ན་རག་སྐོང་བཤགས་ཀྱི་དབང་བསྐུར་འགྲོ་དྲུག་རང་གྲོལ་གྱི་ཁ་འཕངས་ལྷན་ཐབས་ཉེར་མཁོ།

ན་རག་སྐོང་བཤགས་ཀྱི་དབང་བསྐུར་འགྲོ་དྲུག་རང་གྲོལ་གྱི་ཁ་འཕངས་ལྷན་ཐབས་ཉེར་མཁོ་རྣམས་གུད་དུ་བྲིས་པའོ། །

ཞི་ཁྲོ་རབ་འབྱམས་ཚོགས་ལ་ཕྱག་འཚལ་ལོ། །དབང་བསྐུར་གནས་སྤར་འགྲོ་དྲུག་རང་གྲོལ་གྱི། སྦྱོར་དངོས་རྗེས་གསུམ་དུ་ཁ་འཕངས་ཡོད་པ་རྣམས་ལྷན་ཐབས་སུ་སྦྱར་བདེ་བར་བྱས་པ་ནི། དང་པོ་གླུད་གཏོར་བྱིན་ལ་མེ་ཆུས་བསྐྲད་ཅེས་པ། སྒོ་རྒྱབ་བམ་ཡོལ་བའི་ཕྱི་རོལ་དུ་སློབ་མ་དུ་ཡོད་ཚོགས་པ་ལ། ལས་སློབ་ཀྱིས་ཟན་སྙི་དུམ་རེ་གཏད། དེ་ནས་དམིགས་པ་འབོགས་པ་ནི། འོ། རིགས་ཀྱི་བུ་ཁྱོད་རྣམས་ཉོན་ཅིག་ཁམས་གསུམ་འཁོར་བའི་གནས་འདི་ནི་དུག་གི་རྒྱ་མཚོའམ། མེ་མར་གྱི་འོབས་སམ། མི་གཙང་པའི་འདམ་རྫབ་དང་འདྲ་བ་ལས། སྡུག་བསྔལ་ལ་སྡུག་བསྔལ་དུ་ཤེས་པའི་གང་ཟག་ནི་དཀོན་ཏེ། ཁྱེད་རྣམས་ནི་ལས་དང་སྨོན་ལམ་གྱི་འབྲེལ་བའི་སྟོབས་ཀྱིས་མྱ་ངན་ལས་འདས་པ་ཆེད་དུ་གཉེར་ནས། འབྲས་བུ་གསང་སྔགས་རྡོ་རྗེ་ཐེག་པའི་སྒོར་འཇུག་པར་བྱེད་པ་ལ། རྒྱུད་དག་ཅིང་སྣོད་དུ་རུང་བར་བྱ་བའི་ཕྱིར། ཡི་གེ་བརྒྱ་པའི་སྒྲིབ་སྦྱོང་དང་། དབང་བསྐུར་བ་ལ་བར་ཆད་མི་འབྱུང་བར་བྱ་བའི་ཕྱིར་ལན་ཆགས་ཀྱི་གླུད་གཏོར་བསྔོ་བ་ཡིན་པས་དམིགས་པ་འདི་བཞིན་དུ་མཛོད་ཅིག ཁྱོད་རང་རྣམས་ཀྱི་ཚེ་རབས་འཁོར་བ་ཐོག་མ་མེད་པ་ནས། ལུས་ངག་ཡིད་གསུམ་གྱི་རྒྱུད་ལ་ཡོད་པའི་ནད་གདོན་སྡིག་སྒྲིབ་རྐྱེན་བགེགས་བར་ཆད་ཐམས་ཅད་འོད་ནག་པོའི་ཚུལ་དུ་བུད་ནས་ལག་གི་ཟན་སྙི་ལ་ཐིམ་པར་བསམས་ལ་ཡི་གེ་བརྒྱ་པ་ཚར་རེ་བཟླ་ཞིང་ཆང་བུ་གྱིས་ལ་མཆིལ་མ་བཏབ་མཛོད། ༀ་བཛྲ་ས་ཏྭ་ས་མ༴ ཞེས་ཡིག་བརྒྱ་ཚང་བར་ལན་གསུམ་སོགས་བརྗོད། དེ་ནས་སྣོད་དུ་བསྡུས་པའི་སྟེང་དུ་ལས་བུམ་ཀྱིས་ཁྲུས་བྱ་བ་ནི། ཧཱུྃ༔ རྒྱུ་དྲུག་ནད་གདོན་སྒྲིབ་སྦྱང་ཕྱིར༔ བུམ་ཆུ་བཀྲ་ཤིས་ཆུ་རྒྱུན་གྱིས༔ སྐལ་ལྡན་བུ་ཡི་སྒོ་གསུམ་བཀྲུ༔ མི་མཐུན་ཞི་ནས་སྣོད་རུང་ཤོག༔ ༀ་བཛྲ་ཨ་མྲྀ་ཏ་ཀུཎྜ་ལཱི་ཧཱུྃ། སྡིག་པ་དང་སྒྲིབ་པ་ཐམས་ཅད་སརྦ་པཱ་པཾ་ད་ཧ་ན་ཤཱནྟིཾ་ཀུ་རུ་སྭཱ་ཧཱ། ཞེས་བཀྲུ་ཞིང་སློབ་མ་རྣམས་ལ་ཡིག་བརྒྱ་བཟླ་བཅུག་གོ ། གླུད་གཏོར་ལ་ཆབ་བརྩལ། སྭ་བྷ་ཝས་སྦྱང་། འབྲུ་གསུམ་དང་ཨ་ཀཱ་རོས་འདོད་ཡོན་ལྔར་བྱིན་གྱིས་བརླབས། དེ་བཞིན་གཤེགས་པ་བཞི་ལ་ཕྱག་འཚལ་ལ། །མཆོད་སྦྱིན་གྱི་གླུད་གཏོར་རྒྱ་ཆེན་པོ་འདི་བསྔོ་ཞིང་སྦྱིན་པའི་གནས་ནི་འདིར་འདུས་ཤིང་འཚོགས་པ་ཐམས་ཅད་ཀྱི་ཚེ་རབས་ཐོག་མེད་ནས་ལན་ཆགས་པའི་མགྲོན་ཡ་བདུད་རྒྱལ་པོ། མ་བདུད་རྒྱལ་མོ། བཙན་ཁ་བཞི། མགྱོགས་སྡེ་བརྒྱད། རྒྱལ་པོ་དང་བརྒྱ་བྱིན། ས་བདག་དང་ཀླུ་སྲིན། འབྱུང་པོ་དང་རོ་ལངས། ནད་རིམས་དང་ཡམས་ཀྱི་བདག་པོ། ཁྱད་པར་དུ་བདག་གིས་དབང་ཟབ་མོ་བསྐུར་བ་ལ་བར་དུ་གཅོད་པར་བྱེད་པའི་གནོད་བྱེད་གདོན་བགེགས་འབྱུང་པོ་ལན་ཆགས་ཀྱི་བདག་པོ་རྣམས་ལ་སྦྱིན་ནོ། །བསྔོའོ། །ཚིམ་པར་གྱིས་ལ་བདག་ཅག་དཔོན་སློབ་དགོན་སྡེ་གྲྭ་ཚན་ཡོན་མཆོད་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་མ་བྱེད་ལ་སོ་སོ་རང་རང་གི་གནས་སུ་མྱུར་དུ་བྱེར་ཅིག་དེངས་ཤིག སརྦ་བིགྣན་ཨུ་ཙ་ཏ་ཡ་གརྫ་གརྫ་ཧཱུྃ་ཕཊཿ ཅེས་པས་དབང་ལྡན་གྱི་གནས་སམ་གང་འཐད་དུ་དོར་རོ། །དེ་ནས་ནང་དུ་བླ་མ་ཁྲི་མཐོན་པོ་ལ་རྒྱན་ཆས་དང་ལྡན་པར་ཏིང་ངེ་འཛིན་ལ་བཞུགས། ལས་སློབ་ཀྱིས་རྡོ་རྗེའི་ལམ་ལ་དབང་ཞུ་རྣམས་ཡིག་བརྒྱ་བཟླ་ཞིང་ནང་དུ་ཁྲིད་དེ། གིང་དང་ཁྲོ་བོའི་ཆ་ལུགས་བྱས་ཏེ། མེ་ཐུན་ཆུ་ཐུན་བརྡེགས། གུ་གུལ་བདུག ལས་བྱང་གིས་བཀའ་བསྒོ། སུམ་བྷ་ནི་དང་དྲག་སྔགས་ཀྱིིས་བསྐྲད། རྗེས་སུ་མཚམས་བཅད་བསྲུང་བའི་གུར་ཁང་དང་ལྡན་པར་བྱའོ། །དེ་ནས་མཆེད་ལྕམ་རྣམས་ཀྱིས་གུས་པས་ཕྱག་འཚལ་ཞིང་མཎྜལ་འབུལ་བ་ནི། བུམ་དབང་ལ་འབྲུའི་ཚོམ་བུ་བཀོད་དེ་སྤྲུལ་སྐུའི་མཎྜལ་ལོགས་ནས་བྱུང་བ་ལྟར་འབུལ་ལོ། །སྤྲོ་ན་བརྒྱུད་པའི་གསོལ་འདེབས་ཀྱང་བྱའོ། །དེ་ནས་ཐལ་མོ་སྦྱར་ཏེ་མགྲིན་གཅིག་དུ་གསོལ་བ་གདབ་པ་ནི། །ཨེ་མ་མགོན་པོ་ཐུགས་རྗེ་ཅན༔ རིགས་དྲུག་གནས་སུ་ལྟུང་བ་ཡི༔ སྐྱབས་བྲལ་མགོན་མེད་སེམས་ཅན་ལ༔ ཐུགས་རྗེ་ལྕགས་ཀྱུས་བཟུང་དུ་གསོལ༔ ལན་གསུམ་གྱི་རྗེས་ལ། དལ་འབྱོར་རྙེད་དཀའ། རྙེད་ཀྱང་ཆོས་དང་འཕྲད་པར་དཀའ་ཚུལ། དྲང་དོན་ངེས་དོན་ལ་སོགས་སྐབས་དང་བསྟུན་ལ་བཤད། ཅེས་འབྱུང་བའི་དོན་ནི། དེ་ཡང་རྒྱས་པར་སྤྲོ་ན་གཞན་ནས་བྱུང་བ་ལྟར་རོ། །

