བརྒྱུད་པའི་ལོ་རྒྱུས་མདོར་བསྡུས་པ་ནོར་བུའི་ཕྲེང་བ།

ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ བརྒྱུད་པའི་ལོ་རྒྱུས་མདོར་བསྡུས་པ་ནོར་བུའི་ཕྲེང་བ་ཞེས་བྱ་བ་བཞུགས་སོ། །

ཞི་ཁྲོ་སྐུ་གསུམ ་ལྷ་ལ་ཕྱག་འཚལ་ལོ། །ཟབ་ཆོས་ཞི་ཁྲོ་དགོངས་པ་རང་གྲོལ་ལས། བར་དོ་ཐོས་གྲོལ་གྱི་ཆོས་སྐོར་འདི་ལ་བརྒྱུད་པ་ནི། དད་ལྡན་སྐྱེས་བུ་རྣམས་ཡིད་ཆེས་པར་བྱ་བའི་ཕྱིར། ཆུ་མགོ་གངས་ལ་ཐུག་པ་ལྟར། །ཀུན་བཟང་ང་ཡི་བར་དུ་བཤད། །ཅེས་གསུངས་པས། རྒྱལ་བ་དགོངས་པའི་བརྒྱུད་པ་དང་། རིག་འཛིན་བརྡ་ཡི་བརྒྱུད་པ་དང་། གང་ཟག་སྙན་ཁུང་གི་ བརྒྱུད་པ་དང་གསུམ ་མོ། བརྒྱུད་པའི་དགོས་པ་ནི། ཡིད་ཆེས་ཤིང་ཁུངས་བཙུན་པར་བྱེད་པ་ཡིན་ཏེ། ཉི་ཟླ་ཁ་སྦྱོར་ལས། ཐོག་མར་ལོ་རྒྱུས་དོན་གྱིས་བཤད། །ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འ གྱུར། ཞེས་གསུངས་པས། དང་པོ་རྒྱལ་བ་དགོངས་པའི་ བརྒྱུད་པ་ལ་གསུམ ་སྟེ། ཆོས་སྐུ་ཀུན་བཟང་ཡབ་ཡུམ། དྲུག་པ་རྡོ་རྗེ་འཆང་ཆེན། སྟོན་པ་རྡོ་རྗེ་སེམས་དཔའ་དང་གསུམ་ཡིན་ཏེ། ཆོས་སྐུ་ཀུན་བཟང་ཡབ་ཡུམ་ནི། དབྱིངས་རང་བཞིན་རྣམ་པར་དག་པ། འོག་མིན་ཆོས་ཀྱི་དབྱིངས་ཀྱི་ཕོ་བྲང་དུ། འདུས་མ་བྱས་པ་ཡེ་ནས་ལྷུན་གྲུབ། སྣང་སྟོང་ཐབས་དང་ཤེས་རབ་མཉམ་པར་བཞུགས་པའི། བཅོམ་ལྡན་འདས་དཔལ་ཀུན་བཟང་ཡབ་ཡུམ་ཡིན་ཏེ། དེའང་ཆོས་སྐུ་དྲི་བྲལ་ཅིའི་ངོ་བོར་ཡང་མ་གྲུབ་པ་ལ། གདུལ་བྱའི་སྣང་ངོར་ཐུགས་རྗེ་ཞལ་ཕྱག་གི་རྣམ་པར། སྐུ་མཚན་དང་དཔེ་བྱད་དུ་འབར་བར་བཞེངས་ཏེ། སྤྲོས་པའི་མཚན་མ་ཐམས་ཅད་དང་བྲལ་བའི་ངང་ལས། །གནས་འོག་མིན་ཆོས་ཀྱི་དབྱིངས་ཀྱི་ཡེ་ཤེས། འོད་ལྔ་འཁྲུགས་པའི་ཕོ་བྲང་དུ་བཞུགས་སོ། །བཅོམ་ལྡན་འདས་དཔལ་ཀུན་ཏུ་བཟང་པོས་དགོངས་པ་ཡོངས་སུ་རྫོགས་པ་དྲུག་པ་རྡོ་རྗེ་འཆང་ཆེན་པོ་ལ་གཏད་ནས། སྤྱི་བླུགས་ཆེན་པོར་བྱིན་གྱིས་བརླབས། དེ་ལྟར་བྱིན་གྱིས་བརླབས་ནས། གདུལ་བྱ་རྣམས་ལ་ཐུགས་རྗེ་རང་བབས་སུ་བྱོན་ཞིང་། གདུལ་བྱའི་སྣང་ཡུལ་དུ་སྐུ་མཚན་དང་དཔེ་བྱད་དཔག་ཏུ་མེད་པར་བསྟན་ཏེ། མཛད་པའི་རྣམ་པར་སྤྲུལ་པ་མང་པོ་ལས་བསྡུས་ཏེ་སྨོས་པ་ནི། ཐུགས་རྗེ་ཆེ་ལ་ཐབས་མཁས་ཀྱི་མངའ་བདག་བཅོམ་ལྡན་འདས་དྲུག་པ་རྡོ་རྗེ་འཆང་ཆེན་པོ་ཉིད་དོ། །བཅོམ་ལྡན་འདས་དྲུག་པ་རྡོ་རྗེ་འཆང་ཆེན་པོ་ཉིད་ཀྱི་དགོངས་པ་སྟོན་པ་རྡོ་རྗེ་སེམས་དཔའ་ཉིད་ལ་གཏད་ཅིང་བྱིན་གྱིས་བརླབས་སོ། །སྟོན་པ་བཅོམ་ལྡན་འདས་རྡོ་རྗེ་སེམས་དཔའ་དེ་ཉིད་སྤྲོས་བྲལ་ཆེན་པོའི་ཀློང་ལས། ཐུགས་རང་བྱུང་གི་ཡེ་ཤེས་རྣམ་པར་གཡོས་པས་ལོངས་སྤྱོད་རྫོགས་པའི་སྐུ་རང་བྱུང་དུ་བྱོན་ཞིང་། ཡེ་ཤེས་ཆེན་པོའི་འོད་ཟེར་གྱི་འཕྲོ་འདུས་མཛད་པ་སུམ་ཅུ་སོ་དྲུག་གི་སྐུ་རང་བྱུང་དུ་གནས་འོད་ཀྱི་ཐིག་ལེ་ལས། གནས་ཕུན་སུམ་ཚོགས་པ་དྲུག་ཅུ་ཐམ་པར་གནས་པར་༼སྣང་བར་༽བྱས། སངས་རྒྱས་ཀྱི་སྐུ་དཔག་ཏུ་མེད་པ། སྤྱན་གྱི་དཀྱིལ་འཁོར་ལ་མངོན་པར་སྣང་ནས། དེ་དག་ཀྱང་ཉིད་ཀྱི་འོད་ཟེར་རིགས་ལྔའི་སངས་རྒྱས་སུ་འདུས་ཤིང་རིགས་ལས་མངོན་དུ་ཕྱུང་ངོ་། །དེའི་