྱོད་ཚངས་རྒྱལ་པོའི་འབྱུང་ཁུངས། ཁྱད་པར་བྲམ་ཟེ་དུང་གི་ཕྲེང་བའི་ལོ་རྒྱུས་རྣམས་རྒྱས་པར་གསུངས།

༈ དྲུག་པ་དངོས་གྲུབ་ཀྱི་པྲ་བརྟགས་སོ་ཤིང་དོར་བ་ནི། །ཤིང་སོར་བཅུ་གཉིས་པ་མགོ་མཇུག་མ་ལོག་པ། སྟོད་རྒྱ་མདུད་ཆང་ཟུང་ལྕིམ་གཞོག་ལ། སྨད་ཟླ་གམ་དབྱིབས་ཅན། མེ་ཏོག་སྔོན་པོ་དང་། དར་མཐིང་གའི་ཅོད་པན་གྱིས་སྤྲས་པ་སློབ་མའི་གྲངས་དང་མཉམ་པའམ། མ་འབྱོར་ན་ལྔ་ལ་བྱའོ། །དཀྱིལ་འཁོར་ཀྱི་ནུབ་ཏུ་པདྨ་འདབ་བཞིའི་དལ་ལམ། ཚོམ་བུ་ལྔ་བཀོད་ལ་རིགས་ལྔར་བསྐྱེད། མཆོད་བསྟོད་བསྡུས་པ་ཞིག་བྱས་པའི་སྟེང་དུ། ལག་གཉིས་ཐལ་མོའི་བར་དུ་བཅུག་ལ་དོར། ཀྱེ། བུ་ཁྱོད་དཀྱིལ་འཁོར་ཆེན་པོ་རུ། །ཞུགས་ནས་དངོས་གྲུབ་བརྟག་བྱའི་ཕྱིར། །ཡེ་ཤེས་ལྔ་ལྡན་སོ་ཤིང་འདི། །རྡོ་རྗེ་ཐལ་སྦྱར་སོ་ཡིས་དོར། །ཅེས་སོ་རྩ་བྲུ་བའི་ཚུལ་གྱིས་དཀྱིལ་འཁོར་གྱི་དབུས་སུ་གཏད་དེ། དོར་བའི་ཚིག་ནི། ཀྱེ་ཧོ། བླ་མས་ཇི་ལྟར་བསྒོས་པ་ལྟར། །ཚད་དང་ལྡན་པའི་སོ་ཤིང་འདི། །དངོས་གྲུབ་དམ་པ་ཐོབ་བྱའི་ཕྱིར། །དཀྱིལ་འཁོར་དབུས་སུ་དོར་བར་བྱ། །དངོས་གྲུབ་ཇི་ལྟར་འབྱུང་བ་ཡི། །ཕྱོགས་ཀྱི་ལྷ་ལ་ཕོག་པར་ཤོག །ༀ་གུ་རུ་དྷེ་ཝ་ཌཱ་ཀི་ནཱི་བཛྲ་ཧཱ་ས་ཧ། ཞེས་པས་དོར་བས་ཤར་དུ་རྩེ་མོ་བསྟན་ན་ཞི་བ། དེ་བཞིན་དུ་ལྷོར་རྒྱས་པ། ནུབ་ཏུ་དབང་། བྱང་དུ་དྲག་པོ། སྟེང་དུ་མཁའ་སྤྱོད་དམ་མཆོག་ཐོབ། འོག་ཏུ་ས་སྤྱོད། མཚམས་སུ་དངོས་གྲུབ་ཕྲན་ཚེག་རེ་འགྲུབ། ཕྱིར་སོང་ན་བསྐྱལ། ཆགས་པ་དང་གས་པ་བྱུང་ན་སློབ་མ་དེ་ལ་བར་ཆད་འོང་ཉེན་ཡོད་པས་རྐྱེན་བཟློག་ལ་འབད། མེ་ཏོག་ཅོད་པན་ཟག་ན་གོད་ཀ་འོང་ཉེན་ཡོད་པས་དེའི་ཆོ་ག་ལ་བརྩོན་པར་བྱའོ། །དལ་བསྡུ་ལྷ་གཤེགས་མི་དམིགས་པའི་རྒྱས་གདབ་བོ། །༈ བདུན་པ་ཁྱོར་ཆུ་བླུད་པ་ནི། ལས་ཐམས་ཅད་པའི་ཆུ་དུང་ཞལ་དུ་བླུགས་ཏེ། བཾ་ལས་བྱུང་བའི་ཆུ་དེ་བཾ་བདུན་བརྗོད་པས་གཡས་ཀྱི་ལག་པར་སྦྱིན་ཞིང་། ༀ་ཧྲཱིཿབི་ཤུདྡྷེ་སརྦ་དྷརྨ། སརྦ་པཱ་པཾ་ནི་ཙཪྻ། སརྦ་སཾ་ཤྭ་དྷ་ནི། སརྦ་བི་ཀ་ལ་པ་ཨཱ་པ་ནཱ་ཡ་ཧཱུྃ། ཞེས་བརྗོད་ཅིང་ལན་གསུམ་འཐུང་དུ་བཅོལ།

༈ བརྒྱད་པ་སྲུང་སྐུད་དམར་པོ་གསུམ་སྒྲིལ་མཐོ་གསུམ་པ་ལ། རིགས་གསུམ་མགོན་པོའི་སྔགས་བཟླ་ཤིང་མདུད་ལ། ཕོའི་གྲུ་མོ་གཡོན། མོའི་གྲུ་མོ་གཡས་སུ་གདག་ཅིང་། རྡོ་རྗེ་ཐེག་པའི་དཀྱིལ་འཁོར་དུ། །འཇུག་པའི་བར་ཆད་བྱེད་པའི་བགེགས། །བསྲུང་ཕྱིར་རྡོ་རྗེའི་སྲད་བུ་འདི། །སྐལ་ལྡན་ཁྱོད་ལ་གདག་པར་བགྱི། །ༀ་གུ་རུ་དྷེ་ཝ་ཌཱ་ཀི་ནཱི་བུདྡྷ་མཻ་ཏྲི་སརྦ་རཀྵ་རཀྵ་སརྦ་སྭཱ་ཧཱ། ཞེས་པས་གདབ་བོ། །

