རྒྱུད་ཆེན་ལྟ་བ་ཀློང་ཡངས་ཀྱི་མན་ངག་བར་དོ་བཞིའི་གདམས་ངག

རྒྱུད་ཆེན་ལྟ་བ་ཀློང་ཡངས་ཀྱི་མན་ངག་བར་དོ་བཞིའི་གདམས་ངག་བཞུགས་སོ༔

ཨོ་རྒྱན་པདྨ་འབྱུང་གནས་ངས༔ རྡོ་རྗེ་འཆང་གི་ལུང་བཞིན་དུ༔ སྐྱེ་གཉིས་བར་དོར་སངས་རྒྱས་ནས༔ ངེས་པའི་འབྲས་བུ་སུས་འདོད་པ༔ ང་ཡི་བསྟན་གྱིས་ལེགས་པར་ཉོན༔ ཡང་དག་ཟང་ཐལ་ངོ་བོ་ཉིད༔ འཁོར་འདས་ཀུན་གྱི་ལམ་ཆེན་པོ༔ དེ་ཉིད་བགྲོད་པར་བྱ་བའི་ཕྱིར༔ བར་དོའི་དབྱེ་བསལ་ས་མཚམས་དང༔ གནས་ལུགས་འཆར་ལུགས་བཞི་རུ་འདུས༔ རང་བཞིན་སྐྱེས་གནས་བར་དོ་དང་༔ འཆི་ཁ་མ་ཡི་བར་དོ་དང་༔ ཆོས་ཉིད་ཞི་ཁྲོའི་བར་དོ་དང་༔ སྲིད་པར་འཁྱམས་པའི་བར་དོའོ༔ སྐྱེས་གནས་བར་དོ་འདི་ལྟ་སྟེ༔ མ་ལས་སྐྱེས་ནས་མ་ཤིའི་བར༔ རང་ལུས་འདོམ་གང་གྲུ་བཞི་འདི༔ ཁམས་རྣམས་དང་ནི་ཕུང་པོ་དང༔ སྐྱེ་མཆེད་དང་ནི་དབང་པོ་དང༔ ཡུལ་དང་ཡུལ་ཅན་ཤེས་པ་རྣམས༔ ཅི་ལྟར་གནས་པ་གཏན་ལ་དབབ༔ འདི་དག་ཤེས་པའི་རྣལ་འབྱོར་པས༔ སྣང་བ་ཐམས་ཅད་དབང་བསྒྱུར་ནུས༔ ཁམས་ལ་རྣམ་པ་གཉིས་ཡིན་ཏེ༔ ཕྱི་ཡུལ་གྱིས་བསྡུས་པའི་ཁམས་དང་གཉིས༼གཅིག༽༔ ནང་སེམས་ཀྱིས་བསྡུས་པའི་ཁམས་དང་གཉིས༔ ཕྱི་ཡུལ་གྱིས་བསྡུས་པའི་ཁམས་རྣམས་ནི༔ ས་ཁམས་གཞི་རྣམས་སྐྱེད་པར་བྱེད༔ ཆུ་ཡི་ཁམས་ཀྱིས་ནི་མིང་རྣམས་འཛིན༔ མེ་ཡི་ཁམས་ཀྱིས་ཡུལ་རྣམས་སྨིན༔ རླུང་གི་ཁམས་ཀྱིས་གཡོ་ཞིང་འཇིག་རྟེན་འདེགས༔ ནམ་མཁའི་ཁམས་ཀྱིས་གཞི་ཡང་འཛིན༔ དེ་ནི་ཕྱི་ཡུལ་ཁམས་ལྔ་ཡིན༔ སེམས་ཀྱི་ཁམས་ལ་གཉིས་ཡིན་ཏེ༔ སེམས་ཅན་སྡུད་བྱེད་སྣོད་ཀྱི་ཁམས༔ སེམས་ཉིད་ལས་བྱུང་བཅུད་ཀྱི་ཁམས་ཉིད་དོ༔ སེམས་དྲན་པས་གཞི་བྱས་གཟུགས་ཀྱི་ཁམས༔ དྲན་པ་མཐའ་ཡས་གཟུགས་མེད་ཁམས༔ དྲན་པ་བདག་༼རགས༽འཛིན་འདོད་པའི་ཁམས༔ ཁམས་གསུམ་དག་པ་ཡེ་ཤེས་ཞིང་༔ སེམས་ཉིད་ལས་བྱུང་ཁམས་ཞེས་བྱ་༼པ༽༔ ཤེས་པ་རང་གསལ་མིག་གི་ཁམས༔ ཤེས་པ་རྩེ་གཅིག་རྣ་བའི་ཁམས༔ ཤེས་པ་མཐའ་ཡས་སྣ་ཡི་ཁམས༔ ཤེས་པ་གཅིག་སྡུད་ལྕེ་ཡི་ཁམས༔ ཤེས་པ་ཀུན་ལ་ཁྱབ་པ་ཡིད་ཀྱི་ཁམས༔ ཤེས་པ་ཀུན་འཇུག་ཡིད་ཀྱི་ཁམས༔ དབང་པོ་ཚོགས་དྲུག་ཁམས་དྲུག་གོ༔ མིང་གཟུགས་འཛིན་པ་མིག་གི་རྣམ་ཤེས༔ སྒྲ་རྣམས་འཛིན་པ་རྣ་བའི་རྣམ་ཤེས༔ གཞན་རྗེས་འཛིན་པ་སྣ་ཡི་རྣམ་ཤེས༔ དངོས་སུ་མྱོང་བ་ལྕེ་ཡི་རྣམ་ཤེས༔ ཀུན་ལ་ཁྱབ་པ་ཡིད་ཀྱི་རྣམ་ཤེས༔ ཐམས་ཅད་འདུས་པ་ལུས་ཀྱི་རྣམ་ཤེས༔ དེ་ལྟར་རྣམ་ཤེས་ཁམས་དྲུག་གོ༔ དངོས་པོ་ཐམས་ཅད་ལོག་རྟོག་འཛིན་ཅིང་ཡུལ་བསྒྲུབ་པས༔ མིག་གི་འདུས་ཏེ་རེག་པའི་ཁམས་དང་གཅིག༔ སྣང་བ་ཡུལ་ལ་འཛིན་ཅིང་འཕྲོག་༼ཕྲག་དོག་༽བྱེད་པས༔ རྣ་བའི་འདུས་ཏེ་རེག་པའི་ཁམས་དང་གཉིས༔ འཐོར་བའི་རྣམ་ཤེས་གཅིག་ཏུ་སྡུད་བྱེད་ཅིང་༔ གཞན་གྱི་ཡིད་འཕྲོག་སྣ་ཡི་འདུས་ཏེ་རེག་པའི་ཁམས་དང་གསུམ༔ གང་གི་དངོས་པོ་རྗེས་སུ་འཛིན་ཅིང་ལེན༔ ལྕེ་ཡི་འདུས་ཏེ་རེག་པའི་ཁམས་དང་བཞི༔ དྲན་པའི་དབང་པོ་ཐམས་ཅད་གཅིག་ཏུ་སྡུད་བྱེད་ཅིང༔ ཡུལ་སྣང་ཀུན་ལ་འཇུག་པས་ན༔ ཡིད་ཀྱི་འདུས་ཏེ་རེག་པའི་ཁམས་དང་ལྔ༔ རང་ས་ཐམས་ཅད་འཛིན་ཅིང་འབྱུང་སྡུད་པས༔ ལུས་ཀྱི་འདུས་ཏེ་རེག་པའི་ཁམས་དང་དྲུག་གོ༔ ཁམས་ཀྱི་རྣམ་པ་དེ་དག་ཀྱང་༔ ཡུལ་ཀུན་འཛིན་པས་རང་འཁྲུལ་པའོ༔ རྟོག་པ་དང་བཅས་ཕུང་པོ་ནི༔ དངོས་པོ་ཐམས་ཅད་གཅིག་ཏུ་སྡུད་ཅིང་བསྒྲུབ་པས་ན༔ གཟུགས་ཀྱི་ཕུང་པོ་ཞེས་བྱའོ༔ ཉོན་མོངས་ཐམས་ཅད་གཅིག་ཏུ་སྡུད་[ཅིང་ཚོར་བས་མྱོང་བས་ན༔ དེ་ལ་ཚོར་བའི་ཕུང་པོ་ཞེས་བྱའོ༔ དབང་པོའི་བྱེ་བྲག་གིས་འཛིན་པ་ཐམས་ཅད་གཅིག་ཏུ་བསྡུས་ནས༔ ལེགས་ཉེས་ཀྱི་འདུ་ཤེས་བཟུང་བས་ན༔ དེ་ལ་འདུ་ཤེས་ཀྱི་ཕུང་པོ་ཞེས་བྱའོ༔ ཉོན་མོངས་པ་ཐམས་ཅད་གཅིག་ཏུ་སྡུད་ནས་བྱ་བ་ཐམས་ཅད་བྱས་པས་ན༔ དེ་ལ་] ( ཚིག་འདི་རྣམས་མ་དཔེ་ལས་ཆད་འདུག་པ་ཡི་དམ་དགོངས་འདུས་ལྟར་བྱས་མཆན་) འདུ་བྱེད་ཕུང་པོ་ཞེས་པའོ༔ ཤེས་པ་ཐམས་ཅད་འདུས་པས་ན༔ རྣམ་ཤེས་ཕུང་པོ་ཞེས་པའོ༔ རྟོག་པ་མེད་པའི་ཕུང་པོ་ནི༔ བསམ་གཏན་གཅིག་འདུས་ཏིང་འཛིན་ཕུང་པོ༔ ཟག་པ་ཟད་པ་རྣམ་གྲོལ་ཕུང་པོ༔ སྐྱེ་བ་མེད་པ་ཤེས་རབ་ཕུང་པོ༔ དྲི་མ་དག་པས་ཚུལ་ཁྲིམས་ཕུང་པོ༔ རྣམ་རྟོག་ལས་འདས་རྣམ་གྲོལ་ཕུང་པོ༔ ཡེ་ཤེས་དང་ལྡན་པ་ཡེ་ཤེས་ཀྱི་ཕུང་པོ༔ ཕར་ཕྱིན་དྲུག་གི་ཕུང་པོའོ༔ ས་ཡི་ཆ་འཛིན་མིག་གི་དབང་༔ རླུང་གི་ཆ་འཛིན་རྣ་བའི་དབང་༔ ཆུ་ཡི་ཆ་འཛིན་སྣ་ཡི་དབང་༔ མེ་ཡི་ཆ་འཛིན་ལྕེ་ཡི་དབང་༔ ནམ་མཁའི་ཆ་འཛིན་ཡིད་ཀྱི་དབང་༔ སྣ་ཚོགས་ཆ་འཛིན་ལུས་ཀྱི་དབང་༔ ཤེས་རབ་ཆ་འཛིན་དབང་པོ་ནི༔ གདུང་སེམས་དད་པའི་དབང་པོ་དང་༔ རྣོ་མྱུར་བརྩོན་འགྲུས་དབང་པོ་དང་༔ རྩེ་གཅིག་དྲན་པའི་དབང་པོ་དང་༔ ཆོས་ཉིད་རིག་པའི་དབང་པོ་དང་༔ ལྷ་བསྒོམ་ཉེར་ལེན་དབང་པོ་དང་༔ སེམས་བསྐྱེད་ཞི་བའི་དབང་པོའོ༔

སྐྱེ་མཆེད་བཅུ་གཉིས་འདི་ལྟ་སྟེ༔ བཟུང་བའི་སེམས་དང་འཛིན་པའི་ཡུལ༔ བཟུང་བའི་སེམས་བསྐྱེད་༼སྐྱེ་མཆེད་༽ འདི་ལྟར་རོ༔ གཟུགས་ལ་འདུ་ཤེས་སེམས་དཔའ་དང་༔ སྒྲ་ལ་འདུ་ཤེས་སེམས་དཔའ་དང་༔ དྲི་ལ་འདུ་ཤེས་སེམས་དཔའ་དང་༔ རོ་ལ་འདུ་ཤེས་སེམས་དཔའ་དང་༔ རེག་ལ་འདུ་ཤེས་སེམས་དཔའ་དང་༔ ཆོས་ལ་འདུ་ཤེས་སེམས་དཔའ་དང་༔ མིག་རྣ་བ་སྣ་ལྕེ་ཡིད་ལུས་དྲུག་རང་རང་བཟུང་བའི་ཆ་དང་བཅུ་གཉིས་སོ༔ འཛིན་པའི་སྐྱེ་མཆེད་བཅུ་གཉིས་ནི༔ མིང་གཟུགས་ཁ་དོག་དབྱིབས་རྣམས་དང་༔ ཚིག་དང་ཐད་སྙད་སྣང་མི་སྣང༔ རྟེན་ཅིང་འབྱུང་བ་བཅུ་གཉིས་དང་༔ འདྲ་དང་འདྲ་མིན་རྣམ་པ་གཉིས༔ ཐམས་ཅད་འདུ་ཤེ ས་སེམས་དཔའ་དང༔ ཉེར་ལེན་རྒྱུ་རྐྱེན་འབྱུང་དུས་དང་༔ འཛིན་པ་སྐྱེ་མཆེད་བཅུ་གཉིས་ཡིན༔ ཡུལ་ལ་གཉིས་དེ་དངོས་དང་དངོས་མ་ཡིན༔ དངོས་པོའི་ཡུལ་ནི་འདི་ལྟ་སྟེ༔ གཟུགས་སྒྲ་དྲི་རོ་རེག་བྱ་ཆོས༔ འབྱུང་བཞི་ལ་སོགས་འཇུག་པའི་རྐྱེན༔ དངོས་པོ་མེད་པའི་ཡུལ་རྣམས་ནི༔ སྟོང་ཉིད་མཐར་ཕྱིན་འཛིན་བྲལ་ལོ༔ མ་ཡེངས་ཡུལ་ནི་རྣམ་པ་གཉིས༔ མཐའ་ལས་འདས་དང་ལྟ་བ་དང་༔ དངོས་པོ་བདག་ཏུ་མེད་པ་ནི༔ མཐའ་ལས་འདས་པའི་སྟོང་བ་ཉིད༔ ཆོས་རྣམས་ཐམས་ཅད་འདུས་མ་བྱས༔ མ་བཅོས་ཐིག་ལེ་ཉག་གཅིག་ཏུ༔ བྱུང་ཚོར་སྒོ་བཅད་གསལ་སྟོང་དང་༔ ཡུལ་ཅན་ཐམས་ཅད་རྣམ་པར་དག༔ དག་ཞེས་བྱ་བ་ཆོས་ཟད་དོ༔ ལྟ་བ་ལས་འདས་སྟོང་པ་ནི༔ བརྗོད་དུ་མེད་པའི་མཚན་ཉིད་ཡིན༔ རྒྱུ་རྐྱེན་ཀུན་ལས་འདས་པའོ༔ མཐའ་ནི་གང་ཡང་མི་འབྱེད་དེ༔ མཐའ་བཞིའི་དྲི་མ་རང་སངས་ཉིད༔ རྩིས་གདབ་ཀུན་ལས་འདས་པའོ༔ ས་མ་ཡ༔

ཉོན་མོངས་དྲུག་ནི་འདི་ལྟར་རོ༔ མ་རིག་པ་ཡི་འཁྲུལ་རྟོག་ཡིན༔ གཏི་མུག་ཤེས་རབ་ཆ་ལས་འཁྲུལ༔ ཞེ་སྡང་བསྐྱེད་རིམ་ཆ་ལས་འཁྲུལ༔ ང་རྒྱལ་ལྟ་བའི་ཆ་ལས་འཁྲུལ༔ འདོད་ཆགས་སྣང་བའི་ཆ་ལས་འཁྲུལ༔ ཕྲག་དོག་རྟོག་པའི་ཆ་ལས་འཁྲུལ༔ དེ་ལ་སོགས་ཏེ་ཉོན་མོངས་སེམས༔ གཟུང་འཛིན་མཚམས་སྦྱར་བག་ཆགས་དང༔ ཡུལ་དང་ཡུལ་ཅན་འཛིན་པ་ཀུན༔ དེ་ལ་རྟོག་པའི་སྐྱེ་བོ་སྟེ༔ ཨ་ནུ་མན་ཆད་འདོད་གཞུང་ངོ་༔ ལོག་པར་རྟོག་པའི་ལྟ་བ་ནི༔ རྟག་ཆད་བདག་འཛིན་ཡིད་དཔྱོད་བཞི༔ ཡོད་དང་མེད་པར་ལྟ་བ འོ༔ དེ་ནི་ཉོན་མོངས་འཁྲུལ་རྟོག་གོ༔ ས་མ་ཡ༔

གླུ་ར་ཐོཾ༔ དུག་ལྔ་དུག་གསུམ་ཉོན་མོངས་ཀུན༔ སྤོང་དང་སྒྱུར་དང་གཉེན་པོ་མེད༔ དེ་བཞིན་ཉིད་དུ་མ་རྟོགས་ན༔ མ་རིག་པ་དང་རིག་པ་གཉིས༔ ལུས་དང་གྲིབ་མའི་ཚུལ་དུ་ཡོད༔ མི་སྤངས་མི་སྦྱངས་རིག་མ་རྟོགས༼གཏོགས༽༔ གཉེན་པོའི་སྤངས་བླངས་ག་ལ་ཡོད༔ འབད་རྩོལ་དམིགས་པས་གྲོལ་མི་འགྱུར༔ མ་བཙལ་རང་དག་མ་ཤེས་པར༔ གཙང་མར་འདོད་ན་ཆུ་རྙོག་བཞིན༔ ཕྱི་ཕྱིར་དྭངས་པ་མ་ཡིན་ནོ༔ འདི་ཡི་མཚན་ཉིད་མ་ཤེས་ན༔ གྲུབ་མཐའ་མ་གྱུར་སྣང་བ་སྟེ༔ མངོན་ཞེན་བཟློག་པ་མ་ཡིན་ནོ༔ ཉོན་མོངས་གྲོལ་བར་འདོད་པ་ན༔ འབད་བཅས་རྣམས་ནི་རང་སར་བཞག༔ རང་གཞག་རང་སངས་ཉིད་དུ་གྲོལ༔ རང་གིས་ཤར་གྲོལ་རང་ཉིད་བལྟ༔ རང་ཁ་མ་ཉིད་རང་སར་གྲོལ༔ ལྕགས་ཀྱིས་ལྕགས་རྣམས་འཇོམས་པ་ལྟར༔ རང་གི་གཉེན་པོར་རང་ཉིད་ཆེ༔ ཉོན་མོངས་གཉེན་པོར་ཉོན་མོངས་རང་༔ གཅེར་གྱིས་བལྟས་པས་ཐམས་ཅད་གྲོལ༔ ཡེ་གྲོལ་ཡོངས་གྲོལ་བསྐྱར་གཞི་བྲལ༔ རང་བཞིན་གནས་ལུགས་སུས་རྟོགས་པ༔ ཐོག་མའི་མགོན་པོ་དྲི་མེད་ཡིན༔ མ་བཙལ་བ་ཡི་དོན་རྣམས་རྙེད༔ མ་བསྒོམ་བཞག་པས་བདེ་བ་ཐོབ༔ རང་བཞིན་ཉིད་དུ་མངོན་སུམ་རིག༔ མ་བཅིངས་པས་ནི་ཐམས་ཅད་གྲོལ༔ སྐད་ཅིག་འདི་ལ་སུས་གོམས་པ༔ མཚན་མེད་ལྔ་ཡི་སྡིག་པ་ཡང་༔ ཐམས་ཅད་བྱང་བར་ཐེ་ཚོམ་མེད༔ ས་མ་ཡ༔

