དབང་བཞི་འཕྲད་ཚད་རང་གྲོལ་གྱི་དོན་བསྡུས་དབང་བཞིའི་དོན་དབང་ཐོས་ཚད་རང་གྲོལ།
ཟབ་ཆོས་ཞི་ཁྲོ་དགོངས་པ་རང་གྲོལ་ལས་དབང་བཞི་འཕྲད་ཚད་རང་གྲོལ་གྱི་དོན་བསྡུས་དབང་བཞིའི་དོན་དབང་ཐོས་ཚད་རང་གྲོལ་འདི་ནི་དཔེ་འཁྱུད་མི་བྱ་ཀུན་ལ་སྤེལ་ཁྱེར་བདེ་ལ་ཕན་ཡོན་ཆེ་བར་ཡོད།
ཀུན་བཟང་ཞི་ཁྲོའི་ལྷ་ལ་ཕྱག་འཚལ་ནས། །ཞི་ཁྲོའི་དབང་བཞི་འཕྲད་ཚད་རང་གྲོལ་གྱི། །སྤྲོས་བཅས་བུམ་དབང་བསྡུས་པ་བསྐུར་ཐབས་བྲི། །ཆོས་བདག་བསྲུང་མས་བཀའ་གནང་བྱིན་གྱིས་རློབས། །ཞི་ཁྲོ་བླུག་ཞོར་ཡིན་ན་རབ། །མིན་ན་དཀྱིལ་ཐང་མེད་ན་ཚོམ་བུ་དང་། །བུམ་པ་གཏོར་མ་མཆོད་པ་རྣམ་ལྔ་བཤམས། །ཞི་ཁྲོའི་ལས་བྱང་ཉུང་བ་ཚར་ཅིག་གིས། །བདག་མདུན་བུམ་པ་གཏོར་མ་དུས་གཅིག་བསྐྱེད། །བྷོ་དྷི་ཙིཏྟའི་བསྙེན་པ་ཅི་འགྲུབ་བཟླས། །ཁྲོམ་པ་ཡོད་ན་འཛབ་བསྙེན་འུར་འདོན་བཅུག །ལས་བུམ་ནང་དུ་བདུད་རྩི་འཁྱིལ་པའམ། །རྡོར་སེམས་གཙོ་རྐྱང་དྲན་རྫོགས་ཡིད་ཀྱིས་བསྒོམ། །གང་ཡིན་སྔགས་དེ་ཅུང་ཟད་བཟླས་པས་འཐུས། །སློབ་མ་འཚོགས་ནས་བགེགས་གཏོར་སྤྱི་ལྟར་བསྔོ། །ལས་བྱང་ནང་ལྟར་བཀའ་བསྒོ་མཚམས་གཅོད་ནི། །རྔ་དང་རོལ་མོ་དང་བཅས་ནས་ཀྱིས་བྲབ། །དབང་བཤད་རྒྱས་བསྡུས་སྐབས་དང་བསྟུན་ལ་བྱ། །ཉུང་ན་ཆབ་བཏང་མང་ན་མེ་ལོང་ངོས། ཁྲོམ་པ་འཆར་ལ་ལས་བུམ་ཁྲུས་བྱས་ཏེ།
ཧཱུྃ༔ རྒྱུད་དྲུག་ནད་གདོན་སྒྲིབ་སྦྱོང་ཕྱིར༔ བུམ་ཆུ་བཀྲ་ཤིས་ཆུ་རྒྱུན་གྱིས༔ སྐལ་ལྡན་བུ་ཡི་སྒོ་གསུམ་བཀྲུ༔ མི་མཐུན་ཞི་ནས་སྣོད་རུང་ཤོག༔ ༀ་བཛྲ་ཨ་མྲྀ་ཏ་ཀུནྡྷ་ལི་ཧཱུྃ༔ སྡིག་པ་དང་སྒྲིབ་པ་ཐམས་ཅད་ཤུདྡྷེ་ཤུདྡྷེ་བི་ཤུདྡྷེ་སྭཱ་ཧཱ༔ ད་ཁྱོད་རང་རྣམས་ཕོ་བྲང་གི་ཕྱི་སྒོ་ནས་གསོལ་བ་འདེབས་པའི་མོས་པས་རྗེས་ཟློས་མཛོད། ཧོ༔ སྒོ་བསྲུང་ཕོ་མོ་ཐམས་ཅད་གསོན༔ བདག་ཅག་འཁོར་བའི་སྡུག་བསྔལ་ལས༔ ཐར་ཕྱིར་དཀྱིལ་འཁོར་འདིར་འཇུག་པས༔ སྒོ་བས་སྒོ་ཕྱེས་ནང་བཏང་འཚལ༔ རྟག་ཏུ་ཁྱེད་དྲིན་བདག་གིས་ཁུར༔ དེ་ལྟར་གསོལ་བ་བཏབ་པས་སྒོ་སྲུང་ཁྲོ་བོ་ཁྲོ་མོ་ཐམས་ཅད་ཀྱིས་མེ་རླུང་མཚོན་ཆ་འཚུབ་མའི་ཀློང་ནས་ང་རོ་དྲག་པོ་དང་བཅས་ཏེ། ཧོ་ཁྱེད་ཅག་སྒོ་འདིར་འཇུག་པ་ལ༔ དགེ་བཅུ་བསྒྲུབ་ཅིང་མི་དགེ་སྤོང༔ དཀོན་མཆོག་གསུམ་པོ་ཡིད་ལ་གྱིས༔ ཁས་ལེན་མེད་ན་ཕྱིར་དེངས་ཤིག༔ ཅེས་བྱས་པའི་ལན་ཞུ་བ་འདིའི་རྗེས་ཟློས་མཛོད། བདག་ཅག་ཁྱེད་ཀྱི་བཀའ་བཞིན་བགྱིད༔ དགེ་སྒྲུབ་སྡིག་སྤངས་སྐྱབས་སུ་འགྲོ༔ ངེས་པར་ནང་དེར་བཏང་དུ་གསོལ༔ ཞེས་བརྗོད་པས་ལས་ཀྱི་རྡོ་རྗེས་ཁྲིད་ནས་ཕོ་བྲང་གི་ནང་དུ་སླེབ་ནས་བླ་མ་ལ་ཕྱག་དང་མཎྜལ་ཕུལ་བར་བསྒོམ་ལ། ས་གཞི་སྤོས༴ སོགས། དེ་ནས་སློབ་དཔོན་ལ་འདོད་དོན་ཞུ་བའི་རྗེས་ཟློས་མཛོད། ཧོ་ཁྱེད་ཞབས་བཀའ་དྲིན་སྤང་ནས་ནི༔ བདག་ནི་སྐྱབས་གཞན་མ་མཆིས་པས༔ བླ་མ་གཙོ་མཆོག་འགྲོ་བའི་མགོན༔ སློབ་མ་བདག་ལ་བསྐྱབ་ཏུ་གསོལ༔ གཅིག་གམ་གསུམ། བླ་མས། བདག་ལ་ཡོན་ཏན་ཚོགས་མཆིས་ཀྱི༔ ཁྱོད་རྣམས་ཅི་འདོད་གང་ཡིད་འོང་༔ རྗེས་ཟློས། ཧོ་དུས་གསུམ་རྒྱལ་བའི་དགོངས་དྲིལ་བའི༔ ཐབས་ཤེས་དབྱེར་མེད་བདག་ཉིད་ཅན༔ གསང་སྔགས་ཐབས་ཀྱིས་བདག་ཉིད་མཆོག༔ དབང་བཞི་རྫོགས་པར་བདག་ལ་རྩོལ༔ གཅིག་གམ་གསུམ། འོ་ན་སྡོམ་པ་གསུམ་ལ་བརྟེན་དགོས་པས་སྡོམ་པའི་གཞི་སྐྱབས་སུ་འགྲོ་བའི་སྡོམ་པ་ཞུ་བའི་ཕྱིར་རྗེས་ཟློས་མཛོད། ན་མོ་རྣམ་མཁྱེན་གཙོ་བོ་དཀོན་མཆོག་གསུམ༔ བདག་ལ་གསན་ཅིང་དགོངས་སུ་གསོལཿ ཐར་པའི་ལམ་སྐས་དཀོན་མཆོག་གསུམ༔ ངན་སོང་དག་ལས་བསྐྱབ་ཏུ་གསོལ༔ མ་རིག་མུན་སེལ་དཀོན་མཆོག་གསུམ༔ མུན་པ་དག་ལས་བསྐྱབ་ཏུ་གསོལ༔ འགྲོ་བ་འདྲེན་མཛད་དཀོན་མཆོག་གསུམ༔ འགྲོ་དྲུག་དག་ལས་བསྐྱབ་ཏུ་གསོལ༔ འགྲོ་དྲུག་སྐྱབས་གནས་དཀོན་མཆོག་གསུམ༔ འཁོར་བའི་འདམ་ནས་དྲང་དུ་གསོལ༔ བར་ཆད་ཀུན་སེལ་དཀོན་མཆོག་གསུམ༔ འདི་ཕྱི་གཉིས་ལས་བསྐྱབ་ཏུ་གསོལ༔ དངོས་གྲུབ་ཆར་འབེབས་དཀོན་མཆོག་གསུམ༔ མཆོག་དང་ཐུན་མོང་དངོས་གྲུབ་སྩོལ༔ རང་ངོ་ཤེས་པར་བྱིན་གྱིས་རློབས༔ རང་རྒྱུད་གྲོལ་བར་མཛད་དུ་གསོལ༔ གཞན་སྣང་འདུལ་བར་བྱིན་གྱིས་རློབས༔ བདག་གཞན་སྨིན་པར་མཛད་དུ་གསོལ༔ ལན་གསུམ་མ་ལྕོགས་ན་གཅིག་གིས་ཆོག་སྟེ། འོག་ནས་འབྱུང་བ་ཚར་གསུམ་དོན་ལ་འགྲོ་བར་ཡོད་པས་ཆོག་གོ། །
དེ་ནས་ཕྱི་ནང་གསང་བའི་དཀོན་མཆོག་གསུམ་ལ། སྐྱབས་སུ་འགྲོ་བའི་རྗེས་ཟློས་མཛོད། ཀྱཻ་ཕྱོགས་བཅུའི་སངས་རྒྱས་བྱང་ཆུབ་སེམས༔ བླ་མ་ཡི་དམ་མཁའ་འགྲོ་དགོངས༔ རྐང་གཉིས་གཙོ་བོ་སངས་རྒྱས་དང་༔ ཞི་བ་ཆགས་བྲལ་དམ་པའི་ཆོས༔ ཚོགས་མཆོག་ཕྱིར་མི་ལྡོག་པ་ལ༔ བདག་ནི་གུས་པས་སྐྱབས་སུ་མཆི༔ བྱིན་རླབས་འབྱུང་བའི་བླ་མ་རྗེ༔ དངོས་གྲུབ་སྟེར་བའི་ཡི་དམ་ལྷ༔ བར་ཆད་སེལ་བའི་མཁའ་འགྲོ་མ༔ བདག་སོགས་གུས་པས་སྐྱབས་སུ་མཆི༔ གདལ་ཁྱབ་ཆེན་པོ་ཆོས་ཀྱི་སྐུ༔ གསལ་དངས་ཆེན་པོ་ལོངས་སྤྱོད་རྫོགས༔ སྣ་ཚོགས་འཛིན་བྲལ་སྤྲུལ་པའི་སྐུ༔ བདག་སོགས་འགྲོ་ཀུན་བསྐྱབ་ཏུ་གསོལ༔ གསུམ་མམ། ཚིག་རྗེས་མ་གསུམ་ཀྱིས་མཐུས། འདུལ་བ་ནས་གསུངས་པའི་དགེ་ཚུལ་དགེ་སློང་སོགས་ཀྱི་སྡོམ་པ་ནི་མ་ཡིན་ཀྱང་། སོ་སོར་ཐར་པའི་དོན་བསྡུས་ན། གཞན་ལ་གནོད་པ་གཞི་དང་བཅས་པ་སྤང་ན། སྐྲ་རིང་ཞིང་གོས་དཀར་ན་ཡང་དོན་གྱིས་དགེ་སློང་ཡིན་པས། དེའི་སྡོམ་པ་ཞུ་བའི་རྗེས་ཟློས་མཛོད། བླ་མ་མཆོག་གི་སྤྱན་སྔ་རུ༔ ལུས་ངག་ཡིད་ཀྱིས་འགྲོ་བ་ལ༔ གནོད་པ་སྤང་ཞིང་དགེ་བ་བསྒྲུབ༔ དགེ་བསྙེན་དགེ་ཚུལ་དགེ་སློང་གསུམ༔ ཉན་ཐོས་རང་རྒྱལ་བྱང་ཆུབ་སེམས༔ སོ་སོར་ཐར་པའི་སྡོམ་པ་ལ༔ བདག་ནི་རྒྱུན་དུ་གནས་ཤིང་བསྲུང་༔ ཚིག་རྗེས་མ་གསུམ། ད་བྱང་ཆུབ་སེམས་བསྐྱེད་ཞུ་བསམ་པ་གྱིས་ལ་རྗེས་ཟློས་མཛོད། ཧོ་དུས་གསུམ་བླ་མ་མཆོག་དགོངས་ཤིག༔ འདི་བཟུང་བྱང་ཆུབ་མ་ཐོབ་པར༔ འགྲོ་དྲུག་སེམས་ཅན་ཐམས་ཅད་ལ༔ ཕ་མའི་འདུ་ཤེས་ཉེར་བཞག་སྟེ༔ མ་བསྒྲལ་བ་རྣམས་བསྒྲལ་བ་དང་༔ མ་གྲོལ་བ་རྣམས་དགྲོལ་བ་དང་༔ དབུག་མ་དབྱུང་རྣམས་དབུག་དབྱུང་ཕྱིར༔ སྨོན་པ་བྱང་ཆུབ་སེམས་བསྐྱེད་དོ༔ ཚིག་རྗེས་མ་གསུམ། དེ་ལྟར་བསམ་པ་བྱང་ཆུབ་ཏུ་སེམས་བསྐྱེད་ནས། སྦྱོར་བ་ཕ་རོལ་ཏུ་ཕྱིན་པ་དྲུག་ལ་སྤྱོད་བསམ་པས་འཇུག་པ་སེམས་བསྐྱེད་ཞུ་བའི་རྗེས་ཟློས་མཛོད། ཧོ་སྔོན་གྱི་རྒྱལ་བ་ཐམས་ཅད་ཀྱང་༔ སྡོམ་པ་ལ་ནི་གནས་པ་ལྟར༔ འདི་བཟུང་བྱང་ཆུབ་མ་ཐོབ་བར༔ བླ་མེད་འཇུག་པའི་བྱང་ཆུབ་སེམས༔ བདག་ཅག་རྣམས་ཀྱིས་བསྐྱེད་པར་བགྱི༔ ཕར་ཕྱིན་དྲུག་ལ་སློབ་ཅིང་བསྒྲུབ༔ བརྩོན་འགྲུས་དག་གི་ཐམས་ཅད་བསྒྲལ༔ ཀུན་དོན་ཚུལ་ཁྲིམ་གསུམ་ཡང་བཟུང་༔ བདག་གིས་སེམས་བསྐྱེད་སྡོམ་བཟུང་ནས༔ མ་གྲོལ་སྒྲོལ་དང་མ་བསྒྲལ་བསྒྲལ༔ དབུག་དབྱུང་མྱ་ངན་འདས་ལ་འགོད༔ ཚིག་རྗེས་མ་གསུམ། དེ་ལྟར་ཐེག་པ་ཐུན་མོང་བའི་སྡོམ་པ་བཟུང་ནས། གསང་སྔགས་རིག་འཛིན་གྱི་སྡོམ་པ་ཞུ་བའི་རྗེས་ཟློས་མཛོད། ཧོ་དཀོན་མཆོག་གསུམ་བཟུང་མི་གཏོང་བསྒྲུབ༔ བླ་མ་ཡི་དམ་མི་སྤང་བསྒྲུབ༔ སངས་རྒྱས་དཀོན་མཆོག་དམ་ཚིག་ཏུ༔ ཡང་དག་སྙིང་པོའི་དོན་ལ་འཇུག༔ དམ་ཆོས་དཀོན་མཆོག་དམ་ཚིག་ཏུ༔ ཐེག་པ་གསུམ་རྣམས་ངོ་བོར་དྲིལ༔ དགེ་འདུན་དཀོན་མཆོག་དམ་ཚིག་ཏུ༔ རིག་པ་དྲི་མེད་དོན་ལ་བལྟ༔ བླ་མ་ཡི་དམ་དམ་ཚིག་ཏུ༔ རང་སེམས་གཙང་མ་དཔང་དུ་བཙུགས༔ རྡོ་རྗེ་རིགས་ཀྱི་དམ་ཚིག་ཏུ༔ རྡོ་རྗེ་དྲིལ་བུའི་ཕྱག་རྒྱ་དང་༔ བྱང་ཆུབ་སེམས་ནི་སྤང་མི་བྱ༔ རྡོ་རྗེ་རིགས་ཀྱི་དམ་ཚིག་ཡིན༔ རིན་ཆེན་རིགས་ཀྱིས་དམ་ཚིག་ཏུ༔ སྦྱིན་པ་རྣམས་བཞི་རྟག་ཏུ་སྦྱིན༔ རིན་ཆེན་རིགས་ཀྱི་དམ་ཚིག་ཡིན༔ པདྨ་རིགས་ཀྱི་དམ་ཚིག་ཏུ༔ ཐེག་པ་གསུམ་དང་ཆོས་རྣམས་བཤད༔ པདྨ་རིགས་ཀྱིས་དམ་ཚིག་ཡིན༔ ལས་ཀྱི་རིག་ཀྱི་དམ་ཚིག་ཏུ༔ འགྲོ་བའི་དོན་ལ་བརྩོན་པར་བྱ༔ ལས་ཀྱི་རིགས་ཀྱི་དམ་ཚིག་ཡིན༔ དེ་བཞིན་རིགས་ཀྱི་དམ་ཚིག་ཏུ༔ དཀྱིལ་འཁོར་གསུམ་དང་འབྲལ་མི་བྱ༔ དེ་བཞིན་རིགས་ཀྱི་དམ་ཚིག་ཡིན༔ བདག་ནི་དཔལ་ཆེན་རིགས་མཆོག་ཆེ༔ བླ་མ་ཡི་དམ་མཁའ་འགྲོ་དང་༔ སྐྱབས་གནས་དཀོན་མཆོག་གསུམ་རྣམས་ལས༔ མི་འདའ་རྡོ་རྗེའི་དམ་ལ་གནས། ཡར་མཆོད་གུས་ཤིང་མར་ལ་བརྩེ༔ རྩ་བ་ཡན་ལག་དམ་ཚིག་བསྲུང་༔ རྩ་བ་བཞི་སོགས་དམ་ཚིག་ལས༔ ནམ་ཡང་མི་འདའ་གཟུང་བར་བྱ༔ ཚིག་རྗེས་མ་གསུམ་བྱ། དེ་ནས་ཉུང་ན་རྡོ་རྗེ་སྤྱི་བོར་བཞག མང་ན་ཕྱོགས་སུ་བསྟན་ཅིང་སྤྱི་བོར་བཞག་པར་བསྒོམ། ཧཱུྃ་འདི་ནི་དམ་ཚིག་རྡོ་རྗེ་ཡིན༔ སྐུ་ཡི་དམ་ཚིག་ལུས་ཀྱིས་བསྲུང་༔ ཉམས་ན་ན་རཀ་དམྱལ་བར་ཚུད༔ བསྲུང་ན་སྐུ་ཡི་འགྲོ་དོན་ནུས༔ བདུད་རྩི་བུམ་ཆུ་བསྲེ་དུང་ཆོས་ཀྱིས་བླུད། མང་ན་སྲིན་ལག་གི་གཏོར། དུང་ཆོས་བསྟན་ལ་བླུད་པར་བསྒོམ་ཞིང་། ཧཱུྃ་དམ་ཚིག་བདུད་རྩིའི་ཆུ་འདི་ཉིད༔ ཁྱོད་ཀྱི་ངག་ཏུ་བླུད་པར་བྱ༔ གསུང་གི་དམ་ཚིག་ངག་གིས་སྲུངས༔ ཉམས་ན་བྱོལ་སོང་གནས་སུ་སྐྱེ༔ བསྲུང་ན་ཆོས་སྨྲའི་རྒྱལ་པོ་སྐྱེ༔ དེ་ནས་གཙོ་བོའི་སྐུ་མེ་ལོང་དུ་བསྟན་ལ་སྙིང་ཁར་བཞག་གམ་བཞག་པར་བསྒོམས་ཤིག ཧཱུྃ་འདི་ནི་ཡེ་ཤེས་སེམས་དཔའ་སྟེ༔ ཐུགས་ཀྱི་དམ་ཚིག་ཡིད་ཀྱིས་སྲུངས༔ ཉམས་ན་སྨྱོ་འབོག་ཅན་དུ་སྐྱེ༔ བསྲུང་ན་ཆོས་སྐུ་གཉིས་ལྡན་ཐོབ༔ དེ་ནས་རྡོ་རྗེ་ལག་ཏུ་གཏད་པར་དམིགས་ལ། མིག་ལམ་དུ་ཕྱར། ལྕེ་ལ་བདུད་རྩི་བྱིན་པར་བསྒོམ་ལ་སྲིན་ལག་གིས་གཏོར། སྙིང་ཁར་དྲི་ཡི་ཐིག་ལེ་བྱས་པར་དམིག་ལ་བྲིས་པ་བསྟན། སྲིན་ལག་གི་རྩེ་ལ་སྤོས་ཆུ་རེག་པ་བསྟན། དེ་ནས་རྡོ་རྗེ་སློབ་དཔོན་གྱིས་གོང་གི་དབང་རྫས་རྡོ་རྗེ་དང་མེ་ལོང་གཙོ་བོའི་སྐུ་དྲིའི་ཐིག་ལེ་བྲིས་པ་དམ་ཚིག་གི་རྡོ་རྗེ་རྩེ་ལྔ་པ་དང་བཅས་པ་ཉུང་ན་མགོ་དང་ལག་དང་སྙིང་གར་གཏུག མང་ན་སྤྱི་བོར་འགྲིམ་ཞིང་མཆོད་གཡོག་པས་བུམ་པ་ནས་དམ་ཆུ་གཉིས་བསྲེས་པ་འགྲིམ་ཞིང་བླུད་དོ། །
---དེ་བྱེད་ཁ་དམ་བསྒྲགས་ལ༔ ཧོ་བུ་ཁྱོད་འདི་ལྟར་བསྲུང་བར་གྱིས༔ ཡབ་ཡུམ་སྐུ་ཡི་དམ་ཚིག་ཏུ༔ བློ་ཆེ་ཁོག་ཡང་བསྐྱེད་པར་གྱིས༔ གསང་སྔགས་མི་འཆལ་ཤེས་པ་དང་༔ མཚན་མ་མི་འགོང་རིགས་མི་སྨད༔ རྡོ་རྗེ་སློབ་དཔོན་མལ་ཆ་དང་༔ ཡོ་བྱད་ཕྱག་རྒྱ་ལ་སོགས་པ༔ མ་གནང་བར་དུ་མི་སྤྱོད་ཅིང་༔ མོས་གུས་སྐུ་གསུང་ཐུགས་དམ་སྲུངས༔ སྤུན་གྲོགས་ལྷན་ཅིག་འཐབ་རྩོད་སྤང་༔ ཁྱད་པར་དམན་པ་སྐྱོང་བར་གྱིས༔ དམ་ཚིག་དེ་དག་ཁས་ལེན་པའི་རྗེས་ཟློས་མཛོད། ཧོ་དཔའ་བོས་གསུང་བཞིན་བདག་གིས་བསྒྲུབ༔ སངས་རྒྱས་ཞིང་དུ་བསྒྲལ་བར་མཛོད༔ ཅེས་བརྗོད་རྗེས་གོང་གི་དམ་ཆུ་དམ་ཚིག་རྡོ་རྗེ་སོགས་སྐབས་འདིར་འགྲིམ་མོ། །སྐབས་འདིར་སྤྱིར་རྡུལ་ཚོན་མེད་ན་ལྟ་གོན་མི་དགོས་མི་འབྱོར་ཟེར་བ་དགེ་བཤེས་ཐམས་ཅད་གསུང་མཐུན་ལ། ཁྱད་པར་བསྒྲུབ་ཆེན་མིན་པའི་མགྱོགས་དབང་ལ་ནི་སོ་ཤིང་དཔུང་སྐུད་སོགས་མི་འབྱོར་ཞེས་བདག་གི་བླ་མ་གསར་རྙིང་གཉིས་ལ་མཁས་པ་རབ་འབྱམས་སྨྲ་བ་ངག་གི་དབང་པོས་བདག་ལ་ཞལ་ཁྲིད་མཛད་དོ། །དེ་སྔོན་ཞི་ཁྲོའི་དཀྱིལ་འཁོར་མ་མཐོང་བ་དང་། མ་རིག་པ་བརྒལ་བའི་བརྡ་ཆོས་སུ་མིག་དར་ཆིངས། ཅེས་མིག་དར་བཀྱེ། ད་དཀྱིལ་འཁོར་ནང་དུ་འཇུག་པའི་ཕྱིར་མཎྜལ་ཕུལ། ས་གཞི་སྤོས་ཆུས༴སོགས། རྗེས་ཟློས་མཛོད། ཀྱེ་ཧོ་འགྲོ་མགོན་བླ་མ་རྗེ༔ བདག་ཅག་སྐལ་ལྡན་བུ་རྣམས་ནི༔ དཀྱིལ་འཁོར་གཉན་པོར་གཞུག་ཏུ་གསོལ༔ རྗེས་མ་གསུམ། དཀྱིལ་འཁོར་གྱི་སྒོ་བསྲུང་ལ་གསོལ་བ་འདེབས་པའི་མོས་པས་རྗེས་ཟློས་མཛོད། ཧཱུྃ༔ དཀྱིལ་འཁོར་ཆེན་པོའི་སྒོ་བཞི་ནི༔ ཉོན་མོངས་སྒྲིབ་པས་བཅད་ལགས་ན༔ སྒོ་བ་ཁྲོ་བོ་ཆེན་པོ་བཞི༔ སྒོ་མ་ཁྲོ་མོ་བཞི་རྣམས་ཀྱིས༔ ཐབས་ཤེས་ཕྱག་རྒྱ་བཞི་པོ་ཡིས༔ ཡེ་ཤེས་བཞི་ཡི་སྒོ་ཕྱེས་ལ༔ བདག་ཅག་དད་པས་འཇུག་པར་བགྱི༔ ཀུན་བཟང་ཞི་ཁྲོའི་ལྷ་ཚོགས་ལ༔ བདག་ཅག་གུས་པས་ཕྱག་འཚལ་ལོ༔ ཡི་དམ་ལྷ་དང་མཇལ་བར་ཤོག༔ པྲ་ཝེ་ཤ་ཡ་ཕཊཿ སྒོ་བཞི་ཕྱེས་ནས་སྐོར་བ་ལན་གསུམ་བྱས་ཏེ། འཕྲིན་ལས་འགྲུབ་པའི་ཕྱིར་རྡོ་རྗེ་རིན་ཆེན་པདྨ་རྒྱ་གྲམ་རྣམས་ལག་ཏུ་བྱིན་པས་དངོས་གྲུབ་བཞི་ཐོབ་པར་བསྒོམ། ཅེས་ཙག་ལི་བསྟན་ཙམ་བྱའམ། ཉུང་ན་ལག་དུ་བཞག སློབ་དཔོན་གྱི་རླུང་རོ་བུས་ཏེ། ད་ཁྱེད་རང་རྣམས་དཀྱིལ་འཁོར་ཤར་སྒོའི་འཁྱམས་སུ་གནས་པ་ལ༔ སློབ་དཔོན་ཀུན་བཟང་ཡབ་ཡུམ་འཁྲིལ་སྦྱོར་གྱི་ཤངས་ནས་རླུང་བྱུང་བས་ཁྱོད་རང་རྣམས་འོད་དུ་ཞུ་བ་རླུང་གིས་རྔུབ་སྟེེ་ཤང་དབུག་གཡོན་ནས་ཞུགས༔ སྐུ་ཡི་དབྱིབས་བརྒྱུད་རྡོ་རྗེའི་སྦུབ་ནས་ཐོན༔ ཡུམ་གྱི་པདྨར་བབ་པས་སྲས་སུ་གྱུར་ཏེ༔ ཡུམ་གྱི་རྩིབ་མའི་གོ་བར་ནས་ཐོན་པས༔ མདུན་གྱི་བར་སྣང་ལ་རིགས་ཐམས་ཅད་འདུས་པའི་ངོ་བོར༔ བཅོམ་ལྡན་འདས་དཔལ་རྡོ་རྗེ་སེམས་དཔའ་སྐུ་མདོག་ཕྱག་མཚན་རྒྱན་ཆ་ལུགས་དང་བཅས་པ་སྣང་ལ་རང་བཞིན་མེད་པར་གྱུར་ཏེ༔ དཀྱིལ་འཁོར་ཤར་སྒོའི་ཁྱམས་ན་སེངྒེའི་ཁྲི་ལ་བཞུགས་པར་གྱུར་པའི་སྙིང་ནང་ན་སངས་རྒྱས་བཞི་བཅུ་རྩ་གཉིས༔ ཀླད་པ་དུང་ཁང་ནང་ན་ཁྲག་འཐུང་ལྔ་བཅུ་རྩ་བརྒྱད༔ མགྲིན་པ་ན་དག་པ་རིག་འཛིན་གྱི་ལྷ་ཚོགས་གསལ་བར་བསྒོམ་ཤིག༔ ཧོ་བུ་ཁྱོད་དེང་ནས་རྒྱལ་བའི་སྲས༔ གསང་སྔགས་དབང་གི་སྣོད་ཡིན་ནོ༔ སྤྲོ་བ་དང་དགའ་བ་སྐྱེད་ཅིག༔ ད་ཡེ་ཤེས་པ་དབབ་པའི་ཕྱིར་ཁྱོད་རང་རྣམས་བཞེངས་ནས་ཐལ་མོ་སྙིང་གར་སྦྱར་བའི་མོས་པ་གྱིས་ལ༔ སྐད་ཅིག་གིས་ཁྱེད་རང་རྣམས་རྡོ་རྗེ་ཕག་མོ་མཐིང་ནག་བུ་མོ་བཅུ་དྲུག་ལོན་པའི་ན་ཚོད་ཙམ༔ ནུ་མ་འབུར་ཞིང་བྷ་ག་རྒྱས་པ། དབུ་སྐྲ་ལྕང་ལོ་སིལ་བུར་བསིལ་བ། རུས་པའི་རྒྱན་དྲུག་གིས་བརྒྱན་པ། ཕྱག་གཡས་ཅང་ཏེའུ་དང་། གཡོན་དྲིལ་བུ་འཛིན་པ། སྐུ་གར་ཐབས་ཁྱུག་ཁྱུག་མཛད་པ་གཅིག་བསྒོམས་ཤིག༔ གཞན་ཡང་མདུན་གྱི་ནམ་མཁའ་ན་ཡར་ལ་འོག་མིན་ནས་རྩ་བ་གསུམ་གྱི་ལྷ་ཚོགས་དང་༔ ཁྱད་པར་ཡི་དམ་ཞི་ཁྲོ་རབ་འབྱམས་ལྷ་ཚོགས་དཔག་ཏུ་མེད་པ་རྣམས་མཚོ་ལ་ཁ་བ་བབས་པ་ལྟར་ཁྱེད་རང་རྣམས་ལ་སིབ་སིབ་ཐིམ་པར་མིག་ཚུམ་ལ་སྒོམས་ཤིག༔ སྤོས་འགྲིམས་དང་རྔ་རོལ་མོ་དང་བཅས། ཧཱུྃ་དཔལ་ལྡན་ནུབ་ཕྱོགས་ཨུ་རྒྱན་ཡུལ༔ དྷ་ན་ཀོ་ཤའི་མཚོ་གླིང་དུ༔ ཡ་མཚན་མཆོག་གི་དངོས་གྲུབ་མཉེས༔ པདྨ་འབྱུང་གནས་བྱིན་ཕོབ་ཅིག༔ བྱིན་ཆེན་ངོ་མཚར་མཆོག་གི་གནས༔ ལྷུན་གྲུབ་དབྱིངས་ཀྱི་དཀྱིལ་འཁོར་ནས༔ སྐུ་གསུང་ཐུགས་ཡོན་ཕྲིན་ལས་འདུལ༔ ཞི་ཁྲོའི་ལྷ་ཚོགས་བྱིན་ཕོབ་ཅིག༔ བྱིན་ཆེན་ངོ་མཚར་མཆོག་གི་གནས༔ ཧེ་རུ་ཀ་ཡི་གནས་བཅུ་ནས༔ ལེགས་ཉེས་དམ་ཚིག་རྗེས་གཅོད་པའི༔ ཀཽ་སེང་དབང་ཕྱུག་བྱིན་ཕོབ་ཅིག༔ ༀ་ཨཱཿཧཱུྃ་གུ་རུ་དྷེ་ཝ་ཌཱཀྐི་ནི་སིདྡྷི་ཧཱུྃ༔ བོ་དྷི་ཙིཏྟ་དང་། བཛྲ་ཨ་ཝེ་ཤ་ཡ་ཨ་ཨཱཿ ཞེས་ཡུན་རིང་བརྗོད་ནས། ད་སེམས་མ་བཅོས་པར་རང་ལུགས་སུ་ལྷོད་ཀྱིས་ཀློད༔ ངོ་བོ་རྗེན་པའི་སྟེང་དུ་ཞོག་ཅིག༔ སྐལ་བ་དང་ལྡན་ན་སྐབས་འདིར་རྟོགས་པ་གཤའ་མ་ཅིག་སྐྱེ་བ་ཡིན་ནོ༔ ད་མེ་ཏོག་གི་ཕྲེང་བ་འདི་ཚེ་རབས་ལས་ཀྱི་ལྷ་ལ་འབུལ་བསམ་པ་གྱིས་ལ་རྗེས་ཟློས། ཀྱཻ་ཚེ་རབས་ཐོག་མེད་དུས་ཉིད་ནས༔ ཐ་མ་ད་ལ་ཐུག་གི་བར༔ བསྙེན་བསྒྲུབ་བསྒོམ་པའི་ཡི་དམ་ལྷ༔ གང་ཡིན་དེ་ལ་ཕོག་པར་ཤོག༔ མེ་ཏོག་ནས་དེ་དཀྱིལ་འཁོར་ལ་གཏོར༔ པྲ་ཏི་ཛ་ཧོ། རིགས་དང་མཐུན་པའི་མིང་ངམ༔ བཏགས་མིང་ནི༔ ད་ལམ་སྒྲིབ་པ་དག་པའི་རྟེན་འབྲེལ་དུ་མེ་ཏོག་དེ་རྡོ་རྗེ་སེམས་དཔའ་ཡབ་ཡུམ་ལ་ཕོག་པའི་མོས་པ་གྱིས་ལ༔ སྐྱེས་པ་རྣམས་ལ་མིང་རྡོ་རྗེ་སེམས་དཔའ༔ བུད་མེད་རྣམས་ལ་རྡོ་རྗེ་སེམས་མ་མིང་བཏགས་པ་ཡིན་པས་མ་བརྗེད་ན༔ དམྱལ་བ་ན་ཕྱིན་ན་ཡང་དེ་མ་ཐག་གསང་མཚན་བརྗོད་པས་ཐར་བ་དང་༔ མ་འོངས་པ་ན་མཚན་དེ་འདྲ་བའི་སངས་རྒྱས་སུ་འགྱུར་བ་གསང་སྔགས་ཀྱི་ནུས་པ་ཡིན་ནོ་གསུང་༔ ད་མ་རིག་པའི་སྒྲིབ་པ་དང་མིག་དར་ལྷན་གཅིག་ཏུ་བསལ་བར་སྒོམས་ཤིག༔ ཀུན་བཟང་རིག་ལྔ་རྡོ་རྗེ་སེམས༔ ཁྱོད་ཀྱི་མ་རིགས་ལིང་ཐོག་མིག༔ ཡེ་ཤེས་སྤྱན་དུ་དབྱེ་བར་ཤོག༔ ༀ་བཛྲ་ཙཀྵུ་པྲ་ཝེ་ཤ་ཡ་ཕཊཿ ཅེས་རྡོ་རྗེས་བཤུ་ཚུལ་བྱས་ལ༔ མིག་དར་བསྡུ་བཅུག༔ མཆོད་གཡོག་པས་ལྷ་ངོ་བསྟན་ཚུལ་བྱས༔ ཧོ་བདག་ནི་མ་རིག་མིག་འབྱེད་ཡིན༔ དཀྱིལ་འཁོར་བཟང་པོ་འདི་ལ་ལྟོས༔ དེ་རིང་དཀྱིལ་འཁོར་འདི་མཐོང་རྟགས༔ ཅོད་པན་བཟང་པོ་འདི་ཡང་ཐོགས༔ གསང་མཚན་གང་ཡིན་མ་བརྗེད་ཅིག༔ ཅེས་ཙམ་པ་ཀ་མིག་ལམ་དུ་བསྟན་ནས་དབུ་རྒྱན་པར་བཅུགས་ལ་དབུ་རྒྱན་དུས་འགྲིམས་པས་འཐུས་སོ། །