ཚེ་ཉིད་ཀྱི་ལྗགས་འོད་ཀྱི་སྣང་བ་ལས། རང་བྱུང་གི་ཡི་གེའི་སྒྲ་རང་བྱུང་དུ་བབ་སྟེ། སེམས་ཅན་ཐམས་ཅད་བླ་ན་མེད་པའི་བྱང་ཆུབ་ལ་འགོད་དོ། །ཞེས་ལན་གསུམ་དུ་བྱུང་བས་ཉིད་ཀྱི་ཐུགས་རང་བྱུང་གི་ཡེ་ཤེས་ལས། ཆོས་ཉིད་ཀུན་ཏུ་བཟང་མོ་རང་བྱུང་ནས། རང་བྱུང་འཛད་མེད་ཀྱི་ཐུགས་རྗེ་ཕྱོགས་བཅུར་འཕྲོས་སོ། །དེའི་ངང་ལས་བཅོམ་ལྡན་འདས་དཔལ་རྡོ་རྗེ་སེམས་དཔའི་སྐུ། འཁོར་གྲངས་མེད་པ་ཉིད་ཀྱི་ལོངས་སྤྱོད་དུ་འདུས་པ་དང་། རྫོགས་པ་ཆེན་པོའི་སྐུ་འོད་དུ་འབར་བ་དེ་བཞིན་དུ། རིགས་ལྔའི་སངས་རྒྱས་ལ་སོགས་གྲངས་མེད་པ་སོ་སོའི་དཀྱིལ་འཁོར་དང་བཅས་པ། ཉིད་ཀྱི་ལོངས་སྤྱོད་དུ་འདུས་པ་དང་། རྫོགས་པ་ཆེན་པོའི་སྐུ་འོད་དུ་འབར་བ་ལན་བཅུ་གཉིས་སུ་བྱུང་བས། ཆོས་ཐམས་ཅད་ལ་ལོངས་སྤྱོད་ཅིང་རྫོགས་པས་འདི་ཉིད་ཀྱི་ཚེ་ཆོས་ཐམས་ཅད་ཀྱི་རང་བཞིན་དམིགས་བསྡུས་དང་བྲལ་བ་ཉིད་དོ། །དེ་ནས་ཐུགས་རྗེའི་ཡུལ་དུ་མ་ལ་དགོངས་པ་རང་ཤར་དུ་བྱུང་ངོ་། །དེ་ཚེ་འོད་ཀྱི་བཀོད་པ་ལེགས་པའི་གནས་ཁང་བུ་བརྩེགས་པ་ན། སྟོན་པ་ཤེས་རིག་གི་རྒྱལ་པོ་རྡོ་རྗེ་སེམས་དཔའ་ཞེས་བྱ་བ། དཀྱིལ་འཁོར་གྱི་མངའ་བདག་ཏུ་བྱུང་སྟེ། སྐུ་གསུང་ཐུགས་རང་བྱུང་གི་སྟོན་པའི་ངང་ནས། མི་གཡོ་ཆེན་པོ་ཉིད་དུ་བྱུང་ངོ་། །དེ་ཡང་འཕོ་འགྱུར་མ་ཡིན་ཞིང་། བདེ་བའི་ཞིང་ཁམས་ཐམས་ཅད་ཀྱང་མངོན་པར་དགའ་བ་ནས། སངས་རྒྱས་བརྗོད་ཀྱིས་མི་ལངས་པ་དག་ཏུ་རང་བྱུང་ཡེ་ཤེས་རང་གསལ་གྱི་ངང་ལ་རང་བཞུགས་སོ། །བཅོམ་ལྡན་འདས་སྟོན་པ་རྡོ་རྗེ་སེམས་དཔའ་ཉིད་ཀྱི་དགོངས་པས། རིག་འཛིན་ཆེན་པོ་དགའ་རབ་རྡོ་རྗེ་ལ་བྱིན་གྱིས་བརླབས་སོ། །དེ་ཡན་ཆད་རྒྱལ་བ་དགོངས་པའི་བརྒྱུད་པ་ཞེས་བྱའོ། །དེ་ནས་རིག་འཛིན་རིག་པའི་བརྒྱུད་པ་གཏན་ལ་དབབ་པར་བྱ་སྟེ། སྟོན་པ་རྡོ་རྗེ་སེམས་དཔའི་བྱིན་རླབས་ལས། སངས་རྒྱས་མྱ་ངན་ལས་འདས་ནས་ལོ་སུམ་བརྒྱ་དང་དྲུག་ཅུ་ཐམ་པ་ན། རྡོ་རྗེ་གདན་གྱི་ནུབ་ཕྱོགས་དྷ་ན་ཀོ་ཥའི་གླིང་། དཔལ་བདེ་བྱེད་བརྩེགས་པའི་གཙུག་ལག་ཁང་བཀོད་པ་ཕུན་སུམ་ཚོགས་པ་དང་ལྡན་པར་ཡབ་རྒྱལ་པོ་ཨུ་པ་ར་ཛ་དང་། ཡུམ་བཙུན་མོ་སྣང་བ་གསལ་བའི་འོད་ཅེས་བྱ་བ་གཉིས་ལ། སྲས་མོ་སུ་དྷརྨ་ཞེས་བྱ་བ་ཡོད་པ་རབ་ཏུ་བྱུང་ནས། དགེ་སློང་མ་མཛད་པ་ཞིག་ནུབ་ཕྱོགས་རྒྱ་མཚོའི་གླིང་བར་ཞིག་ཏུ། འཇག་སྐྱིལ་༼སྤྱིལ་༽ཕུབ་ནས་གཡོག་མོ་དྷཱཀྐི་བདེ་མའི་སྙིང་ལྡན་མ་བྱ་བ་ཞིག་དང་ལྷན་ཅིག་ཏུ་ཆོས་ལ་གནས་པའི་ཚེ། ནུབ་གཅིག་གི་རྨི་ལམ་ལ། མི་དཀར་པོས་ཤེལ་གྱི་བུམ་པ་ལ་རིགས་ལྔའི་ས་བོན་གྱིས་སྤྲས་པ་ཞིག་སྤྱི་བོར་བཞག་པ་རྨིས། དེ་ལ་བརྟེན་ནས་ལྷ་ལྕམ་ལུས་མ་བདེ། དུས་ལ་བབས་ནས་ཕ་མེད་པའི་བུ་ཞིག་རྩིབས་ལོགས་གཡས་པའི་གོ་བར་ནས་འཁྲུངས་པ་དང་། དགེ་སློང་མས་ཕ་མེད་པའི་བུ་འདི་འདྲ་བ་ཞིག་སྐྱེས་ཞེས་སྨྲེེ་སྔགས་ཀྱི་ཚིག་མང་པོ་བརྗོད་པས། གཡོག་མོས། ཀྱེ་འདི་ནི་སངས་རྒྱས་ཀྱི་སྲས་དམ་པ་ཞིག་ཡིན་ནོ་བྱས་ཀྱང་མ་ཉན་ནས་ཐལ་དོང་དུ་འདོར་དུ་བཅུག