དེ་དག་བཤད་པ་ཐམས་ཅད་ཀྱང་༔ རང་བཞིན་གནས་པའི་བར་དོར་གྲོལ༔ སེམས་ཀྱིས་བསྡུས་པའི་སེམས་ཅན་ལ༔ དུས་གསུམ་སངས་རྒྱས་ཐམས་ཅད་ཀྱི༔ རྒྱུ་ནི་བཟང་ངན་མེད་པར་གནས༔ ཏིལ་ལ་མར་ཁུས་ཁྱབ་བཞིན་དུ༔ བདེ་གཤེགས་སྙིང་པོས་འགྲོ་ལ་ཁྱབ༔ སེམས་ཅན་སངས་རྒྱས་སྙིང་པོ་ཅན༔ སྐུ་དང་ཡེ་ཤེས་ཐིག་ལེ་དང་༔ འོད་དང་རང་རིག་ངོ་བོར་གནས༔ སྐུ་ནི་རྣམ་པ་གསུམ་དུ་འདུས༔ རིག་པ་རང་སྣང་སྐུ་དང་གཅིག༔ དངས་མ་འདུས་པའི་སྐུ་དང་གཉིས༔ མཚན་ཉིད་འཛིན་པའི་སྐུ་དང་གསུམ༔ རིག་པ་རང་སྣང་སྐུ་རྣམས་ནི༔ དབང་པོ་ལྔ་དང་ཕུང་པོ་ལྔ༔ ཁམས་ལྔ་སྐྱེ་མཆེད་ཡུལ་ཅན་ནི༔ ཉོན་མོངས་ལ་སོགས་རྣམ་རྟོག་གོ༼པར་དག༽༔ ལྷ་དང་ལྷ་མོའི་རང་བཞིན་ཡིན༔ དངས་མ་འདུས་པའི་སྐུ་རྣམས་ནི༔ རང་རང་མཚན་ཉིད་འཛིན་པའི་སྐུ༔ ཡེ་ཇི་བཞིན་པའི་སྐུ་གཉིས་སོ༔ མཚན་ཉིད་འཛིན་པའི་སྐུ་རྣམས་ནི༔ རྣམ་པར་མི་ཕྱེད་རོལ་བའི་སྐུ༔ དག་པ་སྤྱི་ཕུད་ཆེན་པོའི་སྐུ༔ རིག་པ་རྗེས་སུ་འཛིན་པའི་སྐུ༔ ཡེ་ཇི་བཞིན་པའི་སྐུ་རྣམས་ནི༔ ཀ་དག་ཆེན་པོའི་སྐུ་དང་གཅིག༔ ཡེ་ཐོག་དང་པོའི་སྐུ་དང་གཉིས༔ ཡེ་ཐོག་མི་འགྱུར་སྐུ་དང་གསུམ༔ སྐུ་གསུམ་རང་རྫོགས་སྐུ་དང་བཞི༔ འབྲས་བུ་རྫོགས་ལྡན་སྐུ་དང་ལྔའོ༔ འདི་རྣམས་ཀུན་ཀྱང་སྐུ་གསུམ་མོ༔ ཆོས་སྐུ་སྤྲོས་པ་མེད་རྣམས་དང་༔ ལོངས་སྐུ་འཛིན་མེད་ཆེན་པོ་དང་༔ སྤྲུལ་སྐུ་འགགས་མེད་ཆེན་པོ་དང་༔ རྣམ་པ་གསུམ་དུ་འདུས་པའོ༔ རེ་རེ་ལའང་གསུམ་གསུམ་སྟེ༔ དགུ་ཕྲུགས་དག་ཏུ་ངོ་ཡང་སྤྲད༔ མི་འགྱུར་རང་དག་རིག་པའི་སྐུ༔ བརྡལ་ཁྱབ་ཆེན་པོའི་རང་བཞིན་སྐུ༔ ཀུན་ཟླུམ་ཉག་གཅིག་ཐིག་ལེའི་སྐུ༔ སྣ་ཚོགས་རང་གྲོལ་ལྷུན་གྲུབ་སྐུ༔ མཚན་ཉིད་འཛིན་པ་རིགས་ལྔའི་སྐུ༔ རང་གསལ་མ་འདྲེས་ཡོངས་རྫོགས་སྐུ༔ མ་དག་པ་ཡི་སྤྲུལ་སྐུ་དང་༔ འགྲོ་དྲུག་འདུལ་བའི་སྤྲུལ་སྐུ་དང་༔ རང་བཞིན་སྤྲུལ་པའི་སྐུ་དང་གསུམ༔ འདི་རྣམས་སྐུ་ཡི་ངོ་བོ་ཡིན༔ རང་བཞིན་གནས་པའི་སྐུ་རྣམས་སོ༔ ས་མ་ཡ༔ ཡེ་ཤེས་ལ་ཡང་རྣམ་པ་གཉིས༔ གཞི་གནས་རང་བབ་ཡེ་ཤེས་དང༔ མཚན་ཉིད་འཛིན་པའི་ཡེ་ཤེས་སོ༔ གཞི་གནས་ཡེ་ཤེས་རྣམ་པ་གསུམ༔ ངོ་བོ་ཀ་དག་ཡེ་ཤེས་དང་༔ རང་བཞིན་ལྷུན་གྲུབ་ཡེ་ཤེས་དང་༔ ཐུགས་རྗེ་རང་སྣང་ཡེ་ཤེས་སོ༔ མཚན་ཉིད་འཛིན་པ་རྣམ་པ་ལྔ༔ ཆོས་ཀྱི་དབྱིངས་ཀྱི་ཡེ་ཤེས་དང་༔ མེ་ལོང་མཉམ་ཉིད་སོ་སོར་རྟོག༔ བྱ་གྲུབ་ཡེ་ཤེས་རྣམ་ལྔའོ༔ འོད་ལ་རྣམ་པ་གཉིས་སུ་འདུས༔ རང་གསལ་ཁ་དོག་འཛིན་པའི་དོན༼འོད༽༔ དཀར་སེར་དམར་ལྗང་མཐིང་ཀའོ༔ མི་གནས་རང་སར་དག་པ་ནི༔ རང་རིག་དྲི་མ་མེད་པ་ཡིན༔ སྣང་བ་གང་ཡང་མེད་པས་དཀར༔ རིག་པ་མ་བཙལ་བཞག་པ་སྟེ༔ ཡུལ་སྣང་རང་སར་དག་པས་སེར༔ རང་རིག་ཆགས་པ་མེད་པ་སྟེ༔ ཤེས་པ་གང་ཡང་མི་དམིགས་དམར༔ བྱ་བྱེད་ཀུན་ལས་འདས་པས་ལྗང་༔ དམིགས་གཏད་བྲལ་བས་མཐིང་ཀའོ༔ ཐིག་ལེའང་ག སུམ་དུ་འདུས་སོ༔ གཞི་འཛིན་སྣང་ལམ་འབྲས་བུའོ༔ གཞི་འཛིན་ཐིག་ལེ་རྣམ་པ་གཉིས༔ རང་བཞིན་འོད་ཀྱི་ཐིག་ལེ་དང་༔ མ་བཅོས་ཀུན་བཟང་ཐིག་ལེའོ༔ སྣང་བ་ལམ་གྱི་ཐིག་ལེ་ནི༔ ཀུན་རྫོབ་རྒྱུ་ཡི་ཐིག་ལེ་དང་༔ གནས་པ་དོན་གྱི་ཐིག་ལེའོ༔ འབྲས་བུ་སྨིན་པའི་ཐིག་ལེ་གསུམ༔ འོད་ཟེར་སྨིན་པའི་ཐིག་ལེ་དང་༔ ཡེ་ཤེས་སྨིན་པའི་ཐིིག་ལེ་དང་༔ རིག་པ་སྨིན་པའི་ཐིག་ལེའོ༔ ཀུན་རྫོབ་ཐིག་ལེ་འདི་ལྟ་སྟེ༔ ཕོ་གཡས་མོ་གཡོན་རྩ་ལ་གནས༔ ཕ་ཡི་རྒྱུ་དང་མ་ཡི་མངལ༔ འབྱུང་བ་འདུས་པའི་དངས་མ་སྟེ༔ འདོད་ཆགས་ཀུན་གྱི་རང་བཞིན་ཡིན༔ དེ་རྣམས་ཀུན་ལ་དམར་པོར་འབྱུང་༔ ཕ་ཡི་དངས་མ་རུས་པ་སྟེ༔ མ་ཡི་དངས་མ་ཤ་དང་ཁྲག༔ སྙིགས་མ་འདུས་པའི་ཐིག་ལེ་ནི༔ ཕོ་ལ་དཀར་པོ་འབྱུང་བའོ༔ དེ་ཕྱིར་འབྱུང་བ་འདུས་པས་གཟུགས་སུ་སྨིན༔ བྱང་ཆུབ་སེམས་ཀྱི་ཐིག་ལེ་དང་༔ དྲན་བསམ་བྱུང་ཚོར་རིག་པར་ཤར༔ སྐྱེ་བ་རྣམ་བཞི་ཐམས་ཅད་ཀྱང་༔ འབྱུང་བ་འདུས་པའི་ས་བོན་དང་༔ བྱང་ཆུབ་སེམས་ཀྱི་ས་བོན་གཉིས༔ རང་ཆས་ཉིད་དུ་འཛོམ་པ་ལས༔ སྐྱེ་བ་ཉིད་ནི་ལེན་པའོ༔ དེ་ཡང་ལུས་ཅན་ཐམས་ཅད་ཀུན༔ ཐིག་ལེ་དཀར་དམར་གཉིས་ལས་བྱུང་༔ དེ་ལྟར་ཕུང་པོའི་རྟེན་གཞི་ནི༔ ཀུན་རྫོབ་རྒྱུ་ཡི་ཐིག་ལེ་ཡིན༔ ཆགས་འཛིན་དར་རྒུད་ཐམས་ཅད་ཀྱང་༔ དཀར་དམར་ཐིག་ལེ་གཉིས་པོ་ཡི་༼ཡིན༽༔ དོན་དམ་ཐིག་ལེ་རྣམ་པ་གཉིས༔ རང་གནས་རྒྱུ་ཡི་ཐིག་ལེ་དང་༔ སྣང་སྟོང་དག་པའི་ཐིག་ལེའོ༔ དེ་ཡང་དེ་གཉིས་གཅིག་གི་ཚུལ༔ སེམས་ཅན་ཀུན་གྱི་སྙིང་གི་ནང་༔ འོད་ཟེར་འདུས་པའི་ཐིག་ལེ་ནི༔ ཚོན་སྣ་ལྔ་ཡི་གྲུ་གུ་བཞིན༔ ཁྲ་ཡི་མིག་གམ་སྟག་གི་མིག༔ རྨ་བྱའི་མདངས་ལྟར་ཡོད་པའོ༔ སྐྱེས་བུ་གོམས་པ་ཐམས་ཅད་ལ༔ དང་པོ་འོད་ཀྱི་སྣམ་བུར་གསལ༔ གཉིས་པ་འོད་ཀྱི་ཟེར་ཐག་ལ༔ གསུམ་པ་ཐིག་ལེའི་མུ་ཁྱུད་འཆར༔ དེ་ནི་དོན་དམ་གནས་ལུགས་སོ༔ ས་མ་ཡ༔

འོད་ཟེར་སྨིན་པའི་ཐིག་ལེ་ནི༔ གྱེན་ལ་འགྲེངས་ཏེ་འཇའ་ཚོན་འདྲ༔ འདི་ལ་གོམས་པས་འཇའ་ཚོན་མཐོང༔ ཡེ་ཤེས་སྨིན་པའི་ཐིིག་ལེ་ནི༔ རྩིབས་ཤར་ཉི་མའི་དཀྱིལ་འཁོར་འདྲ༔ འདི་ལ་གོམས་པས་རང་སྣང་མཐོང་༔ རིག་པ་སྨིན་པའི་ཐིག་ལེ་མུ་ཁྱུད་བཅས༔ རང་གསལ་ཟླུམ་པོ་འདི་ལ་གང་གོམས་པ༔ དག་པ་ཆེན་པོའི་སྣང་བ་མཐོང་༔ ཐིག་ལེ་རྣམས་ཀྱི་ཕྱི་དབྱིབས་ཟླུམ༔ འདི་ལ་གོམས་པས་འབྲས་བུ་ཐོབ༔ འདི་ནི་ཐིག་ལེའི་ངོ་སྤྲོད་དོ༔

རིག་པ་ལ་ཡང་རྣམ་པ་གཉིས༔ གཞི་འཛིན་པ་དང་མཚན་ཉིད་འཛིན༔ གཞི་འཛིན་རིག་པ་ལུ་གུ་རྒྱུད༔ འདི་ནི་ཡེ་ཤེས་ཆེན་པོའོ༔ མཚན་ཉིད་འཛིན་པའི་རིག་པ་ནི༔ ཡེ་ཤེས་ཀུན་ལ་ཁྱབ་པར་གནས༔ ཞེས་པས་རང་ལུས་གྲུ་བཞི་ལ༔ སྐུ་དང་ཡེ་ཤེས་ཐིག་ལེ་དང་༔ འོད་དང་རང་རིག་གནས་པའི་ཚུལ༔ ངོ་སྤྲོད་ཡང་དག་བཤད་པའོ༔ ས་མ་ཡ༔ སྦས་རྒྱ༔ ཟབ་རྒྱ༔

འདི་ཡི་གཟུགས་ཀྱིས་དཔེའུ་རིས་ཤོག་ཁྲའི་ནང་དུ་ངོ་ཡང་སྤྲད༔ དེས་ན་སེམས་ཅན་ཐམས་ཅད་ལ༔ སྐུ་དང་ཡེ་ཤེས་འོད་ཐིག་ལེ༔ རིག་པ་རང་བྱུང་གནས་མོད་ཀྱང་༔ དེ་ཡི་དོན་ཉིད་མ་རྟོགས་པས༔ འཁྲུལ་བའི་རྒྱུར་གྱུར་འཁོར་བར་འཁྱམས༔ དེ་ཉིད་རྟོགས་པར་བྱ་བ་ལ༔ ཐབས་ཀྱི་ཡན་ལག་འདི་རྣམ་གཅེས༔ ཐོས་པས་ཕྱི་ཡི་སྒྲོ་འདོགས་ཆོད༔ བསམ་པས་ནང་གི་སྒྲོ་འདོགས་ཆོད༔ བསྒོམ་པས་གསང་བའི་སྒྲོ་འདོགས་ཆོད༔ དེ་ལ་སྤྱོད་པ་གལ་ཆེ་བས༔ འཁོར་འདས་རུ་ཤན་ཕྱེ་བ་དང་༔ བརྟུལ་ཞུགས་ལམ་དུ་བསླངས་བ་གཉིས༔ འདིར་ནི་བརྟུལ་ཞུགས་ལམ་བསླངས་ཀྱི༔ སྤྱོད་པ་བྱེ་བྲག་བསྟན་པར་བྱ༔ བུང་བ་ལྟ་བུའི་སྤྱོད་པ་ཡིས༔ ཆོས་རྣམས་ཀུན་གྱི་རོ་ལ་མྱོང་༔ རི་དྭགས་ལྟ་བུའི་སྤྱོད་པ་ཡིས༔ འཁྲུལ་པའི་རྐྱེན་གྱུར་ཡུལ་རྣམས་སྤངས༔ ལྐུགས་པ་ལྟ་བུའི་སྤྱོད་པ་ཡིས༔ འཁྲུལ་བའི་ངག་ནི་རྣམ་པར་སྤངས༔ ཐི་བྱ་ལྟ་བུའི་སྤྱོད་པ་ཡིས༔ གསང་བ་སྔགས་ཀྱི་ཐེ་ཚོམ་བཅད༔ སྨྱོན་པ་ལྟ་བུའི་སྤྱོད་པ་ཡིས༔ གཅིག་ཏུ་གནས་པའི་ཡུལ་རྣམས་སྤངས༔ སེང་གེ་ལྟ་བུའི་སྤྱོད་པ་ཡིས༔ འཇིགས་པའི་སེམས་སྤངས་དུར་ཁྲོད་རྒྱུ༔ ཁྱི་ཕག་ལྟ་བུའི་སྤྱོད་པ་ཡིས༔ གཙང་སྨེའི་རྣམ་པར་རྟོག་པ་སྤངས༔ དོམ་བུ་ལྟ་བུའི་སྤྱོད་པ་ཡིས༔ དྲན་བསམ་ཐོག་བབ་ཉིད་དུ་སྤྱོད༔ བུ་ཆུང་ལྟ་བུའི་སྤྱོད་པ་ཡིས༔ འཁྲུལ་བའི་ཞེན་པ་རྒྱང་རིང་སྤངས༔ ངང་བ་ལྟ་བུའི་སྤྱོད་པ་ཡིས༔ མཐུན་པའི་ཚིག་གིས་འཇིག་རྟེན་དྲངས༔ གླང་ཆེན་ལྟ་བུའི་སྤྱོད་པ་ཡིས༔ འཁོར་བའི་གཡུལ་རྣམས་རབ་གནས་བཟློགཿ རི་སྐེག་ལྟ་བའི་སྤྱོད་པ་ཡིས༔ བུ་དང་དགྲ་ཡི་འདུ་ཤེས་སྤངས༔ རྒྱལ་པོ་ལྟ་བུའི་སྤྱོད་པ་ཡིས༔ འདོད་པའི་ཆོག་ཤེས་དུས་ཚོད་བཅད༔ དྲེའུ་མོ་ལྟ་བུའི་སྤྱོད་པ་ཡིས༔ འཁོར་བའི་ས་བོན་སྤེལ་མི་བྱ༔ བྲམ་ཟེ་ལྟ་བུའི་སྤྱོད་པ་ཡིས༔ གཞན་གྱི་ལོངས་སྤྱོད་ཟས་རྣམས་སྤངས༔ དཔའ་བོ་ལྟ་བུའི་སྤྱོད་པ་ཡིས༔ འཁོར་འདས་གཉིས་ཀྱི་རུ་ཤན་དབྱེ༔ ཆུ་མིག་ལྟ་བུའི་སྤྱོད་པ་ཡིས༔ དྲན་པ་དེ་ཉིད་རང་སར་བཞག༔ མཁའ་ལ་མདུང་བསྐོར་སྤྱོད་པ་ཡིས༔ དངོས་པོ་རྣམས་ལ་ཟང་ཐལ་སྤྱོད༔ བར་སྣང་རླུང་གི་སྤྱོད་པ་ཡིས༔ བཟུང་དང་འཛིན་པའི་རྟོག་པ་སྤངས༔ བྱ་ཁྱུང་ལྟ་བུའི་སྤྱོད་པ་ཡིས༔ གཡང་ས་རྣམས་ལ་རླབས་ཀྱིས་བཅད༔ རི་བོ་ལྟ་བུའི་སྤྱོད་པ་ཡིས༔ འགྱུར་མེད་རང་ཐོག་གཅིག་ཐག་ཆོད༔ ཐེག་ཆེན་ལྟ་བུའི་སྤྱོད་པ་ཡིས༔ སྣང་བ་ཕྱིར་མི་བཟློག་པར་བཅད༔ དེ་ལྟར་སྤྱོད་པ་ཉེར་གསུམ་གྱིས༔ གོ་ལོག་ཚུལ་དུ་མ་ཡེངས་པར༔ རིམ་པ་བཞིན་དུ་བཅད་༼སྤྱད་༽ པར་བྱ༔ སྤྱོད་པ་ལོག་ན་ཆོས་ཉིད་འཆལ༔ ས་མ་ཡ༔

འཁོར་འདས་རུ་ཤན་དབྱེ་བའི་སྤྱོད་པ་ནི༔ སྤྱིར་ན་ཐོད་རྒལ་ཐམས་ཅད་ཡིན༔ མདོར་བསྡུས་སྤྱོད་པ་གསུམ་དུ་འདུས༔ མ་ཆགས་འཛིན་པའི་སྤྱོད་པ་དང་༔ དགག་བསྒྲུབ་མེད་པའི་སྤྱོད་པ་དང་༔ ཆགས་མེད་ཞེན་མེད་སྤྱོད་པའོ༔ མ་ཆགས་འཛིན་པའི་སྤྱོད་པ་ནི༔ མཚན་ཉིད་ཐེག་པའི་སྤྱོད་པ་སྟེ༔ དོན་ལ་ཆགས་པ་ཆེན་པོས་བཅིངས༔ ཐབས་མེད་གྲོལ་བར་ག་ལ་འགྱུར༔ དོན་མེད་སྤྱོད་པ་ཆགས་པ་ཡི༔ འཛིན་པའི་སྤྱོད་པས་རང་རྒྱུད་བཅིངས༔ གྲོལ་བར་མི་ནུས་ཡུན་རིང་གནས༔ ཚུལ་འཆོས་དག་གི་སྤྱོད་པའོ༔ ས་མ་ཡ༔

དགག་བསྒྲུབ་མེད་པའི་སྤྱོད་པ་ནི༔ གསང་སྔགས་ཕྱི་ནང་སྤྱོད་པ་སྟེ༔ ཉོན་མོངས་དག་པར་མི་འདོད་ཅིང་༔ ཡེ་ཤེས་བསྒྲུབ་པར་མི་འདོད་ལ༔ ཚིག་དོན་འབྲེལ་བའི་སྤྱོད་པའོ༔ དོན་གྱི་ཆགས་མེད་མ་ཡིན་ཏེ༔ ཐབས་རྣམས་སྤྱོད་པའི་ཁྱད་པར་འཕགས༔ ཐབས་ཆེན་འཛིན་སྤྱོད་དེ་བཞིན་ནོ༔ དེ་ནི་སྤྱོད་པའི་རྣལ་འབྱོར་ཡང་༔ ཡང་དག་ཨ་ཏིའི་སྤྱོད་པ་མིན༔ ཐབས་ཀྱི་ཁྱད་ཀྱིས་བྱང་ཆུབ་འབྱུང༔ ཁྱད་པར་གཅིག་གི་ངོ་བོ་ལ༔ ཡེ་ཤེས་རྟོགས་པས་འདུ་འབྲལ་མེད༔ ས་མ་ཡ༔ ཆགས་མེད་ཞེན་མེད་སྤྱོད་པ་ནི༔ རྫོགས་ཆེན་ཨ་ཏིའི་སྤྱོད་པ་སྟེ༔ བྱར་མེད་བྱས་མེད་བྱུང་བ་མེད༔ འགྲོ་མེད་འོང་མེད་བྱས་པ་མེད༔ བག་ཆགས་ཐུགས་ལ་ཡེ་ཤེས་འཆར༔ རྒྱུ་བོར་ཡེ་ཤེས་ཞེན་པ་མེད༔ སྣང་བའི་ཡུལ་ལ་སྒྲོན་མ་འཆར༔ སྣང་བཀག་སྒྲོན་མ་ཞེན་པ་མེད༔ ཆགས་མེད་ཞེན་མེད་སྤྱོད་པ་འདི༔ བློ་རྩལ་ལྡན་པའི་སྤྱོད་པ་ཡི༔ ཡང་དག་དོན་རྟོགས་ཞེན་མེད་གནས༔ ཆགས་ཀྱང་ཞེན་མེད་སྤྱོད་པ་ཆེན་པོ་ཡིན༔ འཛིན་པའི་ཡུལ་མེད་ཞེན་པའི་མཐའ་ལས་གྲོལ༔ མ་རིག་གནས་མེད་རྣམ་རྟོག་སེམས་ལས་གྲོལ༔ ས་མ་ཡ༔

སྤྱོད་པའི་རིམ་པ་སོང་ནས་ཀྱང་༔ སྒོམ་པའི་རིམ་པ་འདི་ལྟར་རོ༔ ཡི་གེ་ཨཱ༔ ལ་སེམས་གཏད་པས༔ དངོས་པོའི་ཞེན་པ་རང་སར་བཟློག༔ བསྐྱེད་པ་ལྷ་ལ་སེམས་གཏད་པས༔ ལུས་ཀྱི་དྲི་མ་དག་པར་བྱེད༔ རྡོ་རྗེའི་གླུ་ལ་སེམས་གཏད་པས༔ རང་གཞན་ཡིད་ནི་ཚིམ་པར་བྱེད༔ ཡི་གེ་ཧཱུྃ་ལ་སེམས་གཏད་པས༔ ངག་གི་དྲི་མ་ཐམས་ཅད་སྦྱངས༔ ཡི་གེ་རཾ་ལ་སེམས་གཏད་པས༔ དངོས་པོའི་དྲི་མ་ཐམས་ཅད་སྦྱངས༔ ཡི་གེ་ཧ་ལ་སེམས་གཏད་པས༔ གཏི་མུག་ཐམས་ཅད་ཟད་པར་བྱེད༔ ཡི་གེ་ཕཊཿལ་སེམས་གཏད་པས༔ ལུས་ངག་ཡིད་ལ་གནོད་པ་སྦྱངས༔ སྨིན་མཚམས་ཡི་གེ་སུཾ་བསྒོམ་པས༔ ཡེ་ཤེས་རླུང་ལ་གོམས་པར་འགྱུར༔ ལུ་གུ་རྒྱུད་ལ་སེམས་གཏད་པས༔ དབང་པོ་ལྔ་ཡི་སྒོ་རྣམས་ཁེགས༔ སྣ་རྩེ་སེམས་རྩེ་གཅིག་གཏད་པས༔ འབྱུང་བཞི་འཐོར་བ་རང་སར་སྡུད༔ ལུས་བརྟན་༼རྐྱེན་༽ རང་འོད་སེམས་གཏད་པས༔ བར་དོའི་འོད་ལ་གོམས་པར་འགྱུར༔ མཁའ་ལ་སེམས་ནི་གཏད་པ་ཡིས༔ ཆོས་ཉིད་སྟོང་པ་ཉིད་ལ་གོམས༔ རྣ་བའི་སྒྲ་ལ་སེམས་གཏད་པས༔ སྒྲ་རྣམས་ཐམས་ཅད་ཇི་དགར་སྤྱོད༔ སྙིང་གར་སེམས་ནི་སུས་གཏད་པས༔ བསམ་པ་རང་སར་གནས་པར་སྤྱད༔ སྟོང་ཉིད་ཧད་པོ་༼ཧར་སངས་༽སུས་བསྒོམ་པ༔ དྲན་པ་ཐམས་ཅད་རང་སར་སྟོང་༔ མི་རྟག་པ་ནི་སུས་བསྒོམ་པ༔ འཁོར་བའི་ཆོས་ལ་ཞེན་པ་བཟློག༔ འབྱུང་བ་ལྔ་ལ་སུས་བསྒོམ་པ༔ དེ་ཡིས་སྒྲ་བཞིའི་དོན་ཀུན་རིགས༔ མི་རྟོག་ཡེ་ཤེས་གང་བསྒོམ་པ༔ མཚན་མའི་ཞེན་པ་ཐམས་ཅད་འགག༔ གཉིས་མེད་བདེ་བ་སུས་བསྒོམ་པ༔ འདོད་ཡོན་ཐམས་ཅད་ལམ་དུ་ཁྱེར༔ བར་སྣང་ཁམས་སུ་༼སྟོང་པ་༽ སུས་བསྒོམ་པ༔ རང་གི་སེམས་ལ་དབང་བསྒྱུར་ནུས༔ ཕྱག་རྒྱ་ཆེན་པོ་སུས་བསྒོམ་པ༔ རང་གི་ས་ལ་དབང་བསྒྱུར་ནུས༔ རང་བཞིན་ཤུགས་ཀྱིས་བསྒོམ་པ་ཡིས༔ ལུས་ངག་ཡིད་གསུམ་རྣལ་དུ་ཕེབས༔ རང་བྱུང་ལྟ་བ་བསྒོམ་པ་ཡིས༔ ཉོན་མོངས་ཀུན་གྱི་མགོ་ཡང་གནོན༔ མ་བཅོས་བཞག་པས་བྱུང་ཚོར་འགགས༔ མ་བསྒོམ་གནས་པས་དྲོད་ཚད་རྙེད༔ ཡང་གཅིག་བསྒོམ་པའི་རིམ་པ་ནི༔ བྱང་ཆུབ་སེམས་དཔའི་བསྒོམ་པ་དེ༔ སེམས་འཛིན་པ་ནི་མ་ཡིན་ཞིང་༔ ངང་ངམ་ཤུགས་ཀྱིས་སྐྱེ་བའོ༔ བསྒོམ་གནས་ཀློང་དུ་གྱུར་པའོ༔ ཟས་ཀྱི་འདུ་ཤེས་སྤངས་པའོ༔ སེམས་ལ་གནས་པ་རྣམས་ཀྱིས་སྤྱོད༔ རྣམ་རྟོག་ངང་གིས་མེད་པའོ༔ དེས་ཀྱང་དོན་ཆེན་མཚོན་མི་ནུས༔ ཁ་སྣའི་དབུགས་ནི་བསྡམས་བྱས་ནས༔ རྟོག་མེད་ཡིད་ལ་འགྱུ་བ་ནི༔ ཤེས་པ་གཅིག་གི་ངོ་བོ་སྟེ༔ འཕྲལ་གྱི་རྣམ་རྟོག་མེད་ན་ཡང་༔ ཡང་དག་དོན་གྱིས་མཚོན་མི་ནུས༔ དེ་བཞིན་གཤེགས་པའི་བསྒོམ་པ་ནི༔ ནམ་མཁའི་མཐོངས་སུ་ཤེས་པར་གྱིས༔ དེ་ལ་གོམས་པར་གྱུར་པས་ན༔ ཡེ་ཤེས་སྣང་བ་ལྷུག་པར་འཆར༔ ཡང་དག་ལམ་ཡང་དེ་བཞིན་ནོ༔ འཛིན་མེད་ལམ་ཡང་དེ་བཞིན་ལ༔ བསྒོམ་མེད་ཡེངས་མེད་ངང་ལ་གནས༔ སལ་ལེ་ཧྲིག་གེ་ཝལ་ལེ་བ༔ ཡང་དག་ཆེན་པོའི་བསྒོམ་པའོ༔ ད་ནི་ལྟ་བ་བཤད་པར་བྱ༔ ལྟ་བ་ལ་ཡང་རྣམ་པ་གསུམ༔ ཆེན་པོས་༼ཆོས་ཅན་༽ ལྟ་བའི་ལྟ་བ་དང་༔ ཆོས་ཉིད་ལྟ་བའི་ལྟ་བ་དང་༔ རང་རིག་ལྟ་བའི་ལྟ་བའོ༔ ཆོས་ཅན་མཚན་མར་སྣང་བ་དང་༔ མིག་གི་དབང་པོ་མ་འགགས་པས༔ སེམས་ཀྱིས་ལྟ་བ་ལེགས་པ་ཡིན༔ རང་སྣང་རང་གིས་ལྟ་བ་ཡིན༔ ཆོ་འཕྲུལ་ཕྱི་ཡི་སྣང་བ་སྟེ༔ དམིགས་པ་མེད་པའི་ཡུལ་རྣམས་ཀུན༔ རང་བཞིན་མེད་པར་གང་གོམས་པ༔ འདི་ནི་སྣང་སྟོང་གཉིས་སུ་མེད༔ ཚོགས་དྲུག་མ་འགགས་ལྷུག་པའོ༔ རྟོག་མེད་གསལ་བའི་ངོ་བོ་ལ༔ རང་བྱུང་ཆེན་པོ་ཤེས་གྱུར་ན༔ ཆོས་ཅན་ཕྱི་ཡི་ལྟ་བ་ཡིན༔