༈ དགུ་པ་རྩྭ་ཀུ་ཤ་ལ་ཧཱུྃ་ལས་བྱུང་བའི་སྔས་སྟན་བསམས་ལ། ལག་པ་གཡས་གཡོན་དུ་གཏད་ལ། སྐལ་ལྡན་ཁྱོད་ནི་དུས་གསུམ་དུ། །དགེ་དང་མི་དགེ་གྱུར་པ་གང་། །དཀྱིལ་འཁོར་འདི་འདྲ་མཐོང་བ་ཡི། །བརྟག་པར་བྱ་ཕྱིར་སྔས་སྟན་སྦྱིན། །ལེགས་ཉེས་མཚན་མ་ཅི་བྱུང་ཡང་། །ནང་པར་ང་ལ་མ་གསང་སྨྲོས། །ༀ་བཛྲ་ཏིཀྵ་ཎ་བྃ། ཞེས་བྱིན། སློབ་མས། ༀ་བཛྲ་ཏིཀྵ་ཎ་སིདྡྷི་ཧཱུྃ། ཞེས་བླངས་ལ། གཡས་སུ་གཏད་པ་ལ་སྔས། གཡོན་དུ་གཏད་པ་ལ་གདན་བྱས་ཏེ། གཙང་ཞིང་དབེན་པའི་སར་སེང་གེའི་ཉལ་སྟབས་བྱ་ལ་ཉལ་ཞིང་། ༀ་མུ་ཙི་ནི་སྭཱ་ཧཱ། ༀ་མུ་ཁ་ལེ་སྭཱ་ཧཱ། ༀ་མོ་ཧ་ནི་སྭཱ་ཧཱ། ༀ་དྷ་ན་དྷ་ལི་སྭཱ་ཧཱ། ཅེས་ཉེར་གཅིག་གམ་བརྒྱ་རྩ་བརྒྱད་བཟླས་ལ། བླ་མ་ཞི་ཁྲོ་རབ་འབྱམས་ཀྱི་དཀྱིལ་འཁོར་ལྷ་ཚོགས་ཐམས་ཅད་ལ་ཕྱག་འཚལ་ཞིང་སྐྱབས་སུ་མཆིའོ། །བདག་ལ་འདས་མ་འོངས་ད་ལྟ་དུས་གསུམ་གྱི་དགེ་དང་མི་དགེ་བའི་ལྟས་ཐམས་ཅད་བསྟན་དུ་གསོལ། །ཞེས་སྨོན་ལམ་བཏབ་ལ་ཉལ། ནང་པར་ལྟས་གང་བྱུང་རྡོ་རྗེ་རྒྱལ་པོ་ལ་བརྗོད་ལ། ངན་པའི་ལྟས་བྱུང་ན་ཆོ་ག་ལ་འབད་པར་བྱའོ། ༈ ། བཅུ་པ་ནི། ཞི་ཁྲོའི་འཛབ་བཟླ་བའམ། ཡང་ན་ཡི་གེ་བརྒྱ་པའི་འཛབ་ལ་འབད་པར་བྱའོ། །དེ་དག་ནི་སློབ་མ་སྔོན་འགྲོ་སྟ་གོན་གྱི་རིམ་པ་ལ་འཇུག་པའི་བྱ་བ་ཡིན་ནོ། །

༈ གསུམ་པ་དལ་དུ་འཇུག་ཅིང་སྔོན་འགྲོའི་དབང་བསྐུར་བ་ལ་གཉིས་ཏེ། སློབ་མ་དལ་དུ་འཇུག་པ་དང་། སྔོན་འགྲོའི་དབང་རིགས་དྲུག་གནས་ནས་དྲང་བའི་ཕྱིར་དུ་བསྐུར་བའོ། །དང་པོ་དལ་དུ་འཇུག་པ་ལ་བཅུ་གཅིག་སྟེ། དང་པོ་དལ་དུ་འཇུག་པའི་ཕྱིར་དུ། རྡོ་རྗེ་རྒྱལ་པོ་ལ་མཎྜལ་འབུལ་ཞིང་། ཁྱོད་རང་གི་ལུས་ལོངས་སྤྱོད་དང་བཅས་པ་ཕུལ་ནས་གསོལ་བ་གདབ་པ་ནི། ཨེ་མ་མགོན་པོ་ཐུགས་རྗེ་ཅན། །བདག་སོགས་འགྲོ་བ་མ་ལུས་པ། །ལོག་པའི་ལམ་དུ་ཞུགས་པ་རྣམས། །བདེ་ཆེན་ཐར་པའི་ལམ་བསྟན་འཚལ། །ཞེས་ལན་གསུམ་བྱའོ། །གཉིས་པ་སློབ་དཔོན་གྱིས་འདི་སྐད་ལན་སྦྱིན་པ་ནི། ཨེ་མ་འདིར་འདུས་སྐལ་ལྡན་ལས་ཅན་རྣམས། །སྔོན་ཆད་མ་རིགས་རྨོངས་པའི་ལས་དབང་གིས། །དུག་གསུམ་གྱིས་བཅིངས་ངན་སོང་གསུམ་དུ་མནར། །དེང་ནས་བརྩམས་ཏེ་རྒྱལ་བའི་ཐུགས་རྗེ་ཡི། །ཕོ་ཉས་བཟུང་སྟེ་དཀྱིལ་འཁོར་གྲལ་དུ་འགོད། །དོན་འབྲས་འདོད་ཕྱིར་དད་པའི་ཤུགས་བསྐྱེད་ལ། །སྐུ་གསུམ་ཞིང་ཁམས་ཕོ་བྲང་འདིར་ཤོག་ཅིག །བླ་མེད་དོན་གྱི་འབྲས་བུ་སྦྱིན་པར་བགྱི། །ཞེས་བརྗོད་པར་བྱའོ། །

༈ གསུམ་པ་སྐྱབས་སུ་འགྲོ་བ་ལ། མདུན་གྱི་ནམ་མཁར་དཀོན་མཆོག་གསུམ་དང་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་མངོན་སུམ་དུ་བཞུགས་པར་བསྒོམས་ལ་ཐལ་མོ་སྦྱར་ཞིང་། ཐུན་མོང་གི་སྐྱབས་འགྲོ་ཞུ་བའི་དོན་དུ་རྗེས་ཟློས་གྱིས་ཤིག ཨེ་མ་ཕྱོགས་བཅུའི་སངས་རྒྱས་བྱང་སེམས་དང་། །བླ་མ་ཡི་དམ་མཁའ་འགྲོ་དགོངས། །རྐང་གཉིས་གཙོ་བོ་སངས་རྒྱས་དང་། །ཞི་བ་ཆགས་བྲལ་དམ་པའི་ཆོས། །ཚོགས་མཆོག་འཕགས་པའི་དགེ་འདུན་ལ། །བདག་ནི་གུས་པས་སྐྱབས་སུ་མཆི། །ལན་གསུམ་བྱའོ། །ད་ཁྱད་པར་གྱི་སྐྱབས་འགྲོ་ཞུ་བའི་དོན་དུ་རྗེས་ཟློས་གྱིས་ཤིག་བྱས་ལ། ཀུན་བཟང་ཞི་ཁྲོའི་ལྷ་ཚོགས་དང་། །དམ་པ་རིགས་བརྒྱའི་ལྷ་ཚོགས་ལ། །འདི་བཟུང་བླ་མེད་བྱང་ཆུབ་བར། །གུས་པས་སྐྱབས་སུ་ཉེ་བར་མཆི། །ཞེས་ལན་གསུམ་བརྗོད་ལ། དེས་སྐྱབས་སུ་འགྲོ་བའི་སྡོམ་པ་སྔར་མ་ཐོབ་པ་ཐོབ་པ་ཡིན། ཉམས་ན་སོས་པར་འགྱུར་བ་ཡིན། དེ་ལ་བསླབ་བྱ་དགོས་པ་ཁྱད་པར་གྱི་བསླབ་བྱ་དྲུག ཐུན་མོང་གི་བསླབ་བྱ་ལྔ་སྟེ། བསླབ་བྱ་བཅུ་གཅིག་དང་ལྡན་པར་བྱེད་པ་གལ་ཆེའོ། །བཞི་པ་སོ་སོར་ཐར་པའི་སྡོམ་པ་ཞུ་བའི་དོན་དུ་རྗེས་ཟློས་གྱིས་ཤིག་བྱས་ལ། བླ་མ་ཀུན་བཟང་སྤྱན་སྔ་རུ། །ལུས་ངག་ཡིད་ཀྱིས་གཞན་རྣམས་ལ། །གནོད་པ་ལས་བཟློག་དགེ་བ་བསྒྲུབ། །དགེ་བསྙེན་དགེ་ཚུལ་དགེ་སློང་སོགས། །སོ་སོར་ཐར་པའི་སྡོམ་པ་ལ། །རྒྱུན་དུ་གནས་ཤིང་དགའ་བ་བསྒོམ། །སྡོམ་པ་ཡོངས་སུ་བཟུང་བར་བགྱི། །ཞེས་ལན་གསུམ་གྱིས་ཕྱི་སོ་ཐར་གྱི་སྡོམ་པ་བཟུང་བར་བྱ།

༈ ལྔ་པ་ནང་བྱང་ཆུབ་མཆོག་ཏུ་སེམས་བསྐྱེད་པ་ལ་དང་པོ་སྨོན་པ་སེམས་བསྐྱེད་བླང་བ་ནི། བླ་མ་ཀུན་བཟང་དགོངས་སུ་གསོལ། །འདི་བཟུང་བྱང་ཆུབ་མ་ཐོབ་པར། །འགྲོ་དྲུག་སེམས་ཅན་ཐམས་ཅད་ལ། །མ་དང་བུ་ཡི་འདུ་ཤེས་ཀྱིས། །མ་བརྒལ་བ་རྣམས་བསྒྲལ་བ་དང་། །མ་གྲོལ་བ་རྣམས་དགྲོལ་བ་དང་། །དབུགས་མ་ཕྱུང་རྣམས་དབུགས་དབྱུང་ཕྱིར། །སྨོན་པའི་བྱང་ཆུབ་སེམས་བསྐྱེད་དོ། །ཞེས་ལན་གསུམ་བྱ། དེ་རྗེས་འཇུག་པ་སེམས་བསྐྱེད་བླང་བ་ནི། སྔོན་གྱི་རྒྱལ་བ་ཐམས་ཅད་ཀྱང་། །སྡོམ་པ་ལ་ནི་གནས་པ་ལྟར། །འདི་བཟུང་འཁོར་བ་མ་སྟོངས་པར། །བླ་མེད་འཇུག་པའི་བྱང་ཆུབ་སེམས། །དེ་ནི་བདག་གིས་བསྐྱེད་པར་བགྱི། །ཕར་ཕྱིན་དྲུག་ལ་བསླབ་ཅིང་བསྒྲུབ། །བརྩོན་འགྲུས་དག་གིས་ཐམས་ཅད་བསྒྲལ། །ཀུན་དོན་ཚུལ་ཁྲིམས་གསུམ་ཡང་བཟུང་། །བདག་གིས་སེམས་བསྐྱེད་སྡོམ་བཟུང་ནས། །མ་གྲོལ་དགྲོལ་དང་མ་བརྒལ་བསྒྲལ། །དབུགས་དབྱུང་མྱ་ངན་འདས་ལ་འགོད། །ཅེས་ལན་གསུམ་བྱའོ། །དེ་ནས་སྨོན་འཇུག་གཉིས་ཀྱི་སྡོམ་པ་བྱང་སེམས་ཀྱི་བསླབ་བྱ་ཐོབ་པ་ཡིན་ནོ། །