བསྡུས་པ་ནི། འོ། རྣམ་པ་ཐམས་ཅད་མཁྱེན་པའི་སངས་རྒྱས་ཀྱི་གོ་འཕང་ཐོབ་པར་བྱེད་པ་ལ། དལ་འབྱོར་གྱི་མི་ལུས་རིན་པོ་ཆེ་འདི་ལ་མ་བརྟེན་པར་ཐབས་གཞན་ན་མེད་དོ། །དེ་ཡང་དལ་འབྱོར་བཅོ་བརྒྱད་དང་ལྡན་པའི་མི་ལུས་རིན་པོ་ཆེ་འདི་ནི། ད་རེས་ཙམ་མིན་པ་ཤིན་ཏུ་རྙེད་པར་དཀའ་སྟེ། སྤྱོད་འཇུག་ལས། དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་འགྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་བསྒྲུབ་ན། །ཕྱིས་ནས་ཡང་དག་འབྱོར་བ་ག་ལ་འགྱུར། །ཞེས་པ་དང་། མདོ་ལས། ལོག་ལ་སྲན་མ་གཏོར་བས་གཅིག་ཆགས་སྲིད། །ཐམས་ཅད་ས་ལ་ལྷུང་ནས་སོང་བ་ལྟར། །ཐོབ་པར་དཀའ་འོ་སེམས་ཅན་གྲངས་ལ་ལྟོས། །ཞེས་གསུངས་པ་དང་། དེ་ཡང་མདོ་ལས། བཅོམ་ལྡན་འདས་ལ་ཤཱ་རིའི་བུས་གསོལ་བ། བཅོམ་ལྡན་འདས། དམྱལ་བའི་ཚད་ནི་ཅི་ཙམ་ཞིག་ཡོད། ཡི་དྭགས་ཀྱི་ཚད་ནི་ཅི་ཙམ་ཞིག་ཡོད། དུད་འགྲོ་ནི་ཅི་ཙམ་ཞིག་ཡོད། ལྷ་མ་ཡིན་ནི་ཅི་ཙམ་ཞིག་ཡོད། ལྷ་མི་གཉིས་པོ་ནི་ཅི་ཙམ་ཞིག་ཡོད། ཞུས་པས། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ། དམྱལ་བ་ནི་ས་གཞི་ཙམ་ཡོད་དོ། །ཡི་དྭགས་ནི་བྱེ་མའི་གྲངས་ཙམ་ཡོད་དོ། །དུད་འགྲོ་ནི་ཆང་གི་སྦང་མ་ཙམ་ཡོད་དོ། །ལྷ་མ་ཡིན་ནི་ཁ་བ་བུ་ཡུག་ཙམ་ཡོད་དོ། །ལྷ་མི་གཉིས་ནི་སེན་མོའི་སྟེང་དུ་རྡུལ་ཆགས་པ་ཙམ་ཡོད་དོ། །ཞེས་སོགས་མང་དུ་གསུངས་པའི་ཕྱིར་ཤིན་ཏུ་ཐོབ་དཀའ་བར་ཤེས་པར་བྱའོ། །ཐོབ་ནས་ཀྱང་དམ་པའི་ཆོས་དང་འཕྲད་པར་དེ་བས་ཀྱང་དཀའ་སྟེ། མདོ་ལས། སངས་རྒྱས་རྙེད་པ་བརྒྱ་ལམ་རྙེད་པར་དཀའ། །མིར་སྐྱེ་བ་ཡང་ཤིན་ཏུ་རྙེད་དཀའ་སྟེ། གྲོགས་པོ་གང་དག་དད་པས་ཆོས་ཉན་པ། །འདི་འདྲ་བསྐལ་པ་བརྒྱར་ཡང་རྙེད་མི་འགྱུར་། །ཞེས་སོགས་ལུང་མང་ངོ་། །དེ་བས་ན་ད་ལ ན་ཅིས་ཀྱང་འབད་པས་ཆོས་དང་ལྡན་དགོས་ཏེ། སློབ་དཔོན་ཀླུ་སྒྲུབ་ཀྱི་ཞལ་ནས། འཆི་བའི་རྐྱེན་མང་གསོན་པོའི་རྐྱེན་ནི་ཉུང་། །འཚོ་རྐྱེན་ཉིད་ཀྱང་འཆི་བའི་རྐྱེན་དུ་འགྱུར། དེ་བས་རྟག་ཏུ་ཆོས་ལ་འབད་པར་བྱ། །ཞེས་གསུངས་སོ། གཞན་ཡང་ཐེག་པ་ཆེན་པོའི་ཆོས་བཤད་ཅེས་པས། སྟོན་པ་རྡོ་རྗེ་རྒྱལ་པོ་ཐུགས་རྗེ་དང་ལྡན་པའི་ངང་ནས། ཀྱེ་ཧོ། རིགས་ཀྱི་བུ་རྣམས་གསོན། །ཁ་ཅིག་གསང་སྔགས་འགྲུབ་དོན་གཉེར། །དཀྱིལ་འཁོར་འདིར་ནི་ཞུགས་པར་བྱ། །ཚེ་འདི་འབའ་ཞིག་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར་། །འཇིག་རྟེན་ཕ་རོལ་དོན་གཉེར་ན། །ཚེ་འདིའི་འབྲས་བུ་ཤུགས་ལས་འབྱུང་། །དེ་ཕྱིར་ཕྱི་མ་དོན་གཉེར་ཞིང་། །བླ་མེད་སྔགས་ལ་དད་པར་གྱིས། །འཇིག་རྟེན་ན་ནི་ཀུན་མཁྱེན་དག །ཨུ་དུམ་ཝ་རའི་མེ་ཏོག་ལྟར། །བརྒྱ་ལམ་ལ་ནི་རེ་འགའ་ཞིག །འབྱུང་ངམ་ཡང་ནི་འབྱུང་མི་འགྱུར། །གསང་སྔགས་སྤྱོད་པའི་ཚུལ་མཆོག་འདི། །དེ་བས་ཀྱང་ནི་དཀོན་པ་སྟེ། །བསྐལ་བ་བྱེ་བ་སྟོང་དུ་ཡང་། །སྡིག་པ་མི་བཟད་བགྱིས་པ་རྣམས། །དེ་ཀུན་དཀྱིལ་འཁོར་འདི་འདྲ་བ། །མཐོང་བ་ཙམ་གྱིས་བྱང་གྱུར་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་རྣམས་སྨོས་ཅི་འཚལ། །ཞེས་སོ། །དེ་ཡང་བྲམ་ཟེ་དུང་གི་ཕྲེང་བ་ཅན་གྱི་ལོ་རྒྱུས་དང་། འགྱོད་ཚངས་རྒྱལ་པོའི་འབྱུང་ཁུངས་གཉིས་བཤད་ཅེས་པས། དེ་གཉིས་ལོགས་སུ་གསལ་བ་ལྟར་རོ། །དེ་ནས་བརྒྱུད་པའི་ལོ་རྒྱུས་བཤད་ཅེས་པས་དེ་ཡང་རྒྱས་པར་བརྒྱུད་པའི་ལོ་རྒྱུས་སམ། དབང་བཤད་ནས་འབྱུང་བ་ལྟར་རོ། །ཤིན་ཏུ་བསྡུས་པ་ནི། ཀློང་གསལ་ལས། གསང་ཆེན་ངེས་པའི་བཀའ་འདི་ལ། །ལོ་རྒྱུས་དོན་གྱིས་མ་བཤད་ན། །ཡིད་མི་ཆེས་པའི་སྐྱོན་ཏུ་འགྱུར། ཞེས་པས། བརྒྱུད་པའི་ལོ་རྒྱུས་ཟུར་ཙམ་ཞིག་བཤད་ན། ཨོ་རྒྱན་རིན་པོ་ཆེས་སྒམ་པོ་གདར་གྱི་རི་ལ་སྦས་པའི་གཏེར་ཁ། གཏེར་སྟོན་ཀརྨ་གླིང་པས་བཏོན་པའི་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བསྐུར་གནས་སྤར་འགྲོ་དྲུག་རང་གྲོལ་འདིའི་བརྒྱུད་པ་ནི། ཆོས་སྐུ་ཀུན་བཟང་ཡབ་ཡུམ། དྲུག་པ་རྡོ་རྗེ་འཆང་ཆེན། སྟོན་པ་རྡོ་རྗེ་སེམས་དཔའ། རིག་འཛིན་དགའ་རབ་རྡོ་རྗེ། མཁས་པ་ཤྲཱི་སིང་ཧ། ཨོ་རྒྱན་པདྨ་འབྱུང་གནས། མ་གཅིག་ཡེ་ཤེས་མཚོ་རྒྱལ། གཏེར་སྟོན་ཀརྨ་གླིང་པ། ཐུགས་སྲས་ཉི་ཟླ་ཆོས་རྗེ། འགྲོ་མགོན་ཉི་ཟླ་འོད་ཟེར། ནམ་མཁའ་ཆོས་ཀྱི་རྒྱ་མཚོ། རིག་འཛིན་སངས་རྒྱས་བཀྲ་ཤིས། གདུང་རྒྱུད་ཀུན་དགའ་གྲགས་པ། སྤྲུལ་སྐུ་བཀྲ་ཤིས་རྒྱ་མཚོ། གུ་རུ་ཆོས་ཀྱི་འབྱུང་གནས། ཡོངས་འཛིན་ཤཱཀྱ་བཀྲ་ཤིས། མཚན་ལྡན་ཆོས་ཉིད་རྒྱ་མཚོ། དྲིན་ཆེན་རྩ་བའི་བླ་མ། དེས་བདག་ལའོ། །གཞན་ཡང་འདིར་ལུགས་མི་འདྲ་བ་འགའ་ཞིག་ཡོད་དེ། འདི་ནི་ཉེ་བ་དང་དབང་བརྒྱུད་ལྟར་ཡིན་ནོ། །དེ་ཡང་ལུང་ལས། ཆུ་མགོ་གངས་ལ་ཐུག་གི་བར། །ཀུན་བཟང་ང་ཡི་བར་དུ་བཤད། །ཅེས་པས། དེ་ལྟར་ཆོས་སྐུ་ཀུན་བཟང་ཡབ་ཡུམ་ནས། ད་ལྟའི་བར་དུ་བརྒྱུད་པ་དྲུག་ལྡན་དུ་ཟམ་མ་ཆད་པའི་དབང་ཆོས་ཟབ་མོ་འདི་ལྟ་བུའི་སྒོར་ཞུགས་ཕྱིན་ཆད་བསྐལ་པ་དཔག་ཏུ་མེད་པའི་སྡིག་སྒྲིབ་ཐམས་ཅད་དཀྱིལ་འཁོར་མཐོང་བ་ཙམ་གྱིས་དག་པར་གསུངས་སོ། །དེ་ནས་དངོས་གྲུབ་ཀྱི་པྲ་བརྟགས་སོ་ཤིང་དོར་བ་ནི། ནས་ཀྱི་ཚོམ་བུ་ལྔ་ལ་རིགས་ལྔ་བསྐྱེད་བསྟིིམ་མཆོད་བསྟོད་སོགས་བསྡུས་པ་ཞིག་བྱས་ལ། ཙནྡན་ནམ་དྲི་བཟང་གི་ཤིང་མགོ་མཇུག་མ་ལོག་པ་སོར་བརྒྱད་པའི་རྩེ་ལ་མེ་ཏོག་ཅོད་པཎ་དང་བཅས་པ་རྡོ་རྗེའི་ཐལ་མོས་བཟུང་ལ། དམིགས་པ་དང་བཅས་པས་འབུལ་བ་ནི། རྗེས་ཟློས། ཧོ། བླ་མ་ཡི་དམ་མཁའ་འགྲོ་དང་། །སངས་རྒྱས་བྱང་ཆུབ་སེམས་དཔའ་དང་། །ཞི་ཁྲོ་རིགས་ལྔ་ཐམས་ཅད་དགོངས། །བདག་ནི་རིགས་ལྔའི་དངོས་གྲུབ་ལྔ། །གང་ཐོབ་མི་ཐོབ་བསྟན་དུ་གསོལ། །བཛྲ་ཧཱ་ས་ཧཿ ཞེས་བརྗོད་ནས་ཚོམ་བུའི་སྟེང་དུ་དོར་རོ། །དེ་ཡང་དབུས་སུ་བབས་ན་བདེ་གཤེགས་རིགས་དང་མཆོག་གི་དངོས་གྲུབ་ཐོབ། ཤར་དུ་རྡོ་རྗེ་དང་ཞི་བའི་དངོས་གྲུབ་ཐོབ། ལྷོར་རིན་པོ་ཆེ་དང་རྒྱས་པའི་དངོས་གྲུབ་ཐོབ། ནུབ་ཏུ་པདྨ་དང་དབང་གི་དངོས་གྲུབ་ཐོབ། བྱང་དུ་ལས་དང་དྲག་པོའི་དངོས་གྲུབ་ཐོབ། མཚམས་བཞིར་དངོས་གྲུབ་ཕྲན་ཚེག་རེ་ཐོབ། རྩ་བ་ཚུར་བསྟན་འགྱེལ་ན་དངོས་གྲུབ་མེད། ལན་གསུམ་བསྐྱར་ཡང་འགྱེལ་ན་བར་ཆད་འབྱུང་བས་བཟློག་པ་ལ་སོགས་བྱའོ། །

དེ་ནས་བར་ཆད་བསྲུང་བའི་ཕྱིར། སྲུང་སྐུད་ལྔ་བསྒྲིལ་ལ་རྡོ་རྗེའི་མདུད་པ་བྱས་ལ་རྩ་སྔགས་ཤམ་བུར། བཛྲ་རཀྵཾ་རཀྵཾ་ཧཱུྃ། ཞེས་བཏག་ལ་འདོགས་པ་ནི། ཧཱུྃ༔ ལུས་ལ་བར་ཆད་སྲུང་བའི་ཕྱིར༔ སྲུང་སྐུད་རྡོ་རྗེའི་མདུད་པ་ཅན༔ ཞི་ཁྲོ་རིགས་བརྒྱའི་ཕོ་བྲང་ཡིན༔ རྡོ་རྗེའི་གོ་ཆ་འདི་ཕོག་པས༔ རླུང་མཁྲིས་བད་ཀན་འདུས་པ་སོགས༔ ནད་རྣམས་ཐམས་ཅད་བསྲུང་བར་བྱ༔ བརྒྱད་ཅུ་རྩ་བཞི་ལ་སོགས་པའི༔ ལྟས་ངན་ཐམས་ཅད་བསྲུང་བར་བྱ༔ འདོད་ཆགས་ཞེ་སྡང་ལ་སོགས་པའི༔ ཉོན་མོངས་ཐམས་ཅད་བསྲུང་བར་བྱ༔ བྱད་ཕུར་རྨི་ལྟས་ངན་པ་སོགས༔ བསྒྲུབ་ལ་བར་ཆད་ཐམས་ཅད་བསྲུང་༔ སྲུང་བ་རྡོ་རྗེའི་གུར་ཆེན་འདི༔ དབང་སྣོད་བུ་མཆོག་རྡོ་རྗེའི་གུར༔ རྡོ་རྗེའི་ལྟེ་བར་ཕོ་བྲང་བཅའ༔ བླ་མ་ཡི་དམ་མཁའ་འགྲོ་ཡིས༔ དབང་བཞིའི་ཆུ་བོ་གསལ་བར་ཤོག༔ རྩ་སྔགས་ཤམ་བུར། བཛྲ་རཀྵ་རཀྵ་ཧཱུྃ། ཕོའི་གཡོན། མོའི་དཔུང་པ་གཡས་སུ་བཏགས་ཤིང་རྡོ་རྗེ་རྒྱ་གྲམ་གྱི་རྒྱས་གདབ་བོ། །

དེ་ནས་ཀུ་ཤ་གཏད་ཅིང་ལེགས་ཉེས་རྨི་ལམ་བརྟག་པ་ནི། ཀུ་ཤ་མང་ཉུང་གཉིས་སྤོས་ཆུས་བསངས། སྭ་བྷ་ཝའི་སྔགས་དང་། ༀ་ཨཱཿཧཱུྃ་གིས་བྱིན་གྱིས་བརླབས། སྔགས་འདི་བརྒྱ་སྟོང་ལ་སོགས་ཅི་འགྲུབ་བཀླག་གོ ། ༀ་བཛྲ་ཎི་ཏྲི་བྷི་ཤ་ཀེ་དུ་སྭཱ་ཧཱཿ པྲ་ནི་སྟོན་ཅིག༔ ཅེས་གདབ་བོ། །དེ་ནས་བསྣོལ་མར་བྱིན་ལ། ཧཱུྃཿ སྔོན་ཡང་སྟོན་པ་བཅོམ་ལྡན་འདས༔ རྩྭ་མཆོག་ལ་ནི་སྟན་བྱས་ནས༔ བདུད་བཏུལ་ཆོས་ཀྱི་འཁོར་ལོ་བསྐོར༔ བྱང་ཆུབ་རྡོ་རྗེའི་སྐུ་བརྙེས་ལྟར༔ ཁྱོད་ཀྱང་རྟེན་འབྲེལ་ལ་གནས་མཛོད༔ བཛྲ་ཏིཀྵྞ་བཾ༔ ཞེས་བྱིན་ལ། སློབ་བུས། ཧོཿ བླ་མ་ཡི་དམ་མཁའ་འགྲོ་དང་༔ ཆོས་སྐྱོང་སྲུང་མ་ཐམས་ཅད་ཀྱིས༔ བདག་ལ་དགེ་དང་མི་དགེ་སོགས༔ རྨི་ལམ་དུ་ནི་གསལ་བར་སྟོན༔ ཞེས་སོགས་ཀྱིས་དམོད་པ་བོར་ལ། བླ་མ་དང་དཀྱིལ་འཁོར་ཕྱོགས་ལ་མགོ་གཏད་ཅིང་སེང་གེའི་ཉལ་སྟབས་ཀྱིས་རྨི་ལམ་བརྟག་གོ ། ནངས་པར་སློབ་དཔོན་ལ་ཞུ། ངན་ན་བཟློག་པ་དང་དྲག་པོའི་སྦྱིན་སྲེེག་བྱའོ། །དེ་ནས་ཞི་ཁྲོའི་འཛབ་བཟླས་ཞེས་གསུངས་པས། འདི་ལའང་། རྒྱས་པར་འཛབ་དགོངས་ཉིད་དུ་ཤེས་ལ། འདིར་ཞི་ཁྲོ་སྤྱི་དྲིལ་དུ་སྒྲུབ་པའི་འཛབ་ལ་གཉིས་ཏེ། དམིགས་པ་དང་འཛབ་དངོས་སོ། དང་པོ་དམིགས་པ་ནི། དབང་གི་དུས་སུ་སྟོང་ཁམས་ཐམས་ཅད་འཛབ་སྔགས་ཀྱི་ཆོས་སྒྲས་གང་བ། དཔེར་ན་བུང་བ་ཚང་ཞིག་པ་ལྟ་བུར་སྒྲོགས་པ་སྟེ། ཁྱེད་རང་རྣམས་དཔལ་རྡོ་རྗེ་སེམས་དཔར་གསལ་སྒོམ་རིམ་ལྟར་མཆན། བའི་ཐུགས་ཀའི་སྔགས་ཕྲེང་ལས་འོད་ཟེར་དཔག་ཏུ་མེད་ཅིང་བརྗོད་ཀྱིས་མི་ལོངས་པ་སྟེང་འོག་ཕྱོགས་མཚམས་ཐམས་ཅད་དུ་འཕྲོས་ཤིང་ཁམས་གསུམ་ཀྱི་སེམས་ཅན་ལ་ཕོག་པས་ལུས་ངག་ཡིད་གསུམ་གྱི་སྡིག་སྒྲིབ་མ་ལུས་པ་བྱང་ཞིང་དག་ནས། ཐམས་ཅད་དུས་གཅིག་ལ་ཞི་ཁྲོ་རྩ་བ་གསུམ་གྱི་སྐུ་ཤ་སྟག་ཏུ་གྱུར་ཏེ། དེ་རྣམས་ཐམས་ཅད་ཀྱིས་འཛབ་སྔགས་ཏི་རི་རི་སྒྲོགས་པར་བསམ་མོ། །གཉིས་པ་འཛབ་དངོས་ནི། ཀུན་གྱི་འཛབ་རྗེས་ཟློས་ལྟར། ༀ་ཨཱཿཧཱུྃ་བྷོ་དྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ༀ་རུ་ལུ་རུ་ལུ་ཧཱུྃ་བྷྱོ་ཧཱུྃཿ ཞེས་ཞི་ཁྲོ་སྤྱི་དྲིལ་དུ་འབྲུག་སྟོང་གི་ལྡིར་དབྱངས་སུ་བཟླས་ཏེ། སེམས་ནི་དཀྱིལ་འཁོར་གསུམ་ཁྱེར་སོ་གསུམ་དང་མ་བྲལ་བར། རྒྱུན་དུ་སྣང་སྟོང་དྲན་སྟོང་རིག་སྟོང་དང་མ་བྲལ་བར་བྱའོ། །

གསུམ་པ་དལ་དུ་འཇུག་ཅིང་སྔོན་འགྲོའི་དབང་བསྐུར་བ་ནི། སློབ་བུ་རྣམས་ཐལ་མོ་སྦྱར་ནས་དལ་དུ་འཇུག་པའི་ཕྱིར། གསོལ་པ་གདབ་པ་ནི། རྗེས་ཟློས། ཨེ་མ་མགོན་པོ་ཐུགས་རྗེ་ཅན༔ བདག་སོགས་འགྲོ་བ་མ་ལུས་པ༔ ལོག་པའི་ལམ་དུ་ཞུགས་པ་རྣམས༔ བདེ་ཆེན་ཐར་པའི་ལམ་བསྟན་འཚལ༔ ཞེས་ལན་གསུམ་གྱི་རྗེས་ལ། སློབ་དཔོན་གྱིས་འདི་སྐད་དོ། །ཨེ་མ་འདིར་འདུས་སྐལ་ལྡན་ལས་ཅན་རྣམས༔ སྔོན་ཆད་མ་རིག་རྨོངས་པའི་ལས་དབང་གིས༔ དུག་གསུམ་གྱིས་བཅིངས་ངན་སོང་གསུམ་དུ་མནར༔ དེང་ནས་བརྩམས་ཏེ་རྒྱལ་བའི་ཐུགས་རྗེ་ཡི༔ ཕོ་ཉས་བཟུང་སྟེ་དཀྱིལ་འཁོར་གྲལ་དུ་འགོད༔ དོན་འབྲས་འདོད་ཕྱིར་དད་པའི་ཤུགས་བསྐྱེད་ལ༔ སྐུ་གསུམ་ཞིང་ཁམས་ཕོ་བྲང་འདིར་ཤོག་ཅིག༔ བླ་མེད་དོན་གྱི་སྙིང་པོ་སྦྱིན་པར་བྱ༔ ཞེས་བརྗོད་ལ་ཐོག་མར་སློབ་བུ་རྣམས་ལ་སྐྱབས་འགྲོ་འབོགས་པ་ནི། མདུན་གྱིི་ནམ་མཁར་དཀོན་མཆོག་གསུམ་དང་རྩ་བ་གསུམ་སྐུ་གསུམ་ཞི་ཁྲོ་རབ་འབྱམས་གྱི་ལྷ་ཚོགས་རྣམས་མངོན་སུམ་དུ་བཞུགས་པར་དམིགས་ལ་ཐལ་མོ་སྦྱར་ཏེ་རྗེས་ཟློས་བྱེད་དུ་གཞུག་ལ། ཀྱེཿ ཕྱོགས་བཅུའི་སངས་རྒྱས་ཐམས་ཅད་དང་༔ བླ་མ་ཡི་དམ་མཁའ་འགྲོ་དགོངས༔ རྐང་གཉིས་གཙོ་བོ་སངས་རྒྱས་དང་༔ ཞི་བ་ཆགས་བྲལ་དམ་པའི་ཆོས༔ ཚོགས་མཆོག་འཕགས་པའི་དགེ་འདུན་ལ༔ བདག་ནི་གུས་པས་སྐྱབས་སུ་མཆི༔ ལན་གསུམ་དང་། ཡང་། ཀུན་བཟང་ཞི་ཁྲོའི་ལྷ་ཚོགས་དང་༔ དམ་པ་རིགས་བརྒྱའི་ལྷ་ཚོགས་ལ༔ དེང་བཟུང་བླ་མེད་བྱང་ཆུབ་བར༔ གུས་པས་སྐྱབས་སུ་ཉེ་བར་མཆི༔ ཞེས་ལན་གསུམ་བྱའོ། །

དེ་ནས་སེམས་བསྐྱེད་སྡོམ་པ་བཟུང་བ་རྣམས་ཀྱི་ཁས་བླང་དེ་ལ། སེམས་བསྐྱེད་པ་ལ་དང་པོ་ཕྱི་སོ་སོར་ཐར་པའི་སྡོམ་པ་ཞུ་བའི་དོན་དུ་རྗེས་ཟློས་མཛོད། ཧོ༔ བླ་མ་མཆོག་གི་སྤྱན་སྔ་རུ༔ ལུས་ངག་ཡིད་ཀྱིས་འགྲོ་བ་ལ༔ གནོད་པ་སྤང་ཞིང་དགེ་བ་བསྒྲུབ༔ དགེ་བསྙེན་དགེ་ཚུལ་དགེ་སློང་གསུམ༔ སོ་སོ་ཐར་པའི་སྡོམ་པ་ལ༔ བདག་ནི་རྒྱུན་དུ་གནས་ཤིང་བསྲུང་༔ ཞེས་ལན་གསུམ་དང་། དེ་ནས་སྨོན་པ་སེམས་བསྐྱེད་བླངས་པའི་དོན་དུ་རྗེས་ཟློས་མཛོད། ཧོ༔ དུས་གསུམ་བླ་མ་མཆོག་དགོངས་ཤིག༔ འདི་བཟུང་བྱང་ཆུབ་མ་ཐོབ་པར༔ འགྲོ་དྲུག་སེམས་ཅན་ཐམས་ཅད་ལ༔ ཕ་མའི་འདུ་ཤེས་ཉེར་བཞག་སྟེ༔ མ་བསྒྲལ་བ་རྣམས་བསྒྲལ་བ་དང་༔ མ་གྲོལ་བ་རྣམས་དགྲོལ་བ་དང་༔ དབུགས་མ་དབྱུང་རྣམས་དབུགས་དབྱུང་ཞིང་༔ སྨོན་པ་བྱང་ཆུབ་སེམས་བསྐྱེད་དོ༔ ཞེས་ལན་གསུམ་དང་། དེ་ནས་འཇུག་པ་སེམས་བསྐྱེད་བླངས་བའི་དོན་དུ་རྗེས་ཟློས། ཧོཿ སྔོན་གྱི་རྒྱལ་བ་ཐམས་ཅད་ཀྱང་༔ སྡོམ་པ་ལ་ནི་གནས་པ་ལྟར༔ དེང་བཟུང་བྱང་ཆུབ་མ་ཐོབ་བར༔ བླ་མེད་འཇུག་པའི་བྱང་ཆུབ་སེམས༔ བདག་ཅག་རྣམས་ཀྱིས་བསྐྱེད་པར་བགྱི༔ ཕར་ཕྱིན་དྲུག་སློབ་སྡོམ་གསུམ་བཟུང་༔ བརྩོན་འགྲུས་དག་གིས་ཐམས་ཅད་བསྒྲལ༔ ཀུན་དོན་ཚུལ་ཁྲིམས་གསུམ་ཡང་བཟུང་༔ མ་གྲོལ་དགྲོལ་དང་མ་བསྒྲལ་བསྒྲལ༔ དབུགས་དབྱུང་མྱ་ངན་འདས་ལ་འགོད༔ ཅེས་ལན་གསུམ་དང་། ཡང་རིགས་ལྔའི་སྡོམ་པ་བཟུང་དོན་དུ་རྗེས་ཟློས་མཛོད། ཧོ༔ དཀོན་མཆོག་གསུམ་བཟུང་མི་གཏོང་བསྒྲུབ༔ རྡོ་རྗེ་རིགས་ཀྱི་དམ་ཚིག་ཏུ༔ རྡོ་རྗེ་དྲིལ་བུའི་ཕྱག་རྒྱ་དང་༔ བྱང་ཆུབ་སེམས་ནི་སྤང་མི་བྱ༔ རིན་ཆེན་རིགས་ཀྱི་དམ་ཚིག་ཏུ༔ སྦྱིན་པ་རྣམ་བཞི་རྟག་ཏུ་སྦྱིན༔ པདྨ་རིགས་ཀྱི་དམ་ཚིག་ཏུ༔ ཐེག་པ་གསུམ་དང་ཆོས་རྣམས་བཤད༔ ལས་ཀྱི་རིགས་ཀྱི་དམ་ཚིག་ཏུ༔ འགྲོ་བའི་དོན་ལ་བརྩོན་པར་བྱ༔ དེ་བཞིན་རིགས་ཀྱི་དམ་ཚིག་ཏུ༔ དཀྱིལ་འཁོར་གསུམ་དང་འབྲལ་མི་བྱ༔ རྩ་བ་ཡན་ལག་དམ་ཚིག་རྣམས༔ མ་ལུས་བདག་གིས་ཡོངས་སུ་བཟུང་༔ ཞེས་ལན་གསུམ་བྱའོ། །

དེ་ནས་དམ་ཚིག་རྡོ་རྗེ་མགོར་བཞག་ལ། ཧོཿ འདི་ནི་རྡོ་རྗེའི་དམ་ཚིག་ཡིན༔ སྐུ་ཡི་དམ་ཚིག་ལུས་ཀྱིས་བསྲུང་༔ ཉམས་ན་ན་རཀ་དམྱལ་བར་ལྟུང་༔ བསྲུངས་ན་སྤྲུལ་སྐུས་འགྲོ་དོན་འབྱུང་༔ གསུང་གི་དམ་ཚིག་ངག་གིས་བསྲུངས༔ ཉམས་ན་བྱོལ་སོང་གནས་སུ་སྐྱེ༔ བསྲུངས་ན་ཆོས་སྨྲའི་རྒྱལ་པོར་འགྱུར༔ ཐུགས་ཀྱི་དམ་ཚིག་སེམས་ཀྱིས་བསྲུངས༔ ཉམས་ན་སྨྱོོ་འབོག་ཅན་དུ་སྐྱེ༔ བསྲུངས་ན་ཆོས་སྐུ་གཉིས་ལྡན་ཐོབ༔ ཅེས་དམ་ཚིག་འབོགས་པར་བྱ། དེ་ནས་དལ་དུ་ཞུགས་པ་ལ། སློབ་མའི་མིག་རས་ཀྱིས་བཀབ་ལ་ཞེས་པས་མིག་དར་སྔོན་པོས་བཅིངས་ཏེ། ༀ་ཨ་ཁཾ་ཝཱི་ར་ཧཱུྃཿ ཞེས་ཕྱག་འཚལ། སྐབས་འདིར་ཡེ་ཤེས་དབབ་པ་ལོགས་སུ་གསལ་བ་བཞིན་བྱའོ། །

དེ་ནས་ཐམས་ཅད་ལངས་ལ་ཐལ་མོ་སྦྱར་བར་སློབ་བུ་རྡོ་རྗེས་ཁྲིད་ལ་དཀྱིལ་འཁོར་གྱི་ཕྱོགས་བཞིའི་སྒོ་ཕྱེས་ནས་ལག་ཏུ་མེ་ཏོག་དང་ཅོད་པཎ་སྣ་ལྔ་དང་བཅས་བཟུང་སྟེ་ཤར་སྒོ་ནས་དབུས་ཕྱོགས་སུ་གཏད་དེ་ཕུལ་བའི་རྗེས་ཟློས། ཀྱཻ་ཚེ་རབས་ཐོག་མེད་དུས་ཉིད་ནས༔ ཐ་མ་ད་ལ་ཐུག་གི་བར༔ བསྙེན་བསྒྲུབ་བསྒོམ་པའི་ཡི་དམ་ལྷ༔ གང་ཡིན་དེ་ལ་མེ་ཏོག་ཕོག༔ ཅེས་བརྗོད་ལ་དོར་རོ། །གང་དུ་ཕོག་པའི་མིང་བཏགས་ཞེས་པ་ནི། དབུས་སུ་ཕོག་ན། ཆོས་དབྱིངས་རང་གྲོལ༔ དྲི་མེད་རང་གྲོལ༔ སྣ་ཚོགས་རང་གྲོལ༔ དུ་མ་རང་གྲོལ༔ ཀུན་ཁྱབ་རང་གྲོལ༔ རྒྱལ་བ་སྤྱི་བླུགས་སོགས་སོ། །དེ་བཞིན་ཤར་དུ། གདོད་མའི་རང་མདངས༔ རྡོ་རྗེ་རང་གསལ༔ རྡོ་རྗེ་སེམས་དཔའ༔ རྡོ་རྗེ་འཆང་ཆེན༔ རྡོ་རྗེ་ལྷུན་པོ་སོགས་དང་༔ ལྷོར་རིན་ཆེན་རྒྱལ་པོ༔ རིན་ཆེན་འབྱུང་གནས༔ ཡོན་ཏན་ལྷུན་གྲུབ༔ དཔལ་འབྱོར་ལྷུན་གྲུབ༔ སོགས་དང་། ནུབ་ཏུ། པདྨ་ཀུན་བཟང་༔ པདྨ་དྲི་མེད༔ པདྨ་རྒྱལ་པོ༔ པདྨ་འོད་གསལ༔ པདྨ་དབང་ཕྱུག༔ པདྨ་གསུང་དབྱངས་སོགས་དང་། བྱང་དུ། ཚོགས་དྲུག་རང་གྲོལ༔ ཀརྨ་དོན་གྲུབ༔ ཕྲིན་ལས་ཐོགས་མེད༔ དོན་ཡོད་རྣམ་རྒྱལ༔ སོགས་སོ། །རྒྱས་པར་འདོད་ན་བུམ་དབང་ཆེ་བའི་སྔོན་འགྲོར་གསལ་ལོ། །གསང་མཚན་གང་ཡིན་པ་དེ་མ་བརྗེད་པར་ཟུངས་ཤིག་ཅེས་པར་གདམས་སོ། །

དེ་ནས་རྡོ་རྗེ་སློབ་དཔོན་གྱི་དྲུང་དུ་ཁྲིད་ལ་མིག་རས་ཕྱེ་བ་ནི། རྡོ་རྗེ་སློབ་དཔོན་གྱིས་གསེར་ཐུར་རམ། རྡོ་རྗེ་ཐོགས་ལ། ཇི་ལྟར་མིག་མཁན་རྒྱལ་པོ་ཡིས༔ རབ་རིབ་ལིང་ཏོག་བསལ་བ་ལྟར༔ དེ་བཞིན་བུ་ཁྱོད་མ་རིག་པའི༔ ཉོན་མོངས་དྲུག་གིས་བསྒྲིབ་པ་ཡི༔ མ་རིག་ལིང་ཏོག་བསལ་བར་བྱ༔ ན་ར་ཀ༔ པྲེ་ཏ་ཀ༔ ཏིར་ཡ་ཀ༔ དྷེ་ཝ་ཨ་ལི་དྷེ་ཝ་མ་ནུ་ཤྱ༔ ཙཀྵྱུ་པྲ་ཝེ་ཤ་ཡ་ཕཊཿ ཅེས་བརྗོད་ལ་མིག་རས་བསལ་ལོ། །དེ་ནས་དཀྱིལ་འཁོར་གྱི་སྔར་མེ་ཏོག་ཅོད་པཎ་བླངས་ལ་སློབ་བུའི་མགོར་བཞག་ཅིང་འདི་སྐད་དོ། །ཧཱུྃ༔ བདག་ནི་མ་རིག་མིག་འབྱེད་ཡིན༔ དཀྱིལ་འཁོར་བཟང་པོ་འདི་ལ་ལྟོས༔ དེང་ནས་དཀྱིལ་འཁོར་འདི་མཐོང་རྟགས༔ ཅོད་པཎ་བཟང་པོ་འདི་ཡང་ཐོགས༔ གསང་མཚན་འདི་ཡང་མ་བརྗེད་ཅིག༔ ཅེས་དང་། དེ་ནས་མ་འོངས་པར་ཞིང་ཁམས་སུ་ལུང་བསྟན་པ་ནི། རྡོ་རྗེ་དྲིལ་བཅས་ཆོས་གོས་ཀྱི་གྲ་སེང་གེའི་རྣ་བ་ལྟར་བྱས་ནས། འོ་རིགས་ཀྱི་སེམས་དཔའ་རེ་རེ་ལྟར་གསང་མཚན་གང་ཡིན། དྲིས་ནས་གསང་མཚན་ཆེ་གེ་མོ་ཞེས་པ་དང་། ཁྱེད་རྣམས་ཀྱི་མེ་ཏོག་ཅོད་པཎ་དབུས་སུ། ཤར་ཏུ། ལྷོར། ནུབ་ཏུ། བྱང་དུ། གང་ཡིན་པའི་ཕྱག་མཚན། འཁོར་ལོ། རྡོ་རྗེ། རིན་པོ་ཆེ། པདྨ། རྒྱ་གྲམ། མདོག་ནི། མཐིང་ག དཀར་པོ། སེར་པོ། དམར་པོ། ལྗང་གུ། རིགས་ནི་བུདྡྷའི་རིགས། རྡོ་རྗེའི་རིགས། རིན་པོ་ཆེའི་རིགས། པདྨའི་རིགས། ལས་ཀྱི་རིགས། གསང་མཚན་དང་མཐུན་པར་སྙིང་པོ་ཡང་ཐ་དད་པའམ། ཞི་ཁྲོ་རིགས་འདུས་སམ། ཧཱུྃ་སྒྲུབ་ལྟ་བུར་ཟློས་ཤིག འདི་ནས་གལ་ཏེ་འཆི་འཕོས་ནས་ཀྱང་། དབུས་ཕྱོགས་སྟུག་པོ་བཀོད་པ། ཤར་ཕྱོགས་མངོན་པར་དགའ་བ། ལྷོ་ཕྱོགས་དཔལ་དང་ལྡན་པ། ནུབ་ཕྱོགས་བདེ་བ་ཅན། བྱང་ཕྱོགས་ལས་རབ་རྫོགས་པ་ཞེས་བྱ་བའི་ཞིང་ཁམས་རྣམ་པར་དག་པ་ན་སངས་རྒྱས་ནས་འཁོར་བ་མ་སྟོངས་ཀྱི་བར་དུ་འགྲོ་བ་སེམས་ཅན་ཐམས་ཅད་ཀྱི་དོན་ཐོགས་པ་མེད་པ་འབད་མེད་ལྷུན་གྲུབ་ཏུ་འབྱུང་བར་འགྱུར་རོ། །ཞེས་ལུང་བསྟན་ནས་སྤྲོ་བ་བསྐྱེད་པར་བྱའོ། །དེ་ནས་དཀྱིལ་འཁོར་དང་ལྷ་ཡི་རྣམ་དག་མཐོང་བ་རང་གྲོལ་ལྟར་བཤད། ཅེས་པས་ལོགས་སུ་གསལ་ལོ། །སྐབས་འདིར་ཀུན་གྱིས་མཎྜལ་འབུལ། ཞལ་སྐྱེམས་དྲང་བར་བྱའོ། །དེར་བླ་མས། འོ་ཁྱེད་རྣམས་ཀྱིས་དེ་སྔ་ཕན་ཆད་དཀྱིལ་འཁོར་འདི་ལྟ་བུ་མ་མཐོང་བས་ཁམས་གསུམ་དུ་འཁོར་ཞིང་རིགས་དྲུག་ཏུ་འཁྱམས་པ་ཡིན་གྱི། ཁར་སང་ཕན་ཆད་ཤིན་ཏུ་ཅོལ་ཆུང་མི་ཚེ་སྟོང་ཟད། བྱས་པ་དོན་མེད་དེ་ཙམ་ཞིག་བྱས། ད་ནི་ཡི་དམ་ཞི་ཁྲོའི་དཀྱིལ་འཁོར་འདིར་ཚུད་པས་ད་ལྟ་ཤི་ཡང་སངས་རྒྱ་བ་ཡིན་པས་སྤྲོ་བ་སྒོམས་ཤིག ཅེས་བརྗོད། དེ་ནས་རང་གཞུང་གིས། དེ་ནས་སྔགས་ཀྱི་སྣོད་དུ་རུང་བར་བྱ་བའི་ཕྱིར་ཞེས་སོགས་དཀྱུས་ལྟར་རོ། །ལྷོ་ནས་བཀྲ་ཤིས་སོགས་ཚང་བ་དང་། དེ་ནས་དྲུག་པ་མིའི་གནས་ནས་སྤར་བའི་སྐབས་འདིར། དབང་བཤད་ཅུང་ཞིག་སྤྲོ་ན། འདི་ལྷན་ཐབས་སུ་སྦྱར་རོ། །སྤྱིར་དབང་ལ་ཡོངས་རྫོགས་མཐའ་རྟེན་བཅས། ཞེས་པ་ནི་བླ་མེད་ཀྱི་རྒྱུད་ཀུན་ལས་གསུངས་སོ། །དེ་ཡང་ཕྱི་སྤྲོས་བཅས་བུམ་པའི་དབང་དང་། ནང་སྤྲོས་མེད་གསང་བའི་དབང་དང་། ཤིན་ཏུ་སྤྲོས་མེད་ཤེས་རབ་ཡེ་ཤེས་ཀྱི་དབང་དང་། རབ་ཏུ་སྤྲོས་མེད་ཚིག་དབང་རིན་པོ་ཆེའོ། །ད་རེས་བུམ་དབང་འགྲོ་དྲུག་རང་གྲོལ་ལྟར་ལས་ཅུང་ཟད་བྱེ་བྲག་ཕྱེ་ན། རྒྱུད་ལས། རྣམ་བཅུ་དབང་ལྡན་ཆེ་བ་པོ། །ཞེས་པས། བུམ་དབང་ཁོ་ན་ལ་ཡང་བཅུ་སྟེ། ངོ་བོ་དང་། ངེས་ཚིག་དང་། མཚན་ཉིད་དང་། དབྱེ་བ་དང་། བསྐུར་ཐབས་དང་། བསམ་རྒྱུད་དང་། བསྐུར་གནས་དང་། བསྒྲག་ཚིག་དང་། བསྟིམ་གནས་དང་། དབང་དོན་ངོས་བཟུང་བ་དང་བཅུའོ། །དང་པོ་བུམ་དབང་གི་ངོ་བོ་ནི། ཞུས་ལན་སྙིང་གི་མེ་ལོང་ལས། ཕྱི་སྣང་སྲིད་དང་སྣོད་བཅུད། ནང་ཕུང་ཁམས་དང་སྐྱེ་མཆེད་ཐམས་ཅད་ཡེ་གདོད་མ་ནས་ལྷ་རུ་གནས་སོ། །ཞེས་པས་དེ་དོན་ངོ་སྤྲོད་ཅིང་རྟོགས་པར་བྱེད་པའོ། །གཉིས་པ་བུམ་དབང་གི་ངེས་ཚིག་ནི། ཡང་དེ་ཉིད་ལས། ཡེ་ནས་གནས་པ་དེ་ཉིད་ཀྱང་། ལུས་བྱིན་གྱིས་མ་བརླབས་ཏེ། ཡིད་བཞིན་གྱི་ནོར་བུ་ལ་གསོལ་བ་མ་ཐེབ་པ་དེ། ད་ཡིད་བཞིན་གྱི་ནོར་བུ་ལ་གསོལ་བ་ཐེབས་པ་ལྟར་རྟོགས་ཤིང་ལམ་དུ་བྱེད་པའོ། །ཞེས་སོ། །གསུམ་པ་བུམ་དབང་གི་མཚན་ཉིད་ནི། དེ་ཉིད་ལས། བུམ་དབང་ཐོབ་ནས་སྣང་སྲིད་ལྷ་དང་ལྷ་མོར་ཤེས་པས་ས་རྡོ་ཙམ་ལ་ཡང་སྨད་ཅིང་བརྙས་པ་སྤང་། རང་ལུས་རྩ་ཁམས་ལྷའི་རང་བཞིན་ཏུ་ཤེས་པས་ཐ་མལ་དུ་མི་བཟུང་བསྐྱེད་རིམ་བསྟེན་པར་བྱ། ཞེས་སོ། །

བཞི་པ་བུམ་དབང་གི་དབྱེ་བ་ནི། དོན་ཏིག་ལས། བུམ་དབང་དེ་ཉིད་ལ་ཡང་བདག་དང་བུམ་པ་ལྷར་བསྐྱེད་པས་བུམ་དབང་། ཡེ་ཤེས་ཀྱི་བདུད་རྩི་སྤྱི་བོར་བླུགས་པས་གསང་དབང་། བདག་དང་གཉིས་སུ་མེད་པར་འདྲེས་པས་ཤེས་རབ་ཡེ་ཤེས་ཀྱི་དབང་། སྒོམ་མཁན་ངོ་བོ་མ་གྲུབ་པས་རྩལ་དབང་ཡིན་ནོ། །ཞེས་གསུངས་སོ། །ལྔ་པ་བུམ་དབང་གི་བསྐུར་ཐབས་ནི། སྔོན་འགྲོ་དངོས་གཞི་རྗེས་དང་གསུམ་གྱི་རྐྱ་བར་ནས་བཏོན་ཏེ་བསྐུར་བ་འདི་རྣམས་སོ། །དྲུག་པ་བུམ་དབང་གི་ཏིང་ངེ་འཛིན་ནི། དབང་བསྐུར་དུས་ཀྱི་ལྷ་རྣམས་སྐུ་མདོག་ཕྱག་མཚན་རྒྱན་ཆ་ལུགས་ཐམས་ཅད་གསལ་བར་བདག་གིས་བསྐྱེད། སློབ་མ་ལ་ཡང་བསྐྱེད། མདུན་གྱི་བར་སྣང་ལ་ཡང་གང་བར་བསྐྱེད། དབང་རྫས་ཙཀ་ལི་ལ་ཡང་བསྐྱེད་ཅིང་སློབ་བུ་རྣམས་ལ་ཡང་བསྟིམ། སྙིང་པོ་ཡང་ལན་བདུན་བདུན་སོགས་བཟླས་ལ་དེ་ཉིད་རེ་རེ་བསྒོམ་དུ་གཞུག་གོ ། བདུན་པ་བུམ་དབང་གི་བསྒྲག་ཚིག་ནི། དཀྱུས་བཞིན་ཚིགས་བཅད་ལྷུགས་ཡོད་པ་དེའོ། །བརྒྱད་པ་དབང་བསྐུར་གནས་ནི། གནས་ལྔ་སོགས་གཞུང་ནས་བྱུང་བ་བཞིན་ནོ། །དགུ་པ་བསྟིམ་གནས་ནི། ཁྱད་པར་སློབ་བུའི་ལུས་ལ་བསྟིམ་པ་གཙོ་ཆེར་རོ། །བཅུ་པ་དབང་དོན་ངོས་བཟུང་བ་ནི། བླ་མེད་དོན་རྫོགས་འདུས་པའི་དབང་བསྐུར་རབ་བྱེད་ལས། བུམ་པའི་དབང་ནི་གང་དང་གང་། །ལས་ཀྱི་སློབ་དཔོན་དང་པོས་ཏེ། །བྱས་པའི་རྡུལ་ཚོན་དཀྱིལ་འཁོར་བརྟེན། །ཐུན་མོང་རིག་པའི་དབང་ལྔ་བསྐུར། །ལུས་ཀྱི་སྒྲིབ་པ་གསུམ་པོ་དག །བསྐྱེད་རིམ་ལྷ་ཡི་སྐལ་བར་ལྡན། །ཡི་དམ་ཚོགས་ཀྱི་སྒོ་མོ་འབྱེད། །སྣོད་བཅུད་ལྷ་དང་ལྷ་མོར་བལྟ། །ས་མ་ཡ་དམ་ཚིག་ཕྱག་རྒྱ་བརྟེན། །བལྟས་པ་ཙམ་གྱིས་ཆགས་པ་དག །སྐྱེ་བའི་སྡུག་བསྔལ་ཞི་བར་བྱེད། །མ་འདྲེས་དགའ་བ་ལུས་ལ་བསྐྱེད། །སྒོང་ང་ལས་སྐྱེས་སྐྱེ་སྒོ་གཅོད། །འཇིག་པ་ཕུང་པོའི་བདུད་ཀུན་བཅོམ། །སྤྱི་མཆེད་ཁམས་གསུམ་སེམས་ཅན་ཀུན། །སྙིང་རྗེ་ཚད་མེད་ཀུན་ལ་སྐྱེ། །བསྐྱེད་རྫོགས་ཟུང་འཇུག་དབྱེར་མེད་བསྒོམ། །སྐྱེ་ཤིའི་བར་དོ་གཅོད་པར་བྱེད། །རིགས་སྤྱོད་སྤྱོད་པའི་སྤྱོད་པ་སྤྱོད། །ཉམས་ལ་གོང་འཕེལ་སྣང་བ་མཆེད། །མེ་ལོང་ལྟ་བུའི་ཡེ་ཤེས་མཐོང་། །མ་འོངས་དུས་ན་སངས་རྒྱས་ཐོབ། །སྤྲུལ་སྐུ་ཐོབ་པར་ལུང་ཡང་བསྟན། །བྱ་ལས་ཀྲི་ཡའི་ཕྱོགས་སུ་གཏོགས། །ཕྲིན་ལས་རྣམ་བཞིའི་ལས་རྣམས་འགྲུབ། །གདོལ་པའི་རིགས་རྣམས་འདུལ་བའི་ཕྱིར། །ཕྱི་ལྟར་བུམ་པའི་དབང་དུ་བཤད། །ཅེས་གསུངས་པ་དེ་ལ་དོན་ཉི་ཤུ་རྩ་ལྔར་བཤད་དོ། །དེ་ནས་དྲུག་པ་མིའི་གནས་སྤར་ཞིང་ཉམས་ཆག་བསྐང་བའི་བུམ་དབང་ཆེན་མོ་བསྐུར་བའི་དོན་དུ་མཎྜལ་དང་། ཐལ་མོ་སྦྱར་ཏེ་གསོལ་པ་གདབ་པའི་རྗེས་ཟློས། ཀྱེ་མ་བླ་མ་རྡོ་རྗེ་འཛིན༔ བདག་ཅག་རིགས་དྲུག་གནས་སུ་འཁྱམས༔ དམ་ཚིག་ཉམས་ཆག་དཔག་མེད་བསགས༔ མགོན་པོ་ཐུགས་རྗེ་ཅན་ཁྱོད་ཀྱིས༔ ཉམས་ཆག་སྐོངས་ལ་དངོས་གྲུབ་སྩོལ༔ དབང་མཆོག་རྣམ་ཀུན་དེང་འདིར་བསྐུར༔ ཞེས་ལན་གསུམ་གྱི་རྗེས་ལ། རྡོ་རྗེ་སློབ་དཔོན་གྱིས། ཁྱོད་རང་རྣམས་ཀྱིས་དམ་ཚིགས་ཉམས་ཆག་གསོ་བའི་ཕྱིར། མདུན་གྱི་ནམ་མཁར་རྒྱལ་བ་ཞི་ཁྲོའི་ལྷ་ཚོགས་རྣམས་དཔང་དུ་བཙུགས་ཏེ། རྡོ་རྗེ་སེམས་དཔའི་སྒོམ་བཟླས་ཕོག་ལ། ཞེས་པས། ཁྱེད་རང་རྣམས་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་གཡས་རྡོ་རྗེ་དཀར་པོ་རྩེ་ལྔ་པ་ཐུགས་ཀར་འཛིན་ཅིང་། གཡོན་པས་དྲིལ་བུ་དཀུར་བརྟེན་པ། ཞབས་སེམས་དཔའི་སྐྱིལ་ཀྲུང་དུ་བཞུགས་པའི་ཐུགས་ཀར་ཟླ་བའི་སྟེང་དུ་ཧཱུྃ་དཀར་པོའི་མཐར་ཡི་གེ་བརྒྱ་པས་འཁོར་བར་དམིགས་ལ། ༀ་བཛྲ་ས་ཏྭ་ས་མ་ཡཱ༴སོགས་ཚང་བར་གསུམ་མམ་ཅི་རིགས་པར་བཟླས་སུ་བཅུག་གོ ། རྗེས་སུ་བཤགས་པ་བྱ། ཞེས་པ་ནི། བདེ་གཤེགས་སྤྱི་བཤགས་སམ། ཞི་ཁྲོ་བཤགས་ཆུང་གི། ཧོ། བདེ་གཤེགས་ཡོངས་རྫོགས་མན་ཆད་གང་རིགས་བྱའོ། །ཤིན་ཏུ་བསྡུས་པ་ནི། སྐུ་གསུང་ཐུགས་དང་རྩ་བ་ཡན་ལག་གི ། དམ་ཚིག་ཉམས་ཆགས་འགལ་འཁྲུལ་མཐོལ་ཞིང་བཤགས། །རྗེ་བཙུན་བླ་མ་རྣམས་ཀྱི་སྤྱན་ལམ་དུ། །སོགས་ནས་མཆོག་དང་ཐུན་མོང་དངོས་གྲུབ་སྩལ་དུ་གསོལ། ཞེས་བཤགས་པའི་རྗེས་སུ། བུམ་བཤད་ཟིན་བྲིས། དང་པོ་ཐུན་མོང་རིག་པའི་དབང་ལྔ་བསྐུར་བ་ནི། རྒྱུད་ལས། ཞེ་སྡང་མེ་གསོད་ཆུ་ཡི་དབང་༔ ང་རྒྱལ་རི་བསྙིལ་དབུ་རྒྱན་དབང་༔ འདོད་ཆགས་དུག་འཇོམས་རྡོ་རྗེའི་དབང་༔ ཕྲག་དོག་ལྕགས་འགྲོལ་དྲིལ་བུའི་དབང་༔ གཏི་མུག་མུན་སེལ་མིང་གི་དབང་༔ ཆུ་དང་དབུ་རྒྱན་རྡོར་དྲིལ་མིང་༔ བུ་ཁྱོད་ལ་ནི་བསྐུར་བར་བྱ༔ ཞེས་པས། དང་པོ་མི་བསྐྱོད་པ་བུམ་པ་ཆུའི་དབང་ཞེས་པ་འདི་ལ། བུམ་པ་ཟེར་བའི་རྒྱུ་མཚན་ནི། བཏགས་པ་མིང་གི་བུམ་པ། དམིགས་པ་རྟེན་གྱི་བུམ་པ། འདུས་བྱས་རྫས་ཀྱི་བུམ་པ། འདུས་མ་བྱས་དོན་དམ་ཆོས་ཉིད་ཀྱི་བུམ་པ་དང་བཞི་ལས། དང་པོ་མིང་བུམ་པར་གྲགས་པ་འདི་གང་ནས་བྱུང་ན། མི་རྣམས་ཚེ་ལོ་དཔག་ཏུ་མེད་པ་ཐུབ་པའི་དུས་སུ་ཕུན་ཚོགས་དགའ་ལྡན་པད་སྡོང་གི་གནས་སུ། བཅོམ་ལྡན་འདས་དཔལ་རྡོ་རྗེ་སེམས་དཔའི་ཕྱག་ཏུ་ས་བདག་སྟོབས་པོ་ཆེས་ས་རྡོ་བྲག་བཅུད་སོགས་ལས་བྱས་པའི་རིན་པོ་ཆེ་རྣམ་པར་རྒྱལ་བའི་བུམ་པ་འདི་ཕུལ་ལོ། །དེ་བཞིན་ཏུ་བུམ་སྙིང་ལ་མདངས་ལྡན་མཚོ་སྨན་རྒྱལ་མོས་ཆུ་བོ་ཡོན་ཏན་བརྒྱད་དང་ལྡན་པ་ཕུལ་ལོ། །ལྷའི་བུ་མོ་སྤུན་ལྔས་སྨན་སྣ་ལྔ་ཕུལ་ལོ། །འཇིག་རྟེན་དབང་ཕྱུག་གིས་འབྲུ་སྣ་ལྔ་ཕུལ་ལོ། །གནོད་སྦྱིན་གྱི་བུ་མོ་སྤུན་ལྔས་སྙིང་པོ་ལྔ་ཕུལ་ལོ། །དྲི་ཟའི་བུ་མོ་སྤུན་ལྔས་དྲི་རྣམ་པ་ལྔ་ཕུལ་ལོ། །ས་ཡི་ལྷ་མོ་བརྟན་མས་རིན་པོ་ཆེ་སྣ་ལྔ་ཕུལ་ལོ། །ཀླུའི་བུ་མོ་རྣམས་ཀྱིས་མགུལ་ཆིངས་ལྔ་ཕུལ་ལོ། །གཤིན་རྗེའི་བུ་མོ་རྣམས་ཀྱིས་ཁ་རྒྱན་ཕུལ་ལོ། །དམུའི་བུ་མོ་ལྔས་ནི་གཟུང་ཐག་ཕུལ་ལོ། །ལྷ་མིན་གྱི་བུ་མོ་རྣམས་ཀྱིས་རྡོ་རྗེ་ཕུལ་ནས་རྒྱན་ཆ་ལུགས་དང་ལྡན་པར་བྱས་པ་དེ། དཔལ་རྡོ་རྗེ་སེམས་དཔས་སེམས་ཅན་ལ་ཕན་ཐོགས་རྒྱ་ཆེན་པོ་འབྱུང་བའི་སྨོན་ལམ་དང་བཅས་པས་དབང་བསྐུར་བའི་རྫས་སུ་བཞག་པའོ། །དེ་ལ་སྒྲུབ་བུམ་དང་གཙོ་བུམ་དབང་བུམ་རྣམ་རྒྱལ་བུམ་པ་སོགས་བཏགས་པ་མིང་གི་བུམ་པ་ཡང་ཡིན་ནོ། །གཉིས་པ་དམིགས་པ་རྟེན་གྱི་བུམ་པ་ནི། བུམ་པ་དེ་ཡང་ཕྱི་གཞལ་ཡས་ཁང་གི་རྣམ་པ་ལ། ནང་ཡི་དམ་རྒྱལ་བ་ཞི་ཁྲོ་རབ་འབྱམས་རྣམས་གསལ་གདབ་པའི་དམིགས་རྟེན་དུ་བྱ་བ་འདིའོ། །གསུམ་པ་འདུས་བྱས་རྫས་ཀྱི་བུམ་པ་ནི། རྣམ་རྒྱལ་གྱི་བུམ་པ་རྒྱུ་གསེར་དངུལ་ཟངས་སོགས་ལས་གྲུབ་པ་མཚན་ཉིད་དང་ལྡན་པར་རྫས་བཅུད་བླུགས་འབྱུང་བ་ཐམས་ཅད་མིང་གཟུགས་མཚན་མ་ཅན་དུ་འདུས་པའོ། །བཞི་པ་འདུས་མ་བྱས་ཆོས་ཉིད་ཀྱི་བུམ་པ་ནི། བུམ་ནི་སྐྱེ་བ་མེད་ལ། པ་ནི་འགགས་པ་མེད་པ་སྟེ། སྐྱེ་འགགས་གཉིས་སུ་མེད་པའི་དོན་དེ་རྟོགས་པའི་བརྡའ་མཚོན་ནོ། །དེ་ནས་ཆུའི་དབང་ཞེས་པ་ནི། བུམ་པ་འདིའི་ནང་དུ་ཆུ་བོ་ཡོན་ཏན་བརྒྱད་དང་ལྡན་པས་བཀང་པ་འདིའོ། །དེ་ཡང་གཙང་བ་དང་། དྭངས་པ་དང་། བསིལ་བ་དང་། བསུང་པ་དང་། ཞིམ་པ་དང་། ངོམས་པ་དང་། འཇམ་པ་དང་། བདེ་བའོ། །གཙང་བ་ནི། དྲི་མ་དང་ལྷན་ཅིག་མི་གནས་པའོ། །དྭངས་པ་ནི་རྙོགས་པ་མེད་པའོ། །བསིལ་བ་ནི་ངད་དང་ལྡན་པའོ། །བསུང་བ་ནི་ངར་དང་ལྡན་པའོ། །ཞིམ་པ་ནི་རོ་མཆོག་ཏུ་གྱུར་པའོ། །ངོམས་པ་ནི་གདུང་བ་སེལ་བའོ། །འཇམ་པ་ནི་ཟུག་རྔུ་མེད་པའོ། །བདེ་བ་ནི་ལུས་ལ་ཕན་པའོ། །ཞེས་སོགས་ཀྱི་བུམ་རྫས་རེ་རེ་ལྟར་བཤད་པ་ཡོད་ཀྱང་མི་བསྐྱོད་པ་བུམ་ཆུའི་དབང་གསུངས་པ་བཞིན་ནོ། དབང་གཞུང་རིག་པའི་དབང་ལྔ་རྫོགས་ནས་བུམ་ཆུ་ཐམས་ཅད་གཙོ་བུམ་དུ་བསྡུ་དུས་ཚིག་བཅད་མགོར་སྦྱར་ནས། དེའི་ཚེ་ནམ་མཁར་རྩ་བ་གསུམ་གྱི་ལྷ་ཚོགས་རྣམས་ཀྱིས་དབང་བསྐུར་བའི་དགོངས་པས་བྱིན་གྱིས་བརླབས། རིག་མ་རྣམས་ཀྱིས་རྡོ་རྗེའི་གླུ་ལེན་ཞིང་བཀྲ་ཤིས་བརྗོད། དཔའ་བོ་མཁའ་འགྲོ་རྣམས་ཀྱིས་རོལ་མོ་དང་མཆོད་པའི་མེ་ཏོག་གི་ཆར་ཕབ། ཁྲོ་བོ་དང་ཁྲོ་མོ་རྣམས་ཕྱོགས་དང་ཕྱོགས་མཚམས་སུ་འཁོད་ནས་བགེགས་བསྐྲད་པར་ཡང་སྒོོམས་ཤིག་བྱས་ལ། ཧཱུྃཿ རིན་ཆེན་བུམ་པ་གཞལ་ཡས་ཁང་༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ རིགས་ཀྱི་བུ་ལ་དབང་བསྐུར་བས༔ ལྷ་དབང་ལུས་ལ་ཐོབ་པར་ཤོག༔ ཧཱུྃ་བཛྲ་ཨ་བྷི་ཥིཉྩ་ཧཱུྃ༔ ༀ་བུདྡྷ་ཨ་བྷི་ཥིཉྩ་ༀ༔ སྭཱ་རཏྣ་ཨ་བྷི་ཥིཉྩ་སྭཱ༔ ཨཱཾ་པདྨ་ཨ་བྷི་ཥིཉྩ་ཨཱཾ༔ ཧཱ་ཀརྨ་ཨ་བྷི་ཥིཉྩ་ཧཱ༔ ཞེས་གནས་ལྔར་བསྐུར་ནས་བུམ་ཆུ་ཡང་ངག་ཏུ་བླུད་དོ། །དེ་ནས་ཐུགས་ཕྱག་མཚན་གྱི་དབང་མན་ཆད་གཞུང་ལྟར་བསྐུར་རོ། །དེ་ནས་དབང་གོང་མ་གསུམ་བསྐུར་ན་དཀྱུས་བཞིན་དང་། བཏགས་གྲོལ་གྱི་དབང་དང་། གཏོར་དབང་། རྗེས་མཐའ་བརྟེན་དང་བཅས་ལ་ལྷན་ཐབས་གཞན་མི་དགོས་སོ། །

དེ་ལྟར་འགྲོ་དྲུག་རང་གྲོལ་ཁ་འཕངས་ལྷན་ཐབས་བཅས། །འཕྲད་ཚད་རང་གྲོལ་སྔོན་འགྲོ་རིན་ཆེན་གསལ་སྒྲོན་སོགས། །རྣམ་དཔྱོད་ཟབ་མོས་གཞན་ནས་ཁ་བསྐངས་ནོར་འཁྲུལ་མེད། །སྔོན་ནམ་མཁའ་རྒྱ་མཚོས་མཛད་པ་ནི། གཞུང་འབྲེལ་མ་ཕུད་པ་དང་སྤྲད་རྒྱུ་མང་། གནད་འགའ་རེ་མ་ཚང་མི་ལྕོགས་པས། བརྗེད་དོགས་དང་སླ་ཕྱིར་འདི་བྱས་སོ། །གསང་སྔགས་ལག་ལེན་མཐའ་ཅན་ཡིན་པས་ན། །མཐའ་དྲུག་ལྡན་པའི་ཆོས་འབྱུང་བདག་གིས་ནི། །ལོག་པའི་ཆོ་ག་འགའ་ཡིས་ཡིད་མི་ཆེས། །བླུན་པོ་འགའ་ནི་གླང་ལྟར་འགྱིངས་བར་ཟད། །ཤུབྷཾ།། །།