ད་ནི་ཆོས་ཉིད་ནང་གི་ལྟ་བ་བཤད༔ ཆོས་ཉིད་རིག་པ་སྐྱེ་མེད་ལ༔ རྣམ་རྟོག་མཚན་མ་ངང་གིས་མེད༔ རིག་པ་དགག་བསྒྲུབ་མེད་པ་ལ༔ ཞེན་པའི་སྤྱོད་པ་ག་ལ་ཡོད༔ ཆོས་ཉིད་རྟོག་པར་བྱེད་པ་ནི༔ བྱར་མེད་ངང་དུ་ཤེས་པར་བྱ༔ བྱ་བྱེད་བྲལ་བའི་རིག་པ་ནི༔ གང་གི་ཕྱོགས་སུ་མ་ལྷུང་ན༔ ལྟ་བ་ཆེན་པོ་ཞེས་བྱའོ༔ དེ་ཡང་རྟོགས་བྱེད་འདི་ལྟ་སྟེ༔ འདུ་ཤེས་གཅིག་པའི་ཤེས་རབ་ཀྱིས༔ བློ་གདེང་ཡིད་ཆེས་གྱུར་པ་དང་༔ ཆོས་ཉིད་སྐྱེ་མེད་རྟོགས་གྱུར་ན༔ ཡེ་ཤེས་ཆེན་པོ་སྐྱེ་བར་འགྱུར༔ ཆོས་ཉིད་སྐྱེ་མེད་སྣང་བ་ལ༔ སྐྱེ་བྱ་སྐྱེ་བྱེད་གཉིས་ལྟར་སྣང་༔ དེ་ཡང་ཆོས་ཉིད་ཆེན་པོ་ནི༔ གཅིག་མ་ཤེས་པས་གཉིས་སུ་བྱུང་༔ གཅིག་ཤེས་ན་ནི་ཀུན་ཀྱང་གྲོལ༔ དེ་ལྟར་སྐྱེ་མེད་དོན་རྟོགས་ན༔ ཆོས་ཉིད་ལྟ་བའི་ལྟ་བར་འདོད༔ ས་མ་ཡ༔ རང་རིག་ལྟ་བ་འདི་ལྟར་རོ༔ ཤེས་པ་ངང་གིས་མ་གཡོས་པས༔ དབྱིངས་དང་རིག་པ་སུས་མཐོང་བ༔ དེ་ནི་སངས་རྒྱས་ས་ལ་གོམས༔ བཞག་པ་རྣམས་ཀྱི་རང་རྒྱས་ཐེབ༔ དགོངས་པ་རྣམས་ཀྱི་དུས་ཚོད་བསྟན༔ ཟད་པ་རྣམས་ཀྱི་དག་པ་བསྟན༔ རྟེན་པའི་གདེང་གིས་མི་༼བརྟན་པས་གདེང་གི་ཕྱིར་༽ བཟློག་རྟགས༔ དབྱིངས་ཀྱི་སྒྲོན་མ་སུས་མཐོང་བ༔ ཆོས་ཀྱི་དབྱིངས་ལ་མངོན་དུ་སྤྱོད༔ ཐིག་ལེའི་སྒྲོན་མ་སུས་མཐོང་བ༔ རྩོལ་བྱས་རྣམས་ཀྱི་དྲོད་གནས་ཐོབ༔ ཤེས་རབ་སྒྲོན་མ་སུས་མཐོང་བ༔ ཕྱི་དང་ནང་དང་ཆོས་ཉིད་རྟོགས༔ ༼སྤྱི་དང་རང་གི་མཚན་ཉིད་རྟོགས༔ ༽ ཆུ་ཡི་སྒྲོན་མ་སུས་མཐོང་བ༔ དབང་པོ་རྣམས་ལ་ཐོགས་མེད་འཆར༔ ལུ་གུ་རྒྱུད་ལ་སུས་གོམས་པ༔ རིག་པ་རྣམས་ཀྱི་སྲང་ལ་ཐེབས༔ འདི་རྣམས་ཀུན་གྱི་བྱུང་བ་ནི༔ གནས་ནི་ཙིཏྟའི་ནང་ན་གནས༔ ལམ་ནི་རྩ་གཞི་༼བཞི་༽འགྱུ་བྱེད་རླུང་༔ འཆར་བྱེད་སྒོ་ནི་མིག་ལགས་སོ༔ ནམ་མཁའ་དངས་པའི་ཡུལ་ལ་འཆར༔ དེ་ནི་སྐུ་ལྔའི་དཀྱིལ་འཁོར་རོ༔ དུས་ནི་བར་དོའི་དུས་སུ་འཆར༔ ངོ་བོ་འགྱུར་མེད་ཆེན་པོའི་ས༔ རང་བཞིན་འགགས་མེད་ཀུན་ལ་ཁྱབ༔ ཐུགས་རྗེའི་སྣང་བ་མ་འགགས་འཆར༔ རྒྱུ་ནི་ཀུན་ལ་དེ་བཞིན་གནས༔ རྐྱེན་ནི་ངོ་སྤྲོད་ཉེར་གཅིག་གོ༔ རྒྱུ་རྐྱེན་འཛོམས་ན་རང་རིག་རྟོགས༔ རྟོག་མེད་གསལ་བའི་ངོ་བོ་ལ༔ འཛིན་པའི་རྣམ་རྟོག་ངང་གིས་མེད༔ འཛིན་མེད་རང་གསལ་དེ་བཞིན་ནོ༔ འཛིན་མེད་འགྲོ་འོང་མེད་པའི་ཆོས༔ སངས་རྒྱས་ཀུན་གྱི་དགོངས་པ་ཡིན༔ རང་གསལ་རྟོག་མེད་ཆེན་པོ་ནི༔ མ་བསྐྱེད་མཁའ་ལ་གསལ་བའོ༔ དེ་ལྟར་རྟོགས་པའི་རྣམ་པ་དེ༔ རང་རིག་ལྟ་བའི་ལྟ་བ་ཡིན༔ འདི་ཉིད་རྣམ་པ་ཐམས་ཅད་ཀུན༔ རང་བཞིན་གནས་པའི་བར་མ་དོར༔ འདི་རྣམས་གོམས་པའི་སྐྱེས་བུ་དེ༔ འབྱུང་བ་ཐམས་ཅད་རང་དེངས་སོ༔ རང་ལུས་འོད་སྐུར་ཡལ་བའོ༔ ཀློང་ཡངས་སྲོག་གི་ཡང་བཅུད་དང་༔ དབང་བཞི་དོན་གྱི་རྒྱབ་ཡིག་ཡིན༔ ཁྱད་པར་ཚིག་དབང་ངོ་སྤྲོད་དོ༔ ངོ་སྤྲོད་ཉག་༼ཉེར་༽ གཅིག་གི་རྒྱབ་ཆོས༔ ས་མ་ཡ༔ ངོ་སྤྲོད་ཐམས་ཅད་ཚར་ནས་བར་དོའི་ཆོས་འདི་བཤད༔ བདག་འདྲ་པདྨ་འབྱུང་གནས་ཀྱིས༔ སྐྱེ་གནས་བར་དོར་རང་སྣང་ཐག་ཀྱང་བཅད་༔ སྐྱེ་གཉིས་བར་དོར་མངོན་སངས་རྒྱས༔ ས་མ་ཡ༔ གཏེར་རྒྱ༔ སྦས་རྒྱ༔ ཟབ་རྒྱ༔ གཏེར་སྟོན་རྡོ་རྗེ་གླིང་པས་བཏོན༔

བདག་འདྲ་པདྨ་འབྱུང་གནས་ངས༔ ཨ་ཏི་རྒྱུད་ཀྱི་ཁོང་སྙིང་ཕྱུང་༔ འདི་ནི་འཆི་ཁའི་བར་དོའོ༔ བར་དོ་གཉིས་པ་ཞེས་སུ་གྲགས༔ གང་ཞིག་སྐྱེས་བུ་དེ་ཉིད་ནི༔ འཆི་རྐྱེན་ནད་ཀྱིས་འབྱུང་བ་འཁྲུགས༔ ལུས་ངག་ཡིད་གསུམ་སྡུག་བསྔལ་ལོ༔ དུས་ཆེན་མ་བྱུང་འཆི་རྟགས་ལ༔ ཆོ་ག་རིམ་གྲོས་འཆི་བ་བཟློག༔ དུས་ཆེན་བབ་པར་གྱུར་པ་ལ༔ སུས་ཀྱང་མི་བཟློག་ཐམས་ཅད་འགྲོ༔ ལུས་འདི་མི་རྟག་མགྲོན་པོ་འདྲ༔ མགྲོན་པོ་ཡུན་རིང་བསྡད་པ་མེད༔ ངག་འདི་མི་རྟག་བྲག་ཆ་འདྲ༔ བྲག་ཆས་གཏན་སྐད་ཐུབ་པ་མེད༔ སེམས་འདི་མི་རྟག་བྱིའུ་ཆུང་འདྲ༔ བྱིའུ་ཆུང་ཤིང་ཁར་གཏན་མི་གནས༔ དབུགས་འདི་མི་རྟག་ནམ་མཁའི་ན་བུན་འདྲ༔ ན་བུན་ནམ་ཡལ་ཅི་ཆ་ཡོད༔ བློ་འདི་བར་སྣང་འཇའ་དང་འདྲ༔ འཇའ་ཚོན་ནམ་མཁར་ནམ་ཡལ་ལམ༔ རྣམ་ཤེས་ནམ་མཁའི་བྱ་སྒྲོ་འདྲ༔ བྱ་སྒྲོ་རླུང་གིས་ནམ་ཁྱེར་རམ༔ གཉེན་བཤེས་ཚོང་དུས་མགྲོན་པོ་འདྲ༔ ལུས་པ་ཐམས་ཅད་ནམ་བྲལ་ལམ༔ ནོར་རྫས་རྩ་ཁའི་ཟིལ་པ་འདྲ༔ ཟིལ་པ་ཉི་མའི་ནམ་སྐེམ་མམ༔ བདག་འཛིན་མགར་བའི་ལྕམ་པ་འདྲ༔ ལྕམ་པའི་ཁ་འདི་ནམ་བྲལ་ལམ༔ ཚེ་འདི་མི་རྟག་རྨི་ལམ་འདྲ༔ རྨི་ལམ་དངོས་པོར་གྲུབ་པ་མེད༔ ཚེ་འདི་མི་རྟག་འབབ་ཆུ་འདྲ༔ འབབ་ཆུ་བཞིན་དུ་སྡོད་པ་མེད༔ ཚེ་འདི་མི་རྟག་རླུང་དང་འདྲ༔ རླུང་ནི་སྐྱེས་བུས་བཟུང་བ་མེད༔ ཚེ་འདི་ཡུན་ཐུང་སྤྲུལ་པ་འདྲ༔ སྤྲུལ་པ་རྟག་ཏུ་གནས་པ་མེད༔ ཚེ་འདི་མི་རྟག་སྒྱུ་མ་འདྲ༔ སྒྱུ་མ་གཏན་ས་བཟུང་བ་མེད༔ ཚེ་འདི་མི་རྟག་ཆར་སྤྲིན་འདྲ༔ ཆར་སྤྲིན་དུས་ཚོད་བཟུང་བ་མེད༔ གང་ཞིག་བདུད་ཀྱི་ལམ་ཞུགས་ཚེ༔ རྒྱལ་པོས་ཁ་དྲག་རྩོད་པ་མེད༔ འཆི་བདག་བདུད་ཀྱིས་བཟུང་ནས་འགྲོ༔ ཁ་དམན་ཞུ་བ་འབུལ་ས་མེད༔ ཤ་ཟ་སྲིན་པོས་དེད་ནས་འགྲོ༔ བཟུར་མེད་གཤིན་རྗེའི་འཕྲང་ལ་འགྲོ༔ འཇིགས་པའི་བདུད་གྱིས་ལམ་མཁན་བྱེད༔ ཕོ་ཉའི་ཚོགས་ཀྱིས་རྒྱབ་ནས་དེད༔ དེ་ཚེ་སྐྱབས་གནས་རེ་ས་མེད༔ བར་ལམ་གཅིག་པའི་འཕྲང་གཅིག་དེ་ན་མཆིས༔ དེ་དུས་བླ་མའི་གདམས་ངག་དགོས༔ བར་དོའི་ཡེ་ཤེས་ངོས་གཟུང་བྱ༔ དཀོན་མཆོག་གསུམ་ལ་རྒྱབ་བརྟེན་བྱ༔ གང་ཞིག་སྐྱེ་བོ་ཕོ་མོ་རྣམས༔ འཆི་ལུགས་བསམ་གྱིས་མི་ཁྱབ་སྟེ༔ གནས་ལུགས་འཆི་དང་དྲག་པོར་འཆི༔ ནད་རིགས་བཞི་བརྒྱ་རྩ་བཞི་དང་༔ བགེགས་རིགས་སྟོང་ཕྲག་བརྒྱད་ཅུ་ཡིས༔ བར་ཆོད་བྱས་ནས་འཆི་བ་སྟེ༔ ལ་ལ་མེ་དང་ཆུ་ལ་འཆི༔ ལ་ལ་བྲག་དང་ས་ཡིས་འཆི༔ ལ་ལ་ཤིང་དང་རླུང་གིས་འཆི༔ ལ་ལ་གྲི་དང་མཚོན་གྱིས་འཆི༔ ལ་ལ་དུག་དང་དམར་གྲིར་འཆི༔ ལ་ལ་རླུང་མཁྲིས་བད་ཀན་འཆི༔ ལ་ལ་སྡེ་བརྒྱད་དྲག་པོས་གསོད༔ རྒས་ཤིང་འཆི་བ་རེ་རེ་ཙམ༔ དེ་ལྟར་འཆི་ལུགས་གཅིག་ལ་ནི༔ མི་འཆི་བ་ནི་གཅིག་ཀྱང་མེད༔ ཐམས་ཅད་ལམ་ཆེན་དེར་འགྲོ་བས༔ དེ་ལ་སྔ་ཟོན་འདི་ལྟར་བྱ༔ དབེན་པའི་གནས་སམ་ལུང་སྟོང་དུ༔ འཆི་བའི་དུས་ཚོད་རྟགས་རྣམས་འབྱུང་༔ སྤྱིར་ན་འབྱུང་བཞིའི་ཕུང་པོ་འདི༔ སྟོབས་ཆུང་དབང་པོ་མི་གསལ་ཞིང་༔ ལུས་ངག་སེམས་ཚིག་ཟ་བ་དང་༔ ནོར་དང་ལོངས་སྤྱོད་གོད་པ་དང་༔ རང་སེམས་ཕྱད་ཕྱོད་རྨི་ལམ་འཁྲུག༔ གཤིས་ལུགས་ཤ་མདོག་འགྱུར་བ་རྣམས༔ བར་ཆོད་འབྱུང་བའི་སྔ་རྟགས་ཡིན༔ ཕྱི་རྟགས་བལྟས་པས་ཐམས་ཅད་ནི༔ གཞན་དང་མཐུན་པར་རང་ཆོག་བྱ༔ ཡན་ལག་སེན་མོའི་བཀྲག་མེད་ན༔ ཟླ་བ་བདུན་ནས་འཆི་བར་ངེས༔ སྐྱེས་བུའི་མིག་གི་སྤྲིས་ཡལ་ན༔ ཟླ་བ་ལྔ་ནས་འཆི་བར་ངེས༔ འཆི་བདག་གཤིན་རྗེ་ཉིད་ལ་ངན༔ ཅིས་ཀྱང་མི་བཟློག་ཉེར་གཅིག་འཆི༔ རྐང་པའི་ལོང་བུ་ཕྱིར་ལོག་ན༔ ཟླ་བ་གཅིག་ནས་འཆི་བར་ངེས༔ ལྟག་སྐྲ་གྱེན་ལ་ལོག་པ་ནི༔ ཟླ་བ་གསུམ་ནས་འཆི་བར་ངེས༔ གང་ཞིག་རྨི་ལམ་དག་ལ་ཡང་༔ ཟས་སུ་མི་གཙང་ཟ་བ་དང་༔ གོས་སུ་རེ་བ་གོན་པ་དང་༔ མེ་ཏོག་དམར་པོ་ཐུ་བ་དང་༔ བོང་ནག་ཕྱིར་ལོག་ཞོན་པ་དང་༔ སྤྲེལ་དཀར་ཁྱི་དཀར་སྣ་དམར་ཞོན༔ བྲ་བོ་ཁུར་ནས་ནུབ་ལ་བརྒལ༔ སྟག་གཟིག་ཟ་འོག་ལྷམ་ཁྲ་གྱོན༔ མགོ་ལ་དར་ནག་ཕོད་དམར་བཙུགས༔ འདི་རྣམས་རིམ་པར་བྱུང་ཡང་འཆི༔ གང་ཞིག་ནད་ཀྱིས་ཐེབས་པ་ལ༔ སོ་ལ་དྲེག་པ་ནག་པོར་ཆགས༔ ཞག་པོ་དགུ་ལ་འཆི་བའོ༔ སྣ་ཞོམ་སྣ་ནས་གཏམ་བྱུང་བ༔ ཞག་གཅིག་དག་ནས་འཆི་བར་བྱུང་༔ ཡན་ལག་ཡང་ཡང་བརྐྱང་བསྐུམ་བྱེད༔ དེ་ཡང་ཉི་མ་བདུན་ནས་འཆི༔ མིག་གཉིས་འབྲུ་ཚུགས་བལྟ་བ་ན༔ ཞག་པོ་དགུ་ནས་འཆི་བར་འགྱུར༔ མིག་གིས་ཚིག་༼ཚུགས་༽ རྣམས་ཕར་ཚུར་འཁྲུགས༔ དེ་ཡང་མྱུར་དུ་འགུམ་པའོ༔ འགྲམ་པ་གཉིས་ཀྱི་ཤ་ཤོར་ན༔ ཟླ་བ་ཕྱེད་ནས་ངེས་པར་འཆི༔ དབུགས་ནི་མི་སྡུད་ཡང་ཡང་རྒོད༔ དེ་ཡང་ཟླ་བ་དྲུག་ནས་འཆི༔ སྣ་ཡི་རྐ་བ་ཞོམ་པ་ན༔ ཞག་པོ་བདུན་ནས་ངེས་པར་འཆི༔ ལྕེ་ནི་ནང་སྡུད་བརྟིབ་པ་ནི༔ ཞག་པོ་བཞི་ལ་ངེས་པར་འཆི༔ སྟེང་འོག་སོ་གཉིས་འཐམ་གྱུར་ན༔ ཞག་པོ་གསུམ་ནས་ངེས་པར་འཆི༔ འགྲམ་གཡོན་ལྕེ་རྩ་ནག་པ་ན༔ ཞག་པོ་གཉིས་ན་ངེས་པར་འཆི༔ རྣ་བ་མགོ་ལ་འབྱར་བ་ན༔ ཞག་གཅིག་ནས་ནི་འཆི་བར་ངེས༔ རྣ་བའི་འུར་སྒྲ་ཆད་ནས་ཞག་གཉིས་ཐུབ༔ ལངས་འདུག་བྱ་བ་སྤོ་ན་མོད་ལ་འཆི༔ བྲང་གིས་ལྷེན་སྣ་ཞོམ་ན་ཞག་པོ་དྲུག་ནས་འཆི༔ གཉིད་ལོག་རྩ་ཉིད་མེད་གྱུར་ན༔ དེ་ཡང་ཟླ་བ་ཕྱེད་ནས་འཆི༔ གླུ་ལེན་འཛུམ་མདངས་ཆེ་བ་ནི༔ མོད་ལ་འགུམ་པར་ཤེས་པར་བྱ༔ གལ་ཏེ་རང་དོན་ལྷུར་ལེན་ན༔ བརྟགས་པའི་རིམ་པ་འདི་ལྟར་བྱ༔ སྤྲིན་མེད་ནམ་མཁའ་དྭངས་པ་ལ༔ ཟླ་བ་ཉ་རྒྱས་དྭངས་པའི་དུས༔ རང་ཉིད་གཅེར་བུར་ཕྱུང་བྱས་ནས༔ གྲིབ་མའི་སྙིང་གར་མདུང་གཅིག་བཞག༔ དེ་ལ་མིག་གཉིས་འབྲུ་ཚུགས་བལྟ༔ མ་བཟོད་པ་དང་ནམ་མཁའ་ལ༔ ཡར་ཡར་བཏེག་ལ་བལྟས་གྱུར་ན༔ རང་གཟུགས་མ་ཚང་མགོ་མེད་ན༔ དེ་ཡང་འཆི་བའི་ཆོ་ག་འབད༔ ལག་ངར་གྱེན་ལ་བསླངས་ནས་ནི༔ རང་ཉིད་སྨིན་ཕྲག་གཅར་ལ་བལྟ༔ རྦད་ཀྱིས་ཆད་པར་གྱུར་པ་ན༔ ཞག་པོ་དགུ་ནི་དག་ལ་འཆི༔ རང་ཉིད་དྲི་ཆུ་སངས་གྱུར་ན༔ དེ་ཡང་མོད་ལ་འཆི་བར་འགྱུར༔ ཆུ་ཟང་ནང་དུ་རང་ཉིད་བལྟ༔ གཟུགས་སུ་མེད་ན་མོད་ལ་འཆི༔ མིག་གཉིས་མནན་ལ་བཙིར་བ་ཡི༔ འོད་ཀོར་མེད་ན་ཞག་གསུམ་དག་ནས་འཆི༔ ནང་པར་ནམ་ལངས་ཉི་ཤར་དུས༔ ཁ་ནུབ་དག་ཏུ་བལྟས་བྱས་ནས༔ རང་ཉིད་སྤྱི་བོའི་དུད་རླངས་བརྟགས༔ དུ་རླངས་མེད་ན་མོད་ལ་འཆི༔ རང་ཉིད་ཐིག་ལེ་གཏན་འཛག་ན༔ དེ་ཡང་མོད་ལ་འཆི་བར་འགྱུར༔ རྩ་སྒོ་མི་ཐུབ་ཆུ་ཤོར་ན༔ དེ་ཡང་མོད་ལ་འཆི་བར་འགྱུར༔ སྤྱི་དང་བྱེ་བྲག་ཐམས་ཅད་དུ༔ ལུས་ཅན་ཀུན་ལ་རྟགས་ཚང་ན༔ འཆི་བར་ངེས་སོ་གདོན་མི་ཟ༔ འཆི་རྟགས་འདི་རྣམས་མཁས་པས་བརྟགས༔ ཡུན་ནི་རིང་ཐུང་འཆི་རྟགས་ལྟོས༔ དེ་ལྟར་རྟགས་རྣམས་ཚངས་གྱུར་ན༔ འཆི་བ་བསླུ་བའི་ཆོ་ག་བྱ༔ ས་མ་ཡ༔ ཀློང་ཡངས་ཨ་ཏི་བཀོད་པ་ལས༔ གང་ཟག་འཆི་ཁའི་བར་དོ་བསྟན༔ གོང་དུ་བཤད་པ་གཞུང་གི་ཚུལ༔ འདི་ཉིད་ངེས་པར་གཏན་ལ་ཕེབས༔ དགའ་རབ་རྡོ་རྗེའི་ཞལ་ཆེམས་སོ༔ ཨོ་རྒྱན་ང་ཡིས་གནད་བསྟན་བཤད༔ གང་དག་སྐྱེ་བོ་ཕོ་མོ་རྣམས༔ འཆི་ལུགས་རྣམ་པ་གཉིས་སུ་འདུས༔ དུས་མ་ཡིན་དང་འབྱུང་བ་ཟད༔ ཐལ་ལུགས་ནང་ནས་མེ་སྟག་ཡར༔ དེ་ལ་བརྟགས་པ་བདག་གཞན་གཉིས༔ དང་པོ་ལ་ནི་འདི་ལྟར་རོ༔ སེན་མོའི་བཀྲག་མདངས་དམར་པོ་ཤོར༔ ཟླ་དགུ་ཉིན་ཕྱེད་ནད་བཏབ་འཆི༔ མིག་མཐའི་དཀར་པོ་ཡལ་བ་ན༔ ཟླ་བ་ལྔ་ལ་ངེས་པར་འཆི༔ ལྟག་ཁུང་སྐྲ་མཚམས་གཅིག་ལོག་ན༔ ཞག་ནི་ཉེར་གཅིག་དག་ལ་འཆི༔ རྐང་པའི་ལོང་བུ་དོན་པ་ན༔ ཟླ་བ་གཅིག་ནས་འཆི་བ་ཡིན༔ ནང་དུ་རྟགས་རྣམས་གོང་དང་མཐུན༔ མིག་གཉིས་དཀར་པོ་ལོག་ལོག་བལྟ༔ ཟླ་བ་གཅིག་ནས་འཆི་བའོ༔