༈ དྲུག་པ་གསང་སྔགས་ཀྱི་སྡོམ་པ་བླང་བ་ནི། འདིའི་རྗེས་ཟློས་མཛོད་ཅིག་བྱས་ལ། དཀོན་མཆོག་གསུམ་ནི་མི་སྤང་ངོ་། །རྡོ་རྗེ་དྲིལ་བུའི་ཕྱག་རྒྱ་དང་། །བྱང་ཆུབ་སེམས་ནི་སྤང་མི་བྱ། །རིན་ཆེན་རིགས་ཀྱི་དམ་ཚིག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །པདྨ་རིགས་ཀྱི་དམ་ཚིག་ཏུ། །ཐེག་པ་གསུམ་དང་ཆོས་རྣམས་བཤད། །ལས་ཀྱི་རིགས་ཀྱི་དམ་ཚིག་ཏུ། །འགྲོ་བའི་དོན་ལ་བརྩོན་པར་བྱ། །དེ་བཞིན་རིགས་ཀྱི་དམ་ཚིག་ཏུ། །དཀྱིལ་འཁོར་གསུམ་དང་འབྲལ་མི་བྱ། །རྩ་བ་ཡན་ལག་དམ་ཚིག་ཀུན། །མ་ལུས་བདག་གིས་ཡོངས་སུ་བཟུང། །ཞེས་ལན་གསུམ་གྱིས་རིགས་ལྔའི་དམ་ཚིག་གི་སྡོམ་པ་ལེགས་པར་ཐོབ་པ་ཡིན་ནོ། །ཞིབ་ཏུ་བྱེད་ན་དེ་དག་གི་དམ་ཚིག་རིམ་པར་བཤད་པར་བྱའོ། །༈ བདུན་པ་ནི། མིག་དར་དམར་པོས་གཡོགས་ལ། ༀ་ཨཱ་ཁཾ་ཝཱི་ར་ཧཱུྃ། ཞེས་བྱའོ། །

༈ བརྒྱད་པ་ཅོད་པན་ཐོགས་ནས་དཀྱིལ་འཁོར་བསྐོར་ལ། ཤར་སྒོ་དབྱེ་ལ་འདི་སྐད་བརྗོད། བདག་ཅག་རིག་པའི་མེ་ཏོག་འདི། །ཡི་དམ་ཞི་ཁྲོའི་ལྷ་ལ་འབུལ། །སྔོན་ནས་ལས་འཕྲོ་གང་ཡོད་པའི། །ཡི་དམ་ལྷ་ལ་བབ་པར་ཤོག །པྲ་ཏི་ཛ་ཧོ། ཞེས་ཅོད་པན་དཀྱིལ་འཁོར་གྱི་སྟེང་དུ་བསྐུར། མེ་ཏོག་གང་ཕོག་དེའི་གསང་མཚན་གདག་གོ ། དགུ་པ་ནམ་མཁའི་དཀྱིལ་འཁོར་ཁ་དོག་དྲིས་ལ། དཀར་པོ་མཐོང་ན་ཞི་བའི་ལས་འགྲུབ། དེ་བཞིན་དུ་སེར་པོ་ལ་རྒྱས་པ། དམར་པོ་ལ་དབང་། ནག་པོ་དང་ལྗང་ཀུ་ལ་དྲག་པོ། ཁྲ་བོ་ལ་སྣ་ཚོགས་འགྲུབ་པའོ། །

༈ བཅུ་པ་ནི་སློབ་དཔོན་གྱི་དྲུང་དུ་ཁྲིད་ལ། མིག་རས་དབྱེ་བ་ནི། ཇི་ལྟར་མིག་མཁན་རྒྱལ་པོ་ཡིས། །རབ་རིབ་ལིང་ཏོག་བསལ་བ་ལྟར། །དེ་བཞིན་བུ་ཁྱོད་མ་རིག་པའི། །ཉོན་མོངས་དྲུག་གིས་བསྒྲིབས་པ་ཡི། །མ་རིག་ལིང་ཏོག་བསལ་བར་བྱ། །ན་ར་ཀ། པྲེ་ཏ་ཀ། ཏིར་ཡ་ཀ། དེ་བ་ཨ་ལི། དེ་བ་ཨ་ནུ་ཤ། ཙཀྵུཿཔྲ་བེ་ཤ་ཡ་ཨཱ། ཞེས་བརྗོད་ལ་མིག་དར་དབྱེ་བར་བྱའོ། །༈ བཅུ་གཅིག་པ་ལྷ་ངོ་བསྟན་པ་ནི། དཀྱིལ་འཁོར་རྣམ་དག་དང་ལྷའི་བཞུགས་ཚུལ་རྣམས་བརྗོད་ཅིང་། ཡི་དམ་གྱི་ལྷ་ཡིན་པར་ངོ་ཤེས་པར་གྱིས་ཤིག །ཅེས་ལྷ་ངོ་བསྟན་པར་བྱའོ། །དེ་དག་ནི་དལ་དུ་འཇུག་པའི་རིམ་པའོ། །

