དབང་བཞིའི་རྣམ་བཤད་སྣོད་བཅུད་རང་གྲོལ།

ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བཞིའི་རྣམ་བཤད་སྣོད་བཅུད་རང་གྲོལ་ཞེས་བྱ་བ་བཞུགས་སོ། །

ཞི་ཁྲོ་རྩ་བ་གསུམ་གྱི་ལྷ་ཚོགས་ལ། །ལུས་ངག་ཡིད་གསུམ་གུས་པས་ཕྱག་འཚལ་ནས། །ལུང་དང་མན་ངག་རིག་པ་ཚད་མ་ལ། །བརྟེན་ནས་ངས་འདིར་ཟབ་ཆོས་དབང་བཤད་བྱ། །དེ་ལ་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བཞིའི་རྣམ་བཤད་བསྟན་པ་ནི། དེ་ཡང་དབང་བཞི་འཕྲད་ཚད་རང་གྲོལ་ལས། དེ་ནས་བླ་མ་བརྒྱུད་པའི་རྣམ་ཐར་རྒྱས་བསྡུས་དང་༔ དབང་གང་གིས་གང་ལ་བསྐུར་བའི་ཚུལ་དང་༔ དབང་བཞིའི་རྒྱུ་མཚན༔ དབང་གི་ངོ་བོ༔ ངེས་ཚིག༔ དབྱེ་བ༔ སྒྲ་དོན་རྣམས་རྒྱས་བསྡུས་སྐབས་དང་བསྟུན་ལ་བཤད༔ ཅེས་པས། འདི་ལ་དོན་རྣམ་པ་བཅུ་སྟེ། དབང་གི་བརྒྱུད་པའི་བབས་ཚུལ་དང་། གང་གིས་སྐུར་བྱེད་སློབ་དཔོན་གྱི་མཚན་ཉིད་དང་། གང་ལ་བསྐུར་བྱ་སློབ་མའི་མཚན་ཉིད་དང་། གང་བསྐུར་བ་དབང་བཞིའི་རྣམ་བཞག་དང་། གང་ལ་བརྟེེན་ནས་བསྐུར་ལུགས་རྒྱུད་སྡེའི་མན་ངག་དང་། དུས་ནམ་བསྐུར་མཚམས་ངོས་བཟུང་བ་དང་། ཚུལ་ཇི་ལྟར་བསྐུར་ཐབས་ཆོག་འགྲིགས་སམ་དབང་དོན་བཤད་པ་དང་། དེ་ལྟར་དབང་མ་ཐོབ་པའི་སྐྱོན་དང་། ཐོབ་པའི་ཡོན་ཏན་དང་། དབང་གི་གཏད་རྒྱ་བསྟན་པའོ། དང་པོ་དབང་གི་བརྒྱུད་པའི་བབས་ཚུལ་ནི། དེ་ཉིད་ཀྱི་རྒྱུད་ལས། བརྒྱུད་པའི་བབས་དང་ཆེ་བ་བཤད། །ཅེས་པས། འདི་ལ་རྒྱལ་བ་དགོངས་པའི་བརྒྱུད་པ་དང་གཅིག རིག་འཛིན་བརྡའི་བརྒྱུད་པ་དང་གཉིས། གང་ཟག་སྙན་ཁུངས་ཀྱིི་བརྒྱུད་པ་དང་གསུམ། ཐུགས་རྗེ་བྱིན་རླབས་བརྒྱུད་པ་དང་བཞི། མཁའ་འགྲོ་གཏད་རྒྱའི་བརྒྱུད་པ་དང་ལྔ། སྨོན་ལམ་དབང་བསྐུར་གྱི་བརྒྱུད་པ་དང་དྲུག་ཚང་བ་ཡིན་ནོ། །དེའང་ཆོས་སྐུ་ཀུན་བཟང་ཡབ་ཡུམ་དོན་ལ་ཡོད་པ་མ་ཡིན་ཏེ་སྟོང་གསལ་དུ་བརྗོད་པའོ། །སྟོང་གསལ་རང་མདངས་ལས་ཤར་བའི་ཆོས་རྡོ་རྗེེ་འཆང་ནས་རིགས་ལྔའི་སངས་རྒྱས་ཐམས་ཅད་ཀྱིས་རིམ་བཞིན་དུ་གང་ཟག་སྣོད་ལྡན་རྣམས་ལ་དགོངས་ནས་གསུངས་པས་ན་རྒྱལ་བ་དགོངས་པའི་བརྒྱུད་པ་ཡང་འདི་ལ་ཚང་ངོ་། །རིག་འཛིན་བརྡའི་བརྒྱུད་པ་ཡང་ཚང་སྟེ། ཆོས་སྐུ་ཀུན་བཟང་ཡབ་ཡུམ་རྡོ་རྗེ་འཆང་ནས་རིགས་ལྔའི་སངས་རྒྱས་བརྒྱུད་པ་གཅིག་ནས་གཅིག་ཏུ་བརྒྱུད་པ་ཐམས་ཅད་ལ། ཕྱག་རྒྱའི་བརྡའ་བསྟན་པ་ཙམ་གྱིས་དོན་གྱི་འབྲས་བུ་ཐོབ་བོ། །དེས་དེ་ལྟར་དབང་བསྐུར་བ་དང་། གཏེར་ཆོས་འདི་རྣམས་ཐམས་ཅད་ཀྱང་འདི་ལྟར་དུ་གྱིས་ཤིག བསྒྲུབ་ཅིག སྟོན་ཅིག ཅེས་ཡི་གེའི་རིས་སུ་ཡོད་པ་འདི་ནི་རིག་འཛིན་བརྡའི་བརྒྱུད་པ་ཡིན་ནོ། །གང་ཟག་སྙན་ཁུང་བརྒྱུད་པ་ཡང་ཚང་སྟེ། སྤྲུལ་པའི་སྐུ་དགའ་རབ་རྡོ་རྗེ་ནས་ཤྲཱི་སེངྷ་དང་ཨོ་རྒྱན་པདྨ་དག་གི་གསུངས་པའི་ཆོས་རྣམས་ཀུན་སྒྲ་ཚིག་ནོར་འཁྲུལ་མེད་པར་ཡི་གེ་ལ་བྲིས། ཡི་གེ་སྤྲུལ་པའི་སྐུ་དངོས་ཡིན། དེ་ཉིད་ཀློག་པས་སྒྲ་ཡང་ཡིན། སྒྲ་དོན་གོ་བས་ཉམས་སུ་ལེན་པས་ན། གང་ཟག་སྙན་ཁུང་བརྒྱུད་པ་ཡང་འདི་ལ་ཚང་ངོ་། །ཐུགས་རྗེ་བྱིན་རླབས་ཀྱི་བརྒྱུད་པ་ཡང་འདི་ལ་ཚང་སྟེ། ཀུན་བཟང་ཡབ་ཡུམ་རྡ ོ་རྗེ་འཆང་ནས་རིགས་ལྔའི་སངས་རྒྱས་ལ་སོགས་ཀྱིས་བྱིན་བརླབ་རིམ་པ་བཞིན་དུ་བབས་པ་རྣམས་ཨོ་རྒྱན་རྗེས་གཏེར་དུ་སྦས་ནས། གང་ཟག་ལས་ཅན་ལ་དབང་བསྐུར་བྱིན་རླབས་དུ་བསྔགས་པ་ཡིན་པས་ན། ཐུགས་རྗེ་བྱིན་བརླབ་བརྒྱུད་པ་ཡང་འདི་ལ་ཚང་ངོ་། །མཁའ་འགྲོ་གཏད་རྒྱའི་བརྒྱུད་པ་ཡང་འདི་ལ་ཚང་སྟེ། ཀུན་བཟང་རྡོ་རྗེ་འཆང་ནས་རིམ་པ་བཞིན་དུ་སྐལ་ལྡན་ལས་ཅན་དང་མ་འཕྲད་ཀྱི་བར་དུ་རྒྱས་བཏབ་ནས། དྷཱ་ཀི་དང་འཇིག་རྟེན་གྱི་ལྷ་འདྲེ་ལ། སྐལ་ལྡན་ལས་ཅན་གཅིག་ལ་གཏེར་འདི་གཏོད་ཅིག་ཅེས་གདམས་པས་མཁའ་འགྲོ་མ་དང་འཇིག་རྟེན་གྱི་ལྷ་འདྲེ་དེས། གཏེར་སྟོན་གཅིག་ལ་གཏད་པ་ཡིན་པས་ན་མཁའ་འགྲོ་གཏད་རྒྱའི་བརྒྱུད་པ་འདི་ལ་ཚང་ངོ་། །སྨོན་ལམ་དབང་བསྐུར་གྱི་བརྒྱུད་པ་ཡང་ཚང་སྟེ། ཆོས་ཐམས་ཅད་སྨོན་ལམ་གྱིས་བསྒྱུར་བ་ཡིན་ནོ། །སྨོན་ལམ་ནི་སངས་རྒྱས་ཀྱི་བཀའ་ཡིན་པས། བཀའ་ནི་བདེན་པར་འཛིན་པས་ན། ཀུན་བཟང་ཡབ་ཡུམ་ནས་ཆོས་འདི་འཆང་ཡན་ཆད་ཀྱིས་རིམ་པ་ལྟར་དུ་སྨོན་ལམ་བཏབ་ཅིང་དབང་བསྐུར་བ་ཡིན་པས་ན། དབང་བསྐུར་སྨོན་ལམ་གྱི་བརྒྱུད་པ་ཡང་འདི་ལ་ཚང་ངོ་། །དེ་ལྟར་བརྒྱུད་པ་དྲུག་ཚང་བའི་དབང་གི་བརྒྱུད་ཚུལ་རིམ་པར་བབ་ལུགས་འདི་ལྟ་སྟེ། དང་པོ་ཆོས་སྐུ་ཀུན་བཟང་ཡབ་ཡུམ། དེས་དྲུག་པ་རྡོ་རྗེ་འཆང་ཆེན། དེས་སྟོན་པ་རྡོ་རྗེ་སེམས་དཔའ། དེས་སྤྲུལ་སྐུ་དགའ་རབ་རྡོ་རྗེ། དེས་རིག་འཛིན་ཤྲཱྀ་སེང་ཧ། དེས་སློབ་དཔོན་པདྨ་འབྱུང་གནས། དེས་མཁའ་འགྲོ་ཡེ་ཤེས་མཚོ་རྒྱལ། དེས་གཏེར་སྟོན་ཀརྨ་གླིང་པ། དེས་སྲས་མཆོག་ཉི་ཟླ་ཆོས་རྗེ། དེས་འགྲོ་མགོན་ཉི་ཟླ་འོད་ཟེར། དེས་རྒྱ་བཙུན་ནམ་མཁའ་རྒྱ་མཚོ། དེས་ལྔ་ཚོ་པདྨ་རྒྱལ་མཚན། དེས་རྟོགས་ལྡན་ཡེ་ཤེས་བློ་གྲོས། དེས་རོང་སྟོན་ནམ་མཁའ་རྡོ་རྗེ། དེས་ལྕགས་མདུད་པ་ཤེས་རབ་རྒྱལ་མཚན། དེས་བླ་མ་བྱང་ཆུབ་རྒྱ་མཚོ། དེས་དྲིན་ཆེན་རྩ་བའི་བླ་མའོ། །ཡང་བརྒྱུད་ལུགས་གཅིག་ལ། ནམ་མཁའ་རྒྱ་མཚོ། ཀྲ་ཡ་ཀེ་ཏུ། ཀྲ་ཡ་བཛྲ། ཤཱཀྱ་ཀེ་ཏུ། རྩ་བའི་བླ་མའོ། །ཡང་བརྒྱུད་ལུགས་གཅིག་ལ། ནམ་མཁའ་རྒྱ་མཚོ། བསོད་ནམས་རྣམ་རྒྱལ། ཀུན་དགའ་གྲགས་པ། རྩ་བའི་བླ་མའོ། །དེ་ལྟར་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྨིན་གྲོལ་བསྟན་པའི་བླ་མ་ཡན་ཆད་དུ། གཅིག་ནས་གཅིག་ཏུ་དགོངས་པས་དགོངས་བརྒྱུད་ཟམ་མ་ཆད། གཅིག་ནས་གཅིག་ཏུ་དཔེ་དང་བརྡའ་བསྟན་པས་བརྡའ་བརྒྱུད་ཟམ་མ་ཆད། གཅིག་ནས་གཅིག་ཏུ་སྙན་ནས་སྙན་དུ་བརྒྱུད་པས་སྙན་རྒྱུད་ཟམ་མ་ཆད། གཅིག་ནས་གཅིག་ཏུ་བྱིན་གྱིས་བརླབས་ཤིང་གདམས་པས་བྱིན་བརླབས་བརྒྱུད་པ་ཟམ་མ་ཆད། གཅིག་ནས་གཅིག་ཏུ་གཏད་པས་གཏད་རྒྱ་ཟམ་མ་ཆད། གཅིག་ནས་གཅིག་ཏུ་དབང་བསྐུར་ཞིང་སྨོན་ལམ་བཏབ་པས་དབང་བསྐུར་སྨོན་ལམ་གྱི་བརྒྱུད་པ་ཟམ་མ་ཆད་པའི་ཆོས་སོ། །

