དབང་བཞི་འཕྲད་ཚད་རང་གྲོལ་གྱི་བརྒྱུད་པའི་ལོ་རྒྱུས།
ཟབ་ཆོས་ཞི་ཁྲོ་དགོངས་པ་རང་གྲོལ་ལས་དབང་བཞི་འཕྲད་ཚད་རང་གྲོལ་གྱི་བརྒྱུད་པའི་ལོ་རྒྱུས་བཞུགས་སོ། །
ཟབ་ཆོས་ཞི་ཁྲོ་དགོངས་པ་རང་གྲོལ་ལས། དབང་བཞི་འཕྲད་ཚད་རང་གྲོལ་གྱི་བརྒྱུད་པའི་ལོ་རྒྱུས་ལ་སྦྱར་རྒྱུ་ལུང་བསྡུས་མཆན། ནི། གཏེར་སྟོན་ཡན་ཆད་གོ་སླ་ཞིང་། གཏེར་སྟོན་ནི་སྤྱི་དོན་ལུང་བསྟན་གསལ་བ་ལས། ཟབ་ཆོས་ཞི་ཁྲོ་དགོངས་པ་རང་གྲོལ་འདི༔ སྤེལ་བར་ཕོངས་པས་རིན་ཆེན་གཏེར་དུ་སྦས༔ ཨེ་མ་འདི་ཉིད་སྟོན་པའི་སྐལ་ལྡན་རིགས་ཀྱི་བུ༔ མདོག་དཀར་གཟུགས་རིང་སྨྲ་བདེ་ཁྲོ་བོའི་དབྱིབས༔ རེས་འགའ་ངོམ་ནག་གླེན་པ་ལྟ་བུ་ལ༔ རེས་འགའ་གཏད་མེད་བྱིས་པའི་རྣམ་པ་ཅན༔ མ་དང་མཁའ་འགྲོ་འདུ་བའི་རིགས་ཀྱི་བུ༔ དད་པ་སྟོབས་ཆེ་ཤེས་རབ་རིག་པ་རྣོ༔ མི་སེམས་མི་འཛིན་དཔའ་བོའི་ཚུལ་འཛིན་པ༔ འབྲུག་སྦྲུལ་ལོ་པ་དཔལ་གྱི་མིང་ཅན་འབྱུང་༔ འདི་ཉིད་ལོ་ཙཱ་ཀླུ་ཡི་རྒྱལ་མཚན་ཡིན༔ འདི་དང་འཕྲད་ཀྱི་ཆོས་ལ་ཟོང་མ་བྱེད༔ མཐོང་ཐོས་འབྲེལ་བ་སྐྱེ་བ་མཐའ་ཅན་ཡིན༔ དེ་ལ་འདུན་བྱེད་སློབ་བུ་བཅུ་བཞི་འབྱུང་༔ ཞེས་པའི་ནང་ནས་གཏེར་སློབ་མཆོག་ཏུ་གྱུར་པ་ནི། ཡོས་བུ་ལོ་པ་དངོས་གྲུབ་མིང་ཅན་གཅིག༔ མིག་ནི་ཆེ་ཞིང་དཔྲལ་བའི་དབྱིབས་མཐོ་བ༔ ཤེས་རབ་བརྩོན་འགྲུས་དད་པ་སྙིང་རུས་ཅན༔ ལས་ལྡན་རྟགས་སུ་ལྟེ་བར་སྨེ་བས་མཛེས༔ འདི་ཉིད་དབང་གི་བླ་མའི་རྣལ་འབྱོར་སྐྱོང་༔ ཞེས་གསུངས་པས་བཞི་རྫོགས་དབང་བསྐུར་འདི་ལ་ཆིག་བརྒྱུད་དུ་གཏད་ཅིང་། ཉམས་སུ་ལེན་པའི་ཚེ་མཆོག་གི་དངོས་གྲུབ་ལོ་གསུམ་ནས་བརྙེས་སོ། །དེ་ཉིད་ཀྱི་སློབ་མ་བཞི་རྫོགས་གཅིག་བརྒྱུད་ཀྱི་བཀའ་བབས་པ་ནམ་མཁའ་སངས་རྒྱས་ཡིན་ཏེ། ལུང་བསྟན་ལས། འབྲུག་གི་ལོ་པ་ཉམ་ཆུང་འདམ་བུའི་ཚུལ༔ ལས་ལྡན་ཡིན་རྟགས་སངས་རྒྱས་མིང་ཅན་ཞིག༔ སྙིང་རུས་ཆེ་ཞིང་སྒྲུབ་པ་བྱེད་ལ་བརྩོན༔ དེ་ཉིད་དབང་གིས་གཅིག་པུར་རི་ཁྲོད་འགྲིམས༔ ཞེས་པས་སྐྱེས་བུ་དམ་པ་དེ་ལ་བཀའ་བབས་པ་དེ་ཉིད་ཀྱིས་སྤྲང་པོ་བདག་ལོ་ལྔ་བཅུ་དུས། གནམ་ལོ་སྤྲེལ་ལོ་ལ་ཀོང་ཡུལ་གསང་བའི་གནས། ཀོང་རི་ཁྲོད་དུ་བསྡད་ཅིང་ཨོ་རྒྱན་རྗེ་ལ་གསོལ་བ་འདེབས་པའི་དུས་སུ་རྨི་ལམ་རྟགས་དང་མཚན་མ་བཟང་པོ་བྱུང་དུས་རྣལ་འབྱོར་པ་དཔོན་སློབ་གསུམ་ལ། གྲྭ་པ་གཅིག་ཨ་ཙ་རའི་ཆ་བྱད་ཡོད་པ། བོད་སྐད་ཡེ་མི་མཁྱེན་པ་ཞིག་འདུག་སྟེ། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བཞི་འཕྲད་ཚད་རང་གྲོལ་གྱི་བཀའ་ཁྱོད་ལ་བབས་ཤིང་བསྐྱལ་བ་དང་། གནས་ཆེན་བརྒྱ་ལ་མཇལ་བ་ལ་འགྲོ་བ་ཡིན་པས་གསང་ཚུལ་དུ་རྟེན་འབྲེལ་བསྒྲིག་པས་དྲག་གསུངས་པ་ལས་ཞུས་ཤིང་སྤེལ་བའི་ལུང་བསྟན་ཡོད་པ་ལགས། རྗེས་ཀྱི་རིམ་པ་གསལ་བ་ལས༔ ཨེ་མ་མ་འོངས་སྙིགས་མའི་དུས༔ གསང་སྔགས་ཐམས་ཅད་འཆོལ་བར་འགྱུར༔ དེ་དུས་བསྟན་པ་རྫོགས་དོན་དུ༔ ཁ་ཚང་དོན་འདྲིལ་གདམས་པ་ནི༔ ཡི་གེར་བྲིས་ནས་གཏེར་དུ་སྦས༔ ལས་ཅན་གཅིག་གིས་འདི་རྙེད་ནས༔ འགྲོ་དོན་དཔག་མེད་བྱེད་པར་ཤོག༔ ཨོ་རྒྱན་ཆེན་པོའི་ལུང་བསྟན་ལྟར༔ རྣམ་མཁྱེན་ལ་སོགས་སྤྲུལ་པ་གསུམ༔ གང་རུང་གཅིག་དང་འཕྲད་པར་ཤོག༔ གབ་འཁྲུགས་མེད་པར་འདིར་ཕབ་ནས༔ ལུང་ཟིན་སློབ་བུ་མཐའ་རྒྱས་ཤིང་༔ ཨ་ཏིའི་བསྟན་པ་མཐར་རྒྱས་ཏེ༔ ཆོས་འདིས་འགྲོ་དོན་བྱེད་པར་ཤོག༔ ཅེས་པ་དང་འཁོར་འདས་རང་གྲོལ་གྱི་ཁ་བྱང་གཏད་དེ་ལུང་ལས། མ་འོངས་བཞི་བཅུ་ཁ་རལ་དུས༔ ལྷ་ལྕམ་གང་འབུམ་སྐྱེ་བ་ནི༔ རྡོ་རྗེའི་མིང་ཅན་རྟ་ལུག་ལོ༔ བརླ་གཡས་ཤ་མཚན་རྡོ་རྗེས་མཚན༔ ཤར་གྱི་ཕྱོགས་སུ་ཉམས་ལེན་བྱེད༔ ཅེས་པ་ལྟར་བཀའ་བབས་ཡོངས་སུ་རྫོགས་པར་གཏད་ཅིང་། སྤེལ་བའི་ལུང་བསྟན་ཁྱོད་ལ་བབས་ཤིང་སྣང་བ་ངོ་མཚར་རྨད་དུ་བྱུང་བ་ལགས་སོ།། །།དགེའོ།། །།བཀྲ་ཤིས་པར་གྱུར་ཅིག། །།