༈ གཉིས་པ་སྔོན་འགྲོའི་དབང་བསྐུར་པའི་རིམ་པ་ལ། སྔགས་ཀྱི་སྣོད་དུ་རུང་བར་བྱ་བའི་ཕྱིར། ཉོན་མོངས་རྒྱུད་དྲུག་སྦྱངས་ནས། རིགས་དྲུག་གནས་ནས་སྤར་བའི་སྔོན་འགྲོའི་དབང་ནི། དང་པོ་དམྱལ་བའི་གནས་ནས་དྲངས་ཏེ་རིག་འཛིན་གྱི་གྲལ་དུ་འཁོད་པའི་དོན་དུ་གསོལ་བ་གདབ་པ་འདིའི་རྗེས་ཟློས་གྱིས་བྱས་ལ། །ཨེ་མ་མགོན་པོ་ཐུགས་རྗེ་ཅན། །བདག་སོགས་འཁོར་བའི་སྡུག་བསྔལ་ལས། །བསྐྱབ་ཕྱིར་བརྩེ་བས་རབ་བཟུང་ནས། །དབང་དང་བྱིན་རླབས་སྩལ་ཏུ་གསོལ། །ཞེས་ལན་གསུམ་བྱ། དཀྱིལ་འཁོར་དབུས་སུ་སྨན་ལྔའི་བུམ་པ་སློོབ་བུའི་མགོ་ཐོག་ཏུ་བཞག་ལ། འོ་རིགས་ཀྱི་བུ་དབུས་ཀྱི་བུམ་པ་འདི་སྨན་ལྔའི་བུམ་པ་ཡིན་ཏེ། སངས་རྒྱས་རྡོ་རྗེ་སེམས་དཔའི་རིགས་ལྔའི་ལྷ་ཚོགས་བཞུགས་པས། ཁྱོད་ལ་དབང་བསྐུར་བ་ཙམ་གྱིས། ཞེ་སྡང་དམྱལ་བའི་གནས་ལས་ཐར་ནས། ཐུགས་རྡོ་རྗེ་རིགས་ཀྱི་དབང་ཐོབ་པ་ཡིན་སྙམ་པའི་མོས་པ་དུང་དུང་མཛོད་ཅིག ཧཱུྃ༔ ཀུན་བཟང་ཡུམ་གྱི་བུམ་པ་ན༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ དམྱལ་བའི་སྐྱེ་སྒོ་བཅད་ནས་ནི༔ ན་རཀ་སྡུག་བསྔལ་བྲལ་བར་ཤོག༔ དུ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུཾ་ཧཱུྃ་ཕཊ༔ མེ་ཆུ་ལག་ཏུ་གཏད་ལ། ཧཱུྃ་ཚ་གྲང་སྐྱོབ་བྱེད་མེ་ཆུ་བསིལ་དྲོད་ལྡན༔ སྐལ་ལྡན་རིགས་ཀྱི་བུ་ལ་དབང་བསྐུར་བས༔ དམྱལ་བ་ཚ་གྲང་སྡུག་བསྔལ་ལས་གྲོལ་ནས༔ ན་ར་ཀ་ཡི་སྡུག་བསྔལ་གྲོལ་བར་ཤོག༔ ཧཱུྃ་བཛྲ་ས་ཏྭ་ས་མ་ཡ་སོགས་རྡོ་རྗེ་སེམས་དཔའི་ཡིག་བརྒྱ་བཟླ། ཧཱུྃ་བཛྲ་ཨ་བྷི་ཥིཉྩ་ཨ༔ ཞེས་བུམ་ཆུ་བླུད་ཅིང་། སྐལ་ལྡན་ཁྱོད་ལ་སྨན་ལྔའི་བུམ་པས་དབང་བསྐུར་བས། ཉོན་མོངས་པ་ཞེ་སྡང་གིས་ཀུན་ནས་བསླངས་པའི་ལས་སྒྲིབ་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག་ནས། སེམས་ཅན་དམྱལ་བ་ཆེན་པོར་སྐྱེ་བའི་སྒོ་བཅད་དེ། ནད་ལྔའི་ཉེས་པ་ལས་གྲོལ་ནས། ཤར་ཕྱོགས་མངོན་པར་དགའ་བའི་ཞིང་ཁམས་ཀྱི་སྒོ་ཕྱེས་ནས། བཅོམ་ལྡན་འདས་རྡོ་རྗེ་སེམས་དཔའ་རིགས་ལྔའི་དབང་ཐོབ་སྟེ། སངས་རྒྱས་རྡོ་རྗེ་རིགས་ཀྱི་ཞིང་ཁམས་ལ་དབང་བསྒྱུར་ནས། སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག །ཅེས་བརྗོད་ཅིང་ལག་ཏུ་རྡོ་རྗེ་གཏད་པར་བྱའོ། །

གཉིས་པ་ཡི་དྭགས་ཀྱི་གནས་ནས་སྤར་བའི་དབང་ནི། སློབ་མས་གསོལ་བ་གདབ་པ་ནི། ཀྱེ་མ་ཀྱི་ཧུད་མགོན་པོ་ཡིས། །ཐུགས་རྗེས་ཟུངས་ལ་བདག་སྐྱོབས་ཤིག །བདག་ལུས་སྒྲོལ་ལ་བདེ་ལ་འཁོད། །མགོན་པོས་མྱུར་དུ་བསྐྱབ་ཏུ་གསོལ། །ཞེས་ལན་གསུམ་བྱའོ། །སློབ་དཔོན་གྱིས་དྲི་ལྔའི་བུམ་པ་མགོར་བཞག་ལ། འོ་རིགས་ཀྱི་བུ། ནུབ་ཀྱི་བུམ་པ་འདི་ནི་དྲི་ལྔའི་བུམ་པ་ཡིན་ཏེ། སངས་རྒྱས་སྣང་བ་མཐའ་ཡས་རིགས་ལྔའི་ལྷ་ཚོགས་བཞུགས་པས། ཁྱོད་ལ་དབང་བསྐུར་བ་ཙམ་གྱིས་འདོད་ཆགས་ཡི་དྭགས་ཀྱི་གནས་ལས་ཐར་ནས་གསུང་པདྨ་རིགས་ཀྱི་དབང་ཐོབ་པ་ཡིན་སྙམ་པའི་མོས་པ་དུང་དུང་མཛོད་ཅིག ཧཱུྃ། བདུད་རྩི་དྲི་ལྔའི་བུམ་པ་འདིར༔ བདེ་གཤེགས་གསུང་གི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ ཡི་དྭགས་སྐྱེ་སྒོ་བཅད་ནས་ནི༔ བདེ་བ་ཅན་དུ་སྐྱེ་བར་ཤོག༔ པྲེ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཅེས་བུམ་ཆུ་བླུད། སྒྲོམ་བུ་ལག་ཏུ་གཏད་ལ། ཨཱཿ རིན་ཆེན་སྒྲོམ་གྱི་བུམ་པ་འདིར༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ པྲེ་ཏ་ཀ་ཡི་སྡུག་བསྔལ་བྲལ་བར་ཤོག༔ ཨཱཾ་པདྨ་ས་ཏྭ་ས་མ་ཡ་སོགས་སྣང་བ་མཐའ་ཡས་ཀྱི་ཡིག་བརྒྱ་བཟླས་པའི་མཐར། ཨཱཾ་པདྨ་ཨ་བྷི་ཥིཉྩ་ཨཱཿ སྐལ་ལྡན་ཁྱོད་ལ་དྲི་ལྔའི་བུམ་པ་དང་༔ རིན་པོ་ཆེའི་སྒྲོམ་བུའི་དབང་བསྐུར་བས། ཉོན་མོངས་པ་འདོད་ཆགས་ཀྱིས་ཀུན་ནས་བསླང་བའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་བྱང་ཞིང་དག་ནས་ཡི་དྭགས་སུ་སྐྱེ་བའི་སྒོ་བཅད་དེ། དུག་ལྔའི་ཉེས་པ་ལས་གྲོལ་ནས། ནུབ་བདེ་བ་ཅན་གྱི་ཞིང་ཁམས་ཀྱི་སྒོ་ཕྱེས་ནས། སྣང་བ་མཐའ་ཡས་རིགས་ལྔའི་དབང་ཐོབ་སྟེ། སངས་རྒྱས་པདྨ་རིགས་ཀྱི་ཞིང་ཁམས་ལ་དབང་བསྒྱུར་ནས། སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག ཅེས་བརྗོད་ཅིང་པདྨ་ལག་ཏུ་གཏད།

གསུམ་པ་དུད་འགྲོའི་གནས་ནས་སྤར་བའི་དབང་ནི། གསོལ་བ་གདབ་པ་ནི། ཀྱེ་མ་ཀྱི་ཧུད་བདག་འདྲ་སོགས། །ལས་ཀྱི་རྣམ་སྨིན་རང་ལ་སྨིན། །མགོན་པོ་ཐུགས་རྗེ་ཆེན་པོ་ཡིས། །གནས་ངན་འདི་ལས་བདག་སྒྲོལ་མཛོད། །ཅེས་ལན་གསུམ། སློབ་དཔོན་གྱིས་ཤར་ནས་འབྲུ་ལྔའི་བུམ་པ་མགོར་བཞག་ལ། འོ་རིགས་ཀྱི་བུ། ཤར་གྱི་བུམ་པ་འདི་ནི་འབྲུ་ལྔའི་བུམ་པ་ཡིན་ཏེ། སངས་རྒྱས་རྣམ་པར་སྣང་མཛད་རིགས་ལྔའི་ལྷ་ཚོགས་བཞུགས་པས། ཁྱོད་ལ་དབང་བསྐུར་བ་ཙམ་གྱིས་གཏི་མུག་དུད་འགྲོའི་གནས་ལས་ཐར་ནས། སྐུ་བདེ་གཤེགས་རིགས་ཀྱི་དབང་ཐོབ་པའི་མོས་པ་དུང་དུང་མཛོད་ཅིག ཧཱུྃ། རིན་ཆེན་འབྲུ་ལྔའི་བུམ་པ་འདིར༔ བདེ་གཤེགས་སྐུ་ཡི་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ དུད་འགྲོའི་སྐྱེ་སྒོ་བཅད་ནས་ནི༔ མངོན་དགའི་ཞིང་དུ་སྐྱེ་བར་ཤོག༔ སུ་མ་ཐ་མ་ཐ་སརྦ་ཏིར་ཡ་ཀ་ག་ཏེ་ཧེ་ཏུཾ་ཧཱུྃ་ཕཊ༔ ཅེས་བུམ་ཆུ་བླུད། པུསྟི་ལག་ཏུ་གཏད་ལ། ༀ་ཤེས་རབ་རིག་པའི་པུསྟི་འདི༔ དུས་གསུམ་རྒྱལ་བ་ཞི་ཁྲོའི་གསུང་༔ སྐལ་ལྡན་བུ་ལ་དབང་བསྐུར་བས༔ ཏིར་ཡ་ཀ་ཡི་སྡུག་བསྔལ་བྲལ་བར་ཤོག༔ ༀ་བུདྡྷ་ས་ཏྭ་ས་མ་ཡ༴ཞེས་རྣམ་སྣང་གི་ཡིག་བརྒྱ་བཟླས་པའི་མཐར། ༀ་བུདྡྷ་ཨ་བྷི་ཥིཉྩ་ཨཱཿ སྐལ་ལྡན་ཁྱོད་ལ་འབྲུ་ལྔའི་བུམ་པ་དང་། པུ སྟིའི་དབང་བསྐུར་བས། ཉོན་མོངས་པ་གཏི་མུག་གིས་ཀུན་ནས་བསླངས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག་ནས་དུད་འགྲོའི་སྐྱེ་གནས་སུ་སྐྱེ་བའི་སྒོ་བཅད་དེ། ཉོན་མོངས་པ་ལྔའི་ཉེས་པ་ལས་གྲོལ་ནས། ཤར་ཕྱོགས་མངོན་པར་དགའ་བའི་ཞིང་ཁམས་ཀྱི་སྒོ་ཕྱེས་ནས། རྣམ་པར་སྣང་མཛད་རིགས་ལྔའི་དབང་ཐོབ་སྟེ། སངས་རྒྱས་བདེ་གཤེགས་རིགས་ཀྱི་ཞིང་ཁམས་ལ་དབང་བསྒྱུར་ནས་སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག །ཅེས་བརྗོད་ཅིང་འཁོར་ལོ་ལག་ཏུ་གཏད་དོ། །

བཞི་པ་ལྷ་མིན་གྱི་གནས་ནས་སྤར་བའི་དབང་ནི། སློབ་མས་གསོལ་བ་གདབ་པ་ནི། ཀྱེ་མ་བདག་འདྲའི་སེམས་ཅན་རྣམས། །སྔོན་གྱི་ལས་ངན་དབང་གྱུར་པས། །ཀྱེ་མ་ཀྱི་ཧུད་མགོན་པོ་ཡིས། །བདག་ལུས་ངན་པ་བསྒྲལ་དུ་གསོལ། །ཞེས་ལན་གསུམ། སློབ་དཔོན་གྱིས་བྱང་ནས་སྙིང་པོ་ལྔའི་བུམ་པ་མགོ་ཐོག་ཏུ་བཞག་ལ། འོ་རིགས་ཀྱི་བུ། བྱང་གི་བུམ་པ་འདི་ནི་སྙིང་པོ་ལྔའི་བུམ་པ་ཡིན་ཏེ། སངས་རྒྱས་དོན་ཡོད་གྲུབ་པ་རིགས་ལྔའི་ལྷ་ཚོགས་བཞུགས་པས། ཁྱོད་ལ་དབང་བསྐུར་བ་ཙམ་གྱིས་ཕྲག་དོག་ལྷ་མ་ཡིན་གྱི་གནས་ལས་ཐར་ནས། ཕྲིན་ལས་ལས་ཀྱི་རིགས་ཀྱི་དབང་ཐོབ་པའི་མོས་པ་དུང་དུང་མཛོད་ཅིག ཧཱུྃ༔ སྙིང་པོ་ལྔ་ཡི་བུམ་པ་འདིར༔ བདེ་གཤེགས་ཕྲིན་ལས་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ ལྷ་མིན་སྐྱེ་སྒོ་བཅད་ནས་ནི༔ ལས་རབ་ཞིང་དུ་སྐྱེ་བར་ཤོག༔ ཏྲི་སརྦ་དུ་ལ་སརྦ་ཀརྨ་པྲ་ཝེ་ཤ་ཡ་ཧཱུྃ་ཕཊ༔ ཅེས་བུམ་ཆུ་བླུད། དེ་ནས་གོ་མཚོན་ལག་ཏུ་གཏད་ལ། ཧཱ༔ ཤེས་རབ་དོན་མཚོན་རལ་གྲི་དང་༔ བདུད་ཀྱི་མཚོན་སྲུང་གོ་ཆ་འདི༔ དུས་གསུམ་རྒྱལ་བའི་སྦྱོར་སྒྲོལ་ཏེ༔ ཞི་ཁྲོ་རྒྱལ་བའི་ཕྱག་མཚན་འདིས༔ སྐལ་ལྡན་བུ་ལ་དབང་བསྐུར་བས༔ ཧེ་ས་ཀ་ཡི་སྡུག་བསྔལ་བྲལ་བར་ཤོག ཧཱ་ཀརྨ་ས་ཏྭ་ས་མ་ཡ་༴སོགས་དོན་ཡོད་གྲུབ་པའི་ཡི་གེ་བརྒྱ་པའི་མཐར། ཧཱ་ཀརྨ་ཨ་བྷི་ཥིཉྩ་ཨཱཿ སྐལ་ལྡན་ཁྱོད་ལ་སྙིང་པོ་ལྔའི་བུམ་པ་དང་གོ་མཚོན་གྱི་དབང་བསྐུར་བས། ཉོན་མོངས་པ་ཕྲག་དོག་གིས་ཀུན་ནས་བསླངས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་ཐམས་ཅད་བྱང་ཞིང་དག་ནས་ལྷ་མིན་གནས་སུ་སྐྱེ་བའི་སྒོ་བཅད་དེ། ཕུང་པོ་ལྔའི་ཉེས་པ་ལས་གྲོལ་ནས། བྱང་ཕྱོགས་ལས་རབ་རྫོགས་པའི་ཞིང་ཁམས་ཀྱི་སྒོ་ཕྱེས་ནས། སངས་རྒྱས་དོན་ཡོད་གྲུབ་པ་རིགས་ལྔའི་དབང་ཐོབ་སྟེ། སངས་རྒྱས་ཕྲིན་ལས་རིགས་ཀྱི་ཞིང་ཁམས་ལ་དབང་བསྒྱུར་ནས། སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག ཅེས་བརྗོད་ཅིང་། རྒྱ་གྲམ་ལག་ཏུ་གཏད་དོ། །

ལྔ་པ་ལྷའི་གནས་ནས་སྤར་བའི་དབང་ནི། སློབ་བུས་གསོལ་བ་གདབ་པ་ནི། ཀྱེ་མ་ཀྱི་ཧུད་ཐུགས་རྗེ་ཅན། །བདག་འདྲ་རྨོངས་པའི་འཛིན་པ་ཅན། །དམ་ཚིག་རྩ་བ་ཉམས་པའི་སྐྱོན། །ངན་སོང་མཐོ་རིས་གནས་ནས་འཁོར། །མི་འཆབ་མཐོལ་བཤགས་མེ་ཏོག་བཞེས། །དབང་བསྐུར་ལྷ་ཡི་གནས་ནས་དྲོངས། །ཞེས་ལན་གསུམ་རྗེས་ལ་མེ་ཏོག་འབུལ། སློབ་དཔོན་གྱིས་ལྷོ་རིན་པོ་ཆེ་ལྔའི་བུམ་པ་སློབ་མའི་མགོར་བཞག་ལ། འོ་རིགས་ཀྱི་བུ། ལྷོའི་བུམ་པ་འདི་ནི་རིན་པོ་ཆེ་ལྔའི་བུམ་པ་ཡིན་ཏེ། སངས་རྒྱས་རིན་ཆེན་འབྱུང་ལྡན་རིགས་ལྔའི་ལྷ་ཚོགས་བཞུགས་པས། ཁྱོད་ལ་དབང་བསྐུར་བ་ཙམ་གྱིས་ང་རྒྱལ་ལྷའི་གནས་ལས་ཐར་ནས། ཡོན་ཏན་རིན་ཆེན་རིགས་ཀྱི་དབང་ཐོབ་པ་ཡིན་སྙམ་པའི་མོས་པ་དུང་དུང་མཛོད་ཅིག ཧཱུྃ༔ རིན་ཆེན་ལྔ་ཡི་བུམ་པ་འདིར༔ བདེ་གཤེགས་ཡོན་ཏན་ལྷ་ཚོགས་བཞུགས༔ སྐལ་ལྡན་བུ་ལ་དབང་བསྐུར་བས༔ ལྷ་ཡི་སྐྱེ་སྒོ་བཅད་ནས་ནི༔ རིན་ཆེན་ཞིང་དུ་སྐྱེ་བར་ཤོག༔ ཨཿསརྦ་ཏ་ཐཱ་ག་ཏ་བི་དན་ཁདྒ་ཚིནྡྷ་ཚིནྡྷ་ཧཱུྃ་ཕཊ༔ ཅེས་བུམ་ཆུ་བླུད། པི་ཝཾ་ལག་ཏུ་གཏད་ལ། སྭཱ༔ ལོངས་སྤྱོད་བདུད་ཀྱི་གཡེང་འཇོམས་པ༔ པི་ཝཾ་སྙན་པའི་དོན་བྱེད་འདིས༔ དེང་འདིར་ཁྱོད་ལ་དབང་བསྐུར་བས༔ སྐྱེ་བ་གཅིག་གིས་ལས་རྫོགས་ཤོག༔ སྭཱ་རཏྣ་ས་ཏྭ་ས་མ་ཡ༴སོགས་རིན་ཆེན་འབྱུང་ལྡན་གྱི་ཡིག་བརྒྱ་བཟླས་པའི་མཐར། སྭཱ་རཏྣ་ཨ་བྷི་ཥིཉྩ་ཨཱཿ འོ་སྐལ་ལྡན་རིགས་ཀྱི་བུ་ཁྱོད་ལ་རིན་པོ་ཆེ་ལྔའི་བུམ་པ་དང་། པི་ཝཾ་གི་དབང་བསྐུར་བས། ཉོན་མོངས་པ་ང་རྒྱལ་གྱིས་ཀུན་ནས་བསླངས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་བྱང་ཞིང་དག་ནས། ལྷའི་གནས་སུ་སྐྱེ་བའི་སྒོ་བཅད་དེ། འདོད་ཡོན་ལྔའི་ཉེས་པ་ལས་གྲོལ་ནས། ལྷོ་ཕྱོགས་དཔལ་ལྡན་རིན་ཆེན་བཀོད་པའི་ཞིང་ཁམས་ཀྱི་སྒོ་ཕྱེས་ནས། རིན་ཆེན་འབྱུང་ལྡན་རིགས་ལྔའི་དབང་ཐོབ་སྟེ། སངས་རྒྱས་རིན་ཆེན་རིགས་ཀྱི་ཞིང་ཁམས་ལ་དབང་བསྒྱུར་ནས། །སེམས་ཅན་གྱི་དོན་ཐོགས་པ་མེད་པར་འབྱུང་བར་གྱུར་ཅིག ཅེས་བརྗོད་ཅིང་རིན་པོ་ཆེ་ལག་ཏུ་གཏད་དོ། །ལྷོ་ནས་བཀྲ་ཤིས་གང་ལགས་པ། །ཞེས་སོགས་སོ་སོར་བཀྲ་ཤིས་ཚིགས་སུ་བཅད་པ་འགྲུབ་ན་ཀུན་ལ་བྱ་ཞིང། མེ་ཏོག་དོར། རོལ་མོ་བྱའོ། །སྔོན་འགྲོ་དབང་བསྐུར་བའི་རིམ་པའོ། །དེ་ཡན་ཆད་སྔོན་འགྲོའི་རིམ་པ་འགྲིགས་ཆགས་སུ་བྱས་པའོ། །