གཉིས་པ་གང་གིས་སྐུར་བྱེད་སློབ་དཔོན་གྱི་མཚན་ཉིད་ལ་གཉིས་ཏེ། བཅུད་ལྡན་གྱི་སློབ་དཔོན་བླང་བྱ་དང་། བཅུད་དང་མི་ལྡན་པའི་སློབ་དཔོན་དོར་བྱའོ། །དང་པོ་ནི་རབ་འབྲིང་ཐ་མ་གསུམ་སྟེ། རབ་བསྐྱེད་རྫོགས་གྱི་དོན་ཇི་ལྟ་བ་བཞིན་རྟོགས་ཐོག་ནས་བརྟན་པ་ཐོབ་ངེས་པ་ཞིག་དགོས། འབྲིང་དངོས་ཉམས་རྨི་ལམ་དུ་ཡི་དམ་ལྷའི་ཞལ་མཇལ་ཞིང་དབང་ལུང་གསལ་བོར་ཐོབ་པ་ཞིག་དགོས། ཐ་མ་ཡང་རང་རང་གི་བསྒྲུབ་གཞུང་ནས་བཤད་པ་བཞིན་དུ་བསྙེན་བསྒྲུབ་ཀྱི་གྲངས་ཚད་སུམ་འགྱུར་ཐེམས་ཤིང་། ཆོ་ག་ལག་ལེན་གྱི་རིམ་པ་ལ་མཁས་པ་ཞིག་དགོས་སོ། །རཏྣ་གླིང་པས་མཚོ་རྒྱལ་ལ་ཞུས་པའི་སྙན་རྒྱུད་ཡིད་བཞིན་ནོར་བུ་ལས། བླ་མ་དེ་ཡང་རབ་འབྲིང་ཐ་མ་གསུམ་གྱི་ལྷ་བསྙེན་ཚད་དུ་གྱུར་པ་ཞིག་དགོས་ཏེ༔ བསྙེན་བསྒྲུབ་རབ་ངོ་བོས་ཐེམས་པ༔ འབྲིང་རྟགས་ཀྱིས་ཐེམས་པ༔ ཐ་མ་གྲངས་ཀྱིས་ཐེམས་པ་ཞིག་དགོས༔ དེ་ལ་ངོ་བོས་ཐེམས་པ་གང་ཞེ་ན༔ བསྐྱེད་རིམ་ལ་བརྟན་པ་ཐོབ་པས་རང་རྒྱུད་དུ་འཛིན་པ་མེད་པ༔ བསྙེན་བསྒྲུབ་ལ་རྟགས་ཐོན་པས་ལས་རླུང་གི་འགྱུ་བ་ཟད་ཅིང་༔ རྩྭའི་མདུད་པ་གྲོལ་བས་རླུང་ལས་སུ་རུང་བ༔ སེམས་རྫོགས་རིམ་ལ་བརྟན་པ་ཐོབ་པས༔ ཡི་དམ་ལྷའི་ཐུགས་རང་སེམས་སྟོང་པའི་ངོ་བོར་དབྱེར་མེད་རོ་གཅིག་ཏུ་འདྲེས་པས། བློ་འདས་ཆོས་སྐུའི་ངང་དུ་རོ་གཅིག་ཏུ་གྱུར་པ་ནི་རབ་ངོ་བོས་ཐེམས་པའོ༔ འབྲིང་རྟགས་ཀྱིས་ཐེམས་པ་ནི༔ རབ་དངོས༔ འབྲིང་ཉམས༔ ཐ་མ་ཡང་རྨི་ལམ་དུ་ལྷའི་ཞལ་མཐོང་༔ ལུང་གིས་གནང་བ་ཐོབ༔ རྨི་ལམ་དུ་ཡང་བསྐྱེད་རིམ་གྱི་དྲན་པ་ཡོད་པ་ཞིག་གཅེས་སོ༔ ཐ་མ་གྲངས་ཀྱིས་ཐེམས་པ་ནི༔ སྤྱིར་སྒྲུབ་ཐབས་ནས་བཤད་པའི་གྲངས་ལ་བསྒོས་པ་ནི༔ དབང་རབ་སྦྱངས་པ་སྔོན་སོང་ཡིན༔ འབྲིང་གཉིས་འགྱུར༔ དབང་པོ་ཐ་མ་ལ་སུམ་འགྱུར་གྱིས་ཐེམས་པར་ངེས་ཤིང་༔ འོན་ཀྱང་བྱེ་བ་དང་བདུན་འབུམ་ཐེམས་ནས་བྱར་རུང་ཙམ་མོ༔ ཞེས་གསུངས་པ་ལྟར་ངེས་སོ། །

གཉིས་པ་བཅུད་དང་མི་ལྡན་པའི་སློབ་དཔོན་དོར་བྱ་ནི། དེ་ལྟར་རབ་འབྲིང་ཐ་མ་གསུམ་གྱི་མཚན་ཉིད་དང་མི་ལྡན་པའི་བླ་མས་དབང་བསྐུར་བྱས་ཀྱང་གཞན་རྒྱུད་སྨིན་མི་ནུས་ཏེ། ཡང་དེ་ཉིད་ལས། དེ་ལྟར་གསུམ་པོ་ལ་དབང་གི་དྲོད་མ་ཐོབ༔ བསྐྱེད་རྫོགས་ལ་བརྟན་པ་མ་ཐོབ་བར་བདག་འཇུག་ཅེས་གཞུང་སོར་བཞག༔ ཚིག་རུང་ཙམ་དུ་བླང་པས་ནི༔ ངེས་པའི་དབང་ནི་མི་ཐོབ་སྟེ༔ བརྒྱུད་པ་མ་ཆད་ཙམ་གྱི་རྗེས་གནང་དུ་འགྱུར་རོ༔ ཅིའི་ཕྱིར་ན༔ དབང་ཆུ་ཀླུང་བཞི་འདུས་ཀྱི་རྒྱུད་ལས༔ ངོ་བོ་རྟགས་དང་གྲངས་སུ་བཅས༔ རྡོ་རྗེ་སློབ་དཔོན་རང་གི་དབང་༔ དེ་ཉིད་གྱད་དུ་མ་གྱུར་པར༔ ཚིག་ཙམ་བདག་ལ་འཇུག་པ་ཡིས༔ གཞན་སྨིན་ནུས་པ་མ་ཡིན་ནོ༔ ཞེས་གསུངས་པ་ལྟར་ཡིན་པས༔ རྡོ་རྗེ་སློབ་དཔོན་གོང་ལྟར་བཅུད་ལྡན་བླངས་ཤིང་། བཅུད་དང་མི་ལྡན་པ་དོར་བར་བྱའོ། །གསུམ་པ་གང་ལ་བསྐུར་བྱ་སློབ་མའི་མཚན་ཉིད་ལ་གཉིས་ཏེ། སྣོད་ལྡན་གྱི་སློབ་མ་བླངས་བྱ་དང་། སྣོད་དང་མི་ལྡན་པའི་སློབ་མ་དོར་བྱའོ། །དང་པོ་ནི་རབ་ཆེ་བ་བཅོ་ལྔ་དང་ལྡན་པ། འབྲིང་ཆེ་བ་བཅུ་དང་ལྡན་པ་ཐ་མ་ཆེ་བ་བདུན་དང་ལྡན་པ། ཡང་ཐ་ཡང་ཆེ་བ་ལྔ་དང་ལྡན་པ་ཞིག་དགོས་ཏེ། མཚོ་རྒྱལ་གྱི་སྙན་རྒྱུད་ལས། མོས་གུས་ཀྱི་བླ་མ་སངས་རྒྱས་དངོས་སུ་མཐོང་བ༔ ཅི་མཛད་ལེགས་པར་མཐོང་ཞིང་ཅི་གསུང་གི་བཀའ་ལ་ཉན་པ༔ ཡིད་ལ་དགེ་དགུ་འབྱུང་ཞིང་བརྡའ་དང་ཆོས་སུ་གོ་བ༔ གཏང་ཕོད་ཆེ་བ༔ སྙིང་རྗེ་ཆེ་བ༔ ཞེན་ལོག་ཆེ་བ༔ མོས་གུས་ཆེ་བ༔ དག་སྣང་ཆེ་བ༔ ངེས་འབྱུང་ཆེ་བ༔ སྐྱོ་ཤས་ཆེ་བ༔ ཕན་སེམས་ཆེ་བ༔ སྙིང་སྟོབས་ཆེ་བ༔ བརྟུལ་ཞུགས་ཆེ་བ༔ ཤེས་རབ་ཆེ་བ༔ བློ་ཆེ་བ༔ སྡུག་སྲན་ཆེ་བ༔ སྙིང་རུས་ཆེ་བ༔ ཐེག་པ་ཆེ་བ༔ ཆེ་བ་བཅོ་ལྔ་འཛོམས་ན་དེས་ཚེ་གཅིག་གིས་སངས་རྒྱས་འགྲུབ་པས་རབ༔ སུམ་གཉིས་ཚང་ཡང་བར་དོ་གསུམ་ལ་གྲོལ་ནུས་པས་འབྲིང་༔ ཕྱེད་ཚང་ན་ཕྱིར་མི་ལྡོག་པས་ཐ་མ༔ སུམ་ཆ་ཚང་ཡང་བླ་མས་ཐབས་ལེགས་པར་ཁྲིད་པས་ཐར་བའི་ས་བོན་ཐེབ་པས་སྣོད་དུ་རུང་ཙམ་ཡིན་ནོ༔ ཞེས་གསུངས་པ་ལྟར་ངེས་སོ། །གཉིས་པ་སྣོད་དང་མི་ལྡན་པའི་སློབ་མ་དོར་བྱ་ནི། གོང་གི་ཆེ་བ་དེ་དག་དང་མི་ལྡན་པའི་སྣོད་ངན་ལ་དབང་བསྐུར་མི་རུང་སྟེ། ཡང་དེ་ཉིད་ལས། དེ་དག་ལས་བཟློག་པའི་རིགས་གསར་འགྲོགས་ཆེ་བ༔ ཕྱི་ཐག་ཐུང་བ༔ རྒྱུད་གྱོང་བ༔ དད་པ་འགྱུར་ལྡོག་མང་བ༔ རྐྱེན་དུམ་རེ་ཡང་མི་ཁྱགས་པ༔ ཁ་ཡན་ལ་ཁོང་ངན་པ༔ ཚེ་འདིའི་ཆེ་ཐབས་དང་འདོད་པ་ཁོང་དུ་བཅུག་པ༔ འཆི་བ་སྙིང་ནས་མི་དྲན་པའི་དྲེད་པོ་ལ་གདམས་པ་སྦྱིན་དུ་མི་རུང་བས་ཐབས་ཀྱིས་སྤོངས་ཤིགས༔ ཞེས་གསུངས་པས། གོང་གི་སྣོད་ལྡན་ལ་གསང་སྔགས་ཀྱི་དབང་བསྐུར་ཞིང་། སྣོད་དང་མི་ལྡན་པའི་སློབ་མ་ལ་དབང་བསྐུར་མི་བྱའོ། །བཞི་པ་གང་བསྐུར་བ་དབང་བཞིའི་རྣམ་བཞག་ལས། །དང་པོ་བུམ་དབང་ལ་བཞི་སྟེ། ངོ་བོ་དང་། ངེས་ཚིག་དང་། མཚན་ཉིད་དང་། དབྱེ་བའོ། །དང་པོ་བུམ་དབང་གི་ངོ་བོ་ནི། ཕྱི་ནང་སྣོད་བཅུད་ཕུང་ཁམས་སྐྱེ་མཆེད་ཐམས་ཅད་ཞི་ཁྲོའི་སྐུ་རུ་ཡེ་ནས་གནས་པ་དེ་བུམ་དབང་གིས་ངོ་སྤྲད་ཅིང་རྟོགས་པར་བྱེད་པ་སྟེ། ཐུགས་ཀྱི་ཞུས་ལན་སྙིང་གི་མེ་ལོང་ལས། དང་པོ་ངོ་བོ་ནི༔ ཕྱི་སྣང་སྲིད་སྣོད་བཅུད༔ ནང་ཕུང་ཁམས་སྐྱེ་མཆེད་ཐམས་ཅད་ཡེ་གདོད་མ་ནས་ལྷ་རུ་གནས་སོ༔ ཞེས་སོ། །

གཉིས་པ་བུམ་དབང་གི་ངེས་ཚིག་ནི། བུམ་པའི་དབང་ལུས་ལ་བསྐུར་ནས་ལུས་ཀྱི་དྲི་མ་དག་ཅིང་བསྐྱེད་རིམ་ཀྱི་སྣོད་དུ་རུང་བས་ན་བུམ་དབང་ཞེས་བྱ་སྟེ། ཡང་དེ་ཉིད་ལས། ངེས་ཚིག་ནི༔ ཡེ་ནས་གནས་པ་དེ༔ ལུས་བྱིན་གྱིས་མ་བརླབ་སྟེ༔ ཡིད་བཞིན་གྱི་ནོར་བུ་ལ་གསོལ་བ་མ་ཐེབ་དེ་སླར་ཡིད་བཞིན་གྱི་ནོར་བུ་ལ་གསོལ་བ་ཐེབ་པ་ལྟར་རྟོགས་ཅིང་ལམ་དུ་བྱེད་པའོ༔ ཞེས་སོ། །གསུམ་པ་བུམ་དབང་གི་མཚན་ཉིད་ནི། ལུས་མ་སྨིན་པ་སྨིན་པར་བྱེད་པ་གཅིག་ཡིན་ཏེ། ཡང་དེ་ཉིད་ལས། མཚན་ཉིད་ནི་བུམ་དབང་ཐོབ་ནས་སྣང་སྲིད་ལྷ་དང་ལྷ་མོར་ཤེས་པས་ས་རྡོ་ཙམ་ལ་སྨད་ཅིང་བརྙས་པ་སྤང་༔ རང་ལུས་རྩ་ཁམས་ལྷའི་རང་བཞིན་དུ་ཤེས་པས་ཐ་མལ་དུ་མི་བཟུང་བསྐྱེད་རིམ་བརྟན་པར་བྱ༔ ཞེས་སོ། །བཞི་པ་བུམ་དབང་གི་དབྱེ་བ་ལའང་བཞི་སྟེ། བུམ་དབང་གི་བུམ་དབང་། གསང་དབང་དང་། ཤེས་རབ་ཡེ་ཤེས་ཀྱི་དབང་དང་། ཚིག་དབང་ངམ་རྩལ་དབང་སྟེ། དོན་ཐིག་ལས། བུམ་དབང་དེ་ཉིད་ལའང་༔ བདག་དང་བུམ་པ་ལྷར་བསྐྱེད་པས་བུམ་དབང་༔ ཡེ་ཤེས་བདུད་རྩི་སྤྱི་བོར་བླུག་པས་གསང་དབང་༔ བདག་དང་གཉིས་སུ་མེད་པར་འདྲེས་པས་ཤེས་རབ་ཡེ་ཤེས་ཀྱི་དབང་༔ བསྒོམ་མཁན་ངོ་བོར་མ་གྲུབ་པས་རྩལ་དབང་ཡིན་ཏེ༔ ཞེས་སོ། །གཉིས་པ་གསང་དབང་ལ་བཞི་སྟེ། ངོ་བོ་དང་། ངེས་ཚིག་དང་། མཚན་ཉིད་དང་། དབྱེ་བའོ། །དང་པོ་གསང་དབང་གི་ངོ་བོ་ནི། ངག་འབྱུང་འཇུག་གནས་གསུམ་ཐེབས་སམ། གྲགས་སྟོང་ཟུང་འཇུག་གསུང་གི་ངོ་བོར་ཡེ་ནས་གནས་པ་དེ་གསང་དབང་གིས་ངོ་སྤྲད་ཅིང་རྟོགས་པར་བྱེད་པ་སྟེ། ཞུས་ལན་སྙིང་གི་མེ་ལོང་ལས། གསང་དབང་གི་ངོ་བོ་ནི་ཐབས་ཤེས་ཟུང་དུ་འཇུག་པའོ༔ ཞེས་སོ། །གཉིས་པ་གསང་དབང་གི་ངེས་ཚིག་ནི། གསང་བའི་དམ་རྫས་ཀྱི་དབང་ངག་ལ་བསྐུར་ནས་ངག་གི་དྲི་མ་དག་ཅིང་སྟེང་སྒོ་རྩ་རླུང་གི་སྣོད་དུ་རུང་བས་ན། གསང་དབང་ཞེས་བྱ་སྟེ། ཡང་དེ་ཉིད་ལས། ངེས་ཚིག་ནི༔ གསང་བའི་དམ་རྫས་བླ་ན་མེད་པའི་སྤྱི་སྲོག་བྱང་ཆུབ་སེམས་ཀྱི་དྭངས་མའོ༔ ཞེས་སོ། །གསུམ་པ་གསང་དབང་གི་མཚན་ཉིད་ནི། ངག་མ་སྨིན་པ་སྨིན་པར་བྱེད་པ་ཞིག་ཡིན་ཏེ། ཡང་དེ་ཉིད་ལས། མཚན་ཉིད་ནི༔ བདག་གི་ཕུང་ཁམས་སྐྱེ་མཆེད་ཐམས་ཅད་བདེ་སྟོང་གི་རང་བཞིན་དུ་བྱིན་གྱིས་བརླབས་ཤིང་༔ རྩ་ཐིག་རླུང་གསུམ་བདེ་སྟོང་བསྒོམ་པས་རང་འབྲས་མངོན་དུ་བྱེད་ཅིང་༔ གསུང་གི་བྱིན་བརླབ་ཐོབ་པའོ༔ ཞེས་སོ། །བཞི་པ་གསང་དབང་གི་དབྱེ་བ་ལ་བཞི་སྟེ། གསང་དབང་གི་བུམ་དབང་དང་། གསང་དབང་དང་། ཤེས་རབ་ཡེ་ཤེས་ཀྱི་དབང་དང་། ཚིག་དབང་ངམ་རྩལ་དབང་སྟེ། དོན་ཐིག་ལས། གསང་དབང་དེ་ཉིད་ལ་ཡང་༔ བླ་མ་ཡབ་ཡུམ་གྱི་བྱང་སེམས་ལྕེ་ཐོག་ཏུ་བཞག་པས་བུམ་དབང་༔ དེའི་རོ་མྱོང་བས་གསང་དབང་༔ བདེ་བས་རྩ་རླུང་ཐིག་ལེ་གང་བས་ཤེས་རབ་ཡེ་ཤེས་ཀྱི་དབང་༔ དེ་སྟོང་ཉིད་དུ་འདྲེས་པས་རྩལ་དབང་ཡིན་ནོ༔ ཞེས་སོ། །གསུམ་པ་ཤེས་རབ་ཡེ་ཤེས་ཀྱི་དབང་ལ་བཞི་སྟེ། ངོ་བོ་དང་། ངེས་ཚིག་དང་། མཚན་ཉིད་དང་། དབྱེ་བའོ། །དང་པོ་ཤེས་རབ་ཡེ་ཤེས་ཀྱི་དབང་གི་ངོ་བོ་ནི། སེམས་བདེ་སྟོང་ཟུང་འཇུག་ཐུགས་ཀྱི་ངོ་བོར་ཡེ་ནས་གནས་པ་དེ་ཤེས་རབ་ཡེ་ཤེས་ཀྱི་དབང་གིས་ངོ་སྤྲད་ཅིང་རྟོགས་པར་བྱེད་པ་སྟེ། ཞུས་ལན་ཐུགས་ཀྱི་མེ་ལོང་ལས། ངོ་བོ་ནི་བདེ་སྟོང་དཔེའི་ཡེ་ཤེས་ལམ་དུ་བྱེད་པའོ། །ཞེས་སོ། །