མིག་གཉིས་མཆི་མ་མ་ཐུབ་ན༔ ཞག་པོ་ལྔ་ལ་འགུམ་བའོ༔ ཨེའུ་མང་ཞིང་རླུང་གྱུར་ན༔ མོད་ལ་སྲོག་རྩ་འགགས་ནས་འཆི༔ འགྲུལ་ངོ་འདྲེ་ཁ་ཡོངས་གྱུར་ན༔ དེ་ཡང་མོད་ལ་འགུམ་པའོ༔ ལུས་ལ་ཤིག་རྡུལ་དྲི་མ་མནམ༔ དེ་ཡང་མོད་ལ་འགུམ་པར་འགྱུར༔ ལར་ཡང་ལུས་ངག་ཡིད་གསུམ་རྨུགས༔ ཤིང་ལྟར་རིང་དང་རྡོ་ལྟར་མཁྲེགས༔ ཆུ་ལྟར་རྒྱས་དང་རླུང་ལྟར་གཡོ༔ ས་ལྟར་བརྟན་པའི་ནད་བྱུང་ན༔ དེ་ཡང་མོད་ལ་འཆི་བའོ༔ ས་མ་ཡ༔

ཤིན་ཏུ་དབེན་པའི་གནས་ཉིད་དུ༔ མཆོད་གཏོར་བཤམས་ལ་གསོལ་བ་བཏབ༔ བླ་མ་ཡི་དམ་མཁའ་འགྲོ་མཆོད༔ ནམ་དང་ཉི་མ་འདས་པའི་དུས༔ སྔ་དྲོ་ཕྱི་དྲོ་སེར་བུ་མེད༔ ནམ་མཁའ་འཇམ་པའི་དུས་ཚོད་དུ༔ ལག་པ་གཉིས་སུ་དབྱུག་ཕྲེང་ཐོགས༔ ཡན་ལག་བཞི་པོ་བསྒྲད་ནས་ལངས༔ རང་ཉིད་གྲིབ་མའི་སྙིང་ཁ་རུ༔ ཐུགས་རྗེ་ཆེན་པོའི་སྐུ་གཅིག་བཞག༔ དེ་ལ་ཡུན་རིང་མིག་གཉིས་གཏད༔ དེ་ནས་ཤེས་པ་ནམ་མཁར་འཕངས༔ རང་གཟུགས་ནམ་མཁར་འཆར་བ་དེ༔ རང་ཉིད་གོས་དང་ཁ་དོག་ཐུབ༔ ལུས་པོ་མ་ཚང་མེད་གྱུར་ན༔ ཚེ་ལ་བར་ཆད་མེད་པ་ཡིན༔ ལག་པའི་ཕྱག་མཚན་མ་ཚང་ན༔ བརྟེན་པའི་ལྷ་དང་བྲལ་བ་ཡིན༔ ལོ་ནི་བདུན་ནས་འཆི་བར་ངེས༔ ལག་གཡས་མེད་ན་ལོ་ལྔ་ཐུབ༔ ལག་གཡོན་མེད་ན་ལོ་གསུམ་ཐུབ༔ རྐང་གཉིས་ཆད་ན་ལོ་གཉིས་ཐུབ༔ རྐང་གཡས་ཆད་ན་ཟླ་བརྒྱད་ཐུབ༔ རྐང་གཡོན་ཆད་ན་ལོ་གཅིག་ཐུབ༔ གློ་གཡས་མེད་ན་ཟླ་དགུ་ཐུབ༔ ཁོག་སྟོད་མེད་ན་ཟླ་བ་གསུམ༔ ཁོག་སྨད་མེད་ན་ཟླ་བ་གཅིག༔ གཞོགས་གཡས་མེད་ན་ཞག་ཉེར་གཅིག༔ གཞོགས་གཡོན་མེད་ན་ཟླ་གཅིག་གོ༔ དབྱིབས་ནི་གྲུ་བཞི་བསླུ་བས་བཟློག༔ ཟླུམ་པོ་ཟླ་གམ་ནར་མོ་གསུམ༔ བསླུ་བས་བཟློག་པར་ཤེས་པར་བྱ༔ གྲུ་གསུམ་བྱུང་ན་མི་བཟློག་གོ༔ ཁ་དོག་དཀར་པོ་དབུས་ནས་ཡལ༔ ཀླུ་དང་རྒྱལ་པོས་ཟིན་པའི་རྟགས༔ སྔོན་པོ་རྐང་ནས་ཡལ་བ་ན༔ ཀླུ་དང་མཚོ་སྨན་གནོད་པའོ༔ ནག་པོ་གཡས་སུ་ཡལ་བ་ན༔ བདུད་དང་མ་མོས་ཟིན་པའི་རྟགས༔ དམར་པོ་གཡས་སུ་ཡལ་བ་ན༔ བཙན་དང་འགོ་ལྷས་ཟིན་པའི་རྟགས༔ སེར་པོ་མགོ་ནས་ཡལ་བ་ན༔ ཀླུ་བཙན་རྒྱལ་འགོངས་གནོད་པའི་རྟགས༔

བན་ ནག་པོ་ བུན་ མ་མོ་དང་གཤིན་རྗེས་གནོད་ བྲང་ སེར་པོ་བྲིང་ས་བདག་གནོད་ ཁྲི་ ཁ་དོག་སྣ་ཚོགས་ ཁྲག་ ཤི་འདྲེ་གནོད་རྟགས་ ཁྱུགས༔ སྡེ་བརྒྱད་ལ་སོགས་གཤིན་རྗེའི་རྟགས༔ འདི་རྣམས་ཞིབ་པར་བརྟག་པར་བྱ༔ དབེན་པར་སོས་དལ་ཡང་ཡང་བརྟགས༔ གོས་ཀྱང་དམར་པོ་གོན་ནས་བཟུང་༔ དཀར་པོ་གང་རུང་འཆར་བར་གསལ༔ ཁྲུས་བྱས་གོས་གོན་རྒྱན་མེད་བྱས༔ ཉི་མའི་ནུབ་ཡང་གསལ་བའོ༔ ཉི་མ་ཕྱེད་ཀྱི་དུས་ཚོད་ལ༔ ཁ་ནི་ལྷོ་ཡི་ཕྱོགས་སུ་བལྟས༔ ལག་པ་གཡས་གཡོན་གྲུ་མོ་པུས་ཁར་བསླང་༔ ཁུ་ཚུར་བཅངས་ལ་སྨིན་ཕྲག་བཟུང་༔ མིག་གཉིས་ཟུར་གྱིས་ཁྲིད་ལ་བལྟས༔ ཤིན་ཏུ་ཕྲ་བར་འོངས་པ་སྟེ༔ ཆད་ནས་བཅུ་དགུ་དག་ནས་འཆི༔ ཆུ་རྗིང་ལྡིང་ཀ་ཡོད་པའི་སར༔ ཉི་ནུབ་ནམ་མཁའ་དངས་པའི་དུས༔ ཆུ་འོད་རི་ལ་ཕོག་པ་དང་༔ རང་ཉིད་ལངས་ནས་བལྟས་པ་ཡིས༔ ཆུ་ལ་གྲིབ་མ་ཉིས་བརྩེགས་འཆར༔ དེ་ཡི་སྟེང་ནས་མེད་གྱུར་ན༔ ཆུ་ཡི་མི་ཆུང་སྟོར་བས་དེ༔ བཅུ་དྲུག་ཉི་མ་ཕྱེད་ནས་འཆི༔ ཟས་ལྐུགས་སྤྱོད་ངན་ཐམས་ཅད་སྤངས༔ ཞག་གཅིག་བསྒོམ་ལ་ནམ་ལངས་ཚེ༔ མཁར་ལྡེར་གཙང་མར་ཆུ་བཏང་ལ༔ ཉི་མའི་ཟེར་ལ་བརྟགས་པ་ཡིས༔ དུད་རླངས་སྔོ་དམར་བྱུང་གྱུར་ན༔ དེ་ནི་མི་འཆི་སྐྱོན་མེད་ཡིན༔ མེད་ན་ཞག་པོ་དགུ་ན་འགུམ༔ ནག་པོ་ཧྲལ་ཞག་གཅིག་འགུམ ཧྲོལ་དམར་པོ་ཐིག་ལེ་ཟུར་གསུམ་འདྲ་མོད་ལ་འགུམ་ཅན༔ ཟུར་གསུམ་རོ་འདྲ་མོད་ལ་བརྩི༔ གཞན་ནི་གོང་ལྟར་བྱུང་ཡང་བཟོད༔ ཉི་མ་རྩེ་ཤར་དུས་ཚོད་ལ༔ དྲི་མ་གཙང་སར་དོར་བ་དེ༔ རླངས་མེད་ཞག་པོ་དགུ་ལ་འགུམ༔ དེ་ནི་ས་དུད་ཡལ་བའོ༔ འབྱུང་བ་ཟད་པ་བྱ་བ་ཡིན༔

བདག་འདྲ་པདྨ་འབྱུང་གནས་ཀྱིས༔ ཨ་ཏི་བཀོད་པ་ཆེན་པོ་ལས༔ འཆི་བ་བསླུ་བའི་ཆོ་ག་བསྟན༔ རྡོ་རྗེ་འཆང་གི་གསུང་ལས་བཀོད༔ གྲོ་ག་རས་སམ་ཤིང་ཤུན་ལ༔ འབྱུང་བ་ལྔ་ཡི་འཁོར་ལོ་ནི༔ རྩིབས་བཞི་ལྟེ་བ་མུ་ཁྱུད་བཅས༔ ས་ཆུ་མེ་རླུང་ནམ་མཁའ་དང་༔ འཁོར་ལོ་དག་ནི་ལྔ་བྱས་ལ༔ ཁ་དོག་ལྔ་ནི་འབྱུང་བ་ཕྱེ༔ ལྟེ་བ་རྩིབས་བཞི་ལྔ་ལ་ཡང་༔ རང་རང་ས་བོན་རེ་རེ་བཀོད༔ མུ་ཁྱུད་ཨཱ་ལི་ཀཱ་ལི་བཀོད༔ དེ་ལྟར་འཁོར་ལོ་ལྔ་བྲིས་ལ༔ མཎྜལ་ཕྱོགས་དང་དབུས་ལྔ་རུ༔ ཤར་ཆུ་ལྷོ་མེ་ནུབ་ཏུ་ས༔ བྱང་དུ་རླུང་ལ་དབུས་སུ་ནམ་མཁའོ༔ དེ་ནས་ལྷ་ཡི་བསྐྱེད་རིམ་ནི༔ ཤར་དུ་ཆུ་ལྷ་དཀར་པོ་བུམ་ཆུ་ཐོགས༔ ཆུ་འཁོར་དེ་ལ་བསྟིམ་བྱས་ལ༔ ཁཾ་ཞེས་ན ད་པའི་ལོ་གྲངས་བརྗོད༔ ལྷོ་རུ་མེ་ལྷ་དམར་པོ་ནི༔ མེ་ཡི་སྒྲོན་ཤིང་དམར་པོ་ཐོགས༔ མེ་འཁོར་དེ་ལ་བསྟིམ་བྱས་ལ༔ རཾ་ཞེས་ནད་པའི་ལོ་གྲངས་བརྗོད༔ ནུབ་ཏུ་ས་ཡི་ལྷ་མོ་སེར་མོ་ནི༔ ཕྱག་ན་རིན་ཆེན་བསྣམས་པ་གཅིག༔ ས་འཁོར་དེ་ལ་བསྟིམ་བྱས་ནས༔ ལཾ་ཞེས་ནད་པའི་ལོ་གྲངས་བརྗོད༔ བྱང་དུ་རླུང་ལྷ་ལྗང་ཀུ་བ་དན་ཕྱར༔ རླུང་འཁོར་ལ་བསྟིམ་ཡཾ་ཉིད་བཟླ༔ དབུས་སུ་གནམ་ལྷ་སྔོན་པོ་ནི༔ ཆོས་འབྱུང་ཨེ་ཡི་མཚན་པ་བསྣམས༔ ཨེ་ཞེས་ནད་པའི་ལོ་གྲངས་བརྗོད༔ ནམ་མཁའི་འཁོར་ལོ་དེ་ལ་བསྟིམ༔

དེ་ནས་ངག་ཏུ་ཚིག་འདི་བརྗོད༔ ཧཱུྃ༔ འབྱུང་བ་སྐྱེས་པའི་ལྷ་ཚོགས་རྣམས༔ བདག་ལ་གསན་ཅིང་དགོངས་སུ་གསོལ༔ འབྱུང་བ་ཕྱི་ནང་འཁྲུགས་པ་རྣམས༔ ཆོ་ག་འདི་ཡིས་མཐུན་པར་ཤོག༔ དམིགས་པའི་མི་འདི་བསླུ་བའོ༔ ནད་གདོན་སྡིག་སྒྲིབ་རྣམ་རྟོག་རྣམས༔ ད་ལྟ་ཉིད་དུ་བྱང་ནས་ཀྱང་༔ འཆི་བའི་རྐྱེན་རྣམས་བཟློག་ཏུ་གསོལ༔ འདོད་ཡོན་མཆོད་པ་རྣམ་པ་ལྔ༔ འབྱུང་ལྔ་བསྐྱེད་པའི་ལྷ་ལ་འབུལ༔ མཆོད་པ་བཞེས་ལ་དགྱེས་པར་རོལ༔ དེ་ནས་འཁོར་ལོ་ལྔ་པོ་དེ༔ ཁམ་ཕོར་ཁ་སྦྱོར་ནང་དུ་བཅུག༔ ཚོན་སྐུད་སྣ་ལྔས་རྒྱ་གྲམ་བཅིངས༔ དེ་ཡང་གདན་གྱི་དབུས་སུ་བཞག༔ ཤིང་སྣ་ལྔ་དང་མེ་སྣ་ལྔ༔ ས་སྣ་ལྔ་དང་ཆུ་སྣ་ལྔ༔ སེམས་ཅན་རིགས་ནི་མི་གཅིག་པའི༔ ཁ་རླངས་དག་ལ་བསྒྲེས་པའི་ཟན༔ དེ་རྣམས་བསྲེས་ལ་ངར་མི་ཁྲུ་གང་བྱ༔ དབང་པོ་ལྔ་ལ་ཡི་གེ་ལྔ༔ མིག་ཏུ་རཾ་ལ་རྣ་བར་ཡཾ༔ ཁ་ལ་བཾ་ལ་ལྕེ་ལ་ལཾ༔ སྙིང་ཁར་ཨེ་བྲིས་གཞུག་པར་བྱ༔ འདི་ཉིད་གའུའི་རྒྱབ་ཏུ་བཞག༔ ངར་མི་དེ་ཡི་ཐ་མ་རུ༔ གང་ལ་དམིགས་པ་དེ་ཡི་ཟག་རྫས་ནི༔ མཆིལ་སྣབས་སྐྲ་སེན་དྲི་མ་དང་༔ དྲི་ཆེན་དྲི་ཆུ་རིན་ཆེན་དང་༔ འབྲུ་སྣ་ལྔ་དང་ཁམ་ས་ལ ༔ ངར་གླུད་ལོ་གྲངས་བྱས་ལ་བསྐོར༔ ཁ་དོག་སྣ་ལྔ་ཁྲ་བོ་དང་༔ ཚོན་གྱིས་ལེགས་པར་བསྒྱུར་ལ་བསྐོར༔ དར་ཟབ་བལ་ཚོན་སྣ་ལྔ་ཡང་༔ གཟུགས་ཀྱི་ཁ་དོག་དག་དང་བསྟུན༔ ཕོད་དང་རྒྱང་བུ་བྱས་པས་བརྒྱན༔ མགོ་ལ་ལྟས་ངན་སྣ་ཚོགས་སྒྲོ༔ ལུས་ལ་དར་གོས་གོན་པར་བྱ༔ དེ་དག་རེ་རེའི་མདུན་ན་ཡང་༔ གཏོར་མ་གཟུགས་ཀྱི་ཁ་དོག་ལྟར༔ ཤ་མར་བརྒྱན་ལ་བསྐོར་བར་བྱ༔ ངར་ཟན་ཆང་བུ་ལོ་ཡི་གྲངས་༔ གཟུགས་བརྙན་དེ་ལ་བསྐོར་བར་བྱ༔ དེ་ལ་ཟས་ཕུད་འབྲུ་ཡིས་བྲན༔ སྔགས་དྲུག་ཕྱག་དྲུག་གིས་བྱིན་བརླབས༔ རྡོ་རྗེའི་ཤྭ་ལོ་ཀ་འདི་ཉིད༔

ངར་གླུད་རེ་ལ་གསུམ་གསུམ་བརྗོད༔ ཧཱུྃ༔ ཁྱེར་ཅིག་ཁྱེར་ཅིག་སྟོབས་ལྡན་རྣམས༔ སྲིད་དང་ཆགས་དང་ཞེན་པ་རྣམས༔ དྲན་དང་བསམ་དང་བཟུང་དང་རེག༔ ཀློད་དང་གྲོལ་དང་ཞི་བར་མཛོད༔ དེ་ནས་གླུད་རྣམས་ཆུ་གཞུང་བསྐྱུར༔ འཁོར་ལོ་རྟེན་འབྲེལ་རབ་གནས་བྱ༔ ནད་པའི་མགུལ་དུ་གདགས་པར་བྱ༔ དེས་ནི་ལོ་གསུམ་འཆི་བ་བཟློག༔ ལོ་རེ་ལན་རེ་བྱས་ན་བཟང་༔ འདི་ལས་ཟབ་པ་ཡོད་རེ་ཀན༔ ཤི་ན་རཀ་ཀེཤིཐཾ༔ རྡོ་རྗེའི་ཚིག་གོ༔ རྒྱ་རྒྱ་རྒྱ༔

སྒོས་སུ་ཚེ་བསླུ་འདི་ལྟར་རོ༔ འབྱུང་བ་ལྔ་ཡི་འཁོར་ལོ་ཡི༔ རང་གི་དབང་པོ་ལྔ་པོ་ལ༔ དབང་བསྐུར་བྱིན་གྱིས་བརླབ་པར་བྱ༔ འབྱུང་ལྔའི་ལྷ་དང་ཡི་གེ་བསྒོམ༔ འདི་ནི་ཀུན་ལ་དགོས་པའོ༔ རྒྱ་དྷྱ་དྒྱཿ

སེན་མོའི་བཀྲག་རྩི་ཡལ་བ་ན༔ དགེ་སློང་བདུན་ལ་ཆོས་སྟོན་བྱ༔ སྡོམ་པ་བླངས་ལ་གོས་སེར་གྱོན༔ མིག་གི་དཀར་པོ་ཡལ་བ་ལ༔ ཚ་ཚ་དཀར་པོ་ལོ་གྲངས་བཏབ༔ བསྐོར་བ་བདུན་བྱས་ཆུ་གཞུང་བསྒྱུར༔ ས་མ་ཡ༔ ལྟག་སྐྲ་གྱེན་ལ་ལོག་པ་ལ༔ འབྲུ་ནག་དགུ་ལ་ཟན་བྱས་ཏེ༔ རང་གཟུགས་ཁྲུ་གང་བ་གཅིག་བྱས༔ སྙིང་གར་ལོང་ཏང་ལོ་གྲངས་བཅུག༔ རང་སྐྲ་བྲེག་ལ་དེ་ཡི་སྐྲ༔ རང་ཁྲག་ཕྱུངས་ལ་དེ་ཡི་གདོང་༔ རང་གོས་ཕྱུངས་ལ་དེ་ལ་བསྐོན༔ རང་གི་ཁྱིམ་ནས་གོམ་པ་འཇལ༔ ཉེར་གཅིག་ས་རུ་གྲུ་གསུམ་བྲུ༔ འབྱུང་བའི་སྙིང་པོ་བགྲངས་ལ་མནན༔ བདུད་ཕོ་འདི་ཁྱེར་ཅིག་ཁ་ཆེའོ༔ ཁ་ཆེའོ༔ ཁ་ཆེའོ༔ དེང་དེར་དར་ཟན་སྟེང་དུ་དྲི་ཆེན་བཏང་༔ སས་བྱིབ༔ རང་ཉིད་བྲོས་པར་བྱ༔ དེ་ལྟར་བྱས་པས་བཟློག་སྲིད་དོ༔ རྒྱ་རྒྱ་རྒྱ༔ རྐང་པའི་ལོང་མོ་དོན་པ་ལ༔ ཉི་མ་གྲིབ་ཆུང་བྱུང་དུས་སུ༔ གཅེར་མོར་གོས་ཕུད་ཁྱི་མཇུག་ལྟར༔ མདུན་དུ་དྲི་ཆེན་བཞག་པར་བྱ༔ ཁམས་སུ་ཟོས་ལ་ཁྱི་སྐད་ལན་གསུམ་འདོན༔ དེ་ལྟར་ལན་གསུམ་བྱས་ན་བཟློག༔ ས་མ་ཡ༔

སོ་དྲེག་ནག་པོ་ཆགས་པ་ལ༔ གཅེར་བུ་ར་ཡི་པགས་པ་གོན༔ ཤར་དུ་ཁ་བལྟས་ར་ཡི་སྐད༔ ལན་གསུམ་བྱས་པས་བཟློག་པའོ༔ རྒྱ་རྒྱ་རྒྱ༔ སྣ་ཞོམས་པ་ཡི་ཆོ་ག་ནི༔ སྣ་རྩེར་ཡི་གེ་ཨཱ་བསྒོམ་ལ༔ ཨཱ་ཡི་དབང་བསྐུར་ཉེར་གཅིག་བཟླས༔ ལུས་པོ་ཆུ་སྣ་དགུ་ལས་སྟོན་༼བཏོན་༽༔ དེ་ཡིས་བཟློག་གོ་ས་མ་ཡཱ༔ ཡན་ལག་བརྐྱང་བསྐུམ་བྱེད་པ་ལ༔ ཡན་ལག་བཞི་ལ་རྒྱ་སྐེགས་ཀྱིས༔ འབྱུང་བཞིའི་འཁོར་ལོ་བྲི་བར་བྱ༔ རྣམ་འཇོམས་ལོ་གྲངས་བཟླས་ལ་བཀྲུ༔ བཀྲུ་སྔགས་ལོ་གྲངས་བྱས་ལས་ཕན༔ མིག་ནི་འབྲུ་ཚུགས་བལྟ་བ་ལ༔ མིག་ཏུ་ཧ་དཀར་བསྒོམ་ལ་བཟླས༔ དགེ་འདུན་བཞི་སྡེར་སྟོན་མོ་བྱ༔ བྱིས་པ་ལོ་གྲངས་སྟོན་མོ་བྱ༔ གོས་དམར་པོ་བསྐུར་བ་བཟློག༔ རྒྱ་རྒྱ་རྒྱ༔ འགྲམ་པའི་ཤ་རྣམས་ཤོར་བ་ལ༔ ཚ་ཚ་ཆུ་གཏོར་སྦྱིན་བསྲེག་བྱ༔ ཨ་དང་ཨེ་གཉིས་ལོ་གྲངས་བཟླས༔ ངར་གླུད་ལྗང་ཀུས་དར་ལྗང་ཕྱར༔ ལོ་གྲངས་བྱས་ལ་ལྷོ་ནུབ་ལ༔ དེ་ཡིས་བཟློག་གོ་ས་མ་ཡ༔ དབུགས་རྒོད་པ་བུ་རམ་ལ༔ ཡཾ་ཞེས་བརྒྱ་རྩ་བཟླས་ལ་བྱིན༔ འགྲམ་པའི་སྟེང་དུ་ཨཱཿདཀར་བསྒོམ་ཞིང་བཟླས༔ སྣ་གཡོན་མེད་པར་གྱུར་པ་ལ༔ སྣ་རྩེ་ལ་ནི་ཧཱུྃ་བསྒོམ་བཟླས༔ མིག་ཆུ་མི་ཐུབ་བྷྲཱུཾ་བསྒོམ་བཟླས༔ འགྲམ་གཡོན་ཤ་ཤོར་རཀྵ་བསྒོམ་ཞིང་བཟླས༔ ལྕེ་ལ་ཐིག་ལེ་བྱུང་བ་ན༔ ཧཱུྃ་དང་ཨཱ་ལི་བསྒོམ་བཟླས་བྱ༔ རྣ་བ་འབྱར་ན་མུཾ་བསྒོམ་བཟླས༔ སོ་ཐམ་ན་ནི་ཨ་ལི་དང་༔ ཤུམ་བཟླས་ཏེ་བསྒོམ༔ བྲང་གིས་ལྷེའུ་སྣ་ཞོམ་པ་ན༔ ༀ་དང་ཨ་ཨ་ཡུ་བསྒོམ་མོ༔ རྩིའུ་ཆུང་གཉིས་མི་འགུལ་ན༔ ཧྲཱིཿདང་ཧཱུྃ་ཉིད་བསྒོམ་པར་བྱ༔ ཡི་གེ་དེ་དག་དྲི་བཟང་གིས༔ རང་རང་གནས་སུ་བྲི་དང་བཀླག༔ རྟེན་འབྲེལ་ཕན་པར་བཤད་པའོ༔ ནམ་མཁར་གཟུགས་བརྙན་བརྟགས་པ་ལ༔ ཕྱག་མཚན་ཕྱག་གཡོན་མ་ཚང་ན༔ བླ་མ་ཡི་དམ་མཁའ་འགྲོ་མཆོད༔ ཚོགས་གཏོར་བརྒྱ་རྩ་བཏང་བར་བྱ༔ ལག་པ་གཡས་པ་མ་ཚང་ན༔ འབྲུ་སྣའི་ངར་གླུད་ཁྲུ་གང་ལ༔ མགོ་ལ་སེང་གེ་ཁ་གདངས་བྱ༔ དེ་ལ་སེ་བྱའི་སྤུ་བྱའི་སྤུ་གང་རྙེད་ལ་བྱ་ལོ་གྲངས༔ བརྒྱན་ལ་བྱང་གི་ཕྱོགས་སུ་ནི༔ རྒྱལ་པོའི་ཕོ་བྲང་གནས་སུ་བསྐྱལ༔ ལག་པ་གཡོན་པ་མེད་པ་ན༔ སྲེ་མོང་ཟེར་མོའི་བླུད་བུ་ལ་བྱེད་གི་བླུད་བུའི་ནང་དུ་ནི༔ ཁྱི་ཕག་སྟག་གིས་མཆེ་བ་བཅུག༔ དེ་དག་རང་གི་དྲི་མ་བསྒྲེས༔ ངར་གླུད་བཅུག་ལ་ཆུ་ལ་བོར༔ རྐང་པ་གཡས་པ་མེད་པ་ན༔ ནམ་གྱི་སྲོད་ལ་ནུབ་ཕྱོགས་སུ༔ རྒྱ་ཤུག་གམ་ནི་སེང་ལྡེང་མེ༔ ལོ་གྲངས་ཙམ་གྱིས་བཏང་བས་བཟློག༔ རྐང་པ་གཡོན་པ་མེད་པ་ལ༔ གླུད་དཀར་ཁྲུ་གང་ཙམ་གཅིག་ལ༔ སྙིང་དཀར་སྟག་པ་ནག་པོ་སོར་བཞི་ལ༔ ལོ་གྲངས་ཉ་ག་བྱས་ལ་བཙུགས༔ ནམ་མཁར་སྐྱ་རེང་ཤར་བ་དང་༔ བསྐོར་ཁང་ནང་དུ་བསྐྱལ་བར་བྱ༔ མགོ་གཞོག་གཡས་པ་མེད་པ་ན༔ ཕུང་ཤུལ་ས་སྣ་དགུ་བླང་ཏེ༔ ཤིང་ནག་འབྲས་བུ་དག་དང་སྦྱར༔ རྫ་ཡི་གའུ་ནང་དུ་བཅུག༔ གླང་མའི་བྱང་བུ་བཅུ་གཉིས་བཅུག༔ ལོ་སྐོར་བཅུ་གཉིས་མིང་གི་མཐར༔ ལོ་ཡི་རྒྱལ་པོས་བྱུར་ཁྱེར་ཅིག་བྲི༔ ཁ་བཅད་སྐུད་པས་དམ་དུ་བཅིངས༔ ཚེར་མ་ཅན་གྱི་ཤིང་རྙེད་ཚེར༔ འགལ་སའི་ནང་དུ་དྲིལ་ནས་ནི༔ ནམ་ཕྱེད་རང་ཉིད་གོས་ནག་གོན༔ རྫས་དེ་དུར་ཁྲོད་གནས་སུ་བསྐྱལ༔ མགོ་གཞོག་གཡོན་པ་མེད་པ་ན༔ འབྲུ་སྣ་ཉི་ཤུ་རྩ་ལྔ་ཡི༔ ངར་ཟན་བྱས་ལ་སྙིང་ག་རུ༔ མི་རྟ་ཁྱི་གསུམ་རུས་པ་བཅུག༔ ངར་གོས་བསྐོན་ལ་མདུན་དུ་བཞག༔ ལྷོ་ཕྱོགས་གོམས་པ་བརྒྱད་ཅུའི་སར༔ གཞན་གྱིས་དོང་དུ་མནན་པར་བྱ༔ མིང་ནས་བོས་ལ་ལན་གསུམ་དུ༔ བྲོ་བརྡུང་ཆོ་ངེས་བཏབ་པའོ༔

སྐེད་པ་ཡན་ཆད་ཆད་པ་ན༔ ཤར་ལྷོར་ཚེར་ཅན་ཤིང་ལ་ཧོམ༔ རང་ལོ་ཙམ་པའི་གྲངས་སུ་བརྩིགས༔ ཧོམ་རེ་བསྲེགས་ཤིང་རཾ་ཉིད་ལ༔ ལོ་གྲངས་ཙམ་རེ་བཟླས་ལ་བསྲེགས༔ ཕྲག་པ་མན་ཆད་སུས་སོང་ན༔ རང་ལུས་རོ་སོལ་ནག་པོས་བྱུག༔ སྐྲ་ནི་སྤྱི་བོར་བཅིངས་ནས་སུ༔ ཤོག་བུ་སོར་བཞི་པ་གཅིག་ལ༔ རང་ལོ་གནམ་ལོ་མིང་གཉིས་བྲི༔ ཕྱོགས་བཞིར་རཾ་ཡཾ་ཁཾ་གསུམ་བྲི༔ གུ་གུལ་དག་གིས་ཏང་སྣར་སྦྱར༔ ཚེས་དགུའི་ནམ་གུང་ཕྱོགས་བཞིར་རྒྱུགས༔ ཁ་ནས་ལོ་ཁྱེར་ལོ་ཁྱེར་བརྗོད༔ དེ་ནས་ཤིན་ཏུ་དུར་ཁྲོད་སྦ༔ རོ་སྟོད་ཡན་ཆད་མེད་པ་ན༔ སེང་ལྡེང་ཤུག་པའི་མེ་ཧོམ་ལ༔ ལོ་སྐོར་བཅུ་གཉིས་གཟུགས་བྲིས་བསྲེགས༔ ཚ་ཚ་ཆུ་གཏོར་ལོ་གྲངས་བྱ༔ ཁོག་སྨད་མེད་ན་དུར་ཁྲོད་དུ༔ རུས་པ་སྣ་ཚོགས་དུད་པ་བཏང་༔ ལུས་ཀྱི་གཞོག་གཡས་མེད་པ་ན༔ གཙུག་ཏོར་ཚ་ཚ་ཚེ་དཔག་མེད༔ ལོ་གྲངས་གྱུར་པ་བརྗོད་པར་བྱ༔ གཞོག་གཡོན་མེད་ན་གཟུངས་གྲ་ལྔ་ལོ་གྲངས་འདོན༔ གནམ་སའི་འབྲེལ་ཐག་ཆད་པ་ན༔ གསུང་རབ་ཀློག་ཅིང་དགེ་བར་འབད༔ ལྗོན་ཤིང་ཆད་ན་རླུང་བསྒོམ་སྨན་སྦྱོར་བརྟེན༔ ཆུ་ཡི་སྤྲིས་ཡལ་ཁམ་ས་ལ༔ ལོ་སྐོར་བཅུ་གཉིས་གཟུགས་བྱས་ཚ་ཚ་དང་༔ གླུད་རེ་བརྟགས་པའི་ཧོམ་རེ་རྣམས༔ ཉི་མ་རྒས་ཁར་བྱང་ཤར་དུར་ཁྲོད་བསྐྱལ༔ ནག་པོ་ཧྲལ་ཧྲོལ་བྱུང་བ་ན༔ ལྕགས་ཕྱེ་ཟངས་ཕྱེ་འབྲུ་སྣ་བསྲེས༔ ཕྱོགས་བཞི་དག་ཏུ་གཏོར་མས་བཟློག༔ དམར་པོ་ཐིག་ལེ་བྱུང་བ་ན༔ ངར་གླུད་ལོ་གྲངས་བྱས་པ་ལ༔ གཟི་མོ་བྱི་ཐུར་རེ་རེ་གཟུག༔ རུས་པ་སྣ་ཚོགས་དག་དང་སྡེབ༔ ཤར་ཕྱོགས་རྒྱ་ལམ་སུམ་མདོར་བསྐྱལ༔ དུད་རླངས་ཆད་ན་རྟ་ཐོད་ལ༔ འབྱུང་བ་བཞི་ཡི་ས་བོན་བྲིས༔ ཉི་མ་མདུང་གང་ཙམ་ལ་ནུབ་དུ་བསྐྱལ༔ རྟ་སྐད་སྣ་ཚོགས་འདོན་པར་བྱ༔ རྣ་བའི་འུར་སྒྲ་ཆད་པ་ན༔ སྙིང་ནང་ཡཾ་བསྒོམ་མིག་གྱེན་བཟློག༔ གཟུངས་སྔགས་ཆུ་ཡིས་མགོ་ལུས་བཀྲུ༔ རྣ་བ་ཤྭ་ཤྭ་ཟེར་བ་ན༔ ཟས་སྣའི་གཏོར་མ་ལོ་གྲངས་དང་༔ རང་ལོ་གནམ་ལོའི་མིང་དང་བཅས༔ ཤིང་སྡོང་རྐང་གཅིག་ས་རུ་བསྐྱལ༔ ནང་གི་འཆི་ལྟས་བྱུང་བ་ལ༔ རླུང་ནི་བུམ་པ་ཅན་དུ་བསྒོམ༔ གཞན་ཡང་ལག་ངར་ཆད་པ་དང་༔ རྐྱག་པ་རླངས་པ་མེད་པ་དང་༔ ཆུ་དྲི་ངན་དང་གྲིབ་མ་མེད་ལ་སོགས༔ ལར་ཡང་འཆི་བསླུ་ཐམས་ཅད་ལ༔ འཆི་ངོ་ཤེས་པའི་སྲོག་ཡང་བསླུ༔ མཆོད་རྟེན་རྙིང་གསོ་ན་བཟའ་གསོལ༔ ལམ་འཕྲང་བསལ་ཞིང་དར་མ་ཀློག༔ སཱཙྪ་ཆུ་གཏོར་ཚོགས་བརྒྱ་རྩ༔ སྣང་སྲིད་ཐམས་ཅད་མདོས་ཀྱིས་བསྐང་༔ ཚེ་སྒྲུབ་ཚེ་ཆོག་སྤོང་དག་བྱ༔ ལར་ནི་དགེ་རྩ་འགྲུབ་ཚད་བྱ༔ དེ་ནི་ཆོ་གའི་རིམ་པ་ཡིས༔ འཕྲལ་གྱི་བར་ཆད་ཕྲན་བུ་ལས༔ དེ་ལྟར་བྱས་པས་བླུ་བའོ༔ དུས་ཆེན་བྱུང་བའི་རྟགས་རྣམས་ལ༔ རྟེན་འབྲེལ་བྱས་ཀྱང་ཕན་པ་མེད༔ དེས་ན་མཁས་པས་བརྟག་པར་བྱ༔ བདག་འདྲ་པདྨ་འབྱུང་གནས་ཀྱིས༔ འཆི་རྟགས་བསླུ་བའི་མན་ངག་བསྟན༔ ཀློང་ཡངས་སྲོག་གི་སྙིང་པོའོ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔

སྐྱེས་བུའི་ལུས་ལ་ནད་བཏབ་ནས༔ རྟགས་འདི་སུ་ལ་བྱུང་བ་དེ༔ འཆི་བའི་དུས་ལ་བབ་པ་ཡིན༔ སེམས་ཅན་དབུགས་ནི་འཕོ་བའི་ཚེ༔ ཕྱི་འབྱུང་ལྔ་པོ་ནང་དུ་སྡུད༔ ནང་འབྱུང་ལྔ་པོ་གསང་བར་ཐིམ༔ གསང་འབྱུང་ལྔ་པོ་ཡོངས་སུ་རྫོགས༔ ཡང་དག་ལམ་ཆེན་ཉིད་ལ་ཐིམ༔ འབྱུང་ལྔའི་འཕོ་འཇུག་འདི་ལྟར་རོ༔ ཤ་ནི་ས་ལ་ཐིམ་པ་དང་༔ དེ་བཞིན་ཆུ་དང་མེ་དང་རླུང་༔ སོ་སོ་རང་རང་ཐིམ་པ་དང་༔ སྐྱེས་བུའི་ལུས་ལ་འདི་ལྟར་རོ༔ ནང་གི་ས་ནི་ཤ་རུས་ཡིན༔ དེ་ནི་ཕྱི་ཡི་ས་ལ་ཐིམ༔ དེ་ཡི་རྟགས་སུ་འདི་ལྟར་འོང་༔ ལུས་ནི་ལྕི་ཞིང་ཟས་མི་ལོན༔ ལུས་སྟོབས་ཤོར་ཞིང་ཤེས་པ་རྨུགས༔ ལངས་མི་ནུས་ཤིང་ས་རྡོ་འདྲ༔ ནང་གི་ཆུ་ནི་ཁྲག་ཆུ་སེར༔ དེ་ནི་ཕྱི་ལ་ཐིམ་པའི་རྟགས༔ ཁ་ཆུ་སྣ་ཆུ་འཛག་པར་བྱེད༔ ཆུ་ངན་མི་ཐུབ་གྲེ་ལྕེ་སྐམ༔ མིག་ཀྱང་གྱེན་དུ་ལོག་ལོག་སོང་༔ ནང་གི་མེ་ནི་དྲོད་ཡིན་ཏེ༔ ཕྱི་ཡི་མེ་ལ་ཐིམ་པའི་རྟགས༔ ཁ་སྣ་སྐམ་ཤིང་ལུས་དྲོད་ཤོར༔ ཤེས་པ་རེས་གསལ་རེས་མི་གསལ༔ ཕྱི་ནང་བར་གསུམ་དྲོད་མི་འཆོར་༼ཚོར་༽ ༔ ནང་གི་དབུགས་ནི་རླུང་ཡིན་པས༔ ཕྱི་ཡི་རླུང་ལ་ཐིམ་པའི་རྟགས༔ དབུགས་ནི་ངར་ངར་ཡན་ལག་ཕྲ༔ མིག་ཀྱང་གྱེན་ལ་བཟློག་པའོ༔ བཀྲག་མདངས་ཐམས་ཅད་ཉམས་ནས་འགྲོ༔ ཟས་ཀྱི་ཐ་མ་ཤི་ཟས་ཟ༔ གཏམ་གྱི་ཐ་མ་ཁ་ཆེམས་བཞག༔ གོས་ཀྱི་ཐ་མ་རེ་གོས་གོན༔ གནས་ཀྱི་ཐ་མ་དུར་ཁྲོད་འགྲོ༔ གཉེན་ཀྱི་ཐ་མས་ངུ་བྲང་བརྡུངས༔ དེ་ཡི་མཐའ་ལ་ཐུག་པའི་ཚེ༔ ཕྱི་དབུགས་ཁྲོག་གིས་ཆད་ནས་འགྲོ༔ རྟགས་འདི་སུ་ལ་བྱུང་བ་དེ༔ མི་དེ་འདི་རུ་མི་གནས་ཕ་རོལ་དུ༔ ངེས་པར་ཡང་དག་འགྲོ་བས་ན༔ དེ་དུས་བླ་མའི་གདམས་ངག་རྣམས༔ རང་གིས་རྒྱུད་ལ་དྲན་པར་བྱ༔ དེ་དུས་སྣང་བ་འདི་ལྟར་འོང་༔ ཕྱི་ཡི་དབང་པོ་དྲན་ཉམས་བྱེད༔ མུན་སྲོས་བཞིན་དུ་འུབ་ཀྱིས་འདུས༔ རིག་པ་སྙིང་གི་དཀྱིལ་དུ་གནས༔ སྨྲ་མི་ཤེས་ཤིང་དྲན་པ་ཉམས༔ དེ་དུས་ལུས་ཀྱི་ཁྲག་འདུས་ནས༔ སྲོག་རྩའི་ནང་ནས་སྙིང་ནང་སྡོད༔ ཁ་གདངས་མིག་ནི་སྐྱ་ལོག་འགྲོ༔ དབུགས་ནི་ཁྲུ་གང་ཙམ་དུ་ཆད༔ དེ་དུས་ཁྲག་ཐིག་གཅིག་བརྒྱབ་པས༔ མགོ་བཀུག་དབུགས་ནི་མདའ་གང་ཆད་པའོ༔ དེ་ནས་ཁྲག་ཐིག་གསུམ་བརྒྱབ་པས༔ ཨིག་འབྱིན་ཁོང་པ་ཁྲོལ་ཟེར་འོང་༔ དབུགས་ནི་མདའ་གང་ས་ནས་ཆད༔ དེ་ནས་ཕྱི་དབུགས་ཆད་པ་དང་༔ རིག་པ་སྙིང་དཀྱིལ་གནས་ནས་ཡོད༔ དེ་དུས་འཕོ་བ་བཏབ་ན་ཐེབས༔ བླ་མའི་གདམས་ངག་གསལ་ཡང་གདབ༔ མི་དེ་ཕྱི་དབུགས་ཆད་པའི་དུས༔ རིགས་དྲུག་རྟགས་ནི་འདི་ལྟར་འབྱུང་༔ ལག་པ་གཡས་པ་གཡོབ་པ་དང་༔ ཁ་ནས་ཅལ་ཅོལ་འདོན་པ་དང་༔ མཆན་ཁུང་གཡས་སུ་དྲོད་འདུས་ན༔ མི་དེ་ལྷ་མིན་གནས་སུ་སྐྱེ༔ ཚིགས་ལ་དྲན་པ་ཉམས་པ་དང་༔ མིག་ཏུ་དྲོད་རྣམས་འདུས་པ་ནི༔ མི་དེ་མི་ཡི་གནས་སུ་སྐྱེ༔ ཁ་ནས་སེམས་ཅན་སྒྲ་སྐད་འདོན༔ མཚན་མར་དྲོད་རྣམས་འདུས་པ་ནི༔ དེ་ནི་བྱོལ་སོང་གནས་སུ་སྐྱེ༔ ལུས་ནི་སེར་པོ་བཀྲག་མེད་དང་༔ ཁ་ལ་དྲོད་རྣམས་འདུས་པ་ནི༔ མི་དེ་ཡི་དྭགས་གནས་སུ་སྐྱེ༔ རྐང་པ་གཡས་པ་ས་ལ་རྡེབ༔ རྐང་པའི་མཐིལ་དུ་དྲོད་འདུས་ན༔ མི་དེ་དམྱལ་བའི་གནས་སུ་སྐྱེ༔ རྟགས་ཚད་འདི་རྣམས་ཁོ་ན་བདེན༔ དེ་ལ་ཐུགས་རྗེས་བཟུང་བའི་ཕྱིར༔ ལུས་པོ་སེང་གེའི་ཉལ་ཐབས་བཅོལ༔ མགོ་བྱང་རྐང་པ་ལྷོ་ལ་བསྟན༔ རིག་པ་འདི་ཉིད་མིག་ལ་གཏད༔ སལ་ལེ་ཧྲིག་གེ་སེང་ངེ་བཞག༔ སྒྲ་རྣམས་ཐམས་ཅད་རང་གི་སྒྲ༔ འོད་ཟེར་ཐམས་ཅད་རང་གི་ཟེར༔ སྣང་བ་ཐམས་ཅད་རང་སྣང་ངོ་༔ གསལ་སྟོང་འཛིན་པ་མེད་པར་བྱ༔ དབྱིངས་དང་རིག་པ་མ་འགྱུར་ན༔ མི་དེ་བར་དོ་མེད་པར་རྒྱས༔ གལ་ཏེ་དབྱིངས་རིག་མ་གསལ་ན༔ བླ་མས་བར་དོའི་འོད་སྣང་རྣམས༔ སྤྱི་བོར་ཁ་གཏད་ཡང་དག་བཤད༔ བཏགས་གྲོལ་རྒྱུད་དང་གདམས་པ་རྣམས༔ རྣ་བར་སྦུ་གུ་བཅུག་ལ་བཤད༔ དེས་ནི་བདེན་པ་མཐོང་བར་འགྱུར༔ ལྷ་མིན་རྟགས་ཏེ་སུ་ལྡན་པ༔ དེ་ཉིད་དྲངས་པའི་རྣལ་འབྱོར་པས༔ རོ་ཡི་ལྟེ་བར་ཨཱཿདཀར་བསྒོམ༔ སྤྱི་བོར་ཁ་གཏད་དབུགས་ཀྱིས་དྲངས༔ ཨ་ཨ་ཅེས་པ་ཉེར་གཅིག་བརྗོད༔ བུམ་དབང་སྤྱི་བོར་བཞག་པར་བྱ༔ བུམ་པ་ཉིད་ཀྱང་ཨཱ་རུ་བསྒོམ༔ མཆན་ཁུང་གཡས་པར་ཡི་གེ་ཀྵ༔ དཀར་པོ་མིག་ལ་ཉེར་གཅིག་བགྲངས༔ བུམ་པ་ཀཾ་བསྒོམ་མཆན་ཁུང་བཞག༔ གང་ཞིག་མི་ཡི་རྟགས་བྱུང་ན༔ མིག་དང་སྤྱི་བོ་གང་རུང་དུ༔ ཡི་གེ་ཏཾ་བསྒོམ་གསལ་བར་བསྒོམ༔ དབུགས་ནི་ཉེར་གཅིག་སྤྱི་བོར་དྲངས༔ བུམ་པ་ཏཾ་བསྒོམ་མིག་ལ་བསྐུར༔ གང་དག་བྱོལ་སོང་རྟགས་བྱུང་ན༔ མཚན་མར་ཡི་གེ་རྒྱ་སེར་བསྒོམ༔ དབུགས་དང་བཅས་པས་ལན་དགུ་དྲངས༔ བུམ་པ་རྒྱ་བསྒོམ་མཚན་མར་བཞག༔ གང་དག་ཡི་དྭགས་རྟགས་བྱུང་ན༔ ཁོ་ཡི་རྣམ་ཤེས་བྷྱ་རུ་བསྒོམ༔ ལྕེ་ལ་བུམ་པ་བྷྱ་བསྒོམ་བཟླས༔ དབུགས་དང་བྷྱ་ཡིས་ལན་བདུན་དྲངས༔

