རྫོགས་ཆེན་སྐྱེ་མེད་ཆོས་སྐུ་ཞལ་མཇལ།
བཀའ་རྫོགས་པ་ཆེན་པོ་བླ་མ་ཀུན་འདུས་ཀྱི་ཆ་ལག་ཐོས་ཆོག་ལྟ་བ་རང་གྲོལ་ངན་སོང་སྒྲིབ་སྦྱང་གི་རྫོགས་ཆེན་སྐྱེ་མེད་ཆོས་སྐུ་ཞལ་མཇལ་བཞུགས་སོ༔
རྒྱ་གར་སྐད་དུ༔ ན་མོ་གུ་རུ་བྷོདྷི་ཙིཏྟ་མ་ཧཱ་སུ་ཀ་ཛྙཱ་ན་དྷརྟུ་གྷ་ན་ཡཱཿ བོད་སྐད་དུ༔ བླ་མ་ཀུན་བཟང་བྱང་ཆུབ་སེམས་ཀྱི་བདེ་བ་ཆེན་པོ་ཆོས་ཀྱི་དབྱིངས་ཀྱི་ཚོགས་ལ་འདུད༔ ཐོས་ཆོག་ལྟ་བ་རང་གྲོལ་ལས༔ ངན་སོང་སྒྲིབ་སྦྱང་གི་གནད་དོན༔ མ་རིག་རིག་པ་བསྟན༔ ཉོན་མོངས་ཀྱི་དམག་ཚོགས་བཤིག་པ༔ སྐྱེ་མེད་ཆོས་སྐུའི་ཞལ་མཇལ་བའི་གདམས་ངག༔ ཚིག་ཉུང་ལ་དོན་འདུས་པ༔ རྒན་མོ་མཛུབ་ཁྲིད༔ བྱ་ཐེ་བ་ཚང་དུ་འཇུག་པ་ལྟ་བུའི་ཐེ་ཚོམ་མེད་པའི་ཆོས༔ དུས་ངན་སྙིགས་མ་རྩོད་པའི་དུས་སུ༔ བསྒོམ་ལུགས་དང་དབེན་ཁྲོད་དུ་ཡུན་རིང་དུ་འདུག་མི་ཐུབ་པ་རྣམས་ལ༔ དོན་ཁྲིད་དཔེ་རྩར་མི་བཅད་པར་དམར་ཁྲིད་ཆོས༔ ས་མ་ཡཱ༔ རྒྱཿརྒྱཿརྒྱ༔
དང་པོ་ལ་སྤྱི་དོན་བདུན་པ༔ དེ་ལ་སྔོན་འགྲོ་དངོས་གཞི་རྗེས་གསུམ་མོ༔ སྔོན་འགྲོ་ལ་གཉིས༔ རང་རྒྱུད་སྦྱོང་བ༔ གཞི་འདུལ་བ་གཉིས་སོ༔ སྦྱང་བ་ལས་མང་རིམ༔ སྐྱབས་འགྲོ་སེམས་བསྐྱེད་ཀྱི་ཁྲིད༔ སྒྲིབ་གཉིས་སྦྱང་བ་ཡི་གེ་བརྒྱ་བའི་ཁྲིད༔ ཚོགས་གཉིས་རྫོགས་པ་མཎྜལ་ཚོགས་བསགས་པའི་ཁྲིད༔ བླ་མ་ལ་གསོལ་བ་མ་བཏབ་ན༔ བྱིན་རླབས་མི་འབྱུང་བས༔ བྱིན་རླབས་འབྱུང་ཤེས་པ་བླ་མའི་རྣལ་འབྱོར་གྱི་ཁྲིད༔ དེ་ལ་དོན་གསུམ་པ་སྙིང་ཐིག་ནང་དུ་འཇུག་ཤེས་པར་བྱའོ༔ དང་པོ་ལ་གསུམ༔ མ་དག་པའི་སེམས་འཛིན་པ༔ ཤིང་བུ་རྡེའུ་ལ་འཛིན་པ༔ དག་པ་ལྷ་ལ་འཛིན་པ༔ བསྲུང་དྲན་སྟོན་རྩི་ལ་འཛིན་པ་དང་གསུམ་ལས༔ མ་དག་པའི་སེམས་འཛིན་པ་ཤིང་བུ་རྡེའུ་དང་༔ སྨིན་མཚམས་ཐིག་ལེ་སྙིང་ག་ལ་སེམས་འཛིན་ནས་འདུལ་བ༔ དག་པ་སེམས་འཛིན་པ་ཆོས་སྐུ་ལ་འཛིན་པ་དང་༔ ལོངས་སྐུ་ལ་འཛིན་པ་དང༔ སྤྲུལ་སྐུ་ལ་འཛིན་པ་དང་གསུམ་ཡིན་ནོ༔ དེ་ལ་གསུམ༔ རླུང་སེམས་རྣམ་རྟོག་ཁོ་རང་དང༔ འགྱུ་བ་ལ་སེམས་འཛིན་པ་དང༔ ངོ་ཟིན་ནས་འབྲས་བུ་སྐྱེ་མེད་རྡོ་རྗེ་བཟླས་པའི་སེམས་འཛིན་པ་དང་གསུམ་མོ༔ དེ་ལ་མཚན་མ་མེད་པའི་སེམས་བསྒྲིམ་ཀློད་བསླབ་པའོ༔ དེ་ལ་ཞག་རེ་སྦྱངས་བར་བྱས་ལ༔ དྲན་སེམས་འདུག་ཀློད་མེད་པ་རིག་རིག་ཏུར་ཏུར༔ མི་ཤེས་དགུ་ཤེས་པ་རྩར་བཅད་ན༔ སེམས་བརྟན་པར་འཇུག་གོ༔ དེ་ལ་སྦྱངས་ནས་ཞི་གནས་ཀྱི་ཉམས་བདེ་ཀློད་ཆེན་མོ་འབྱུང་བ༔ བསམ་བློ་སྟོང་སེམས་སྒོ་གསུམ༔ རྣལ་དུ་ཕབ་པ༔ ཞི་གནས་ལ་དངོས་པོ་སྟོང་པའོ༔ དེ་ལ་གནད་དབབ་གསུམ༔ ལུས་དྲང་པོར་གནད་དབབ༔ སེམས་འཛིན་པ་གནད་དབབ༔ ཉམས་འཆར་བ་གནད་དབབ༔ བྱ་བ་དགུ་ཕྲུགས་སུ་བཏང་བའོ༔ ཞི་གནས་གཉིས་མཚན་པ་བཅའ་བའོ༔ ཞི་གནས་ཁྲིད་མཚན་མ་མེད་པའི་ཞི་གནས་ཀྱི་ཁྲིད་ཤེས་པར་གོ་བརྩེགས་བཏང་བའོ༔ དེ་ལ་སེམས་ཅི་ཤར་རྟོགས་པ་ཆུད་ཟོས་སུ་མི་བཏང་བར༔ འདུལ་སྟོབས་སྦྱར་ལ༔ ལྷག་མཐོང་གི་བདེ་ཉམས་འབྱུང་བའི་སྟོང་ཆ་ངོ་སྤྲོད་པ༔ གསལ་ཆ་ངོ་སྤྲོད་པ༔ རིག་པ་ངོ་ཟིན་པ༔ བདེ་ཉམས་རྟོགས་པ༔ ཤར་གྲོལ་དུ་ཁྲིད་དགོས་པ་བློ་བསྐྱེད་དོ༔ དེ་ལ་རབ་ཏུ་མིང་བཏགས་པའི་ཚིག༔ འདི་ལྟར་ངོ་སྤྲད་པ་གལ་ཆེ༔ དེ་ལ་ཚིག་ཏུ་ཕབ་པའི་སློབ་བུ་མ་ཡེངས་ཉོན༔ ཨེ་མ་སྔོན་འགྲོ་བདུན་གྱི་ཆོས་སོང་ནས༔ དང་པོ་སྐྱེ་དཀའ་སྐྱེ་བའི་ས༔ ལྷོ་རྒྱལ་འཛམ་བུ་གླིང་དུ་འཁྲུངས༔ ཐོབ་དཀའ་དལ་འབྱོར་རྙེད་དཀའ་བ༔ མི་ལུས་རིན་ཆེན་འབྱོར་ལྡན་ཐོབ༔ འཕྲད་དཀའ་དམ་པའི་ཆོས་ལ་སོགས༔ མཇལ་དཀའ་སྐུ་གསུམ་ངོ་བོ་མཐོང༔ ཀུན་བཟང་ང་ཡི་དགོངས་པ་ཡིན༔ བུ་ཁྱོད་ཀྱི་སེམས་ནི་དྲི་མ་མེད༔ རྡོ་རྗེ་སེམས་དཔའ་ཐུགས་ཀྱི་རྟེན༔ མེ་ལོངས་ཕྱི་གསལ་ནང་གསལ་འདི༔ བུ་ཁྱོད་ཀྱི་སེམས་ནི་འདི་ལྟར་མཚུངས༔ སངས་རྒྱས་འོད་ཀྱི་ཕུང་པོ་ལ༔ སྟོང་གསལ་དང་བ་སྣང་བའི་ཉམས༔ སྣང་སྟོང་གཉིས་སུ་མ་མཆིས་ཏེ༔ གཉིས་སུ་མིང་བཏགས་སངས་རྒྱས་ཡིན༔ སྣང་བ་ཡབ་ལ་སྟོང་པ་ཡུམ༔ སྣང་བ་ཆོས་སྐུའི་ངོ་བོ་ཡིན༔ སྟོང་པ་ཡུམ་གྱི་ངོ་བོ་སྟེ༔ ཆོས་སྐུ་ཡབ་ཡུམ་རྟོགས་པར་མཛོད༔ ཆོས་ཀྱི་སྐུ་ལ་མདུན་རྒྱབ་མེད༔ སེམས་ལ་སེམས་གཉིས་མ་མཆིས་ཏེ༔ སྟོང་གསལ་འགག་མེད་རིག་པ་མཆིས༔ གཅིག་པུར་ཆོས་སྐུའི་རིག་ཐོག་ཆོད༔ སྟོང་པ་དངོས་ཡོད་མ་མཆིས་ཏེ༔ ཆོས་སྐུའི་མིང་ནི་བཏགས་པའོ༔ རིག་པ་འོད་ཀྱི་སྣང་བ་ལ༔ དངས་ཤིང་གསལ་ལ་རྙོག་མེད་པ༔ ཕུང་ཁམས་ལྷ་ཡི་རྐྱེན་བྱས་ནས༔ ཅི་ཤར་རྟོགས་པའི་ངང་དུ་སྙོམས༔ གཅིག་པུར་་ལྔ་ལྔ་མ་མཆིས་ཏེ༔ རྐྱེན་ནི་དུག་ལྔ་སོ་སོར་མཆིས༔ བདུད་ཀྱི་རྐྱེན་གྱིས་མི་ཟིན་པ༔ དུག་ལྔ་ཞི་བའི་ཕུང་པོ་འོད༔ སྐུ་གསུམ་སྐུ་ལྔ་ཁྱད་པར་མེད༔ འདུན་པ་གཅིག་གིས་ཆོད་པར་གྱིས༔ སྐུ་གསུམ་ངོ་བོ་ངོ་སྤྲོད་ན༔ ཅིར་མི་དགོངས་ལ་བདེ་བ་དེ༔ སྤྲུལ་སྐུ་མིང་དུ་བཏགས་པ་ཡིན༔ ཅིར་མི་དགོངས་ལ་གསལ་བ་དེ༔ ལོངས་སྐུའི་མིང་དུ་བཏགས་པ་ཡིན༔ ཅིར་མི་དགོངས་ལ་སྟོང་པ་དེ༔ ཆོས་སྐུའི་མིང་དུ་བཏགས་པ་སྟེ༔ གཟུགས་སྟོང་གཟུགས་ཀྱི་འཛིན་པ་ཆོད༔ གྲགས་སྟོང་སྒྲ་ཡི་འཛིན་པ་ཆོད༔ དྲི་སྟོང་དྲི་ཡི་འཛིན་པ་ཆོད༔ མྱོང་སྟོང་རོ་ཡི་འཛིན་པ་ཆོད༔ འཇམ་རྩུབ་རེག་བྱའི་འཛིན་པ་ཆོད༔ ཚོགས་བརྒྱད་རྟོགས་པ་ཅི་ཤར་ཡང༔ སྟོང་པའི་ངང་དུ་ཚོགས་སུ་སྡུས༔ ཆུ་ལ་ཆུ་བུར་ཐིམ་པ་ལྟར༔ ཤེས་པ་སོ་མའི་ངང་དུ་ཞོག༔ ཅེས་གསུངས༔ ཆོས་སྐུ་སངས་རྒྱས་ཀྱི་ཐུགས་ཞེས་བྱ་བ་ཤེས་ན་འདི་ཁོ་ནའོ༔ སེམས་ཅན་གྱི་སེམས་རང་འཛིན་གྱི་སངས་རྒྱས་མཁན༔ འཁོར་བར་འཁྱམས་མཁན༔ བདེ་བ་སྤྱོད་མཁན༔ སྡུག་ཏུ་བཙུད་མཁན༔ མཁན་པོ་ཐམས་ཅད་འདི་ཁོ་ན་མོད༔ འདི་ཡང་མེད་ན༔ བདེན་རྫུན་སངས་རྒྱས་སེམས་ཅན་གཉིས་སུ་མེད་པའོ༔ དཔེར་ན་སྟོང་ཐལ་དུ་ཅི་བྱེད༔ འདི་སུས་ཀྱང་མ་བཅོས་པ༔ རང་བྱུང་ཡེ་སངས་སུ་ལྷུན་གྲུབ་ཏུ་ཡེ་ཤེས་ཞེས་བྱ་བའོ༔ རིག་པ་འདི་བླ་མའི་གདམས་ངག་ཟབ་ཀྱང་བྱུང་བ་མ་ཡིན༔ ཁྱོད་རང་ཐབས་མཁས་པའི་སྟོབས་ལས་བྱུང་བ་མ་ཡིན༔ རྣམ་རིག་སྲ་བ་དང༔ སྟོབས་རྫུ་ཆེ་བས་བྱུང་བ་མ་ཡིན༔ སེམས་ཁོ་རང་གདོད་མ་ནས་ཆོས་སྐུའི་དབྱིངས་སུ་གྲུབ་ནས༔ རང་གི་རང་ཤེས་བསྒྱུར་ཏེ༔ དེ་ཀ་ངོ་ཤེས་པའོ༔ ད་ཡན་ཆད་དང་སྔར་ལྷན་ཅིག་སྐྱེ་ནས༔ མ་རིག་པས་བསྒྲིབས་ནས་ངོ་མ་ཤེས༔ ཐག་མ་ཆོད༔ ཞེ་མ་ཚིམ༔ ཡིད་ལ་མ་ཆེས་པར་འཁོར་བར་འཁྱམས་པའོ༔ སྔོན་གྱི་སྡུག་བསྔལ་དེ་ལྟ་བུ་བསམ་ལ༔ རང་ངོ་ཤེས༔ རང་མཚང་རང་གིས་རིག་ནས༔ སེམས་ངོ་སྤྲད་པས་ཡུན་དུ་ལྟོས་ཤིག༔ སངས་རྒྱས་ཐམས་ཅད་མཛད་པའི་ཕྲིན་ལས་སྐྱོབ་པའི་ཐུགས་རྗེ་ཡོད་པའི་དོན་འདི་ལྟར༔ སྟོང་གསལ་གྱི་རིག་པ་ཧྲིག་གེ་སྐྱོང་བ་རྒྱུན་ཆད་མེད་པར་མྱོང་བ༔ བྱམས་པའི་སེམས་འདུལ་བའི་ཐབས་སུ་བཀོད་པའོ༔ བདེ་གཤེགས་སྙིང་པོ༔ ཤེས་རབ་ཀྱི་ཕ་རོལ་དུ་ཕྱིན་པའི༔ ཨ་ཏི་སོ་མ་ཡིད་ལ་འཆོང་ཞིག༔ ཅེས་གསུངས༔ མདོ་འབུམ་རྒྱུད་ལས༔ རང་གི་རང་རིག་རྣམ་དག་པ༔ མ་སྐྱེ་མི་འགག་ནམ་མཁའི་ངོ་བོ་ཉིད༔ སོ་སོར་རང་རིག་ཡེ་ཤེས་སྤྱོད་ཡུལ་བ༔ དུས་གསུམ་རྒྱལ་བའི་ཡུམ་ལ་ཆོས་སྐུ་སྟོང༔ ཞེས་གསུངས༔ ཀྲི་ཡ་ཡང་དག་གི་རྒྱུད་ལས༔ བླ་མའི་ཐུགས་ནི་ནམ་མཁའ་ལྟར༔ འཁྲུལ་པ་མེད་དེ་ཆོས་ཀྱི་སྐུ༔ དེ་ལྟར་རང་ལ་ཡོད་པའོ༔ ཞེས་གསུངས་སོ༔ མདོ་རིན་ཆེན་སྤངས་པ་ལས༔ སངས་རྒྱས་ལོག་ན་བཙལ་དུ་མེད༔ རང་གི་སེམས་ལ་ལྟོས་ནས་ཀྱང༔ སངས་རྒྱས་མ་གྱུར་གང་ཡང་མེད༔ ཞེས་གསུངས་སོ༔ ཐིག་ལེ་རྣམ་དབྱིངས་ལས༔ ཀུན་ཏུ་བཟང་པོ་རང་ལ་གནས༔ སློབ་དཔོན་གཞན་བརྟེན་འཁྲུལ་པ་ཡིན༔ རང་ངོ་མ་ཤེས་པ་ཡི་སྐྱོན༔ ཅེས་གསུངས༔ གསང་བདག་ཀྲི་ཡའི་རྒྱུད་ལས༔ སངས་རྒྱས་ཤ་ཁྲག་ལྤགས་ཀྱིས་བཏུམ༔ རང་གིས་རང་བཙུར་སྙིང་རེ་རྗེ༔ ལྷོད་ལ་སངས་རྒྱས་རང་ལ་ལྟོས༔ ཞེས་གསུངས༔ ཉི་མའི་སྙིང་པོ་ལས༔ སངས་རྒྱས་ཐུགས་བཅུད་རང་ལ་གནས༔ ངོ་མ་ཤེས་པའི་སེམས་ཅན་རྣམས༔ རང་ངོ་མ་ཤེས་སྙིང་རེ་རྗེ༔ ཞེས་གསུངས༔ ལུང་ཡེ་ཤེས་མར་མེའི་རྒྱུད་ལས༔ རང་གི་སྙིང་གི་དཀྱིལ་ཡང་དག་པར་ཕ་རོལ་ཕྱིན་ནོ༔ ཞེས་གསུངས༔ མཚན་མ་མེད་པའི་རྒྱུད་ལས༔ སངས་རྒྱས་ཐམས་ཅད་ཀྱི་སྙིང་པོ༔ ཡང་དག་པ་རང་ལ་གནས་སོ༔ ཞེས་གསུངས༔ གསང་བའི་ཐུགས་བཅུད་ལས༔ ཀུན་ཏུ་བཟང་པོའི་གསུང་བདག་ལ་ཉོན་ཅིག༔ ང་ཡི་རང་བཞིན་འདི་ལྟ་སྟེ༔ ཡོད་པ་གཅིག་ལ་མེད་པ་ཡིན༔ བསྟན་ནི་རྣམ་པ་གཉིས་སུ་བསྟན༔ བྱུང་བ་ཐེག་པ་དགུ་ལ་བྱུང༔ འདུས་ནི་རྫོགས་པ་ཆེན་པོར་འདུས༔ ཡིན་ནི་བྱང་ཆུབ་སེམས་ཀྱི་རིག༔ བཅོམ་ནི་ཉོན་མོངས་ངར་འཛིན་བཅོམ༔ གནས་ནི་ཆོས་དབྱིངས་ཡེ་ཤེས་གནས༔ ཐོབ་ནི་འབྲས་བུ་སྐུ་གསུམ་ཐོབ༔ གཅིག་ལ་སོ་སོའི་མིང་བཏགས་སོ༔ ཞེས་གསུངས༔ རྒྱུད་འཐོར་བུ་ལས༔ གནས་ནི་ཡེ་ཤེས་ལུས་ལ་གནས༔ བསླབ་ནི་བླ་མའི་གདམས་ངག་གོ༔ ཞེས་གསུངས༔ རྒྱུད་ནོར་བུ་ཕྲ་བཀོད་ལས༔ ཏིལ་དང་ཕྱུགས་ཀྱི་ལུས་གསེང་ནས༔ མར་ཉིད་ཡེ་ནས་འབྱུང་བ་བཞིན༔ སེམས་ཅན་ལུས་ལྟར་སྣང་བ་ལ༔ ཕ་རོལ་ཕྱིན་པ་ཀུན་ལ་གནས༔ ཞེས་གསུངས༔ གསང་བའི་རྒྱུད་ལས༔ ལྤགས་པས་ཤ་བཏུམས་ཁོང་དཀྱིལ་ནས༔ ཙིཏྟ་རིན་ཆེན་ཟུར་གསུམ་བརྒྱད༔ བུམ་པའི་ནང་ནས་མར་མེ་བསྒྲོན་པ་ལྟར༔ ཤ་ཡི་སྒྲོན་མ་ཡེ་ཤེས་གནས་པའོ༔ ཞེས་གསུངས༔ སྒྲ་ཐལ་འགྱུར་རྩ་བའི་རྒྱུད་ལས༔ སྤྱི་གཙུག་ཙིཏྟའི་རྩ་ནང་ནས༔ མ་བཅོས་དག་པ་སངས་རྒྱས་གཞན༔ ཞེས་གསུངས༔ སེང་གེ་རྩལ་རྫོགས་ཀྱི་རྒྱུད་ལས༔ སྙིང་པོ་ཡེ་ཤེས་གསུམ་བརྩེགས་དེ༔ རང་རང་སྙིང་གི་དཀྱིལ་ན་གནས༔ ཞེས་གསུངས༔ སྤྱོད་པ་རྩ་བའི་རྒྱུད་ལས༔ མ་གོ་མ་ཤེས་དྲེད་པོ་ཡི༔ སངས་རྒྱས་གར་གནས་མི་ཤེས་པ༔ ཁ་ནས་ཆོས་བཤད་ཆུ་བོའི་གཞུང༔ འོ་ཅིང༔ སངས་རྒྱས་རང་ལ་གནས་པ་ཡིན་པ༔ དེས་ཕྱི་ལ་བསྒྲགས་ནས༔ ནང་དུ་ཕེབས་ན་སངས་རྒྱས་ཟེར༔ ཞེས་གསུངས༔ ཡང་སེངྒེ་རྩལ་རྫོགས་ཀྱི་རྒྱུད་ལས༔ མ་དག་སེམས་ཅན་རེ་རེ་ཡི༔ ཐབས་ཤེས་བརྟེན་པའི་སྒྲོ་སྐུར་འདེབས༔ མ་གོ་རིག་པ་ཡེ་ཤེས་བདེ༔ ཟུང་འཇུག་གསལ་སྟོང་ཡབ་ཡུམ་ཚུལ༔ ཀུན་གྱིས་བརྟེན་ན་སངས་རྒྱས་ཐོབ༔ ཅེས་གསུངས༔ ཡང་ནོར་བུ་ཕྲ་བཀོད་ལས༔ རིག་པའི་གནས་ལུགས་མང་དུ་བྱ༔ ཡབ་དང་ཡུམ་གྱི་ཚུལ་དུ་གནས༔ ཞེས་གསུངས༔ ཡང་ནོར་བུ་སྒྲོན་མའི་རྒྱུད་ལས༔ ཡབ་དང་ཡུམ་གྱི་དཔེ་མཚན་པ༔ རྡོ་རྗེ་དྲིལ་བུ་བཤམས་པའོ༔ ཞེས་གསུངས༔
མྱུར་བའི་རྒྱུད་ལས༔ ཙིཏྟ་སྙིང་གི་གཞལ་ཡས་ན༔ ངོ་བོ་ཡེ་ཤེས་ཀ་ནས་དག༔ ཅེས་གསུངས༔ རང་ཤར་རྒྱུད་ལས༔ མུན་ཁང་ནང་གི་སྒྲོན་མེ་ལྟར༔ འོད་ཀྱི་ནང་དུ་སངས་རྒྱས་གནས༔ ཞེས་གསུངས༔ སྙིང་གི་ཐིག་པའི་མེ་ལོང་གི་རྒྱུད་ལས༔ གནས་ནི་སངས་རྒྱས་སྙིང་གི་དཀྱིལ༔ བརྟེན་ནི་རིག་མ་མཁའ་ན་བདེ༔ ཞེས་གསུངས༔ རྩ་རྒྱུད་འབར་བའི་རྒྱུད་ལས༔ རྩ་ཐམས་ཅད་རྒྱལ་ཁང་ཕུབ་པ་ལྟ་བུར༔ རྒྱལ་བློན་གསལ་བ་ལྟར༔ སངས་རྒྱས་བཞུགས་སོ༔ ཞེས་གསུངས༔ ཡང་མེ་ལོང་རྒྱུད་ལས༔ རིག་པ་གནས་ནི་སྙིང་ལ་གནས༔ སུས་ཀྱང་བཟུང་དུ་མེད་པ་ནི༔ ལྕགས་ཀྱི་པ་ཏྲ་ལྷན་མི་ཐུབ༔ རང་སར་བཞག་ན་ཉི་ཟླའོ༔ ཞེས་གསུངས་སོ༔ སྒྲོན་མེའི་རྒྱུད་ལས༔ ཡེ་ཤེས་སེམས་ཀྱི་འགྲོ་ལམ་ནི༔ དཔེར་ན་རྒྱལ་ཁམས་བ་གམ་ལྟར༔ ཞེས་གསུངས༔ དེས་མེ་ལོང་རྒྱུད་ལས༔ སེམས་ནི་མེ་ལོང་འདི་ལྟར་རོ༔ ཡུན་དུ་སྐྱོང་སྟེ་མེ་ལོང་ཕྱིས་པ་ལྟར༔ ཞེས་གསུངས༔ འཁྲུལ་ཆོད་ཀྱི་རྒྱུད་ལས༔ རིག་པ་ཕྲ་མོ་ཏུར་ཏུར་པོ༔ འགྲོ་ས་མང་སྟེ་གནས་ཏེ་སྒུག༔ དཔེར་ན་ཆུ་བོ་རང་འཁོར་ལྟར༔ ཞེས་གསུངས༔ གསང་བདག་ཛམ་ལྷའི་རྒྱུད་ལས༔ མ་གོ་སེམས་ཅན་མང་པོ་ཡིས༔ བླ་མའི་ཐུགས་ན་ནོར་བུ་གནས༔ ཟེར་ཞིང་བླ་མའི་ཐུགས་ལ་བསྟོད་ནས༔ རང་ལ་ཡོད་པ་མ་གོའོ༔ ཞེས་གསུངས༔ དེ་ལྟར་སེམས་ཞེས་བྱ་བ་རང་གི་གཏན་དུ་གནད་དབབ་ཐབས་སུ༔ བརྩོན་འགྲུས་ཀྱིས་འདུལ་བ༔ བླ་མའི་གདམས་ངག་གིས་འདུལ་བ༔ དབྱིབས་ངོ་ཤེས་པ༔ ཐེ་ཚོམ་གྱི་རྒྱུད་འཁོར་ནས༔ དཔེ་ཡིག་ཆ་རྒྱུད་ཀུན་ལ་འདི་ལྟར་ལྟའོ༔ དེ་ལྟར་སེམས་རྣལ་དུ་དབབ་ནས༔ ཡེ་ཤེས་སྣང་བ་དང་གཉིས་སུ་མེད་པའི་ས་ལམ་གྱི་སྒྲིབ་པ་སྦྱངས༔ སྐུ་གསུམ་གྱི་འབྲས་བུ་ཐོབ་པར་འགྱུར་རོ༔
འོ་སངས་རྒྱས་ཐམས་ཅད་རང་ངོ་རང་ལ་ལྟ་ཞིང༔ དུས་རྒྱུན་ཆད་མེད་པ༔ སངས་རྒྱས་ཀྱི་མིང་བཏགས་པའོ༔ དེ་ལྟར་བླ་མའི་སློབ་བུ་ལ་ངོ་སྤྲད་ཅིང༔ སྐུ་གསུམ་ཁྱབ་བདལ་ལྷུན་གྲུབ་ཏུ་རིག་པ་གཏད༔ འོད་གསལ་དང་འཆར་སྒོ་ལ་སོགས་པ༔ སྤྱི་ཡི་རྫོགས་པ་ཆེན་པོ་རྣམས་ལ་ཁྲིད༔ དེ་ལྟར་ཉམས་སུ་བླང་སྟེ༔ འཆི་ཁ་བར་དོ་ན༔ ངང་ཕྲུག་མ་དང་འཕྲད་པ་ལྟ་བུ་ངོ་ཟིན་ནས༔ འཁྲུལ་པ་རང་སར་ཞི་ནས༔ ཆོས་ཀྱི་སྐུ་དང་འདུ་འབྲལ་མེད་དོ༔ ཐོས་ཆོག་ལྟ་བ་རང་གྲོལ་ལས༔ ངན་སོང་སྒྲིབ་སྦྱང་གི་སྤྱི་དོན༔ ཨུ་རྒྱན་གུ་རུ་པདྨ་འབྱུང་གནས་ཀྱི་ཐུགས་བཅུད༔ མ་འོངས་སྙིང་གི་བུ་དང་འཕྲད་ནས༔ འཁོར་བ་མ་སྟོངས་བར་དུ་ཆོས་འདི་མ་རྫོགས་སོ༔ ས་མ་ཡཱཿ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ བཀའ་རྒྱ༔ དམ་རྒྱ༔ གསང་རྒྱ༔ གཏད་རྒྱ༔ དགེའོ།། །།