འོ་རིགས་ཀྱི་བུ་རྣམས་མེ་རི་རྡོ་ར་དུར་ཁྲོད་བརྒྱད་ཀྱི་དབུས་ན་ཕྱི་རིན་པོ་ཆེའི་གཞལ་ཡས་ཁང་ལ༔ ནང་ཐོད་པའི་གཞལ་ཡས་ཁང་ཞི་ཁྲོ་སྦྲག་མའི་དཀྱིལ་འཁོར་འདིའི་ནང་ཡ་ཀི་ན༔ ཁྲག་འཐུང་ཁྲོ་བོའི་ལྷ་ཚོགས་ཀྱི་སྟེང་གི་བར་སྣང་གཞལ་ཡས་ཁང་གི་ནང་དུ་ཞི་བའི་ལྷ་ཚོགས་དབུ་རྒྱན་གྱི་ཚུལ་དུ་བཞུགས་པ་དང་༔ ཕྱི་ཁྱམས་ལ་དབང་ཕྱུག་ཉི་ཤུ་རྩ་བརྒྱད་སྤོར་བྱེད་ཆེན་མོ་བརྒྱད་དང་༔ རིག་འཛིན་དཔའ་བོ་མཁའ་འགྲོ་སྤྲིན་ལྟར་གཏིབས་པ་ལྟ་བུའི་ཞལ་དངོས་སུ་མཐོང་བའི་མོས་པ་མཛོད་ལ་སྨོན་ལམ་འདིའི་རྗེས་ཟློས་མཛོད་ཅིག ཀྱཻ་མ་བག་ཆགས་དྲག་པོས་འཁོར་བར་འཁྱམས་པའི་ཚེ༔ སྔངས་སྐྲགས་འཇིགས་སྣང་སྤང་བའི་འོད་ལམ་ལ༔ བཅོམ་ལྡན་ཞི་ཁྲོའི་ཚོགས་ཀྱིས་ལམ་སྣ་དྲོངས༔ དབྱིངས་ཕྱུག་ཁྲོ་མོའི་ཚོགས་ཀྱིས་རྒྱབ་ནས་སྐྱོལ༔ བར་དོ་འཇིགས་པའི་འཕྲང་ལས་བསྒྲལ་དུ་གསོལ༔ ཡང་དག་རྫོགས་པའི་སངས་རྒྱས་ས་རུ་སྐྱོལ༔ དེས་དཀྱིལ་འཁོར་དུ་འཇུག་པ་སོང་ནས་དངོས་གཞི་དབང་ཞུ་བའི་ཕྱིར་འབྲུ་ལྔའི་མཎྜལ་ཕུལ། ས་གཞི་༴ སོགས རྗེས་ཟློས་མཛོད། ཀྱཻ་བླ་མ་རྡོ་རྗེ་འཛིན་པ་ཆེ༔ བདག་ཅག་སྐལ་ལྡན་བུ་སློབ་ལ༔ དབང་བཞིའི་ཆུ་བོ་བསྐུར་དུ་གསོལ༔ བརྒྱུད་པའི་བབ་ཚུལ་གང་ལྟར་ལགས༔ ཞུས་པས། བུ་སློབ་ལས་ཅན་མ་ཡེངས་ཉོན༔ བླ་མེད་གསང་བའི་གདམ་ངག་འདི༔ སྣོད་མིན་རྣམས་ལ་བསྐུར་མི་རུང་༔ སྣོད་ལྡན་མོས་གུས་གདུང་ཤུག་སྐྱེད༔ འོ་ན་ཆོས་སྐུ་ཀུན་ཏུ་བཟང་པོ། དྲུག་པ་རྡོ་རྗེ་འཆང་ཆེན། སྟོན་པ་རྡོ་རྗེ་སེམས་དཔའ་རྣམས་གཅིག་གིས་གཅིག་ལ་དགོངས་པ་གཏད་པ་ཙམ་གྱིས་ཆོག་པས། རྒྱལ་བ་དགོངས་པའི་བརྒྱུད་པའོ། །རིགས་འཛིན་དགའ་རབ་རྡོ་རྗེ། གུ་རུ་ཤྲྀ་སེང་ཧ། འཆི་མེད་པདྨ་འབྱུང་གནས་གསུམ་གྱིས་གཅིག་གིས་གཅིག་ལ་བརྡ་བསྟན་པ་ཙམ་གྱིས་ཆོག་པས་རིག་འཛིན་བརྡ་ཡི་རྒྱུད་པའོ། །ཨོ་རྒྱན་ཆེན་པོས་དྭགས་པོ་གདར་གྱི་རི་ལ་གཏེར་དུ་སྦས་ཤིང་སྨོན་ལམ་བཏབ་པས། ལོ་ཙཱ་བ་ཅོག་རོ་ཀླུ་ཡི་རྒྱལ་མཚན་གྱི་སྐྱེ་བ་གཏེར་སྟོན་ཉི་ཟླ་སངས་རྒྱས་ཀྱི་སྲས་པོ། གྲུབ་ཐོབ་ཀརྨ་གླིང་པ་ལ་ཡེ་ཤེས་མཚོ་རྒྱལ་ལ་སོགས་ཆོས་བདག་མཁའ་འགྲོས་ལུང་བསྟན་ཁ་བྱང་གཏད་པས་མཁའ་འགྲོ་གཏད་རྒྱ་བརྒྱུད་པ་དང་། གཏེར་ནས་བཏོན་པས་གཏེར་ཆོས་སྨོན་ལམ་གྱི་བརྒྱུད་པ་གཉིས་ཀ་ཡིན། དེ་ནས་ཐུགས་སྲས་ཉི་ཟླ་ཆོས་རྗེ། འགྲོ་མགོན་སུཪྱ་ཙནྡྲ་གཉིས་ཀྱི་རིང་ལ་དབང་བཞི་འདི་གཅིག་བརྒྱུད་ལས་མེད་ཅིང་། མ་སྤེལ་བར་ཉམས་སུ་བླང་ནས། གཏེར་སྒྲུབ་མཆོག་ཏུ་གྱུར་པས་བྱིན་བརླབས་དང་ལྡན་པས་ཐུགས་རྗེའི་བྱིན་བརླབས་བརྒྱུད་པ་ཡིན། དེ་ནས་ལུང་བསྟན་ལྟར་ལྷ་ལྕམ་གང་འབུམ་གྱི་སྐྱེ་བ་བཀའ་བབ་ཆོས་ཀྱི་རྒྱ་མཚོ་ལ་བཀའ་བབ། ལོ་དྲུག་ཉམས་སུ་བླང་ནས་ཕྱག་ལེན་རྒྱས་བསྡུས་ཐམས་ཅད་གཏན་ལ་ཕབ་པས་བཀའ་བབ་དོན་ཀྱི་བརྒྱུད་པ་ཡིན། དེ་ནས་སྤྲུལ་སྐུ་ཐུགས་རྗེ་འོད་ཟེར། འཁྲུལ་ཞིག་བྷུདྡྷ་མཾ་ག དེས་རཏྣའི་གདུང་རྒྱུད་རིག་འཛིན་ཀུན་དགའ་གྲག་པ་དང་། སྲས་ཀུན་དགའ་བསྟན་འཛིན་ནས། ཡང་ན། གུ་རུ་ནམ་མཁའ་རྡོ་རྗེ། མཚན་ལྡན་སྟོན་པ་རྒྱལ་མཚན། རིག་འཛིན་ཀུན་བཟང་ཤེས་རབ། ཡང་ན། རིག་འཛིན་ཀརྨ་དོན་ཡོད། དེས་བདག་རཱ་ག་ཨ་སྱ་ལ་དབང་བཞི་འདི་ལན་གཉིས་གནང་སྟེ། ལུང་བསྟན་ཆེན་པོ་བཀའ་རྒྱ་མ་ལས། མདོར་ན་ཨུ་རྒྱན་ངས་བསྟན་ཆོས་རྣམས་ལ༔ ཚུལ་བཞིན་སུ་དང་སུ་ཡིས་ཉམས་བླངས་པ༔ ཐམས་ཅད་ང་ཡི་སྤྲུལ་པ་ཡིན་པ་སྟེ༔ ཕྱི་རབས་ཀུན་གྱིས་ཐེ་ཚོམ་ཡིད་གཉིས་སྤང་༔ གུས་པས་བཀུར་སྟི་ཕུ་དུད་འབྲེལ་པ་ཐོགས༔ ཅེས་དང་། གསང་འདུས་ཞུས་ལན་ལས། མ་འོངས་གཏེར་ལ་མོས་པའི་གང་ཟག་རྣམས༔ དེང་སང་གུ་རུའི་ཞལ་མཐོང་འབྲེལ་པ་ཐོགས༔ ཐམས་ཅད་ལས་ཅན་ཡིན་པས་དགའ་བ་སྒོམས༔ ཁོ་མོའི་ཚིག་འདི་རིན་ཆེན་གསེར་བས་དཀོན༔ ཞེས་པ་ལྟར་བརྒྱུད་པའི་བླ་མ་རྣམས་ཐེ་ཚོམ་མེད་པར་གཏེར་ལ་མོས་ཤིང་ཚུལ་བཞིན་ཉམས་སུ་ལེན་པ་ཤ་སྟག་སྟེ། གང་ཟག་སྙན་ཁུང་བརྒྱུད་པ་དང་དྲུག་ལྡན་ཡིན་ནོ། །དེ་ལྟར་ཁུངས་བཙུན་པའི་དབང་ཞུ་བའི་ཕྱིར་རྗེས་ཟློས་མཛོད། ཀྱེ་ཧོཿ བླ་མ་འགྲོ་བའི་མགོན༔ བདག་ཅག་སྐལ་ལྡན་སློབ་བུ་ལ༔ དཀྱིལ་འཁོར་ཆེན་པོའི་ཤར་ཕྱོགས་ནས༔ བུམ་པའི་དབང་བསྐུར་སྩལ་ཏུ་གསོལ༔ གསུམ། ཚུར་ཤོག་ཚུར་ཤོག་རིགས་ཀྱི་བུ༔ ད་ནི་བདག་གིས་ཁྱོད་སྨིན་བྱ༔ བདག་བསྐྱེད་དཀྱིལ་འཁོར་གཙོ་བོའི་ཐུགས་ཀ་ནས་སློབ་དཔོན་རྡོར་སེམས་དཀར་པོ་ཕྱག་གཉིས་རྡོ་རྗེ་དྲིལ་བུ་འཛིན་ཅིང་༔ སྐུ་ལ་ཞི་ཁྲོའི་ལྷ་ཚོགས་རྫོགས་པ་གཅིག་བྱོན་ནས་མདུན་བསྐྱེད་དཀྱིལ་འཁོར་ཤར་སྒོའི་ཕྱི་ཁྱམས་སེང་གེའི་ཁྲི་ལ་བཞུགས་ནས་དབང་གི་བྱ་བ་མཛད༔ དེ་ཡི་མདུན་དུ་ཁྱོད་རྣམས་ཀྱང་པད་ཟླའི་གདན་དབང་སྟེགས་ལ་འགོད་ནས་མོས་གུས་བྱས་པས་སློབ་དཔོན་གྱིས་དབང་ཚིག་གསུང་པ་ཙམ་གྱིས་མདུན་བསྐྱེད་ལྷ་ཚོགས་བསྐུལ་བས༔ ཀུན་བཟང་རིགས་ལྔས་དབང་བསྐུར་བའི་དགོངས་པ་མཛད༔ ཡུམ་ལྔའི་ཐུགས་ཀ་ནས་མཁའ་འགྲོ་ལྔ་སྤྲུལ་ནས་བུམ་པ་དང་དབང་རྫས་རྣམས་ཐོག་ནས་བར་སྣང་ཁམས་སུ་རྒྱང་གྱིས་འབྱོན་ཏེ༔ སྤྱི་བོ་ལ་སོགས་སུ་དབང་བསྐུར༔ སེམས་དཔའ་སེམས་མ་བཅུ་དྲུག་གིས་བཀྲ་ཤིས་བརྗོད༔ ཁྲག་འཐུང་ཁྲོ་བོ་རྣམས་ཀྱིས་ཧཱུྃ་ཕཊ་ཀྱི་སྒྲས་བགེགས་བསྐྲད༔ དེ་ཡང་བུམ་པ་ལྔའམ་གཅིག་གི་ནང་དུ་རྡོར་སེམས་རིག་ལྔ་ཞུ་བ་ཡེ་ཤེས་ལྔ་ཡི་ཆུས་ལུས་ཀྱི་གནས་ལྔའམ་སྤྱི་བོའི་གནས་ལྔར་དབང་བསྐུར་བར་སྒོམས་ཤིག༔ ཅེས་བརྡ་སྤྲད་ནས། ཉུང་ན་བུམ་པ་ལྔ་པོ་མགོའི་དབུས་དང་ཕྱོགས་བཞིར་རིམ་པར་བཞག་པ་རྒྱས་པའོ། །བུམ་པ་ལྔ་ཚིག་བརྗོད་ཅིང་ཕྱར་ཙམ་བྱས་ནས་ལན་ལྔ་སྤྱི་བོའི་གནས་ལྔར་བཞག་ཅིང་། མགྲིན་པ་ནི་འབྲིང་། ཁྲོམ་ལ་ནི་བུམ་པ་ལྔ་སོ་སོར་ཕྱར་བ་ཙམ་བྱས་ལ་དུས་གཅིག་རེག་ཙམ་རེ་འགྲིམ་པ་བསྡུས་པ། བུམ་པ་ལྔ་ཕྱར་ཙམ་བྱས་ནས་རྗེས་བུམ་དབང་རྒྱས་པ་དང་དྲུག་ཀ་གཅིག་ཏུ་བསྡུས་ནས་འགྲིམ་པ་ཤིན་དུ་བསྡུས་པ་ཡིན་ནོ། །བུམ་པ་གཅིག་ལས་མེད་ན་གཅིག་པོ་དེ་བསྟན་ཝིག་བྱའོ། །ཧཱུྃ་བུམ་པའི་རང་བཞིན་ཆོས་ཀྱི་སྐུ༔ བུམ་བཅུད་འདི་ནི་ལོངས་སྤྱོད་རྫོགས༔ གཟུང་ཐག་ཁ་རྒྱན་སྤྲུལ་པའི་སྐུ༔ རིན་ཆེན་ལྔ་ཡི་དབང་བསྐུར་བས༔ ཡེ་ཤེས་ལྔ་ལྡན་དབང་ཐོབ་ཤོག༔ ཚིག་ལྷུགས་མི་དགོས་དོན་ཚིགས་བཅད་ལ་ཚང་བའོ། །ཧཱུྃ་བཛྲ་དྷྲྀཀ༔ མཱུཾ་དྷ་དྷུ་ཤྭ་རི་སྟྭཾ༔ བཛྲ་ཨ་བྷི་ཥིཉྩ་ཧཱུྃ༔ འདིར་རྡོར་སེམས་དབུས་སུ་བསྒོམ་པ་ན་རཀ་དོང་སྤྲུག་གི་དབང་དུ་ཡིན་ལ། རྣམ་སྣང་དབུས་སུ་བསྒོམ་ན་སྔགས་བརྗེ། སྤྱི་བོར་བཞག་པར་བྱའོ། །ཁྲོམ་ལ་སོ་སོར་འགྲིམ་ན་སློབ་དཔོན་གྱིས་རིགས་ལྔ་སོ་སོའི་ཡིག་བརྒྱ་འདོན། ཁྲོམ་ལ་རྡོར་སེམས་རིགས་ལྔ་སོ་སོའི་སྙིང་པོ་འབྲུ་དྲུག་འུར་འདོན་ཕྱག་ལེན་ཡིན་ནོ། །