འོད་དང་སྒྲ་དང་འཇའ་ལ་སོགས་པ་སངས་རྒྱས་འཇིག་རྟེན་དུ་བྱོན་པའི་ལྟས་མང་པོ་བྱུང་བས། དེ་ནས་དགེ་སློང་མའི་ཞལ་ནས། ངའི་བུ་དེ་སངས་རྒྱས་ཀྱི་རྣམ་འཕྲུལ་ཞིག་ཡིན་ན་ད་དུང་མ་གྲོངས་བར་ཡོད་དམ། ལྟོས་དང་གསུངས་པས། ཞག་གསུམ་ལོན་པའི་ནང་བར་བལྟས་པས། སྐུ་སྟོད་ཐལ་བའི་གསེབ་ནས་དྲང་སང་ངེ་ཞལ་འཛུམ་མུལ་ལེ་བཞུགས་པས། དར་དཀར་གྱིས་ལྕིབས་ནས་བླངས་ཏེ། སྤོས་ཆུས་ཁྲུས་བྱས་པ་དང་། བར་སྣང་ནས་ལྷ་རྣམས་ཀྱིས་ཁྲུས་གསོལ་བ་དང་། ཤིས་པ་བརྗོད་པ་ལ་སོགས་པ་ངོ་མཚར་བའི་ལྟས་མང་པོ་བྱུང་། དེ་ནས་གཅེས་སྤྲས་ཀྱིས་བསྐྱངས་པས། ཡུལ་མི་རྣམས་ཀྱིས་ཐལ་བའི་དཀྱིལ་དུ་སྦས་ཀྱང་བུ་ཆུང་འདི་མ་ཤི་བས། མཚན་ཡང་རོ་ལངས་ཐལ་མདོག་ཏུ་བཏགས། དེ་ནས་ལོ་བདུན་ལོན་ནས་བུ་ཆུང་གིས་ང་རྒྱ་གར་གྱི་པཎྜི་ཏ་རྣམས་ཀྱི་རྩར་སྐྱོལ་དང་། ཚིག་མི་བདེ་བའི་དྲི་བ་བྱེད་རྒྱུ་ཡོད་གསུངས། མི་རྣམས་ཀྱིས་ཁྱོད་ལོ་བདུན་ལས་མ་ལོན་སོ་གཅིག་ཀྱང་མ་བརྗེས་བྱས་པས། ང་ལ་ཆོས་གཏམ་བྱེད་རྒྱུ་ཡོད་གསུངས། དེ་ནས་མྱེས་པོ་ཨུ་པ་རཱ་ཛ་དང་། པཎྜི་ཏ་ལྔ་བརྒྱ་དང་མཇལ། རོ་ལངས་ཐལ་མདོག་གིས་ཕར་དྲིས་པས། པཎྜི་ཏ་ཐམས་ཅད་ཀྱིས་ལན་མ་ཐེབས། ཚུར་དྲིས་པ་ཐམས་ཅད་ལ་ལན་ཐོགས་པ་མེད་པ་བྱུང་། དེ་ནས་པཎྜི་ཏ་ཐམས་ཅད་ཀྱིས་དད་པ་བྱས། ཞབས་སྤྱི་བོར་བླངས། རྒྱལ་པོས་བུ་ཚ་དགའ་རབ་ཅིག་ཏུ་འདུག་གསུངས་པས་དགའ་རབ་རྡོ་རྗེ་བཏགས། པཎྜི་ཏ་ཐམས་ཅད་ཀྱིས་པྲ་ཛྙཱ་བྷ་ཝ་ཞེས་བྱ་བ་བཏགས། དེ་ནས་བྱང་ཕྱོགས་རི་བོ་ཉི་མ་རབ་ཏུ་སྣང་བྱེད་ཅེས་བྱ་བ། མི་མ་ཡིན་མང་དུ་ཚོགས་པའི་གནས་སུ་ལོ་སུམ་ཅུ་སོ་གཉིས་ལ་ཏིང་ངེ་འཛིན་ལ་བཞུགས་པས། ས་གཡོ་བ་དང་། སྒྲ་དང་། འོད་དང་མེ་ཏོག་གི་ཆར་ཕབ་ཅིང་། ཁྱད་པར་དུ་མུ་སྟེགས་ཀྱི་བསྟན་པ་རྣམས་ཉམས་པར་བྱས་སོ། །མུ་སྟེགས་ཀྱི་རྒྱལ་པོ་ཞིག་གིས་ན་རེ། འདི་ནི་ནང་པ་སངས་རྒྱས་ཀྱི་བསྟན་པ་འཕེལ་ཞིང་རྒྱས་པ། ཕྱི་པ་མུ་སྟེགས་པའི་བསྟན་པ་ཉམས་པར་བྱེད་པ་ཡིན་པས་འདི་སོད་ཅིག་ཅེས་བསྒོས་ཏེ། གསོད་པའི་ཐབས་ཅི་བྱས་ཀྱང་ཐབས་མ་རྙེད། སློབ་དཔོན་དགའ་རབ་རྡོ་རྗེ་ནམ་མཁའི་དབྱིངས་སུ་གཤེགས་པས། མུ་སྟེགས་ཀྱི་རྒྱལ་པོ་འཁོར་དང་བཅས་པ་ངོ་མཚར་སྐྱེས་ཤིང་ཕྱག་བྱས་ནས་ནང་པའི་བསྟན་པ་ལ་ཞུགས་སོ། །

དེ་ནས་དགའ་རབ་རྡོ་རྗེས་སྔར་སངས་རྒྱས་ཀྱིས་གསུངས་པའི་ཆོས་སྡེ་སྣོད་མ་ལུས་པ་དང་། ཁྱད་པར་དུ་རང་བྱུང་རྫོགས་པ་ཆེན་པོ་ཤོ་ལོ་ཀ་འབུམ་ཕྲག་དྲུག་ཅུ་རྩ་བཞི་ཐུགས་ལ་མངའ་བ་རྣམས། རི་མ་ལ་ཡ་རིན་པོ་ཆེ་སྤུངས་པ་བསྟན་པ་རྒྱས་བྱེད་ཀྱི་རྩེ་མོར་མཁའ་འགྲོ་བདེ་བའི་རོ་ལྡན་མ་དང་། བདེ་བྱེད་ཡོན་ཏན་མཐའ་ཡས་མ་དང་། སློབ་དཔོན་དགའ་རབ་རྡོ་རྗེ་དང་གསུམ་གྱིས། ལོ་གསུམ་བར་དུ་ཡི་གེ་དཀར་ཆག་ལ་བཏབ་ནས། དྷཱཀྐི་མངོན་བྱུང་གི་ཕུག་པར་རྒྱས་བཏབ་ཅིང་མཁའ་འགྲོ་མ་ལ་གཉེར་དུ་གཏད་དེ་བཞུགས་སུ་བཅོལ། སློབ་དཔོན་ཆེན་པོ་རྡོ་རྗེ་གདན་གྱི་བྱང་ཤར་མཚམས། དཔག་ཚད་ལྔ་འདས་པ་ན། དུར་ཁྲོད་ཆེན་པོ་བསིལ་བའི་ཚལ་ཞེས་བྱ་བར་དགོངས་པ་ལ་བཞུགས་ནས། མཁའ་འགྲོ་མ་རྣམས་ལ་ཆོས་བསྟན་ཏོ། །དེའི་ཚེ་དེའི་དུས་ན་རྒྱ་ནག་ཤིང་རྩའི་གླིང་ན། ཁྱིམ་བདག་དགེ་བའི་བློ་ཅན་ཞེས་བྱ་བ་དང་། ཡུམ་སྣང་གསལ་མ་ཞེས་བྱ་བའི་བུ། ཤྲཱྀ་སིང་ཧ་ཞེས་བྱ་བ་སྦྱངས་པའི་ཡོན་ཏན་དང་ལྡན་པ་ཞིག་ཡོད་པ་དེ། དུས་རེ་ཞིག་གྲོང་ཁྱེར་གསེར་གླིང་ཞེས་བྱ་བར་འགྲོ་སྙམ་ནས། ཁ་ནུབ་ལ་གཏད་དེ། རྔ་མོང་ནག་པོ་སྟོབས་ལྡན་ལ་ཞོན་ནས། མཐའ་ཁོབ་ཀྱི་དཀྱིལ་དུ་སླེབས་པའི་ཚེ། འཕགས་པ་སྤྱན་རས་གཟིགས་དབང་ཕྱུག་སྟེང་གི་ནམ་མཁའ་ལ་དངོས་སུ་བྱོན་ནས། ཀྱེ་སྐལ་ལྡན་རིགས་ཀྱི་བུ། འབྲས་བུ་ངེས་པའི་སྙིང་པོ་འདོད་ན། དུར་ཁྲོད་ཆེན་པོ་བསིལ་བའི་ཚལ་དུ་སོང་ཞིག་ཅེས་ལུང་བསྟན་པས་བསླབ་སྦྱང་དང་། རྐང་མགྱོགས་དང་རྫུའཕྲུལ་གྱི་ཤུགས་ཀྱིས་དུར་ཁྲོད་ཆེན་པོ་བསིལ་བའི་ཚལ་དུ་སློབ་དཔོན་ཆེན་པོ་དགའ་རབ་རྡོ་རྗེ་དང་མཇལ། ཡང་དག་པའི་གདམས་པ་ཞིག་བསྟན་དུ་གསོལ། ཞེས་ཞུས་པས། ལས་དང་སྐལ་བར་ལྡན་པར་གཟིགས་ནས། མན་ངག་རིན་པོ་ཆེ་སྙིང་པོའི་གདམས་པ་ཐམས་ཅད་གནང་ཞིང་། ཁྱད་པར་དུ་རྫོགས་པ་ཆེན་པོའི་རྒྱུད་སྡེ་འབུམ་ཕྲག་དྲུག་ཅུ་རྩ་བཞིའི་དོན་མ་ལུས་པ་ལོ་ཉེར་ལྔའི་བར་དུ་ཞུན་འཐར་བཅད་ནས། ཉམས་སུ་བླངས་པས་རྟོགས་པའི་གདེངས་དང་ལྡན་པར་གྱུར་ཏེ། སློབ་དཔོན་ཆེན་པོ་ཤྲཱྀ་སིང་ཧ་ཉིད། དུར་ཁྲོད་སོ་སའི་གླིང་ལ་དགོངས་པ་ལ་བཞུགས་སོ། །དེའི་དུས་ན་ཨོ་རྒྱན་གྱི་མཁན་པོ་པདྨ་འབྱུང་གནས་ལ། གསང་སྔགས་བསྒྲུབ་སྡེ་མཐའ་དག་གི་སྨིན་གྲོལ་དང་བཅས་པ། ཁྱད་པར་དུ་རང་བཞིན་རྫོགས་པ་ཆེན་པོའི་ཆོས་སྡེ་མཐའ་དག་གི་སྙིང་པོ་ཡང་ཞུན་བཅུད་དུ་དྲིལ་བའི་ཨ་ཏི་བླ་མེད། ཡང་དག་གསེར་མཛོད། སྙིང་ཐིག་གསལ་བ། ཉམས་ལེན་གྱི་སྐོར་རྣམས། བུམ་པ་མཚན་ལྡན་དུ་བྱོས་ཏེ། གང་ཞིང་མ་ཟག་པའི་ཚུལ་དུ་གནས་དུར་ཁྲོད་ཆེན་པོ་སོ་ས་གླིང་གི་དབུས་ན། རང་བྱུང་གི་མཆོད་རྟེན་རྒྱ་ཆེ་བ། སྲིད་དུ་རིང་བ། འཁོར་ལོ་གདུགས་དང་བཅས་པ་རྒྱུ་རིན་པོ་ཆེ་གསེར་དངུལ་ལ་བྱས་པ། འོད་ཟེར་དཔག་ཏུ་མེད་པ་འཕྲོ་བའི་དྲུང་དུ། སློབ་དཔོན་ཆེན་པོ་ཤྲཱྀ་སིང་ཧ་ཞེས་བྱ་བ་ཐབས་མཁས་ཐུགས་རྗེ་དང་ལྡན་པའི་མདུན་དུ་གྲོགས་ཀྱི་དམ་པ་པཎྜི་ཏ་དྲི་མེད་བཤེས་གཉེན་བྱ་བ་དང་རྒྱལ་བ་ཡེ་ཤེས་མདོ་ཞེས་བྱ་བ་སྦྱངས་པའི་ཡོན་ཏན་དང་ལྡན་པ་དང་། ཨོ་རྒྱན་གྱི་སློབ་དཔོན་པདྨ་སྟེ་མཆེད་གྲོགས་ གསུམ་ལ་གནད་ཐོག་ཏུ་གནད་དབབ་ནས་བྱིན་གྱིས་བརླབས་པའོ། །

དེ་ལྟར་རིག་འཛིན་བརྡ་བརྒྱུད ་ཀྱི་ལོ་རྒྱུས་གཏན་ལ་ཕབ་ནས། གང་ཟག་སྙན་བརྒྱུད་ཀྱི་ལོ་རྒྱུས་ཀྱང་། བདག་ཉིད་ཆེན་པོ་ཨོ་རྒྱན་པདྨ་ནས་བརྒྱུད་པ་རྣམས་ཀྱི་མཚན་དོན་ནི་ཤུགས་ཀྱིས་ཤེས་པར་བྱ་ཞིང་། སྙིགས་མའི་དུས་སུ་དྭགས་ཀོང་དང་། བྱང་ཕྱོགས་ཀྱི་སེམས་ཅན་རྣམས་ལ་ཕན་བདེ་སྟེར་བའི་སླད་དུ་ལས་ཀྱི་དཔའ་བོ་ཀརྨའི་མིང་ཅན་ཅིག་གིས་འགྲོ་དོན་རླབས་ཆེན་སྤྱོད་པར་གྱུར་ཅིག