གཉིས་པ་ཤེས་རབ་ཡེ་ཤེས་ཀྱི་དབང་གི་ངེས་ཚིག་ནི། ཤེས་རབ་ཡུམ་ལ་བརྟེན་ཏེ་དགའ་བཞི་ཡེ་ཤེས་ཀྱི་དབང་སེམས་ལ་བསྐུར་ནས་སེམས་ཀྱི་དྲི་མ་དག་ཅིང་ཆགས་ལམ་གྱི་སྣོད་དུ་རུང་བས་ན་ཤེས་རབ་ཡེ་ཤེས་ཀྱི་དབང་ཞེས་བྱ་སྟེ། དེ་ཉིད་ལས། ངེས་ཚིག་ནི་འཛིན་པ་རང་སར་དག་ནས༔ རང་བྱུང་གི་བདེ་བ་འཆར་བས་དགའ་བ༔ མཆོག་དགའ༔ དགའ་བྲལ༔ ལྷན་ཅིག་སྐྱེས་པའི་དགའ་བའོ༔ ཞེས་སོ། །གསུམ་པ་ཤེས་རབ་ཡེ་ཤེས་ཀྱི་དབང་གི་མཚན་ཉིད་ནི། སེམས་མ་སྨིན་པ་སྨིན་པར་བྱེད་པ་གཅིག་ཡིན་ཏེ། ཡང་དེ་ཉིད་ལས། མཚན་ཉིད་ནི༔ བདེ་སྟོང་དཔེའི་ཡེ་ཤེས་ལ་བརྟེན་ནས༔ རང་བྱུང་དོན་གྱི་ཡེ་ཤེས་རྒྱུད་ལ་སྐྱེ་བའོ༔ ཞེས་སོ། །བཞི་པ་ཤེས་རབ་ཡེ་ཤེས་ཀྱི་དབང་གི་དབྱེ་བ་ལ་བཞི་སྟེ། ཤེས་རབ་ཡེ་ཤེས་ཀྱི་དབང་གི་བུམ་དབང་དང་གསང་དབང་དང་། ཤེས་རབ་ཡེ་ཤེས་ཀྱི་དབང་དང་། ཚིག་དབང་ངམ་རྩལ་དབང་སྟེ། དོན་ཐིག་ལས། ཤེས་རབ་ཡེ་ཤེས་ཀྱི་དབང་གི་དེ་ཉིད་ཀྱང་༔ སློབ་བུ་ཡབ་ཡུམ་ལྷར་གསལ་བ་བུམ་དབང་༔ བྱང་སེམས་དབབ་པ་གསང་དབང་༔ བདེ་བ་ཆེན་པོ་ཉམས་སུ་སྐྱེ་བས་ཤེས་རབ་ཡེ་ཤེས་ཀྱི་དབང་༔ བདེ་བ་སྟོང་ཉིད་དུ་བསྲེ་བས་ཚིག་དབང་ཡིན་ནོ༔ ཞེས་སོ། །བཞི་པ་ཚིག་དབང་ལ་ཡང་བཞི་སྟེ། ངོ་བོ་དང་། ངེས་ཚིག་དང་། མཚན་ཉིད་དང་། དབྱེ་བའོ། །དང་པོ་ཚིག་དབང་གི་ངོ་བོ་ནི། ཆོས་ཀུན་རང་བྱུང་ཡེ་ཤེས་སྐུ་གསུང་ཐུགས་ཡོན་ཏན་ཕྲིན་ལས་ཀྱི་ངོ་བོར་ཡེ་ནས་གནས་པ་དེ་ཚིག་དབང་གིས་ངོ་སྤྲད་ཅིང་རྟོགས་པར་བྱེད་པ་སྟེ། ཞུས་ལན་སྙིང་གི་མེ་ལོང་ལས། ཚིག་དབང་གི་ངོ་བོ་ནི༔ རང་བྱུང་ཡེ་ཤེས་རང་རིག་ཀུན་ཏུ་བཟང་པོ་འདི་ཁོ་ནའོ༔ ཞེས་སོ། །

གཉིས་པ་ཚིག་དབང་གི་ངེས་ཚིག་ནི། ཚིག་གི་དབང་ལུས་ངག་ཡིད་གསུམ་དབྱེར་མེད་ལ་བསྐུར་ནས་སྒོ་གསུམ་ཐ་དད་དུ་འཛིན་པའི་དྲི་མ་དག་ཅིང་ཁྲེགས་ཆོད་ཐོད་རྒལ་གྱི་སྣོད་དུ་རུང་བས་ན་ཚིག་དབང་ཞེས་བྱ་སྟེ། དེ་ཉིད་ལས། ངེས་ཚིག་ནི༔ ཡེ་ནས་གནས་པ་དེ་ཉིད་ཡེ་ཇི་བཞིན་པའི་ངང་དུ་ངོ་སྤྲད་ཅིང་དེའི་དོན་ཉམས་སུ་ལེན་པའོ༔ ཞེས་སོ། །གསུམ་པ་ཚིག་དབང་གི་མཚན་ཉིད་ནི། ལུས་ངག་ཡིད་གསུམ་མ་སྨིན་པ་སྨིན་པར་བྱེད་པ་ཞིག་ཡིན་ཏེ། ཡང་དེ་ཉིད་ལས། མཚན་ཉིད་ནི༔ མ་ནོར་མ་བཅོས་པ༔ འབྲི་བ་མེད་པ༔ གང་བ་མེད་པ༔ འགྲོ་འོང་མེད་ཅིང་རྟག་ཆད་ཀྱི་མཐའ་ལས་འདས་པ་རང་བྱུང་ལྷུན་གྲུབ་ཁྱབ་བརྡལ༔ གསལ་སྟོང་ཟུང་འཇུག༔ མཐའ་བྲལ་མ་འདྲེས་ཡོངས་རྫོགས༔ བློ་ལས་འདས་པའོ༔ ཞེས་སོ། །བཞི་པ་ཚིག་དབང་གི་དབྱེ་བ་ལ་བཞི་སྟེ། ཚིག་དབང་གི་བུམ་དབང་དང་། གསང་དབང་དང་། ཤེས་རབ་ཡེ་ཤེས་ཀྱི་དབང་དང་། ཚིག་དབང་ངམ་རྩལ་དབང་སྟེ། དོན་ཐིག་ལས། རྩལ་དབང་དེ་ལ་ཡང་༔ སྣང་བ་སེམས་སུ་བསྟན་པས་བུམ་དབང་༔ སེམས་སྟོང་པར་བསྟན་པས་གསང་དབང་༔ སྟོང་པ་བདེ་ཆེན་དུ་བསྟན་པས་ཤེས་རབ་ཡེ་ཤེས་ཀྱི་དབང་༔ བདེ་ཆེན་བློ་འདས་སུ་བསྟན་པས་རྩལ་དབང་ཡིན་ཏེ༔ ཞེས་སོ། །ལྔ་པ་གང་ལ་བརྟེན་ནས་བསྐུར་ལུགས་རྒྱུད་སྡེའི་མན་ངག་གཉིས་ཏེ། བསྐུར་ལུགས་དངོས་དང་། དབང་ཐོབ་ཚུལ་ལོ། །དང་པོ་ནི། འཕྲད་ཚད་རང་གྲོལ་ལས། དབང་བཞིའི་ཕྱག་ལེན་ཟབ་མོ་འདི༔ རྒྱུད་ལས་ཕྱུངས་ཏེ་ཡི་གེར་བཀོད༔ ཅེས་སོ། །མན་ངག་དབང་བཞི་འཕྲད་ཚད་རང་གྲོལ་བསྐུར་ལུགས་འདི། གུ་རུ་པདྨ་ཡབ་ཡུམ་གྱིས་རྒྱུད་འཁོར་འདས་རང་གྲོལ་གྱི་ལེའུ་ཉེར་དྲུག་པ་ལ་བརྟེན་ནས་དབང་བཞིའི་སྔོན་འགྲོ་བསྐུར་ལུགས་མཛད། ལེའུ་ཉེར་བདུན་པ་ལ་བརྟེན་ནས་བུམ་དབང་བསྐུར་ལུགས་མཛད། ལེའུ་ཉེར་བརྒྱད་པ་ལ་བརྟེན་ནས་གསང་དབང་བསྐུར་ལུགས་མཛད། ལེའུ་ཉེར་དགུ་པ་ལ་བརྟེན་ནས་ཤེས་རབ་ཡེ་ཤེས་ཀྱི་དབང་བསྐུར་ལུགས་མཛད། ལེའུ་སུམ་ཅུ་པ་ལ་བརྟེན་ནས་ཚིག་དབང་བསྐུར་ལུགས་མཛད། ལེའུ་སོ་གཅིག་པ་ལ་བརྟེན་ནས་བྱེ་བྲག་ཏུ་ལྷ་དབང་རྣམས་བསྐུར་ལུགས་མཛད། དེ་ལྟ་བུའི་རྒྱུད་སྡེའི་མན་ངག་ལ་བརྟེན་པའི་ཆོག་འགྲིགས་ཡིན་ནོ། །ཁྱད་པར་དུ་ཕྱི་བུམ་པའི་དབང་རྡུལ་ཚོན་གྱི་དཀྱིལ་འཁོར་ལ་བརྟེན་ནས་བསྐུར་དགོས་སོ། །གཉིས་པ་ལུས་ཀྱི་དཀྱིལ་འཁོར་ལ་བརྟེན་ནས་བསྐུར་དགོས་སོ། །གསུམ་པ་གསང་བའི་དཀྱིལ་འཁོར་ལ་བརྟེན་ནས་བསྐུར་དགོས་སོ། །བཞི་པ་རང་རིག་གི་དཀྱིལ་འཁོར་ལ་བརྟེན་ནས་བསྐུར་དགོས་སོ། །གཉིས་པ་དབང་ཐོབ་ཚུལ་རབ་འབྲིང་ཐ་མ་གསུམ་ནི། རྒྱལ་བ་ཡང་དགོན་པའི་རི་ཆོས་ཡོན་ཏན་ཀུན་འབྱུང་ལས། རྐྱེེན་གསུམ་ལས་ཐོབ་པ་ནི་གདན་གསུམ་འཛོམ་པའི་དཀྱིལ་འཁོར་དུ། དབང་བཞི་ཡོངས་སུ་རྫོགས་པ་ཐོབ་པ་སྟེ། ལུས་ཀྱི་དཀྱིལ་འཁོར་དང་དངོས་ཀྱི་ཕྱག་རྒྱ་ལ་ཐོབ་ན་རབ། ཏིང་ངེ་འཛིན་གྱི་དཀྱིལ་འཁོར་དང་ཡིད་ཀྱི་ཕྱག་རྒྱ་ལ་ཐོབ་ན་འབྲིང་། རྡུལ་ཚོན་གྱི་དཀྱིལ་འཁོར་དང་ཚིག་ཙམ་གྱི་ཕྱག་རྒྱ་ལ་བརྟེན་ནས་ཐོབ་པ་ཐ་མ་སྟེ། ཞེས་པས། དེ་ཡང་དངོས་ཀྱི་ཕྱག་རྒྱ་ལ་ཐོབ་པ་ལ། བླ་མ་རང་ཡང་རླུང་སེམས་ལ་རང་དབང་ཐོབ་པ། བྱང་སེམས་སློབ་མའི་ལྕེ་ལ་བཞག་པ་ཙམ་གྱིས་བདེ་སྟོང་གི་རྟོགས་པ་ཤར་ནུས་པ། དཔེར་ན་རྒྱལ་པོ་ཨིནྡྲ་བྷཱུ་དྷི་ལ་སངས་རྒྱས་ཀྱིས་གསང་བ་འདུས་པའི་དཀྱིལ་འཁོར་དུ་དབང་བསྐུར་བས། དགའ་བ་བཞི་ངོ་སྤྲད། སྐད་ཅིག་མ་བཞི་ངོས་བཟུང་ནས་ཟག་མེད་ཀྱི་ལམ་དུ་ཁྱེར་ནས་བཙུན་མོ་ལྔ་བརྒྱ་དང་བཅས་པ་ཚེ་གཅིག་ལུས་གཅིག་ལ་སངས་རྒྱས་པ་ལྟ་བུའོ། །འབྲིང་རླུང་སེམས་ལ་རང་དབང་ཐོབ་པ་རང་ལུས་ཐབས་དང་ལྡན་པས་འཕོ་བ་གྲོང་འཇུག་ནུས་པ་ཕ་དམ་པ་རྒྱ་གར་དང་། མར་པ་ལོ་ཙཱ་བ་ལྟ་བུ་གཅིག་དགོས། ཐ་མ་རླུང་སེམས་ལ་དབང་ཐོབ་ནས་ཐིག་ལེ་དབབ་པ། བསྐྱིལ་བ། བཟློག་པ། དགྲམ་པ་ལ་སོགས་པ་ལ་མཁས་པ་གུ་རུ་ཆོས་ཀྱི་དབང་ཕྱུག་དང་། རྒྱལ་བ་གཡུང་སྟོན་པ་ལྟ་བུ་ཞིག་དགོས། དེ་མིན་རྟེན་ཅན་གྱི་དབང་བསྐུར་འདིའི་ལག་ལེན་དུ་བྱེད་ན་བྱིན་རླབས་འཇུག་པ་ལྟ་ཅི། ཕམ་ལྟུང་དྲག་པོ་གཅིག་ཕོག་ལས་ཆེ། འབྲིང་ཏིང་ངེ་འཛིན་གྱི་དཀྱིལ་འཁོར་དང་ཡིད་ཀྱི་ཕྱག་རྒྱ་ལ་བརྟེན་པའི་དབང་དུ་