དེ་ནས་ཤར་བུམ། ཧཱུྃ་བུམ་པའི་རང་བཞིན་ཆོས་ཀྱི་སྐུ༔ བུམ་བཅུད་འདི་ནི་ལོངས་སྤྱོད་རྫོགས༔ གཟུང་ཐག་ཁ་རྒྱན་སྤྲུལ་པའི་སྐུ༔ སྨན་མཆོག་ལྔ་ཡི་དབང་བསྐུར་བས། དུག་ལྔའི་ནད་ལས་གྲོལ་བར་ཤོག༔ དཔྲལ་བར་བཞག ༀ་ཛིག་ན་ཛིག༔ ལཾ་ཏེ་ཤྭ་ར་ཏི་སྟྭཾ༔ བྷུདྡྷ་ཨ་བྷི་ཥིཉྩ་ༀ༔ ལྷོའི་བུམ་པ། ཧཱུྃ་བུམ་པའི་རང་བཞིན་ཆོས་ཀྱི་སྐུ༔ བུམ་བཅུད་འདི་ནི་ལོངས་སྤྱོད་རྫོགས༔ གཟུངས་ཐག་ཁ་རྒྱན་སྤྲུལ་པའི་སྐུ༔ སྙིང་པོ་ལྔ་ཡི་དབང་བསྐུར་བས༔ རིགས་མཆོག་ལྔ་པོ་ཐོབ་པར་ཤོག༔ རྣ་ལྟག་གཡས། སྭཱ་རཏྣ་དྷྲྀཀ༔ མཱཾ་མོ་ཧཱ་ར་ཏི་སྟྭཾ༔ རཏྣ་ཨ་བྷི་ཥིཉྩ་སྭཱ༔ ནུབ་ཀྱི་བུམ་པ། ཧཱུྃ་བུམ་པའི་རང་བཞིན་ཆོས་ཀྱི་སྐུ༔ བུམ་བཅུད་འདི་ནི་ལོངས་སྤྱོད་རྫོགས༔ གཟུང་ཐག་ཁ་རྒྱན་སྤྲུལ་པའི་སྐུ༔ འབྲུ་སྣ་ལྔ་ཡི་དབང་བསྐུར་བས༔ སྐུ་གསུང་ཐུགས་ཡོན་ཕྲིན་ལས་ལྔ༔ ཉི་ཤུ་རྩ་ལྔའི་དབང་ཐོབ་ཤོག༔ ལྟག་ཁུང་། ཨཾ་ཨ་རོ་ལིཀ༔ པཱཾ་ར་ག་ར་ཏི་སྟྭཾ༔ པདྨ་ཨ་བྷི་ཥིཉྩ་ཨཱཿ བྱང་གི་བུམ་པ། ཧཱུྃ་བུམ་པའི་རང་བཞིན་ཆོས་ཀྱི་སྐུ༔ བུམ་བཅུད་འདི་ནི་ལོངས་སྤྱོད་རྫོགས༔ གཟུང་ཐག་ཁ་རྒྱན་སྤྲུལ་པའི་སྐུ༔ དྲི་མཆོག་ལྔ་ཡི་དབང་བསྐུར་བས༔ ཕ་རོལ་ཕྱིན་དྲུག་མཐར་ཕྱིན་ནས༔ སྟོང་ཉིད་སྙིང་རྗེ་དབྱེར་མེད་ཤོག༔ རྣ་ལྟག་གཡོན། ཧ་པྲཉྫ་དྷྲིཀ༔ ཏཾ་བཛྲ་ར་ཏི་སྟྭཾ། ཅེས་བུམ་པ་ལྔ་ཡོད་ན་བུམ་ཆུ་གཙོ་བུམ་དུ་བསྡུ་ལ། འོ་དེ་ལྟར་རིགས་ལྔའི་དབང་བསྐུར་བས༔ དུག་ལྔའི་སྒྲིབ་པ་དག༔ འགྲོ་བ་ལམ་རྒྱུད་ལྔའི་སྐྱེ་སྒོ་ཆོད༔ ཕུང་པོ་ལྔ་གནས་འགྱུར༔ རིགས་ལྔའི་ས་བོན་བཞག༔ ཡེ་ཤེས་ལྔ་རྒྱུད་ལ་སྐྱེས༔ ཞིང་ཁམས་ལྔ་ལ་དབང་བསྒྱུར་བའི་སྐལ་བ་ཅན་དུ་བྱས་པའོ༔ ད་རྣམ་རྒྱལ་བུམ་པ་འདིའི་ནང་ན་དམ་པ་རིགས་བརྒྱ་བཞུགས་པའི་སྐུ་ལས་བདུད་རྩིའི་རྒྱུན་བབས་པས༔ ལུས་ཐམས་ཅད་གང་བར་སྒོམས་ཤིག༔ ཧཱུྃ་བུམ་པ་འདི་ནི་གཞལ་ཡས་ཁང་༔ ནང་ན་ཞི་ཁྲོའི་ལྷ་ཚོགས་བཞུགས༔ ཕྱི་ནང་གསང་བའི་དཀྱིལ་འཁོར་ནས༔ སྐུ་གསུང་ཐུགས་ཀྱི་དབང་བསྐུར་ནས༔ ཕྱི་ནང་གསང་བའི་དབང་མཆོག་རྣམས༔ སྐལ་ལྡན་རྣམས་ལ་ཕབ་ནས་ཀྱང་༔ ཕུང་ཁམས་ལྷ་དང་ལྷ་མོར་གྱུར༔ བསྐྱེད་རིམ་ལྷ་དབང་ཐོབ་པར་ཤོག༔ ༀ་ཨཱཿཧཱུྃ༔ ༀ་ན་མཿསརྦ་ཏ་ཐ་ག་ཏ་ཨ་བྷི་ཥིཉྩ་ༀ་ཨཱཿཧཱུྃ་ཧྲཱི་སྭཱ་ཧཱ༔ དམ་པ་རིག་བརྒྱའི་དབང་དང་དངོས་གྲུབ་དམ་པ་ཐོབ་པར་གྱུར་གཅིག༔ དབང་ལྡན་རྣམས་ལ་དབང་ཐོབ་༼ཐིམ་༽པར་གྱུར་ཅིག༔ གསལ་བར་གྱུར་ཅིག༔ མཆེད་པར་གྱུར་ཅིག༔ འབར་བར་གྱུར་ཅིག༔ རྒྱས་པར་གྱུར་ཅིག༔ དབང་དུ་གྱུར་ཅིག༔ སྨིན་ཅིང་གྲོལ་བར་གྱུར་ཅིག༔ རེག་ཅིང་གྲོལ་བར་གྱུར་ཅིག༔ བརྟན་པར་གྱུར་ཅིག༔ གྲོལ་བར་གྱུར་ཅིག༔ མེ་ཏོག་གང་ལ་ཕོག་པའི་ལྷ་དང་དབྱེར་མེད་པར་སངས་རྒྱས་པར་གྱུར་ཅིག༔ འདི་ཡན་ཆོད་བུམ་པ་དྲུག་སྟོན་ཙམ་བྱས་ནས་འདིར་ལན་གཅིག་སློབ་དཔོན་གྱིས་བུམ་པ་སྤྱི་བོར་འགྲིམས་ཤིང་བོ་དྷི་ཙིཏྟ་འདོན། མཆོད་གཡོག་པས་བུམ་ཆུ་བཀྱེ་བ་རང་གིས་འཐུས་སོ། །ཁྲོམ་པ་ལ་བྷོ་དྷིའི་བསྐུལ་ལོ། །དེ་ནས་བཀྲ་ཤིས་གང་རུང་ཤྭ་ལོ་ཀ་གཅིག་སྟེ། ཧྲཱི་སྐྱེ་འཆི་གཉིས་སྤང་ཚེ་ཡི་རིག་འཛིན་བརྙེས༔ པདྨ་འབྱུང་ནས་བཀྲ་ཤིས་གང་ལགས་པ༔ དམ་པ་དེས་ཀྱང་དེང་འདིར་བདེ་ལེགས་ཤོག༔ དེ་ནས་རིགས་པའི་དབང་ལྔ་ཡང་སོ་སོར་སྟོན་ཙམ་བྱས་ནས་དུས་གཅིག་འགྲིམ་པས་ཆོག་སྟེ། བུམ་པ། ཧཱུྃ༔ སྐུ་གསུམ་དམ་ཚིག་ལས་བྱུང་ཞིང་༔ ཉོན་མོངས་ཞེ་སྡང་འཇོམས་མཛད་པ༔ ལྷ་ཡི་བདུད་རྩི་དག་པ་ཡིས༔ མི་བསྐྱོད་པ་རུ་དབང་བསྐུར་རོ༔ ཧཱུྃ་བཛྲ་ཨ་དྷར་ཤུ་ཛྙཱ་ན་ཨཱཿ བྷི་ཥིཉྩ་མཾ༔ དབུ་རྒྱན། ཧཱུྃ་སངས་རྒྱས་ཀུན་གྱི་རྒྱལ་སྲིད་དབང་༔ ང་རྒྱལ་རྟོག་པ་རྣམ་པར་འཇོམས༔ ཆགས་མེད་སྦྱིན་པའི་དབུ་རྒྱན་འདིས༔ རྫོགས་སངས་རྒྱས་སུ་དབང་བསྐུར་རོ༔ སྭཱ་རཏྣ་ས་མནྟ་ཛྙཱ་ན་སྭཱ་བྷ་ཝ་ཨ་བྷི་ཥིཉྩ་མཾ༔ རྡོ་རྗེ། ཧཱུྃ༔ སངས་རྒྱས་ཀུན་གྱི་རྡོ་རྗེའི་དབང་༔ མི་ཕྱེད་རྡོ་རྗེ་གསང་བ་ལས༔ འདོད་ཆགས་རྟོག་པ་རྣམ་པར་འཇོམས༔ རྡོ་རྗེ་ཆོས་ཀྱི་དབང་བསྐུར་རོ༔ ཨཾ་པདྨ་པྲ་ཛྙཱ་ཨ་བྷི་ཥིིཉྩ་མཾ༔ དྲིལ་བུ། ཧཱུྃ་ཐབས་དང་ཤེས་རབ་ལྡན་པ་ཡི༔ འགྲོ་དོན་མཉམ་མེད་དྲིལ་བུ་འདིས༔ ཕྲག་དོག་རྟོག་པ་རྣམ་པར་འཇོམས༔ གཉིས་སུ་མེད་པར་དབང་བསྐུར་རོ༔ ཧ་ཏིཥྛ་ཨ་ནུ་ཏེ་ཛྙཱ་ན་པ་ཏེ་བཛྲ་ཀརྨ་ཨ་བྷི་ཥིཉྩ་མཾཿ དེ་ནས་རྣམ་སྣང་གི་ཙཀ་ལི་བསྟན་ལ། ཧཱུྃ་རྣམ་སྣང་མིང་གི་དབང་བསྐུར་བས༔ གཏི་མུག་རྟོག་པ་རྣམ་པར་འཇོམས༔ ཅིས་ཀྱང་མི་ཆོད་མི་ཤིགས་པ༔ རྡོ་རྗེའི་མིང་ནི་རབ་ཏུ་གྲགས༔ ༀ་ཏྲེ་ཙཀྲ་མ་ཏུ༔ ཨ་མི་ཛྙ་ན་བཛྲ་ཨ་བྷི་ཥིཉྩ་མཾ༔ ཅེས་དཔྲལ་བར། ཚར་ནས། འོ་ཁྱེད་རྣམས་ལ་བྱ་སྤྱོད་རྣལ་འབྱོར་རྒྱུད་རྣམས་དང་ཐུན་མོངས་བ་རིག་པའི་དབང་ལྔ་བསྐུར་བས། རྒྱུད་ཐམས་ཅད་ལ་བལྟ་བ་དང་ཉན་པར་དབང་བ་ཡིན་ནོ། །དབུ་རྒྱན་ནང་དུ་བུམ་པ་བཅུག་ཁ་རྒྱན་ལ་རྣམ་སྣང་གི་སྐུ་བཙུག་པ་རྡོ་རྗེ་དང་བཅས་ལག་གཡས་པས་མགོ་ལ་བཞག་པ་དང་། རྡོར་དྲིལ་བསྒྲིལ་བ་ལག་གཡོན་དུ་འཕྱངས་པ་ལ་རེག་ཙམ་བྱེད་འཇུག་ཅིང་འགྲོ། བོ་དྷི་བསྐུལ་འདོན། མཆོད་གཡོག་གིས་བུམ་ཆུ་བཀྱེའོ། །ད་ལྷ་དབང་ཞུ་བའི་རྗེས་ཟློས་མཛོད། ཀྱེ་ཧོ་བླ་མ་རྡོ་རྗེ་འཛིན་པ་ཆེ༔ བདག་ཅག་སྐལ་ལྡན་བུ་རྣམས་ལ༔ རྒྱལ་བ་ཞི་ཁྲོ་རབ་འབྱམས་ཀྱི༔ ལྷ་དབང་ཡོངས་རྫོགས་བསྐུར་དུ་གསོལ༔ གསུམ། འོ་དེ་ལྟར་གསོལ་བ་བཏབ་པས༔ མདུན་བསྐྱེད་དཀྱིལ་འཁོར་གྱི་ལྷ་རྣམས་ལས་རང་རང་གི་སྐུ་མར་མེ་གཅིག་ལས་གཉིས་ཆད་ཀྱི་ཚུལ་དུ་བྱོན་ནས༔ ཁྱོད་རང་རྣམས་རྡོར་སེམས་སུ་གསལ་བའི་ཐུགས་ཀར་ཞི་བ་དང་ཀླད་པར་ཁྲག་འཐུང་གི་ལྷ་ཚོགས་ལུས་ལྷའི་ཚུལ་དུ་བཞུགས་པ་ལ༔ དམ་ཚིག་སེམས་དཔའ་ལ་ཡེ་ཤེས་སེམས་དཔའ་ཐིམ་པའི་ཚུལ་གྱིས་སོ་སོར་ཐིམ་པར་སྒོམས་ཤིག༔ འདིར་རྒྱས་པར་འདོད་ན་སྤྲོས་བཅས་བུམ་དབང་ཆེན་མོའི་ལྷ་དབང་ཡོངས་རྫོགས་གཞུང་ལྟར་བསྐུར་རོ། །