ཅེས་སྨོན་ལམ་བཏབ་ནས་བྱིན་གྱིས་བརླབས་སོ། །གང་ཟག་སྙན་ཁུང་གི་བརྒྱུད་པ་ལ། གཏེར་སྟོན་ཀརྨ་གླིང་པའི་སྐུ་འཁྲུངས་ཡུལ་ནི། དྭགས་པོའི་སྟོད་ཁྱེར་གྲུབ་ཆེན་ཉི་ཟླ་སངས་རྒྱས་ཀྱི་སྲས་པོ་ཀུན་གྱི་ཆེ་ཤོས། ལུང་བསྟན་དང་རྟེན་འབྲེལ་འཛོམས་ནས། དྭགས་ལ་སྒམ་པོ་གདར་གྱི་རི་ལྷ་བྲན་གར་བྱེད་པ་འདྲ་བ་ནས། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྐོར་རྣམས། གཏེར་ནས་གསང་སྟེ་གདན་དྲངས། གཞན་ཡང་པདྨ་ཞི་ཁྲོ་ལ་སོགས་ཀྱང་གཏེར་ནས་བཏོན། གཏེར་ལུང་གི་ཇོ་མོའི་ལུང་བསྟན་རྟེན་འབྲེལ་འཆུག་པས་ཁ་སྨྲས་ཀྱང་བྱུང་། འོན་ཀྱང་སྲས་གཅིག་ནི་ཡོད། དགོངས་པ་རང་གྲོལ་སྤེལ་བའི་དུས་ལ་མ་སླེབས་པ་ལ་ཤོག་སེར་གཅིག་གཞན་ལ་བསྟན་པས། སྐུ་ཚེ་ལ་བར་ཆད་བྱུང་ཞེས་པ་ཡང་གྲགས། ཡོན་ཏན་དཔག་ཏུ་མེད་པ་ཐུགས་ལ་མངའ་ཞིང་། འཕྲིན་ལས་གང་ལའང་ཐོགས་པ་མེད་པའི་མངའ་བདག་ཆེན་པོ་དེ་ཉིད་སྐུ་གཤེགས་པར་རིག་ནས། སང་གནང་ད་ཙམ་ལ་ངའི་ལུས་ལ་མེ་ཏོག་པདྨའི་རི་མོ་མང་པོ་དོད་ནས་ཡོད་གསུངས་པ་དང་། མངོན་ཤེས་ཀྱང་མང་དུ་གསུངས། དེ་ནས་ཕྱིས་ལོ་སྐུ་གཤེགས་ཁར་སྲས་ལ་དགོངས་པ་རང་གྲོལ་གྱི་དབང་དང་བཀའ་ལུང་གནང་ནས་གཞན་སུ་ལའང་མ་བསྟན། ཉི་ཟླའི་མིང་ཅན་སྐྱེས་བུ་དམ་པ་ཞིག་ལ་ཆོས་འདི་གཏོད། དེས་འགྲོ་དོན་རྒྱ་ཆེར་སྤྱོད་པ་འབྱུང་གསུངས་པ་སོགས་ལུང་བསྟན་མང་དུ་མཛད་ནས་གཤེགས་སོ། །

ཀརྨ་གླིང་པ་ཉིད་ཀྱི་ཡབ་གྲུབ་ཆེན་ཉི་ཟླ་སངས་རྒྱས་ཡིན་ཏེ་དགུང་ལོ་བརྒྱ་དང་ཉི་ཤུར་བཞུགས་པ་ཡིན་ནོ། །ཀརྨ་གླིང་པ་དེའི་སྲས་ཉི་ཟླ་ཆོས་རྗེ་ཡིན་ཏེ། ཆུང་ངུ་ནས་ཆོས་ལ་དད་ཅིང་ཐུགས་རབ་ཆེ་བ། ཀུན་གྱི་ཡིད་དུ་འོང་བ། བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པ། ཡོན་ཏན་མཐའ་དག་ལ་ཐུགས་སྦྱངས་པ། ཁྱད་པར་དུ་རང་བཞིན་རྫོགས་པ་ཆེན་པོའི་ཆོས་དོན་ལ་མཁས་པ། དགུང་ལོ་བཅུ་བདུན་ནས་ཆོས་གསུང་པ་དང་། དབང་བསྐུར་ལ་མཁས་པ། གདུལ་བྱ་དང་བ་འདྲེན་ཅིང་། འགྲོ་བའི་དོན་རྒྱ་ཆེར་མཛད་པ་ཅིག་བྱུང་། དྭགས་པོ་ནས་ལུང་པོ་ཕྱོགས་སུ་ཕྱག་ཕེབས། བླ་མ་རིན་པོ་ཆེ་སུཪྻ་ཙནྡྲ་རསྨི་དང་མཇལ། རྨི་ལམ་དང་རྟེན་འབྲེལ་འགྲིགས་པས། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྐོར་བླ་མ་ཉི་ཟླ་འོད་ཟེར་ལ་ཕུལ། ཁྱེད་ལུང་བསྟན་ནས་ཟིན།  བརྒྱུད་པ་གསུམ ་པ་ཡིན། ངས་ཆོས་འདི་རླུང་གི་ཕྱོགས་ཙམ་ཡང་སུ་ལ་བསྟན་པ་མེད།  བརྒྱུད་པ་གསུམ ་གྱི་བར་དུ་གཅིག་བརྒྱུད་གྱིས།  བརྒྱུད་པ་གསུམ ་ནས་འགྲོ་དོན་རྒྱ་ཆེན་འབྱུང་གསུངས་པ་ཡོད། ཁྱེད་ཀྱིས་ཀྱང་ལོ་དྲུག་གི་བར་དུ་སུ་ལའང་མ་སྟོན་ཁྱེད་རང་ཉམས་སུ་ལོངས། ལོ་དྲུག་སོང་ནས་གཞན་ལ་སྟོན་དང་འགྲོ་དོན་རྒྱ་ཆེར་འོང་། ཀརྨ་གླིང་པའི་ཕྲིན་ལས་བྱང་ཕྱོགས་རྒྱས། །ཞེས་གསུངས་པས། བྱང་ཕྱོགས་སུ་བསྟན་པ་དར་རྒྱས་སུ་འོང་བའི་ལུང་བསྟན་ཡོད། ཟབ་ཆོས་འདིའི་འོག་སྒོ་བདེ་ཆེན་གྱི་སྐོར་ནི། ལོ་བཅུའི་བར་དུ་སུ་ལ་མ་སྟོན། དེ་ནས་སྟོན་དང་བར་ཆད་ལས་གྲོལ་བ་ཡིན་གསུངས་སོ། །དེའི་སློབ་མ་ནི་བླ་མ་རིན་པོ་ཆེ་སུཪྻ་ཙནྡྲ་རསྨི་ཡིན་ཏེ། སྐུ་འཁྲུངས་ཡུལ་ནི་ལུང་པོ་རྩི་དཀར་བྱ་བ་ཡིན། བརྒྱུད་པ་ནི་གླང་ཆེན་དཔལ་གྱི་སེངྒེའི་བརྒྱུད་པ། ཕ་སྨན་པ་གཡང་རྒྱལ་གྱི་བུ་ལ་{སྔ་མ་}ཆུང་ངུ་ནས་ཆོས་ལ་མོས་ཤིང་། གཅིག་པུར་འགོལ་བའི་སར་བྱོན་ནས། ཐུགས་དམ་ལ་བཞུགས་པས་ཆུང་ཆུང་དུས་ནས། མི་ཀུན་གྱིས་སྒོམ་ཆེན་སྒོམ་ཆེན་ཞེས་ཟེར། རྗེ་བཙུན་གྲགས་པ་རིན་པོ་ཆེ་ལ་སོགས་པའི་བླ་མ་མང་པོའི་ཞབས་ལ་གཏུགས་ནས་ཕྱི་ནང་གསང་གསུམ་གྱི་ཆོས་ལ་མཁས་པ། བསྒྲུབ་པ་ལ་བརྩོན་པ། འཆད་པ་དང་། རྩོམ་པ་ལ་མངའ་བརྙེས་ཤིང་། རྟོགས་པ་མཆོག་ཏུ་གྱུར་པ། སྙིགས་དུས་ཀྱི་སེམས་ཅན་ཐམས་ཅད་ཀྱི་འདྲེན་པ་དམ་པ་དེ་ཉིད། ཀོང་སྨད་རྒྱ་འཛིན་ཕུའི་ཕྱོགས་སུ། ཡོངས་ཀྱི་བླ་མ་དགེ་བའི་བཤེས་གཉེན་མང་པོ་དང་། ཡོན་བདག་རྣམས་ཀྱིས་གདན་དྲངས་པ་ན། བདག་དང་མཇལ་བས་ཐུགས་རྗེས་འཛིན་སོ་མཛད། ཆོས་གང་ལ་གང་དགོས་གནང་། རྗེ་བཙུན་ཆེན་པོ་དེའི་རྣམ་ཐར་པུསྟི་ཆེན་པོ་གཅིག་ཡོད། མཛད་ཆོས་ལའང་རབ་དབྱེ་རྒྱ་མཚོ་ལ་སོགས་པའི་བསྟན་བཅོས་བསམ་གྱིས་མི་ཁྱབ་པ་མང་པོ་ཡོད། འདི་ཉིད་ནི་རྒྱ་གར་གྱི་གཏེར་སྟོན་བཛྲ་མ་ཏི། དགོངས་འདུས་ལ་སོགས་ལུང་བསྟན་མང་པོ་ནས་ཟིན་པ་ཡིན། ཨོ་རྒྱན་རིན་པོ་ཆེ་པདྨས་བྱིན་གྱིས་བརླབས་པའི་སྐྱེས་བུ་དམ་པ་ཆེན་པོ་ཡིན་ཅིང་། གང་ཟག་སྤྱི་བཙན་པ་ནི་མ་ཡིན་ནོ། །དེའི་སློབ་མ་ནི། བདག་རྒྱ་བཙུན་པ་ནམ་མཁའ་ཆོས་ཀྱི་རྒྱ་མཚོ་ཡིན་པས། རུས་ནི་རྒྱ་ར། ཕ་ནི་ཆེམ་ཡུལ་ཆེས་གྲོང་ཞེས་པ་ན་ནམ་མཁའ་ཞེས་བྱ་བ་ཞིག་ཡིན། བདག་གི་ཕ་དེས་དང་པོ་ཁྱིམ་བཟུང་བྱས་པས། བུ་དང་བུ་མོ་གང་ཡང་མེད་དེ། ཁོས་ཆོ་ལོ་འགྱེད་པས་ཁྱིམ་ཤོར། དེ་ནས་ཀོང་སྨད་ལྟ་བ་ཕུག་གསེབ་ཡུལ་སྟེང་དགོན་ན། ཁོ་རང་གི་ནུ་བོ་བླ་མ་ཆོས་འགྲུབ་ཅེས་པ་ཞིག་བཞུགས་པའི་རྩ་ན་ཁོ་ཡིས་ཆོས་འདོན་བྱས། དེ་ནས་བཙུན་མ་བདེ་བ་པདྨ་ཞེས་བྱ་བ་ཞིག་དང་མཐུན་ནས་ལྕགས་པོ་ཁྱིའི་ལོ་ལ་བདག་ནི་ཁོའི་སྲས་སུ་སྐྱེས། ཡང་སྲིང་མོ་ཞིག་སྐྱེས། བདག་ལོ་ལྔ་ལོན་ཙ་ཡང་ནུ་བོ་གཅིག་སྐྱེས། དེ་ནས་ལོ་མ་འཁོར་བ་ལ་ཕ་མ་དང་སྲིང་མོ་གསུམ་ཀ་ཤི་ནས། དེ་ནས་བུ་ཆུང་དེ་ཁྱིམ་བདག་པོ་དགེ་བསྙེན་མ་ཞེས་བྱ་བ་དང་སེམས་ཅན་ཞིག་གིས་གསོས་པས་ལོ་བཅུ་གཉིས་ལ་རབ་ཏུ་བྱུང་བས། ཡོན་ཏན་དང་ཆོས་མཐའ་དག་ལ་ཐུགས་སྦྱངས་བྱས་པས་ཡོན་ཏན་ཕུན་སུམ་ཚོགས་པ་མངའ་ཞིང་། ཡར་ཆོས་རྗེ་རྣམ་པའི་ཞབས་ཏོག་ལ་བརྩོན་པ། མར་སེམས་ཅན་ཐམས་ཅད་ཀྱི་ནད་གདོན་ཐམས་ཅད་ལ་རྐྱེན་སེལ་ཕན་པ་རྒྱ་ཆེན་བསམ་གྱིས་མི་ཁྱབ་པ་མཛད་ཅིང་ཆོས་དང་འཇིག་རྟེན་བྱ་བ་གང་ཡང་ཕུན་སུམ་ཚོགས་པ་ཡོངས་ཀྱི་དཔལ་མགོན་དུ་གྱུར་པ་ཞིག ད་ལྟ་ཐང་འབྲོག་དགོན་པའི་བླ་མ་ལ་བཞུགས་ནས་ཡོད་དོ། །བདག་ཀྱང་ལོ་ལྔ་ནས་ཨ་ཁུ་བླ་མ་ཆོས་འགྲུབ་པས་བསྐྱངས་ནས་ལོ་དྲུག་ནས་ཡི་གེ་བསླབས། ལོ་དགུ་ལ་ཀློག་བཟང་པོ་ཤེས། དེ་ནས་ལོ་བཅུ་གཅིག་ནས་དྲུང་ཆོས་རྡོར་རྟོགས་ལྡན་པའི་དྲུང་དུ་དགེ་བསྙེན་བྱས། མིང་ནམ་མཁའ་རྒྱ་མཚོ་བཏགས། སྤྱན་རས་གཟིགས་ཀྱི་ཆོས་སྐོར། འཇམ་པའི་དབྱངས་ཀྱི་རྗེས་གནང་ལ་སོགས་པའི་ཆོས་ལུང་མང་དུ་ཐོབ། ཨ་ཁུ་བླ་མའི་དྲུང་དུ་མུན་སེལ་སྒྲོན་མའི་ཁྲིད། རྫོགས་ཆེན་གསང་སྐོར་ལ་སོགས་པའི་ཆོས་མང་དུ་ཐོབ། ལོ་བཅུ་གསུམ་ནས་བླ་མ་དམ་པ་མངའ་རི་བའི་དྲུང་དུ་དགེ་ཚུལ་བྱས། ལོ་བཅུ་དྲུག་ལོན་དུས་ཨ་ཁུ་བླ་མ་འདས། དེ་ནས་བླ་མ་རྣམ་རྒྱལ་བཟང་པོའི་དྲུང་དུ་ཆོས་ཁྲིད་རྫོགས་ཆེན་ཞུས། ལོ་བཅོ་བརྒྱད་ལོན་དུས་བླ་མ་ནམ་མཁའ་བཤེས་གཉེན་པ་ལ་དུས་འཁོར་དགོངས་འདུས་ཀུན་རིགས་ལ་སོགས་ཡོན་ཏན་མཐའ་དག་