གང་དག་དམྱལ་བའི་རྟགས་བྱུང་ན༔ རོ་ཡི་རྣམ་ཤེས་ཡི་གེ་གསུམ༔ སྤྱི་བོར་མགྲིན་པ་སྙིང་ཁ་རུ༔ ༀ་དཀར་ཨཱཿདམར་ཧཱུྃ་མཐིང་བསྒོམ༔ རང་ཡང་བསྒོམ་ལ་རོ་ཡང་བསྒོམ༔ ཚིག་འདི་རྣ་བར་གསལ་བར་གདབ༔ རང་དང་སྤྲད་དེ་དབུགས་དང་བསྟུན༔ རྣམ་ཤེས་ཡིག་འབྲུ་གསུམ་དུ་བསྒོམ༔ ལན་གྲངས་ཉི་ཤུ་རྩ་གཅིག་ཏུ༔ དབུགས་དང་བསྒོམ་བསྟུན་རེ་ལ་གཞུག༔ གཞན་ཡང་ཡེ་ཤེས་རང་འོད་སྤྲད༔ དེས་ནི་རིགས་དྲུག་བྲོས་ཁུང་ཁོག༔ ས་མ་ཡ༔ རྒྱ་རྒྱ་རྒྱ༔ ད་ནི་རྣམ་ཤེས་ནམ་མཁར་ཐིམ༔ དོན་ལ་རླུང་ལྔ་འཕྲོས་པ་ཡིན༔ ཡུལ་མེད་རིག་པ་ནམ་མཁར་ཐིམ༔ ཀུན་ཁྱབ་ནམ་མཁའ་སྒྲོན་མར་ཐིམ༔ མ་འདྲེས་ནམ་མཁའ་དབྱིངས་སུ་ཐིམ༔ དོན་མཚོན་ནམ་མཁའ་ཤེས་རབ་ཐིམ༔ ཐམས་ཅད་ལྷུན་གྲུབ་ཆེན་པོར་ཐིམ༔ སྙིང་གི་དཀྱིལ་གྱི་རིག་པ་ཡང་༔ ཐིག་ལེ་ཉིད་ལ་ཐིམ་པའོ༔ ཐིག་ལེ་ཉིད་ཀྱང་རྩ་ལམ་ལ་ཕྱུངས་ནས༔ སྒྲོན་མ་རྣམས་པ་བཞི་ལ་ཐིམ༔ སྒྲོན་མ་བཞི་པོ་འོད་ལྔར་ཐིམ༔ འོད་ཟེར་ལྔ་ནི་སྐུ་ལ་ཐིམ༔ སྐུ་རྣམས་ཚོམ་བུ་ལྔ་ལ་ཐིམ༔ ཚོམ་བུ་ཡེ་ཤེས་གཉིས་ལ་ཐིམ༔ ཡེ་ཤེས་ལྷུན་གྲུབ་དག་ལ་ཐིམ༔ ལྷུན་གྲུབ་ཀ་དག་ཀློང་དུ་ཐིམ༔ དེ་ནས་རང་ས་ཟིན་པའོ༔ རྐྱེན་དབང་དག་ཏུ་འཆི་བ་སྟེ༔ འཆི་ཁའི་བར་དོ་ངེས་པ་མེད༔ ཡང་ཡེངས་ཟ་ཟི་ཕྱ་ཕྱོ་སྟེ༔ སྡུག་བསྔལ་ཉམས་ཐག་ཤི་ཁའོ༔ གང་ཟག་འཆི་ཁའི་བར་དོ་འདི༔ བླ་མ་མཆེད་གྲོགས་དམ་ལྡན་གྱིས༔ གདམས་པ་གསལ་གདབ་ཆགས་མེད་བསྒོམས༔ སྔར་གྱི་གདམས་ངག་ཐམས་ཅད་ཀུན༔ ཡང་ཡང་བློ་ལ་བརྟེན་པར་བྱ༔ འཇིག་རྟེན་བྱ་བ་ཐམས་ཅད་ཀུན༔ བློ་ཡི་ལིངས་ཀྱིས་རྒྱབ་ཏུ་བོར༔ ཤི་ལུང་དེ་ལྟར་མེད་པ་ལ༔ ཞག་གྲངས་ཉི་ཤུ་རྩ་གཅིག་ལ༔ གཤིན་ཆོག་དག་ལ་འབད་པར་བྱ༔ ལམ་སྣ་ཨེ་ཟིན་དེ་ལ་རགས༔ གང་ཟག་འཆི་ཁའི་བར་དོ་ཞེས་བྱ་བ་རྫོགས་སོ༔ གཏེར་རྒྱ༔ སྦས་རྒྱ༔ ཟབ་རྒྱ༔

ཆོས་ཉིད་བར་དོ་འདི་ལྟར་རོ༔ ཕུང་པོ་མེད་ཅིང་ཟག་བཅས་བྲལ༔ སྣང་བ་ཐམས་ཅད་བདེན་པའི་ཞིང་༔ རང་སྣང་དག་པར་ཀུན་སྣང་སྟེ༔ འདི་ལ་ཐེ་ཚོམ་སུས་ཟ་བ༔ རྒྱལ་བ་རྣམས་ཀྱི་སྐུ་ལ་བསྒྲིབས༔ རང་བཞིན་དག་པའི་སྣང་བ་འདི༔ རྣམ་པར་ཤེས་པ་འོད་གསལ་ཐིམ༔ དབུགས་ཕྱི་ནང་གཉིས་ཀྱི་འགྲུལ་ཐང་ཆད༔ ལུས་དང་སེམས་ཀྱི་འབྲེལ་པ་ཆད༔ དབུགས་ནི་རང་སྣང་ཁམས་སུ་ཆད༔ ལུས་ནི་བེམ་པོར་ལིངས་ཀྱིས་འགྲོ༔ རིག་པ་མེ་སྟག་ཡར་བ་ལྟར༔ འོད་གསལ་ཆོས་ཉིད་ས་རུ་སླེབས༔ དེ་ལ་ཆོས་ཉིད་བར་དོ་འཆར༔ སྔར་གྱི་ལུས་ཀྱི་བག་ཆགས་ཀྱིས༔ དངོས་པོ་ཐམས་ཅད་ཡོད་པར་སྙམ༔ གདོས་བཅས་ལུས་ནི་མི་སྣང་སྟེ༔ འོད་གསལ་ལུས་ནི་གསལ་བའོ༔ དེ་ཡི་དུས་སུ་རྟོག་པ་འགགས༔ ཕྲ་རགས་རྟོག་སེམས་མི་འགྱུ་སྟེ༔ དེ་ཚེ་མིག་སྔར་གྱུར་ཚད་རྣམས༔ འོད་ཟེར་ལྔ་ཡི་ད་ལར་འཆར༔ གདོས་བཅས་ས་རྡོ་ལ་སོགས་པའི༔ འབྱུང་བཞིའི་སྣང་བ་ཐམས་ཅད་དང་༔ ནང་བཅུད་སེམས་ཅན་ལ་སོགས་པའི༔ རྟོག་པའི་ངོ་བོ་གཅིག་ཀྱང་མེད༔ སྟེང་འོག་ཕྱོགས་མཚམས་ཐམས་ཅད་ཀུན༔ བར་མཚམས་མེད་པར་འོད་ལྔའི་ཞིང་༔ སྣང་བ་མཐོང་བ་དེ་དག་ནི༔ ཕྱི་ནས་བལྟས་ནས་ནང་ཡང་གསལ༔ ནང་ནས་བལྟས་ན་ཕྱི་ཡང་གསལ༔ ཕྱི་ནང་མེད་པར་ཟང་ཐལ་ལེ༔ ལྡེམ་ལྡེམ་བཞིན་ནམ་མེར་མེར་བཞིན༔ མནན་ན་ནེམ་ནེམ་བྱེད་པ་སྙམ༔ བཏེགས་ན་འཕར་འཕར་བྱེད་པ་སྙམ༔ ཤིན་ཏུ་ཡིད་དུ་འོང་བ་དང་། ཁ་དོག་ལྔ་རུ་གསལ་བ་དང་༔ སོ་སོར་མ་འདྲེས་རང་སར་གསལ༔ ཕྲ་བ་མགུལ་བ་འཕྲིག་པ་དང་༔ གསལ་འཚེར་ལྷུན་སྡུག་གཟི་བརྗིད་འཕྲོ༔ སྣུམ་ལ་འདྲིལ་ཞིང་རབ་ཏུ་ཕྲ༔ རྒྱ་ཆེ་ཁོག་ཡངས་དཔངས་ཀྱང་མཐོ༔ རྩེ་མོ་ཡངས་པ་ཞེས་བྱ་སྟེ༔ དཀྱིལ་འཁོར་ཀུན་གྱི་འབྱུང་གནས་སུ༔ བྱས་པ་མེད་པར་རང་བྱུང་བཞུགས༔ དེ་ཡང་ཁ་དོག་སྣ་ལྔ་སྟེ༔ དཀར་པོ་རང་གསལ་མདངས་ཟེར་འཕྲོ༔ སེར་པོ་རང་གསལ་འོད་མདངས་འཕྲོ༔ དམར་པོ་རང་གསལ་མདངས་ཟེར་འཕྲོ༔ ལྗང་ཀུ་རང་གསལ་མདངས་ཟེར་འཕྲོ༔ མཐིང་ཀ་རང་གསལ་མདངས་ཟེར་འཕྲོ༔ དེ་དག་འབྱར་ལ་མ་རེག་པ༔ ཁ་དོག་སོ་སོ་རང་སར་གསལ། ཤིན་ཏུ་ལྷུན་སྟུག་ཚུལ་དུ་གནས༔ འགགས་པར་མི་ནུས་བསམ་ཡུལ་འདས༔ འོད་སྣང་འཁྲུགས་པའི་བསམ་སྣང་ནི༔ བདག་འཛིན་ལུས་ཀྱི་རྟེན་སོར་གནས༔ ཆོས་ཉིད་དོན་ལ་སྤྱོད་པའོ༔ ཕྲ་རགས་རྟོག་པ་ཀུན་འགགས་ཏེ༔ དབང་པོ་ཀུན་ལྡན་འོད་ཀྱི་ལུས༔ ལུས་དང་གྲིབ་མའི་ཚུལ་དུ་གྱུར༔ དེ་ལྟར་འོད་སྣང་ཤར་བ་དེ༔ མིང་ནི་རིག་པ་འོད་ལ་ཐིམ་པའོ༔

ད་ནི་འོད་སྣང་དེ་དག་ནི༔ ཟུང་འཇུག་དག་ལ་ཐིམ་པ་ནི༔ གོང་གི་འོད་སྣང་ཐམས་ཅད་ཀྱང་༔ སྐུ་ཡི་སྣང་བར་འཆར་བ་སྟེ༔ འོད་ཁྱིམ་གནས་པ་དེ་དག་ལ༔ རིགས་ལྔ་ཡབ་ཡུམ་ཚོམ་བུར་གསལ༔ དཔག་མེད་གྲངས་ལས་འདས་པ་ལས༔ ཁ་དོག་ཕྱག་རྒྱ་རྒྱན་དང་ལྡན༔ སེམས་དཔའ་དང་ནི་སེམས་མར་བཅས༔ དཀྱིལ་འཁོར་གཅིག་རྫོགས་ཉིད་དུ་འཆར༔ མི་ཆེ་བ་དང་མི་ཆུང་བ༔ གདན་ཁྲི་རྒྱབ་ཡོལ་བཅས་པ་སྟེ༔ གསལ་འཚེར་ལྷུན་སྟུག་གཟི་བརྗིད་འཕྲོ༔ མཉེན་ལྕུགས་འཁྲིལ་ལྡེམ་གཞོན་ཚུལ་ཅན༔ ཞི་བའི་ལྷ་སྐུ་དེ་དག་ཀྱང་༔ ལྔ་ཚན་རེ་ལ་འོད་ལྔའི་ཚུལ༔ མུ་ཁྱུད་འོད་ལྔ་བསྐོར་བ་འཆར༔ ཡབ་དང་ཡུམ་གྱི་ཆ་འཛིན་དང་༔ སྣང་བ་ཐམས་ཅད་སྐུ་རུ་འཆར༔ དེ་དུས་རང་གི་ཐུགས་ཀ་ནས༔ འོད་ཟེར་ཤིན་ཏུ་ཕྲ་བ་དག༔ ཉི་མའི་ཟེར་ཐག་ལྟ་བུར་འཆར༔ འོད་ཟེར་དེ་དག་ཐམས་ཅད་ནི༔ ལྷ་སྐུ་ཀུན་གྱི་གཟུགས་དང་འབྲེལ༔ འདི་ཉིད་རང་གི་ཤེས་པས་ཟིན༔ རང་སྣང་ཡིན་པར་ཤེས་གྱུར་ན༔ མི་རྟོག་ཏིང་འཛིན་བསམ་གཏན་ལ༔ རང་བཞིན་དུ་ནི་གནས་པའོ༔ དེ་ནི་རིག་པ་འོད་ལ་ཡལ༔ འཇུག་པ་ཞེས་སུ་གྲགས་པའོ༔ དེ་ཚེ་རང་གི་སྙིང་ག་ནས༔ ཟེར་ཐག་འོད་ཀྱི་ལུ་གུ་རྒྱུད༔ ཚོམ་བུའི་ཐུགས་ཀར་འབྲེལ་སྙམ་ནས༔ དེ་དག་ཐིག་ལེ་རབ་བརྒྱན་སྣང་༔ ཤེས་པས་ཟིན་པས་བསམ་གཏན་སྐྱེ༔ ཟེར་ཐག་དེ་དག་ཐམས་ཅད་ལ༔ ཐིག་ལེ་ཕྲ་མོ་གྲངས་མེད་འཆར༔ དེ་ཡང་འཇུག་པའི་གནད་ཅིག་ཡིན༔ ས་མ་ཡ༔ དེ་ནས་རང་གིས་སྙིང་ག་ནས༔ འོད་ཟེར་ཚོན་སྐུད་དྲ་བ་གཅིག༔ ཚོམ་བུའི་ལྷ་ཚོགས་ཐུགས་ཀར་འབྲེལ༔ དེ་དུས་ཚོམ་བུའི་ལྷ་ཚོགས་རྣམས༔ རང་ལ་ཐིམ་པའི་སྣང་བ་འཆར༔ དེ་ནི་འོད་ཟེར་རིག་པ་ལ༔ ཚུར་ལ་འཇུག་པ་ཞེས་བྱ་སྟེ༔ དེ་ཡང་འཇུག་པའི་གནད་ཅིག་ཡིན༔ དེ་ཡི་དུས་ལ་བབས་ཙམ་ན༔ རང་སྣང་ཡིན་པར་ཐག་ཀྱང་བཅད་༔ རང་རིག་ཡིན་པར་ངོ་ཤེས་ཏེ༔ མ་པང་བུ་འཇུག་གདམས་ངག་ནི༔ ཡིད་ཆེས་ཐག་ཆོད་དྲན་པར་བྱ༔

ད་ནི་གྲོལ་ལུགས་འདི་ལྟ་སྟེ༔ ཕུང་པོ་ལྔ་ཡི་གཟུང་འཛིན་དེ༔ ལོངས་སྤྱོད་རྫོགས་པའི་སྐུ་རུ་གྲོལ༔ འབྱུང་བ་ཉོན་མོངས་རང་གྲོལ་བས༔ འོད་གསལ་རིག་པ་ཆོས་སྐུར་ཤར༔ འོད་གསལ་བདེ་ཆེན་ཀློང་དུ་གྲོལ༔ རིག་པ་ཡེ་ཤེས་མ་བུ་འཕྲོད༔ ཕྲག་དོག་རྣམ་རྟོག་ཐམས་ཅད་སྤངས༔ མ་ཡེངས་མ་ནོར་རང་ངོས་བཟུང་༔

འདི་དུས་ཡེ་ཤེས་བཞི་སྦྱོར་སྣང་བ་གཅིག༔ རང་གི་སྙིང་ཀར་འཆར་བ་ནི༔ རྡོ་རྗེ་སེམས་དཔའི་ཁོང་སེང་ལམ༔ རིག་པའི་སྣ་ཐག་ཞེས་ཀྱང་བྱ༔ འོད་ཀྱི་ཐག་པ་ཤིན་ཏུ་ཕྲ༔ དེ་ནི་སྟེང་གི་ནམ་མཁའ་ལ༔ གྱེན་ལ་ཁྲུ་གང་ས་རུ་སྣང་༔ དེ་ལ་མ་ཡེངས་བལྟས་པ་ཡིས༔ སྣང་བ་རྒྱ་ཆེར་མཆེད་པ་དང་༔ ཡང་གསང་ཤིན་ཏུ་མཐའ་ཡས་པ༔ བློ་རྒྱ་ཤིན་ཏུ་མཐའ་ཡས་པ༔ དེ་ཡང་དང་པོ་འོད་མཐིང་ཀ༔ སྣམ་བུ་བརྐྱང་པ་ལྟ་བུའི་ཁར༔ ཐིག་ལེ་ཟེར་དང་ལྡན་པ་ནི༔ མེ་ལོང་ཁ་སྦུབ་གནས་པ་ལྟར༔ ཤིན་ཏུ་གསལ་ཞིང་འཚེར་བ་ལ༔ རང་བཞིན་ཐིག་ལེ་ལྔ་ལྔས་བརྒྱན༔ དེ་སྟེང་དཀར་པོའི་སྣམ་བུ་ལ༔ ཐིག་ལེ་གོང་དང་འདྲ་བའོ༔ དེ་སྟེང་དམར་པོའི་སྣམ་བུ་སྟེ༔ ཐིག་ལེ་གོང་དང་འདྲ་བའོ༔ དེ་ཡི་སྟེང་དུ་འོད་ཟེར་ནི༔ གསལ་ལ་ཟླུམ་པ་གདུགས་ལྟར་འཆར༔ དེ་དག་ཡེ་ཤེས་བཞི་སྦྱོར་སྣང་བ་སྟེ༔ བྱ་བ་གྲུབ་པའི་ཡེ་ཤེས་ཀྱི༔ རྩལ་མ་རྫོགས་པས་མི་སྣང་སྟེ༔ འདི་ལྟར་སྣང་བ་མཐོང་བའི་དུས༔ རང་རིག་ཅིར་ཡང་མི་འགྱུར་བས༔ གསེར་གྱི་ཐུར་མ་ལྟ་བུ་ཡིས༔ མཆོག་ཏུ་དྲན་པ་གལ་ཆེའོ༔ དེ་ལ་ཡིད་ཆེས་ལན་གསུམ་བསྐྱེད༔ མཐར་ཕྱིན་དུས་སུ་སྐྱེ་བའོ༔ རང་རིག་སྔར་བསྒོམ་གདམས་ངག་དང་༔ ཞི་ཁྲོ་རང་གསལ་སུན་མ་གཉིས༔ གཉིས་མེད་གཅིག་གི་རང་བཞིན་རིགས༔ མ་དང་བུ་གཉིས་འཕྲད་པ་དང་༔ ཆུ་དང་འོ་མ་འདྲེས་པའམ༔ ཆུ་བྲན་རྒྱ་མཚོར་སླེབ་པ་བཞིན༔ རང་དོན་རང་གིས་ཤེས་པར་བྱ༔ འདི་ཡི་དུས་སུ་རིག་པ་ནི༔ ལྷུན་གྲུབ་ཆེན་པོའི་སྐུ་ལ་ཐིམ༔ འདི་ཡི་དུས་སུ་འདི་ལྟར་འབྱུང་༔ རང་རིག་སྣང་བ་ཐམས་ཅད་ནི༔ ཁ་དོག་མཐིང་ཀ་མུ་ཁྱུད་ལྡན༔ ཉི་མ་ལ་ནི་འཇའ་འཁྱིལ་བཞིན༔ དེ་ཡི་སྟེང་དུ་ཉི་ལྟར་ཟླུམ༔ གདུགས་ཀྱི་ཚུལ་དུ་གནས་པའོ༔ འདི་ཡི་དུས་སུ་འཆར་ལུགས་བརྒྱད༔ ཐམས་ཅད་དུས་མཉམ་འཆར་བའོ༔ ཞི་ཁྲོ་ཡེ་ཤེས་བཞི་ལྡན་དང༔ ལྷུན་གྲུབ་ཤར་ལུགས་བརྒྱད་སོགས་རྣམས༔ དུས་མཉམ་འཆར་རོ་ས་མ་ཡཱ༔ དམ་དུམ་སྔ་ཕྱི་ཡོད་པར་གསུངས༔ ས་མ་ཡ༔ རྒྱ་རྒྱ་རྒྱ༔

ཕྲ་རགས་རྟོག་པ་འགགས་པའི་དུས༔ ནམ་མཁའ་རང་རིག་འོད་སྣང་ཐིམ༔ ཁ་དོག་ལྔ་ལྡན་འོད་དང་ཟེར༔ མ་ངེས་འཇའ་ཚོན་རིས་སུ་སྣང་༔ དེ་ཚེ་སྒྲ་འོད་ཟེར་གསུམ་འཁྲིགས༔ དེ་ལ་འོད་གསལ་གཉིས་མེད་ངང་༔ ལྷུན་གྲུབ་ཞི་ཁྲོའི་ལྷ་ཚོགས་འཆར༔ ཞི་ཁྲོའི་ལྷ་ཚོགས་ཐམས་ཅད་ནི༔ དཀྱིལ་འཁོར་ཕོ་བྲང་དག་ལ་རྫོགས༔ ཞི་བ་དང་ནི་ཁྲོ་བོའི་སྐུ༔ ཆེ་བའི་ཚད་ནི་ནམ་མཁའ་ཙམ༔ ཆུང་བའི་ཚད་ནི་ཡུངས་འབྲུ་ཙམ༔ འབྲིང་པོ་རི་རབ་ཙམ་པ་འཆར༔ མང་ཉུང་དཔག་ཏུ་མེད་པ་སྟེ༔ མགོ་བརྙན་མཚོན་ཆ་སྣ་ཚོགས་འཆར༔ འོད་ཟེར་ཉི་མ་འབུམ་ཤར་ཙམ༔ རང་གི་ཕྱོགས་སུ་རུབ་པ་སྙམ༔ ཞི་ཁྲོའི་དཀྱིལ་འཁོར་ཆེན་པོ་དེར༔ ཆོས་ཉིད་རང་སྒྲ་འབྲུག་སྟོང་ལྡིར༔ མི་སྙན་སྒྲ་སྐད་སྣ་ཚོགས་འཆར༔ སྐུ་ཡི་སྣང་བས་སྐྲག་པར་བྱེད༔ སྒྲ་སྐད་སྣང་བས་སྔངས་པར་བྱེད༔ ཟེར་གྱིས་སྣང་བས་འཆར་༼འཇིགས་པར ༽བར་བྱེད༔ ཞི་ཁྲོ་གཉིས་པོ་དུས་གཅིག་འཆར༔ དེ་ནི་ཡེ་ཤེས་བཞི་སྦྱོར་རོ༔ ལས་ངན་ཅན་ལ་ཁྲོ་བོ་སྔོན་ལ་འཆར༔ གཞན་སྣང་གཅིག་ཀྱང་མེད་པའོ༔ རང་བཞིན་འཆར་ལུགས་འདི་ལྟར་རོ༔ འོད་སྣང་སྔོན་ལ་འཆར་བའོ༔ དེ་ནི་ཞི་བའི་ཚོམ་བུར་གྱུར༔ དེ་ནས་ཡེ་ཤེས་བཞི་ལྡན་འཆར༔ དེ་ནས་ཁྲོ་བོའི་དཀྱིལ་འཁོར་འཆར༔ དེ་ནས་ཀ་དག་རང་ས་ཟིན༔ འཆར་ལུགས་བརྒྱད་པོ་དུས་གཅིག་གོ༔

ད་ནི་རང་གི་ཤེས་པ་ནི༔ ལྷུན་གྲུབ་ཆེན་པོར་ཐིམ་པའི་དུས༔ འཆར་ལུགས་བརྒྱད་ནི་འདི་ལྟར་འཆར༔ དེ་ཡང་རང་རིག་ཡེ་ཤེས་འདི༔ ཐུགས་རྗེ་ལྟ་བུར་ཤར་བས་ན༔ འཁོར་འདས་གཉིས་པོ་རྒྱ་མ་ཆད༔ རང་རིག་འོད་ལྟར་ཤར་བས་ནི༔ སྣང་བ་ཐམས་ཅད་ནང་ནས་གསལ༔ རང་རིག་སྐུ་ལྟར་ཤར་བས་ན༔ ཤེས་པའི་ཁ་ནི་ཕྱིར་མ་ཤོར༔ རང་རིག་ཡེ་ཤེས་ལྟར་ཤར་བས༔ སྣང་བ་ཐམས་ཅད་ཟང་ཐལ་ཉིད༔ རང་རིག་གཉིས་མེད་ལྟར་ཤར་བས༔ རང་གི་ཤེས་པ་རྩེ་གཅིག་གནས༔ རང་རིག་མཐའ་གྲོལ་ལྟར་ཤར་བས༔ མཐའ་ནི་གང་ལ་ཡང་མི་གནས་སོ༔ མ་དག་འཁོར་བའི་སྒོ་ལྟར་ཤར༔ སྲིད་པའི་འབྱུང་ཁུང་མི་འགགས་སོ༔ དག་པ་ཡེ་ཤེས་སྒོ་ལྟར་ཤར༔ ཆོས་ཉིད་མ་དང་བུ་འབྲེལ་ལོ༔ ཨེ་མ་འཁོར་འདས་གཉིས་མེད་འཆར༔ འོད་གསལ་ཟུང་འཇུག་ཏུ་འཆར༔ ཟུང་འཇུག་ཡེ་ཤེས་སུ་འཆར༔ ཡེ་ཤེས་གཉིས་མེད་དུ་འཆར༔ གཉིས་མེད་མཐའ་གྲོལ་དུ་འཆར༔ མཐའ་གྲོལ་འཁོར་བར་འཆར༔ འཁོར་བ་ཆོས་ཉིད་དུ་འཆར་རོ༔ ཤར་ལུགས་བརྒྱད་ཤེས་པའོ༔ ཤར་ལུགས་བརྒྱད་པོ་བྱུང་བའི་ཚེ༔ ཕྱིར་མི་ལྡོག་པ་དཔག་ཆེན་མདའ༔ ཐོག་པ་མེད་པ་འཕངས་བཞིན་འཆར༔ དྲན་བསམ་ཐོགས་པ་མེད་པ་རུ༔ སྐད་ཅིག་ཉིད་ལ་རང་སྣང་ཞིང་༔ ལྷུན་གྲུབ་ཆེན་པོའི་ཐེག་པར་གནས༔ ཅི་ལྟ་བར་ནི་ཐམས་ཅད་ཀུན༔ རང་རིག་རྩལ་སྣང་ཡིན་པར་ཤེས༔ སྤྲོ་རྟོག་མ་བྱེད་ཐག་ཆོད་ཅིག༔ འདི་དུས་མངོན་ཤེས་དྲུག་ཀྱང་འཆར༔ སྔོན་གྱི་སྐྱེས་གནས་ཤེས་དང་གཅིག༔ འཆི་འཕོ་གར་སྐྱེ་ཤེས་དང་གཉིས༔ མི་མངོན་པ་དང་མངོན་པ་ཤེས༔ རིགས་དྲུག་རྣམས་ཀྱི་མཚན་ཉིད་ཤེས༔ ཆོས་ཀྱི་རྒྱུད་ལུང་ཐམས་ཅད་ཤེས༔ དག་པ་ཡེ་ཤེས་ཞིང་ཁམས་ཤེས༔ དེ་ཡང་མངོན་ཤེས་དགུ་རུ་ཕྱེ༔ སྐུ་གསུང་ཐུགས་ཀྱི་མངོན་ཤེས་དགུ༔ སྐུ་ཡི་མངོན་ཤེས་གསུམ་པོ་ནི༔ ཆོས་སྐུ་སྐྱེ་བ་མེད་པར་ཤར༔ ལོངས་སྐུ་ཚོམ་བུ་རང་གསལ་ཤེས༔ སྤྲུལ་སྐུ་རིགས་དྲུག་སྐྱེ་གནས་ཤེས༔ གསུང་གི་མངོན་ཤེས་གསུམ་པོ་ནི༔ གྲགས་སྟོང་ཆོས་ཀྱི་ཕུང་པོ་ཤེས༔ བར་སྡེ་སྣོད་རིམ་དགུའི་ཆོས་རྣམས་ཤེས༔ ཐ་མ་རིགས་དྲུག་སྒྲ་སྐད་ཤེས༔ ཐུགས་ཀྱི་མངོན་ཤེས་གསུམ་པོ་ནི༔ ཆོས་སྐུའི་ཐུགས་ནི་ཀ་དག་ཆེན་པོར་ཤེས༔ ལོངས་སྐུའི་ཐུགས་ནི་ལྷུན་གྲུབ་ཆེན་པོར་ཤེས༔ སྤྲུལ་སྐུའི་ཐུགས་ནི་འཁོར་འདས་མཉམ་པར་ཤེས༔ དེ་ནི་རྣམ་ཤེས་དགུ་ཕྲུགས་ཡིན༔ ཨོ་རྒྱན་ང་ཡི་འདོད་གཞུང་ནི༔ སྐད་ཅིག་མ་ནི་དང་པོ་ལ༔ མངོན་པར་ཤེས་པ་དྲུག་ཕྲག་དྲུག༔ ཤིན་ཏུ་གསལ་བར་འཆར་བའོ༔ དབང་པོའི་མངོན་པར་ཤེས་པ་དྲུག༔ སེམས་ལས་སུ་རུང་བའི་མངོན་པར་ཤེས་པ་དྲུག༔ ཤེས་རབ་དབང་པོའི་མངོན་པར་ཤེས་པ་དྲུག༔ ཡེ་ཤེས་མཐོང་བ་རྣམ་པར་དག༔ ཟང་ཐལ་ཆེན་པོའི་མངོན་ཤེས་དྲུག༔ ཆོས་ཉིད་ཕྱིན་ཅི་མ་ལོག་པར༔ མཐོང་བའི་མངོན་པར་ཤེས་པ་དྲུག༔ སངས་རྒྱས་མཁྱེན་པ་ཕྱིན་ཅི་མ་ལོག་པ༔ ཡང་དག་མཐོང་བའི་མངོན་པར་ཤེས་པ་དྲུག༔ མངོན་པར་ཤེས་པ་དེ་དག་རྣམས༔ རྗེས་དྲན་དྲུག་པོ་དག་ལས་བྱུང་༔ འཇམ་དཔལ་དྲ་བ་སྡོམ་པ་ལས༔ མངོན་ཤེས་དྲུག་དང་རྗེས་སུ་དྲན༔ བྱང་ཆུབ་སེམས་དཔའ་རྣམས་ལ་ཡང་༔ ཅེས་པ་ལ་སོགས་ལུང་དང་མཐུན༔ ཡི་དམ་ལྷ་ཚོགས་རྗེས་དྲན་པས༔ ཞི་ཁྲོའི་ལྷ་ཚོགས་སྐུ་ཞལ་མཐོང་༔ ལམ་ཉིད་རྗེས་སུ་དྲན་པ་ཡིས༔ བར་དོར་ཆོས་ཉིད་དབང་བསྒྱུར་ནུས༔ སྐྱེས་གནས་རྗེས་སུ་དྲན་པ་ཡིས༔ དབང་པོ་ཐ་མལ་པ་རྣམས་ནི༔ སྤྲུལ་པ་སྐུ་ཡི་ཞིང་དུ་སྐྱེ༔ བསམ་གཏན་རྗེས་སུ་དྲན་པ་ཡིས༔ ཞག་ལྔ་བསམ་གཏན་གནས་པར་བྱེད༔ བླ་མའི་གདམས་ངག་རྗེས་དྲན་པས༔ རང་སྣང་ཡེ་ཤེས་ཟང་ཐལ་རྟོགས༔ ལྟ་བ་རྗེས་སུ་དྲན་པ་ཡིས༔ ལྷུན་གྲུབ་འོད་སྐུའི་དཀྱིལ་འཁོར་རྟོགས༔ སྔར་འདྲིས་མི་དང་འཕྲད་པ་ལྟར༔ རང་ངོ་རང་གིས་ཤེས་པ་ལྟར༔ འདི་དུས་མི་བརྗེད་གཟུངས་རྣམས་ཀྱང་༔ རང་གི་རྒྱུད་ལ་སྐྱེ་བར་འགྱུར༔

སྔོན་གྱི་ཆོས་རྣམས་རྒྱུད་ལ་འཆར༔ དེ་བཞིན་སྔར་མ་མཐོང་བ་ཡི༔ དམ་ཆོས་རྣམས་ཀྱང་རྒྱུད་ལ་འཆར༔ དེ་ནི་ཆོས་ཉིད་བར་དོ་ཟེར༔ ཏིང་འཛིན་རྒྱུད་ལ་འཆར་བ་དང་༔ མ་དག་པ་ཡི་རྟོག་སེམས་རྣམས༔ གཏན་ནས་སྐྱེ་བར་མི་འགྱུར་རོ༔ འདི་དུས་དབང་པོ་རབ་འབྲིང་མཐའ༔ ཉེར་གཅིག་བར་དུ་བརྟན་པ་ཐོབ༔ སྣང་ཚུལ་ཉེར་གཅིག་མཐོང་བའོ༔ རབ་ནི་སྐད་ཅིག་གསུམ་ལ་གྲོལ༔ འབྲིང་ནི་ཞག་པོ་ལྔ་ལ་གྲོལ༔ སྐད་ཅིག་ཉི་ཤུ་རྩ་གཅིག་ལ༔ དེ་ནི་གྲོལ་བ་འབྲིང་བའོ༔ ཐ་མ་སྤྲུལ་སྐུའི་ཞིང་ཁམས་སུ༔ བར་དོ་མེད་པར་སངས་རྒྱས་སོ༔ དབང་པོ་རབ་ཀྱི་བྱེ་བྲག་གིས༔ ཆོས་ཉིད་བར་དོ་དག་ལ་ནི༔ ཞག་པོ་ཉེར་གཅིག་བཤད་པར་འདུག༔ འདི་ལ་དུས་ནི་རྣམ་པ་གསུམ༔ འཇུག་པའི་དུས་དང་གྲོལ་བའི་དུས༔ མཐའ་རུ་ཕྱིན་པའི་དུས་དང་གསུམ༔ འཇུག་པ་ལ་ཡང་རྣམ་པ་གཉིས༔ རིག་པ་འོད་གསལ་ཕར་འཇུག་དང་༔ འོད་ནི་རིག་པ་ཚུར་འཇུག་གོ༔ གྲོལ་བ་ལ་ཡང་རྣམ་པ་གསུམ༔ རིག་པ་རྐྱེན་རྣམས་ཀུན་དང་བྲལ༔ འབྱུང་བ་གཞན་ལས་གྲོལ་བ་དང་༔ རིག་པ་དྲི་མ་མེད་པས་ན༔ ཉོན་མོངས་ཀུན་ལས་གྲོལ་བ་དང་༔ རིག་པ་ཕྱོགས་ལྷུང་མཐའ་གྲོལ་བས༔ ཕྱི་ནང་ཆོས་ལས་གྲོལ་བའོ༔ མཐའ་རུ་ཕྱིན་པ་འདི་ལྟར་རོ༔ རིག་པ་ཉིད་ནི་ཆོས་ཐམས་ཅད༔ སྣང་བ་དུས་གཅིག་གྲོལ་བའོ༔ གྲོལ་བའི་ཐིམ་ལུགས་བརྒྱད་འབྱུང་སྟེ༔ ཐུགས་རྗེ་ཐུགས་རྗེ་ལ་ཐིམ་པས༔ ཉི་མ་ནུབ་ཀའི་ཟེར་ཐག་ལྟར༔ གཟིགས་སྣང་ཀུན་ལས་འདས་པའོ༔ ཡེ་ཤེས་ཡེ་ཤེས་ལ་ཐིམ་པས༔ མ་པང་བུ་ཚུད་ལྟ་བུ་སྟེ༔ ཆོས་ཉིད་མ་དང་རིག་པ་བུ༔ ལྷུན་གྲུབ་སྦུབས་སུ་འཛོམས་པའོ༔ འོད་ཉིད་འོད་ལ་ཐིམ་པ་ཡང་༔ འཇའ་ཚོན་ནམ་མཁར་ཡལ་བ་ལྟར༔ འོད་སྣང་ལྔ་ཡང་ནམ་མཁར་འདུས༔ སྐུ་ཉིད་སྐུ་ཐིམ་བུམ་སྐུ་འདྲ༔ ཤེས་བྱ་ནང་དུ་གསལ་བས་ན༔ ཕྱི་རུ་མཚན་མ་ཞལ་ཕྱག་མེད༔ རང་ངོ་རྣམ་པར་དག་པའོ༔ གཉིས་མེད་གཉིས་མེད་ལ་ཐིམ་པས༔ ཆུ་ལ་ཆུ་བོ་ཐིམ་པ་ལྟར༔ རྟོག་པའི་ཡུལ་མེད་རང་སངས་ཉིད༔ མཐའ་གྲོལ་མཐའ་གྲོལ་ལ་ཐིམ་པས༔ ནམ་མཁའ་ནམ་མཁའ་ལ་ཐིམ་བཞིན༔ རྟོག་པའི་ཡུལ་མེད་ཀ་ནས་དག༔ མ་དག་དག་པར་ཐིམ་པ་སྟེ༔ སྦྲ་ཡི་ཆོན་ཐག་བསྡུས་པ་ལྟར༔ ཐིག་ལེ་ཉག་གཅིག་ངང་དུ་རྫོགས༔ དག་པ་ཡེ་ཤེས་ཆེན་པོ་ནི༔ ངོ་བོ་སྐུ་ལ་ཐིམ་པ་སྟེ༔ སེང་གེས་གངས་ལ་ཟིན་པ་ལྟར༔ ཡ་ངའི་རྟོག་པ་ཀུན་དང་བྲལ༔ ལྷུན་གྲུབ་ཀ་དག་རང་གྲོལ་ལོ༔ ཆོས་ཉིད་བར་དོའི་འཆར་ཚུལ་ལོ༔ ས་མ་ཡ༔ རྒྱ་རྒྱ་རྒྱ་༔ གཏེར་རྒྱ༔ སྦས་རྒྱ༔ ཟབ་རྒྱ༔ དམ་རྒྱའོ༔

ཀློང་ཡངས་སྲོག་གི་སྙིང་བཅུད་ལས༔ ལོགས་སུ་གབ་པ་བར་དོའི་ཆོས༔ དབང་པོའི་བྱེ་བྲག་རབ་འབྲིང་གསུམ༔ འཆར་ཚུལ་ལེགས་པར་བྲི་བར་བྱ༔ དབང་པོ་རབ་འབྲིང་ཐ་མ་གསུམ༔ རེ་རེ་ལ་ཡང་བདུན་བདུན་སྟེ༔ བྱེ་བྲག་ཉི་ཤུ་རྩ་གཅིག་ཕྱེ༔ རབ་ཀྱི་ཐ་མ་རབ་ཀྱི་འབྲིང་༔ རབ་ཀྱི་ཕུལ་དང་རབ་ཀྱི་རྩེ༔ རབ་ཀྱི་མཐའ་རུ་ཕྱིན་དང་བདུན༔ དེ་ཡང་མཐོང་ཚུལ་རེ་རེ་སྟེ༔ ཡེ་ཤེས་སྣང་བ་སྐྱེ་ཚུལ་རེ༔ རྟོགས་པའི་ཚད་དེ་སྣང་ཚུལ་རེ༔ གོ་བའི་སྐྱེ་ཚུལ་རེ་རེ་དང་༔ ཤེས་པ་ཡི་ནི་བལྟ་ལུགས་རེ༔ ཤར་ནས་རང་རང་སྣང་བ་ལ༔ བརྟན་པ་ཐོབ་ནས་གྲོལ་བའོ༔ དབང་པོ་འབྲིང་གི་ཐ་མ་དང་༔ འབྲིང་གི་འབྲིང་དང་འབྲིང་གི་རབ༔ འབྲིང་གི་རྩེ་མོ་འབྲིང་མཐར་ཕྱིན༔ དེ་ལྟ་ཡང་ནི་གོང་ལྟ་བུ༔ སྣང་བ་ཡེ་ཤེས་རེ་རེར་འཆར༔ དབང་པོ་ཐ་མ་ཐ་མའི་འབྲིང་༔ ཐ་མའི་རབ་དང་ཐ་མའི་མཆོག༔ ཐ་མའི་ཕུལ་དང་ཐ་མའི་རྩེ༔ ཐ་མའི་ཕུལ་དུ་ཕྱིན་པའོ༔ དེ་ཡང་དབང་པོ་རབ་ནི་སྐད་ཅིག་མ༔ རྣམ་པ་གསུམ་ལ་སངས་རྒྱས་ནས༔ སྤྲུལ་སྐུའི་རང་བཞིན་འཆར་བའོ༔ སྐད་ཅིག་གཅིག་ལ་འོད་སྣང་འགགས༔ སྐད་ཅིག་གཉིས་ལ་ལྷུན་གྲུབ་འཆར༔ སྐད་ཅིག་གསུམ་ལ་ཀ་དག་ཐོབ༔ ཀ་དག་ཐོབ་ནས་སྤྲུལ་པ་ནི༔ ཉི་ཟེར་སྐར་མདའ་ལྟ་བུ་རུ༔ རང་བཞིན་མ་འགགས་རྩལ་ཤར་ནས༔ ཞག་པོ་གསུམ་ལ་འགྲོ་དོན་ནུས༔ དབང་པོ་རབ་ཀྱི་རྩེ་མོ་ནི༔ ཞག་གཅིག་འོད་སྣང་བར་དོ་སྡོད༔ དེ་ནས་ཡེ་ཤེས་བཞི་སྦྱོར་མཐོང་༔ དེ་དུས་རང་གི་མིག་གཉིས་ནས༔ ཡེ་ཤེས་མེ་དཔུང་གཉིས་བྱུང་ནས༔ མཚོན་ཆར་བབ་ཅིང་ཀུན་ཚིག་སྟེ༔ སྣང་བ་ཐམས་ཅད་མེད་པར་ཤར༔ དེ་ལ་རང་གི་ཤེས་པ་དང་༔ རང་ཡུལ་མཐོང་སྟེ་ལྷུན་གྲུབ་ཏུ༔ ཀ་དག་ས་ནས་སྤྲུལ་སྐུ་འགྱེད༔ དེ་ཡང་ཉི་ཟེར་སྐར་མདའ་ལྟར༔ རབ་ཀྱི་མཆོག་ནི་ཞག་གཅིག་ནས༔ སངས་རྒྱས་སྤྲུལ་པ་འགྱེད་པར་ནུས༔ ཞག་གཅིག་འོད་མཚོན་སྣང་བ་འཆར༔

དེ་ནས་རང་གི་སྙིང་ག་ནས༔ ཡེ་ཤེས་ཉི་མ་གཅིག་ཤར་ཏེ༔ དེ་ལས་འོད་ཟེར་ཕྱོགས་བཅུར་འཕྲོས༔ འོད་ཟེར་རྩེ་མོ་རེ་རེ་ལ༔ ཞི་ཁྲོ་རིགས་བརྒྱའི་སྐུ་རེ་འཆར༔ སྣང་བ་ཐམས་ཅད་སྐུ་རུ་མཐོང་༔ དེ་ནས་ལྷུན་གྲུབ་ཆེན་པོའི་སར༔ ངེས་པ་རྙེད་ནས་ཀ་དག་ཐོབ༔ ཞག་པོ་གཉིས་ནས་འགྲོ་དོན་བྱེད༔ ཞག་པོ་བདུན་ནས་སྤྲུལ་པ་འགྱེད༔ ཉི་ཟེར་སྐར་མདའ་ལྟ་བུའོ༔ རབ་ཀྱི་ཕུལ་ནི་ཞག་གསུམ་བར་དོར་སྡོད༔ ཞག་གཅིག་འོད་ཚོམ་སྣང་བ་འཆར༔ གཉིས་པར་སྐུ་ཡི་སྣང་བ་འཆར༔ གསུམ་པར་ལྷུན་གྲུབ་ཀ་དག་ཐོབ༔ འགྲོ་དོན་ཞག་པོ་བཅུ་གཅིག་ནས༔ ཉི་ཤར་སྐར་མདའ་ལྟ་བུར་ཤར༔ དབང་པོ་རབ་ཀྱི་རབ་ལ་ནི༔ ཞག་གཅིག་བར་དོར་སྡོད་པ་སྟེ༔ རང་གི་མདུན་དུ་ཚོམ་བུ་ལྔ༔ བཀྲག་དང་ལྡན་པའི་སྣང་བ་འཆར༔ དེ་ལ་ཡིད་སད་སྣང་བ་ནི༔ ཤར་ནས་རིམ་བཞིན་ཚོམ་བུ་དང་༔ ཞག་གཅིག་འཆར་༼ཆགས་༽ནས་འདུག་པའོ༔ དེ་ནས་ལྷུན་གྲུབ་ངེས་པར་ཐོབ༔ ཀ་དག་འགྲོ་དོན་ཞག་བཅུ་བཞི༔ ཉི་ཟེར་སྐར་མདའ་ལྟ་བུ་རུ༔ དབང་པོ་རབ་ཀྱི་འབྲིང་པོ་ནི༔ ཞག་ལྔ་བར་དོར་སྡོད་པའོ༔ ཞག་བཞི་ཚོམ་བུ་བཞི་ལ་སྡོད༔ ལྔ་ལ་རང་གི་སྙིང་ག་ནས༔ འོད་ཟེར་རྟ་རྔ་ཙམ་པ་གཅིག༔ ནམ་མཁའི་དབྱིངས་སུ་ཚོམ་བུར་སྣང་༔ དེ་ལ་ཡིད་ཆེས་རབ་སྐྱེས་ནས༔ ཀ་དག་ལྷུན་གྲུབ་ངོ་འཕྲོད་དོ༔ འགྲོ་བའི་དོན་ལ་ཉེར་གཅིག་ནས༔ ཉི་ཟེར་སྐར་མདའ་ལྟ་བུར་ནུས༔ དབང་པོ་རབ་ཀྱི་ཐ་མ་ནི༔ ཚོམ་བུ་ལྔ་ལ་ཞག་ལྔ་སྡོད༔ ཡེ་ཤེས་སྣང་བ་ཞག་གཅིག་གོ༔ དེ་དུས་རང་གི་མིག་གཉིས་ནས༔ ཡེ་ཤེས་མེ་ལོང་གཉིས་ཤར་ནས༔ དེ་ལ་སྣང་བ་དཔག་མེད་འཕྲོ༔ ཚོམ་བུ་གཅིག་གི་སྟེང་དུ་འཆར༔ གཅིག་ནི་རང་གི་མདུན་དུ་འཆར༔ དེ་ལྟར་ཤར་བའི་དུས་དེ་རུ༔ རང་རིག་ཡིན་པས་ཐག་ཀྱང་བཅད༔ སྒྲ་འོད་ཟེར་ལ་མ་སྐྲག་ཅིག༔ དེ་རྣམས་ནི་དབང་པོ་རབ་བདུན་གྱི་གྲོལ་ལུགས་སོ༔

དབང་པོ་འབྲིང་གི་གྲོལ་ལུགས་ནི༔ དབང་པོ་འབྲིང་གི་མཐར་ཕྱིན་ཏེ༔ ཞག་བདུན་དག་ལ་ངེས་པ་རྙེད༔ འོད་ཚོམ་ལྔ་ལ་ཞག་ལྔ་ཆགས༔ ཞག་གཅིག་ཆོས་དབྱིངས་ཡེ་ཤེས་སོ༔ ཞག་གཅིག་མེ་ལོང་ཡེ་ཤེས་སོ༔ དེ་ལྟར་ཞག་བདུན་སྡོད་པའོ༔ དེ་དུས་རང་ཉིད་སྙིང་ཀ་ནས༔ སྐུ་གཅིག་བྱུང་བ་དེ་ཉིད་ལས༔ ལྷ་སྐུ་ཞི་ཁྲོ་གྲངས་མེད་འཕྲོ༔ དེ་ནས་ལྷུན་གྲུབ་ངེས་པ་རྙེད༔ འགྲོ་བའི་དོན་ཡང་ཉེར་དྲུག་ནས༔ ཉི་ཟེར་སྐར་མདའ་ལྟ་བུར་གནས༔ དབང་པོ་འབྲིང་གི་རྩེ་མོ་ནི༔ ཚོམ་བུ་ལྔ་ལ་ཞག་ལྔ་སྡོད༔ ཡེ་ཤེས་བཞི་ལ་ཞག་གསུམ་གནས༔ དེ་དུས་རང་གི་སྟེང་དུ་ནི༔ ཡེ་ཤེས་བཞི་ཡི་འོད་སྐུ་ལྔ༔ དཔག་ཏུ་མེད་པའི་འོད་སྐུ་མཐོང་༔ དེ་ནས་ལྷུན་གྲུབ་ཀ་དག་རང་ངོ་ཤེས༔ འགྲོ་བའི་དོན་ལ་ཉེར་དྲུག་ནས༔ ཉི་ཟེར་སྐར་མདའ་ལྟ་བུར་ནུས༔ འབྲིང་གི་མཆོག་ནི་འདི་ལྟར་རོ༔ ཚོམ་བུ་ལྔ་ལ་ཞག་ལྔ་ཆགས༔ ཡེ་ཤེས་བཞི་ལ་ཞག་བཞི་ཆགས༔ དེ་ནས་ལྷུན་གྲུབ་རང་ངོ་ཤེས༔ ཅིར་སྣང་ཐམས་ཅད་མེ་ལོང་ལྟར༔ གསལ་ལ་འཛིན་པ་མེད་པར་རྟོགས༔ འགྲོ་བའི་དོན་ལ་སུམ་ཅུ་གནས༔ ཉི་ཞུར་སྐར་མའི་ཟེར་ལྟར་ནུས༔ དབང་པོ་འབྲིང་གི་ཡུལ་ནི་འདི་ལྟར་རོ༔ འོད་ཚོམ་བུ་ལྔ་ལ་ཞག་ལྔ་ཆགས༔ དེ་ནས་ལྷུན་གྲུབ་རང་ངོ་ཤེས༔ སྤྲུལ་སྐུའི་འགྲོ་དོན་ཞག་སུམ་ཅུ༔ རྩ་གཅིག་དག་ནས་ནུས་པའོ༔ དབང་པོ་འབྲིང་གི་རབ་ལ་ནི༔ ཚོམ་བུ་ལྔ་ལ་ཞགས་ལྔ་ཆགས༔ ཡེ་ཤེས་ལྔ་ལ་ཞག་ལྔ་ཆགས༔ ལྷུན་གྲུབ་སྦུབས་སུ་ཞག་བཞི་ཆགས༔ སྣང་བ་ཐམས་ཅད་འོད་ཁྱིམ་དུ༔ ཀ་དག་ས་ལ་ངེས་པ་རྙེད༔ འགྲོ་བའི་དོན་ལ་སོ་བཞི་གནས༔ ཉི་ཟེར་སྐར་མདའ་ལྟ་བུར་ནུས༔ དབང་པོ་འབྲིང་གི་འབྲིང་པོ་ནི༔ ཚོམ་བུ་ལྔ་ལ་ཞག་ལྔ་ཆགས༔ ལོངས་སྤྱོད་ཞི་ཁྲོ་ཞིང་ལ་གཅིག༔ ཡེ་ཤེས་ལྔ་ལ་ཞག་ལྔ་ཆགས༔ ལྷུན་གྲུབ་སྣང་བ་ཞག་གཅིག་སྟེ༔ བཅུ་གཉིས་ཞག་ལ་ངེས་པ་རྙེད༔ འགྲོ་བའི་དོན་ཡང་སོ་བདུན་གནས༔ ཉི་ཞུར་སྐར་མདའ་ལྟ་བུར་འཆར༔ དབང་པོ་འབྲིང་གི་ཐ་མ་ནི༔ ཚོམ་བུ་ལྔ་ལ་ཞག་ལྔ་སྟེ༔ ཡེ་ཤེས་ལྔ་ལ་ཞག་ལྔ་དང་༔ ལྷུན་གྲུབ་དག་ལ་ཞག་གསུམ་ཆགས༔ དེ་ནས་སྐད་ཅིག་རང་ངོ་ཤེས༔ སྤྲུལ་པའི་འགྲོ་དོན་སོ་བརྒྱད་ནས༔ ཉི་ཟེར་སྐར་མདའ་ལྟ་བུར་གྱུར༔ ཡར་ལ་འགྲོ་ལུགས་བསྟན་པའོ༔