འབྲིང་པོ་འདོད་ན་དབང་བསྐུར་གནས་སྤར་འགྲོ་དྲུག་རང་གྲོལ་གྱི་ལྷ་དབང་ཡོངས་རྫོགས་བསྐུར་ཏེ། དེ་གཉིས་གང་ལ་ཡང་བར་སྐབས་ཀྱི་ངོ་སྤྲོད་ཀྱི་ཚིག་ལྷུགས་མི་སྦྱར་ཏེེ། ལར་འདི་བསྡུས་པའི་སྐབས་ཡིན་ནོ། །
བསྡུས་པ་རང་འདོད་ན་ཞི་བའི་དབང་ཙཀ་དུས་ག ཅིག ཁྲོ་བོའི་དབང་ཙཀ་དུས་གཅིག་སྤྱི་བོར་བཞག མེད་ན་ཀུན་བཟང་ཆེ་མཆོག་གཉིས་ཁོ་ནས་ཆོག་སྟེེ། དེ་ཡང་རྒྱས་པར་བྱེད་ན་ཚན་པ་ཚན་པ་གཏོར་མ་ལ་བཙུག་པ་ཕྱག་ལེན་ནོ། །བསྡུ་ན། ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ ཞི་བའི་ལྷ་ཚོགས་དབང་བསྐུར་བས༔ ཕུང་ཁམས་སྐྱེ་མཆེད་གནས་དག་ནས༔ ཞི་བ་རབ་འབྱམས་དབང་ཐོབ་ཤོག༔ ༀ་ཨཱཿཧཱུྃ་བྷོ་དྷི་ཙིཏྟ་མ་ཧཱ་སུ་ཁ་ཛྙ་ན་དྷརྟུ་ཨཱཿ ཀ་ཡ་ཨ་བྷི་ཥིཉྩ་ༀ་ཨཱཿཧཱུྃ་ཧྲཱིཿ ཅེས་ཞི་བ་དང་༔ ཧཱུྃ་སྐལ་ལྡན་རིགས་ཀྱི་བུ་རྣམས་ལ༔ ཁྲག་འཐུང་ལྷ་ཚོགས་དབང་བསྐུར་བས༔ ཉོན་མོངས་རྟོག་ཚོགས་གནས་དག་ནས༔ ཁྲག་འཐུང་རབ་འབྱམས་དབང་ཐོབ་ཤོག༔ ༀ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཀ་ཡ་ཨ་བྷི་ཥིཉྩ་ༀ༔ ཅེས་པ་ཁྲོ་བོ་དང་༔ འོ་སྐལ་ལྡན་རིགས་ཀྱི་བུ་རྣམས༔ ཞི་བའི་ལྷ་ཚོགས་དེ་རྣམས་ཀྱང་གུད་ན་མེད་དེ༔ རང་གི་ཕུང་པོ་ལྔ་རིགས་ལྔ༔ ཁམས་ལྔ་ཡུམ་ལྔ༔ ཚོགས་བརྒྱད་སེམས་དཔའ་བརྒྱད༔ ཡུལ་བརྒྱད་སེམས་མ་བརྒྱད༔ དུག་ལྔ་སེར་སྣ་དང་དྲུག་ཐུབ་པ་དྲུག༔ རྟག་ཆད་མུ་བཞི་སྐྱེ་གནས་བཞི་སྒོ་བ་ཡབ་ཡུམ་བརྒྱད༔ ཉོན་མོངས་པའི་རྟོག་ཚོགས་རྣམས་ཁྲག་འཐུང་དྲུག་ཅུ་ཡེ་ནས་ཡིན་ཅིང་༔ དེ་དོན་མ་རྟོགས་པས་འཁོར་བར་འཁྱམས་པ་ཡིན༔ ད་ནི་དབང་བསྐུར་བས་རྒྱུད་སྨིན་ངོ་འཕྲོད་ནས༔ སྤྱིར་ནི་ཕྱི་ནང་སྣོད་བཅུད་ཐམས་ཅད་ཞི་ཁྲོ་དག་པ་རབ་འབྱམས་ཀྱི་བསྐྱེད་རིམ་བསྒོམ་པ་དང་༔ ཁྱད་པར་སྙིང་ཁ་ན་ཞི་བའི་ལྷ་ཚོགས༔ མགྲིན་པ་ན་རིག་འཛིན་ལྷ་ཚོགས། ཀླད་པ་དུང་ཁང་ནང་ན་ཁྲག་འཐུང་གི་ལྷ་ཚོགས༔ རྩ་རླུང་ཐིག་ལེ་ལྷའི་དཀྱིལ་འཁོར་དུ་གསལ་ཐོབ་ལ༔ ཟ་འཐུང་རྣམས་ཚོགས་འཁོར་དང་༔ ཞྭ་གོས་རྒྱན་རྣམས་ན་བཟའ༔ རླུང་འབྱུང་འཇུག་གནས་གསུམ་འབྲུ་གསུམ་རྡོ་རྗེའི་བཟླས་པར་ཤེས་པར་གྱིས་ཤིག༔ དེ་ནས་རང་ཉིད་འཆི་བའི་ཚེ༔ ཞི་ཁྲོའི་ལྷ་ཚོགས་རང་གི་ལུས་ལས་ཐོན་ནས༔ ནམ་མཁའ་བར་སྣང་གང་བར་འཆར་བའི་ཚེ༔ སྒྲ་འོད་ཟེར་གསུམ་ལ་མ་འཇིགས༔ མ་སྐྲག༔ མ་སྔངས་པར་ད་ལྟ་དབང་བསྐུར་བའི་ཡི་དམ་གྱི་ལྷ་འདི་རྣམས་ཡིན་པས༔ ཡིན་པར་ངོ་ཤེས་པར་གྱིས་ཤིག༔ དེས་དག་པའི་ཞིང་ཁམས་སུ་བསུ་བར་ངེས་ཏེ༔ ཧེ་རུ་ཀའི་རྒྱུད་ཐམས་ཅད་ནས༔ རྣལ་འབྱོར་པ་རྣམས་འཕོ་ཚེ་དཔའ༔ དཔལ་ལྡན་ཁྲག་འཐུང་ལ་སོགས་པའི༔ མེ་ཏོག་ལ་སོགས་ལག་ན་ཐོགས༔ འཆི་བ་ཞེས་བྱ་རྣམ་རྟོགས་ཏེ༔ མཁའ་སྤྱོད་གནས་སུ་ཁྲིད་པར་འགྱུར༔ ཞེས་གསུངས་པ་དང་མཐུན་པ་ཡིན་ནོ༔
༈ དེ་ནས་སྐབས་འདིར་མཆོག་དབང་གསུམ་པོ་བསྐུར་བ་ཡིན་ཡང་༔ རྒྱས་པ་ནི་ཐོད་པ་ལྔ་སོགས་དང་ཆས་དཀའ་བ་དང་ཚོགས་བརྒྱ་མང་པོ་སོགས་བཀའ་རྒྱ་དམ་པས་སུ་ཡིན་ལ་བསྐུར་ན་རང་ཡང་གསང་དམ་ཉམས་པའི་ལྟུང་བར་འགྱུར་བས་སྤྲོས་པ་བསྐྱུངས༔ འདིར་མཆོག་དབང་བསྡུས་པ་ཙམ་འདི་ཡང་ཁྲོམ་ཉོག་ལ་མི་རུང་གསང་སྒྲོགས་གི་ལྟུང་བ་དང་བཀའ་སྲུང་གི་ཕྲག་དོག་འབྱུང་༔ བཙུན་པ་དང་ཞི་ཁྲོ་ཉམས་ལེན་མཁན་དང་༔ བསྒོམ་རིམ་ལྷན་སྐྱེས་ཐུགས་དམ་དང་༔ རྫོགས་ཆེན་ཉམས་ལེན་མཁན་དང་༔ མི་ནག་ཡིན་རུང་བག་ཆགས་རང་གྲོལ་ཆགས་མེད་བྱེད་པ་རྣམས་འདི་མ་ཐོབ་ན་དབང་མི་ཚང་བས༔ ཤིན་དུ་གལ་ཆེ་བ་གཅིག་ཡོད་པ་དང་༔ ནད་པ་འཆི་ངེས་ལ་བསྐུར་ཡང་དམ་ཚིག་ཆགས་ལོང་མེད་ཅིང་དབང་བཞི་ཚང་ཕྱིར་ཡོན་ཏན་ཤིན་ཏུ་ཆེ་བའོ༔ དབང་རྫས་ནི་བྷནྡྷ་བདུད་རྩི་མེ་ལོང་ཤེལ་སོགས་དང་པོ་ནས་བཤམས་ལ༔ བསྙེན་པའི་སྐབས་སུ་ལྷ་ཡབ་ཡུམ་སྦྱོར་མཚམས་ནས་བྱང་སེམས་བྷནྡྷ་བདུད་རྩི་ལ་ཐིམ་པར་བསྒོམ་པས་འཐུས་སོ༔ མིག་དར་བཀབ་པ་ཕྱེ་བའི་ཚུལ་ཙམ་གྲུབ་ན་ལེགས༔ ད་བླ་མ་རྡོ་རྗེ་སེམས་དཔའ་དཀྱིལ་འཁོར་གྱི་ལྷོ་སྒོའི་འགྲམ་དུ་བྱོན་ནས་སེང་གེའི་ཁྲི་ལ་བཞུགས་པ་ལ་གསོལ་བ་འདེབས་པར་བསྒོམ་ལ་རྗེས་ཟློས་མཛོད༔ ཀྱེ་ཧོཿ བླ་མ་འགྲོ་བའི་མགོན༔ བདག་སོགས་སྐལ་ལྡན་བུ་སློབ་ལ༔ དཀྱིལ་འཁོར་ཆེན་པོའི་ལྷོ་ཕྱོགས་སུ༔ གསང་བའི་དབང་མཆོག་བསྐུར་དུ་གསོལ༔ ཚིག་རྗེས་མ་གསུམ། འོ་ཐོད་པ་འདིའི་ནང་ན་ཀུན་བཟང་རིགས་ལྔ་ཆེ་མཆོག་རིགས་དྲུག་གི་བྱང་ཆུབ་ཀྱི་བྱང་སེམས་བདུད་རྩི་དཀར་དམར་གྱི་རང་བཞིན་དེ་ཁྱོད་རང་གི་སྤྱི་བོར་བཞག་པས་ཐོད་པའི་ཚང་བུག་ནས་ཞུགས༔ ལུས་གྱི་རྩ་འཁོར་ལྔ་གང་བས་བདེ་སྟོང་གཉིས་སུ་མེད་པའི་ཡེ་ཤེས་མངོན་སུམ་བསྐྱེད་པར་སྒོམས་ཤིག༔ ཧོ་ཐོད་པ་མཚན་ལྡན་ཀ་པ་ལ༔ ཡེ་ཤེས་བདུད་རྩི་ལྔ་ལྡན་བཅུད༔ སྐལ་ལྡན་བུ་ཡི་ངག་ཏུ་བླུད༔ རྩ་གསུམ་འཁོར་ལོ་ལྔ་ལྡན་པས༔ ཐིག་ལེ་རང་དབང་ཐོབ་པ་དང་༔ ཐོག་མེད་བདེ་ཆེན་མཐར་ཕྱིན་ཤོག༔ བོ་དྷི་ཙིཏྟ་ཨ་མྲྀ་ཏ་ཨ་བྷི་ཥིཉྩ་ༀ༔ བདུད་རྩི་བླུད༔ དེས་ངག་གི་སྒྲིབ་པ་བྱང་༔ རྩ་རླུང་བསྒོམ་པར་དབང་༔ དབང་གི་ལས་འགྲུབ༔ ས་དགུ་པ་མན་ཆོད་ནོན༔ འབྲས་བུ་ལོངས་སྐུ་འགྲུབ་པའི་སྐལ་བ་ཅན་དུ་གྱུར་པས༔ ལུས་དཀྱིལ་མཐོང་བའི་མོས་པས་མིག་དར་ཁྲོལ༔ གཏང་རག་གི་མཎྜལ་འབུལ༔ ས་གཞི༴ ད་བླ་མ་རྡོ་རྗེ་སེམས་དཔའ་དཀྱིལ་འཁོར་གྱི་ནུབ་སྒོའི་འགྲམ་དུ་སེང་ཁྲི་ལ་བཞུགས་པ་ལ་གསོལ་བ་འདེབས་པའི་མོས་པས་རྗེས་ཟློས་མཛོད༔ མིག་དར་གྱོན་ལ། ཀྱེ་ཧོཿ བླ་མ་འགྲོ་བའི་མགོན༔ ཐུགས་རྗེ་ཆེན་པོས་བརྩེར་དགོངས་ལ༔ ཤེས་རབ་དབང་ཞིག་བསྐུར་བར་མཛོད༔ བདག་གི་ཤེས་རབ་རིག་མ་རྣམས༔ རིགས་ཀྱི་མཚན་ལྡན་བདེ་བ་སྐྱེད༔ འདི་འབུལ་བཞེས་ལ་བདག་རྒྱུད་ཁྲོལ༔ ཞེས་ཌཱ་ཱཀིའི་ཙཀ་ལི་ཡར་ཕུལ་བཅུག ཧོཿ བདེ་བ་སེམས་ཟུང་སྟོང་པ་སྐྱོང་༔ འབེབས་འདྲེན་བཀྲམ་བཟློག་བཞི་ཡིས་ཟླུམ༔ འདི་ཉིད་བདེ་གཤེགས་བླ་མེད་མཆོག༔ ཕྲིན་ལས་འབྲས་བུ་ཨ་ལ་ལ༔ ཅེས་ཙཀ་ལི་གཏད་ལ་ལག་ཏུ་འགྲིམས་ནས། ཁྱེད་རང་རྣམས་སྐད་གཅིག་གིས་རྟ་ཕག་ཡབ་ཡུམ་འཁྲིལ་སྦྱོར་དུ་གྱུར་པས་སྤྱི་བོའི་ཧཾ་ལས་བྱང་སེམས་བབས་པས་རྩ་འཁོར་ལོ་བཞི་རིམ་པར་གང་སྟེ༔ སྤྱི་བོ་དང་མགྲིན་པར་བབ་པས་དགའ་བ༔ སྙིང་ཁར་མཆོག་དགའ༔ ལྟེ་བར་དགའ་བྲལ༔ གསང་བར་ལྷན་གཅིག་སྐྱེས་པའི་དགའ་བ་སྐྱེས༔ གྱེན་དུ་བཟློག་ནས་ལུས་ཀུན་ཁྱབ་པས་བདེ་སྟོང་གཉིས་སུ་མེད་པའི་ཡེ་ཤེས་རྟོགས་པར་སྒོམས་ཤིག༔ ད་གསང་བའི་དཀྱིལ་འཁོར་མཐོང་བའི་མོས་པས་མིག་དར་ཁྲོལ༔ དེས་ཡིད་སྒྲིབ་དག༔ ཡིད་རིག་ཡེ་ཤེས་ཀྱི་ཕྱག་རྒྱ་སོགས་རྩ་རླུང་ཐིག་ལེ་བསྒོམ་པར་དབང་༔ རྒྱས་པའི་ལས་ཐམས་ཅད་འགྲུབ༔ ས་བཅུ་པ་ནོན་ཅིང་འབྲས་བུ་ཆོས་སྐུ་ཐོབ་པའི་སྐལ་ལྡན་དུ་བྱས་པ་ཡིན་པས་མཎྜལ་ཕུལ༔ ས་གཞི༴ ཡང་བླ་མ་རྡོ་རྗེ་སེམས་དཔའ་བྱོན་ནས་དཀྱིལ་འཁོར་བྱང་གི་སྒོ་དྲུང་དུ་སེང་ཁྲི་ལ་བཞུགས་པ་ལ་གསོལ་བ་འདེབས་པའི་རྗེས་ཟློས་མཛོད༔ ཀྱཻ་ཧོཿ བླ་མ་སངས་རྒྱས་འགྲོ་བའི་མགོན༔ ཐུགས་རྗེས་བདག་ལ་དགོངས་མཛོད་ལ༔ སྙིང་པོ་དོན་མཆོག་བྱ་བའི་ཕྱིར༔ རིན་ཆེན་གསེར་གཡུའི་མཎྜ ལ་འབུལ༔ ཡེ་ཤེས་ལྔ་པོ་ངོ་སྤྲོད་ལ༔ ཚིག་དབང་རིན་ཆེན་བདག་ལ་རྩོལ༔ འོ་ན་ཁྱེད་རྣམས་ལུས་རྣམ་སྣང་གི་ཆོས་བདུན་ཆས་ལ་ཤེལ་འདི་ལ་ལྟོས་ཤིག༔ ཤེལ་ཕྱར་ལ༔ བུ་ཁྱོད་ཐེག་པ་ཆེན་པོའི་སྣོད༔ འཁོར་བའི་མཚོ་ལས་སྒྲོལ་བའི་ཕྱིར༔ ཡང་དག་དོན་ལ་ད་ཞུགས་ཤིག༔ རིགས་ཀྱི་བུ་ཁྱོད་ཉོན་གཅིག༔ ཁྱོད་ལུས་བྱ་བ་དང་བྲལ་ལོ༔ ངག་བརྗོད་པ་དང་བྲལ་ལོ༔ སེམས་རྟོག་པ་དང་བྲལ་ལོ༔ རང་གི་རིག་པའི་གཤིས་ཀྱི་འདུག་ཚུལ་འདི་ཤེལ་འདི་དང་འདྲ་སྟེ༔ ཤེལ་ཕྱི་ནང་མ་སྒྲིབ་པ་ལྟར་སེམས་ཉིད་ངོ་བོ་སྟོང་པ་ཉིད་དོ༔ ཤེལ་གདན་གང་བཞག་གི་ཁ་དོག་ཏུ་འགྱུར་བ་ལྟར༔ སེམས་ལ་ཅིར་ཡང་འཆར་རོ༔ ཤེལ་ཁ་དོག་སྣ་ཚོགས་སུ་འགྱུར་ཡང་ཤེལ་དང་དབྱེར་མེད་པ་ལྟར༔ སེམས་ལ་ཅི་ཤར་ཡང་སྟོང་པ་ཉིད་དང་དབྱེར་མེད་དོ༔ ཤེལ་འདི་རྡོ་རྗེ་སེམས་དཔའི་ཐུགས་རྗེའི་འོད་ཟེར་གྱི་བྱིན་རླབས་ལས་བྱུང་བའི་ལོ་རྒྱུས་ལྟར༔ སེམས་ཉིད་འདི་ཡེ་ནས་ཆོས་སྐུའི་ངོ་བོར་གནས་སོ༔ རང་གི་སེམས་ཉིད་མ་ཡེངས་ཙམ་དུ་མ་བཅོས་རང་བབས་སུ་བཞག་པ་ནི་རྫོགས་པ་ཆེན་པོ་གཞི་ཁྲེག་ཆོད་ཀྱི་ཉམས་ལེན་ཡིན་པས་དེང་ཕྱིན་ཆད་དེ་ལྟར་བསྒོམ་དུ་མེད་པའི་ངང་ལ་སྒོམས་ཤིག༔ ཅེས་ཤེལ་སྤྱི་བོར་བཞག༔ སྣང་སྲིད་ཕྱག་རྒྱ་ཆེན་པོའི་དཀྱིལ་འཁོར་མཐོང་བའི་བརྡར་མིག་དར་ཁྲོལ་མཎྜལ་ཕུལ༔ ད་ཁྱོད་རང་རྣམས་ལུས་གནད་ཙོག་པུར་སྡོད་ཅིག༔ སློབ་དཔོན་གྱིས་ཤར་ཕྱོགས་ཀྱི་དཀྱིལ་འཁོར་ནས་རྡོ་རྗེ་ལུ་གུ་རྒྱུད་བྲིས་པ་བསྟན༔ ལྷོ་ནས་དབྱིངས་རྣམ་པར་དག་པའི་སྒྲོན་མའི་དཔེ་རྨ་བྱའི་མདོངས་བསྟན༔ ནུབ་ནས་མེ་ལོང་ལ་དཀྱིལ་འཁོར་འཆར་བ་བསྟན་པ་ལྷ་སྐུ་འཆར་བའི་དཔེ༔ བྱང་ནས་གཟུགས་སྒྲ་དྲི་རོ་རེག་བྱ་ཆོས་ལྔའི་གཟུགས་བརྙན་བསྟན་པས་རྫོགས་པ་ཆེན་པོའི་དོན་རྟོགས་པའི་མོས་པ་མཛོད༔ ཅེས་ཤེལ་དང་འཇའ་རིས་བྲིས་པ་འདོད་ཡོན་ལྔ་བྲིས་པ་རྨ་བྱའི་སྒྲོ་མེ་ལོང་རྡོར་དྲིལ་སོགས་དུས་གཅིག་ལ་ཕྱར་ནས༔ རྨ་བྱ་ལུག་རྒྱུད་ལག་ཏུ་ཕྱར༔ དཀྱིལ་འཁོར་ལ་སོགས་སྣང་བ་གཏད༔ ཤེལ་མིག་སྦྱར་བ་འདི་ལ་ལྟོས༔ ཀ་དག་རྩལ་དབང་ཐོབ་པར་ཤོག༔ བོ་དྷི་བརྗོད་ཅིང་སྤྱི་བོར་བཞག༔ བསྟན་པས་ཀྱང་འཐུས༔ དྷརྨ་ཀ་ཡ་ཨ་བྷི་ཥིཉྩ་མཾ༔ འོ་རིགས་ཀྱི་བུ་ཙིཏྟ་ཤའི་སྒྲོན་མེ་ན༔ ཞི་བའི་ལྷ་ཚོགས་བཞུགས་པའི་འོད༔ དཀར་འཇམ་ཤ་ཡི་སྒྲོན་མེ་ནས་བརྒྱུད་དེ༔ རྒྱང་ཞགས་ཆུ་ཡི་སྒྲོན་མེ་ལ་བྱུང་ནས༔ དབྱིངས་རྣམ་པར་དག་པའི་སྒྲོན་མེ་ནམ་མཁའ་གསལ་ཞིང་༔ དེ་ལ་ཐིག་ལེ་སྟོང་པའི་སྒྲོན་མེ་ཉམས་སུ་བླང་ན་རིག་པ་རྡོ་རྗེ་ལུ་གུ་རྒྱུད༔ ཞི་ཁྲོའི་ལྷ་ཚོགས་དངོས་སུ་འཆར་བར་འགྱུར་བའི་གདམས་པ་ཉམས་སུ་ལེན་རུང་བར་བྱས་པས༔ སྣང་བ་བཞི་མཐར་ཕྱིན་ནས་སངས་རྒྱས་གཞོན་ནུ་བུམ་སྐུའི་ཀློང་དུ་སངས་རྒྱ་བ་དང་༔ དེ་བར་དུ་ཡང་ས་བཅུ་གཅིག་གམ་བཅུ་དྲུག་ཡེ་ཤེས་བླ་མའི་ས་ནོན་པའི་སྐལ་ལྡན་དུ་བྱས་པ་ཡིན་པས་མཎྜལ་ཕུལ༔ ས་གཞི་སྤོས༴སོགས།