ལ་སྦྱང་ལོ་བྱས། ལོ་ཉེར་གཅིག་རེད་དུས་སུ་ཨ་ཁུ་བླ་མའི་དགོན་པ་སྨན་མོའི་གདན་ས་བཟུང་། དེ་དུས་འོར་ཤོད་ཆེམ་ཡུལ་གད་པ་སྐྱ་བོར་གཏེར་སྟོན་སངས་རྒྱས་གླིང་པའི་སྲས་པོ་བླ་མ་ཡེ་ཤེས་རྡོ་རྗེའི་དྲུང་དུ་དགོངས་འདུས་ཞུས། དེ་དུས་ཚེ་རབས་ཀྱི་བླ་མ་བསོད་ནམས་རྒྱལ་མཚན་དང་མཇལ་ནས། ཙཱ་རི་བསྐོར་བ་དང་ཆོས་ཞུ་བ་ལ་འོང་ཆད་བྱས་པས་ཕྱིས་དེ་ལོ་ཙཱ་རི་བསྐོར་ནས། བླ་མ་བསོད་ནམས་པ་ལ་ཆོས་ཞུས། ལོ་ཉེར་བཞིའི་དུས་ལ། ཆོས་རྗེ་གཙང་ཆེན་པའི་དྲུང་དུ་བེ་ཐོག་དགོན་དུ་བསྙེན་རྫོགས་བྱས། །མིང་ནམ་མཁའ་ཆོས་ཀྱི་རྒྱ་མཚོ་བཏགས། དེ་ནས་བླ་མ་རིན་པོ་ཆེ་བསོད་ནམས་རྒྱལ་མཚན་སྨན་མོ་དགོན་དུ་གདན་དྲངས་ནས། ཟབ་ཆོས་ཀྱི་འཁོར་ལོ་བསྐོར། བླ་མ་དམ་པའི་ཐུགས་རྗེས་འཛིན་སོ་མཛད་ནས་ཐབས་ལམ་གྲོལ་ལམ་དབང་ལ་སོགས་པ་གང་ལ་གང་དགོས་ཐམས་ཅད་བུམ་པ་གང་བྱོའི་ཚུལ་དུ་གནང་། བཀའ་དྲིན་ལ་འཁོར་ཐབས་མེད་དོ། །བླ་མ་རིན་པོ་ཆེ་སཱུཪྻ་ཙནྡྲའི་དྲུང་དུ་གསང་སྔགས་རྒྱུད་འབུམ། བཀའ་གསར་རྙིང་གི་ཆོས་དང་དབང་ལ་སོགས་པ་མང་དུ་ཐོབ་ཅིང་། ཁྱད་པར་དུའང་ཐུགས་རྗེ་ཁྲོས་མ་ནག་མོའི་སྐོར། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ཆོས་སྐོར་རྣམས་ལ་ནན་ཆགས་བྱས། །ངོ་སྤྲོད་ལག་ལེན་རྣམས་ལ་འདྲིས་པར་བྱས་ཤིང་བཀའ་དྲིན་ལ་འཁོར་ཐབས་མེད་དོ། །བླ་མ་རྗེ་རྣལ་འབྱོར་གྱི་དབང་ཕྱུག་བླ་མ་རྫ་སྒོམ་པའི་དྲུང་དུ་བཀའ་རྒྱུད་རིན་པོ་ཆེའི་ཆོས་སྐོར་ཟབ་ལ་རྒྱ་ཆེ་བ་བསམ་གྱིས་མི་ཁྱབ་པ་མང་དུ་ཐོབ། དྲུང་པ་སངས་རྒྱས་དཔལ་བའི་དྲུང་དུ་གསང་སྔགས་གསར་རྙིང་ཕྱག་གཅོད་ལ་སོགས་པ་བཀའ་ལུང་བསམ་གྱིས་མི་ཁྱབ་པ་མང་དུ་ཐོབ། གཞན་ཡང་གསང་སྔགས་གསར་རྙིང་གི་དབང་བཀའ་ལ་སོགས་པའི་བཀའ་ལུང་བསམ་གྱིས་མི་ཁྱབ་པ་ཐོབ་པ་ལ། ཆོས་ཀྱི་རྗེ་མཐོང་བ་དོན་ལྡན། ཀརྨ་པ་ཆོས་གྲགས་རྒྱ་མཚོ། ཞྭ་དམར་བ་ཆོས་དཔལ་ཡེ་ཤེས། སྤྲུལ་སྐུ་ཆོས་ཀྱི་གྲགས་པ། ཆོས་རྗེ་ཡིད་བཟང་རྩེ་པ། རྗེ་སྤྱན་སྔ་རིན་པོ་ཆེ། རྗེ་འབྲི་གུང་པ་སྐུ་མཆེད། རྗེ་སྒམ་པོ་བ་སྐུ་མཆེད། འབྲུག་པ་རྒྱལ་དབང་ཆོས་རྗེ། རྗེ་ཆོས་ཀྱི་དབང་ཕྱུག ཆོས་རྗེ་ནམ་བློ་བ། རྗེ་ཁྲོ་ཕུ་ལོ་ཙཱ་བ། གཏེར་སྟོན་རཏྣ་གླིང་པ། དྲུང་བསོད་ནམས་འབུམ་པ། ས་སྐྱ་བ་དཔལ་ལྡན་བཟང་པོ། །མཁས་པ་བསོད་ནམས་རྒྱ་མཚོ། མཚུར་ཕུ་རིན་པོ་ཆེ། རྗེ་ཤང་ལམ་ལ། སློབ་དཔོན་བླ་མ་རྒྱལ་མཚན། རྗེ་དྷརྨཱ་སྭ་མི། དྲུང་པ་བསོད་ནམས་རྒྱལ་མཚན་པ་ཡབ་སྲས། བླ་མ་འཇམ་དབྱངས་གཞོན་ནུ། དྲུང་པུཎྱཻ་རཱ་ཛ། དབོན་པོ་སྨོན་ལམ་གྲགས་པ། ཀརྨ་སྤྲུལ་སྐུ། དྲུང་ཛྙཱ་ན་སཱ་ག་ར། མཚན་ལྡན་དངོས་གྲུབ་དཔལ་མོ་ལ་སོགས་པའི་བླ་མ་བཞི་བཅུ་ཞེ་གཉིས་བསྟེན། བཀའ་ལུང་བསམ་གྱིས་མི་ཁྱབ་པ་ཐོབ། ལོ་འགའ་ཡང་མཚམས་ལ་བསྡད་ལོ་བྱས། ལོ་ཞེ་གཅིག་ལ་གཏམ་མྱོག་རྒྱ་གྲོང་གི་གཡོན་ཟུར་དུ་ཆོས་འཁོར་རྩེ་བཏབ། ལོ་ཞེ་དྲུག་ལ་དབུས་ཕྱོགས་སུ་ཆོས་རྗེ་ཞྭ་དམར་བའི་ཕྱག་ཕྱི་ལ་ཇོ་མཇལ་ཡང་དག་པ་བྱས། རང་ལ་མཁོས་ཀ་མེད་ཀྱང་། དགོན་པ་ལྔ་དྲུག་ཙམ་བཟུང་ལོ་བྱས། ལོ་དྲུག་ཅུ་རེ་དྲུག་ལ་གཏམ་མྱོག་རྒྱ་གྲོང་གི་གཡས་ཟུར་གངས་ཕུའི་འདབས། དཔལ་རིན་ཆེན་གླིང་ཞེས་བྱ་བའི་རི་ཁྲོད་ཅིག་བཏབ། བླ་མ་དམ་པ་རྣམས་ཀྱི་ཐུགས་རྗེས་འཛིན་སོ་མཛད་ནས། ཆོས་དང་བཀའ་ལུང་ལའང་སྦ་འཕྲི་མེད་པ་ཡང་དག་པར་གནང། དམ་བཅའ་འགའ་རེ་དང་སྒྲུབ་པ་ལ་འབུངས་ལོ་བྱས་ཀྱང་། ཕལ་ཆེར་སྙོམ་ལས་ལ་ལུས། སྙིང་རུས་དང་བརྩོན་འགྲུས་ཆུང་བས་ཉམས་རྟོགས་བཟང་པོ་རྒྱུད་ལ་སྐྱེ་བ་ནི་དཀའ་བར་འདུག