དབང་པོ་ཐ་མ་བདུན་པོ་ནི༔ གྲོལ་ལུགས་ཆེན་པོ་འདི་ལྟར་རོ༔ ཐ་མའི་མཐར་ཕྱིན་འདི་ཉིད་ནི༔ ཚོམ་བུ་ལྔ་ལ་ཞག་དྲུག་ཐོག༔ ཡེ་ཤེས་ལྔ་ལ་ཞག་ལྔ་ཐོག༔ ལྷུན་གྲུབ་ལམ་ལ་ཞག་ལྔ་ཐོག༔ དེ་ནས་རང་སྣང་ངོ་ཤེས་ནས༔ ཡང་དག་རྫོགས་པའི་སངས་རྒྱས་ཐོབ༔ སྤྲུལ་པའི་འགྲོ་དོན་ཞེ་གཅིག་གནས༔ ཉི་ཟེར་སྐར་མདའ་ལྟ་བུར་རོ༔ དབང་པོ་ཐ་མའི་རྩེ་མོ་ནི༔ ཚོམ་བུ་ལྔ་ལ་ཞག་དྲུག་ཐོག༔ ཡེ་ཤེས་ལྔ་ལ་ཞག་ལྔ་ཐོག༔ ལྷུན་གྲུབ་ལམ་ལ་ཞག་ལྔ་ཐོག༔ བཅོ་ལྔ་དག་ནས་རང་ངོ་ཤེས༔ སྤྲུལ་པའི་སྐུ་ཡང་ཞེ་གསུམ་གནས༔ ཉི་ཟེར་སྐར་མདའ་ལྟ་བུའོ༔ ཐ་མའི་མཆོག་ནི་འདི་ལྟ་སྟེ༔ ཚོམ་བུ་ལྔ་ལ་ཞག་དྲུག་ཐོག༔ ཡེ་ཤེས་ལྔ་ལ་ཞག་ལྔ་ཐོག༔ ལྷུན་གྲུབ་དག་ལ་ཞག་ལྔ་ཐོག༔ བཅུ་དྲུག་ཞག་ལ་བརྟན་པ་ཐོབ༔ སྤྲུལ་པའི་སྐུ་ཡང་ཞེ་བདུན་གནས༔ ཉི་ཟེར་སྐར་མདའ་ལྟ་བུར་འགྲུབ༔ ཐ་མའི་ཕུལ་ལ་དེ་དང་འདྲ༔ དབང་པོ་ཐ་མའི་རབ་ལ་འདི་ལྟ་སྟེ༔ འོད་ཚོམ་ལྔ་ལ་ཞག་དྲུག་ཐོག༔ ཡེ་ཤེས་ལྔ་ལ་ཞག་བརྒྱད་སྡོད༔ ལྷུན་གྲུབ་དག་ལ་ཞག་བཞི་གནས༔ བཅོ་བརྒྱད་དག་ནས་རང་ངོ་ཤེས༔ སྤྲུལ་པའི་སྐུ་ལ་ཞག་བཅུ་གནས༔ སེམས་ཅན་ཀུན་གྱི་དོན་བྱེད་ནུས༔ ཐ་མའི་འབྲིང་ནི་འདི་ལྟ་སྟེ༔ སྲིད་པ་བར་དོའི་ཞག་དང་མཐུན༔ འོད་ཚོམ་དག་ལ་ཞག་བཅུ་གཉིས༔ ཡེ་ཤེས་ལྔ་ལ་ཞག་བཞི་གནས༔ ལྷུན་གྲུབ་དག་ལ་ཞག་ལྔ་གནས༔ སྤྲུལ་པའི་སྐུ་ཡང་ཉེར་གཅིག་གནས༔ ཉི་ཟེར་སྐར་མདའ་ལྟ་བུར་ནུས༔ དབང་པོ་ཐ་མའི་ཐ་མ་ནི༔ དེ་ལྟར་རང་མདངས་འཆར་བའི་ཕྱིར༔ འོད་སྐུ་མཐའ་མེད་པ་ཡི་ཡུལ༔ ཡང་དག་པ་ལྷུན་གྲུབ་ཆེན་པོ་ངོ་ཡིས་ཟུངས་ཤིག༔ ཆོས་ཉིད་ཞི་ཁྲོའི་བར་དོ་ཞེས་བྱ་བ་རྫོགས་སོ༔ ས་མ་ཡ༔

དབང་པོ་ཐ་འབྲིང་མན་ཆད་རྣམས༔ སྤྲུལ་པ་སྐུ་ཡི་ཞིང་ཁམས་སུ༔ རིགས་ཀྱིས་བདག་པོ་རྣམ་པ་ལྔའི༔ བྱིན་རླབས་དབང་བསྐུར་ལུང་བསྟན་ཏེ༔ ལས་ཟད་འཛིན་པ་དག་ནས་ཀྱང་༔ བར་དོ་མེད་པར་སངས་རྒྱའོ༔ ས་མ་ཡ༔ རྒྱ་རྒྱ་རྒྱ༔ ཀློང་འབྱམས་སྲོག་གི་ཡང་བཅུད་ལས༔ སྲིད་པ་བར་དོའི་གྲོལ་ཚུལ་བསྟན༔ གོང་གི་ཆོས་ཉིད་བར་དོ་ལ༔ རང་ངོ་མ་ཤེས་རང་རྒྱུད་འཁྲུལ༔ འཁྲུལ་ལུགས་ཉི་ཤུ་རྩ་གཅིག་སྟེ༔ ལ་ལ་རྣམ་པ་ཀུན་ལས་འཁྲུལ༔ ལ་ལ་ཉམས་ལས་འཁྲུལ་པའོ༔ ལ་ལ་མ་དག་པ་ལས་འཁྲུལ༔ ལ་ལ་དམིགས་པ་དག་ལས་འཁྲུལ༔ ལ་ལ་ཅི་ཡང་མེད་སྙམ་འཁྲུལ༔ ལ་ལ་ཡུལ་ལས་འཁྲུལ་པའོ༔ ལ་ལ་ཡུལ་ནི་དག་ལས་འཁྲུལ༔ ལ་ལ་སྙིང་པོ་དག་ལས་འཁྲུལ༔ ལ་ལ་མ་རིག་པ་ལས་འཁྲུལ༔ ལ་ལ་རྐྱེན་ལས་འཁྲུལ་པའོ༔ ལ་ལ་རྟོག་པ་དག་ལས་འཁྲུལ༔ ལ་ལ་གཞི་ལས་འཁྲུལ་པའོ༔ ལ་ལ་ངོ་མ་ཤེས་པས་འཁྲུལ༔ ལ་ལ་འཛིན་པ་དག་ལས་འཁྲུལ༔ ལ་ལ་འདུ་བྱེད་དག་ལས་འཁྲུལ༔ ལ་ལ་རྒྱུ་ལས་འཁྲུལ་བ་དང་༔ ལ་ལ་སྐད་ཅིག་མ་ལས་འཁྲུལ༔ ལ་ལ་ཆད་པར་འཁྲུལ་བ་དང་༔ ལ་ལ་གཟུགས་སོགས་འཁྲུལ་པའོ༔ སྲིད་པ་བར་དོའི་འཁྲུལ་ལུགས་ནི༔ ཉི་ཤུ་རྩ་གཅིག་དག་ཏུ་བཤད༔ རང་ངོ་མ་ཤེས་རང་སྣང་འཁྲུལ༔ སྲིད་པ་བར་དོ་ཞེས་བྱ་བ༔ ཤ་ཁྲག་རང་གི་ལུས་དང་བྲལ༔ སྒྱུ་མ་ཡིད་ཀྱི་གཟུགས་ཅན་ཏེ༔ མངོན་སུམ་སྲིད་པའི་ཤ་གཟུགས་ཅན༔ དབང་པོ་ཀུན་ཚང་ཐོགས་མེད་རྒྱུ༔ ཆོས་ཉིད་བདེན་པའི་དོན་མ་མཐོང་༔ འོད་སྣང་ཀུན་ལ་བྲེད་སྔངས་ནས༔ འཁོར་བའི་ལམ་ཟིན་སྔར་ཞེན་གྱིས༔ བག་ཆགས་དེ་ལ་ཨ་འཐས་པས༔ རང་ལུས་མེད་ཀྱང་ཡོད་སྙམ་འཆར༔ དེ་ཡང་ཡིད་ལ་ཆགས་པའི་ལུས་ཡོད་པས༔ དབང་པོ་ཚང་ནས་གར་ཡང་རྒྱུ༔ བྱ་སྒྲོ་རླུང་གིས་ཁྱེར་བ་བཞིན༔ ཕྱད་ཕྱོད་ཡད་ཡུད་སྙམ་ཞིང་འཇུག༔ སྔར་གྱི་ཆགས་པ་ཐམས་ཅད་ཀུན༔ སྤྱོད་ཅིང་འཇུག་པ་སྙམ་བྱེད་འཆར༔ སེར་སྣའི་རྨི་ལམ་རྨི་ལམ་ཙམ༔ བན་བུན་ལོང་ལོང་འཆར་བའོ༔ དེ་ཡང་རིག་པ་ཡུལ་དང་བྲལ༔ བེམས་རིག་བྲལ་བའི་གནད་ཀྱིས་སུ༔ ས་གཅིག་མི་སྡོད་ཚིག་པ་ཟ༔ སྙིང་རླུང་ལངས་ཤིང་ཕྱད་ཕྱོད་དོ༔ དབང་པོ་རེས་གསལ་རེས་མི་གསལ༔ དེ་ནས་བསམ་བློ་སྐད་ཅིག་པས༔ ཤི་འདུག་བསམ་པ་ཡིད་ལ་སྐྱེ༔ དེ་དུས་སྙིང་རྩ་ཆད་པ་མོད༔ ད་ནི་ཅི་བྱེད་བྱེད་སྙམ་པའི༔ མི་དགའ་རྟོག་པ་བྲེང་གིས་འཆར༔ བསམ་པ་མགོ་འཐིམ་སྙིང་རྩ་དྲངས༔ སྡུག་བསྔལ་དྲག་པོ་དཔག་མེད་སྐྱེ༔ སྔར་བས་དྲན་པ་བདུན་འགྱུར་གསལ༔ རིགས་དྲུག་སོ་སོའི་སྣང་བ་འཆར༔ འདོད་པ་ཁམས་ཀྱི་ཕྱི་སྣོད་དང་༔ ནང་བཅུད་རང་གིས་རིག་ཅིང་གསལ༔ རང་ཉིད་གར་སྐྱེའི་སྣོད་བཅུད་ཀྱང་༔ ཤིན་ཏུ་གསལ་བར་འཆར་བའོ༔ རྫུ་འཕྲུལ་ཡན་ལག་ཀུན་རྫོགས་ནས༔ དངོས་པོ་ཀུན་ལ་ཐོགས་མེད་ཅིང་༔ རི་བྲག་ཀུན་ལ་ཟང་ཐལ་འཇུག༔ དེ་ཡི་དུས་སུ་ཚེ་ཚད་ནི༔ ཉི་ཤུ་རྩ་གཅིག་ཚེ་ཚད་ཡིན༔ བྱིས་པ་ལོ་བརྒྱད་ལོན་པའམ༔ ལོ་བཅུ་ལོན་པའི་ལུས་ཚད་དུ༔ རྨི་ལམ་ལྟ་བུའི་གཟུགས་སུ་གནས༔ སྐྱེ་བའི་གནས་ནི་རྣམ་བཞི་སྟེ༔ ངེས་མེད་བསམ་གཏན་དག་ལ་རེ༔ སྤྱོད་པ་ཉིད་ནི་ཀུན་ལ་སྤྱོད༔ འོད་ཟེར་ཉིད་ནི་རྣམ་པ་དྲུག༔ ལས་ཉོན་ཅན་ལ་དམྱལ་རང་ཁམས༔ དྲན་པ་རྨུགས་ནས་རྡོ་རྗེའོ༔ དྲན་པ་གསལ་པོ་དེ་ཡི་དུས༔ ཕོ་མོ་ཆགས་པ་སྤྱོད་པའི་སྣང་བ་འཆར༔ དེ་ཡི་དུས་སུ་དྲན་པ་ལེགས་པར་བཟུང་༔ བླ་མ་ཡི་དམ་དྲན་བྱས་ལ༔ འདོད་ཆགས་ཞེ་སྡང་ཕྲག་དོག་དང་༔ མིག་སེར་འཁྲིག་ཆགས་མེད་པ་རུ༔ རང་སེམས་རྣམ་དག་སྤྲོས་བྲལ་ངང་༔ ཡི་དམ་ཡབ་ཡུམ་སེམས་ཟིན་ནས༔ མངལ་ཁ་བསྡམ་པ་ཡོད་པའོ༔ འདོད་ཆགས་དེ་ལ་མི་ཆགས་པར༔ ཞེན་ལོག་བསྒོམས་ནས་ལུས་མི་ལེན༔ དེ་དུས་རིགས་དྲུག་ཞིང་ཁམས་ནི༔ བདེ་དང་ལྡན་པར་འཆར་བའོ༔ ལྷ་ཡི་འོད་ནི་དཀར་པོ་བཀྲག་མེད་དང་༔ ལྷ་ཁང་འཁོར་ལོ་བུམ་པ་དང་༔ ལྷ་ཡི་རྣམ་པ་སྣ་ཚོགས་འཆར༔ དེ་ཡི་དཀྱིལ་དུ་སེམས་གཏད་པས༔ མི་དེ་ལྷ་ཡི་གནས་སུ་སྐྱེ༔ ལྷ་མིན་འོད་ནི་སེར་མོག་ལ༔ དེ་ཡི་ནང་དུ་གོ་ཁྲབ་དང་༔ རྫོངས་དང་དམག་གི་འཁྲུག་རྩོད་དར༔ དེ་ཡི་གསེབ་ཏུ་སེམས་ཞུགས་ན༔ མི་དེ་ལྷ་མིན་གནས་སུ་སྐྱེ༔ མི་ཡི་འོད་ནི་དམར་མོག་ལ༔ དེ་ཡི་ནང་དུ་ཡུལ་གྲོང་དང་༔ སྐྱེ་བོ་ཕོ་མོ་མང་པོ་དང་༔ ཁྱད་པར་སྦྱོར་བ་བྱེད་པ་མཐོང་༔ སྦྱོར་བ་བྱེད་པ་ཐམས་ཅད་ལ༔ སེམས་ཀྱིས་ཆགས་པར་གྱུར་པ་ན༔ མི་དེ་མངལ་དུ་འཇུག་པ་སྟེ༔ བླ་མ་མི་ཆེན་དཔོན་པོ་རྣམས༔ སྦྱོར་བ་བྱེད་པའི་མདུན་དུ་བསྡད༔ དེ་ནས་མངལ་སྒོ་བདམས་པ་གཅེས༔ ཞེན་ཆགས་མེད་ན་མངལ་མི་འཇུག༔ གལ་ཏེ་ལས་ཀྱིས་མཚམས་སྦྱར་ནས༔ གདམས་ངག་མེད་པའི་སེམས་ཅན་ནི༔ དེ་ནས་མངལ་གྱི་སྒོར་ཚུད་ནས༔ ཕ་དང་མ་ཡི་རྒྱུ་རྐྱེན་ལས༔ མེར་མེར་པོ་དང་ནུར་ནུར་པོ༔ གོར་གོར་པོ་དང་ཉ་ལྟ་བུ༔ རུས་སྦལ་བཞིན་དང་སྦལ་བ་བཞིན༔ མཁྲེངས་འགྱུར་ལ་སོགས་བདུན་ཕྲག་བདུན༔ ལྟེ་བ་ལས་ནི་ལུས་རྣམས་བསྐྱེད༔ ཟླ་དགུ་དེ་བཞིན་ངོ་བཅུ་ནས༔ ལུས་པོ་མ་ཡི་མངལ་ནས་ཐོན༔ དེ་ལྟར་གཟུགས་ནི་ཐ་དད་ནི༔ འཁོར་བ་ཉིད་ནས་འཁོར་བའོ༔ མི་འཁོར་ཡེ་ཤེས་འདི་ལྟ་སྟེ༔ ནམ་མཁའ་ལམ་དུ་སུས་བྱེད་པ༔ འདི་ལ་རྣལ་འབྱོར་རྫོགས་པའོ༔ སྔགས་ཀྱི་དམ་པ་ཟིན་ནས་བཟློག༔ བྱོལ་སོང་འོད་ནི་སེར་མོག་ལ༔ དེ་ཡི་ནང་དུ་ཁང་སྟོང་དང་༔ སྨུག་པ་ཁ་ཆུར་བུ་ཡུག་དང་༔ བྱོལ་སོང་རྣམ་པ་སྣ་ཚོགས་མཐོང་༔ དེ་ཡི་གསེབ་ཏུ་སེམས་བཅུག་ནས༔ མི་དེ་བྱོལ་སོང་གནས་སུ་སྐྱེ༔ ཡི་དྭགས་ལུས་ནི་དུད་ཁ་བ༔ དེ་ཡི་ནང་དུ་བྲག་ཕུག་དང་༔ ཡི་དྭགས་རྣམ་པ་སྣ་ཚོགས་དང་༔ དེ་ཡི་ནང་དུ་སེམས་ཚུད་ནས༔ མི་དེ་ཡི་དྭགས་གནས་སུ་སྐྱེ༔ དམྱལ་བའི་འོད་ནི་མུན་ནག་གཏིབས༔ བལ་ནག་གཡེངས་འདྲ་སྡོང་དུམ་བྱེད༔ དེ་ཡི་གསེབ་ཏུ་དམྱལ་བའི་གནས༔ ཚ་གྲང་ལྕགས་ཁང་སྡུག་བསྔལ་མཐོང་༔ དེ་ཡི་གསེབ་ཏུ་སེམས་ཆགས་ན༔ ཨ་པ་སྙམ་ནས་ཆགས་པའོ༔ ཡང་ན་བང་ན་གཤེས་ལོག་མཐོང་༔ དེ་ལ་སེམས་ཡིད་ཆགས་གྱུར་ན༔ མི་དེ་དམྱལ་བའི་གནས་སུ་སྐྱེ༔ རིགས་དྲུག་ཡུལ་དུ་སེམས་ཆགས་ནས༔ འགྲོ་བར་འདོད་ཀྱང་རྒྱས་འཐུམས་ནས༔ ཐོག་པ་ཉིད་དང་བཅས་པའོ༔ དེ་ནས་རྩལ་ནི་མོས་༼མེས་༽བཟུང་ངང་༔ འདམ་གྱིས་རྡུལ་རྣམས་བཟུང་བ་ལྟར༔ བྱ་འགྲོ་འདོད་ཀྱང་གཟན་བུའི་དབང་༔ ས་ཁུང་བྲུབ་པས་སྙིངས་ཟིན་ལྟར༔ དབང་མེད་འཁོར་བའི་རྒྱ་ལ་ཚུད༔ སྡུད་པ་ལས༔ འགྲོ་བ་འཁྲུལ་པ་རི་དྭགས་རྒྱར་ཚུད་འདྲར་ཤེས་ནས༔ ཤེས་རབ་ལྡན་པ་མཁའ་ལ་བྱ་བཞིན་རྣམ་པར་རྒྱུ༔ ས་མ་ཡ༔ རྒྱ་རྒྱ་རྒྱ༔ ད་ནི་རིགས་དྲུག་ལམ་དགག་ཕྱིར༔ གོང་གི་རིགས་དྲུག་ཡུལ་སྣང་དྲུག༔ དེ་དག་དྲུག་པོ་ཤར་བ་འདིས༔ ཡི་དམ་ཞི་ཁྲོ་གང་རུང་གཅིག༔ འདུན་པ་རྩེ་གཅིག་གཏད་གྱུར་ན༔ དེ་ཡི་བྱིན་རླབས་དྲག་པོ་ཡིས༔ ལས་དང་ལྡན་པ་ཉིད་དུ་སྐྱེ༔ ཡང་གཅིག་དཀོན་མཆོག་གསུམ་པོ་ལ༔ སྐྱབས་འགྲོ་མོས་གུས་དྲག་པོ་བྱ༔ རྩེ་གཅིག་དཀོན་མཆོག་གསུམ་དྲན་ནས༔ དེ་ཡི་བྱིན་རླབས་དྲག་པོ་ཡིས༔ དལ་འབྱོར་མི་ལུས་གཙང་མ་ཐོབ༔ བླ་མ་དམ་པ་རྣམས་དང་མཇལ༔ ཉམས་སུ་བླངས་ནས་སངས་རྒྱའོ༔

བག་ཆགས་ལས་ངན་སྡིག་ཅན་རྣམས༔ ཆོས་ཉིད་བར་དོར་ཁ་འཁྱམས་ནས༔ རིགས་དྲུག་སྣང་ལུགས་སྣ་ཚོགས་འཆར༔ ཡིད་དུ་མི་འོང་མངལ་དུ་འཇུག༔ ཤིན་ཏུ་ལས་ངན་ཆེ་བ་ལ༔ ཤི་མ་ཐག་ཏུ་དམྱལ་བ་ཉིད༔ དགེ་སྡིག་རྡེལ་བུ་འགྲིམ་པ་ལ༔ ལྷ་དང་བདུད་གཉིས་འཐེན་རེས་བྱེད༔ ཤགས་འདེབས་བདེན་རྫུན་མ་ཕྱེད་ནས༔ གཤིན་རྗེ་ཆོས་ཀྱི་རྒྱལ་པོ་ཡིས༔ ལས་ཀྱི་མེ་ལོང་བསྟན་པ་དང་༔ དགེ་སྡུག་ཐམས་ཅད་ས་ལེར་གསལ༔ དེ་ནས་ལྷ་དེ་སྐྱེངས་བ་དང་༔ རང་བཞིན་མཁའ་ལ་ཡལ་ཏེ་སོང་༔ བདུད་དེ་རྒྱལ་ནས་ལེགས་པར་བཟུང་༔ ཐོ་བ་ཅན་གྱིས་རྒྱབ་ནས་བཅོམ༔ ལྕགས་ཀྱུས་སྙིང་བཟུང་ཞགས་པས་ཁྲིད༔ ཚ་གྲང་སྡུག་བསྔལ་བསམ་ལས་འདས༔ དེ་ལས་ཐུགས་རྗེས་སྐྱོབ་པ་དཀའ༔ ཀློང་ཆེན་ཡངས་པའི་སྲོག་གི་ཡང་བཅུད་ལས༔ སྲིད་པ་བར་དོའི་གྲོལ་འཁྲུལ་རྫོགས་སོ༔ རྒྱ་རྒྱ་རྒྱ༔ བར་དོ་བཞི་ཡི་འཆར་ཚུལ་ངོ་སྤྲད་པ་ཡང་དག་པ༔ ཨ་ཏི་བཀོད་པ་ཆེན་པོ༔ རྡོ་རྗེ་འཆང་གི་དགོངས་པ་དགའ་རབ་རྡོ་རྗེའི་གསུང་༔ ཤྲཱི་སེང་ཧའི་ཞལ་གདམས༔ པད་འབྱུང་ང་ཡིས་དོན་རྣམས་བསྡུས་པ༔ རྒྱ་བོད་གཉིས་ན་མེད་པའི་གདམས་པའོ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ དམ་རྒྱ༔ ཨེ་མ་ཧོ༔ ཇོ་སྲས་རྡོ་རྗེ་གླིང་པ་ངས ༔ ཐེག་མཆོག་ཀློང་ཆེན་ཆོས་སྐོར་རྣམས༔ གནམ་ལྕགས་བྲག་ནས་རྒྱ་བཀྲོལ་ནས༔ བུ་སློབ་དོན་དུ་པཎྚི་ཏའི༔ ཡིག་རིས་མི་གཅིག་གསུམ་ལས་ཕབ༔ དར་ཞིང་རྒྱས་པར་གཏེར་སྲུང་རྣམས༔ ཁ་ཐཾ༔ རྫོགས་སོ༔ རྒྱལ་སྲས་རྡོ་རྗེ་གླིང་པས་གཏེར་ནས་བཏོན་པའོ༔ བཀྲ་ཤིས་པར་གྱུར་ཅིག༔