དེ་ལྟར་མཆོག་དབང་བསྐུར་རམ་མ་བསྐུར་ཡང་རུང་སྟེ། དེ་ལྟར་དབང་རྒྱས་པར་བསྐུར་ཡང་གཏོར་དབང་མ་བསྐུལ་ན་དངོས་གྲུབ་ཕྱིར་འགྱང་བར་གསུངས་པས༔ དམ་པ་རིགས་བརྒྱའི་དབང་ཐོབ་ཀྱང་རིག་འཛིན་དང་སྤོར་བྱེད་སོགས་ཀྱི་དབང་མ་འདུས་པས་གཏོར་དབང་ཞུ་བའི་དོན་དུ༔ གཏོར་མ་འདི་ཉིད་ཞི་ཁྲོ་དམ་པ་རིགས་བརྒྱ་ལ་རིག་འཛིན་དཔའ་བོ་དང་ཌཱཀྐི༔ རྩ་རྒྱུད་བླ་མ༔ སྤོར་བྱེད་བརྒྱད༔ ཡེ་ཤེས་ཀྱི་ཆོས་སྐྱོང་སྲུང་མའི་ཚོགས་སྤྲིན་འཁྲིགས་པ་ལྟར་སྤྱི་བོར་བྱོན་ནས༔ བླ་མ་རིག་འཛིན་ཐམས་ཅད་སྤྱི་བོར་ཐིམ༔ བདེ་གཤེགས་ཡི་དམ་ཐམས་ཅད་མགྲིན་པར་ཐིམ༔ མ་རྒྱུད་ཌཱཀྐི་ཐམས་ཅད་སྙིང་ཁར་ཐིམ༔ གཏེར་བདག་ནོར་ལྷ་ཐམས་ཅད་ལྟེ་བར་ཐིམ༔ ཡེ་ཤེས་ཀྱི་ཆོས་སྐྱོང་ཐམས་ཅད་གསང་བར་ཐིམ༔ བཀའ་བསྲུང་གཏེར་བསྲུང་རྣམས་ཀྱིས་སྤུན་དང་གྲོགས་སུ་དགོངས་པར་འགྱུར་སྙམ་དུ་མོས་པ་རྩེ་གཅིག་པ་མཛོད་ཅིག༔ ༀ་ཨཱཿཧཱུྃ་དབྱིངས་རིག་དབྱེར་མེད་གཏོར་གཞོང་དུ༔ གསལ་སྟོང་དབྱེར་མེད་རྩ་གསུམ་བཞུགས༔ རིག་རྩལ་དབྱེར་མེད་བསྲུང་མས་བསྐོར༔ དབང་མཆོག་དམ་པ་འདི་བསྐུར་བས༔ ལྷུན་གྲུབ་རང་དབང་ཐོབ་པར་ཤོག༔ ༀ་ཨཱཿཧཱུྃ༔ གུ་རུ་དྷེ་ཝ་ཌཱཀྐི་ནི་སརྦ་སིདྡྷི་ཕ་ལ་ཨ་བྷི་ཥིཉྩ་ཧོ༔ ཆོས་སྐུ་ཀུན་བཟང་ཡབ་ཡུམ༔ ལོངས་སྐུ་རིགས་ལྔ་ཡབ་ཡུམ། སེམས་དཔའ་ཡབ་ཡུམ་བཅུ་དྲུག༔ སྒོ་བ་ཡབ་ཡུམ་བརྒྱད༔ སྤྲུལ་སྐུ་ཐུབ་པ་དྲུག༔ ཁྲག་འཐུང་ཆེ་མཆོག་ཡབ་ཡུམ༔ རིགས་ལྔའི་ཁྲག་འཐུང་ཡབ་ཡུམ༔ ཀོའུ་སེང་ཕྲ་མེན་བཅུ་དྲུག༔ སྒོ་སྐྱོང་ཕྱག་རྒྱ་རྣམ་བཞི༔ ཐུབ་དྲུག་ཁྲོས་པའི་སྤོར་བྱེད་བརྒྱད༔ རིག་འཛིན་ཡབ་ཡུམ་བཅུ༔ རིག་འཛིན་བརྒྱུད་པའི་བླ་མ༔ བཀའ་སྲུང་དབང་ཕྱུག་ཉེར་བརྒྱད༔ ལ་སོགས་པ་ཞི་ཁྲོ་རབ་འབྱམས་ཐམས་ཅད་ཀྱིས་བྱིན་གྱིས་རློབས་ཤིག༔ རྡོ་རྗེའི་སློབ་མ་འདི་རྣམས་ཀྱི་བར་ཆད་ཐམས་ཅད་བསལ་དུ་གསོལ༔ སྡིག་སྒྲིབ་ཐམས་ཅད་དག་པར་མཛད་དུ་གསོལ༔ ནད་ཐམས་ཅད་ཞི་བར་མཛད་དུ་གསོལ༔ གདོན་ཐམས་ཅད་བཟློག་པར་མཛད་དུ་གསོལ༔ ཚེ་བསྲིང་བར་མཛད་དུ་གསོལ༔ དཔལ་བསྐྱེད་པར་མཛད་དུ་གསོལ༔ དབང་ཐང་ཆེ་བར་མཛད་དུ་གསོལ༔ ལོངས་སྤྱོད་རྒྱས་པར་མཛད་དུ་གསོལ༔ བསོད་ནམས་འཕེལ་བར་མཛད་དུ་གསོལ༔ ཉམས་རྟོགས་བསྐྱེད་པར་མཛད་དུ་གསོལ༔ ཚེ་འདིར་སྣང་བ་བཞི་མཐར་ཕྱིན་པར་མཛད་དུ་གསོལ༔ དུས་ལ་བབ་པའི་ཚེ་འཆི་བ་ཆོས་སྐུར་ངོ་འཕྲོད་པར་མཛད་དུ་གསོལ༔ ཆོས་ཉིད་བར་དོར་ངོ་འཕྲོད་ནས་ལོངས་སྤྱོད་རྫོགས་པའི་སྐུ་ཐོབ་པར་མཛད་དུ་གསོལ༔ སྲིད་པ་བར་དོར་རིག་འཛིན་རྣམས་ཀྱིས་ལམ་སྣ་དྲངས་ནས་བདེ་ཆེན་དག་པའི་ཞིང་དུ་བརྫུས་སྐྱེས་སྤྲུལ་པའི་སྐུ་ཐོབ་པར་མཛད་དུ་གསོལ༔ ཅེས་བརྗོད་ནས་བོ་དྷི་འདོན་ཅིང་གཏོར་མ་མགོ་ལ་འགྲིམས་སྟེ༔ རྒྱས་པར་ན་རེ་རེའི་མགོ་ཐོག་ཏུ་བོ་དྷི་ཚར་རེ་ལ༔ ཀ་ཡ་ཝཱཀྐ་ཙིཏྟ་སརྦ་ཨ་བྷི་ཥིཉྩ་ཧཱུྃཿ ཞེས་སྦྱར་རོ༔
དེ་ནས་མཐའ་རྟེན་རྒྱལ་སྲིད་དང་རྟགས་བརྒྱད་ནི་མི་དགོས་ཏེ༔ འདི་བསྡུས་པ་ཡིན་པས་དང་༔ བཀྲ་ཤིས་རྫས་རྟགས་རྒྱལ་སྲིད་སོགས་ཀྱི་དོན་ནི་ཤིས་པ་བརྗོད་པ་ཡིན་པས་བཀྲ་ཤིས་ལ་འདུས་པས༔ ལས་བྱང་མང་ཉུང་གང་འདོད་ཀྱི་བཀྲ་ཤིས་བརྗོད་ནས་མེ་ཏོག་འཐོར༔ འོ་དེས་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བཞི་འཕྲད་ཚད་རང་གྲོལ་ཞེས་བྱ་བའི་དོན་དབང་ཐོབ་ཚད་རང་གྲོལ་ཞེས་བྱ་བ་ལེགས་པར་ཐོབ་པ་ཡིན་པས༔ དམ་ཚིག་ས་ཡ་དང་འབུམ་སྡེ་གསུངས་ཀྱང་༔ བླ་མ་ཨོ་རྒྱན་དབྱེར་མེད་དུ་བསྒོམ་པ་དང་༔ ཡི་དམ་ཞི་ཁྲོ་ལུས་དཀྱིལ་ལུས་ལྷར་མོས་པས་ཟ་འཐུང་ཐམས་ཅད་མཆོད་པར་དམིགས་པ་དང་༔ ངག་བཛྲ་གུ་རུ་འམ༔ བོ་དྷི་ཙིཏྟ་འམ༔ རིགས་དྲུག་གི་སྐྱེ་སྒོ་གཅོད་པ་བཏགས་གྲོལ་སྙིང་པོ་འབྲུ་དྲུག༔ འཿཨཿཤཿསཿམཿཧཿ ཞེས་པ་ཅི་ནུས་འདོན་ཞིང་༔ མཐར་གྱིས་རྟོགས་པ་ཇེ་མཐོ་ལ་སོང་བ་དང་༔ རིམ་པར་དམ་ཚིག་ཐམས་ཅད་གཙང་མར་བསྲུང་བསམ་པ་གྱིས་ལ༔ གཙོ་བོས་ཇི་ལྟར༴ འོ་དེ་ལྟར་དབང་ཐོབ་ནས་ཉམས་སུ་བླང་པས༔ རབ་ཚེ་འདིར་སངས་རྒྱས༔ འབྲིང་བར་དོར་སངས་རྒྱ༔ དབང་ཐོབ་ནས་ཉམས་སུ་མ་བླང་ཀྱང་༔ དམ་ཚིག་མ་ཉམས་ན་སྐྱེ་བ་བདུན་ནས་འཚང་རྒྱ་བར་གསར་རྙིང་གི་རྒྱུད་སྡེ་རྣམས་ཞལ་མཐུན་ཅིང་༔ ཁྱད་པར་དབང་བཞིའི་སྟ་གོན་སྐབས་ནས་ཨོ་རྒྱན་རིན་པོ་ཆེས༔ འོ་ཁྱེད་རྣམས་དེ་སྔ་ཕན་ཆད་དཀྱིལ་འཁོར་འདི་འདྲ་མ་མཐོང་བས༔ ཁམས་གསུམ་དུ་འཁོར་ཞིང་རིགས་དྲུག་ཏུ་འཁྱམས་པ་ཡིན༔ དེ་སྔ་ཕན་ཆད་ཤིན་དུ་ཅོལ་ཆུང་༔ མི་ཚེ་སྟོང་ཟད་བྱས་པ་དོན་མེད་དུ་སོང་༔ ད་ནི་དཀྱིལ་འཁོར་འདི་ལྟ་བུ་དང་མཇལ༔ ད་ལྟ་ཤི་ཡང་བདེ་བ་ཆེན་པོར་སངས་རྒྱ་བ་ཡིན་པས་སྤྲོ་བ་བསྐྱེད་མཛོད་༔ གསུང་སྟེ་དཀྱིལ་འཁོར་དུ་ཞུགས་པ་ཙམ་ལ་ཕན་ཡོན་དེ་ལྟར་ན༔ ད་ལམ་དབང་ཡོངས་རྫོགས་ཐོབ་པ་ལ་ནི་སྨོས་ཅི་དགོས༔ དེས་ན་ཡིད་དགའ་བ་བསྒོམ་ལ༔ མཎྜལ་ཕུལ༔ ས་གཞི༴ དེ་ནས་སློབ་མ་གྱེས། ཞི་ཁྲོ་བླུག་ཞོར་ཡིན་ན་གཞུང་ལྟར། མིན་ཀྱང་ལས་བྱང་ཆེ་ཆུང་གང་རུང་གི་ཚོགས་དང་ཆད་མདོ་སོགས་རྗེས་ཚང་བར་བྱའོ། །མདུན་བུམ་གྱི་དཀྱིལ་འཁོར་ལྷ་ཚོགས་གསལ་གདབ་ལ་བསྙེན་པ་ཅུང་ཟད་བྱས་ན་སློབ་དཔོན་རང་གི་ནུས་པ་མི་ཉམས། བུམ་ཆུ་བདུད་རྩི་ཡང་ལྕེ་ལ་བཞག་པར་བྱའོ། །གང་དུ་བདག་འཇུག་ཡང་མདུན་བུམ་ལྷའི་གནས་ལྔ་ནས་འོད་ཟེར་ཁ་དོག་ལྔ་རང་གི་གནས་ལྔར་ཐིམ་པར་བསྒོམ་ཞིང་བསྙེན་པ་བྱས་པས་འཐུས། གསར་མ་ལྟར་བདག་འཇུག་ལེན་སྲོལ་མེད་དོ། །རྗེས་ནས་མདུན་བུམ་གྱི་ཡེ་ཤེས་པ་ཙཀ་ལི་སོགས་རྟེན་ལ་ཐིམ་པར་བསྒོམ་ཞིང་། བདག་བསྐྱེད་ཡེ་ཤེས་པ་ནམ་ཡང་མི་གཤེགས་པ་ནི་རྙིང་མའི་ཁྱད་ཆོས་སོ། །
ཨེ་མ་ཧོ། ཞི་ཁྲོ་དར་ཆ་ཆེ་ཞིང་གྲགས་ཆེ་ཡང་། །དབང་བཞི་དཔེ་སྣ་མང་བས་གུང་འགྲིགས་དཀའ། །བསྒྲུབ་ཆེན་ཁོ་ནའི་ལུགས་སུ་གསུངས་པའི་ཕྱིར། །དེ་ཡི་ནང་ནས་མགྱོགས་དབང་ཤབ་ཤེས་དཀའ། །དེ་ཕྱིར་དབང་བཞི་ཐོབ་པ་ཤིན་ཏུ་ཉུང་། །དེ་ལ་ཕན་ཕྱིར་སྤྱིལ་བུའི་དགོན་པ་ནས། །བླ་མ་ཆོས་སྨན་གཉིས་ཀྱིས་མཎྜལ་བཅས། །གཉེར་པ་བརྫོངས་ནས་དོན་ཆེན་བསྐུལ་བའི་ཕྱིར། །ཕྱི་རབས་འགྲོ་ལ་ཕན་པའི་སེམས་བསྐྱེད་ཀྱིས། །ར་ག་ཨ་སྱེས་འཕྲལ་དུ་བྲིས་པ་ལ། །ཉེས་འགལ་མཆིས་ན་སྲུང་མ་རྣམས་ལ་བཤགས། །དགེ་བས་འདི་ཉིད་དར་རྒྱས་ཆེར་འཕེལ་ནས། །འགྲོ་ཀུན་ཀ་དག་ཀློང་དུ་གྲོལ་བར་ཤོག །མངྒ་ལམ། བྷ་ཝནྟུ། འདིར་ཆགས་མེད་བཀའ་འབུམ་ནང་གི་མ་དཔེ་དང་བྲིས་མའི་དཔེ་རྙིང་ཞིག་དང་ཕན་ཚུན་གུང་སྒྲིགས་ནས་ཞུས། སླར་ཡང་ལེགས་པར་བརྟག་མཛོད། །