སྔོན་བསགས་ཀྱི་ལས་འཕྲོ་ལ་བརྟེན་ནས། བླ་མ་དམ་པ་རྣམས་ཀྱི་ཐུགས་རྗེ་ཚད་བཟུང་མ་མཆིས་པས་ཚེ་འདིར་ཅི་བསམ་འགྲུབ་པ་དང་བདེ་སྐྱིད་ཕུན་སུམ་ཚོགས་པ་བྱུང་།

རྒས་པོ་འཆི་ཁ་མ་བདག་ལ་སྨོན་ཞིང་དད་འདུན་བྱེད་པ་རྣམས་ཀྱི་ཐུགས་ལ་འདི་ལྟར་ཞོག མི་ཆོས་ཀྱི་རྩ་བ་ཡིན་པས་ཀུན་དང་མཐུན་པར་གྱིས། ལྷ་ཆོས་ཀྱི་རྩ་བ་ཡིན་པས་གཞན་ཕན་གང་ཆེ་གྱིས། མི་རྟག་པའི་རྩ་བ་ཡིན་པས་ནམ་འཆི་ངེས་མེད་སོམས། རྒྱུ་འབྲས་ཀྱི་རྩ་བ་ཡིན་པས་འཁོར་བའི་སྡུག་བསྔལ་སོམས། འདུན་མའི་རྩ་བ་ཡིན་པས་བློ་ཕུག་ཆོས་ལ་གཏོད། ཆོས་ཀྱི་རྩ་བ་ཡིན་པས་སེམས་ཀྱིས་སེམས་ལ་ལྟོས། ཉམ་ལེན་གྱི་རྩ་བ་ཡིན་པས་དྲན་པ་ཡེངས་མེད་བརྟེན། གདམས་ངག་གི་རྩ་བ་ཡིན་པས་ཡེངས་མེད་ངང་ལ་ཞོག སྤྱོད་པའི་རྩ་བ་ཡིན་པས་སྤངས་བླངས་མེད་པར་གྱིས། འབྲས་བུའི་རྩ་བ་ཡིན་པས་རེ་དོགས་མེད་པར་གྱིས། གྲོགས་ཀྱི་རྩ་བ་ཡིན་པས་དག་སྣང་ཀུན་ལ་གྱིས། བསྲུང་སྡོམ་གྱི་རྩ་བ་ཡིན་པས་རང་སེམས་དཔང་དུ་ཚུགས། སྐྱབས་འགྲོའི་རྩ་བ་ཡིན་པས་དད་པ་བརྟན་པོ་གྱིས། སེམས་བསྐྱེད་ཀྱི་རྩ་བ་ཡིན་པས་རང་ལས་གཞན་གཅེས་གྱིས། དམ་ཚིག་གི་རྩ་བ་ཡིན་པས་ངོས་ལྐོག་མེད་པར་གྱིས། འགྲོ་ཀུན་ཕ་མ་ཡིན་ནོ་དྲིན་ལན་ཀུན་ལ་འཇོལ། དུས་ངན་གྱིས་སྙིགས་མར་འདུག་གོ་བརྩོན་འགྲུས་ཆོས་ལ་གྱིས། དེ་ལྟར་མདོ་དོན་ཆོས་ལ་དྲིལ་ལ་རི་ཁྲོད་དབེན་གནས་བརྟེན་ཞིང་བླ་མའི་གདམས་ངག་སེམས་ལ་བཞག་ཅིང་ཉམས་སུ་ལེན་པ་ལ་བརྩོན་པར་མཛད་ནས་འཆི་ཁར་མི་འཚེར་བ་ཙམ་རེ་མཛོད་ཅིག ཕྱི་རབས་སེང་ཕྲུག་ཀུན་གྱི་ཐུགས་ལ་ཞོག་དང་སྙིང་གཏམ་ཡིན། ང་རྒས་པོས་ཁ་ཆེམས་བཞག་ཀྱང་དེ་ལས་འཇོག་རྒྱུ་མེད། ཐུགས་ལ་ཟུངས་ཤིག ཟབ་ཆོས་ཞི་ཁྲོ་དགོངས་པ་རང་གྲོལ་བར་དོ་ཐོས་གྲོལ་གྱི་ཆོས་འདི་ནི་བླ་མ་དམ་པས་བདག་ལ་འདི་སྐད་གསུངས། འདི་ལན་མང་དུ་ཐོས་པའི་སེམས་ཅན་ཐམས་ཅད་ངན་སོང་དུ་འགྲོ་མི་སྲིད་གསུངས། ཤིན་ཏུ་ཡང་ཟབ་པར་འདོད་པས་རྩིས་ཆེ་བར་མཛོད་ཅིག ས་མ་ཡ། དེ་ལྟར་བརྒྱུད་པའི་རིམ་པ་ཟུར་ཙམ་འདི། མདོ་ཁམས་ཀྱི་བཤེས་གཉེན་དམ་པ་བླ་མ་ཆོས་རྒྱལ་གྱིས་ཡང་ནས་ཡང་དུ་བསྐུལ་བ་ལ་བརྟེན་ནས་རང་འདྲ་བློ་དམན་རྣམས་ལ་ཡིད་ཆེས་པའི་ཕྱིར། ས་ཕོ་ལུག་གི་ལོ་ཟླ་བདུན་པའི་ཡར་ཚེས་བཅུ་ལ། གཏམ་མྱོག་རྒྱ་གྲོང་གི་གཡས་ཟུར། གངས་ཕུའི་འདབས་ཆུ་བོ་གསེར་ལྡན་ཧི་ཏིའི་གཡས་ཕྱོགས་དཔལ་རིན་ཆེན་གླིང་དུ་རྒྱ་བཙུན་ནམ་མཁའ་ཆོས་ཀྱི་རྒྱ་མཚོས་བཀོད་པ། ཡི་གེ་པ་ནི་ལྷོ་རྒྱུད་ཀྱི་བན་ཆུང་བསོད་ནམས་རྒྱ་མཚོས་བྲིས་པའོ། །དགེ་བ་དེས་མཚོན་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ཆེན་པོ་ལས་གྲོལ་ནས་ཐར་བར་གྱུར་ཅིག མངྒ་ལཾ། །ཤུ་བྷཾ། །