བླ་མ་བརྒྱུད་པའི་གསོལ་འདེབས་ནོར་བུའི་ཕྲེང་བ།
༈ རིག་འཛིན་ཆོས་རྒྱལ་གླིང་པའི་གཏེར་གསར་ཐོས་གྲོལ་གྱི་ཆོས་ཚན་འགའ་དང་བསྙེན་ཡིག་སྐོར།
བླ་མ་བརྒྱུད་པའི་གསོལ་འདེབས་ནོར་བུའི་ཕྲེང་བ་ཞེས་བྱ་བ་བཞུགས་སོ། །ན་མོ་གུ་རུ་དེ་ཝ་མནྚ་ལེ་བྷྱ། རྣམ་གསུམ་ཡོ་གའི་རྒྱུད་སྡེ་རྒྱ་མཚོ་ཡི། །སྙིང་པོ་ཞི་ཁྲོ་འདུས་པའི་གཞུང་བཟང་གི ། ཟབ་མོ་རྫོགས་རིམ་ཕྱོགས་ཀྱི་གདམས་པའི་སྲོལ། །མཆོག་གྱུར་གང་ལས་ཇི་ལྟར་བརྒྱུད་པའི་ཚུལ། །ཀུན་བཟང་རིགས་ལྔ་དཔལ་ལྡན་རྡོ་རྗེ་སེམས། །དགའ་རབ་རྡོ་རྗེ་འཇམ་དཔལ་བཤེས་གཉེན་དང་། །ཤྲཱི་སིངྷ་པདྨ་འབྱུང་གནས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྒྱ་ཆེན་བསྐྱེད་པའི་ཕྱོགས་ཀྱི་གདམས་པའི་སྲོལ། །གང་ལས་བརྒྱུད་ཚུལ་ཀུན་བཟང་རྡོ་རྗེ་སེམས། །ཞི་དང་ཁྲོ་ཚོགས་སྟོན་པ་ཤཱཀྱ་ཐུབ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །རྒྱལ་ཀུན་གསང་གསུམ་ངོ་བོ་རིགས་གསུམ་མགོན། །སྐལ་ལྡན་དམ་པའི་རིགས་ཅན་དྲ་མ་ལྔ། །མཐའ་ཡས་རྒྱུད་སྡེའི་བཀའ་བབ་རྒྱལ་པོ་ཛཿ གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཨུ་པ་རཱ་ཛ་ཨིནྡྲ་བོ་དྷི་དང་། །པུ་ཏྲ་རྣམ་གསུམ་ཀུ་ཀུ་རཱ་ཛའི་ཞབས། །དགའ་རབ་བཞད་པ་རྩལ་དང་མཚོ་སྐྱེས་རྗེ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གཞན་ཡང་ལུས་དཀྱིལ་ཨ་ནུའི་གདམས་པ་སོགས། །རྒྱུད་དང་སྒྲུབ་སྡེ་ཆོས་ཚུལ་སྔ་ཕྱི་ཀུན། །འདུས་པའི་བཀའ་བབས་པདྨ་ཐོད་ཕྲེང་རྩལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཡེ་ཤེས་མཚོ་རྒྱལ་བཻ་རོ་ཁྲི་སྲོང་སྟེ། །རྗེ་འབངས་གྲོགས་གསུམ་ཞེས་གྲགས་ནང་གསེས་སུ། །འབངས་ཀྱི་ཟུང་གཅིག་དཔལ་གྱི་དབང་ཕྱུག་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གྲུབ་པའི་གཙུག་རྒྱན་མ་ཏི་རཏྣའི་ཞབས། །རྗེ་དེའི་རྣམ་འཕྲུལ་ཟབ་གཏེར་རྒྱ་མཚོ་ལ། །དབང་བསྒྱུར་ཆོས་ཀྱི་རྒྱལ་པོ་གླིང་པའི་མཚན། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཚེ་དབང་རྣམ་རྒྱལ་བསོད་ནམས་རྒྱལ་མཚན་པ། །ཀུན་བཟང་རྣམ་རྒྱལ་མདོ་སྔགས་རྒྱ་མཚོའི་སྡེ། །ཚེ་དབང་ནོར་བུ་ཀརྨ་གྲགས་པ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །འཇིགས་མེད་ཆོས་མཆོག་ཀུན་བཟང་དཔལ་འབྱོར་ཞབས། །གང་དེས་རྗེས་བཟུང་པདྨ་འཇིགས་མེད་སོགས། །དངོས་བརྒྱུད་བླ་མ་དམ་པའི་ཚོགས་རྣམས་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །བསྐྱེད་རིམ་ཁྱད་པར་བཞི་ལྡན་རྣལ་འབྱོར་གྱིས། །རྒྱུད་སྨིན་དམིགས་བཅས་རྫོགས་རིམ་རྟོགས་པ་སྐྱེས། །དེ་ལས་དམིགས་མེད་རྫོགས་པ་ཆེན་པོའི་དོན། །རྟོགས་ནས་ཀ་དག་གཞི་ཐོག་ཕེབས་པར་ཤོག །ཅེས་སྤྱི་དང་། བྱེ་བྲག་ཏུ་གསོལ་བ་འདེབས་ན་རྣམ་ཐར་བསྡུས་དོན་དང་སྦྲེལ་བ་འདི་ལྟ་སྟེ།
༈ སྤྲུལ་པའི་གཏེར་སྟོན་ཆོས་རྒྱལ་གླིང་པ་ལ་གསོལ་བ་འདེབས་པ་བྱིན་རླབས་དཔལ་སྟེར་ཞེས་བྱ་བ་བཞུགས་སོ། །ༀ་སྭ་སྟི་སིདྡྷི། དམ་པའི་རིགས་ཅན་བློ་གྲོས་ཐབས་ལྡན་དང་། །དངོས་གྲུབ་མཆོག་བརྙེས་དཔལ་གྱི་དབང་ཕྱུག་གི །རྣམ་འཕྲུལ་ཟབ་གཏེར་བཀའ་བབས་རིག་པ་འཛིན། །ཆོས་རྒྱལ་གླིང་པའི་ཞབས་ལ་གསོལ་བ་འདེབས། །མཁྱེན་པས་ཤེས་བྱ་ཟབ་མོའི་གནས་ལུགས་གཟིགས། །བརྩེ་ཆེན་ཐུགས་རྗེས་འགྲོ་འདུལ་ཕྲིན་ལས་རྒྱས། །ནུས་པས་ཡིད་སྲུབས་དཔུང་ཚོགས་མཐར་མཛད་པ། །ནམ་མཁའ་རྒྱལ་པོའི་ཞབས་ལ་གསོལ་བ་འདེབས། །སྐྱབས་གནས་ཀུན་འདུས་པདྨའི་རྒྱལ་ཚབ་ཆེར། །རྩེ་གཅིག་གུས་པས་གསོལ་བ་བཏབ་པའི་མཐུས། །ཡེ་ཤེས་གཟིགས་པས་རྟག་ཏུ་རྗེས་བཟུང་ནས། །རང་གཞན་དོན་གཉིས་འགྲུབ་པར་བྱིན་གྱིས་རློབས། །ཞེས་པའང་བསྟོད་ཡུལ་དམ་པ་གང་དེའི་རིགས་ཆོས་ཀྱི་བརྒྱུད་འཛིན་རྒྱལ་སྲས་བསོད་ནམས་སྟོབས་རྒྱལ་གྱི་བཞེད་སྐོང་དུ་མཚོ་སྐྱེས་བླ་མ་དགྱེས་པའི་འབངས་མཁྱེན་བརྩེའི་དབང་པོས་བྲིས་པ་དོན་དང་ལྡན་པར་གྱུར་ཅིག །
ཞི་བ་གོང་ནས་བསྙེན་ཀྱང་འགྲོ་བའི་ངོར། །གང་འདུལ་དེར་སྣང་དུ་མའི་གར་དང་ནི། །བློ་གྲོས་རིན་ཆེན་རྣམ་པ་འཕྲུལ་པའི་གར། །གར་དབང་ཆོས་རྒྱལ་གླིང་པར་གསོལ་བ་འདེབས། །སྨོན་ལམ་སྟོབས་ཀྱིས་དགེ་བའི་ཆར་བཟང་པོས། །ཕྱོགས་བརྒྱའི་གདུལ་དཀའི་ཐ་བ་རབ་བརླན་ནས། །བྱང་ཆུབ་མྱུ་གུ་སྨིན་མཛད་གང་དེ་ཡི། །ཐུགས་བསྐྱེད་བསྟན་འགྲོའི་གསོས་སུ་སྨིན་པར་ཤོག །ཅེས་ཀུ་ལི་བ་ཀུན་བཟང་འཇིགས་མེད་རྡོ་རྗེས་རྒྱལ་འཕགས་རི་ཁྲོད་དུ་གུས་པས་གསོལ་བ་བཏབ་པ་དགེའོ། །དེ་ལྟར་དམ་པ་ཟུང་གི་གསུང་དང་སྦྲེལ་བའི་བརྒྱུད་པའི་གསོལ་འདེབས་འདི་ཡང་ཐམས་ཅད་མཁྱེན་པ་མཚོ་སྐྱེས་དགྱེས་པའི་ཞབས་རྡུལ་གཙུག་ཏུ་འཆང་བ་བསོད་ནམས་སྟོབས་རྒྱལ་གྱིས་བགྱིས་པ་དགེ་ལེགས་སུ་གྱུར་ཅིག། །།