བྱས་ན་སྣོད་བཅུད་ལྷའི་ངོ་བོར་གནས་པ་བླ་མས་ངོ་སྤྲད་པ་ལ། སློབ་མས་ངོ་ཤེས་ཤིང་ངེས་ཤེས་སྐྱེས་ན་བུམ་དབང་ཐོབ་པ་ཡིན། གསལ་སྟོང་གི་ངེས་ཤེས་སྐྱེས་ན་གསང་དབང་ཐོབ་པ་ཡིན། བདེ་སྟོང་གི་ཏིང་འཛིན་སྐྱེས་ན་ཤེས་རབ་ཡེ་ཤེས་ཀྱི་དབང་ཐོབ། ཆོས་ཀུན་རང་བྱུང་ཡེ་ཤེས་སུ་རྟོགས་ན་བཞི་པ་ཐོབ་པ་ཡིན། ཐ་མ་རྡུལ་ཚོན་གྱི་དཀྱིལ་འཁོར་དང་ཚིག་གི་ཕྱག་རྒྱ་མ་ལ་བརྟེན་ནས་ཆོ་ག་མགོ་མཇུག་མ་ནོར་བར་ཚིག་གིས་བརྡ་སྤྲད་མཁས་པ་ཞིག་གིས་ཚིག་གི་རྣམ་གྲངས་གོ་རིམ་མ་ནོར་བར་ཐོབ་པར་བྱས་ནས། རང་ཉིད་ཀྱིས་དམ་ཚིག་བསྲུང་དབེན་པར་བསྐྱེད་རྫོགས་ཀྱི་དོན་ཉམས་སུ་བླངས་ན་དབང་དོན་སྐྱེ། དབང་བསྐུར་བྱེད་དུས་ངོ་མ་འཕྲོད་ན་དེ་རྒྱབ་བཅུན་ནས་ཡོན་ཏན་སྐྱེ་དགོས། གོང་གི་གདན་གསུམ་འཛོམ་པའི་དཀྱིལ་འཁོར་ནི། ཞེས་པས། དབུས་སུ་སངས་རྒྱས་རིགས་ལྔའི་གདན། བར་ན་སེམས་དཔའ་སེམས་མའི་གདན། མཐའ་ན་ཁྲོ་བོ་ཁྲོ་མོའི་གདན། གདན་གསུམ་འཛོམ་པའི་དཀྱིལ་འཁོར་འདི་གསར་མ་བའི་ཕ་རྒྱུད་གསང་བ་འདུས་པ་དང་། རྙིང་མ་བའི་ཞི་བའི་དཀྱིལ་འཁོར་དང་། ཡོ་ག་ཀུན་རིག་གི་དཀྱིལ་འཁོར་གསུམ་ལ་དངོས་སུ་ཡོད། གཞན་ལ་ཆེར་མ་མཐོང་། འོན་ཀྱང་དོད་བརྩིས་ན་བླ་མེད་ཀྱི་དཀྱིལ་འཁོར་ཀུན་ལ་ཚང་ནས་ཡོད་གསུངས་ཀྱང་། འདིར་ཞི་ཁྲོ་དགོངས་པ་རང་གྲོལ་གྱི་དཀྱིལ་འཁོར་ལ་གདན་གསུམ་དངོས་སུ་ཚང་ནས་ཡོད་དོ། །དྲུག་པ་དུས་ནམ་བསྐུར་མཚམས་ངོས་བཟུང་བ་ནི། སྤྱིར་སྣོད་བཅུད་རྟེན་འབྲེལ་འཛོམ་པའི་དུས་སུ་ཡིན་ཀྱང་། ད་རེས་འདིར་རྒྱུ་དུས། ལམ་དུས། འབྲས་དུས་གསུམ་དུ་ངོས་བཟུང་ངོ་། །དེ་ཡང་རྒྱུ་དུས་ཀྱི་དབང་ནི། སློབ་དཔོན་ཚོགས་སྦྱོར་ལ་དྲོད་ཐོན་པ་ཞིག་གིས་རྡུལ་ཚོན་གྱི་དཀྱིལ་འཁོར་ལ་བརྟེན་ནས། སློབ་མ་ལས་དང་པོ་པ་གསང་སྔགས་ཀྱི་རིགས་ཅན་དེ་ལ་དབང་བསྐུར་བ་ནི་ཆོས་སྒོ་ཕྱེ་བ་སྟེ། དབང་གི་བག་ཆགས་བཞག་པ་ཡིན་ནོ། །ལམ་དུས་ཀྱི་དབང་ནི། སློབ་དཔོན་མཐོང་བསྒོམ་པ་ཞིག་གིས་ཏིང་ངེ་འཛིན་གྱི་དཀྱིལ་འཁོར་ལ་བརྟེན་ནས། སློབ་མ་ཚོགས་སྦྱོར་ལ་དྲོད་ཐོབ་པ་ཞིག་ལ་དབང་བསྐུར་བའི་དུས་སུ། དབང་གི་ནུས་པ་འཇོག་པས་ཉམས་རྟོགས་བོགས་འདོན་པ་དགོས་པ་སྟེེ། དཔེར་ན་སློབ་དཔོན་སངས་རྒྱས་གསང་བས་མཚོ་མ་ཕམ་པའི་འགྲམ་དུ་སྔགས་ཚུལ་མི་ལྔ་ལ་དབང་བསྐུར་བ་ལྟ་བུའོ། །འབྲས་དུས་ཀྱི་དབང་ནི། སློབ་དཔོན་རྫོགས་པའི་སངས་རྒྱས་ཀྱིས་ཡེ་ཤེས་ཀྱི་དཀྱིལ་འཁོར་ལ་བརྟེན་ནས། སློབ་མ་མཐར་ལམ་པ་ས་བཅུའི་དབང་ཕྱུག་གམ། ལྷུན་གྲུབ་རིག་འཛིན་ལ་དབང་བསྐུར་བའི་དུས་སུ་དབང་ངོ་བོ་ཐོབ་སྟེ། ཤེས་བྱའི་གཏིང་མཐའ་རྫོགས་པའོ། །དེ་ཡང་སྐན་ཚ་ལས། དེ་རུ་དབང་གིས་ཅི་བྱེད་ན༔ དག་བྱ་ཕྲ་བའི་ཕྲ་བ་དག༔ མཐོང་བྱ་གཞི་ཡི་ཡེ་ཤེས་ཀྱི༔ ཐ་གྲུ་མ་ལུས་དེར་རྒྱས་པ༔ ཞེས་གསུངས་སོ། །བདུན་པ་ཚུལ་ཇི་ལྟར་བསྐུར་ཐབས་ཆོག་འགྲིགས་དང་དབང་དོན་བཤད་པ་ལ་གཉིས་ཏེ། ཁྲིགས་ཆགས་ལུགས་སུ་བསྐུར་བ་དང་། དུམ་བུ་ལུགས་སུ་བསྐུར་བའོ། །དང་པོ་ནི། ནུབ་དང་པོ་ས་ཆོག གཉིས་པ་སྟ་གོན། གསུམ་པ་དངོས་གཞི་དང་གསུམ་གྱིི་ཚུལ་དུ་དབང་རྣམས་ཞག་སྦྲེལ་ཏེ་བར་མ་ཆོད་པར་གཅིག་རྟིང་ལ་གཅིག་བསྐུར་བ་ཡིན་ནོ། །གཉིས་པ་དུམ་བུ་ལུགས་སུ་སྐུར་བ་ནི། དེ་ཡང་དབང་རེ་བསྐུར་ནས་དེའི་གདམས་པ་རེ་བསྟན་ཏེ། རྟགས་མ་བྱུང་གི་བར་དུ་བསྒོམ་ཞིང་བྱུང་ན་དབང་ཕྱི་མ་རྣམས་རིམ་པར་ལོ་ཟླའི་བར་དུ་ཆོད་པར་བསྐུར་བ་དུམ་བུའི་ལུགས་ལ་བཞི་སྟེ། དང་པོ་སྤྲོོས་བཅས་བུམ་དབང་བསྐུར་ཐབས་ལས་རིམ་ལ་སྦྱོར་དངོས་རྗེས་གསུམ་མོ། །སྦྱོར་བ་སྔོན་འགྲོ་ཆོག་འགྲིགས་སུ་ཤེས་ལ། འདིར་དངོས་གཞི་ལ་ལྔ་སྟེ། ཏིང་ངེ་འཛིན་དང་། བསྒྲགས་ཚིག་དང་། བསྐུར་གནས་དང་། བསྟིམ་གནས་དང་། དབང་དོན་ནོ། །དང་པོ་ཏིང་ངེ་འཛིན་ནི། བུམ་དབང་བསྐུར་བའི་དུས་སུ། སློབ་མ་ལ་ལྷ་དབང་རིམ་པ་ལྟར་བསྐུར་བ་དེ་ཉིད་སྐུ་གསུང་ཐུགས་ཕྱག་རྒྱ་རྒྱན་ཆ་ལུགས་ཐམས་ཅད་གསལ་བར་བདག་ཉིད་ཀྱང་བསྐྱེད། སློབ་མ་ཡང་བསྐྱེད། མདུན་གྱི་བར་སྣང་ལ་ཡང་གང་བར་བསྐྱེད། དབང་རྫས་ཙཀ་ལི་དེ་ཡང་བསྐྱེད། སློབ་བུ་རྣམས་ལ་སིབ་སིབ་བསྟིམ་མོ། །ལྷ་སོ་སོའི་སྙིང་པོ་ལན་བདུན་བདུན་བཀླགས་ལ་དེ་ཉིད་རེ་རེ་བཞིན་བསྒོམ་དུ་གཞུག་གོ ། གཉིས་པ་བུམ་དབང་གི་དབང་གི་བསྒྲགས་ཚིག་ཚིགས་བཅད་ལྷུག་གང་ཡོད་དང་། གསུམ་པ་བསྐུར་གནས་དབང་གཞུང་དུ་ཤེས། བཞི་པ་བསྟིམ་གནས་སློབ་བུའི་ལུས་ལའོ། །ལྔ་པ་བུམ་དབང་གི་དབང་དོན་ངོས་བཟུང་བ་ནི། བླ་མེད་དོན་རྫོགས་འདུས་པའི་དབང་སྐུར་རབ་འབྱེད་ལས། བུམ་པའི་དབང་ནི་གང་དང་གང་༔ ལས་ཀྱི་སློབ་དཔོན་དང་པོ་སྟེ༔ བྱས་པས་རྡུལ་ཚོན་དཀྱིལ་འཁོར་བརྟེན༔ ཐུན་མོང་རིག་པའི་དབང་ལྔ་བསྐུར༔ ལུས་ཀྱི་སྒྲིབ་པ་གསུམ་པོ་དག༔ བསྐྱེད་རིམ་ལྷ་ཡི་སྐལ་བར་ལྡན༔ ཡི་དམ་ཚོགས་ཀྱི་སྒོ་མོ་ཕྱེད༔ སྣོད་བཅུད་ལྷ་དང་ལྷ་མོར་བལྟ༔ ས་མ་ཡའི་དམ་ཚིག་ཕྱག་རྒྱ་བརྟན༔ བལྟས་པས་ཚིམ་པའི་ཆགས་པ་དག༔ སྐྱེ་བའི་སྡུག་བསྔལ་ཞི་བར་བྱེད༔ མ་འདྲེས་དགའ་བ་ལུས་ལ་སྐྱེ༔ སྒོང་ང་ལས་སྐྱེས་སྐྱེ་སྒོ་གཅོད༔ འཇིགས་པ་ཕུང་པོའི་བདུད་ཀུན་བཅོམ༔ སྤྱི་མཆེད་ཁམས་གསུམ་སེམས་ཅན་ཀུན༔ སྙིང་རྗེ་ཚད་མེད་རྒྱུད་ལ་སྐྱེ༔ བསྐྱེད་རྫོགས་ཟུང་འཇུག་དབྱེར་མེད་བསྒོམ༔ སྐྱེ་ཤི་བར་དོ་གཅོད་པར་བྱེད༔ རིགས་སྤྱོད་སྤྱོད་པ་སྤྱད་པ་སྤྱོད༔ ཉམས་ལ་གོང་འཕེལ་སྣང་བ་འབྱེད༔ མེ་ལོང་ལྟ་བུའི་ཡེ་ཤེས་མཐོང་༔ མ་འོངས་དུས་ན་སངས་རྒྱས་ཐོབ༔ སྤྲུལ་སྐུར་ཐོབ་པར་ལུང་ཡང་བསྟན༔ བྱ་ལས་ཀྲི་ཡའི་ཕྱོགས་སུ་གཏོགས༔ ཕྲིན་ལས་ཞི་བའི་ལས་རྣམས་འགྲུབ༔ གདོལ་པའི་རིགས་རྣམས་འདུལ་བའི་ཕྱིར༔ ཕྱི་ལྟར་བུམ་པའི་དབང་དུ་བཤད༔ ཅེས་པས། བུམ་དབང་ལ་དོན་ཉི་ཤུ་རྩ་ལྔ་ཕྱེ་ནས་བསྟན་པ་ལ། དང་པོ་སློབ་དཔོན་ནི། ཕུང་ཁམས་སྐྱེ་མཆེད་ཞི་ཁྲོའི་དཀྱིལ་འཁོར་དུ་ངོ་སྤྲད་པས་སློབ་དཔོན་བཞི་ལས་བླ་མ་རྡོ་རྡེ་སློབ་དཔོན་ནོ། །གཉིས་པ་དཀྱིལ་འཁོར་གང་ལ་བརྟེན་པ་ནི། ཡེ་ནས་རང་བྱུང་ཡེ་ཤེས་ཀྱི་རང་རྩལ་རོལ་པ་ཕུང་ཁམས་སྐྱེ་མཆེད་དུ་ཤར་བས་ཞི་ཁྲོའི་དཀྱིལ་འཁོར་དུ་གནས་པ་དེ་ད་ལྟ་མངོན་སུམ་དུ་རྟོགས་པའི་ཐབས་ལ་དཀྱིལ་འཁོར་བཞི་ལས་རྡུལ་ཚོན་གྱི་དཀྱིལ་འཁོར་ལ་བསྟེན་ནོ། །གསུམ་པ་དབང་རྫས་གང་གིས་བསྐུར་བ་ནི། རྒྱུ་རང་ལ་ལྷན་ཅིག་གནས་པའི་དམིགས་རྐྱེན་བྱེད་པས་བུམ་དབང་དང་ཐུན་མོང་རིག་པའི་དབང་ལྔ་ལ་སོགས་པའི་རྫས་ཀྱིས་བསྐུར་རོ། །བཞི་པ་སྒྲིབ་པ་གང་དག་པ་ནི། བུམ་དབང་གིས་ལུས་ཀྱི་དྲི་མ་བཀྲུ་བས་སྒྲིབ་པ་བཞི་ལས་ལུས་ཀྱི་སྒོ་ནས་བསགས་པའི་སྒྲིབ་གསུམ་དག་གོ ། ལྔ་པ་དབང་སྐལ་ནི། བུམ་དབང་ཐོབ་ནས་སྐལ་པ་བཞི་ལས་བསྐྱེད་རིམ་ལྷ་བསྒོམ་པའི་སྐལ་བ་དང་ལྡན་ནོ། །དྲུག་པ་སྔགས་ཀྱི་སྒོ་འབྱེད་ཚུལ་ནི། བུམ་དབང་ཐོབ་ཕྱིན་ཆད་ལས་ཚོགས་གང་ཡང་བསྒྲུབ་རུང་བས་སྔགས་སྒོ་བཞི་ལས་ཡི་དམ་ཚོགས་ཀྱི་སྒོ་མོ་འབྱེད་དོ། །བདུན་པ་ལྟ་བ་རྟོགས་ཚུལ་ནི། སྣང་སྲིད་ལྷའི་སྐུ་སྣང་ལ་རང་བཞིན་མེད་པ་ཆུ་ཟླ་ལྟ་བུར་ཤེས་པས་ལྟ་བ་བཞི་ལས་སྣོད་བཅུད་ལྷ་དང་ལྷ་མོར་བལྟའོ། །བརྒྱད་པ་ཕྱག་རྒྱ་བརྟེན་ལུགས་ནི། གསལ་སྟོང་གི་ངེས་ཤེས་སྐྱེ་བས་ཕྱག་རྒྱ་བཞི་ལས་དམ་ཚིག་ཕྱག་རྒྱ་བསྟེན་ནོ། །དགུ་པ་ཆགས་སྤྱོད་དག་ཚུལ་ནི། རང་ལུས་ལྷ་སྐུ་ཕྱག་རྒྱ་ཡབ་ཡུམ་དུ་གསལ་བས་ཆགས་པ་བཞི་ལས་ལྷ་ཕོ་མོ་གཅིག་གིས་གཅིག་ལ་ཆགས་པས་ཆགས་སེམས་ཀྱི་ཡུན་རིང་བལྟས་པས་ཚིམ་པའི་འདོད་ཆགས་དག་གོ ། བཅུ་པ་སྡུག་བསྔལ་ཞི་ཚུལ་ནི། བསྐྱེད་རིམ་གོམས་ནས་སྐྱེ་གནས་ཀྱི་ཟག་པ་ཟད་པས། སྡུག་བསྔལ་བཞི་ལས་སྐྱེ་བའི་སྡུག་བསྔལ་ཞི་བར་བྱེད་དོ། །བཅུ་གཅིག་པ་དགའ་བ་སྐྱེ་ཚུལ་ནི། ནང་རྟེན་འབྲེལ་ཀྱི་རླུང་སེམས་ཀྱིས་དཔྲལ་བའི་རྩ་འདབ་གང་བས་དགའ་བ་བཞི་ལས་དགའ་བའི་ཏིང་འཛིན་ལུས་ལ་སྐྱེ་བའོ། །བཅུ་གཉིས་པ་སྐྱེ་སྒོ་གཅོད་ཚུལ་ནི། དབང་དོན་རྒྱུད་ལ་བརྟན་པ་ཐོབ་ན་བར་དོར་སངས་རྒྱས་པས་སྐྱེ་གནས་བཞི་ལས་སྒོང་ང་ལས་སྐྱེས་པའི་སྒོ་གཅོད་དོ། །བཅུ་གསུམ་པ་བདུད་བཅོམ་ཚུལ་ནི། ཕུང་ཁམས་སྐྱེ་མཆེད་ལྷ་རུ་ཤར་བས་བདུད་བཞི་ལས་ཕུང་པོའི་བདུད་བཅོམ་མོ། །བཅུ་བཞི་པ་མཆེད་ཡིན་ཚུལ་ནི། མཐོང་ཚད་ལྷ་རུ་དག་སྣང་སྦྱང་བས་སྤྱི་མཆེད་སེམས་ཅན་ཐམས་ཅད་ཀུན་ནོ། །བཅོ་ལྔ་པ་ཚད་མེད་རྒྱུད་ལ་སྐྱེ་ཚུལ་ནི། ཁམས་གསུམ་སེམས་ཅན་ཐམས་ཅད་ལ་ཡུལ་བྲལ་དམིགས་མེད་ཀྱི་སྙིང་རྗེ་སྐྱེས་པས་ཚད་མེད་བཞི་ལས་སྙིང་རྗེ་ཚད་མེད་རྒྱུད་ལ་སྐྱེའོ། །བཅུ་དྲུག་པ་བསྒོམ་པ་གོམ་ཚུལ་ནི། གདངས་མ་འགག་པ་ལྷར་གསལ་དུས་ཉིད་ནས། གཤིས་མ་གྲུབ་པས་བསྒོམ་པ་བཞི་ལས་བསྐྱེད་རྫོགས་ཟུང་འཇུག་དབྱེར་མེད་བསྒོམ་མོ། །བཅུ་བདུན་པ་བར་དོ་གཅོད་ཚུལ་ནི། དབང་པོ་རབ་ཚེ་འདིར་རིག་འཛིན་ཐོབ་པས་བར་དོ་བཞི་ལས་སྐྱེ་འཆིའི་བར་དོ་གཅོད། བཅོ་བརྒྱད་པ་སྤྱོད་པ་སྤྱོད་ཚུལ་ནི། སྤྱོད་ལམ་རྣམ་བཞིར་ལྷའི་ངོ་བོར་ལོངས་སྤྱོད་པས་སྤྱོད་པ་བཞི་ལས་རིགས་སྤྱོད་ཀྱི་སྤྱོད་པ་སྤྱོད་དོ། །བཅུ་དགུ་པ་སྣང་བ་འབྱེད་ཚུལ་ནི། བསྐྱེད་རིམ་གྱི་དམིགས་འགྲིགས་རྩེ་གཅིག་ཏུ་བྱེད་དུས་ཉམས་སྣང་སྣ་ཚོགས་འཕེལ་བས་སྣང་བ་བཞི་ལས་ཉམས་གོང་འཕེལ་གྱི་སྣང་བ་འབྱེད་དོ། །ཉི་ཤུ་པ་ཡེ་ཤེས་མཐོང་ཚུལ་ནི། ཡེ་ནས་རྟོག་ཚོགས་ལྷ་རུ་གསལ་བ་དེ་ད་ལྟ་ངོ་ཤེས་པས་ཡེ་ཤེས་བཞི་ལས་མེ་ལོང་ལྟ་བུའི་ཡེ་ཤེས་མཐོང་ངོ་། །ཉེར་གཅིག་པ་འབྲས་བུ་ཐོབ་ཚུལ་ནི། བསྐྱེད་རིམ་ལ་བརྩོན་ཞིང་མ་ཞེན་ན། འབྲས་བུ་ཕྱི་མ་ཐོབ་པས་མ་འོངས་དུས་སུ་སངས་རྒྱས་ཐོབ་པའོ། །ཉེར་གཉིས་པ་ལུང་བསྟན་ཚུལ་ནི། ལུས་ཀྱི་ཞེན་འཛིན་དག་པས་སྐུ་བཞི་ལས་སྤྲུལ་སྐུ་ཐོབ་པར་སངས་རྒྱས་ཀྱིས་ལུང་བསྟན་ཏོ། །ཉེར་གསུམ་པ་རྒྱུད་སྡེའི་ཕྱོགས་གང་དུ་གཏོགས་ཚུལ་ནི། བསྐྱེད་རིམ་ལ་ལུས་སྤྱོད་གཙོ་བོ་སྟོན་པས་རྒྱུད་སྡེ་བཞི་ལས་བྱ་བའི་ཕྱོགས་སུ་གཏོགས་སོ། །ཉེར་བཞི་པ་ཕྲིན་ལས་འགྲུབ་ཚུལ་ནི། བསྐྱེད་རིམ་ལ་བརྟན་པ་ཐོབ་ན་མི་མཐུན་བར་ཆད་ཞི་བས་ཕྲིན་ལས་བཞི་ལས་ཞི་བའི་ཕྲིན་ལས་འགྲུབ་བོ། །ཉེར་ལྔ་པ་མི་རིགས་འདུལ་ཚུལ་ནི། ཉོན་མོངས་པ་ཤིན་ཏུ་རགས་པ་བསྐྱེད་རིམ་གྱིས་འདུལ་བས་མི་རིགས་བཞི་ལས་གདོལ་པའི་རིགས་ཕྱི་བུམ་པའི་དབང་གིས་འདུལ་བར་བཤད་དོ། །གསུམ་པ་མཐའ་བརྟེན་རྗེས་གནང་དང་དབང་རྗེས་ཀྱི་རིམ་པ་ཆོག་འགྲིགས་ལྟར་ཤེས་ལ།

གཉིས་པ་གསང་དབང་བསྐུར་ཐབས་ལས་རིམ་ལ་སྦྱོར་དངོས་རྗེས་གསུམ་མོ། །སྔོན་འགྲོ་བུམ་དབང་དང་འདྲ་བས་ཆོག་འགྲིགས་སུ་ཤེས་སོ། །འདིར་དངོས་གཞི་ལ་ལྔ་སྟེ། ཏིང་ངེ་འཛིན་དང་། བསྒྲགས་ཚིག་དང་། བསྐུར་གནས་དང་། བསྟིམ་གནས་དང་། དབང་དོན་ནོ། །དང་པོ་ཏིང་ངེ་འཛིན་ནི། བླ་མ་ཡབ་ཡུམ་སྦྱོར་བ་མཛད་པའི་བྱང་སེམས་དཀར་དམར་ལ་ཕྱོགས་བཅུའི་བླ་མ་བདེ་གཤེགས་རིག་འཛིན་ཐམས་ཅད་ཀྱི་བྱང་སེམས་བསྟིམས་ནས་། སློབ་བུའི་ལྕེ་ལ་བསྐུར་བས། འཁོར་བའི་ས་བོན་བསྲེགས་ནས་དོན་དམ་རྟོག་མེད་ཡེ་ཤེས་རྒྱུད་ལ་སྐྱེ་བར་བསྒོམ་མོ། །གཉིས་པ་བསྒྲགས་ཚིག་ཚིགས་བཅད་ལྷུགས་གང་ཡོད་དང་། གསུམ་པ་བསྐུར་གནས་གཞུང་དུ་ཤེས་སོ། །བཞི་པ་བསྟིམ་གནས་ངག་གོ ། ལྔ་པ་གསང་དབང་དོན་ངོས་བཟུང་བ་ནི། བླ་མེད་དོན་རྫོགས་འདུས་པའི་དབང་བསྐུར་རབ་འབྱེད་ལས། བྷནྡྷའི་དབང་ནི་གང་དང་གང་༔ རྡོ་རྗེ་སློབ་དཔོན་གཉིས་པ་སྟེ༔ རང་ལུས་རྒྱལ་བའི་དཀྱིལ་འཁོར་རྟེན༔ ཁྱད་པར་དམ་རྫས་དབང་ལྔ་བསྐུར༔ ངག་གི་སྒྲིབ་པ་བཞི་པོ་དག༔ བཟླས་པ་སྔགས་ཀྱི་སྐལ་བར་ལྡན༔ སྨིན་བྱེད་དབང་གི་སྒོ་མོ་ཕྱེད༔ སྒྲ་རུ་གྲགས་ཚད་སྔགས་སྒྲར་བལྟ༔ རང་ལུས་ཆོས་ཀྱི་ཕྱག་རྒྱ་བསྟེན༔ དགོད་པས་ཚིམ་པའི་ཆགས་པ་དག༔ རྒས་པའི་སྡུག་བསྔལ་ཞི་བར་བྱེད༔ མཆོག་ཏུ་དགའ་བ་ངག་ལ་སྐྱེ༔ དྲོད་གཤེར་ལས་སྐྱེས་སྐྱེ་སྒོ་གཅོད༔ འཇིགས་པ་ལྷ་ཡི་བདུད་ཀུན་བཅོམ༔ རིང་མཆེད་ཆོས་སྒོར་ཞུགས་ཚད་ཀུན༔ བྱམས་པ་ཚད་མེད་རྒྱུད་ལ་སྐྱེ༔ སྔགས་ཀྱི་འཕྲོ་འདུས་འོད་ཟེར་བསྒོམ༔ རྨི་ལམ་བར་དོ་གཅོད་པར་བྱེད༔ སྨྱོ་སྤྱོད་སྤྱོད་པ་སྤྱོད་པ་སྤྱོད༔ རིག་པ་ཚད་ཕེབས་སྣང་བ་འབྱེད༔ མཉམ་པ་ཉིད་ཀྱི་ཡེ་ཤེས་མཐོང་༔ འདས་པའི་དུས་ན་སངས་རྒྱས་ཐོབ༔ ལོངས་སྐུ་ཐོབ་པར་ལུང་ཡང་བསྟན༔ ཡེ་ཤེས་ལྷ་རྒྱུད་ཨུ་པར་གཏོགས༔ ཕྲིན་ལས་དྲག་པོའི་ལས་རྣམས་འགྲུབ༔ རྨོངས་༼དམངས་༽ཀྱི་རིགས་རྣམས་འདུལ་བའི་ཕྱིར༔ ནང་ལྟར་བྷནྡྷའི་དབང་དུ་བཤད༔ ཅེས་པས། གསང་དབང་ལ་དབང་དོན་ཉི་ཤུ་རྩ་ལྔ་ཕྱེ་ནས་བསྟན་པ་ལ། དང་པོ་སློབ་དཔོན་ནི། དོན་དམ་རྟོག་མེད་ཡེ་ཤེས་ཀྱི་རྒྱུ་རང་ལ་གནས་པ་དེ། རྐྱེན་བྱང་སེམས་གཉིས་ཀྱིས་བྱས་པས་སློབ་དཔོན་བཞི་ལས་བྱང་སེམས་རྡོ་རྗེ་སློབ་དཔོན། གཉིས་པ་དཀྱིལ་འཁོར་གང་ལ་བརྟེན་ཚུལ་ནི། བླ་མ་ཡབ་ཡུམ་སློབ་བུ་གསུམ་གྱི་ལུས་ཀྱི་དཀྱིལ་འཁོར་ལ་བརྟེན་པས་དཀྱིལ་འཁོར་བཞི་ལས་བླ་མ་ཡབ་ཡུམ་གྱི་ལུས་སམ་རང་ལུས་རྒྱལ་བའི་དཀྱིལ་འཁོར་ལ་བརྟེན་ནོ། །གསུམ་པ་དབང་རྫས་གང་གི་བསྐུར་བ་ནི། ཐོད་པ་ལྔའི་ནང་དུ་དམ་རྫས་བླུག་པས་དབང་རྫས་བཞི་ལས་ཁྱད་པར་དམ་རྫས་བདུད་རྩི་ལྔས་བསྐུར་བའོ། །བཞི་པ་སྒྲིབ་པ་གང་དག་པ་ནི། གསང་དབང་གི་ངག་གིས་དྲི་མ་བཀྲུ་བས་སྒྲིབ་པ་བཞི་ལས་ངག་གིས་བསགས་པའི་སྒྲིབ་པ་བཞི་དག་གོ ། ལྔ་པ་དབང་སྐལ་ནི། གསང་དབང་ཐོབ་ནས་སྔགས་བཟླས་པའམ་ཐབས་ལམ་སྟེང་སྒོ་རྩ་རླུང་བསྒོམ་པའི་སྐལ་བར་ལྡན་པའོ། །དྲུག་པ་སྔགས་ཀྱི་སྒོ་འབྱེད་ཚུལ་ནི། གསང་དབང་ཐོབ་ཕྱིན་ཆད་སྒོ་བཞི་ལས་སྨིན་བྱེད་དབང་གི་སྒོ་འབྱེད་དོ། །བདུན་པ་ལྟ་བ་རྟོགས་ཚུལ་ནི། སྒྲ་གྲགས་སྟོང་བརྗོད་མེད་དུ་རྟོགས་པའམ་ཐབས་ལམ་རྩ་རླུང་གི་གནད་ཤེས་པས་ལྟ་བ་བཞི་ལས་སྒྲ་གྲགས་ཚད་སྔགས་སྒྲར་བལྟའོ། །བརྒྱད་པ་ཕྱག་རྒྱ་བརྟེན་ལུགས་ནི། སྒྲ་གྲགས་སྟོང་བརྗོད་དུ་མེད་པ་ལ་ངེས་ཤེས་སྐྱེ་བས་ཕྱག་རྒྱ་བཞི་ལས་རང་ལུས་ཆོས་ཀྱི་ཕྱག་རྒྱ་བརྟེན་ནོ། །དགུ་པ་ཆགས་སྤྱོད་དག་ཚུལ་ནི། སྟེང་སྒོ་རྩ་རླུང་བསྒོམ་པས་ཆགས་པ་བཞི་ལས་ལྷ་ཕོ་མོ་གཅིག་གིས་གཅིག་མཐོང་ནས་རྒོད་པས་ཚིམ་པའི་འདོད་ཆགས་དག་གོ ། བཅུ་པ་སྡུག་བསྔལ་ཞི་ཚུལ་ནི། རྩ་རླུང་འབྱོང་ནས་རྒས་དཀའ་བས་སྡུག་བསྔལ་བཞི་ལས་རྒས་པའི་སྡུག་བསྔལ་ཞིའོ། །བཅུ་གཅིག་པ་དགའ་བ་སྐྱེ་ཚུལ་ནི། ནང་གི་རྟེན་འབྲེལ་རླུང་སེམས་མགྲིན་པར་སླེབ་པས་དགའ་བ་བཞིའི་མཆོག་ཏུ་དགའ་བ་དག་ལ་སྐྱེའོ། །བཅུ་གཉིས་པ་སྐྱེ་སྒོ་གཅོད་ཚུལ་ནི། དྲོད་གཤེར་ལས་སྐྱེས་པའི་སྐྱེ་སྒོ་གཅོད་དོ། །བཅུ་གསུམ་པ་བདུད་བཅོམ་ཚུལ་ནི། རླུང་ཟིན་ན་རྟོག་མེད་ཀྱི་ཡེ་ཤེས་རྒྱུད་ལ་སྐྱེ་བས་བདུད་བཞི་ལས་ལྷའི་བུའི་བདུད་བཅོམ་མོ། བཅུ་བཞི་པ་མཆེད་ཡིན་ཚུལ་ནི། སྒྲ་གྲགས་ཚད་སྔགས་སམ་སངས་རྒྱས་ཀྱི་གསུང་དུ་སྦྱངས་པས་མཆེད་བཞི་ལས་རིང་མཆེད་ཆོས་སྒོར་ཞུགས་ཚད་ཀུན་ནོ། །བཅོ་ལྔ་པ་ཚད་མེད་རྒྱུད་ལ་སྐྱེ་ཚུལ་ནི། རྩ་རླུང་བསྒོམ་པའི་ནུས་པས་ཚད་མེད་བཞི་ལས་ཆོས་ལ་དམིགས་པའི་བྱམས་པ་ཚད་མེད་རྒྱུད་ལ་སྐྱེའོ། །བཅུ་དྲུག་པ་སྒོམ་པ་གོམས་ཚུལ་ནི། སྔགས་ཀྱི་འོད་ཟེར་འཕྲོ་འདུའམ། སྟེང་སྒོ་རྩ་རླུང་བསྒོམ་པས་བསྒོམ་པ་བཞི་ལས་སྔགས་ཀྱི་འཕྲོ་འདུའི་འོད་ཟེར་བསྒོམ་མོ། །བཅུ་བདུན་པ་བར་དོ་གཅོད་ཚུལ་ནི། རླུང་སེམས་དབུ་མར་ཚུད་པས་བར་དོ་བཞི་ལས་རྨི་ལམ་བར་དོ་གཅོད་པར་བྱེད་དོ། །བཅོ་བརྒྱད་པ་སྤྱོད་པ་སྤྱོད་ཚུལ་ནི། སྤྱོད་ལམ་རྣམ་བཞིར་རྩ་རླུང་གི་ལྟ་བསྒོམ་ལམ་དུ་ཁྱེར་བས་སྤྱོད་པ་བཞི་ལས་སྨྱོན་སྤྱོད་ཀྱི་སྤྱོད་པ་སྤྱོད་དོ། །བཅུ་དགུ་པ་སྣང་བ་འབྱེད་ཚུལ་ནི། གཏུམ་མོ་གནད་དུ་བསྣུན་དུས་ཤེས་བྱ་ལ་སྲིད་ཚད་འཆར་བས་སྣང་བ་བཞི་ལས་རིག་པ་ཚད་ཕེབས་ཀྱི་སྣང་བ་འབྱེད་དོ། །ཉི་ཤུ་པ་ཡེ་ཤེས་མཐོང་ཚུལ་ནི། རྟོག་མེད་མཉམ་པ་ཉིད་ཀྱི་ཡེ་ཤེས་རྟོགས་པས་ཡེ་ཤེས་བཞི་ལས་མཉམ་ཉིད་ཀྱི་ཡེ་ཤེས་མཐོང་ངོ་། །ཉེར་གཅིག་པ་འབྲས་བུ་ཐོབ་ཚུལ་ནི། གཤིས་ཡེ་ནས་སངས་རྒྱས་ཡིན་པས་འབྲས་བུ་བཞི་ལས་འདས་པའི་དུས་ནས་སངས་རྒྱས་ཐོབ་བོ། །ཉེར་གཉིས་པ་ལུང་བསྟན་ཚུལ་ནི། ངག་གི་ཞེན་འཛིན་དག་པས་སྐུ་བཞི་ལས་ལོངས་སྐུ་ཐོབ་པར་སངས་རྒྱས་ཀྱིས་ལུང་བསྟན་ཏོ། །ཉེར་གསུམ་པ་རྒྱུད་སྡེའི་ཕྱོགས་གང་དུ་གཏོགས་ཚུལ་ནི། གསང་དབང་གི་ངག་སྤྱོད་གཙོ་བོར་སྟོན་པས་རྒྱུད་སྡེ་བཞི་ལས་ཨུ་པའི་ཕྱོགས་སུ་གཏོགས་སོ། །ཉེར་བཞི་པ་ཕྲིན་ལས་འགྲུབ་ཚུལ་ནི། རྩ་རླུང་ལས་སུ་རུང་ན་ལྷ་འདྲེ་མི་གསུམ་དབང་དུ་འདུས་ཤིང་དགྲ་བགེགས་ཚར་གཅོད་པས་ཕྲིན་ལས་བཞི་ལས་དབང་གི་ལས་སམ་དྲག་པོའི་ལས་འགྲུབ་བོ། །ཉེར་ལྔ་པ་མི་རིགས་འདུལ་ཚུལ་ནི། ཉོན་མོངས་པ་རགས་པ་རྩ་རླུང་གིས་སྦྱངས་པས་མི་རིགས་བཞི་ལས་རྨོངས་༼དམངས་༽རིགས་བྷན་དྷའི་དབང་གིས་འདུལ་བར་བཤད་དོ། །གསུམ་པ་མཐའ་བརྟེན་རྗེས་ཀྱི་རིམ་པ་རྣམས་ཆོག་འགྲིགས་ལྟར་དུ་བྱའོ། །

གསུམ་པ་ཤེས་རབ་ཡེ་ཤེས་ཀྱི་དབང་བསྐུར་ཐབས་ལས་རིམ་ལ་སྦྱོོར་དངོས་རྗེས་གསུམ་མོ། །དེ་ཡང་སྔོན་འགྲོ་ནི་དབང་གཉིས་པ་དང་འདྲ་བས་ཆོག་འགྲིགས་སུ་ཤེས་ལ། འདིར་གསུམ་པའི་དབང་གི་དངོས་གཞི་ལ་ལྔ་སྟེ། ཏིང་ངེ་འཛིན་དང་། བསྒྲགས་ཚིག་དང་། བསྐུར་གནས་དང་། བསྟིམ་གནས་དང་། དབང་དོན་ནོ། །དང་པོ་ཤེས་རབ་ཡེ་ཤེས་ཀྱི་དབང་གི་ཏིང་ངེ་འཛིན་ནི། སློབ་བུ་ཡི་དམ་རྟ་ཕག་ཡབ་ཡུམ་ཏུ་བྱིན་གྱིས་བརླབས་ལ་དམིགས་པ་འབོགས། སྤྱི་བོར་ཨོ་རྒྱན་ཡབ་ཡུམ་སྙོམས་འཇུག་མཛད་པའི་བྱང་སེམས་ཀྱི་རྒྱུན་སྤྱི་བོ་ལ་སོགས་གནས་རྣམས་སུ་བབ་ནས་དགའ་བ་བཞི་བདེ་སྟོང་གི་ཏིང་འཛིན་རྒྱུད་ལ་སྐྱེ་བར་བསྒོམ་མོ། །གཉིས་པ་ཤེས་རབ་ཡེ་ཤེས་ཀྱི་བསྒྲགས་ཚིག་ཡང་ཚིགས་བཅད་ལྷུག་གང་ཡོད་དང་། གསུམ་པ་བསྐུར་གནས་ནི་དབང་གཞུང་དུ་ཤེས་སོ། །བཞི་པ་བསྟིམ་གནས་ནི། སློབ་བུའི་སྙིང་དབུས་སེམས་ལ་བསྟིམ་མོ། །ལྔ་པ་ཤེས་རབ་ཡེ་ཤེས་ཀྱི་དབང་ངོས་བཟུང་བ་ནི། བླ་མེད་དོན་རྫོགས་འདུས་པའི་དབང་བསྐུར་རབ་འབྱེད་ལས། ཤེར་ཡེའི་དབང་ནི་གང་དང་གང་༔ རྡོ་རྗེ་སློབ་དཔོན་གསུམ་པ་སྟེ༔ རིགས་བཟང་མཚན་དང་ལྡན་པའི་ཡུམ༔ བློ་ཕེབ་ཡིད་འཕྲོག་མ་ལ་བརྟེན༔ འདོད་ཡོན་རོལ་པའི་དབང་ལྔ་བསྐུར༔ སེམས་ཀྱི་སྒྲིབ་པ་གསུམ་པོ་དག༔ སྣང་བ་ལམ་ཁྱེར་སྐལ་བར་ལྡན༔ རྩ་སྦྱོངས་སྤྱོད་པའི་སྒོ་མོ་ཕྱེད༔ ཐབས་ཤེས་དབྱེར་མེད་བདེ་སྟོང་ལྷ༔ གཞན་ལུས་ལས་ཀྱི་ཕྱག་རྒྱ་བརྟེན༔ འཁྱུད་པས་ཚིམ་པའི་ཆགས་པ་དག༔ ན་བའི་སྡུག་བསྔལ་ཞི་བར་བྱེད༔ མི་རྟོག་དགའ་བྲལ་སེམས་ལ་སྐྱེ༔ མངལ་ནས་སྐྱེ་བའི་སྐྱེ་སྒོ་གཅོད༔ འཇིགས་པ་ཉོན་མོངས་བདུད་དཔུང་འཇོམས༔ ཉེ་མཆེད་ལྟ་སྤྱོད་མཐུན་པ་ཀུན༔ དགའ་བ་ཚད་མེད་རྒྱུད་ལ་སྐྱེ༔ ཐིག་ལེ་དབབ་བཟློག་བཀྲམ་བསྐྱིལ་བསྒོམ༔ སྲིད་པ་བར་དོ་གཅོད་པར་བྱེད༔ གསང་སྤྱོད་སྤྱོད་པ་སྤྱོད་པ་སྤྱོད༔ ཆོས་ཉིད་མངོན་སུམ་སྣང་བ་ཕྱེད༔ སོ་སོར་རྟོག་པའི་ཡེ་ཤེས་མཐོང་༔ ད་ལྟའི་དུས་ནས་སངས་རྒྱས་ཐོབ༔ ཆོས་སྐུ་ཐོབ་པར་ལུང་ཡང་བསྟན༔ མངོན་བྱང་ཡོ་གའི་ཕྱོགས་སུ་གཏོགས༔ ཕྲིན་ལས་དབང་གི་ལས་རྣམས་འགྲུབ༔ བྲམ་ཟེའི་རིགས་རྣམས་འདུལ་བའི་ཕྱིར༔ གསང་དབང་ཤེས་རབ་ཡེ་ཤེས་བཤད༔ ཅེས་པས། ཤེས་རབ་ཡེ་ཤེས་ཀྱི་དབང་ལ་དབང་དོན་ཉི་ཤུ་རྩ་ལྔ་ཕྱེ་ནས་བསྟན་པ་ལས། །དང་པོ་ཤེས་རབ་ཡེ་ཤེས་ཀྱི་དབང་གི་སློབ་དཔོན་ནི། ཆགས་རྟོག་བདེ་བ་རང་སྤང་མ་དགོས་པར་བདེ་སྟོང་གཉིས་མེད་དུ་རྟོགས་པའི་རྐྱེན་ཡུམ་གྱིས་བྱེད་པས། སློབ་དཔོན་བཞི་ལས་རིགས་བཟང་མཚན་ལྡན་གྱི་ཡུམ་རྡོ་རྗེ་སློབ་དཔོན་ནོ། །གཉིས་པ་དཀྱིལ་འཁོར་གང་ལ་བརྟེན་པ་ནི། རང་ལུས་ཐབས་དང་ལྡན་པས་དཀྱིལ་འཁོར་བཞི་ལས་གཞན་ལུས་མཚན་ལྡན་གྱི་གསང་བའི་དཀྱིལ་འཁོར་ལ་བརྟེན་ནོ། །གསུམ་པ་དབང་རྫས་གང་གིས་བསྐུར་བ་ནི། ཕྱག་རྒྱ་རིགས་ལྔ་དེ་ཡིན་པས། དབང་རྫས་བཞི་ལས་ཕྱག་རྒྱ་ལྔའམ་འདོད་ཡོན་རོལ་པའི་དབང་རྫས་ལྔས་བསྐུར་རོ། །བཞི་པ་སྒྲིབ་པ་གང་དག་པ་ནི། ཤེས་རབ་ཡེ་ཤེས་ཀྱི་དབང་གིས་སེམས་ཀྱི་དྲི་མ་བཀྲུ་བས་སྒྲིབ་པ་བཞི་ལས་སེམས་ཀྱིས་བསགས་པའི་སྒྲིབ་པ་གསུམ་པོ་དག་གོ ། ལྔ་པ་དབང་སྐལ་ནི། ཤེས་རབ་ཡེ་ཤེས་ཀྱི་དབང་ཐོབ་ནས་བསྐལ་པ་བཞི་ལས་འོག་སྒོ་བདེ་ཆེན་གྱི་སྣང་བ་ལམ་དུ་ཁྱེར་བའི་སྐལ་བ་དང་ལྡན་ནོ། །དྲུག་པ་སྔགས་སྒོ་འབྱེད་ཚུལ་ནི། གསུམ་པའི་དབང་ཐོབ་ཕྱིན་ཆད་སྔགས་སྒོ་བཞི་ལས་རྩལ་སྦྱོངས་སྤྱོད་པ་སྣ་ཚོགས་ཀྱི་སྒོ་ཕྱེད་དོ། །བདུན་པ་ལྟ་བ་རྟོགས་ཚུལ་ནི། བདེ་སྟོང་གཉིས་མེད་དུ་ཤེས་པས་ལྟ་བ་བཞི་ལས་ཐབས་ཤེས་དབྱེར་མེད་བདེ་སྟོང་ཟུང་འཇུག་ཏུ་བལྟའོ། །བརྒྱད་པ་ཕྱག་རྒྱ་བརྟེན་ཚུལ་ནི། བདེ་སྟོང་གཉིས་མེད་ཀྱི་ངེས་ཤེས་སྐྱེ་བས་ཕྱག་རྒྱ་བཞི་ལས་གཞན་ལུས་ལས་ཀྱི་ཕྱག་རྒྱ་བརྟེན་ནོ། །དགུ་པ་ཆགས་པ་དག་ཚུལ་ནི། འོག་སྒོ་བདེ་ཆེན་གྱི་ལམ་ལ་གོམ་པས་ཆགས་སྤྱོད་བཞི་ལས་གཉིས་གཉིས་འཁྱུད་ཅིང་དབང་པོ་གཉིས་སྦྱོར་བས་ཚིམ་པའི་འདོད་ཆགས་དག་གོ ། བཅུ་པ་སྡུག་བསྔལ་ཞི་ཚུལ་ནི། ཆགས་ལམ་ལ་བརྟན་པ་ཐོབ་ན་ན་ཚའི་ཟུག་རྔུ་བདེ་བར་ཤར་བས་སྡུག་བསྔལ་བཞི་ལས་ན་ཚའི་སྡུག་བསྔལ་ཞི་བར་བྱེད་དོ། བཅུ་གཅིག་པ་དགའ་བ་སྐྱེ་ཚུལ་ནི། ནང་རྟེན་འབྲེལ་རླུང་སེམས་ཀྱིས་སྙིང་ནང་གི་རྩ་འདབ་གང་བས་དགའ་བ་བཞི་ལས་མི་རྟོག་དགའ་བྲལ་སེམས་ལ་སྐྱེའོ། །བཅུ་གཉིས་པ་སྐྱེ་སྒོ་གཅོད་ཚུལ་ནི། སྲིད་པ་བར་དོ ར་མངལ་སྒོ་ཁེགས་པས་སྐྱེ་གནས་བཞི་ལས་མངལ་ནས་སྐྱེ་བའི་སྐྱེ་སྒོ་གཅོད་དོ། །བཅུ་གསུམ་པ་བདུད་བཅོམ་ཚུལ་ནི། ཉོན་མོངས་པ་ཆགས་རྟོག་ཡེ་ཤེས་སུ་ཤར་བས་བདུད་བཞི་ལས་ཉོན་མོངས་བདུད་ཀུན་བཅོམ་མོ། །བཅུ་བཞི་པ་མཆེད་ཡིན་ཚུལ་ནི། དྲན་རྟོག་བདེ་ཆེན་སངས་རྒྱས་ཀྱི་ཐུགས་སུ་དག་སྣང་སྦྱངས་པས་མཆེད་བཞི་ལས་ཉེ་མཆེད་ལྟ་སྤྱོད་མཐུན་པ་ཀུན་ནོ། །བཅོ་ལྔ་པ་ཚད་མེད་རྒྱུད་ལ་སྐྱེ་ཚུལ་ནི། ཟབ་ལམ་དགའ་བཞིའི་འགྲོས་ཐིམ་གྱི་ནུས་པས་ཚད་མེད་བཞི་ལས་དགའ་བ་ཚད་མེད་རྒྱུད་ལ་སྐྱེ་བའོ། །བཅུ་དྲུག་པ་སྒོམ་པ་གོམ་ཚུལ་ནི། མཁས་པ་བཞིའི་སྒོ་ནས་ཉམས་སུ་ལེན་པས་སྒོམ་པ་བཞི་ལས་ཐིག་ལེ་དབབ་བཟློག་དགྲམ་བསྐྱིལ་བསྒོམ་མོ། །བཅུ་བདུན་པ་བར་དོ་གཅོད་ཚུལ་ནི། སྲིད་པ་བར་དོར་མངལ་སྒོ་བདམས་ནས་དག་པའི་ཞིང་དུ་འཕོ་བས་བར་དོ་བཞི་ལས་སྲིད་པ་བར་དོ་གཅོད་པར་བྱེད་དོ། །བཅོ་བརྒྱད་པ་སྤྱོད་པ་སྤྱོད་ཚུལ་ནི། ཆགས་ལམ་རྣམས་གསང་ནས་སྤྱོོད་དགོས་པས་སྤྱོད་པ་བཞི་ལས་གསང་སྤྱོད་ཀྱི་སྤྱོད་པ་སྤྱོད་དོ། །བཅུ་དགུ་པ་སྣང་བ་འབྱེད་ཚུལ་ནི། འོག་སྒོ་གནད་དུ་བསྣུན་དུས་བདེ་སྟོང་ཟུང་འཇུག་གི་སྣང་བ་མངོན་དུ་གྱུར་པས་སྣང་བ་བཞི་ལས་ཆོས་ཉིད་མངོན་སུམ་གྱི་སྣང་བ་འབྱེད་དོ། །ཉི་ཤུ་པ་ཡེ་ཤེས་མཐོང་ཚུལ་ནི། དགའ་བ་བཞིའི་དོན་སོ་སོར་མ་འདྲེས་པར་རྟོགས་པས་ཡེ་ཤེས་བཞི་ལས་སོ་སོར་རྟོག་པའི་ཡེ་ཤེས་མཐོང་ངོ་། །ཉེར་གཅིག་པ་འབྲས་བུ་ཐོབ་ཚུལ་ནི། བརྩོན་འགྲུས་རབ་ཚེ་འདིར་ལྷག་མེད་འགྲུབ་པས་འབྲས་བུ་བཞི་ལས་ད་ལྟའི་དུས་ནས་སངས་རྒྱས་ཐོབ་བོ། །ཉེར་གཉིས་པ་བསྐུར་ལུང་བསྟན་ཚུལ་ནི། སེམས་ཀྱི་ཞེན་འཛིན་དག་པས་སྐུ་བཞི་ལས་ཆོས་སྐུ་ཐོབ་པར་སངས་རྒྱས་ཀྱིས་ལུང་ཡང་བསྟན་ཏོ། །ཉེར་གསུམ་པ་རྒྱུད་སྡེའི་ཕྱོགས་གང་དུ་གཏོགས་ཚུལ་ནི། ཤེས་རབ་ཡེ་ཤེས་ཀྱི་དབང་དོན་ལ་སེམས་སྤྱོད་གཙོ་བོར་སྟོན་པས་རྒྱུད་སྡེ་བཞི་ལ་རྣལ་འབྱོར་ཡོ་གའི་ཕྱོགས་སུ་གཏོགས་སོ། །ཉེར་བཞི་པ་ཕྲིན་ལས་འགྲུབ་ཚུལ་ནི། ཐིག་ལེ་ལས་སུ་རུང་ན་ཚེ་དང་བསོད་ནམས་རྒྱས་ཤིང་ལྷ་འདྲེ་མི་གསུམ་དབང་དུ་འདུ་བས་ཕྲིན་ལས་བཞི་ལས་རྒྱས་པའི་ལས་སམ་དབང་གི་ལས་འགྲུབ་བོ། །ཉེར་ལྔ་པ་མི་རིགས་འདུལ་ཚུལ་ནི། ཉོན་མོངས་པ་ཕྲ་བ་ཆགས་ལམ་གྱིས་སྦྱངས་པས་མི་རིགས་བཞི་ལས་བྲམ་ཟེའི་རིགས་ཤེས་རབ་ཡེ་ཤེས་ཀྱི་དབང་གིས་འདུལ་བར་བཤད་དོ། །གསུམ་པ་མཐའ་རྟེན་རྗེས་གནང་གི་དབང་དང་རྗེས་ཀྱི་རིམ་པ་རྣམས་ཆོག་འགྲིགས་ལྟར་དུ་བྱའོ། །

བཞི་པ་ཚིག་དབང་རིན་པོ་ཆེ་བསྐུར་ཐབས་ལས་རིམ་ལ་སྦྱོར་དངོས་རྗེས་གསུམ་མོ། །དེའང་སྔོན་འགྲོ་ནི་དབང་གསུམ་པོ་དང་འདྲ་བས་ཆོག་འགྲིགས་སུ་ཤེས་ལ། འདིར་བཞི་པའི་དབང་གི་དངོས་གཞི་ལ་ལྔ་སྟེ། ཏིང་ངེ་འཛིན་དང་། བསྒྲག་ཚིགས་དང་། བསྐུར་གནས་དང་། བསྟིམ་གནས་དང་། དབང་དོན་ནོ། དང་པོ་ཚིག་དབང་གི་ཏིང་ངེ་འཛིན་ནི། སློབ་བུ་རྣམ་སྣང་ཆོས་བདུན་བཅའ་ལ། སེལ་མེད་རང་སེམས་སོ་མ་རང་གདངས་སུ་འདུག་པའོ། །གཉིས་པ་བསྒྲག་ཚིག་ནི། ཚིགས་བཅད་ལྷུག་གང་ཡོད་དང་། གསུམ་པ་བསྐུར་གནས་ནི་གཞུང་དུ་ཤེས། བཞི་པ་བསྟིམ་གནས་ནི། མཉམ་པ་ཉིད་ཀྱི་ཡེ་ཤེས་འོད་གསལ་གཅིག་དང་དུ་མར་འཛིན་པ་ལས་གྲོལ་བའོ། །ལྔ་པ་ཚིག་དབང་གི་དབང་དོན་ངོས་བཟུང་བ་ནི། བླ་མེད་དོན་རྫོགས་འདུས་པའི་དབང་བསྐུར་རབ་འབྱེད་ལས། ཚིག་དབང་དེ་ཉིད་གང་དང་གང་༔ རྡོ་རྗེ་སློབ་དཔོན་བཞི་པ་སྟེ༔ བྱང་ཆུབ་སེམས་ཀྱི་དཀྱིལ་འཁོར་བརྟེན༔ རྣལ་འབྱོར་རིམ་པའི་དབང་ལྔ་བསྐུར༔ གོལ་ས་སྒྲིབ་པ་དྲུག་པོ་དག༔ གཞི་ནས་ཡེ་གྲོལ་སྐལ་བར་ལྡན༔ གྲོལ་བྱེད་ལྟ་བའི་སྒོ་མོ་འབྱེད༔ བསྒོམ་མེད་རྫོགས་ཆེན་ལྟ་བ་རྟོགས༔ སྦྱོར་སྒྲོལ་ཕྱག་རྒྱ་ཆེན་པོ་བསྟེན༔ བཅངས་པས་ཚིམ་པའི་ཆགས་པ་དག༔ འཆི་བའི་སྡུག་བསྔལ་ཞི་བར་བྱེད༔ ལྷན་ཅིག་སྐྱེས་པའི་དགའ་བ་སྐྱེ༔ བརྫུས་ནས་སྐྱེ་བའི་སྐྱེ་སྒོ་གཅོད༔ འཇིགས་པ་འཆི་བདག་བདུད་ཀུན་བཅོམ༔ འདྲེས་མཆེད་དཀྱིལ་འཁོར་གཅིག་ཞུགས་ཀུན༔ བཏང་སྙོམ་ཚད་མེད་རྒྱུད་ལ་སྐྱེ༔ སྒོམ་མེད་ཡེངས་མེད་ཡེ་གྲུབ་བསྒོམ༔ ཏིང་འཛིན་བར་དོ་གཅོད་པར་བྱེད༔ ཚོགས་སྤྱོད་སྤྱོད་པ་སྤྱོད་པ་སྤྱོད༔ འཇའ་འོད་ཟེར་གསུམ་སྣང་བ་འབྱེད༔ བྱ་གྲུབ་ཆོས་དབྱིངས་ཡེ་ཤེས་མཐོང་༔ མ་ངེས་དུས་གསུམ་སངས་རྒྱས་ཐོབ༔ མི་ཤིགས་རྡོ་རྗེའི་སྐུ་ཐོབ་འགྱུར༔ བྱ་བྲལ་ཨ་ཏིའི་ཕྱོགས་སུ་གཏོགས༔ ཕྲིན་ལས་རྒྱས་པའི་ལས་ཀུན་འགྲུབ༔ རྗེའི་རིགས་རྣམས་འདུལ་བའི་ཕྱིར༔ སྤྲོས་མེད་ཚིག་གི་དབང་དུ་བཤད༔ ཅེས་པས། བཞི་པ་ཚིག་དབང་རིན་པོ་ཆེ་ལ་དབང་དོན་ཉི་ཤུ་རྩ་ལྔ་ཕྱེ་ནས་བསྟན་པ་ལ། དང་པོ་ཚིག་དབང་གི་སློབ་དཔོན་ནི། ཆོས་ཀུན་རང་བྱུང་ཡེ་ཤེས་སུ་གནས་པ་དེ་རང་གིས་རང་རྟོགས་པས་སློབ་དཔོན་བཞི་ལས་རང་རིག་རྡོ་རྗེ་སློབ་དཔོན་ནོ། །གཉིས་པ་དཀྱིལ་འཁོར་གང་ལ་བསྟེན་པ་ནི། གཉིས་མེད་ཡེ་ཤེས་ཀྱི་དཀྱིལ་དུ་སྣང་སྲིད་ཐམས་ཅད་འཁོར་བས་དཀྱིལ་འཁོར་བཞི་ལས་དོན་དམ་བྱང་ཆུབ་སེམས་ཀྱི་དཀྱིལ་འཁོར་དྲུག་ལ་བརྟེན་ནོ། །གསུམ་པ་དབང་རྫས་གང་གི ས་བསྐུར་བ་ནི། རང་ལ་གནས་པའི་དོན་ངོ་མ་ཤེས་པ་ཤེས་པར་བྱེད་པས་དབང་རྫས་བཞི་ལས་། རྣལ་འབྱོར་རིམ་ལྔའམ། ཤེལ། ལུ་གུ་རྒྱུད། རྨ་བྱ། མེ་ལོང་། ཚོགས་དྲུག་གིས་བསྐུར་རོ། །བཞི་པ་སྒྲིབ་པ་གང་དག་པ་ནི། ཚིག་དབང་གིས་སྒོ་གསུམ་གྱི་དྲི་མ་བཀྲུ་བས་སྒྲིབ་པ་བཞི་ལས་སྒྲིབ་པ་དྲུག་གམ་ལུས་ངག་ཡིད་གསུམ་གྱི་ཤེས་སྒྲིབ་དག་གོ ། ལྔ་པ་དབང་སྐལ་ནི། ཚིག་དབང་ཐོབ་ནས། གཞི་ཁྲེགས་ཆོད་ཡེ་གྲོལ་ལམ་ཐོད་རྒལ་འོད་གསལ་བསྒོམ་པའི་སྐལ་བར་ལྡན་ནོ། །དྲུག་པ་སྔགས་སྒོ་འབྱེད་ཚུལ་ནི། ཚིག་དབང་ཐོབ་ཕྱིན་ཆད་སྒོ་བཞི་ལས་གྲོལ་བྱེད་ཀྱི་གདམས་པ་ལྟ་བ་ལ་སོགས་པའི་སྒོ་ཕྱེད་དོ། །བདུན་པ་ལྟ་བ་རྟོགས་ཚུལ་ནི། ཤེས་བྱ་གཤིས་ཀྱི་གནས་ལུགས་ཇི་ལྟ་བ་བཞིན་ཤེས་པས་ལྟ་བ་བཞི་ལས་བསྒོམ་མེད་རྫོགས་པ་ཆེན་པོའི་ལྟ་བའོ། །བརྒྱད་པ་ཕྱག་རྒྱ་བརྟེན་ཚུལ་ནི། ཟུང་འཇུག་བློ་འདས་སུ་རྟོགས་པས། ཕྱག་རྒྱ་བཞི་ལས་སྦྱོར་སྒྲོལ་ཕྱག་རྒྱ་ཆེན་པོ་བརྟེན་ནོ། །དགུ་པ་ཆགས་པ་དག་ཚུལ་ནི། ཁྲེགས་ཆོད་ཐོད་རྒལ་ལ་གོམས་པས་ཆགས་སྤྱོད་བཞི་ལས་ལྷ་ཕོ་མོ་ལག་གཉིས་འཆངས་པས་ཚིམ་པའི་འདོད་ཆགས་དག་གོ ། བཅུ་པ་སྡུག་བསྔལ་ཞི་ཚུལ་ནི། བརྩོན་འགྲུས་རབ་ཚེ་འདིར་ཕུང་པོ་ལྷག་མེད་དུ་ཡལ་བས་སྡུག་བསྔལ་བཞི་ལས་འཆི་བའི་སྡུག་བསྔལ་ཞི་བར་བྱེད་དོ། །བཅུ་གཅིག་པ་དགའ་བ་སྐྱེ་ཚུལ་ནི། མངོན་སུམ་དུ་ཉམས་སུ་བླངས་དུས་འཛིན་ཞེན་ཐམས་ཅད་བྲལ་བས་དགའ་བ་བཞི་ལས་ལྷན་ཅིག་སྐྱེས་པའི་དགའ་བ་སྐྱེའོ། །བཅུ་གཉིས་པ་སྐྱེ་སྒོ་གཅོད་ཚུལ་ནི། དབང་པོ་འབྲིང་པོ་བར་དོར་གྲོལ་བས་སྐྱེ་གནས་བཞི་ལས་བརྫུས་ནས་སྐྱེ་བའི་སྐྱེ་སྒོ་གཅོད་དོ། །བཅུ་གསུམ་པ་བདུད་བཅོམ་ཚུལ་ནི། ཚེ་འདིར་གྲོལ་བ་ཐོབ་ནས་བདུད་བཞི་ལས་འཆི་བདག་གི་བདུད་བཅོམ་མོ། །བཅུ་བཞི་པ་མཆེད་ཡིན་ཚུལ་ནི། རང་བྱུང་ཡེ་ཤེས་ཀྱི་དཀྱིིལ་འཁོར་དུ་ཆོས་ཀུན་མ་འདྲེས་ཡོངས་སུ་གཞུག་པས་མཆེད་བཞི་ལས་འདྲེས་མཆེད་དཀྱིལ་འཁོར་གཅིག་ཏུ་ཞུགས་པ་ཀུན་ནོ། །བཅོ་ལྔ་པ་ཚད་མེད་རྒྱུད་ལ་སྐྱེ་ཚུལ་ནི། ལམ་ལ་བརྟན་པ་ཐོབ་ན་གང་ལ་ཉེ་རིང་མེད་པས་ཚད་མེད་བཞི་ལས་བཏང་སྙོམས་ཚད་མེད་རྒྱུད་ལ་སྐྱེའོ། །བཅུ་དྲུག་པ་བསྒོམ་པ་གོམས་ཚུལ་ནི། ཁྲེགས་ཆོད་ཀྱི་ངོས་ནས་བསྒོམ་དུ་མེད་ལ། ཐོད་རྒལ་གྱིས་ངོས་ནས་ཡེངས་སུ་མེད་པས་བསྒོམ་པ་བཞི་ལས་བསྒོམ་མེད་ཡེངས་མེད་ཡེ་གྲུབ་ཏུ་བསྒོམ་མོ། །བཅུ་བདུན་པ་བར་དོ་གཅོད་ཚུལ་ནི། ཏིང་ངེ་འཛིན་ལ་ཐུན་མཚམས་རེག་འཇོག་མེད་པས་བར་དོ་བཞི་ལས་ཏིང་འཛིན་བར་དོ་གཅོད་པར་བྱེད་དོ། །བཅོ་བརྒྱད་པ་སྤྱོད་པ་སྤྱོད་ཚུལ་ནི། ཁྲེགས་ཆོད་ཐོད་རྒལ་གྱི་ལྟ་བསྒོམ་སྤྱོད་ལམ་རྣམ་བཞིར་ལམ་དུ་ཁྱེར་བས་སྤྱོད་པ་བཞི་ལས་ཚོགས་སྤྱོད་ཀྱི་སྤྱོད་པ་སྤྱོད་པའོ། །བཅུ་དགུ་པ་སྣང་བ་འབྱེད་ཚུལ་ནི། མངོན་སུམ་ཡེ་ཤེས་ཀྱི་ལམ་ཉམས་སུ་བླངས་དུས་འཁྲུལ་སྣང་སྒྲིབ་པ་ཟད་པས་སྣང་བ་བཞི་ལས་གདོས་བཅས་རྩོལ་རྟོག་ཟད་པའི་སྣང་བ་འབྱེད་དོ། །ཉི་ཤུ་པ་ཡེ་ཤེས་མཐོང་ཚུལ་ནི། མཁྱེན་གསུམ་རང་རྩལ་རྫོགས་ཅིང་སྒྲིབ་གསུམ་རྣམ་པར་དག་པས་ཡེ་ཤེས་བཞི་ལས་བྱ་གྲུབ་ཆོས་དབྱིངས་ཡེ་ཤེས་མཐོང་ངོ་། །ཉེར་གཅིག་པ་འབྲས་བུ་ཐོབ་ཚུལ་ནི། རྒྱལ་བའི་མཛད་པ་ཅིར་ཡང་མ་ངེས་པས་འབྲས་བུ་བཞི་ལས་མ་ངེས་དུས་སུ་སངས་རྒྱས་ཐོབ་པའོ། །ཉེར་གཉིས་པ་བསྐུར་ལུང་བསྟན་ཚུལ་ནི། སྒོ་གསུམ་གྱི་ཤེས་སྒྲིབ་དག་པས་སྐུ་བཞི་ལས་མི་ཤིག་རྡོ་རྗེའི་སྐུ་ཐོབ་བོ། །ཉེར་གསུམ་པ་རྒྱུད་སྡེའི་ཕྱོགས་གར་གཏོགས་པ་ནི། ཚིག་དབང་གིས་བརྡའ་དོན་ལྷན་སྐྱེས་འབའ་ཞིག་གཙོ་བོར་སྟོན་པས་རྒྱུད་སྡེ་བཞི་ལས་བླ་མེད་བྱ་བྲལ་ཨ་ཏིའི་ཕྱོགས་སུ་གཏོགས་སོ། །ཉེར་བཞི་པ་ཕྲིན་ལས་འགྲུབ་ཚུལ་ནི། སྐུ་དང་ཡེ་ཤེས་ཀྱི་དཀྱིལ་འཁོར་རྒྱས་པའམ་ལྷུན་གྱིས་གྲུབ་པས་ཕྲིན་ལས་བཞི་ལས་རྒྱས་པའི་ལས་སམ་ལྷུན་གྱིས་གྲུབ་པའི་ལས་འགྲུབ་བོ། །ཉེར་ལྔ་པ་མི་རིགས་འདུལ་ཚུལ་ནི། ཉོན་མོངས་པ་ཕྲ་བའི་ཕྲ་བ་ངེས་ལམ་གྱིས་སྦྱངས་པས་མི་རིགས་བཞི་ལས་རྗེའུའི་རིག་སྤྲོས་མེད་ཚིག་དབང་རིན་པོ་ཆེས་འདུལ་བར་བཤད་དོ། །གསུམ་པ་མཐའ་བརྟེན་རྗེས་གནང་གི་དབང་དང་རྗེས་ཀྱི་རིམ་པ་ཆོག་འགྲིགས་ལྟར་དུ་བྱའོ། །

བརྒྱད་པ་དེ་ལྟར་དབང་མ་ཐོབ་པའི་སྐྱོན་ནི། སྙིང་གི་མེ་ལོང་ལས། གསང་སྔགས་དབང་ལ་མ་བརྟེན་འགྲུབ་པར་ག་ལ་འགྱུར༔ དཔེར་ན་མཉན་པ་ལག་སྐྱ་མེད་པ་བཞིན༔ ཞེས་དང་། ཕྱག་རྒྱ་ཆེན་པོ་ཁ་སྤྱོར་ཐིག་ལེ་ལས། དབང་མ་ཐོབ་ན་དངོས་གྲུབ་མེད༔ བྱེ་མ་བཙིར་བས་མར་མེད་བཞིན༔ ཞེས་པས། དེ་ཁོ་ན་ཉིད་ཀྱི་སྣོད་དུ་མི་རུང་། ཡང་དག་པའི་བྱིན་རླབས་མི་འཇུག་དངོས་གྲུབ་ཀྱི་རྩ་བ་ཆད་པའོ། །དགུ་པ་དབང་ཐོབ་པའི་ཡོན་ཏན་ནི། སྙིང་གི་མེ་ལོང་ལས། དབང་རྣམས་རབ་ཏུ་ཐོབ་བྱས་ན༔ གསང་སྔགས་ཐམས་ཅད་མ་བསྒྲུབ་འགྲུབ༔ ཅེས་དང་། ཀློང་གསལ་ལས། དབང་ཐོབ་རྒྱུད་སྨིན་ཆོས་སྒོ་འབྱེད༔ གསང་སྔགས་དོན་ཀུན་འགྲུབ་པར་འགྱུར༔ ཞེས་པས། གོང་མའི་བྱིན་རླབས་འཇུག་པས་གསང་སྔགས་ཀྱི་སྣོད་དུ་རུང་། ཟབ་པའི་ཆོས་སྒོ་ཕྱེད་པས་སྨིན་གྲོལ་གྱི་ལམ་ལ་དབང་། གསང་སྔགས་ཀྱི་དངོས་གྲུབ་གྲུབ་པས་རང་གཞན་གྱི་འདོད་དགུ་འབྱུང་བའོ། །བཅུ་པ་དབང་གི་གཏད་རྒྱ་བསྟན་པ་ནི། ཕྲད་ཚད་རང་གྲོལ་ལས། བཞི་རྫོགས་དབང་བསྐུར་སྣོད་ལྡན་ནི༔ བརྒྱ་ལམ་ནང་ནས་རེས་འགའ་ཙམ༔ ཀུན་ལ་བུམ་དབང་འབྲེལ་པ་ཐོབ༔ གོང་མ་གསུམ་ནི་ཤིན་ཏུ་གསང་༔ ཞེས་པས། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བཞི་ཡོངས་སུ་རྫོགས་པ་ནི། སློབ་གཞུང་མན་ངག་ནས་བསྔགས་པའི་སྣོད་ལྡན་རེ་རེ་ལ་བསྐུར་ཞིང་། ཆོས་བཀའ་མ་ལུས་པའི་བཀའ་གཏད་དོ། །སྣོད་དང་མི་ལྡན་པ་ལ། དབང་གོང་མ་གསུམ་གསང་རྒྱས་བཏབ་ལ། བུམ་དབང་ནི་ཤི་གསོན་ཀུན་ལ་ཆོས་འབྲེལ་ཏུ་བཞག་གོ ། དེས་སྤྱི་དོན་རྣམ་པ་བཅུའི་སྒོ་ནས་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བཤད་ཟུར་ཙམ་ཞིག་སོང་ངོ། རྗེས་སུ་དབང་སྲོག་དམ་ཚིག་རྣམ་དབྱེ་གཞུང་གཞན་དུ་གསལ་ལོ། །གསང་སྔགས་བླ་མེད་རྒྱུད་ཀྱི་སྒོར་ཞུགས་རྣམས། །དབང་བཞི་གཞུང་ལམ་རིམ་བཞིན་བགྲོད་བྱས་ནས། །འདི་ཕྱི་བར་དོར་རྣམ་གྲོལ་སངས་རྒྱས་སར། །ཕྱིན་པའི་ཐབས་ལ་སྣོད་བཅུད་འཛོམ་དགོས་སོ། །སློབ་དཔོན་མཚན་ཉིད་རབ་འབྲིང་ཐ་མ་གསུམ། །གང་རུང་གཅིག་དང་མི་ལྡན་བསྐུར་བྱེད་ལ། །དབང་བསྐུར་ཞུ་ཡང་དོན་དུ་མི་འགྱུར་ཏེ། །འཆིང་བུར་གསོལ་བཏབ་དགོས་འདོད་མི་འབྱུང་བཞིན། །སྣོད་དང་མི་ལྡན་སློབ་མའི་ཚོགས་རྣམས་ལ། །དབང་ནི་བརྒྱ་སྟོང་དུ་མ་བསྐུར་ན་ཡང་། །རྒྱུད་སྨིན་མི་ནུས་ངལ་བ་དོན་མེད་ཅིང་། །རྡོ་རྒྱབ་ཆུ་བླུགས་ནང་དུ་མི་འགྲོ་བཞིན། །དབང་ཆོག་རྒྱ་འགྱུར་ལྷད་མེད་མ་ཡིན་པའི། །གང་ཟག་ཕལ་གྱིས་རྩོམ་པའི་དབང་ཆོག་ནི། །བསྐུར་ཐབས་གསལ་ཀྱང་བྱིན་བརླབ་ནུས་ཆུང་ཞིང་། །ཚོང་དུས་མང་འགྲིམ་འོ་མ་ཇི་བཞིན་ནོ། །དེང་སང་དབང་བསྐུར་གཉེར་བྱེད་མང་གདའ་སྟེ། །དབང་ཐོབ་རྗེས་སུ་དམ་ཚིག་མ་བསྲུང་ན། །དུག་དང་འདྲེས་པའི་བཟའ་བཏུང་ལོངས་སྤྱོད་བཞིན། །ཕན་པ་བས་ཀྱང་གནོད་པ་ཆེ་བ་ཡིན། །དེ་བས་དབང་སྲོག་དམ་ཚིག་ཚུལ་བཞིན་སྲུངས། །དབང་ནི་མན་ངག་སྣོད་དུ་རུང་ཙམ་གྱི། །དབང་དོན་བསྐྱེད་རྫོགས་ཉམས་སུ་བླངས་ནས་ནི། །རང་རྒྱུད་སྨིན་ཅིང་གཞན་རྒྱུད་གྲོལ་དགོས་སོ། །རང་རིག་བཅུད་ལྡན་རྡོ་རྗེ་སློབ་དཔོན་གྱིས། །རང་སྣང་དཀྱིལ་འཁོར་དབང་རྫས་ལ་བསྟེན་ནས། །རང་གསལ་སྣ་ཚོགས་སྣོད་ལྡན་སློབ་མ་ལ། །རང་སར་རང་གྲོལ་བསྐུར་ཐོབ་དུས་མཚུངས་སོ། །གསང་སྔགས་བླ་མེད་དབང་དོན་རྟོགས་དཀའ་ཕྱིར་། །དབང་བཞི་གཞུང་བཞིན་དགོངས་དོན་མ་ཁྲོལ་ཞིང་། །འགལ་དང་མ་འབྲེལ་ཚིག་སྐྱོན་གང་སོང་རྣམས། །ཞི་ཁྲོ་རྩ་བ་གསུམ་ལ་བཟོད་པར་གསོལ། །དབང་རྣོན་མ་ཡིན་དབང་རྟུལ་བདག་གིས་ནི། །དབང་ལ་བརྟེན་ནས་དབང་བཤད་འདི་བརྩམས་སོ། །དབང་ལ་མོས་རྣམས་དབང་གི་སྣོད་རུང་ཞིང་། །དབང་བཞིས་རྒྱུད་སྨིན་དབང་དོན་མཐར་ཕྱིན་ཤོག། ཤུབྷཾ།