བར་དོ་མུན་སེལ་སྒྲོན་མེ།
སྙིང་ཐིག་ལས་བར་དོ་མུན་སེལ་སྒྲོན་མེ་བཞུགས་སོ༔
ཨཐྎ དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ༔ རྣལ་འབྱོར་པ་གང་ཞིག་ཚེ་འདིར་གཡེང་བས་ཁྱེར་ནས༔ སྙིང་ཐིག་འདི་ཉམས་སུ་མ་ལོན་ན་བར་དོ་སྐད་ཅིག་མའི་ཤེས་པ་ངོས་བཟུང་སྟེ༔ སངས་རྒྱས་པའི་ཐབས་འདི་ལ་གསུམ་སྟེ༔ དང་པོ་རང་བཞིན་གནས་པའི་བར་དོ་ངོ་སྤྲད་པ་དང་༔ སྐྱེ་ཤི་བར་དོ་ལ་ཉམས་སུ་བླངས་ཤིང་འདྲིས་པར་བྱ་བ་དང་༔ སྲིད་པའི་བར་དོ་ངོས་ཟིན་ན་འབྲས་བུ་ཐོབ་ཚུལ་བསྟན་པའོ༔
དང་པོ་ནི་ཡེ་གདོད་མ་ནས་རང་རིག་ཡེ་ཤེས་ལྔ་ལྡན་ལྷུན་གྲུབ་ཏུ་གནས་ཏེ༔ རྒྱུད་ཀློང་གསལ་ལས༔ ཐོག་མ་ཐ་མ་མེད་དུས་ནས༔ རང་ལ་རང་ཆས་གནས་པའི་ཕྱིར༔ ཅེས་སོ༔ དེ་ལ་དཔེ་དོན་རྟགས་གསུམ་གྱིས་ངོ་སྤྲད་དེ༔ དཔེ་ནི་རྡོ་རྗེ་སེམས་དཔའི་སྐུ་ཚབ་མན་ཤེལ་དྭངས་པ་གཅིག་ལ་དབང་པོ་གཏད་པས༔ ཤེལ་དེ་དག་པ་གསལ་བ་བཟུང་དུ་མེད་པ་རྟོག་པ་མེད་ཅིང་༔ མ་འགག་པ༔ འོད་ལྔ་ཕྲ་ལ་གསལ་ལ་འཚེར་བ༔ རང་བཞིན་གྱིས་བཀྲག་ལ་ཉམ་ང་བ༔ ཝལ་ལེ་ཁྱུག་གེ་བ་འདི་དཔེར་བྱས་ན་( ནས་)དོན་རང་ཐོག་ཏུ་ངོ་སྤྲད་པ་ནི༔ གོང་གི་དཔེ་བཞིན་དུ༔ རང་རིག་ཡེ་ཤེས་ལྔ་ལྡན་དེ་ཡང་གོང་དང་འདྲ་བར༔ གསལ་ལ་དྭངས་པ་ཡེ་ཤེས་ལྔའི་ངོ་བོ་འོད་ལྔའི་རང་བཞིན༔ འཛིན་མེད་དུ་ཝལ་ལེ་ས་ལེ་བ་འདི༔ ཙིཏྟ་རིན་པོ་ཆེ་གུར་ཕུབ་པའི་ནང་དུ་གནས་པའི་ཚུལ་གྱིས་གནས་ཏེ༔ རྒྱུད་ལས་མཁའ་དང་འཇའ་ཚོན་གྱི་ཚུལ་དུ་གནས་སོ༔ དེ་ཉིད་གསུམ་པ་རྟགས་ཀྱིས་ངོ་སྤྲད་པ་ནི༔ རྐྱེན་རྡོ་རྗེ་སེམས་དཔའི་སྐུ་ཚབ་ལ་དབང་པོ་གཏད་ནས་བལྟས་པས༔ འོད་དང་ཟེར་ཀྱི་ཚུལ་དུ་གནས་ཞིང་སྤྲིན་བྲལ་གྱི་མཁའ་ལ་གཏད་པས་རང་རིག་ཡེ་ཤེས་ལྔའི་གསལ་མདངས༔ མ་འགགས་པར་སྐུ་དང་ཚོམ་བུའི་རྣམ་པ་དབང་པོས་དངོས་སུ་མཐོང་བ་འདི་ཁོ་ནའོ༔ དེ་ནི་ཆོས་སྐུ་ཡིན་པས་རང་རིག་ཡེ་ནས་རང་ལ་གནས་པའི་བརྡའོ༔ དེ་ལྟར་རང་བཞིན་གནས་པའི་བར་དོ་དཔེ་དོན་རྟགས་གསུམ་གྱིས་ངོ་སྤྲད་ནས༔ གཉིས་པ་སྐྱེ་ཤིའི་བར་དོར་ཉམས་སུ་བླང་པའི་ཐབས་བསྟན་པ་ནི༔ ཉིན་མོ་སྒྱུ་མའི་འདུན་པས་བར་དོ་སྦྱངས་པ་དང་༔ མཚན་མོ་འོད་གསལ་གྱི་བར་དོ་སྦྱངས་ལ༔ གནས་སྐབས་སུ་སྒྲ་འོད་ཟེར་ལ་སྦྱངས་ཏེ༔ དང་པོ་ནི་ཉིན་པར་ས་མཐོ་ཞིང་ཐམས་ཅད་གསལ་བར་ཕྱིན་ལ༔ ཕྱི་སྣོད་ནང་བཅུད་རི་དང་རི་ཕྲན་རྩི་ཤིང་ནགས་ཚལ་གནམ་ས་ཉི་ཟླ་མི་དང་དུད་འགྲོ་ཁ་དོག་སྣ་ཚོགས༔ ཡུལ་ཁམས་དང་སྐད་རིགས་དགའ་དང་མི་དགའ་༔ ང་སྣང་སྲིད་ཐམས་ཅད་དོན་ལ་མ་གྲུབ༔ རང་རིག་འཛིན་རྟོག་སེམས་ཀྱི་ཆོ་འཕྲུལ་ཡིན༔ མི་བདེན་བཞིན་དུ་སྣང་བ་སྒྱུ་མ་ཡིན༔ སྔར་བྱུང་བ་ནི་མི་རྟག་མི་བདེན༔ ཕྱིས་འབྱུང་བ་ནི་མི་རྟག་མི་བདེན༔ ད་ལྟ་ཡང་རང་སྣང་འཁྲུལ་བའི་བློས་བཅོས་པ་མིན་པར་དོན་ལ་མེད་བློས་ཐག་རྦད་ཀྱིས་བཅད་པ་བློ་ཐག་ཆོད་ཆོད་དུ་སྦྱངས༔ དེ་ལྟར་རྩེ་གཅིག་ཏུ་བསྒོམ་པས་རང་ཡང་ཡོད་སྙམ་མི་བྱེད་པར་དྲན་མེད་དུ་འཁྱམས་འགྲོ་རྒྱུན་འབྱུང་སྟེ༔ དེ་ནས་གདམས་པའི་སྟོབས་ལ་བསྟེན་ནས༔ ཆོས་ཉིད་དང་སྲིད་པའི་བར་དོ་ལ་ཡང་གང་ཤར་ཐམས་ཅད་མི་བདེན་སྒྱུ་མར་ཤེས་པས༔ དུས་དེར་སངས་རྒྱས་པར་འགྱུར་རོ༔ མཚན་མོ་འོད་གསལ་སྦྱངས་པ་ནི་རང་གི་ཐུགས་ཀར་དཀྱིལ་དུ་བླ་མ་སྐུ་མདོག་ཤེལ་ལྟ་བུ་གཅིག་བསྒོམ༔ དེའི་ཐུགས་ནས་འོད་འཕྲོས་པས༔ སྣོད་བཅུད་སྣང་སྲིད་ཐམས་ཅད་བླ་མའི་རང་བཞིན་དུ་གྱུར༔ གཉིད་དུ་འགྲོ་ཁར་འོད་ཀྱིས་སྣང་སྲིད་བླ་མའི་རང་བཞིན་དུ་ཚུར་འདུས་ཏེ་ཐུགས་ཀའི་བླ་མ་ལ་ཐིམ་པས༔ སྣང་སྲིད་བླ་མའི་རང་བཞིན་ལས་གཞི་ཅི་ཡང་མི་དམིགས་པའི་ངང་ནས༔ སྙིང་གའི་བླ་མའི་འོད་ཟེར་གྱིས་འཇིག་རྟེན་གྱི་ཁམས་ཐམས་ཅད་དཀར་མེར་གྱིས་ཡོད་པ་ལ་རྩེ་གཅིག་ཏུ་གཏད་ནས་གཉིད་ལོག་པས་འོད་གསལ་དུ་འགྲོ་ཞིང ༔ རྨི་ལམ་དུའང་གོང་གི་རྨི་ལམ་དུ་དམིགས་པ་ལ་གཅིག་ཏུ་འཇུག་པ་ལ་སློབ་བོ༔ དེས་ཉིན་མཚན་གྱི་འཁྲུལ་པ་ཆོད་དོ༔
བར་དོར་ཁྱུང་ཕྲུག་སྒོང་རྒྱ་དང་བྲལ་བ་ལྟར་གྲོལ་ལོ༔ གནས་སྐབས་སུ་ཤེལ་ལ་སྦྱངས་ཏེ་སུཪྱའི་མར་མེ་ལ་སྦྱང་མན་ཤེལ་ལ་དབང་པོ་གཏད་པས་འོད་ཁ་དོག་མ་འདྲེས་པར་གསལ༔ མདོངས་ཀྱི་འོད་དེ་ལ་འདྲེས་པར་བྱས་པས༔ ཆོས་ཉིད་ཀྱི་བར་དོ་རང་རིག་ཡེ་ཤེས་རང་འོད་དེ་ཁོ་ན་ལྟར་དེར་གནས་ཤིང༔ མཚང་གོ་བས་གྲོལ་བར་འགྱུར་རོ༔ ཡང་གནས་སྐབས་སུ་སྒྲ་ལ་སྦྱང་སྟེ༔ རང་དབེན་པར་སོང་ལ༔ ཧ་ཧ་ཧི་ཧི་དང་ངུ་བ་དང༔ རྒོད་པ་སོད་རྒྱོབ་སྣ་ཚོགས་སུ་བརྗོད་ལ༔ རྗེས་སུ་དེ་རྣམས་ཀྱང་རང་གི་བློའི་འཛིན་པ་དོན་སྟོང་པའི་རང་སྒྲ༔ བདེན་མེད་སྐྱེ་མེད་དུ་དོན་ལ་མ་གྲུབ་པར་ཐག་རྦད་ཀྱིས་བཅད་ཅིང༔ རང་གི་ཤེས་རྒྱུད་ལ་བཀལ་ཞིང་བལྟའོ༔ དེ་ལྟར་འདྲིས་པས་བདེན་མེད་གཏན་མེད་དུ་འགྲོ་ཞིང༔ དེ་ལྟར་འཆི་ཁའི་བར་དུ་ཉམས་སུ་བླངས་པས༔ བར་དོར་སྔར་འདྲིས་ཀྱི་མི་དང་འཕྲད་པ་བཞིན་དུ༔ སྐད་ཅིག་མ་ལ་རང་རིག་གི་རྩལ་ཡིན་པར་མཚང་རིག་ནས༔ དུས་དེར་གྲོལ་བར་ཐེ་ཚོམ་མེད་དོ་ས་མ་ཡ༔ རྒྱ༔ དོན་གསུམ་པ་བར་དོར་འབྲས་བུ་ཐོབ་ཚུལ་བསྟན་པ་ཡིན༔ རྣལ་འབྱོར་པ་ལུས་རྒྱ་དང་བྲལ་ནས་འཆར་བ་ཡིན་ཅིང༔ དེ་ལ་ཕྱི་དབུགས་ཆད་དེ་ནང་དབུགས་མ་ཆད་པའི་བར་དེར༔ རྡོ་རྗེ་སེམས་དཔའི་གསང་ལམ་ཞེས་པ་རང་གི་མིག་གཉིས་ནས་འོད་ཟེར་ཀ་བ་ལྟ་བུའམ༔ དུང་གི་ཐག་པ་ལྟ་བུ་གཅིག་ཟང་ཐལ་ལེ་བ་ལ་རིག་པ་རྩེ་གཅིག་ཏུ༔ ཨ་ཕ་ད་འཆི་བར་འདུག་པས༔ རྡོ་རྗེ་སེམས་དཔའི་སྣ་ཐག་ཏུ་བྱུང་བས་ངོ་ཤེས་ཤིང་རྩེ་གཅིག་ཏུ་གཏད་པའི་འདུན་པ་དྲག་པོས་ཡར་གྱི་ཟང་ཐལ་ལ་རང་རིག་རྩེ་གཅིག་ཏུ་གཏད་པས༔ སྐད་ཅིག་ལ་གྲོལ་ཏེ་བར་དོ་མེད་པར་སངས་རྒྱས་པར་གདོན་མི་ཟ་སྟེ་ངོ་མཚར་ཆེའོ༔ ས་མ་ཡ༔ རྒྱ༔
དེ་ནས་ཆོས་ཉིད་ཀྱི་བར་དོ་ནི༔ ལུས་རྒྱ་གྲོལ་བའི་གནད་ཀྱིས་ཤེས་པ་གསལ་ཞིང༔ ཡེ་ཤེས་འོད་ལྔ་ཁ་དོག་གསལ་བ་ཕྲ་བ༔ འཕྲིགས་པས་གསལ་ལ་འཚེར་བ༔ ཉམས་ང་བ༔ ཐང་ཆེན་པོ་ལ་སོས་ཀའི་སྨིག་རྒྱུ་བ་ལྟར་དུ༔ ཞིང་ཁམས་ཐམས་ཅད་ཁེངས་པ༔ འོད་ཀྱི་རྩེ་མཚོན་ཆའི་རྣམ་པར་བྱུང་ནས༔ རང་ལ་གཏད་པ་དང༔ མདོར་ན་ཉམས་ང་བ་འཇིགས་པ་དང༔ སྐྱེ་བ་དང་སྣང་བ་འཕྱོ་བ་དང༔ དྲན་པ་རང་ལ་རང་དབང་མི་ཐོབ་པ་དང༔ ཆོས་ཀྱི་རང་སྒྲས་ཡང་རྒྱོབ་སོད་དང༔ སྣ་ཚོགས་སུ་སྟོང་གསུམ་འུར་སྒྲ་དང་བཅས་པ༔ བསྲན་མི་བཟོད་པ་འབྱུང་བས་དེ་རྣམས་ལ་རང་སྣང་འཁྲུལ་པར་ཤེས་པས་མི་སྐྲག༔ མི་སྔངས་བར་ཆོས་ཉིད་ཀྱི་རང་འོད་དང་རང་སྒྲར་ཤེས་པར་བྱའོ༔ དེ་ལྟར་སྣ་ཚོགས་སུ་གསལ་བས་དེ་ལ་དེར་འཛིན་གྱི་ཤེས་པ་མི་གཞུག་པར་རང་སྣང་འཁྲུལ་པར་ཐག་རྦད་ཀྱིས་བཅད་ལ༔ སྐད་ཅིག་མ་དེ་ལ་གྲོལ་བར་འགྱུར་བས་ན༔ ད་ལྟ་ནས་ཉིན་ནུབ་ཀྱི་དྲན་འཛིན༔ རྡོ་རྗེ་སེམས་དཔའི་སྐུ་ཚབ་དང་༔ ཟེར་གཉིས་ལ་འདྲེས་པར་བྱེད་པ་གནད་ཡིན་ནོ༔ ས་མ་ཡཱ་རྒྱ༔ དེ་ལྟར་ཉམས་སུ་བླངས་པས་འབྲས་བུ་ཐོབ་ཚུལ་ནི༔ སྒྲ་འོད་ཟེར་གསུམ་འོད་ལྔའི་རང་བཞིན་དེ་ལ་དེར་གསལ་དེ་ལ་དེར་འཛིན་གྱི་ཤེས་པས་མ་ཞུག་ན་ཆོས་སྐུ་མངོན་དུ་གྱུར་པ་ཡིན་ནོ༔ འོད་ལྔ་དེ་རང་སྣང་དུ་ཤེས་ཤིང་ཞེན་འཛིན་མེད་ན་ལོངས་སྐུ་ཐོབ་པ་ཡིན་ནོ༔ དེ་ཡང་མཐིང་ག་མཐོང་ཚེ་འདི་ཁོ་ན་རང་རིག་སྟོང་པ་ཆེན་པོ་མེ་ལོང་ལྟ་བུའི་ཡེ་ཤེས་ཡིན་པར་ཤེས་ཤིང༔ དེ་ལ་མ་ཞེན་པར་རྡོ་རྗེ་སེམས་དཔའ་འཁོར་བཅས་འགྲུབ་ཅིང༔ ཞིང་ཡང་ཤར་ཕྱོགས་མངོན་པར་དགའ་བའི་ཞིང་དུ་བུདྡྷའོ༔ དེ་བཞིན་དུ་འོད་དཀར་པོ་མཐོང་ཚེ་འདི་ཀ་རང་རིག་པའི་ངོ་བོ་ཆོས་དབྱིངས་ཡིན་པར་ཤེས་པས༔ རྣམ་སྣང་འཁོར་བཅས་གྲུབ་ཅིང༔ མཐའ་དབུས་མེད་པའི་ཞིང་དུ་བུདྡྷའོ༔ དེ་བཞིན་དུ་འོད་སེར་པོ་མཐོང་ཚེ་མཉམ་ཉིད་ཡེ་ཤེས་ཡིན་པར་ཤེས་པས༔ རིན་འབྱུང་འཁོར་བཅས་གྲུབ་ཅིང༔ དཔལ་དང་ལྡན་པར་བུདྡྷའོ༔ འོད་དམར་པོ་མཐོང་ཚེ་སོར་རྟོག་ཡེ་ཤེས་ཡིན་པར་ཤེས་པས༔ སྣང་བ་མཐའ་ཡས་འཁོར་བཅས་གྲུབ་ཅིང༔ ནུབ་བདེ་བ་ཆེན་པོར་བུ དྡྷའོ༔ འོད་ལྗང་གུ་མཐོང་ཚེ་བྱ་གྲུབ་ཡེ་ཤེས་ཡིན་པས༔ དོན་གྲུབ་འཁོར་བཅས་འགྲུབ་ཅིང་བྱང་ལས་རབ་རོལ་པར་བུདྡྷའོ༔ སངས་རྒྱས་པར་འགྱུར་རོ༔ ས་མ་ཡཱ༔ རྒྱ༔
དེ་དག་ཀྱང་དོན་ལ་ལོག་ནས་རྙེད་ཅིང་འགྲུབ་པ་ནི་མ་ཡིན་ཏེ༔ རང་ལ་གནས་ཤིང་རང་ཐོག་བབ་པས་ན༔ རྒྱུད་ལས༔ རང་ལས་རྙེད་པའི་འབྲས་བུ་ནི༔ ཐོག་མ་ཐ་མ་མེད་དུས་ནས༔ རང་ལ་རང་ཆས་ཡོད་པའི་ཕྱིར༔ རང་ངོ་ཤེས་ཤིང་རྟོགས་པས་ཆོག༔ རྨི་ལམ་སད་པའི་དུས་བཞིན་ནོ༔ ཅེས་གསུངས་སོ༔ དེ་ནས་རང་རིག་གཅིག་པུའི་རྩ་བ་ཆོད་པས༔ སྣང་སྲིད་འཁོར་འདས་ཀྱི་ཆོས་ཐམས་ཅད་སྐད་ཅིག་ཏུ་གྲོལ་བར་འགྱུར་རོ༔ ས་མ་ཡ་རྒྱ༔
ཨེ་མ་བདག་འདྲ་པདྨ་འབྱུང་གནས་ཀྱིས༔ དམ་ཆོས་ཀློང་གསལ་སྙིང་ཐིག་ལས༔ གཏེར་ཆོས་འདི་སྤྱོད་ལས་ཅན་ལ༔ ཞལ་ཐེམ་བཤད་ཀྱིས་འདི་ལྟར་སྤྱོད༔ བླ་མ་སངས་རྒྱས་བལྟ་ཞིང་བསྒྲུབ་ལ་བརྩོན༔ མོས་གུས་ཐང་ལྷོད་མེད་ཅིང་ཞབས་ཏོག་བསྒྲུབ༔ ཉམས་ལེན་མནའ་རྒྱ་ནུས་ལ་ཆོས་འདི་སྦྱིན༔ རང་ཉམས་མ་ལོན་གཞན་ལ་དཔེ་རྒྱ་སྡོམ༔ དེ་ལྟར་མ་ཡིན་སྣོད་ངན་སློབ་མ་སྤོངས༔ མུ་སྟེགས་ལོག་པར་ལྟ་ལ་ཆོས་འདི་སྦོས༔ བླ་མ་ཟོལ་འགྲོགས་མཁན་ལ་ཆོས་མི་བསྟན༔ ནོར་བུ་འདམ་གཡོག་མཁན་ལ་ཆོས་འདི་སྦོས༔ ཉན་ཐོས་ཁྲིིམས་བཅིངས་བ་ལ་འདི་མི་བསྟན༔ སྟོན་པ་ཚིག་ཕྱིར་འབྲང་ལ་ཆོས་འདི་སྦོས༔ དད་པ་འདུན་པ་མེད་ལ་ཆོས་མི་བསྟན༔ ཁ་གསག་སྟོང་ཞུས་མཁན་ལ་ཆོས་འདི་སྦོས༔ ནམ་མཁའ་ཡར་ཆོད་མཁན་ལ་ཆོས་མི་བསྟན༔ དྲེད་པོ་ཁ་ཆོས་མཁན་ལ་ཆོས་འདི་སྦོས༔ བབ་ཆོས་གསང་སྒོ་འཆོལ་ལ་ཆོས་མ་བསྟན༔ མ་གོ་འཆད་རིངས་པོ་ལ་ཆོས་འདི་སྦོས༔ མདོ་མེད་རྟོག་འདོད་མཁན་ལ་ཆོས་མི་བསྟན༔ ཉམས་ལེན་ཕྱི་དུས་མཁན་ལ་ཆོས་འདི་སྦོས༔ གདམས་པའི་བཀའ་རྒྱ་འདི་དང་མ་ལྡན་ན༔ སྤྲེལ་ལག་མེ་སྒྲོན་བསྐུར་བས་རང་གཞན་ཕུང༔ དེ་ཕྱིར་པད་འབྱུང་སྙིང་ཉེའི་གསུང་ཡིན་པས༔ ཤ་ཚའི་གསང་གཏམ་སྙིང་ལ་བཅང་བར་གྱིས་ཤིག༔ ཆོས་འདི་མཁའ་འགྲོའི་སྙིང་པོ་ཟབ་གཏེར་ཡིན༔ ལན་ཅིག་བཀའ་ཤོག་མཐོང་ངམ་འཆང་ཡང་རུང༔ ཨོ་རྒྱན་བདག་དང་འབྲེལ་ལྡན་ཐུགས་སྲས་ཡིན༔ ཉམས་སུ་ལེན་རྣམས་ལོ་དྲུག་སངས་རྒྱས་འགྲུབ༔ ལུང་ཐོབ་ཙམ་གྱིས་བདེ་ཆེན་ཞིང་དུ་བསྒྲོད༔ བསླུས་ན་པད་འབྱུང་ཞན་ནོ་རྗེས་འཇུག་རྣམས་༔ སྐལ་ལྡན་ལས་ཅན་གཅིག་དང་འདི་འཕྲད་ནས༔ སྐལ་ལྡན་དེ་དང་འབྲེལ་ཚད་དོན་ལྡན་ཡོང༔ རྡོ་དང་ནོར་བུ་ངོ་ཤེས་ཉུང་བར་ངེས༔ མིང་ཅན་ཁྱོད་དང་འདི་འཕྲད་ཤོག༔ སྨོན་ལམ་བཙན་པས་ཁྱོད་ལ་གཏད་དོ༔ ཟབ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ མཎྚ་གྷུ་ཧྱ༔ ཨེ་མ་འདི་འདྲའི་མན་ངག་གཏེར་ནས་བཏོན༔ སྣོད་ལྡན་འདྲ་བ་ཅི་ཡོད་དམ༔ འགྲོ་དོན་རྒྱ་ཆེན་སྨོན་ལམ་འཚལ༔ མངྒ་ལམ།། །།