༈ སྤྱི་དོན་གཉིས་པ་དངོས་གཞི་ལ་མིའི་གནས་ནས་སྤར་ཞིང་། ཉམས་ཆགས་བསྐང་བའི་སྤྲོས་བཅས་བུམ་དབང་ཆེན་མོ་བསྐུར་བ་ལ། ཐུན་མོང་རིག་པའི་དབང་ལྔ། བུམ་དབང་དངོས། ཐུགས་ཕྱག་མཚན་གྱི་དབང་། རིགས་ལྔའི་ཕྱག་མཚན་གྱི་དབང་། དམ་པ་རིགས་བརྒྱའི་ལྷ་དབང་ཆེན་མོ་རྣམས་རིམ་པ་ལྟར་བསྐུར། དེ་ནས་གསང་བ་སྤྲོས་མེད་གྱི་དབང་། ཤེས་རབ་ཡེ་ཤེས་ལ་ཤིན་ཏུ་སྤྲོས་མེད་ཀྱི་དབང་། ཚིག་དབང་རིན་པོ་ཆེ་ལ་རབ་ཏུ་སྤྲོས་མེད་ཀྱི་དབང་རྣམས། དབང་མཆོག་རྒྱལ་པོའི་རྒྱུད་ནས་གསུངས་པ་ལྟར་ངོ་སྤྲད་པར་བྱའོ། །རྒྱས་པར་འདོད་ན་རྫོགས་ཆེན་གཞན་ནས་གསུངས་པ་ལྟར་རོ། །འདི་ལ་སྒྲུབ་དབང་རྒྱས་པར་བྱེད་ན། ཞག་བདུན་ནམ་ལྔའམ་གསུམ་གང་རུང་བྱ་སྟེ། དང་པོའི་སྐབས་སུ་ཡིག་བརྒྱའི་འཛབ་བཟླ། དེ་ནས་ཞི་ཁྲོའི་འཛབ་བཟླ་སྟེ། སྟོན་པ་རྡོ་རྗེ་རྒྱལ་པོས་ཀྱང་གསུང་བཅད་མཛད་ཅིང་། གཟུངས་ཐག་འཛིན་པ་ལ་སོགས་བྱའོ། །རྒྱལ་ཐེབ་ཀྱིས་ཆོ་གའི་རིམ་པ་ལ་འབད། ནུབ་རེ་ཚོགས་ཀྱི་འཁོར་ལོ་བསྐོར། འཛབ་དགོངས་དམིགས་པའི་འཁྲུལ་འཁོར་སྤྱི་དང་མཐུན་ཞིང་། དུས་བཅུ་གཉིས་ལ་ཉུལ་ལེ་སྤྲད་ཅིང་ཌཱ་ཀི་འགྱེད། བཅུ་གཉིས་མ་འགྲུབ་ན་བཞི་ལ་གིང་གིས་བགེགས་བསྐྲད་པར་བྱ། དཀྱིལ་འཁོར་ལ་ཡང་ས་ཆོག་ཐིག་ཆོག་ཚོན་ཆོག་བྲི་བ་སོགས་དང་། རྫས་དང་ཡོ་བྱད་བཤམས་པ་སོགས་མཆོད་གཏོར་དབང་རྫས་ལ་སོགས་པ་ཐམས་ཅད་བུམ་པ་སྟ་གོན་སློབ་མ་སྟ་གོན་རྣམས་སྤྱི་དང་མཐུན་པར་རྒྱས་པར་བྱའོ། །དབང་ཞག་གཅིག་ལ་བྱེད་ན། བསྡུས་པ་འདིའི་འགྲུབ་ཅིང་གོ་འབྱེད་ཤེས་པར་བྱའོ། །

སྤྱི་དོན་གསུམ་པ་རྗེས་ཀྱི་ལས་རིམ་རྣམས་དབང་ཆོག་དང་། ཆོ་གའི་གཞུང་ལྟར་རོ། །དེ་ལྟར་དབང་གི་སྔོན་འགྲོའི་ལྷན་ཐབས་འདི་ཉིད་རང་འདྲའི་བློ་དམན་རྣམས་ཀྱི་དོན་དུ་བྱ་ལོ་ཟླ་བ་དྲུག་པའི་ཡར་ཚེས་བཅུ་གཅིག་ལ། གཏམ་མྱོག་གངས་ཕུའི་དབེན་གནས་སུ། རྒྱ་བཙུན་ནམ་མཁའ་ཆོས་ཀྱི་རྒྱ་མཚོས་བྲིས་པ། སེམས་ཅན་ཐམས་ཅད་སྙིང་པོའི་དོན་ལ་ལོངས་སྤྱོད་པར་གྱུར་ཅིག །མངྒ་ལཾ།། །།