ཞི་ཁྲོའི་ལོ་རྒྱུས་བསྡུས་པ།
ཞི་ཁྲོའི་ལོ་རྒྱུས་བསྡུས་པ་བཞུགས་སོ༔
དེ་ཡང་དང་པོ་རྒྱུད་འདི་ཡི་འབྱུང་ཁུངས་ནི༔ འོག་མིན་སྡུག་པོ་བཀོད་པའི་སྟེང་ཕྱོགས་སུ༔ དུར་ཁྲོད་མེ་རི་འབར་བའི་ཀློང་དུ་ཁྲོ་བོ་ཁྲོ་མོའི་ཚོགས་དཔག་ཏུ་མེད་པའི་འཁོར་དང་ལྡན་པ་རིག་འཛིན་ཆེན་པོའི་ས་ཐོབ་པ་མ་གཏོགས་པར༔ གཞན་གནས་པར་མི་ནུས་པའི་ཞིང་མཆོག་དམ་པ་དེ་ན༔ ཆོས་སྐུ་སྟོན་པ་ཀུན་ཏུ་བཟང་པོ་དེ་ཉིད༔ ཆེ་མཆོག་ཧེ་རུ་ཀའི་སྐུར་བཞེངས་ནས་ཚོགས་བརྒྱད་ལ་ཧེ་རུ་ཀ་བརྒྱད་སོགས༔ རྒྱུད་སྡེ་དུ་མའི་ལྷར་སྤྲུལ་ནས༔ རང་རང་གི་རྒྱུད་གསུངས་པ་དང༔ བཅོམ་ལྡན་འདས་ཐུབ་པ་ཆེན་པོ་རྡོ་རྗེ་འཆང་གི་སྐུར་བཞེངས་ནས་རྒྱུད་སྡེ་ཆེན་པོ་བཞི་དྲུག་ལ་སོགས་སྡེ་སྣོད་དཔག་ཏུ་མེད་པ་གསུངས་པ་རྣམས་མཁའ་འགྲོ་མ་ལས་ཀྱི་དབང་པོ་ཆེ་དང༔ བྱང་ཆུབ་སེམས་དཔའ་ལག་ན་རྡོ་རྗེ་ལྷ་དང་མི་ཡི་འཁོར་རྣམས་ཀྱིས་བཀའ་ཡི་བསྡུ་བ་བྱས་ཏེ༔ མཆོད་རྟེན་བདེ་བྱེད་བརྩེགས་པ་ལ་སོགས་པའི༔ གནས་ཆེན་པོ་རྣམས༔ སྲིད་གསུམ་ཐམས་ཅད་གཏེར་གྱིས་བཀང་སྟེ་སྦས་པ་རྣམས༔ དུས་ལ་བབ་ཚེ་རྒྱ་གར་གྱི་རིག་འཛིན་ཆེན་པོ་རྣམས་དང༔ ཁྱད་པར་ཨོ་རྒྱན་རིན་པོ་ཆེའི་གཏེར་ནས་བཏོན་ཏེ༔ རྒྱ་གར་ཤར་ནུབ་ལ་སོགས་རིག་འཛིན་གྲུབ་ཐོབ་ཐམས་ཅད་ཀྱི་ཐུགས་བཅུད་མ་ལུས་བླངས་ཤིང་གཅིག་ཏུ་བསྡུས་ཏེ༔ བོད་ཡུལ་ཁ་བ་ཅན་གྱི་ཞིང་ཁམས་ལ༔ གདུལ་བྱ་གཟིགས་ནས་བོད་ཀྱི་ལྷ་འདྲེ་གདུག་པ་ཅན་རྣམས་བཏུལ༔ མཐའ་འདུལ་ཡང་འདུལ་གྱི་གཙུག་ལག་རྣམས་བཞེངས༔ བོད་ཀྱི་རྗེ་འབངས་ཐམས་ཅད་འཁོར་བཅས་ཆོས་ལ་བཙུད༔ ས་རྡོ་རི་བྲག་ཐམས་ཅད་བསྒྲུབ་པའི་ཆོས་གནས་སུ་བྱིན་གྱིས་བརླབས༔ ཁམས་མུན་པའི་གླིང་དུ་སངས་རྒྱས་ཀྱི་བསྟན་པ་རྒྱས་པར་མཛད༔ བསམ་ཡས་ལ་སོགས་གནས་རྣམས་སུ༔ ཐེག་པ་རིམ་དགུའི་དཀྱིལ་འཁོར་དཔག་ཏུ་མེད་པ་ཞལ་ཕྱེ༔ རྗེ་འབངས་ཐམས་ཅད་སྨིན་པར་མཛད༔ རྒྱ་དཔེ་ཐམས་ཅད་གཏེར་དུ་སྦས་ཤིང་མ་འོངས་བོད་ཀྱི་བཙས་སུ་བཞག༔ དེ་ཡི་ཚེ་སྡིག་བློན་ཤན་ཏ་ཞེས་པའི༔ མཁའ་འགྲོ་ཡེ་ཤེས་མཚོ་རྒྱལ་ཆོས་བྲོས་ལ་བྱོན་པ་ལ༔ ཆད་པ་དུ་མ་བཅད་པའི་རྣམ་སྨིན་གྱིས༔ བློན་པོ་དམྱལ་བ་ཆེན་པོ་མནར་མེད་དུ་སྐྱེས་པ༔ དེ་འདྲེན་པའི་ཕྱིར་དུ་ཡེ་ཤེས་མཚོ་རྒྱལ་དམྱལ་བར་བྱོན་ནས༔ ཅི་ལྟར་བྱས་པའི་ཐབས་ཡོད་དམ༔ ཞེས་གཤིན་རྗེ་ལས་མཁན་རྣམས་ལ་དྲིས་པས༔ འདིར་ཞི་ཁྲོའི་དཀྱིལ་འཁོར་ཞལ་ཕྱེས་ན་ཐར༔ གཞན་ཅི་བྱས་ཀྱང་ཐར་པའི་ཐབས་མེད་ཟེར་བ་ལ་བརྟེན་ནས༔ ཡེ་ཤེས་མཚོ་རྒྱལ་གྱིས་ཞི་ཁྲོའི་དཀྱིལ་འཁོར་ཞལ་ཕྱེས་པ་ཙམ་གྱིས་ལྕགས་བསྲེགས་ཀྱི་ཁང་པ་ཡང་ཞིག༔ ལྕགས་བསྲེགས་ཀྱི་ས་གཞི་ཡང་བསིལ་བར་གྱུར༔ བློན་པོ་ཤན་ཏིའི་གཙོར་བཅས་པའི་འབུམ་ཚོ་ལྔ་དྲངས་སོ༔ དམྱལ་དཔོན་གྱི་ལྷ་ལྕམ་ལ་ཕྱག་འཚལ་ལོ༔ ཁྱོད་ནི་རྒྱལ་བ་ཀུན་ལས་ཐུགས་རྗེ་ཆེ་བའི་སེམས་མ་ཁྱེད༔ མི་ཡི་ཡུལ་དུ་ཞི་ཁྲོའི་དཀྱིལ་འཁོར་དར་བར་གྱིས་ཤིག༔ ཅེས་བཀའ་བསྒོས་སོ༔ ཆོས་འདི་ནི༔ ཆོས་སྐུ་ཀུན་ཏུ་བཟང་པོ༔ ལོངས་སྐུ་རྒྱལ་བ་རིགས་ལྔ༔ དྲུག་པ་རྡོ་རྗེ་འཆང་ཆེན༔ སྟོན་པ་རྡོ་རྗེ་སེམས་དཔའ་ལ་དགོངས་པའི་བྱིན་གྱིས་བརླབས༔ དེ་ལ་རྒྱལ་བ་དགོངས་པའི་བརྒྱུད་པ་ཞེས་བྱའོ༔ དེ་ནས་དགའ་རབ་རྡོ་རྗེ༔ ཤྲྀ་སེང་ཧ༔ པདྨ་འབྱུང་གནས་ལ་བརྡའ་ཡི་སྒོ་ནས་བསྟན་པ་རིག་འཛིན་བརྡའ་ཡི་བརྒྱུད་པ་ཞེས་བྱའོ༔ དེ་ནས་ཨོ་རྒྱན་ཆེན་པོས་བོད་གངས་ཅན་ལྗོངས་འདིར་བྱོན་ནས་རྗེ་འབངས་རྣམས་ལ་ཆོས་འདི་སྙན་བརྒྱུད་དུ་གནང་བའི་གང་ཟག་སྙན་བརྒྱུད་ཅེས་བྱའོ༔ དེ་ནས་ཆོས་འདི་ཤིན་ཏུ་ཟབ་པས་ནུབ་ཀྱིས་དོགས་ནས་ཞི་ཁྲོ་བཀའ་མ་ཡང་དར་བར་མཛད་ཅིང༔ གཏེར་ཁ་ཡང་མང་དུ་སྦས༔ ཐོས་གྲོལ་འདི་ནི་མ་བསྒོམ་པ་སངས་རྒྱས་ཐོབ་པའི་ཆོས༔ ཐོས་པ་ཙམ་དུ་གྲོལ་བ་ཐོབ་པའི་ཆོས༔ སྡིག་པོ་ཆེ་གསེབ་ལམ་དུ་ཁྲིད་པའི་ཆོས༔ སྐད་ཅིག་གཅིག་གིས་བྱེ་བྲག་བྱེད་པའི་ཆོས༔ སྐད་ཅིག་གཅིག་གིས་རྫོགས་སངས་རྒྱས་པའི་ཆོས་ཟབ་མོ་ཡིན་ཏེ༔ འདི་སློབ་པའི་སེམས་ཅན་ངན་སོང་དུ་འགྲོ་བར་མི་སྲིད་དོ༔ མཚམས་མེད་པ་ལྔ་བསགས་པའི་མི་ཡི་རྣ་ལམ་དུ་ཐོས་ན་ཡང༔ ངེས་པར་གྲོལ་བར་འགྱུར༔ འཆི་ཁ་སངས་རྒྱས་པའི་མན་ངག་དུས་གསུམ་སངས་རྒྱས་རྣམས་ཀྱིས་བཙལ་ཀྱང་འདི་ལས་ལྷག་པའི་ཆོས་རྙེད་མི་སྲིད་དོ༔ ཞེས་དང༔ གཞན་ཡང་དཀྱིལ་འཁོར་གྱི་ལྷ་འདི་རྣམས་ཀྱི་མཚན་ལན་གཅིག་རྣ་བར་ཐོས་པས་ཀྱང༔ ངན་སོང་གི་གནས་སུ་མི་སྐྱེ་ཞིང་མཐར་འཚང་རྒྱ་བར་གསུངས་ཏེ༔ དཔལ་ཀུན་ཏུ་བཟང་པོ་ཉིད་ཀྱི་ཞལ་ནས་ཀྱང༔ གལ་ཏེ་རྣལ་འབྱོར་ཕོ་མོ་གང་ཞིག་གི༔ དཀྱིལ་འཁོར་གྱི་ལྷ་འདི་རྣམས་ཀྱི་མཚན་རྣ་བར་ལན་གཅིག་ཐོས་པ་ཙམ་གྱིས་ཀྱང༔ ན་རག་ཆེན་པོར་མི་ལྟུང་ངོ༔ ཞེས་གསུངས་པ་ལྟར་རོ༔ ཡང་ཡིད་བཞིན་སྒྱུ་འཕྲུལ་དཀྱིལ་འཁོར་ལས༔ གང་ཞིག་གུས་པར་ཕྱག་འཚལ་ན༔ ཉམས་ཆག་ཀུན་ཀྱང་བྱང་བར་འགྱུར༔ དམ་ཚིག་བསྲུང་ན་དངོས་གྲུབ་ཐོབ༔ ཅེས་གསུངས་སོ༔